احفاد السيد : الثار ( بأجزائها الإثنين ) الفصل الثالث وسبعون 73 - بقلم ​رُقَيَّةُ الْأَكْبَرُ

﴿ وَالْبَاقِيَاتُ الصَّالِحَاتُ ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- واللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ

مُتابعة لحســابي حتــى ندخل رقم جديد oo_ll13

التعب علينا والتفاعل عليكم التصويت والتعليق أبين الفقرات كلش مهمة هو الدعم للقصة وهو الينسي الكاتب التعب التصويت كلش ما عاجبني مو حلو ...
والمصممات لا تقصرن 🎀🌸

وتعالوا لقناتي بالتلكرام بيها الأبطال و نحجي كلشي هناك يخص الرواية ++ أنشر تغشوشات

- ما زلت انتظر على وعد اللقاء
وأعد لك الأيام حنيناً لا ينتهي
الأيام دهور لا تنتهي الا بقدومك
سأنتظرك وكأنك القَدر الذي لا مفر منه
وأكذب كل شيء لأصدق وعد عينيك.
كن بخير لأجلي..
فما هي إلا أيام وتشرق في سمائي من جديد

لـــ رُقية الأكبر

﷽
اللهم صلّ علىٰ محمد وآل محمد
~~~~~~~~~~~~~~~~~~~

٭٭ طيبة الزهراء ٭٭
رجعت من الجامعة على وقت يعني باقي لدوامي ساعة بس انا ضربت آخر محاضرة لأن متت من التعب صعدت بوجهي لغرفتي فتت لكيت علي الصادق كاعد على الجرباية يلعب بتليفونة حطيت جنطتي على ميز المكياج وهتفت وياه

طيبة الزهراء :- مساء الخير

ما جاوبني ولا رفع عينة أصلاً بلعت موس وسكتت باوعت بالمراية ورجعت انداريت إله وهتفت وياه

طيبة الزهراء :- چا مَنّوشة وين؟

ماباوع الي اصلاً هم وجاوبني وهَوّ يلعب بالتليفون

علي الصادق :- مادري اسألي أبوها

- وليش انا شنو جاي أسوي هسة مو حضرتك أبوها؟

:- طيبات اطلعي من رأسي مالي خلك

- لشوكت نضل هيچ راح تجي عمتي ترى

:- تهدديني بعمتج؟

- اني اهدد صادقي اناا

:- خير ان شاءالله عود اذا اجت عمتچ كليلهم اني ضربتچ مرة ثانية واشكيها مني مااوصيچ

- تشوفني هيچ أنتَ؟

:- طيباات ترى اني اعرفج لا تتمسكنين على راسي

- علي الصادق والله جاي تتعبني والنبي جاي أحاول اتفاهم وياك وأنتَ مو راضي تنطيني روحك

:- حطي عيونچ بعيوني وكليلي أحبك

- شنو؟

:- هااا طلبت تنزليلي الچنة؟؟

- علي الصادق شنو هل طلبات هي ترى رچلي أنتَ

:- وانا ماريد أصير بس رجلك كاافي شما حجيت وكتيلي رجلي رجلي اريدج تكولين حبيبي أمنيتي من ينجاب طاريي تكولين علية أبو بيتي ابو طفلتي كلها رجلي تعرفين ليش؟ لأن أنتَ شايفتني بس هيج رجل بالغرفة ولاشيء بالصدك بعينچ

- علي الرضا وين؟

:- هههههه أنزلي دورري عليه ولا تسّمعيني حسّچ

بقيت بحجابي بس نزعت الصاية وعفت علي الصادق ونزلت لجوة لكيت العلوية كاعدة بالهول وجاي تخيط وكفت يمها وهتفت وياها

طيبة الزهراء :- خالة

العلوية :- ها حبيبتي

- وين روضي؟

:- يمكن بالبراني كاعد يقرأ

- تمام خالة ... شوكت الغدة ؟

:- بس يجون الولد أصب شني جوعانة اسويلج؟

- لا حبيبتي انتضر لمن نكمل كلنا رايحة أشوف روضي

:- براحتچ أمي

عفت خالتي وطلعت للبراني فتحت الباب لكيت روضي
٭ علي الرضا ٭ نايم ومخلي الكتاب على وجهَ وانا واكفة برجلي دفعت رجلة وهتفت وياه

طيبة الزهراء :- رووضيي ... رضيياات ... عليي الرضا وجهدد ان شاءالله اكووومم

طفر من مُكانة كعد وشال الكتاب من وجهَ وحطة بين رجلية وصار يباوعلي وهو بالكوة يفتح عيونة

علي الرضا :- عيوني طيباتو

- أريد احجي وياك صحصح

:- ايي خيتي كولي مصحصح جنت أخذ قيلولة بس

- أريدك تمشي تطلع علي الصادق لأن راح يتخبل من كعدة البيت

:- وهي هاي هم يرادلها روضة؟ يا خيتي علي الصادق مو بس يتخبل هذا راح يفجر البيت بينا إذا بقى محبوس بين أربع حيطان بس تعالي كوليلي شبيج وجهج ميريح؟

- عوفك مني هسة رووضي الرجال واصلة ويا لحد خشمة ومن سألته على مَنّوشة كب بوجهي روح له عفية أخذه طلعوا غيروا جو أخوك جاي يذبل كدام عيني وهو حابس نفسه بهل الغرفة

:- شوفي طيبات علي الصادق مو غشيم وما بيه شيء علاقتكم البيت كلها حسّ بيها والي ما تسمعي من غيري تسمعي منيي ترى اخوي واعرفنة والي بگلبه مو قصة طلعة وطبة وينتهي علي الصادق يريد كلمة تبرد ناره وأنتِ ماشاء الله عليج لسانج بس بالحق يشتغل وبالمشاعر صاير صخر جلمود هسة أمشي وياه بس لا تجين تلوميني إذا شمرني من الدرج لأن هالفترة حتى خياله ما طايقه

- لا تبالغ روضيي لا تنسى أنتَ الوحيد الي يسمع منك ويحجي وياك بهدوء بوقت صار حتى علي الكاظم ما يتحملة روح له بأسلوبك قنعه يروح وياك للمحل أو تمرون على أي شيء المهم يفرغ طاقته برة البيت

:- ماشي يا أم منوشة راح أروح أضحي بنفسي لخاطر عيونج بس بشرط من نرجع كون الگاچ مسوية ذيج الحلاوة الي يحبها بلكي الله يلين گلبه ويشوف الدنيا وردية من وراچ

- چنه عليها يدلل والله العظيم

عافني وطلع وهو يتمشى بثقة وأنا بقيت بمكاني أتنفس بصعوبة أحس روحي ضايعة بين كبريائي وبين تعب علي الصادق مني صدك أنا مقصرة؟ لو هو الي جاي يطلب المستحيل بوسط هالهوسة العايشيها؟

طلعت وراه وشفته صعد الدرج بخطوات سريعة صعدت وراه على كيف سمعت صوته وهو يصيح ويمشي :

علي الرضا :- علوووش ولك أبو الحسين وينك؟ كوم بدّل خل نطلع نشم هوى لا تضل كاعد جنك بومة فوك روسنا!

ضحكت غصباً عني على أسلوب علي الرضا بس گلبي جان يرجف ياترى علي الصادق راح يقبل يطلع لو راح يطرد أخوه مثل ما طردني بكلماته؟

وكفت بالباب مال الغرفة بوقت ما علي الرضا دخل للغرفة وبدون ما يدك الباب لكة علي الصادق بعده على نفس وضعيتة بس هالمرة شامر التليفون من إيده وصافن بالسكف بملامح معقدة

علي الرضا :ـ ها يابة.. شنو هل صفنة؟ كاضيها عزاوي والناس برة معيدة؟

ونفس سلوبة وياي جان سلوبة وي اخوه بدون ما يلتفت إلى علي الرضا رد عليه

علي الصادق :- علي الرضا اطلع وسد الباب وراك مالي خلك لغشمرتك هسة.

علي الرضا تقرب وكعد على طرف الجرباية ببرود وصار يريد يخلي علي الصادق يحجي بلكي يرتاح وانا جنت واكفة بجهة اشوفهم واسمعهم بس ما حسست علي الصادق بوجودي بالبداية عبالي هو شافني بس بعدين لاحظته ما منتبه عليه من الأساس

علي الرضا :- ما أطلع وإذا تريد تطردني كوم وشيلني بيدك ولك علوش شجاك؟ البيت صار كئيب من وراك حتى العلوية خايفة تحجي وياك و طيبة الزهراء وجهها أصفر عبالك مسوية جريمة شمالك وياهن

علي الصادق :ـ لا تسويها بريئة براسي!

:- لا طيبات بريئة غصباً عليك هية شنية؟

- هههههه أنتَ تعرف طيبات علتها وين

:- أيي وين سولف كل البكلبك يمكن نطلع بحل ترى العلاقة تقوة بمشاكلها الله وكيلك محد عايش ببيتة ومرتاح

- بس محد عايش عيشتي

:- وشنهي هية عيشتك هاي هية ملوك تتمناها شبيها بوية عيشتك؟

- لك طيبات تريدني أعيش وياها رجل كرسي؟ بس وجود رسمي؟ أنا أريد مرتي أريد السند الي أحس بيه من أرجع تعبان ما أريد وحدة تجاملني وبس تخلص الجملة تنهزم لغير غرفة

:- يا خوي هي طباع والنسوان مو كلهن سوا بس إنتَ هم لا تضغط عليها زيادة تدري بيها تحبك بس طبعها ناشف بالتعبير

- هههه تحبني أيي صح

:- كوم هسة عوفنا من هالحجي البس قميصك وخل نطلع نمر على المحل لو نروح نكعد يم أبو جعفر شوية الصدر ضاك يا خوي

- ماريد أطلع عوفوني براحتي

:- والعباس ما أعوفك لو تطلع وياي هسة بكرامتك لو أصيح للعلوية تجيك وأنت تعرف أمك شتسوي بيك يلة علوش لخاطر منوشة على الأقل البنية صارلها من نولدت ما شافت ضحكتك

علي الصادق سكت شوية تنهد تنهيدة طويلة وكأنه جاي يفرغ جبل من الهموم من صدره

علي الصادق :ـ طيبة وينها؟

علي الرضا :ـ موجودة تنتظر إشارة حتى تتنفس كوم البس راح أنتظرك بالسيارة لا تلطعني هواي

طلع علي الرضا نزل الدرج وهو يغني بصوت ناصي وكأنه انتصر بمعركة بقيت واكفة ورا الباب أيدي على گلبي وأسمع دگاته تصك بأذني حسيت بحركة جوة بالغرفة ردت أنسحب ردت أشرد لغرفة منوشة وأختل هناك بس رجلي خذلتني

فتحت الباب على كيف لكيته واكف كدام المراية يزرر قميصه الأسود على كيفة وعيونه ذبلانة وتعبانة شافني و جمدت أيده على دگمة القميص واندار بوجي نظراته جانت غريبة مو العصبية اللي جانت قبل شوية لا جانت نظرة عتب مخلوطة بشوگ يوجع الروح

تقرب مني بخطوات وأنا لا إرادياً رجعت خطوة لورا لحد ما انطك ظهري بالحايط صار كبالي مباشرة ريحة عطره اللي أحبها والي جانت دائماً تملي ريتي بالأمان هسة صارت تخنكني بكلمات العتاب اللي حجاها لـ علي الرضا

علي الصادق مد أيده بأصابعه الخشنة لمس طرف حجابي ونزله على متوني وهمس بصوت مبحوح

- طيبات ليش هيج صايرة صخرة وياي؟ أنا شسويت حتى تجازيني ببرودج هذا؟

رفعت عيني اله شفت لمعة غريبة بعيونه كأنما جاي يتوسل بية أكسر هالحواجز ردت أحجي ردت أگوله

:- علي والله أحبك بس ما أعرف أعبر ويمكن هلشيء بسبب تفكيرة

بس لساني انربط مد أيده الثانية وحاوط وجهي بچفوفه دفا أيده جمر خدودي تقرب أكثر أنفاسه صارت تلفح وجهي وهمس يم أذني

- أريد أحس بيج يمي مو بس جسد كاعد يطبخ ويغسل ويربي طفلة أريد طيبة الزهراء اللي جانت عيونها تسولفلي كلشي قبل لا ينطق لسانها ليش بنيتي هذا الساتر بيني وبينج؟

طبع بوسة خفيفة على كصتي وطول بيها حسيت بگلبي راح يوكع من مكانه خوفي من ضعفي كدامه خوفي من إنو إذا استسلمت هسة راح أنكسر أكثر بعدين دفعته بخفة من صدره وحاولت أعدل حجابي وأنا أتهرب من نظراته

:- علي لا تسوي هيج أخوك ينتظرك بالسيارة روح لا يتأخر الوقت

شفته غمض عيونه بقوة وضغط على سنونه سحب أيده مني وكأنما انچوى بنار ضحك ضحكة قصيرة ضحكة مليانة مرارة وهز راسه وهو يباوع للأرض

- حتى بهاللحظة هم تتهربين هم جاملتيني بكلمة أخوك ينتظرك يولي أنا جاي أحترگ كدامج وأنتِ تگليلي السيارة تنتظرك؟ خوووششش

مشى خطوتين للميز سحب سويجه وتليفونه وهو يشد على قبضة أيده وكف يمي بالباب باوعلي نظرة أخيرة نظرة واحد جاي يودع أغلى ما عنده وهو مجبور مد أيده ومسح على جتفي بخفة وكال بصوت هادئ يكتل

- راح أطلع مو لأن روضي يريدني و محتاجني راح أطلع لأن كعدتي هنا صارت تخنگني وتخنگج بس تذكري طيبات الصخر يتفتت بالماي وأنا مايي راح يخلص وبعدة ما فاد وياج

طلع من الغرفة ونزل الدرج بخطوات سريعة وأنا بقيت واكفة بمكاني اسمع صوت سيارة علي الصادق وهي تبتعد حسيت البيت فجأة صار فارغ كئيب وأكبر من حجمه بهواي رحت للجرباية كعدت بمكانه وغمضت عيوني وأنا أسمع صدى كلمته أمنيتي تكولين حبيبي

نزلت دموعي غصباً عني ليش هيج أنا؟ ليش كلما يتقرب خطوة أرجع أنا عشرة؟ صرت ألوم بنفسي وأتذكر وعدي لــ علي الرضا ان راح أسوي لعلي الصادق الحلاوة الي يحبها كمت بكسرة خاطر مسحت دموعي ونزلت للمطبخ صرت أطلع الغراض وأنا حركاتي ميتة بس بداخلي جان اكو أمل صغير إنو هالحلاوة بلكي تكون أول خطوة أذوب بيها الجليد اللي بنينه بإيدينا

العلوية شافتني سكتت ما حچت شي بس نظراتها جانت تكول

_ يا يمة صيري حنينة الرجال ماله غيرج

بقيت أشتغل والوقت يمر ثكيل وكل ما أسمع صوت سيارة بالشارع يفز گلبي وأكول أجه علي وأرجع أذكر نفسي إنو لازم هل المرة من يفتح الباب ما أكون الباردة أكون طيبة الزهراء اللي هو يحبها

صارت الساعة ١٢ ونص دخل علي الباقر و منة المنان للبيت وبعدة بنص ساعة طب علي السجاد وهو مرجع اولادة من المدرسة ودخل علي الكاظم واستغربت أول مرة غدير الله هيج تتأخر بالعادة تجي قبلهم ومو عوايدها ما تتصل عليه مسحت ايدي من الطحين ورحت ألهم للهول جانوا كلهم كاعدين يم العلوية وهتفت وياهم

طيبة الزهراء :- شنوو غديرة لهسة ماراجعة؟؟

العلوية :- اي أتأخر الوقت شلون ما ضيعت بنتي

علي السجاد :- لا تشيلون هم هسة تجي

طيبة الزهراء :- شلون هسة تجي واليوم أربعاء جدولها قصير المفروض من ١٢ ضبط هية هناا

علي الباقر :- مخطوفة عادي انسوها هسة وسوولنا آكل ميت جوع

:- علي الباقر شنو مخطوفة لا تجفلني غديرة وين ؟

العلوية :- روححي صبي غدة الهم هسّة وبعدها اصعدي غيري هدومج عدنا طلعة اليوم

:- صدك تحجون؟

علي الكاظم :- بوووويةة روحييي ميتين جوووع نضل وي غديرة هسة روحي صبي الأكل

صبّيت الغدا والكل التم بس اللكمة ما كانت تنزل بزردومي عيني على الباب وعقل يفكر بـ علي الصادق وعتابه اللي كسر ظهري وعقل ثاني يم غديرالله اللي تأخرت والبيت كله صار عبارة عن تساؤلات وشقة علي الباقر الثكيل اللي زاد الطين بلة

كملوا غداهم وأنا عفتهم وصعدت فوك لغرفتي ريحة عطره بعدها تارس المكان ذبيت الشال وكعدت على طرف الجرباية أحس روحي ثكيلة تذكرت كلامه من كال الصخر يتفتت بالماي وكأنما جان يقصد إن صبري وصبره واصلين للنهاية

فتحت الكنتور وطلعت ثوب أسود نزاكة لبسته ورتبت شعري وأنا أردد بقلبي

: علي الصادق والله مو قسوة بس الخوف من الوجع هو اللي يخليني أضم مشاعري ورا مية ساتر

لبست صايتي مال الطلعة وحجابي ونزلت جوة لكيت العلوية لابسة عبايتها ومنتظرة يم الباب

طيبة الزهراء :- خالة غديرالله ما إجت؟ والله بالي يمها الساعة صاررت 3العصر!!!

العلوية :- يمة غدير هسة تجي، لا تضلين توسوسين.

- والطلعة هاي شنو سالفتها هسة؟

:+ والطلعة هاي الولد وصوني عليها قبل لا يطلعون وعلي الصادق راح يجي ياخذنه

جمدت بمكاني يعني رغم زعله ورغم حركان دمه مني فكر يغير جو إلنا؟ سمعت صوت السيارة برة گلبي فز قبل لا يفتح الباب دخل علي الرضا وهو يضحك ويغمزلي ووراه دخل علي الصادق جانت ملامحه هادئة بس عيونه أول ما طاحت عليه حسيت بيها عتب ما يخلص

علي الرضا :- هااا يا أهل الدار جاهزين؟ لو نبدل الخطة ونروح بس إحنا الزلم؟

العلوية :- جاهزين يمة

علي الصادق :- يلة لا نتأخر

تقدمت خطوتين صرت قريبة منه هو جان لابس نظارته وبيده السويج راد يندار ويطلع بس هالمرة ما كدرت أسكت طلعوا العلوية و علي الرضا واني هتفت

طيبة الزهراء :- علي

وكف بمكانه بس ما دار وجهه حسيت بصدره يعلى وينصى

طيبة الزهراء :- سويتلك الحلاوة الي تحبة ومن نرجع أريدك تاكلها من إيدي

شفت طرف شفته ارتفع بابتسامة خفيفة ابتسامة نصر صغيرة ألتفت عليه نزل النظارة شوية وبحس هادئ ومبحوح كال

علي الصادق :- نشوف يا طيبة الزهراء نشوف الحلاوة راح تغير الطعم المر اللي بگلبي لو نضل على حطة إيدج؟

طلع وخلاني واكفة بس هالمرة ما جان اكو برود جان اكو أمل إن ليلة اليوم راح تكون البداية مو النهاية طلعت وراهم وأنا أعدل بصايتي وحجابي وبداخلي أردد

: راح أكولها يا صداقي راح أكول حبيبي واكلك احبك وكلشيي بس انطيني وكت أتعلم شلون أذوب الصخر اللي بنيته

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ غدير الله ٭٭
طلعت من البيت والخنكة بصدري الدنيا جانت هدوء والفرع فارغ لأن الوكت بعده بداية دوام مشيت وأنا أعدل بجنطتي وكل شوية ألتفت وراي أحس أكو عيون تراقبني أحس الهوى صار ثكيل

وصلت لراس الفرع المكان جان يخوف بشكل مو طبيعي فجأة سمعت صوت صرصرة تايرات قوية سيارة تاهو سودة جامهه مظلل اجت تمشي بسرعة جنونية ووكفت كبالي بالضبط سدت عليَّ الطريق

گلبي وكع بين رجليه ردت أركض ردت أرجع للبيت بس مالحگت الباب انفتح بسرعة البرق نزلوا منها اثنين زلم ضخام ملثمين بـ شماغ أسود وعيونهم بالكاد طالعة

واحد منهم لزم ايدي وعصرها لدرجة حسيت عظمي راح ينكسر والثاني سحبني من خصري وصرت أصيح

- هدووووني يماااااا عليييييي مَوووااسسس ولكك رضااااا الحگوووووولي يااا نااسسسس

صحت بأعلى صوتي بس واحد منهم حط ايده الضخمة على حلكي كتم نفسي وكتم صرختي شالوني مثل الريشة وأنا أرافس بين ايديهم دموعي نزلت على ايد الملثم شمروني بالكشن الوراني مال السيارة مثل الذبيحة

قبل لا يسدون الباب واحد منهم باوعلي وضحك ضحكة خشنة هزت كياني وكال بصوت

- جنة منتضريچ بفارغ الصبر

طبگوا الباب بقوة والمحرك زأر وطارت السيارة بية لمكان ما أعرفه وأنا بس أسمع صوت دكات گلبي وهي تودع الدنيا الي جنت أعرفها

ربطوا عيوني وحلكي وجنت احس بالسيارة تبتعد خلص ماكدر اسوي شيء بس الاكدر علية هو ادعي بس هذا العندي سبحت تسبيحة الزهراء وصرت أردد بدعاء التوسل لأن معجزات هذا الدعاء وياي كلش عظيمة لمن وصلت الى

"" يَا أَبَا مُحَمَّدٍ يَا حَسَنَ بْنَ عَلِيٍّ أَيُّهَا الزَّكِيُّ الْعَسْكَرِيُّ يَا بْنَ رَسُولِ اللهِ يَا حُجَّةَ اللهِ عَلَى خَلْقِهِ يَا سَيِّدَنَا وَمَوْلانَا إِنَّا تَوَجَّهْنَا وَاسْتَشْفَعْنَا وَتَوَسَّلْنَا بِكَ إِلَى اللهِ، وَقَدَّمْنَاكَ بَيْنَ يَدَيْ حَاجَاتِنَا، يَا وَجِيهاً عِنْدَ اللهِ اشْفَعْ لَنَا عِنْدَ اللهِ. ""

وصلت لهذا المقطع وكطعت كلامي بكلبي لأن حسيت بالسيارة وكفت ... بقيت ساكتة انفتح باب السيارة وسحلني رجال شالني لزم رجلية بيديه وحط بطني على چتفي وشمرني لظهرة

دخلت لشيء مكان ما جنت أشوف شيء وما أسمع شيء لأن شغلهم جان على الصامت كعدت على الكرسي وربطوني وراحوا عني سمعت صوت الباب انسد كعدت اردد حتى اهدا نفسي

: يَا سَادَتِي وَمَوَالِيَّ، إِنِّي تَوَجَّهْتُ بِكُمْ أَئِمَّتِي وَعُدَّتِي لِيَوْمِ فَقْرِي وَحَاجَتِي إِلَى اللهِ، وَتَوَسَّلْتُ بِكُمْ إِلَى اللهِ، وَاسْتَشْفَعْتُ بِكُمْ إِلَى اللهِ، فَاشْفَعُوا لِي عِنْدَ اللهِ، وَاسْتَنْقِذُونِي مِنْ ذُنُوبِي عِنْدَ اللهِ، فَإِنَّكُمْ وَسِيلَتِي إِلَى اللهِ، وَبِحُبِّكُمْ وَبِقُرْبِكُمْ أَرْجُو نَجَاةً مِنَ اللهِ، فَكُونُوا عِنْدَ اللهِ رَجَائِي، يَا سَادَتِي يَا أَوْلِيَاءَ اللهِ، صَلَّى اللهُ عَلَيْهِمْ أَجْمَعِينَ وَلَعَنَ اللهُ أَعْدَاءَ اللهِ ظَالِمِيهِمْ مِنَ الأوَّلِينَ وَالآخِرِينَ، آمِينَ رَبَّ الْعَالَمِينَ.

وهنا حاولت افلت ايدي بس ربطهم جان مُحكم بقيت أتحرك أتحرك لمن وكعت بالكاع اني والكرسي لأن جنت مربطة بي أيست ماكو شيء بعد بقة عندي أمل بس إخواني
ضليت أفكر شلون راح يلكوني؟ راح اطول لو أبقى هنا لو اطلع ؟ منو عندة مصلحة بخطفي أنمار معقولة؟ لا ما يسويها زين منو هذولة وليش من دون الأيام علي الباقر تصرف وياي هيچ

ضليت افكر واربط اشياء مو يم بعض براسي آخر شيء ضربت راسي بالكاع وصحت بكلبي

: ياالله أنتَ المستعان وأنتَ تكدر ياربي انقذني ياالله

سلمت نفسي الى الله وبقيت بس وي التسبيح والدعاء وصرت اتذكر الأشياء الي اتعلمتها من السيد علي السجاد و السيد علي الباقر والشغلات الي حفضونياها وكلشي بهل دنيا من مشاكل من ضغط علاجة سورة من القرآن و دعاء و تسبيحة الزهراء وتذكرت من كالي علي السجاد وصوتة رن بأذني .....

علي السجاد :- اذا حسيتي روحج تعبانة وكاافي ما تتحملين بعد وبزعتي من الدنيا شغلة وحدة بس تكدر ترجع طاقتج بيها

غدير الله :- شنو هية؟

- اتوجهي لرب الرحمة واقراءي سورة الشرح مرة مرتين ولوحدج راح تحسين كل هم بداخلج انزاح وتحسين نفسج مابيه شيء وأصلا أصلا راح تحسين توج جابتج امج

:- لا مو لهدرجة لا تبالغ!

- تشكين بتأثير سورة الله نزلها رحمة للعالمين

:- لا ما اشك بس سجاد

- غديرة لو االعالم هذا شوية شوية بسس مثل ما تطور بهي الامور التافهة لو شوية متطور وي منضور الدين ووتعمق شوية بتأثير الأدعية و السور الي ما اجت النا عبث وحك عيونج ما تلكين بعد إنسان يصييح مخنوك لو يكول مهموم

:- هسّة انا شنو اقرأ ؟

- حبيبي دامچ مخنوگة وتعبانة اقرأي سورة الشرح وصلي على النبي هواية

:- تمام يارويحتي ...

تذكرت هذا الموقف براسي لهذا صرت اقرأ سورة الشرح وصرت اقرا دعاء الإمام السجاد عند الشدة ودعاء الإمام علي عند الكرب

: بِسْمِ اللَّهِ الرَّحْمَٰنِ الرَّحِيمِ
أَلَمْ نَشْرَحْ لَكَ صَدْرَكَ (1) وَوَضَعْنَا عَنكَ وِزْرَكَ (2) الَّذِي أَنقَضَ ظَهْرَكَ (3) وَرَفَعْنَا لَكَ ذِكْرَكَ (4) فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6) فَإِذَا فَرَغْتَ فَانصَبْ (7) وَإِلَىٰ رَبِّكَ فَارْغَب (8)

دعاء الإمام السجاد (ع) هذا الدعاء من الصحيفة السجادية مخصص لطلب الفرج وكشف الكرب

يَا مَنْ تُحَلُّ بِهِ عُقَدُ الْمَكَارِهِ، وَيَا مَنْ يُفْثَأُ بِهِ حَدُّ الشَّدَائِدِ، وَيَا مَنْ يُلْتَمَسُ مِنْهُ الْمَخْرَجُ إِلَى رَوْحِ الْفَرَجِ... صَلِّ عَلَى مُحَمَّدٍ وَآلِهِ، وَافْتَحْ لِي يَا رَبِّ بَابَ الْفَرَجِ بِطَوْلِكَ، وَاكْسِرْ عَنِّي سُلْطَانَ الْهَمِّ بِحَوْلِكَ

جان الإمام علي (ع) يوصي بهذا الكلمات عند الكرب

لا إله إلا الله الحليم الكريم لا إله إلا الله العلي العظيم، سبحان الله رب السماوات السبع ورب الأرضين السبع وما فيهن وما بينهن ورب العرش العظيم، والحمد لله رب العالمين

وبقيت انتظر ومدري كم ساعة مرت بسّ على إحساسي يمكن أكثر من 4ساعات مدري أقل او اكثر ماعرف بعد ...
جنت أفكر شحال أهلي هسّة؟ شنو هاي نطلع من كارثة ندخل بكارثة بيت عبد الحسّن شوكت يصفى ويرتاح؟

وانا اخذ نفس انفتح الباب وأجوا لــ عندي مدري كم واحد رفعوني من الأرض انا والكرسي وعدلوني وصرت أحسّ بايدين تتحسس جسمي ونزعتني صايتي الجنت لابستها بقيت أتحرك حتى أحاول امنعهم بسّ أنشألت القماشة عن حلگي وبديت أصرخ

غدير الله :- وخروا عني لا تگربون منيي وحگ چدي إخواني يحيدوكم حود وحك چدي ولا واحد يضل عايش بيكم لكم انا العلوية غدير الله وحگ جدي السيد علي الباقر ما يخليكم عدلين خلوني أروح وانسي الصار وخرروووا ايدكم عنيييي

هنا نحطت قماشة على حلگي واظن بيها منوم لأن اغمى عليه ومادري شنو الصار بعدها بس فزيت لكيت عيوني مغمضة وايدية مربطة وحسيت روحي بسيارة وتمشي بيه شنو الصار مادري بروححي
بقيت اصيح لأن حلگي جان ما مربووط وأريد بس فكة

غدير الله :- وين رايحين ما تخافون من الله؟ وين ماشين وماخذيني تسمعون أنتم لو طرشااان؟ وسّم ان شاءالله بكلبكم احجي وياكممم لو بيكم زلمة ما تخلوني هيچ مربطة انا بنت وهيج خايفين مني لو تشوفون إخواني شنو تسوون ؟ ردوا علية بس كلولي منو أنتم شنو تردون مني موو احجي وياكمم؟؟

هنا انا عرفت شما احجي ماكو فايدة لان ماكو واحد يسمع ويرد وخفت لا يرجعون ويحطولي منوم لو يربطون حلكي لهذا سكتت وانتضرت اشوفهم وين ياخذوني بس بالي صار بالساعات النمت بيها خاف واحد نگس بيهم متگرب الي متتت خوف من هاي الناحية

السيارة جانت تمشي بهدوء مو مثل سرعة الـ تاهو السودة اللي خطفتني الصمت اللي بالسيارة جان يذبح بس هالمرة ماكو ذيج الضحكات الخشنة ولا العطر الغريب اللي جان يخنكني جنت أحس بدموعي تحرك خدودي الخوف من المجهول الخوف على شرفي والخوف من فكرة إني يمكن ما راح أشوف وجه أمي العلوية مرة ثانية كل هذا جان ينهش بگلبي نهش

جنت أگول بيني وبين نفسي يا غديرالله هاي تاليها؟ تخلص حياتج بهيج ظلمة؟ بس سورة الشرح ودعاء الفرج بقوا بلساني وبگلبي أحسهم السند الوحيد اللي مخليني ما أنهار تماماً

فجأة حسيت السيارة بدت تخفف سرعتها وبعدين وكفت تماماً سمعت صوت باب السيارة ينفتح وكلبي دكاته صارت تدك بضلوعي مثل الطبل يا ربي سترك يا ربي إنت الحافظ رددت هالكلمات وأنا أحس بإيدين ناعمة أييي جانت ايدين ناعمة لزمتني من جتفي وساعدتني أنزل

استغربت.. هاي مو إيد الزلم الضخام اللي شمروني بالتاهو هاي الإيد بيها حنان غريب بس الخوف جان مسيطر عليه لدرجة ما كدرت أحلل الموقف سحلونيأو بالأحرى مشوني مسافة قصيرة جنت أسمع صوت خطواتي على أرضية ناعمة مو مثل تراب الفرع ولا كاع المخزن اللي جنت بيه

وكفوني بمكان وحسيت الجو تغير صار بي ريحة عطر قوية وأصوات همس خفيف وكأنو أكو ناس هواي بالمكان فجأة انفتحت الربطة اللي على عيوني

غمضت عيوني بقوة من ضوا القاعة القوي وبديت أفتحهن شوية شوية وأنا أرجف أول ما وضحت الرؤية عندي وكع نظري على لافتة جبيرة معلكة مكتوب عليها بالذهبي

: كل عام وأنتِ غيمة بيتنا.. عيد ميلاد سعيد علويتنا غديرالله

شهكت شهكة طويلة وبقيت واكفة بمكاني مصدومة التفتت يمنى ويسرى شفت روحي بنص قاعة مزينة بأحلى الزينة وبالوجوه شفت الزلم الملثمين ذبوا الشماغات جانوا إخواني
الي خطفوني الصبح همّة علي الباقر و علي السجاد من الرهبة والخوف حتى ما تعرفت على أصواتهم ولا اجسامهم

والي دخلوا علية ونزعوني الصاية ومشوا بيه بالسيارة هنّ أريج الله و عمتي فاطمة الزهراء دخلن غيرن ملابسي حتى أصير متجهزة لهي الحفلة صرت اباوع الهم كلهم موجوين

علي الباقر اللي جان الصبح قاسي واكف وكباله كيكة جبيرة وهو يضحك بوجهي ذيج الضحكة اللي تفتت الصخر من الحنان وبصفه علي السجاد وعلي الكاظم وعلي الصادق وعلي الرضا كلهم واكفين وبيدهم ورد وعيونهم تلمع بالفرح والفخر

صحت بيهم وأنا أشهك من البجي

- ولكم شسويتوا بية؟ ليش هيج؟ ردتوا تموتوني من الخوف؟

جتني أريج الله تضحك وحضنتني حيل وهتفت وياي

أريج الله :- يا روحي يا غديرة والله لو ما هيج ما جانت كملت المفاجأة! ردنا نسويلج يوم ما تنسينه بحياتج ولو أدري كلبج رجيج جان خففنا الخطة شوية

وعمتي فاطمة الزهراء جتي من وراي باست راسي وكالت

فاطمة الزهراء :- يمة بنيتي لا تبجين هذا يوم فرحج إخوانج رادوا يختبرون صبرج ويراوونج إنو مهما ضاقت الفرج يجي من حيث لا تحتسبين

علي الباقر تقرب مني لزم إيدي اللي جانت ترجف وباسها وكال بصوت بي بحة ندم وحب

علي الباقر :- غديرتي يا بعد نحري يابعد صمام كلبي وصمامي الرئوي يابعد طفلة كلبي وحك لا إله الا الله السويتة الصبح جان أصعب شي سويته بحياتي من شفت دموعج نزلت وأنا أصيح عليج تمنيت الأرض تنشك وتبلعني بس علي السجاد و علي الرضا قفلوا إلا نسوي هالمقلب حتى نكسر الروتين والقلق اللي عشتيه بالفترة الأخيرة ردنا نراويج إنو إن مع العسر يسراً مو بس آية نقراها بل واقع نعيشه

أنا بقيت صافنة بوجوهم الغيظ اللي جان بگلبي تبخر وحل محله حب جبير لهذولة الزلم اللي همَّ سندي بالدنيا حضنت علي الباقر وهتفت وانا بحضنة

- ولك باقريي والله حسبالي نمت وذبحوني حسبالي أنمار سواها وحك جدي دعاء التوسل ما فارك لساني جنت أستشفع بيكم عند الله وأنا ما أدري أنتم الخاطفيني!

ضحك علي السجاد وكال

علي السجاد :- ولهذا السبب إحنا نحبج لأن إيمانج أقوى من الخوف شفتي شلون الدعاء فادج؟ طلعتي من العسر ودخلتي بـ يسر هذا الاحتفال

بدت الموسيقى الهادئة تشتغل والكل بدأ يباركلي علي الكاظم جابلي هدية مغلفة وكال

علي الكاظم :- هاي تعويض عن سحلة السيارة والمنوم اللي هو جان مجرد ريحة ورد قوية خلتج تدوخين شوية ههههههه

وعلي الصادق وعلي الرضا بدوا يوزعون الأكل والحلويات والقاعة انملت بضحكاتنا جنت أباوعلهم وأكول بگلبي

: يا ربي صدك أنتَ كريم

البيت اللي جان شاحب الصبح هسة صار ينبض بالحياة أمي العلوية جتي تمشي وبدت تهلهل وتصلي على محمد وآل محمد

- يمة غديرة شفتي شلون علي الباقر جان يمثل؟ والله من طلعتي وهو رجع صار يبجي ويكول شلون هيج حجيت وية غيمة بيتنا؟

رحت لحضن أمي وبديت أضحك وأبجي بنفس الوقت جانت المفاجأة مرعبة بس نهايتها جانت مثل الجنة شفت بعيون إخواني الخمسة وأولاد عمي حماية ما تتوفر لأي بنية بالكون عرفت إنو مهما صار ومهما الدنيا دارت بية عندي خمسة جبال يسندون ظهري وعندي أخت وعمة مثل الماي البارد على الكلب

كعدنا ناكل ونضحك وعلي الباقر كل شوية يشاقيني

- ها غديرة بعدج تريدين تروحين للجامعة لو بطلتي؟

:- لا بطلت أريد أبقى هنا بنصكم بس بشرط مرة ثانية من تريدون تفاجئوني جيبولي ورد للبيت لا تخطفوني بتاهو مظللة

وهج الطف :- حاصلج خطف و بتاهوو هههههه

:- خليي الج بعيد ميلادج اني اسويها الج تدللين وعيشي الي عشت بيه

أصفاد الحق :- والزهرة طلع بيج روح انا كلت الهم هسة تجيها نوبة قلبية وتموت عليكم هههههه

:- والنبي رادت تجي بس ربك سلم بسسس سؤالي منو الشالني ؟؟

علي السجاد :- انا ...

:- شسالفة خوية بطني مردتها صدك جذب عبالك عدوتك شلون شالني وشمرني على جتفة عبالك ما شايف

علي الرضا :- عادي عذري تلكينة حسّ روحه بفلم

:- بس والله لو اعيش العمر عمرين ماراح انسى الصار هذا يعني طبعتوا عيد ميلاد براسي كل حياتي ما يجي مثلة مشكورين هههههههه

طيبة الزهراء :- يلاااا بشهر الثاني عيد ميلادي اشوفف شنو تسوولي؟؟

علي الصادق :- جنچ علية اخذج ونسافر هناك اسوي الج

طيبة الزهراء :- صدددك ؟؟

- والله العظيم غير مرتي وحبيبتي تدللين علية اختاري الدولة الترديها ويصير الچ

فاطمة الزهراء :- الله يهدي سركم ان شاءالله وتضلون هيچ دومم

اريج الله :- وين حَيرام چا انا هم اريد عيد ميلادي

علي الرضا :- يلا اكلوهااا طلعت عيون النسووان ههههههه

المعتز باالله :- ترى جدي مطلع عيونهن من زمان مو جديدة عليهن حفيدات أحمد الصادق

وهج الطف :- مثل ما طلع عينكم علينا

ألمعتز باالله :- صدك والله ليش عيونة طالعة عليكم؟

- ليش ما ملاحظ؟

:- لا والله ست وهج الطف وضحيلي؟

- مشكلتك اذا ما تشوف عدل

:- والله الاشوفة انا هو جدي منطيكم على مايكم وزيادة وأبسط شيء الألقاب مالتجن عمي شنهي أميرات

- وأنتم هم المنطي النا منطي الكم موش أنتَ نفس السادة؟ و علي الباقر غيرة السادة و اخوي شيخ السادة؟ نفس الألقاب ترى ما مفضل أحد على احد

:- بس ما غلط من انطاج لقبچ

- ههههههههه اكل الكيك اكول أحسن شيء

ام البنين :- ان شاءالله العمر المديد يابعد كلبي غيماتي

ألفاروق الأعظم :- انطيني حيدرة عنچ

:- على كيفك وياه

- انطي كيك؟

:- لا عيوني انطيتة لا يأكل هواي أخاف علية

- هاي هية ميرزا تدللين ما انطي

جميلة :- تعالوا ناخذ صورة جماعية لهل كعدة الحلوة

غدير الله :- اصبريييي انااا بالنص اكعد

علي الباقر :- تعاي اكعدي على رجلي هههههههه وين بالنص جنج فارة

- هناااا هي صرت يلا كلنا لازم نطلع بالصورة

شبير :- انا اخذها اصبروا اصعد على الكرسي حتى كلنا نطلع يلا

بسمة :- اضحكوووا نريد الصورة ذكرى بيها بس الضحكة يلا اضحكووا كلكم

شبر :- دقيقة اعدل روحيي

البشير قيصر :- تعال جهادي اشيلك ... يلا شبير صور

علي الرضا :- مووو تحنطنا يلااا صور وفض السالفة

شبير :- هههههههه يلااا

انتهت الليلة وأنا أحس روحي صدك انولدت من جديد مثل ما كال علي السجاد كل الخوف والقلق اللي جان بصدري انزاح وعرفت إنو الضيك مهما كبر رب العالمين ضام وراه فرحة تسوى كل التعب

طلعت من القاعة وأنا لازمة إيد علي الباقر وعلي السجاد وباوعت للسما وكلت الحمد لله على نعمة الأهل والحمد لله على اليسر بعد العسر

بعد مارجعت للبيت و انطفت الأضواء وخلصت الهوسة صعدت لغرفتي وأنا شايلة هداياي وضحكتي مالية وجهي ذبيت روحي على الجرباية وجان بالي صافي لأول مرة من شهور سحبت موبايلي حتى أشوف الرسايل وفتحت الواتساب وأنا أتوقع مباركات من طلاب قسمي بس فجأة جمدت بمكاني
نغزة بگلبي وكعت الموبايل من إيدي رقم أعرفه مثل ما أعرف اسمي رقم ...... أنمار مراسلني

فتحت الرسالة وأنا أرجف الحروف جانت تمشي كبال عيوني مثل الجمر قرأت كلماته ندمه اعتذاره وحبه المسموم اللي دمر بيتنا غمضت عيوني حيل وتذكرت وجوه إخواني وأبوي تذكرت كسرة أختي بسببه وبسبب أهله

وجانت رسالتة

أنمار :- كل عام وأنتِ غيمة بيتي اللي ضاعت وغصتي اللي ما تفارك صدري.. غديرة أدري اليوم عيد ميلادج وأدري جيتي على بالج كـ وجع مو كـ ذكرى حلوة وحق عيونج اللي بجيتها نار الندم ما جاي تطفي بگلبي وأدري كلمة آسف ما ترجع اللي راح ولا تبرد كلب أختج اليوم وأنتِ بنص إخوانج تذكري إنو أكو واحد كسرته الدنيا وخسر كلشي بس حتى يرضي ثار مو ثاره وبقى يحبج من بعيد وهو ميت من القهر كل عام وأنتِ بخير يا علويتي يابعد تربيتي ويا رب يجي يوم وتسامحيني بيه ولو أدري المسامحة صعبة

سحبت نفس طويل والدمعة اللي نزلت ما جانت دمعة ضعف جانت دمعة حوبة المظلوم بين الوجع والقوة اخذت اصابعي وكتبت رد لرسالتة وجان ردي

غدير الله :- أنمار.. جنت كاعدة بنص أهلي بنص الجبال اللي راد أبوك يهدمهم بس الله ردهم لظهري سند شيفيد اعتذارك؟ وشترجعلي كل عام وأنتِ بخير وأنتَ العوام اللي ضاعت بيها سنيننا؟ إنتَ تكول متت من القهر؟ إحنا متنا صدك واندفنا وعشنا الفاتحة بمكان العيد بفضلك وفضل اهلك لا تعايدني العلوية غدير الله اليوم انولدت من جديد بس هالمرة انولدت بلا گلب يحب واحد مثلك عايد نفسك بذنوبك وعوف الغيمة بسلام لأن الغيم ما ينزل للگاع اللي تلوثت بدم أهلها

شمرت الموبايل وما انطيتة مجال يرد سويتله بلوك ونهيت كلشي مسحت دموعي بطرف إيدي وكعدت اتنفس

:- يا رب أنتَ انطيتني الفرحة اليوم لا تخلي ذيچ الوجوه القديمة تبوكها مني

باوعت للصورة الجماعية اللي أخذناها قبل شوية شفت ضحكة علي الباقر وعلي الرضا،وحسيت إنو هذا هو عيدي الحقيقي نمت وأنا أدري إنو الفجر اللي طلع على غدير الله اليوم ما راح يخلي للظلمة مكان مرة ثانية

نمت ذيچ الليلة وأنا حاسة بروحي غيمة صدك طايرة فوك الغيم عرفت إنو السند مو بس حجي السند ذولا الزلم اللي شفت الموت بعيونهم الصبح وشفت الجنة بضحكتهم بالليل نمت وأنا أردد بگلبي

:- يا غدير الله طول ما ربج موجود وإخوانج ذولا حزام ظهرج لا تخافين من جية الباجر الدنيا لو شكد ما تظلم لازم تاليها تضوي

وغمضت عيني والابتسامة ما فاركت وجهي وأنا أتحلف بـ علي الباقر وبقية العلالي كون باجر أردلهم المقلب بس خل أصبرلهم هينة يا ولد أحمد الصادق اني اعلمكم على سوايتكم هاي وياي ههههههه

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ رحمة الزهراء ٭٭

روحي بدت تطلع الرؤية صارت مشوشة كدامي وصوت تكسير غراض بيتي صار يطكطك براسي لزموا ايدية ثنينهم وسحلوني للغرفة الجوه وأنا أسمع ضحكاتهم الرخيصة ترن بكل زاوية بالبيت

أخر شي شفته قبل لا تغيب روحي هو صورة زبير المعلكة بالصالة والزجاج مالتها يتكسر جوه بسطال واحد منهم وابني أحمد الدر مادري شنو صار بيّ وبعدها تذكرت أن أبني بالروضة من دخلتهم علية حتى نسيت اسمي

لضربات جانت تنزل على جسمي مثل المطر كل ضربة توكع على ضلعي أحس عظامي تتفتت بس عقلي جان بمكان ثاني جان ويه أحمد الدر ويه ضحكته الصبح وهو يبوسني ويكولي ماما لتاخرين عليه بالروضة

غمضت عيوني حيل وأنا أتحمل الوجع الدم غطى وجهي وطعمة بحلكي صار يخنكني واحد منهم جان يضربني ببسطاله على بطني وهو يضحك واللخ يجر بشعري ويركع راسي بالكاع الوجع جان يفوق التحمل بس وسط هذا الموت كله فزت بجسمي رعدة فرح وسط الوجع
كلت بگلبي وأنا أتلوى جوه رجليهم الحمد لله يا ربي اشكرك يا الهي اضربوا موتوني بس ابني بعيد ابني بأمان هاي الفكرة خلتني أتحمل ضرباتهم اللي جانت تريد تنهي حياتي جانوا يحجون كلمات قذرة ويشتمون بزبير وأنا بس أردد بگلبي يا زهراء احميه.. يا زهراء سندي

بعد ما شبعوا غليلهم مني وشافوني جثة هامدة ما تتحرك عبالهم متت سمعت واحد منهم يكول بصوت خشن

- كافي عوفوها هاي انتهت خلي نطلع قبل لا يجي أحد البيت صار عبارة عن خراب وهذا اللي رادته سناء

سمعت صوت خطواتهم وهي تبتعد وصوت الباب الخارجي من ركعوه بقوة وراهم ساد الصمت مرعب بالبيت هدوء يشبه هدوء المگابر ما يكطعه غير صوت التنفس مالتي وصوت الدم وهو ينكط من وجهي على السيراميك البارد
فتحت عيني بالكوة الرؤية جانت عبارة عن غواش أحمر حاولت أتحرك صرخت صرخة مكتومة من الوجع أحس ضلوعي مكسرة وجسمي كله عبارة عن قطعة من النار البيت اللي جان قبل شوية يفوح بريحة زُبير صار ريحته حقد ودم وتخريب

سحبت نفسي بشلل أيديه جانت ترجف وأنا أحاول أجر جسمي على المرمر كل سنتمتر أمشيه جانت روحي تطلع بيه شفت الصالة يا ربي الصالة اللي تعبت بتأثيثها الصور المزهريات كلشي متفلش وصورة زبير صورة هيبتي وسندي مشككة والزجاج مالتها مطشر بكل مكان

- زبير لازم أوصل لزبير

جان هذا هدفي الوحيد لازم أحذره سناء اللي ذكروا اسمها هي الأفعى اللي جانت تتربص بيهم والأمانة اللي كالو وصلت خفت لا يكون زبير صار عليه شي
زحفت للمطبخ جان الموبايل مالتي عفته على الميز قبل لا يهجمون الطريق جان طويل أطول طريق مشيته بحياتي صرت أجر بجسمي وأنا ألهث أترك وراي أثر مال دم على طول الممر كلما أغمض عيني من الوجع أتخيل وجه أحمد الدر وأكول لازم أعيش علموده

وصلت للمطبخ الميز جان مكلوب والموبايل واكع بالكاع تحت الكرسي المكسور مدت ايدي المرتجفة أصابعي جانت مغطاة بالدم لدرجة إن شاشة اللمس ما جانت تستجيب بالبداية مسحت الدم بقميصي الممشگگ وحاولت أفتح القفل

دك الموبايل رنة ثنين وبكل رنة جان گلبي يدك وياها يا رب جاوب يا رب أنت الحافظ

انفتح الخط وجاني صوته صوته اللي جان قبل شوية يطمني

زُبير :- ها علويتي شصاير؟ شو داگة علية هسة؟ مو كتلج عندي اجتماع بالمديرية؟

ما كدرت أحجي غصيت بالعبرة وبالدم اللي سد حنجرتي طلعت مني بس ونة مكسورة

- ز.. زُبير

صوته تغير فجأة نبرة النقيب القوي تحولت لخوف وهلع

:- رحمة الزهراء شبيج؟ صوتج شبي؟ رحمة ردي علية!

- زبير هجموا عليه.. بالبيت ثلاثة زلم سناء زبير دير بالك سناء دزتهم

:- شنوووو؟ رحمتي احجي وياي أنتِ وين؟ أحمد الدر وين؟

حاولت أطمئنه بقايا قوتي هتفت وياه

- أحمد الدر بالروضة الحمد لله ما جان موجود بس أنا أنا مكسرة يا زبير البيت فلشوه الحكلي روحي جاي تطلع ولا تكول لواحد من اهلي ماريدهم يعرفونن بالصار لا تحجي لأحد

:- ثواني وأني يمج والله لأحرك الدنيا على روسهم رحمة الزهراء لا تسدين الخط خليج وياي رحمة تسمعيني؟

بدت الدنيا تدور بية وصوت زبير صار يبعد ويبعد الموبايل سحل من ايدي ونمت على وجهي بالدم بس جان بالي مرتاح لشيء واحد إن ابني بخير وإن زبير عرف الحقيقة

ما أعرف شكد مر من الوقت بس فزيت على صوت الباب وهو ينخلع خلع وصوت خطوات ركض سريعة جان هذا صوت زبير

زُبير :- رحمة الزهراء ... علووويتييي !! وينج؟

جان يصيح بجنون سمعته يدخل للغرف يكسر اللي بقى من الأبواب وهو يدور علية من وصل للمطبخ وشافني حسيت بيه وكع على ركبه يمي لزم راسي بيده اللي ترجف وهو يشوف وجهي المشوه ودمي اللي مالي المكان

زُبير :- يا بوية شسووا بيج يا بنت الأصول؟ ولك زبير هيج يصير ببيتك وأنت ماكو؟ بس كلة مني انا أبن الانذال دخلت لحياتج ووسختج وياي

جان يبجي بصوت مكتوم هو النقيب اللي ما تنهز اله شعرة شفته كبالي مكسور حاول يشيلني وأنا فتحت عيني شوية وكلتله بضعف

- زبير أحمد الدر لا تخليهم يوصلوله

باس ايدي المدمية وكال وهو يشد على سنونه وعيونه تطلع منها نار

:- وعيونج يا رحمتي وبعزة جلال الله إلا أشرب من دمهم واحد واحد وسناء هاي الحيةةة كتلچ عليها وأنتِ ما سمعتيني اليوم نهايتها على ايدي بس كومي وياي كومي يالعلوية البيت ما يسوى شي بدونج

شالني بين ايديه وحسيت بالأمان لأول مرة من ذيج اللحظة المرعبة وأنا بحضنه شفت صورة بيتنا بس كل اللي جان يهمني هو إن الأمانة أحمد الدر جانت بعيدة عن هاي القذارة

بعد ما طلعنا من البيت والسيارة تمشي بسرعة جنونية للمستشفى جان زبير يحجي بالموبايل ويه جماعته ينطي أوامر مشددة

:- اريد كل الكاميرات بالمنطقة السيارة اللي دخلت فرعي والزلم الثلاثة أريدهم أحياء أو أموات خلال ساعة وسناء جيبوها من جوه الكاع لو جانت ببطن الحوت طلعوها!

التفت علية ومسح على راسي بحنان وكمل كلامة

:- ارتاحي يا بعد روحي حقج راح يرجع مربع السبع ما ينسى ثاره وأنا زبير اللي الكل تعرفه

غمضت عيني وأنا أسمع دكات گلبه السريعة أدري إن الأيام الجاية راح تكون صعبة وإن الحرب ويه سناء وعصابتها بدت فعلياً بس طول ما أحنا سوى وأحمد الدر بخير كلشي يهون

٭٭٭٭٭٭٭٭

وصل زبير للمستشفى جان يركض بالممرات مثل المخبل عيونه صايرة دم وهدومه العسكرية ملوثة بدم رحمة الزهراء بعد ما دخلوا رحمة لغرفة العمليات الصغرى حتى يخيطون جروحها ويطمنون على ضلوعها وكف بالأسيبار وهو يرجف من العصبية

ما مرت نص ساعة وإذا بصوت صياح ونحيب يترس الممر التفت زبير وشاف أمه سناء جاية تركض وتلطم على صدرها بتمثيل متقن ودموعها عشرة عشرة

تقربت من زبير وشمرت نفسها عليه وهي تصيح

سناء :- يمه زبير يمه سودة عليه شصاير بمرتك؟ شني هالخبر الفجع گلبي؟ يا نذل الي تجرأ ودخل بيتك بغيابك؟

زبير وكف بمكانه جامد مثل الصخر عيونه مركزة بوجه أمه تذكر كلمة رحمة الزهراء وهي تكلة ان الرجال الهجم عليها كال الها سناء تسلم عليج جان يحاول يصدك إن أمه مستحيل تسوي هيج بس الشك جان ينخر براسه

نزل زبير ايد أمه عن جتفه بهدوء يخوف وكال بصوت ناصي

زُبير :- يُمه.. الزلم اللي دخلوا للبيت كالوا لرحمتي جملة وحدة.. سناء تسلم عليج والأمانة وصلت.. فسريري هاي الجملة بروح أبوية

سناء هنا جمدت لحظة بس سرعان ما تحولت ملامحها المفاجأة والبراءة المصطنعة ولطمت على حلكها

سناء :- ياااا عزززة العزاج يا سناء يمه زبير تصدك بهيج حجي؟ هاي حية هاي رحمة الزهراء اكيد تريد تخرب بيني وبينك وليدي هاي هي الدزت الزلم وهي الاتفقت وياهم يضربوها ضرب خفيف حتى تتهمني وتخلص مني وتنفرد بيك وبالبيت فرد نوووب وما تنطيني مجال للرجعة!

زبير ضحك ضحكة استهزاء مكسورة وتقرب من أمه لدرجة صار يحجي يم أذنها

- ضرب خفيف يُمه؟ رحمة الزهراء ضلوعها مكسرة وجهها ما ينگلب الدم تارس البيت تعالي شوفيها جوه تعالي شوفي التمثيل مالتها شلون صاير يا مرة تسوي بنفسها هيج حتى بس تتبلى عليج؟

سناء بدت ترفع صوتها حتى تلم الناس وتلعب دور الضحية

:- أي تسوي هيچ العلوية مالتك حاقدة تريدني أطلع من البيت ومن حياتك تريد تكسر كلمتي كدامك هي دزت على ذول الزلم وكالتلهم هيج كولوا حتى زبير يكره أمه يمه إنتَ ضابط ذكي شلون تعبر عليك هاي اللعبة؟

بهاي اللحظة طلعت الدكتورة من الغرفة وجهه جان قلق وهتفت ويا زبير

جمال :- سيادة النقيب المريضة استعادت وعيها بس وضعها النفسي مدمر وتكول أريد أحجي ويه زوجي ضروري قبل لا يجي أحد

زبير دفع أمه بخفة ودخل للغرفة سناء ركضت وراه وهي تصيح

سناء :- أنا أدخل وياك خليني أشوفها شلون تجذب كدام وجهي

رحمة الزهراء جانت نايمة على السدية وجهها عبارة عن خريطة من الكدمات الزرگ والخضر عيونها منفوخة وبالكوة تفتحها من شافت سناء دخلت ويه زبير فزت بجسم المكسر وحاولت تبتعد صرخت صرخة خنكتها العبرة

رحمة الزهراء :- طلعيهاااا زبير طلعها لا تخليها تتقرب مني هاي الحية هي الدمرت بيتي هي الي كالتلهم فلشوا البيت وما عليكم بالطفل

سناء تقربت من السدية بصلف وهي تصيح

سناء :- يا ظالمة يا جذابة أنا هيج أسوي؟ أنا أم زبير؟ ولج خافي الله أنتِ اتفقتِ ويه ناس غربة حتى تذبين التهمة براسي مو بعيد أنتِ الفلشتِ غراضج بيدج يا عديمة الضمير ولج ما تخافين من الله تردين تخربين بيني وبين أبني الي ماصدكت على الله انجمعت بيه من سنوات راحت

زبير هنا فقد السيطرة ضرب الميز اللي يمه بوكس خلاه يتفطر وصاح بصوت زلزل المستشفى

- كااااااافي سدي حلكج يمه ولا حرف!

التفت لرحمة الزهراء لزم ايدها المدمية وكال بلهفة

- رحمتي احجيلي كلشي لا تخافين منها أنا هنا

رحمة الزهراء جانت ترجف دموعها نزلت على الضمادات

رحمة الزهراء :- زبير واحد منهم طلع موبايله كدامي قبل لا يضربوني فتح سبيكر سمعت صوتها سمعت صوت أمك وهي تكولهم لا تخلون عظم صاحي بيها وأثاث البيت أريده يتفلش وإذا شفتوا الطفل لا ترحمونه زبير صوت أمك أعرفه أكثر من روحي جانت تضحك وهي تسمعهم يشتمون بيك وبشاربك وجانوا يدورون على أحمد الدر حتى يكتلونة زُبير جانوا يردون يكتلون أبنييي ابنك الوحيييد

سناء وجها صار أصفر بدت تتلعثم

سناء :- جذب هذا تسجيل صوت يشبه صوته زبير لا تصدك

زبير طلع موبايله جان جايته رسالة من صديقه بالاستخبارات فتح الرسالة جان فيديو من كاميرا مراقبة بفرع بيتهم طالع بيها سيارة سناء وهي توكف براس الفرع قبل الهجوم بعشر دقايق وينزل منها واحد من المجرمين ويصعد بسيارة ثانية هي اللي نفذت الهجوم زبير دار الموبايل على أمه وعيونه تلمع بدموع القهر والغضب

زُبير :- وهذا هم تمثيل يمه؟ سيارتج شجانت تسوي هناك؟ والرجال اللي نزل منها وصعد ويه العصابة هذا مو حمودي أبن خالي الي هو ابن أخوج لو من زمان ما شايفة انا ومتوهم بيه هسة ؟؟؟؟

سناء وكعت بالكاع ما لكت بعد مجال للجذب بدت تتوسل وتمسح برجل زبير وتهتف

سناء :- يمه زبير ردت أأدبها بس ردتها تخاف وتعرف إن البيت بي جبير ما ردتهم يوصلون للأذى الجبير بس ردت أكسر خشمها

زبير سحب رجله منها بقرف وكف بطوله وهو يباوعلها بنظرة خذلان

- تكسرين خشمها؟ فلشتِ بيتي وضربتِ عرضي وخليتي مثل هذول الحثالة يحطون ايدهم على علويتي وردتِ تكتلين ابني وكل هذا وتكولين تأديب؟

التفت لرحمة الزهراء اللي جانت تبجي بصمت ورجع باوع لأمه وكال بقرار نهائي

زُبير :- من هاي الساعة لا أنتِ أمي ولا أعرفج والزلم الدزيتيهم وحمودي ابن أخوج هسة كلهم بالسجن وحسابج وياهم بالقانون لولا شيباتج جان هسة خليتج تنامين بالسجن وياهم بس حسابج ويه الله جبير وحسابج وياي ما خلص

سحب زبير كرسي وكعد يم رحمة الزهراء لزم راسها وباسه كدام أمه وكمل كلامة بس وي مرتة

- سامحيني يالعلوية ذنبج بركبتي بس من اليوم ماكو بشر يمس شعرة منج حتى لو جان من دمي ولحمي

سناء طلعت من الغرفة وهي تجر أذيال الخيبة وهمّ يباوعون عليها بنظرات احتقار بينما زبير جان يحاول يلملم جروح كلبه وجروح زوجته اللي انهدم حيلها بسبب غدر الأقربين واتصل على صديقة طلب منه يأخذ أحمد الدر من المستشفى ويخلي ويا اولادة ويخلي عدهم بالبيت لمن يطلعون هو ورحمة الزهراء من المستشفى ورجع باس أيد مرتة وهتف وياها

:- انا يمج علويتي

- زُبير

:- عيونة

- لا تحمل نفسك هم الصار وياي تمامم ولا تضل تفكر

:- لج انا هسة متمني الموت يلفيني والخليفة عليي

- لااا أسم الله عليك مابية شيء يروحي يفداك كلشي

:- بنت الاجاويد

- هههههه اطلب منك طلب ؟

:- عيوني اشلعيهن واخذيهن

- أريد هسة عصير بُرتقال صافي

:- جنج علية ديالى بذات نفسها اجيبها الج واعصرها

- زبير

:- عيوني وروحي وكلبي يابعد راسي وشيبي

- أحبك حيل أنا العلوية تموت بدونك

:- تحسّين بشيء علويتي؟

- لا يروحي انا بخير لا تخاف بس هيچ حبيت اكلك علمود ترجعلي بسرعة

:- لاااا ماراح اعوفنج هسة أتصل على أحد يجيب النا

راح زبير لصفحة واتصل على واحد من جماعتة وطلب منه يجيب الهم العصير والكيك لرحمتة
ورجع كعد يمها وضل يبوس بيها ويكوم يبوس براسها ويحاول يخفف شوية من الطراگيع الي مسويتهن أمه بيها وراد يتصل بأهلها بس هية رفضت وأخذت التليفون منه وطلبت ما ينجاب طاري لهلها والسالفة تندفن هنا وهو نفذ كلامها ....

﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ وَهج الطف ٭٭

غيرت الملابس لـ سراج الدين و وصلتني رسالة رحت فتحت التليفون ودخلت على الرسائل لكيت الرسالة من أم البنين كتبت الي

:- چمر انا على الباب افتحيلي

عفت أبني سراج الدين على الجرباية ونزلت أركض شافتني أمي وصاحت بيه

بسمة :- بهداي شمالچ تركضين ولج لا تتأذين

جاوبتها وأنا أركض ...

- يمة بنانة على الباب منتضرة

طلعت أركض للباب فتحتة وضحكت هتفت وياها

- يااهلاً وسهلاً بالميرزا فوتي لجوة

:- خليفة هنا؟

- لا خية طالع فوتي وازعي براحتج هههه بيت وبلا زلمة كل الهلا بيج

:- يابعد العيون بالمهلي

دخلت أم البنين وياي وصعدت بيها للغرفة دخلنا وكعدنا هناك وهي كعدت على الجرباية وأخذت سراج الدين وخلتة بحضنها وانا كعدت كدامها وهتفت وياها

وهج الطف :- اكلج بنانة

- كولي يروحي

:- يحتاج اضيفج لو أنتِ مو غريبة من اهل البيت؟

- شسالفة تضيفيني جاية اشوفج انا مو اجربج

:- ايي عفييةة كلش مالي خلك أصعد بالماي وانزل بالچاي

- خرب إبليسچ ههههه چا ليش بس سراج أمين الدين وينه؟

:- هناك بغرفة امي نايم تعرفين بعدة صغير مالي خلك متاغاتة

- الله يخليهم الج بس شنو ما ناوية تسوينهم ثلاثي؟

:- لا أسم الله همّة سراج وأمين وماجاي اشوف نفسي ادور ثالث؟؟ لا وعز الله يدخل خليفة يكلي الگفشة منفوشة مالحك لنفسي أسبح

- ههههههه شسالفة ولج ترى ﴿ الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾

:- والحمدلله عندي هذول الإثنين خليني مكتفية كلش بيهم وكافة عليهم الله يرزق المحروم

- أمين والله يحميهم الج

:- عوفچ مني هَسّة شعجب ما جايبة حيدرة وياچ على علمي ما يوكع من أيدچ؟

- وهو أخوچ يخليني اتنفس؟

:- أخوي؟؟؟

- ايي ألفاروق الأعظم ماخذ حيدرة وطالع

:- صدك صحيح السمعتة

- شنووة؟

:- علساس ألفاروق الأعظم أتقدم الچ !

- هذا أخوج بطران والحمزة ،،، غيري الموضوع دخيلج

:- زين ليش؟؟

- شنو اليش؟

:- خلينا نحجي مادام انفتح الموضوع

- بشنو نحجي چمر كتلج غيري من الأخير انطيتها الكم مُستحيل اتزوج بعد علي الهادي مُستحيل ماكدر وماراح اكدر ولا راح اتقبل نفسي أصلاً

:- ترى علي الهادي راح لدار حقة والله يرحمة ان شاءالله والف رحمة ونور على روحة هذا مو يعني نوكف حياتج الي هسة جاي تبدي وفوك هذا كلة عندج ابنج حيدر الكرار بعدة توة دخل الثلاث سنوات ماراح تكدرين له لوحدج يحتاج أب شوفي ما أحجي هسة لأن أخوي ومدري شنو لا ابد والله بس لأن أنتِ تستاهلين وأحد يحبچ ويكلج تم وحاضر ما تستاهلين هيچ تعيشي وأنتِ بزهرة عمرچ

- جمر والنبي ماكدر ما اتقبلها على نفسي

:- ليش انطيني سبب أخوي بيه شيء؟

- لا مابية شيء وألف بنت تتمناه جسم وجمال ومال والله يلكي الي تحبة وتصونة بس مو أم البنين

:- وليش مو أم البنين؟ شنو رأيج اذا هو عايف البنات كلهن وطايح عليچ؟ لو رافضتة لأن مو سيد؟

صفنت بوجهي أم البنين ورفعت حاجبها الي وهتفت وياي بصوت بيه لمحة استغراب

ام البنين :- شنو يعني ألفاروق الأعظم مو سيد؟

وهج الطف :- لا هَوّ مو سيد

- شلون مو سيد وهو أبن خالي السيد صفاء الحسن لا تلحسين عقلي!

:- هو أبن ابوي بس أبنة الروحي يعنيي الفاروق الأعظم هو ابن الروح لـ السيد صفاء الحسن

- هاي شلچ بيها؟

:- عبالي تعرفين

- مو مهم والقصة مو سيد لو عامي القصة تقبل وانا ماكدر اتقبل نفسي وي أي أحد وانا هسة لازم أروح

:- شني وين رايحة بعد وقت توچ اجيتي ترى ما تتغدين عندنا؟

- لا بعد روحي شلشتيني هسة رايحة وأرجع الج بغير وقت احبج هواي

:- بنانة

- عيوني أنتِ چمر

:- بيچ شيء انكلب حالچ بثواني!

- اتذكرت سالفة موصيتني عليها أمي ولازم اسويها ولا شيخلصني من لسان عمة السادة أنتِ أدرى بيها بغير وقت الج الوقت كلة اوعدج بوساااتي الج

:- تمام حبيبتي على راحتج

- بالج على الامراء الدين مع السلامة

:- اوصلج للباب ثواني

نزلت وراها أركض أحاول ألحك عليها أريد أصلح الغلطة اللي طلعت من لساني بدون وعي

:- بنانة بنانة أوكفي خية!

صحت وراها بس هي جانت تمشي بخطوات سريعة جنها كطعت الخيط اللي يربطها بالمكان وصلت للباب التفتت عليه ووجهها مخطوف عيونها بيها نظرة غريبة مثل المتيه وحيرة وعلامات استفهام مالهن أول ولا آخر

- وهج روحي لجهالج نلتقي بغير وقت

كالتها وسدت الباب وراها وكفت بمكاني السكوت صار يصفر بذاني أحس گلبي يدك دكات قوية ومو منتظمة

:- يا غبرة يا وهج الطف شسويتي؟

همست لروحي وأنا أضرب على صدري بيدي التفتت أريد أصعد ولكيت أمي واكفة بباب الصالة وجها ما يتفسر عيونها حمر وصايرة نار من العصبية

تقربت مني بخطوات ثكيلة جانت حاطة شالها على جتفها وعاقدة حواجبها بطريقة خلت ركبي ترجف وكفت كبالي وصوتها طلع مخنوك بس حاد

بسمة :- شنو حجيتي شكلتي؟ وهج الطف عيدي الي كلتي لـ أم البنين ليش هيچي طلعت مرعوبة؟

بلعت ريچ بصعوبة حاولت أرگع الموضوع

:- يمة ما كلت شي بس جنا نسولف على الخطوبة و...

قاطعتني بضربة قوية على أيدها تصفك أيد بأيد وصاحت

- من يمتا تچذبين علية وهج الطف لج انا سمعتج بإذاني هذن سمعتج وأنتِ تگولين الها الفاروق الأعظم مو سيد سمعتج تگولين ابن الروح مو ابن الصلب ولج يمة هاي أمانة سر مدفون شلون تطلعيه وتشمري بوجه البنية؟

:- يمة والله مو قصدي هي جانت تعاند وتكول ما أريد وأنا عبالي ترفضه لأن عبالها سيد وهي تخاف من هاي المسؤولية ردت أقرب المسافات والله ردت مصلحة أخوي

أمي لزمت راسي بيديها وهي تهز بيه بقهر

- يا مصلحة ولج؟ يا مصلحة والولد نفسه ما يعرف؟ ألفاروق لو درى الدنيا تنكلب وما تكعد السيد بشير قيصر لو درى شلون فرطتي بسره شيكول؟ ولج هذول سادة أسرارهم عِرضهم أنتِ تدرين أم البنين هسة وين راحت؟ تدرين هاي الكلمة وين راح توصل؟

نزلت دموعي غصب عني كعدت على الدرجة الأولى من الدرج وحطيت راسي بين رجليه

:- يمة والله الساني زل ما جنت حاسبة حساب عبالي هي تعرف عبالي الكل يدري بس أنا غشيمة

أمي كعدت يمي بس مو بحنان جانت كعدت المفزوعة والخايفة من الجاي

- محد يدري وهج الطف محد! الفاروق الأعظم عاش عمره كله على إنه سليل هاي الدوحة يخدم الحسين بدمه وعرگه على إنه ابن هالعائلة هسة إذا راحت أم البنين وحجت أو إذا بينت بعيونها نظرة شفقة للفاروق الأعظم الولد يموت أنتِ ذبحتي أخوج بلسانج

:- يمة لا تخوفيني بنانة عاقلة ومستحيل تحجي

- البنية انصدمت يا وهج الصدمة تخلي الواحد يحجي بدون وعي وهسة ألفاروق الأعظم إذا حس بشيء شلون راح يواجه السيد؟ وشلون راح يواجه روحه؟

:- مادري مادري ساعتي السودة ...

عفت امي وصعدت لفوك مرت وقت وأنا بغرفتي سراج الدين وأمين الدين نايمين يمي بس عيوني ما غمضت كل ما ارمش أتذكر نظرة أم البنين من كتلها ابن الروح أحس الكلمة صارت جمرة ببلعومي البيت صار هدوء حتى أمي ما رجعت وحجت وياي لمن نزلت لكيتها تروح وتجي بالمطبخ وهي تسبح بسبحتها وتستغفر وأنا أدري بداخلها بركان رجعت صعدت لغرفتي وأخذت وقت قصير بعدها كلت انا ماجنت اقصد أسوي شيء مو زين لهذا لازم أمي تحجي وياي نزلت الها لكيتها كاعدة بالمصلى تقربت منها وبست أيدها وهتفت وياها

:- يمة فدوة رحتلج شسوي هسة؟ أروح لبنانة وأحلفها ما تحجي؟

أمي سحبت أيدها بهدوء وقهر وردت عليه

- المي إذا انجبّ ما يلموه يا يمة الكلمة طلعت هسة ما بيدنا غير الدعاء كون الله يستر علينا من هاي السالفة وكون الفاروق الأعظم ما يوصله خبر لأن إذا عرف بس الله يكدر يحلها لأن هدمتي بيت بناه السيد صفاء الحسن بسنين بكلمة وحدة طايشة منچ

طلعت من يمها وأنا أحس ذنب الدنيا كله فوك جتفي شلون اذا سولفت ام البنين ؟ شلون اذا اجانة شلون راح أباوع بوجهه ؟ شلون راح يجني يوم والفظ كلمة وياه واكلة

:- أنتَ مو أخوي بالدم؟

﹉﹉﹉﹉﹉﹉﹉﹉﹉﹉﹉﹉﹉﹉﹉
بعد ما طلعت أم البنين من بيت وهج الطف وهي تمشي وما تحس بجدامها جانت الدنيا تفتر بيها الكلمة اللي ذبتها وهج بذانها جانت مثل الطكة بالراس ،،، أبنه الروحي.. مو سيد وصلت لبيتها دخلت وسدت الباب وصورة ألفاروق الأعظم ما فاركت خيالها هذا الزلمة اللي هيبته ترج البيت اللي الكل يحلف براس أبوه السيد صفاء الحسن يطلع متبنى؟

وهي غاركة بصفنتها انفتح الباب ودخل ألفاروق الأعظم للصالة وبأيده الصغير حيدرة جان شيله على جتفه ويضحك وياه ضحكة تترس البيت أمان نزل حيدرة من جتفه وهو يكول له

الفاروق الأعظم :- بطل روح لأمك يلة سبع

التفت الفاروق الاعظم وشاف أم البنين واكفة بالهول وجها أصفر وعيونها بيها نظرة غريبة نظرة أول مرة يشوفها مو خوف ولا رفض جانت نظرة تسائل وكأنها جاي تشيد ملامحه من جديد تقرب منها نزع شماغه وشمره على القنفة وهتف بصوته الجهوري

الفاروق الأعظم :- الله بالخير أم البنين شو واكفة بمجانج؟ صاير شي؟ مريضة؟

بقت ساكتة بس تباوع لطوله لرزانته لملامحه اللي ما تشبه ملامح السيد صفاء الحسن السمراء الحادة هو جان أبيض بملامح مرسومة رسم بلعت ريچها وكالت بصوت يرجف

- لا مابية شي، بس جنت يم وهج الطف وتوني رجعت

الفاروق الاعظم من سمع اسم أخته ابتسم وهتف

:- هاا يعني جمرات السوالف لسه ما خلصت؟ وشلونهم الولد؟ وخليفة شلونه؟

كلب أم البنين ينعصر كعدت على الكرسي القريب منها وهي تفرك بأيديها

- زينين كلهم زينين الحمدالله

:- ألف الحمدالله والشگر

- فاروق..

:- عمرة الضاع!

- أنتَ شكد تحب السيد البشير قيصر ؟

استغرب السؤال عقد حواجبه وتقرب خطوتين صار واكف كبالها مثل السد المنيع

:- شنو هالسؤال بنانة؟ السيد مو بس اخوي السيد هذا هو اللي سواني زلمة هو اللي شالني من جانت الدنيا ضايكة بية أنا ابن السيد صفاء الحسن صح بس الدنيا خلتني اضير ابن السيد البشير قيصر ليش تسألين؟

ارتبكت ام البنين ودارت وجها عنه

- لا.. ماكوو شي بس وهج الطف حجتلي عن علاقتكم وشلون هو يحبك أكثر من الباقين

الفاروق الأعظم ضحك ضحكة كصيرة بس عيونه جانت تراقبها بدقة

:- أدري بيج بنانة وراج سالفة وجهج ما يبشر بخير والكلمة محبوسة بطرف لسانج إذا الموضوع يخص جيتي وخطبتي الج فآنا كتلج أنا شاريج وأريد حيدرة يصير بحمايتي وما يهمني أي شي ثاني

هنا أم البنين ما كدرت تتحمل رفعت عينها بيه جانت تريد تسأله

- أنت تدري؟

بس خافت تكسر هذا الشموخ كالت بصوت ناصي

- فاروق أنتَ لو بيوم عرفت إنك مو الشخص اللي تعتقد إنك هو.. يعني لو تغيرت الحقيقة اللي عشت عليها عمرك كله شتسوي؟

الفاروق الأعظم جمدت ملامحه عيونه صغرت وهو يباوعلها بحدة تخوف تقرب منها أكثر وهتف وياها

:- بنانة.. احجي عدل. شنو هاللغز؟ سامعة شيء؟

- ما حجينا شي فاروق مجرد سؤال.

لزم طرف الكرسي وضغط عليه بقوة وهتف وياها بقساوة ما جانت متخيلتها

:- أنا السيد الفاروق الأعظم أبن السيد صفاء الحسن أنا اللي السادة وعوام المنطقة يعرفون أصلي وفصلي شنو اللي ممكن يتغير؟ أنا ابن هذا البيت وابن هذيج الدوحة لا تخلين سوالف النسوان تضيع عقلي وعقلج قسماً بالله يا بنانة لو أحس أحد جاي يمس أصلي بكلمة لو يفتح باب مسدود أحرك الدنيا وما بيها

سكتت أم البنين حسّت إن السر اللي عدها مو مجرد خبر هذا قنبلة لو انفجرت تكتل الكل شافت بعيونه ولاء غريب للسيد صفاء الحسن ولاء لدرجة إنه مستعد يمحي أي حقيقة تعارضه

- خلاص فاروق ماكو شي تعوذ من إبليس أنا بس تعبانة شوية أصلاً راح أخذ حيدرة واصعد لفوك

دار وجهه عنها أخذ شماغه وطلع برة الصالة وهو يدردم بغضب مكتوم وهي بقت بمكانها تتخيل شكل وهج الطف وهي تحجي وتتخيل شكل الفاروق الأعظم لو درى بيوم إنه ابن الروح مو ابن النسب!

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُبر ٭٭

صدمنا خبر سفر حوراء الجان مفاجأة والمشكلة حتى صديقتها غادي ماجانت تعرف ونصدمت مثلنا لوين راحت وشنو صاير وياها محد يدري وهو حاضرتني وما تتواصل وي احد

بعد ما خلصت محاضرات رجعت للبيت بس اختنكت للوضع خليت وطلعت صرت افتر بالسيارة لمن صار الليل وانا بالسيارة رحت ترستها بنزين
واستمريت افتر بالشوارع وانا محتار بزماني

شلونها؟
شنو چاي تسوي؟
وين كاعدة؟
اكلت لا؟

أسألة هواي ماكو الهن أي جواب ضليت بسيارتي لحد ما صارت الساعة 12 بليل الجو قسى بالبرد ومطرت حيل ساء الوضع وكفت سيارتي بشارع عام والمطر نازل علية شغلت قصيدة باسِم " زينب لفت " وضليت ابجي

لأول مرة بحياتي ابجي من الحركة الي جانت بيه بجيت من كلبي وبكل حرگتي ابجي واضرب على الستيرن اذا موش الي ياربي وموش قسمتي ليش تخلي حبها بكلبي؟ ليش هيج تكسرني بيها ياالله شنو مسوي بحياتي حتى اتجازة وياها هيچي؟ ليش هذا الشعور القاسي أمر بيه بيا ذنب؟ ذنب حبيتها من كلبي ليش من دون البنات ليش إلا هية ياالله

شلت جهازي وصرت ادزلها بصمات رغم هية حاضرتني وأعرف ماراح تسمعهن ولا يوصلن إلها لكن حجيت كلشي طلعت كل الي بكلبي ونمت بالسيارة

رغم برودة الجو نمتت ،،، كعدت الصبح على شرطي المرور وهو يدك بيدة على الجامة السيارة اعتذرت منه وشغلت السيارة ورجعت للبيت واتلكتني امي ميتة من الخوف علية

جميلة :- هاي وينك يمة؟؟ عززة وجهك صاير ثلچ تعال يمة طب تعال وين جنت ياروحي أنتَ ؟؟

شبر :- يمة راح أصعد أسبح بماي دافئ اصير زين لا تخافين علية

:- راح اجهزلك الريوك أسبح وانزل

صعدت لغرفتي وجسمي يختض من البرد أحس عظامي تجرش مو بس من جو الشارع لا.. أحس برودة بوسط گلبي ما يطفيها حتى تنور نزعت هدومي المبللة اللي صارت تثگل عليّ وشغلت الماي الحار وگفت جوه الدوش وأحس الماي ينزل على راسي مثل النار بس ما فاد بقيت أرجف غمضت عيوني وتخيلت وجه حوراء بين البخار ضحكتها، نظرتها الأخيرة شلون راحت وعافتني بنص العاصفة وطفّت كل شموعي؟

طلعت من الحمام لبست هدومي وشمرت الخاولي على جتفي ونزلت الدرج وأنا أجر بجدمي جر ريحة الچاي والخبز الحار مالت جميلة الجميلات تترس البيت بس يا ريوك هذا اليشتهيه اللي بگلبي؟ لگيتها كاعدة والصينية مجهزة والگيمر والچاي والبيض بس هي عينها على الباب من شافتني فزت ووجهها ينضح خوف ومحنة

شبر :- يُمة ليش تتعبين روحج مالي نفس بكل شي

جميلة :- اسم الله عليك يمة گرب لية تعال اكل لگمة واشرب چاي تدفي گلبك وجهك أصفر كركم يا شبر شجاك يبعد طوايفي؟

ما جاوبتها رحت گبل تمددت على الكاع بصفها شمرت روحي مثل الطفل اللي مكسور جناحه وخليت راسي على رجلها رفعت إيدها ذيچ الإيد الدافيّة اللي ريحتها حنة وطيبة وبدت تمسح على شعري اهنا.. اهنا انهاريت حسيت السد اللي بنيته طول الليل انهار بلمسة إيدها انهد

:- يُمة.. ادعيلي فدوة أروح لتراب رجلج بس ادعيلي الله يبرد ناري أحس صدري جاي يوجر نار يمة نار وماي الدنيا كله ما يطفيها

- يا بعد بيتي وجمال عيوني يا يمة شصاير بيك؟ أنت شبر؟ أنت السبع اللي تهز الكاع؟ شنهو اللي كسر ظهرك وخلاك تنام برة وبالمطر؟ يمة احچيلي أنا أمك أنا اللي شلت همك قبل لا تطلع للدنيا منو اللي خلّى حالك هيچ؟

:- يُمة.. حبيتها حبيت وحدة مو إلي أو يمكن أنا مو إلها حبيت حوراء حب ما شاله بشر صرت أشوف الدنيا بعيونها وأتنفس من الهوا اللي تتنفسه فجأة يمة فجأة وبدون إنذار سافرت هههه راحت وعافتني بلا كلمة بلا وداع بلا حتى سبب يبرد العلة حظرتني من كل مكان سدت الأبواب بوجهي وخلتني أطگ راس براس من جانت موجودة جانت مفضلة ذو الفقار علية وهسة يمة رااحتتت يمة ليش الحب هيچ يذل؟ ليش اللي نحبهم من كل گلبنا هم أول ناس يكسرون بخاطرنا؟

غمضت عيوني وأنا أحس بدموعي بدت تبلل ثوب أمي جانت تمسح على راسي بقوة وكأنها تريد تطلع الوجع من راسي بإيدها

- يا يمة يا بعد رويحتي الحب مو ذلة بس النصيب مرات يصير طعمه مر اسمعني يمة البنية اللي تعوفك بنص الطريق وهي تعرف بيك شكد هاويها هذي ما تستاهل دمعة من عيونك الله راد يراويك معدنها هسة قبل لا يربطكم سكف واحد وتصير الكسرة أعظم يمة الدنيا ما توكف على أحد وأنت زلمة ومعدنك ذهب ألف وحدة تتمناك واذا البنية مخلوقة الك فــ مستحيل تصير لغيرك شلون انا وابوك أبتعدت عنه 16 سنة ومرجعي وين؟ هي رجعت له وبنيت وياه بيتي من جد وجديد لأن نحن الله خالقنة سوة

:- لا تكولين هالحچي يمة ما أريد ألف وحدة أريدها هي ليش هي بالذات؟ ليش كلبي اختار أصعب طريق؟ أدعي ربي يمسح حبها من بالي وأرجع أصلي وأدعي يرجعها إلي صرت مثل المخبل أدز بصمات وأعرف ما راح تسمعهن أحجي ويا خيالها بالمطر أصيح باسمها والصدى يرجع عليّ يستهزئ بية يمة أحس روحي ضاعت

- يا بعد أمك أنتَ بعدك صغير والوجع هسة حار بيك باچر تبرد وباچر تعرف إنو الله من يبعد عنك شي مو معناه يريد يعذبك لا.. معناه جاي يحميك من وجع أكبر يمكن لو بقيت وياها جان انكسرت كسر ما إله جبر ارفع راسك يمة ما عاش اللي ينزل راس السيد شبر الصادق تعوذ من الشيطان وصلي ركعتين وذب حملك على الله المكتوب على الجبين لازم تشوفه العين وإذا هي نصيبك لو سكنت ورا السبع بحور ترجعلك وإذا مو نصيبك فالله يعوضك باللي تلم جروحك وتعرف قيمتك

:- أدعيلي يمة بس ادعيلي أصبر. مالي غير دعائج يخلصني من هالمحنة أحسني غريب حتى ببيتي غريب عن روحي

بقيت نايم على رجلها وهي تقرأ عليّ آيات وتمسح بدموعي بطرف شيلتها وصوتها الهادئ بدة يسكن العاصفة اللي بصدري شوية شوية المطر برا بعده يصب بس اهنا يم رجليها حسيت بدفو جنت فاقده طول الليل بس السؤال اللي بقى ينخر براسي: يا حوراء هم يجي يوم وتعرفين شسويتي بية؟

بهذا الوقت حسيت بوزن صغير شمر روحه فوك ظهري وصوت ناعم مثل زقزقة العصافير كسر حاجز الصمت والدموع اللي جانت غاركة بيه المكان هذا جهاد الحسين بزر الكعدة مال السادة اللي ضحكته دائماً تذكرني إنو الدنيا لسه بيها جانب صافي ما ملوث بخيباتنا

جهاد الحُسين :- شبربر .. شبربر نمت هواي كافي نوم شوف شجبتلك اليوم لازم نخلص الرسمة أنتَ وعدتني شبوري خلص رسمتة وصار دور رسمتك شبربر

رفعت راسي شوية من حضن أمي مسحت وجهي بطرف رداني وحاولت أرسم ابتسامة باهتة كوة استخرجتها من وسط القهر شفته شايل كراسته وأقلام التلوين المشمرة بكل مكان وبيده ورقة مشخبط عليها ألوان مخربطة بس بعينه هي بيغاسوس

شبر :- يا بعد أخوك جهادي تعبان بوية خليني أرتاح شوية وأكوم وياك

جهاد الحسين :- لااا أمي تكول شبر وشبير اسباع وما يتعبون شوف رسمت سيارتك بس سويتها تطير فوك الغيوم يلا كوم أريد أرسم وجهك بس لا تسوي حزين سوي هيج افتح حلكك

أمي ضحكت من كل كلبها ومسحت على راس جهاد الحسين وباوعتلي نظرة معناها كوم لخاطر هالطفل سحبت نفسي وكعدت سحبني جهاد من إيدي وكعدني على القنفة وفرش كراسته بالكاع كدامي

شبر :- ماشي يا فنان شتريد نرسم اليوم؟

جهاد الحسين :- نرسم بيت جبير وبيه حديقة وأنتَ واكف بالنص وتضحك شبر ليش عيونك حمرة باجي؟

سؤاله جان مثل السهم طفل بعمر الورد يحس بوجع أخوه بلعت غصتي وحاولت أشغل نفسي بالأقلام

شبر :- لا يا حبيبي هذا المطر دخل بعيني وسواها حمرة يلا جيب القلم الأخضر خل نرسم شجر وجيب القلم الوردي نلون الورد تدري جهاد؟ الورد حلو بس شوكه يأذي اليد الي تچيسه وهي ما تعرف

جهاد الحسين :- إذا الشوك أذانا نقصه بالمقص شبر ليش تبجي عليه؟ نجيب وردة ثانية ما بيها شوك بابا يكول الشوك فقط بالصحراء ونحن ما نروح للصحراء نضل عايشين هنا

باوعت لجهاد الحسين وسكتت .. كلامه رغم بساطته جان درس لطفل يشوف الحل سهل : اللي يأذيك عوفه وازرع غيره ،،، بست راسه حيل وشميت ريحة الطفولة بيه وحسيت غيمة سودة انزاحت عن صدري بسببه

كضيت الساعة اللي بعدها وأنا أحاول أندمج وياه أشخبط وألون وأسمع سوالفه الما تخلص عن الروضة وعن أصدقاءه أمي جانت تراقبنا من بعيد وصوته و أنفاسة الهادئة بدت تبرد النار اللي بگلبي

كمت من يم جهاد الحُسين بعد ما رسمتله بطل يشبهه ورحت شربت استكان چاي دافي من إيد جميلة الجميلات باوعت من الشباچ المطر خف والشمس بدت تطلع من بين الغيوم

: شبر مهما يطول الليل الصبح جاي لا محالة

حوراء راحت واخذت وياها قطعة من روحي بس تركتلي درس قاسي راح يخليني أعيد حساباتي بكل شي نزعت غلاف المبايل وهمست لنفسي

: يا ربي إذا جانت خير إلي فـ درب السد خلي يرد جيبها لحد بابي وإذا جانت شر وكسرة خاطر فـ امسح حبها من ذرات دمي وعوضني باللي تستاهل صبري أنا شبر الصادق والكسر اللي ما يموتني يخليني أقوى من الحديد

التفتت على جهاد الحُسين اللي جان يصيحني مرة ثانية يريدني أشوف تلوينه ابتسمت بوجهه صدك هالمرة الحياة لهسة بيها ألوان حتى لو أغلى لون ضاع مني بالزدحام

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ غدير الله ٭٭

بهذا اليوم بليل بعد العشة كعدنا كلنا بالهول على التليفزيون وانا جنت كاعدة بالقنفة ويمي كاعد أخوي علي الباقر جان حاضني من ظهري ومخلية راسي على صدرة وجانت بالقنفة الكدامنا كاعدة طيبة الزهراء ومتمدد علي الصادق على طول القنفة ومخلي راسة على رجلين مرتة الي هية جانت تلعب بشعرة وامي جانت كاعدة بالنص ومتگية على القنفة الي بالنص ويمها كاعد علي الكاظم مخلي راسة على جتفها و ألمعتز باالله جان كاعد على يمينها و علي التقي و علي النقي جانوا نايمين على رجليها
و علي الرضا و علي السجاد جانوا طالعين .... وهاي كعدتنا واندماجنة كلة لأن جنا كاعدين نباوع توم وجيري ولمن انتهت الحلقة الأولى

علي الباقر :- اوف ليش خلصت طلعي ثانية ...

طيبة الزهراء :- جاي تحمل النت ضعيف لان داتمطر

غدير الله :- طلعي الحلقة الي شفناها ذاك اليوم

:- ما تملين منها شفتيها مليون مرة

غدير الله :- لااا ما امل طلعيهااا

علي الصادق :- يا حلقة؟

طيبة الزهراء :- حلقة توم جيري من عود توم هو متمرض بهذا الحب الأحمر وبعدين يطلع جيري هو يرسم على وجه وآخر شيء صدك يتمرضون ويكعدون على الشباج

العلوية :- هاي سولفتها طيبات المن مطلعيها بعد

غدير الله :- لاااا ماعلييةة طلعيهاا

علي الباقر :- داام غديرة تريدهاا طلعوها بسرعة

طيبة الزهراء :- بوووية هذايا كدامكم جاي يحمل خلي يشتغل وتطلع الحلقة

هنا بهذا الوقت التفتت علي الكاظم وهتف وي أمي

علي الكاظم :- صدك يمة شوكت رايحة للوادم؟

العلوية :- باجر العصر ان شاءالله نروح انا وعمتك وبسمة وان شاءالله خير

علي الصادق :- يعني صدك راح تخطبون اله؟

علي الكاظم :- وليش متفاجئ مو زلمة مو من حقي اتزوج واستقر؟

علي الباقر :- ولك لو متزوج مَنّوشة أشرف الك

:- خييير خييير شنو أشرف الي؟

العلوية :- يقصد اكبر منها

:- ترى البنت جبيرة

غدير الله :- اكظيم لا تضحك على روحك البنت لهسة تلعب

:- المهم عاادي خلوها تلعب وياي

العلوية :- المهم هسّة جاي أفكر أخطب منهم مرة ثانية ...

طيبة الزهراء :- شلون يعني؟

العلوية :- يعني ما ناخذ بَسّ ملاك لا أخذ منهم نسّوان إثنين

علي الباقر :- اذا باوعتي الييي وجنتِ تقصديني والزهرة أطلع هسة بالمطر اشك هدومي واخليكم تاخذوني لــ الشماعية ولا اتزوج مااششي؟

علي الصادق :- اييي وما تتزوج شنو منتضر؟

- مالك غرض أنتَ ما كاعد على كلبك انا لا تحجي

العلوية :- كش وبرة ما تتكابلون شمالكم؟ ومنهو كال انا أقصد عليك ماريد الك شبيه مخبلة اخبل بنت الناس وياك

- خفة وراحة دوم هيج فكري ولا تورطين بنات الناس وياي

غدير الله :- چا لمنو تردين تخطبين اذا مو لعلي الباقر؟

هنا امي صارت تباوع لــ ألمعتز باالله الي هو بسرعة رفع ايدية الاثنين وصاح بصوت جهوري

ألمعتز باالله :- لا تعايني إلي ترى اسوي سواية علي الباقر زواج ما اتزوج تردين روحي زوجيي ابنج علي الرضا هو من عمري عود زوجي ياالله تجين آلية

العلوية :- ترى انا أريد أخطب لــ علي الرضا منو ذاب الكم عظم أنتَ و علي الباقر ليش تحسبون نفسكم محور الكون؟ ماتردون تعرسون ضلواا لمن تموتون وينگطع نسلكم والله ليش؟ لان حضراتكم جنتوا معتگفين غم اي والله

غدير الله :- هههههه تستاهللووون

علي الصادق :- بسّ يمة علي الرضا مو بالة يتزوج ابد ما أحس يريد هلشيء ؟

- هية أخت ملاك شكبرها ؟

غدير الله :- ياهي سُكر لو نوف؟

- لا نوف!

طيبة الزهراء :- تردين تخطبين لعلي الرضا نووف؟

- اييي

غدير الله :- لااا يمااا شيليها من راسج

- ليش شبيها البنية حبابة و مأدبة!

غدير الله :- البنت أدب أدب ما حجيت شيء بس يمة البنية تكبرني بخمس سنوااتت يعني هية اكبر من علي الرضا
بـ أربع سنوات

- هية المفروض اخطب نووف الك يالمكموع

علي الكاظم :- هسة انا اريد ملاك تلطم على نوف بوية شعلية بالمحروسة انا أحب أختها تقبليها يعني احب بنية اتزوج أختها ؟؟؟

- هذا الحب منين طلعلي ما تكلي؟؟ آخر وقت والله

علي الكاظم :- هسة روحن باچر شوفن الوضع والله كريم حتى بليل نكعد نحن الزلم ...

- شمالك مستعجل غير ننطيهم مجال يفكرون؟

علي الكاظم :- مااكو مجال يمة براس السنة انا معرررس ماعلية ادخل الــ سنة الجديدة وانا عريس وي عروستي

- الله يهديك ماكول غير هيچ ،،، بس قبلها باچر الصبح تطلع أنتَ و ألمعتز باالله و علي الرضا وتحجون وياه تشوفوا الي بلكي الله يقتنع علمود من نروح العصر نحجي بسالفة ملاك و سُكرة الك و لاخوك

ألمعتز باالله :- على هذا الخشم تدللين علوية ...

علي الكاظم :- اذا هيچ سهلة

علي الباقر :- يلاا شغلوا خلونا نشووف

طيبة الزهراء :- جنت منتضرتكم تخلصون كلامكم

شغلت طيبة الزهراء حلقة جديدة من توم جيري وهنا علي الصادق كام ولزمت ايدة طيبة الزهراء وهتفت وياه

طيبة الزهراء :- وين رايح؟

علي الصادق :- داخ راسي صاعد انام

- جاية وياك اوكف

:- لا خليچ هنا كملي وياهم انا صاعد

- لااا جاية وياك ماريد أشوف شيء

العلوية :- بيك شيء صداقي يمّة؟

:- لا يمّة مابية شيء والله بس راسي دااخ من التلفزيون وهم الصوبة نعستتت تصبحون على خير

العلوية :- أنتَ الخير يابعد أمك ...

هنا علي الباقر همس وي نفسة ولأن انا جنت كاعدة يمة سمعتة بوضوح رد على كلام أمي

علي الباقر :- عمت عيني اذا علي الصادق الخير!

غدير الله :- لك اشش لا يسمعك شيخلصنا من لسانة

- خلي يسمع شنهي خايف منه أعلي صووتي واخلي يسمع؟

:- يااا علييي لخاطري مشيها ليلة وحدة بسس خلينا نعيش ليلة وحدة بس بهذا الهدوء والجمال ...

- سكتنااا

واستمرينا نشاهد توم جيري ولا من عقلنا مندمجين ونضحك وميتين عبالك أول مرة نشوف لمن أتأخر الوقت ناموا علي التقي و علي النقي على رجلين امي لهذا كامت و علي الكاظم و ألمعتز باالله شالوهم صعدوا بيهم وصعدت امي وياهم حتى تنومهم بغرفتهم وتنام هية هم

أخذ علي الباقر باس ايدي وهتف وياي وهو يمشي ايدة على خدي ويتحسسة

علي الباقر :- ليش التفاحات ذبلانات؟

غدير الله :- تفكير وقلق و سهر وكلشي اكيد اضعف

- وعليمن بوية شكوو؟

:- شنو شكو بس دراسة كافي شايف قوانين العراق مال الزمهن واحطهن ....

- وين تحطيهن؟

:- بعيووون حموورابي هو والمسلة مالتة مكيفين العراق أول من سن القوانين وهو آخر من يطبقهن

- هههههه أنتِ اختاريتي هذا الطريق وبعدين ماكو طريق سهل والمشي علية يخبل لابد كلهن بيهم صعوبة

:- هههفف نتحملل ونخلص ما ضل شيء بس سنتين واودعهم

- تصيرين أحلا محامية بالكون

:- لا مو بالكون شسالفة

- بعيوني أنتِ احلا محامية بكل هذا الوجود واحلا بنت

:- ترى عندي 40 شبيه

- والله كفر يصيرلج شبيه أنتِ واكطع ما يجي بعدج ابد

:- هههههه عمي شنو هاي ترى جاي اخجل وراح اتكبر هيج

- بس عيونج كارثية وحك عيوني عزيزة كلبي وروحي أنتِ ابوس راسج ورجلج وتأمريني أمر

هنا نزلوا ألمعتز باالله و علي الكاظم وكعدوا يمنا وهنا دخلوا للبيت علي الرضا و علي السجاد و المرتضى الأمير وياهم
وكعدوا كلهم يمنا وهتف علي السجاد ...

علي السجاد :- علي التقي و علي النقي وين؟

غدير الله :- فوك نايمين

:- اتعشوا؟

- شسالفة ترى ولدناا موش بس ولدك؟

:- تعرفين بيه ما أطمئن اذا ما شفتهم بعيوني ياكلون لان يغلسون همة شاطرين

- لا تخاف امي وكلتهم بيدها .. وانا خلصت كل واجباتهم المدرسية وهسة هم نايمين بسبات

:- الحمدالله ...

بهذا الوقت هتف المرتضى الأمير وهو يضحك ويباوع علينا

المرتضى الأمير :- اكلكم مدام كلنا كاعدين وفارغين شرأيكم نلعب؟

علي الباقر :- شنلعب؟

علي الرضا :- بيت بيوتي!!

علي السجاد شمر علي الرضا بالمخدة مال القنفة وهتف بوجهة بتر فكاهي ...

علي السجاد :- بيت بيوتي بعينك جدامك نسوان جاعدين هاا؟

علي الرضا :- چا نلعب العريس و العروس ؟

علي الكاظم :- يلا انا العريسسس بس لازم نمر على بيت عمران نجيب العروس حتى نكمل اللعبة

ألمعتز باالله :- شوووف هذا البطران الكاعد يتوهم على بيت عمران عمييي جيبوا المرة بسرعة راح يموت الرجال هههههه

علي الباقر :- لا فكرة اللعبة حلوة بس شنو نختار لعبة حلوة وويانة غديرة هم يعني بدون مصارعة ادري بيكم هسة تركضون الها ويانة جنس لطيف لهذا تختاروا لعبة حلوة

علي السجاد :- نلعب عشائر؟

المرتضى الأمير :- والله تووونسس اييي نلعبها

علي الباقر :- شيخ السادة ما موجود منهو الشيخ؟

ألمعتز باالله :- آفة علييك علي الباقر شيخ السادة ما موجود بس هذا انا ألمعتز باالله شيخ العشيرة كلها انتضروني ثواني

علي السجاد :- هذا المسودن وين طفر؟

علي الباقر :- شووف شعندة هسة ينزل ايي نكمل!!

عافنة ألمعتز باالله وطفر لفوك ونحن بقينا نفكر شنو الكعدة العشائرية الي راح نسويها ههههه وبشنو انا افيدهم

علي الكاظم :- خلي نروح للبراني أحسن جلستة ارتب من هاي و أريح

علي السجاد :- ترى الساعة راح تصير وحدة بليل مو وحدة الظهر

المرتضى الأمير :- خااب امشي واذا خربت بشرتك لو طلعت الك هلات سود انا اجيبلك ماسك بفلووسي ما تخسر شيء

خلينا وكمنا طلعنة للبراني فتحنا الباب ودخلنا وقررناا علساس همة متحرشين بيه و أبوي علي السجاد يجي يريد ياخذ حقي من شيخ العشيرة ههههههه مدري شهل أفكاررر وبلشوا باللعبة و جان ألمعتز باالله ما موجود وبسرعة علي السجاد اخذ الدور خلاني بظهرة ووكف كدام علي الكاظم و المرتضى الامير وصيح

علي السجاد :- شيييخ عشيرتكم وين

علي الكاظم :- تحلم تجايل شيخ عشيرتنا رووح رووح يا حباب

:- ششيل ايدك وصيحولي جبيركم اتفاهم وياه وحقي وحق بنتي أخذه من عيونكم

المرتضى الأمير :- حضرتك مطلع بنتك بالمشلح ما تريد الناس تباوع وتتحرش حلوة هاي الغلط منك بالأساس

غدير الله :- المشلح شنوو ما تحترمم نفسكك؟؟

علي الكاظم :- شووف لسان بنتك شطولة وجاي تاخذ حقها أصلا أنتَ كاعد تتبلى على اخوي وما تحرش بهي السعلوة بنتك

:- أششش باباتي لا تحجين وياهم ولا تتعبين روحج يمي الموضوع وانا اطلع حقچ من نص عيونهم اقلع القزح مال عيونهم صيحولي جبيركم ما احجي وي ورعان انا

المرتضى الأمير :- أنتَ الورع ...

علي الكاظم :- لاااا لااا مرتضى حتى لو لعب الألفاظ رجاءاً اكبر مننا نحترمة اشش يغلط علينا ما نغلط علية يلااا نرجع لمود اللعبة ... لااا عمي ما تشوف جبيرنا

هنا علي الباقر تقدم سحب علي الكاظم من ايدة وهو صار كدام علي السجاد وهتف وياه ..

علي الباقر :- شنو تريد خوية؟

:- أنتَ شيخ عشيرتهم؟

- لا موش انا

:- اررريد شييخ العشيرة

هنا انركع باب البراني كلنا درنا بوجهنا للباب وشفنة ألمعتز باالله لابس دشداشة السودة وحاط الغترة الخضرة على متنة وطب يمشي بهيبة و رزانة انا هنا صدك كرشت هههههه طلع شخصية أول مرة نشوفها وكف كدام ابوي أقصد كدام علي السجاد وهتف وياه بصوت جهوري قوي ...

ألمعتز باالله :- سمعتك تريد شيخ العشيرة؟

:- ترى تعبتونيي ايي اريدة وينه صيحوا الي

ألمعتز باالله :- شنهي مو بعينك؟

:- عفواً أخي ؟

- لك انااا الشيخ! احجي العندك شنهي؟

:- أنتَ شيخ العشيرة؟

- شنهي مو عاجبك ترى فصلنا مليار ونص اذا مو عاجبك كووول علمود تصير عليك وحدة تقلل من قميتي وسط ديواني يااا باااطل ...

علي الباقر :- لاااااا ابو شهاب خليي على صفحةة وارجع الشيخ ألمعتز باالله

- ولك انا شيخ عطوانية ما صير ليش سمعتوا كلامي وخليتوني شيخ عشيرة؟

علي الكاظم :- كملل اللعبة واحجييي وي الرجال وشوف شيريد

- ءءحمم ايي صح كول عمي شنهي التريدة؟

:- بوية ولد عمومتك ماعدهم أخلاق

- وشنو مسوين ولد عمومتي اذا غلطانين هسة افعص رجابهم جدامك وتحت رجلك

:- متحارشين ببنتي ...

هنا ألمعتز باالله باوعلي رفعلي حاجبة وعض شفتة وغمزلي وهتف وياي

- شنهي هلطيرة منين فاتت لديوان بويةة سدوا الشبابيچ لا تطير وين نحصل هيچ صيدة

فطست من الضحك وابوي علي السجاد ضرب ألمعتز بااالله بالخفة على صدرة وبيدة خلّى وجه لوجه وهتف وياه بنتر

:- شهل حجي هاذي بنتييي اذا شيخ العشيرة هيچي جا ماكو رجة من عمومتة

ألمعتز باالله :- هية هاي بنتك المتحرشين بيها ولدي؟

:- أي هي بنتي

- چا حقهم ما اعذرهم

:- شنهيي خوية؟؟؟

- اييي وهذا الصگد يعني بشرفك باوع الها شوففهاا طيرة من الچنة شاردة بشرفك هيچي طيرة مهيتها بين هذول المطيرچية المتعلمين على الازرك والأخضر الصوچ بيمن هسة؟

:- بيمن؟

- بيكم اكككيددد المفروض إحنا نأخذ منكم فصل موش انتم

غدير الله :- وليشش بلة همة المتحرشين بيه مو انا متحرشة بيهم!

- وياهوو كالج صيري بهذا الچمال؟ ثرتيي مشاعر اولادي ياالله هسة كليلي منهو راح يهيد هذني مشاعرهم؟ وهم كلهم عزابية هاااا راح يكلولي زواجنا وكل واحد لازم مهر 10 ملايين و غير تجهيزات العرس هايي لكل واحد خاسر انا 25مليون ليش والله لأن حضرة جنابك هيجتي مشاعرهم يلا هسة الفصل انا لازم اخذة منكم ...

غدير الله :- شنهي هاي شيخ چيس حب؟؟

يا يابة بهذيج اللحظة البراني انكلب ساحة مال عرض أزياء ومسرحية كوميدية بنفس الوقت ألمعتز باالله جان لابس الدور لِبِس والغترة الخضرة على جتفة منطيته هيبة شيخ بس السانه جان ينكط شقاوة ومجاكرة من كالت اله
شيخ چيس حب الكل فلتت ضحكتهم وعلي السجاد وكع على القنفة من كد ما ضحك وهو يحاول يحافظ على وقارة كـ أب مجروح

علي السجاد مسح دموع ضحكة وكال بنتر تمثيلي

:- لك يا شيخ هاي بدال ما تنصفني؟ بدال ما تگص السان وليدك المتحرش جاي تطلب فصل لأن بنتي حلوة؟هاي وين صايرة بيا سلف بيا مذهب؟

ألمعتز باالله عدل غترته بكل ثقة وكعد على الكرسي العالي وسحب سبحة وهمية بيده وكال

- اسمعني يابو غديرة القوانين تغيرت إحنا بقرن الواحد وعشرين والجمال صار سلاح فتاك وبنتك شايلة أر بي جي بوجه ولد عمي هسة المرتضى الأمير من شافها عيونه صار بيهن حول مؤقت من الصدمة، ومنو يعالج عيونه؟ وعلي الكاظم صار عنده خفقان وتعرف عمليات القلب شكد تكلف؟ إحنا عشيرة فقيرة ما نتحمل هاي الخسائر البشرية

المرتضى الأمير فز وكال وهو يسوي روحه يرجف

المرتضى الأمير :- اي والله يا شيخ هسة أنا أحس روحي دايخ هاي البنية لازم تتغطى ببطانية مو بس شال جمالها يسبب حوادث سير بالديوان

أنا رديت عليهم بضحكة وخصرت ايدي

غدير الله :- لا والله؟ يعني هسة أنا صرت المجرمة؟ يا شيخ أنا جاية أطالب بحقي لو أدري هيج جان رحت اشتكيت بمركز شرطة توم وجيري وخلصت منكم

علي الباقر جان واكف بالنص يباوع لهذولة المخبلين وهو ميت ضحك بس راد يسوي هدنة حتى يكمل الفيلم تقدم خطوة وكال

علي الباقر :- يا جماعة صلوا على محمد إحنا ما نريد دم ولا نريد فصول توصل للمليارات شيخ ألمعتز أنتَ كبرت السالفة وأبو غديرة أنتَ هم حميت زايد خلونا نلكى حل يرضي الطرفين

ألمعتز باالله باوع لعلي الباقر بنظرة دهاء وكال:

- شنو حلك يا بن الباقر؟ نورنا بعلمك

علي الباقر باوعلي وغمزلي وكال

علي الباقر :- الحل هو المقايضة بما إن غديرة هي سبب المشكلة بجمالها وبما إن ولدنا تضرروا نفسياً فالحل إن غديرة تسويلنا قورية چاي مهيل بالهيلة من هاي الزينة وتجيب وياها كليجة أمي وتوزعها على الديوان إكراماً لشارب الشيخ وبهيج يطيح الحطب ونعتبر الفصل شربناه چااي!

علي السجاد :- لاااا شنو هاي؟ بنتي محامية وتعبانة تروح تسوي چاي للمتحرشين؟ أنا أرفض أريد اعتذار رسمي وأريد علي الكاظم يگول أنا سعلوة جدام الكل!

علي الكاظم :- أناااا؟ أنا العريس المنتظر أگول عن روحي سعلوة؟ يا شيخ ألمعتز شوفلنا حل هذا الرجال يريد يهين كرامة شباب العشيرة

ألمعتز باالله وكف بكل طوله وسوى حركة بيده يعني اسكتوا الكل ساد الهدوء بالبراني حتى صوت المطر برة جان ينسمع كال بصوت جهوري

ألمعتز باالله :- حكمت المحكمة العشائرية بما يلي
أولاً يُسقط حق أبو غديرة بالاعتذار لأن ولدي جانوا ضحية انبهار
ثانياً تُكلف المتهمة غدير الله بعمل صينية چاي معجلة مو بس چاي أريد وياه لومي حامض لأن ضغطنا صعد من الضحك
ثالثاً بما إن علي الرضا و علي السجاد و المرتضى دخلوا بنص السالفة فكل واحد منهم يروح يجيب نستلة من جيبه الخاص لغديرة كـ ترضية عما بدر من إخوانهم
رابعاً علي الصادق الي فوك نايم باجر عشانة على حسابة لأن فلت من هاي الطلابة

أنا ضحكت وكلت

غدير الله :- والله يا شيخ خوش حكم هسة عجبتني

- تتزوجيني

:- هههههههه يمة بطنييي بسس هاا النستلة لازم تكون كاكاو بلجيكي مو حي الله شي وإلا أرفع قضية بمحكمة الجنايات الدولية

المرتضى الأمير :- تدللين أجيب لج كرتونة كاملة بس فكينا من لسانج المحامي

بهاي اللحظة علي الرضا وعلي السجاد جانوا يضحكون

علي الرضا :- خرب حظي ألمعتز والله لو تدري أمي جان سوت بيك فصل لأن أخذت غترتها الخضرة

ألمعتز باالله ارتبك ونزع الغترة بسرعة وهتف ويانه بتوتر

ألمعتز باالله :- ولكم لااا هاي مو مال العلوية هاي مالتي اشتريتها من زمان

ضحكنا كلنا من كل كلبنا التعب مال الدراسة وهموم الخطبة مالت باجر وكلام أمي عن الزواج كله ذاب بهاي اللحظات كعدنا كلنا بالأرض بالبراني والجو جان دافي رغم المطر الي برة

علي الباقر :- مساع غديرة تحجيلي عن حمورابي وهسة ألمعتز باالله صار علينا حمورابي

علي السجاد :- ها غديرة هسة صدك شنو اللي جنتِ تحجين عنه حمورابي؟

كتله وأنا أعدل كعدتي

- والله يا علاوي حمورابي جان خوش زلمة بس لو شايفكم هسة جان لغى المسلة وكعد يكتب قانون ألمعتز باالله تدري رغم كل التعب بس كعدتنا هاي تسوى الدنيا

علي الباقر باوع للساعة وكال

:- الساعة صارت بالثنتين باجر ورانا مهمة انتحارية بيت عمران و علي الكاظم يلاا روح نام واستعد ترى باجر لازم تكون سبع وتكدر تقنع الجماعة

علي الكاظم اتنهد وكال

- ان شاء الله خير بس والله يا ولد حلوة الكعدة وياكم عود كليوم عيديوهاا تصبحون على خير

كمنا كلنا حتى نلم الغراض ونطفي الأضواء المرتضى الأمير جان بعده يشمر حجي على ألمعتز ويسميه الشيخ عطواني وألمعتز يركض وراه بالمخدة وأنا جنت أمشي وراهم أباوع لظهورهم وأكول بگلبي

:- يا ربي لا تحرمني من هاي اللمة يا ربي اجعل أيامنا كلها ضحك وبعد عنا الهم

صعدنا الدرج بهدوء حتى ما نفزز أمي من وصلت لغرفتي التفتت لعلي الباقر اللي جان بعده يمي كتله

- علي

:- نحرة لعلي

- صدك أنا محامية حلوة؟

ابتسم بذيج الابتسامة اللي تفرش الأمان بگلبي وباس راسي وكال

:- أنتِ مو بس محامية حلوة أنتِ قانون بيتنا اللي نمشي عليه تصبحين على حب يا غديرة الله

دخلت لغرفتي وصوت المطر على الشباك جان مثل الموسيقى نمت وأنا أبتسم وأفكر بباجر وبالحلقة مال توم وجيري اللي ما كملناها وبملاك وسكرة وبكل التفاصيل اللي تخلي حياتنا رغم بساطتها.. جنة

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ علي الكاظم ٭٭
كعدنا الصبح والشمس بعدها ما طالعة زين الجو بي برودة والسمة صافية بعد مطرة البارحة ريحة الطين والندى ترد الروح بس روحي أنا كانت بمكان ثاني يم ملاك وبراس السنة والبدلة والزفة المعتز بالله كعد قبلي شفته واكف بالمطبخ يسوي كهوة رحتله وكتله

- ها يالمعتز؟

:- ياهلا صباح النور

- اليوم يومك نريد همتك ويانا علي الرضا قفلته قفلة وإذا ما لينه گلبه اليوم العلوية تسوي بينا العرس

ضحك المعتز بالله وهز راسه

:- ولا يهمك كظيم اليوم نركص على جتافه إلا يوافق بس كون ما يطردنا اصبلك وياي ؟

- أيي صب

بعد ما شربنا الكهوة طلعنا أنا والمعتز باالله وشفنا علي الرضا كاعد بالحديقة كباله استكان الچاي وبيده المسبحة مال أبوي وكاعد يضرب صفنات هدوءه يستفز الواحد كأنما عايش بعالم ثاني غمزت للمعتز باالله وهو فهم السالفة بدال ما نسلم سلام الله بدأت الهوسة والأهازيج من باب الصالة لحد ما وصلنا يمه

المعتز بالله بدأ يصفك بيده وصوته الجهوري رج البيت رج

:- هذا الرادها وهذا التمناها.. وبنت الأجاويد لعلي الرضا جبناها!

أنا طفرت بنص الحديقة وأردح وياه مطلع كل حركتي مالت الخطوبة

- يا علي الرضا العريس.. والكل اليوم فرحانة والمحروسة الحلوة بالبيت.. صايرة هي السلطانة!

المعتز باالله كام يحوس داير ما داير علي الرضا ويهوس بصوت عالي

:- جا كحلي عينج يا يمة جاج الجان يتمنة علي الرضا صار عريس.. وريحة عطره من الجنة!

جنا نركص ونصفك وواحد يدفع بالثاني وأنا أصيح

- شيلوها الشيلة.. والعريس نغنيله هااا.. هااا.. واليوم العرس والكل معزومة وعلي الرضا يذب هدومه.. يلبس قاطه ويعدل نومه!

علي الرضا جان يباوعلنا ببرود نزل استكان الچاي من ايده وبقى يباوع وضحكته اللي تطلع بس بالزور ألمعتز باالله ما سكت لزم جتف علي الرضا وكام يهز بيه

:- عريسنا مملوح.. والضحكة منه تروح؟ لا بالله تظل دوم واليوم نخطبله أحلى بنية باليوم!

أنا كملتها بهوسة أخيرة

- تستاهل سُكرة وهي تستاهلك.. يا سبع وبكل كلفاتك ملك!

وكفنا نلهث من التعب والركص ننتظر منه ضحكة ننتظر كلمة مبروك أو الله كريم المعتز باالله مسح عرگ كصته بياخة قميصه وكال وهو يضحك

:- ها خويي؟ بشرنا؟ اليوم العصر العلوية والنسوان رايحات وكلنا نخلص جرت وحدة علي الكاظم ياخذ ملاك وأنتَ تاخذ سُكرة ونطلع بسيارة وحدة ونكلب المنطقة كلب

علي الرضا سكت لحظة فر المسبحة بإيده وباوعلنا بنظرة وكال بصوت هادئ بس بي حدة تگص الحديد

- خلصتوا؟ كملتوا الهوسة والريدحة مالتكم؟

المعتز بالله بلع ريچة وكال

:- أييي خويي شبيك؟ جاي نفرحلك والله العلوية رايدة تفرح بيك وسُكرة بنية أدب وأخلاق

علي الرضا وكف على طوله وبان طوله خلى ايده بجيوبه وكال

- سمعوا انتوا الاثنين وأنتَ بالذات يا علي الكاظم زواج أنا ما أتزوج لا سُكرة ولا غير سُكرة سدوا هذا الموضوع ولا تجيبوه على لسانكم كدام العلوية مرة ثانية لا أهج من البيت وما تشوفون وجهي بعد

أنا حاولت ألطف الجو كلتله

علي الكاظم :- يا خويي شبيك؟ البنية هي ذهب والعلوية تگول تلوگلك

قاطعني بنبرة خلتني أتمنى لو ساكت

- علي الكاظم أنتَ تريد تتزوج الله يوفقك أخذ ملاك أخذ سكرة أخذ العشيرة كلها.. بس أنا عوفني بحالب زواج ماكو وحجي العصر مال خطوبة تبلغون العلوية من هسة ،،
علي الرضا ما يتزوج نقطة راس سطر

المعتز بالله باوعلي وكال بصوت ناصي

ألمعتز بالله :- ها كظيم؟ شگلتلك؟ الولد قفل

علي الرضا مشى خطوات والتفت علينا وكال

- والمعتزباالله المرة الثانية إذا شفتك تهوس هاي الهوسات أسوي بيك سواية ما صايرة روحوا شوفوا شغلكم وعوفوا سالفة المرة

عافنة وراح دخل لجوة واني بقيت صافن بوجه ألمعتز باالله كتله

علي الكاظم :- وهسة؟ شراح نكول لأمي؟ ذيج مجهزة روحها وراسمة العرس والنسوان وهذا طردنا بكلمتين

المعتز نفض روحة وكال بضحكة قهر

:- والله يا كظيم أنا سويت اللي عليا هسة أنت ورطت روحك روح بشر العلوية كولها علي الرضا كال لا سُكرة ولا عرس كلشي مايريد وانضم النا نحن المعتگفين بلكي تقتنع وتفك ياخة منه

ضحكت بحسرة وكلت

علي الكاظم :- يا ربي هسة أنا شلي غرض؟ ردت بس أعرس وأخلص طلعتلي سالفة علي الرضا صفح الله اليستر من العلوية العصر

بقينا أنا والمعتز بالله واحد يباوع بوجه الثاني والحيطان مالت الحديقة تضحك علينا وعلى هوساتنا الضاعت بـ لا مال علي الرضا اللي نزلت مثل الطبر المعتز عدل ياخته ونفض ايده كال

:- أنا طالع للشغل هاي الحسبة يمك كظيم أنتَ السبع وأنتَ اللي تفتح الموضوع وية العلوية أنا روحي ما بايعها

عافني وطلع وبقيت أنا أقدم رجل وأؤخر رجل شلون راح أواجه العلوية؟ هاي أمي ومن تنرسم براسها فرحة وتجي الصدمة تهدمها البيت كله يوكف على تك رجل

دخلت للصالة شفتها كاعدة من شافتني صدقت بحديثها وعدلت شيلتها وكالت بوجه مستبشر

العلوية :- ها يمة علي بشرني؟ شحجيتوا وية أخوك؟ ريح كلبي وصبلي البشارة

بلعت ريچي وجرّيت حسرة شطولها كعدت يم رجليها وكلت بصوت ناصي

- يمة يا بعد حيلي أنتِ تدرين علي الرضا طبعة صعب واليوم أنا والمعتزباالله سوينا اللي علينا وزيادة هوسنا وركصنا وردنا نلين گلبه بس الولد قفل يكول زواج ما أتزوج لا سُكرة ولا غيرها وحتى هدد إذا فتحنا الموضوع مرة ثانية يهج من البيت

سكتت العلوية شفت لمعة خيبة بوجها خلتني أتندم لأني اني اللي كلتلها بس هيّ وبحكمتها المعهودة جرت نفس غميچ وكالت

:- لا حول ولا قوة إلا بالله يا يمة النصيب مو بالدفع والكلب إذا ما مال ما ترهّم عليه جية علي الرضا شايل بكلبة من موت أبوك واخوك ويمكن بعد وكت على فرحته ما أريد أضغط عليه ويضيع مني إذا هو ما رايد ما نكدر نغصبه على بنت العالم ونظلمها وياه

باوعتلي وابتسمت بوجهي ذيج الابتسامة اللي خلت روحي ترجع وكملت كلامها

:- بس أنتَ يمة أنتَ فرحتي اليوم علي الرضا قفل بابه بس بابك أنت مفتوح مجهزة روحي اليوم العصر نمشي لبيت عمران ونطلب ملاك لـ علي الكاظم والرزق على الله

بسّت ايدها وكمت بسّت رأسها وهتفت وياها بفرحة ...

- الله يخليج النا ومايحرمني شوفتج بجاه محمد وآل محمد

:- الله يديم هاي الفرحة والضحكة على وجهك وجعل عيني ما تبجيك

عفت العلوية وصعدت لفوك اطفر واني فرحان حيل ومامصدك شمسي راح تطلع وراح تجي البنية لبيتي حلالي ومرتي

أخذت نفس طويل ورحت طلعت هدومي من الكنتور وغيرت ملابسي حتى انزل للشغل مو على فرحان لازم اخذلي إجازة ماكو بعد تغليس راح أصير مسؤول عن بيت ومرة هههه

عفت البيت ورحت للمحل حتى أشوف رزقي واترزق على الله

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ أريج الله ٭٭

صار العصر والجو بعده بي نسمة برودة تجدد النشاط رحت لبيت اهلي بعد ما خليت شمس الحسين ونور الحسن عند ابوهم دخلت ولكيت البيت صار بي حركة مو طبيعية العلوية لبست عبايتها السودة وريحة البخور ترس المكان اجت عمتي فاطمة الزهراء عمة السادة الي من تدخل مكان تفرض احترامها واجت وياها بسمة زوجة عمي اللي لسانها دايماً يقطر عسل وتعرف شلون ترتب الحجي

أنا جنت أروح وأجي منتضرتهن يخلصن حتى نروح لبيت العالم بس كلبي جان يدك طبول الخوف مو من الرفض الخوف من الفرق اللي بين علي الكاظم وبين ملاك يعني أخوي بعد كم سنة يدخل الأربعين والبنية بعدهي برعم عشرين سنة مو شوية فرق جيل كامل

وجان هوة كاعد كدامنة ويهز برجلة عمتي فاطمة انتبهت عليه ضحكت وكالت

فاطمة الزهراء :- شبيك يمة علي؟ صاير جنه سعفة وتطير ملاك بنيتنا ونعرفها وأنتَ سبع الزلم العمر مجرد رقم يمة المهم الدلال والراحة اللي راح تشوفها يمك

بسمة كملت وراها وهي تعدل عباية أمي

بسمة :- أي والله عيني علي الكاظم ما ناقصة شيء هيبة وجمال ومال وألف وحدة تتمناه وملاك محظوظة بصيتكم وبيتكم يلة يمة نتوكل على الله

ابتسم علي الكاظم بتسليك ونحن عفنا وطلعنا ونحن نمشي الشارع الكصير اجه براسي هل راح توافق؟ هل أهلها راح يباوعون لعمر اخوي لو لشخصيته؟ وصلنا لبيت عمران دكينا الباب وفتحتة الأم دخلت العلوية وعمتي وبسمة وانا واستقبلتنا أم ملاك أحسن استقبال كعدنا بالاستقبال والجاي والحلويات تقدمت وبدت عمتي تفتح السالفة بذكاء

فاطمة الزهراء :- والله يا أم ملاك إحنا اليوم جايين ويدنا ممدودة ليدكم بالخير

- ان شاءالله كلة خير بأذن الله بس شنو الموضوع؟

فاطمة الزهراء :- ما أحب ألف ولا ادور اجيج من الأخير هاي العلوية ما لكت أحلى ولا أنسب من ملاك لوليدها علي الكاظم وتدرين أبنا علي الكاظم هو مو بس ابننا هو سندنا والكل يشهد بأخلاقه وشغله وتدينه

أم ملاك اللي جانت تعرف قيمة عائلتنا ردت بهدوء

- يا أهلاً بيكم نورتوا البيت والله يا علوية علي الكاظم ما يتفوت ورجال ينشد بيه الظهر بس أنتِ تدرين البنية لازم ينوخذ رايها والفرق بالعمر هم لازم نحسبله حساب ملاك بعدها صغيرة

هنا تدخلت العلوية أمي بصوتها الهادئ والمؤثر

العلوية :- يا أم ملاك البنية إلها الحشيمة والكرامة علي الكاظم صحيح أكبر منها بس هو راح يكون إلها الأب والأخ والزوج راح يدللها دلال ما شايفته ويخليها أميرة بيته إحنا ما نشتري جارية إحنا نطلب نسب وأصل وملاك عدنا أغلى من عيونا خلوها تفكر وإحنا مو غربه إحنا أهل

- كايمة أشوفها...

بسمة :- أخذي راحتج ولا تضغطين عليها عوفي البنت على راحتها

بعد نص ساعة من الحجي ونحن كل وحدة بينا تباوع للثانية وعمتي كلشوي تشرب چاي وتباوعلي وتهمس الي

فاطمة الزهراء :- هيي وينچ ريحانة

أريج الله :- هاا عمة؟

- تعاي اترگبي لي چاي شوية زيحي بسمة

:- شنو عمة؟

- اسمعي خاف لا سامح الله ورفضت البنت انا الزم ما علية كلب أبني ماروح اكسرة واجرحة

:- زين؟؟؟

- اذا رفضت ملاك وصلي الخبر لـ زوجج حَيرام خلي يشوف شغلة!

انا صفنت بوجه عمتي و بسمة غطت وجه بالعباية ميتة ضحك وهتفت

بسمة :- ياااا عزة العزاج افطيم

:- ماا فهمتتت شنو زوجي يشوف شغلة يا شغل؟

ضربتي على جتفي بخفة بسمة وهمست وياي

بسمة :- وصجيجة قصددها يسوي للبنت سحر تخليها توافق

فاطمة الزهراء:- اذا هية الي بالشمال سمعت وفهمت وأنتِ اليمي ما فهمتي الحمدالله على خلفتك يا خوية

العلوية :- اششش شهل حچي شبي أبني حتى نسحر بنات الناس ياالله يوافقون علية هو بس سحر طولة وسحر عيونة كافي

فاطمة الزهراء :- اكوول ترى علي الباقر و علي السجاد و علي الرضا لهسة كاعدين على كلبج لا تبيعين سحورة براسي وينه سحرهم؟ جاي اشوف طوابير النسوان مصاكك على بيتج ما يطلعون ولدج يخافون على روحهم اسكتي خية اسكتي وخلي نمشي علي الكاظم الي حمض على كلبج

العلوية :- ما يتزوجون يااهي الچان غير اشوف بنت اسمنها واحلاها

:- كاافي اجتتت المرةة

طلعت أم ملاك ونزلت النا ورجعت كعدت جدامنه والضحكة شوية مرسومة على شفايفها وملامحها هادئة وحلوة

فاطمة الزهراء :- هاا نضر عيني بشريني

زينة :- والله يا علوية البنية مستحية بس مبين من وجهها القبول ننتظر عمران يجي ونحجي وياه وإن شاء الله ما يصير إلا الخير علي الكاظم ولدنا وما نلكى أحسن منه يصون ملاك

أريج الله :- عمة الزلم يردون يجون اليوم بليل يطلبون البنت رسمي يعني؟

- لا وين مو اليوم على الأقل لمن يجي ابوها ويفكر وانا اتصل وارد الكم خبر

العلوية :- والله المفروض هيچي بس الولد حيل مستعجل تخيلي براس السنة يريد العرس ..

- يااا عزة راس السنة باقيلة بس 10 ايام وين نلحك حتى لو هسة خطبوا؟؟

فاطمة الزهراء :- ما يكدر بعد يريد يلحك على عمرة

- ان شاءالله يجي ابوها اليوم واحجي وياه وان شاءالله اذا الله انطاكم نحن ننطيكم

بسمة :- الله يقدم الي بيه الخير ان شاءالله

طلعت الكلمات من أم ملاك مثل المي البارد اللي نزل على كلوبنا بس بنفس الوقت أحس السالفة بعدها بين إي ولا طلعنا من بيتهم والجو جان بعده بي هذيج النسمة اللي ترد الروح بس بالي يم علي الكاظم اللي عايفينه بالبيت ياكل بروحه مشيت بصف عمتي فاطمة وبسمة وعمتي تمشي وتهز بعبايتها شفت علي الكاظم واكف بباب البيت لابس دشداشته وبيده السبحة بس السبحة جانت تفتر بيده بسرعة مو طبيعية من شافنا عدل وكفته وحاول يسوي روحه طبيعي بس عيونه جانت تسبقه بالسؤال

فاطمة الزهراء :- ها علي شو بعدك واكف بالباب؟ لا تخاف البضاعة انحجزت والنية صافية

علي الكاظم :- ها عمتي بشري؟ شكالوا؟ وافقت؟ لو كالوا جبير عليها؟

العلوية :- يمة فوت جوه مو مال حجي بالشارع الجيران منا ومنا

دخلنا للاستقبال وعلي الكاظم دخل ورانا يرجف كعدت العلوية وأخذت نفس طويل وبسمة بدت تسولف بالتفاصيل وهي تبالغ كعادتها تخلي السالفة تسويها مسلسل تركي

بسمة :- ولك علي لو شايف أم ملاك شلون استقبلتنا المرة طايرة بيك وتكول علي الكاظم ينشد بيه الظهر بس تدري السالفة يم أبوها عمران والمرة كالت البنية مستحية بس وجهها ينطي قبول

علي الكاظم :- يعني فهموني هسة ما اعترضت على العمر؟ ما كالت هذا شايب؟

أريج الله :- يا شايب خوية أنت هيبة وطول واليوم عمتي فاطمة ما قصرت لو ما عمتي جان السالفة تعقدت

عمتي فاطمة الزهراء باوعت لعلي الكاظم بنظرة حنينة وكالت

فاطمة الزهراء :- يمة علي العمر تخلص منه أيام بس المهم الروح أنت تداريها وتصير إلها السند بس اسمعني يمة السالفة هسة يم أبوها واليوم بليل يجي الرد بس أنتَ لا تضل تهز برجلك فضحتنا جدام النسوان

راح علي الكاظم لغرفته وأنا بقيت ويه العلوية وبسمة بالمطبخ نسوي عشاء بس بالي مو يمي أفكر بملاك هاي البنية اللي مثل الوردة شلون راح تتقبل فكرة زواج سريع؟ وشلون راح تتأقلم ويه علي الكاظم اللي طبعه حاد شوية وهادئ بزيادة؟

عمتي فاطمة الزهراء جانت كاعدة بالصالة تسبح وتدعي وكل شوية تصيح

:- يا ريحانة جيبيلي مي.. يا ريحانة الموبايل ما رن؟

وانا ارد عليها بنفس الرد بكل مرة لان بس اريد أكمل شغل واخلص من اسالتها

- عمة بعد وقت أبوها هسة يلا رجع من الشغل خلي يتعشون ويرتاحون ويحجون بالسالفة شنو الموضوع

بسمة جانت يمي تثرم بالبصل وهتف وياي

بسمة :- أنا أكلكم البنية توافق علي الكاظم ما ينرفض وبنيان بيتهم وسمعتهم بالمنطقة تفتح أقسى الأبواب بس الخوف من الحجي الناس ما ترحم راح يكولون أخذت واحد بكد أبوها

العلوية :- خليهم يحجون الحجي ما يبني بيت علي الكاظم راح يخليها بوسط عيونه وهذا يكفي

انجمعوا اخواني كلهم وسوينة السفرة الي جمعتنا كلنا وبعد ما صارت الساعة بالتسعة بليل البيت هدوء بس صوت التلفزيون ناصي وفجأة رن موبايل العلوية الكل فز حتى علي الكاظم طلع من غرفته يمشي حافي وكف بباب الصالة وعيونه على الموبايل

العلوية شالت الخط وفتحت سبيكر بطلب من عمتي فاطمة الزهراء اللي أشرت بسبابتها فتحي الصوت وردت عليها

أم ملاك :- ألوو هلا علوية شلونكم؟

العلوية :- هلا بيج خية بشريني ان شاء الله خير؟

:- والله يا علوية حجينا ويه أبوها وهو كال علي الكاظم ذهب وما نلكى مثله

- وملاك البنية ماكالت شيء؟

:- ملاك.. بنيتي ساكتة والسكوت علامة الرضا وهم أبوها يكول خلي يتفضلون باجر بالليل يطلبون رسمي

- ان شاءالله خير ان شاءالله

:- الله يقدم الي بيه الخير ان شاءالله خية

علي الكاظم من سمع هالكلمتين وجهه صار أحمر وابتسامة شككت حلكه عمتي فاطمة الزهراء هلهلت هلهولة خفيفة حتى لا يسمعون بالهاتف وبسمة كامت تركص بحواجبها وتغمز لعلي الكاظم وتضحك وكملت كلامها امي

العلوية :- ألف مبروك خية وباجر إحنا عندكم المغرب ان شاء الله

:- تشرفوننا خية في امان الله

سدت التلفون وعلي الكاظم كبل راح باس راس أمي وراس عمتي جانت لحظة غريبة علي الرزن صار مثل الطفل الصغير اللي حصل على اللعبة اللي يتمناها وفرحتة هاي جانت بعدال فرحتنا كلنا لأن أتأخر الوقت

جان لازم أرجع لان راسلني حيرام لهذا ودعتهم ورجعت لبيتي لـ مملكتي اللي بنيتها ويه حَيرام دخلت للبيت الجو جان صار مغرب والنسمة الباردة بدت تقوى وتدخل للعظم فتحت الباب واستقبلتني ريحة البيت بريحة عشا طيب شمس الحسين ونور الحسن جانوا نايمين بالهول من التعب غطيتهم وبستهم وصعدت لغرفتي أدور على سندي

لگيت حَيرام كاعد بالمكتبة الصغيرة اللي بغرفتنا لابس مناظره ويقرأ وبصفه استكان الجاي اللي صاير دافي من شافني شمر الكتاب وفتح إيديه وهو يبتسم ذيج الابتسامة اللي تمحي تعب يومي كله

حَيرام :- ها يا ريحة هلي؟ بشريني شسويتي

تقربت منه نزعت عباتي وشمرتها على القنفة وارتميت بحضنه جان دافي بشكل يخليني أنسى برودة الجو برا

أريج الله :- والله يا حَيرام السالفة عبرت نص الطريق البنية وافقت مبدئياً وأمها فرحانة بسسس عمتي فاطمة الزهراء تدري شتگول؟

ضحك حَيرام وهو يمرر إيده على شعري

:- انا أدري بعمتج فاطمة الزهراء لسانها دايماً سابقها شگالت هالمرة؟

- تخيل تكول إذا رفضت خلي حَيرام يشوف شغله ويسويلها سحر وأنا بقيت صافنة

انفجر حَيرام بالضحك لدرجة عيونه دمعت شالني من حظنه وكعدني كباله وهو يباوعلي بنظرات كلها حنية

حَيرام :- مُنقذتي أنا سحري الوحيد هو أنتِ لا أحتاج أسوي سحر لأحد ولا شيء بس علي الكاظم يستاهل ورجل مثل علي الأخلاق اللي عنده والرزانة هي أكبر سحر ممكن تجذب أي بنية حتى لو جان الفرق العمر المهم الروح هدوتي الروح هي اللي تعشك مو شهادة الميلاد

كمت من يمه ورحت وكفت يم الشباچ أباوع للحديقة والاشجار اللي بدت تنفض أوراقها حَيرام اجه وراي حط إيديه على خصري وسند راسه على جتفي

حَيرام :- بيش تفكرين؟

أريج الله :- أفكر باخوي خايفة عليه يا حَيرام خايفة من هذا الاستعجال يريد العرس براس السنة يعني بعد عشر أيام ليش هيج مستعجل؟ كأنه خايف الوقت يبوگة أو خايف ملاك تغير رأيها

حَيرام دارني عليه لزم وجهي بجفوفه الدافية وهتف

:- أريجي علي الكاظم عاش عمره كله وضيع سنين وهو يركض وره نفسة وشغلة هسة من لكة البنية اللي حركت گلبه يريد يختصر المسافات هو مو خايف من الوقت هو مشتاق للاستقرار يريد يفتح باب بيته ويلگى وحدة تستقبله بضحكة وتمسح عنه تعب الدنيا

سكتت شوية وبعدين سألته بدلع

- يعني أنا هيج أسوي بيك؟

:- أنتِ؟ أنتِ النفس اللي أصعده وأنزله أنتِ اللي خليتيني أعرف إن الدنيا مو بس ركض الدنيا هي هاي اللحظة اللي ألمج بيها لصدري وأشم ريحة عطرج

- حَيرام تذكر أول أيام زواجنا؟ من جنت أخاف من ظلك؟

:- شلون أنسى؟ جنتي جنج عصفور مبلل بس شوية شوية صرتي أنتِ الشجرة اللي أستظل بيها أريج تدري ليش ما تفاجات من كتيلي علي الكاظم يريد يخطب ملاك ولا كتلج ليش وهيج شيء؟

- أييي ليش؟ لان خوش بنية!

:- مو بس لأنها خوش بنية لا لأن بعلي الكاظم نظرة تشبه نظرتي لج أول ما شفتج نظرة الرجال اللي لكة ضالته

- تعرف حيرام كلام عمتي عن السحر خوفني لحظة بس كلامك هسة ريحني صدك الحب هو السحر الحلال بس حَيرام إذا صارت الخطبة رسمي أريدك توكف ويه إخواني اريدك تسندهم بالمشاية وبالترتيبات

:- علي أخوي قبل لا يكون نسبي وعيوني إله بس هسة أريدج تنسين علي وملاك وتنسين العلوية أريدج تركزين وياي أنا شوفي هذا الشيب اللي طلع بلحيتي؟ كله من وره حبج

- هههه هذا مو شيب حب هذا شيب قهر مني

:- خليه قهر، خليه تعب المهم منج

- يلا انا تبعت وطفلك الي هنا هم تعب لازم ننام

:- عمت عين التعب تعاي يبعد ريتي تعاي ياهدوتي كلها ناامي

- وين رايح؟

:- شمسي و نوري ناموا بالصالة رايح اصعدهم لغرفتهك واجيج نامي أنتِ

- ماشي يروحي تصبح على خير يا أغلى ما عندي

:- أحبج مُنقذتي

انتهى اليوم وأنا نايمة بحضن الأمان أحس إن الدنيا مهما دارت ومهما جان الفرق بالعمر أو الظروف يبقى الحب الصادق هو اللي ينتصر بالتالي غفيت

﹉﹉﹉﹉﹉﹉﹉﹉﹉﹉﹉﹉﹉﹉﹉﹉

:- هاااي شبيك وياها؟

- وأنتَ شلك غرض؟

:- شلوون شلي غرض شيل إيدك لا اكسرها

- أنتَ توخر ولا تدخل

دفعت الرجال وطيحتة بالكاع وحطيت رجلي على صدرة وهتفت وياه بنتر

:- هاي تخصني واليمس شيء يخص السيد عمرة بهذا اللحظة ينتهي

هنا اجاني الصوت من ورة وصاح

:: وخر عن اخوي يا حيوان

يــــتــــبـــع تابعوا حسابي لندخل ألف oo_ll13

- بعد ما تلكه من حبي
هذيج الوادم ودور
همه الساده موجودين
بس يا سيد يشور

وتعالوا لقناتي بالتلكرام بيها الأبطال و نحجي كلشي هناك يخص الرواية ++ أنشر تغشوشات

لهنا وانتهى المُنْعَطف السابِع 🌊🌊
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون التفاعل ما عاجبني حيل 👎🏻👎🏻👎🏻

وإن شاءالله اشوفكم بــ مُنْعطف جديد

15,670 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ