رواية احفاد السيد : الثار ( بأجزائها الإثنين ) الفصل الرابع والعشرون 24 - بقلم ​رُقَـيَّـةُ الْأَكْـبَـرُ

الكــاتبـة ⇦ رِقيــة الـأكبر ⇨

بقلـمها روايـــة ↲ أحــفاد السيد : الثــأر ↳

الـــبارت 40

__ ثقل ميزانــك بذكــر الله

_ سبحان الله
_ الحــمد لله بعد
_ لا اله الا الله
_ الله وأكـــبر
_ لا حول ولا قوة الا باالله
_ سُبحان الله العضيم
_ سُبحان الله وبحمدة
_ أستغفر الله واتوب اليه
_ اللهم صل على محمد وال محمد

__ يآ دنِيا كثرِي ترِاب وبرِوحي طمَي
شنوَ المࢦذه البيَج مَن راحَت طفلــة اختـي

━━━━━━━━━ ✧ ━━━━━━━━━

""" رحــمة الزهراء """

كعدت على صوت الاذان مثل مجنت متعودة كمت وصليت الفجر فبعدها شفت مابيها نوم كمت من السجادة وطلعت من الغرفـة و زُبيــر جان نايم .
صعدت نزلت بدلة دوامـة من المشر وكعدت بصالة كويتها ورتبتها واجيت بخرتها .
ورحت للمطبخ سويت أكلــة ( الريــوك ) ولمن صارت الساعة 32 : 5 ص
رحت ودخلت الغرفة وصرت احاول اكعدة .
وعلى ما كعد وكام غسل وسبــح واجاني كعد كدامي
اردفت ..

_ اصبلـك جاي ؟

_ صبــي ..

_ ما تريد تداوم شبيك مالك خلك ؟!

_ ماعرف راسي احسنة راح ينفجر .

_ بيك شـي ؟ منين تحس بالوجع ؟

_ مناا

_ اهاا هذا صداع عادي حكوم اسويلك كهوة تصحصح بيها بدل الجاي ..

فتــح تلفـــونة يشتغل بي واني كمت هدرت ماي وسويت له كوب كهوة .
ورجعت انطيتـة الة وصار يتريك ويكلب بالتلفون ..
واردفت وياة ..

_ عوف التلفون وركز باكلك مراح يطير هذا

_ جاي اشوف اخر الاخبار

_ عوفه زبير اخر الاخبار تلكاهم على مكتبك ..

_ هاي امس اهلج حارين تلفوني اتصالات شكو ؟؟

بقيت صافنة بوجهة مصدومة اهلليي ؟؟؟ اردف

_ ايي اهلج هاج احسبي علي السجاد متصل ثلاث مرات
حامد المتقين مرة وحدة
علي الباقر 7 مرات واخر اتصال قبل 5ساعات
عبد الحسن اتصالين ..

شنو القيامة قامت عند اهلج .. ؟؟

ضليت حايرة شسوي لا انا العندي تلفون واتصل ولا هذا اليقبل اطلع سحبت التلفون من ايدة و اخذت اتصـل على علـي الباقر .
وبعد ما رد عليــة .. جان صوتــة جهوري حززينن حيل نقبظ كلبي من سمعتة هيج ..
وما كالـي شي بس

_ هااا ابا الحسن خرعتوني صاير الكم شي ؟؟

علي الباقر :: تعاي للمستشفى

_ شصااير

_ بس تعاي الحگي علينا بالمستشفى

_ جاية جاية

سديت التلفون وما لفظ زبير وياي شي لمن شاف تعابير رجهي فهم كلشي طلع لبرة شغل سيارتة وانا صعدت اركض لبسست روحيي بالكوة
وحجابي مدري شلون والعباية حط حطيتها على راسي ونزلت صعدت السيارة و طلعنة الهم ..

""" أنــمــار """

طلعــت من البيــت ورة طلعــة غديرتي بكذا ساعة
ورحت لشغل ولان انا سبــق الي وجنت ممداوم يومين
وجان حتمياً الشغل لراسي غركت بي صرت بس اريدة يخلص ..
ضليت اشتغل وما كعدت ولا دقيـقة لحد ما شفت كلشي خلص وانتهى كلشي على اكمل وجه

بَ 57: 12 م

اردفت وي نفـسي اكيد هسة اغديرتي راجعـة البيت شنو ليش متصلت ولمن ردت اشوف تلفوتي اكتشفت ان تلفوني اصلا مو يمي .!!!
رحت لفوك ادور علية لكيت روحي شامرة بالمكتب .
فتحتة حتـى اتصل على مرتي .
لكيتها دازتلي رسالة قبل 16 دقيقة
فتحت الرسالة ولمن قريت محتوها !!!

شعور لا يوصف ابد

يعنــي مرتي جانت محتاجة للمساعدة وقبل 16 دقيـقة عَجل هسسة اشنو صاير بيهااا ؟؟؟

صارت عيوني تطاير بالشرار حرفيا صرت احس جسمي صار يذب نار من كد ما خفت والرهبة اتملكت جسمي
طلعت مزرعد لسيارة فتحت الموقع مال تلفوني وصرت اتبع موقع تلفون غدير الله ولمن تحدد عندي صرت امشي على سرعة 220 التاير صار يجدح بالكاع من كد ما يفتر ..

اتخبلت حيل تصركعت من القريتة ما ضل عقل براسي
الله شاهد
واول ما وصلت شفت الما. اريد اشوفة لمحت من بعيد شي اسود واكع على الارض لمن نزلت السيارة وركضت ناحة لكيتها اهي غدير الله واكعة والدم ترس الكاع منها

جانت صاحية حطيت ايدي جوة راسها ولمن باوعت علية اغمي عليها لاحضت لمن غمضت عيونها شلتها وركضت بيها لسيارة وجنت طول الطريق احاول احجي وياها واحرك بيها خاطر تكعد مجنت اريدها تفقد الوعي ابد

ولاحضت الخنجر المغروس ابداخلها والنقش الجاي عليــة ولمن ردت اطلعة خفت لان جان حيل مغروس تركتة لدكتورة هي تعرف شغلها

واول ما وصلت للمستشفى نزلت غديرتي ودخلت اصيح اتلكوني الممرضات وجابولي السدية حطيت غديرة عليها واخذوها لطوارئ
واول ما دخلت الدكتورة وشافت حالتها حولتها للعمليات فوراً ..

بقيت افتر بالممر واني محتار شسوي ما بين متأكد الي ورة هلحادث ابوي لان الخنجر الي دخل ببطن مرتي وهي شايلة ابني هذا خجنر اخوي بندر ..
النقش مالتة مو غريب ابد وهوة الوحيد اليسوي خناجرة اهيج ..

وما بين افكر انا ما ضريتة بشي بالعكس انا سكتت خاطر هو ميأذي غدير اكيد ابوي مو غبي لهدرجة ويستضعفني هلكد ويلف حبل المشنقة على ارقبتة ..

ضليت افكر فكرة تجيبني وفكرة توديني وكعدت ادعي .
ايي ادعي لاول مرة بكل حياتي جانت هاي ادعي
وحتى مجنت اعرف شلون بس حاولت ارفع ايدي واناجي ربي .

جنت متأكد مليار بالمية الي ابطنها طفلنا خلاصص ماات
بس مجنت اريدها تروح ..
خسرت ابني ماريد اخسرها
هية مو بس مرتي هي جانت الروح الي جانت دنيتـي كلها عرضتني عن فقدان امي حيل

خسرت امي واجتني غدير الله عوض مابية اخسرها هي الثانية بعد ضربتين على الراس توجع وتذبح هم ..

رجعت وثبتت يم باب العمليات وطلعت الدكتور تريد متبرع لدم لان خسرت دمها كلة
وجانت تريد اقل شي اقل شي 20 بطل دم !!
من زمرة دم A+ جنت انا اكدر اتبرع بس جنت اكدر انطي اقل شي واحد هذا المقدار الي يكدر يتبرع بية الشخص ميكدر يتبرع باكثر من هيج

رحت لدكتورة واتبرعت ب 2 وردت الثالث لكن
اردفت وياي بهجة ┛ لاا ميصير جسمك مراح يتحمل ويمكن تخسر صحتك ميصير تتبرع اكثر من هيج┏

جنت مستعد اخسر صحتي بس ما اخسر غديرتي
انكطعت بية السبل ما ضل كدامي الا اتصل بأهلها لان هي من دمهم ..
اخذت تلفوني واتصلت على علي السجاد واول ما رفع الخط ..

علـي السجاد :: هلاا بالنسيب ..

_ شلونك ابو التقي ؟

_ خيرك خوية شمالة صوتك ؟؟ صايرلك شي

_ غدير الله

_ شنييي غيمة شمالها ؟؟ الووو انمااارر تسمعني رد علية غديرة شمالهااا اختييي ؟؟

_ غيـمة سوت حادث وهسة هية بالمستشفى محتاجة دم A+ اتبرعت انا الها ب 2 وبعدنا محتاجين 18 بطل اقل شي لان هواي خسرت دم

_ ثواني ونصير يمك دزلي اسم المستشفى

_ تمام ان شاءالله..

سديت التلفون وضليت اتاني .
وهية ربع ساعة او اكثر ما انتبهت للوقت بس بعده
دخل علي السجاد والعائلة الكريمة كلها وراحو يتبرعون لان دمهم يطابق دم غدير الله كلهم .
وبقى عبد الحسن يمي لان بية سَكرِ وميكدر يتبرع ..

وبعد ما اتبرعو وصل المجموع 19 واحد بس ومنكدر يتبرعون اكثر من هيج !!! ومحتاجين واحد بس .
وصدمتنا الدكتورة لمن كالت

╮ ترى نحن محتاجين اكثر بس كتلكم محتاجين اقل شي 20 مكدر هسة اتقبل 19 ميكفي البنت جسمها خالي من الدم ويمكن نخسرها حاولو تدبروها بأسرع وقت . ╭

كلهم اتبرعو ومنكدر بعد ضل املنا ب رحمـة الزهراء ولمن اتصلنا عليها طلع جهازها مغلق .
اخذنا نتصـل على زُبيــر وجان ما يرد يرن تلفونة بس ما يشيلة ..

ضلينة نفرك بأدينة محتارين شنو نسوي والمن ننطي الوجه.

لمن رفع تلفونة عبد الحسن. واخذ زواية يحجي بالتلفون. ورجع يمنا . وبعد نص ساعة هيج تقريبا
لاحضنا جية علي الباقر و المعتز باالله و اصفاد الحق و صيوان دخلو عليــنة وبدون ميحجون شي ويانة اتوجهو وراحو اتبرعو ..
وصار عندنا 26 بطل دم اخذتهم الدكتورة وبلشت العملية ..

وعبد الحسن بهاي الاثناء طلب من الكل يرحون ويفرغون المستشفى ويطمنهم من خلال الاتصال
ولان رفضو من ضمنهم العلوية ابت تروح وتعوف بتها
فقد اعصابة عبد الحسن صارت شوي هوسة ابيناتهم بس انحلت لمن السادة اداركت الموقف واخذت العلوية والعلويات وطلعوا بقى يمي فقط عبد الحسن و علي السجاد و علي الباقر .

ضلينا كل واحد ماخذ زواية وننتضر فرج الله
وانا الجنت ما فاك حلكي ب ولا كلمة وياهم بالعكس جنت بس خانك روحي وابجي عيوني ما وكفن ولا دقيقة بذرف الدمع لجل غاليتي الجانت جوة ومدري شني حالها ..

لمن اجة علية علي الباقر و سحبني من ايدي وطلعني من المستشفى كعدنا كدامها على الرصيف وجابلي ماي بارد وعصير وقدمة الي بعد ما كعد يمي و ربت على كتفي ..

علـي الباقـر :: هاك اشرب وريح صدرك ..

_ هسة انت ما خايف على غدير الله ؟

_ ههههه انت تحجي وكأن غدير شخص عادي بالنسبة الي تراك جاي تحجي عن قطعة من روحي هايي بنتي مو اختي شلوون يعني مخايف عليها ..

_ مادري والله استغربتك و شفتك حيل هادئ وحتى ما سألت شنو صار وياها وليش اهي اهناية

_ ماكو فايدة من العصبية ولا فايدة من السؤال الي اعرفة وواثق هسة ان غدير الله حالياً بيد رب رحيم هوة الجاي يعالجها مو الدكتورة وحتى لو سامح الله واخذها
مابيدنا شي .

_ امووت ورااهاا والله اذبح روحي وروحة لامي

_ اششش لا تحجي هيجي أنمار تريد تخسر دنياك واخرتك تكتل روحك وتروح لجهنم شمالك ما قاري بالقران أيــة ²⁴ من سورة البقرة .
⊂ انها نار جهنم التي وقودها الناس والحجارة ⊃
انت رجال مسلم شيعي حرام تفكر هيج ولو بس تفكير حررام وعييب عليك

_ عَجل علي الباقر تريد مني اتحمل اغيابها ؟!
شلون اصبر على فقدانها وعلي اموتن وراها ادوهن وراهاا انا عصرية مكدر افاركها مو تريد ما شوفها ابد وعلي اذبح روحيي على تابوتها ..

_ اسمع ترى حتى نحن مو هين علينا ابد قسم باالله كسرة ما بعدها كسرة بس نخلي قول الامام علي بمسامعنا دوم لمن گال ( عليـة السلام )
⇦ الحمد الله الذي يغسل ذنوب شيعتنا ويطهرها بالحوادث المؤلمة ⇨

خلينا دائم نكرر هذا القول ونكول بعدها
لا حول لي و لا قوة لي الا بك يا حي يا قيوم
ترى الله ما خلقنا حتى ينسانا ولا خلقنا حتى يعذبنا ويخلينا نعيش هاي الصايب ترى ربي جاي يختبر مدى حبنا الة راح نخسر النحبة بس راح نححمدة على الصار ما نلومة .. هيج الرب يريدنا نصبر وهمم
هوة اقرب النا من حبل الوريد جرب تندعي ومراح يردك لو جانت اذنوبك بحمل الجبال .

_ ... ... ... ...... ...

اتلعثمت كلماتي وي صدى كلمات علي الباقر .
جنت احرك بشفتي وانا اريد الكلمة تطلع مني لارد علية مكدرت اجاوب الايمان المكبوت بداخل هذا السيد
لهذا مطلع شي وياي فا التزمت السكوت

رغم هو يحب غدير الله اكثر من روحة ولو نجمع حب العلوية وحب عبد الحسن وحبي وحب العائلة كلها لغديرة
راح يصير ذرة بالبحر جدام حب علي الباقر لـ غدير الله
وجنت اكدر اقرأ الخوف بعينـة الها وحسيت بغصاتة الجانت مخلوطة وي صوتـة الجهوري الحزين

بس يمكن قرر ما ينطي لأبليس مجال ويستضعفة بهاي نقطة الضعف والثغرة الصارت عندة ويكعد يعاتب رب العالمين ليش هيج صار باختة ..
لذالك خط للإيمان خط عريض كدامة .

بدون ما ارد علية عفتة وكمت دخلت المستشفى وتركت علي الباقر على موضعة ..

""" علــي البــاقــِر """

كلامي وي انمار لأهدي اعصابة ورة ما شفتة شلون يرجف وعيونة صاير لونهن احمر من الدموع والحركة
هنا بس عرفت ان غــيــمة عرفت تختار صــح
عرفت تختار الرجال الي يذرف الدموع لجلها وكدام الكل بدون لا يخشى ينكال اله انت رجال عيب تبجي
او ميصير تبجي على بنية وانت زلمة .
بعد هذا الموقف الي شفتة كبر هواي بعيني بس هذا مو يعني ان انا رتاحيت ناحة لا بس شفت حبة الجبير لغدير الله ..

دخلت المستشفى وضليت اتمشى بالممرر وانا راسي رافعة لفوك واتمتم .

_ يا حميد بحق محمد ويا عالي بحق علي ويا فاطر بحق فاطِمة ويا محسن بحق الحسن ويا قديم الاحسان بحق الحُسين
فرج عنا يا الله فرجا عاجلا بحقهم
سلمت اختي بين ايدين رحمتك وانت ارحم الراحمين

هنا بس وتذكرت نحن بشهر المحرم الحرام
والــيوم بس هو يوم السابع من محرم يوم البطل الصيهود ابا الفضل العباس .
وحاشى للعباس يرد شخص اجاه متوسل بالحسين .

بقيت شوي بعيد عنهم وكعدت اتمتم وي روحي ..

_ صل الله عليك يا سيدي و يا مولاي يا ابن رسول الله
صل الله عليك يا سيدي و يا مولاي يا ابا عبد الله و على آلك المنتجبين الغر الميامين
يا رحمـة الله الواسعـة و يا باب النجاة الأمــة
ما خاب من تمسـك بيكم و آمن من لجأ اليــكم
يا ليــت كنت معكم سادتي فنفوز فوز عظيماً

جانت عيوني غدير الله واذا راحت غدير الله هاي هية السيد علي الباقر تروح عيونة ..

اخخ يا دنيييا شنو سويتي أثر لخواني ما خليتـي ..

بعد ما قرئت السلام للامام الحسين بنية التقرب للأمام العباس
صرت اردد هذا الاية من سورة النمل قرئتها خمس مرات

￤ آمن يجيب المضطر اذا دعاه ويكشف السوء ￤

زفرت النفس وبقيت ايدي على صدري
ما نزلتها جنت يمكن متأكد مقدار 5% غدير متطلع منها
بس لمن طلعت الدكتورة
بقيت واكف بمكاني و ابوي و علي السجاد و انمار
راحــو الها وسألوها

دارت الفكرة براسي أتقدمت بـخطوات جامــدة و ثكيــلة من ثكــل الفكــرة الجـــانت تــدور بــيـة صــرت عنــهم مسافــة مو بعيــدة وأسمــع همســاات كلمــاتهـم
الــي اخترقــت جــدار صــدري وكــطعت وتيــن قلبــي

أنــمــار :: بشريــني هاا دكتورة شنوو صاار ؟؟

عبد الحسن :: دكتورة شنو بنتي جوة شلونها

_ اولاً : عظم الله اجركم بالطفلة الجانت حامل بيها البنت

أنمــار :: انعللل ابو الطفلـــة دكتـــورررة مررتيييي شلونهاا مررتي خرة على الطفلة خيولي بس مررتي

_ صلــو على النبي واتهدو بالله عليكم البنت تعبت وياها
علمود اخلي جسمها يستقبل الدم وحالياً حالتها مستقرة بس فاقدة الوعي لازم تبقى تحت المراقبة لمن تصحى خاف يصير عليها مضاعفات او شي .

علي السجاد :: بالله عليج دكتورة ماكو شي

_ ماكو شي ينضــم اذا اكو جان كتلكم .

أنمار :: نكدر نشوفها هسة ندخل عليها ؟

_ تكدرون بس مراح تستفادون شي لان المريضة لهسة فاقدة الوعي وما تحس بلي يمها .

عبد الحسن :: حتـى لو ندخل نشوفها ونطمن .

_ ادخلو لكن رجاءاً لا تجبروني اطلب منكم تطلعون التزمو الهدوء المريضة حيل بحاجة لراحة وللهدوء ماريد ازعاج ..

علي السجاد :: لا توصين دكتورة بعيوننا ..

عافو الدكتورة ودخلو للغرفـة واتقــدمت الدكتورة لتروح
بس لمن شافتني وكفت يمي واردفت وياي ..

_ أنتَ أشنو تقرب المريضة ؟

ما رفعت عيني الها ضليت اباوع للكدامي واردفت رد عليها ..

_ انا اخوها الكبير .

_ ممكن تتفضل وياي اريد احجي وياك بموضوع يخص المريضة ..

_ تفضلي دكتورة .

راحت كدامي وانا مشيت لكن خطواتي تتلعث لا يطلع صاير بَ غدير الله شي و هاي ما كدرت تحجي كدام اهلي كلبـي انقبض بحيث من الخوف الحسيت بي

لا اردياً قريت سورة الفاتحة مرتين وسورة الكوثر ثلاث مرات وهديت ثوابهن لأم البنين

دخلت للغرفـة وانا دخلت وراها كعدت على ورة المكتب مالتها وجانت لازمة تقارير غدير الله بأيدها
اشرتلي اكعد . كعدت كدامها واردفت ..

_ دكتورة احجي اختـي بيها شي ؟

_ صار شي انا اتجاهلت احجي بي كدام اهلك لان شفتهم شلون زوجها وابوها منفعلين خفت لا ازيدها عليهم لذالك طلبت منك تجي لان شفتك ساكت وملتزم بمكانك لان لازم واحد بيكم يعرف على الاقل

_ و أم البنين نشف دمي وتجمد دكتورة شنـي اختـي شمالها ؟

_ اثر الحادث الي صار وياها السجينة الي دخلت ابطنها جانت داخلة بقوة حيل واخترقت جدار الرحم وسببت تشوه بجدار الرحم

_ يعنـــي ؟؟

_ يعنــي اختك من المستحيل بعد تصير ام وتحبل ..

بقيت صافن ومصدوم للأسمعة ليش هيجج صاار توها جانت منتضرة تجيب طفلها هسة اصلن مراح تصير ام اووفف ياا الله
كملت كلامي وي الدكتورة ب سؤال

_ زين دكتورة علاج شي كلشي ميفيد يعني ؟؟

_ وي حالت اختك للأسف لا لان صار تهشم لجدار الرحم واي علاج ميفيد بعد لكن اكو طريقة ثانية تكدر من خلالها تصير ام ..

_ طفل انابيب ؟؟؟

دنكت تضحك ورجعت عاينت لي واردفت

_ صدك تحجي اكلك تهشم بالرحم وتكلي طفل انبوب ترى اختك ماعدها حاليا رحم يحوي الجنين زوجها ماابي شي خاطر تسوي طفل انبوب

_ جا دكتورة شنيي الطريقة للحمل اذاا مو طفل انابيب

_ عمليـة تأجير الرحم ..

ضليت صاافن عليــها شني هاي اول مرة اسمع بيها
رفعت حاجبي وهية تفهمتني ما فهمت اردفت وياي

_ اعرف استغربت باع هاي العملية ما تصير هواي بس هية الشي الوحيد اليناسب حالت اخيتك ..

_ وشلون هاي تصير ؟

_ لازم تلكون بنت او مرة تقبل تأجر رحمها وتأجير الرحم يعني المرة تشيل طفل اختك تسع الشهور وتولدة وتنطي لاختك وتاخذ اجرها

_ وشلون ابن اختي يتحول لبطن المرة ؟

_ هنا راح يبدي شغلنا ناخذ عينـة من زوج اختك وعينة من اختك وندخلها لرحم المرة يعني كلشي منهم المرة مجرد حلقة وصل يتم الاخصاب بداخلها بالرحم مالتها ويتكون جنين بداخلها ابوة نسيبك وامة اختك

_ الله كريم لهذا دكتورة هسة اختي ماعليها شي ؟

_ ماعليه شي حالياً ..

_ تمام اكدر اروح ؟

_ تفضل ..

تركــت المستشفى ورجعت للبيت بعد ما اتصلت علية رحمة الزهراء وكالتلي راح تجي انطيت خبر لابوي رجعت واني مثكول الحال ومهوم ومهضوم كلهن عليـة
الخبر جان صاعقة ووكعت علية شنو صار وي غديرتي
هية سوت الاكو والماكو خاطر بس تكدر تحبل وتشيل هلطفل هاذا شلون هسة اذا عرفت ماكو اي مجال تخلف بي
ولا طريقة تخليها تحس بالامومة سواء تأجير الرحم
وهاي العملية اضن بيها محرمات مدري كلبي مرتاح الها
ماعرف ما مستطرق لهاي العملية .

اول ما دخلت البيت لكيت طيبـات بالحديقة تسگي الورد ما شايفها من مهد العرس
وكفت بمكاني وبقيت اباوع الها وحيلي مهدود
اول منتبهت عليـة اجتني بلهــفة واردفت وياي

طيبــة الزهراء :: الســلام عليــكم سيد

_ وعليـكم السلام والرحمــة مولاتي

_ الحمدالله على سلامتك نورت بيتك واخيرا ما بغيت تجي وترجع لهنا وتكحل اعيوننا بشوفتك .

_ الله يسلمج

_ امبين عليك التعب فوت ارتاح

_ هوة هيج فمان الله

_ برعاية الله ..

تركت طيبـة واني اصلا ما مباوع لها جنت احجي وياها واني اباوع للكدامي ما حطيت عيني بعينها ولا وجهي بوجها اول مدخلت لصالة اتلكتني العلوية حضنتني بعدها
اتلكتني اريج الله كذالك حضنتني وكعدت بنصهم ..

العلوية :: يمة سيد الف الف الحمدالله لربي على سلامتك يا بعد اميمتك ..

_ الله يسلمج يمة

أريج الله ;; حيل اشتاقيت الك حبيبي ابوي

_ انا حيل اشتاقيت الكم بس جنت اتمنى ارجع بضرف احسن من هيج

علـي الهادي :: اكعد انت هسسة ارتااح لون وجهك رايح
بنـــانــة اكمززي بسساع جيبي مااي ..

ام البنين :: تدللون

كامت أم البنين تجيب ماي الي وكعدت بنصهم ضيعت ام رحمة الزهراء مرة عمي وسألت عليها من بعد
ما اردفت ليــنا بالسلام عليــة

لــينــا :: شلونك علـي الباقــر ؟!

_ بخــيير الحمــدالله

لــينــا :: الحمدالله على سلامتك نورت البيت

_ اءءءء چاا عمتــي وينــها ؟؟!

ضحكت اريج الله واردفت وياي بعد ما حطت حنجها على متني وهمست بأذني ..

أريـج الله :: عمتـك اول ما شافت المعتز باالله جدامها ضمتة لصدرها وصعدت بي هسة مخليتة بحضنها ونايمة

_ احسن شي يسوي انا هم محتاج حضن العلوية ونومة طويلة .

العلوية :: حضن العلوية و روحها الكم يانور عيوني انتم

علي الهادي :: شنــي علي الباقر ؟

_ شنــي ؟

أم البنين :: تفضل خوية

_ بعد نحري يبعد اخيج مشكورة رحم الله والديج

علي الهادي :: وضعك مو تمام شمالك ترى ابوي اتصل وطمنـة على غيمــة شنـي صاير الها شي ضماه عليــنة ؟؟

بقيت صافن بوجهة شلون افاتحهم بالمووضوع واكللهم الي صاير ب اختي غدير الله حتى ابوي ما يعرف بي
شربت الكلاص كلة واردفت

العلوية ;: الف عافية يبعد ارويحتي ..

_ يعافيج . مابية شي بس حيل تعبان هناك مو نايم زين وخلصنا رجعت هاي بوجهي للمستشفئ ما رتاحيت ولا دقيقة

العلوية :: اصعد يمــة وروح لحجرتك ارتاح ونام

أريج الله :: ترى انا منضفة غرفتك ومرتبتها اصعد ونام اطبك يومين سوة محد يكعدك ..

_ الساعة ابيش هسة ؟

العلوية :: الساعة 45: 6 م ب9 يجون النسوان اليوم عدنا الحچة مال الامام العباس

_ خووش هداي ساعتين وكعدني ..

علي الهادي :: صصار تدلل

_ تضل يمكم العافية صاعد انام شوي

تركتهم وصعدت وصعد وراي علي الهادي وانا بالممرر كضني من ايدي وحط ايدي علئ راسة واردف وياي

علـي الهادي :: ايدك على راسي ومحلفك بروحي ومحلفك بداعت جدنا رسول الله تسولفلي شنو بيك
خوية اعرفنة هاي الحيرة البوچهك مو تعب ولا من قلة النوم انت اخوي وانا اعرفك اكثر من اي واحد لا تعلمني بيك فَ سولفلي هسة شنو بيك ؟

وخرت ايدي من راسة ومسحت لحيتي ورفعت راسي الة واردفت وياه واني ايدي على كتفــة ..

_ علي الهادي يا هادي يا حنين ادري بيك تحس بية وعرفت ان انا بية شي واصلا هذا الحمل لوحدي مو كادر علية بس مو هسة ثق بية راح احجيلك وكلشي بس هسة اريد ارتاح وانام ساعتين لان مجاي اشوف الجدامي
ولاتنسى اليوم مواكب الامام العباس لازم نطلع الهن نروح للهيئة خليــني انام ومن اكعد واشوف نفسي وقت احجيلك راح احجي الك كلشي ..

ضل صافن علية واني جنت بس اريد اقنعة حتى يرتاح اخوي علي الهادي واعرفنة اذا حط شي براسة يضل وراه لهذا مردتة يضل يفكر بية .
لمن شفت ماكو جواب هزيت راسي وياه بِ هااا
ابتسم واردفت وياي ..

علـي الهـادي :: هااي ههي خووش روحح وارتاح هسة ومن تكعد يصير الحچي المعدل ..

_ هاي ههي تاج راسي الي تريدة

_ نازل انا فمان الله ..

تركنــي علــي الهـادي ونزل الهم اردود واني كملت طريقي لغرفتي واستوقفني صوت طفل يبجــي !!!
وكفت وصرت امسح بوجهي و بعيوني فكرت هذا تخيل مني بس استمر الصوت يرن بأذني اتقدمت وصرت امشي اتجاها ولكيــتة جاي من غرفة علي السجاد .
فتحت الباب ودخلــت وتركتة مفتوح وراي اصلا ما رديتــة ..

لكيــت ثلاث كواريك اتقربت منهن ولكيت كل واحد بيهن طفل وكل واحد بيهن ورقـة مكتوب عليهن ايات من القران للحفظ
ولاحضت الكماط مكتوب علية اسم الطفل

قريت اسم الطفل الاول جان مكتوب على الكماط أسم
السيد ' علـي التقي '
والثاني مكتوب على الكماط ماله حفيدة الزهراء
' نور الزهراء '
والثالث مكتوب على اكماطة
السيد ' علي النقي '

نسسيتت همي بشوفتهم وضحككت وابتهجت والفرحــة غمررت روحيي وصدري
عرفت هذول الاطفال هم اولاد علـي السجاد هههه
أجو لدنيا ونوروها وأخيـــراً بعد طول انتضــار

وانا جنت امشي ايدي عليهم واقرأ حجاب الامام الهادي عليهم
اجاني صوت من ظهري اردف ..

لــينا ;; ما خلوك ترتااح من صوتهم موو !! مستعجلين يردوك بسرعة تتعرف عليهم ويتعرفون على عمهم اللطيف ههههههه

التفت الها وحتى بدون ما ابتسم وياها لفضت ..

_ أشكد اعمارهــم ؟؟

اتقربت منـي ابتعدت لصفحة. وهيـة شالت واحد من الاطفال ووكفت كدامي اردود ..

ليـــنــا :: عمــرهم شهر. و اسبوع . هااك حاب تشيل ولي عهد اخوك ؟ هذا الجبير علي التقي

ابتعدت عنها واردفت ..

_ لااا ماريد اشيلـــة ..

رفعت حاجبها وياي وردت علية بأبتسامة مسمومة

ليــنا :: افف ليشش هيج تكترت !!! ترى ابن اخوك طفل ميخوف وحاب عمة يشيلة لأول مرة .

رفعت عيني الها واردفت وياها ..

_ مو قصــة خايف منة بس لأن حيل تعبان رايح انا انام وعود من اكعد يدللون بحضني ربي يخليهم ويحرسهم الكم ..

ليـــنا :: بالوقت التريدة تعال واللعب وياهم . ربي يحفضك ويحرسك .

تركتها وطلعت رحت لغرفتــي وطبيت وانا التعــب متـبدي عليــة نزعت اهدومي ودخلت سبحت ولمن طلعت نصييت السبلت
و وكفت على المراية و لاحضت شي مختلف بغرفتي
لمن ركزت حيل عرفت اكو صورة مشيولة من مكانها
وهي صورتي وي طيبات وقت جان عمرها 5 سنوات
انا سحبتها وحطيتها بأطار وجنت مخليها على الميز
يم الجرباية بس لكيتها مموجودة استغرربت ححيلل

ضليت اصييح لأريج الله وبعد ما دخلت عليــة للغرفة اردفت ..

أريـج الله :: خييـر اسم الله منـو گــرصــك ؟؟

_ منــو فايت لغرفتــي غيــرج ؟

_ محد اناا دخللـت نضفتـــها وطلعــت

_ أريــجـة صــورة ماهييــة جانت هنااك

_ أهاا صورتــك انت وطيبات ؟

_ اييي حاطــها هنااك ويننهاا ؟

_ طيبات اخذتها

_ شنــيي طيـباات اخذتــها ؟؟

_ جنــت انضف وهية دخلت تساعدني ولمن شافتها اخذتها وطلعت بيها

_ شلوون تاخذها وهي مالتـي ؟

_ ماعرف ذيج طيبات وروح اسالها هسة انت حاارك دمك علمود صوورة مطايرة البنت روح الها وسألها علمود الصورة واخذها منها

_ خووشش

_ اصيحها الك هسة ؟

_ هسسـة لااا اريد انام رراح الوقت وبعدين انا من اتفرغ اروح الها واخذها

_ براحتك ححبيبي محتاج شي بويــة ؟

_ لا يبعد ابوج روحــي وارتاحي يصمام كلبـي

_ تصبح عَ خير

_ انتِ اصل الخير ..

طلعـت أريج الله وتركتنـي ولمن ردت انام اتذكرت انا تعبان وخفت لا تاخذني النومة ويجون النسوان ومكدر انزل ..يعـني تاليــتي انحصر اهنانة
خليت غرفتـي ونزلت للبراني
فتحت الباب دخلت وسديتة وراي
لان حتـى اذا اجن النسوان واني كعدت اطلع براحتي
سحبت المخدة ومديت طولي وسمعت طكطكة اعضام ظهري ياابوي منهد حيلي وعلي

صرت اباوع لسگف واني افكر بعدها سرحت عن دنيتي كلها خليــتها بظهري ميشوم اليفكر بدنياه

صرت استذكر المصيبـة الي حلت بهاذا الشهــر الحرام !

صرت اتذكر واقعة الطف ولان جان اليوم محدد لسيدي ومولاي ابا الفضل العباس
اخذت اقرة وي نفسي ..

_ طگــها الشمــر بالســوط ويسسب ابوها
شيسوي لون موچود عبــاس اخوها ؟؟

رجعت استذكر علاقة ابا الفضل باختة العقيلة وشلون جان يعاملها وشلون جانت مدللة ابين عباس وحسين !
ياالله يا مصيبـة كربلاء
الطاقــة الي لازم تكون عندنا لنتحمل هاي الفاجعة لازم تفوق كلشي ..
بقيت اردد وي نفسي اشعار اموت عليهن لمولاي ..

_ نبـع للخوة أبو فاضل و وصلها
اعتنـى المشرعـة بزود و وصلها
زينـب والحـرم محد وصلها
بس طاح الولي راحت سبيــة !!

رجع عقلي ياخذني للموقف الي اتخذتة جدتي زينب الحوراء رغم المناضر الشافتها موت اخوانها ودوست الخيل وحرك الخيام واليتامى
وقالت ( ما رئيت أالا جميلاً )
اتخذت موقف امام منضر قوي بحزنة لكن صبرها كان اقوة وصارت هي الاعلام الحر بعد مقتل الحُسين ( عَ )
أمرأة زينب لكن أي امرأة ...

_ سالفـة زينب جبيرة شلـون شالتها الهزل
و سالفـة اتجـتفـت ايديها و مشبـچـة بذاك الحبل
و هيـة بنت منــو ؟ ياهــو أبــوها ؟!
ليــش جدام الميسوة الشمر يشتمها ؟
وهيـة اخت منــو ؟ ياهوو اخوها ؟؟
ذاك ابو عين الحارة وجفوف السخيـة
الما يرد منــة واحد عدل
اااييي يا جدتــي اايي يا زينـــب
وحك خدرج وحك كل رفــة عباية
مو سبايا من مشيتو انتِ گدتيهم سبايا ..

انزاحــت كُل هموم مشكلــتي المتعلقــة ب غديـر الله
ابمجرد استذكرت هموم واقعــة الطف الاليــمة

بعدها بلا شعور ولا وعي غمضت عيوني وغفيت من التعب الجان متكدس بداخلــي ..

واول مكعدت على صوت الملايــة وهي تنعى اخذت تلفونــي واتصلــت على اريج الله بس مجانت تشيلة
ولان ادري ب طيبـة الزهراء ما يطيح تلفونها من ايدها

اتصلت عليــة وجاوبــتنــي ...

طيبــة الزهراء :: هلا علـي الباقـر ..

_هلا بيج عيوني .

_ ااكو شي بيك شي ؟

_ انا بالبراني واريد اطلع بس اصعدي لغرفتي جيبي دشداشة واحزام ..

_ تمام دقايق وانا يمــك ..

_ انتضرج ..

سديت التلفون وكمت اصحصح وانفتح الباب ودخلت طيبات ورة دقائق مو هواي .
حطت الدشداشة والحزام على المخدة .
وانطتني كاسـة ماي واردفت وياي .

_ تفضــل !

_ زاد فضلج

_ جوعان اسويلك عشة ؟

_ لا هسة اطلع من برة اكل وين تسويلي بهاي الهوسة

_ لا عادي اكدر اسوي

_ لاا ينحري مااريد ..

_ تمــام براحتك انا فايتـةة لجوة

التفت لتروح ناديت عليها رجعت وباوعت الي ..

_ طيباتِ .

_ عيونــي

_ ليش ماخذة الصورة من الغرفـة مالتــي ؟

ابتسمت ودنكت ولاحضت ان ابتسامتها ابتسامة حزن
سكتت لدقائق وبعدها رفعت راسها وحطت عينها بعيني لمدة ثلاث ثواني وباوعت لسگف واردفت ..

_ ماكــو الها داعِ تحط صورتـي بغرفتك و انت عايف مرتك وابنك لوحدههــم ..

بقيــت صافن عليه وادارك الي سمعتــة ياا الله شنوو طيبات من رههف ؟؟؟
معقوول عرفت انا متزووجج لو هاي مقلب وجاي تشاقى واني اخذتها بجدية لان انا صدك متزوج ؟
اول ما ردت اردف رفعت ايدها بوجهي ✋ بعنى لا تحجي شي واردفت وياي ...

_ كتلــك سابقا الــآمان الي شعرت بي وانا يمك مجنت احسة بس يم ابوي وكتلك انت اغلى من ابن عم
وانت جنت وياي بكل خطوة بس مالهاا داعي تضم موضوع زواجك تكدر تكول وتحجي ماعرف ليش مسوي روحك هلكد صعب .
متريد احد يدخل بحياتك ولا تريد مساعدة من احد
ترى الانسان مو دوم قوي ومو دوم يكدر يتحمل كلشي لوحدة ..
علـي الباقر انت متحبنيي ولا مقدار ذرة .
لو تحبني صددك جان على الاقل احترمت حبك الي واعترفت بزواجك وخلينة بالعنة الي تلعنة. نتقبلة ما نتقبلة بس انت لاا كلعادة اختاريت طريق الاسرار ..
بكييفففك سويي اليعجبك واتزوج وطلك وخلف والي تريدة حياتك واللعب بيها شلونن ما تبغى
بسسس خليــك بعيد عنـي
حتـى لو حتاجيييتك لا توكف وياي لان مستحيل اتقبل احد جان يباوع بعيني ويجذذب ..

خلصت كلامها وتركتني وطلعت ..
شنو هاي المصايب الكاعد تتحذف علية من كل صوب
منين ما ادير وجهي مصيبة وسالفة يا محمد
كمت لبست واني اول مرة. احس احد يهز بية شعرة. وهيج كلامة يضل يتردد بمسامعي .
اتصل عليـة حامِد المتقين يكلي راح يروح لبيت سراج
اجلت الموضوع وكتلة لصبح حتى نروح انا وياه

وطلعت من البيت رحت الساحة للمواكب .
ولكيت ابوي و صيوان واكفين هناك ..

"" المـعتـز باالله ""

كعدت ب 9 من حضن امي كمت
واتوجهت لبست بنطروني الاسود و قميص الاسود
واخذت الجراوية وطلعت من البيت ركض لان شفت النسوان بدت تجي اصلا طلعت من الباب الخلفي الي بلمطبخ ..
وقبل لا اطلع لكيــت وهج الطف بالمطبخ تحضر كاسات الماي .
رحت وضربتها على علباتها التفت الي مفزوزة وانا اضحك .. واردفت وياي ..

وهـج الطــف :: شلـــونك الحمدالله على سلامتك ؟

_ الله يسلمج يقلبـي انا بخير دامج بخير ..

_ عساك دوم

_ امبين مشتاقتلي وتفكرين بيه هواي !!

_ ليش حسيت هيج ؟

_ امبين من اعيونج السهرانات من التفكير بية صايرة جنج مكبسلة هههههههه

_ لا ما بية شي بس صحيح يمكن لان تعبانة هااي الفترة ف صايرة هيج عيوني .

_ شيي اكيد لان تتعبين وتلعبين هواي بتلفون صايرة هيج خو مطلعين صدك مكبسلة حتى

_ حتــى شنو ؟؟

_ اطفـي شمعــة شبابـــچ بيـــدي وعلي الفحل

_ وانت تتخيل انا اسويها

_ غصبا عليك متسويها انا زلمة ممفكر مو ادور انت بنت

_ زين زين لا تعصب ونحن بس جاي نحجي

_ يلا انا طالع محتاجـة شي ؟

_ تجي لهنا لو تنام برة

_ لا ارجع بس انام بالبراني اليوم

_ يعني راح تفوت من الباب الخلفي تبع البراني ؟

_ ايي ليش اكو شي ؟

_ لااا بس هيج اسأل .

_ اذا صحت الي فرصة اتصل عليج تطلعيلي حيل مشتاق لسوالفج

_ تدلل ..

_ يلا بالج لروحج ححبيبي

_ الله وياك

التفت حتـى اروح حطيت ايدي على السرگي ورجعت انداريت الها واردفت وياها

_ وهج الطف ..

_ عيــوني ؟

_ سالماات

_ شنــو گول محتاج شي ؟

_ انتبهي لنفســج يروحيي

_ هههههه ترى ابيت اهلي شنتبه على نفسي اكثر من هيج ؟

_ هيـة جمــلة وحدة انطيها الج واطلع فكري بيها زين ودوريها براسج خووش

_ شنو هَن ؟

_ خليج بعيدة عن ليـــنا

ضلت تعاين لي . عفتها وطلعت وانا ضربت بالجراوية على رچلي ..
فريت لشارع الامامي ورحت للكراج صعدت سيارتيي بعد غيياب ..

ركبت بيها وفتحت تلفوني الاصلي لاول مرة بعد شهر
ولكيت جماعتي المتصلة عليـة ومنهن جرح
متصلــة عليــة 76 مرة !!
ورسايلها اليي على الواتساب عبرت الــ 219

دخلت للمراسلـة گالبـة الدنيا عليية ..
قريتهن ونسييت ارد لان وانا بالمحادثـة مشيت على الطريق العام وقفلت التلفون وحطيته بجيبي واني كل راسي اني رديت عليها ..

ولمن وصلت الساحة لكيتهم مسوين المواكب وريحــة الچاي على الحطب .
تدك باليافووخ

رحــت لموكبنـا لكيتــة معجوج بالبس حك التشابيه
ويختارون ممثلين وكفت اباب الخيــمة ونطيتهم ضهري و وجهي جان لشارع اباوع واتأمل باصحاب الزناچيل

والنسوان الي متتاحچة وي الزلم علمود تشوف المواكب متعووفون الزلم بحالهم كلشي مدخلين روحهن استغفر الله ..

بقيت اباوع واني لعبـانة روحيي

وآجاني الصوت من ورة من الخيمــة يصيح ..

_ السيد المعتز باالله ..

التفتت لصوت واردفت ب نعم
اجاني قاسم ووكف كدامي وصار يباوع لجسمي وكال

_ اييي كللششش ضابط

_ ضابط استخبارات هاهاهاها

_ متضحك ..

_ وعساسس انا اريد اضحكك خيير شنيي الضابط ؟

_ عزوز تمثــل دور علـي الاكبر بس هذا بقى عدنا ما حصلنا له وانت كعدت على هلدور علـي الاكبر جان ضعيف وطويل و عمرة بالعشرينات .. هااا تسوي

_ يمعوودد دروح عني شوفلك غير واحد ويني انا وين اخذ دور

_ معتز باااع الهوسة ما ضل واحد ما جربناه هسة انت سيد واكيد راح تضبط الدور وهي كلشي ماكو بس تلبس اللبس و نغطي وجهك ..

_ لاااا

_ معتز راح تمثثــل الدور لا اصيح لعمي السيد عبد الحسن يتصرف وياك

_ تهدد ولك ؟؟

_ ما اهدد بس حس بية ياااخي من الصبح مكسور ضهري وحيلي مهدود اعدل بخياطة هلملابس وهسة حضرتك متفخفخ تكلي ماريد لا غصبا عليك تريد ..

_ باع قاسم اذا ما جفيت شري ورحت ما اضمن الك شنو يصير ..

_ شيصير يعنيي شيصير ؟

_ شتررييدد منييي

_ تمثثل دور علي الاكبر ترى ازعل منك ولا تحاجيني بعد

_ لا اله الا الله

_ شكلـــت ؟

_ بششرط

_ خدمة الحسين مابيها شروط ..

_ ههههههههه قااســم

_ شكـــلت . ؟

_ هاايي ههيي عمي انا اكدرلك بس ما اشوف اللبس هسة خلي لباجر لأي يوم واذا صرعت راسي بهاذا الموال روح دورلك غير واحد

_ لا هاي هية رحم الله امك وابوك ..

عافني ورجع دخل للخيمة يسوي ولاحضت عمي عبد الحسن وي صيوان و علي الباقر .
رحت ووكفت يمهم وسمعت الكلام الجان يدور ابين عمي وصيوان ..

صيوان :: كل الناس الي انطيتنا اسماءهم مالهم ايد بالجثة الي لكيناها بالارض ..

عبد الحسن ;; شلون تتأكدون من هلشي ؟

علي الباقر :: الطب الشرعي أكد النا ان الرجال ميت على اثر 17 طعنـة بالجسد واتوفى قبل لا نلكي الجثة ونخبر عنها ب 10 ساعات يعنيي لحضة وقوع الجريمة صارت باليلة الفاتت ما بين الساعة 12 الصبح و 1 الصبح لان نحن لكيناها الساعة بالتسعة الصبح ..

صيوان :; وكل الي انت ذكرت اسماءهم انطونا حجة غياب كلش قوية بهاذا الوقت بالتحديد

عبد الحسن :: ما اصدك لو شيسوون زين و سائد ؟

علي الباقر ;; هذاا بذذات اقوة حجة

_ وشنيي حچـتــة ؟

صيوان :: سائد جبران جان يم بناتة بذاك اليوم بمحافضة الانبار وهوة جان رايح قبلها بأسبوع لان بنتـة اجوان تمرضت ..

_ سائـد هذا واحد شيطان اخذوها مني مستحيييل يسوي شي بيدة يكدر يكون بأماكن متفرقة بنفس الوقت من خلال الزلم مالتة ما يسوي شي بيدة ..

علي الباقر :: راح نبقى ورة القصة ولا بد يعثر اذا طلع هو صدك. ورة هذا السالفة

جنت انا مجرد مستمــع الهم ..
لحد ما عمـي طلع خنجر وخلا كدامنــة ..
واردف ..

عبد الحسن :: هذا الخنجر الي انترك ابطن بنتي وانا ادرري وواثق اتقصدو يتركونة حتى يعلمون علية .

صيوان :: دقيقة عميي شو انطيني

_ شنــي ؟؟

اخذ صيوان الخنجر من ايد عمي وصار يتمعن بي
وراح فتح تلفونة وطلع صورة لنفس الخنجر .
وصار يباوع النا واردف ..

علي الباقر :: شبيــك ؟؟

صيــوان :: نفسس الزلمة يعني متقصدنا

المعتز باالله :: شنو نفس الزلمة

صيوان :: شوفو هاي الصورة بيها الخجنر الي انا طلعتة من صدر الرجال ذاك اليوم وشوفو الخنجر الي انغرز ابطن غدير ..

علي الباقر :: نفس النقش .

المعتز باالله :: يعنـي الي كتل الرجال والي استفرد ب غدير الله نفس الشخص ..

صيوان ;; الله ينور عليك عزوز صحيح هذا اكبر دليل انة تقصد بالحالتين يترك الخنجر .

عبد الحسن ;; يمكـن يكون الزلم مالتـة تشغتل هيج وهوة كاعد ومترخي .

علي الباقر :: هم صح يمكن هيج ..

صيوان :: المهم هسة نحن عرفنا ان القذر الجاي يلعب بينا هاي اللعبة الوسخـة هوة رجال واحد ..

عبد الحسن :: غريمـي واحد وراح الكي ..

المعتز باالله :: ونحــن ويــاك ..

صيوان :: راح اراجع اصناع هذا الخناجر واشوف ..

علي الباقر :: ايي عفيـة لان امبين الخنجر تصميم خاص من هذا النقش الي على الخنجرين موجود وهذا اكبر دليل انهن يرجعن لنفس الشخص الــــ Ba _ sa

عبد الحسن :: لاززمم نلكي هذذاا بسرعة لان هسسة استوقى اول شي كتل بكاعنا وشافنة سكتنا راح واستفرد باختكم حتى يستضعفكم ويخليكم تفقدون اعصابكم وبدمها يريد يلطخكم كلكم لهذا ما مستعد اخلي يتقوة بالغدر على شي واحد بيكم ..

صيـوان :: لا تفكــر بيـة عمي وعلي الا ماخلي ليلة تمر عليـه بسلام ..

_ عندي الثقــة بيكــم ..

علي الباقر :: انا رايح هسة ..

_ وين ؟

علي الباقر :: حييـل تعبان والله هيج اجيت علمود اشوف الاجواء بس اريد ارجع ارتاح .

_ انتبــة لنفسك بــويــة ..

علي الباقر :: لا توصـي ..

عافانة علـي الباقر وراح . واني بقيت اباوع علية لان عرفت وراه شي هوة وقت ما جان عمي يحجي انتبهت عليـة مثل التذكر شي علمود هيج اتحجج بالتعب حتى يروح ..
بس عادي وين يروح مني اعرف وين راح اعرف ..

♩ آلمُـــستـــشفــى ♩

"" رحمــة الزهراء ""

دخلت للمستشفى وي زبير ورحت لدكتورة واطمنت على غدير الله وعرفت بموضوع الامومة وعرفتها ما كالت لاحد بس علي الباقر ف انا كذالك اتجاهلت هسة اكللهم بالوقت الحاضر يعني بتالي هم راح يعرفون بس مابيهم حيل هسسة ..

وكفت بالباب وتجيت راسي علية
بوقت ما جان زبيـر و علي السجاد كاعدين جوة بالغرفة يم انمار يهدون بي
لان جان حيل منهاار ويبجــي . وحاضن ايد غدير يصيح ويحجي وياها ..

آنــمـــار :: غديرتي ؟ اشنو يحبيبي انت ؟ اشنو صاير بيج يابعد اعيوني ..
الحق اعلية مجان لازم من الاساس اخليج ترحين لوحدج ..
يا الله ادخيلك انا لا شيء يمكن بالنسبة الك حتى تمسع دعائي بس اهي ياربي اهي حفيدة نبيك دخيلة يارب اسمعني لخاطرها ياا الله و خلها تفتح عيونها .
انا بدونج ولا شيي
غديرة تسمعــينـي انمار ولا شييي بدونج انت حياتـة كلها ولج انمار يموت بدونج غدير يااااا ربييييي

اعرف سوييت اشياء موزينة هوواي بحياتي بس ياا الله لا تختبرني ب مرتي يا ربي انت تدري وتشوف مالي غيرها هي كل حياتي دخيل اسمك يا الله
انت الي كلت :
〖ادعوني استجيب لكم واني اقرب اليكم من حبل الوريد 〗
جاي ادعيك يا ربي وكل ايماني بيك تسمعنـي

ااااخخخ اخخخ ياا روحييي اخخخ ..

علـي السجاد ;; خوويــة كاافي تسوي بروحك هيجيي كوم وياي خلينا نروح نبقى هنا منحصل شي غدير متحس ونايمة ..

_ لااا لاااا ممتعود انام بدونها وخر عني علي السجاد خليني وياها خليني هنا ما اعوفة لو اعرف اموت ..

زُبير :: البنت مابيها شييي ساعات وتكعد لا تضل تتبجبج على راسها وتفاول عليها صلي على النبي وكوم ادعي الها تكعد بسرعة هاي كلشي الله شگفـة عنها ماكو شي يخوف ..

_ مررتييي هاي مررتيييي ..

علي السجاد :: ثلاثتنا مزوجين و كلنا نحس بيك مو لوحدك متأذي اذا اهي مرتك صاللها سنـة تراهي اختي صاللها 19 سنة ربيتها بحضني وعلي ايدي الوجع الجبير الي بس انا مجبور اصبر لان مابيه شي هي بس لازم تكعد لا تضل هيج تتنوح ..

_ مو بكددي والله حزنكم ما يوصل الي موو بكددي اول مرة بحياتي اوون اول مررة اااخخخ غديررةة تونيي كمت امشي عدل وعدلت روححي لا توكع مني غديرتي
وعلي اوكع وياها .. اموت وراها والله .. ما تحسون بية انتم ..

زُبير :: ما نحس بيك شني ؟
انمار كلشي والا حد هسة لو بيها شي تلكانا حتى نحن ننوح وياك بس البنت الله يسترر عليها كلشي ماكو بيها اخذت كم ضربة والله كومها بالسلامة احمد الله ممعتدين عليها اكثر من هيج لو مغتصبيها كول الحمدالله خلصت بس على الضرب ..

_ اريد ابقى يمها روحو انتم اذا تردون ..

زبير :: والله بعد ما شفنة هذا حالتك ما نعوفك والعزه

_ ليش متقبلون ابجي عليها حيل مخنوك ؟

علي السجاد :: يا صبر ايوب ولك ليشش اسم الله تبجي عليها والله اذا صار بيها شي ف من ورة ادموعك
انمار صلي على النبي التحملتة غديرة مو قليل ..

زبير ::ايي ولهاذا لازم من تكعد تلكاكم تضحكون الها علي الاقل خفّو عليها من هم فقدان الطفل ..

_ ااهه ياكسرتي علييج

علي السجاد :: امسسح ادموعك يلاا راح تروح كحلتك

زبير :; هااك اشرب هلماي وصلي على النبي وهاك هاي السجادة والتربة صليلك ركُعتين لله تعالى لان كامت بسلامة .. وكذالك شسم هاي الصلاة علي السجاد ؟

علي السجاد :: يا صلاة ؟

زُبير ;; كالتلي عليها علويتي ونسيتها خرب .. هايي مال فاطمة الزهراء ؟

علي السجاد :: اهاا صلاة الاستغـاثة بالزهراء

زبير :: اييي هي ههاي وهم انمار صلي صلاة الاستغـاثــة بالزهراء هم عبارة عن ركُعتين بس منضورهن كللش قوي اسالني انا صليتها مرة و نكضت حاجتي باسرع ما يكون ..

_ ان شاء الله..

علي السجاد :: نثق بيك ونروح ؟

_ ايي روحو خلص هديت راح اصلي الكالي عليهم زُبير واكعد اقرآ قران يمها ..

زبير ;; اييي عفيية هيجي من البداية هي تحتاج بس هاذا الشي واقراها زيارة عاشوراء خلها تسمعها من صوتك يمكن ترتاح ..

_ ان شاء الله حسوي كلشي اهم شي هي ..

علي السجاد ;; هنيال غدير انرزقت بشخص مثلك .

_ هنيالي بيها ..

زبير :: يلا تضل يمها العافية ..

علي السجاد :: انتبـه الها ولنفسـك وتلفونك عندك شيلة واتصل علية بس تحتاج شي ..

_ الله وياكم ..

حسيت بيهم راح يجون ابتعدت عن الباب شوي وفتحة اول شي زبير واجة وكف يمي وطلع وراه علي السجاد و وكفن كدامنا .

رحمة الزهراء :: كدرتو تهدونة. ؟

زبير :: كدرناا

_ افف الحمدالله اسمعه وكلبي جمر على كلامة ضليت ابجي

علي السجاد :: حيل مقهور ..

_ بس لازم يفكر ان خلص هيي بخير ميحتاج هلدموع

زبير ;: اليحب ميعرف انها بخير جاي يشوف مرتة وجها ازرك من الضرب وجسمها عبارة عن كدمات غير الطعنة وفووك الطين بلة ابنـة رااح
شتردين منة لو انا بمكانة لاحرك بغداد على السواها زين منة وهيج كاعد وبس يبجي والله لو مريدة يهدء جان كتلة كوم وخلينا ندور على ذول الحيوااناات انا وياه هم لو زللم ما يستوحدون ببنت لوحدها. اخناااث حريماات ..

علي السجاد :: المدد يا بو فاضل المدد

_ زين ما كدرتو تعرفو من هم لو ليش سوو هيج شنو غايتهم ؟

علي السجاد :: يمكن خطف ؟ بس كدرت تشرد منهم ؟

زبير ;; صدك تحجي خوويــة شسالفـة وينهم وين الخطف اسألني اناا مليون حالة تجينا هيج .

علي السجاد ;; شنو يعنـي ؟

زبيــر :: ما دام لا مغتصبيها ولا ماخذيها يعني هي ضلت وياهم لساعات بس وفوك هذا انمار كال انها دزت رسالة الة وكالتلة ممرتاحة لابو التكسي يعني هي جانت تحس اكو شي ومن منضرها الشفتـه بي هذا

معناها واحد يا متقصدها يعني عدها عداوة وي احد وسوه بيها هيج اوو انتم عدو الكم وتقصد يضربكم ب اختكم ..

علـي السجاد ;; وين نحن حتـى هيج يصير بينا يارب ما نتحمل بعد مصيبـة اكبر من هاي خلصت الطاقـة والله خلصـت ..

زبير :: القفل والمفتاح عند غدير الله خلها تكعد احجي وياها ولازم ناخذ منها كلشي وهم لا تنسـى باجر يجي المحقق لهنا لان هذا يمكن تطلع قضية شروع بالقتل او قضية خطف ..

علـي السجاد :: لا هو انا من الصبح هنا

زبيـر :: زيــن تسوي .. يلا علويتـي نتوكــل ؟

علي السجاد ;; شنو رحمة مراح تحضرين الحجة اليوم ؟

_ ماعرف يمكن هسة اروح الهم ..

زبيـر :: يلا خويـة نترخص ..

علي السجاد :: مرخوصين ..

تركنا علي السجاد وطلعنا من المستشفى ولمن صعدنا بالسيارة اردف زُبيــر ..

_ جنتِ تكدري تكليله تعبانة لا مكدر رجلي عندة دوام من الصبح تكدرين تحطين مليون عذر ؟

_ وليشش حتـى احط عذر لو متريدني ارروح زبير كافي طوختها وياي هسة تفر السيارة وتذبني يمهم كافي تلفوني مكسور ومدري امي شتفكر بية انت تعرف اهي شكد تخاف من الهوة

_ وانا اخاف عليـچ اكثر من اهلــچ

_ زبيــر راح اروح لهلي لا تصير كلش ..

_ مجاي تفهميني ..

_ لاااا جاي افهمك اووف استغفر الله رب العالمين

_ رحمـة مساع عفتچ ساعـة بس والخلقچ كتلني افراكچ
مااكدر ابدونچ كافي تكليلي اروح واروح ..

_ انت جاي تحبسـنـي

_ احبسچ بحبـي واهتمامي الچ ولا اخليچ للهب ودب .

_ بنتــر _ ليش تحسسني لكيتني بشي ملهى لو بار زبير انتبه لكلامك وياي العلوية رحمة الزهراء اناااا بنت السيد الحسن المجتبـى الكل تحلف براسة
بعمرة ما واحد اتجرء يحجي وياي هيج لو يغلط وياي مثلك واني ساكتة الك مو خوف منك بس من. ورة كلبي
ولا لو اعرف هذا اسلوبك وهذا تفكيرك جان من البداية ما فكرت احبك وجان دست على كلبي بـ ... استغفر الله اسكت يا لساني اسكت لا اله الا الله

ما جاوبنـي وكمل طريقــة بنص الشارع رجعت وحطيت ايدي على ايدة واردفت وياه ..

_ لا تعگد حواجبــك هيچ متريدني اروح هاي ههي مروح ..

_ لااا راح اخليج ترحين هاي رايحين الهم صحيح كلامج يمكن من خوفي لا اخسرج ومن حبي الج وغيرتي الزايدة صرت اخليج تتندمين لان تزوجتيني مووو

_ لااا مستحيل اندم زبير انت روحي وبَعلي ومستحيل افكر بيك هيجي انت كلشي بالنسبة لي متعرف غلاتك بكلبي والله .. بس انت ترفس ببطني بسوالفك تجبرني اسولف هيج

_ اعتذذرر والله اتعودي عليــة والله لان احبج حيل لو تعيشي بربع ثلث الجنت عايش بي انا ما تلوميني ..

_ قريت الفاتحـة لروحي من يوم التزوجنة لان بعد ما لبست الابيض صرت انا روحك لهذا لا تعتذر من روحك .

حط ايدة ورة رقبتـي وحــضــني حييـل
رجعت كعدت بالكرسي وصار لازم ايدي ويباوعلي يبتسم ويرفع ايدي يبوسها .
وصلنا لبيــتنا ( بيت عَبد الحَسن )
فتحت السيارة ونزلت و هو نزل وياي وكف كدامي وحضني وباسني براسي واردف ..

_ شوكت اجي اخذج ؟

_ شوكت باجر تطلع من الدوام ؟

_ اطلع بأي وقت

_ جا اني راح اشغل هذا التلفون الجديد وين السيم كارت مالتي ؟

_هذيا بالگفر مالتي دقيقــة اطلعــة

_ تمام انطينياه

_ هاج

_ شكــراً هاي راح اشغل مالتـي وانتضر اتصالي

_ لا تتأخرين رحمــة

_ لا توصي هي حجة حنبقى كاعدين لصبح و لمن تخلص ننام على ما اكعد

_ تمام بالج لنفسسج ..

_ لا توصينـي انت انتبه لنفسك ونبه تلفونك حتى تكعد على وقت

_ تمام يروحي

_ يلا باي

_ احبج علويتي

_ واني اموت علييك طركاعتـي ..

ضليت اباوع لــ زبير وهوة صعد سيارتـة راد يروح اجاني
شبر وشبير جايبين كرااتين ماي يردون يدخلوهن لجوة
دخلنا انا وياهن حطوهن بالطرمـة ورادو يطلعون ..

_ شكرا تعبانكم ؟

شبر :: ماكو تعب بخدمـة الحسين.

_ يمـــة فدددوووةة يابعد روحيي

شبير :: عمــة محتاجة شي ثاني

_ مادري يبعدي

شبر :: ادخلي صيحي امي ..

_ صار انتضروني ..

دخـلت لجــوة و ناديـت لـــ جمــيلات .
وطلعت وياي وحجت وي اولادها الي عشعشو بكلبـي

جميــلة :: ها ماماتي ؟

شبر :: هاي الماي الطلبتي

جميلـة ;; عاشت ايدكم

شبير :: محتاجــة شي يــمة نجيبـة الكم ؟

_ لا ماماتي ماريد شي بس وين راح ترحون ؟

شبير ;; راح نرجع للموكب يم ابوي .

رحمـة الزهراء :: بالكم لنفسـكم من الطريق بعد عمتكـم .

شبر :: لا توصين حبيبتـي نحن رايحـين اذا تحتاجون شي اتصلــو عليـنا .

جمـيلة ;; الله لا يحرمنـي نور عيونكم ربي يحرسكم و يوفقــكم

عافونــة شبـر وشبيـر وطلعـو بـــرة وانا بقيت واكفـة يم جميــلة حضنتــها وسلمـت عليها لان من زمان مو شايفتها .

جمــيلة :: شلونها العروس ؟

_ ههههههه ويني وين العروس كضيت شهر كافي صرت عتيگة .

_ ياا يمـة بعدج كولي يالله اقل شي تكضي سنــة يالله تصيري عتيگة هههه

_ شلونج انت انت العروس ست جميلــة مو انا

_ ايي صحيح كلامج عروس من 17 سنـة هاا

_ ههههههه فــدوة وبعدج شباب ولا جنج ثلاثينيــة جادة

_ عوفي الجادة وتعااي النسوان ماتو من العطش خلينــا نفوت نودي الماي هم ياالله يبرد وننطي الهن .

_ تمام شيلي يلا

شلنا الماي ودخلنا جوة ورحنا للمطبخ بوقت الملايـة كومت النسوان وصارن يهوسن .
ليلــة العباس صارت تقرأ فزاعــيات الهن وهن مسويات ميدان ..

المـــلايـــة ::

چيبـو بيــرغ العــباس ... بمتونـي اشدنــة
عجـــز منــي الطبيب ... وجيت أكــصدنـة

دجــيبو بيــرغــة والرايـــة عگــديها
دميــل عـن عجـيج الگــوم طــب ليـها
يفــوك الگــاع خيــل و لــزلم و غاطــيها
رنـــة على الشريعـة الحيد سوهَ النا

دهــوسيلــة عـدل طب لصــواويــنة
تموت ازلامهم من يخزرهم بعـــينــة
هذة الوفــى للخــوان جفــينـة
يــم العلگـمي تعــرف تفاصــيلة

بعد ما كملت الماي رحت وكعدت على الدرج وتچيت راسي على المحجر وجانت كاعدة يمي اريج الله
وصرت الطم صدري على الخــفة .
واريج الله جانت تلطــم على راسها وحسيت اريج اصلا مو ويانه بالها جان يم غديرة .
ما نعرف سبب المصايب الجاي تصير النا شنو يعنـي منكدر نكعد اسبوع واحد هادئ الا تصير النا مشكلة تبچينا عمـــر .
بس الله موجود وما ينسى عبدة . هوة الي گال

_ يا عبدي انا ما خلقتك لكِ انسساك

املنــا باالله جبير واكبر من حزنا على مصايبنا
لان نعرف :
على المصيبة أجر و على الصبر أجر و على المرض أجر و على البلاء أجر .،
كلشـي والا شيء ونتحمـل ونصــبر والله كريـــم ..

"" طــيبـــة الـــزهـــراء ""

صارت الســاعــة 3 الفجــر والحجة بعدهي والنسوان صاحيات عبالك الساعــة 7 بليل ..
رن تلفوني ولكيت المتصل علي الصادق .
عفت النسوان والملا بصالة وصعدت لفوك ورديت عليــة

طيبـة الزهراء :: الوو ؟

علي الصادق :: هاي وينج ؟

_ ماعرف توني انتبهت على هذا اتصالك جنت بالقراية

_ طيبـة ضروري اشوفج هسسة

_ صادق انا طمنتك على غدير ماكدر اجي

_ واني ماكدر اصبر كتلج ضروري اشوفج تعالي هسسة لا انا اروح للمستشفى

_ انتضرر انتضرر هسسة دقائـق وانا يمك

_ خوش رايح انتضرج .

_ تمام

سديت التلفون واخذت صايتي و حجابي شمرتهن من الشباك وكعن بالحوش .
ونزلت كأن ماكو شي طلعت من الصالة و عبرت الاستقبال ورحت للحوش اخذت الصاية والحجاب نفضتهن من التراب لبستهن وطلعت من الباب الامامي يعني الباب الرئيسي مال الشارع
وانداريت لدربونــة الثانــية ورحت للهيكل .. اول ما دفعت الحديدة ودخلـت لكيت علي الصادق منتضرنــي

_ شبيك تخبلت عليــة ؟

_ اختــي شبيها ؟؟

_ صادق كتلك غيمـة مابية شي عبرت مرحلة الخطر ولله الحمد وهسة هي محتاجة راحة وراح تكعد

_ انا لازم اشوفها

_ مااكدر المستشفى هناك انمار زوجها وابوك و علي السجاد ميفاركوها مااكدر حت امك ممخليها تروح لهناك

_ وانا ماعندي صبر خوفي راح يكتلنــي على اختـي

_ صدكني مابيدي شي اسوي الك بس وعد لمن تجي للبيت وتبقى عدنا راح اجيبها لهنا وتشوفها ثق بيه

_ يارب الهمني الصبر خاطر اتحمل

_ لازم ارجع مابية اتاخر البيت متروس نسوان وهسة يفكدني لان محتاجات نفتر يمهن .

_ دقيقة طيبة

_ عيونــي

_ هااج هذا

_ شنو هذا ؟

_ حرز اربطي على عضد غدير الله الايمن

_ تمام اذا صادفت علي السجاد انطي اله هو يربطه الها وهي بالمستشفى ما انتضرها لمن تجي لهنا

_ ايي زين تسوين

_ يلا انا رايــحة

_ بالج لنفسسج

_ انت انتـبه لنفسسـك ولا تفكـر هواي تمام

_ لا تفكرين بيه روحي هسة

_ استودعتك الله

_ استودعتج الله

تركت علي الصادق ورحت امشي واني لازمة الحرز بيدي رحت وضميتة بجيب القميص مالتي وسديت الصاية وعدلت شالي ورحت وكذالك مشيت من الباب الرئيسي
واول ما فتحت الباب وردت ادخل ..
لكيت المعتز باالله بوجهي بالحوش واكف جاي يلعب بتلفونة رفع راسة على صوت فتحت الباب وشافاني واني اطب نزل تلفونة حطة بجيبة ورفع حاجبــة واردف باستغرابب ..

المعتز باالله :: طيبـــة الزهراء ؟؟؟؟

_ عزوز ؟

دنك باوع لساعتة ورجع باوعلي والشرار تطاير من عيونة وكال بزمجرة ..

_ الساعــة 48 : 3 الفجر وين جنتـي وشسوين بالشارع ؟؟

حسيت ريجي نشف هذا المعتز باالله مابيـة احجي كلمة راح يسحلني بالكااع شكلـة ؟؟ يا عذر اطلعـة ماكو شي ضابط وياي صدك شنو جنت اسوي بهاذذا الوقت ؟؟
وين جنت ؟؟

اتقرب منـي وسحلني من ايدي ححيل ونتر بوجهي بس بصوت خافت خاطر لا يسمعنا النسوان الجوة غمضت عيوني وبلعت ريجي ..

_ جاااييي احجي ويااج جااوبي لا يطللع صووتييي وين جنتييي بهااذا الوقت شعدجج طالعةة احجييي ولجج

⇦ مَـــشــهِــد ⇨

"" صَـــيــوان ""

بوقت جنا انا وعمي عبد الحسن واكفين نشاهد مراسيم السابع الجاي تصير ..
واصحاب الزناجيل والمواكب والقصايد وكلشي متولع ومحترك بالساحــة
اجى رجال ووكف كدامنا وصار وجــه بَ وجــه وي عمي .. ولاحـضت بوجه عمي المفاجأة وشلون نقطعت انفاسة لثواني وهو يشاهد وجه الرجال ..

صيوان ;; محررم اله طعم خاص سبحان الله

عبد الحسن :: محرم الحسين هذا كلشي بية خاص ..

صيوان :: اييي والله الحمدالله نخلقنا شيعــة وما نحرمنا من هلخدمــة الي مابيه خسارة ..

_ الســلام عليــكم سيد عبد الحسن ؟

عبد الحسن :: علــي الكاضــم ؟؟

┬──┬┬──┬┬──┬┬──┬┬──┬

__ مُن نُعَوفَك نلِفي وين؟
لِمِنْه بَيتك يالحِنَين،
مُن مَتاهاتِ العُمِر مِتَعُوب أجيتَك.

للــِــقَــصــة بَـــقــيــة ☜

__ ثقل ميزانــك بذكــر الله

_ سبحان الله
_ الحــمد لله
_ لا اله الا الله
_ الله وأكـــبر
_ لا حول ولا قوة الا باالله
_ سُبحان الله العضيم
_ سُبحان الله وبحمدة
_ أستغفر الله واتوب اليه
_ اللهم صل على محمد وال محمد

لهنا وصلنا لنهايــة البارت
اشوفكم بالجاي لا تنسون التصويت والتعليق لطفاً ✨💗

احبكــــم والسلام 💗💗