رواية احفاد السيد : الثار ( بأجزائها الإثنين ) الفصل التاسع 9 - بقلم ​رُقَـيَّـةُ الْأَكْـبَـرُ

. أحفاد السيد
بقلم الكاتبة ﴿ رقَـيـَة الأكــبر ﴾
لاتنسون التصويت ومتابعة للحساب

.
البارت 22

- كلُّ النساءِ قصائدٌ منثورةٌ
وخلقتِ أنتِ كلَّ وزنٍ شاعري
يا فتّنة لا أستطِيع وصالهَا
إن لم تكونيّ ملاكيّ فتظاهريّ .

★★★★★★★★★★★★★★

المعتز باالله :: آددم !!!

طيبة :: المعتز باالله !؟

علي الباقر :: منوو انت وشنو جااي يصير هناا ؟

ـ اولك انت شعددك هناا شتسوييي ؟؟

علي الباقر :: طيبات فووتي جووة

طيبة :: بسس

المعتز باالله :: فووتييي اوللججج... لا اوديج وره اببوووجج

علي الباقر :: صوتك يا زلمه لا تفضحنا
طيبات ادخلي جووة رووحييي

"" بعد ما دخلت طيبة لجوة راح المعتز باالله وسحل ادم من ياخة قميصة واني مفاهم هذا منو وشنو علاقته بطيبة وليش ابن عمي هلكد شايل منه ؟؟

المعتز باالله :: اجيتنـي واني رفضتك شكووو جاي لهنا ؟؟
اولك ترريدد تموووتت انت ترريد تموووتت ؟؟؟

ادم :: اسسف بس مكدرت الزم كلبـي مريت مناا حتى حتى اجيكم للفاتحة وشفت طيبة جاي تذب هذا الماي هنا بشارع ومنطاني كلبي ما اعزيها والله ما حطيت عيني بعينها وانا مدنك بعدني مكايل الها البقيه بحياتج انت اجيت ..

ـ وشكووو تعززي منريد منك شيي بس اطلع من حياتنا رووحح لاتراويني وجهك

ـ اني شاري اختك على سنه الله ورسولة وانت متريدني ماكدر اطلعها من كلبي وراسي

ـ طلعها غصب عنك تطلعها لا وروحة. لابوي الصار جوة. التراب الحكك بي انت وووياهااا ورووحوو عوود تزوجوو بالجنه

علي الباقر :: المعتز باالله كاافي عووف الرجال....

"" بعدت المعتز عن ادم ودفعت الولد لكدام وخليته يدور وجه. ويروح وبقيت اني. والمعتز بالشارع هوة حاط ايدية على خصرة ويحاول يجر نفسة.
واني تحز بخاطري منضر طيبة واهي واكفة. وياه

علي الباقر :: كاافي معتز

المعتز باالله :: اعرف مالها علاقه واعررف هوة الجاي يركض وراها بس خووية بودي افووت واطلع كل حركتي بيها وبي....

ـ اتعووذ من الشيطان شووف هاي تاليت الكتمان
هاي انت من امس كاتم جوة صدرك حزنك على ابوك وكلشي وهاي باول نغزة ردت اطلع كلشي ...

ـ تدري بيه مااحب هااي التصرفاات علي الباقر الا اهل بيتييي الا حرمت بيتي احررك الكووووون عليهن

ـ خلص يا زلمة لا يروح كلبك يوكف الله يخليك اهدة تعاال نرجع للجادر
نرجع للفاتحة حتـى شوفة امك اتركها تعااال
امششييي يا رجالل ...

ـ جاي وراك

ـ لا تجي كدامي امشي خوية يلا

"" اخذت المعتز بالله من ادية ورحت رجعت للفاتحة كعدته وكعدت كدانه غسلت وجه
وشربته مااي وحضنته وصرت ابوس براسة

واجاني البشير ولزم ايديه وصار يبوس بيهن ونهدي بي ما ضلت سالفه ما ضل شي ما حجيناه وياه وهوة. ساكت

وبعدها المعتز صاح لحامد وطلب مننا يروح الة ..
وعفناه يلتهي وي حامد وصرت واكف وي البشير

علي الباقر :: حيل خاايف على اعزيز

البشير :: حاليا هوة بحالة صدمة هسة يستقبل الوضع ويصحي على نفسة لا تخااف

ـ ماعرف يا خوية ماعرف

ـ عوفك. من اعزيز شبيكم انت وعلي السجاد ؟

ـ شنو شبينا ؟

ـ اني اسالك شبيكم متعاركين ؟

ـ لاا شسالفة من يمتا اني وعلي السجاد نتعارك ؟؟

ـ جا شمالكم منتبه الكم من امس وانتم ولا واحد. ضاحك. بوجه الثاني واصلن ولا واحد بيكم. مباوع للثاني

ـ مو الا نسوي هيج مابينه شي بس منكسرين على عمي مو هاي السوالف هسه

ـ علي الباقر !!! البشير اني ما تعلمني بيكم ولكم
انتم لو بنص الحزن ابتسامتكم بوجه بعض ما ترروح وهسة. مااكو اصلن

ـ صح اكو خلاف بسيط بيناتنا وراح ينحل

ـ خلاف اففاا عليكم ؟؟ يصير خلاف ابيناتكم ؟

ـ مصارين البطن تتعارك متريد يصير خلاف ابيناتنا

ـ بس مو نحن احفاد من رس احمد ال صادق الي نخلي الخلاف التافه يفاركنا ...
انتضر دقيقه....

ـ تعال شتريد اتسوي ؟

ـ هسة اجيك وانعل ابو الخلاف

ـ البشير البشير اووكف

"" رراح البشير وصاح لعلي السجاد الجان يكصب باللحم كدامنا عاف الساطور وعاف كلشي من ايدية
واجه للبشير
والي البشير بدورة اخذ علي السجاد من ايدة وجابة خلاه كدامي بوقت اني دنكت منطاني كلبي ارفع راسي واشوف نضرات اخووي الي
واردف البشير

البشير :: شنو نحسدتو ؟ اي والله نحسدنا على علاقتنا الي نحن اولاد عم وعمه ومجاي نصيح لبعض باسمائنا ما تطلع مننا غير كلمة خوية
شنو التغير هسة ؟؟
هاا علي السجاد شنوو احجي شبيك وي علي الباقر ؟

علي السجاد :: علي الباقر بمثابة الدم الي يسري بشراينـي وهوة قزح عيونـي مو اني الي اشيل بخاطري منه لو افكر بي
وللعلم اني الغلطان وما اعرف شلون اعتذر منه لسوء الفهم
والله امس شفت كسرة ابوي على عمي
ردت اكتل نفسـي لان خليت علي الباقر امس ينام زعلان مني واني غلطان وياه ومسمعه كلام والله مو اله ابد والله مو اله...

البشير :: جا شبيكم بعد ؟
ها خوية ابا الحسن متسامح اخيك الجبير جاي يعتذر منك ؟؟

"" انا هنا ما لزمت روحي نزلت دموعييي وصرت امسحهن واني مدنك
والبشير رفع راسي بايدة وهوة يكول افا افا
وعلي السجاد اتقدم وحضني بكل حرراررةة
وصار بيدة يدك على ظهري ويبجي ...
اول مرة هيج نتخالف ويغلط وياي بكل عمرنـا

علي الباقر :: ... .. .. .. .. .. .. .. ..

البشير :: افى افى افى هااي شنوو يخووية شنو هااي الدمووع يااعلي ادخيلك

علي السجاد :: اذبح روحي جوة رجليك يابعد اخووك. يابعد ادمووع عينـي
اااخخخخخ يااخووويي شكدد مشتاق الك
ابوس ايدك اروح فدووة لدوموعك هااي سامحنـي

" لمن دنك علي السجاد يبوس ايدي وخرتها عنه ورجعت حضنته...

علي الباقر :: لا استغفر الله لاتسوي هيج وياي خوية

علي السجاد :: استاهل شنو تسوي وياي استاهل

ـ م راح اسويلك شي بس شي واحد واني راح اسامحك

ـ شنوو ؟؟

ـ هههههههه تعرفة انت الي ببالي بالك

ـ اخ ههههه تدلل عليه

البشير :: صافي يا لبن ؟؟

علي الباقر :: ماكدر ازعل منه وهوه يعررف مستضعفنـي

علي السجاد :: شعندي غيرك غير انت مسندي

البشير :: الله سبحانه كال بصورة القصص
< وسنشد عضدك باخيك ونجعل لكما سلطان نصيرا >

لاتخلون احد يفرك بينكم لو مهما جان غلاته عندكم
والله اصعب شي فراك الاخوان اسالوني اني الدفنت ثلاثه
اسالو ابوكم الدفن اثنين ...

علي الباقر :: انت دفنت ثلاثه بس نحن تسعة هنا عندك. وجوة ايدك

ـ اخوان يوسف جانو 11 هسة انتم بس 9 فرق اثنين

علي السجاد :: خيولون اخووان يوسف لا تقارنا بيهم هم صح جانو 11 لكنهم بس عدد بس نحن هنا افعال وانت مجربنا تلكانه حزام بظهرك وكت الشدة

علي الباقر :: الخووة مو بالعدد الخووة رفعة رااس
يوسف عندة احدعش
وحسين ترى عندة بس العباس ...

ـ صدك عضدي انتم

"" واحنا نسولف سمعنا ابوي عبد الحسن وكع !!!

ركضنااا ودخلنا لنص الجادر وطلعنا لبرة كعدنا على الكرسي خليناه يتنفس
ورشينه مااي على وجه
وصحى الحمدالله جان هبوط بسيط من حزنه على عمي

بس هبطنا كلنا وعلي ....

رحنا وصرنا نساعد بالطبخ حتى نكمل بسرعة. ..

« مَـــشـــهِــد »

بنين :: واني جنت بغرفة غدير اتصل عليه علي الهادي
مكدرت ارفض الاتصال لان ادري بي راح يضل باله
واني احصلة بالسنه حسنه
اخذت التلفون وفتحت الاتصال وياه ....

علي الهـادي :: لك هـْْْــلا هــلا بلهفــة روحــي هــلا بالمشتاقتلها رروحييي

بنين :: هلا بيك ياعمري

ـ شلونج مريتـي شلونج يا حلالي ؟؟

ـ اني بخير انت شلونك دراستك شلونها ؟

ـ والله اني طايح حضي هنا منتضر هاي الشهرين يكضن حتى اجي واخلص لان حييللل مشتاقلج

ـ يلا خلص الهوواي وبقى الشوية

ـ ايي ان شاءالله.

ـ بس كوون اكو نتيجة

ـ لا ما مقبولة منج يعني ماخذ منحة بالقاهرة ومتطلع مني نتيجة صدك تحجين اني ابو النتيجة

ـ رفعه راسي انت الي اتباه بي اعرف بيك

ـ يابعد روحي بناني انت الاهم شلونها مدرستج ؟

ـ اني زينه وكالو راح يعتمدون على نص السنه والدخول شامل النا نمتحن بس وزاري وبنص الكتاب

ـ صددك ؟

ـ.والله

ـ اي هم ززين بعد احسن الج يروحي طلعي معدل

ـ ايي ان شاءالله

ـ بناني

ـ ها عمري

ـ شبي صوتج شنو الصياح اليمج صاير شي ؟؟

ـ لا ماكو شي لايضل بالك

ـ اتصل بامي مترد بناني احجي

ـ صدكني ماكو شي وهذا التلفزيون حامِد معلي الصوت لا اكثر ولا اقل

ـ ام البنين

ـ ههف مدام صاار بيها اسمي ام البنين مو بناني يعني ضجتت مو ؟؟

ـ صايره تجذبين عليه هواي

ـ بشنو مجذبة عليك اني ؟؟

ـ سولفي من الاخيررر شنو هذا الصيااح ؟؟

ـ يااالله علي الهاددي عووف راسك بدراستك هسة ومن تجي الله كريم هنا بس شهرين بقن....

ـ الحمززه هسسة على اول طياره اجي للعراق وانعل ابو الدراسة لا ابو الفاينل احجييي ولج

ـ يااا علي الهادي صلي على النبي

ـ احجيييي منووو المااات ؟؟

ـ بس اهددة واني راح احجيلك كلشي والله

ـ من البداية شكوو شي ضامي علينه ومجذبين بي تحجي

ـ تدلل بس اهدة يمعوود صوتك طرمت اذاني

ـ احجي يلا

ـ قبل شهرين وكسور تقريبا

ـ ايي

ـ استشهد مؤمل الصدر بالتظاهرات

ـ شنوووة ؟؟؟؟

ـ وبعده بيوم ماات تحرير اجته نوبة من حزنه على اخوة

ـ ... ... ... ... ... ...

ـ وهاي اول البارحة تزوجت غدير الله

ـ اختييي

ـ اييي

ـ هههههه حلوووووو حلووووووو كملييييي

ـ والبارحة مات خالي الحسن المجتبـى ..

ـ. شنوو هااي المصايبب النازلة عليكم ونحن بعالم الموازي ولا. واحد كال اتصل واكول للي ساكنين بالمريخ همة من العائلة ولازم يعرفوون يعنييي اخووانييي مااتو واختي تزوجتتت
وهسسة عمي رراح
ونحن اذن من طين ووحدة من عجين

ـ علي الهادي خالي عبد الحسن حرص علينه ما نكللكم خاطر ما تلتهوون صدكني

ـ اشششش ام البنين اششش مااريد اسمع شي

ـ علي الهاادي

ـ ٠٠٠٠٠٠٠٠٠٠٠٠٠٠٠٠٠٠

ـ اللووو علي الهاادي ؟؟؟

ـ ٠٠٠٠٠٠٠٠٠٠٠٠٠٠٠٠٠

ـ تسمعنيييي علي الهاادي ووين رحتت

"" حط علي الهادي وسد التلفون بوجهي
واني شمرته على صفحة وصرت ابجي هاي اني لا بيها ولا عليها طلع حركته علي الهادي بيه

صارت بجيتـي وي دخولية رحمـة الي اجت يمي وكعدت وصارت تسالنـي شبية ؟

ام البنين :: والله ياالله هم يجذبون ويضمون واني الي اكلها

رحمة :: شنو يا حبيبي شبيج ؟

ـ رحمـة !!

ـ افف شبيج يروحيي

ـ ختنكت اختنكتت حييل

ـ. من شنو يا خيه

ـ علي الهادي

ـ شبي ؟

ـ توة اتصل يسال

ـ ايي

ـ وسمع صوت الصياح وصار يسالني ويسالني وضغط عليه

ـ اييي

ـ وكلتله بكلشي

ـ بشنو كتيلة ؟؟

ـ كلتلة بالماتوو كلهم وحتى بزواج غدير كلتله ماكدرت اجذب علي اكثر من هيج واخر شي طلع حركته بية وهاي سداه بوجهي وحضرني

ـ وليش كتيلة مو عمي كال لازم ميعرفون ؟

ـ هو حسس يتصل على العلوية ومترد علي واتصل على اخوانه ميردو
ومن اتصل عليه سمع صوت الصياح صاار يصيح عليه

ـ اووف خلص اهددي هي المصايب مراضييه تفاركنا نتحمل شنسوي وبعدين شنو يطلع بيد علي الهادي هاي عرف شنو راح يسوي يعني راح يصير عليه النبي عيسى ويرجع الماتو ؟؟
لا بيدة ولا بيدنا شي واذا ضمينه عليهم ف لمصلحتهم مو من حقهم يلومنا بشي
يعني يردون يعوفون دراستتهم ومستقبلهم ويجون هنا للفاتحة والبجي واللطم الي ما منه فايدة ؟

ـ والله مرراح يقتنع وصدكي هسة على اول طيارة راح يجي لهنا حيل عصب

ـ خليي يجي ومراح يكدرر يحجي شي وعيونج كاافي تبجين

ـ خايفة رحمة خاايفة

ـ من شنوو يا روحي ؟

ـ معقولة اذا اجة يوصل مرحلة يطلكني ؟؟

ـ صلي على النبي شجاج متوصل لهاي المرحلة

ـ ولج حضرني شووفي حضرني ححيلل عصب فكر اني جذبت علي يكلي صايره هوواي تجذبين عليه يااربي

ـ ترى علي الهادي يحبج ومستحيل يعوفج خلي هاي ببالج ولا شنو جابرة الي يخلي يعقد عليج ويخليج تصيري مرته ياالله يروح لمصر
غير من خوفة لا تنخطبين وتتزوجين بغيابه
نهى عليج وراح ف مستحيل يفرط بيج
ومن يجي اني وعلي الباقر وعلي السجاد وكلنا راح نوكف بوجه قبل لا يوكف كدامج وقبلنا كلنا راح يواجه عمي عبد الحسن ف لا تخافين يا روحي انتي شيلي هاي الافكار السودة من راسج

ـ جا ليش طلع حركته بيه ؟؟

ـ نحن ههيج نحن رس السيد احمد ال صادق والله هيج هااج شووفي
اني من حزني على ابوي بدال ما اتصل على زُبير واشكيه اهمومي وارتاح وياه لاا وكعت وحضرته هم هااج وشوفيي
وحتى هذا الرقم الغريب ادري بيه اله اني انطي رفض
وشوفي هذا الحساب الغريب من امس يراسلني على الانستكرام واني معلكته بالطلبات
هم اعرف بي لزُبير وهيج ما احجي وياه
شفتي الرس هسة مو بس عند علي الهادي عندنا كلنا نعصب ونضوج من شي نروح نطلع حركتنا بشي ثاني

ـ الله يصبرني عليه بس

ـ هههه ادعي الله يهدي وبعدين يا ميرزا انتي منو غيرج يلوك تصير حرم السيد هاا حتى تخافين لا يطلكج ؟؟

هوة يحصل مثلج حاى يعوفج !!

ـ اي والله خلييه يبوس ايدية ان اني قبلت بيه

ـ وكفووو عفيية عليج هيجي اريدنج

ـ بعدد روحييي رحومةة شكدد عظيمة انتي

ـ العظمة بس لله سبحانه

ـ هذا الشي اكيد بس اقصد عظمة القوة والصبر يعني انت البارحة اليشوفج ميكول هاي انتي هسه شنو التغير بيج وهيج كطعتي البجي ؟

ـ لا بتالي ابقى اني علوية ومؤمنه ان كل هذا اختبار من الله صح هوة. ابوي وكسرني بس الله موجود
والامام العباس كافل جميع المكسوررين
وسلمت امري لفقيد الكفين

ـ ميقصر والله

ـ ادرري مايرد احد محتاج ينطي وهوة بدون ايدين

ـ خرب يومج

ـ شبيج

ـ ذكرتيني بكربلاء من زمان مزايرة

ـ صار الج شكد ؟

ـ تقريبا راح اكمل 7 اشهور

ـ ززين قريبه ولج

ـ وانت ؟

ـ من 2016

ـ صدك والله

ـ والله من زمان حيل خو النجف ولا طابتها ابد

ـ ليش عود ؟

ـ هاي بعد متصير يختي ابد كلما اريد متضبط اتحمل واصبر واكول الله كريم الزياره رزق

ـ الله كريم ان شاءالله نرروح بمحرم هذا وعدد رجلي على رجلج ترحين وياي

ـ الله كريم ..

" واني اسولف وي رحمة فاتت غدير وكعدت على كرسي المراية كدامنا وجه جان حيل ضايج
واردفت رحمـة وياها

رحـمة :: خير غيمـة انت شبيج. بعد هم تطلكتـي ؟؟

غدير :: ياررريتت واخلص منه هيج كوون مرة وحده ينشال هوة واخته

بنين :: شكو شنو صاير ؟؟

ـ تخيلن اتصل عليه هسة يكلي جهزي روحج اجي اخذج يالله استلمي هذا شتحجين وياه !!!

رحمـة :: هم حقة

ـ هية شنيه حقة اكول للعلويه تكلي حقة اجيج تكليلي حقة !!!

رحمـة :: غيمـة انت اول البارحة تزوجتـي والبارحـة انت نمتـي هناا ميصير حبيبـي انتـي روحي واكعدي وي رجلج

ـ شووف الكعده وياه شلونهاا يالله

رحمـة :: ليش متحبي ولج ؟؟

ـ خلي احب روحي حتـى احبة
وبعدين هاي شبيها الميته بحضنج ؟؟

بنين :: اناا ؟؟

ـ ايي انتيي ؟؟

رحمـة :: اخوج متصل عليها ومعصب عليها وهية كالتله كلشي وهوة. حضرها وسد التلفون بوجها

ـ علي الهادي !!

بنين :: لا علي الرضا يعني منو رجلي واتصل عليه ؟؟

ـ اعصابج اعصابج عينـي ام خشم اليابس شنو حجيت اني

رحمـة :: هسة على الاقل غيمـة مصببتج اهون من مصيبة هاي المسكينه هههههههه

ـ وعلي نحن حياتنا محتوى استلم يالله
وهسة علي الهادي راح يرجع العراق ؟؟

بنين :: شي اكيد هذا يسويها ميضل هناك

ـ خررب يعني مبقاله شي شبي هذاا اتخبل فرد مرة

بنين :: حضيي غيير كل عمرة ما يتصل بيه الا اني احرك التلفون بالاتصالات
هسسة لااا هووة. الي اتصل صاار ميتت الا يسمع صووتي

ـ هاي بعد الله يريد هيج اهدي انتي لا نروح يصير بيج شي

رحمة :: على طاري المرض
غيمـة اخذتي علاجج ؟؟

ـ ايي اخذيته علي الباقر موصي طيبة ...

بنين :: علي الباقر وطيبة وااااتتت كيف انجمعو هههههه

رحمة :: وهذا اخيج وين شاف اخيتي

ـ يااا ماتعرفن التطووورراات الاخييرررة

رحمة :: شنووو ؟؟

بنين :: الله يستر شنو هناا ؟؟

ـ البارحة صعدتتت واشوفلج ذيج الشوفة

رحمة :: احجي عااد

ـ طيبة نايمه بغرفة علي الباقر وهوة مسوي بيها ابن العم الحنين اليواسي اليل كلة كاعد وياها بالحديقه يحجي وياها ويسكتها واليوم الصبح وصاني عليها ...

بنين :: هااي شنوو هاااي ههههههه مجنتت متخييلللة ابد يحححح عليي الباقر وطيبة معقولة ؟؟

رحمة :: واذا شبيجن راح تكلكلن ترة ابن عمها واخوهاا

ـ حبيبتـي اخووي واني اعرفه اكثر من اييي شخص كلجن انتن بنات عمه وعمته ما يصيحلجن باساميجن
يكللجن خوية
الا طيبة الزهراء يصيحلها طيباتي ...

بنين :: يعني نكول مبرررشش ممبرروششش

ـ ايي عينييي مبرروشااتت مو مبروش وحده

رحمة :: مبروشاتت بعيونجن هسة تردن تاخذ اجر وتجمعن راسين بالحلال ما لكيتن غير اختي الطفلة
ترة لو اخوج متزوج على وقت جان ابنه بعمر طيبة

ـ واذا هية مراهقة وهوه ثلاثينـي ياعينييي عينااه والله حاصل الها طيبة تنام وتكعد على صوت علي الباقر وهوة يكلللها يا نحري يا صمام كلبـي يا محروستي يا عرضي

ياابووووييةةة عمييي هنيالج يا طيبة اذا صدك ..

بنين :: هاي عود انت اخته وهيج عاشكته هههههه شنكول على الغريبات

رحمة :: هااي مو صاحيه لا تخلين بالج وياها كوومي كومي جهزي روحج لا يجي رجلج كومي
ولاتحجن هيج. كداام طيبة ديرن بالجن

ـ رجلي يجي ياخذني بليل مو هسة

بنين :: شوكت العرس بس ؟؟

رحمة :: يااا ولجن كاافي

ـ هههااايييي

بنين :: يلا اني حنزل اشوف امي خاف محتاجة شي

ـ تمام وبطريقج شوفي الجنة مالتنا شلونها

رحمة :: شعجب تسالين عن لينا منج. من الشيطان

ـ يععععع لينا شننيي

بنين :: مو تردين اشوف الجنه مالتكم شلونها ؟

ـ. اقصد طيبة ترة

رحمة :: كوومييي ولجج لا اذبحج هسة هنا هههههه

بنين :: تعااي خية تعااي وياي لا ننكتل حررام. واحد يجمع راسين بالحلال هناا يصير منبوووذ

ـ ايي والله كسرتيي كلبي رحمة. اصلن انيي مرراح اوافق على هاذا العرس

رحمة :: سوالف طلعنها من راسهن وصدكنها ياا الحمد الله والشكر عن نعمة العقل. ..
روحيي خية الله وياج تاثيرات العلاج هذاا ..

« مَـــشـــهِــد »

انمار :: طلعت من الفاتحة ورحت لابوي من بعد ما دزيت رساله لغدير ان اني راح اجي اخذها بليل
دخلت للبيت وكعدت يم ابوي بعد السلام
وبعد ما سالني عن لينا واطمن عليها
اردف وياي بالموضوع الجابني لجلة

قصطير :: الفاتحة المن ؟

انمار :: بوية فااتحة الحسن المجتبـى

ـ لجهنم وبأس المصير

ـ ٠٠٠٠٠٠٠٠٠٠٠٠٠٠٠٠٠٠

ـ شلونه وضع عبد الحسن مكسوور موو ؟؟

ـ يا بوية راد يموت ورة اخوه على اولاد اخوة جان قوي ومصبر نفسة بس هنا ما تحمل
حتى قبل شوي وكع ومن صحة شبك المعتز بالله وكعد يبجي بحضنه ويكله انت من ريحة الغالي. ..

ـ يستاهل عساه بالكسر الي ما ينجبر وبعد وبعد راح يذووك منيي

ـ المن طلبتني ؟؟

ـ وين صرت بالي كتلك علي ؟؟

ـ شنو بوية ؟؟

ـ عبد. الحسن عندة كلشـي الا عرضة ويمكن انت نتبهت بكل فاتحة ميخليهن لوحدهن ويبقي يمهن زلم
لان كلش مهم عندة نسوان بيته من جان اخته وبتها
لو بنات اخونه لو بناته

ـ ايي اعرف

ـ واني اريد اضرب هاذا العرررض. ..

ـ شلونن ؟؟

ـ جعدة بناته عندك

ـ لااا بوووية ششيل غدير من راسك ..

ـ لاتخااف مرراح اسويلها شي. غدير انت تزوجتها ودخلت عليها ما تفيدني بعد

ـ عجل شنو ؟؟

ـ رحمـة الزهراء ، ام البنين ، وهج الطف ، طيبة الزهراء ، اريج الله
كلهن يخصن عبد الحسن
اريد اسمع صووت صياحهن وهن يناجن عمهن واخوانهن ومحد يرد عليهن
بس. طلع وهج الطف ماريد احد يوصل الها

ـ بوية صعب هاذا الشي السادة مجاي يفاركوون بناتهم

ـ موو شغللييي المن مخليك انت واختك هناااك اذا مترريد شغلنا يصير على مرتك سويي الكتلك عليي

ـ بس بوية افهمني ام البنين علي الهادي متزوجها
ورحمة نخطبت قبل موت ابوها

ـ علي الهادي ابن عبد الحسن مو ؟

ـ ايي

ـ يعني هوة ماخذ بنت فاطمة بت عمته

ـ ايي يحبها من هوة. وصغير واتزوجها وراح لمصر يكمل دراسة الطب هناك

ـ ورحمـة منو هذا الخطبها ؟

ـ مااعرف بس سمعت بي ان هوة نقيب

ـ شنو اسمه ؟

ـ هم ماا اعرف

ـ جيبلي اسمةة وشوفة شنوو هوة. ما شنوو
وبعدين الخطبة صارت رسمي ؟

ـ لا بس. حجي اجة طلبها من اخوها وهيج سوالف هاي. قبل ايام ما لحك المعتز يرد خبر لان مات ابوهم

ـ اهاااا

ـ ٠٠٠٠٠٠٠٠٠٠٠٠٠٠٠٠٠٠٠

ـ خلينه هسسة ب اريج الله

ـ شبيها

ـ اريدها شبيها ؟

ـ شتريد منها ؟؟

ـ انماااررر هووااي صااير تسال

ـ تمام بوية التريده

ـ اسمع اعرف هسة مراح تكدر لا انت. ولا للينا تسوو شي لان فاتحة وهوسة والبيت متروس
بعد الاربعين اريد اسمع خبر اريج الله

والله لتصير هااي الكسرة الجبيرة. الهم
هم ما نكسرو على الماتو كد مراح ينكسرون ويدنكون راسهم من ورة عرضهم الراح يتطشر

ـ تريد لينا تكتلها ؟

ـ لا لاااا انت الراح تتصرف والكتل وهاي السوالف عبد الحسن بيده يسويهن لبنته

ـ ما فهمت !!!

ـ انت هسة روح وخليلي عينك على بيتهم واريدك تشوف منو اكثر شخص يمر على الولد ويثقون بي

ـ و بشنو راح يفيدنا هذا ؟

ـ هذا هوه مفتاحنا لنوصل ل اريج الله ونضربها

ـ اشوف واردلك خبر لازم اروح هسة

ـ .كووول لاختك

ـ شنو ؟؟

ـ كللها لا تندمج وياهم هوواي ما بقة شي تررا
وانت هممم لا تتعود هوواي على غدير

ترى كدامكم بس 11 شهر وتعوفون كلشـي وتختفون من. حياه السادة

ـ و هوة نحن خلينه عدهم حياه ؟

ـ وما نخلي ولو بيدي جاان مسحتهم عن وجه الارض بس. الدنيا بيها قانوون

ـ ههههه زين وتذكرت القانون

ـ رووح يلة انت هسة

ـ مــع الســلامـة ˝˝

"" طلعت من بيت ابوي وبقيت كاعد بالسياره واني اكول بيني وبين نفسي
معقولة بس 11 شهر
واهجر غدير ؟؟
هههه مرراح احس بيهن والله
زين شلون بيه
شلون رااح اتركها
شلون راح اكدر انساها واتخطئ كلشي عشته وياها
وكلشي حسيته. وياها
وشنو يضمن الي غدير ميصير عدها طفل منـي ؟؟

الطريق المشينه بي من الاساس خطأ
لينا حامل
واني بالي يم مرتي
والوقت يمشي بينا
وحبل الجذب كصيير
وفوك هذا السويته اكول على امل تسامحني غدير لمن تعرف

شلون هسة راح. تسامحني اذا عرفت اني راح اضر اختها
وراح اكون سبب بتدميرها وتدمير مستقبلها وانهااء حياتها ؟؟؟

والله لو تكتلني بيدهااا مرراح تطفي النار الي بكلبها اعرف بيها هي من غير شي. متحبني مو ادوور تعرف عني مل هذني السوالف...

مشيت بسيارتي
ورجعت وكفت يم الفاتحة ونزلت وصرت معزب وي الولد
وهي ساعات بس. ودعنا علي الباقر
لان كال يريد ياخذ طيبة للنجف وسمعت المعتز بالله شلون يوصي وخايف عليها
وحتى عبد الحسن ماعنو الرايح وياها ابنه
بس كعد يوصي ويكله انتبه الها وانتبه الها

شفت بعيني هم بارواحهم ما يامنون على عرضهم شلون ابوي. يريد مني اوصل الهن ؟؟

وبعد الصار شفت اجت ابنيه ووكفت بعيد عن الفاتحة. بس انتبهت لملامح البشير اول مشافها راح الها
وبعده راح المعتز بالله وكف وياه
ولحكهم عبد الحسن وصرت اشوف الهوسة. الي صارت بس. مجنت اسمع شي لان جنت حيل بعيد عنهم اشوف بس صوررة ... .

« مَـــشـــهِــد »

البشير :: واني جاي اساعد الولد لنصب الغدة
شفت جميلة وكفت براس الشارع ...
رحت الها
ووكفت كدامها وجان لابسة. شالها ومطلعه الكذلة مالها سحبت الشال وغطيت شعرها وجنت اريدها تروح منااا وهية ثابته بمكانها...

البشير :: هااي شنووو وضعيتج واصلن شجااي تسوين هناا ؟؟

جميلة :: اجيت اعزيك اجيت اقوم بالواجب

ـ جميلة روحي منااا شبر وشبير هناك جووة ماريدهم يشوفوج بهااي الحالة روحيي

ـ ما بقى شيي خلهم يشوفو امهم شنو صاار بيها من وره الحب ومن وره ابوهم

ـ جميلة عدنا فاتحة ولحد الان منجب وساكت وياااج لا تطلعيها ويايي من ماعونهاا اتعووذي من الشيطااان. ورروحيي

ـ مرراح ارروح اصلن اني ما اجيت. الك اجيت اعزي عبد الحسن صددك وينه هوووة

"" بدت تصيح لعميي
واني حطيت ايدي على. حلكها حتى اسد صوتها اجاني المعتز بالله واجاني عمي ووكف عمي كدامنا واني والمعتز بالله صرنا وراه وجميلة كدام عمي وجه بوجه صارو

اول لقاء الهم من بعد 17 سنه

جميلة :: اجيت اعززي عبد الحسن ووويننةةة عببددد الحسسسن وييننككك

البشير :: اشششش انلصممييي ولجج كاافي فضحتيينا

ـ.خايفين من الفضيحةة هااا هههههه يا ناس يا عالم سادة. احمد ال صادق خايفين من الفضيحة

المعتز باالله :: شجااي شيصير هنااا ؟؟

جميلة :: انت مدخلك رووح. روحح اشرب حليب وناام السوالف عوفها النا احنا الكبااار

المعتز باالله :: والله لو ما مرة انتي جاان عرفت شلون ارد عليج وششلون اتصرف وياج

البشير :: جمييللة كاافييي. روحي مناا لا تخلين اعصابي تطك. عليج

ـ كل عمرك اعصابك طاكة عليه شنو الجديد يلا طككهن هسة عاادي ماعندي شي

عبد الحسن :: شنو هايي وخروو لي جااي خيررج شتردين ؟؟

جميلة :: اللهم صل على محمد وآل محمد
واخيرا شفتك يا حضرة السيد عبد الحسن ابن السيد. احمد ابن السيد صادق ابن السيد جلال الدين هههههه سلالتكم حلوة احبها

ـ ما تغيرتي بعدج نفس. طيشج ونفس تفاهتج !!

ــ مممم صحح ما تغيرتت ما تغييرت وانت هم ما تغيرت بعدك انت نفسك ذااك السيد الي يمشي كلمته على الكل الي يفرض رئيه على الكل
ويتبرة من شكو. واحد ما يسمع كلامه
بعدك. نفسك انت ذاك السيد الاناني الي يريد كلشي. اله
السيد الي اخذ اولاد اخوه واولاد اخته وكلشيي وهوه. الي رباهم وهوه الي سماهم وهوة. سوالهم كلشي
بعدك ذاك انت الاناني الييي. يريد يزوجهم ويطلكهم بمزاجة وياخذ اولادهم بكيفه
وميريد احد يفك حلكة ويكله احجاية وحدة
انت الي متغيرت يا سيد يا عبد الحسن

ـ ٠٠٠٠٠٠٠٠٠٠٠٠٠٠٠٠٠

ـ الامام علي يكوول ...
« ان دعتك قوتك لضلم الناس تذكر قوه الله عليك »

وانت هووواي ضلمتنـي وانت تعرف كلش زين
يوم الي جبرت ذااك الواكف وراك يطلكنـي وانت جنت تعرف ولا متاكد ان اني مالي ذنب بكل الي صاار

وخليت العقاب ينزل عليه واني مالي بي خليت بشير يطلكني واني مجان عندي غيرة مجنت اريد غيرة انت دمرت حياتي
ودمرت مستقبلي وكلشي بيه
انت كتتتاللل روحييي
انت كتال روحي وانت غريمي شلون اخذ الثار هسة منك ؟
لو اكتلك بلميوون طريقه والله ما يشفي الناار الجوة. صدري النار الي انت شعلتها واني عمري جاان بس 16 سنه

بس اريد جوواب بيا ذنب عاقبتنـي وخليت ابن اخوك يتركنـي وحرمتنـي اني واولادي من حنيته وحبه ومنه كله

هاا بيا ذنب ؟؟ ... ...

ـ بذنب الناس الابرياء الماتو بالحرب ب 2004 الي مالهم ذنب وابوج جان متلوث بدمهم
ولا صارت بعينه ان هم اولاد بلده رااح وتعاوون وي الاميركاان
شترردين منييي هااا اخليج يمي وانت بنته بنت الخااين ؟؟

ـ غلط سواه ابوي
اجيت انت وحاسبتني اني هاا حلوو تفكيرك كلش حلوو وقوي همم

البشير :: جميلـة كاافي روحي مناا

ـ لااا لاا خلينيي خليينيي انيي مصدكت شوكت اشوفة حتى احاجي خليني يمه

عبد الحسن :: ودعي مناا الفاتحة كلها زلم يلاا
واذا على اولادج ف اني كلت لبشير اذا انت ترديهم يكدر يرجعج وتنتهي

ـ هيييج بهاااي السهووولةة والضييم العشت بيي هاااا 17 سنه من حياتي كضت هيج والله ما حسيت بولا ثانيه منهاا وانت تكول انتهت ؟؟؟

يا عبد الحسن اذا انتهت عندك. مرراح تنتهي عندي وحقي رااح اخذه يعني راااح اخذه وخليني على بالك. زززين

وراح ارجع كلشي وعيونك اولادي وحبيبي وحياتي الضيعتها وكللشي

واذا انت ضلمتنـي الله ميضرب بعصة
وعسى الله يجعل حووبتي ما تتخطاك حسبي الله ونعم الوكيل بيك
عسى حوبتي تطلع ببناتك وتعلمك ان لله حق وشلون الضلم يصير.... .

عبد الحسن :: حقييرة جااي تدعين على بناتي وكدامي !!!

"" بعد كلام جميلة عمي ضربها راجدي ...

واهي ولاجنها بقت مستمرة ... .

جميلة :: اصلن اني هسة متشمته بيك شاايف هاي الحاله الانت بيها على موت اخووك انت تستاهل تنحط بهيج موقف تستاهل تعيش كل انوواع الحزن

وصدكني هاي بس البداية بعد وبعد راح تعيش شكو واحد انت ضلمته وخليته ينام يبجي
واذيته من غير حق

الله موجود وراح يااخذ حقة مربع من نص عيونك

الله ويايي ياا ساادة

"" خلت ورراحت وعمي جان كان صاعقه ونزلت علي ما حجة ولا شي راح وكعد بباب الجادر

وبقيت اني والمعتز بالله نباوع لجميلة وهي ترروح....

المعتز باالله :: هااي تخبلت رسميي سمعتهاا اندعت على اخواتنا ؟؟

البشير :: ٠٠٠٠٠٠٠٠٠٠٠٠٠٠٠٠٠

ـ بشير شبيك جااي احجي وياك ؟

ـ اكثر شخص انضلم بهاي القصة هَي جميلة

ـ يا ضلم التعرضت اله هااذاا متشوف لسانها شكد صليب

ـ من ضيم كلبها من ضيم كلبها معتززز العاشته مو قليل وما الومهاا ابد على الحجته انت متعرررف

ـ شنو الما اعرفه شنو قصتك وياها ؟؟

ـ انســـى ...

ـ لا ما انسى احجي البشير هي دعت علينه حوبتها مراح تتخطانه احجي. لازم اعرف ليش هيج

ـ ب نهاية 2002 تزوجت جملية

ـ ايي

ـ هي جانت جيرانه وابوها جان تاجر يسافر ويودي بضاعة ويرجع بضاعه

ـ خووش

ـ تزوجنا واني احبها وهية تحبني تمووت عليه
وبعد زوجنا صارت سوالف السقوط وسوالف دخوليه الاميركان للحتلال وشلون صار يكتل بالناس هيج
ومن ضمنهم ماتت امها واخوها
وابوها جان مسافر ولمن رجع عرفنا ان هوه تجند. وي الاميركان
وصار يحارب وياهم ضد العراقيين
بذاك. الوقت عمي كال متبقى بنته ولا دقيقه عدنا
منطاني حتى احجي ولا شي واني بذاك الوقت عمري 18

ـ زين

ـ صار عمي يشكك بيها وصار يكول شمعرفك يمكن هي وي ابوها ومعرف شنو
ووصل مرحلة يشكك بشرفها وصار يكللها شنو. ضامن النا محد متقرب منج غير ابني البشير

ـ هااي شنوو معقولةة ؟؟؟

ـ عمي جان محترك روحة على عملة ابوها
ف اني هناا حيلل عصبت من هذا الكلام طلكتها وطردتها بليل
ومجنت ادري هية جانت حامل بشهر الثالث

وهم ماعرف شنوو صارر وين راحتت

للحظة جانت تجيني هواجيس ان هية يمكن مااتت من الهجمات القصف الجان يصير

وهاي صدمتني لمن شفتها هسة وشفتها شلون فوك السويته بيها
هية سوت كل العليها خاطر تحمي اولادي ومتقصر وياهم بشـي وفووك السويتةةة بيهااا

ما كرهت ولدي بيه

ولك لمن شفت شبر وشبير اجو حضنوني واستقبلوني وكان هم كبرو على قصة. امهم تسولفلهم عني وكان اني بطل ماكو مني وان اني احسن اب واحسن زوج بهاذا الكون ...

ـ اذا هذا الحجي ف ترا هيه حيييل خطية

ـ كلنا خطية مو بس هية

ـ لااا انت ابد مو خطية بشير على السويتو وياها تستاهلون كلشي يصير وياكم من عقاب الله جا انت تطلع منك هيج بنت 16 سنه حامل ويتيمه
هيج تشمرهاا وما تهتم بيها وبيا وقت بوقت كله قصف واعتدائات

ما خفتتت عليها لو ميته من قصف لو شي
شلون راح تخلصون من ذمتهااا ؟؟؟

ـ مااعرفف معتز لا تزيد همي هم لا تزييده

ـ عوف كبريائك هسة وروح روح. وراهاا واحجي وياها بيك ما بيك احجي. وياها

ـ حجيت

ـ لاا ادري بيك وباسلوبك ما حجيت وياها بالطريقه الي هيه منتضرتها منك
بشير البنيه مبين تحبك لا تكسرها اكثر
جرب هسة. روح الها وكللها احبج واشتاقيت الج
وشوف وعلي الا تحضنك
ترة هاي الكدامك مو جميلة صاحبة ال33 سنه
ترة. هاي بعدهي 16 سنه ترة عمرها واكف بذيج. السنه

روح خوية روح فدوة الك

ـ هسة فاتحة وعدنا شغل وهي هم معصبه خليها لباجر وانس اروح الها

ـ لاا بليل اخذ الاولاد ينامون عدها واحجي وياها

ـ الله كريم لليل

ـ املي بيك ادري ما تحب. الضلم كافي تضلم المسكينة وياك

ـ اني اكول اروح الها لوحدي حتى نسولف لوحدنا

ـ هم زين تسوي بس. اذا شافت اولادها ترتاح اكثر

ـ لا بعدين وره منحجي اجي اخذ الاولاد وارجع الها

ـ واخذ الشيخ وياك هم يالله

ـ لاا وين

ـ تصير اذا انت تنازلت شويه يعني فوك شينك قووات عينك والله ياعمي

ـ طبعي شسوي

ـ طبع خاايس وكلام الله

ـ ترا اني اكبر منك شهل احتتررام ؟؟

ـ واني حجيت صدك قابل جذبت بشي

ـ امشيي يلا امششي
لازم نصب ونرتب الغده

ـ وهاي نحن راح. نكضي عمرنا عشيات وغديات

ـ جا شلون احلا شي هذا

« مَــشــهِــد »

طيبــة :: طلعنا اني وعلي الباقر بسيارة للنجف
وعلى طول الطريق هوة. محاجي شي وياي بلعكس باقي ساكت وعينه محطها بعينـي
بس فش كلبي واني الي اردفت

طيبــة :: اريد مااي عطشت

علي الباقر :: دقيقه لنوصل هذا المحل

ـ تمام امشي بسرعه راح اموت من. العطش

ـ نازل اجيبلج تردين شي غير المااي ؟

ـ لا بس ماي

ـ تمام

"" نزل دخل المحل جابلي ماي وعصير وكيكه ...
حطاهن بحضني وسد باب السيارة. وكمل طريقه.

علي الباقر :: اتفضلي

طيبة :: كتلك بس مااي

ـ ادري بيج ممتغديه صبري روحج بذني علما نوصل واخذج تاكلين شي

ـ ما مشتهية اريد بس ماااي

ـ اكلي وانت ساكته

ـ شبيك مطنكر ؟؟

ـ ٠٠٠٠٠٠٠٠٠٠٠٠٠٠٠٠

ـ شنو احجي ليش ساكت اكو. شي صاير شي ؟

ـ ٠٠٠٠٠٠٠٠٠٠٠٠٠٠٠٠

ـ يااا دا احجي وي الستيران شبيك هاااي ؟؟

ـ هاا طيبات هاا ؟

ـ شبيك مطنكر الصبح شحلاتك ؟؟

ـ مابية شي تعبان

ـ لا البارحه انت جنت تعبان وسولفت وياي عاادي مابيك شي اليوم صايرلك شي

ـ منو هذا الوكفتي وياه الصبح بالباب ؟

ـ ادم

ـ منو ادم هذاا ؟؟

ـ هذا صديق اختي

ـ شنووة

ـ يووووو شلشتنـي
اقصد اخوو صديقتي

ـ ودام اخو صديقتج شكوو جايج للباب ؟

ـ هوة مجايني ولا يريدني بس هوة يعرف المعتز ويعرفني لان مرات هوه الوصلني وي اخته
ف من سمع ابوي ماات اجة جان قاصد مكان الفاتحة مالتكم

ـ اييي

ـ وصادفت ان جيته وي ما اني ارش ماي بشارع وترة. واجب هذا هوة يعرفني ويعرف المصاب العندي والله مصار شي وكف بس كالي البقية بحياتج. والله يصبركم اجيتو انت و المعتز

ـ ومجان الة داعي يوكف هسة اني ابن عمج. وفهمت. غلط. شلون بالغريب المر من يمكم ...

ـ مااعرف والله

ـ فكري ادور طيباتي سمعه هااي

ـ مجان قصدي شي هوة عزاني بابوي واني حتى ما رديت علي

ـ تمام يا نحري انسيي السالفة

ـ يعني انت زعلان مني؟

ـ جنت هسة لا

ـ متاكد

ـ والله راحت الضوجه من عرفت

ـ مم زين

ـ يعني ما بينج وبينه شي؟؟

ـ لا ابد والله

ـ خوش يا نحري وصمام كلبي

"" كمل علي الباقر سياقة وشفت شلون انرسمت الضحكه على وجه
من بعد ما عرف سالفة ادم وان ماعندي شي وياه

وبعد ما وصلنا النجف ونزلنا من السياره ودخلت المكبرة.

وصلنا لكبر ابوي ....

وكعت عليه على كبرة وصرت اسولف وياه

طيبة:: ها بوية ها شلونك ياروحي؟؟

شوفني شلوني بغيابك ياروحي انتي

شوفني شگد اكسِر اࢦخاطر وانتَ مامَوجود
وحࢪِ࣪ينة رِوحي صَدكني وانتَ مَو يَمي

جني مثل طفࢦة يتيَمة وتايَة بسِوك
شَما شآفت چَبير تكوَل هآذا ابَوي

ابوي غاليي انته حبيبي وين رحت عني ياروحي جا انب بعدني صغيرونه مكلت هااي منو الها؟؟

ـ طيباتي لاتسوين هيجي لاتخليني اتندم لان جبتج فكري بروحج

ـ عگب ذآك المَشة ميهَمني كَل اݪراح ولآ احسِب حَساب لكلمة الفرگة فارگته الچَنت حآسبلة ميَت حسِاب ابوَي وباگه منِي المَوت بَالسكتة.....

ـ خلي نروح نزور ترتاحين ياروحي خلينا كومي

_ بويةة حبيبي بَس أخ خليَت بَحلگنة وغيَرت ملبَسنة وشَكلنة ويآك خَوش ايَام عَشنة انتَ متِت واحنِة انهبنِة

ـ طيباتي كوومي كاافي

ـ خليني علي الباقر خليني فدووة اريد اشبع من ريحته خليني

ـ لا يا نحريي كوومي ....

ـ ليش هيج بعدني صغيرة بعدني صغيررةةة ليش تيتمت لييش؟؟

ـ كوومييي طيبات ....

"" كومني علي الباقر واخذني للسياره رحنا لضريح الامام زرنا وكملنا
ووداني للمطعم وصار يجبرني اكل
وبعد ما تعشيت
صعدنا السيارة وصار يسولف وياي
وعود يخفف عني
صار يحجيلي سوالفه بالتحقيق والاجرام الي يشوفه

وشلون جاان من يودون وراه يروح لموقع الجريمه وشوف شلون الجثه وشلون القتل

والله بسوالفه قمت على كلبي ما ريحة
سوالف تخررععع مدري شلون جان ينام ومتحمل يشوف ...

واني متحملة وساكته مكضيتها اي واي
ولمن صارت الساعة 10 بليل

طلعنا من النجف وصرنا نمشي على السريع لنرجع بغداد .......

غدير:: اجاني انمار واخذاني ولمن وصلنا لبيتهم انفجرت علي هوة كعد على الكرسي بالهوول
واني ضليت واكفة كدامه معصبه حيلل
لان ما عجبني الوضع السواه ان اجه واخذاني

انمار :: هااا شبيج اكعديي لا ضلين هيج واكفه

غدير:: عوود انت شنوو تسوي هيج يعني انييي عندي مصاب والمفروض اكوون وي اهلي وانت تجي وتاخذني منهم؟؟؟
مو كاافي الي سوته اختك؟؟؟

ـ وشنو سووت اختي؟؟

ـ متخدرة فووك بغرفتها لابسة الالوان وحاطه المكيااج بوجهة ونايمه تلعب بتلفونها ولا يكلك عدنا فاتحة

ـ ترى اختتي حامل

ـ واذا حاامل على كولت عمتي الجلاب الي بشارع يحبلن ويجيبن
بس اكوو فرق بين التعبانه صدك وتضغط على نفسها وتشتغل
واكو فرق الي ماعدها اصلن حياااء

ـ غددييررر لاتغلططين على اختتتي

ـ اختك اللي ماخلت حشيمه لا لاحد ولا لنفسهااا كاافي عااد كلوبنا مكسورة على عمي واهي متحمرة ومتكحلة

ـ هسة انت معصبه من لينا تطلعين حركتج بيه؟؟

ـ ما طلع حركتي باحد صاعده انااام بغرفتتي اريح الي

ـ غدير ترى حقي اجيبج لهنا شنو ذنبي البارحة ثاني ليله الج وياي وانت كضيتها هناك

ـ واني شبيدي اذا بعد زواجي بيوم راح عمي؟؟

ـ واني حااس بيج بس انت هم حسي بيه الصبح اخذج الهم وهاي بس بليل ارجعج لهنا

ـ خووش

ـ راضية عليه؟؟

ـ راضية

ـ اموت عليج يولي

ـ انمار اطلب منك طلب

ـ عيوني الج

ـ اريد بعد الاربعين مال عمي نسافر شهر عسل

ـ هاي شنو؟

ـ شنو؟؟

ـ يعني انت لا سويتي عرس ولا شي لان اولاد عمج ما مخلصه دورة السنه مالتهم وهسة تردين بعد الاربعين شهر عسل مرة وحده

ـ مو شهر عسل ادك واركص بي لااا اريدده هيج يعني مجرد سفره سفوري اريح صدري بيها

ـ اهااا

ـ بس اذا مفلس وماعندك فلوس عاادي

ـ لا شسالفه فلوسي كلها جووة رجليج تدللين عليه منا لبعد شهرين الله كريم

ـ ايي الله كريم صاعده انام

ـ شوي وصاعد وراج .....

"" صعدت للغرفة وبعد ما غيرت ملابسي ونمت اجه انمار ونام وراي وحضني
وصار يهمس باذني ...

انمار :: غديرة

غدير:: ها حبيبي

ـ ما بخاطرج يصير مني اولاد؟

ـ كول يالله تونا ثاني لليلة ههههه

ـ لا اكوول يروحي انتي

ـ اكيد دامك رجلي اكيد بخاطري يصير اولاد

ـ تحبيني؟

ـ اكيدد احبك اول وتالي راح احبك

ـ صددك ولج؟؟

ـ يااا شبيكك انماار ههههه

ـ صددك راحح تحبيني؟؟

ـ اكيدد

ـ امووت عليج امووت عليج امووت عليج

ـ اهدة اهدة

ـ افديج بعمري اني اريدج توعديني

ـ بشنو؟؟

ـ ان مراح تعوفيني ولا تتخلين عني

ـ صاير شي انمار؟

ـ لا ماكو شي بس اكول متاكده مراح تعوفيني

ـ اان شاءالله

ـ غديرة

ـ انمار والله تعبانه ناام وخليني انام

ـ تعاي يروحي انومج بروحي

ـ فدوة الها

ـ اذا صاار شي ونجبرت اعوفج ف اكتل نفسي واكتلج

ـ الله يهديك شبيك اليوم عليه

ـ نامي بنيتي نامي

« مَـشـِهـد »

البشير:: وقت الرحت لبيت جميلة لاحجي وياها
لكيت باب البيت مفتوح
دخلت لجوة ولكييت جميلة واكعه بالهول
بالعة كل الحبوب ومنتحرة

ركضت الها وشلتها ...

༺༺༺༺༺༻༻༻༻༻

_ ضَلت اوَشالة مَن العَمر ردَناها تگضي ويآك يَلـ عچَلت بالمَوت صدگني مَا نِنساك

يــتـــبـــ؏ ☜

5800 كلمة
لتواصل o.oll13