رواية احفاد السيد : الثار ( بأجزائها الإثنين ) الفصل الحادي والعشرون 21 - بقلم ​رُقَـيَّـةُ الْأَكْـبَـرُ

#الســــادة

" الرحلة الهادئة الاخيرة "

الكاتبة رقيـــة الــأكـبر

قبل كلشي اتركو تصويت ومتابعة لحسابي oo_ll13
وتعليق حلو مثلكم 💗✨

نبلش بالبارت ونكول بســم الله

.
البارت 36 "" الرحـــلــة الهـــادئــة الاخـــيرة ""

- ‏ عاشكها صاار سنين والدنيا داارت الردتها مرتي تصير عد غيري صاارت ..

‏- لا تنشد على الحال حال الخذوهه
بالحُب والعريس جتال ابوهه

::::::::::::::::::::::::::::::::::::::::::::

"" رُقيــة الــاكــبر ""

عج على السادة ذاك اليوم الفرح والضحكات الحقيقية
وبساعات احتفال النسوان جانو الزلم هم مسوين حفلة وجاي يودعون العزوبية .
وجانو كلهم لابسين دشاديش وكاعدين يدبجون ..

_ حبها زبير حبها ولتخاف من أمها أمها تصير عمتك بكليبها اضمك. .

_ علاوينا حلوه زفته بين عمامه واخوته ..

_ زوجنة علي الهادي وأخلصنا منه .. بقى اخوه الأكبر منه ..

علي الباقر :: هههههههه الي بيها نغزة هاذي الهوسة

المعتز بالله :: منهوس شي هيجي فارغ نحن

اصفاد الحق :: زُبير يا طير الحر شنهة الصيدة ..

_ يا عليوي طفي اللاله .... تره العين جتاله

زبير :: واني اخذت الرادتني وعفت لخاطرها كل بنات اولايتيي ..

_ انجب يل شامت كد ذراعه وعرس بيه

_ هاذي فرحتنا التمام فرحت كل العمام هاي فرحتنا الجبيرة فرحت كل العشيرة

_ امشو خل نتبارك لام العروستين
..و المعرس ابنها وكرت العين

المرتضى الامير :: هاي الرادها وهاي التمناها شيخة العلويات لنقيب جبناهاا

واستمرت السعادة وللان حامِد المتقين جان موجود ..
جان الوضع متحسس ابينة وابين زُبير بسبب المواقف الصارت ابيناتهم ..
وبعد ما كملو حفلتهم وصار الوضع هدوء
اردف زُبير

زبير :: انا اترخص .. شكراً هواي اتونست وياكم اول مرة هيج اندمج هلكد ..

علي الباقر :: فرحتكم هاي ..

علي السجاد :: ابقى شوية بعد ترى اليوم اخر يوم الك يعني تكدر تتاخر شكد متريد اليوم

_ ههههه لا حيل تعبت ولا تنسون باجر وراي سوالف وتعب هم اريد اجهز كم شغلة بالبيت

حامد المتقين :: ايي الله وياك

لمن لاحضو السادة طريقة رد الميرزا حامد المتقين وشلون نضر الة زبير حاولو يهدون الوضع ضحك علي الهادي واردف ..

علي الهادي :: اههه ايي والله كلام زبير صحيح نحن ناس باجر ورانا عرس مو فارغين مثلكم لازم نرجع ونرتاح ..

صيوان ;: صح الساعة اتاخرت خلينا نرجع

اصفاد الحق :: بعدني ما شابع ..

المعتز باالله :: امشيي عوود من تتزوج نشبعك ههههه

_ تردوني انتضر لمن اتزووج

علي السجاد :: جا شعبالك لازم تتزوج تشبع ..

حامد المتقين :: يلا الامير تجي وياي ؟

المرتضى الامير ;; لاا يخوي راجع وي المصطفى القاسم ..

_ خوش يلا شباب اني رايح ..

زبير :: وانا هم اشوفكم باجر ..

طلع زبير وطلع حامد المتقين و صار التقائهم بشارع وكف زبير يم سيارتة وضل يباوع ولمن شاف حامد المتقين فتح سيارتة وراح يصعد ييها اردف وياه بطريقة منرفزة ..

_ باجر عرسي .

التفت الة حامد المتقين واتقدم يمة وهو مبتسم ..واردف وياه

_ لصراحة يا زبير ما الومك اذا تفرح هلكد بالعكس افرح وكثر للان لو جنت تكضي عمرك كلة تنضف بروحك وتنضف بسمعتك ما جنت راح تطول اضفر وحدة مثل رحمة اني اكول هسة اركب سيارتك وبوجهك لاقرب جامع وصلي ركُعتين شكر لوجه الله

_ بعمري كلة ما فكرت اضر احد ودامك سئلت عني لحد ما طك راسك تعرفني كلش زين منو انا وشنو انا مو صح

_ زين وشتريد هسة ؟

_ صحيح كلامك لو اموت مجنت اكدر احلم اخذ وحدة مثل علويتي بس ماكو شي مستحيل هاي هسة هية مرتي وباجر راح تزفها بيدك الي ..

_ خوش حچي بس لاتنسى النار والثلج ما يجتمعون
وانت ناار و شيخة ثلج ولا بد يجي عليك يوم ..

_ وراح اكسر هاي القاعدة ووياها اكسر عينك واراويك شلون الثلج بذذاات نفسة راح يصير بحجري ..
وما تبتعد عنـي ان غداً لناضرة قريب

صعد زبير بسيارتة وراح وحامد بقى واكف بمكانة ولمن طلع علي الباقر لاحض علية شلون واكف واجة لي يمة واردف وياة ..

_ ميرزا ؟

_ هلا علي الباقر

_ صاير شي ؟

_ لاا ليش ؟

_ مدري عنك سيارتك ذيج هية ليش واكف هنانة ؟

_ جنت احجي وي زبير

_ متعوفة بحالة شبيك وياه

_ علي الباقر تشوفة يستاهل ياخذ شيخة ؟؟

_ باع انا اعرف زبير من ايام الجامعة صح اهلة مو خووش وابد مو خووش بس ثق بية هوة زلمة كلف
ينشد يية الضهر ولهذا انا ماعارضت الزواج هذا واتغاضيت عن سمعة اهلة لان شايف زبير وعايش وياه .

_ كلبي يتفطر جااي ..

_ حاس بيك

_ وشلون حاس بية ؟

_ حامد انا الكلش زين اعرف شعور انك تحب وتشوفة كدام عينك بس ايدك متطولة ولا السانك يكدر يلفظ وياهَ شي حتى لو شفتهَ راح يروح لغيرك متكدر تسوي شي

_ انا هسة اكتشفت شيي مهم

_ ههههه وشنو هاذا الشي ؟؟!

_ اكتشفت ان نحن اقوياء بكُلشي الأ الحَب ..

_ ياخووي الدنيا كلها اتخبلت من الحب تريد نحن نبقى اقوياء يمة ليش هوة اليفارك حبيبة يبگة بيه شي ؟ .!!

_ مايبگى بيه شي أسالني انا شكلي وباجر راح امشي بزفتها

_ راح تضل اسير بمحبتها هيچ

_ عادي اتحمل وراح اناطرها عمري كلة

_ روح للبيت ارتااح ولا تفكر حاول هيچي يمكن بس هاي الليلة صعبة عليك بس لازم تتقبل الوضع ..

_ باجر انا عندي مأتم وانتم عندكم عرس راح ازف شيخة واشيع كلبي ..

ترك حامِد المتقين علي الباقر وراح صعد سيارتة ورجع لبيتة وبقى علي الباقر يفكر بكلام حامد ويحط نفسه بمكانه لا سامح الله وتزوجت طيبة الزهراء غيره ومجانت من نصيبة شنو يسوي ؟؟!
كسر حاجز تفكيرة لمن اتجهة لسيارتة وراح لبيتة الثاني حتى ينام عدهم لان واعد ابنة ينام اليوم وياهم ..

بالجهة الثانية ام البنين ورحمة الزهراء صعدن غيرن ملابسهن ولبسن بدلات لون احمر ونزلن كعدن بصالة ..
والعلوية جابت الحنة ومدت ايدها ام البنين
وامها فاطمة الزهراء حطت الحنة الها وحطت فوكها ليرة. ذهب وربطت ايدها وكذالك سوت باليد الثانية
ورحمة الزهراء سون وياها نفس الشي وامها هية الي حنتها .
وبين ما جان الكل ملتهي بالحنة ومتنومس استغلت الفرصة طيبة الزهراء ورحت حطت شالها على راسها ولبست صاية فوك بدلتها وطلعت ..

راحت لشارع الثاني وشافت الخرابة راحت وفاتت الها ولكت الرجال منتضرها هناك اول ما شافها فز من مكانة .. وراح لي يمها وصار كدامها ..

:::::::::::::::::::::::::::::::::::::::::::::::::::::::

"" طيبة الزهراء ""

طلعت من البيت ورحت انا متهورة ببعض تصرفاتي ومررات اصلاً اتصرف بدون تفكير ..
لمن دخلت لكيتة موجود اول ما شافاني اجة. ليمي وابتسم ..
وانا جنت حيل متوترة واردفت وياه ..

_ ليش ردت تشوفني هنانة ؟

_ ماكو غيرج راح يسمعني

_ شنو مسوي انت ليش هيج وضعك

_ ماعرف

_ اسمعني انا ماعرفك ولا واثقة بيك اصلا احجيلي كلشي وكأن جاي نتعرف من جديد خووش

_ خووش اسمعيني

_ أحچي ..

_ أنا علي الصادق عبد الحسن عمري 28سنة
مصارلي اشهر انا وأخوي راجعين للعراق ..

_ لييش انت بعد عندك اخ ؟؟

_ ايي ترى ابوي قبل لا يصير عندة علي الهادي وعلي الرضا توأم جنا احنا توأمة انا واخوي التوأم علي الكاظم ..

_ دقيقة مجاي استوععببب استوعبنــي

_ شبيج شنو الي ما ستوعبتــي ؟؟

_ هسة اذا ابنة لاعمي وعندك اخ توأم وينكم انا عمري كلة لا شايفتكم ولا سامعة عنكم ولا لمحت احد جاب طاري بأسمكم

_ اكيد مراح تسمعين خوف من ابوي لان بذاك الوقت ابوي اتبرة. مننا وحلف يتبرة من اي شخص يحاول يتواصل ويانة قسى قلبة علينا وخلانا نصير قاسيين ..

_ ليش اتبرة منكم ؟ واصلا انتم من يمتا مسافرين ؟!

_ صاللنا تقريبا 10سنوات بألمانيا سافرنا بعمر 18سنة

_ زين شنو سبب عمي اتبرة منكم ؟؟

_ طيبة طيبة هاي السالفة طويلة عندج وقت نسولف بهاي التفاصيل ؟

_ لااا ابد ماعندي واصلا لازم ارجع هسة بلكوة خطفت روحي واجيتك وخلص وقتي

_ تمام انتضرج باجر بأي وقت تجين انا هنا

_ اذا كدرت اطلع

_ ليش هلمكياج وهذا التزين اكو شي بالبيت ؟

_ ايي عندنا حنة وباجر عرس

_ عرس منو ؟

_ طلع ايدك واحسب وياي عرس بنت عمتك أم البنين
وعرس اختي رحمة الزهراء وعرس اخوك علي الهادي

_ الله ام البنين كبررت وراح تتزوج البارحة عايفها عمرها ثمان اسنين .. علاويي هم شوكت كبر وهسة امي تكر عينة وتزوجة

_ كبرنا الوقت يمشي ترى

_ رحوومة هذا اول عرس الها لو تزوجت قبل لان هية. من عمري انا وحامد المتقين !!

_ لااا هذا اول عرس توها ففكرت تتزوج

_ اوو شعجب هلكد اتاخرت ؟

_ بعد رحمة وبكيفها

_ اخواتي غيمة اريجة !!

_ اريج الله بعدهي ممزوجة وغدير الله اتزوجت وحالياً حامل

_ اههههه صددكك تحجين !!!!

_ والله العظيم

_ طيبة ضروري اشوفها

_ صيحني طيبات لا تكلي هيج طيبة وادبرها الك احاول

_ خووش طيبات الورد ..

_ يلة رايحة انا

_ انتبهي لنفسج

_ باااي

_ في آمان الله ..

عفتة وطلعت ولمن وصلت لركن مالتنا شفت السيارات واكفة ببابنا واكفين المعتز باالله وعلي الهادي وعلي السجاد وعلي الرضا وادركت ان اذا طبو راح يقفلون الباب
يعني انا لازم ادك الباب حتي يفتحو الي بقيت واكفه ورة البيت واني اعض باصبعي من الخوف .
لحد ما رجعت مديت راسي شفتهم فتحو الباب و فاتو لجوة اتقدمت بخطوات مريبة وكفت كدام الباب وطلعع توقعي بمكانة قفلو الباب
واذا دكيتة هسة ليفتحو الي والمعتز باالله عرف انا طالعة والساعة 23 : 2 ص
وعلــي الا يخلــي العرس فاتحتــي ..
بقيت اغمض بعيوني حيييلل واني ارجف ومادري شلون تذكرت علي الباقر مجان وياهم ردت اتصل علية لان عندة مفاتيح احتياطية باوعت ليدي لكيت روحي عايفة تلفوني جوة من كبر لفنيييي اني اجييب المصايب لرووحي خرب حضي الفگر ..
انداريت لورة بيتنا وشفت ماكو كدامي طريق الا اطفر من الحايط باوعت لشارع لكيتة يصفر ولا نفس بي وكذالك مابي كامرات استغليت الفرصة
نزعت صايتي وحجابي وحذائي كلهن وشمرتهن كدامي ورفعت فستاني وكمشت بالحايط للحديقه الخلفية وصعدت على الحايط وطفرت لجوة ارضية الحديقة الخلفية محدديها مسوين لها مثل السياج من طابوك من طفرت وكعت بالكاع وطكت رجلي بالطابوك ونشكت رجلي !!!!! واضافري لان اطوال واني كمشت بالحايط

وقويت الكمشة مالتي حتى ما اوكع اضفر الاصبع
( السبابة ) رجع لورة وكام !!! ضل يجري دم و وجع طيح حضي اضفري مخلوع ورجلي مشكوكة !!

حتى اليسوون وياها تحقيق وتعذيب متعيش نفس الي عشتة ..

شلت غراضي وحطيتهن على المرجوحة وكعدت وضليت اباوع لروحي ايدي تصب دم ودم رجلي ترس الفستان رحت للحمامات الخارجية ودخلت عليها نزعت فساتني وغسلت رجلي وايدي .
ورجعت بدلت وطلعت لغرفة الضيوف الي نحن أوردي موفرين بيها كلشي حتى الضيف من يجي ميحتاج شي ويطلبة كلشي يمة ..
دخلت عليها ورحت للأسعافات الاولية اخذت لزكة وحطيتها لاصبعي
وعقمت جرح رجلي وضمدتة ..
وطلعت مكملة كلشي بس جنت اعاني من قصة الدم الي على الفستان !!

هو انا مفضوحة مفضوحة خليني اتحمل فضيحة شي صغير ولا انفضح فضيحة مالها والي ..
دخلت لجوة واني حاطة الصاية كدامي مغطية الدم وصلت لدرج لزمتني امي واردفت...

_ وين جنتي توني اسال عليج

باوعت الها وضحكت جذب واردفت

_ يمة يعني وين اروح ادخيل بختج جنت كاعدة بالحديقة اتنفس شوية صار عندي اختناق ..

_ شنو هذا الدم العلى فستانج شكوووو

_ صووتج افضحيني بعددد افضحيني
هذا دم طمث متشوفيني صاعدة لفوك اريد اغير ..

_ خرعتييينيي عبالي صاير وياج شي اصعدي غيري واذا وجعتچ بطنچ حيل يايمة روحي لغرفتي وابلعي حب

_ لا ميحتاج متعودة على الوجع صاعدة انا

_ بالج لنفسج يمة اذا حتاجيتي شي صيحيني

_ ليش تعامليني كأن اول مرة يمة ترى عمري 15 مو تسع اسنين يعني صالي وياها سبعة سنواات معاشرتها ومتعودة عليها .

_ انجبي بهاي السوالف ماكو جبير وصغير بكل مرة تجي كأن اول مرة مثل مكتلج هسة اذا حتاجيتي صيحيني واذا هيج اخذذ حب من غرفتي

_ تماام عن اذنج ..

عفت امي وصعدت لغرفتي غيرت فساتي وبقيت ما نزلت ابد لان خلص خلصت الحفلة حطيت راسي على المخدة وغمضت عيوني وححاولت انام ..

"" جمـــيلـــة ""

صرت اجهز لعرس السادة واني مجان بخاطري اروح بس لان رحمة غالية عندي وهم البشير طلب مني احضر لان هوة مموجود ف راد وجودي انا ..
واني بالغرفة جاي اجهز الغراض لباجر للعرس دخلو عليه شبر و شبير ..
ووكفو كدامي كل واحد شايل قاط ..

جميلة :: ها يثمر عمري

شبر :: نريد رئيج ..

_ بشنو يروحي ؟؟

شبير :: يمةة نلبس هذني القوط لو نلبس ذني الدشاديش ؟

_ لا يروحي القاط محلو عليكم انتم وي هذا جسمكم يلوك الدشداشة يروحي ..

شبيير :: هااااا شكلتككك والله يمة كلتلة خلنا نلبس دشداشة وهوة ما قبل ..

_ لا يروحي حلوة عليكم تطلعون صاكيين ..

شبر :: على ابونا غير ..

_ هاا ولكم وليش مو علية شنو انا محلوة ؟

شبير :: انت ماكو بجمالج متشوفي ابوي طايح عليج

_ ولكك هههههههه

شبر :: يعني هسة. نلبس دشداشة ؟

_ اييي البسو هندام ابوكم ..

شبير :: شكرا لرئيج يابعد روحييي

_ تعال لحضيي يابعد كل اهلي وناسي ..

اخذت شبر وشبير لحضني و ودعوني وراحو يكملون اغراضهم واني اخذت تلفوني واتصلت على سائد حتـى اشوفة وين وصل ماكدر اورط نفسي وياه واخر شي هوة ميكدر يسوي لي شي .. ..

وبعد ما رد علية

قصطير :: ياهلا بَ جميلة الجميلات ..

_ شصار وياك ؟

_ بخصوص ؟

_ لا تتغافل وياي ساائد بخصوص شنوو يعني بخصوص اهلي

_ وصيت زلم وبعدهم يراجعون

_ وشكد ياخذ وقت بعد وياكم ؟

_ مادري بعدنا نسال بس ما نتاخر اكثر من اسبوع هيج

_ اسمع هن يومين ويرجع البشير وانا راح ارجعلة ما اسويلك اي شي اذا ما لكيت اهلي

_ هاي هية متفقين

_ رايححة انا باي

_ ثوانيي جميلة

_ نعم ؟

_ اذا رجعتلج اهلج لو اطلب روحج تطيها الي .

_ ااذاا رجعت اهلي بذاك الوقتتت تدلل روحي جوة. رجلك ..

_ هههههه خووش عجبتيني ححيل

_ رايحة انا هسة

_ مودعة مودعة والكلب داعيلج يا جميلة الكل

سديت التلفون بوجهة وكعدت اتامل معقولة انا اوصل مرحلة ائذي البشير قيصر ؟؟
ليش دخلت روحي بهاي القصة ! جنت عايشة حياتي وي اولادي اووف لو ادري مارجعت
بس انا لازم الكي اهلي كلش ضروري اخوي وامي لازم الكاهم اذا مجانو ميتين من حرب النجف
ف انااا لازم الكيهم اكبر غلط سويتة بحياتي من بعد غلط رجعتي هوة لمن غلطت ورحت بذاك الوقت لوحدي ما رجعت لهلي حتى اطلع وياهم ..

اوووف يا امي حييل اشتد حنيني الج ولاخوي تعالي بسرعة فدوة شوفي ابنيتج شلون وضعها بحالة رهيبة
شلون صارت ام يا يمة صرت اهتم واخاف مثل ما انتي جنت تهتمي وتخافي

انا هسة صرت اتفهم شعورج لمن جنتي تخافي علية من الهوة انا هسة ام لثنين زلم يعني لازم ما ينخاف عليهم ..
واني احس روحي تلوب من يطلعون وي عمهم ..

ااخخ يا يممة اخخخ سوالف هوواي محتتاجة احط راسي بحجرج واحجي واني ابجي حتى افرغ البكلبي

جمر كلبي ولهيبة كلة من غيابكم عنييي ..

مسحت ادموعي واتاملت خير احتمال 88% يرجعون احتماال ..
روحي تلولي لغيابكم يابعد چبدي ...

سمعت صووت رسالة رحت فتحت التلفون وطلع البشير قيصر دازلي رسالة يكول بيها

_ مشتاقلج جمال شسالفة كطعية وياي متكولين رجال خطية كلبة خلصان بالواجب خلي اشوفة ؟؟

نزلن ادموعي بحرارة يااااربي داحس انا جااي اخوون البشير والله هو كل دنيتي بس هم انا اريد اهلي شعور صعبب وضيااع قريت الرسالة وابيت عن الرد ..

وغلقت التلفون حتى ما اقرة اي شي يدزة بعد ..

"" علـي الباقــر ""

دخلت للبيت وبعد ما رجع وطلبني مجد نمت ورههف نامت علـى ايدي وهوة نام على صدرها ..
اجتني هفوات اريد احجي لرههف عن امرين بس كلتت لاا خلي الزم روحي ماكدر اضمن سراج ادريه راح يسوي شي سالفة ..
خطية هذا وحيدها اذا صار شي وراح راح تصير حياتها جروح بجروح ..

الاخ اعز اغلى من الروح واكيد متكدر تشوفة على حبل المشنقة ..

رههف امانة عندي ولازم اصير كد الامانة

وبنفس الوقت لازم اوفي بوعدي لـ لهيب ( آمرين ) واخلي يرجع هنا لبيته ويبقى سند لاختة ولابنها وانا اسحب روحي من حياتهم وارجع لحياتي .

انكطع تفكيري وي صوت رههف يكول :

_ أكــول علاي

_ كولـي يا نحــري

_ باجر العرس سوة لو نحن لوحدنا وانتم لوحد

_ لا وين عايشين حتى سوة لا كلمن وحد

_ يعني اللبس براحتي

_ ايي بس عبايتج خلها قريبة عليج لان نفوت ناخذ العرايس ..

_ اذا بس هيج سهلة كلش متحمسةة احضر عرس الكم خاطري اشوف اجوائكم ..

_ حالة حال اي عرس عراقي عادي

_ لا مدام انتم بي بس ههاي كافية تخلي يجنن ..

_ تمام نامـي يلة يعمري

_ اقرالي شي بصوتك خليني انام علية

_ شقررة ؟؟!

_ بكيفك اي شي اقرالي انام على صوتك

_ تمام غمضي عيونج ..

_ يلة

غمضت رههف عيونها وانا غمضت عيوني هم وبديت اقرا

_ مـــآلــي غيرك مولاي يا ححبيب امي الزجية
مالي غيرك يالجنت خيمة علية
مالي غيرك يا دمع عيني الجرية
مالي غيرك يا غريب الغاضرية
مالي غيرك يالطريح على الوطية
مالي غيرك خوية راح امشي سبية

ودمجت وياها قصيدة لباسم وكلت

_ غيرتك حتى بسباي
امشيي وعيونك ورااي
من تصير الدنيا لليل
راسك الي يضوي بسمااي

تعال الحك لزينب هاا يمولايي ؟؟
لا والدها حاضر لا اخو الجاي
ولا جف الحبايب نكط الماي
هضيمة وي الجنازة ماكو وفاي !!

لمن لاحضت على رههف جاي تغفي صرت اقرة بهدوء وكلت ..

_ أنادي فئةٌ يُزعجُها طٌول بُكائي
لمَاذا يَغضب الجاهل من حر عزائي
لأني كلما الطم صدري بولاءِ
أرى من غضبوا تلطمهم كف السماءِ
قوم حسبوا .. منا نسبوا
ياللعجبُ والمنقلبُ
أيا زوبعة الجهل سأبكي ما حييت
بنار الغيظ موتوا و حُسين لا يمُوتُ

غمضت عيونها غفيانة بنومها واني بقيت افكر ..
شنو مصير رههف اذا صار لـــ امرين شي ؟
شنو مصيري انااا اذا رههف بقت وياي !! لازم انسى شي اسمة طيبات وانا هلشي مستحيل لو بروحي ما اضحي بحبي لطيبات ..
كضيت عمري انتضرها مستحيل اخلي شي مثل هيج يأثر وياخذ طيبات منـي ..

غمضت عيوني واني احاول اتامل باجر
بيت صغير طفلين زوجة حنونة
بيت صغير كلة. دفو مليان بصوت طيبة الزهراء
بيت صغير مليان بصوت ضحكات طيبة الزهراء
بيت صغير مليان بحنان طيبة الزهراء واهتمامها

جنت احاول اتأمل هاي الاشياء واني اردف بكلمة شوكت ؟
راحت اسنين عمري واني انتضر واكول شوكت ..

واني غارق بَ بحر افكاري غفيت بلا شعور ..

كعدت الصبح على صوت اتصال فتحت التلفون ...
لكيت الساعة 57 : 7 ص
وامي جانت تتصل علية رديت عليها ..

_ ها يمة ؟

_ وين انت ولك ؟

_ خير محتاجة شي

_ لا توني مريت لغرفتك وما لكيتك شنو وينك ما راجع للبيت انتة ؟

_ لا يمة طلعت من الصبح عندي كم شغلة اخلصها واجي

_ لا تتاخر

_ تردون مني شي

_ نسسيت روحك العرس اليووم والتجهيزاات لراسنا تعال عاون اخوانك ..

_ تمام جااي جااي

_ يلا عمتك وام رحمة راح يرحن للصالون وي البنوتات

_ ياهو راح يروح وياهن ؟

_ هنا عمتك ومرة عمك و رحمة الزهراء و ام البنين و غدير الله بسس ..

_ خلي يخلن بالهم على غيــمة

_ بدون ما توصي هسة انت تعال ولا تتاخر

_ تمام يمة تمام

_ يلا ابني ..

سديت التلفون وحاولت اصحصح ورحت نزلت لجوة لكيت رههف مجهزة الريوك كعدت اتريكت وياهم ..
واردفت وياها

_ اليوم بيش الساعة ترحين لهلي ؟

_ مادري اروح ب5 هيج ماريد اروح من وقت

_ خووش

_ حتسووه بقاعة مو ؟

_ ايي انتن قاعتكم حجزتها مغلقة حتى تاخذن راحتجن بيها ونحن لا

_ ايي حلوو ..

_ انت روحي لهناك ادزلج العنون

_ ايي عفية لا اروح واتيه ههههه

_ واي واحد يسالج واكيد راح يسالوج لان ماكو غريب هناك تكليلهم صديقة غديرة واصلا غديرة هناك راح تعرفج على اهلي علي احساب انتي صديقتها ..

_ ان شاءالله ححبيبي

_ اتونسسي بكد ما تكدري ..

_ هههههههه متونسة بكل حياتي دام وياك

_ يلا انا راح اروح ههسة

_ بعد وقت ؟

_ لا السوالف اليوم لراسي لا تنسين انا معزب يعني ظهري راح ينكسر خليني اروح واخلص نص السوالف ههسة

_ بالك لنفسك لعد ..

_ عليمن توصيني ترى رايح لهلي مرايح لحرب ..

_ حتى لو ههسة انت بس هذا الطريق التمشي بية بسيارة كلبي ينقبض عليك فدوة بس توصل دزلي رسالة اطمن ..

_ امري لله ولا يهمج ..

_ عمرري انت دربك اخضر

_ استودعتج الله

تركتها وطلعت ولمن وصلت لبيتنا لكيت ابوي ماخذ علي الرضا والفاروق الاعظم وصيوان و المرتضى الامير للقاعة مالت الزلم حتـى يجهزون كلشي بيها وتاكدون من كلشي

ولمن دخلت لكيت كاعد بالبراني المعتز باالله و علي السجاد و حامد المتقين و اصفاد الحق ..

وجانت صوت الدك من جوة البيت يرن رن ..
جاي يجهزن روحهن ويركصن البنات شلون دبرهنا مادري .
اخذت اسحب خطواتي لكيت وهج الطف و طيبة الزهراء
كاعدات بالصالة وجاي يرتبن بيها ..
اردفت وياهن ..

_ هاا كواهن الله

وهج الطف :: كوة الله حليك ..

_ تعبانات ؟

طيبة الزهراء :: لاا ماكو تعب فرحانين ..

_ دوم ان شاءالله

طيبة الزهراء :: انا صاعدة اودي دني لأريجة وهوجة كملي البيدج بسرعة ما ضل وقت

وهج الطف :: تمام حبيبي

كامت طيبات ورادت تصعد لاريج الله ولاحضت عليها تعرج بالمشي رحت ليمها ولزمت ايدها واخذت الغراض ولزمتها وصعدتها انا واردفت وياها ..

_ شبيج ليش جاي تعرجين ؟

_ البارحة جنت نازلة اركض منا ووكعت

_ صابج ثوول متباوعين لطريقج ؟

_ مادرييي زلكت رجلي ووكعت

_ اعوفج ليلة وحدة اجي الكيج متكسرة خووش

_ صدك وين انت امس ؟

_ وين انا امس

_ وين رحت وين نمت ؟

_ وين رحت وين نمت ؟؟

_ علي لا تتهرب من السؤال بهاذا اسلوبك احجي

_ ههههههه جنت يم صديقي واخذنا الوقت نمت يمة

_ اهاا

_ شعرفج انا نايم برة ؟

_ مريت عليك بليل ولكيتك مموجود عرفت نايم برة

_ لا تكولين لامي لان كتلها طلعت من الصبح مالي خلك كلامها

_ تمام

_ وليش مريتي عليه محتاجة شي جنتي ؟

_ لا هييج ردت اشوفك.
وهسسة كافي وخر ايدك انا اروح لوحدي

_ انا هم اريد اروح لاريجة لا عبالج صعدت وياج لسواد عيونج

_ اهاا واني عبالي حنيت علية ..

_ ومنو انت حتي احن عليج

مشيت واتقدمت كدامها شوية وسمعت صوتها يكول ..

_ انا بنيتك واختك واهلك وحياتك انا كلشي بالنسبة الك

انداريت الها وباوعت لها بطرف عيني ابتسمت ابتسامة خفيفة واردفت ومن كد ما كلبي دك سريع مدري شضربني على راسي وحجيت هيج وياها

_ ههههه ومنو ضحك عليج وكالج هاذا الحجي

_ يعني غلط ؟

_ رب الغلط انت مجرد اخت صغيرة الي ..

_ حلوو طلعت منك هسه اروح لاريج احسن

بقيت ساكت واني استوعب الي صاار دقيقه دقيييقةة هايي طيباات لك انا شلون احجي وياها هيج ؟؟
ليشش اصلا حجيت وياها هيج شجااني يااالله
وشنو. قصدها بكلمة حلو طلعت منك ؟
شديصيير اكيد هسة هية راح تضل براسها هاي الكلمة
خررب حضي الا اجفص بيها ..
راحت كدامي ودخلت للغرفة واني رحت لغرفتي على ما غيرت ملابسـي وسبحـت ..
رجعت طلعت ودخلت علـى اريج الله لكيت طيبات عايفتها ونازلة ..
وكفت يمهة وهية كاعدة تعدل بالفستان مالتها ..
رحت كعدت واردفت ..

_ شنو هلجمال هذا انت العروس لو غيرج ؟

_ ههههه لا تبالغ بعدني ممسوية شـي

_ اذا بعدج ممسوية شـي وهلكد تخبلين اذا سويتـي شنو تطلعيـن بلة ؟

_ هاي اني بس بعينك هيج

_ اكو احد مضوجج ؟

_ لااا بس اكول محد يحجـي وياي هيج غيرك

_ يولون واصلا لا تسمعي بس منـي

_ ههههههه شوف حلو هذا راح البسة للعرس .

_ شتلبسين يخبل عليج بس اختاري لون حلو لان لاتنسي عيونج راح تعكس علية ..

_ ايي علمود هيج احتاريت هذا رصاصي ..

_ اي ينحــري يخـبـل ..

_ خوش چا راح اعتمد علية .

_ يلة يالعزيزة اني رايح

_ وين ؟

_ اكمل الشغل وي الولد

_ اها تمام يروحي الله يساعدك

_ ويساعدج صمام كلبـي ..

عفت اريج الله ونزلت لجوة لكيتهم مشغلين حماسـي
وكاعدين المعتز باالله لازم سبحة ويسوي روحة عود يركص ويفر بالسبحة و طيبة الزهراء كاعدة تركص وياه

ضليت صافن عليهم معقولة هذا المعتز باالله ؟؟
لو هذا واحد يشبه ما اصدك منا لهنا الي شفتة ذاك اليوم يركص ومتونس هوة المعتز باالله ..

عفتهم بجو الركص وطلعت من البيت شافتنـي امي وصاحتنـي رجعت وفتت للمطبخ واردفت ..

_ ها يمة ؟

_ تعال ابا الحسن تعال

_ خير

_ ضلي ساعة افكر يا يمة ومضبطت وياي ولا شـي .

_ شنو شبيج ؟

_ يمة احنا عروسة داخلة النا وعروسة طالعة من عدنا

_ ايي اعرف وشبيها ؟

_ شلون بالزفة اذا نريد نجيب ام البنين لهنا و زُبير يريد يزف شيخة لهناك شلون بينا احنا ننقسم يعني ؟

_ جا يمة اني المن حجزت الكم قاعة وهوست روحي هن مو اثنينهن بنفس الصالون ؟

_ اييي

_ هاي ههي نروح الهن بنفس الوقت ونطلعن من الصالون ونزفهن للقاعة وندخلهن تبقن تركصن وتهوسن براحتج اربع ساعات خمسة بكيفجن لمن يخلص الوقت نرجع ندخل ..
علي الهادي كال لمن اطب اخذ ام البنين واودعكم يريد يروح للفندق هناك يكضي اول ليلة الة يريد لوحدة ..
و زُبير يريد ياخذ شيخة لبيتا ..

_ يعنـي اذا علي الهادي ياخذ ام البنين لوحدة ويروح الزفة الاخيرة لــشيخة نوصلها لييتها !

_ ايي بالضبط ..

_ زين

_ بعد اكو شي شاغل هلبال الحلو ؟؟

_ اييي اكو سالفة ردت اسولفها ونسيتها ..

_ شنو هية ؟

_ مادري نسيت ..

_ اروح الحك على الولد انا .. واذا تذكرتي سالفتج اتصلي علية ..

_ ههههههه الله وياك يمة بالك لنفسك

_ صدك شلون صرتي ؟

_ لا بخير الحمدالله

_ تحسين بدوخة شي لا تتعبين روحج هواي كلشي كامل هناك

_ ما متعبة روحي وحتـى لو كلشي كامل هناك لا تنسـى 7 ايام بيتـي هذة مَ راح يفرغ من النسوان لازم ارتبة عدل قبل كلشي ..

_ وهم ارجع واكلج لا تضغطين على روحج واذا على البيت ف من نرجع انا والولد نرتبة ..

_ بعدني ممسوية شي ف متعبانة لا تخاف .

_ بداعت ابوي لا تتعبين روحج

_ صار يروحي انت والله مراح اتعب نفسـي بس احس بشي اكعد واعوف كلشي من ايدي

_ خوش

_ روح للزلم لا تتأخر علي ابوك

_ رايح له

_ حافضك الرحمن يمة الله وياك ..

عفت امي وطلعت وبوجهي رحت لسيارة ورحت للقاعة مالتنا لكيت ابوي كارب الفاروق الاعظم و صيوان و علي الرضا و المرتضى الامير ..
اشتغلو كلشي بدون كلمة وي ابوي هههههههه ..
بقيت افكر بالتجهيزات الحلوة الي سووهن
اول ما شافني ابوي ندهلي ..
رحت ليمة وصار يحجي وي الشباب ..

عَبد الحَسن :: راح اطلع شوي لا تتخاذلون كملو البيدكم ..

الفاروق الاعظم :: عمي خلصنا كلشي شنسوي بعد نرجع نغير ديكور القاعة ؟

علي الرضا :: ايي والله شسالفة بوية هاي احنا المن حجزنة كاملة غير منريد نشتغل جايبنا هنا وكارب حالنه هاي العمال يسون كلشي تريدة ..

_ لا تطولون اللسان و شفت شغل العمال واجواء القاعة وما دخلت مزاجي كملو شغل بسرعة وانتم ساكتين لا انطيكم شغل ثاني متخلصون منة اسبوع لكدام

المرتضى الامير :: لا خالي هاي راح نخلص واحنا الممنونين اصلا ولا يهمك ..

_ طالع لبرة 5 دقايق وارجع الكم واشوفكم .. تعال علي الباقر ..

رجع ابوي وندار الي و اخذني من ايدي وطلعنا لبرة القاعة وحط ايدة علي متني وبدة يتسائل وياي . ..

_ شنو بوية محتاج شي ؟

_ ايي امس طرة على راسي شي وبديت اتذكر واريد استفسار منك

_ وشنو هلشي ؟

_ زُبير العاصـي ..

_ شبـي

_ هوة يتيم

_ ايي بوية ..

_ خووش ما كلت شـي وامنت باالله والله يرحم اهلة بس بوية اليتيم ماعندة عم خال جد ابن عم ابو شنـي الوضعية سكتة يا لفتة من خطب لهسة وهوة بس هوة ولا طلع حس من اهلة ؟؟

_ ماعرف اضن مكطوع من شجرة ؟

_ شهلحجي هذاا شنـي مكطوع من شجرة ماكو واحد يكول لنفسة مكطوع من شجرة الا اذا طلع ابن حرام وميعرف اهلة من ناسة

_ لا بوية شسالفة بعدين انا مادري هو مو صديق حامِد المتقين وخطب عن طريقة اسال حامِد عنة ..

_ اتصل بحامِد هسة وخلي يجيني ..

_ بوية ليش ماخذ السالفة بهاي الجدية

_ جا شلون ولك

_ انت مو سالت عنة قبل لا توافق

_ ايي سالت بس عنة مادري شلون راح عن راسي اسالة عن عمامة خوالة اجدادة ..

_ زين يعني نكول لا سامح الله هسة عرفت عنة. شي مو زين شتكدر تسوي واليوم العرس ..

_ شي مثل شنو ؟

_ يعني مثلاً مثلاً ان اهلة جانو مو زينين سمعتهم مو خوش ..

_ بس الناس السالناهم مدحو باهلة هواي ؟

_ اعرف وانعم من زُبير بس جاي اكلك مثلاً يعني شنو راح تسوي بهاذا الوقت الراح

_ ما راح شي لا تنسـى شيخة بعدهي عدنـا يحلم يطول منها شي

_ تخرب العرس كلة يعني ؟؟

_ ابو العرس اخربة اذا طلع بي هيج وذرة من شغلة مو زينة

_ يعني بوية انت هسة راح تهدم سعادة شيخة لا تنسى يمكن هية هسة بدت تحبة من فترة الخطوبة الراحت ؟

_ تزعل الها يومين وبعدين تدرك ان انا سويت هذا لمصلحتها .. اتصل ب حامِد المُتقين بسرعة ..

_ ان شاءالله.

رحت لصفحة عن ابوي واتصلت على حامِد وانا متوتر ياعلي شلون لو ابوي عرف الصدك عن زبير والله الا يحركنا كلنا لان جذبنا علية وما حجينة الصدك رغم احنا نعرف كلشي ..
واول ما فتح الخط اردفت وياه بصوت خافت ..

_ الو حامد تعال بسرعه

_ وين اجي شصاير ؟

_ تعال للقاعة ابوي يريدك

_ خير ان شاءالله اكو شي ضروري يعني ؟

_ ولك ابوي مدري شبييه صحة ضميرة علـى هذا زبير وبدة يسال عنة صدك وكالي اتصل بيك واجيبك لان زبير اجة وخطب عن طريق هو صديقك

_ استغفر الله علـى هاي السالفة ..

_ تعال بسرعة لا تتأخر

_ جايكم بالطريق

_ خوش ..

سديت التلفون وانداريت لابوي ورحت يمة

_ ها رد عليك ؟

_ ايي وهسة بطريق هو جاينا

_ زين ..

_ بوية لي احسك ضايج ؟

_ شلون امس تطلعون امكم من البيت وبالجذب ولا زلمة بيكم رفع السماعة وانطاني خبر ؟

_ مانعرف بوية جنا كاعدين وفجأة صاحت طيبة الزهراء ودخلنا للبيت نركض لكيت امي واكعه بالكاع ما ضل عقل براسي شلتها واخذتها وبقيت كاعد وياها لصبح ..

_ وشنو اليخلي العلوية توصل لهاي الحالة ؟

_ مادري

_ شني المتدري ولك اعوفكم بس كم ساعة تخلون امكم يصير بيها انهيار عصبي ؟ لو اموت شسوون تموتوها وراي

_ لاا بوية شسالفة الله يخليك ويخليها خيمة علينة ..

_ جا شنو السالفة فهمني سيد علي الباقر

_ ماعرف بوية مااعرف كتلك جنا كاعدين انا وعلي الرضا وطلعت علينه طيبة بنص الليل شنو صار وياها ليش هيج صار وياها مادري ماادري. ..

_ ياخبر اليوم بفلوس باجر ببلاش ..

بقيت ساكت واني اباوع لطريق مشكلة ابوي يبقى بالسالفة اذا ما اقتنع بالجواب ويضل يلح بيها لمن يعرف كلشي يريدة وكلشي هوة يريد يسمعة ..
اولاً :: خفت من سالفة امي لا يعرف ان هي صار بيها هيج لان جانت تبجي على علي الصادق و علي الكاظم
ثانياً :: خفت على رحمة الزهراء اذا عرف ابوي بموضوع زبير ما يخليها ثانية وياه واني جنت اشوف الحب الي تضمة لزبير بعيونها ..
بقيت انتضر حامد المتقين وابوي وراي يسبح وصوت الحجر ما السبحة من واحد يطك بواحد احسة جاي يطك براسي .. من كد ممتوتر وخايف كلشي عندي عادي بس لا تخلوني يم ابوي بمسافة قليلة. ابيناتنا كل شخصيتي تروح وهيبتي و قوتي كلشي بية يروح يودعنـي ويمشي عني بس اوكف يمة مدري ليش اكوم حتى ما اعرف اسولف وابلع بالحجي ..
وبعد نص ساعة او ساعة تقريباً وصل الميرزا حامد المتقين ونزل من السيارة ووكف كدامي ..
رحنا احنا الأثنين ووكفنا كدام ابوي واني وكفت صفح

حامِد المتقين :: السلام عليكم شلونك خال

_ هلا بابن اختي ياهلا وعليكم. السلام والرحمة

_ كالو محتاجنـي كول وأمرنــي

_ ميـأمر عليك عدوك اريدنك بسؤال وجواب

_ وانا جاهز شنو خالي ؟

_ زُبير صديقك مو ؟

_ اي خالي صديقي

_ شلون تعرفت علية انت ويمتا ؟

_ ماعرف يمتا بضبط بس بيها الـ 6 سنوات او 5 هيج شي يعني واتعرفت علية بحكم شغلي تعرف انا محامي وهوة. ضابط اجتمعنا بالمحكمة وتعرفت علية ..

_ اهاا ..

نضرات ابوي لكلام حامد ذكرتي بهاذا اليكول ما اقتنعت ما اقتنعت هههههه
بس عجبني موقف حامد شلون واكف ويحجي وهوة واثق من نفسة اني الاعرف الصدك صدكت كلامة هاذا !!

ورجع ابوي اردف بسؤال ...

_ هوة يتيم اهل شنو ماعدة عمام خوال ؟

_ هوة لا

_ شني لااا

_ خالي هوة ابوة وحيد اهلة ماعدة لا اخت ولا اخ

_ وخوالة ؟ لو امه هم وحيدة اهلها

_ خوالة متبري من امة لان تزوجت ابوة غصب عنهم ف منذاك الوقت وهمة ما يحجون وياهم ولا يدخلون

_ هيجج !!

_ صاير شـي خالي

_ لا حبيت اسأل غلط لو بيها اشكال ؟!

_ لا بلعكس احب على كلبي اسمع صوتك ..

_ تكدر تروح اذا تريد ..

_ اي خالي لازم نروح للحمام العرسان هناك منتضرينة

_ اي روحو وجهزوهم عدل

_ ان شاءالله خالي .. علي الباقر تروح وياي ؟

باوعت لابوي الي أشرلي براسة بكلمة ايي روح
رحت ويا حامد المتقين بس هو بسيارتة وانا بسيارتي وانا بطريق اتصلت على اصفاد الحق و المعتز باالله و علي السجاد والمصطفى القاسم حتـى يلحكونة لهناك ..

و وصلنا اخذنا علي الهادي و زبير للصالون خففو شعرهم ورتبو نفسهم ..

والشباب يمهم يهوسون ..

المرتضى الامير :: انجب يل شامت كد ذراعه وعرس بيه ..

تعالو و تباركو النا يامن تحبوين .. تعالو و اعبرو يا هلا وي المجبلين ..

وهنا اصفاد الحق هوس لــ زبير ولمن باوعت لحامد لكيت ملامح وجهة ما تتفسر لكلام اصفاد ..

اصفاد الحق :: زُبيرنا اخذ الرادته وعايف بنات ولايته ..

هاي الرادهاا وهااي التمناها شيخة العلويااات الة جبناها
وهية وياه وتتمناه وهوة بحبها خيي عوونة ..

بعد ما كملنا كلشي العرسان والشباب جهزنا ارواحنا رجعنا للبيت مال عمي الحسن المجتبى وكعدنا نغير ملابسنة وبقينا ننتضر علي الهادي و زبير يطلعون النا حتى نشوف لبسهم لان هاي الشغلة سلمناها لــ للمعتز باالله و اصفاد الحق ف شلت هم لا يطلع ذوقهم مو حلو !!!

لمن طلع النا علي الهادي طلع مختارين الة الزي السعودي الملكي .. ولصراحة طالع يخبل علية وزين اختارو الة هيج لان علي الهادي ضعيف وطويل ..

ولمن طلع زبير جان مختارين له قاط و خالين فوكة بشت
وهم طلعو كد السالفة هاي لان زبير ضخم ويلوك علية هيج شي ..

ولمن كملنا كلنا اجة علي السجاد للمعتز باالله واردف وياه ..

علي السجاد :: هوة هاذا القاط الي كتلت روحك علية ب 300 دولار ؟

المعتز بالله :: شرايكم وعلي يستاهل

علي الهادي :: هندام البالات احلا من هاذا

_ محد سالكم عن رئيكم يلا

_ ههههههههه لا تزعل لا تزعل تخبل اصلا انت شتلبس تحلي ..

_ بعد روحيي ابا الحسن بس انت تفهم والله

اصفاد الحق :: انت وي اليصفكلك ..

_ ايي على الاقل جاملني ..

علي السجاد :: صارت الساعة 5 شوكت نروح ناخذهم ؟

زبير :: غير لمن يتصلون علينا ؟

علي الهادي :: خلينا نروح ونبقى ننترضهن بالباب .. عادي ..

حامد المتقين :: كلام علي الهادي صحيح خلينا نروح هيج ..

علي السجاد :: جا يلة امشونا

علي الهادي :: يععز علية اتزوج اليوم وابوي البشير قيصر ما يحضر عرسي ..

بقينا ساكتين وصدك نحس بنقص احنا مو كاملين المفروض ويانة ( محمد الصدر و مؤمل الصدر و تحرير و البشير قيصر و علي الكاظم و علي الصادق ) ..

بس ماكو باليد حيلة نصهم اخذهم الموت مننا ونصهم الوقت خذاهم
المعتز باالله اتذكر ابوة واردف

_ وهم يعز علية يجي اليوم الاتزوج بية وابوي مموجود يزفلي المرة بيدة ..

اصفاد الحق :: يمعوديين مانريد ادموع اليوم فرحتنا الجبيرة .. امسحو الدموع يلا وخلينا نطلع لزفة ..

علي الباقر :: صدك يلة اسكتو وخلينا نروح ..

طلعنا بالسيارات وكل وحدة بيها شغلت شكل وحطت الصوت لابعد حد و طلعنا وسيارة زبير جانت مشغلة حسام الرسام هههه
وصلنا الصالون وسوينة لجو للمكان ...

∞∞∞∞∞∞∞∞∞∞∞∞∞∞∞∞

"" رحمــة الزهراء ""

ونحن بصالون كملنا المكياج وصار وقت نلبس البدلات اخذت ام البنين الكلاص ومدري شنو صارر بثواني الكلاص وكع ونكسر ..ومدري شلون انجرحت ايدها
وصارت البدلة مالتها بدم !!!!!

ام البنين :: اخخخخ ..

فاطمة الزهراء :: يمةة اسم الله ..

_ تعاي اكعدي هنااا شجاج يمة ؟؟

_ يمةة بدلتي ادمررتت

فاطمة الزهراء :: ولچ باعي ايدج الي انشكت وتكليلي بدلة

رحمة الزهراء :: ماكو شي عمة هسة ينشف الدم بس جيبولي ضماد ومعقم ..

راحت ام الصالون خطية جابت النا المعقم والضماد واني كعدت اضمد جرحهة للعلم جنت اشوف الجرح يرادلة خياط لان كلش جان عميق و يخوف بس مكدرت اخيطة لان انا بصالون ولا بينا نروح للمستشفى ما ضل الوقت النا...
ربطت ايدها حيل حتى يوكف النزيف شوي وبعد العرس. اخيطة الها
وهية جانت ادموعها عشرة عشرة لان بدلتها خربت صارو عليها دم .. باست راسها امي واردفت وياها

_ يااا بنانة عمت عين البدلة التخلي دموعج هيج تكت

_ خالة شلبس هسسة عررسي اليوم. وبدلتي صارت كلها دم شنو هاي القسمة ياللله

غدير الله :: هسة اتصل بأريج واخليها تجي وتجيب البدلة الي سوتها الج ..

رحمة الزهراء :: صدك لر تنسين اريجة مسوية النا بدلات وعلى قياساتنا اتصلي خليها تجيب مال بنانة بسرعة

_ ثواني اتصل عليها ..

راحت غدير الله واتصلت بأريج ونحن بقينة نهدء بأم البنيو الي صررت تشهك بالبجي عبالك نهاية العالم اذا خربت البدلة بليلة العرس !!
بعد ما هديناها كعدنا ننتضر وصلت اريج وطبت النا هي و وياها رجال كلنا لمن شفناه وكفنا متفاجئين ..انطت البدلة لأم البنين ..
وضلت ويانة والرجال جان واكف يمنا ..

بعد ما كملنا كلشي اجت امي حطتلي الطرحة وعمتي حطتها لأم البنين ..

وبعد ساعة ونحن كاملين سمعنا صوت الدك برة عرفنا انهم وصلو اجت امي وعمتي ونزلن الغطة على وجهنا واجة الرجال لزم ايد ام البنين وباسها وطب عمي لزم ايدي .. بعد ما سلم على البشير قيصر الي اجة وي اريج وسوالنا مفاجئة هههههههه
دخلو زبير و علي الهادي الي طفر وحضن البشير اول ما شافه ..

علي الهادي :: ابووييي

البشير قيصر :: ياهلا بالعرررييسس هههههه

_ والله هسة كملت الفرحة صدك

زبير :: الحمدالله على سلامتك

_ الله يسلمك

فاطمة الزهراء :: الزفة تنتضر برة مو وقت الكلام هذا

اخذ البشير قيصر ايد علي الهادي وحطها بأيد ام البنين
وانا عمي اخذ بيدي وحطها بيد زبيري ..
ووكف كدامنا عمي بعد ما جمع ايدينا نحن الاربعة وحط ايدة فوكهن وغمض عيونة واردف... .

عَبد الحَسن :: اللهم صل على محمد وآل محمد
اللهي بالميامين الهداة من بني هاشم
بخاتم النبيين اخ الوحي آبا القاسم
بمن صام بمن صلى بمن صدق بالخاتم
بمن اثر بالقرص ثلاثً وطوى صائم
بمن ردت له الشمس ب بابل والملأ عالم
بحق البضعة الزهراء وهي ست النساء فاطم
بحق البضعة الزهراء وهي ست النساء فاطم
بالمسوم بالمقتول ضلماً فالعن الضالم
بالسجاد و الباقر والصادق والكاظم بالمسوم في طوساً
علياً وابنة العالم وبحق العسكريين والمنتظر القائم

اللهم بارك لهما وبارك عليهما و اللهم اجمع بينهما بالخير

اللهم صل على محمد وال محمد ..

رجعو وصلو على النبي من بعد ما عمي صلى
وطلعنا وصعدنا بالسياارت ورحنا بيها وللعلم جان كل اخواني كل واحد جاي بسيارتة رجو الشارع رج بالدكات والسيارات ..
واني جنت كاعدة ورة يم زبير وعمي بالصدر كاعد
كعد وياي بالسيارة مو وي ابنة علي الهادي لان انا شيخة العلويات ههه
جان زبير حاضن ايدي ما تركها ولا لحضة رغم ايدي عركت بين ايدية وهم ما تركها ..
وجنت اباوع لطريق الجانت احسة ديرسم الي طريق جديد بحياتي ..

"" غدير الله ""

رغم انمار جان حاضر بالزفة بس ما صعدت وياه لان شفت لينا راحت وصعدت وياه اني رحت وي اريج الله وصعدنا وي علي الباقر ..
والبشير قيصر صعد وي اولادة شبر وشبير الجانو يخبلووونن ياخذون الكلب ..
ولمن طلعنا بالزفة بقيت اصفك واني اصيح

_ هالليله ليلة عرس الاثنين ليلة ربيع وكمره واللي جمع بين قلبين الله يطول بعمره ..

اريج الله :: ولج صمي حلكج شوية متسمعي مشغلين دكة اسكتي هذا منا وانت منا ؟؟

عاندت وياها رفعت صوتي وصرت اصفك حيل واني اصيح وكام يضحك علي الباقر ..

_ هاذي فرحتنا التمام فرحت كل العمام هاي فرحتنا الجبيرة فرحت كل العشيرة ..

علي الباقر :: بنت عبارة عن اعناد ههههههه

اريج الله :: ميفيد بيها الحجي شما تحجي

_ آسمر ويخبل وكل القوط تلوك علية يمة فددديتت اخوووييي ..

اريج الله :: كللشش اخووج ما لابس قاط غديرة لا تضلين تخوطين بصف الستكان ..

علي الباقر :: عوفيها متونسة شبيج وياها هووسي هووسي غديرتي براحتج اهججلج السيارة كلها ..

_ مااريد وين يبقـة بالواحد واهس يهوس وعندة اخت مثل اختي

اريج الله :: حماسج مالة داعي لان مشغلين وبععدين متخافين على روحج حامل حامل ولج كاعدة وتهوسين

_ ترى الطفل ابطني مملزكتة بعلچ حتى كل شوي وحدة مذكرتني انا حامل ..

علي الباقر :: خايفين عليج غير ..

_ ماكو شي يخوف ترى ..

ونحن نسولف صارت يمنا سيارة المعتز بالله الي جان طالع من جامة السيارة ويحرك استيرن السيارة برجلة ويهوس بقيت صافنة علية واضحك لحد ما نزل علي الباقر الجامة مالتنه وعاط بية ..

علي الباقر :: لا تندعم يالمسووودن ؟

المعتز باالله :: ما اندعم ما اندعم ما امووت لا تخااف ..

_ طب ولك لا يلمحك ابوي وين اكو واحد يهوس بعرس اختة ؟

_ جاي اهوس بعرس اخوي وبت عمتي انا

اريج الله :: هههههههه صدك مسودن ..

_ ساعة اندعم

غدير الله :: ميندعم مسيطر

_ ماكو سيطرة بشارع كلشي يصير ..

غدير الله :: لاا عوفة بحالة هسة. هو عررس نرريد نتونسس عوفةة ..

سكت علي الباقر وبدة يباوع الي من المراية ويباوع لأريج الله وضحك. واردف ..

_ تعرفن توهمت عبالي انتن العرايسس ؟

غدير الله :: صدك

اريج الله :: كيفت ام حلك ترى جاي يجاملج لا تصدكين روحج ..

_ ههههه لا والله صدك طالعات صااكاات ..

اريج الله :: عيونك الحلوة ححبيبي

غدير الله :: خجللتت

_ لك اغدي فدوواتت لليخجل يابعد نحريي وصمامة لكلبي ..

كملنا الطريق ووصلنا للقاعة نزلنا ودخلنا الها وكعدن رحمة الزهراء وام البنين على الكوشة وبدت يشغلون اغاني ..
رغم احنا محددين الاشياء الازم يشغلوهن بس مدري منو جان يشغل هيج اغاني على مزاجة ..

وبعد الفرحة الجبيرة شفت رهف فاتت للقاعة رحت ليمها وسلمت عليها واخذتها عرفتها على اهلي ..

غدير الله :: ياهلا والله برهوفة

رههف :: هلا بيج غدير انت صح ؟

_ ايي يروحي انا غدير

_ اتشرفت بيج ..

_ انطيني اشيلة عنج هذا مجد ؟

_ ايي ابني مجد

_ يااي فددووة يخبل يطيج شبه كلش جبير ..

_ هههه صحيح الأكثر يكولون يشبهني هوة ..

_ تعااي اعرفج على اهلي

_ متوترة

_ لا تتوترين ولا تخافين تعالي ..

اخذت رهف من ايدها ورحت اول شي وكفت كدام امي
واردفت

_ اعرفج رهف هاي العلوية الصاكة اميي انا هههه

رهف :: تشرفت بمعرفتج علوية

العلوية :: الي شرف ححبيتي بس ماعرفج شنو غديرة منو هاي الحلوة ؟

_ هاي رهف صديقتي وهاذا الصاك ابنها

العلوية :: يابعد روحي كل الهلا بيج نورتي مكانج ..

رهف :: بعد روحي خالة

_ تعاي اعرفج على الباقيين ..

رحت وي رهف ووكفت يم اريج الله وجانن واكفات يمها وهج الطف و طيبة الزهراء

_ اعرفج رهوفة هاي اختي الجبيرة اسمها اريج الله وهاي بنت عمي الجبير اسمة وهج الطف وهاي بنت عمي الصغير اسمها طيبة الزهراء وهي هاي جعدة العلويات اصغرنا ..

رهف :: اتشرفت بيكم كلكم والله

_ بنات اعرفكم رههف صديقتي ..

اريج الله :: الشرف النا حبيبتي نورتي العرس ..

طيبة الزهراء :: فدوة لله هاذا الطفل ابنج ؟

رهف :: ايي ابني اسمة مجد علي باقر

طيبة الزهراء :: اهااا ربي يخلي ويحرسة الج وتكر عينج بي ..

رهف :: تسلمين ياقلبي ..

اخذت رهف من يمهن وصرت اعرفها على عائلتنا واحد واحد لين وصلت يم حبيبة و درية ..

_ اشلونجن احبيبات .. اعرفج رههف هاي حبيبة بنت خالي وهاي درية اصير زوجة ابن خالي ..

رهف :: حبيت عائلتكم حيل ..

_ واني حبيتج

درية :: شكلج محبوب بية قبول هواي ..

رهف :: شكرا يكلبي وانت حيل حلوة هم

حبيبة :: الحلو هذا شكد عمرة ؟

رهف :: ميمي عمري ثلاث سنوات ..

دريــة :: اصغر من ابني

_ عندج طفل انت ؟

_ اي عندي بس وي ابوة هسة اسمة صمود

_ ربي يخلي الج شكد عمرة ؟

_ صمودي عمرة سنتين ضبط

_ ياحبيبي تشوفي عريس ان شاءالله

_ وانت هم تكر عينج بوليدج وتجيبي غيرة ان شاءالله..

وبعد الحوار تركت رههف يم دريـة وحبيبة لان اندمجت وياهن ورحت اكمل باقي بالقاعة وبعد ما ركصنا وتعبنا ..
اندك هورن ودخلت العاملة مال القاعة وانطتنا خبر ان العرسان اجوي ويردون يدخلون لياخذو العرايس ..
جهزن عمتي ومرة عمي غطن ام البنين ورحمة الزهراء ونزلن الغطة على وجوهم ..
ونحن كل وحده بينا لبست عبايتها والي لبست بس حجاب ..
وانفتح باب القاعة ودخلو ابوي يمشي وراه يمشي زبير و علي الهادي

و تفاجأت لمن شفت صيوان و علي الباقر و اصفاد الحق والمعتز بالله مغيرين ملابسهم ..
ولابسين بدلات عسكرية !!!!

كامت ام البنين وصار يمها علي الهادي واخذها من ايدها وطلع وياها لوحدهم لان يرحون للفندق ..
ورحمة الزهراء طلعت وياها مرة عمي وكلنا طلعنه بزفتها

لمن وصلنا وكفت سيارة رحمة الزهراء والكل جان واكف حول السيارة لمن نزل زبير وفتح الباب حتى ينزل رحمة الزهراء الكل كام يصيح صلو على محمد وآل محمد ..

راحت مرة عمي وفتحت الباب مال البيت كدامهم

ولمن زُبــيــر فتــح بــاب السيارة ونزلت وحطت رحمة الزهراء رجلها بالكاع صاحت عمتي فاطمة الزهراء ..

_ زُبيــر لف شيخـة العلويات بعباتك لا يخطفها منك الهوى

اول ما طلعت رحمة من السيارة فتح زبيــر عباتــة ووحط رحمة الزهراء جوة اجناحة غطاها حيل بعباتــة. وبدة يمشـي بيها وكأن مايريد ولا عين بشرية تلمح مرتــة .!!

فاتو للبيت ونحن لمن ردنا نرجع ابوي الي رجعنا ..
اول ما فتنا للبيت .. وشمرنا روحنا على الكنبة من التعب طيبة الزهراء رغم جانت ضايجة على اختها واستوحش البيت صددك ..
رجعو نص الشباب .. !! لا علي الباقر ولا صيووان ولا المعتز بالله ولا حتى اصفاد من بعد الزفة لمحتة ..

ولمن سالت علي السجاد عنهم سكت
وابوي جاوب بمكانة واردف وياي ..

عبد الحسن :: غديرة بوية اتاخر الوقت اتصلي بأنمار يجي ياخذج واذا تنامين هنا اصعدي لغرفتج

_ بس بوية من حقي اعرف اخوانييي وين راحو من طبو وراك ببدلات عسكرية وهم اختفو ؟؟ شنوو يجي البشير يختفون اخوي شجاي يصير ..

اتقاطع كلامي صووت صياح من فوك وجان الصوت لــ لينا لمن وكفت على الدرج وجانت بدلتها كلها دمم
جانت تصرخ من الوجع وتنزف بشكل مو طبيعي ..
ركضنا الها ابوي ركض يجهز السيارة وامي جابت العباية الها واول ما وصل الها علي السجاد وكعت ابين ايدية واخر شي لفضتة ..

لينا :: سجاد اطفالي اطفالي سجاد ..

_ مراح يصير لج شي ياروحة. لعلي السجاد ..

رغم ثقلها وهي حامل جان علي السجاد شايلها وركض بيها لبرة كان ابين ايدية ريشة من منضرها الشفتة حطيت ايدي على بطني واردفت ..

_ الله يبعد عني و عنك الشر يا امي انت ..

←←←←←←←←←←←←←←←

__ "وعَلِمت أن الطَّريق مُوحِش وليس مَعِي أنيس، فحفظتُ القرآن".

يَـــتبـــع ←

لهنا اعزاز قلبي وصلنا لنهاية البارت
صلو على محمد وال محمد اذا ما صليتو اليوم

لا تنسون تصويت وتنطوني رئيـــكم

ومتابعة لحسابـــي انستغــرام

احبــــكم والســـلام 💗✨