رواية أكابر و اقول فراقه عادي و انا في داخلي اصرخ تكفون جيبوه الفصل الرابع 4 - بقلم HaboOoshy

رامي وهو يكلم الممرضه بصراخ: افتحي بلوزته
هزت راسها الممرضه وفتحت البلوزه بس الكل انصدم من المشد الملفوف ع صدره اللي مبين ان خلفه صدر
رامي اللي انصدم وبصراخ لطلاب: اطلعوا برا
لفوا كلهم بيطلعون بس
رامي: انتي وقفي
وقفت اميره اما الكل طلع
رامي وهو يمد لها الجهاز:انتي انعشيها
انصدمت اميره بخوف صح هي تعرف يعني تعلمت بالكتب بس ماقد جربت بس صرخه رامي صحتها سحبت الجهاز ولما ناظرت ملامح قمر حست انها تعرفها بلعت ريقها وبهمس:بسم الله(بعدت الممرضه المشد ع صدر قمر وانصدمت اميره قلب قمر مره وبعدت)
رامي اللي عيونه ع الجهاز بس:مره ثانيه
هزت راسها اميره وعادتها وهي تشوف جسم قمر يرتفع وينزل بعدت وناظرت رامي
رامي وهو يناظر الجهاز بلع ريقه بس ثواني ورجع يدق نفس قبل
تنفست اميره براحه وناظرت قمر باستغراب ""شيلي يخلي بنت تسوي نفسها ولد؟ ""اشهقت بصدمه""هذا الا هو ايه نفس الولد اللي الا هو انا متاكده""
الممرضه وهي تغطي قمر وتناظر اميره باستغراب
رامي: فيه شي؟
اميره بصدمه: لا مافيه شي
تنهد رامي وهو يناظر قمر: الحين هذا بنت والا ولد؟
ناظرته اميره باستحقار ""صدق غبي كل هذا ويقول بنت والا ولد؟""
ناظرها رامي بمثل نظراتها:فيه شي ؟
اميره ناظرته من فوق لتحت ولفت وجهها
تنهد رامي ولف للممرضه:من جاء معه او معها؟
الممرضه:رجال
رامي:اوك خلوها هنا لين نعرف السالفه وانا بطلع اقول للي جاء معها
اميره بحماس ودون شعور :اقدر اروح معك؟
كان بيفتح الباب بس وقف ولف لها:نعم؟
اميره بخوف من نظرته: اقصد ابي اروح معك عادي؟
ناظرها شوي بعدين نزل راسه ورفعه:طيب امشي
هزت راسها بحماس ومشت وراءه ولما شافت فهد ""الحين تاكدت الا هذا نفس الولد اللي كان معه بس وش سالفتهم؟""
رامي بصدمه:فهد؟
ناظره فهد وبنفس الصدمه:رامي؟
ابتسم رامي وضمه بقوه:وينك يارجال وش حال الدنيا فيك؟
ضحك فهد بخفه وهو يضمه:بخير انت وشلونك؟
رامي:ههه بخير
بعد عنه فهد وهو يناظر له:ههه حققت امنيتك وصرت دكتور؟
رامي بشويه غرور: ومو أي دكتور
فهد:ههه انت لين الحين ماتركت غرورك؟
رامي:ههه لا وانت وشلونك وشلون مشاري وكل الشباب ؟
فهد:كلهم بخير والله امم رامي صديقي دخل هنا قبل شوي
رامي وهو يلف للمرضه:من اللي جاء مع السيد؟
الممرضه وهي تناظر له بخوف وتقرب لرامي وبهمس:نفس البنت اللي قبل شوي
انصدم رامي هو يعرف فهد زين مستحيل يكون راعي حركات لف لفهد وبلم فيه
فهد بخوف: رامي فيه شي؟؟
بلع ريقه رامي واشر على الكرسي: اقعد فهد
فهد:ما اني قاعد قول لي وش فيه؟
رامي وهو يتنهد وشبك يدينه ببعض: انت من اللي جاء معك اقصد يعني وش علاقتك فيه؟
فهد باستغراب:صديقي رامي خوفتني هو فيه شي؟
رامي: لا هو بخير لاتخاف بس ايش اسمه؟
فهد:فارس
رامي وهو يناظر اميره والممرضه بعدين لف وناظر فهد: فهد مدري وش اقول لك
فهد بخوف:ايش؟
رامي وهو يرمي القنبله:اللي جاء معك بنت مو ولد
فهد وهو يناظر لرامي بصدمه وبعدين انفجر ضحك:ههههههه لا انت اكيد غلطان انا اعرف فارس بنت مستحيل
عض رامي شفته السفليه بعدين ناظر اميره وناظر فهد وطبطب ع كتفه وبحده: فهد انا دكتور واعرف البنت من الولد واذا مو مصدقني اسال الدكتوره اميره هي اللي انعشتها
لف فهد بصدمه لاميره وكانه يسالها
اميره وهي تبلع ريقها اول مره تقول لشخص شي زي كذا هزت راسها وبهمس:ايه
قعد بقوة على الكرسي وهز راسه بلا: لالا ورجع وقف)انتوا غلطانين انا ابي اوريكم انكم غلطانين
رامي:طيب امش معنا نوريك
هز راسه فهد وهو مقتنع انهم غلطانين مستحيل يكون فارس بنت مستحيل ..
وصلوا الغرفه دخلوا و وقفوا قدام السرير بالضبط
رامي:هذا هو؟
هز راسه فهد:شفتوا قلت لكم انكم غلطانين
تنهد رامي:فهد حنا مو غلطانين هذا اللي انعشانها هي بنت (تنهد وبحده) فهد شوف صدرها
صار يرمش بصدمه ولف وناظر قمر اللي نايمه:لالا هذا صديقي انا اعرفه
رامي: طيب 10 دقايق وتصحى وبنفهم كل شي
هز راسه فهد ومسك يد قمر بقوه وضغط عليها وهو متاكد انهم غلطانين ..

بــعــد 15 ددقــيــقــه ..

بدت قمر تفتح عيونها على خفيف وبخفه وبهمس:يمه
لف لها فهد وناظر وجهها:فارس فارس
فتحت عيونها قمر وعيونهم تراقبها
فهد بابتسامه:انت بخير؟
قمر بهمس: فهد؟
هز راسه فهد بايه
تعدلت بجلستها بس لما تعدلت حست بشي ناقصها شي تعودت تلبسه بلعت ريقها ونزلت راسها لصدرها وانصدمت وهي تشوفه باين من تحت البلوزه ناظرت المكان اللي حولها بسرعه ""مستشفى يعني؟""لفت بسرعه وشافت رجال لابس بالطو وبنت بعد وفهد
ناظرتهم قمر وماقدرت تتكلم او تقول أي شي
رامي : اسمعني حنا لما جينا ننعشك عشان قلبك توقف وفتحنا بلوزتك اكتشفنا انك بنت بس فهد مو راضي يصدقنا ممكن تفهمنا؟
فهد وهو يناظرلها : فارس تكلم قول أي شي خلهم يصدقون انك ولد مو بنت ...

بلعت ريقها قمر وبدت دموعها تنزل خلاص طريقها وتجربتها انتهت هنا خلاص كل شي انكشف بس ياليته تاخر لانها ماقدرت تسوي أي شي من خطه الانتقام اللي تبي تنفذها لابوها وعبدالعزيز ما اهتمت بانها يمكن تدخل السجن بسبب اللي سوته بس كان فيه سبب ثاني قاعد يرعبها الحين ابوفهد وفهد ومشاري وش راح يسون لما يدرون او فهد درى وش راح يسوي مستحيل تتخلى عن الاخوان والاب اللي ضمها لصدره ومد يده لها لما الدنيا كلها تخلت عنها وفهد اللي دافع عنها وحماها ومشاري اللي اعتبرها زي اخوه الصغير
بلع ريقه فهد ومسك كتوفها بقووه: فارس تكلم قول انك ولد
رامي وهو يمسك كتف فهد ويسحبه ع وراء:فهد اهدا
رفعت راسها قمر والدموع  ع وجهها وبهمس وهي تشهق:اسففه فهد ..
انصدم فهد من الصوت اللي طلع من صديقه كان صوتي انثوي ناعم وتانيث لنفسه هز راسه بلا: لا لا انت ولد انا اعرفك مستحيل تكون بنت مستحيل
شهقت قمر بقوه: فهد افهمني انا كنت مضطره اسوي صدقني ما كنت انت ولا عمي بمخططي بس انت وعمي صرتوا بطريقي صرتوا زي اهلي ما كنت اقدر اقول لكم حقيقتي فهد افهمني تكفى فهد لاتزعل ..
كانت اميره واقفه وتراقب وهي مصدووومه من تصرف هذي البنت ""ياترى وشي اللي صار بحياتها خلها تسوي نفسها ولد؟""
هز راسه فهد وصرخ:لاتتكلم كانك بنت انطم ايه صح انت تمزح صح (وصرخ بصوت عالي) صح (ومسكها من كتوفها وهزها بقوه) قول صح مستحيل اني اكون اعتبرتك اخوي مستحيل
شهقت قمر بقوه وهي تدف يدين فهد عن كتوفها بعنف: لا صدق انا بنت ايه بنت ..
فهد بصدمه:ليش؟
نزلت راسها قمر شوي بعدين رفعته: ماقدر اقولك ماقدر (حطت يدها ع رقبتها بس انصدمت لما مالقت السلسال وصرخت بصوت عالي شوي) وين سلسالي وينه؟
فهد وهو يطلعه من جيبه:هذا؟
سحبت قمر وهي تضمه بيدينها بقوه
هز راسه فهد بصدمه وبهمس:فارس
رفعت راسها قمر بس طاحت ع اخر السرير من قوه كف فهد اللي صوته صار يتردد بالغرفه
شهقت اميره بخوف وصدمه وحطت يدينها على فمها وعيونها طارت
مسكها فهد من ثوب المستشفى ورفعها و وجهه قريب من وجهها تفل بقوه عليها ودفها بقوه اكبر
مسكه رامي بقوه:ىفهد خلاص
كانت عيون قمر بالارض ودموعها جفت على خدودها وبهمس: اتركه يفرغ اللي فيه انا غلطانه واستاهل (رفعت راسها وناظرته بنظره مافهمها وبصوت عالي شوي) اضربني يافهد اضربني اذا هذا بيريحك لاني تعودت لما اغلط اعاقب اشد العقاب ااه لاني لما افرح ساعه لازم ابكي يوم اضربني صدقني ماراح ياثر فيني اضربني
دف فهد رامي بقوه وناظرها بنظره استحقار قويه ولف وجهه وطلع
نزلت راسها وغمضت عيونها بقوه الا هو ما تمنت تشوف هذي النظره منه الا هو تمنت تشوفها من أي احد الا هو الا هو
طلع رامي بسرعه وراء فهد اما اميره بقت وعيونها ع قمر وهي لسى مصدومه
فتحت قمر السلسال وضحكت بين دموعها اللي بدت تنزل من جديد:يمه شفتي حظ بنتك شفتيه تتذكرين لما كنت اقولك اني مالي حظ تقولين لا يابنتي لازم تكافحين تتذكرين لما كنتي تقولين عيشي حياتك بحب وبتنجين من الشر اللي فيها يمه ليش تكذبين عليا انا كل مااحب اشوف الشر كله يمه ليش مامت؟
(ضمت السلسال بقوه لصدرها وهي تشاهق بالالم)
ناظرتها اميره بعطف وحزن وايقنت ان هذي البنت ماسوت كذا الا لظروف قويه طلعت من الغرفه وهي لسى مصدومه ودموعها بدت تنزل ع اللي يصير بهذي الدنيا بكت لما تذكرت حياتها السعيده اللي تتافف منها باكثر الاوقات والحياه التعيسه اللي عاشتها هذي البنت بكت لان الدنيا ماترحم ضعف الناس ..ِ

** مــكــتـــب رامــــي ..

دخل رامي وقعد فهد بالقوه: فهد خلاص هد.
فهد اللي صدره يرتفع وينزل بقوه وصوت تنفسه ظاهر ويهز رجله بقوه
تنهد رامي ونادى سكرتيرته:جيبي كوب عصير ليمون بسرعه
هزت راسها السكرتيره وطلعت بسرعه
رامي:فهد اهدا خلاص العصبيه ماراح تفيدك الحين اهدا عشان تقدر تفهم اللي يصير
فهد بصراخ: مو قادر اصدق اللي قاعد يصير قد ايش كنت غبي
رامي:فهد انت مو غبي مظهرها خلاك تتاكد انها ولد حتى انا كان ع بالي انها ولد الا لما انعشانها فهد خلاص اهدا
فهد وهو ياقف:بروح
وقف رامي ومسكه: وين بتروح وانت معصب؟
فهد:أي زفت
رامي:لا اقعد هنا
تنهد فهد واخذ نفس:بروح للحمام وبرجع
رامي وهو يناظره:خلاص بس لاتروح أي مكان ثاني وانت كذا خلاص؟
هز راسه فهد وطلع
تنهد رامي وشد شعره بيدينه ""كل الحريم كذا يافهد كلهم يخوننا ويخنون اهلهم كل الحريم خاينات كلهم""

فـــاصــــل
((فهد ورامي ومشاري وسلمان وسامر كانوا شله ايام المتوسط والثانوي بس تفرقوا لما درسوا الجامعه رامي راح يدرس برا وانقطعوا عن بعض ومن ذيك الايام ماتكلموا مع بعض يعني لهم تقريبا 5 سنوات عن بعض ورامي لما رجع انشغل بالمستشفى وشغله)) ..

بــيــت ابـوســديــم..

سديم: اف زهق
ساره:مرا زهق ايش هذا قسم مو حاله
ام سديم:احسن هذي قعدتكن بالبيت اقولكن خلن ابوكن يوظفكن بس ماانتن راضيات
سديم:خلاص انا زهقت بتوظف بشركه ابوي
ساره وهي تشهق:وتتريكني لحالي ؟
سديم بضحك:خلاص يا اختي لازم هنا نتفرق
ساره بمزح وهي تمسك يدين سديم : لا لاتتركيني ..
دفت يدينها سديم وبعدين انفجرن ضحك
ام سديم وهي تناظر لهن بطرف العين:الحمدلله والشكر يخلف عليكن بس انا وش سويت بحياتي عشان الله يبلاني ببنات مثلكن؟
سديم وساره:هههههههههه
ساره:ليش يمه وه بس وش حلاتنا
سديم:ايه الف واحد يتمنى بس نظره منا
ام سديم: ايه مبين واكبر دليل الخطاب اللي عند الباب مانقدر نردهم
ساره وسديم:هههههههه
ساره بمزح:هاه ايه طبعا سديم شفتي المزيون اللي عند الباب ع اليسار تراه لي
سديم: مناك بس لي انا
ساره:لا انا
ام سديم بصراخ:بس يمال اللي ماني بقايله خلاص طسن عني ياخبلات الطول طول نخله والعقل عقل سخله
ركضن سديم وساره لانهن يعرفن امهن اذا عصبت ماترحم ..

في المستشفى عند الحمامات كان مركي يدينه على المغسله وهو يتنفس بصوت مسموع رفع راسه وصار يناظر نفسه بالمرايه ""وشلون مااكتشفت شي زي كذا ماكان فيه أي شي يدل ع انه بنت لاصوته ولاجسمه ولا شكله صح ان ملامحه ناعمه بس ولو اااه"" غمض عيونه بقوه وهي يتذكر ملمس يدها لما طاحت عليها وان يدها مافيها شعر ابدا ضرب بيده بقوه على المغسله بقهر وطلع ..

غــرفــه قــمـــر

كانت واقفه وتلبس مشدها سحبت بلوزتها اللي على السرير ولبستها وهي تسكر اﻷزرار اللي قدام لفت بسرعه على فتحت الباب القويه بلعت ريقها بخوف ورجعت خطوه لوراء : فهد
سكر الباب وراءه او بالاصح قفله وتقدم لها وعيونه كلها شرار وقهر
تنهدت قمر وسحبت سلسالها ولبسته مستحيل تخاف من فهد مع انه رجل وقوي بس ماتدري ليه مستحيل تخاف منه يمكن لانها رسمت فيه الامان
مسكها بقوه من ذراعها ولفها له وصدم فيها الجدار و وجهه قريب من وجهها
غمضت عيونها بالالم من قوه الصدمه بس فتحتها وهي تناظر له
بلع ريقه وهو يناظر عيونها توه يحس بجمال عيونها كانت كبيره وحاده وحواجبها اللي كانت مرتبه ومرسومه من القهر مسكها بقوه من كتوفها بيدينه الثنتين وصدم فيها الجدار ثاني مره وبصوت مخنوق:انتي من ايش مخلوقه؟
أي بنت قليله تربيه تسوي كذا؟
اي بنت ترضى تعيش مع اولاد أي بنت تسوي اللي انتي سويتيه أي بنت؟
ناظرته بحزن وقهر حست بااهانه ماقد حستها من قبل ماتوقعت ان التجربه اللي حست بانها بتساعدها دمرتها زياده نزلت عيونها و رجعت رفعتها وهي تناظر لعيونه بقوه وبصوت هادي عكس اللي العاصفه اللي بداخلها: فهد اتركني خلاص انا بطلع من حياتك ( سكت وهي تشوفه مابعد ولا تركها وبحده) اتركني
تركها فهد بقوه ودفها لين طاحت بالارض عند الباب: انقلعي انقلعي للمكان الوسخ اللي جيتي منه انقلعي
وقفت وهي تحس يدها راحت من الطيحه هزت راسها بالالم وطلعت
شد شعره بيدينه بقوه وصرخ بالالم وضرب برجله الارض يحس انه وده يلحقه ويمسكه بحياته ماحب شخص زي ماحب فارس حب برائته وطفولته حب منطقه ومبادئه بالكلام حب اسلوبه اللي يدل على رجاحه عقله مع صغر سنه بس صدمه (وقف دقيقه بس ناظر للمكان اللي طلعت منه انصدم وهو يشوف السلسال اللي رمت نفسها بالبحر عشانه طايح بالارض عرف انه لما دفها انفك دون ماتتدري حس بشعور غريب سحبه وراح يركض)
رامي وهو يشوف فهد يركض صرخ: فهد فهد( ودخل الغرفه وشافها فاضيه وطلع يركض وراء فهد)

وقف فهد قدام البوابه صرخ بصوت عالي:فارس
لفت قمر اللي كانت تمشي بنص الشارع بس لفت وجهها لاتجاه الشارع بسرعه وفتحت عيونها بتوسع وهي تشوف السياره الطايره لها ماقدرت تتحرك حست رجولها انشلت
وقفت سياره مشاري وابوفهد وهو يشوفون المنظر وصرخوا: فارس
غمضت عيونها قمر بقوة وضمت يدينها لصدرها بس فجاه حست بجسم ضمها وصاروا بالارض فتحت عيونها وهي تشوف السياره وقفت بعد مسافه لفت بسرعه للجسم اللي فوقها وشافت فهد
بلع ريقه فهد اول مره يركز فيها كذا شكلها وهي مغضمه عيونها وخصلات شعرها متبعثره ع وجهها ولما فتحت عيونها صار يتاملها ماقدر يقوم من فوقها ناظر شفايفها الورديه
ركضوا رامي وابوفهد ومشاري لهم
وقف فهد وهو ماسك قمر من كتوفها وبهمس بااذنها: ياويلك لو قلت لابوي او مشاري شي فاهمه؟
كانت تناظر لعيونه وشفايفه وهي تتحرك هزت راسها باايه
بعدها فهد عنه ولف لابوه ومشاري ورامي
ابوفهد وهو يلمسهم:فيكم شي؟
مشاري:انتوا بخير؟
فهد وهو يمسك يد ابوه وعينه ع قمر: حنا بخير لاتخاف
مشاري بشويه عصبيه:وش مطلعك من المستشفى؟
قمر اللي لسى مفهيه صحاها لمسه مشاري لها من كتفها:ايش؟
مشاري:وش مطلعك من المستشفى؟
فهد بسرعه:خلاص قالوا لنا مافيه شي يقدر يطلع (ولف لرامي) صح رامي؟
هز راسه رامي بدون مايقول أي شي .

لف مشاري صرخ:رامي (وسلم عليه بحراره وحب وبدوا يسالفون ودخل فهد معهم بس كان ساكت وهو يناظر ابوه وهو يتكلم مع البنت اللي لسى حتى اسمها مايعرفه)
ابوفهد بحنان : انت بخير ياوليدي ؟
هزت قمر راسها وهي تتامل الحب اللي تلقت من هذا الرجال: ايه بخير
ابتسم ابوفهد وطبطب ع كتفه: يلا امش عشان نروح للشاليه خالتك (يقصد ام فهد) خايفه عليك وامي بعد يلا امش (ولف وسلم ع رامي) والله انك لاتتغدى معنا
رامي:لا والله عندي شغل
ابوفهد:خلاص انا حلفت والا بترد حلفي
رامي باحراج: ولا والله ياعمي مارد حلفك يلا معكم
فهد بحده: فارس امشي معي بسيارتي
ناظرته قمر بخوف خفيف بس تنهدت وهزت راسها
مشاري وهو يبتسم ويلف يده حول كتف رامي:انت تعال معي
ضحك رامي:انت ماتتغير؟
مشاري:لا مستحيل (ولف لابوفهد) عمي تجي معي والا مع فهد؟
ابوفهد بابتسامه:الخوي مايترك خويه معك
ضحكوا كلهم ماعدا فهد وقمر ومشوا
فهد وهو يناظر لها من فوق لتحت : امشي
هزت راسها قمر و ركبت وهم ساكتين (رفعت راسها وبهمس): فهد هذا مو طريق الشاليه
فهد وهو عيونه لقدام ويدينه ع الدريكسون:ادري
بلعت ريقها قمر وحطت يدها ع رقبتها تبي تحس بالامان ان امها قربها بس انصدمت مالقته:سلسالي (ولفت لفهد) فهد تكفى ارجع بدور سلسالي
ماعطاها فهد وجهه وكمل طريقه
قمر وهي تترجاه: فهد تكفى انت ماتعرف وش معنى هذا السلسال لي فهد تكفى افهمني فهد تكفى بس وقف هنا وانا برجع بنفسي فهد
وقف السياره ولف لها:انزلي
ناظرته وهي ضامه شفايفها بقوه ولفت للمكان كان بحر بس فاضي هزت راسها ونزلت
قعدوا بعيدين عن بعض شوي
كان فهد لام رجوله بس فاتح بينهن ولف يدينه حولهن وعيونه ع البحر
اما قمر متربعه وتلعب بالرمل وابتسمت ع خفيف: عارفه بتقول اطلعي من حياتي عادي ماانت اول واحد تقولها ومتاكده انك مو الاخير يمكن فيه ناس ماقالوها مباشره بوجهي بس افعالهم قالتها (وقفت ولفت وجهها) صدقني فهد انتوا عايله غير عن كل اللي عرفتهم (ونزلت راسها لان دموعها بدت تنزل) حافظ عليهم مع السلامه والله يوفقك
مسك معصمها وهو لسى ع وضعه وعيونه ع البحر
لفت وجهها له بصدمه وبهمس: فهد
فهد:تبي تورطني مع ابوي وش بقوله اذا سالني عنك؟
ناظرت ظهره:ااا ااا
وقف فهد وناظرها بحده:من انتي وليش سويتي كذا وشي اللي يخلي بنت تسوي كذا ؟
نزلت راسها شوي وسحبت يدها من يده بعدين رفعت راسها وهزت كتفه بمعنى مدري ودموعها لسى تمشي ع خدودها:مدري صدقني كنت احب اني بنت كنت زيك عندي عايله احبهم موت ام واخ ابيع الدنيا واشتريهم كان عندي بيت وغرفه ومدرسه وطموح بس كل شي تغير
فهد باهتمام واستغراب:ايش صار وش اللي وصلك لهنا؟
قمر ابتسمت بالالم:حظي
فهد باستغراب:حظك؟
قمر:ايه حظي انولدت دون ماشوف ابوي انولدت وانا اسمع اني يتيمه بس ابوي حي وشلون اصير يتيمه وابوي حي لان ابوي تخلى عنا مدري ليش سوا كذا بس اللي اعرفه اني مستحيل اغفر له ببدايه حياتي ماكان شخص مهم ابدا بالعكس كان انسان جدا عادي عندي كنا نعيش ببيت صغير ع قدنا نصرف من مكافاه اخوي والفلوس اللي تجينا من الاكل اللي تبيعه امي كنت مبسوطه ببساطه حالنا كان عندي اهل وبيت وصديقات بس كان اخر يوم اختبارات ثانويه عامه كنت مبسوطه اني خلصت واني بحقق حلمي واصير دكتوره كنت فرحانه ودخلت البيت وانا اركض وضميت امي وانا اصرخ واقول يمه بنتك تخرجت بنتك بتصير دكتوره بس كان وجهها اسود خفت بقوه ومسكت يدها بس اول مالمستها طاحت بالارض كانت ذيك اول مره اشوف امي كذا اول مره اشوف امي بهذي الحاله صرخت ووديناها المستشفى وهناك انصدمت انه طلع عندها سرطان بالمخ وبمراحله الاخيرة (شقهت من البكي) ماصدقت كلامهم كانت امي دايم تشكي راسها بس كانت تقول انه صداع وبيروح كذبت الكل وبكيت دخلت ع امي وطحت ع صدرها وطلبتها ماتتركني مسكت وجهي وهي تبكي وقالت لي انا دوري بالحياه انتهى
ياالله قد ايش كانت هذي الكلمه قويه علي نزلت مثل الصاروخ ع قلبي وفجرته سحبت يدي وفتحتها وحطت فيها هذا السلسال اللي كنت بموت عشانه قالت لي افتحيه ولما فتحت شفت امي وجنبها رجال غريب اول مره اشوفه وبينهم اخوي عبدالعزيز كان عمره سنه يمكن كانوا يضحكون ومبسوطين استغربت وسالت امي من هذا الرجال قالت لي والابتسامه ع وجهها هذا ابوك حسيت وكان احد عطاني كف ومو أي كف كف قوي وشلون ابوي وماعرف وجهه انصدمت واللي صدمني اكثر الابتسامه اللي ع وجه امي قالت لي ماابيك لما تشوفينه ماتعرفينه ااه ههه ومن ذاك اليوم مات حلمي وطموحي باني اصير دكتوره صرنا انا وعبدالعزيز نجمع الريال فوق الريال عشان علاج امي بعد سنه من الالم والتعب ماتت ماتت اطهر انسانه ع وجه الكون اغمى علي وتعبت من هول الصدمه مستحيل اعيش دونها كنت دايم اقولها يمه مستحيل اعيش وانتي مو معي كانت تضحك تقول بتعيشين ماحد بيموت قبل يومه ..

لما صحيت بعد اسبوع سالت عن اخوي وانصدمت لما قالوا لي ان من يوم ماامك ماتت اختفى وان الدفن قام فيه ابو فواز الاب اللي حماني ودلعني زي وحده من بناته كانت صدمه كيف اخوي تخلى عني ليش يصير لي كذا ليش انولد دون اب ومراهقتي واحلامي تروح عشان امي راحت وتركتني وليش اظل وحيده ويتيمه عشان اخوي خاف من مسؤليتي كل هذا سالت نفسي بس (ولفت لفهد والدموع تمشي بغزاره ع وجهها وحركت يدينها بقهر وهي تاشر ع نفسها) مالقيت جواب الا انني نحس وان اللي يقرب لي يختفي بهذي الدنيا ..
ناظرها فهد ملامحها ماعرف ايش يقول يهديها والا يهاوشها والا ايش يسوي؟
شهقت بقوه قمر ومسحت دموعها: عشت عند خالي لانه هو الوحيد اللي بقى لي كان سكير قذر وصخ (اصرخت باعلى) جربت تعيش بخوف جربت يوم كامل تقعد دون اكل جربت كل ماتبي تتطلع من غرفتك تركض وانت تحمي جسمك جربت لما تمر فيه يدين تحاول تلمسك جربت تعيش ع الاهانات والسب جربت تجلس بغرفه مافيه الا فراش بالارض جربت تعيش وانت تكلم نفسك وتفكر بحياتك التعيسه؟
ناظرها بصدمه وماقدر يقول أي شيء
قمر وهي تقعد وعيونها ع البحر : مع كل اللي صار كنت صابره كنت اقول لنفسي هذا اختبار من ربي لي بيشوف ثقتي فيه بس بيوم كنت راجعه من بيت نور اول مادخلت حسيت بيدين التفت حول خصري ورفعتني من الارض صرخت بخوف عرفت انه ابوسالم اللي ياما حاول يعتدي علي شفت عيون خالي وهو يناظر من باب غرفته وكانه يشوف بنت ليل مو بنت اخته او كانه يتفرج ع فلم ماله علاقه باابطاله حسيت بذيك اللحظه احساس ماقدر اوصفه حسيت اني حشره مالها قيمه بهذي الحياه الكل يضربها ويدفها ع غيره ضربته وقدرت اهرب دخلت بيت نور وانا منهاره اتجهت لغرفتها وسحبت المقص قصيت شعري (مسكت اطراف شعرها واضحكت بخفه) كنت احبه كنت احب لما كنت اقعد بالصاله وأمي تقعد تمشطه لي وعبدالعزيز يضحك علي باني كاني بزر امي تمشط شعري ههه كنت امد لساني له واقوله انا حره وامي تهاوشنا بعدين تقعد تغني بصوتها الروعه .. قصيته لاني كرهت كوني بنت عارفه ان مو هو اللي يثبت اني بنت بس (هزت كتوفها) مدري ليش سويت كذا رميت العبايه اللي علي ومسحت باقي المكياج اللي ع وجههي ضمتني نور وهي مستغربه كرهت خوفي كرهت الرعب اللي يحوم حولي بس عشاني بنت لو انا ولد ماصار اللي صار لو انا ولد ماخاف عبدالعزيز مني لو انا ولد كان مااحتجت عبدالعزيز لو انا ولد كان قدرت احمي نفسي من خالي وغيره لو انا ولد ماطلعت من بيتنا اصلا بس عشاني بنت يصير كل هذا لي
سكت فهد شوي بعدين قال:وكيف فكرتي انك تسوي نفسك ولد ماخفتي ؟
ناظرته وابتسمت بين دموعها وبهمس:خفت ههه لا لاني كرهت كلمه خوف كرهتها مثل ماكرهت ابوي وعبدالعزيز وخالي ومثل ماكرهت نفسي قلت خليني مره واحده بس اسوي شي دون مااخاف خليني مره واحده اسوي شي دون ماعتمد ع احد طبعا نور عارضت كثير بعكس منيره وبالاخير وافقت ومن ذاك عهدت نفسي عهد اني باانتقم من ابوي وعبدالعزيز ع الجروح اللي خلوها لي وبس اظن الباقي تعرفه (وقفت وابتسمت) مشكور فهد ع اللي سويته كان شرف لي اني اعرفك ..
ناظرها هو قاعد بتاملها
هزت راسها قمر ومشت خطوه ووقفت وهي معطيه ظهرها لفهد:سلمني ع عمي ومشاري وقل لعمي انه غير منظر الرجال بعيني وقل لمشاري اني وربي حسيته زي اخوي وقل لهم اني اسفه اني دخلت حياتكم مع السلامه (مشت باتجاه الشارع)
وقف بسرعه ودون شعور ومسكها من ذراعها ولفها له صارت قريبه له صار يناظر عيونها دون مايقول أي شي
ناظرته شوي بعدين نزلت راسها وبهمس:فهد
فهد بسرعه:لاتروحين
رفعت راسها وناظرته بصدمه:ايش ؟
فهد:قلت لاتروحين اصلا وين بتروحين؟
ابتسمت قمر:ارض الله واسعه
فهد:انتي ايش اسمك؟
ابتسمت : قمر
ناظرها فهد بتامل وماقال شي
نزلت راسها قمر وسحبت نفسها من يد فهد وضحكت بمزح مجروح:عارفه انه اسم مو على مسمى (ودخلت يدها بخصلات شعرها وحركتها بعلامه خجل)
ناظرها وابتسم:ايش اسمك ابوك؟
قمر باستغراب: ليش؟
فهد:يمكن اقدر اساعدك
قمر:خالد الراسي
ناظرها فهد بصدمه:ايش؟
قمر باستغراب:تعرفه؟
فهد:ايش اسمك جدك؟
قمر:صقر
فهد:انتي متاكده؟
قمر:اكيد متاكده هذا اسمي ليش تعرفه؟
فهد:انتي متاكده انك عايشه بالشرقيه او بالمملكه كلها؟
قمر باستغراب:ليش؟
فهد:هذولاء اكبر تجار بكل المملكه محلات السيارات اللي بالشرقيه اكثرها لهم غير الشركات التجاريه
ناظرته بصدمه وهي ترمش:لالا مستحيل يكون ابوي غني وحنا كنا عايشين بفقر مستحيل
فهد:اهدي حنا راح نتاكد(وناظرها بتامل وبدون احساس) انا راح اساعدك
رفعت راسها بصدمه: جد فهد
فهد وهو يبتسم:هيه لايكون نسيت انك صديقي؟
ضحكت بخفه:لا
فهد:اجل امش نرجع للشاليه لان جوالي من اليوم يهتز من مكالمات ابوي
ضحكت قمر ومشت ركبوا السياره:فهد
لف لها فهد:هلا
قمر:مشكور
فهد:العفو
كانت قمر متضايقه كثير وعيونها ع الشارع وتفكر معقوله ابوها يكون نفس الشخص اللي يتكلم عنه فهد ..

توضيح ..

((ابي اوضح شي عن انا قمر بحياتها ماسمعت عن ابوها لانها كانت ساكنه بحي فقير وزيها اهل نور واهل منيره وحتى المدرسه اللي درست فيها كانت بنفس الحاره وماكانوا يطلعون كثير ولا يعرفون غير اهل الحاره))

ابتسم فهد دون مايناظر لها: روق
لفت وناظرته بتامل ماقالت شي
فهد وهو لسى مبتسم وقال بمزح: عشاني
ابتسمت وهي تناظر له بعدين لفت وجهها للشارع ..

يــوم جــديــد ..

غــرفــه نــوم الـشـبـاب
كان فهد حاط يده تحت خده وهو منسدح ويتامل قمر وهي نايمه فوق السرير وهو بالارض ""اف وشفيني يعني لما دريت انه بنت تغيرت نظرتي له اف الله يلعن ابليس"" دخل يده بجيبه وطلع السلسال وصار يتامله رفع جسمه شوي وحط السلسال ع الوساده جنب راس قمر ورجع لفراشه

بـــيــت ابــونـاصــر..

اميره وهي ماسكه بيدها كوب كافي وتدور بالحديقه وبيدها الثانيه جوالها اللي باذنها:والله ياسوير اللي قلته لك صدق
ساره:انا قسم شكيت لما قربت منه ماكانه وجه ولد بعدين مااغازل ولا شي يعني استغربت
اميره وهي تشرب وتهز راسها بحماس:ايه بس تتوقعين ليش سوت كذا تصدقين عرفت اني عايشه بنعمه حزنت عليها كثير ياترى وين اهلها ؟
ساره بنفس الحزن: ايه صادقه ماتدرين ايش ظروفها يمكن يتيمه او يمكن بنت قليله ادب
اميره بسرعه: لا والله ماهي قليله ادب
ساره بضحك :  وانتي وش دراك مصدقتها وانا مدري؟
اميره بخجل:ههههه لا بس مدري يعني كذا باين وجه اللي تبي شي بعدين لو هي قليله ادب زي ماتقولين ليش تسوي نفسها ولد؟
ساره:والله مدري صدق الدنيا هذي تشوفين فيها العجب يلا عاد بروح اقول لخواتي اكيد بينجلطون
اميره:هههه اووك يلا بايو وسلمي عليهم انا بروح للمستشفى ادعي لي
ساره:الله يوفقك اسمعي اذا رجعتي تعالي عندنا مو امك بتروح نفس الزواج اللي بتروح له امي؟
اميره:الا
ساره:خلاص اجل اذا خلصتي تعالي وش ولوه تقعدين لحالك؟
اميره:صادقه بجيب نادر ونجي يلا بايو
ساره:بايو ..

الـشـالــيــهــات ..

فتحت عيونها قمر وهي تتنهد تعدلت بسرعه وهي تشوف السلسال جنبها سحبته وهي تبتسم بقوه ضمته لصدرها:ااه من جابـ ـ ـ(ارفعت راسها وناظرت باب الغرفه المفتوح اللي يطلع ع الحديقه والمسبح الصغير وشافت فهد واقف وهو معطيها ظهرها وحاط يدينه بجيبه ابتسمت لبسته وعدلت بلوزتها ودخلت الحمام و قفلت باب الغرفه وطلعت جلال الصلاه وصلت وغيرت ملابسها وطلعت و وقفت وراءه:صباح الخير
لف لها وناظرها بسرعه وتعداها
ناظرته باستغراب ""وشفيه هذا مره يكلمني ومره يسحب علي ااف"" صحت من ضربه مشاري ع كتفها
مشاري:ههههه وش فيك؟
قمر وهي تبتسم بارتباك: مافيني شي
لفت قمر ع صوت الجده:فارس
لفت للجده وابتسمت بقوه:هلا جده
الجده وهي قاعده على فرشه وجنبها عيالها وحريهم وفهد وريماز وحمودي يلعبون قدامهم:تعال يمه افطر
قمر بخجل: لا مو مشتهي
مسكها مشاري من معصمها وسحبها:اقول امش
قعدوا وابتسمت قمر بخجل وارتباك
مد لها ابوفهد كوب حليب: تفضل
ناظرت الحليب وبلعت ريقها اكره شي عندها بالحياه الحليب تكرهه بشكل مو طبيعي بس ماحبت ترد ابوفهد هزت راسها واخذت:شكرا
مدت لها ام فهد ساندوش:تفضل ياوليدي كل
ابتسمت وسحبت الساندوش:مشكوره يعطيكم العافيه
جاءت تركض ريماز وطاحت بحضن قمر وتعلقت برقبتها:فارس صدق انك امس طحت بالبحر؟
قمر وهي تهز راسها: ايه  صدق
ريماز بحماس:وصدق ان فهد باسك من شفايفك ؟
توسعت عيونها بصدمه وصارت ترمش
اما فهد فغص بالشاهي اللي معه:كككح كككح ..
صارت ام فهد تضرب ظهره: بسم الله عليك يا وليدي بسم الله
صرخ فهد: ريماز انقلعي هناك
خافت ريماز وراحت تركض وركض وراءها حمودي
الجده باستغراب: هو وش فيك هوشت اختك وش سوت؟
عصب فهد بقوه ووقف وعطى قمر نظره ومشى
الجده:هذا وش فيه؟
ابوفهد باستغراب:مدري والله يمه
ابومشاري:مشاري تدري ليش فهد معصب من قام وهو كذا؟
مشاري:لا والله انا ماشفته حتى امس جاء وكنت نايم ايه صح كان مع فارس
توجهت كل العيون لقمر اللي لسى تحت تاثير الصدمه
ابوفهد باستغراب:فارس صار شي امس؟
ناظرته قمر بفهاوه:هاه ايش؟
ابوفهد: صار شي لكم انت وفهد؟
قمر بسرعه وهي تاقف:لالا ماصار شي وش بيصير يعني ماصار شي عن اذنكم(وراحت وهي تحس بتموت من الفشله وهي ماره صدمت مها): أي اسف (وكملت مشيها للغرفه دخلتها وقعدت ع السرير) ..

عند مها اللي فهت بفرحه
ضحكوا البنات عليها وبدا التعليق
منى:ترى نحن هنا ؟
خوله:هههه شوفوا وجه مها وشلون صار لونه؟
نواره:ياالله لهدرجه يسوي الحب كذا؟
كل البنات ماعدا مها:ههههههههه
مها وهي تضرب منى من كتفها بمزح وخجل:طسي عني ااه يمه بموت من الوناسه..

** غــرفــه الــشــبـــاب ..

مسكت قمر جوالها وهي قاعده تبكي دقت ع منيره:الو
منيره بخوف وهي تاقف:قمر وش فيك؟
شهقت قمر: منيره
منيره اللي زاد خوفها:وش فيك تكلمي قولي
قمر:فهد
منيره:وشفيه؟
قمر: درى اني بنت
شهقت منيره:ايش وشلون وانتي وين الحين ؟
قمر وهي تمسح دموعها :لا انا بخير اسفه بس اسمعي (وبدت تقولها كل السالفه من الغرق لين صار قبل شوي يوم قالت لها ريماز انه باسها)  الحين وشلون بقابله ؟
طاحت ضحك منيره : هههههه
قمر بقهر:وش يضحكك؟
منيره: اضحك عليك ..
قمر:ايه خلاص
منيره: ياحياتي انتي خلاص دامه ماقال شي اقصد ماعلم عليك خلاص بعدين انتي مفروض تسوين نفسك عادي فاهمه ؟
قمر وهي تمسح دموعها وبهمس:ايه
منيره وهي تتنهد وبهدوء:تحبينه ؟
بلعت ريقها قمر :احبه؟
منيره:ايه
هزت كتوفها قمر وكان منيره تشوفها: مدري
تنهدت منيره وباحساس حب مجروح:قمر لاتحبين صدقيني حنا مانقدر نحب مانقدر
ضحكت قمر باستهزاء: هو بس الحب اللي مانقدر عليه كل شي مانقدر يلا منيره قلبي بس حبيت افضفض لاحد وادري نور تعبانه وشلونها الحين؟
منيره بابتسامه:لا الحمدلله احسن من قبل بكثير قمور ودي اشوفك
قمر بضيق:حتى انا والله اشتقت لكم موت
منيره:وش رايك نلتقي باي مكان؟
قمر:وين؟
منيره:اممم وش رايك بسوق الراشد؟
قمر: حنا ع مااعتقد بنرجع بعد شوي من الشاليهات وش رايك الليله ؟؟
منيره:خلاص الليله الساعه 8 وبجيب نور وبيننا اتصال
قمر:خلاص يلا باي
منيره:باي ياروحي
تنهدت قمر وراحت للحمام وغسلت وجهها وحركت شعرها بيدينها قدام المرايه وبنظره تشجع فيها نفسها ""انا ماحب فهد ولا استحي منه ولا حتى اخاف منه ايه""
غمضت عيونها ورجعت فتحتها وطلعت

في المـســتـشـفــى اميره وهي ماسكه بيدها ملف وتمشي فيه وهي معصبه""مالت عليك بس ياسخيف(تقصد رامي)
(وصارت تقلده بالكلام)
خوذي هذا الملف ودوري ع الغرف من 35 الى 50 (ورجعت لصوتها العادي) اف مالت عليك ياجعل تدهسك تريله اف""
دخلت اول غرفه ومرت بكم غرفه لين وصلت لغرفه 42 طقت الباب ودخلت:السلام عليكم
كان المريض شاب سعودي وقاعد معه بالغرفه واحد ارتبكت خاصه من نظراتهم وصارت تناظر الملف وتشوف حالته وهي تقرا اسمه:عبدالله ؟
عبدالله وهو يناظر لها من فوق لتحت: ايه
اميره وهي تناظر له باستحقار بعدين ناظرت رجله اللي مجبسه: سويت اشعه اليوم؟
ابتسم:لا
اميره وهي منقهره وبنفخ: افتح بنطلونك """الله يفتح مخك ان شاء الله انا الله وش بلاني وخلاني ادخل طب اف""
فتح البنطلون وهو يناظر لها
اميره وهي ماسكه بيدها القلم صارت تناظر رجله لمست رجله بالقلم
عبدالله:ليش بالقلم؟
سحبت عليه اميره وفتحت الجبس شوي
عبدالله:طيب انا فيه مكان ثاني يعورني
رفعت راسها اميره باستغراب: وين؟
ابتسم بمكر واشر على قلبه ..
وضحكوا هو وصديقه وضربوا يدينهم ببعض
حست اميره بدموعها امتلت بعينها اصلا هي ضايقه من الصبح بعدين يجي رامي والحين هذا يكملها رمت الملف بالارض بقوه وطلعت وهي حاطه يدها ع فمها صارت تمشي او تركض بس حست نفسها اصدمت بشي
مسكها من كتوفها بقوه وقال وهو رافع حاجب:شكل حضني عجبك ؟
رفعت راسها وبنظره حقد دفته عنها ومشت
انصدم من الدموع بعينها لاشعوريا مسك معصمها:وشفيك؟
اميره بهمس:مافيني شي اتركني
رامي باصرار:لا ماراح اتركك قولي لي وشفيك ؟
اميره بضيقه وهي تاشر بيدها الثانيه ع غرفه عبدالله : هذا المريض قليل الادب
انقهر رامي مايدري ليش وقال بعصبيه:وش سوا؟
نزلت راسها اميره وسحبت يدها من يد رامي وضمتها لصدرها وسكتت
رامي اللي حس انه سوا شي كبير: لمسك؟
رفعت راسها بسرعه:لا بس ..
قطع كلامهم ابوسديم(عم اميره وهو صاحب المستشفى):السلام عليكم
رامي:وعيكم السلام
تقدمت اميره وباست راسه وبهمس:وشلونك عمي؟
انصدم رامي ""عمي؟""
ابوسديم بابتسامه: بخير الله يخليك انتي وشلونك عساك بس مرتاحه بمستشفانا ؟
اميره اللي ناظرت رامي بعدين ناظرت عمها وابتسمت بارتباك:ايه يلا عمي عن اذنك عندي
ابوسديم:اذنك معك ايه صح اميره
لفت اميره:هلا؟
ابوسديم:قالت لي ساره اليوم انك بتجي لنا تبين تروحين معي ولا ارسل لك السواق؟
اميره:لالا ماله داعي تكلف نفسك سواقي برا
ابوسديم:خلاص اجل ننتظرك (ومشى)
مسك رامي معصمها بقوه:وين بتروحين؟
اميره بخوف: ولا مكان
رامي:قولي لي وش سوا بسرعه
اميره: هو يعني (وهي تتصنع القوه) دكتور ماقدر اقولك
رامي باستغراب: ليش ؟
اميره بهمس : استحي
ابتسم رامي بس بسرعه اخفى ابتسامته: لا تستحين قولي لي عشان اعرف اتصرف معه
هزت راسها اميره وكلمته باللي صار .

رامي حس بغضب تركها ودخل على المريض
عضت اميره ع شفتها السفليه: اف وش بيسوي (وادخلت بسرعه وراء رامي)
تقدم رامي ومسك عبدالله من بلوزته:شوف ان بس سمعت انك قربت لااي دكتوره او ممرضه هنا او أي احد بهذا المستشفى قسم اني لاوريك نجوم الليل بعز الظهر (ودفه بقوه ع حافه السرير) فاهم ؟
هز راسه بخوف وبارتباك: فاهم
عطاه نظره وسحب الملف من الارض وضربه بصدر اميره بقوه وطلع
اميره وهي تمسك الملف اللي عورها وطلعت رواءه:دكتور اا
قاطعها رامي ولف لها وهو ياشر باصبعه: راح تنقصين 5 درجات
شهقت اميره بصدمه:ليش وش سويت؟
ناظرها رامي من فوق لتحت صح هي ماسوت شي بس بس مايدري كانه يبي يعاقبها ع الشعور اللي بقلبه:لاتخليني اخليها 7
ناظرته اميره بقهر ودموعها تجمعت بعيونها و وقفت قدامه:اكرهك
ولفت وجهها ومشت
ناظرها وهو يبلع ريقه ضرب برجله الارض: اف (ومشى) ..

** بــيـت ابــو فــهــد ..

دخلت 3 سيارات من باب الجراش وقفوا وبدوا الناس ينزلون
ابوفهد:تعشوا عندنا (يقصد ابومشاري)
تهاني بوساعه وجهه وهي تنفخ: لا مانبي نبي نروح لبيتنا (ولفت لابومشاري)مشينا
ابومشاري وهو متفشل بس مايقدر يرد : ايه ههه لا تهاني مو قصدها قصدها اننا تعبانين يلا مع السلامه (ولف لنواره) تروحين يابنيتي؟
ناظرت ابوها بتامل وحزن ع حاله وضعفه وبهمس:لا بنام هنا
هز راسه وابتسم لها وهو متفشل منها طلع بوكه وحط بيدها فلوس وكانه بيعوضها بالفلوس:خوذيها
ابتسمت وهي ترجع الفلوس لابوها تدري ان تهاني بتسوي له سالفه باالبيت ماحبت تضايق ابوها:لا يبه معي واذا احتجت شي مشاري موجود
ابومشاري هز راسه: مع السلامه
نواره باسى: مع السلامه
ركب السياره مع تهاني وحمودي ومشوا
الجده وهي تهز راسها: ااه حسبي الل ه(ولفت لنواره) تعالي يابنتي .
كانت عيون قمر تراقبهم بتامل وحست بضعف او خوف ابومشاري من مرته وبنفس الوقت عطفه وحبه لبنته نزلت راسها باسى ""ياترى لو عرفت ابوي كان حبني؟""
فهد وهو ينفخ رمى عليها كيس فيه اغراض: وده للمطبخ
قمر وهي ماهي قادره تمسكه: ااه ثقيل
عطاها نظره ومشى وخلها
نزلت قمر راسها وصارت تسحبه "" ااف ليش يعاملني كذا طبعا بيعاملك كذا اجل تبيه يرجع يعاملك زي قبل اااف""
دخلت المطبخ وحطته فوق الطاوله مسكت ظهرها بالالم:ااه
ام فهد وهي داخله المطبخ: فيك شي؟؟
لفت قمر لها وبسرعه:لالا مافيني شي تبين شي خالتي قبل ماروح؟
ابتسمت ام فهد:لا وانا امك بس ماانت نايم عندنا؟
قمر""وانا امك ااه(كانت هذي كلمه امها)اشتقت لك يمه"" :لا والله عشان بقوم من بدري وافتح البقاله
هزت راسها:طيب تعشى؟
قمر:لا والله مو مشتهي بس بغير ملابسي ونام تسلمين مع السلامه
ام فهد وهي تشوفه يطلع من الباب الخلفي اللي يطلع ع الحوش ع طول :مع السلامه
مشت قمر لباب الشارع بعد ماخذت شنطتها وطلعت صارت تمشي بالحاره بس وقفت ولفت لاصوات اطفال ابتسمت بالالم ودخلت يدينها بجيب بنطلونها وصارت تتاملهم كانوا 3 بنات و ولدين كانوا البنات يركضون و واحد من الاولاد يلحقوهم واصوات ضحكهم ماليه الحاره والولد الثاني جالس ع عتبه باب ويقرا دمعت عيونها تذكرت طفولتها احسن واحلى ايام بحياتها هي ايام طفولتها كلها براءه وحب حست الاطفال ذولاء ذكورها بنفسها ونور ومنيره وعبدالعزيز وفواز رفعت راسها وهي تشوف المراه اللي طلعت راسها وهي راميه طرحه ع وجهها وقالت: يلا ادخلوا عشان اعطيكم الحلا صاروا الاطفال يصارخون وهم مبسوطين ودخلوا ابتسمت بقوه كانت دايم ام منيره كل عصر تسوي حلى او كيك وتوزع عليهم تنهدت ولفت وجهها وكلمت مشي ..

دخلت البقاله ورمت شنطتها وتسبحت وغيرت ملابسها ناظرت الساعه شافتها 7ونص ""خليني ادق ع منيره واشوفها بتروح او لا"" ودقت ع منيره اللي قالت الا بنروح سكرت الجوال ولبست بنطلون اسود وسيع شوي من فوق وبلوزه رماديه طويله شوي وفوقها جكيت كروهات اسود بعثرت شعرها ولبست نعول سبورت وحطت جوالها وبوكها بجيبها الخلفي وطلعت بعد ماسكرت البقالة ..

بــيــت ابــوفــهــد

ام فهد وهي ماسكه بيدها حافظه:يمه فهد خذ هذا و وده لفارس ماتعشى
فهد: يمه مو لازم
ناظرته ام فهد باستغراب:انت وش فيك على فارس؟
فهد اللي يبي يتهرب وقف واخذ الحافظه:مافينا شي (وطلع ومشى باتجاه البقاله اول ماوقف وهو يشوف البقاله شاف قمر وهي تركب تاكسي وتمشي صرخ بصوت عالي): فارس (بس السياره كانت مشت)"" هذي وين راحت نزل الحافظه بسرعه وطلع جواله ودق عليها وبعصبيه:وين رايحه؟
قمر بتافف:ليش تسال؟
فهد اللي عصب بقوه:خير اقول جاوبي ..

قمر بزهق : وهي تبي تتخلص منه:الراشد
توسعت عيونه بصدمه واستغراب:الراشد؟
قمر:ايه
فهد:وش تبين فيه؟
قمر:ابي اشوف صديقاتي
فهد:أي صديقات؟
قمر باستغراب:فهد ايش يهمك لو عرفت؟
فهد اللي ارتبك وماعرف ايش يقول بصراخ : انا  حر اسمعي قسم بالله لو دخلتي ماتعنين خير فاهمه انتظريني عند البوابه (وسكر السماعه بوجهها)
ناظرت قمر السماعه بصدمه هزت راسها ودخلته بجيبها ونزلت للسوق وقفت وهي تناظر البوابه ""ادخل والا لا ااف اخاف ادخل ويسوي لي فهد ساالفه""
قطع افكارها صوت جوالها:الو
منيره:يلا حنا داخل انتي وينك؟
قمر بزهق:عند البوابه
منيره باستغراب:ليش ماتدخلين؟
قمر بزعل:هاللي اسمه فهد هاوشني ويقول ياويلك لو دخلتي قبل ماجي اف مو ناقصه يهزاني
منيره:هههه حمستيني اشوفه اقول انتظريه وادخلي معه بشوفه
قمر:اقول طسي انتي هذا همك
منيره:هههه طبعا هذا همي ابي اشوف مزيون
قمر: اف(ولفت وهي تشوف سياره فهد) هذا هو شكله وصل انتوا وينكم؟
منيره:فوق عند المطاعم
قمر:طيب يلا باي
منيره:باي
وقفت قمر وهي مكتفه يدينها و واقفه بميلان
وقف فهد جنبها: تعدلي
تعدلت قمر وهي تناظر فوق وحركه فمها بعلامه ضجر منه ولفت له وهي تبتسم بالقوه ومدت يدها قبله:تفضل
ناظرها فهد من فوق لتحت ومشى هزت راسها باستسخاف ومشت وراءه

**بــيــت ابــوســديـــم ..

غـــرفــه ســدديـــم
كانوا الخوات متجمعات وقاعدات ع الكنبات وع الطاوله حلويات وشبسات وببسي وعصيرات وحوسه وكلهم مندمجين مع فلم الرعب وهم مطفين اللمبات والهدوء هو المسيطر ع اجواء الغرفه
سديم وبيدها صحن فشار مليان ومعقدة حواجبها دليل اندماجها مع الفلم وتاكل بهدوء
ساره وهي تمد يدها لصحن الفشار بس ضربت يدها سديم رجعت يدها دون ماتقول شي لانها مندمجه بقوه
ورغد طايحه بحضن ريوف من الخوف اما ريوف فـلافه يدينها حول رغد وهي تبلع ريقها بخوف
اما ريناد اللي متربعه ع الكنب وبحضنها علب المناكير وهي تنفخ ع المناكير اللي باصبعاها وعيونها ع التلفزيون وهي فاتحه فمها شوي تنفخ وشوي تبلم
انفتح الباب بقوه وصرخت لدرجه ان كل البنات صرخوا بوقت واحد
ريوف اللي من الخوف رمت رغد اما سديم طاح صحن الفشار بالارض اما ريناد من الربكه طاحت علبه المناكير اما ساره بغت تتهرب من الخوف
اميره اللي ماقدرت تستحمل اشكالهم:ههههههههه ااه بطني هههههه
سديم بقهر:ضحكتي من سرك بلا
ريناد وهي شوي وتصيح :مناكيري
ساره:يامال المرض ماتعرفين الذوق انتي؟
رغد:انتي سمعتي بشي اسمه دق ع الباب؟
ريوف وهي تحرك نظاراتها وبهدوء:اموره عيب خوفتينا
اميره وهي تطيح ع كنبه منفرده وتحط يدينها ع بطنها:هههه ااه بطني (وحركت يدها بعلامه تاكيد) قسم بالله اشكالكم تحفه هههه اما ريوف وهي ترمي رغد كل هذا اندماج مع الفلم؟
ساره بحماس:فلم رعب يخوف اسمه ذا قراج
اميره:ايه اعرفه شفته قبل يموت من الخوف
سديم وهي تناظر الفشار اللي بالارض:ياامال الوجعه عقابا لك يااميره انزلي تحت ونادي وحده من الخدمات تجي تنظف هالحوسه
ريناد بصراخ: بيبي
ناظروا كلهم لها بعدين رجعوا يتكلمون ماعدا اميره:نعم وش تقول هذي وشي بيبي؟
ريوف:يوه ماتعرفين وش بيبي؟
اميره باستغراب:لا
ريوف:هذا مناكير ريناد الوردي تتدلعه بيبي
اميره: هههههه ياليل ياريناد حتى المناكير تتدلعينه؟
ريناد وهي تسحبه من الارض: احمدي ربك يا اميره انه ماانكسر
ساره وهي تمسك يد اميره وباستغراب:اميره وش فيها عيونك حمراء كانك كنتي تبكين؟
لفوا كلهم لها وباما انه ظلام ماانتبهوا غير ساره اللي كانت قريبه منها
اميره بسرعه وهي تاقف:وشي ابكي بروح انادي الشغاله (وطلعت تركض تحت مع ان بالصاله فيه جهاز ينادي الشغاله بس هي كانت تبي تتهرب وبكل غرفه من غرف البنات فيه بس سديم له اسبوع خربان وماحد صلحه)

في الــــراشــــد قمر وهي مبتسمه تحس ودها تسابق الريح عشان تاصل بسرعه للبنات تحس بتموت من الشوق لهم
صار يناظرها فهد وهي مبتسمه اول مره يشوفها فرحانه زي كذا
وقفت قمر ببدايه المطاعم وهي تدور بعيونها ع منيره ونور وفهد واقف جنبها ومدخل يدينه بجيبه بعكس قمر اللي تحرك يدينها بارتباك
ابتسمت بقوه وهي تشوف منيره ضمتها بقوه دون شعور: اشتقت لك
منيره وهي تضمها بااقوى ماعندها وضربت ظهرها:انا اكثر
ضحكت قمر ولفت لنور اللي واقفه سحبتها قمر من رقبتها وضمتها:هههه اشتقت لكن بنات
نور اللي بدت تبكي وهي تلف يدها حول خصر قمر:فقدناك قمور
منيره وهي تبعد عن قمر وتسحب نور: اليوم مانبي نسوي عزاء (وضحكت بخفه وهي تتلفت) الناس صاروا يناظرون لنا ههههه تلقينهم يقولون وش هذا الولد
ضحكت قمر ومسكت يدين البنات وصارت تتاملهم:ههههه احس كاني لي سنه عنكم
منيره بحب وهي تشد ع يد قمر:قمور صايره تهبلين ..

نور : ايه كانك ولد كوري
ضربتها قمر من كتفها:وش كوري يقالك تمدحين؟
منيره:هو يحصل لك تشبهين كوري؟
ضحكت قمر بعدين كانها تذكرت شي: فهد(ولفت وشافته واقف ويخزها خز ورجعت لفت للبنات وضحكت) ياقدري بيذبحني
منيره اللي فهت:هذا فهد؟
قمر دون ماتلف ماتبيه يشك:ايه اللي لابس بلوزه صفراء
منيره:يخق
ضحكت قمر: ايه (ولفت لنور وشدت ع يدها) وشلونك الحين وشلون خالتي وماجد وفواز؟
نور بحب:كلنا بخير الحمدلله ع كل شي
فهد وهو يقرب:متى تبين تروحين؟
قمر دون نفس:مدري
ناظرها فهد من فوق لتحت ورفع يده بتهديد:ياويلك تروحين دوني فاهمه انا بدور شوي وارجع لك خلاص؟
ناظرته قمر وابتسمت بالغصب:خلاص
ناظرها فهد ومشى
قمر وهي تهز راسها: اف من درى اني بنت احسه وده يقتلني
منيره باستهبال وهي تسوي نفسها هيمانه: ااه لو يبي يقطعني مو بس يقتلني يحق له اروح انا مع الغمازات
ضحكت قمر:انتي ماتتغيرين؟
منيره: مستحيل هههههه
قعدوا وصاروا يسولفون ويضحكون واكلوا ماحسوا ابدا بالوقت..
جاء فهد ووقف وراءها:ماراح تروحين؟؟
قمر:تونا
فهد:الساعه 11
شهقن البنات وبصدمه:ايش ؟
نور وهي تاقف وبخوف:ياقردنا يامنيره وش نسوي؟
منيره وهي تطلع جوالها شهقت: امي داقه 15مره
نور وهي تناظر جوالها:ااه يمه ياقردي مافيه احد ماقد علي ياربي
قمر وهي تحاول تهدين:اهدن اهدن انتن من جابكن؟
منيره:سواق اف نور يلا دقي ع ماجد يجي ياخذنا
نور بخوف وهي تمد لها الجوال:خوذي انتي كلميه انا اخاف يهاوشني
منيره بسرعه: لا انتي كمليه
نور وهي تلف ع قمر:قمر كلميه
ابتسمت قمر:اوك بكلمه
فهد:وشلون تكلمنيه يجي بعدين يشوفك؟
قمر وهي تسحب جوال نور:ماعليك انا اعرف اتصرف
منيره:افتحي السبيكر خلينا نسمع وش يقول
هزت راسها قمر ودقت
ماجد اللي رد بصراخ :قسم بالله اني ذابحك يانور وينك؟
ابتسمت قمر وهي تتدلع:مرحبا دودي؟
سكت شوي بعدين قال بهمس:قمر (وصرخ) قمر؟
ضحكت قمر:دودي اذني ابغاها لاتصرخ
سكت شوي بصدمه بعدين قال:وش هذا جوال نور بعدين انتي وينك لاتقولين انا بخير ومدري ايش يعني تشوفين نور ومنيره وماتبين تشوفينا انتي وين ساكنه اذا خايفه من خالك تعالي عندي وو
قاطعته قمر:هههههه ماجد خلاص اللي ابيه الحين شي واحد بس ابيك تجي تاخذ نور ومنيره بس دون ماتهاوشهم خلاص؟
ماجد:وانتي؟
قمر:وشفيني؟
ماجد:مع من بتروحين؟
قمر:امم مجود ينتظرونك البنات بالرااشد يلا مع السلامه
ماجد:لحظه قمر
سكرت قمر الجوال ومدته لنور وابتسمت:يلا انا لازم اروح قبل مايجي
ابتسمت نور وضمت قمر بقوه وبدموع:قمور مالوم منيره لما سمتك المنقذه
ضحكت قمر وبعدت نور عنها:هههه أي منقذه ياشيخه كلها مكالمه
منيره وهي تتدف نور:بعدي اقول (وضمت قمر بقوه)قمور انتبهي لنفسك فااهمه(وبعدت عنها) بعدي ليش نحفانه كذا انتي ماتاكلين؟
ضحكت قمر بخفه: الا اكل يلا عاد اشوفكن بعدين باي
منيره ونور: باي
لفوا قمر وفهد ومشوا اول مابعدوا عنهم تحولت ملامح قمر للحزن
ناظرها فهد باستغراب كيف تضحكين بوجه اللي تحبين بعدين ترجعين لحالتك كل هذا حب لهم : قمر ؟

#يتبع...