احفاد السيد : الثار ( بأجزائها الإثنين ) الفصل الحادي وسبعون 71 - بقلم ​رُقَيَّةُ الْأَكْبَرُ

﷽
اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ

روايـــــة [ مُنْعَطف السادة ]

بقلمي انا الكاتبة [ رُقـَـيّــة الأكـَـبــر ]

ومُتابعة لحســابي حتــى ندخل رقم جديد فقط اضغط علية وتابعني oo_ll13

✨ التعب علينا والتفاعل عليكم ✨
✨ التصويت والتعليق أبين الفقرات كلش مهمة ✨
✨ هو الدعم للقصة وهو الينسي الكاتب التعب ✨

✧✦✧✦✧✦✧✦✧✦✧✦✧✦✧✦✧✦✧

- أنا ترمِمني رِدتك مو تخربني !
وأحارب بيك خايب مو تحاربني
صُفت حَبل المشانق عِشرتك وياي
مچلب بيك كلّش وانتَ خانگِني
شگد أذيتني وماگِلت أذاني
چا مِن علقتني تريد تِنساني ؟
گالوا فترة وتخلّص وتدري شصار ؟
ماخلصِت الفترة الخَلصت آني .

✧✦✧✦✧✦✧✦✧✦✧✦✧✦✧✦✧✦✧

"""" علي السجاد """"

بينما جانت الإيد الباردة تسد حلگي وصوت العلوية يتحول لفحيح أفاعي يترس المطبخ بدت ملامح الحيطان تذوب وتتحول لتراب ورمل حسيت بجسمي يثگل يغوص وكأنما الگاع انفتحت وبلعتني لظلمة مالها نهاية السواد أكل كلشي حتى صرختي اللي انحبست بصدري صارت عبارة عن غصة خنگتني

فجأة وبنص هذا العدم حسيت بضربة قوية بصدري سحبة هوى دخلت لريتي وكأنما جانت ميتة واندبت بيها الروح

فزييييييت!

شغلت الدنيا بشهكة وعيوني انفتحت على وسعهن وهنَّ غرگانات بالدموع النفس صار يصعد وينزل بصعوبة وگلبي يدگ دگات سريعة لدرجة حسيت عظلات صدري راح تنفجر
أول شي سويته لزمت رگبتي تحسست حلگي جانت إيدي ترجف بس جانت دافية مو ذيج الإيد العظمية اليابسة باوعت يمنى ويسرى الظلمة جانت طبيعية ريحة الغرفة عطري المعتاد حسيت بحركة يم صدري نزلت عيني وشفت أغلى ما عندي علي التقي جان نايم على إيدي اليمنى وحاط راسه الصغير على كتفي وعلي النقي متلفلف بصفحتي الثانية ونايم بنوم عميق أنفاسهم الهادئة جانت أحلى موسيقى سمعتها بحياتي

غمضت عيوني حيل ودموعي نزلت بس هالمرة دموع حقيقية مو سواد ولا حبر همست بصوت مخنوگ

- الحمد لله يا ربي دخيلك جان كابوس جان مجرد كابوس لعين

بقيت ربع ساعة بمكاني ما ردت أتحرك وأفزز الجهال جان الخوف بعده مچلب بطراف روحي ذيج الصور وجه أمي بالمراية الدود اللي يطلع من اللحم وصوت الغراب كلشي جان حقيقي لدرجة مرعبة سحبت إيدي بهدوء من جوة راس علي التقي بست راسه وبست راس أخوه وغطيتهم زين

گمت من الفراش رجلي جانت ترجف من أطخ بالگاع أخاف تطلع طين وتغركني مثل ما شفت بالحلم رحت للحمام وكفت گبال المراية ترددت ثواني قبل لا أرفع راسي رفعت راسي وشفت وجهي علي السجاد الطبيعي تعبان عيونه حمرة من السهر والكوابيس بس عيون حقيقية مو حفر فارغة

فتحت المي البارد والجو جان كلش بارد شهر 12 صرت أذب على وجهي وأكول

- أعوذ بالله من الشيطان الرجيم بسم الله الرحمن الرحيم

توضيت وضوء كامل ردت أطهر روحي من أثر ذيج الصور التلعب النفس لبست دشداشتي ونزلت الدرج بهدوء جان البيت هدوء الفجر يلفه بس هالمرة هدوء يطمن مو هدوء يرهب وصلت للمطبخ شفت الضوة مشعول گلبي رجف تذكرت مشهد السجين وشعر أمي الطويل وكفت بالباب شفت أمي واگفة يم السنك بس جانت لابسة شيلتها البيضة وتدندن بصوت ناصي بكلمات دعاء الصباح

التفتت علية من حست بوجودي وجهها جان ينضح نور وحنان مو مثل ذيج النسخة الشيطانية اللي شفتها

العلوية :- ها يمة علي؟ شو فاز بهيج وقت؟

تقربت منها بخطوات سريعة وبدون ما أحس ذبيت روحي بحضنها ولزمت إيدها بستها حيل شميت بيها ريحة الهيل والچاي والخبز الحار ريحة العافية

علي السجاد :- يمة فدوة رحتلج بس خليني أشوف عيونج

:- شبيك يمة؟ هاي عيوني شبيها؟

باوعت بعيونها شفت عيونها ولونهن الياخذ العقل واللمعة اللي تخليني أحس بالأمان لزمت چتفي نفس الچتف اللي احترگ بالحلم بس هالمرة لزمتها جانت مثل البلسم

علي السجاد :- يمة شفت كابوس هد حيلي شفت سحر وشفت مرايا تتكسر وشفتج شفتج بشكل يمه يرجف

العلوية سحبتني كعدتني على الكرسي وجابتلي گلاص مي

- اشرب يمة سمي باسم الله هذا الشيطان يريد يلعب بعقلك السحر يا يمة خيال والواقع هو ذكر الله لا تخلي هاي الأوهام تاكل بروحك تدري ليش شفتني هيج؟ لأن الشيطان يحاول يضربك بأعز ناسي يريدك تشك حتى بأمك اللي ربتك

:- الحمد لله على كل حال يمة من شفت علي التقي وعلي النقي بحضني حسيت روحي رجعتلي. الدنيا برا شكد ما تكون صعبة بس حضنكم هو الجنة

- يمة علي أنت مسمي ولدك على أسامي الأئمة ومحصن بيتك بالقرآن لا تخاف من خيالات المراية المراية تگدر تخدع العين بس ما تگدر تخدع الگلب المؤمن گوم يمة صلي ركعتين لوجه الله واطرد هاي الوساوس الفجر راح يأذن وصلاة الفجر تغسل الهم غسل

كمت من يمها بست راسها مرة ثانية

:- راح أصلي يمة وأدعي ربي يحفظكم إلي تدرين؟ ذيج اللحظة بالحلم من كلتيلي إحنا صرنا جوة جلد أمك حسيت الدنيا انتهت بس هسة من شفت وجهج يسبح بالذكر عرفت إن الظلمة مهما طالت نور الله هو اللي يطفيها

طلعت من المطبخ وبطريقي للمصلى مريت من يم المراية اللي بالممر وكفت لحظة باوعت لخيالي أبتسمت هالمرة خيالي ابتسم وياي بنفس اللحظة عرفت إن علي السجاد الحقيقي هو اللي يحب أهله ويخاف عليهم مو ذاك المسخ اللي صنعه الخوف

رجعت لغرفتي لكيت علي التقي وعلي النقي متدنيين واحد على الثاني صايرين مثل الكومة الصغيرة مال ملائكة فرشت مصلايتي بالكاع وبديت أصلي وكل سجدة جانت تمسح صورة من صور ذاك الكابوس المرعب لحد ما صار كلبي أبيض مثل الفجر اللي بدا يشك سواد السماء بصوت الأذان

: الله أكبر .. الله أكبر

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" حَـــوراء """"

ضلت غادي مريضة وأخذت اجازة بسبب سوء الأجواء لهذا انجبرت اداوم لوحدي وكذالك لمن رحت للدوام ما ضليت افتر ولا شفت لا ذو الفقار و شبر ولأن مطرت حيل بسرعة رحت للقاعة مالتنا وضليت كاعدة بالستول مالتي واكتب على الورقة فجأة ودخل ذو الفقار اجة كعد يمي بالكرسي وأخذ الورقة من بين ايدية وضل يقرأ الي كاتبتة اني

حوراء :- شنوو هااي فقاار رجعها الي لا تقرأ شيء رجعها إلي

ذو الفقار :- وخرري شلون صارت رجلج؟

- معليك انطيني الورقة

:- بنت ستااار

- جيب الورقة ذو الفقار كتلك لا تحجي وياي بالجامعة

:- شني زعلانة مني؟

- مازعلانة

:- غصباً عليچ ما تزعلين مني

- شَنوّ هَيَّ عود؟

:- شلووونها رچلج ؟

- زينة

:- الحمدالله ... اكلج

- كولل

:- هم رجعت وصارت سوالف بينج وبين هذا المسوي روحة سيد!

- قصدك شُبر؟

:- لا متر

- لا تحشش على أسمة

:- وهو هذا هم أسم دخيل جد أبوه

- شبي أسمة أصلا يخبل والله شُبر هيج بيه فخامة خاصة اذا انكال السيد شُبر الـ صادق شوفة شكد يجنن

:- حلوووووو صااايرة تدافعين عنة وذاك اليوم تكليلي صوتة حلو وهسة عاجبج اسمة وتشوفينة فخامة و يجنن
ماااشااء الله تبارك الرحمٰن وينك يا ستار تعال وشوف بنتك

- هاي شبيك عود!

:- مادري عنچ حووور لا تنسين روحج المن جاية هنا لا اخلي ستار يعيد تأهيلج

- ترى ما غلطت ماكو داعي رد الفعل هاي

:- أكول انجبي

- أنتَ انـجــ***

ثبت ملامحة ورفع حاجبة وركز بعيوني وهتف وياي

ذو الفقار :- كمملييي ليش سكتيي كملي كلمتج

بلعت ريجي وصار وجهي حار من الفشلة والخوف بنفس الوقت نظراته جانت حادة وكأنما يريد يحچي بعيونه
- جربي طلعيها وشوفي شسويلج

- قصدي اني أسكت لا تباوعلي هيج ذو الفقار

:- لسانج طولان حور والظاهر كعدة الكلية خلتج تنسين منهو ذو الفقار ومنهو ستار الكلمة هاي لو طالعة جان عرفت شلون أگص لسانج

- شبيك؟ ترى أنت الاستفزيتني شنو تعيد تأهيلي؟ شنو تهددني ببابا؟ اني ما سويت ذنب مجرد كلت اسم الولد عادي

:- مو عادي يمنه مو عادي شبر وغير شبر هذولي خط أحمر تجين تدرسين وترجعين لا فخامة ولا يجنن افتهمتي لو أعيد بطريقة ثانية؟

- ما يحتاج تعيد الورقة انطيني اياها واطلع منا ما أريد أحد يشوفنا سوا وتصير لي مشاكل فوك المشاكل

:- خلي ببالج عيوني وراج بكل خطوة

الجو جان يغيم بزيادة وصوت الرعد قليل اسمعة واني كاعدة بمكاني واحس الدنيا ضاكت بعيني ذو الفقار جان واكف فوك راسي وعيونه ما فاركت عيوني يريد يكسر عيني بكلمة
بهاي اللحظة انفتح الباب ودخل شُبر

شُبر ما جانت مشيته طبيعية جان مبين عليه السمع كل الحجي لان دخل وعيونه ما صبت غير على ذو الفقار تقدم بخطوات

شُبر :- يا الله خير؟ شنو مخلي البنية هنا وكاعد تصيح عليها؟

ذو الفقار التفت عليه وخر ايده من الميز وعدل وكفته وحجه بنبرة كلها كره

:- أهووو جانه السيد شجابك هنا شبر وشعليك

شُبر ما جاوبه باوع الي وشاف الورقة بيد ذو الفقار مد ايده بهدوء وكال

: انطيني الورقة ذو الفقار

ذو الفقار ضحك باستهزاء

:- شني؟ صاير محامي دفاع؟ لو تريد تقرا شكاتبة عنك وعن جمال صوتك؟

: ليش هي كاتبة بالورقة عني ههههه

:- اطلع برة شُبر

شُبر تقدم خطوة صار صدره بصدر ذو الفقار وصوته صار ناصي بس يخوف

: كتلك انطيني الورقة ولا تخليني أذكرك إحنا وين واكفين حوراء هنا طالبة وأنت جاي ترهبها بوسط القاعة هاي مو مراجلة هاي استقواء على بنية

ذو الفقار دفع شُبر بخفة من صدره

:-لا تعلمني المراجلة يا ابن البشير هاي بت عمي ولحمي ودمي شحجي وياها شسوي بيها مالة دخل الــ غريب اطلع منها لا أحطك براسي وتدري بية من أعند شسوي

انا وكفت وصحت بيهم لان كافي كلما انجمعوا يتعاركون

- فدوة كافي ذو الفقار عوفه شبر عليك الله اطلع.

شُبر ما تحرك عيونه بقت مثبتة بوجة ذو الفقار وهتف

: ما أطلع والورقة هسة ترجع لمكانها حوراء ما غلطت ترى ستار لو يدري بيك مطلع عين بنته هو أول واحد يوكف بوجهك

:- ستار عمي وهسة راح أراويك شلون راح أربي بنت ستار من جديد وعلى كيفي

شُبر لزم إيد ذو الفقار اللي بيها الورقة لزمها بقوة خلت أصابع ذو الفقار تبيض

: كتلك حدك لهنا البنية كالتلك كافي وأني جاي أگلك كافي إذا بيك زود واجهني إلي لا تطلع عضلاتك على وحدة ماتكدر ترد عليك

الجو صار مشحون وانا جنت تحس الهواء خلص بالقاعة
ذو الفقار سحب إيده بقوة وشمر الورقة بوجهي

:- هاج أكليها للورقة بس وحق اللي حط روح بيك يا شبر إذا شفتك واكف بطريقها بعد لو سمعت اسمك يتردد بلسانها ما تلوم إلا نفسك

شُبر ابتسم ببرود يكتل

: التهديد لغة العاجز يا ذو الفقار حوراء لمي غراضج وتعالي ورايخلينه نشوف منو اللي يمنعج تطلعين

طلع ذو الفقار وركع الباب وراه حسيت حيلي كله انهد كعدت على الستول وكمت أشهك بالبجي شُبر بقى واكف بمكانه ما تقرب مني حيل بس كال بصوت حنين

: مسحي دموعج حوراء ما عاش اللي ينزل دمعتج وأني موجود

رفعت راسي وعيوني مغوشة بالدمع

- سيد والله ما سويت شي هسة راح يروح لبابا ويحجي حجي ما صاير بابا يصدكه بكل شي راح يحرموني من الدوام

شُبر سحب كرسي وكعد بعيد عني شوية وكال

: ما يگدر يسوي شي أني راح أحجي وية ابوچ ستار اذا تردين

- لااا دخيلك عوفني بلا مشاكل زايدة

: بس شنو تخلين هذا الطير المهلس هيج يلعب بيج حوراء

- ذو الفقار اني اسيطر علية بس مادري ليش من يوصل الموضوع يمك يتكهرب شنو قصتكم أنتم الاثننين وليش كل هاي الكهرباء ابيناتكم ماجاي أفهم

: خيوليي ولا مهتم إلا يكرهني يحبني هو ومداسي بس المهم أنتِ حوراء فدوتج ماريد أحد يرفع صوتة عليچ

- خلص أنسى اذا حجة لو سوة شيء اني اتصرف وياه ماعليك بي بعد خليك بعيد عنه بس هذا الاريدة منك

: يصير خير بس كوليلي صدك هيج شايفتي ؟

أني هنا وجهي صار نار تمنيت المطر يغرگني ولا يسألني هذا السؤال دنكت راسي وكتله

- سيد ذو الفقار جان يستفزني واني اني مجرد كلت الحقيقة اسمك هيبة وحلو وما بيه شي

شُبر ضحك ضحكة خفيفة أول مرة أسمعها جانت مثل العافية وكف وكال

: يلا لمي غراضج الدنيا مطر ومحد بقى بالقاعة راح أوصلج لحد الباب الخارجي وأتأكد صعدتي بالخط ولا تخافين من ذو الفقار طول ما راسي يشم الهوا محد يمسج بكلمة

لميت أوراقي وإيدي ترجف شگيت الورقة اللي جانت بيها الخواطر ذيج وذبيتها بالزبل

طلعنا للممر جان نوع ما فارغ لان بلشوا الطلاب يطلعون والمطر يصب برة بغزارة شُبر وكف والتفت الي وهتف

: خايفة من شيء؟

- خايفة من ذو الفقار لا يحجي لـ بابا وكتلك ابوي يصدك بيه بكلشي وخايفة لا يحرمني من الدوام ويجبرني

شُبر سكت شوية باوع للمطر وبعدين حجه بنبرة كلها ثقة

: ما عاش اللي يجبرج على شي وأني حي ذو الفقار حسابه يمي مو يمج وأبوج اكيد يعرفج ويعرف تربية بنته لا تخافين هسة

- ليش هيج سويت سيد ليش دخلت نفسك بمشاكل وي ذو الفقار ترى أنتَ ما تعرفة اني مرات أشك ان هذا بيه انفصام بالشخصية والله ساعة هيج وساعة هيج

شُبر باوع بعيوني نظرة جانت أعمق من كل الكلمات

: لأن الكلمة اللي كلتي عنها ما تكتمل إذا شفت وحدة بضيج وما وكفت وياها خاصة إذا جانت هاي الوحدة أنتِ

انلجم لساني الكلمة جانت جبيرة ومفاجئة اليي و شُبر كمل كلامه

: يلا راح أوصلج لحد الخط وما أريد أي خوف بگلبج

كملنا مشينة بالممر جنت أحس إن المطر اللي يوكع برة دا يغسل الخوف اللي بداخلي بس بنفس الوقت جنت ادري إن العاصفة الحقيقية راح تبدي من اوصل للبيت واشوف سيارة ذو الفقار واكفة يم بابنا

﹉﹉﹉﹉﹉﹉﹉﹉﹉﹉﹉﹉﹉﹉
"""" أريج الله """"

كعدت الصبح لكيت روحي نايمة على فراشي والضوء مقتحم كل أنحاء غرفتي من خلال الشباچ مسحت عيوني واني أجمع بعقلي الي صار ولمن صحصحت وتذكرت شنو الصار بليلة امس طفرت من افراشي وفتحت باب غرفتي واني على لساني

: يمة اولادي

طلعت من غرفتي اركض رحت يم غرفة أولادي لكيت المفاتيح متعلگة بالباب والباب مفتوح وسعت عيوني على كدهن وفتحت الباب ودخلت بسرعة لگيت
نور الحَسَنْ و شمس الحُسين نايمين بفراشهم ومتغطين زين
رحت يمهم حطيت ايدي على شعر نور الحسن ابني وبستة على راسة

وطلعت من غرفتهم نضرت للساعة لكيتها تقارب
تصير بــ 8 الصبح نزلت لجوة سمعت صوت بالمطبخ أخذت نفس واني مقتنعة ١٠٠٪ الصار وياي ليلة أمس جان تخيل مني وماكو شيء حقيقي بس لمن وصلت لباب المطبخ لكيت رجال منطي ظهرة وواكف على الطباخ وحسيتة جاي يطبخ هتفت وياه بصوت :

اريج الله :- منو سمحلك تفوت لهنا؟

اندار الي وهو يضحك وهتف وياي بكل برود واني الجان كل جسمي يرجف

: لازم احد يسمحلي بدخلتي عليچ؟

شفت كدامي حَيرام،
بس ما جان حَيرام حبيبي عرفت هو الي خرعني أمس والشيء الخلاني مااكدر اتعرف علية هو لأن جان متغير
١٨٠٪ شعرة طولان وصار عندة لحية وي الشوارب وضعفان بشكل فضيع وصار اسمر من قبل

ما تحملت رحت وحضنتة خلى راسة بركبتي وشد ايديه على خصري وجان يتنفس بصوت عالي
ابتعدت شوي عن وجه وصرت كدامة حيل وقريبة عليه واني مخلية ايدية على خدودة واباوع بعيونه هتفت وياه

أريج الله :- ليش هيج تسوي وياي يروحي؟ تعرف لو صاير بية شيء من أمس؟

حَيرام :- ماجنت أريد اضرج يابعد هدوتي بس شفتچ شلون خفتي وحبيت اكمل وياج هههه

:- شتكمل ولك شتكمل غير حظي طيحتة لو صاير بية شيء عوفني اني طبني ستين مرض بس الي ابطني تعرف شكد وكعت فوك امس بليل لو صاير بيه شيء؟؟

- شني طبچ ستين مرض اششش لا تحجين خلي يروح الي ابطنج المهم أنتِ اعوضة هذا الي بااحشائج بس أنتِ منهو اليعوضچ؟

:- وأمس اني وكعتت لو صاير بية شيء؟

- ههههه ما صار بيچ شيء وكعتي شلتج وخليتج بفراشج وضليت كاعد وعاين لجمالج لمن طلع الصبح وللعلم الصبح طلع للناس بس اني صبحي موجودي وياي وكدامي من الليلل

:- يلاا لاتغرني بكلامك المعسل

- معسل مال اركيلة؟

:- ععيعع لااا حَيرام لاا عيععع

- هههههههايي والله حلوة

:- يلاا بعد لاتسوي هيچ وثاني مرة تعال مثل الاوادم لا تجي مثل ..

- ابطل اجي مثل داسِم؟

:- عااابت لا الله جاب ذكرة اااشش

- هههههههه مُنقذتي

:- عيوني

- اهلچ تعبانين!

:- شنوة؟

- اريد اكعد وي إخوانج

:- حَيرام

- هدوتي

:- اليصير ويانة الك أيد بيه؟

- لا اكيد بس راح اساعدكم

:- شتساعد حَيرام أهلي جاي يتخبلون واحد ورة الثاني بشنو تساعد بيه شنو تسوي

- أريج الله ترى بس ألمعتز باالله و أم البنين التعبوا بهذا كلة لان بس هم الكدر يأثر عليهم

:- وشنو هو شنو هو الي أثر عليهم نحن مسوين لنا سحر حَيرام؟

- اسمعييينيي عااد لا تظلين تنطنطين هيچي اسمعيني واهدي الصار وياكم اني مقصود بية ورجعت علمودكم ماتحملت اشوفكم هيج تتعذبون وانا راح اخلصكم منه ولهذا تشوفيني كدامج هسة

:- حَيرام أنتَ بعدك بهذا الدرب

- قسماً بعيونج وبأولادي مامتقرب منة وجاي اتخلص من شرة وهاي راح أخلص بقى آخر شيء إلي وهو بيت أهلچ اريد اخلصكم بشكل نهائي

هنا انا وبهي الأثناء سمعت صوت نور الحَسَنْ يصيح الي بصوت عاليي عبالي وكع لو صار بيه شيء ركض له حَيرام كدامي واني لزمت بطني وصعدت وراه

حَيرام :- نور الحَسَنْ!!!!

:- يمةةة ابنييي ليش يصيح

- وخرري لي جاي

أول ما وصلنا للغرفة دخلنا لكيت نور الحَسَن فاز من النوم وكاعد على الفراش ويضرب على البطانية ويصيح بأسمي وهو مغمض عيونة

نور الحَسَنْ :- ريــحاااانةة .. ماااماااا .. ريحاااانةةة تعااي اليي ريحااانةةة وينج مامااااا تعاايي ريحااانةةة

ضحكت وخليت ايدي على حلگي اندار الي حَيرام وهمس وياي وهو يأشر على نور الحَسَن

- هي هاي تربيتچ مطلعتلي أولاد امهم؟

:- أشششش معليك بأابني

رحت وكعدت كدامة ولزمت أيده العاصر بيها الغطى وهتفت وياه

:- يروح ريحانة أفتح عيونك شنو تريد ماماتي؟

فتح عيونة نور الحَسَن ومن شاف أبوه نسى مساع يصيحلي ويريدني وكف على الفراش وطفر على صدر ابوة وايديه شكلهن بركبة حَيرام ورجلية خلاهن يحاوطن بطن ابوه
وحَيرام فگ ايديه وضمة لصدرة حيل ضحكت الهم ورحت حطيت ايدي على شعر شمس الحُسين وهتفت وياه

:- يلا شمسي مامة كووم كافي نوم شنو ميت على صوت أخوك اليزرف طبلة الاذن ما فزيت كووم ماماتي اعظامك تأذيك هسة من النوم الزايد كوم حبيبي

كعد حَيرام يمي على الفراش ونور الحَسَن بحضنة وهتف وياه

حَيرام :- شلونك باابا؟

نور الحَسَن :- زين انا و مشتاقلك

- وانا هم مشتاقلك يروح ابوك ليش تصيح لأمك شنو تريد منها؟

: كعدت جنت أريدها تسبحني

- تسبحك بهذا البرد؟

أريج الله :- يابرد حَيرام البيت دافئ والحمدلله انا معلمتهم أول ما يكعدون للحمام على طول

- هي شنهي أريج الله تسودنتي؟ تردين تمرضين جهالي؟

:- كووم شمس حبيبي يلااا نور أخذ اخوك وانزلوا هسة غسلوا وجهكم كوم شمسس شلعت كلبي ياماما

شمس الحُسين :- صباح الخير بابا

- صباحك جمال نفس وجهك

:- نوور ما سمعتني!!! أخذ اخووك وانزلوا غسلوا

نور الحَسَن :- صار ماما

نزلوا نور الحَسَن وشمس الحُسين وبقيت أنا و حَيرام بالغرفة لوحدنا وحيل ضجت لان رفع صوتة علية كدام الأولاد لهذا كلبت خلقتي

حَيرام :- خيرچ شمالچ وجهج انگلب؟

:- كم مرة لازم اكلك صوووتك لا يعلى علية كدام الأولاد ؟

- وانا ما عليت صوتي

:- لا عليييتة حَيرام علييتة ترى انااا مو مهملة حتى تصيح علية بموضوع يخص سلامة أولادي انا اخاف عليهم أكثر منك

- وهسة ليش عصبتي؟

:- عصبت لان عليت صوتك علية وسويت روحك تخاف عليهم اكثر مني

- هسة حضرتج تردين تعيريني لان انا ما موجود يمهم ٢٤س اني اعرف ذاب حملهم عليچ وضايع بنفسي بس هذا ما يعني تشككين بخوفي على أولادي وتخبصيني اخاف عليهم اكثر منك واخاف عليهم اولادي

:- ما اعيرك انا وماكتلك شيء أولادي مو حمل أنتَ ذبيتة عليه لعلمك يعني هذول نعمة الله شمرها علية وفضل ومن من رزقني بيهم موووو حمل من حضرة جنابك

- أريج الله

:- لا تكلي أريج الله

كملت كلامي ودرت وجهي عنه أحس الغصة توكف ببلعومي من يذكر حملهم هو ما يدري ذولي هم الچانو السند الي بغيابه هم النفس الي أتنفسه من تضيك الدنيا بوجهي
تقرب مني حَيرام حسيت بأنفاسه الحارة تضرب ركبتي سكت شوية وبعدين همس بصوت ناصي المرة صوته جان بي نبرة حنين تكسر الخاطر

- هدوتي لسانج لا يطول تدرين بيّ ما أتحمل أشوفج زعلانة بس خوفة الأب چتلتني من شفتهم كبرانين وأنا ما چنت موجود أشوف خطواتهم الأولى

التفتت عليه ودموعي طرف عيني كتله بصوت

:- حَيرام مو بالصوت العالي ينقاس الخوف انا عشت ليالي مرعبة وأنتَ هسة جاي تلومني ليش أريد أسبحهم؟ تدري شكد عانيت حتى أحافظ على ضحكتهم بهاي الظروف؟

لزم ايديه ثنينهن وباسهن عيونه جانت تحچي هواي شغلات ما كدر يلفظها بلسانه سحبني لصدره ومسح على شعري وكال

- حقچ عليَّ ومسحيها بوجهي أنا دمي حار وتدرين بيَّ من أشوف شي يخصهم أفقد بس وحق عيونج الغاية من جيتي هسة هي أمانكم بيت أهلچ والي صار بي كله راح ينتهي داسِم والأكبر من داسم ما راح يوصلون لذيج العتبة بعد

رفعت راسي وباوعت بوجهه الخوف بعده بگلبي بس وجوده ينطيني قوة غريبة وهتفت وياه

:- حَيرام أنتَ تكول مالك ايد بالي صار بس السحر والاذية الي حست بيها أم البنين ومعتز بالله مو سهلة شلون راح تخلصنا؟ شنو الي سويته وخلئ وجهك يتغير هيج؟

غمض عيونه بقوة وجر حسرة طويلة كعد على طرف الفراش وسحبني ليمة حيل كال بصوت بيه غصة ومخنوك

- أريج الله أنا دخلت بحرب وية روحي قبل لا أدخل بحرب وياهم السواد الي چنت بي عفته بس أثاره بعدي جاي ألملم بيها اليوم راح أروح لبيت أهلج أريد أشوف ألمعتز باالله وأريد أحط حد لهاي المهزلة بس طلبي منج واحد لا تخلين الأولاد يبتعدون عن عينج ولا تفتحين الباب لأي أحد

جسمي كزبر من كلامه لزمت ايده بقوة وهتفت وياه

:- يعني شنو حَيرام دتخوفني أكثر؟

- لا تخافين وأنا موجود يلة هسة كافي زعل وجهج هذا ما مخلوق للعبوس نزلي شوفي الجهال وأنا راح أجهز روحي حتى نطلع بيت أهلچ ينتظرونا واليوم تنحسم السالفة

:- حَيرام

- هدوتي و مُنقذتي و ام عَيون فضية

:- ماريد يصير بيناتنا جروخ

- هههه ولا راح يصير اعتبرهن هرمونات الحمل وراح اتحملهن

:- ننزل نتريك؟

- وشرط اوكلچ بيدي

:- وتسبح اولادنا بيدك

- يمةة هو انا اكدر عليچ

:- هههههه لااا

- انزلي يلا يرويحتيي اتفضلي كدامي سيدتي

كمت وأنا أحس بحمل ثكيل انزاح عن صدري بوجوده بس الخوف من المجهول ومن هذا داسم بعده ينخر بگلبي نزلت وجانوا نور الحسن وشمس الحسين يتشاقون بالهول ضحكتهم ردت روحي بس بالي جان يم حَيرام شنو الي ناوي يسويه؟ وهل فعلاً راح تنتهي كوابيسنا؟

﹉﹉﹉﹉﹉﹉﹉﹉﹉﹉﹉﹉﹉﹉
"""" مَـــــلاك """"
عفت بيتنا ورحت لبيت السيد عبد الحَسَنْ حتى أخذ مَنّوشة ولمحت سيارة علي الكاظم وجنت متقصدة اريد احجي وياه بعد الليلة الفاتت دخلت للحوش لان بابهم ٢٤س مفتوح وطبيت للصالة لكيت العلوية كاعدة وبين ايديها شغل حياكة جاي تسوي بيه طكيت الباب وهتفت

مـــلاك :- سلام الله يا اهل هذا البيت ؟؟

اندارت الي وضحكت وعافت الي بيدها وكامت اجت بااتجاهي
باستني وحضنتني وهتفت وياي

العلوية :- ياهلا بــ ملكة

- هلا بيج عمة شلونج شخبارج

:- تعاي يمة اكعدي اني بخير

- تدرين بيه مااكدر اكعد وين مَنّوشة ؟

:- منة المنان وي عمها السيد علي الباقر طلع يوصل العلوية غدير الله وأخذها وياه لان ما تسكت بدونة

- اوو واني اجيت علمودهاا محد موجود هنا؟

:- لا يمة البنوتات بالجامعة والولد كلمن راح لباب رزقة

- اهاا

:- اسويلج ريوگ؟

- لا عمة والله توني متريكة وحتى چاي شربت ليش زينة تخليني اتحرك بلا ريوك

:- لأن هو أهم وجبة مو زين على الما تتريك

- بعد أمهات واتفقتن على شيء نكدر عليجن

:- يمة يمة ونحن نكدر على السانجن بنات هذا الوكت

- هااا عمة هههههه

:- بس الصدك ملكة ميصير ما تشربين شيء من تجين النا؟

- شسالفة عمة تحسسيني اني ابيت غريب حتى لازم ضروري اتضيف!

:- هم والله صح أنتِ وحدة مننا وبينا

- ايي عمة

:- ملكة

- عيوني عمة؟

:- احسچ عندج شيء تردين تحچينة؟

- عمة أنتِ مو بمثابة أمي وأنتِ غالية علية مو صح!

:- المفروض هيج انا

- السيد علي الكاظم موجود

:- اي توة كعد وصعد لغرفتة حتى يغير هندامة ويروح للشغل

- ليش وين جان حتى كعد وصعد لغرفتة ؟

:- جان نايم بالبراني وي اخواتة

- اهااا الله يخليهمم

:- محتاجتــة بشيء؟

- اريد احجي وياه بموضوع

:- هسة ينزل واخذي راحتج وياه اخيج بعد

- تمام عمة

:- ايي شلونها اميمتج و سكرة شلون صارت؟

- والله كلنا بخير عايشين

:- منو عدكم ؟

- محد بس امي و أخواتي

:- چا ابوچ وين؟

- ابوي خارج المحافظة يتشغل

:- هو شنو شغلة ابوج؟

- ابوي تجارة من محافظة لمحافظة وين ما الله يحط رزقة

:- الله يحمي ويجفي شر ابن آدم ويرزقة من أوسع أبوابه بجاه محمد وال محمد

- الله يخليچ عمة

بقيت كاعدة يم العلوية وعيني كل شوية تروح لدرج البيت انتظر جية علي الكاظم كلبي جان يدك بسرعة مو خوف بس ارتباك من السالفة اللي ببالي العلوية خطية ما قصرت ظلت تسولف وتدعي لأبوي وأني أرد عليها بكلمات مقتضبة بالي مو يم السوالف أبد
فجأة سمعت صوت خطوات على الدرج رفعت راسي وشفت علي نازل لابس قميص ومرتب هندامه وبيده المسبحة مالتة أول ما شافني وكف بمكانه عيونه صار بيها استغراب ممزوج بلمحة عرفتها من ليلة البارحة

علي الكاظم :- يالله سلام عليكم

رديت بصوت حاولت أخليه طبيعي

- وعليكم السلام والرحمة سيد صباح الخير

العلوية :- هلا يمة تعال يمة هاي ملكة هنا صارلها ساعة تنتظرك

علي الكاظم باوع لأمه وبعدين دار نظره عليه تقرب خطوتين وكال

علي الكاظم :- خير إن شاء الله ملكة صاير شيء؟ محتاجة شيء؟

كمت من مكاني صرت اباوع اله وهتفت :

- لا سيد مامن شر إن شاء الله بس ردت أحجي وياك بموضوع إذا تسمح لي بدقايق من وقتك قبل لا تروح لشغلك لان انا هم أريد اروح لهلي

:- تعاي وياي لبرة واحجي

- أوكِ

طلعت للحوش وهو طلع وراي بعد ماشفتة شلون ودع امة وباس راسها وايدها وطلع وراي وسد الباب مال الصالة
واجه وكف كدامي وهتف وياي

: هاا ملكة شبيج؟

- اني اجيت احجي وياك على امس

: انا المفروض اعتذر لان اذيتج

- لاااا ماكو منك اذية

: جا شبيج؟

- سيد اني حسيت روحي قلقتك لان نضرتك الي وشلون باوعت الي حسيتك ضل بالك يمي

: وهذا الحقيقة

- وانا مو هيج ماريد احد ينشغل علية

: زين؟

- لهذا اجيت اكلك ترى الصار وياي أمس لأن انا جنت ضايجة ومقهورة وهيج حجيت وياك بقسوة يمكن ومادري مادري المهمم جنت ضايجة

: وشنو الي مضوجج؟

- ماعليك

: هههههه هسة ملاك صدك الي اعرفها

- لا صدك سيد لا تشغل بالك بعد وياي اني ادرى بنفسي لهذا ماعليك بية

: زين كليلي شبيج واني ماعلية بيج بعد

- امي جانت حامل ومن سالفة سكرة والصار وياها حيل خافت وصابها نزيف وسقطتت لان هي بداية حمل ومو ثابت لهذا زعلت حيلل لان هاي حبلت بعد معاناة والحمدلله على كلشي

: الله يعوضها خلي ايمانج بالله جبير

- ان شاءالله

: ما اشوفج بعد ضايجة!؟

- وليش شلك غرض أنتَ زعلت رضيت شلك غرض

: اكيد الي غرررضض

- وليشش يماااه؟؟؟

: لان أحبج

- هههههههههههههههه

: ومرض شنو اليضحك؟

- نكتة الموسم تجنن

: بس اني احبچ صددك

ضليت صافنة علية وضحكتي راحت من وجهي وانصدمت شنو يحبني؟ فا تركت جو الضحكة و الشقة وحجيت وياه بجدية

- بس أنتَ سيد والك هيبتك شلون تحب وحدة مثلي؟

: الحب مو حرام واني حبيتج ماريد اشوف الزعل بعيونج مادري شصار بية حااولت ما احبج حااولت اجبر نفسي بس كلما انام اشوف عيونج بجفوني

- فرق ابيناتنا من السماء للأرض

: نتخطى كلشي مايهمني كلهم السادة سوو الي يردونة واجة دوري اسوي الي اريدة

بقيت واكفة بمكاني الكاع ما شايلتني من الصدمة علي الكاظم السيد اللي الكل يحلف براسه واكف كدامي وبكل ثقة يكول أحبج ضاعت الكلمات بداخلي ومسحت وجهي بيدي وأني أحاول أستوعب

- سيد أنتَ تدري شجاي تكول؟ أنتَ ابن العلوية والسيد اللي تلوك لامه بنيّة من ثوبكم وأني ترى أني ملكة المتمردة اللي لسانها يسبقها نحن وين وأنتَ وين؟

تقرب خطوة وصوته صار أنصى بس بي نبرة إصرار

: ملكة الثوب اللي تحجين عنه هو ثوب العفة والطيبة وأنتِ لبستهن وزيادة السادة بشر مثل كل الناس وكلب السيد ما يختار بالمسطرة يختار باللي يحس بي الأمان وأني أماني لكيته بعيونج حتى لو جانت مدمعة ومقهورة

دنكت راسي خجلانة من نظراته اللي جانت تحاصرني همست بصوت يدوب ينسمع

- بس أهلك والناس فرق العمر شراح يكولون حاط عينة على قاصر؟

ضحك ضحكة خفيفة وحجة

: أهلي يحبون سعادتي والناس الها الظاهر وأني ظاهري وباطني يريدج ملكة أني مو بس جاي أكلج أحبج أني جاي أكلج جهزي روحج لأن السالفة ما تخلص هنا راح أخلي الوالدة تجي تحجي وي أمج وأدخل من الباب مثل ما تفرض الاصول واذا ابوج رفض لأن أنتِ قاصر اقبل بقرارة واذا وافق لازم تقبلين بيه

رفعت راسي بصدمة:

- شتجي تحجي؟ سيد أنتَ مستعجل

: الخير ما بي تأخير أريدج تصيرين حلالي كدام الله وخلقه حتى بعد ماكو داعي تجين للحوش بحجة منّوشة علمود تشوفيني هههههه تجين لأن هذا بيتج ومكانج فكري بالموضوع زين بس خلي ببالج علي الكاظم إذا حط شي براسه يجيبه وأنتِ صرتي ببالي وبالرويحتي

باوعت لعيونه جان بيها لمعة غريبة لمعة إنسان قرر وما ينثني قراره هو سيد العارفين وأني صرت بموقفه طفلة ما تعرف شترد

- بس سيد السالفة مو لعب أخاف تاليها تنجرح وتجرحني وياك صعبة والله صعبة

علي الكاظم عدل محبسه بإيده ودار وجهه للسماء وأخذ نفس عميق ورجع باوعلي بابتسامة هادئة كالت كلشي قبل لسانه:

: ملكة الصعب يسهل بذكر الله وأني استخرت ربي بيج قبل لا أنطق بحرف لا تخافين من الجاي وأني وياج وجهي وجهج لربج وكولي يالله لأن خطبتج من أهلج صارت مسألة وقت وقريب كلش راح تسمعين هوسة السادة ببابكم

غمزلي بطرف عينه وهي أول مرة يسويها وكمل طريقه للباب الشارع وطلع وأني؟ بقيت واكفة بمكاني أيد على كلبي وأيد على حلكي مذهولة من جراءته ومن هيبته اللي خلتني حتى لا ما أكدر أنطقها
عافني واكفة بنص الحوش وطلع وهو يسبح بمسبحته وأني بقيت أباوع لأثره الفرحة والارتباك تضاربن بصدري ضحكت بيني وبين نفسي وكلت

- يا ستار منك يا علي الكاظم وكعتني بشباكك وأني الجنت أظن نفسي صعبة ههههه

مشيت لبيتنا واحسس بداخلي أكو بستان ورد انفتح فجأة يربي معقولة هذا العشك اللي يسولفون عنه؟ لو هاي بس حوبة السيد؟ بس الأكيد إن حياتي من هاليوم راح تتغير وبشكل ما جنت أتخيله أبد

﹉﹉﹉﹉﹉﹉﹉﹉﹉﹉﹉﹉﹉﹉﹉
"""" شُبيِـــرْ """"

نزلت لكيت ابوي طالع لشغل وشُبر رايح لجامعة وامي كاعدة بالكاع تلعب وي أخوي جهاد الحسين وهو كاعد يرسم وكفت يمهم

شُبيِـــرْ :- صباح الخير

جهاد الحُسين :- صباح النوور

جميلة :- صباحك نور حبيبي اسويلك ريوك ؟

:- لا يمة رايح للمحل ليش ما مكعدتني

جميلة :- ما كتلي كعديني عبالي ما تروح

:- شني يمة لازم كليوم اكلج كعديني يعني

جميلة :- ترى اكو منبه شنو يمة شكبرك بعد تصير حتى اني اكعدك ؟

جهاد الحسين :- شبوري تعال شوف شنو رسمت

نزلت كعدت على الكاع وباوعت لرسمة طوفان مادري شنهي چان راسم بس المهم حلوة لأن من أيد اوليدي ضليت صافن عليها وابتسم رجع طوفان وهتف وياي

جهاد الحسين :- هاا شبوري مو حلوة؟

:- رسمة يرسمها السيد طوفان البشير قيصر وتطلع مو حلوة هي شنيي مو عييب ههههه ولك تخبل رسامنا اكتب هنا جواهن طوفان البشير قيصر حقوقك لا يبوكوها منك

جهاد الحسين :- شلون ماعرف أكتب

:- تعال اني اكتبها الك وأنتَ سوي روحك نفس الترسم ارجع واكتب الكتبتة انا بوية لازم تتعلم من هسة ماضل شيء وراك سادس علمي

جميلة :- هههههه شنو شبير كول ياالله على أخيك

:- لا يمة مااكووو ما نلحك بعد تردينة يصير كسول اكتب يلا حبيبي

جهاد الحسين :- اكتب هنا

:- صاارر انطيني القلم شو هااي السيد طوفان البشير قيصر

- اسمي السيد جهاد الحُسين مو طوفان!

:- لا حبيبي اسمك طوفان بس ابوك يصيحلك جهاد الحسين شنهييي طوفان احلا

- مامة

:- شنيي مامة ولك كول الها يماااا هاي ابنج ليش هيج افگاگة

جميلة :- شبير شبيك طحت على أخيك عوفة يحجي الي يعجبة ويكول اليريد يكولة مو زين يحجي خلص حبيبي التريدة

- اسمي انا السيد جِهاد الحُسين مو طوفان

جميلة :- هاي حبيبي أنتَ جهاد الحُسين وابن شيخ السادة

- يلا شبوري اكتب الي هنا اسمي

:- لا إله إلا الله هااي اكتب وراي واريدها بخط حلو و جبير ارد من الشغل اريد اشوفها واكحل عيوني

- أوكِ شبوري

:- يلا يمة انا اترخص محتاجة شيء

جميلة :- ترجع بالسلامةة امي

- استودعتك الله شبوري

جهاد الحُسين حفظ هاي الكلمات من ابوي أسبوع وهو يعلم بيه شلون يسلم وشلون يودع واول مرة يستعملهن وياي واسمعهن منه
حطيت ايدي على خصري ' اتخصرت '
وامي الي جانت ميتة من الضحك نزلت ولزمت راس طوفان حيل وعصرت بخدودة وعضيتهن وهتفت وياه

شبير :- شلون تريدني افصل عن العالم واچودر يمك شلون بية ولك هااا شلوون

جميلة :- عوفة يمة وروح لشغلك لا تتأخر

:- عمييي اذا هذا منتوچچ جميلات لا توكفين لو انا منج اخلف ومااكو

جميلة :- ههههه امشي ولك

جهاد الحسين :- من ترجع نلعب سوة

:- صااار تأمرني أمر سيد طوفان يلا انا مرخص يمااه

جميلة :- دربك اخضر وجعل مابيه شوك

عفت الوالدة وطوفان وكمت طلعت من البيت ورحت للمحل لكيت المحل مفتوح وماشي طبيعي وموجودين بيه زَمُرد و عصام رحت وصرت اكلب بالسجلات نهاية الأسبوع اليوم والجو جان يمطر خفيف
صرت اعيد الحسابات للصادرات والواردات وهتفت وياي زَمُرد

زَمُرد :- سيد ترى عصام أتأكد من كل السجلات

:- حتى لو الإعادة إفادة

عصام :- سيدي بدل ما تضيع وقتك بسجلات عايدين حساباتهم مليار مرة تعال وشوفلي هاي

:- شنوو؟؟ منين هذا الذهب؟

زَمُرد :- مساع اجت مرة وضلت تلح الا تشترونة وان هي محتاجة فلوس وهذا ذهب عرسها

:- وشنهي اشتريتوا؟

عصام :- شلون نشتري وأنتَ صاحب الحلال كلنا الها ابو المحل ما موجود

:- اذا ما اشتريتوا شيسوي عدكم ؟

زَمُرد :- سيد هيَّ كالت خلوا عدكم من يجي ابو المحل يشوفة وهم كالت راح اخذ ساعة وأرجع

:- أنتم صدك تحجونولو فاريها على عقلي

عصام :- احس المرة لحست عقلنا كلنا هههههه

زَمُرد :- يمكن المرة مو صاحية اصلا شلون تترك ذهبها هيج بالمحل وتدير وجها وتروح

:- حسبي الله ونعم الوكيل

زَمُرد :- ماكو داعي تتوتر هسة ترجع واتصرف وياها

:- مااكوو هيج وحدة تعوف ذهبها على كولتج الا اكو أنة بالموضوع

عصام :- كول ياالله سيد اقداركم تأخذ من أفواهكم

:- عصام روح للمعمل هسة

عصام :- اشوف البضاعة لو اجيب؟

:- لا جيب المخلصينة

- صار سيد

لبس قمصلتة عصام وطلع من المحل راحت زَمُرد وصارت تسوي بالحاسبة واني سويت روحي ملتهي بالتليفون حتى ما اباوع لشعرها المروني جنها سعاد بمسلسل باب الحارة
ما تحملت وضليت اباوع الها وضحكت وانتبهت عليه وهتفت وياي

زَمُرد :- شنو سيد ؟

:- أعتذر ماكو شيء

- تكدر تكلي ليش ضحكت وباوعت الي؟بية شيء

:- بيج شيء؟ أنتِ بيج كلشي بس مابيج شين

- شنو؟

:- متابعة مسلسل باب الحارة؟

- لاااا

:- صدك والله!

- والله المسلسل السوري غير!

:- ايي باب الحارة مروان البوابيري شوكت الحكيم ابو حاتم وابو كاسب

- سامعة بي بس ما شايفتة ابد

:- انا هم جنت ما متابعة بس عرفتة من ابوي وهو يسولف على عمامي " رحمة الله عليهم " عندج عمي الصغير جان يعيد بيه يشوف الحلقة الأخيرة ثاني يوم يرجع يشوفة من اول حلقة

- شنو عندة امتحان؟

:- جان يموت علية وابوي يموت على عمي وهسة نتابعة على ذكرة

- عندك عمام ميتين؟

:- عندي هواي يعني خمس عمام الي ميتين

- عززة عنددك 5 عمام ميتين

:- أيي

- شلون هيچ ماتوا موت الله

:- لا

- شلون ماتوا؟

:- عندج عمي محمد الصدر مات وي جد ابوي بحادث سيارة ولحكة عمي مؤمل الصدر اخوة التوأم بالمظاهرات 2019
وبفاتحة عمي مؤمل الصدر انقتل عمي تحرير عن عمر ناهز الــ 16 سنة

- عززة شلون انقتل؟

:- عمي تحرير من مواليدي لو باقي عايش المفروض هسة من عمري وعمرة 23!! بس أولاد الحرام سلبوا منه طفولته وعندچ عمامي الإثنين علي الهادي و المصطفى القاسم ضحوا بنفسهم

- شنو ضحوا بنفسهم؟

:- قصة ماراح تفهميها

- بس ثواني شنو عمك الصغير انقتل بفاتحة أخوه؟ وشنو عمامك ضحوا بأنفسهم؟

:- زَمُرد

- هلاا

:- تذكرين من سألتيني هذا الشعر الأبيض براسي شيب لو صبغ؟

- أيي أتذكر

:- شايفة شيب راسي هذا وانا بهل عمر طلع من نوح أبوي بكل مسية على اوليدة تحرير
الشيب طلع من ضيم عمتي الي كلما اشوفها اشوف عيونها الرصاصية تتمنى تشوف إخوانها وأبوها
طلع الشيب من الغصة التصير بصدري بوقت اباوع لعمي اشوفة يربي اولادة وعيونة بيهن دموع دمعة لـ طيرة كلبة ودمعة لمرتة الدمرتة
طلع الشيب وانا اشوف عمتي انحرمت من الأمومة وخنجر مسموم انغرز وشگ جدار كلبها قبل ما يشگ جدار رحمها
طلع الشيب وانا اشوف عمي الي هاز الدنيا بصوتة وقوتة وهو يصيح بليل ويبجي ويسوي كلشي بروحة بس لان كتم شعور أكبر منه
وتعرفين هذا شيب راسي اكثرة منين طلع؟

- منين طلع؟

:- من عمتي وَهج الطف لمن سمعت منها العاشت بيه وشفت بعيوني الآثار العلى ايديها وركبتها وشفت الي مرت بيه ودخلت للمكان الي جانت عايشة بيه 9سنوات شيب راااسي
عن يا حزن تحجين وعن يا شيب تحجين وعمتي من عمري وما عاشت الحياة الي انا عشت بيها ولا حست بالي انا حسيت بي انحرمت من طفولتها! بالوقت الي انا عايش طفولتي بكل حذافيرها وعمي تحرير مترفه بحضن ابوي
هي امها يمها بس مو يمها وأبوها انحرمت شوفته
قُصتنا ماراح تفهميها
سنة بس سنة جانت والله بس 12شهر
بسس طشرت عشيرة وترست مكابر

- اختصر حياتكم بكلمة

:- شَّتات

- ليش اختاريت هاي الكلمة؟

:- مادريي

- زين انطيني جملة عليكم أنتم السادة

:- نحَن رجالٌ عُشْيٌ

- ووفف ليش اختاريت تكول هيچ ؟

:- لان مشت علينا كلهم جانوا بهي القصة عميان

- ياريت ما سألتك ليش مشيب

:- اليعرف ساكت والمايعرف يسأل ومعذور

انداريت بوجهي ومسحت الدمعة من عيوني وجريت النفس وسكتت عني زَمُرد
ولمن انداريت الها لكيتها ملتهية بشغلها وهتفت وياها

:- عمي شاكر شلون صاار ؟؟

- أبوي على الله و العلاجات

:- مابيه غير العافية خو ما محتاجين شيء؟

- لا الحمدالله ماشية

:- صدك إخوانج شكد أعمارهم ؟

- ليلة 29سنة وانا 26سنة وعندك رملة 19سنة ولين و إيليا 6 و 7 سنوات

:- أنتِ خريچة شنو؟

- أدارة واقتصاد

:- اكول شاطرة بشغلج

- من عمل عملاً فــ لايتقنه مو شرط ألا مجالي بس هذا شغلي

:- أسألج سؤال بس ما أعرف اذا هو تدخل بس صابني الفضول

- لا عادي أسأل اليعجبك

:- بالبداية اول ما شفتج عبالي بس أنتِ بس من رحت وياج للمستشفى لاحظت انتم كلكم هيچ وحتى امچ وياچن

- يمة أسم الله شنو؟

:- مو محجبات عبالي بس أنتِ بس صدمتي لمن شفت حتى أمج والدوخني أنتن اسماءكم شيعية يعني رملة ، ليلة ، ايليا

- أبوي شيعي وأمي مسيحية

:- اهاا وأكيد أنتن المفروض وي دين أبوكم

- لا

:- شلون لا ؟

- يعني ابوي شيعي ولمن راد يتزوج امي أهلة رفضوا لأن مو مسلمة بأاختصار أبوي عاف اهلة ودينة واجه لهنا صار مسيحي حتى اهل أمي يتقبلونة واتزوجها

:- عججيب

- شنو؟

:- صار مسيحي ؟

- هو بس كدام خوالي مسيحي بس لمن تجي اله يصلي ويسوي كلشي للشيعة

:- وأنتِ شنو تصلين ؟

- انا مسيحية على دين أمي

:- يعني بيتكم هسة منقسم؟

- اي بس ليلة وياي مثل امي والباقي وي ابوي يصلن وياه ويحززنن بمحرم الحرام

:- الله يهديچ أنتِ هم

- يعجبك تروح وياي لمكان؟

:- هسة؟

- امم بكيفك

:- خلي من يخلص دوامچ

- براحتك

:- وين نروح؟

- مفاجأة

:- تمام

بهذي الأثناء دخلت مرة للمحل وجانت صاحبة الذهب العافتة راحت و وكفت كدام زَمُرد وهتفت وياها

: ها حبيبتي ما اجة صاحب المحل؟

نضرت الي زَمُرد وأشرت علية وهتفت

زَمُرد :- هذا أبو المحل

اتوجهت الي المرة وهتفت وياي وهي تخلي أيديها على الكزاز

: ها خوية انا عفت ذهبي عندك

- أيي خالة هذا الذهب

: اي دامك شفتة شكد تنطيني بيه؟

- حسب النوع و الوزن نحصي السعر

: غير محلات انطوني بيه 7 ملايين

- خالة الذهب هذا معيار أيماراتي يطلع هيج يتراوح من الــ 5 ملايين الى 8 ملايين

: بس انا محتاجة الفلوس

- بشكد خاطرج تبيعيهن؟

: أقل شيء 10ملايين

- خالة مو سعرهن هذا وأنا الراح أخسر يعني اذا أخذتهم منچ بهيچ سعر وابيعهن للناس بــ ملونين لو ثلاثة

: ترى لولا الحاچة ما انطريت أبيع ذهب عرسي

- زين خالة وين الوصولات؟

: ما اعرف والله

- هاي شلچ بيها شنهي ما تعرفين؟

: الذهب هذا اجه وي النيشان عيالي هم الاشتروه الي

- بس الذهب بلا وصل ما ينباع!

اتقربت مني زَمُرد وهتفت وي المرة

زَمُرد :- خالة روحي ارتاحي هناك على الكرسي

من راحت المرة كعدت على الكرسي اتقربت زَمُرد اكثر مني وهتفت وياي بصوت ناصي حيل

:- سيد شبيك وي المرة خطية جاي تكلك محتاجة

- وكل واحد على كلمة محتاج لازم نتورط وياهلا تصيرين فاهية شنو يضمن هذا صدك الذهب الها وين الوصولات!! ماكدر زَمُرد أضيع رزقي

:- لخاطري هاي المرة خطية والله سويها لله وصدكني اذا الله يشوفك شلون ساعدتها حتى لو بيها أذية رب العالمين راح يدفعها عنك

- بس زَمُرد

:- سيد كتلك لخاطري واذا صارتلك مشكلة احسبها علية!

- أمري لله

:- عفيية حبيبي يلا صيح للمرية واحجي وياها باأسلوب ححلو

- حبيبچ؟

:- كلمة التنكال لا تعلق يلا

ابتعدت عني زَمُرد وصحت للمرة وخلصت وياها واشتريت الذهب وسلمت الها الفلوس ولمن طلعت من المحل نضرت لــ زَمُرد وضحكت الي .. أبتسمت و دنگت

هنا سمعت صوت رسالة اجتني فتحت تليفوني لكيت المرسل عمي الغالي السيد علي الباقر والرسالة كاتبلي بيها

علي الباقر :: أبن أخوي مسوي روحة رچال ويأخذ قراراتة براحتة موو لك أحترم نفسك سيد شبير وبليل اريدك مزروع جدامي وبالك ثم بالك ولك علمي يوصلك وما يتعداك تأخذ بعد قرار واااحد وما ترجع النا لك حتى أبوك الشاد ظهرك بيه ترى انا اكسر ظهرك و ظهرة
بليل اشوفك ويجرالك خير ...

استغربتتت من رسالة عمي بس كلت يلا اكيد ابوي كالة عن سالفة انفصال الخطوبة مالتي يعنيي يلا
راح احصل رزالة صغيرة وتعبر نَفَس كل مرة
سديت التليفون بدون ما ارد على الرسائل وضليت مشلوش بالمحل وباليچون و زَمُرد جانت شغلها بس تحط الحسابات بالسجلات وبالحاسبة وتترس المحل عطرها

ضليت واكف بمكاني الرسالة مالت عمي علي الباقر خلت الوجع يتربع بصدري أدري بي من يحجي حجاية يثنيها ومن كال أكسر ظهرك وظهر أبوك معناها السالفة عبرت حدود فسخ الخطوبه السالفة بيها إنّ باوعت لزَمُرد جانت تضحك وفرحانة وتشتغل وما تدري بالدوامة الصارت براسي

ذبيت حسرة طويلة وهتفت بگلبي

:- يا ستار استر هو نحن السادة حوبتنا تبطي بس ما تخطي وانا اليوم جني طحت بحفرة عمي

اتقربت مني زَمُرد وهتفت وياي

زَمُرد :- ها سيد شو وجهك انكلب؟ شوكت نروح للمفاجأة؟

:- والله يا زَمُرد الظاهر المفاجآت بدت تجيني من حيث لا أحتسب

- ليش خير شنو؟

:- مااكو بس عمي علي الباقر يريدني بليل ومن هسة أكلج إذا شفتيني باجر بالمحل مكسر عرفي هذا سلام مربع من السادة ههههه

- ياااا هههه لهل درجة عمك يخوف؟

:- لا مو يخوف بس هيبة السادة تهد الحيل عمي علي الباقر مو بس عم هو مثل الجبير ومن يزعل حتى الحيطان بالبيت تدنك المهم هسةة يلا حضري روحج نطلع هسة قبل لا يصب المطر قوي ونشوف هاي مفاجأتج شنو عسى ولعل تغسل غثيثة رسالة عمي

- تمام انتضري اجيب القمصلة واجي وياك

:- يلا تعاي

طلعت من المحل قفلت الباب وأني أباوع للسماء الجو غيم والريحة تراب ومطر ركبنا بالسيارة وزَمُرد جانت توصف لي الطريق بعد مسافة ولكيت نفسي واكف كدام كنيسة قديمة

:- هنا؟

زَمُرد :- هنا هذا مكاني الي أرتاح بيه تعال ادخل لا تخاف ما راح نكفر ههههه

دخلت وياها جان المكان هادئ بشكل غريب ريحة البخور والشموع تارس المكان كعدت زَمُرد على الكرسي وأني وكفت بصفها أحس روحي غريب بس بنفس الوقت مرتاح

زَمُرد :- تعرف سيد أنا هنا أصلي للي خلقه وخلقك أصلي لأبوي الي ضحى بكلشي علمود الحب وأصلي إلك حتى الله يشيل هذا الشيب والهم من گلبك

باوعت لعيونها جانت تلمع بهاي اللحظة نسيت روحي ونسيت كلشي ونسيت حتى تهديد عمي حسيت الدنيا صدك شتات بس اكو محطات نكدر نرتاح بيها

:- مشكورة زَمُرد صلاتج واصلة إن شاء الله بس تدرين لو يدرون السادة أنا هسة واكف بنص الكنيسة يمكن ينسفوني نسف ههه

زَمُرد :- الله يحب الكل سيد مو بس السادة

طلعت تنهيدة من كل گلبِي واني أسمع كلماتها.. الله يحب الكل گعدت بصفها على الكرسي وعيوني تتأمل الصليب الجبير واللوحات المتروسة قدسية المكان جان بيه برودة يمس الروح وصمت يخليك تسمع دگات گلبك

التفتت عليها وگلتلها بصوت

:- زَمُرد احجيلي إنتِ هنا شتحسين؟ يعني نحن عدنا الجامع والمنبر والتربة وإنتِ هنا بين الشموع وصور القديسين شنو الفرق بعيونج؟

زَمُرد عدلت كعدتها وابتسمت ذيج الابتسامة اللي تطيح أكبر سيد من طوله وگالت

- سيد الدين مو بس طقوس الدين حب إحنا المسيحيين نأمن إنّ الله محبة هاي الكنيسة مو بس حيطان هاي ملجأ هنا امي جانت تگلي يا بنتي المسيح جان يداوي جروح الناس بكلمة طيبة وأنا أشوفك إنت هم تداوي جروحي بطيبتك تدري نحن نصلي بـ أبانا الذي في السماوات ونطلب الخير والمسامحة إنتو تطلبون الشفاعة وإحنا نطلب من العذراء مريم تستر علينا بحنانها

باوعت ليديها وهي تشعل شمعة صغيرة جانت الحركات مالتها بيها خشوع غريب كملت وهي تباوع للشمعة وهتفت وياي

- تدري شنو أحلى شي بـ ديانتي؟ فكرة الغفران إنّ الواحد مهما يغلط اكو باب مفتوح يرجع منه طفل جديد وأنا اليوم صليتلك مو لأنك سيد وابن سادة صليتلك لأنك إنسان تعبت من حمل الدنيا على جتافك

ابتسمت واني أحك طرف لحيتي وگلتلها

:- والله يا زَمُرد كلامج يريح بس تدرين شي؟ نحن السادة عدنا أهل البيت هم الميزان الهدوء هناك مو طبيعي وعلاج لروحج يمهم والدنيا وسيعة وأكبر من ضيگ عقولنا وتشددنا
وهمم يعنيي مثلا يعني هسة لو يدري عم السيد شبير ان أبن أخوه گاعد بالكنيسة ويسمع ترانيم السلام جان كفروني وطلعوني من الملة! بس الصدگ حسيت الله هنا قريب مثل ما هو قريب بـ صلاتي وتسابيحي

زَمُرد لزمت طرف رداي بخفة وگالت :

- المهم گلبك سيد الله يباوع للگلوب قبل ما يباوع للعمامة أو الصليب

بقينا ساكتين فترة بس صمتنا جان أحلى من ألف كلمة ريحة البخور بدت تسكن براسي وتطرد طيوف المزعجة حسيت براحة مؤقتة مثل الواحد اللي لكى لوحة بنص صحراء تيه

:- تدري يا زَمُرد مفاجأتج هاي خلتني أحس إني حر ولو لـ نص ساعة بس هسة لازم نطلع الجو بدأ يليل وموعدي وي الموت الأحمر قرب

گامت وگفت ونفضت ملابسها بخفة وباوعتلي بنظرة كلها حنان

- لا تخاف سيد اللي عنده گلب مثل گلبك الله ما يضيعه لا بكنيسة ولا بجامع

طلعت وياها وأنا أدري هاي اللحظات هي الهدوء اللي يسبق العاصفة طلعنا من الكنيسة والليل بدا يرخي وصلتها لبيتها ورجعت لبيتنا والطريق كله أفكر بكلام عمي دخلت للبيت سمعت صوت جاي من الديوانية رحت ودخلت ولكيت عمي علي الباقر كاعد بهندس الديوانية وبيده السبحة يفر بيها وصوت طكطكتها يرج وكفت بالباب كلت بصوت يرجف شوية

:- سلام عليكم عمي جيت مثل ما ردت

عمي ما دار وجهه بس حجه بصوت ثكيل يخلي الواحد يتمنى الأرض تنشك وتبلعه

علي الباقر :- ادخل شبير سد الباب وراك واكعد چدامي

:- خيرك عمي جفلتي!

- تعال اكعد چداامي

:- ياالله

- شنهي هذا عطرك؟

:- اااءء عطر المحل عمي

- خووش عطر المحل ..

:- عمي هسة أنتَ شنو محتاج يمي والله ما مسوي شيء

- اي اكعد جدامي ليش الخوف اذا ممسوي شيء؟

:- مادري اخاف منك

- اكعدد

:- صار تريد اصبلك چاي؟

- اي سولفلي

:- شسولفلك؟

- ليش فصخت الخطوبة وليش نحن ندري بالصدفة الغريب عرف بااول يوم ونحن نعرف بالصدفة ؟؟؟

:- عميي

- احجي اسمع

:- شوف عمي أنتَ بيوم الخطوبة مو كتلي الاحترام والحُب اساس كلشي بالعلاقة؟

- صحيح

:- شنو فايدة الحُب موجود بس الاحترام ماكو..

- شُبيِرْ لا تكول هسة عمي واكف وياها ضدي وشما احجي ماراح يفهموني مثل ما سمعت منها أسمع منك باباتي صحيح الاحترام أساس كلشي بس تصير هيج أشياء يعني البنت تكول ما ذنبها شيء بالغلط

:- والغلط هذا باجر يصير جدام الناس

- شُبيِرْ

:- عمي أنتَ سمعت منها وترست عقلك بعد شتريد اكلك يعني؟

- لك مثل ما أنتَ أبن أخوي وما أقبل عليك لا تنسى هدى بنتنا وتربيتنا ودامك حطيت خطأ عليها يعني الخطأ بتربيتنا

:- بوية انا الغلطان البنت ماي زلال مابيها ولا عيب وانا عيوب الدنيا بيه كلهن

- شُبيِرْ لا تتعبني

:- عمي رجعة ما ارجعها انطيها الك من الأخير

سكت عمي علي الباقر ونزل سبحته من إيده خلاها على الفراش بصفه وهدوءه هذا جان أصعب من صياحه باوعلي بنظرة جانت نظرة بيها عتب جنت دائماً أكول عمي علي الباقر شايل بكلب واحد عقل عشيرة كاملة
نزل راسه سحب نفس عميق وطلعه بحسرة وبعدين كال بصوت هادئ

- شبير بوية أنتَ تحسب الرجولة بس كلمة ما أرجع؟ تحسب العناد هو الي يسويك زلمة جدام أهلك؟

:- عمي السالفة مو عناد بس الكرامة

قاطعني بحركة من إيده وكال

- اسمعني وليدي أنا ما متزوج ومثل ما تگول الناس العزوبي غريب بس أنا عشت عمري كله أراقب شفت بيوت انبنّت على الصبر وبيوت اتهدمت بكلمة عصبية المرة يا شبير مثل الجام إذا انكسرت تگوم تجرح وإذا داريتها تعكس صورتك بأجمل ما يكون هدى بنتنا ومن لحمك ودمك والي صار بينكم تراه يصير بأحسن العوائل بس الزلمة الحوك هو الي يلم السالفة مو يطشرها

تقرب مني لزم جتفي وكمل

- أنتَ تگول ماكو احترام؟ الاحترام يا شبير مو بس هي تنطيكياه أنتَ تفرضه بهدوءك بكلمتك باحتوائك إلها المرة من تغلط تريد سند يگوللها هذا غلط مو يگولها انتهينا تدري ليش ما تزوجت أنا؟ مو لأن مالي غرض بالنسوان لا بس لأن جنت أدور على الحكمة الي تخلي البيت بيت مو مجرد حياطين وسگف وأشوف بيك يا شبير طيش الشباب الي هسة ما عندهم عم يگعدهم هاي الكعدة ويكول الهم اصبروا
تعامل وي زوجتك مو كأنها خصمك تعامل وياها كأنها قطعة منك تأذت وتريد تطيب إذا اليوم عفتها لأن غلطت بكلمة أو تصرف باجر منو يضمن لك ما تعوف غيرها؟الحياة مو رحلة سياحية الحياة معركة والمرة هي سندك الوحيد الي يوكف بظهرك لا تكسر ظهرك بإيدك

سكت عمي ولفّ السكوت الديوانية كلها حتى صوت النفس كمت أسمعه بوضوح كلامه جان مثل السجاجين مو لأن بي قسوة لا والله بس لأن بي شيء يوجع الواحد بضميره هو يحجي وأنا عيوني بالكاع أحس روحي صغير جدامه مو بس بالعمر لا.. بالعقل وبالصبر وبطريقة الشوف للأمور

دار وجهه عليّ وعيونه ذيج الثجيلة اللي تخليك تحس نفسك مكشوف كأنما جاي يقرأ صفحة بوسط كتاب رجع سحب سبحته بس هالمرة ما طكطكها لفها على إيده وحجة بنبرة تغيرت صارت أهدأ بس أحدّ من السيف

- شوف يا شبير انا كتلك اللي عندي ووضحتلك المرة شنو والبيت شنو بس اسمعني زين أنا علي الباقر وعمري ما جبرت واحد على لگمة ما يشتهيها ولا أريد هدى تعيش وي زلمة حاسبها واجب أو كسرة خشم إذا أنت بقرارك هذا مقتنع إنك جاي تحافظ على كرامتك وإذا تشوف روحك ما تكدر تحتويها وتصير إلها السند اللي حجيتلك عنها فـ أنا أكللك بيها من هسة : لا ترجعها أنتَ بطريق و هدى من طريق

رفعت راسي بصدمة ما توقعت عمي يطينياها بهيج سهولة وهو اللي قبل شوية جان يمدح بالصبر كمل كلامه وهو يباوعلي بحدة

- اي نعم لا ترجعها وتورط بنت الناس وياك ولا تكسر بختها وية واحد كلبه مو يمها المرة تريد رجال يملكها مو بس بالاسم يملكها بفعله فإذا أنت تشوف نفسك قاصر عن هاي المسؤولية فـ سد هذا الباب وانسى السالفة بس حط بالك يا شبير وهاي الكلمة تخليها حلقة بأذنك ما طولك عايش لا تخطي بعد خطوة وحدة بموضوع الزواج لا خطوبة ثانية ولا عرس ولا حتى تفتح سيرة مرة وأنت بعدك بهذا طيشك لا تروح توجع بنات العالم وتكسر بختهن وأنت ما مستعد تتحمل زلة لسان أو غلطة ساعة عصبية اللي ما يعرف يحتوي بنت عمه اللي هي عرضه ولحمه ما راح يعرف يحتوي الغريبة الزواج مو حفلة وبدلة وركص ليل الزواج صبر وتحمل وأنتَ يا وليدي بعدك بعيد عن هذا الدرب

كلماته هاي جانت أقسى من قرار الرجعة حسيت بدمي يفور مو زعل منه بس قهر على نفسي كمت وكفت وحسيت الديوانية ضاقت بيَّ

:- عمي أنتَ تعرف شكد أحترمك وتعرف إنك عندي بمقام أبوي وأعز بس والله السالفة مو طيش ولا هو عناد طفولي أنا من شفت هدى وتجاوزت حدودها بالكلام حسيت الدنيا كلها صغرت بعيني كلت إذا هسة وهي بيت أهلها وهيج باجر ببيتي شلون؟ أنا إنسان عندي غيرة على كلمتي وعلى هيبتي وما أقبل المرة ترفع صوتها أو تستهين بوجودي يمكن أنتَ تشوفني طايش بس أنا أشوف نفسي جاي أحمي نفسي وأحميها من مستقبل أسود ومشاكل ما تخلص

سكتت شوية بلعت ريچي وكملت كلامي

:- أما عن سالفة الزواج مرة ثانية فـ اطمئن عمي أنا بعد هذا الدرس توبة إذا أدنيت يم هذا الدرب أنا هسة عرفت إنو الزلمة الحوك اللي تحجي عنه يمكن بعده ما نضج بداخل شبير أنا راح أمشي بكلامك ما راح أورطها وياي ولا راح أورط نفسي بغيرها لحد ما أحس روحي صرت كدها مثل ما تريد أو يمكن لحد ما ألكى اللي تفهم معنى الاحترام قبل لا تفهم معنى الحب

عمي علي الباقر ما جاوب بس هز رأسه بحزن خفيف ورجع فر سبحته درت وجهي وطلعت من الديوانية والباب سديته وراي بهدوء بس بداخلي جان أكو صوت عالي يصرخ صوت يكولي إنو المعركة ويا نفسي توها بدت وإنو كلام عمي جان هو المراية الحقيقية اللي شفت بيها عيوبي لأول مرة بوضوح طلعت من الديوانية والظلمة بالحوش بس بالي جان يشتعل أفكار

نزلت للحديقة الجو بارد والهوا يضرب بوجهي بس نار گلبي ما طفت تذكرت هدى تذكرت ضحكتها وتذكرت اللحظة الي صار بيها الخلاف هل فعلاً أنا جنت قاسي؟ هل فعلاً الاحترام يجي بالتدريج مو بالفرض؟

ضليت اتمشى وانا شفت عمي طلع وراي وراح لشارع وسمعت صوت سيارتة وصار صوتة يرن بذاني من جان يگول

- الزلمة مو الي يگول أنا وبس الزلمة الي يگول نحن

أخذت الموبايل فتحتة ودخلت على رسائلي وياها شفت رسالة منها قديمة كاتبة بيها

هدى :- شبير لا تخليني

غمضت عيني بقوة كلام عمي علي الباقر دخل بية كلش هواي هو الما متزوج علمني شلون أكون زوج علمني إنُّ البيت ما ينبني بالصياح ينبني بالصبر كلت بگلبي

:- يا عمي أنتَ حطيتني بنص نارين نار كرامتي الي تحرك بية ونار كلامك الي يگول حافظ على بيتك وعدل نفسك

مرت الساعات وأنا اصفن بالكاع رجعت و تذكرت من كال عمي

- يعني الخطأ بتربيتنا

هاي الجملة ذبحتني يعني أنا جاي أطعن بأبوي وعمامي من أگول هدى ما متربية أو ما تحترم

دخلت و غسلت وجهي بماي بارد وكفت گبال المراية شفت واحد ثاني مو شبير العصبي شفت واحد لازم يراجع حساباته

دخلت لجوة سمعت صوت من غرفة المصلى رحت لكيت ابوي كاعد يصلي وكفت بعيد باوعت عليه وهو ساجد ويدعي بصوت ناصي حَسّيت إنُّ هذا الرجل شايل همومنا كلنا

صعدت لغرفتي والكلام ماراضي يطلع من رأسي وكان عمي لهسة موجود ولهسة يحجي وطبعن بصدري كلماتةةة

- الكسر الحقيقي هو من تضيع إنسانة جانت تحلم تكون باسمك بس لأنك ما عرفت تحتويها المراة مثل الجام جرحتها تنكسر وتجرحك داريها تعكس صورتك باجمل ما يكون

مديت طولي على الفراش أحس راسي صار ثكيل من كثر الحجي والصفنات كلام عمي علي الباقر مو بس رزلني لا والله هذا فكالي جروح جانت مستورة وخلاني أواجه روحي بالمراية بلا تجميل

طلعت تنهيدة حارة من كل كلبي وهتفت بيني وبين نفسي

:- يا بوية يا شبير أثارينا نركض ورا الهيبة والكلمة المسموعة ونسينا إنُّ الهيبة الحقيقية هي الي تلم الشتات مو الي تطشره عمي حطني بميزان وطلع ميزاني خفيف كشفلي إنُّ الرجولة مو بس شوارب وتخصيرة وكلمة أنا الرجولة صبر واحتواء

وفجأة تذكرت زَمُرد وكلامها بالكنيسة عن الغفران ورجعت قارنته وي قسوتي وي هدى حسيت بتناقض غريب شلون أدور راحة بال الترانيم وأنا كلبي شايل غيض وقسوة على بنت من لحمي ودمي؟

جريت الموبايل باوعت لاسم هدى صبعي يروح ويرجع العناد يگلي عوفها كرامتك أهم وكلام عمي يزن بأذني لا تكسر بختها وتوجع بنات الناس

ذبيت الموبايل بصفحة وكلت بصوت مسموع ويه خنكَة عبرة

:- والله يا عمي علي طلعت السالفة مو سالفة فسخ خطوبة السالفة سالفة ذات لازم تنكسر حتى يصفى المعدن يا ستار من الجاي جني اليوم عرفت إنُّ شيب راسي مو بس من ضيم أهلي طلع شيب راسي من عقلي الي بعده يحبي بدرب العشكَ والمسؤولية يا ربي برد كلبي ودليني الدرب لو أصير كدها وأحتويها لو أتركها للي يعرف قيمتها و الجام من يلمع مو بس من ينكسر
الظلمة تفتك بالغرفة إلا من ضوا خفيف يجي من الشباچ أحس راسي صار تنكة من كثر الدك كلام عمي علي الباقر من جهة ووجه زَمُرد من جهة ثانية

غمضت عيني وحسيت بضيج بصدري سحبت نفس حار وكلت بيني وبين روحي

:- يا شبير أنتَ وين تريد توصل؟ حاط رجلك بمركبين والغرگ صار يشاور بيك عمك علي الباقر يريد يسوي منك زلمة بس الكلب يا عمي الكلب ما يمشي بالرزايل ولا يلين بالهيبة

تذكرت هدى تربية إيدنا الي جانت بيوم من الأيام حلمي الوردي بس ليش هسة أحسها صارت حمل ثكيل؟ ليش من أسمع طاريها أحسني جاي أختنك؟ مو كره لا والله بس أحس روحي انطفت من جهتها الكرامة الي حجيت عنها كدام عمي جانت بس غلاف الحقيقة هي إنُّ المشاعر اتجاهها تبخرت وصارت مثل الثوب الضيگ الي يريد يشگ جلدي

فتحت عيوني وصفنت بالسكف وارتسمت كبالي ملامح زَمُرد هاي البنية الي لا هي من ثوبي ولا من ديني ولا حتى من بيئتي شلون دخلت لكلبي بهالسرعة؟ شلون خلتني أكعد بالكنيسة وأنا ابن السادة وأسمع ترانيمها وأحس براحة ما شفتها حتى بصلاتي؟ حجيت وي نفسي

:- ولك شبير أنت صاحي؟ زَمُرد مسيحية تدري شنو يعني؟ يعني سد وسور بينك وبينها يعني هيبة السادة الي يحجي عنها عمك تنهدم بلحظة لو دروا إنُّ كلبك مال لغير دينك أنتَ الي تشيل هم الشيب الي براسك من ضيم أهلك تريد تزيد الضيم ضيمين؟

كمت كعدت على حيلي حطيت إيدي بوسط شعري المشيب وكملت كلامي لنفسي

:- بس يا ربي الكلب شيسوي؟ زَمُرد مو بس بنية حلوة زَمُرد روحها تشبهني تعبها شتاتها نظرة عيونها الي تحجي قصص ما تنفهم هاي البنية شافت شيب راسي حست بيَّة بلا ما أحجي خلتني أحس إني شبير الإنسان مو السيد شبير الي لازم يشيل حمل العشيرة ولازم اتقيد واتعقد وخلتني حتى بالكنيسة اكعد واعيش حياتي طبيعي بدون تعقيد

رجعت بذاكرتي للمحل من كالتلي حبيبي وطفرت الكلمة منها بعفوية هاي الكلمة جانت عندي تسوى ملك الدنيا ومن خلتني أشتري الذهب من المرة المحتاجة خلتني أشوف الدنيا بعين ثانية عين الغفران والمحبة الي تعلمتها بكنيستها

عمي علي يگول المرة مثل الجام وأنا أگول يا عمي هدى انكسرت بيدي والجام المنكسر ما يتصلح يظل يجرح لو شكد ما لزگناه بس زَمُرد زَمُرد مثل الضوء تدخل لظلمة كلبي بلا استئذان بس الضوا هذا يحركني ويحرك أهلي وياي شلون أجيب مسيحية لبيت السيد البشير قيصر؟ شلون أقنع أبوي الي يگضي ليله بالدعاء والصلاة؟ شلون أواجه عمامي

وكفت يم الشباج المطر بدا يقوى وصوت الرعد صار يهز الغيوم

:- هدى تريدني أرجع وأهلي يريدون الستر وعمي يريدني أصير گلف بس أنا أريد روحي أريد هذا الشعور الي أحسه من أمشي بصف زَمُرد أريد الغريب الي يفهمني ما أريد القريب الي بس يحاسبني بس الدنيا مو بهالسهولة

تخيلت زَمُرد وهي تشعل الشمعة وتدعيلي

- أصلي إلك حتى الله يشيل هذا الشيب والهم من گلبك

ولج يا زَمُرد شلتي الهم وحطيتي بمكانه نار صلاتج وصلت بس الجواب صعب شلون أگول لعمي وأنا أدري الجواب راح يفتح عليَّ بيبان جهنم؟ شلون أگول لروحي كافي وأنا كل ذرة بية تشتاق لعطرها ولشعرها المروني؟

رجعت كعدت على طرف الفراش طفيت الضوء تماماً وردت أعيش بالظلمة شوية

:- أنا هسة بنص الشتات صدگ لا كدرت أكون السيد الي يرضي أهله ويلم الفشلة ويرجع لهدى ولا كدرت أكون الشاب الحر الي يركض ورا كلبه ويگول هاي هي مرتيي المسيحية أنا ضايع بين صليب زَمُرد وعمامة أهلي بين طيبة زَمُرد وعناد هدى بين حلمي وواقعي

سحبت حسرة طويلة أحس ريتي توجعني من الهوا البارد

:- يا رب أنت تدري بالگلوب تدري إنُّ هدى ما تملي عيني وتدري إنُّ زَمُرد صارت هي النفس لا تخليني أكسر بخت أحد ولا تخليني أعيش مكسور عمي يگول نحن السادة حوبتنا تبطي وأنا أگول يا عمي حوبتي هي عيوني الي شافت غير دربك وگلبي الي دگ بغير ديوانك راح أظل ساكت وأخلي الأيام هي الي تحجي بس هدى لا يا هدى رجعة ما أرجع مو لأنچ مو زينة بس لأن الكلب صار بمكان ثاني مكان بعيد وراه سياج كنيسة وريحة بخور وصوت ترانيم تگول الله محبة وأنا ضعت بهاي المحبة

اتمددت وحطيت إيدي تحت راسي أسمع صوت المطر وهو يغسل شوارع المنطقة وتمنيت لو يغسل كلبي من هذا التردد بس جان يذكرني كل لحظة إنُّ الضيم ما يروح بالمطر الضيم يروح بالقرار وأنا قراري صار واضح لو زَمُرد لو شتات العمر كله وهدى صارت صفحة وانطوت حتى لو جان الثمن كسر ظهر شبير بوسط ديوان السادة

:- نام يا شبير نام باجر المحل ينتظرك وزَمُرد تنتظرك والله يستر عسى ولعل ربي يفتحها بوجهي وما يخلي هاي المفاجأة تنتهي بمصيبة

﹉﹉﹉﹉﹉﹉﹉﹉﹉﹉﹉﹉﹉﹉﹉
"""" صَـــــيــــوآن """"

قضية البنت بتول لحسّت عقلي وجنت ما انام الليل بس خاطر الگي طرف خيط يوصلني الها بيا ذنب ضاع شبابها؟ جريمة قتل لو حادث الله كتبة الها؟ ماجنت الگي الأجوبة المقنعة وقررت احقق وي أمها
وبعد ما كعدت وي كل الأطراف من أمها و الي وجنت كاعد اكلب بـــ الأوراق ودخلني أبني صمود وطفر كعد على رجلية ودخلت درية وراه وهو فتح قمصلتي ودخل حضني حيل وغطيتة بالقمصلة وهتفت وياه

صَيوان :- شنوو مسوي ولك وضممييت روحك

صمود :- مامة مامة بابا

درية :- صيوان انطيني صمود

ضحكت بوجع وأنا أحس بگلبي يرجف مو من الخوف بس من كمية التناقض اللي عايش بيها إيد تگلب بملفات جثث ودم وإيد حاضنة طفل هو كل أملي بهالدنيا صمود جان يرجف بحضني دافن راسه بصدري وقابض على قميصي بإيديه الصغار كأنه عصفور فلت من صيد صگور

باوعت لدرية جانت واكفة بالباب ونفسها عالي مخصرة بإيد ولازمة خاولي بالإيد الثانية عيونها بيها ذيج الحنية اللي تخليني أهيد مهما جانت الدنيا محترگة براسي

صيوان :- شبيج درية عوفي الولد شسوى هو؟

درية :- صيوان لا تدافعله تدري شسوة راح للمطبخ وذب الاستكانات مال الجاي اللي صبيتها وفات بالصينية عرض هدومي تبللت وهو طفر ركض عليك

ضحكت بصوت عالي ضحكة طلعت من وسط التعب بوست راس صمود اللي بدة يطلّع عينه وحدة من جوة القمصلة يباوع لأمه بخوف ومكر

صيوان :- فدوة يروحن اله الاستكانات وصاحبهن يمعودة هو طفل قابل گاصد؟ تعالي اكعدي تعالي ارتاحي شوية وعوفي الولد بحضني هو هذا مكانه الأصلي

درية زفرت بضيج بس ملامحها لانت سحبت الكرسي اللي كبالي وكعدت عيونها راحت على الأوراق والصور المشمرة على الميز صور بتول ذيج البنية اللي جانت مثل الوردة وذبلت بلحظة غامضة

درية :- بعدك ويه هاي البنية يا صيوان؟ يا عيني أنتَ وجهك غدى أصفر وعيونك غارن من السهر وهاي القضية راح تاكل من عافيتك أكثر مما تنطي حق لصاحبتها

:- درية هاي مو مجرد قضية هاي ذمة بتول من شفت أمها تبجي وتلطم حسيت نار بگلبي المرة تكول بنتي راحت لشغلها وهناك اعتدوا عليها بس التقرير الطبي بي إنّ اكو أثر سحب اكو خوف جان بعيونها مو مال مجرد نوبة قلبية

صمود حس بنبرة صوتي اتغيرت سكت وبقى يباوعلي كأنما الطفل بده يستوعب ثكل الكلام سحبت نفس غميچ وخرت صمود عن حضني بلطف كعدته على الكرسي الي صفي وانطيته قلم وورقة فارغة كلتله

:- هااك ارسم بابا ارسملي بيت وعصافير

التفتت لدرية وكلت بصوت ناصي

:- أمها يا درية أمها من سألتها جانت ترجف مو بس من الحزن لا جانت خايفة ما تريد حق بنتها يروح و احس المستشفى و التقرير يريد يدفن سر وي جثة البنت

- صيوان أنت تدري الدرب اللي ماشي بيه خطر هاي القضايا اللي بيها هيج تخلص بدم خاف على روحك خاف على صمود خاف علية

:- واللي يخاف على صمود وعليج ما يخاف على بنات الناس؟ ام بتول تكلي بنتها جانت تحلم تصير محامية جانت تريد تدافع عن المظلومين تالي هي تصير المظلومة اللي ماكو منو يدافع عنها؟ لو الكل يسكت جان الدنيا صارت غابة

كمت وكفت رحت للشباج جان الجو برا مغيم تذكرت كلام أمها من كالتلي

: بتول جانت تخاف من الليل تكول يمة أحس اكو عيون تلاحگني بالظلمة وتراقبني

رجعت للميز سحبت صورة لبتول جانت لابسة بيها صدرية ومبتسمة هاي الابتسامة جانت تكسر گلبي

صيوان :- تعرفين شنو اللي يحرك عقلي؟ التناقض بشهادات واحد يكول شافها بكذا وقت وواحد يكول شافها تمشي وحدها وتطلع من مكان شغلها وأمها تكول جانت بالشغل واحد منهم جذاب والكل جاي يتستر على الجاني وأمها الوحيدة الجاي تصرخ بأسم بنتها

درية :- زين وأبوها شو ما ذكرته؟

صيوان :- أبوها رجل ساكت سكوت مريب من حجيت وياه جان يباوع بالكاع ويهز برجله ما نزل دمعة وحدة بس كال هذا يومها الله كاتبه بس اللي يكتشف إن بنته مجتولة أو ميتة بحادث غامض ما يسكت هيج سكوت بارد إلا إذا جان هو شريك أو يعرف القاتل ويخاف منه

بهالأثناء صمود شخبط على الورقة بكل قوته وصاح

صمود :- باابا شوف نار!

باوعت للورقة جان مشخبط شخابيط عشوائية باللون الأحمر والأسود كلبي نغزني الصدف أحياناً تنطق بلسان الأطفال
درية كامت وباوعت لي بنظرة أخيرة قبل ما تطلع وهتفت وياي

درية :- صيواني العشا راح يجهز غسل وجهك وتعال اكل لگمة عوف الموتى هسة وفكر بالأحياء اللي كدامك أنتَ إذا ضعت إحنا نضيع وراك

طلعت درية وبقيت أنا وصمود بالمكتب سحبت الفايل وحطيته بالجرار وقفلته وباوعت لصمود شلته وحطيته على جتفي

صيوان :- امشي لك صمودي نمشي ناكل بس والله يا بتول وحق هذا الطفل البريء اللي بحضني إلا أطلع حقج لو جان القاتل ببطن الحوت

طلعت من الغرفة بس عقلي بقى هناك بين الأوراق وبين ذيج العيون اللي جانت تطلب نجدة من كبر مجهول

مرت الأيام وأنا مثل الغرگان اللي يلزم بگصبة بس هالبصيص من الأمل چان يگودني لـــ أماكن مظلمة ما چنت أتخيلها ليلة ورا ليلة وبحث ورا بحث اكتشفت إن الشغل اللي چانت بتول تشتغل بيه هو مجرد واجهة من برة كوفي بس من الداخل لعمليات غسيل أموال و ابتزاز سياسيين وتجار كبار

بالصدفة وبمساعدة صديق قديم يشتغل بمركز الاتصالات گدرت أحصل سجل مكالمات لرقم أبو بتول بالليلة اللي ماتت بيها الصدمة چانت إن أبوها استلم مكالمة من مدير الكوفي اللي تشتغل بيه بتول والمكالمة استمرت نص ساعة قبل ما يبلغون عن وفاتها

رجعت لبيت أبو بتول بس هالمرة ما رحت كـ ضابط رحت وأنا شايل بيدي حبل المشنقة لضميره لكيته كاعد بالحوش دخلت بعد ما ام بتول فتحت الباب و وكفت كدامة وهتفت وياه

صيوان :- أبو بتول شلونك؟

: الضابط صيوان جاينا بذات نفسة الله يستر خيرك

:- ماكو والله بس ذاك اليوم هيچ ابني صمود رسملة رسمة تعرف شنو هية؟

: شنو؟

:- رسم نار؟ سألته هاي شنو كال بابا هاي نار تاكل الجذابين أنت شتكول؟ النار راح تاكلك لو راح تبردها بكلمة حق؟

: يا صيوان شتريد مني؟ البنية ماتت واندفنت والحي أبقى من الميت

:- ولك يا حي؟ أنتَ ميت من يوم اللي بعت دم بنتك وقبضت الثمن المدير خابرك كالولك بنتك شافت أوراق ما لازم تشوفها واعتدينا عليهااا ومااتت وأنت اختاريت تسكت وتگبض الدية وهي حارة بتول ما ماتت بنوبة قلبية بتول انخنگت بدمها وبسكوتك

الرجال انهار وكع على ركبه وبدأ يشاغ مثل الطفل اعترف بكل شي اعترف إن المدير هددة بعائلته كلها وبنفس الوقت أغراه بمبلغ يسد عينه وهو من خوفه وطمعه غطى على الجريمة ووقع على التقرير المزور

الحقيقـة المُرة بفضل اعتراف الأب گدرت أحصل أمر قبض على مدير الكوفي وثنين من حمايته طلعت القوة وداهمنا المكان جانت لحظة ما تتوصف وأنا أشوف الوحوش اللي لابسين قاطات وهم ينهانون بالكلبشات

رجعت للبيت جان الفجر بادي يطر دخلت لغرفتي لكيت درية نايمة و الأمير عباس نايم بصفها فاتح إيديه ومطمن رحت للمكتب طلعت صورة بتول من الجرار باوعت لابتسامتها وحسيت لأول مرة إن عيونها بردت

نمت ذيج الليلة نومة ما ضايگها من سنين حلمت ببتول تضحك وماكو خوف بعيونها من فزيت لكيت صمود كاعد فوك راسي يضحك ويلعب بشعري والأمير عباس مخلي راسة على صدري ونايم

غمضت عيوني حيل وأنا أشتم ريحة صمود والامير عباس ريحة البراءة اللي خلتني أتحمل كل هذا العفن اللي شفته بست راس صمود وشلت الأمير عباس من صدري خليته بحضن أمه طلعت للصالة الشمس بدت تفرش خيوطها والبيت هادئ بس من صوت العصافير برا

رحت للمكتب للمرة الأخيرة سحبت صورة بتول.. صارت حرة شگگت الصورة وحركتها بطرف الچداحة مو لأن أريد أنساها لا بس لأن بتول هسة مو بحاجة لملف ولا لصورة بجرار ضابط بتول هسة بمكان ما بي عيون تلاحكها بالظلمة
وكفت باوعت للسماء وكلت بنبرة مليانة راحة وقهر بنفس الوكت

:- ارتاحي يا بتول وحگ دموع أمج اليوم يالله گدرت أغمض جفني وأنا أدري بيج نمتي رغد الدنيا يا بنتي لو شكد ما تظلم يظل بيها خيط أبيض يشگ حلگ الظلمة وأبوچ؟ عوفيه لضميره وللنار اللي رسمها صمود تاليته يحترك بيها وحده هسة صار لازم أعيش للأحياء وأحرس أحلام صمود و الأمير عباس حتى لا يجي يوم ويصيرون صور بجرارات الضباط

نفضت رماد الصورة من إيدي ودخلت للبيت وسديت الباب بوجه ريح الفجر ورحت لغرفتي دخلت و اتمدد بصف درية أخيراً صيوان لكة خيط الفجر اللي يوصله لبر الأمان

صيوان :- درية اللي ينام ومظلمة الناس على جتافه يظل ميت وهو يتنفس اليوم بس صيوان كدر يباوع بالمراية ويگول عفية عليك سويتها

وبعد ما كعدوا ونزلوا اولادي يلعبون وعلى اساس انا انزل للدوام لبست بدلتي العسكرية وكلشي

وكفت كدام المراية عدّلت ياختي ونزعت رتبتي العسكرية بهدوء حطها على الميز وبصفها المسدس باوعت لوجهي التجاعيد اللي رسمتها قضية بتول بدت أخف بس تعب السنين لهسة مطبوع جوه عيوني نزلت وكفت على الدرج وشفت صمود والامير عباس وهمه يركضون بالهول وصوت ضحك درية يملي البيت وصرت اهذري وي نفسي

:- كافي يا صيوان لهنا وحللت خبزتك هاي الرتبة شالتني وشلتها حمتني وتعبتني بس الكاع هسة أولى بية الكاع ما تجذب ولا تلبس وجوه مستعارة ولا تضم سر يموت أهله وراه الكاع تنطي على كد العرك وتصفي النية ويه الماي
أبويه جان يگول يا أبني اللي يزرع ورد يشم عطره واللي يزرع حق يحصد راحة باله وأنا اليوم زرعت حق بتول وحصدت نومة ليل المظلومين هسة صار لازم أرجع لذيج الطينة أغسل ايدي من حبر التحقيقات ودم القضايا وأمليها بتراب البستان صمود والأمير عباس يحتاجون أبو يشمون بيه ريحة الهيل والنعناع مو ريحة الرصاص والملفات المعفنة

طلعت للحوش الجو جان ريحة فجر وندى باوعت للنخل الواگف بشموخ حسيت بيه يحاجيني يگلي هلا بيك يابن الطينة رجعت لأصلك

واني ساكت رجعت دخلت لفوك وصعدت للغرفة نزعت الحذاء العسكري الثجيلة ولبست دشداشتي حسيت بجسمي خف كأنما جنت شايل جبل ونزاح عن صدري

وبعد ما غيرت هندامي نزلت ومشيت لوسط البستان وصوت صمود والأمير عباس وراية يركضون ويضحكون ودرية واگفة بالباب تعاينلي بفرحة غسلت كل همومي دنگت على الكاع لزمت التراب وگلت بگلبي

:- يا كاعنا الطيبـة جيتج غريب وتاهت خطواته بالمدن والظلم جيتج وبيدي تعب السنين وحوبة المظلومين شغلة الضابط خذت مني عافيتي وشوفتني وجوه للناس چنت أتمنى ما أشوفها بس كافي إني طلعت منها وذمتي بيضة مثل شيبات أبوية

التفتت للصغار رحت وشلت صمود وصحت لدرية

:- يا أم صمود اليوم صيوان نزع جِلد الضابط ولبس جِلد الفلاح اليوم راح أتعلم لغة الزرع وأنسى لغة القتل بتول هسة نامت وأنا هسة يالله گدرت أصحى
ذبيت بدلة الضابط وشمرت الرتبة بجرار الوكت ومطرت الدنيا بوجهي غسلت تعب السنين هسة يالله صرت فلاح بصدر ديوان أزرع شتلة وأحرس نخلة وأنام ورآسي مو على مخدة رآسي على چتف الراحة يا بتول النار اللي رسمها صمود أكلت الجاني وهسة النار اللي بگلبي صارت رماد وذراها الهوى بفيّ البستان

أخذت تليفوني حتى أتصل واكول ألهم على قراري الجان مفاجأة حتى الي هيج فجأة قررت هيج قرار بست صمود براسة ونزلتة من حضني ركض يلعب وي الأمير عباس
وانا اخذت اكلب بقائمة الاسماء الاتصال وبراسي يكول

انطوت صفحة المكاتب المظلمة وانفتحت صفحة البستان الخضرة عفت الرتب لأهلها وأخذت راحة بالي لعيالي يا درية اللي يحرث كاعة ما يحتاج قانون يحميه كاعة هي دولته وسنده وداعاً يا زمن الدم وهلا بيك يا زمن الحصاد هسة يالله صار للعيشة طعم وهسة يالله گدرت أگول لصيوان

: عفية عليك.. صرت حر

﹉﹉﹉﹉﹉﹉﹉﹉﹉﹉﹉﹉﹉﹉﹉
"""" علي الرضا """"

طلع الصبح عفت الولد كلهم نايمين بالبراني واحد بحضن الثاني ودخلت للبيت من صبح ربي غيرت هندامي ونزلت طلعت من البيت صعدت سيارتي وطلعت بوجهي للنجف الأشرف للمكبرة دخلت الها أمشي على حيلي بس يا حيل؟

وصلت لكبر اخوي توأمي علي الهادي وكفت يمة وحضنت كبرة وهتفت وياه

:- ها يا هدهدي نمت ورغدت؟ ولك هيج تتركني وحدي بنص هاي الهوسة؟ تدري الصبح من طلع وشفت مكانك خالي حسيت روحي هي اللي اندفنت وياك مو جسمك الولد نايمين واحد بحضن الثاني بالبراني يكسرون الخاطر بس تدري شنو جان ناقصهم؟ جان ناقصهم طولك وهيبتك التلمنا كلنا جيتك والوجع بگلبي ماله والي جيتك أريد اشم ريحتك بهذا التراب بلكي يبرد شوية من ناري يكولون التوأم روح وحدة بجسمين زين أنتَ رحت ليش روحي ضلت معلكة لا هي صاعدة لربها ولا هي كادرة تعيش بدونك؟ يا خوية الدنيا عگبك صارت بعيني ضيچة والبيت الما بي صوتك ما يتسمى بيت جيت أحجيلك لأن أدري بيك تسمعني وأدري بيك تحس بكسرة ظهري اللي ما حد يحس بيها غيرك

أبتعدت عن گبر أخوي وزحفت لكبر أبوي حطيت رأسي على كبرة هو جان أكبر عزوة الي جان واكثر إنسان أحبة وما طلع من لساني على كبرة بس .. قصيدة ...

علي الرضا :-

بابا بابا.. بابا بابا
بالخرابة نيموني.. إضلوعي بردت يا غطاي
ياهو اليگلي تعاي.. عگبك أنتَ

فك ايديك وكلي بابا لية لية بكل دفو
بابا الولد خطية من يضل بلا أبو
فكلي حضنك يالحنين ومثل حضنك وين أكو ؟
بابا صار الليل وينك وانا أخاف من الهدوء

فكلي عينك ... يالونينك
طر دليلي ... طر دليلي
الچلمة منك چنها ماي وياهو اليكلي تعال
عگبك أنتَ ... عگبك أنتَ

بابا لو فگيت عينك لا تكلي شهل أثر
ولا تكلي شبيها عينك زركة ودموعك مطر
لان مااكدر اكلك بعد ياخد انسطر
وفز على صوت الحنين وبابا كلي من النحر

بابا شو ذبلان اشوفك يالچنت جنك صبح؟
اضحكلي بابا انا العزيز يالضحكتك ما تصح
بابا شو طالت السكتة والسكوت اعظم جرح

وانطيت ظهري للكبر وانتجيت عليه وحطيت راسي أبين رجلية وبديت ابجي
وضليت ابجي لحد ما حسّيت روححي طگت وحاولت اتأقلم واكول قدر الله وكلنا على هذا الدرب
بس كسرتي بأابوي اكبر من كسرتي بـ علي الهادي أبوي دگ بالعظم صرت اسولف وي روححي وانا اباوع للسماء

- كلشي خلص من يوم موتاكم خلص كلشي خلص كلشي فراك عيونكم عمة عيوني وهد حيلي بوياااي بوية

غمضت عيوني والحسرة تأكل بصدري الهوا بالنجف رغم عذوبته بس أحسه يمر بمريئي مثل الشوك رفعت راسي للسماء وشفت الطيور تحوم گلت بگلبي

: هنيالجن تروحن وترجعن لعشجن وأنا عشي اتهدم وراحوا أهله

گمت من مكاني بـثگل نفضت التراب عن هدومي بس يا تراب الينفض وجع الروح؟ باوعت لگبر أبوي النوب الـگبر علي الهادي وگلت بصوت مخنوگ

- بوية علي الهادي أنا رايح بس عايف روحي يمكم راح أرجع لبيتكم بس شلون راح أگدر أفتح الباب وما أسمع الله يساعدك من حلگك يا بوية؟ شلون راح أصد بوجوه الولد وما أشوف عيونك بيهم يا علي الهادي ؟ أنا رايح لضيم الدنيا رايح أصير صغير العائلة وأنا أصغركم جرح راح أحاول ألملم الباقي من عندي بس يا هو اليلملمني أنا؟ يا هو اليفك زرار گلبي الضيگ؟ وداعة الله يا ريحة الهيل وداعة الله يا سندي الما يميل راح أمشي بس خطوة لجدام وعشر خطوات لورا عيوني ما تقبل تفارگ ترابكم اتهنوا بنومتكم وادعولي ادعولي لأن علي الرضا صار غريب وهو بنص أهله

مشيت وأنا أجر بجدامي جر ألتفت كل شوية أحس طيوفهم تمشي وراي لحد ما وصلت لقبور مؤمل الصدر و تحرير وغمضت عيني حيل ردت أحبس الدمعة بس هي جانت أسرع مني نزلت تحفر بخدي وتگول

- ضاع العز يا علي الرضا ضاع العز

رجعت وكعدت يم قبورهم وخليت راسي برجلية وبديت ابجي وما رفعت عيني الا لمن حسيت أيد انحطت على متني رفعت راسي ولكيت أبنية كدامي لابسة عباية سودة وعيني صدت لرجليها جانت أطراف العباية بيه طين هواي رفعت راسي الها أبتسمت الي ومدت أيدها انطتني بطل ماي وهتفت

:- هاك خوية أشرب الماي واذكرهم وأقرأ لهم الفاتحة الدموع للميت ما تفيد

- مشكورة

أخذت الماي من أيدها ومسحت ادموعي وهتفت وياي

:- الشهيد مؤمل الصدر و المرحوم تحرير شنو يصيرون الك؟

رفعت حاجبي الها شلون تعرفهم وجاوبتها

- أولاد عمي

:- اهاا الله يرحمهم ويصبر كلبك

- بس منين تعرفينهم؟

:- الله يرحمهم انا قبر ابوي و امي قريب منا وهي المساحة الكم مرة من المرات رجال طلب مني أغسل قبورهم لان انا كليوم اجي اغسل قبر امي و ابوي

- منو الطلب منج؟

:- والله ما اعرفة شفتة نايم هنا واني كعدتة ما اتذكر ملامحة ولا حتى صوتة

- قبل شكد هاي السالفة؟

:- تقريباً قبل 6 سنوات او أكثر

- اظن لو البشير قيصر لو ألفاروق الأعظم

:- ما اعرف المهم هو طلب مني وانا كد وعدي ولحد الان اغسل واجيت هسة علمود اغسلهن

- رحم الله موتاچ

:- وموتاك باع خوية لا تبجي هنا ذاك ضريح ابو تُراب هنا أهل التراب الدموع ما يردونها تأذيهم

- ان شاءالله

:- الله وياك

عافتني البنية وراحت وانا فتحت البطل مال الماي شربت منه وغسلت وجهي وكمت على رجلية طلعت من المكبرة ورحت لضريح الإمام علي ( علية السلام )

دخلت للصحن الشريف والوجع بضلوعي جنه جمر ما يطفي وكفت بالباب نزعت حزني قبل لا أنزع قندرتي بس يا حزن الينزع؟هو صار جلد وعظم باوعت للكبة شفتها تلمع ضوة على عيوني المشتهاية شوفة أهلها رفعت أيدي ورجفة بصابيعي وكلت بصوت مخنوك

- جيتك يا علي يا بو الحسنين جيتك وأنا ظهري مكسور كسرة ما تنجبر جيتك غريب واليوم عرفت شنو معنى يا غريب اذكر غريبك علي الهادي راح يا بو تراب عافني بنص الدرب وأبوي أخ يا أبوي هذا الجان خيمتنا طاحت الخيمة والمطر كطع جلودنا

مشيت بين الزوار الناس تندفع وأنا جني ريشة بوسط ريح وصلت للضريح شمرت روحي عليه لزمت الشباچ بقوة جني غركان وجلب بحبل نجاة شميت ريحة الحضرة حسيت برودة سرت بصدري بس الكلب بعده يغلي

- يا علي أنت أبو اليتامة وأنا اليوم يتيم الأبو ويتيم الأخ باوع لحالي شوف علي الرضا شصار بحاله صرت جسد بلا روح أمشي وأسولف وي خيالي ياهو اليلمنا يا علي؟ ياهو اليصبرنا ؟

كعدت بصف الضريح لفيت راسي بالجراوية وعصرت عيوني بدت الصور تمر كبالي مثل شريط أسود شفت وجه علي الهادي وهو يضحك شفت أبوي وهو يعدل عكاله شفت مؤمل الصدر و تحرير وشفت المصطفى القاسم وهم يركضون بذاكرتي كل غالي راح ترك بصمة وجع بوسط كلبي

- يا بو تراب البنية بالمكبرة تكول الدموع ما يردونها بس شيسوي اللي عينه صارت هي السبيل الوحيد لراحة روحه؟ شيسوي اللي كلما يغمض يشوف وجوهم؟ أنا اليوم ما جاي أندب حظي أنا جاي أريد منك القوة أريد صبرك يا علي صبرك على فقد الزهرة صبرك على غدر الزمان

بقيت كاعد ساعة ساعتين ما أدري بالوكت المذن أذن وصوت الله أكبر هز كياني تذكرت صلاة أبوي تذكرت وضوء علي الهادي من جان يترس البيت طمأنينة كمت توضيت بمي بارد حسيت المي يغسل مو بس وجهي يغسل اليأس العشش بروحي صليت وبكل سجدة جنت أكول

يا ربي أمانتك هم عندك وأنا هنا صبرني على فراگهم

طلعت من الصحن الوكت صار عصر الشمس بدت تميل للمغيب والسماء انصبغت بلون الوداع ركبت سيارتي لزمت الستيرن وباعوت للمراية شفت عيوني شفت بيها لمعة حزن بس وياها لمحة إصرار

- راح أرجع راح أرجع للبيت الما بيه ريحتهم

حركت السيارة والنجف بدت تصغر وراي بس گلورهم بقت محفورة بوسط عيني وأنا بالطريق جان الراديو يقرأ قرآن وصوت القارئ يرتل وبشر الصابرين نزلت دمعة أخيرة مسحتها بظاهر أيدي وكلت

- وداعة الله يا أهل المكبرة وداعة الله يا غوالي علي الرضا اليوم مات ولد من جديد علي الرضا السند راح أروح وأفتح باب البيت ولو ما سمعت الله يساعدك بلسان أبوي راح أسمعها بگلبي وبلسان علي الباقر ولو ما شفت عيون علي الهادي راح أشوفها بكل زاوية وبكل وجه من الولد و بوجه حيدرة

وصلت لباب البيت الوكت ليل نزلت وكفت كبال الباب حطيت أيدي على القفل ترددت لحظة تذكرت الضحكة الجانت تملي المكان أخذت نفس عميق فتحت الباب ودخلت البيت جان هدوء بس هدوء يكتل بدون ما اندار لأحد صعدت گُبل لغرفتي دخلت وسديت على نفسي الباب

- يا دنيا شكد ما تاخذين يبقى الإيمان بالله وبـ أهل البيت هو الذخيرة راح نعيش وراح نبني وراح نخلي ذكراهم يظل يفوح مثل ريحة المسك بكل ركن من هذا البيت

﹉﹉﹉﹉﹉﹉﹉﹉﹉﹉﹉﹉﹉﹉﹉
"""" علي الباقر """"

خليت مَنّوشة عند العلوية وطلعت الساعة 9الصبح بعد ما وصلت غدير الله للجامعة ورجعت للبيت هم رديت وطلعت من البيت وانا بالطريق دزيت رسالة لــ شُبيِرْ
ورحت لجامعة غديرتي وبقيت هُناك انتضرها وبعد ما كملت محاضرتها الأولى وطلعت للكفتريا لكتني موجود منتضرها ضحكت الي واجتني نفس الفراشة الطايرة وكعدت يمي كمت وجبت الها گهوة وكعدت

غدير الله :- عاشتت ايدك افتر رأسي ..

علي الباقر :- شلون لبيتي؟

- اممم زوينة الحمدالله

:- ليش طلبتي مني اضل هنا يمچ صاير شيء خايفة من شيء؟

- اممم لاااا بس تعرف ماعندي أحد هنا واضل لوحدي وأنتَ فارغ ماعندك شيء لهذا كلت تقضي الوقت وياي

:- جنچ على هاي

- بعد روححي

:- غديرتي

- نضر عيوني

:- أسأل سؤالي

- الله يستر

:- ههههههه ليش الله يستر شنو مسوي

- أنتَ ما بالعادة تكول اسال متعودة عليك گبل تدخل بالموضوع وهيچ يعني أول مرة تكلي أسأل سؤال

:- لا حبيت هسة هيج أسألج عادي؟

- اكييد عادي كول يروحي؟

:- اكو شيء مخوفچ اخيچ واعرفنج من عويناتج

- أنمار

:- شبي؟

- ذاك اليوم اجاني وطلعت وياه

ما سيطرت على نفسي وضربت على الطبلة وهتفت بنتر حيلل

:- صدددك تحجين أنتِ ؟؟؟؟

خنگت نفسها غدير الله وغمضت عيونها وانا حطيت راسي على ايدي على الطبلة ورفعت راسي وبيدي عدلت شعري ونزلت بيدي مشيتها على لحيتي وهتفت وياها بصوت اهدا بعد ما لعنت الشيطان وصليت على النبي

:- اللهم صلِّ على محمد وآل بيت محمد اسسف ااسيفف

- رايحة للمحاضرة انا

:- بنتي اوكفي وعلي آسف ماقصدي أرفع صوتي عليچ تعاي حبيبتي اكعدي وهاچ اشربي ماي واحجيلي بهدوء شلون اجاج وشلون طلعتي وياه وليش محد يعرف شلون وثقتي بيه وطلعتي بس كليلي شلون وثقتي بيه؟؟

- مااكدرت باقري ماكدرت

:- شنو الماكدرتي علية غيمةةة ؟؟

- تعبني

:- تعاي نطلع هلشيء ما ينحجي بيه هنية تعاي كوميلي

أخذت بأيد غدير الله وشلت الجنطة عنها وطلعت وياها كعدنا بالسيارة وهتفت وياها

:- هسة أحجي

- شوف من يوم الي طلع بيه وانا أحس اكو احد يراقبنيي

:- زين

- ايي فاا بذاك اليوم أتواصل وياي وكالي انا براس شارع المجمع اطلعيلي اريد احجي وياج

:- خوية ليش اجذب عليك انا لهسة مرتة وماكدرت اوكف روحي الراحت وي صوتة طلعت له بدون ما أحس ومشيت وانا عمية وصعدت وياه وصار يحجي وياي

- أذاج؟

:- أيييي آذاني ححيلل آذاني

هنا غدير الله بدت تبجي ما استحملت اخذت براسها ودفنتة بصدري وهتفت وياها واني أحاول اسكتها

:- غديرتي أنسي ابوس ايدج انسي يابعد روحي روح أخيج لا تتعبيني باوعيلي ابوس العيون المدمعة وحگ علي ادفع عمري وماريد أشوف عيونج هيچ مغوركة بالدموع أبوي ابوسج انا وابوس راسج مو أنتِ التضعفين وتبجين خلي يروح كافي صفحة وانطوت بحياتج وأنتِ بعدچ كتكوتة مالتي هااا وتوج مرحلة ثانية تتخرجين وتشتغلين اذا تردين وكلشي تسوين وانا وياج وبظهرج شتردين تشلعين عيوني وتاخذيهن

سحبت نفس طويل أحس بريتي اشتعلت نار وأنا أسمعها تكول آذاني لزمت ايدها بين اديه عصرتها بلكي أحسسها بالأمان اللي فقدته بذاك اليوم المشؤوم نزلت راسي لمستوى راسها وحجيت بصوت هادئ صوت الأبو اللي يلملم شتات بنته

:- غديرتي يبعد حيلي وكل هلي باوعي بعيوني أنمار مو بس آذاج أنتِ أنمار ذبحنا كلنا بوجعج بس كليلي لشوكت نضل واكفين يم جنازة الماضي ونبجي؟ لشوكت نضل نطي حطب لناره حتى يحركنا أزيد؟

مسحت دمعة نزلت على خدها وكملت كلامي

:- غيمة أنتِ شفتي بعينج شفتي شلون خسرنا أغلى ما نملك أبوج اللي جان جبل انهد حيله بسببه أخوانج اللي جانوا مثل الورد ذبلوا وراحوا بلمحة بصر وأريج أريج اللي طعنها بشرفها لولا ستر الله ورحمته جان هسة هي جوة التراب بسببه كلنا انطعنا يا غديرتي كلنا خسرنا قطعة من روحنا أنتِ خسرتي طفلج وأنا خسرت راحة بالي وأنا أشوفج بهالحال

لزمت وجها بيديه الاثنين وخليت كصتي على كصتها

:- بس اسمعيني يا بعد أخيج إحنا ولد عبد الحسن إحنا ما ننهزم إذا هو وأبو رادو يكسروننا لازم نثبت الهم إن إحنا أقوى من غدرهم أنتِ هسة أملنا الوحيد أنتِ اللي راح ترفعين اسم أبوج وتكولين أنا نجحت رغم الوجع لا تخلين هالأسود يطغى على بياض گلبج تخطيه يا غديرتي تخطيه لجل عيون علي الهادي لجل أريج الله ولجلي أنا اللي مالي غيركم بهالدنيا

غدير الله بدت تنفث حسراتها وشفتها ترجف وهتفت وياي

- باقري أحس روحي فارغة أحس كلشي ضاع مني

:- ما ضاع شي ومحمد كلشي يتعوض إلا ضحكتج هذي صيري قوية صيري غدير الله اللي ما تكسرها العواصف روحي هسة روحي لمحاضرتج ارفعي راسج لا تخلين واحد يشوف انكسارج صيري جبل مثل أبوج وأنا أنا هنا ما أتحرك خطوة كاعد بالسيارة أنتظرج تخلصين ونرجع للبيت سوة ونضحك بوجه العلوية ولا كأن شي صار

هزت راسها بالموافقة وهي تمسح عيونها بقوة نزلت من السيارة شفتها عدلت عبايتها وشالت جنطتها ومشت بخطوات ثگيلةة بقيت أراقبها بظلها لحد ما اختفت ورا باب الكلية

رجعت ظهري على الكشن وغمضت عيوني الدنيا جانت تدور بية شبعت قهر طلعت سبحتي من جيبي وبديت أفر بيها بيدي الترچف وصحت وي نفسي

:- يا ربي انطيها الصبر يا ربي لا تحملها فوك طاقتها طفلة وشافت كل هالضيم شلون راح تكمل؟

نزلت الجام شوية أريد هوى الله يچيس وجهي المحترك من الغيض الساعة جانت تمشي على گيف كل دقيقة تمر أتخيل أنمار كبالي وأريد أشرب من دمه بس أرجع وأتذكر وعدي لغدير الله لازم أكون سندها مو همها الجديد شبكت ايدي ورا راسي وبقيت اباوع لباب الجامعة الشمس بدت تغيب ورة الغيوم والحرارة بدت تقل برد قاتل بس أنا جنت مقرر ما أتحرك لو تخلص المحاضرات كلهن لو يخلص اليوم كله أضل منتظر غيمة تطلع حتى أحسسها إن اكو حايط صلب وراها ما ينهد مهما جار الزمان

:- اخلصي محاضرتج يابعد أخيج اخلصي وتعالي ترى مالي غيرج حزام ظهر بهالدنيا الملحوظة

بقيت بمكاني عين على الباب وعين على ذكرياتنا المرة أنتظر جية الفرج بطلعة أختي من ذيج البوابة

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" طَيبة الزهراء """"

جانت منة المنان عندي وجنت شايلتها وافتر بيها لان جانت تبجي وما راضية تسكت واني حاضنتها واحجي وياها

:- كااافي يمة شبيج انكرصتي امييي مَنّوشااتي اني امچ يروحي شبيج حبيبتي وياي ليش ما تسكتين سويتتت الج كلشي شترديني بعد اسوي؟؟ لج كااافي اسكتييي يااالله

بهذا الأثناء دخل علي الصادق للغرفة وكف يمي وحط ايدة على راس منة المنان وحاول يحجي وياها

- شبيها مَنّوشة ؟

:- ماادرريي ماضل شيء ما سويتة الها وبعدهي تبجي

- رضعتيها؟

:- كللشي سويتت صادق كلشي منتضرتك تكلي رضيعهااا يعني مو جوعانة هاي تحط الممة بحلكها تشمرها

- چا شبيها؟

:- لو اعرف تشوفني هيج محتارة وياها؟؟

- شوو انطينياها

شال منة المنان من ايدي وأخذها لحضنة وصار يهز بيها حتى بلگي الله تسكت وتهيد صوتها راح من كد النواح

- كافي حبيبتي شبيج شنو تردين هااا باباتي؟ مَنّوش گلبي عزيزة ابوچ أنتِ طفلتي بچري ولج باوعيلي باوعي لابوج يروحيي باوعيلي ياحيلي ياصغيرتي اميرتي بنيتي ومدللتي

:- مايفيد صداقي مايفيد حجيت وياها لمن طگ راسي وبعدهي تبجي

- وشلون يعني تظل البنية هيچ تبجي ؟

:- انطيني خلي أشوف بلگي اجه علي الباقر بس يمة تهيد

- هسة علي الباقر شنهي بنتي لو بنته

:- ياالله هاك سكتها ما تكدر وهي بس تشم عطرة تسكت

- وليش الصوچ بيمن بهي النقطة ؟

:- علي الصادق اذا تريد تحجي على إهمال منة المنان فا انت تصير على رأس القائمة انااا صغيرة على أصير ام وانت جبرتني اخلفها الك وهي شامرها على اهلك لك لا كدرت تصير رجال ولا كدرت تصير اب

- والصوچ بيمن منو الخلاني أكره حتى نفسي؟

:- انطيني منة المنان أروح أشوف علي الباقر بنتي راح تموت بالبجي

أخذت منة المنان وطلعت من الغرفه حطيت الحجاب على راسي وشفت غرفة علي الباقر مفتوح الباب مالتها والضوة طالع منها عرفت هو موجود بيها رحت وكفت بالباب لكيتة جاي يصلي بقيت واكفة بمكاني واني انضر إله ولمن خلص تسبيح وأخذ القرآن راد يقرأ اندار الي وشافني باس القرآن وردة لمكانة وكام ولف السجادة واجه يمي وبسرعة منة المنان اندارت ومدت أيديها إله واخذها مني وشالها وضحكتهاا شكت حلگها خنگتني العبرة شلون بنتي بحضني وبحضن أبوها ما سكتت وشلون صار مزاجها بس شمت عطر عمها
بقيت واكفة بالباب عيوني غاركة بالدموع وأني أشوف منة المنان شلون تضحك وتناغي بين إيدين علي الباقر كأنما جانت بغير عالم وجت لهذا العالم بس من شمت عطره غصة بگلبي وكفت مو حسد والله بس قهر على حالي وعلى هالبنية اللي مالگت أمانها بحضن أبوها ومالگته بحضني وأني أمها ومذلولة عليها

علي الباقر باوعلي بنظرة كلها حنية وعتب كال وهو يهز بيها ويبتسم

- ها طيبات شو مَنّوشة جانت تعزف سيمفونية بجي وهسة صارت تغرد؟

:- ما أدري والله ما أدري تعبتني وتعبت وياها علي الصادق جوة يلوم بية ويكول صوچج وهو أصلاً ما يعرف حتى شلون يلزمها عدل بس شمّت عطرك سكتت يمكن تدري بيك أحن عليها من أبوها

دنّگ راسه وباسها من كصتها ورد رفع راسة الي وكال

- لا تكولين هيج علي الصادق يحبها بس هو طبعه جلف ما يعرف يعبر والجاهل يحس طيبات يحس بالكلب المكسور والبال المشغول ومنة المنان تحس بيج مكسورة

جنت أريد أحجي أريد أفرغ القهر اللي بصدري بس فجأة سمعت صوت خطوات وراي التفتت ولگيت علي الصادق واكف بباب الغرفة عيونه تجدح نار وهو يشوف بنته تضحك بحضن أخوه وهو اللي عجز يسكتها صاح بصوت مكتوم بس حدّي

علي الصادق :- هااا كملت المسرحية سكتت الأميرة بحضن عمها؟

- خوية البنية طفلة شبيها أعصابك؟ المهم سكتت ونامت

تقدم علي الصادق وسحبها من حضن أخوه بقسوة خلت البنية تفز وترجع تبجي من جديد لزمت إيده وكلتله وأني أرجف

:- عوفهاااا ماا صدكت سكتت ليش هيج تسوي؟ تريد تموتها من البجي بس حتى تثبت إنك أبوها؟

دفعني وباوعلي بنظرة استهزاء وكال

- أني أبوها وغصباً عليج وعلى الكل وأنتِ يلا امشي كدامي للغرفة لو عجبج الكعدة هنا يم علي الباقر؟

حجايته جانت مثل السجين بگلبي باوعت لعلي الباقر اللي نزّل راسه بأسة وما حب يدخل بمشكلة أكبر سحبت منة المنان اللي رجعت تصرخ من علي الصادق ومشيت وأني أحس روحي جاي تطلع دخلت لغرفتي كعدت على الجرباية وحضنتها حيل وصرت أبجي وياها بصوت عالي

:- يا يمة منة المنان ذنبج وذنب أمج برگبة الما عرفوا يصونون الأمانة اششش كاافي فدووة كااافييي

دخل علي الصادق وقفل الباب وصار يصيح عليه

- هاي عود شنو تسميها شهل استهتااار هذاا طيبات شوكت تردين تحترمين نفسچ حتى تخليني أحترمچ لج كاافييي اعقليها أنتِ مرتي اليي مرت علي الصادق اسمعييي عدل الصادق مو الباقر لج كاافي

:- ترى هذا بس مرض براسك ماكو اي شيء من تخيلاتك علي الصادق اني نسيت أخوك من يوم لبست الأبيض الك ليش ما أنتَ تريد ترحمني وتصدك انا نسيت أخوك وتخلينا نبدي حياة جديدة سوة وي بنتنا

- لا صدك نسيتي؟ وأنتِ مخلية بنتج بحضنة ويتامل بيها لأن من عطرج لج ولا طفل من أطفال السادة هيج قريب على علي الباقر بس منة المنان شمعنىى بنت علي الصادق؟

:- ترى أنتَ هسة جاي تطعن بيه

- واطعن واطعن طيبات هاااي الحقيقة لا تنزلين دمعتين وتتمسكنين هاي الحقيقة أنتِ تنامين بحضني بس كلبج وعقلج وروحچ وكلشي بيچ يم علي الباقر احلفي ما تجي عليج ساعات وانا قريب منج تتخيليني علي الباقر؟؟ لو تتمنين هو الي بمكاني احلفييي

وكفت والدموع تحرك خدودي الكلمات اللي نطقها علي الصادق جانت مثل الخناجر المسمومة اللي تطعن بشرفي وبمشاعري منة المنان بصفي تصرخ وصوتهَ هو يعلى بالبجي الدنيا دارت بيه شلون يجرأ يشكك بية؟ شلون يگدر يلوث طهارتي بظنونه المريضة وهو يعرف كلش زين شنو ضحيت و صرت إله؟ حسيت بركان بصدري راد ينفجر مديت إيدي ومسحت دموعي ورفعت راسي وعيوني بعيونه اللي تطلع نار احسهن هتفت وياه

:- لك كاااافي كافي تذبح بيه بكل كلمة شنو ذنبي إذا كلبك مليان غل؟ شنو ذنبي إذا أنتَ عجزت تخليني أحبك مثل ما هو خلاني أحترمه؟ علي الباقر ما يوم باوعلي بنظرة مو زينة ولا يوم تجاوز حدوده بس أنتَ أنتَ اللي جاي تهدم بيتنا بيدك ترى بهذا شكك وهذا تفكيرك المسموم جاي تهدم بيتنا

علي الصادق تقدم مني ووجهه صار أحمر وعروگ ركبته برزت صاح بصوت

- لا تجيبين اسمه على لسانج لا تمدحينه كدامي تدرين ليش منة المنان تسكت بحضنه؟ لأنها تشم بيج ريحة اللهفة إله تشم بيج الخيانة اللي بداخلج

هنا فقدت أعصابي نسيت الخوف نسيت إني صغيرة ومالي ظهر صرخت بوجهه

:- إي وأنتَ تعرف ليش بنتك تروحله؟ لأن هو رجال يعرف معنى الحنية لأن هو ما يظلم لأن هو ساند الكل وأنتَ بس فالح تكسر بية لو جان هو اللي بمكانك جان ما خلى بنته تصرخ وجان ما ذل أمها أنتَ تغار منه حتى بصلاته تغار منه لأن الكل يحبه وأنتَ حتى بنتك تنفر منك

علي الصادق جمد بمكانه لحظة الصدمة خلت عيونه تتوسع وبعدها تحولت لصيحة وحش مجروح مد إيده وبكل قوته ضربني راجدي لطمة خلتني أطير وأوكع على طرف الجرباية أذني صارت توش والدنيا غوشت بعيني منة المنان صرخت صرخة شگت صدري صوت بجيها صار هستيري طفلة وحست بأمها تأذت ما اكتفى بهذا كام و هجم عليه وسحبني من شعري وهو يصيح

- تتقارنيني بـ علي الباقر تگولين عليه مو رجال اليوم والله ما تطلع شمس عليچ اليوم أدفنج وأدفن ذكراه وياج

بديت أتوسل بيه مو علمودي علمود البنية اللي راحت من البجي

:- صادق فدوة البنية راح تموت عوفني وخر اشوف بنتي البنية راح يوكف كلبها!

- خليها تموت وأنتِ وراها

صار يضرب بية بكل مكان ضربات عشوائية وقاسية وأنا أحاول أحمي راسي وأحمي منة المنان اللي صارت تزحف وتصرخ بصفنا الغرفة صارت عبارة عن جحيم صوت ضرب وصياح ونحيب الطفلة اللي ملى البيت كله

فجأة سمعنا صوت ضرب على الباب وصوت علي الباقر جان يرعد من ورة الباب

علي الباقر :- علي الصادق افتح الباب لك افتحه لا أكسره على راسك شجاي تسوي بالبنية؟ شجاي تسوي بمرتك؟

علي الصادق فقد السيطرة تماماً سحبني من هدومي وشمرني بالحايط وهو يصيح للباب

- مالك غرض مرتي وأدبها لا تدخل علي الباقر لا تخليني أرتكب جريمة هسة

منة المنان صوتها انقطع من كثر النواح صارت تطلع صوت مثل الشهكة خفت عليها خفت تروح من إيدي رحت زحف لجهة منة المنان وأنا أصرخ بصوت مبحوح

:- علييي علي الباقر ساعدني بنتي راحح تموت فدوة اكسر الباب

ما مرت ثواني إلا وصوت خشبات الباب وهن يتكسرن ويتحطمن تحت ضربات علي الباقر انفتح الباب بقوة خلت علي الصادق يرجع ليورة دخل علي الباقر وجهه جان يفيض غضب بس أول ما شافني وشاف منظر منة المنان عيونه انملت قهر شافني واكعة بالگاع وجهي منفوخ وشعري مخربط وهدومي مشگگة ومنة المنان وجهها صار أزرق من البجي والشهكات علي الباقر تقدم بخطوات سريعة علي الصادق راد يوكف بوجهه وهتف وياه

- اطلع برة علي هاي غرفتي وهاي مرتي!

علي الباقر ما حجة ولا كلمة بس دفعه علي الصادق دفعة وحدة خلاه يضرب بالدولاب وراح مباشرة لمنة المنان شالها بحذر وحنان ورفعها لصدره البنية أول ما حست بي جلبت بقميصه وصارت تشهك بقوة وتطلع أصوات تگطع الگلب اندار علي الباقر لأخوه ونظرته جانت تكسر الصخر وهتف وياه

علي الباقر :- أنتَ مو بشر أنتَ وحش طفلة مثل الوردة تسوي بيها هيج ومرة أمانة عندك تمد إيدك عليها ولك علي الصادق هي هاي المرجلة عندك ؟

علي الصادق صاح وهو يلهث تعب من الضرب بيه

- لا تتدخل هاي بنتي وأنا حر بيها وهاي مرتي

علي الباقر تقرب منه وهو شايل البنية وصار وجهه بوجه أخوه

علي الباقر :- منة المنان من اليوم ما تبقى عندك لحظة لحد ما تصحى على نفسك وتصير آدمي البنية راح تروح من إيدك بسبب خبالك وشكك والمرأة اللي تحجي عليها هاي أشرف من الشرف ولو جان عندي ذرة نية مو زينة تجاهها جان ما وكفت بوجهك هسة وأنا أعرف إنك أخوي وحزامي

التفت علي الباقر الي ومد إيده الثانية ساعدني أكوم وأنا أرجف من الوجع والخوف وكمل كلامة

علي الباقر :- كومي طيبات كومي مَنّوشة وياي لا تخافين تعالي لغرفة العلوية ما حد يمد إيده عليج وأنا موجود

علي الصادق جان واكف يباوعلنا بنظرات حقد بس ما كدر يسوي شيء كدام هيبة أخوه الجبير وقوة شخصيته طلعت من الغرفة وأنا أستند على الحايط وعيوني على منة المنان اللي بدت تهيد بحضن عمها وكأنها لكت الأمان اللي فقدته بحضن أبوها

دخلنا لغرفة العلوية وعلي الباقر حط بنتي بفراش العلوية وصار يمسح على راسها ويقرأ آيات والعلوية جانت ما موجودة جانت يم عمتي فاطمة الزهراء هي والبنات ومحد بالبيت بس علي الرضا و علي الباقر واني وهذا المخبل مالتي ياريت رحت وياهن ولا بقيت يمة أنا كعدت بالكاع وأنا أشهك من القهر وهتفت وياه

:- علي راح يدمرني راح يكتلني بظنونه شسوي يربي؟

علي الباقر باوعلي بحزن وكعد بعيد عني بشوية كال بصوت هادئ

- لا تخافين طفلة كلبي علي الصادق مريض بغيرته وأنا غلطت من البداية من سكتت على تصرفاته منة المنان ذنبها بركبتي وأعدج وعد شارب ما يمسج ضرر بعد اليوم ادريي هواي واعدتج وهواي جاي يتمادة وياج بس بكل مرة يتغافلني بلحظة يتخبل ماجاي الحگ عليه بس هسة خليج هنا ارتاحي ومنة المنان يمي

بقيت أباوع لبنتي شلون غطت بنوم عميق وهي مجلبة بأصبع عمها وكأنها تگول لا تعوفني القهر أكل كلبي بس بداخل هالوجع حسيت لأول مرة بإن اكو سد منيع يحميني من إخبال علي الصادق

غمضت عيوني والوجع ينهش بجسمي وأنا أردد بگلبي

:- يا ربي صبّرني على هالحياة واحفظ لي هالبنية اللي ما شافت يوم حلو وي اهلها من يوم ما أجت للدنيا

رفعت راسي لكيت علي الباقر صافن بيه مسحت دموعي وهو جر حسرة وهتف وياي

- طيبات لا تخافين احجي وي علي الصادق وهالمرة السالفة ما تعبر بسلام

:- شيفيد الحجي السجين من تدخل بالگلب بعد شينزعها؟ أخوك طعن بشرفي كدامك وهدم كل جسر جان ممكن يرجعنا سوة

قاطع كلامنا دخول علي الصادق جان وجهه شاحب وعيونه غايرة باوعلي بنظرة ما عرفت أفسرها ندم؟ لو حقد؟ تقدم راد يحجي بس علي الباقر وكف بوجهه وصار حايط بيني وبينه وعلي الصادق هتف بصوت مخنوك

- انطيني بنتي طيبات اريد أخذها تنام يمي

:- ما تروح وياك البنية تعبت وأنا تعبت علي الصادق أنتَ مو بس كسرتني أنتَ كرهتني حتى باليوم اللي صرت بي أم

هنا علي الباقر تدخل بحزم

علي الباقر : علي الصادق أنتَ مريض ولازم تتعالج من هذا الشك وكلتها الك سابقآ طيبات ومنة المنان يبقون هنا بغرفة العلوية وأنت تروح تراجع نفسك إذا ما صرت آدمي وتعرف قيمة الأمانة اللي عندك فـ والله وحق اهل البيت ما أخليك تلمح طيفهن

علي الصادق باوع لأخوه بقهر وجان يعرف إنو كلمة علي الباقر هي الماشية بالبيت دار وجهه وطلع بدون ما يحجي حرف بس حسيت بكسرته الكسرة اللي هو صنعها بإيده
مرت ذيچ الليلة واني مهدودة الحيل نايمة بصف منة المنان بغرفة العلوية وكل شوية أفز مرعوبة عبالي علي الصادق راح يدخل علينا بس جان صوت علي الباقر وهو كاعد على المصلاية مال أمة يسبح ويقرا قرآن هو اللي جان ينطيني الأمان جان هو السد اللي واكف بوجه ريح خبالات أخوه ثاني اباوع لــ منة المنان وبكل مرة ينمرد كلبي هاي الطفلة شنو ذنبها تعيش بين شك أبوها وقهر أمها؟ بذيچ الليلة حضنت منة المنان وهمست بآذنها

:- يمة مَنّوشة كبري وصيري قوية لا تخلين أحد يكسر جنحج مثل ما سووا بأمج الدنيا يا بنتي ما ترحم الضعيف وأحنا مالنا غير الله وأهل البيت مالنا سند غيرهم

جنت عايشة تحت ظل العلوية وحماية علي الباقر صرت جسد بلا روح لعلي الصادق بس صرت كل الروح لمنة المنان بسس ما جانت الي البنت ما جانت تتقبلني ابد ليش ماجنت اعرف وفوك هذا كلة بقيت أنتظر الفرج من الله لعل وعسى يجي يوم وتبرد هالنار اللي بصدري وجنت اخاف اتواصل وي اختي رحمة الزهراء لان ماعرف شنو رد فعلها اذا عرفت اليصير بية بغيابها والمعتز بالله جنت اتجاهل اخلي يشوفني بيوم يضربني علي الصادق بداخلي شعور ماريد علي الصادق يتأذى ...

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" عَزيزة """"

كعدت الصبح وبعدني لهسة ماخذة اجوائي من بيت أهلي من جنت اكعد الفجرية حتى الحگ على الشغل رفعت راسي من المخدة وباوعت للساعة لكيتها الساعة بــ 5 الفچر باوعت لگيت حامِد المتقين ما موجود! أول شيء فزيت بس بسرعة تذكرت ان هو صدك كالي راح ينام وي إخوته ابيت عمي عبد الحسن

كمت على كيفي لكيت اطفالي در الشام و در النجف نايمين بالمهد مالتهم بوستهم براسهم ونزلت طلعت للحوش وشغلت الماطور وكعدت اترس الچراگل و دخلت نضفت الصالة كلها والبراني و الإستقبال وشغلت البخور بالبراني و رشيت المعطر وشغلت بخور بالصالة لان عندنا وأحد نفسية يكولون أسمة المرتضى الأمير يهج من البيت اذا ما شم ريحة حلوة

و رحت للمطبخ العجين انا عاجنتة من الليل كعدت أشنك وصعدت لفوك الدنيا ماطرة بس الحمدلله بعد اكو حطب ما وصل إلة الماي حطيتهن بنتور الطين وشغلت النار بيهم وكعدت اخبز ومن خلصت نزلت وسويت الهم ريوك على سرعتي لان صارت الساعة 7 الصبح

والحمدلله كملت كلشي وكعدت العلوية و أم البنين و المرتضى الأمير و الفاروق الاعظم دخل ودخل وياه حامِد المتقين واجاني للمطبخ واني بقالي بس الستكانات اشيلهن للسفرة حضني من ورة وهتف بأذاني

حامِد المتقين :- مشتاقلج أم درري

عزيزة :- أيي واضح والدليل أمس أنتَ كلها بحضني

- هههههههه وعلي صبرت نفسي أخواتي غيرر ماكدر الهم

:- بس تكدر تضحك علية بشكم كلمة

- ابوس ايدج انا شعندي غيرج روحي من الدنيا عزيزتي

:- هاك الاستكانات طلعهن خليهن علىى السفرة خلي الناس تاكل

- تأمريني أمر عزوتي

طلع حامِد المتقين وشال الصينية وحطها على السفرة واني عدلت حجابي وأخذت الخبز وطلعت كعدنا وصرنا نتريگ
وانا جنت أشوف نضرات ألفاروق الأعظم لــ أم البنين
ومــ أخذ حيدرة منها مخلي على رجلية ويوكل بيه ونحن بنص الهدوء سمعنا صوت الباب مال البيت اندفر حيل وطب ألمعتز باالله وكبل طب وهو يصيح ويباوع بااتجاه
عمتي فاطمة الزهراء

ألمعتز باالله :- هااااي شنووو وهج الطف و هذا رجلها شكوو جاي يدخلون بيتي وي غراضهم؟

حامِد المتقين :- صوتك ..

- ماا انصيي صوووتيي شكوو نازليين لبيتي شنو ان شاءالله يردون يستقرون هناا؟؟؟

فاطمة الزهراء :- عندك مانع؟

- عمة شنو هذا الحجي إلا أنتِ لا تصيري ضدي اروحلج فدوة لا توجعين كلبي

فاطمة الزهراء :- محد راح يوجعة كلبة كلكم أحفاد السيد أحمد تصيرون يمي وتحت جناحي وبسمة وبنتها وهج الطف راح يعيشون بالمجمع وتحديداً ابيتك لأن أنتَ ساكن عند عمك

- وهيچ راح تخليني كليوم اشوفهااا واشوف زوجهاا هيج راح تكسرين كلبي؟؟؟

المشهد جان مشدود والكل سكتوا من الصدمة المعتز بالله جان واگف والنفس ماله يصعد وينزل من القهر والعصبية وعمتي فاطمة الزهراء واگفة بشموخها المعتاد نظراتها ما تنهز

فاطمة الزهراء :- المعتز بالله اليدگ باب هالبيت بحماية السيد وهج الطف بتنا وإذا جار عليها الوكت مالها غير حضن أهلها و الكلب اللي ينكسر يتصلح بالإيمان مو بالزعل

حامد المتقين گام من السفرة وگف بصف المعتز باالله وحط إيده على چتفه يحاول يهدي اللعب

حامد المتقين :- استهدِ بالرحمن يمعود الدنيا ما تسوى المرة جاية لهلها وتريد تعيش بنصنا ونحن ولد عمها وسندها عيب تطلع منا حچايه تكسر خاطرها كدام رجلها

المعتز بالله نتر إيد حامد المتقين وعيونه غورت بالدموع باوع لعمتي بنظرة عتب توجع الكلب

المعتز بالله :- يا سند يرحم والديج يا عمة؟ تخلين السچينة بگلبي وتگولين لا تتوجع؟ البيت مجمع خير بس مو على حساب روحي أنا طالع والبيت خلوه يفرغ لغيري أنا ما أتحمل أشوف أحلامي تمشي گدام عيني وإيدها بإيد غيري!

طلع المعتز باالله ورگع الباب وراه رگعة هزتنا هز الفاروق الأعظم نزل راسه ومسح وجهه بإيده وأم البنين جانت ترجف حيدرة ختلة بحضنها وفز من الصوت

حاولت انا ألطف الجو لان نعرف المشاكل هاي تجي وتروح وطگات ألمعتز باالله ما تخلص لهذا محد طلع وراه ولا واحد كال شيء لان يدرون شنو راح يصير بعدها لهذا انا گلت بصوت ناصي

عزيزة :- صلوا على محمد يا جماعة الخير اذكروا الله المعتز باالله فورة دم وهسه يبرد ويرجع هو حنين وما يرضى بالزعل

المرتضى الأمير :- الريحة الطيبة بالبيت ما تخفي ريحة المشاكل يا أم در يمااه إنتِ أدرى بمصلحة البيت يس المعتز باالله هل المرة صدگ انجرح

حامد المتقين رجع گعد يمي باوعلي ونفسه طويل همس بأذني

حامد المتقين :- عزيزة روحي ورا أمي شوفيها خاف ضغطها صعد هاي السالفة ما راح تعدي على خير وهج الطف وصلت ومعناها عاصفة

هزيت راسي وگمت وأني أدري الأيام الجاية ببيت السيد أحمد ما راح تشبه اللي فات

مشيت ورا عمتي فاطمة الزهراء وهي تمشي دخلت لغرفتها وكعدت على طرف السجادة لزمت سبحتها وبدت تسبح بس ملامحها جانت تحجي قلق ما تكدر تخفيه تقربت منها بست راسها وقدمت لها كلاص الماي

عزيزة :- عمة اهدي فدوة لعينج المعتز بالله وليدج وتعرفينه ساعة غضب وتعدي

باوعتلي عمتي بنظرة حزينة وهزت راسها وهي تهمس

فاطمة الزهراء :- يا عزيزة جية وهج الطف مو جية خطار هاي جية استقرار المعتز باالله انجرح بكرامته قبل كلبه والبيت اللي ينبني على حسرات الوادم يظل يهتز

بعد هاي كلماتها كامت وخلت الكلاص على الميز وطلعت من الغرفة ورجعت لولدها وكفت بنص الصالة وصاحت بصوت

فاطمة الزهراء :- اسمعوني كلكم من اليوم ورايح الذمة برية من كل واحد يفتح موضوع الماضي وهج الطف ورجلها مو ضيوف السيد هم اولادة والي يمسهم بكلمة يمس طرف عباتي المعتز باالله يزعل ويرضى بس هذا البيت بابة ما ينسد بوجه بناته

الكل سكت حتى المرتضى الأمير اللي جان يحاول يلطف الجو سكت وحط ايده على راسه و حامد المتقين باوعلي ونظراته تگول بدت العاصفة

بينما البيت غرك بسكون مخيف انفتح باب الحوش بهدوء دخلت وهج الطف وعيونها كانت تدور بالوجوه بخوف وانكسار ووراها امها تمشي بخطوات مترددة

أول ما شافت عمتي وكعت الجنطة من ايدها وركضت شمرت نفسها بحضنها وهي تشهك بالبجي بهل لحظة، سمعنا صوت سيارة المعتز بالله تفحط بالفرع برة وهي تبتعد بسرعة جنونية

التفتت على حامد المتقين لكيته واكف يباوع للباب المفتوح همستله بصوت يرجف

عزيزة :- حامد المعتز باالله راح بس خوفي لا يرجع وهو شايل بگلبه شي يحرگ الأخضر واليابس

حامد سد الباب بقوة وقفل القفل باوعلي وكال بجمود

حامد المتقين :- البيت اللي تدخلة وهج الطف وهي مكسورة لازم واحد من زلمة يدفع الثمن وخوفي الثمن يطلع غالي يا أم در

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" سُــــكِــــر """"

أخذت سوسي بزونتي شلتها و طلعت برة اللعب وياها واني كاعدة على الرصيف كدام بيتنا وكفت سيارة سودة مضللة شوي عني ونزلوا منها اثنين زلم واجو علية وكفوا كدامي وهتفوا وياي

: أنتِ سُكر عمران؟

واحد بيهم عرفتة هو نفس الي هجم على بيت السيد أصفاد الحق وانا ضربتة بس الي حجة وياي جنت أول مرة أسمع صوتة وأول مرة اشوفة كمت على حيلي وفلتت سوسي من ايدي وطبت لجوة لبيتنا وانا هتفت وياه

- أيي أنا سُكر عمران خير يا طير؟

: شلون صار راسج لو بواهسج نكسرة الج مرة ثانية؟

- هههههههه ومنو يكسرة الي؟

هنا نزل رجال من السيارة وجان كارط خيط عمرة رجل بالدنيا ورجل بالآخرة فتحت عيوني على كبرهم وأنا أشوف هذا الشايب اللي نزل من السيارة وجهه يطرد النعمة ومبين عليه ثكيل بس ثكل مال شر لبسه مرتب بس نظراته بيها سمّ يكتل وكفت وكفة سبعة وعدلت شعري ورفعت راسي ما أريدهم يحسون بذرة خوف رغم كلبي جان يدك من الخوف على أهلي مو على نفسي

نزل هذا الشايب وكف بيناتهم وهذولة الاثنين الرعادية رأساً دنكوا روسهم وابتعدوا خطوة ليورة باوعلي من فوك ليجوة بنظرة استصغار وأنا رديتله النظرة بأقوى منها وكلتله بصوت عالي ومستهزئ

- هااا عمو خير؟ شو الجماعة صاروا خرفان من نزلت أنتَ الجبير مال هذولة السرسرية؟

ضحك ضحكة خفيفة صوته مثل خشخشة ورق يابس وكال بصوت ناصي

: لسانج طويل يا بنت عمران وطوله هو اللي وداج لـ أصفاد الحق وهو اللي راح يوديج لمكان ما تطلعين منه إلا بجفن

خزرتة وكلتله

- والله يا حجي العمر بيد الله مو بيدك وبعدين عيب عليك شيبة ولحية وهاد على بنية بكد حفيدتك؟ لو أنتوا بس فالحين بالسيارات المضللة وشد الجسم عساس زلم

تقرب مني خطوة وصار وجهه بوجهي ريحة جكاير قوية طلعت منه همس

: انا ما يحب أحد يكسر كلمتي وأنتِ كسرتيها اليوم جيت بذات نفسي بس أشوف سُكر اللي سوت هالضجة حتى أعرف بيا طريقة راح نكسرها

رديت عليه بضحكة استهزاء

- سلملي على روحك الماتقبل وكول لها سُكر تعتذر منك لأن راسها يابس وإذا فكرت تكسره لازم تحضر روحك لأن الكسر راح يوصل لبيتك هسة تفضلوا منا لا ألم عليكم الشارع وأسويكم فرجة لليسوى والما يسوى ولو كل جماعتي بالمجتمع تسوةة روحووا مناا إلا اطلع عليكم الزلم الصدك

دار وجهه وصعد للسيارة بدون ولا كلمة وهذولة الاثنين صعدوا وراه وهم يخزرون بية شخطت السيارة وطلعت وأنا بقيت واكفة بمكاني رجليه ترجف بس ما بينت الهم مسحت وجهي بيدي وكلت

- يا ستار هاي الشغلة كبرت يا سُكر والظاهر اللعب صار عالمكشوف استغفر الله استغفر الله

دخلت للبيت وگلبي مثل الطبل يدگ سديت الباب وراي وتجيت عليه وأنا أسمع صوت أنفاسي العالية سوسي جانت واكفة أول ما شافتني اجت يمي وصارت تمسح روحها برجلي شلتها وعصرتها بصدري حيل وهتفت

- ماكو شي سوسي ماكو شي

كلتها وأنا أحاول أقنع نفسي قبل لا أقنعها بس السالفة جبيرة والشايب ذاك نظراته ما تبشر بخير صعدت لغرفة ملاك لان الوحيدة الي شباچ غرفتها للشارع لكيتها نايمة دخلت بهدوء و بقيت واگفة ورا الشباچ أراقب الفرع لحد ما شفت سيارة السيد أصفاد الحق طبت للمجمع ووكفت كدام بيتهم هنا ما تحملت سديت الشباچ بسرعة ونزلت طلعت لازم أحجي لازم يعرف إنو اللعب صار بالوجه وباب بيتنا

طلعت للشارع وهو يحاول يفتح باب بيتهم اندار بوجه وشافني ضل يباوعلي واني مشيت وصلت يمه وهو شافني واستغرب من شكلي المخطوف ولوني المخطوف

- سيد سيد أصفاد

: خير يا سُكر شبيج بوية؟ وجهج صاير أصفر صاير شي بالبيت ابوج بيه شيء ولج؟

تقربت منه وصوتي يرجف

- السيد أصفاد جوي لبيتنا وگفوا بالباب اثنين من ذولاك السرسرية وياهم واحد شايب وجهه يگطع الرزق هددوني بيك وكالي لسانج هو اللي راح يوديج لمكان ما تطلعين منه إلا بجفن

السيد أصفاد عقد حواجبه وملامحه تغيرت ١٨٠ درجة صار وجهه ما يتفسر من العصبية بس حاول يسيطر على نفسه كدامي تقرب خطوة وهدأ صوته

: شايب شلونه وصفه؟

حجيتله كل اللي صار بالتفصيل وهو يسمعني بتركيز وهدوء مخيف من خلصت أخذ نفس عميق وهو يباوع بعيوني بنظرة طمأنينة خلت روحي تهدأ شوي

: سُكر اسمعيني زين روحي لبيتج اقفلي الباب ولا تطلعين لو تنكلب الدنيا هذا الموضوع صار يمي وداعة جدتي الزهراء ما يمسج طرف منهم وأنا أشم الهوى انسي كلشي شفتي ولا تحجين لأهلج حتى لا يخافون السالفة خلصت وصلتي لأمان السيد

- بس يا سيد هذا الشايب مبين مو سهل

قاطعني وهتف وياي

: وأنا أصفاد الحق انا المو سهل هو اللي راح يتعب ويانا روحي بوية روحي

طلع موبايله واتصل وجهه جان جامد وعيونه تلمع بشرر واتصل واني اباوع بيه والي اتصل عليه رد وسمعت صوت السيد أصفاد ألحق

: ألو السيد علي الباقر؟ اسمعني زين حضر الولد ولا يبقى واحد السالفة تعدت حدودها ووصلت لبيوتنا تحضروا اليوم نطلع لأبو حيدر واليوم ننهي هاي القصة لان انا تعبت لا تخلي سلاح أريد الرجفة توصل لگلبهم قبل لا نوصل لبيوتهم

سد الموبايل وباوعلي وهتف وياي

: روحي نامي أتأخر الوقت حيل

- خايفة عليكم

: لا تخافين بنتي الدنيا تصيح هلا بطك الفشك

- ما فهمت شنو يعني؟!

: هههههههههه ولا تفهمين روحي نامي وسدي الباب زين

الليل نزل وسكنت الأصوات بس بداخل بيت السيد أصفاد ألحق جان الجمر ما ارتاحيت أبد وضليت واكفة ورا الشباچ لحد ما سمعت صوت الأذان شفت أربع سيارات سود وكفن ببابهم بصمت مرعب طلعوا من بيت السادة زلم خيالاتهم تمشي بالظلمة السلاح مبين بخصورهم وبأيديهم وعلي الباقر جان واكف يحجي وياهم

طلع السيد أصفاد من البيت لابس قميصه الأسود وشايل بيده سلاحه لفه بشاله ونظر نظرة أخيرة لبيتنا جانت نظرة وداع لو نظرة حرب؟ ما عرفت صعدوا بالسيارات وشخطوا الصوت فزز الهدوء مال المنطقة كلها

كلبي صار يوجعني السالفة مو بس تهديد السالفة دم وكسر عظم

✧✦✧✦✧✦✧✦✧✦✧✦✧✦✧✦✧✦✧

- إحنه السادة والنا بالشدة صولات
واليعادينا يضوك الموت من چفه
شمرة هاشمية وفزعة الحق دوم
ما نسكت لظالم والظلم ما نلفه
ابن العترة وأصفاد الحق عنوان
من يلبس غضبها الدنيا تترجفه
يا شايب الويل دومك والمنايا حوم
سيف السيد عِدال والباطل ينسفه

يَـــــتــــبــع ☜☞

تعالوا لقناتي بالتلكرام بيها الأبطال يوزر القناة : oo_ii13

لهنا وصلنا لهناية المُنْعطف الخامس
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون التفاعل ما عاجبني 👎🏻👎🏻👎🏻

وإن شاءالله اشوفكم بــ مُنْعطف جديد ومتابعة لحسابي خلي ندخل ألف قبل نهاية الرواية فقط اضغط على اليوزر وتابعني oo_ll13

17,135 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ