رواية احفاد السيد : الثار ( بأجزائها الإثنين ) الفصل التاسع عشر 19 - بقلم ​رُقَـيَّـةُ الْأَكْـبَـرُ

رواية آحفاد السيد : الثار

بقلمي انا الكاتبة " رقية الاكبر "

لا تنسون التصويت والتعليق ابين الفقرات ومتابعه لحسابي بالواتباد oo_ll13

وكذالك متابعة لحسابي بالانستا انشر بية كلشي

ندخل بالبارت ونكول
بسم الله الرحمن الرحيم

البارت 34

يــابعد أهلي
كأنهُ بدرٌ في ليلـةٍ شَديدة الظَـلام

※※※※※※※※※※※※※※※※※※※※

""" أصفاد الحق """

ونحن مستمري بالكعدة رجع واجانة حامِد المتغين وانتهبت على ملامح وجهة جانت عادي حسيت ان مصار شي وياة وكذالك ما حجة شي يعني موغف يخوف صاير وياه كعد بهدوء وهم اجانة وانضم لكعدتنا علي الهادي بعد ما راح المعتز بالله
تركتهم وكمت واول ما وكفت على حيلي اردف صيوان ..

صيوان :: هااا صفد وين؟؟

_ رجلية وجعني من الكعدة كايم افتر شوية هنانة باطراف الارضي..

علي الباقر :: لا تتعمق بيها هواي من البداية افتر وارجع لا تفوت لجوة..

_ لا توصي يخووي

عفتهم واتوجهت للارضي ودخلت بيها وصرت امشي وي الساجية واني بعدني جاي اتعمغ هف علية ريحة تمووت العدل ..
بغيت امشي حتى اعرف شنو مصدر هاي الريحة لان ارضنا ابد ما تنطي هيج ريحة كلها شجر والهوى اعذيبي يرد الروح مالتها..
واني دا امشي وعيني لكدام ما اشوف رجلية ولا اشوف الكاع حسيت رجلي سحكت على شي قوي
دنكت من المنضر الشفتة رجعت اربع خطوات سوة لورة

وصحتت بأعلى صوتييي ....

__ شباااببب يااا زلممممم ويينكممم تعالووو يمييي شووييةة ...

ركضولي وعبالهم صايرلي شي وكف علي السجاد وراي وصار يباوع وحط ايدة على متني ووكف علي الباقر يمي على اليمنى ويمة علي الهادي وعلى اليسرى وكف صيوان ويمة حامد والمرتضى ...

وصارو صافنين للمنضر الموجود بنص كاعنة اتغدم صيوان وصاح بي علي الباقر...

علي الباقر :: صيووان لا تجيسسة خاف بية بصمات شي وانت ضابط وتعرف ..

صيوان:: لا مراح اجيسة بس اريد اخذ هاي الورقة العلى صدرة ..

علي السجاد :: منو كاتلة هذا ؟؟

علي الباقر :: الكاع هاي كلشي بيها شوف منو مخلص عليه هنا وشارد ..

صيوان :: انتم المقصودين هذا ما مات عبث هنا بكاعكم

علي الهادي :: المقصد؟؟

صيوان:: يعني مووت هذا الرجال السادة انتم مقصودين بية ..

جانت اكو ورغة حاطيها على صدر الرجال الميت ومدخلين الخنجر ابصدرة حتى ما تطير الورغة الوحشية بموت هذا الرجال بعمري ما شفتهااا شلون هيجي لما طلع صيوان اكلينكس وحطة على الخنجر ورفعة وكال انتم السادة مقصودين بموت هذا الرجال هنانة واردف علي الهادي وراه

علي الهادي:: الورقة متروسة من دم هاي الجثة بس لازم تقرأ النا شنو مكتوب بيها شني يعني احنا المقصودين؟؟

واني عيوني منشالت من الرجال اتخيلو وياي جان منحوور من ركبتة لدرجة راسة باغي بجسمة بلحمة صغيرة بس نحركة خطوة صغيرة بس هاي هية راسة ينفصل عن جسمة انا المتعود على طك الفشك دمي نشف من شفته الشمر ممسوي هيج وبدء صيوان يغرأ الورغة والمكتوب بيها

صيوان:: [ أحفاد السيد احمد الصادق وش تونسو وانتم تشوفو الجثمان بنص ارضكم للمعلومة الرجل هذا اجة برجلة لهنا ومات بيدنا هنا ماكو شي صعب علينا ..
سابقاً كلت الكم ﴿ طلقة فارغة وجثة هامدة ﴾ خليكم يقيضين خاف الجاي واحد منكم ] ..

بغى واحد يعاين لثاني من بعد ما سمعنا المكتوب ورفع راسة المرتضى الامير واردف بآقتراح

المرتضى الامير:: الاحسن نتصل ب خالي عبد الحسن..

علي الهادي:: ههههههه تتصلون بابوي هو بس يعرف بينا هنا يعوف مووضوع الجثة ويجي علينا ويلحكنه بيها واخو زينب..

حامد المتقين :: كلام علي الهادي صحيح بس بنفس الوقت احنا راح نتصل بالشرطة يعني خالي راح يوصل الة خبر يعني ماكلين هوى ماكلين ...

علي السجاد :: اصفاد انت تباوع وكأن متفاجأ من المنضر هاذا ؟ شنو اول مرة عليك

أصفاد الحق :: وعز الله وصلت مرحلة ما اتفاجأ بعد من اي منضر اشوفة او يصير هنا ولكم على هاي المصايب الجاي تصير بهاي الكاع احسن لو عدها اللسان جان غنت الكم

« يا كاع اترابج كافوري »

ادري شنييي وليية ما نرتاح دغيغة وحدة ..

حامد المتقين :: اصفاد مو وقت تصنيفك هسااع..

_ ايي صح وغت ندفن هلمرحوم ونجي محلف بالعباس لشرطة موش احنا چتالته وغت هاذا الشيي موو

المرتضى الامير :: اصفااد صم حلكك شويي هسة نحن بيا حال ؟

_ تراه حالكم نفس حالي هي انا وياكم ومبتلي

صيوان :: مع احترامي الك سيد اصفاد بس الصم شويية زنجل حلكك كافي خلينا نلكي حل

علي السجاد :: ها علي الباقر صافن متريد تكول شي؟؟

علي الباقر :: لاا بس احنا لازم نروح منا اصفاد تعال وياي وانتم كل واحد يروح بسيارتة ماريد اشوف بسس ترراب التواير وباوعو واسمعوني زين نحن اليوم لا اجتمعنا ولا شفنا بعض وكلمن ملتهي بروحةةة خووش وحتى الكااع احنا مواصلين الها

علي السجاد :: والجثة هااي تبقى اهنانة ؟؟

علي الباقر :: لاا مراح تبقى بمكان اكرام الميت دفنة و آنت صيوان خوية اتصل وبلغ الشرطة واخذة لتشريح وبعده ادفنوه وتكدر تكول لابوي ان انتة اجيت لهنا لوحدك لان ابوي مستعد يعادينا كلنا لان موصينا منوصل لهنا بس انت لاا ميكدر يحجي وياك ..

علي الهادي :: رااح بيها صيووان اقرو عليه الفاتحة

صيوان :: دمك خفيف علي الهادي ربي يخليك اهه
لا تفكر بشي علي الباقر اعتبرة صار واي رد فعل من خالي اتحملة يموون بمثابة الوالد الله يرحمة

علي الباقر :: بعد روحي انتَ الضلع الما ينشلع يلا شباب انتم روحو وانتَ صَفِد تعال وياي

_ تمام خووية

علي الباقر :: تحركو يلة امشونا..

اخذني علي الباقر وطلعنا ب السيارة واني بطريق باوعت لعلي الباقر واردفت...

_ صددك علي الباقر تذكرت

_ شنوو

_ وهج الطف كالت تريدني اجيبك واجي حتى تحجي وياك

_ وهج الطف مالتنا ماغيرها

_ اييي

_ وشنو تريد؟

_ كالت تريد تشوفك وتحجي وياك انتة مدري

_ خووش اتصل بيها هسه انتة وخلينا نروح ليها

_ نروح للبيت يمكن ما تريد احد يعرف اخليها تطلع النا؟

_ خووش كللها خليها تطلع النا..

_ تمام..

اخذت تلفوني واتصلت على وهج الطف ولمن ردت عليه..

_ الو وهجهج؟

وهج الطف :: هلا عيني

_ اشلونج؟؟

_ بخير انت شلونك

_ انا بخير دامج بخير اكلج

_ كوول

_ انت بالبيت صحح

_ اييي ليش

_ انا وعلي الباقر بطريغ جاينكم اطلعي النا

_ المن

_ شني المن مو انتي كلتي اريدن علي الباقر احجي وياه

_ لااا خلص ميحتااج جنت مدوهنا وطلبت بس هسه لا كلشي ماكو لا تجي

_ شنيي لعبة عندج اهي؟؟

_ مجنت اعرف حتسويها صددك

_ هوة شني اسويها صدك غير انتي ردتي علي الباقر شلون مسويها يعني

_ صافي اني كلتلك اريدن اشوفه لان جان شي براسي وهسه الحمدالله ارتاح راسي خلينا حتطفي هسه

_ وهج الطف

_ احجي وياك بعدين باااي

سدت التلفون بوجهي باوعت لعلي الباقر لكيتها بياوع الي واردف..

علي الباقر :: شصاار ؟؟

_ تكول ماتريد شي جان براسها شي وهسه خلصت جنها تلعب هااي

_ شوكت اتصلت بيك؟

_ امس بنص الليل

_ خافنها طايحة بيك وتحججت بهاي السالفة حتى تتصل عليك وتسمع صوتك !؟

_ اههههههه لا يخووي شني السالفة

_ مدرري جاي اشمن هيجي ريحة حُب واعجاب

_ علااي وصلني للمحلات وخلني اشوف شغلي

_ اوصلك ليش ما اوصلك انا الي اوصلك مو تدللل

_ علي الباقر

_ هههههههههه خلص سكتنا بس فكر بيها يعني وشوف تصرفاتها وبعدين بت عمي انا اضمنها الك وتربيتنا بعد تشك بتربيتنا

_ تريد تربطني باالبت كووة؟؟

_ رحم الله من جمع رئسين بالحلال

_ هسة خليني استغر والله كريم

_ ايي واهي هم بعدهي صغيرة خلها تكبر اشوي واني اخطبها الك

_ الله كريم هسااع انتة وصلني المحلل

_ خووش راح اوصلك ولا تنسى كلاميي

_ بخصووص ؟؟!

_ بخصوص سالفة الجثة لا يفلت الي السانك ويرووح فاضحنة لا تنسى اذا اذااا سالك ابووي كول انت لا واصل للارض ولا متكرب ناحهة خووش حچي ؟؟؟

_ خوش الحچي هذاا خووش

_ عفية عليك وهم لا تنسى قضية الاسقط

_ لا افى عليك بأم رااسي هاي وعويناتك مو ناسسي شي .

_ واثق بيك انا ولهاذا من دونهم كلهم انا مسلمك هلسالفة

_ علي الباقر أسألك سؤال ؟

_ جواب اكيد .

_ يعني لو مثلاً نكول مثلاً بيووم عرفت انا واكف يصف عدو الك انت راح تتفهم موغفي وتچي تفهم مني ؟

_ لا ميحتاج افهم منك ..

_ ليش ؟؟!

_ اصير ما اشوفك اصلاً

_ لهدرجة ؟

_ واكثر صفد اكثر شغلتين اكرهم بكل عمرري الغدر والجذب

_ الله يبعدنا عنهم

_ بأيد منو مخلي ايدك ولك اعترف من ههسة احسن

_ بأيد الرحمن مخلي ايدي يعني بأيد منو مثلاً انا نطيت مثال لان تذكرت مشهد امس شفته بمسلسل ف سالتك

_ الحمدالله اذا هيج ماريد انكسر بيك ويجي الضرب الي من صوبك لان بذالك الوقت حيل راح اتأذى

_ ﴿ وسنشد عضدك باخيك ونجعل لكم سلطانا ﴾
وعيونك راح اصير الك خير مثال ...

_ اخوي الزوود انت غيرر ويلة هسة راح اخذنك للمحل

_ اطلع لغااد شوية مو تذبني هنا

_ صاار...

ودعت علي الباقر ورحت دخلت المحل واني راسي يفكر بكلام السيد معقولة وهج الطف سوت هيج لتسمع صوتي؟؟
يعني جانت مشتاقة الي.. شنو اليخليها تشتاق غير الحب
يعني وهج الطف تحبني ماكو الها بس هذا الباب
اووف منك يا ابا الحسن خليتني هيجي افكرر ماكو داعِ لكل هاذا تفكيري البنية مصارلي اعرفها بس اسابيع شوكت لحكت تحبني وهلسوالف ماكو اي نوع من افكار ابا الحسن
بس هَو ميريدها تروح لغريب هيج لاحضت علية علمود هيج حاول يحطها براسي وانطاني لمحة حتى افكر بموضوعها ..

"" علي الباقر ""

ودعت اصفاد الحق وطلعت لبيتنا لارتاح وانا بَ الطريق انتبهت السيارة المضللة رجعت وطلعت بطريقي اختاريت هاي المرة اتجاهلها واصير اقوة منها وما اهتم طبها ستين مرض خلها وراي عندة بنزين زاييد ميعرف وين يكزرة ..
كملت طريقي ورن تلفوني بأشعار رسالة فتحتة ولكيت رههف مراسلتني وتكول ...

رههف :: تعال لنا اليوم اتعشى عندنا مجد توة كعد من النوم وصار يصيح يريدك وانا كتلة انت بدووام وبلكوة قنعته انت متكدر تجي للغدة لهذا حاول تفرغ نفسك وتجينا تضيع وقت وياه ..

اخذت اكتب الها ....

_ اتمنى بس حييل ما اكدر الشغل لراسي حييل وهم انتي حاولي تلهي ما هو هوواي ايام كضاهن بدوني حاولي تقنعي ماكدر اجي هساا انا ابد يمكن لباجر او حتى باجر ماكدر بالج لنفسج وبوسسي الي هوواية ..

دزيت الرسالة وركزت لطريقي واول ما وصلت لبيتنا وكفت سيارتي ونزلت لكيت سيارة المصطفى القاسم واكفة تقربت منها لكيتة كاعد بسيارة دكيت على الجام ولاحضت عليها شلون فزز من الصوت جان صافن وفجأة انا ضربت الجام فتح باب السيارة ونزل وكف كدامي حطيت ايدي على متنة وشدييت حيل ولفظت وياه :

_ يا هلا وسبع تالاف هلا بالميرزا بتاج راسي ..

_ هلا بيك سيد روحي

_ أشوفنك بالسيارة و ما تهديت وفتت جوة

_ اجيت اشوفنك لصراحة ومن لاحضت سيارتك مو اهنا بقيت كاعد بالسيارة

_ شنو يبوي محتاج شي ؟؟

_ ايي اجيتك احجي وياك

_ تعال فوت

_ يالله

اخذت المصطفى القاسم ودخلنا للبراني كعدت واجة كعد يمي اتربع بكعدته ودنك صار يسبح بالسبحة مالتة واني جنت منتضر اسمع شي كلمة منة !!
ولمن حسيت ماكو رجئ منة اردفت وياه واني حاط ايدي على متنة ....

_ متريد تكوول شي ؟؟ ليش ردت تحجي وياي شنو موضوعك احجيلي ؟؟

رفع راسة واختار ميباوع لعيوني رغم انا جنت متوجه الة الا هو يبقى يباوع لكدام ولفظ ...

_ انا التجئت الك لان مالي غيرك اثق بي واحجي وياك بهيج موضوع اسولفلك وانطيك الشغلة ..

_ ايي كوول

_ علي الباقر السالفة ابيناتنا

_ هنا حفرنا وهنا نطمر لاتخاف

_ خووش ....

بدأ يسولف وياي واني اسمع ...

"" المعتز بالله ""

عفت الولد ورحت وكفت كدام بيت جرح وطلعت الي صعدت وياي بالسيارة ومشيت بيها واردفت وياي ..

_ وين دتريد نرووح ؟؟

باوعت الها بطرف عيني واردفت وياها

_ عاجبني نروح للمول ..

ضحكت وخلت ايدها على حلكها وايدها الثانية حطتها على زندي وكالت ...

_ ههههه تريد تجيب الي هدية يعني ؟

_ انا احلا هدية عندج تردين احلا مني ؟؟

_ صدك والله انت احلا هدية واكبر هدية وليدي

_ والج اوليدج شني احجي عدل

_ ترى اوليدي مو غلطة

_ انجبي هاي الكلمة من امي ما اتقبلها مو ادورة منج

_ عوود ليش انت هيج بسرعة تتنرفز وتعصب ؟؟

_ على فكرة لا تشوفيني اضحك واجامل ترى هاي ابد مو شخصييتي ابد ما اعرف اضحك واحشش واصير خفيف دم
بس انا هيج بس يمج لان جاي اجاملج ..

_ ياعمي عاادي اقبل جاملني اقبل بهيج مجاملة تخليني اشوف جمال ضحكتك الي امووت عليهة

_ كرامتج وويين ؟؟

_ اني من اجي يمك اعوف كرامتي بالبيت

_ هل اكول

_ وانت شنو تكول بلة ؟!

_ ماكو وحده بنية هيجي تذب روحها على رجال اولاً اكبر منة وتشوف بعيونهَ حُب لغيرها وعادي عندها باقية وياه

_ ههههه اجاوبك انا
اذا على سالفة ذب الروح ف انا اعتترف اني ذابة نفسي عليك لان لصراحة انت مااكو منك واطلع بنت غبي اذا ضيعتك من ايدي ...
واذا على العمر واذذا يعني انا اكبر منك بَ خمس سنوات؟؟؟
كلش عاادي واذا على سالفة انت تحب ذيج فَ وعيونك خليك وياي شهر بسس شهر الا اخليك حتى ايدي تبوسها وتنسى اسمها ..

_ كل هذا ؟

_ واكثر

_ والله واثقة جا انتي بعدج جديده على الساحة متعرفين المعتز بالله عدل

_ عاادي اعرفك واحفضك همم

_ اهااا .؟

_ ايي والله انت بس خليك وياي واصبر على رزقك وشوف

_ شنو اشوف ؟؟

_ هاي شبيك متجمع وياي !؟

ابتسمت وبقيت مركز لطريق واول ما وصلنا المول نزلنا انا وياها ودخلنا سوة صعدنا لطابق الثاني ودخلت للمحل وبقيت واكف و جرح بقت تتلفت وتباوع للمحل والبضاعة الي بية ...
بعد ما طكت صفنة على المنتجات واتأكدت كلهن ماركات عالمية وبراندات ماكو اي كوبي بيست
رجعت باوعت الي واردفت ...

_ هاي شنو ليش جايبني لهنانة ؟؟

_ شنو ما ناقصج شي مكياج ملابس خلطاات عناية بالبشرة !!
ترى كلشي هنا موجود واصلي اخذي

_ عززة ولك معتز ..

_ اسم الله شكو ؟؟

_ ولك هاذي براندات هسة اقل شي الحمرة هنا ب 30 الف وين اخذذذ ؟؟

_ وشنو يعني المحل كلة تحت وصايتج

_ ما فهمت !؟؟

_ يعني يا محفوضة البكة والسلامة
هذا المحل الج وباسمج وكل هاي البضاعة هية مالتج .

_ شبيك معتز انت هسة تخبلت وياي لو كبسلت ؟

_ لا هاي ولا هاي الله يبعدنا بس ليش ؟

_ لان مو بعقلك بااع المحل بفراغة سعرة يطلع هيج شي 5 ملايين وهاي البضاعة ماركاات عالمية بااع كلشي اصلي يعني بيها بال 20 مليون
يعني المحل وي البضاعة كلة على بعضة 25 مليون سعره
منيلي انا حتى هذا يصير الي الا ابيع كليتي ..

_ ما يحتتتاج تبيعي شييي وانا موجود هاج هاذي الاوراق بس وقعي عليهم وهاي هيه المحل باسمج وحلالج ..

_ شنو هاي معتز انت مشتري هاي السوالف ؟!

_ انت مو كتيلي تشتغلي بكوزمتك عند رجال ؟

_ ايي

_ ما يحتتاج بعد تشتغلي تحت رحمة احد هذا الكوزمتك كلة الج وبعد انتي ام الشغل تعرفي شلون تمشي شغلج وعيشي

_ بس معتز

_ اششش الرسول ما رجع الهدية وهسه هاي هديتي الج ميصير ترجعيها

_ الناس العاقلة تهدي وردة اذا كلش كلش تلفوون مووو كوزمتك كامل سعرة ملايين !!

_ جوة رجلج كلهن طايحات اهم شي بالج مرتاح وهم ما تشتغلي عند رجال غريب

_ ماعرف شلون اشكرك ..

_ لا تشكريني هسة خلي ببالج شي واحد بس شلون تعالجي الوالدة حتى تسندج وترجع وياج من بعد الله مالج غيرها وهي هم مالها غيرج ..

_ وينك عني ذاك الوقت ؟

_ جنت طفل

_ ههههههههههه هم صحح علما كبررتت واجيتني

_ اذا هيجي انا اترخص هيجي خليج بمحلج واسترزقي ..

_ وين رايح ؟

_ سُت جرح انا هم صاحب محلاات ووراي سوالف مو سالفة لو سالفتين

_ اههههه تمام روح لرزقك الله يفتحها بوجهك وين مديرة

_ استودعتج الله

_ حافضك الرحمن الي ..

عفت جرح وطلعت من المول واتوجهت للمحلات ...

【 مَشهِد 】

بندر :: بوية حصلت الك خبرهم

_ عوف هذا الموضوع هسة وكول الي

_ شنوو ؟

_ جبت الي معلومة هذا الكتلك علية ؟

_ اهاا اي بوية حاولت وجبت الاكدر علية لان تعرف المنطقة الهو كاعد بيها ماعندي معارف بيها وحتى من وديت ولد يستفسرون حيل متحفضين على المعلومات لان هوة مكاعد بالولاية ساكن بمزرعة حلالهم .

_ وشنو كدرت تجيب عنه منوو هوة وشكد عمره ؟؟ وشنو تربطة علاقة بَ علي الباقر ليش ميفاركة ؟؟

_ بوية هَو أسمة 〔 العسكري المؤتمن 〕بس من شبابة معروف ويصيحون الة بأسم〔 صيوان 〕 .
وهوة يصير ابن خال علي الباقر وعلي الباقر يصير الة ابن عمتة

_ اهااا العسكري المؤتمن يصير ابن خال علي الباقر يعني هووة هم سيد حالة من حالهم ؟

_ ليش ؟

_ شنو ال ليش زوجة عبد الحسن علوية يعني اهلها سادة واخوها يصير ابو العسكري المؤتمن يعني سيد وابن سيد

_ اها انا ماعرف ام علي الباقر علوية اذا هيج ف صح العسكري المؤتمن سيد هم

_ خخخرب حضههم هاي العائلة جذورهمم ممتدة من كل مكاان بصرة نجف عماارة بغداد تكريت انبار وين متدير وجهك تلكي عررك لسادة السيد احمد الصادق

_ تريد تسوي الة شي ؟

_ شنو شغلة هوة ؟!

_ ضايط

_ خربت السالفة

_ مخرب شي اذا تريدة احطها هناا يركع الك وعيونك

_ لااا مااريد اضرة عوفة خلي متنومس بجناحاتة ويطير زين بيهن بس راح يجي الوقت الي ينكصن بي بس مو انا اكصهن غيري راح يسويها ..

_ شلون يعني ؟

_ حااول ترجع وتسال عنة جيب الي معلومات اكثر عنة هاي الحبشكلاات ما تفيدني بشي

_ تمام بوية

_ مابقى شيي ما بقى الا القليل

"" طيبة الزهراء ""

بعد ما وكعت بالكاع اجت ليمي وخنكتني من ركبتي ورجعتني لورة بس تهدني اطيح من ثلاث طوابق وامووت حسيت هاي اخر لحضة الي ..
بقيت احااول ابلع ريج وهية اردفت وياي بكل حدة ...

_ اسمعيني طيبة اكدر هسة ادفعج واشمرج منا ولا واحد لا من الانس ولا من الجن راح يعرف انا ورراج اذا مسمعتي وسويتي الأكلج عليية فهمتيي ؟؟

وخرت ايدها عن ركبتي واني اتنفست وصحت بصوتي

_ انتييي شجااي تسولفين وخرري عني يااخبلة ولج اذا سواها الشيطان ووكعت منا وعلي الفحل ما يودوني للمستشفى كبل لنجف

_ ههههه واني هذا الاريدة اريدهم يذبوون عليج ترااب مثل ما راح اذبج منااا اذا مسمعتيني ..

_ شتردين مني اقسم انتي مو صاحية

_ الاريدة منج علي الباقر

_ شبييي ؟؟

_ كوومي وخلينا نتفاهم مثل الاواادم

وكفت كدامي ومدت ايدها الي كمت من الارض اخذتني لجهة ما يشوفونا الي بشارع نفضت اتراب الصار بهدومي
ولينا لزمت ايدي من زنددي و واعتذرت بنترت وحدة ...

_ اسفة لان سويت هيج وياك بس لان خفت منج لا متقبلين هل اجيت وياج بالعنف والتخويف

_ ضررورري نشوفلج مصحة لاا اقسم بعيونيي انتي مو صاحية

_ هههههه صح انا مو صاحية وي الناس الي تريد تدمر بيتي

_ وهووة انتي منهوو يم بيتج منو جاي صوب بيتج ؟

_ علي الباقر

_ شنو ؟

_ بااعي انا لينا مستعدة اشعل حرب الها اول ما الها تالي والله اذا شخص لو جان ابوي فكر يوكف بيني وبين علي السجاد

_ انززيين علي الباقر شدخلة جبتي طارية وانا شدخلني سويتي بية هيج

_ شفتج من تدافعين عن علي الباقر وهوة شلون مهتم بيج اسمعيني هذا الرجال ما يحبني وراح يضل وراي لحد ما يخرب بيتي

_ هههههه وانتي شنو مسوية الة علي الباقر ما يكره هيج منا والطريق الا مسويتلج سواية ويااه

_ وانا شمسويية فوك ما انا زوجة اخووة ولازم يحترمني كاعد يترس حجي برااس علي السجاد عليه ميفكر باولادي الي بطريق ميكول حرام ادمر بيت اخووي انا اريدج تحجي وياه وتطلعيني من راسة لان انتي تأثرج خاص علية

_ باع انتي بس خليج بعيدة عن علي الباقر وهوة راح يصير بعيد عنج انا مكدر أثر عليه بشي

_ لا طيببة انت غلطانة انتي اكثر وحدة تكدرين تأثرين علية

_ لا انت الي غلطانة لينا انا مجرد بت عم وطفلة هنا لا ينسمع صوتي ولا الي رئي ف الاحسن الج انتي بس ابتعدي ولا تباوعي بعيونه وهوة معلي ملتهي بروحة باااي

انداريت اريد ارووح سمعت صوتها يصيح الي ويكول

_ اسمعي طيبة اذا ضليتي هيج وما سويتي الي شي ورجع علي الباقر وضرني والله ثم والله الكل هنانة راح يعرف بموضوع البنت المسكينة سرراب الجانت ضحية من ضحاياج وانكرري اذا تكدري تنكري انطيهم كلشي دليل عنددي ويمكن حتى على السجن ترحين ..

انداريت الها مصدومة شلون عرفت بَ موضوع سراب ؟؟
من هاي البنت الواكفة كداامي هااي لينا لو الجن الازرق سالفة الانس ميدري بيها شلون هااي وصلت الها شلون هيج واثقة ولازمة دليل عني ..
غمضت اعيوني استوعب الصار وان انا ركبتي صارت بيد هاي المخلوووقة النكسة ..
بلعت ريجي وفتحت عيوني وباوعت الها واردفت بصوت مهزوز

_ راح احااول

_ راح تسوووين ماعندي محااولة اذا الباقر ضل ورة رجلي انا رتح اصير وي الماكو سوة واذا صار هلشي بذاك الوقت علية وعلى اعدائي اسمعي طيبة اليزرع ششوك يحصد دمم
لاتخليني اخليج من ههسة تحصدين كل شوكة زرعتيها ..

_ كتلللج راااح احااول هاي ههية اعتبرري علي الباقر ما يلفظ ولا حرف عنج بعد خليني هسه انزل لا يجي وااحد ..

_ خووش نششوف

عفتها ورحت فتحت الباب وطلعت نزلت لجوة
واني اتناسى السمعتة منها وبعد ما صار الليل وتعشينة وصعدت كعدنا انا ورحمة الزهراء واريج الله نشولف سمعنا عميي يصيح بالولد البنات بقن بمكانهن ونزلني انا اشوف شنو السالفة وارجع اكللهن وكفت على الدرج وشفت عمي موكف كدامة 【 علي الهادي وعلي السجاد وعلي الباقر والمرتضى الامير وحامد المتقين واصفاد الحق وصيوان والمعتز بالله 】
وهوة كاعد كدامهم وعمة واكفين واحد يم الثاني عبالك طلاب مدرسة مسوين سالفة ورحو للمدير ههههههه
بقيت اباوع وانتبهت على عمي باوع النا واشر النا نرووح يريد يبقى بس هو والولد صعدت العلوية وامي اخذتني من ايدي وصعدنا سوة واني صابني الفضول ليش مجمعهم هيج عبالك يريد يحاكمهم ؟

"" اصفاد الحق ""

مثل ما توقعنا اول ما الشرطة تواصلت وي عمي عبد الحسن بخصوص الجثة والكاع لان الكااع باسم عمي ف توصلو وياي علساسس حتى يفهمون شنو السالفه هااي ..
لمن اتاكدت الشرطة ان نحن اصحاب الارض ماكو النا اي علاقة خلت الجثة بالطب العدلي وينتضرون واحد من اهلة يسالون عليه حتى يسلموهم الجثمان ...
ولمن رجع عمي جمعنا كلنا بالبيت الي جان شااك نحن رايحين لهناك كعد كدامنا وكال ....

_ علي السجاد
_ علي الباقر
_ علي الهادي
_ علي الرضا
_ اصفاد الحق
_ العسكري المؤتمن
_ حامد المتقين
_ المرتضى الامير
_ المعتز بالله
_ الفاروق الاعظم
_ المصطفى القاسم

هاا ياا ارجالي يا ازلامي ساكتين متدرون ابوكم يحب يسمع صوتكم وحسكم احجو شي ايي شيي انطقو اوو هااا يمكن منضر المووت والجثة خلتكم تبلعون اللسان الي الله وهبة الكم مو صح ؟؟؟
اصفاد حبيبي تعال لهنا ...

اصفاد الحق :: انا عمي ؟

_ ايي يروح عمك شبيك خايف ترى لا شايل اسلاحة ولا شايل قامة اريد احجي وياك بكل هدوء وروية وسكينه ..

اصفاد الحق :: عمي هاي كدامك 10 من ولدك غيري صيح واحد بيهم يوكف كدامك واحجي وياه بروية وسكينه براحتك بعد

علي الهادي :: هااا اصففااد تنطي بيناا ابووي صاحك الك روح انتة

_ اصفااد تعاال لو اريد جاان صحت لواحد غيرك تعال انتة واوكف كداامي

اتقدمت ووكفت كدام عمي لمن شافني كام على حيلة وصار بطولي حد حد وباوع بعيني وحط ايده على راسي وكال

_ محلفك بابوك سامي انت جنت هناك ؟

جمدت بمكاني بعد ما حلفني بدون ما التفت لاحد ولا افكر اردفت ...

أصفاد الحق :: اييي جنت بس عمي ترى الولد كلهم مجانو هناك كل واحد جان ملتهي بشغلة بس انا وصيوان رحنا نتمشى والله وبقينا باطراف الاراضي ولمن هف علينا ريحةة دخلنا باتجهاهة شفنا الي شفناه واتصلنا بالشرطة ..

اندار عمي لخواني البقاية واردف ...

_ الكل يبقى هنا بس اصفاد وصيوان يجون وياي تعالو ..

بقى الكل بصالة واني وصيوان طلعنا وراه للبراني طب كعد ونحن كعدنا كدامة واردف ويانة بعد ما طلع ورقة من جيبة
جانت كلها دم وحطها كدامنة كسرت ركبتي لاتجاه كتابة الاحرف طلعت مكتوب عليها ..
【 يا عبد الحسن طلقتي فرغت وجثك همدت 】
رجع يباوع النا واردف صيوان

صيوان :: هاي نفس الكلام مكتووب قريناه على

_ اعرف اعرف جانت موجود على الجثة ادرريي

اصفاد الحق :: انت مجنت ويانه شلون تعرف عمي ؟

_ عبد الحسن انة ولك

صيوان :: شنو هسة خالي ؟

_ صيوان الموضوع يمك انت ضابط وانا مابية اخاطر واعبر خلص اكو من يريد يتهدد بينا وهذا تهديد رسمي انا بالمركز كلت ما اشك باحد بس الصدك لاا اكو هوواي ابراسي واتوقع هاي الحركات الجيفة منهم

صيوان :: من هم بس كلي عليهم اخذهم لتحقيق كلهم واطلع الكضة والمضى منهم ونعرف

_ هوواي براسي لان هواي اعداء الي ونص منهم اتوقع هيج رد فعل ..

اصفاد الحق :: يعني هسة انا مثلا حاقد على شخص اروح اكتل واسوي هاي السوالف ؟؟

_ كلشي يصير وكلشي يسووة بهاذا الوقت راح ادزلك الاسماء مالتهم وشوف شغلك وياهم وسالفة روحتكم لهنااك عبرتها بمزاجي طايحة الكم لسلامتكم ... غداكم الشر تصبحون على خير

طلع عمي وراح وهوة جان يريد يطلع لنجف حتى يزور ابوة
واني بقيت اباوع لصيوان واردف وياي ...

صيوان :: انكضت موو ؟

_ ما كضة شيي هسة يصير سالفه ويطلع قصة روحتنا من عيونا عمي وانا اعرفه

_ اووف هسة ما يبيعهااا اذا ميريد احد يوصل ليها

_ وليش يا مخبل ابن مخبل يشتري هيج كاع مغصوبة ؟

_ ليش هااي الكااع مغصوبة ؟

_ جا متدري ؟

_ لا والله ماعرف توني من حلكك

_ جا متشوفي هاي الكوارث التصير بيها وبعد وبعد راح ناكل منها مصايب

_ جاا ميحركها او ينطيها ليش مخليها هيج دامك نكول مفصوبة

_ عبد الحسن هذااا متعرفة تحس الواحد يكفر بالله اذا بس انطاه رئي

_ ههههههه هسة هوة وين راح ؟

_ من مساع كال يريد يروح لنجف تلاكي طلع وراح لهناك تعال نفوت جوة

_ امشيي

اخذت صيوان ودخلنا جوة وطفرو النا الولد وكفو كدامنا يتسائلون ....

علي الهادي :: شصاارر ؟؟!

صيوان :: مصار شي رجع سالنا كم سؤال وراح

حامِد المتقين :: وين راح ؟؟

_ طلع لنجف

علي الباقر :: اهم شي ما غلط وياكم بالحجي ؟!

_ لااا والله محجة شي ...

علي السجاد :: الحمدالله ..

_ يلا انا اترخص اتاخر الوقت

المعتز بالله :: وين رايح خلنا ننام كلنا هنا اليوم ؟

_ لا اعزيز ماكدر المرة لوحدها بالفندق رايح الها

علي الباقر :: بالك لنفسك خوية

_ حبيبي يلا مع السلامة

المرتضى الامير :: الله وياك ..

المعتز بالله :: اوصلك الباب دقيقة

اصفاد الحق :: وانا هم رايح امي لوحدها ..

الفاروق الاعظم :: اروح وياك انا

علي السجاد :: كمتو تتطافرون واحد ورة الثاني ..

حامد المتقين :: واني هم راح اخذ اخي ونروح هههههه تضل يمكم العافية ..

علي الهادي :: واني صاعد اناام تعبت

"" علي الباقر ""

صعدو كلهم والباقين راحو هيج بقيت اباوع لعلي السجاد وردت اصعد لزم ايدي واردف ...

_ بعدك زعلان من اخيك الجبير ؟

_ مو اني الازعل من روحي

_ جا شمالك وياي كلامك جااف

_ ماكو شي سجاد بس تعبان صاير ما انام عدل حتى صلاوات الفجر صاير اضيعهن يعني باختصار حيل متخربط ف اريد ارتااح

_ يعني ما بداخلك شي علية ؟؟

_ شساللفة علي السجاد ترى انااا علي الباقر ويني وين اشيل بداخلي على اخووي انا على عدوي ما اشيل

_ شوف علي الباقر انا ادري لينا جاي تغلط هواي بس اعذرها هية مجانت هنا ومتعرف تتصرف وفوك هذا حامل اتحمل مرة اخووك لخاطر ..

_ لا تفكر يخووي ميصير خاطرك الا طيب ..

_ وين رايح انت هسة ؟

_ رايح للكراج اششوف السياره من زمان ممشغلها اريد اغسلها

_ بالك لنفسسك ..

_ رايح اغسل سيارة ما احارب

_ هههههههه حتى لوو بالك لنفسسك

_ ولا يهمك يابعد اخووك

عفت علي السجاد وطلعتت لطارمة وبعدها طلعت للكراج وشلت الغطى عنه وبديت اغسل بسيارتي .....

"" رحمة الزهراء ""

نزلت للمطبخ وسويت تمن احمر بالخضراوات الشي الي يموت علية المعتز بالله ولان ما تعشى ويانه عرفتة ممتعشي لان هوة اكتلي ولا ياكل من المطاعم يموت من اكلهم ف صبيت الاكل وصعدت لغرفتة فوك بعد ما استأذنت ودخلت عليه
نزل كعد بالكاع وحطيت الصينية يمة وكعدت على الجرباية يمة واول ما اكل اول لكمة اردف ...

_ يوويلييي عاااشت الايدييين عساني ما انحرم من هاذا النفس

_ الف عافية يروحي اكل على كيفك لا تغص محد يركض وراك

_ كلش طيب

_ عااافيةة هاافية هني ومري

_ خير شيخة احس اكو بحلكج حچي كوولي شمالچ ؟

_ اريد اسأالك سؤال صغير ولا تعصب يعني انت بكيفك تجاوب متجاوب محد يجبرك واني راح اتصرف كأن ما لمحت ولا شفت شي خوووش

_ ايي احچي شنني !؟

_ الصبح واني وي زُبير بالسيارة لمحتك مريت من يمنا انت بسيارتك وصاعدة وياك وحدة بنية منهي هااي ؟؟!

_ فهههممتت هسساع انتي مسويتلي هذا الاكل واني عبالي رف كلبچ علية تالي طلعتي تردين تعرفي منهي البنت الصاعدة وياي

_ اييي يعني شفت اخووي الصغير وياه وحدة اكيد اخاف علية

_ مو طفل انا

_ زين سؤال هية بنية لو مرة ؟؟

_ شنييي السؤال الخااايس هذااا ؟؟؟

_ اعزيز حقي اسالل واخاف عليك كتلك انت اخيي الصغير ومالي من بعد الله وامي غيرك لاتنسى انت وحيدي بهاي الدنيا وماريد باجر لو عكبة هاذي تطلع مو خوووش وحدة ولنها متبليتك لا تتفاجئ وهيجي تباوعلي الدنيا صارت كلشي يصير بيها واصلاً صاارت النسوان تخوف اكثر من الزلم

_ اتفهمتج بس لا تخافين هااي فقيرة وعلى كد روحهة

_ اني لمحتها هي مو محجبة صح ؟؟

_ ايي

_ شني منو هاي شلون تعرفت عليها انت شنو اسمها شكد عمرها ؟؟!

_ مجنت اعرفها صدفة مرت من يم محلي وتحارشو بيها كم واحد رحت وتضاربت وياهم وهية لزكت الي صارت تكلي هاي اول مرة واحد يدافعلي انت اول رجال حقيقي عندة غيرة اشوفه جنت اضحك على كلامهة بس من عرفت ان اخوها بايك فلوسهم وكلشي وشارد للخارج وعمامها وخوالها مسلبين حق امها وابوها بالورث كلت حقها من تحجي وياي هيج وتلزك بية لان دافعت الها

_ مسكينة الله يصبرها على ما ابتلاها ..

_ صددك مسكينة وفطيرة همم

_ زين اهي شنو اسمها

_ جرح

_ اسمها مو لقبها

_ هي اسمهاا جررح

_ ياااا شهللل الاسم اسم الله خلصت الاسااامي

_ هاي بعد مسميهم هيج هية جرح واخوها جراح ..

_ عائلة متجورحة ههههههه زين شكد عمرها ؟!

_ عمرها 25 سنة

_ ............... ............

_ اعرف شتفكرين هسة اعررف

_ اعزيز بعمر امك هااي اصلن فشلة وعيييب حتى تفكر بيها هاي باجر اذا صار شي الله كريم متكدر توكف كدامها كمت لو كعدت هية اكبر منك

_ شعلية بيها ليش بالج طاار شيخة ترى ما بيناتنا شيي ابداً والله مجرد بنية كسرت خاطري حبيت اساعدها لا اكثر ولا اقل

_ الله ينور طريقك ريحت كلبي اشووة اذا بس هيج لان لو صدك وطلعت عاشكها جان اشتعلت اهنية حرب عالمية امي وعمي يصيحو متاخذها عجووز النار وانت تصيح اريدها ..

_ لا مستحيل يصير هيج شي وياي لا تخافي حطي رجلج وايدج بمااي باردة

_ خووش حچي ارتاح كلبي هسة يلا اخليك تكمل عشاك رايحة اني ..

_ فضوليية حيييل ههههههه

_ دام المووضوع وصل الكم اكيد اصير رب الفضول هم ..

_ دام ارتاحيتي وسمعتي الي تردي تسمعي توكلي وخليني اعرف شلون اترس بطني كاطعني الچوع

_ تمام اكل على كيف هاك هااي دولكة الماي

_ چثري بيها ثلج ..

_ متروسة ثلج متشووف ؟

_ ايي حطي بعد اريدةة يكزكز تكزكز

_ لاتروح تمرض يمعود

_ انت موچودة وداويني چا المن سويناچ دكتورة وبالك عنك ؟

_ الوقاية خيراً من العلاج هااك حط كمية الثلج الانت تريدها طالعة اني

_ الله وياچ عيني ومشكورة على الاكل الحلو مثلچ

ابتسمت بوجهة وطلعت واني بطريقي للغرفة فتحت تلفوني واتصلت على زُبير بعد ما شفته شايف المسچ مالتي وممجاوب ..
وانا ادري بيه بالواجب ههسة منايم وتعبان باوعت لساعة لكيتها 12:56 ص
دخلت للغرفة ورجعت اتصلت علية بعد ما رفض مكالمتي الاولى فتح الخط وسمعت صوتة يكول ..

_ هاا علويتي خيرج لهسة ما نايمةة يمعودة مو زين السهر لعيونچ ..

ابتسمت حييل يعني فوك مضايج مني شلون يرد علية وين الكي هيجي رجال يالله جمال وحب وكلشي منطي الي
سكتت ومجاوبته ورجع واردف ...

_ الووو هاا علويتي صااير شيي ؟؟

رديت علية

_ لاا مصاير شيي حَبيبي

_ لعد ليش متصلة وليش منايمة ؟

_ جنت افكر بيك واتصلت

_ وشبية انا هياتني كاعد بالواجب يخلص ب6 الصبح ارجع للبيت انام مابية شي لا تفكرين بية

_ زُبير انت ضايج مني انا اعرف

_ دا احاول انسى لا تذكريني لا اجي احرك عشريتج واحرك حامد ويياج

_ انت فهمتنا غلط تعرف النية انت وتعرف نحن شنو وشلون تربينا تعال اكعد ويانة وشوف ولك اتربينا على مبدأ اخووي واختي

_ رحمةةة رحمةةة كل هاذا ما يعني الي ولا يهمني الي يهمني ويعنيني انتي مررتي هسة وبركبتي وايي مخلوق جان لوو ابوج يتدنى يمچ لو يحط ايده على راسچ و الخليفة علي ادفنة بكاعة فهمتيييي

_ خلص زُبير يعني ما بقى شي للعرس بس 48 ساعة وتريد نخلصها زعل ومعارك شخلينا لبعد العرس ؟؟

_ بعد العرس العز والدلال حبيبي ذكرتيني اكلچ

_ شنو يروحي !؟

_ وين تردين اول 10 ليالي ؟

_ صدك خليت الختيار الي ؟!

_ ايي والله لعد شنو انتي هسة كليلي هم الحك ارتب الوضع

_ چا اسمعني وين اريد اول 5 ليالي بكربلاء اريد هيج بفندق اول ما ارفع البردة عن الشباچ اشوف الحرمين

_ غالية والطلب غالي تدللين بسس هييجج بسس هااي

_ اييي والــــ 5 الثانية انت تختار حتى نجمع ذكريات حلوة

_ زين لعد وعيونج الا اخلي هاي الـــــ10 ليالي احلااااا ليالي بعمرج كلة

_ اهههه وليش بس هااي اليالي راح تصير حلوة اصلن اني راح اخلي كل يوم النا احلا من الثاني والله

_ يابعدهم كلهم اروحلج فدوة اني وعشيرتي واهلي و كلهم

_ اخليك ترتاح

_ بالواجب انا ويني وين الراحة بس انتي روحي ناامي يروحي

_ تريد اسهر وياك ؟

_ لااا اريدج تناميين مبقى شي للعرس ماريد يطلعلج هالات .

_ اممم يهمك جمالي ؟

_ السهر مرض تهمني صحتج

_ ززين انت هسة مو سهران

_ علوييتيي

_ ههههههه خلص خلص التريدة رايحة يروحي

_ يلا حبيبي تصبحين على خير واحلام سعيدة

_ تصبح على خير

سديت التلفوون وفتحت الدولاب وطلعت بدلة العرس ياارب شهلجمال هذا صار عمري ²⁷ وهستوني راح البسها ممصدكة وراح البسها لواحد كلبي يدك اله واريده
اريد اكضي كل العمر وياه ..
بدلتنا انا وام البنين جانو لون ابيض حييل والزمن خلى وحدة منها يصير لونها احمر وبدل متصير بدلة فرح صارت بدلة حزن
بدل ما نلبسها بعرس لبسناها على تابوت .......

رجعت ضميت البدلة وغطيتها عن التراب ورحت نمتت باقي بس 48 ساعة ويتحدد مصيرنا هاي هيه ماكو بعد بيت اهل نصير مسؤليين عن بيت ورجال راح نتعب بس لازم نتعلم شلون نصبر ...

"" طيبة الزهراء ""

ما باقي بس يومين خلص الوقت جاي يداهمنا للعرس ..
اخذت صور لتسريحة الشعر وصور للمكياج وصور للفستان ورحت لفوك دخلت لغرفة اريج الله لكيتها غاركة بنومها طلعت بهدوء ورديت الباب على كيف
واول ما التفت طلع بوجهي علي السجاد فززيت وهوة ضحك ...

_ يمةة بسسم الله الرحمن الرحيم

_ هههههه اسم الله الزهرة القران شمالج شفتي طنطل كدامج ؟

_ لا والله بس ما ضنيت راح اشوفك لهذا نزييت ..

_ اهاا اييي وانتِ شكاعد تسووين بهذا الوقت تفرفرين بالبيت جنج جني

_ انتَ الي شعندك عايف مرتك وجاي تفتر اهنانة ؟؟

_ انا عطشت ولكيت الماي مخلص اليمي نزلت اشرب ماي وهسة صاعد يلا اجة دورج كولي شعندج ؟

_ اجيت اشوف اريج الله

_ علموود ؟؟

_ علموود هذا السجل سحبت صور وحطيتهم بي صور

_ صور شني ؟

_ صور لغراضي للعرس واريد احد ينطيني رئية ويختار وياي

_ ما فهمت صور شنوو يعني ؟

_ شبيك صور مال مكياج وتسريحة وفساتين العرس كرب واريد واحد يساعدني بذوقة

_ تثقين بذوقي ؟؟

_ جنت اثق بذوقك بس من اختاريت لينا غسلت ايدي من ذوقك

_ هااا ولج هههههههه

_ اعذرني بس هاذي الحقيقة مرتك ما تنبلع وياي ابدد ما تنجرع مو الية

_ همززين ان شاء الله الكُل يشوفها مثل متشوفيها انتي وعلي الباقر وغدير الله

_ ليش ؟

_ لان اغار عليها و ماريد احد يحبها غيري

_ من هاي النااحييةةة لا تخاااف محد يبلعهاا ابدد

_ ايي احسن خليني بس انا بالعها

_ الله يساعدك دير بالك لا تغصص ترة لينا ضد الهضم .

_ صددك اشو انتي كاعد تحجين على مرتي كدامي وهااي عوود انا اريد اساعدج بالاختيار

_ وانا ما حجيت شي جذب هاذي الحقيقة وانا اختك المهمم هسةة

_ روحي يلا حتى مساعدة مَ راح اساعدج ولا انطيج ذوقي

_ وعساس ميتة على ذوقك اني لا الله يخليك تعال اختارلي اذا مختاريت الي ما احضر العرس

_ شنوو هذا اللسان ولج ؟

_ اخخ اخخخ اذانييي

_ موو بعمرج انااا السانج اكصة الج

_ اااخخ علي السجاددد وجعتنييي

_ احسسسن تستاهلي حتى مرت الثانية تكصي السانج وي الاكبر منج ..

لزمني من اذاني وكصرني منها وجعني حيل بعد ما حجيت وياه وخر ايده عني وبقى يباوع الي وهوة مضيك عيونه وكال ..

_ صدك وجعتج ؟

_ جا مجذبةةة عليك

_ اسف

_ ماااا

_ اسسسف

_ مااا مااا لا تحجي وياي بعد طلعت انت ومرتك ما تبلعوون ..

_ ههههههه متوالمين انا وياها

_ رووح يلا ماحجي وياك بعد

_ تعاي لهنا اسسف يلا اعتذرت هوواي

_ خللص مصاار شي

_ يلا دام اذيتج رااح اساعدج بشي ..

_ الي هوة

_ انزلي لجوة لطابق الارضي تلكين علي الرضا كاعد يلعب بوبجي اسحبي منة التلفون وطفي واكعدي يمة ترى اخووي علية ذووق يمووت

_ صددك تنصحني بية ؟

_ انصح انصصح روحيلة

_ خووش نازلة الة

_ ززين تسووي

_ عوود شكرااا

_ ولوو جُعدتنا تدللين ...

عفت علي السجاد ونزلت الدرج لكيت علي الرضا كاعد بصالة ..
اجيت من ورة وسحبت التلفون منة اندار الي وبقى صافن بوجهي طفيت التلفون وشمرته على الكنبة الثانية وكعدت يمة وهوة بس صافن ما بدر منه ولا تصرف لان ميكدر يجيسني هههههه لو يسوي الي شي عمي يكلب البيت على راسة ...

علي الرضا :: خير ان شاء الله ..

_ مساعدة لاخيتك الصغيرة المحتاجة مساعدة

_ شنوو ؟

_ اختتار الي

_ شختتار ؟

_ شووف هذني صور فساتين اختار الي واحد وتعا هنا اختار الي نوع المكياج ونوع التسريحة ..

_ منو العروس هية ؟؟

_ شني متعرف شبيك مكبسل ؟

_ سالت جااوبي منو ؟

_ ام البنين و رحمة الزهراء

_ ودام ام البنين ورحمة الزهراء يعني مو طيبة الزهراء انتي شكوو شادة روحج هلكد وجاي تحضري اليشوف يكول انتي الراح تعرسي ؟

_ هاي شبيك وياي غير اني اخت العرايسسس ؟؟

_ هاا اختهمم ولازم تطلعي احلا منهم ؟

_ متختار اليي اووي عابتلك قححط ذووق هسة اشوفلي غيرك يختتار احسن منك ولي عني رايحة لعمي احسلي

_ تتعااييي

_ خييرر ؟

_ تعااي وين ترحين بنص الليل هذا ياهو كاعد اني اختار الج تعالي الي

_ امم بدوون منية تختار وانت ساكت

_ اصلن راح اختار واني الممنون صاارت بيها طااري عمج

_ الخووف يعمي الشوف هههه

_ اكعددي وانتي ساكتة ترة ما اختاار

_ هاااا مو كتلك بدووون منية انييي راايحةة لعمييي ما بيها مجاال بعد

_ تعاااييي يمكمووعةةة عمج مو اهنااا تررى

_ اشنوو وينة جا ؟

_ طلع لنجف

_ يوووو

_ هههههههه تعاي يلا واحترمي نفسج خليني اختارلج ونخلص اريد ارجع اللعب

_ تمام بس علي فدووة اختيار حلو بدون مبالغة وهمم اريدة بدون منية يعني اختار انت ومنجعم

_ بدون غلط ويلا تعاي لا اسحلج

_ اجيييت يلا

_ افتحي السجل اشوف شنو بية ..

_ هااك كلب بي وشوف ..

_ اممممم زززين ...

ب

قى علي الرضا يكلب بالصور ويتمعن بيهن ويشوف نوع فستان ويرجع يشوف صورة للمكياج ويرجع للفستان يعني جان ينسق الي من كلب ورب ..

"" علي الباقر ""

واني جنت صاعد لغرفتي مريت على غرفة أهلي وابوي طلع لنجف لان طرة على بالة جدي فَ راح حتى يزورة
مريت من يم الباب و سمعت صوت بجي وشهكاات جاي من صوب الغرفة اتقربت وحطيت ايدي على الباب هاي امي كاعد تبجي ؟؟!

فتحت الباب عليها بدون استأذان ودخلت
لكيتها كاعدة وحاضنة القميص والصور وتشم بيهن وتشهك بالبجي اول ما شافتني سووت روحهة ساكتة مسحت ادموعها ورجعت الصور لفتهن بالقميص وحطتهن على صفحة

اتقدمت الها بخطووات حيييل ناشفة وعصبية
كعدت يمها واهي مدنكة راسهة تمسح بدموعها
اخذت بيدي ورفعت راسها واردفت واني اتلمس بخدها الجان رطب من الدمووع

_ جااي تبجيين علوية ؟؟

دارت وجها لجهة الحايط ورجعت مسحت وجها بأثنين اديها وباوعت الي وابتسمت ابتسامة جاانت جذبية وكالت ...

_ لاا يمة لا اوليداتي انتة بس بالي يم ابوك افكر بي ومحسيت الا دموعي تنزل

عدلت كعدتي وخليت وجهي لكدام وابتسمت وابتسامتي جانت تسليكية
كمت على حيلي بدون ما احجي ولا ارد على ردها الي
اخذت امشي وصرت كدامها وكفت ومديت ايدي اخذت القميص ونفضته وطاحن الصور
بالكاع دنكت شلتهن وبقيت اتنوع بيهن ورفعت عيني واردفت وياها بعصبية اول مرة اعصب على امي بس لان هية عندي خط احمر ماريد احد يزعلها وعصبت عليها لان شفت هية مزعله روحها

_ عللويةة صاايرة تجذبيين علية وانا علي الباقر ؟

اخذت تمسح بادموعها الصارت تنزل على اخدودها عشرة عشرة
وهية تجر بالنفس انتضرت منها الجوواب والصدك ردت اسمع جوابها حتى نار روحي تطفي ليش هيج مسوية بروحها
كاعدتلي تخنك بروحها وتبجي بجي نحيط
ومكطعة افادها لخاطر خلك اثنين لا اهتمو الها ولا سوو قيمة لحبها عافوها وراحو وصار سنين لا متذكرينا ولا كايلين خلنا نسال ونشوف السادة وين صارو ما صدكو على الله راحو والروحة روحة
وهسة العلوية حاضنة صورهم وتتنحب عليهم

لمن شفت ماكو جواب بس بجي

شمرت الصور يمها على الجرباية وانداريت حتى اطلع لزمت ايدي ورجعت انداريت الها وجانت غركانة بدموعها وحرارة كلبها واردفت وياي ...

_ اووكف سسيد برووح جددك لاتكوول لابوك محلفتك بيي لا تحجي شي

رجعت اتنوعت الها برفعه حاجب واردفت

_ ما اكلة على شنوو قصدج ؟؟

_ يمة لا تحجي وياه لا تكلة بموضوع هذني الصور

_ دامج تعرفي هاذي الشغلة غللط و تغثث ابوي حيل شمالج تسوويها شمواازييج ؟؟

_ موو بيدي ولك تحجي وعبالك السالفة بيدي ولك اني كللبب اممم كللب امم اناا لا تلوومني كاافي تعببت واني امثل كدامكم ممهتمة وان انااا ما حاسة بفراغ صح كلكم حولي بس احس روحي وحييدة احس بنقصص ولكم شمالكم وياييي ..

_ مراح اجاوب عليج علوية ..

_علي الباقر انت مراح تسولف شي واصلن انت لا فتت لهنانة ولا شفت شي موو يمةة اكيد مراح تحجي لابوك وتضر اميمتك اذا ابوك السيد عرف يطلكني والله ..

هديت ايدها وضحكت و مسحت لحيتي بيدي ورجعت اباوع الها واردفت ...

_ اسمعي علوية تردين تبجين تردين تلطمين ما عساااج تنصبين الهم فاتحة هنا طوول بعرض ااخر همي واخر تفكيري ومالي غررض اصلن بس خلي شي براسج العرس كرب وما بكالة شيي وفرحة أم البنين و علي الهادي و رحمة الزهراء عندي أهم من حتى روحييي مو بس أهم من ذول الزوج الحاطة اصورهم وتلطمين عليهم وهم لا شايفيج ولا سامعي بيج ..
باعي يمة عَدي هاي السالفة على خير وخلي العرس يمر مرور الكرام الله يعدي ان شاء الله كل حاجاتج ..

حجيت وياها هاذهِ الكلمات وطلعت ربدت الباب ورااي ونزلت لطابق الارضي لكيت علي الرضا كاعد وي طيبة الزهراء خزرتهم ووكفت ثواني وكملت طريقي طلعت للحوش ..

"" علي الرضا ""

بعد ما اختاريت وي طيووب كلشي رادت تكوم ولاحضت شلون اجة علي الباقر صاروخ من فووك وعيونه تجدح ناار باوعت الة بهاذا المنضر انا حتى من كتلة 【 هلاا اخووي 】
ما جاوبني خزرني وراح بقينا انا و طيبة واحد يباوع بثاني مصدومين هذا شبي هذاا ؟

طيبة رادت تطلع وراه واني منعتها وخليتها تصعد لغرفتها واني كذالك اخذت تلفوني وردت اصعد لغرفتي بس وكفت على الدرج والتفت على باب الحوش وكلت بيني وبين نفسي 【 ياا نومةة هااي ارووح اشووف اخووي 】

اخذت درب طريقي وطلعت للحوش باوعت للحديقة ما لكيت احد رحت للحديقة الثانية الخلفية كذالك ملكيت احد طلعت للشارع لكيت علي الباقر كاعد على الرصيف وجان يخفي ادموعة ويدخن بهلجكاير ...

رحت كعدت يمة واخذت الجكارة من ايدة ودست عليها برجلي
وبقيت اباوع علية واردفت ...

_ شنو صاير وياااك ؟؟

ما جاوبني جنت متوترر حيل اول مرة اكعد هيج كعدة وي علي الباقر رجعت وحجيت ويااه ..

_ متريد تحجيلي شنو صاير وياك ؟؟

كذالك مسمعت منه جاوب ورجعت واردفت !

_ انا اخووك من حقي اعرف افتح كلبك سولفلي شنو صاير وياك ؟؟

_ لحح لحح

_ ايييي كولي شبيك ليش هيج حالتك ؟

_ لحح لحح

_ علي الباقرر متريد تحجيلي شصاير وياك ؟

_ مصاااير وياي شيي شمالك لحييت؟

_ ما اصدك

_ وعسااك ما صدكت شتريد مني عووفني مالك غرض بية

_ شنني مالي غرض بيك اشوف وضعك هيج واصل مرحلة تدخن وتكلي مالك غرض تحلم انتة ؟؟

_ شتريد هسة ؟؟

_ اريد اعرف شنو صاير وياك ؟

_ تريد تعرف

_ اايييي

_ عادي اسالك سؤال رضاوي ؟

_ صارت بيها رضاوي سترك ربي

_ كووم ولك انككللع لجووة

_ هههههههه اشااقيكك وعلي احجي يروح رضاووي

_ وليي عن وجهيي

_ احجي هاي شمالك مغنددب احجي شمالك شني سؤالك ؟

_ مخزن بذاكرتك ذكريات وي علي الكاظم و علي الصادق ؟؟

_ مااعرف والله اذا عشت وياهم بس اتذكر جنت حيل صغير من هم راحو يعني ايي اكو بذاكرتي شي الهم بس لمحاات يعني موو شيي واضح جنت صغير بذاك الوقت ..

_ اهااا

_ شذكرك بيهم تواصلو وياكك رااح يرجعوون ؟؟

_ هيةةة ام......

بعدة ممكمل كلامة حسينا بالباب الشارع اندرع وطلعت طيبة الزهراء مخترعة وحاطة الشال عليك يا الله على راسهة وصاحتتت

_ علي الرضااا عليي الباقرر تعاللو الحكونيي العلوية مدري شجاهاا .......

************************

__ صَيحو عليَهم يَلـ تدفنون
مَن اگبورهم هَلبت يفَزون
هايَ الصوَر تاگل بلعَيون

يتبع ............