احفاد السيد : الثار ( بأجزائها الإثنين ) الفصل الرابع وسبعون 74 - بقلم ​رُقَيَّةُ الْأَكْبَرُ

﴿ وَالْبَاقِيَاتُ الصَّالِحَاتُ ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد

مُتابعة لحســابي حتــى ندخل رقم جديد oo_ll13

التعب علينا والتفاعل عليكم التصويت والتعليق أبين الفقرات كلش مهمة هو الدعم للقصة وهو الينسي الكاتب التعب التصويت كلش ما عاجبني مو حلو ...
والمصممات لا تقصرن 🎀🌸

الما تصوت للبارت وتعلق على الفقرات كون تطلع حباية بخشمها( الا هيچ ياالله تجن وياي )

- ألف مـوت نحرت والصـبر انتحر
والعمر في نـار اشتياقـي يحرق
أضـناني الـنحيب وفـاض بـي المدى
أنا نـبض يـتيم وفي غـيابك أموت
عد .. فـالحنين استباح خـرائطي
وعد فأانا دون لـقائك .. مـوج يـكسر

لــ رُقَـيَّـة الْأَكْـبَـرِ

﷽
اللهم صلّ علىٰ محمد وآل محمد
~~~~~~~

٭٭ شُبيرْ ٭٭

فتحت المحل وأجاني عِصام وبدينا نشتغل ولمن صارت الساعة تسعة ونص و زَمُرد لهسة ما داخلة للمحل ولا جاية
ضل بالي عليها وخفت لا يطلع أبوها هم متعارض عليهم مرة ثانية لهذا ماحبيت أحكم عليها أخذت السويج وطلعت من المحل صعدت سيارتي ورحت لمنطقتهم أشوف شنو موضوعهم وشنو العذر لهذا التأخير هاي المرة

ولمن وصلت للمنطقة ودخلت لشارعهم لكيت زَمُرد واكفة بالباب وكدامها رجال جان من منضرهم يحجي وياهم بعصبية وانا اتقرب منهم ووكفت سيارتي شفت الرجال عت زَمُرد من أيدها عت ما تحملت نزلت بسرعة من السيارة ورحت بأتجهم وبلا وعي سحبت الرجال حيل من ظهرة وصحت بوجه

شُبيرْ :- هاااي شبيك وياها؟

التفت الرجال الي وصاح بيه

- وأنتَ شلك غرض؟

زَمُرد :- سيد دخيلك لا تدخل

دفعت الرجال من صدرة وما اهتميت لكلام زَمُرد وصحت بيه

شُبيرْ :- شلوون شلي غرض شيل إيدك لا اكسرها

- أنتَ الي لازم توخر ولا تدخل بشيء ما يخصك

دفعت الرجال وطيحتة بالكاع وحطيت رجلي على صدرة وهتفت وياه بنتر

:- هاي تخصني واليمس شيء يخص السيد عمرة بهذا اللحظة ينتهي

هنا اجاني الصوت من ورة وصاح

:: وخر عن اخوي يا حيوان

وخرت عن الرجال الي بالكاع ولكيت جايني واحد يمكن أخوه يريد يتهجم علية لزمتة من أيدة ورجعتها ورة ظهرة وهمست بأذنة...

شُبيرْ :- وإذا ما وخرت عن أخوك شنو راح تسويي يعني؟؟

الرجال جان يتلوى بيدي ويحاول يخلص نفسه ونفسه صار عالي من الوجع باوعت لزَمرد جانت ميتة من الخوف عيونها تحچي ألف قصة وقصة وبصفها جانت أختها إيليا واكفة ترجف وضامة نفسها ورا الباب

صحت بيهم بصوت

شبير :- ولك أنتَ وياه تسترجلون على نسوان؟ هاي المراجل العندكم؟

الرجال اللي جان تحت رجلي كعد ويدفع بيده بالكاع يحاول يكوم وهو يمسح وجهه من التراب وصاح بصوت

- هاي مرتي مرتي وأريد أرجعها لبيتها أنتَ شكوو؟ هاي مشاكل عائلية لا تتدخل بين الزلم ونسوانهم

من سمعت كلمة مرتي وفهمت السالفة دمي فار أكثر لويت أيد أخوه حيل لحد ما سمعت طكة عظامة ودرت وجهي عليه واني أضحك باستهزاء

شبير :- مرتك؟ المرة لو تريدك ما جانت لاذت منك المرة اللي تنهان وتنجر من أيدها بالشارع صاحبها مو رجال وأني ما أشوف كدامي زلم أشوف حثالة!

هديت أخوه وشمرته صاروا واحد يم الثاني تقربت منهم بخطوا وكل خطوة جانت توجع الكاع دنكت عليهم وعيوني صارت بعيون المس زَمُرد

شبير :- شوف ولك زَمرد وأهلها صاروا بحماية السيد شبير الصادق اذا ما سامع بيه روح وأسأل واعرفني منهو انا وإذا أسمع بيك واصل لهذا الشارع مرة ثانية أو مفكر بس تفكير تمد أيدك على زَمُرد أحسب الله ما خلقك سامع لو لا؟

هجم عليه أخوه مرة ثانية عباله غفلة بس رديته بوكسي بنص وجهه خلاه يلف ويرجع لوره وهو يسب ويلعن لزمته من ياخته ورفعته

شبير :- كلمة حيوان اللي كلتها قبل شوية راح أدفعك ثمنها غالي بس مو هسة.. هسة تولي أنتَ وهذا الناقص وتصعدون سيارتكم وقسماً باللي رفع السماء وبسط الأرض إذا التفتت ولكيتكم بعدكم واكفين أحرك السيارة بيكم!

ذبيته بالكاع كاموا وراحوا لسيارتهم وهم يتوعدون بس بجبن شخطوا السيارة وطلعوا من المنطقة ألتفتت على زَمرد جانت واكفة تمسح بدموعها وأختها جانت منهارة تبجي بصوت عالي بالباب

تقربت منها وحاولت أهدي نبرة صوتي كد ما أكدر بس عصبيتي جانت واضحة بيدي اللي ترجف من الغيض بس كدرت اخذ بأيد إيليا واحجي وياها واني محاوط وجها بين ايدية

شبير :- لا تخافين بوية أنتِ بيت اهلچ وتبچين صيري قوية

إيليا :- يضربنا

:- أكسر ايدة وعلي فوتيي لجوة ولا تخاافين من اروحلچ فدووة انا

وخرت عن إيليا وفاتت تركض لجوة وضليت اباوع لــ زَمُرد وجنت مفكر هذا الحثالة هو زوجهاا وهية

شبير :- زَمرد..

قاطعتني وهتفت وياي وهية تحط ايدها على صدرها لأنها جانت مختنكه حيل

زَمُرد :- قبل لا تحجي أي شيء هذا الچلب زوج ليلة

:- ليش ما حجيتي؟ ليش تخلين هيج نماذج تتطاول عليكم؟

- سيد والله تعبنا هذا زوج أختي ليل نهار يضربها ويهينها وعافته واجت لهنا وهسة جاي يريد ياخذها بالإكراه أبوية مريض وما يكدر يوكف بوجهم واني شسوي؟ امي ماكدرت تردة هاي انا طلعت اله و شوفة عينك

كلماتها خلت السجينة تضرب بگلبي باوعت الها وهتفت

:- زَمُرد طول ما أني موجود ماكو واحد يگدر يمس شعرة منكم امسحي دموعج وطبي جوه هدي أختج عشر دقايق وأرجع ألگاچ محضرة نفسج تجين للمحل الشغل ما ينتظر والكعدة بالبيت هسة تزيد همج

- تمام سيد هسة بس اجيب جنطتي واجي اصلا انا جنت لابسة اريد اداوم بس الله ياخذ هلمخلوق تدوهنت بسببة

:- يلا انتظرج عزيزتي

رجعت صعدت سيارتي وأني أحس بنار بصدري ضليت صافن وأني أفكر شلون الدنيا تذل العزيز؟ وشلون هيج حثالة يتجرأون على بنات الناس؟ بقيت انتضر لمن اجت زَمُرد وصعدت بالسيارة وهتفت وياي وهي خجلانة

- أسفة سيد على التأخير والله الصار مو بيدي

ذبيت حسرة طويلة وشمرت الجكارة من الشباچ وهتفت وياها

:- زَمرد من اليوم ورايح أي شي يصير وياكم أي أحد يتقرب من باب بيتكم تخابريني فوراً أني مو بس صاحب شغل أني سندج واليوم شفتي السيد من يغضب شيسوي افتهمتي؟

هزت راسها بالموافقة وهي تمسح طرف عينها وكملت كلامي وياها

:- يالله توكلي على الله وتبلشين شغل وتكولين ياالله خير اليوم الشغل يصير نار

حركت السيارة وعيوني بالمراية أراقب الشارع الخوف البعيون زَمرد جان كفيل يخلي النار بصدري ما تطفى لسنة كاملة طول الطريق جانت زَمرد ساكتة بس صوت نفسها المكتوم يوصلني أدري بيها هسة بداخلها صراع بين فشلتها مني ومن الصار وبين خوفها على أختها ليلة من ذاك النكس

وصلنا للمحل نزلت ونزلت هي وراي جانت تمشي بخطوات ترجف فتحت الباب ودخلت عصام جان واكف يمسح بالجام باوعلنا باستغراب لأن شاف وجهي مكلوب وعيوني دم وزَمرد وجها ذبلان

شبير :- عصام عوف اللي بيدك وروح جيب كلاص عصير بارد لــ زَمرد وياريت لو تجيب وياك بطل مي

عصام هز راسه وطلع ركض التفتت لزَمرد اللي وكفت يم الميز وضلت تنكت بملابسها بتوتر

شبير :- زَمرد.. بوية باوعي عليه

رفعت راسها وعيونها مغرغرة صحت بيها بصوت حنين بس بيه نبرة أمر

:- الصار اليوم ينتهي اليوم ذاك الحثالة وأخوه وحق من حط الروح بذيچ الأجساد إذا داسوا طرف منطقتكم مو بس بيتكم أهججهم من المحافظة كلها ليلة أختج خليها تنطي خبر لأبوچ أي حركة أي دكة باب التلفون وعلية افتهمتي لو لا؟

زَمرد :- افتهمت سيد والله ما أعرف شلون أجازيك لولا جيتك جان هسة مسحولة بالشارع

:- لا تجازيني ولا أجازيچ المرة عدنا عرض والعرض ينفدى بالدم هسة ذبي غراضچ وتوكلي على الله الشغل اليوم هواي وأريد ذهن صافي

بدت تشتغل وأنا كعدت بمكاني بس عقلي مو يم الحسابات عقلي يم الزلم اللي تستعرض عضلاتها على نسوان شعلت جكارة ثانية وطلعت تلفوني اتصلت على عمي علي الكاظم وصرت اسالوا شكد باقي ويجون ياخذون ذهب النشيان وبعد ما خلصت وبديت افكر شنو الذهب الحطة الهم سديت الخط وأنا أحس براحة جزئية الشغل بالمحل جان ماشي بس زَمرد جانت صافنة أكثر مما هي تشتغل كل شوية تصفن بالباب عبالك تتوقع الشر يجي من وراه قهرتني هاي البنية شايلة حمل وهي بعمر الورد

صارت الساعة بالوحدة الظهر الشغل خف شوية عصام طلع يوصل طلبية قريبة بقيت أنا وزَمرد تقربت منها جانت ترتب بقطع الذهب وتحطهم بااماكنهم

شبير :- زَمرد تعالي ارتاحي شوية كافي ترتيب

اجت كعدت على الكرسي جانت لابسة حزنها فوك هدومها

زَمرد :- سيد أسأل سؤال؟؟

:- أسالي عزيزتي

- أنتَ ليش هيج ساعدتنا؟

:- شلون يعني؟

- يعني أنتَ مجرد صاحب محل واليوم جازفت بنفسك وضربت زلم علمودنا

ضحكت ضحكة كصيرة وذبيت الجكارة وهتفت وياها

:- زَمرد أنا تربيت بمضيف والمضيف يعلمك إنو الجار قبل الدار والشرف قبل الروح و أنتِ اعتبر صرتي بركبتي مو بس لأن تشتغلين عندي بل لأن شفت بعينج كسرة ما يرضاها لا الله ولا عبده وبعدين أنا السيد والسيادة مو بس بالاسم السيادة بالفعل

هنا شفت لمحة ابتسامة خفيفة على وجها عبالك كلامي طمنها

- ليلة أختي تكسر خاطري تزوجت وهي تظن راح تخلص من تعب العيشة لكت نفسها بجهنم أكبر وأبوية أخ يا أبوية المرض هده ولا هو جان أسد محد يتجرأ يرفع عينه بوجه بناته

:- أبوچ أسد بوجودج ووجودي ليلة هسة يمكم خليها ترتاح وتأمن وهذاك النكس وحق هذا الظهر إلا أخليه يطلكها وهو الممنون وبدون ما يمس شعرة منها

- بس شلون؟

:- معليج اختج يوصللها ورقة طلاكها اذا مو باجر البعدة بهذا الأسبوع اختچ تصير مطلگة على عيني وراسي

- لا تضرر نفسك شبير

:- وعيونج ماكو ضرر كله بالأصول مثل ماهذا النگس دخل الكم بالمعروف راح يطلع بالمعروف ..

- مادري خايفة منك

:- لا تخافين سعاد خانم

- ههههههههه

:- اااييي هيچ من الصبح وخلينا نشوف هاي السنون لا تزعلين مايسوة

- اكمل شغليي

:- كمللييي وحضريي الذهب مال نيشان عمي

- صار بعيوني

:- شهل عيون اريدهن هههههه

- ءحم فدوة

مر اليوم ثكيل بس بنهايته حسيت إنو زَمرد بدت تستعيد قوتها قبل لا تعزل وتطلع وكفت يمي

زَمرد :- سيد باجر أجي بنفس الموعد؟

شبير :- باجر تجين وأنا أمر أخذج الصبح من باب البيت لحد ما تصفى الأمور ما تطلعين وحدج

- بس سيد خاف نتعبك..

:- تعبچ راحة بوية يالله السيارة بالباب أمشي أوصلج وأشوف أبوچ وأطمنة بنفسي

- تمام ماكدر اعاندك لأن أعرف راح تسوي البراسك وما تسمع لأحد

:- عفية زين من عرفتيني امشي كدامي

- تمام

وصلتها للبيت نزلت وياها شفت أبوها و سلمت علية زلمة جبير ومبين عليه أثر العز بس المرض ناهله

دخلتنا زَمُرد للبراني وكعدت انا وياه وهتفت وياه بسرعة بلا مقدمات

شبير :- حجي بنتك ليلة أمانة يمك وأي واحد يوصل لهنا اعتبره واصل لبيت السيد شبير أريدك مرتاح والزلم اللي شفتهم الصبح ذول غيمة سودة وراحت وأنتَ تعرفني وتعرف ابوي بعد فــ اريدك ترتاح

الحجي لزم ايدي وعصرها ودمعة صارت بعينه:

شاكر :- بارك الله بيك يابني بيض الله وجهك طلعت ابن أصول

:- ولا يهمك يابعد روحي بوية انا خادم

- خادم ربك والحسين ابني

:- يلا هسة اترخص

- وين ما ضيفناك شيء

:- لا عمي ما تقصرون بس اجيت اطمنك وعلي عدنا مشية عمي اليوم ولازم الحك عليهم

- الله يوفقة ويوفقك ان شاءالله

:- بعد روحي عمي

بست راسة وايدة وطلعت من بيتهم وأنا أحس الدنيا بعدها بخير صعدت سيارتي وأنا أباوع لشارعهم حلفت بيني وبين نفسي،إنو هذا الشارع راح يصير محرم على كل واحد يريد يمسهم بسوء

رجعت لبيتي ذبيت سويجي ومحفظتي وكعدت بالظلمة فكرت بكلمة زَمرد ليش ساعدتنا؟. الحقيقة مو بس شهامة اكو شي بداخل زَمرد يخليني أريد أكون حايط صد الها عيونها اللي تحجي ألف قصة خلتني أحس بمسؤولية ما حسيت بيها تجاه أحد قبل

كمت اغير هندامي حتى الحك بعمامي واني افكر شلون راح أربي ذاك النذل وشلون راح أخلي الضحكة ترجع لوجه زَمرد وإيليا وليلة لأن اللي يمس شي يخص السيد لازم يتحمل عواقب غضب السيد

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ رحمة الزهراء ٭٭

خرجوني من المستشفى لأن جنت أريد أضل يم أبني هو علاجي وانا بعد ما سطرت رأس زُبير وضغطت عليه سمع كلامي وكام سوة أوراق الخروج وطلعني على حسابة لأن المفروض اضل ثلاث أيام بس طلعت على الحساب الشخصي
وبعد ما طلعت مرينة على بيت صديق زُبير حتى نرجع أحمد الدر ويانه بقيت انا بالسيارة و زُبيري نزل جاب احمد الدر الي صعد بالخلف وحضني من ورة الكرسي وباسني بخدي وهتف وياي

رحمة الزهراء :- هلا بالشيخ العاصي ياهلا

أحمد الدر :- مااامةةة مشتاقلج حيل حيل شلونج؟

- انا هسة صرت بخير من شميت عطرك يابعد ريتي وانا هم مشتاقتلك ماكدرت انام امس بدونك يابعد عمري

:- وانا هم لا تخلوني بعد أنام في بيت الوادم

حرك السيارة زُبير وهتف وي أحمد الدر

- ليش يا مامة هيج تحجي ؟

زُبير :- شنو حمودي ضجت من شيء هناك؟ وهمة ازعجوك بشيء حبيبي

:- لا بابة أصلا حتى علاوي و رتوجة كلش حبابين وضلوا يلبعون وياي وحتى امهم عمة إيمان عصبت علية لأن ما قبلت اكل وخلتني اكل واشبع غصباً علية

- چا مامة هلشيء زين عيب تكول ماريد أنام ببيت الوادم المفروض تكول ألهم شكراً

زبير :- وبعدين حمودي هذا صديقي يعني مثل أخوي والبيت الجنت بيه أنتَ هو بيت عمك

:- بابة انا اعرف هو بيت عمي وشكرتهم وبوستهم قبل لا أطلع بس بعد ماريد أبقى عند أحد مرة ثانية اريدكم بس أنتم يمي و وياي

- وانا أصلا بعد ما اعوفك يرويحتي أنتَ اوليدي

أخذ زُبير ايدي وباسها وأحمد الدر الشمر روحة بالنص وأخذ تليفون أبوه ورجع كعد على الكشن وبقى يلعب عرفت أن أحمد الدر يعرف رمز أبوه حبيت بين نفسي طبيعية بيقت اباوع لــ زُبير و أبتسم وبعدها التفتت للشارع بعد ما وصلنا للبيت نزل حمودي مثل الزيبق كدامنا ونزل زُبير فتحلي الباب ونزلت على كيفي دخلت لجوة و كعدت بالصالة وحمودي هتف وهو يصعد الدرج

أحمد الدر :- مامة بابا رايح اقرأ رايح اكتب انطوني واجبات مامة بابا بس يصير العشة صيحولي

رحمة الزهراء :- ههههه مامة على كيفك لا توكع

زبير :- لا تخافين على السبع أبن السبع

- وانا شنو متعبني غير أبو السبع

:- اوف انا متعبج؟

- اييي ما خلصت منك يكوم يطلع إبنك عليك

:- هذا دليل أنتِ تحبيني أكثر

- اهااا شهد شاهد من أهلة زين تعرف انا أحبك اكثر

:- ما انكر

- چا وين حبك الي وين هوسك بيه؟ كلشي ما شفت!

:- لا الولد اكيد لازم يطلع علية جا تردينة يطلع عليچ عيونة زرك والشفايف فلر مثل خوالة شنهي السالفة؟؟؟

- وشبيهم خوالة؟؟؟

:- مابيهم شيء بس انا احب الزلم الچلح ملح هيج مثلي ومثل ابني النضيفين زيادة ماريدهم

- نقذت روحك

:- ههههه هاي ملامحج اخليهن لبنتي الي بالطريق

- شنو انا حامل وانا مادري؟

:- تعرفين خاطري ببنية ومن زمان!

- وأنتَ تعرف من بعد أبني الحسن الله يرحمة وانا ماكدر احبل

:- علويتي الصار الله كاتبة وحالياً ولدنا بين ايدين بنت رسول الله يتربى وفوك هذا كلة هو طير بالجنة وشفيع النا بالآخرة

- زُبير

:- خلص علويتي سدي الموضوع وأريد راحتچ حالياً

- تريد أطفال؟

:- موش زلمة انا؟ ماكو زلمة مايريد أطفال من محبوبة كلبة

- مو عندنا أحمد الدر

:- وشنو بس أحمد الدر ولازم نصفط ونكعد؟ ترى هو هم يريد إخوان واذا اليوم تسمعين بس مني باجر حتى هو يكلج اريد أخو أشد ظهري بيه اريد اخت ادللها

- شوف أسألك سؤال وترد علية بـ اي او لا

:- خوش علويتي اسألي

- تريدني اباشر بالعلاج؟

:- ايي ،،

- ههههه مااشي يروحيي

:- اتمددي على القنفة وريحي روحج كايم اسوي لكمة ناكلها

- صدك زبيري تذكرت

:- شنو يرويحتي؟

- امي اتصلت علية

:- امچ!!! شبيچ رحمتي صخنتي؟

- خالتي العلوية

:- اهاااا، ايي شنو شبيها؟

- علي الكاظم راح يتزوج واتصلت تكلي علمود أحضر وطلعت إلها عذر وتعذرت على الجية خاف يتصلون بيك الزلم

:- أخوج راح يتزوج؟ليش اتعذرتي؟

- تشوف وضعي هسة يسمح اروح ألهم واخليهم يشوفوني وانا بهاي الشاكلة؟ وحك عيونك ألمعتز بااالله ينصب مشنقة أمك و علي الباقر يحركها وهي معلكة و عمتي فاطمة الزهراء تطلع العيب حتى بيك مو بس تكول هاي امك وأنتَ مالك غرض لهذا اختصرت الكارثة الراح تصير واعتذرت الها وأنتَ هم طلع ألهم عذر ولا تكثر كلام وياهم

:- جاي تتحملين كلهذا من وراي و ورة أمي

- راح أنسى كلشي بس بشرط

:- تأمريني

- سويلي اكل من إيدك الحلوة

:- مو تدللين علية أنتِ

راح زُبير للمطبخ وأنا صعدت لفوك ودخلت لغرفة أحمد الدر لكيتة نايم على بطنة بالكاع ورافع رجلية رفرف بيهن بالهوى وحاط الدفتر كدامة وجاي يكتب رحت يمة وربتت على جتفة وهتفت وياه

رحمة الزهراء :- هايي نومة الشياطين كووم عدل روحك وكوم اكتب على مكتبتك

- امممم مااريدد

:- مو بكيفك لا تتعبني ماكدر احجي هواي كووم جا بابا ليش خسر وجابها للتراب علمود أنتَ تنام هيج وتأذي بطنك ورقبتك كووم مامة لا تتبعني كووم

- راح اكمل و اكوم

:- أحمد الدر

- ها مامة؟

:- ليش تعاند؟؟

- هسة اكمل واكوم

عرفت الكلام وي أحمد الدر ضايع من شابه أباه ما ضلم وهوة نسخة مستنسخة من أبوه لهذا سكتت عنه وغيرت الموضوع

رحمة الزهراء :- حبيبي حمودي أنتَ تعرف رمز تليفون بابا؟

- أيي اعرفة

:- شكد الرمز؟

- مايصير انطيج سر بيني وبين بابا

:- اي عادي يصير هلشيء سر بيني وبينك

- بس ماما أنتِ معلمتني الي يطيني سر لازم اخافظ علية

:- بس حبيبي انا أمك وما يصير تكون أسرار بين الطفل وأمة

- يعني لازم اكلج كلشي حتى اليكلولي لا تكولة؟

:- بالضبط وهلشي بس بيني وبينك

- تمام رمز بابا 2002

:- شكد؟

- رمز بابا 2002

:- مواليد منهو هذا؟

- شنو؟

:- ماكو شيء حبيبي كمل دراسة ماماتي احبك انا

عفت أحمد الدر وطلعت من الغرفة نزلت للصالة لكيت تليفون زبير على الطبلة اخذته ورحت للمطيخ لكيتة واكف يطبخ وهتفت وياه .

رحمة الزهراء :- زُبيري

اندار إلي ورد عليه وهو ينضف ايدة

زُيبر :- عيوني علويتي

:- ممكن تفتحلي تليفونك؟

- ليش تليفونج شبي؟

:- مابية شيء بس اريد اكلب بمالتك شوية

- هههه اكلج عوفي هسة التليفونات وتعالي اكعدي هنا لا تتعبين

أخذ التليفون من ايدي وحطة بجيب بنطرونة وسحبني من ايدي كعدني على الكرسي واندار يكمل شغلة حطيت ايدي على راسي ماريد أفكر خارج الصندوق رجعت وسالتة وانا بمكاني بلا ما اندار إله

رحمة الزهراء :- أكول زُبير

زُبير :- كولي علويتي

:- ليش خربت الغرفة الي بيها صوري؟

- حجينة بهذا الموضوع

:- أعرف حجينة بس أريدك تنطيني سبب مقنع كلش هواي مقنع وأريد اقتنع

- صرتي حلالي شفايدة الغرفة بعد؟

:- زبير الغرفة جانت دليل بحبك الي من خربتها وتصرفاتك ما عاجبتني

- هاي تخيلات براسج ماكو هيچ شيء

:- لا اكو والله اكو زُبير صالي فترة وانا أصارع حتى ما تبرد علاقتنا

- بوية انا مقصر بشيء وياچ؟ سويت الچ شيء ضوجج وزعلچ مني؟

سكتت وما جاوبته لأن الكلمات صارت توجع بحنجرتي باوعتله وهو يشتغل بالمطبخ بكل هدوء كأنما ماكو براسه أي عاصفة بس أنا العواصف أكلت روحي
كمل السفرة و تعشينا بسكوت وأحمد الدر جان يسولف ويضحك وزُبير يسايره وأنا عيوني تراقب كل حركة يسويها زبير.. ليش ضم التليفون بجيبه؟ ليش غير الرمز لـ 2002؟ ومنو صاحب هالمواليد؟

صعدنا ننام وأحمد الدر غفى بغرفته دخلت للغرفة وزبير جان تعبان ذب روحه على الجرباية وسحبني لغمرة صدره وهو يبوس راسي :

زُبير :- نامي يرويحتي باجر وراج علاج وتعب أريدج ترتاحين

غمضت عيوني ومثلت النوم انتظرت فترة لحد ما سمعت أنفاسه ثكلت وصار يغط بنوم سحبت إيدي على كيف وكلبي يدك بكل قوة كأنما جاي أسوي جريمة مديت إيدي للجهة الثانية للميز واخذت التليفون ألجان علية
إيدي ترجف كتبت الرمز 2002 مثل ما كلي حمودي انفتح!
أول ما فتحته رحت لبرامج التواصل دخلت على الواتساب
شفت محادثات هواي مال شغل بس نزلت جوة وشفت اسم رنا.. المحادثة بيها رسائل ممسوحة والباقي كلام غريب

٭شوكت نلتقي؟
٭زبير اعتمد عليك
٭لا تخافين الموضوع يمي

حسيت الدنيا دارت بية عيوني غوشت والدم صعد لراسي شهكت بدون ما أحس والغيرة حركتني حرك ما تحملت لزمت التليفون وشمرته على صدره بكل قوتي وصحت بصوت مخنوك ومهسترة

رحمة الزهراء :- كوووووم زُبيرررر كوووم يا خاين كوووم يا جذاب

فز زبير مرعوب عباله صاير شيء كعد يفرك بعيونه وهو مخترع

زُبير :- شكوو؟ رحمتيي شبيج؟

لزمت التليفون وفتحت المحادثة بوجهه وصحت

- هاي رنا منهي؟ ولك زبير تعيشني بقصة حب وأنتَ تضحك علية ؟ هاي اللي تكللها الموضوع يمي؟ واني الغشيمة اللي عفت أهلي علمودك ضحيت بصحتي

زُبير صفن بالتليفون وبعدين باوعلي بنظرة تعب وعتب سحب التليفون من إيدي وكال بهدوء كتلني

:- رحمتي صلي على محمد أنتِ فاهمة غلط

- لاااا لا تكلي فاهمة غلط هاي السالفة مالت كل الزلم منو رنا؟ وليش مغير الرمز لمواليدها؟٢٠٠٢مووو؟ عساها بحظك وببختك زبير

كام من الجرباية لزم جتافي يحاول يهيدني وأنا أملخ بروحي وأدفع بيه

- وخخرررر عني لا تچيسني أنتَ نكستني خنتني وأنا مريضة

زبير بصوت عالي حيل خلاني انتبه بس عليه

- رحمة اسمعيييي! ولج هاي البت أخوها تاجر مخدرات ومطلوب وهي جاي تتعاون وياي كـ مصدر حتى نوصل لمكانه هاي قضية أمن دولة والرمز 2002 هذا تاريخ أول سنة بلشت انضف حياتي بحياتي واعتز بيه مو مواليد أحد

سكتت لحظة بس الشك جان أعظم من كلامه

:- وجذبك؟ ليش تضم التليفون؟ ليش ما كلتلي؟

- رحمة أنتِ مريضة وأنا شغلي خطر ما ردت أدخلج بهاي المتاهات رنا هاي مهددة بالقتل من قبل أخوها إذا عرفوا هي تبلغ عليه لهذا السبب جاي أحجي وياها بحذر وبطريقة توهم المقابل إذا قره المحادثة

:- ما أصدك والله ما أصدك أنتَ ضابط وتعرف شلون تصفط الحجي وتطلع روحك مثل الشعرة من العجين إذا صدك كلامك عندي شرط واحد وما أتراجع عنه

كعد على طرف الجرباية جر حسرة طويلة وكال

- كولي شتريدين؟

:- تفتح كل حساباتك بتليفوني واتساب، فيسبوك، انستا، كلشي! أريد أشوف كل رسالة توصلك بلحظتها إذا أنتَ نظيف ما راح تمانع

باوعلي زبير وعيونه بيها لمعة حب وحزن على حالتي ابتسم بوجع وكال

- لهل درجة ماكو ثقة يا رحمة الزهراء؟ بعد كل هالسنين؟

:- الثقة انعدمت من شفت اسم رنا بتليفونك بنص الليل!

مد إيده أخذ تليفوني من الميز وبدأ ينزل البرامج ويفتح حساباته واحد ورا الثاني وهو يباوعلي ويكول

- صار هاي حساباتي كلها عندج وهاي رنا راح أحظرها وأحول ملفها لغير ضابط بس علمود ترتاحين رغم هذا الشيء راح يخرب الشغل بس أنتِ أهم من الشغل ومن رنا ومن الكل

من شفته انصاع لطلبي بكل هدوء بدت ناري تبرد شوية بس دموعي ما نشفت كعدت بالكاع وحطيت راسي بين رجلية وأبجي بصمت تقرب مني كعد يمي على الأرض سحب راسي لصدره وهو يهمس بأذني

- ولج يالخبلة ياهي التملي عيني وأنتِ موجودة؟ أنتِ العلوية أنتِ أم بيتي أنتِ اللي حاربت الدنيا علمودها تظنين رنا أو غيرها يهزون شعرة بية؟

رفعت راسي باوعتله عيونه جانت تحجي صدك بس الغيرة طبع بية ما يخلص

:- زبير أنا تعبانة والشك جاي ياكل بية لأن أحبك

- وأنا أموت عليج وحق من خلاج بنص كلبي ماكو غيرج مرة بحياتي

شالني بين إيديه مثل الطفلة حطني على الجرباية وصار يمسح دموعي بطرف أصابعه بدت لمساته تصير أهدأ ونبرة صوته تذوب الهم والحزن بيه

- رحمتي كافي زعل تعبنا من المشاكل أريدج الليلة بس إلي نسيني التعب وخليني أنسيج الشك

تقرب مني أكثر وأنا استسلمت لحضنه اللي هو أماني الوحيد رغم كل عواصفي جانت ليلة مختلفة ليلة صلح ممزوجة بلهفة وشوك كأنما جاي نثبت لبعضنا إنو حبنا أقوى من أي دخيل وأقوى من المرض وأقوى من رنا وقضايا الضباط

نمت على صدره وهو يلاعب شعري غفينا واهو لازم ايدي وضمني لصدرة وحساباته كلها بتليفوني بس كلبي جان يكلي : زبير الج وماراح يصير لغيرج

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُبر ٭٭

بوقت ما جنت أدرس بغرفتي تذكرت حوراء البنية الي ماراضية تطلع من مخي وضل بالي عليها أكثر رحت وراسلت غادي وكتبت الها

:- شلونچ اخيتي؟ اعتذر على الازعاج بس أريد أعرف أخبار حوراء ستار مهدي شلونها هم تواصلتي وياها؟

دزيت الرسالة وحطيت التليفون بعيد عني شوية ورجعت للملازم اضحك على روحي حتى اركز بالامتحان وسمعت صوت الرسالة وصلت لتليفوني أخذت نفس وأخذت تليفوني وشفتة لكيت غادي مجاوبة على رسالتي وكاتبة الي

- أهلا وسهلاً ماكو أي ازعاج اخوي انا بخير الحمدلله اذا أنتَ بخير ،، لا والله ياخوية ما نعرف عنها شيء من راحت لهسة ماكدرت أوصل لا لتليفونها ولا لتليفون أهلها

حسيت بغصة ببلعومي صارت من قريت رسالة غادي الجنت متوقع راح أعرف أخبار حوراء من خلالها لأن هي صديقتها الوحيدة و المقربة وما ينگطع التواصل بينهم للحظة شكيت غادي تجذب علية و حوراء طالبة منها تضم اخباري عنها

لأن وجه ذو الفقار ما بيه قلق ولا خوف على اختفاء حوراء وهلشيء يوحي ان هو يعرف اخبار ها ويعرف هية بخير

طفيت التليفون بدون ما اجاوبها وبديت أمسح بوجهي بأثنين ايدية شنو سويت خاطر هيج اتجازة وياج حوراء؟
وهنا سمعت الباب ينفتح ويدخل أحد لمن نزلت أيديه لكيت كدامي أخوي شبير

شبير :- شلونة الناسيني؟

شبر :- أنجب أنتَ صاير ماتنشاف

- لا والله عمي هو أنتَ من دخلت هي الچلية واتبدل حالك كلة صرنا نحن مو من المقام

:- انجب شبير ماحب هلسوالف

- ليش مو صدك؟

:- ماكو هچي حجي بس الدراسة شاغلة بالي

- الدراسة؟

:- اييي

- هههههههه علينا شبر الصادق علينا سولفها على الدبة هم تضحك عليك

:- اكووول كوم أطلع خليني أكمل

- شبيك سولفلي ما اطلع انا

:- شبير مادري شبيه

- شلون يعني؟

:- يعني مرات أحس أريد اداوم ومرات أحس ماريد أصلا أشوف الجامعة بعد

- مو جنت مگطع روحك على الدوام شني التغير هساع؟

:- مادري يمكن لأن جنت اداوم لشغلة وحدة وهسة راحت

- شنهي هي الشغلة؟

:- ملاكي الضايع للحظة حسيت روحي لكيتة بسس طلعت وهمان بعدة ضايع

- حلوو السالفة بيها ملاك يعني أخوي طايح على وجه ومحد كايل علية أسم الله

:- حلوة هاي ههههه

- اييي سولفلي ولك

:- شسولفلك؟

- كلششيي من الألف للياء شلون ومنو ويمتا وشنو سوت الك حتى سحلت خشمك اليابس

:- هية ما سوت شيء تعرف ليش؟

- ليش؟

:- لان عيونها جانت كفيلة تسوي كلشي بيه

- واصل مرحلة الهيام وصاير شاعر ابن البشير قيصر والله عمي زين ااييي خووية كمل أسمعك وبلة كلي تسوة؟

:- شبير .. سمارها ، عيونها ، ضحكتها ، حشمتها ، مشيتها ، ثكلها ، كلشي بيها يسوة عمري والبي

- شنو أسمها بلة؟

:- معليك

- تحبها؟

:- احبها بس؟ هههه اضلم حبي اذا كلت بس أحبها كول انا عايش على النضر الها من المرحلة الأولى وانا اجذب هاي مشاعري واكول ماكو شيء وماعندي شيء اتجاه هلبنت بس ماكدرت اضم اكثر بعد طلعن طلعن

- زين شبربر هية حلوة؟

:- مالك غرض

- طاح حضك اذا صدك

:- صحيح والله طاح حضي لان كعدت احجي الك

- هوة أنتَ شنو حجيت كضيتها علية معليك ومالك غرض هذا الحجي هذا؟

:- لأن صدك مالك غرض بهچي أسألة استحي على وجهك

- زين عوفك من هذا كلة أسألك سؤال ومنها اكلك بنضري تكدر تكون وياها لو لا!

:- ااسال بلة

- البنية مُسلمة؟

:- صدك طاح حضي لان احجي وياك شهل سؤال السخيف

- ترى كلش مهم مو سخيف

:- اكيد مسلمة شبيك أنتَ وشيعية هم يعني انا سيد أفكر بيهودية لو ملحدة شمالك أنتَ ؟

- لا ترى مابيها شيء حتى لو جانت مسيحية مثلاً المهم هية انسانة

:- شبير أصيح لابوي عليك؟ يخلي الإنسانية بطيبة كلبك اتزوج مسيحية هذا الناقص اطرد الملائكة من بيتي

- اييي هسة الحمدالله التريدها أنتَ شيعية

:- ليش أنتَ حاط عينك على مسيحية؟

- زين شبر شوكت تريد تتقدم لهاي الكريمة؟

:- لابعد وقت

- شوكت يعني؟

:- يعني يمكن ما يجمعني بيها نصيب تظل يم ربك وعيونها شوكت تحبني

- ههه تدري يكلك واحد مبخوت هيج كاعد وداعي على سلالة السيد أحمد الصادق كون ولا واحد يتوفق بحبة

:- هههههه اي والله صدك

- والكاظم شنهي هاي لا من عمامي ولا مننا جاي يكعد حضنا ويصير النريدة شنهي هاي

:- ربك يحلها ما تصعب علية

- ماكو اكرم من رب الرحمة .. وهسة يلا كووم حبيبي يلا غير هندامك وخلي نلحگ على مشية عمي

:- ابوي وين ما سمعت حسة

- نسييت ابو الشيخ ترى سبقنا لان لازم يكون موجود أول واحد وهسة يلا دور ولد الشيخ تسبق وتروح بلا تأخير

:- اها بس اكوي دشداشتي

- صااار

كام فتح الدولاب مالتي وصار يباوع بهدومي واندار الي هتف وياي

شبير :- يا دشداشة تلبس؟ البيضة لو السودة؟

شبر :- سودة

- حلوو .. تلبس قمصلة؟

:- اييي طلعلي القمصلة القماش الجوزية مو جلد

- اي صار تلبس غترة؟

:- اييي الغترة الخضرة وأسود اللبس بس أنتَ تسويها الي

- صاار اكوي دشداشتك واچيك 5 دقائق ما أتأخر

:- نادر ياهو مثلك أنتَ

عافني وطلع شبير علمود يكوي دشداشتي ونروح لمشية الخطبة مال عمي علي الكاظم وانا كمت لميت الملازم والأوراق وحطيتهن على الميز ورتبت غرفتي لا تجيني امي جميلة الجميلات وتخلي هيبتي على المشر

بعد دقائق دخل شبير وهو شايل دشداشتي وعلگها الي وبخرها دخلت انا للحمام ذبيت على روحي ماي وطلعت لبست الدشداشة والقمصلة الجوزية واجاني شبير مكمل روحة وكف كدامي ولف الغترة على راسي ولبسني ساعة ذهبية وانطاني السبحة ولبسني خواتم إثنين واحد الشذرة مالتة لون اسود جبيرة خلاني اللبسها بأيدي اليسرى بالخنصر والمحبس الثاني لون الشذرة احمر قامت وخلاني اللبسة بنفس الايد بالبنصر

صار محبس يم محبس والسبحة والغترة و الساعة المهم طلعني هيبة وصدك سيد بعد ما كمل كلشي خلى وجهي لوجه وحط أيديه على اجتافي واندار أخذ العطر ورش الي شوية وطك صفنة علية وهتفت وياه

شبر :- ها شنو اكتشفت؟

حط ايديه على راسي وأخذ باسني بيه لمن ابتعدت عنه ابتسمت اله وهو رد عليه بصوت ناصي ودافي

شبير :- اكتشفت الله رازقني بااحلا نسخة على وجه الأرض واكتشفت بعد ان أنا عندي أخ بعدال عالم كامل كلة زلم

هنا هو طلع من جيبة كلادة بيها أية الكرسي وجانت الكلادة عبارة عن سلسلة ونازل منها دائرة حديد ومدكوك بيها الآية جانت كلادة فضة خالص
عرفت ان هاي الكلادة هو المصممها ضحكت واخذ لبسني ياها وحطها جوة الدشداشة وهتفت وياه

شبير :- هيچ انا مطمئن عليك من العين

شبر :- شنهي انا النبي يوسف وتخاف لا انحسد هههه

- امشي اطلع لا احولك بناروس هسة مو النبي يوسف

ابتسمت بوجه شبير وأنا أعدل ياخة القمصلة الجوزية كلامه جان مثل البلسم على گلبي المكسور من غياب حوراء طلعت من غرفتي وأنا أحس بروحية جديدة رغم الغصة اللي بعدها ببلعومي بس هيبة آل الصادق ما تسمح للواحد يكسر جناحه گدام العمام

نزلنا الدرج وشبير گدامي يطگ أصبع ويغني بصوت ناصي يريد يغير جوي طلعنا للحوش جان الجو بارد بس الحماس اللي بالبيت يخليك تحس بحرارة العرس ركبنا السيارة وشبير لزم السياقة وطول الطريق يسولف لي عن فخامة الترتيبات اللي سواها عمي علي الكاظم لملاكه

وصلنا للمكان وما جان بيت عادي جانت ديوانية فخمة مأجرة لهيج مناسبة والسيارات مأمنة السرة والهوسة والزلم بكل مكان نزلت من السيارة عدلت الغترة وشبيت طولي شبير وگف بصف وهمس لي

- ارفع راسك سيد شبر اليوم عمامك كلهم هنا

دخلنا للديوان مال بيت العم عمران وأول ما خطينا العتبة ريحة البخور والكهوة العربية سطرتني سطر الديوان جان عبارة عن لوحة مرسومة بالهيبة بالصدر جان گاعد أبوي الشيخ السيد البشير قيصر بطلعته المهيبة وسبحته اللي ما تفارك إيده وعن يمينه ويساره السادة عمامي صف واحد يشد الظهر عمي السيد علي الباقر بنضراتة وهدوءه المعتاد
السيد علي الرضا بابتسامته اللي تريح الگلب
السيد المعتز بالله بخبالة اللي تخلي الكل يسكت من يسولف
الميرزا المرتضى الأمير و حامد المتقين اللي جان يوزع نظرات الفخر بينا والسيد علي السجاد اللي من شفته حسيت بظهري استقام أكثر وجان السيد علي الصادق كاعد وبالوسط جان العريس السيد علي الكاظم طالع كمر ليلة أربعة عشر الفرحة بعيونه مو بس فرحة خطوبة جانت فرحة انتصار المحب اللي أخيراً راح يحضن ملاكه

تقدمنا أنا وشبير حيينا الكل وبست أيد ابوي وسلمنا على العموم فرد فرد وگعدنا بمكانا جانت الكعدة مو بس كلام جانت بروتوكول عشائري وسيادي رفيع

بدت السوالف وابوي البشير قيصر هو اللي استلم دفة الكلام جان صوته يهز الديوان وهو يطلب إيد ملاك لعمي علي الكاظم المقابيل جانوا ناس أجاويد وردوا بكلام يثگل بالميزان بس اللحظة اللي خلت الكل يحبس أنفاسه هي من وگف ابوي البشير قيصر وكال

البشير قيصر :- يا جماعة الخير علي الكاظم ما جاي يخطب بنتكم جاي يطلب روح انحطت بروحنا وملاك بنتكم هي اليوم صارت قطعة من سلالة آل الصادق ومننا

بهيج لحظة تذكرت حوراء غمضت عيوني وتخيلت روحي أنا العريس وهي الملاك اللي جاي نطلب إيدها حسيت بغصة بس وجود عمامي حولي خفف الوطأة التفتت على عمي علي الكاظم شفته يبتسم ويهمس الحمد لله من انقرت الفاتحة وصارت الهلاهل ترج المكان من جهة النسوان اللي جانن بقسم ثاني

المشية ما جانت مجرد گعدة وگومة جانت استعراض لمدة حب علي الكاظم لملاكة رغم بيتهم كدام بيته بس خلّى السيارات تسد المجمع كلة والوجهاء كلهم موجودين والكبار كلهم جابهم لعيونها كأن جاي يطلب بنت ملوك والمكان كله تحول إلى عرس حقيقي

شبير جان يتحرك مثل النحلة يصب كهوة هنا ويضيف ضيف هناك وأنا جنت بصفه أحاول أظهر بأحسن صورة جاني ابوي حط إيده على كتفي وهمس بأذني

البشير قيصر :- شبر عينك لا تنزل السيد يظل راسه مرفوع حتى لو گلبه يحترك ويتفطر

عرفت ابوي يعرف بسالفتي وان امي ما ضلت ساكتة ومسولفة لابوي يعني هو يعرف ابنه ومنو ملاكه الضايع هزيت راسي وبسته من كتفه

شبر :- تؤمرني بوية أنا ابنك وأخو شبير راسي ما ينزل

لمن خلصنا المشية كلها وتمت على حفظ الله بوسط الهوسة عمي علي الكاظم باوعلي وضحك وانا بالكوة رسمت ابتسامتي انتبه عليه لهذا كام من مكانة وسحبني على كتر جان مخلص ومبين التعب والفرح بوجهه سألني وهو يبتسم.

علي الكاظم :- شبر ليش عيونك بيها عتب؟

شبر :- لا عمي فرحان الك حييل والله تستاهل ملاكك وملاك تستاهلك

- شبر اللي يحب صدگ الله ما يضيعه شوفني أنا سنين انتظرت وتعبت واليوم هي صارت حلالي لا يظل بالك

جنت اريد اعيش على كلمة وهاي الكلمة جانت كافية تخلي الروح ترجع لي هو عافني ورجع لعمامي وبعد ما خلصت المشية بقينا بس إحنا العمام والولد گعدنا گعدة عائلية بالحديقة الخارجية الجو جان يجنن ابوي البشير قيصر جان يسولف لنا عن قصص الحب القديمة وشلون جانت الزلم تشتري المرة بدم الگلب
شبير طلع المغني الي بداخلة وبدأ يدندن بصوت ناصي

شبير :- يا عشكنا. يا عشكنا.. ذوبنا بهواك

بذاك الوقت حسيت صدگ إحنا قوة وإحنا عز وإحنا سند لبعض باوعت للخواتم بإيدي الأسود والأحمر وتذكرت كلام شبير عن العين چست الكلادة الفضة اللي جوا دشداشتي وحسيت بأمان غريب

بالرجعة للبيت جنت أنا اللي أسوق وشبير نايم من التعب بصفي بالصدر الطريق جان هادئ والشوارع شبه فارغة لان جان الوقت متأخر فتحت الجام وخليت الهوى البارد يضرب وجهي

طلعت تليفوني شفت رسالة غادي مرة ثانية بس هالمرة ما انقهرت مسحت الرسالة وكتبت بگلبي

شبر :- حوراء لو جنتي بسابع سمة ولو جان ذوالفقار يضم أخبارج سيد شبر راح يوصل لج اليوم شفت عمامي شلون جابوا ملاك لبيتهم وباجر أجيبج إنتِ وتصيرين ست البيت

وصلنا للبيت نزلت شبير وهو دايخ من النعاس صعدنا لغرفنا قبل لا أدخل غرفتي شبير لزم إيدي وكال بصوت ثكيل من النوم

شبير :- ها شبربر بعدك ضايج؟؟.

- اليوم عرفت إنو آل الصادق ما يضيع لهم حق ولا يضيع لهم حب ما ضايج ابد

:- خوش اذا هيچ تصبح على خير

- أنتَ الخير كلة بعد اخوك ..

دخلت لغرفتي وسديت الباب وشمرت روحي على الفراش نمت بليلتها وأنا أحلم بعيونها السكرية وباليوم اللي ألبس بيه الدشداشة السودة والكلادة الفضة بس هالمرة مو لمشية عم من عمامي لازم تكون لمشية سيد شبر الصادق

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ طيبة الزهراء ٭٭

بعد ما خلصت المشية والهوسة وكلشي تم برعاية الله والبيت فرغ وصار هدوء لأن أتأخر الوقت الي رجع لبيتة رجع والي صعد ينام صعد صرت أسمع حتى صوت الهواء من ورة صوت الهدوء مسحت مكياجي وخليت غسول ولمن اجيت أنام لكيت علي الصادق لهسة ما صاعد أخذت الشال وطلعت من الغرفة

فريت البيت كلة ومالكيت إلا أثر فتحت الباب مال غرفة علي الكاظم لكيتة غاط بالنوم ومحد يمة ... استغربت بالعادة يكون يم أخوه بعدها كلت إلا كاعد برة لمن طلعت لكيتة صدك بالبرد والهوة العالي كاعد بالجلسة مال الحديقة رحت يمة

والشال الجنت لافة نفسي بيه حطيتة على جتاف علي الصادق وانا دخلت لحضنة وخليت ايديه تحاوطني حطيت راسي على صدرة وصار الشال مغطي علي الصادق ومغطيني وهوة جان يدخن ما سوة أي رد فعل جان أبرد من الجو اخذ نفس طويل من الجكارة وطلعة وهتف وياي

علي الصادق :- اصعدي لفوك باردة عليج

طيبة الزهراء :- وشنو أنتَ الرجل الحديدي ما تحس بالبرد مو باردة عليك هم

:- عادي أحب هيچ اجواء

- لان تشبهك ..

:- هههه جنت احر من نار التنور وهسة هاي الاجواء صارت تشبهني

- تصدكني اذا كتلك الكعدة هسة وياك حلوة؟

:- لو تكطعين روحچ كدامي ما اصدك

- صداقي

:- اكو سؤال يدور براسي واريد جواب يريح هذا الراس

- شنو كول؟

:- طيبات ليش ما رفضتيني ليش من جنت احجي وياچ ما كتيلي عندچ علاقة بااخويليش انطيتيني مجال وخليتيني اتمادة بالتفكير وياج؟ زين هسة عوفچ من هذا كلة أنتِ بانية حياتچ وي علي الباقر ليش من خطبتچ ما كتيلي ما اجيتي الي وكلتي يابة هيچ وهيچ السالفة علمود انا أتصرف قسماً باالله جنت راح اخلي علي الباقر هو العريس موش انا وافرح الكم من كل كلبي واطك اصبع واهوس لأن راح اجمع راسين بالحلال الله لييششش طيبات ليشش؟؟

- أكلك ليش ماحاربت لجل علي الباقر؟ واتقبلت اتزوجك وأبدي وياك حياتي الجديدة؟

:- ريحي كلبي وطفي ناري وكليلي ليش

- اختصار مختصر لأن أخوك ماحارب علمودي

:- شلون؟وهو هسة مستعد يذبحني علمودچ

- هلشيء بس براسك هو مو شايفني هسة تعرف شلون ما حارب علمودي لان بيوم ألمعتز باالله كال للكل ان أنا راح ازوج طيبات من علي الصادق هو أخوك ضل ساكت ماحجى شيء هو جان يكدر يغير كلشي ومحد يكلة على عينك حاجب يا علي الباقر بس هو أختار يسكت كالعادة ولمن طلبت منه لك ، صداقي اناا بجيت كداامه انا لزمت ايدة وكتلة أنزل ألهم وكول للكل ان أنتَ تريد طيبات وماراح تتزوج غيرك تعرف بذاك اليوم هو شنو رد عليه؟

:- شنو كالچ؟

- كالي مستعد أخسرچ بس ما أخسر ألمعتز باالله ، أتخيل دمعتي الوكعت كدامة ومااهتم الها تعرف جانت هاي الدمعة كفيلة تمسح حبة من گلبي وماجنت أريدك تعرف بهي العلاقة لأن والله بديت وياك بداية نضيفة وجنت أريدك صدك

:- تقنعيني هسة ان أنتِ ما تردينة؟

- ولا ببالي أصلاً

:- حتى اذا نفصلنا

- وما ننفصل مااعوفك انا لو تريد مدري شتسوي علي الصادق انا أهلي ماتوا وأنتَ صرت أهلي ، لا تغار من اخوك لأن والله حبي الك تعدة حدود علي الباقر

:- طيبات

- عيونها

:- خلي نطلع برة هذا البيت

- وين نروح؟

:- اخذج وأخذ منة المنان ونرجع لبغداد

- ماعندي مانع أروح وياك لوين ماتريد

:- نستقر هناك ترى

- لو أموت ونندفن هناك عادي عندي

:- صدك؟

- أنتَ زلمة بيتي وابو بنتي ضي عيني أكيد صدك تنگسر رگبتي اذا كسرت كلمتك

:- جاي تجامليني بهذا الحچي

- صداقي من تزوجنا وانا هذا كلامي وياك

:- شايفة هذا الحجيتي هسة كلة راح اشوفة صدك لو لا

- شلون؟

:- كوومي وياي

أخذني من أيدي ودخلنا لجوة صعدنا لغرفتنا ولمن دخلنا ودخل وراي سد الباب وقفلة انداريت وهتفت وياه وانا متوترة

طيبة الزهراء :- شنو البيك صداقي؟

اتقرب مني حيل وصار قريب تفصلنا شعرة حط عيونة بعيوني وايديه على خصري

علي الصادق :- كلامچ الجوة مجرد كلام تكدرين تطلعينه للشخص التردينة بس الراح يخليني اصدك بمشاعرچ شيء واحد بس

أخذت نفس ونزلت راسي وحطيت ايدية على صدرة وهتفت وياه

طيبة الزهراء :- وشنوو هذا الشيء الواحد

حط أصبعة على حنچي ورفع راسي لمستوى راسة وهتف وياي

علي الصادق :- حطي عيونچ بعيوني وكليلي أحبك خليني أسمعها منچ لمرة وحدة وأنتِ حاطة عينچ بعيني علمود أحس هاي صدك الي لمرة وحدة بس طيبات كليلي أحبك من كلبچ لمرة وحدة بسس

حاولت أبتعد عن علي الصادق لأن حيل جنت متوترة أخاف منه أخاف أسوي شيء يكوم يتخبل علية ردود فعلة الجنونية جانت تخليني أحسب احساب الف مرة لكل شغلة أريد أسويها لو اريد اكولها حطيت ايدية على صدرة و دفيته شوي عني وابتسمت إله وهتفت وياه

طيبة الزهراء :- صداقي تأخر الوقت وراك دوام تعال ننام يروحي

ما قبل ابتعد عنه لزمني حيل وطبگني عليه وهتف وياي بنتر ناصي

- لا تتهربين بروح ابوچ لا تتهربين للحظة وحدة خليني احسّ الكلام تقصديني بيه مو كاعدة تتخيلين علي الباقر بيه ابوسّ ايدج علي الصادق يتوسل الج ويكلج احجيلييي

ما تحملت أشوفه هيچ يبجي أخذت وضميتة لحضني حيل وضغطت على راسة واني دافنته بصدري بعدها رفعت راسه وهتفت وياه وانا أمسح دموعة

:- هاي عيني بعينك وايدك على كلبي وحسّ وإسمع انا هسة مرتك ومااشوف رجال غيرك بحياتي من بعد أهلي الراحوا أنتَ أهلي لا تبجي ولا تنكسر مُستحيل اصير لغيرك حتى لو طلگتني علي الصادق انا أريدك وأريد منه المنان وأريد بيتي

- يعني ماراح تعوفيني بيوم؟

:- مو بالي أصلا اعوفك كلي شعوفك وأنتَ كُلّي!

- حتى لو بيوم قسيت عليج وفقدت أعصابي بالضرب

:- ههههههه اشوفك بوضعية أقسى من هيچ؟ صالي ثلاث سنوات متزوجتك وبيهن شفت الضيم والضرب بكل أنواعة أزعل منك بس ما اعوفنك

- طيبات انا حيل احبچ والله كلش هواي احبچ

:- أدري بيك تعال حبيبي طيبات ماتعيش اذا صارت لغيرك ما تعيشش

أخذت علي الصادق ونمت على ظهري وخليته يتمدد يمي وينام ويخلي راسة على صدري ولزم هدومي حيل چنه مثل الطفل الخايف يضيع أمه وانا هنا هم ماردت يحس بشيء ضليت اللعب ببشعرة لحد ما غفيت

وكعدت الصبح لكيتة ماهو يمي باوعت للساعة لكيتها بــ 7 ونص اليوم محاضرتي تبلش من الساعة 9 لهذا سحبت روحي من الفراش ولبست حجابي و صايتي وطلعت علمود انزل للحمام

وانا اغسل وجهي سمعت صوت صياح علي الصادق طلعت أركض ورحت للصالة لكيت علي الباقر شايل منه المنان والعلوية واكفة كدام علي الصادق صايرة حايط صد كدامة وجان علي الصادق يصيح ...

علي الصادق :- يمة كليلة يعوف بنتي وكافي خلي يفك ياخة عني وعن عائلتي

العلوية :- صداقيي يَمّة صلِ على النبي أذكر الله ترى هو هم عمها

- لا عمها ولا يعرفها هاااي بنتي الييي بنتيي من صلبي يمة خلي يعوف الطفلة لا يخليني هسة أخذها منه بالقوة فـ الأحسن لا يخرع الطفلة خلي يعووفها

علي الباقر :- المن اعوفها؟ الك أنتَ اخليها؟ ههههههه أنتَ بالبداية صير إنسان وي أمها حتى تصير إلها أب منة المنان لا تصير بيدك ولا بيد أمها لحد ما أشوفكم صدك صرتوا مسوؤليين

- انا وطيبة الزهراء راح نرجع نسكن في بغداد ومنه المنان راح تجي ويانه لأن هي بنتنا

شفت ملامح الصدمة على وجه علي الباقر ووجه العلوية الي حطت ايدها على صدرها وصاحت

العلوية :- شلون تفكر هيچ؟ عزة العزاني ماصدكت على الله رجعت الي أنتَ وأخوك هسة تريد ترجع تروح؟

علي الباقر :- عسااه ما رجع شحصلنا منه من رجع لليوم بس دوخة الراس وخبالة

العلوية :- عللليي الباقرر لا تحط فووك النار حطب أخوك هذاا وهاي أنتَ الچبير

علي الصادق :- لااا خلي يحجي هو هذا علي الباقر الي كلكم طايرين بيه خلي يطلع السم الي بكلبة لككك اذا أنتَ تتمنى انا مارجعت چا انا اتمناك تموت اليوم قبل باچر واحلف جدام الكل يوم وفاتك يا علي الباقر راح أسوي عرس ثااني

انصدمت حيل للكلام الي طلع من علي الباقر وللكلام الي رد بيه علي الصادق والمصيبة جان الكلام طالع من وسط كلبة علي الباقر نعرف ليش يضوج من علي الصادق من زمان بس مايكرها بس انا اليوم شفت كره حقيقي بعيون علي الصادق لأخوه... هنا سمعت صوت صيحة من على الدرچ التفتت لكيتة علي السجاد سمع كلام أخوه علي الصادق وصاح بيه ونزل ...

علي السجاد :- عليييي الصااادق

نزل علي السجاد الدرج وزاح العلوية على صفحة ووكف هوة كدام علي الصادق وضربة ذاك الراجدي الي يرجع للمخبل عقلة وصاح بيه

العلوية :- لاااا يمة لا تضرب أخوك!!

علي السجاد :- أحسن الج علوية لا تدخلين .. اضربة واكسر راسة حتى ما يطلع بهچي كلام مرة ثانية ولك وين أكو أخو يتمنى الموت لأخوه؟
ولك أنتَ علي الصادق أبن عبد الحسن ابن أحمد الصادق الي كل تربيتهم على آية ﴿ قَالَ سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا فَلَا يَصِلُونَ إِلَيْكُمَا ﴾ نسيتها؟؟؟

علي الصادق :- ما أتذكرها أصلاً يمكن أنتَ الي نسيت انا موش تربيتكم ...

علي الباقر :- صحيح أنتَ تربية شكووو بار شكوو مجموعة متعاطية بالخارج أنتَ تخرجت معلم صنعة على أيديهم

التفت علي السجاد لعلي الباقر ورفع أيده بوجه بمعنى
( اسكت ماريد اسمع صوتك ) وصاح بيهم هَمّة الإثنين

علي السجاد :- عليي الباقر!! أنتَ من شوكت تحچي هيچ؟ ولكم من شوكت نحن نذابح بيناتنا؟ لكم سائد جبران دخل بيناتنا راد يضيعنا وماكدر ماضيعنا ورجعنا أقوى من قبل والله رجع كيدة بنحرة! ولكم هسةة هسةة ياولد عبد الحسن واحد يكتل الثاني واحد يدعي على الثاني علمود شنو هااا وين وصية جدي بيكم لحد آخر لحظة بحياتة طلب أحفاده يضلون تحت سگف واحد ويضلون ايد وحدة لا واحد ينطي بالثاني ولا واحد يكسر بالثاني وطلب حفيداته يضلن معززات مكرمات لابيهن التزعل ولا بيهن التنهان وتنضرب ولا بيهن الينكسر الها خاطر لو ينرفض الها طلب هاااا وينها وصية جدي بيكم؟ أحمد الصادق وين من حياتكم هااي

الكُل سكت حتى العلوية دنگت رأسها محد بيهم كدر يرد على كلام علي السجاد الي مابيه ولا ذرة خطأ جانت دموعي تنزل بلا رداد ضل علي السجاظ بالنص عين على علي الباقر وعين على علي الصادق منتضر منهم رد ولمن شاف محد بيهم إلا عين يحجي كمل كلامة هو وكال

علي السجاد :- علللي الباقر روح شوف شغلك لأن انا ماريد أتأخر على دوامي أريد أروح مو فارغ لسوالف الزعاطيط مالتكم تالي وقت أشوف اليكبر يعقل بس ولدج يا علوية كبروا يتخبلون

اندار يريد يروح التفتت الهم ورفع اصبعة بوجهم وكمل كلامة

علي السجاد :- وهااا سالفة ثانية الطلعة والسكن برة هذا البيت ممنوع گطنة وتنشال من الأذن واذا ما كدرت الكم فـ عمة السادة تكدر عليكم واحد واحد موجودة هية وتدللون عليه أروح واكللها وتعرفون بيها والله مستعدة تحصر كل واحد بيكم الي بكبر الجبل وتحط الخيزرانة وتربيكم من جديد ولا واحد بيكم يرد بوجها لو يكللها انا زلمة تزين شواربكم الي عبالكم كبرتوا بيها وماواحد يردكم مااريد بعد حسّكم يعلى بالبيت على حسّ العلوية اذا مرتاحين عبد الحسن راح وصرتوا براحتكم وداعت أولادي انا موجود واصير الكم اخسّ من عبد الحسن اذا لزم الأمر وياكم واكسر رگبتة الي يعاندني لو يثني على كلامي وأنتَ علي الصادق تروح تلبس وتغدي لدوامك ما تضل كاعد بالبيت مثل النسوان وبس ترجع ما تطلع لأن بس اجي انا من دوامي عندي كعدة طويلة وياك وسوالف هوااي

بهذا الوقت اندار علي السجاد ونفض القمصلة مالتة وعدل شعره بيدة وطلع من البيت راح لدوامة و علي الصادق صعد بسرعة لفوك و علي الباقر الجان شايل منة المنان لصدرة نضر الي وبلا أي ملامح بوجه أخذ جنطة الي بيها غراض منه المنان وطلع من الصالة انا سحبت خطواتي وصعدت لعند رچلي أشوف شبيه ..

دخلت الغرفة لكيتة كاعد على طرف الجرباية وحاط راسة بين جفوفة رحت كعدت يمة وحطيت ايدي على چتفة وهتفت وياه

طيبة الزهراء :- لا تعصبب نفسك كاافي أهدأ لخاطريي لا تفكر هواي شوف رجلك شلون ترجف ترى أريدك انا ما بايعتك لايصير بيك شيء يمعود أهدأ

رفع راسه من بين ايديه وعيونه جانت عبارة عن جمر حمرة ودموعه محبوسة كوة باوعلي بنظرة كسرت خاطري نظرة طفل انظلم وهو بعز قوته لزم ايدي اللي على جتفه وعصرها حيل لدرجة حسيت عظامي راح تطك بس ما حجيت ولا وخرت لأن أدري الوجع اللي بگلبه أكبر بآلاف المرات من وجع ايدي

هتف بصوت مبحوح يرجف

علي الصادق :- سمعتيه؟ سمعتي علي الباقر شلون يحجي؟ يگلي صير انسان! ولج طيبات أنا مو إنسان؟ أنا اللي ضيعت سنين عمري بالغربة أنا اللي نحركت روحي من القهر والوحدة يجي هسة يزاودني على بنتي؟ يگول ما تصير بيدك؟

دنكت راسي وحطيت ايدي الثانية فوك ايده ردت أمتص هذا الغضب كله

- صداقي حبيبي علي الباقر محروك گلبه وأنتَ تعرفه من يضوج ما يثمن كلامه لا تأخذ على خاطرك هو يحب منه المنان ومستحيل يفرقها عنك بس جانت ساعة شيطان

فز من مكانه مثل الملدوغ وبدأ يمشي بالغرفة يروح ويجي يفرك بوجهه وبشواربه بقوة مثل المخبل

علي الصادق :- لاااا مو ساعة شيطان! هذا حقد قديم هذا سم جان ضامه وطلعه اليوم ولج طيبات أنا شسويت؟ حبيتج؟ تزوجتج؟ لو لأن أنا مو مثلهم مو السيد المثالي اللي يرضى عليه الكل؟ أنا علي الصادق اللي شال ضيم ما شاله جبل وبدال ما يسندوني يضربوني بظهري؟

تقربت منه وكفت كدامه لزمت وجناته بثنين ايديه خليته يركز بعيوني وهتفت وياه

- باوعلي صداقي باوع بعيوني أنتَ مو وحدك أنا وياك ومنه المنان بنتك وأحد ما يكدر يأخذها منك كلام علي السجاد جان قاسي بس هو راد يلم الشمل راد يذكركم بجدكم أنتَ هسة لازم تهدئ روح لدوامك أثبتلهم إنك السند إنك الزلمة اللي ما تهزه ريح لا تنكسر كدامهم عفية علي لا تخليهم يشوفون ضعفك

سكنت حركته شوي وبدأ يتنفس بصعوبة صدره يعلى وينزل حط جبهته على جبهتي وغمض عيونه حيل وهتف بصوت ناصي كلش مثل الهمس چان

علي الصادق :- أخاف يا طيبات أخاف أفقد أعصابي وأسوي شي أندم عليه أخاف هذا البيت يبلعنا كلنا علي الباقر ما راح يتركنا بحالنا وعلي السجاد يريد يمشينا على المسطرة وأنا روحي طير ما أحب القفص

- ماكو قفص يروحي أنا وياك نبني بيتنا الخاص حتى لو بوسط هذا البيت هسة روح غسل وجهك وبدل ملابسك المنان هسة تجيبها العلوية لا تخاف عليها علي الباقر يحبها أكثر من روحه مستحيل يأذيها

هز راسه بــ قلة حيلة وراح للحمام طلعتله ملابس الدوام رتبتهن على الجرباية وكعدت أنتظره كلبي جان يرجف مو بس منه هوَّ بل من المستقبل اللي جاي صراع الأخوة أصعب صراع خاصة إذا جانت المرأة هي المحور رغم إن علي الباقر سكت وتنازل بس السكوت جان بركان نايم وانفجر اليوم

طلع علي الصادق من الحمام واجاني وجهه رطب وشعره مخربط. بدأ يلبس بصمت قاتل لبس قميصه واجيت أنا أعدل الياخة وأشد الدكم جانت ايدي تلامس صدره وجنت أسمع دكات كلبه السريعة وهتف وياي بهي الاثناء

علي الصادق :- طيبات

- عيونها

:- أوعديني

- بشنو يروحي؟

:- مهما صار ومهما سمعتي لا تتغيرين عليه لا تخلين كلامهم يأثر بيج إذا حسيتي بيوم إنچ ندمانة لأن تزوجتيني بدال علي الباقر كوليلي.. كوليلي وأنا أنهي كلشي بيدي

غصيت بالعبرة وحطيت أصبعي على شفته وهتفت وياه بانفعال هادئ وصرخت بيه بصوت ناصي

- اششش لا تكول هذا الكلام الموت أهون عليه من ندمي على زواجي منك أنتَ رجلي وأبو بنتي وسندي علي الباقر صار صفحة وانطوت من زمان واليوم كدامه وكدام الكل كلت إنك أنتَ أهلي كافي شك يا علي كافي تحرك بروحك وبينا

ابتسم ابتسامة مكسورة وطبع بوسة على راسي ورد عليه

:- راح أروح للدوام بس رجعتي مو مثل طلعتي علي السجاد يريد كعدة؟ وانا اريد تصير هاي الكعدة ونحط النقاط على الحروف ما أظل عايش بظل ابن عبد الحسن المثالي وأنا المحكوم عليه دايماً

أخذ جنطته ومفاتيحه ونزل وكفت بباب الغرفة أباوعله وهو ينزل الدرج خطواته جانت مهزوزة بس بيها إصرار غريب نزلت وراه وكفت بالباية الأخيرة للدرچ لكيت العلوية كاعدة وتسبح بسبحتها وعيونها غارگة بالدموع ولمن مر من يمها ابنها العلوية باوعت لعلي الصادق وهو طالع وصاحت وراه

العلوية :- الله وياك يمة الله يبرد گلبك ويهديك لا تشيل بكلبك على إخوتك همة حزام ظهرك بهل دنيا ياامي

ما رد عليها علي الصادق بس هز راسه وطلع صوت سيارته وهو يشخطها جان يعبر عن غضبه المكتوم

التفتت العلوية عليه وكالت بصوت مكسور

العلوية :- يمة طيبات أنتِ العاقلة أنتِ اللي تطفين النار علي الصادق جمرة وعلي الباقر صخرة وأنا بيناتهم جاي أتفتت صيري وياه لا تخلينه يتهور ترى هذا ابني وأعرف خباله

- خالة علي الصادق تعبان يحس نفسه غريب بوسطكم ساعدوني حتى يحس بالأمان مو كلما يحجي كلمة ذكرتوه بماضيه أو غلطه هو بشر ومن حقه يغار على عائلته

عفتها وصعدت رحت لغرفتي فكرت بـ منة المنان الجانت بين ايدين علي الباقر هاي الطفلة هي الضحية بوسط صراع العمالقة هذا

فتحت الشباج جان الجو بارد وهوا بغداد رغم إحنا مو ببغداد هسة بس ريحتها ببالي جان يطگ بصدري تذكرت كلام علي الصادق عن الرجوع لبغداد هل فعلاً الحل هو الهروب؟ لو المواجهة؟

مر الوقت رحت للجامعة ورجعن وصار العصر والبيت هدوء يسبق العاصفة علي السجاد رجع وكعد بالصالة وصاح على الكل

علي السجاد :- الكل يحضر اليوم نصفي الحسابات لا علي الباقر يظل شايل ولا علي الصادق يظل يتخبل والنسوان يظلن بغرفهن هذا حجي زلم

كلبي وكع بين رجليه رحت لغرفتي قفلت الباب وكعدت وراها أسمع الأصوات اللي بدأت تعلى بالصالة سمعت صوت
علي الصادق وهو يصيح: هذاا حقي!
وصوت علي الباقر وهو يرد ببرود يستفز الصخر: حقك لو أنانيتك؟

جنت أدعي ربي تعدي على خير فجأة صار هدوء تام هدوء يخوف أكثر من الصياح وراها سمعت صوت طبكة باب قوية وصوت سيارة وهي تمشي بسرعة جنونية
ركضت للشباچ شفت علي الصادق طار بالسيارة نزلت أركض للصالة ما اهتميت لكلام علي السجاد وصحت بيهم بصوت حالي

- وين راح؟ علي الصادق وين راح؟

علي السجاد جان واكف وجهه مفسر وعلي الباقر دنگ راسه و علي الرضا هو الرد علية

علي الرضا :- راح يبرد كلبه عوفيه طيبة خليه يواجه نفسه

- شلون أعوفه؟ وأنتم كلكم عليه؟ أنتم ما جاي تفهمونه

بجيت بحرگة بجيت على حظي وعلى رجل حَبني لدرجة الجنون وعلى أخو ضحى بحبه بس ما كدر يضحي بكبريائه

مرت ساعات وصار الليل وعلي الصادق ماكو الموبايل مغلق والكل كاعد على أعصابه العلوية تلطم على صدرها وعلي الباقر كاعد بالزاوية يدخن جكارة ورا جكارة وعيونه تلمع بدموع مكتومة

بالساعة بـ 11 بالليل سمعنا صوت سيارة طبكت بالباب ركضنا كلنا نزل علي الصادق بس مو مثل ما طلع جان هاديء هدوء غريب وملابسه بيها تراب طلعنا نشوف تمشى علي الصادق لوسط الحوش باوع لعلي الباقر وباوع لعلي السجاد وراها باوعلي تقرب مني لزم ايدي كدامهم كلهم وباسها وهتف وياي

علي الصادق :- جهزي غراضج طيبات.. وجهزي غراض منه المنان الفجر نطلع لبغداد هذا البيت وهذا الجاه وهذا الورث كله لولد عبد الحسن المثاليين أنا أخذ عائلتي وأمشي ملك بغير مكان

علي الرضا :- لا تتهور وين تروح بهالليل؟

:- أروح لمكان ما بي أثر من علي الباقر أروح لمكان أكون بيه أنا الأب وأنا الزوج بدون ما أحد يذكرني بذنبي اللي هو أصلاً جان طيبة گلبي

اندار عليه وكال بصوت ناصي بس مسموع

:- طيبات ترحين وياي؟ لو تختارين تظلين تحت سگف الأمان مال إخوتي؟

باوعت لعيونه شفت بيها مستقبلي تعبي وحبي ما ترددت ثانية وحدة لزمت ايده حيل وكلت بصوت واثق كدام الكل

- أروح وياك لآخر الدنيا.. أنتَ أهلي ووين ما تروح بيتي هناك

عفناهم ورا ظهرنا وصعدنا نلم غراضنا جانت هاي النهاية لبداية جديدة بداية بعيدة عن صياح الإخوة وعن ذكريات الماضي اللي جانت تخنكنا لمينا جروحنا بچنطة

وطلع علي السجاد متصل على عمة السادة فاطمة الزهراء ومسوالف الها الصار كلشي بالتفصيل الملل ومشكلة علي الصادق بحيث لمن نزلنا حتى نطلع لكيناها بالصالة استوقفتنا واكفة بكل هيبة وتنضر النا ببرود قوي وأشرت بيدها بمعنى ( حطوا الجنط بالكاع ) اجه علي الباقر وسحب منه المنان من حظني ولمن راد يدخل علي الصادق وياخذ البنت صاحت بيه عمتي

فاطمة الزهراء :- لا تتكرب علي الصادق ...

وكفت عمة السادة فاطمة الزهراء بنص الصالة جانت هيبتها تترس المكان والعباية الزينبية ممدودة وراها مثل جناح الغراب عيونها بيها حچي ما يخلص ونظرتها تگص الحديد من صاحت بـ علي الصادق البيت كله جمد علي الصادق چان شاد حيله والجنطة بيده وعيونه تجدح نار وعناد رد عليها وصوته يرجف من القهر

علي الصادق :- عمتة الله يخليج لا تكسرين بكلمتي جدام الكل أنا اليوم قررت وهذا البيت بعد ما يلمني أنا وياهم بسگف واحد أنا موش ابن عبد الحسن إذا ضليت هنا يوم واحد انهان بيه وتنوخذ مني بنتي

عمة السادة تقدمت خطوات وصوت مداسها على الكاشي چان مثل دگات الطبل بگلبي وگفت گباله رفعت إيدها ولمست چتفه بحنية الأم وقوة القائد وهتفت بصوت هادئ بس يهز

فاطمة الزهراء :- ولك علي الصادق يا ريحة الغالي تظن الشردة هو الحل؟ تظن إذا شلت جنطتك ورحت لبغداد راح تخلص من الوجع اللي بداخلگ؟ الوجع مو بالحيطان الوجع بالگلوب المتزاعلة أنتَ وليدي وعلي الباقر وليدي وعلي السجاد السند إذا تفرقتوا اليوم باچر الغريب ياكلكم وما يخليلكم أثر

التفتت لـ علي الباقر اللي چان لازم منه المنان وحاضنها بقوة وصاحت بيه وكملت كلامها

:- وأنتَ علي الباقر بنية أخوك هاي قطعة من روحه شلون تجرأ وتكول ما تصير بيدك؟يا هو أنتَ حتى تحكم على أبو ببنته؟ السكوت الچان بيك سنين طلع اليوم سم؟ رُد الطفلة لأبوها ولحد يفتح حلكه بكلمة طلعة من هذا البيت دام راسي يشم الهوى

علي الباقر علمود لا يكبر المشكلة سلم الطفلة لعلي الصادق بـ إيد ترجف علي الصادق أخذها وشمها حيل چنه جاي يستمد منها القوة بس لساته معند باوعتلي عمتي جرتني من إيدي وگعدتني يمها على القنفة وصاحت بالولد كلهم يگعدون بمكانهم

فاطمة الزهراء :- اسمعوني زين.. هذا البيت الي يجمعكم بناه أحمد الصادق بدم الگلب وراده ملم للمحبين مو ساحة صراع علي الصادق أنتَ مريض بحبك لطيبة الزهراء وهذا مو ذنب بس الذنب إنك تظن الكل أعداءك وعلي الباقر أنتَ ضحيت بس التضحية ما تعني المنّ ولا تعني إنك تكسر بخاطر أخوك كلما شفته مرتاح

بدأت عمتي تحچي عن الماضي عن أيام چانوا بيها يلعبون سوة بالحوش عن وصية جدهم اللي چانت تگول

أحمد الصادق :- الأخو خيمة والبيت بلا أخو خرابة

چانت تحچي ودموع العلوية تنزل بصمت وعلي السجاد واگف بالزاوية عاكد حواجبه يحس بمسؤولية كلامه القاسي الصبح

مرت الساعات والحچي چان يغلي علي الصادق چان كاعد وعيونه بالأرض و علي الباقر يلعب بسبحته بقلق فجأة علي الباقر گام من مكانه تمشى لحد ما وصل گبال أخوه علي الصادق الكل حبس نفسه

هتف بصوت مخنوگ

علي الباقر :- صادق .. يمكن السان خانني الصبح ويمكن الغيرة على منه المنان خلتني أحچي كلام ما يثمن أنا ما أكرهك ولا أتمنى موتك أنتَ عضيدي طيبة صارت مرتك وأنا رضيت بقسمتي من زمان بس الوجع إنك تظنني أريد أخرب بيتك وحق جدنا الحسين أنا ردت مصلحتكم بس الطريقة چانت غلط

علي الصادق رفع راسه شفت عيونه بعدهن بيهن أثر عتب بس گام حضن أخوه علي الباقر وحسيت هلشيء بس كدام العلوية فاطمة الزهراء بس هالمشهد چان كفيل يمسح كل تعب السنين العلوية گامت تضحك حيل وعمة السادة ابتسمت ابتسامة النصر عمة السادة باوعت لعلي الصادق وگالتله

فاطمة الزهراء :- هسة يمة بعدك تريد تروح لبغداد وتخلي أمك تتلوى من القهر؟ لو تظل هنا وتثبت إنك زلمة البيت وسنده؟

علي الصادق باوعلي چانت نظراته تسألني عن رأيي ابتسمتله وهزيت راسي بمعنى (إحنا هنا مكاننا ) تقرب مني لزم إيدي وگال كدامهم

علي الصادق :- لعيون عمتي ولخاطر دمعة أمي راح أظل بس بشرط طيبة الزهراء ومنه المنان خط أحمر لحد يقرب صوبهن بكلمة تمس خاطري

علي السجاد تقدم وضرب علي الصادق على چتفه بضحكة وهتف وياه

علي السجاد :- هسة صرت علي الصادق اللي أعرفه والراجدي مال الصبح عتبره هدية من أخوك الچبير حتى يصحصحك

ضلينا نسولف لحد ما تعب الكل وراح لمكانة بدأ الفجر يطر والبيت اللي چان مشتعل نار صار هاديء ومريح عمتي فاطمة الزهراء ترخصت وراحت تنام والولد كل واحد راح لغرفته وهو حامل بگلبه راحة ما ضايگها من زمان

دخلنا لغرفتنا علي الصادق سد الباب بس هالمرة مو بقفلة خوف وتوتر لا چانت سدة باب استقرار منه المنان جانت ما تسكت من البجي والصوت ملى الغرفة حاولت بكل الطرق اسكتها ما كدرتت وحتى علي الصادق سوة كلشي وماكدر عليها لمن اندك الباب راح علي الصادق فتحة وانا لبست حجابي ودخل علي الباقر أخذ منه المنان مني وبس شمت ريحتة سكتت هلشي صدك ضوجني شوكت تتعود انا أمها والجان يمها أبوها... وبلا أي كلام أخذها علي الباقر وطلع من الغرفة ضاج علي الصادق حيل وراد يطلع وراه ويصيح علية بس انا لزمت ايده وهتفت وياه

علي الصادق :- شوووفييي مايريد يعوفنا بحالنا

طيبة الزهراء :- لخاطر راحة بنتنا عووفة لخاطرها بداعتي بداعتي عندك عليي

- صبر أيوب صبر أيوب

:- لخاطري صداقييي مَنّوشة ترتاح يمة خليها تكبر وتعرف أنتَ أبوها ماراح ياخذها منك لخاطري

- لخاطرج بسس

:- فدوة اروح لك

دخل وسد الباب وتقرب مني چان وجهه تعبان بس مرتاح شال الشال عن راسي وشم شعري بعمق

علي الصادق :- طيبات..

- عيون طيبات.

:- أدري تعبتچ وياي وأدري خبالي مرمرچ بس والله العظيم مالي غيرچ لولا وگفتچ وياي كدامهم ولولا كلامچ اللي يبرد الگلوب چان أنا هسة ضايع بشوارع

- أنتَ مو ضايع وصداقي وياي أنتَ السند وأنا وياك نكبر ونبني دنيتنا شفت شلون عمتي صفت النفوس؟

:- أي والله عمتي السادة خلتني أحس بقيمتي بهذا البيت طيبات توعديني نبدي صفحة جديدة؟ بلا شك وبلا غيرة من الماضي؟

حطيت إيديه على رقبته وقربت وجهي من وجهه لحد ما أنفاسنا اختلطت وهتفت بصوت مليان حب

- وعد يا روحي وعد ما يشوبه شائب أنا إلك وأنتَ إلي وهذا البيت صار جنه بوجودنا سوة

نمنا هذيج الليلة وأنا حاسة بـ أمان حقيقي الهوا اللي چنت أسمع صوته الصبح وهو يصفر من الهدوء القاتل صار هسة نغمة حلوة تهز البردة وتطمئن كلوبنا إن القادم أجمل البيت ما فرغ البيت انترس بركة بوجود عمة السادة وبصلح الإخوة اللي چان عبالنا مستحيل بس حوبة الطيبين دايماً تلم الشمل
رغم جنت أشك بهذا الصلح راح يدوم أيام معدودة بس جنت فرحانة هاي الأيام المعدودة بيها راحة ألف الحمدالله عليهن..

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ مَــــلاك ٭٭

بين ما جنت انا وأمي واخواتي كاعدين تشوف الهدايا الاجت إلي والاغراض مال النيشان والهدياا مال علي الكاظم شفت الذهب وردت اللبسة وامي ضربتني على ايدي وهتفت وياي

ملاك :- اخخ شبيج يمة؟

- مايصلح تلبسين شيء قبل العرس

نوف :- هذا كلة خزعبلات ماعليچ مليكة اللبسي خلي نشوفة عليچ

- لااا انا كلت ما يصلح يعني ما يصلح عووفي لقبل العرس بيوم شوفي هو والبدلة

سُــكر :- ليش جايبين عبااية؟؟ شنو لايكون يردونج تلبسيها! والله أضحك عليچ العمر كلة والنبي

نوف :- مااتوقع لأن طيبة الزهراء و غدير الله يطلعن بلا عباية للجامعة اشوفهن بس صاية يلبسن

- يابناتي يالي تسون نفسجن تفتهمن من أصول الشيعة بوقت الزواج الزوج يدز لزوجتة عباية مو ضروري تلبسها او ما تلبسها بس العادات والتقاليد تستوجب بالنيشان موجودة عباية

سُكر :- بس عمي شنو المشية أمس يابوية طيرت عقليي

- علمود بنتي ملاكة تعرف أنها مااخذت أي واحد شايفة السيد علي الكاظم يمّة!! والله واثقة ومتأكدة مثل ماجاي اشوفج كدامي راح يخليج أميرة زمانج وكولي كالتها امي كايمة انا هسة اكمل الغدة رتبن الهوسة ولا تخربطن الغراض ومثل ما كتلج لا تلبسين الذهب خاف تتغافليني

ملاك :- لا يمة ما البسة صار

- عفية بناتي يلا همن ارواحچن وانزلن ساعدني

نوف :- دقائق واچي وراج

عافتنا امي ونزلت وبس سدت الباب سُكر رفعت ايدها وهتفت بصوت عالي

سُــكر :- يارب يامجيب ياسامع الدعاء مثل ماكدرت تنجي يونس وهو ببطن الحوت مو صعبة عليك تزرع المحبة الية بكلب علي الباقر ابو عيون زيتونية يارب ياكريم اكرمني بكرمك وخلي الناس من امشي انا يمهم يكولون حرمة السيد علي الباقر أجت يارب يارحمٰن يارحيم

بقيت اباوع لــ نوف الي حاطة ايدها على خدها وتباوع
لــ سُكر وهوسها الغير متوقع بــ السيد علي الباقر
بعد ماخلصت دعاء صارت تباوع النا للحظة بعدها تنهدت وكالت

سُــكر :- ما تكولن أمين؟ الكرص ان شاءالله

انا و نوف ضحكنا وصرنا تكول آمين حتى تسكت ونخلص من لسان سُكر كعدت يمنا على الجرباية وهتفت وياها نوف وكالت ..

نوف :- تتوقعين سكر راح يجي يوم ونكعد هاي الكعدة نفسها بس تكون نكلب بالنيشان والهدايا مالتج الي من السيد علي الباقر؟

سكر :- نفس هذا السؤال الج تتوقعين نكعدلج هاي الكعدة لعرسج على السيد ألمعتز باالله؟

ملاك :- عزة اذا صدك بنات عمران راح يقبطن السادة ههه

نوف :- مستحيل وماراح تصير ..

ملاك :- مو صعبة على ربج

- لاااا ألمعتز باالله ماريد احط براسي أصلاً هو مو حُب جان تكدرن تكولن مجرد اعجاب هيج لا اكثر ولا أقل لا حاطتة براسي ولا بانية اماني علية مثل ماتسوي هسة الست سُكر بس تجي قسمتي اتوكل على الله

سكر :- يمعودة أنتِ مالج خلك بس انا خلگي طويل لشوكت يعني يظل هيچ؟ انا اظل حالياً هوة مايريد عادي انا بعدني صغيرة

ملاك :- يمكن ربجن حط بيها حكمة شنو يخلي علي الكاظم من بين بنات خالاتة وكل اقاربة وجماعتة ومن بينج وبين نوف وكحلاء عزت وكل بنات المجمع يجي ويحط عينة عليه وياخذني هيچ يعني أنتِ راح تصيرين أقرب من أخوه علي الباقر

سكر :- لا ماراح استغل هلشيء ولا راح اضل اطافر كدامة كلشوية

:- شلون يعني شتردين؟

- أريدة هو يحس بوجودي وهو اليسال عني وراح يصير كلهذا وبدون مااحرك ساكن انا

نوف :- ذاك اليوم ضربة على راسج ووصلتي للموت ما كلف على نفسة يجي ويطمئن عليج ويكعد وي ابوج المرة الجاية شنو راح تسوين خاطر تلفتين انتباهه؟

- ههههه عمري الهم نذر هذولي بيت السادة مو بس راسي ودمي وعادي حتى لو ميجي ومسوي شيء المهم انا مرتاحة

ملاك :- الله وأكبر يازمن

- نشوف جانت وحدة بينا ماريد أذكر اسمها ما تريدهم ولا حاطتهم براسها اشوفها هساع هية أول عروس لبيتهم

ملاك :- ترى كتلج ربج حاط بيها حكمة مافكرت ولا تعبت روحي لمن كالي علي الكاظم احبج واريدج اجيت لهنا و أخذت استخارة ريحت كلبي بس هيج وانتضرت أمر الله يصير

نوف :- وشلون يعني لا اجيتي النا ولا حجيتي بوقتها شلون انطاج كلبج تضمين علينا يا بذااتة وانا اختج الجبيرة

ملاك :- لأن جنت متوقعة ما تصير وماردت تضلن تحجن بالسالفة لهذا كلت ان صارت الكل يعرف مو بس انتن واذا ماصارت السكوت أولى ...

كملت كلامي وياهن وأنا أحس بغصة فرح بوسط صدري عيوني جانت تلمع وأنا أشوف النيشان كدامي صدك الدنيا قسمة ونصيب ومنو جان يصدك ملاك الطفلة المخبلة هي أول وحدة تكسر حاجز العزوبية ببيت عمران؟

التفتت لنوف اللي جانت تباوعلي بنظرة عتب ممزوجة بحب وسكر اللي بعدهي غركانة بأحلامها وي خيال علي الباقر كلتلهن بصوت ناصي

ملاك :- بنات والله مو قصدي أضم عليجن بس تعرفنني أخاف من الحجي قبل لا يثبت الشيء جنت أگول خاف السالفة تخرب وتضل الغصة بگلبي ردت الأمور تمشي بهدوء السادة وعلي الكاظم ما قصر مشيته جانت تخبل وكلامه ويه أبوي خلى راسي بالسمة

نوف :- والله حقج يا مليكة إحنا بس ردنا نشاركج الفرحة من أول دكة گلب بس يالله المهم هسة إنتِ صرتي چنة السادة وهالذهب والنيشان لايگ لجمالج

سكر طفرت من مكانها وحضنتني حييل وصاحت

سُكر :- ولج ملاك هسة صرتي حماتي المستقبلية يعني لازم تتوسطيلي يم علي الباقر لو بس تصيرين يمهم تنسين أختج سكرة؟

ضحكت من كل گلبي وكلتلها

:- ولج سُكرة إنتِ يرادلج صبر أيوب وعلي الباقر مو سهل بس يالله.. الله كريم

وبين ما نحن بنص الضحك والشقة فجأة فزيت على صوت نغمة موبايلي فز گلبي قبل لا تفز إيدي وتلزم الموبايل باوعت للشاشة مكتوب سيد علي الكاظم

نوف وسكر سكتن فد سكتة وعيونهن صارت يباوعن عليه ويغمزن وجهي صار نار وحسيت الحرارة صعدت لخدودي

سكر :- هااا إجا السبع يالله طلعي برا حجينا ما يخلص روحي شوفي خطيبج شيريد

كمت بسرعة سحبت شالي حطيته على جتفي وطلعت للهول الجوة جان فارغ لأن أمي بالمطبخ وكفت يم الشباج أخذت نفس عميق وفتحت الخط بصوت يرجف من الخجل

ملاك :- ألو.. سلام عليكم

سمعت صوته ذاك الصوت اللي يخلي الروح تهدا ضحكته الهادئة رد عليه

علي الكاظم :-عليكم السلام والرحمة هلا بهالصوت هلا بملاك الكاظم وهلا بأميرة عمري شلونج يابة؟

بلعت ريچيي لكلاممة وكلت بصوت كوة يطلع جنت متوترة كلش هواي

:- الحمد لله إنتَ شلونك سيد؟

- بخير ما طول سمعت هالنفس ملاك شنو جنتي تسوين؟

:- جنت اسولف ويه البنات؟وهم كاعدة بنص الهدايا والذهب مال النيشان اشوفه

- اهااا عجبوج؟

:- اخذن عقلي كلش هواي علية

- انجبي ترى قليل بحقج لو بيدي أجيب لج نجوم السماء وأصيغها الج كلادة

دنكت راسي وكأنه كدامي العرگ نزل من كصتي من المستحى وضحكت وهتفت وياه بالاتصال

:- كلش حلوات تسلم إيدك سيد تعبت نفسك وتكلفت هواي

- يا تعب يا ملاك؟ ولچ إنتِ متعرفين غلاتج عندي أنا من يوم الشفتچ وأنا أدعي ربي تصيرين من نصيبي والله يا ملاك جنت أحسج حلم بعيد بس رحمة الله واسعة هسة أنام وأكعد وأحمد الله مية مرة لأن صرتي حلالي أنتِ مو بس زوجة إنتِ عوض الله إلي عن كل تعب شفته

كلامه جان يجنن يخلي الوحدة تذوب بمكانها سكتت ثواني وحسيت بي يريد يگول شيء مهم نبرة صوته تغيرت صارت بيها لهفة واضحة وكمل كلامة

- ملاكيي عندي الج خبر وأريدج تكولين تم

:- خير سيد؟ شكو؟

- ملاك أنا ما أكدر أنتظر أكثر البيت جاهز وروحي اشتاكت تستقر واليوم حجيت ويه عمي الي هو أبوج واتفقنا العرس راح يصير براس السنة يعني بعد 9 أيام بالضبط

فزيت من مكاني وكلت بصدمة وخجل

:- عزززة سيد شنو 9 أيام؟ بعدنا ما لحگنا الهدوم والترتيبات و الصالون والله هواي هيج!

ضحك بصوت عالي ضحكة مليانة فرح وهتف وياي

- ولج يا صالون يا ترتيبات؟ إنتِ كمر بدون كل شيء أنا مستعجل أريدج يمي أريد أسد بابنا علينا وأرتاح كافي صبرت هواي واليوم كلت لأبوج كتلة عمي بنتك أريدها قبل لا تخلص السنة وهو ما قصر ووافق ها ملاكيي تردين تكسرين بكلمة السيد؟

ذبت بمكاني وكلت بصوت ناصي كوة ينسمع

:- لااا سيد حشاك اللي تشوفه مناسب أنا وياك بي

- فدوة لهالـ أي اللي تطلع مثل العسل خلص يابة جهزي روحج وكولي لأمج وخواتج يشدن حيلهن 9 أيام وتجين لبيتي وتصيرين ملكة عليه أحبج يا ملاكي وأشكر ربي ألف مرة لأن صرنا لبعض

:- حتروح؟

- اي حبيبي بالج لنفسج

:- أنتَ هم سيد

- احبج حيل يا ملاكييي

سديت الموبايل وأنا أحس الدنيا ما شايلتني من الفرحة والخوف بنفس الوقت 9 أيام! يعني راح أودع بيت أهلي؟ راح أصير زوجة السيد علي الكاظم؟

رجعت للغرفة وأنا أمشي مثل السكرانة من الخجل والفرحة نوف وسكر أول ما شافن وجهي طفرن عليه

نوف :- هااا؟ شكو؟ وجهج صاير طماطة! شگال لج؟

باوعتلهن وعيوني مغرغرة بدموع الفرح وهتفت وياهن

:- بنات العرس بعد 9 أيام براس السنة راح أروح لبيت السيد علي الكاظم

نوف :- يمةةة خلي نبدي تجهيزات من هسة عجل

سكر :- ككلللووشش ههههههه ولج عرسج باجر مو بعد ٩ ايام السيد مايلحك بعد

:- يااربيي خايفة خايفةة

نوف :- عليمن الخوف اليسمع يكول نسفرج خارج العراق كلة هذيا بيته كدام بيتنا

:- مسوؤلية ترى

سكر :- ولج لو انا منج ابوس ايدي واسجد شكر واصوم ثلاث ايام يا مسوؤلية يا خوف وانت راح تصيرين زوجة السيد غيرج تتمناه

:- مادري بعد

اجت نوف علية لزمت ايدي وصارت تفر بيه وهي تغني

نوف :- يا شمس عمري ونور العين
يا فرحة قلبي وسنيني
لو تطلبي روحي هالحين
ترخص لعيونك يا عيني
أنا نذرت العمر لرضاكِ
وما لي حبيب بالدني سواكِ

اجتلي سُكر حضنتني وصارت تهتز وياي وهي تكمل الاغنية وي نوف

سُكر :- لازرع الك بستان ورود
وشجرة صغيرة تفييكي
أحرس حلاكي من الحسود
وبجوا عيوني أداريكي
خلي النسيم يلاعب شعرك
وأنا أذوب بعطر إيديكي
لازرع الك بستان ورود
وشجرة صغيرة تفييكي

اخذني الواهس وعليت صوتي وكملت الاغنية وياهن من الفرحة

ملاك :- أعمل من ضلوعي سياج
يحمي هالبستان الغالي
إنتِ أميرة وإنتِ التاج
وإنتِ قمر بيضوي ليالي
أسقيه من نبع الحنان
وأعطيكِ من قلبي الأمان

باستني سُكر حيل وبقت مخلية ايديها على خدي وكملت المقطع مالتي وكالت

سُكر :- وعغصن هالشجرة نكتب أسامينا
يكبر هوانا وتضحك ليالينا
وكل ما هب الهوى ومالت الغصون
أحلف بحبك يا أغلى ما في الكون

اجت نوف وحضنتني انا وسُكر واهتزت وهي تكمل على صوت سُكر

نوف :- لازرع بستان ورود... وشجرة تفييكي
بستان ورود... من قلبي أهديكي
كل العمر... يا عمري أفديكي

الغرفة انملت بالهلاهل وصياح سكر اللي كامت تركص ونوف اللي حضنتني وتبجي وتضحك بوسط هاي الهوسة

غمضت عيوني وتمنيت من كل گلبي أنو هالاستخارة اللي سويتها تظل منورة طريقي ويه السيد وأن يرزق خواتي نفس الفرحة اللي دا أعيشها هسة

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ أم البنين ٭٭

جنت كاعدة بالغرفة أنا و حيدرة والعب وياه ودخل عليه المرتضى الأمير وهتف وياي

ام البنين :- هلاا

المرتضى الأمير :- غيري لحيدرة وانطي الي

- خير ان شاءالله وين رايحين؟

:- اريد نطلع انا وياه والفاروق الأعظم

- مرتضى ترى ابني اريدة شنو السالفة

:- شني شبيچ؟؟

- شبية؟ مجاي تشوف الوضع ابني لو عند عمامة لو بحضن ألفاروق الأعظم ماجاي اشوفنة أبد شنو السالفة

:- وليش هالموضوع زاعجج مدلل عمامة بعد تتحملين يلاا بدون كلام زايد كومي غيري إله

- عوف ابني عندي

:- شوفي راح اطلع للجملة واجي كملي الطفل وانزلي بيه لجوة ...

- مرتضى!

:- أشششش سوي الكتلج علية ترى اجي اخذة وهو هيج والحمزة

- خرب حظي اذا صدك

عافني المرتضى الأمير وطلع وانا رحت طلعت ملابس ثخينة لــ حيدرة حتى لا ياخذ برد لان الجو راح يصير غروب والجو حيل برد وكعدت اغير اله ومشطت شعراتة ولبست حجابي ونزلت لجوة

امنيتي أمي تكعد بالبيت ضليت اصيح عليها و الفاروق الأعظم جان كاعد بالهول رد عليه

أم البنين :- يمااااا يمةةةة؟؟ اميييي وينچ يمعودةة

الفاروق الأعظم :- عمتي راحت لبيت أختي

- من شوكت راحت؟

:- مدريني من أول ما اجيت انا هية طلعت التقيت بيها بالباب

- عبايتها ما تطيح من راسها ياالله

:- تردين شيء؟

- لاا هذا حيدرة كملتة المرتضى الأمير كالي تريد تطلع وياه

:- اييييي انطي الي

- تفضل

رحت انطيتة حيدرة وردت اندار اصعد لغرفتي بس اندارت وصرت اباوع إله شلون يلاعب ابني وشلون مهتم بيه وصرت اشوف حيدرة شلون يضحك من كلبة ومرتاح نغزني كلبي حيل الفاروق الأعظم مو طفل ولا مراهق حتى يبقون ضامين علية هيچ موضوع
و وهج الطف مثل ما زل السانها وياي لابد يزل وي غيري مايصير يبقى عايش بهي الجذبة لبقية حياته

ضليت واكفة للحظات لمن هو هتف وياي وكال

ألفاروق الأعظم :- بيج شيء بنانة؟

انداريت اله ورجعت وكفت قريب منه وهتفت وياه

أم البنين :- فاروق اككلك شيء!

:- كولي يانور عيني

- فارووق أنتَ

:- انا شنو؟

بلعت ريجي واستجمعت قوتي وعصرت ايدي وجريت نفس طويل وبعدها هتفت وياه

:- فتيتي كلبي صاير شي بيج شي انا شنو احجي؟

- السيد الفاروق الأعظم أبن السيد صفاء الحسن يعرف أن هَوّ الإبن الروحي لــ السيد صفاء الحسن ؟

:- شنو يعني انا الإبن الروحي ههههه شبيج شتحجين؟

- تكدر تستفسر من البشير قيصر من هذا الموضوع

:- أم البنين حبابة احجي شنو

- ماعندي شيء أكولة غير هذا الشيء كل الكلام التريد تسمعة تلكاه عند الي يسمي روحه أخوك الچبير وعود يريد مصلحتك انا ماكدر اجذب عليك مثل ماهم جذبوا

:- شهل حجي؟

- روح آلة هسة وشوفة

الفاروق الأعظم حط حيدرة على صفحة بالقنفة وكام على حيلة طلع تليفونة واتصل على البشير قيصر وطلع من البيت بدون أي تعابير انا رحت وشلت حيدرة لا يطيح وصرت اباوع للباب وكعدت بمكان الفاروق الأعظم وبقيت اسولف وي ابني وبعدها دخل المرتضى الأمير

المرتضى الأمير:- وين راح الفاروق الأعظم ؟

- اءء مادري اجاه إتصال وانطاني حيدرة وطلع

:- شوف الغدار عود متفقين نطلع سوة اني اعلمة انطيني حيدرة

- بالك علية فدوةة اروحلك باردة صارت

:- ترى خالة انا شمالج؟

- وانا أمة

:- خلص خلص انطيني ومعليچ

أخذ حيدرة من ايدي وطلع وانا صعدت لفوك مريت على غرفة اخوي حامد المتقين دخلت لكيت عزيزة تلعب وي اولادها در النجف و در الشام رحت وكعدت يم عزيزة وبالي مو يمها عيوني على در النجف و در الشام وهم يضحكون بس بالي يم الفاروق الأعظم شسويت أنا؟ هل جان الوقت مناسب؟ لو شعلت نار ما تطفى ببيتنا؟

عزيزة باوعتلي وكالت

عزيزة :- بنانة شبيج؟ وجهج مكنفذ صاير شي؟

هزيت راسي بـ لا بس الغصة بصدرتي وهتفت وياها

:- ماكو شي عزيزة بس حيدرة أخذوه وضل بالي يمه

كمت عنها وكفت يم الشباج أباوع للشارع جنت اشوف بعيوني خيال للـ الفاروق الاعظم وهو مبين عليه التوتر حتى بوگفته عصرت أيدي حيل وكلت بگلبي

:- يا ربي كون ما تنهجم بيوت بسبب هالكلمة بس الجذب حبلة گصير وهو لازم يعرف أهله منو وساسه منو

مرت ساعة وساعتين والبيت هدوءه يذبح عزيزة نزلت تسوي عشة وأنا نزلت لجوة نار تاكل بضلوعي ضليت افتر بالطارمة فجأة انفتح الباب بقوة دخل المرتضى الأمير بس هالمرة وجهه مو وجه ضحك وشقة وجهه يطرد العافية وعيونه تجدح نار

ام البنين :- هلا

المرتضى الامير :- زين لگيتج هناا هاج حيدرة من ايدي

:- خير ان شاءالله شنو صاير؟

- قبل شوية اتصل علية البشير قيصر وهو منهار رايح اشوفنة واجي

:- خير ان شاءالله

- هاچ ابنچ رايح اشوفة انا في امان الله

:- الله يستر

مدة يدة الي المرتضى الأمير أخذت حيدرة وضميته لصدري المرتضى الأمير عافني وطلع يركض سمعت صوت سيارته شخطت بالكاع عرفت السالفة كبرت والسر اللي ضامينه سنين انفجر اليوم بسببي

دخلت للبيت و صعدت لغرفتي سديت الباب وكعدت بالظلمة وأنا أهز بحيدرة دمعتي نزلت على خده كلتله بصوت ناصي

:- يا يمة يا حيدرة كبرتك وسويتلك اسم بس الحقيقة دومها توجع يجي يوم وتفهم ليش أمك ما كدرت تعيش بالجذب حتى لو جان هالجذب مريح لغيرها

ذيج الليلة ما نمت بقيت أنتظر ارجع واشوف حتى لو خيال الفاروق الأعظم يرجع لو صوت البشير قيصر وهو يعاتب بس اللي عرفته بذاك الوقت إن عائلة السيد صفاء الحسن بعد هذا اليوم ما راح ترجع مثل قبل أبد

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ ألفاروق الأعظم ٭٭

طلعت من البيت والظلمة بدت على الشوارع بس الظلمة اللي بصدري جانت أعتة وأكبر كلمات أم البنين جانت مثل الطعنات مو لأنها رادت تأذيني بس لأنها هزت أساسات عمري كله الإبن الروحي؟ شنو يعني؟ والمنو؟ للسيد صفاء الحسن؟ يعني الشيب اللي تارس لحيته والاسم اللي شايله بكل فخر كله جان مجرد غلاف لقصة ثانية أنا ما أدري بيها؟
ركبت السيارة إيدي ترجف لدرجة ما كدرت أدخل المفتاح بالسويتش من أول مرة اتصلت بالبشير قيصر صوتي جان مخنوك بالعبرة

ألفاروق الأعظم :- بشير وينك؟ لازم أشوفك هسة هسة!

ما انتظرت جوابه شخطت السيارة ومشيت مااشوف الموت كدامي جان الطريق لبيت البشير قصير أطول طريق بحياتي كل شجرة أمر بيها كل ضوه شارع أحس جان يسألني

: أنت منو؟ ابن منو؟

وصلت للبيت نزلت أركض الباب جان مفتوح وكأن البشير قيصر جان بانتظار العاصفة اللي جايته دخلت للبراني لكيته واكف وجهه بي غيمة من القلق بس عيونه جانت تحجي خوف خوف الشخص اللي انكشف سرّه وكفت كباله الهوا بصدري صار جمر عيوني غوشت بالدموع صحت بصوت

- بشير احجيلي وعاين بعيني أنا منو؟

البشير قيصر تقدم خطوة راد يطخ جتفي دفعته بكل قوتي وصرخت

- لا تچيسني! لا تمثل دور الأخو الخايف هسة

:- فارووق شبيك

- أم البنين كالتلي.. كالت روح اسأل البشير قيصر

:- تسألني على شنو؟

- أنا ابن السيد صفاء الحسن لو لا؟

:- فاروق أهدأ

- جاوبني والحمزة أهد البيت على راسي وراسك هسة

البشير نزّل راسه بالكاع هاي النزلة جانت السچينة اللي ذبحت كل أمل عندي وكف بصمت وصمته جان ألعن من الموت تقربت منه لزمت ياخته حيل عصرتها وأنا أهز بيه واصيح بيه

- احجي بشيررر لا تضل ساكت السكوت جاي يكتلني صارلي شكد عايش بوسطكم وأنا عبالي دمي من دمكم؟ عبالي هذا الاسم حگي؟ عبالي السيد صفاء الحسن هو الي انا انزرعت بظهرة و العلوية إسراء هي اللي جابتني لهالدنيا؟ طلعتوا شضامين؟

بدت دموعي تنزل بغزارة حرورة الدمع جيت تجوي خدي البشير قيصر غص بالكلمة وكال بصوت يرجف

:- فاروق يا بعد طوايفي اسمعني السالفة مو مثل ما أنتَ مفكر السيد صفاء الحسن حبك أكثر من ولد صبله.

قاطعته بضحكة هستيرية ضحكة كلها وجع :

- حبه؟ يا حب هذا اللي ينبني على جذبة؟ يا حب اللي يخلي الواحد يعيش عمره كله وهو ما يعرف ساسه من راسه؟ أنا منو أهلي؟ منو أمي؟ منو أبوي اللي ذبني يمكم؟ وليش؟ ليش ضميتوا علية؟

انهاريت رجلي بعد ما شالتني وكعت بالگاع وسط البراني غطيت وجهي بإيديه وبجيت بچي مو مثل بجي الزلم بجيت مثل طفل ضيع أمه مثل يتيم مات أبوه مرتين مرة بالحقيقة ومرة بالجذبة وكمت صيحت واني ادفع واضرب على صدر البشير قيصر

- ولك بشيرررر ليش كسرتوا ظهري؟ أنا جنت أشوفك السند جنت أشوفك الأخو اللي ما تكدر تجيب مثلة بعد أي ام بهي الدنيا تالي تطلع ضام عليّ أصلي وفصلي؟ شلون كدرت تعاين بوجهي كل يوم وأنتَ تعرف أنا مو أخوك بالدم؟ شلون؟

البشير قيصر الزمني حيل من ايدية وكعدني بالكاع و كعد يمي بالگاع حاول يلمني لحضنه هالمرة ما دفعته جنت محتاج أي حضن يلم أشلائي اللي تفرطت دفنت راسي بصدره وكمت أشهك شهكات جانت تطلع من نص گلبي أحس صدري جاي يتفطر

- آخ يا يمة آخ يا بوية يا هو منكم أهلي؟ يا هو اللي شمرني لهالنار؟ بشير أنا هسة ضايع ضايع وماكو شي يلزمني بالگاع الدنيا دارت بية والاسم اللي جنت أرفعه فوك راسي صار حمل يكسر الرگبة

بقيت أردد بوسط البجي

- جذبتوا عليّ ليش؟ سويتوني مضحكة لو ردتوا ترحموني؟ ترى الرحمة اللي تجي بوسط جذبة هي أكبر عذاب هسة أنا بيا وجه أعاين للناس بيا وجه أسمي روحي سيد؟

البشير قيصر جان يبجي وياي يمسح على راسي ويگول

:- أنتَ أخونا وتبقى أخونا والدم اللي يربطنا هو دم الوفا والتربية دم أحمد الصادق مووو صلب لو رحم فاروقي

بس هاي الكلمات جانت مثل الملح على الجرح الوفاء ما يحتاج جذبة والتربية ما تكتمل إلا بالصدك ذيج الليلة بالبراني انذبح الفاروق الأعظم القديم انذبح الشخص اللي جان يثق بكل شي حوله طلعت من حضن البشير قيصر وأنا عيوني حمر مثل الدم ملامحي تغيرت حتى صوتي صار بي شرخ ما يتصلح

كمت وكفت بصعوبة مسحت دموعي بـ ردن ثوبي وباوعت للبشير قيصر نظرة أخيرة قبل لا أطلع وهتفت وياه

- بشير السر اللي حفظتوه سنين اليوم صار سجين بصدري بس لا تتوقع أرجع مثل قبل اليوم عرفت إن البيت اللي بنيتوه على جرف الجذب لازم يجي يوم وينهدم وأم البنين هاي المرة ما غلطت هاي المرة صحتني من حلم جنت راح أموت بوسطه وأنا غافل

:- فاروق بس اسمعني خليني أحجي

- أششش مااريد شيء مااسامع شيء كافييي

عفت البشير قيصر ودفعته وطلعت من البيت والخطوات ما تشيلني أحس الكاع تفتر تحت رجلي والسمه نزلت فوك راسي طبكت الدنيا كلها بصدري ركبت السيارة وشخطتها ما أدري وين رايح بس ردت اشرد من الوجوه من الاسم من السكف اللي عبالي يحميني وطلع هو السجن اللي حابس حقيقتي

وصلت لشط الجو جان بي نسمة باردة بس بصدري جمر يغلي نزلت أمشي على الأطراف الظلمة جانت تنهش بخيالي وكفت كبال المي هذا المي اللي يغسل هموم الناس ليش هسة أحسه يريد يغرگني؟ كعدت على الجرف حطيت راسي بين ركبي وصرخت صرخة صرخة طلعت من جرح ماله دوه

:- يا ربييييي ليش ليش أنا؟

رفعت راسي للسماء وعيوني غاركة بالدمع كمت أناشغ مثل الطفل

:- إلهي أنتَ العدل وين العدل بسالفتي؟ عشت عمري كله أصلي وأصوم وأرفع راسي بلقب السيد وأمشي بين الناس والكل تهابني لهيبة جدي رسول الله تالي أطلع ..... استغفر الله أطلع مجهول؟ أطلع شمرة طريق؟ يا ربي ليش خليتني أعيش بجذبة خمسة وثلاثين سنة؟ ليش نطيتني أهل مو أهلي ودم مو دمي؟

رفعت راسي للسماء وصحت بكسرة خاطر

:- يا أبو الحسن يا داحي الباب أنتَ اللي ما ترد سائل أنا اليوم اتوسل بيك أنا الفاروق الأعظم اللي سموني على اسمك هسة شسمي روحي؟ يا علي نار بگلبي ما يطفيها بس الموت شلون أرجع للبيت؟ شلون أعاين بوجه العلوية اللي جنت أبوس إيدها عبالي هي من اهلي؟ شلون أحط عيني بعين السادة وأنا أعرف إنه مشفق عليّ؟ يا ربي، لو ميت بذاك اليوم اللي شمروني بيه جان أحسن ليش كبرتني وعلّيت شاني وبنيت گصور من رمل تالي بكلمة وحدة من أم البنين انهار كل شي؟

أم البنين

الاسم مر على لساني تذكرت وجهها تذكرت صدها إلي تذكرت شلون جانت تباوعلي بنظرة غريبة هسة عرفت! هسة انحل اللغز اللي جان ذابحني

:- لج يا أم البنين ثاري أنتِ تدرين؟ ثاري رفضج لي مو لأن گلبي مو نظيف ولا لأن شكلي ما عاجبج ولا لأن تردين علي الهادي وماتكدرين بدونة رفضتيني لأن دمي مخلوط؟ لأن أنا مو سيد؟ تباوعيلي نكرة؟ تباوعيلي مو كفؤ لبنت الأصول لأن أصلي ضايع؟

ضحكت ضحكة هستيرية وبقيت أضرب على صدري

:- ولج يا يمة يا أم البنين كسرتيني كسر ما وراه جبار ردت أسويج أميرة ببيتي ردت أعوضج عن كل تعب الدنيا تالي تطلعين أنتِ اللي شايلة السچينة وتذبحين شرفي؟ لعد وين الرحمة؟ وين الدين؟ لو بس كلام؟

كمت وكفت على حيلي صرت أصيح بوجه النهر

:- اسمع يا شط اسمع يا هوى أنا الفاروق الأعظم لا أنا مو الفاروق الأعظم أنا المجهول أنا اللي ماله عنوان يا ربي أنتَ اللي خلقتني أنت اللي سويتني بهالصورة ليش خليت الناس تتلاعب بمصيري؟ ليش خليتني مضحكة؟ هسة البشير قيصر من جان يضحك بوجهي جان يضحك عليّ لو وياي؟ من جان يكلي يا خوي جان يقصدها لو جان يداري خاطري؟

الظلمة زادت وصوت المي صار يمر بالاذن مثل الوشيش بدت الأفكار تروح وتجي..

شنو ذنبي؟ الطفل اللي انشمر لأن مالهم خلك شنو ذنبه يعيش عمره كله يدفع ثمن غلطة غيره؟ أو ثمن فقر غيره؟

مسحت وجهي بقوة أحس جلدي صار يحركني طلعت الهوية من جيبي باوعت لاسم الفاروق الاعظم صفاء الحسن
لزمت الهوية وشمرتها ذبيتها بالمي شفتها وهي تغرك وتختفي بين الموج

:- هذا الاسم غرك وهالوجه راح يتغير يا ربي أنا ما عاتبك كفر أنا عاتبك وجع أنا العبد الضعيف اللي تاهت بيه السبل ساعدني أنسى ساعدني أطلع من هذا الكابوس يا أهل البيت يا سفينة النجاة أنا غركان والغرقة هالمرة مو بالمي الغرقة بالدم اللي يجري بعروگي وما أعرف منين جاي

سكتت لحظة الجو صار هدوء قاتل حسيت حتى الهوى وكف باوعت لإيدي باوعت للسماء وحسيت فجأة ببرودة غريبة تسري بجسمي مو برودة خوف برودة قرار

وگفت على حافة الجرف تماماً المي جوه رجلي أسود مثل ليلي طلعت التليفون من جيبي شفت اتصالات كومة من البشير قيصر ومن المرتضى الأمير ضحكت بمرارة وذبيت التليفون بالنسيان وراه الهوية شمرتة بالماي

صرت اتقرب شوية شوية من الماي وصرت امشي لجوة جنت اريد اشمر روحي ورة الهوية و ورة التليفون واخلص من روحي صرت اصيح بصوت عالي والماي جان ماخذ نص رجلية

:- البشير قيصر سيد صفاء الحسن يا علوية يا أم البنين كلكم مشكورين واحد بنى لي قصر من جذب ووحدة هدمته بحقارة صدك من اليوم لا أنا ابنكم ولا أنا حبيبكم أنا ابن الگاع وابن الضياع

فجأة سمعت صوت سيارة تمشي سريع وراي وصوت البشير قيصر و المرتضى الأمير من بعيد يصيح

البشير قيصر :- فارووووق لا تسويها يا خويه فدوة لاسمك ارجع

المرتضى الأمير :- شمالك فاروق شنهي جااهلل شمالكك ولك..؟؟ ارجععع

التفتت عليهم نص التفاتة وجهي جان خالي من أي تعبير عيوني جانت جمر مطفي رفعت إيدي إله بحركة بسيطة وقبل لا يوصل بامتار همست لنفسي

:- ألفاروق الأعظم أخوكم مات هسة راح يبدي الحساب

وبدون تردد وبكل هدوء شمرت روحي بوسط المي مو بنية الموت بس بنية الغسل من كل گطرة دم عبالي تنتمي الهم

وبين ما المي يغمر راسي وصوت البشير قيصر و المرتضى الامير يختفي شفت صورة أم البنين وهي تبتسم الي بس هالمرة أنا اللي جنت أضحك لأن الجذبة انتهت واليوم بس بدت الحقيقة المرّة

غطست.. والظلمة اللي بصدري أخيراً لكت مكان يشبهها

يــــتــــبـــع

- بتوالي الليل روحي لاچت الكم
احضنوها خطيه لاجت الكم
عزيزه الدمعه لاجت لاجت الكم
امسحوها بردنكم عاد اليه !

مُتابعة للحساب لتجيكم اشعارات الرواية oo_ll13

تعالوا للتلكرام هُنا قناتي أنشر بيها كُلشي يخص الرواية ويخص الأبطال ++ الأبطال موجودين بيها

لهنا وانتهى المُنْعَطف الثــامِـن 🌊🌊
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون التفاعل ما عاجبني حيل 👎🏻👎🏻👎🏻

وإن شاءالله اشوفكم بــ مُنْعطف جديد

13,287 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد

نختم البرتوت الحلوو بهي الصورة 🤍🤍🤍🤍