رواية أكابر و اقول فراقه عادي و انا في داخلي اصرخ تكفون جيبوه الفصل الثالث 3 - بقلم HaboOoshy

بــيــت ابــوفــهــد..

فهد وهو شايل العزبه :فارسووه ادخل المطبخ وجب سله القهوه والشاهي (وباستهزاء) بس لاتخاف ماهو ثقيل
ناظرته قمر بطرف عينها وابتسمت اما فهد فضحك بصوت عالي عليها
قمر: طيب مافيه احد؟
فهد:لا كلهم فوق يلبسون
قمر:طيب (ودخلت اتجهت للمطبخ ع طول )

غــررفــه مــهــا ..

نواره:مها الحين عمتي حنان بتجي للشاليهات ع طول ؟
مها:ايه الله ونااسه زمان عن منى وخوله
نواره وهي تسكر اخر زر من عبايتها:ايه والله يلا بسرعه خلينا نمشي
مها: يلا

الـمـطــبــخ

شالت قمر السله وهي طالعه ع نزله مها ونواره نزلت راسها:احمممم
مها اللي ابتسمت على طول وتغطت اما نواره تغطت بس
جت تركض ريماز وهي تصرخ: فارس
رفعت راسها قمر وبصوت عالي:لالالا ريماااز ..
(كانت شايله بيد سله القهوه والشاهي واليد الثانيه فرشه وريماز تركض لها)
شهقوا مها ونواره لان ريماز ارتمت بحضن قمر اللي طيحت كل الاغراض بالارض وهي بعد طاحت
ركضت مها: فيك شي؟
قمر وهي تبعد ريماز وتتعدل مسكت كوعها لانها طاحت عليه: ايي
نواره بخوف:بنادي مشاري (وراحت تركض للحوش لقت فهد ومشاري)
مشاري فهد فارس طاح
كلهم بصدمه:ايش ؟ وادخلوا يركضون .. وقفت قمر وهي لسى حاطه يدها ع كوعها
((ابوفهد وام فهد والجده والشغاله راحوا من بدري مع بعض الاغراض والفرش))
ركض فهد ومسك كوعها:يعورك؟
ناظرته قمر بخجل وبهمس:شوي عادي
فهد بعصبيه وهو يضرب ريماز من راسها:انتي غبيه تركضين لا احد معه اغراض هاه ليش مارحتي مع ابوي وامي انقلعي عن وجهي
راحت تركض ريماز وهي تبكي
قمر: ليش تبكيها يافهد حرام بزر ما تدري ..
مها اللي خاقه لابعد حد
قمر وهي حاسه بنظرات مها بس تتجاهلها
مشاري:تبي نروح للمستشفى؟
قمر بسرعه:لالالا وش دعوه مستشفى ههه عادي شوي ويروح الالم
فهد:اكيد؟
قمر:ايه
فهد:لا خلنا نجيب الاسعافات والفها لك
قمر بخوف:لالا قلت لك ماله داعي
فهد باصرار:مها روحي جيبي علبه الاسعافات من غرفه امي وابوي
هزت راسها مها وراحت تركض ثواني وجابتها
قمر وهي ترجع على وراء:لا فهد والله مافيني شي
فهد: وش فيك مافيها شي وانت يلا تحركها تعال اقعد بس (وسحبها من معصمها وقعدها ع الكنب وقعد جنبها)
وقفت قمر:مابي
فهد بشويه عصبيه:خير يعني خايف اني الفها لك ؟
قمر:لا مو خايف بس ماابي
سحبها فهد وقعدها وحط علبه الاسعافات وهي مفتوحه بحضنه ومد يدينه وقبل يفتح كمها
مشاري:انا بروح اشوف ريماز (وراح)
قعدت مها ع كنب بعيد شوي وهي تناظر له
فهد بلع ريقه وهو يشوف يدها اول مره يشوفها كانت نحيفه وطويله وبيضاء
نزلت راسها قمر بخجل
مسك كوعها بيد واليد الثانيه صار يلف فيها الشاش وهو يفكر ""يده ناعمه مرا كانه بنت وش هذا التفكير استغفر الله""
اول ماخلص وقفت قمر وبهمس:مشكور
فهد:العفو (ولف لمها) مها مسحي انتي ونواره هذي الحوسه يلا والحقونا بنروح بسيارتي ..
نواره باستغراب:كلنا بسيارتك؟؟
فهد:ايه لان سياره اخوك المصونه خربت زي العاده
نواره:ههههههه طيب يلا
اتجهوا كلهم لسياره فهد اللي كانت جمس يوكن فهد يسوق ومشاري جنبه والمرتبه الثانيه قمر وريماز وبعض الاغراض والمرتبه الاخيره نواره ومها ..

بــيــت ابــونـاصــر ..

كانوا كل العيله متجمعه مع عمهم ابوسديم وجدتهم وجدهم خواتهم
اميره بهمس لساره: اف خلينا نصعد فوق
ساره بنفس الهمس: يعني ماتعرفين جدك وقوانينه لازم كلنا نجلس على  الغداء ..

#نعتذر_جدا"
لعدم تحديد وقت معين لإنزال الرواية ولكننا نحاول ان نلتزم يوميا" بالنشر

.
((اعـــرفكـــم بـعمـــام اميره وساره))

الجد:صقر الراسي ((شخصيه قويه وله قوانين بس طيب وحنون))
الجده:حصه ((تهتم لشكلها مع كبر سنها طيبه بس مستحيل تكلم اللي اقل من مستواهم))
الابن الاكبر ابوسديم:سبق التعريف وعايلته
الابن الاصغر ابوناصر:سبق التعريف وعايلته

أما بناته
البنت الكبيره:ابتسام:34 سنه متزوجه بس لها سنه ببيت اهلها متهاوشه مع رجلها بس ماحد يدري ليش؟؟
عندها:وسن 18 سنه ثالث ثانوي علمي هاديه وبعيده عن البنات دوم لحالها وسرحانه من سنه ونص ماكانت كذا بس من بعد هالسنه والنص تغيرت ولا احد يدري ايش سبب هالتغير
جوري: 10 سنوات بنت كيوت وناعمه بس تكره ان الرجال يلمسونها باي شكل لو احد يبي يسلم تصارخ بشكل غريب ومخيف ..
البنت الصغيره والاخيره لصقر الرااسي: فوز 25 سنه تشتغل ببنك مخطوبه لواحد يدرس برا واذا جاء بيتزوجون تقعد مع البنات بس مو كثير وقريبه لوسن اكثر

((الولد الوحيد بالعيله ناصر ومتعقد مرا عنده نادر اخوه بس نادر صغير عشان كذا ناصر مايتغطى عن البنات كلهم ويعدهن خواته))

ناصر: اف زهق (ولف للبنات) بنات تبونا نروح للبحر ؟
البنات بصراخ ماعدا وسن وفوز: ايه ايه
الجد بحده:قصرن اصواتكن
سكتن البنات وقعدن
ابتسم ناصر:بعد اذنك ياجد وابوي باخذ البنات ونروح نتمشى
الجد:خلاص روحوا
ابوناصر: بس خذ الهمر لان سيارتك ماراح تكفي
ناصر وهو ياقف:طيب (ولف للبنات) يلا
طبعا سديم وخواتها ماتشوفون الا غبارتهن مع اميره ماعدا ريوف تمشي بهدوء اما فوز ووسن ماقاموا
ناصر باستغراب:فوز وسن ماانتن رايحات؟
وسن زي العاده ماردت
ناصر وهو يخز وسن """صدق نفسيه هالبنت"
فوز:لا والله مالي خلق اروح أي مكان ووسن بعد بتقعد معي
ناصر ""يعني وش الغريب وسن 24 ساعه بالبيت"":اها براحتكم
وقفت اميره وساره وخواتها وراء ناصر:يلا
ناصر:يلا
((اطلعوا وركبوا بالهمر ناصر واميره قدام وباقي البنات وراء ))

ابتسام وهي تتامل بنتها وسن ""اعذريني ياقلبي ماقدرت احميك ماقدرت"" ..

** الـشـالـيـهـات ..

وقفت سياره فهد ونزلوا كلهم اتجهوا مها ونواره لداخل الشاليه اما فهد ومشاري وقمر صاروا يشيلون الاغراض ودخلوا

الجده:وينكم تاخرتوا؟
مها:لا بس سياره مشاري خربت
الجده: ايه
نواره:جده ماجت عمتي؟
الجده:توني مكلمتها تقول قريب من هنا
مها بفرحه: يس
الجده: وش تهببهين انتي
مها:ههههه ولا شي جده
جت تركض ريماز وقعدت بحضن امها وبزعل : ماما شفتي فهد هاوشني
ام فهد وهي تضم بنتها بقوه:ليش ياقلبي ؟
ريماز بكذب: ماسويت شي
الجده وهي تخز ريماز من الجنب:تكذبين انتي اعرفك ؟
ريماز اللي تخاف موت من جدتها نقزت من حضن امها وراحت تركض برا
ام فهد والجده: هههههه
حمودي جاء يركض وهو يصارخ :جت عمتي
تهاني اللي قاعده وماده بوزها
دخلت العمه حنان وبناتها وقفوا كلهم يسلمون عليها ..

.
اعـرفـكـم ع عـيـلـه الـعـمـه حـنـان ..

العمه حنان: 39 سنه مراه فله وفرفوشه وكل شي عندها فري وقريبه للبنات والقعده معها ماتنمل
البنت الاكبر لها:منى 20 سنه بنت فله زي امها بالتمام وجرئيه ومعجبه بفهد بس ماتحبه يعني مجرد اعجاب بشخصيته فقط
البنت الثانيه: خوله 17 سنه ثاني ثانوي ادبي بنت اخر همها الدنيا وعايشتها بالطول والعرض ماتتغطى عن العيال بحجه انها صغيره ودلوعه ..
((حنان ماجابت الا منى وخوله لان رجلها لما كان عمر خوله 9 سنوات مات بحادث وهي تشتغل بالرياض ببنك بس بعد فتره بتنقل للشرقيه عند اهلها)) ..

نواره ومها وهم يضمون منى وخوله ويصارخون
الجده: قصررن اصواتكن
ضحكت حنان:خليهن يمه (وبدا السلام والسؤال) ..

عــنــد الــبــحـــر ..

صارت تمشي قمر على اطراف البحر لحالها وضامه يدينها لصدرها "" اه معقوله فيه امل التقي باابوي؟ طيب اذا شفته وش بقول له؟ اكرهك؟ لالا اه بس صدق هذا احساسي والا بقوله ليش تركتني؟ لالا بيظن انه مهم عندي اه طيب عبدالعزيز لو شفته وش بقوله؟ (تحولت نظراتها لحقد وغضب) بتفل بوجهه الكلب "اطلقت اه مسموعه ووقفت تتتامل البحر وخصلات شعرها تتطاير ..

بـمـكـان مو بـعـيـد عن قـمـر

وقفت سياره ناصر ونزلوا البنات قعدوا بالارض اما ناصر راح يشتري اكل لهم
ساره بصوت عالي:بنات
لفوا كلهم لها: ايش ؟
ساره وهي تأشر: مو كأن هذاك الولد اللي شفناه الاسبوع اللي فات؟
اميره:الا والله هو ..
ريناد وهي تتامل قمر:بنات شكله حزين
ريوف بعطف:ايه صح
ساره وهي تاقف:تتحدوني اروح اكلمه ؟
ناظروا لها البنات بصدمه
ريوف وهي تشهق:مجنونه اقعدي مكانك بس
اميره: يلا يلا لو تقدرين روحي
سديم:ايه اتحداك
ساره:طيب بس وش لي؟
ريناد:اللي تبين
ساره وهي تبتسم بمكر:اللي ابي؟
الكل ماعدا ريوف: ايه اللي تبين
هزت راسها ساره شهقوا البنات ماتوقعوا انها تروح ..

وقفت ساره وراء قمر:احمم لو سمحت
لفت قمر لها وناظرتها ونزلت راسها: هلا
ساره:امممم اسمع انا بكلمك بجد
رفعت راسها قمر وناظرتها باستغراب: نعم؟
ساره بصوت اقرب للهمس:انا متحديه خواتي وبنت عمي اني اكلمك امم يعني قول أي شي عشان يعرفون اني قد التحدي
ابتسمت قمر وناظرت البنات اللي مو بعيدين مرا وهم واقفين ""ااه ياليتني عندي خوات وبنات عم"" : طيب
ساره بفرحه: يس ..

** الـشـالـيـهـات ..

فهد وهو ياقف
العمه حنان:وين رايح يمه فهد ماشبعت منك ؟
فهد:تسلمين والله بس تارك فارس برا
مشاري:ايه والله المسكين له ساعه
فهد: اقعد انت انا بروح (وطلع بس استغرب انه مالـقـاه بمجلس الرجال طلع ومشى شوي عقد حواجبه باستغراب وهو يشوف فارس واقف مع بنت ""من هذي؟""
خلني اروح له)

عــنــد قـــمــــر
ساره بابتسامه:مشكور (وراحت تركض للبنات)
ابتسمت قمر ورجعت لفت للبحر
فهد باستغراب : فارس
لفت له قمر: هلا
فهد:من البنت ؟
قمر باستغراب:أي بنت؟
فهد:االلي قبل شوي تكلمك
قمر بابتسامه:ايه لا بس هذي (وقالت له)
فهد: اها يلا امش
قمر: لا روح اقعد مع اهلك انا بقعد عند البحر شوي
فهد وهو يناظر لها بنظره اربكت قمر:ياانك عنيد قلت امش
ابتسمت قمر: طيب يلا

عـنـد الـبـنـات ..
اميره بصدمه:قسم انك غبيه
سديم بحماس: وش قلتوا؟
ساره:واو والله انه عسل
ريناد:ليش؟
ساره:ههه مدري كذا كلامه خطير المهم ابي حقي
ريوف:ههه جد خبله
ساره وهي تناظر ريناد بخبث:رنوده
ريناد بخوف:نعم؟
ساره:عطيني الايبود حقك
شهقت ريناد:والله لو تموتين يلا بس طيري
ساره:وش طيري انتي قلتي اللي ابي خلاص وانا ابي الايبود حقك
سديم:يلا رنوده عطيها تراها سوت شي جريء مرا
ريناد وهي شوي وتصيح:لالا ماابي
ساره:خلاص خلاص رحمتك ابي عشاء من المطعم وايه صح اميره تعزيمنا ببيتك ونام عندك
اميره بفرحه:احلى طلب والله ههههه خلاص اذا رجعنا لبيت جدي ناخذ اغراضنا ورغد ونروح لبيتنا ..

.
الـشـالـيـهـات ..
الــسـاعــه 10:40 لـيـلآ
بعد العشاء كلن راح غرفته طبعا البنات راحوا لغرفتهن

منى بحماس:يلا يلا مهوي قولي لي عن اللي تحبينه
تنهدت مها بحب وطاحت ع السرير وهي تحط يدينها ع قلبها:يخق
خوله بحماس: لهدرجه؟
نواره: يع بنات قسم كانه بنت مو ولد
منى:والله ماعرفنا لكن وحده تقول حلو و وحده تقول لا
انقزت نواره:عندي فكره
خوله: ايش؟
نواره:جدتي وعماتي ناموا صح؟
منى بتريقه: صايرن دجاج ايه
نواره:خلاص اجل نروح لمشاري ونقول له حنا طفشانين نبي نقعد معكم
خوله:تتوقعين يوافق يعني معهم صديقهم هذا
مها:ما اعتقد فهد يوافق نجلس مع مشاري بس فارس لا اف
منى:ماعليكم خلونا نروح لهم وبتشوفون
البنات وقفوا: يلا

عـنــد الـشـبـاب ..

كانوا قاعدين عند البحر وفارشين فرشه وحاطين قهوه وشاهي وفصفص وحوسه الشباب اللي تعرفونها

وقفت منى: السلام عليكم
ناظروا لها فهد ومشاري:هلا
منى: ممكن اطلب منكم طلب ((منى وخوله يمونون مرا ع مشاري وفهد))
فهد: اطلبي
منى بابتسامه:ممكن نقعد معكم؟
(وقبل مايقولون أي شي) قسم طفشانين الشاليه هذا اللي انتوا ماخذينه مافيه تلفزيون ومها نست تجيب المسجل طفشنا مافيه شي نسويه
نواره:ايه ايه تكفون
مشاري وهو يناظر فهد:خلاص اجلسوا بس مابي اسمع صوت لان فارس راح الحمام شوي ويجي
البنات بحماس اقعدوا:طيب
منى بهمس لمها: يوه متحمسه اشوفه
مها بحب: وانا بعد ..

دخلت قمر وماانتبهت للبنات لانها منزله راسها قعدت
فهد:فارس
رفعت راسها قمر وناظرت فهد:هلا
فهد بابتسامه:عطيني العود جنبك
قمر وهي تناظر العود سحبته:تعرف له ؟
فهد:اكيد عطيني
مدته لها وانصدمت لما شافت البنات بس لفت وجهها ..

منى وهي تتامله:فيه شي غريب صح ؟
مها:يخق
خوله:لا كانه بزر شوفي هو حلو بس مدري ما كانه جمال رجال
نواره بحماس:انا قلت لها كذا
مها: انطموا هذا لي لحالي
منى: ههه اشبعي فيه
بدا فهد يدق العود:وش تبون اغني؟
مشاري لف لقمر: فارس ذاك اليوم وانا داخل البقاله سمعتك تغني صوتك كان خطير غني
فهد:جد تعرف تغني؟
قمر بخوف: لالا وش اغني صوتي يجيب الهم
خوله وهي تصفق بجراءه: لا غن
ناظرها فهد وابتسم يحسها لسى صغيره وبتفكيرها بعد: يلا غن
قمر بخجل: طيب وش اغني؟
مشاري: اللي تبي
قمر وهي تتذكر انشوده تحبها تحسها تصف بعض حالها : طيب احمم (بدت تغني بااحساس واتقان)

***

مكتوب ومقدر كل شيء ترى مكتوب (من بدت تغني غمضت عيونها وهي تغني بكل حزن)

بس خلنا نصبر مثل النبي أيوب

نصبر على الأحزان ومفارق الخلان )تذكرت امها وعبدالعزيز)

نصبر على الغربة والشوق للأوطان

نصبر على الجروح والضيق والحرمان )تذكرت حرماانها وعذابها)

نصبر وهم نصبر والله وحده المستعان ) اضغطت بيدها بقوه بقهر)

نصبر ولو ملنا الصبر نصبر ونرضى بالقدر ( فكرت بقدرها والتعاسه اللي مكتوبه لها )

والوقت لو مهما قسى لا مالنا غير الصبر

والصبر مفتاح الفرج خلونا نحتسب الأجر

لإن الله سبحانه يقول الله مع كل من صبر

الله مع الأم الحزينة والله مع الزوجة الأمينة

والله مع المظلوم أكيد(فكرت بنفسها) والله على الظالم شديد (فكرت با ابوها وعبدالعزيز)

والله مع كل من يسافر وبغربته ربي يعينه

والله مع كل من يدافع عن أرضه وعرضه ودينه

والله مع البحار لامن هاج البحر بالسفينة

والله مع الكل والجميع سبحان من ماتغفي عينه ( ابتسمت باالالم بس خالطه شوي امل)

مكتوب ومقدر كل شيء ترى مكتوب

بس خلنا نصبر مثل النبي أيوب

* * *

فتحت عيونها بابتسامه خفيفه ع طرف شفتاها وبضحكه خجل وهي تحك شعرها:ههه قلت لكم صوتي يخرع
فهد بصدمه:فارس صوتك اا
مها دون شعور: يخق
لفوا لها بس انقذتها خوله وهي تصفر وشاركتها منى بتصفيق
خوله:ياخطير وربي شي
مشاري بابتسامه:ماشاء الله عليك ولا بعد غنيتها بااحسساس
ضحكت بخجل: هههه(دق جوالها وردت) هلا..
تحولت ملامحها الفرحه للملامح صدمه)
وبصوت اقرب للهمس:ايش اهدي اهدي ايه ايه انا بنفس المكان اللي قلته لك (طاح الجوال بحضنها وعيونها مثبته لقدام وصارت دموعها تنزل على خدودها)
كلهم انصدموا
فهد وهو يقرب لها: فارس وش فيك؟
مشاري:فارس تكلم من اللي كلمك وليش تبكي ؟
صارت شفايفها ترجف وناظرت فهد حاولت تتمالك نفسها بلعت ريقها وبصوت مبحوح مؤلم:مافيه شي (وقفت وراحت تركض باتجاه الشارع)
انصدموا فهد ومشاري وركضوا وراءها
وقفت مها وهي تحط يدها ع قلبها:وش فيه؟
منى بخوف:مدري خلونا نروح وراءهم
وقفت قمر وهي تمنع شهقاتها تطلع
مسكها فهد من كتفها ولفها: وش فيك ؟
قبل ماتتكلم قمر وقفت سياره تاكسي صغيره ونزلت منها بنت وركضت وطاحت بحضن قمر وهي تصيح بالالم:ااه اااا ااا ابوي راح راح
ضمتها قمر بقوه وصارت تبكي معها: بس نور بس
نور: ااه ااا صرت يتيمه صرت يتيمه ماقدرت اقعد بالبيت ما قدرت اشوف الناس يعزوني فيه ااه اا لا لا مو مصدقه انه راااح ااه
ضمتها قمر صدمه الاب الوحيد اللي عرفته مات مات دون ماتشوفه : ااه اا
نور:اا ااا وشلون اعيش دونه وشلون ااه ااا ماقدر مااقدر ابي اموت
مسكت وجهها قمر وبنفعاليه: وتتركيني لمن لا نور انا ماقدر اعيش دونك اه اا يكفي فقدت اب مابي افقدك (ورجعت ضمتها بقوه بلعت غصتها بقوه وهي تحاول تهدي نور) اسمعيني اسمعيني امك محتاجه لك انا محتاج لك وفواز وماجد تكفين نور لاتضعفين تكفين
هزت راسها نور وضمت قمر لصدرها اقوى:مو مصدقه ااه اا (بعدت عن قمر وهي تحرك يدينها بصدمه) كنت جايه ابي اقومه عشان صلاه الفجر ااه اا زي اا زي كل يوم بس مارد علي ليش مارد ناديته وحركته بس ما رد ااه ااا (وطاحت ع قمر بقوه) اااه رااااح رااح صررت يتيمه صرت يتيمه
قمر بحزن سيطر ع حياتها:كلنا يتامى يا نور كلنا مو بس انتي (مسكت يدين نور) اسمعيني انتي ع الاقل بقى عندك امك واخوانك شوفيني من بقى لي مااحد والا شوفي منيره من بقى لها غير امها تكفين يا نور اصبري احتسبي الاجر صدقيني كل اللي نعرفهم ماراح يفدونا مارح يفدينا الا اللي خلقنا هو وحده يعرف اللي بنفسنا لاتبكين لاتصارخين ولا تببرين لانه لو فاد صديقني كان فاد معي بس مستحيل يفيد مستحيل اصبري ..
شهقت نور وضمت قمر لصدرها وبصوت اقرب للهمس:لاتتركيني
قمر وهي تضمها:ماراح اتركك ..

اما فهد ومشاري والبنات ع راسهم ميه علامه استفهام ماهم فاهمين شي بس تاثروا بكلام قمر واللي صار للبنت
اما مها تبكي بقوه ركضت لداخل الشاليه وبالذات غرفه البنات وطاحت ع السرير تبكي ..

بــعــد ربــع سـاعــه
بعدت قمر نور عن صدرها:امشي نروح لبيتكم
نور اللي استوعبت اللي ممكن يصير لقمر بعد اللي شافوه والاسئله اللي بيسالونها: لا فارس انت اقعد هنا ماتقدر تجي لبيتنا اقعد انا برجع لحالي لا تخاف
قمر بحزن: بس
قاطعته نور:لا بس ولا شي بروح الحين بس انا كنت محتاجه لك والحين ارتحت لاتخاف اقعد انا بخير
قمر وهي تمسك يد نور:نور
نور وهي تبوس يد قمر:انا بخير (مسحت دموعها وركبت السياره التااكسي نفسه اللي جاءت فيه) ..

صارت قمر تتامل السياره لين اختفت نزلت راسها
فهد وهو يقرب:فارس ترانا مو فاهمين شي؟
قمر وهي تبلع غصتها وبهمس:ممكن تتركوني لحالي؟
فهد:بس
قاطعه مشاري وهو يحط يده على كتف فهد وبهمس:اتركه امش
ماكان وده فهد يتركها ناظرها وناظر مشاري هز راسها ومشى ..

مشت قمر ومشت ومشت و وقفت عند البحر بعيد عن الشاليهات شهقت بقوه وطاحت ع ركبها : ليش انا ليش كل ماابي اضحك ابكي ليش يا دنيا تكرهيني ليش ااه خلاص  تعبت تعبت اااه ااا اااااا ليش مامات ابوي والا عبدالعزيز ليش ما مت انا ليش يموتون الطيبين ليش امي تموت ليش الاب الوحيد اللي عرفته يموت اااه ليش ابو منيره يموت ليش يادينا تحرميني من كل اللي احبهم ليش (وبدا صوتها يهدى وطاحت كانها ساجده)ااه ااااا اااا(ارفعت راسها وهي لسى ع ركبها والاموااج اللي تضربها وصلت لبطنها)ااه اا(وبصوت يقطع القلب بصوت ضعيف انثوي تغلب عليه الحزن) استغفر الله العظيم يارب سامحني على الكلام اللي قلته يارب اللهم لا اعتراض ولكن ساعة ضعف يارب سامحني واغفر لي زلة لساني ..
فجأة وفقت وهي ترمي الرمل بقوه برجلها : بس ماراح اخلي ابوي وعبدالعزيز يتهنون بحياتهم من اليوم راح اقسي نفسي (وبدا صوتها يهدى) بس وشلون (امسكت السلسال اللي برقبتها ورمته بعيد على الرمل ) ااه اا حاولت انسى اللي سوه فيني ابوي وعبدالعزيز بس ماقدرت يمه ما قدرت وشلون نسيتي اللي سواه ابوي فيك ياليتك يايمه كذبتي علي وقلتي ان ابوي ميت ياليتك يايمه كان صار عندي جرح واحد بدال جروح اااه  .
قعدت ع الارض  سمعت قمر صوت اﻷذان تنهدت قمر و وقفت و حطت يدينها وراءها تمسح التراب اللي لصق فيها من الماء كانت منزله راسها وهي تتدور بعيونها بالارض عن السلسال شافته سحبته وفتحته ابتسمت بالالم كانت صوره امها قبل ما تموت عطتها كانت صور لامها وابوها واقف جنب امها وبينهم عبدالعزيز اللي كان عمره سنه تقريبا كانت بذاك اليوم اول مره تشوف فيها ابوها اول مره تشوف وجهه فيه شبه من عبدالعزيز وكان السلسال ع شكل قلب ينفتح رجعته برقبتها ومشت ..

يــوم جــديــد..

الــسـ7:30 ص ـااعـــه
بـــيــت ابـونـاصــر
وقفت اميره عند طاوله الطعام وهي تمسح فمها بالمنديل: يلا (وباست خد امها وابوها) بايو ادعوا لي
امها وابوها:الله يوفقك يابنيتي

طلعت اميره وركبت السياره وهي تكلم سوسن:اف مابغى هالدكتور يتكرم ويخلينا نجي مالت عليه ودي اشوفه عشان افقع وجهه ..
سوسن:ههههه حلوه افقع وجهه المهم لاتتاخرين تراه يقولون مايحب التاخير
اميره بقهر: بعد خوش والله بيجلطني هذا الدكتور الحين الناس بادين يطبقون لهم اسبوع وحنا توه يتكرم يقول تعالوا ولا بعد مايبينا نتاخر
سوسن:هههههههه قسم لو تشوفينه يااميره يخق يذبح عليه طول واو
اميره:تعالي انتي متى شفتيه؟
سوسن:امس رحت عشان بشوف نداوم وشفته يمه يا امور يهبل يهبل
اميره:ايه ايه وش فايده الزين والاخلاق بالارض؟
سوسن:ههه بهذي صدقتي يلا اشوفك بالمستشفى بايو
اميره:بايو

الــشــالــيــهــات ..

غـــرفـــه الــبــنــات
منى:ياقلبي يامها بفهم ليش تبكين نمتي وانتي تبكين قمت تبكين ؟
مها بضيق:فارس
نواره باستغراب:وش فيه؟
مها بعصبيه:ما شفتوه كيف يضم هذيك البنت ويمسكها هاه وشلون بكى عشانها (واشرت ع نفسها) وانا مااهتم لي ابدا" ..

ضحكت منى وضمت راسها وضربت ظهرها:ههه الحين مسويه لنا عزاء عشان كذا ؟
مها بدلع:ايه
منى:هههههه ولا يهمك وين بيلقى زيك؟؟
خوله وهي تحرك بلوزتها:اليوم حر ماكاننا بشتاء
منى وهي تبعد مها وبتتطنز: متى صارت الشرقيه برد ؟
نواره:عندي فكره
كلهم:ايش؟
نواره:نقول لمشاري وفهد نبي نركب طراد كل ثنتين بواحد
خوله بحماس:ايه ايه نبي نبي
منى:قوموا نقول لهم
قفوا كلهم وسحبت منى مها بقوه وطلعوا

غــرفــه الــشـبـاب ..

مشاري واقف سكر اخر ازرار من بنطلونه وسحب بلوزته بيلبسها بس اللي فتح الباب بقوه ودخل لف وجهه باستغراب

كانت اول البنات مها لان منى قالت لها ان اكيد مافيه الا فهد ((متعودين مشاري يصحى بدري بعكس فهد))
بلمت مها بخجل من شكل مشاري اللي بس لابس بنطلون نزلت راسها بخجل ولفت تبي تطلع بس صوت مشاري وقفها
مشاري باستغراب: فيه شي مها؟
مها وهي معطته ظهرها وبصوت اقرب للهمس:لا(وطلعت)
لبس بلوزته بسرعه وطلع شاف البنات ميتين ضحك ومها شكلها معصبه من وقفتها ابتسم لانه توه يستوعب ان مها شافته كذا واستحت: وش فيكم؟
نواره:تكفى مشوري نبي طراد اسمع كل ثنتين بواحد تكفى تكفى
خوله:ايه الجو اليوم مرا حلو ماهو برد نبي ننبسط شوي
مشاري:خلاص اوك بس ماشفتوا فهد و فارس؟
نواره:لا
مشاري:خلاص امشوا معي نقول لفهد وفارس يمكن يبون يركبون
البنات بصراخ:هيييهه
مشاري:ههههه اللي يشوف صراخكم يقول اول مره تركبووه امشوا بس
ضحكوا البنات ومشوا وراء مشاري

مـسـتشـفـى الانـتمـاء ..

دخلت اميره وهي مستعجله لانها تاخرت شوي كانت منزله راسها وتناظر ساعتها حست انها صدمت شي قوي وطاحت على الارض شهقت وحطت يدها ع راسها: ايي (ورفعت راسها وبشويه صراخ كله عصبيه): اعمى ماتشوف انت ؟
ناظرها بطرف عينه:خير؟
اميره وهي تاقف:بغيت تلصقني بالجدار وتقولي خير صدق ناس وقحه بدال ماتقول اسف تقول خير قسم بالله انك ماتربيت
بعصبيه وبصوت عالي شوي:لاتتطولين صوتك علي لايجيك كف يخليك تعرفين من تكلمين
شهقت اميره بقهر:نعم نعم من يعطيني كف (واشرت باستحقار عليه واستهزاء) انت هيه انت اصلا تعرف انا بنت من عشان تكلمني كذا (حست اميره بيد سحبتها من وراء لفت وشافت سوسن ومعها البنات والشباب اللي بيطبقون معها)
سوسن بخوف:الله يأخذك انتي تعرفين ان هذا هو الدكتور رامي؟
فتحت اميره عيونها بصدمه بلعت ريقها ولفت له وبابتسامه غبيه:ههه انت الدكتور رامي؟
كتف يدينه وناظرها من فوق لتحت: ايه
لفت اميره وضربت سوسن من كتفها:ليش ماقلتي لي انه هو نفسه الدكتور ..
سوسن:وش درااي عنك اكلتي الرجال بقشوره
رفعت خشمها اميره بشويه غرور: بس بعد هو الغلطان
رامي:سوسن من هذي؟
سوسن:ههه هذي هذي اميره معنا
رامي:اهااا (وقلد حركتها وهي تاشر عليه) انتي يعني بنت تطبيق معي؟
اميره بقهر وهي عاضه ع اسنانها وودها تذبحه:ايه
ابتسم بمكر:ماعرفتي مع من لعبتي
ناظرته اميره بصدمه وهي مفهيه
ناظرها من فوق لتحت ولف ع الطلاب: كلكم وراءي اكمل لكم
مشوا كلهم ماعدا اميره اللي لسى ترمش بعدم تصديق من اللي قاله حست بالمكر بصوته
سحبت سوسن اميره معهم وبهمس:امشي وادعي الله انه ينساك ..

بــيــت نــور ..

بيت ملاه الحزن فجاه ودون سابق انذار فقدوا عمود البيت العمود اللي يضمهم ويحميهم العمود اللي يستندون عليه راح فجاه
صعبه ابوك يموت بين يديك والاصعب ان ابوك يموت دون ماتكونين حاسه وصعبه يموت ابوك وانت بعز فرحتك فيه ماكانت تظن انه يموت بس الاعمار بيد الله

غـــرفــه نــور ..

كانت تبكي وهي لامه رجولها لصدرها فوق السرير وجنبها منيره اللي لها ساعه تحاول تاكلها بس ماقدرت ابدا
منيره بحزن على حال نور وهي تمسح ع كتفها:نوري خلاص خلاص تكفين ماتعبتي من البكي على  بالك لو بكيتي بيرجع صدقيني لو بالدموع بيرجع كان كلنا بكينا عشان يرجع نور هو ماكان بس ابوك لا كان ابوي وابو قمر ااه وكلنا فاقدنا حسه وحنانه بس هو مايبي الحين منا غير الدعاء بس
شهقت نور بقوه وطاحت بحضن منيره:ااه ااا ااا فقدته يامنيره فقدته ا اه فقدته
بلعت غصتها منيره وضمت نور بقوه:كلنا فاقدينه قولي الله يرحمه ويغمد روحه الجنه
نور بهمس قطعه شهاقها:اللـ ـ الله يـ ـ ـ ـيررحمه ااه ااا
منيره بابتسامه خفيفه وهي تسحب صحن الرز وتمد الملعقه : يلا اجل كولي
هزت راسها نور وهي تمسح دموعها وبصوت راح من كثر البكي:وين امي ماشفتها
منيره بضيق:بغرفتها ومرا تعبانه ومتضايقه عشانك
نور وهي تاقف:بروح اشوفها
هزت راسها منيره و وقفت معها واتجهوا لغرفه ام فواز ..

** الــشــالــيــهــات ..
كانوا قمر وفهد يمشون على حواف البحر وكلهم ساكتين
فهد:احمم
لفت له قمر وناظرته باستغراب حسته بيقول شي ابتسمت لانه لاحظت هذا الطبع بفهد اذا يبي يقول شي بس مستحي يقعد يتنح لفت للبحر وبصوت هادي:قول اللي عندك
ابتسم فهد ولف يناظر البحر:ااامم البنت اللي امس(وقف ولف لقمر) من وين تعرفها ؟
وقفت قمر وعطت فهد ظهرها ولمت يدينها لصدرها وببتسامه خفيفه:البنت (تذكرت ايام الطفوله لما كانوا يركضون هي ونور ومنيره وعبدالعزيز وراءهم وقدامهم فواز وصوت ضحكات الطفوله ترن باذونها) ااه هذي اختي وحبيبتي وصديقتي وكل شي بحياتي هذي الانسانه الوحيده اللي وقفت معي بوقت ماوقف معي احد بوقت ابوي وامي تخلوا عني ضمتني لصدرها وقالت لي (ابتسمت بالالم وهي تتذكر كلام نور) انتي صح خسرتي ناس غالين عليك بس بقى لك انا (وبحماس وحب بالكلام) اشرت ع نفسها وقالت شوف لو تخلى الكون كله عنك انا بظل متمسكه فيك اذا ماقدرت بيديني بتمسك فيك بقلبي وروحي قالت لي ان ضعفتي انا بضعف قالت لي (وبابتسامه امل بعيد) فارس (طبعا نور قالت قمر بهذاك الوقت) انت مصدر القوه بالنسبه لي من انا طفله قالت لي لما كانوا (ضحكت بخفه) اولاد الحاره يضربوني تمسكهم وتضربهم بعدين تمسك يدي ونهرب للبيت هههه قالت لي حياتنا مكتوبه لنا وايش دراك يمكن بيوم كل شي يتغير هههه هي امي وابوي واختي وكل شي بحياتي (لفت لفهد وبابتسامه) عرفت من هذي البنت (لفت للجنب وشافت مشاري ومعه البنات ابتسمت لهم) ..

مشاري وهو يقرب لها سحب راسها بقوه:هاه وشلونك الحين ؟
ابتسمت قمر واسحبت نفسها:بخير
لفت منى تشوف مها بعد الكلام اللي سمعوه شافت عيونها امتلت دموعها ضغطت ع يدها بقوه
خوله بحماس:فهد نبي نركب طراد تكفى
فهد:تبون تدخلون البحر بالهبرد؟
نواره:لا اليوم حر يلا فهود مشاري وافق
ناظرها فهد بضحكه:ههه فهود بعينك خلاص طيب (ولف للقمر) تركب معنا
قمر بسرعه:لالا ماعرف اسوقه
فهد:خلاص تركب وراءي انا اعرف
قمر بخوف:لالا مابي
مشاري:انا بروح احجز بنات تعالوا
مشوا البنات وراء مشاري وهم مبسوطين ماعدا مها بعد الكلام اللي اسمعته من فارس

فهد:وش لا بتركب غصبا عنك فاهم
قمر بزهق طفولي : ماابي كل شي تغصبني عليه
ضحك فهد ع حركتها:ههههه ايه غصب عنك امش يلا ولا ترا بزعل عليك
ناظرته قمر ""تزعل علي؟؟"" : اف طيب طيب يلا بس شوف مانطول بس شوي
فهد:طيب بس شوي ..

وقفوا وركب مشاري لحاله نواره مع خوله ومنى مع مها
فهد وهو يركب لف لقمر:يلا
قمر بخوف: اف مابي
فهد:اقول امش ما انت طايح امش
هزت راسها قمر وركبت وهي ميته خجل اول مره تصير قريبه مرا من فهد كذا
لف لها فهد وناظرها بطرف عينه:الحين ليش ماتمسكني والا تبي تتطيح
سكتت قمر وخدودها مولعه وهي منزله راسها
مسك يدينها فهد ولفها حول خصره وانطلق
اول ماانطلق فهد مسكته بقوه لانها حست انها بتتطيح """ييمه ياقلبي ليش يدق كذا اف اكيد عشاني قريبه منه كذا"" شهقت بخوف:فهد خفف السرعه
فهد وهو مبسوط على الاخر: ههههه لالالالا بسوي لك حركه خطيره
قمر بخوف:لالالالا ماابي حركه خطيره
ماهتم فهد لها و سرع بااقوى شي ورفع الطراد فوق وهو يضحك
اما قمر حست بالسلسال اللي برقبتها انفتح فكت يدها بسرعه عن خصر فهد ومسكته قبل مايطيح زلت يدها الثانيه وصرخت وهي تتطيح بالبحر بقوه
رسى الطراد بالبحر لف فهد وانصدم وهو يلف وماشاف فارس صرخ بخوف وهو ياقف بس رجلينه لسى ع الطراد ""لو صار له شي ماراح اساامح نفسي"":فارس فارس
وقفوا مشاري والبنات حولهم بسرعه لانهم شافوا فارس وهو يطيح
اما قمر شهقت بقوه وهي تتطلع راسها من الماء:فهد
انتبه لها فهد وطب بالبحر وطلعها تحت صراخ البنات اما مشاري طب مع فهد وساعده حطوا فارس ع طراد فهد فهد وهو يطق خدها:فارس فارس فارس رد علي
مشاري بخوف:خلنا نوديه للشاطي
هز راسه فهد وحطها بحضنه ومشى فيها للشاطي وكل البنات وراءهم بخوف اما مها تبكي
وصلوا ركض فهد وهو شايلها حطها ع الشاطي وصار يضغط ع بطنها ((فهد اشتغل فتره بالهلال الاحمر وعنده خبره بالاسعافات الاوليه))
مشاري بخوف:انا بنادي عمي (وراح يركض للشاليه)

صار يضغط فهد بقوه ع بطنها ""انا السبب انا اللي اصريت عليه يركب وهو يضغط بقوه
ومها تبكي بخوف ونواره ضمتها وهم يناظرون له بخوف
وقفوا ابوفهد ومشاري الحريم بصدمه من اللي سواه فهد
فهد اللي اخذ نفس قوي ومسك خشم قمر وحط شفايفه على شفايفها وهو يعطيها تنفس صناعي
كلهم بلموا بصدمه من حركته
رفع راسه وصدره يرتفع وينزل ضغط ع بطنها بقوه مره ومرتين ورجع ثااني مره وعطاها تنفس صناعي ورفع راسه يناظر لها
كحت على خفيف وهي تتطلع ماء من فمها اهتزت كتوفها بضعف
ابتسم فهد وشالها:بوديه المستشفى
مشاري وابوفهد:بنجي معك
ركبها فهد سيارته وساق باسرع ماعنده اما مشاري وابو فهد ركبوا بسياره ابوفهد ومشوا وراءهم ..

** مـسـتـشـفـى الانتـمـاء ..

وصل فهد ودخل الطوارى وهو شايلها ركضوا له الممرضات وحطوها بالسرير ودفوها وهو يركض وراءهم ..

جت ممرضه تركض و وقفت قدام الدكتور رامي:دكتور فيه حاله جايه غرق بالبحر ولازم تجي لانك الدكتور الوحيد الموجود بالطوارئ
هز راسه رامي ولف للطلاب: يلا امشوا هذي اول حاله بتشوفونها (ومشى بسرعه وهم كلهم وراءه بحماس)

كان واقف فهد وهو خايف رايح جاي بالممر دق جواله ورد:هلا مشاري
مشاري بعصبيه:الطريق مرا زحمه وشلون عديت انت؟
فهد:والله مدري كل اشاره قطعتها ودخلت الحارات
مشاري: اف انت بمستشفى الانتماء؟
فهد:ايه
مشاري:خلاص نص ساعه بالكثير وحنا عندك واسمع طمنا اذا طلع
فهد:طيب (وسكر السماعه لف وشاف مجموعه دخلوا وما انتبه للدكتور اللي سبقهم)
اتجه رامي لقمر وبدا شغله بس فجأه بدا صوت دقات القلب تعلى
لفوا كلهم للجهاز بخوف
صرخ رامي:جيبوا الجهاز بسرعه
جابت ممرضه الجهاز بسرعه وعطته الدكتور
رامي وهو يشحنه:بعدوا
بعدوا كلهم ورجعوا على وراء
رامي وهو يكلم الممرضه بصراخ:افتحي بلوزته
هزت راسها الممرضه و فتحت البلوزة ..

#يتبع.....

#التوقعات...

🍃 ياترى وش ردة فعلهم بعد ما شالت الممرضة البلوزة ؟

🍃 ليش ابتسام تركت زوجها ووش فيها وسن؟

🍃 اميره وكرهها لرامي وين بيوصل؟