رواية أكابر و اقول فراقه عادي و انا في داخلي اصرخ تكفون جيبوه الفصل الرابع عشر 14 - بقلم HaboOoshy

بــــيـــت نــــور
وقفت سياره فواز قدام البيت ولف للبنات: منيره تبين اوصلك لبيتك؟
نور وهي تلف لمنيره وبحماس:لا منيره يااقلبي تكفين نامي عندي اليوم
منيره:اا بس
قاطعتها نور:يلا يلا منور تكفين
سكتت منيره شوي بعدين قالت:طيب اكلم امي اقولها
نور بسرعه وهي تبتسم:قلت لها قبل
منيره:ههه يعني واثقه اني كنت بوافق؟
هزت راسها نور بطريقه طفوليه:اكيد ههههه
ابتسم فواز وانزلوا كلهم للبيت

الــمـــزرعــــه
بعد ماخلصوا او بالاصح تعبوا من كثر مايغنون صار الكل يسولف ويضحك ماعدا قمر اللي تتاملهم وكانها تبي تشبع عيونها فيهم
صار فهد يتاملها بهدوء صار يمسح ع يدها اللي ماسكها بحنيه وبهمس:وشفيك؟
ناظرته قمر بتامل وتتدقيق وبنفس الهمس:اوعدني انك ماتتخلى عني اوعدني تبقى معي لاخر نفس بحياتي بس تكفى اذا ماتقدر توفي بوعدك لاتوعدني خايفة (لفت وجهها وصارت تناظر ابوفهد وام فهد والبنات ومشاري والجده) خايفه افقدهم (نزلت راسها شوي بعدين رفعته) خايفه افقدك
بلع ريقه مايستحمل يشوفها كذا خايفه ضايعه ابتسم:قمر اوعدك اني ماتخلى عنك زي ما سوا ابوك وعبدالعزيز اوعدك اوعدك اني ابقى معك لااخر نفس (توسعت ابتسامته) حتى لو بيوم تفرقنا ابيك تعرفين اني هنا فاهمه انا جنبك وين مارحتي اعرف ان روحك جنبك وتحميك فاهمه؟
ناظرت قمر عيونها وهزت راسها بلعت ريقها ولفت وجهها عنه وسحبت يدها وحطتها بحضنها وهي ودها تصرخ باعلى صوت وتقول فهد احبك
ناظرها فهد بحب وابتسم ولف وجهه وهو يفكر بالمستقبل""وشلون اقول لابوي وشلون اواجهه مشاري (لف وناظر قمر لثواني) بس عشان هالعيون كل شي بيهون (لف وصار يتامل اهله ابتسم بقوه وراحه)
خوله بصوت عالي: فارس فارس
رفعت قمر راسها وطبعا بصوت رجولي:هلا
خوله:تكفى تكفى غن اخر اغنيه
منى:ههه يعني خاتمه هاه؟؟
خوله:هههه ايه يلا فارس
سكتت قمر شوي بعدين قالت:امم طيب (رفعت راسها وهي تناظر فهد وبدت تغني): 
 
أوعدني عني ما تغيب
تبقى هنا جنبي قريب

بـــيـــت خــالــد الــراســي
دخلت اميره ووراءها الشغاله شايله اكياس سلمت ع ريوف ورغد ولفت للشغاله:خوذيهم للمطبخ رتبيهم وجيبوهم هنا
الشغاله:اوك (ومشت)
اميره بابتسامه:الا وين ساره وريناد؟
دخلت ساره ووراءها ريناد ع اخر كلام اميره:هذا حنا
لفوا كلهم لساره وريناد ووقفت اميره تسلم عليهم وجلسوا
ريوف:يلا تكلموا وشفيكم تاخرتوا؟
صارت ساره تقولهم كل شي صار من البدايه:واخر شي قال بوصلك لسيارتكم ووصلنا وحنا مشينا وهم بعد مشوا
اميره:ماشاءالله صدق رجال
ريوف بحماس:صادقه اللي مثل هذا النوع الحين انقرض
ساره:هههه وش انقرض حيوان هو؟
اميره ببتسامه:ريناد وشفيك؟
ابتسمت ريناد ع خفيف ووقفت:ولاشي اميره ممكن ارتاح بغرفتك شوي؟
اميره بسرعه:اكيد تفضلي
بعد ماراحت ريناد لفت ريوف لساره وبخوف:وشفيها ريناد؟
ساره وهي  تنزل كوب العصير:مدري والله عنها
ابتسمت رغد ببلاهه:يمكن تحب هذا اللي اسمه فواز؟
ضربتها ريوف من راسها:عمى وش حب وماحب مافيه شي اسمه حب فيه زواج تقليدي بس
رغد وهي تحط مكان الضربه:أي طيب طيب اف
ابتسمت اميره بهدوء:ليش ريوف (ومن قلبها) فيه حب
ناظرتها ريوف بتامل""حب يااميره أي حب حب مثل حبك لرامي واحد خاين لالا هذا ماهو الحب""
عم الهدوء المكان فتره بعدين انقزت ساره وبابتسامه واسعه: قومواا نلعب بالرشاشات
عجبت الفكره رغد وريوف وقفوا بس قبل ماتقول أي شي اميره سحبوا يدينها وهم يركضون ويضحكون
وهم طالعين للحديقه اميره:الا تعالوا وين سدوم؟
ساره:كالعاده الشيخه بالشركه
ضحكت اميره وكملوا طريقهم للحديقه

شـــررركـــه خــالــد الــراســي
مــكــتــب خــالــد
كان فتح ملف صفقه ابوضاري (ابونوف) ويناظر باسماء الاعضاء وتذكر عبدالعزيز فيه شي جذبه لهذاك الشاب بس مايدري وش هو ""خلني ادور اسمه"" صار يدوره بيده لين وقف عنده وهو يقراءه:عبدالعزيز عبدالرحمن السمار ""اول مره اسمع بهذي العيله شكله مو غني بس ليش ابوضاري يشغله معه غريبه""سكت ورجع يكمل شغل الصفقه بهدوء

بـــيــــت نـــــــور
صار الجرس يدق بشكل مستمر ومعلق وكان فيه مصيبه نزل فواز يركض من فوق و وراءه نور ومنيره اللي طلعوا من غرفه نور وام فواز وهي تتطلع من المطبخ:وشفييه ؟
فواز وهو يركض: مدري خليكم هنا
ركض ماجد من الدرج وبعد نور اللي كانت بوجهه وركض لبرا
وقفن البنات حول ام فواز بخوف
نور: يمه وشفيه؟
ام فواز وهي تدف نور:روحي بسرعه جيبي طرحتي
هزت راسها نور وراحت تركض اما منيره تقدمت لين صارت مقابل باب المدخل وفتحته ع خفيف وهي تناظر بعيونها لباب الشارع

فتح فواز باب الشارع وتوسعت عيونه بصدمه:عبدالعزيز؟
رفع راسه لفواز والدموع تمشي ع خدوده بس ماشاف فواز بشكله الحالي لا شافه فواز ابو 12 سنه وبصوته البسيط الاقرب للنعومه وهو يمد يدينه له شهق عبدالعزيز:فواز
بلع ريقه فواز ونفس الشي ماشاف عبدالعزيز الرجل الخاين الغدار لا شاف عبدالعزيز ابو 11 سنه لما كان يتضايق يجي ويرتمي بحضنه فتح يدينه له بدون شعور
رمى نفسه عبدالعزيز بصدر فواز:ااه فواز سامحني
بلع ريقه فواز وهو يلف يدينه حول ظهر عبدالعزيز وكأن الطفوله رجعت نفس الحركات نفس الكلام وبهمس:اهدا اهدا(وبضيقه) اهدا وانا اخوك
غمض عيونه عبدالعزيز اكثر ياالله قد ايش اشتاق لهذي الكلمه؟

اما اللي كانت واقفه عند الباب توقعت أي شي أي شي الا انها تشوفه شهقت وبدت دموعها تنزل مو عشانها شافته لا ولا عشان اشتاقت له لا عشان الطفوله رجعت وكأن الزمن دارى ورجعهم لـ10 سنوات وراء نفس الموقف يتكرر ايه نفسه عبدالعزيز يتضايق ويجي يبكي بحضن فواز وهي تراقب بس اللي اختلف شي واحد انها اول كانت تركض له وتمسح ع ظهره وهو بحضن فواز بس الحين مااتقدر ماتقدر
ام نور وهي تفتح كل الباب وبعدت منيره وقفت:عبدالعزيز؟
نور وهي تمسك منيره:منيره انتي بخير؟
كانت منزله عيونها بالارض شوي ورفعتها:كل شي يتكرر يانور كل شي
ضوقت عيونها نور وبلعت ريقها وضمت منيره:بس ياحياتي بس

5دقايق وهدا عبدالعزيز وبعد عن فواز وهو يمسح وجهه بكفوفه وكانه ولد صغير وبهمس: اسف بس مافكرت الا فيك ادري اني غلطان ااه بس (رفع راسه وناظر عيون فواز) ماقدرت افكر الا بكذا سامحني
صار فواز يتامل الاخ والصديق وتوام الروح ايه هذا هو هذا هو بس اللي جاء قبل ماكان عبدالعزيز اللي يعرفه
لف عبدالعزيز وهو يعطي فواز ظهره ويناظر باب الشارع المفتوح ع كبره والحاره باينه وبهمس:اسف اني جيت (بس قبل مامشي حس بيد صارت ع كتفه وقفته)
فواز وهو يمسك كتفه تنهد بقوه:انتظر امش ادخل
سكت عبدالعزيز وهو منزل راسه لف جسمه وناظر فواز:متاكد؟
ابتسم فواز ع خفيف:اكييد امش نتكلم (لف لماجد) قل لنور تجهز القهوه والشاهي بسرعه
هز راسه ماجد وراح يركض لداخل
فواز وهو يمد يده للمحلق اللي باخر الحوش:تفضل
ابتسم عبدالعزيز واخذ نظره سريعه ع الحوش والبيت تنهد كانه ماغاب ولا يوم كل شي زي ماهو ماتغير هز راسه وصار يمشي للمحلق وراء فواز

دخلت ام فواز للمحلق والدموع تنزل ع خدودها:يمه عبدالعزيز
رفع راسه ووقف بسرعه وباس راسها ويدها:سامحيني يمه
صارت ام فواز تمسح دموعها هي تعتبر قمر وعبدالعزيز اولادها مسحت ع شعر عبدالعزيز:مسامحتك يمه مسامحتك (جلسوا وصاروا يسالفون بهدوء بعدين وقفت ام فواز وطلعت تبي تخليهم لحالهم)
نزل فواز فنجان القهوه وهو يناظر عبدالعزيز يبيه يتكلم من نفسه مايبي يضغط عليه ابدا
بلع ريقه عبدالعزيز وهو يناظر الارض شوي ورفع راسه وصار يتامل الملحق:غيرتوا الاثاث؟
فواز بهدوء وهو عيونه لسى عليه:ايه
سكت عبدالعزيز شوي بعدين قال: ادري اني غلطان وان الكل زعلان مني وانا ماالومكم بس انا سويت كل هذا عشان قمر وعشانكم
قطع كلامه فواز وبلهجه حاده:وين رحت ومن وين جبت كل هالفلوس؟
صار يحط يدينه بارتباك رفع راسه وناظر فواز بعدين رجع يناظر يدينه:بطيح من عينك
فواز بهدوء يجرح:طحت منها من زمان
رفع راسه بصدمه وهو يناظر فواز:فواز
بس ملامح فواز كانت جامده ظاهريا بس:تكلم
تنهد عبدالعزيز وعض ع شفته السفليه وهز راسه:ااه طيب ماقدرت اشوف امي تموت قدامي ومااقدر اسوي أي شي ماتت قدامي وماتت قمر معها ااه ايه خفت خفت اني اتحمل مسوؤليه قمر لحالي ماقدرت استحمل ماقدرت ارمي التراب ع وجهه امي قررت اختفي اروح أي مكان بس كنت ابي ارجع وربي اني كنت اقول بنفسي يومين بس و أرجع بس
قاطعه فواز: هاليومين صاروا سنتين صح؟
رفع راسه وناظر فواز هز راسه وكمل:كنت امشي بدون أي هدف وانا ماشي دخلت حاره قديمه مرا وشفت اثنين بااخر الممر يتبادلون شي الاول عطاه اوراق والثاني اخذ فلوس ولما شافوني خافوا وهربوا بس انا تبعتهم ومسكت اللي اخذ الاوراق سالته وش هذي بس رفض يتكلم وحاول يضربني ااه ادري انه ماكان لي دخل بس فيه شي بداخلي قالي ان ممكن استفيد ..

كان الولد صغير وصرت اجر الكلام منه وسحبت الاوراق ولما فتحتهم كانوا اوراق حسابات عرفت انهم كانوا يسرقون من شركه كبيرة وان فيه احد عطاه فلوس عشان يسرقون هذي الشركه ولما سالته ليش قالي مدري حسيت ان هذي الاوراق بتفيدني فقال لي وشرايك نسرق هذا الرجال انصدمت وقلت له وشلون قالي تودي هذي الاوراق له بعد ماننسخها وتعطيه النسخ كانك لقيتها واكيد انه بينبسط وبيحط لك مكانه عنده خفت وقلت له لا اكيد بس بياخذ الاوراق بعدين اخاف يعرفني قالي لا لاتخاف نزور بطاقه جديده لك اسم جديد ونحاول نغير شوي بشكلك يعني قصه شعر ولحيه غير خفت وترددت بعدين قلت واذا أخذ الاوراق وعطاني مبلغ بس قالي لا انا اعرف هذا الرجال وقال كل مبلغ تاخذه منه لي الربع (تنهد بقهر وشد ع قبضه يده وبانفعال) مسكني من اليد اللي تعورني اااه كنت باامس الحاجه للريال وافقت وبدا يزور لي هويه جديده وعطاني سياره فخمه وملابس ماركات وكانني ولد اغنياء وزور لي شهاده جامعيه بتخصص اداره اعمال من جامعه بامريكا وبداينا ننفذ الخطه رحت للشركه وكان اسم الرجال ابوضاري (غمض عيونه شوي بعدين فتحهم) كان طيب حيل وصدق ع طول وقالي بشغلك عندي طبعا بالبدايه كاني رفضت واني مااحتاج فلوس بما ان ابوي وامي ماتوا وورثوا لي كل فلوسهم ايه هذي كانت لعبه ااه فااصر علي وبديت اشتغل معه وقررت ابتعد عنكم عشان اقدر اوفر فلوس وبيت لي ولقمر ااه وبعد سنه وكم شهر قالي هذا الشاب اننا ماصرنا نكسب فلوس زي قبل فقلت له وش نسوي قالي اخطب بنته نوف ووو ااه (غمض عيونه بقوه) ووافقت وصدق خطبتها وملكنا قبل شهرين (بدت تنزل دموعه من جديد) الفلوس اعمتني عن كل شي كل شي تتدري من شفت امس شفت ابوي ايه قابلت ابوي وجها لوجه ااه بس عشان اكمل لعبتني ماقدرت اقوله انا ولدك

كانوا نور ومنيره يتسمعون من اول مابدا يتكلم بس من قال انه خطب نوف توسعت عيونها بصدمه ونزلت للارض ودموعها تنزل بقوه كل شي تقدر تستحمل انه يطلع خاين غدار حرامي كذاب أي شي أي شي الا انه ياخذ غيرها شهقت بقوه صدمة هزتها هزت طفولتها هزت مراهقتها هزت الحب اللي كل يوم يمر يكبر اكثر واكثر ويبنى ع احلام وتخيلات غطت وجهها بيدينها وهي تشاهق تمنت انها ماتت ولا سمعته يقول كذا لما شافته داخل وفواز يضمه قالت خلاص كل شي رجع زي قبل وقمر بترجع وبيعشون حياتهم زي قبل بس لا لان ليس كل مايريده المرى يدركه
نور وهي تضم منيره بقوه:بس ياقلبي بس هو مايستاهلك يالتني ماخليتك تجين هنا وتسمعينه يقول كذا بس ياروحي بس هدي هدي ..

بــــيـــت خـالــد الــراســي
معاذ وهو يسكر لاب ناصر:اقول ناصر
لف له ناصر:هلا
معاذ:ليش مانطلع للشاليه يعني اقصد اهلي مع اهلك؟
سكت ناصر شوي بعدين ابتسم:والله فكره ونقول لعمي بعد يجي هو وبناته
ابتسم معاذ بفرحه ""وهذا اللي ابيه"": ههه ايه ايه خلاص قلهم الخميس هذا تعالوا شاليهنا
ناصر ببتسامه:خلاص صار

بـــيـــت حـــــلا
يـــوم الــزواج
وقفت حلا وهي تناظر نفسها بالمرايه بفستانها الابيض اللي اختارته لها شهد تنهدت ورفعت راسها  صحت ع صوت شهد
شهد بابتسامه:حبيبتي يلا زوجك ينتظرك تحت عشان تروحين معه الفندق وحنا بنروح للقصر
((حلا رفضت تسوي زفه فقالوا يجي سلمان ياخذها من البيت بعدين يطلعون للقصر))
حلا وهي تتامل شهد""يعني خلاص كل حلمي انتهى وانهار""
تنهدت بصوت عالي وهزت راسها نزلت من الدرج بزفه بسيطه ماقدرت ترفع عيونها وصلت لاخر درجه وحست بيد انمدت لها مدت يدها بارتباك وشد هو ع يدها ومشوا صورا كم صوره بعدين ركبوها السياره بعد ماسلمت ع شهد وامها وكل اهلها زفوهم بموكب (طبعا مشاري وفهد حضروا وتركوا اهلهم بالمزرعه) كانوا الشباب مبسوطين رقص وصراخ وطلق واصوات الاغاني والبواري
خلت سلمان يرتاح شوي وهو فاتح الشباك ويضحك مع اصدقاءه لين وصلوه للفندق وسلموا عليه وراحوا طبعا ساعدها سلمان انها تمشي بفستانها ودخلوا جناح حلو وراقي
وقفت حلا بنص الجناح بدون ولا كلمه
سلمان بهدوء وهو ياشر بيده ع غرفه:هذيك غرفه النوم خوذي راحتك غيري ملابسك بعدين تعالي تعشي
ماردت عليه حلا و دخلت وقفلت الباب وهي تتراكى عليه وبدت تبكي ..

الـــمـــزرعــــه
ابوفهد:فارس ليش ماحضرت عرس سلمان؟
مدت قمر بوزها وهي تتذكر كيف فهد رفض انها تروح بحجه انه يغار وه بس يالبى اللي يغارون :هاه؟  ايه تعبان والله شكلي زكمت
ام فهد بحماس:طبعا بتزكم لبسك خفيف قوم البس شي ثقيل المزرعه بارده
ابتسمت قمر بهدوء وقفت:حاضر عن اذنكم(طلعت وهي تمشي لغرفه الشباب طلعت جوالها ودقت ع نور بحماس): ....

طلعت وهي تمشي لغرفه الشباب طلعت جوالها ودقت ع نور بحماس: الو نور
نور وهي تتطلع برا غرفتها لان منيره واخيرا اقتنعت تنام:هلا قموره
قمر اللي مانتبهت لصوت نور وهي تضحك بقوه وتتدور حول نفسها:هههه نور ماراح تصدقين اللي صار لي
نور اللي كانت بتقولها عن عبدالعزيز بس قالت بنفسها اسمعها اول:ليش وش صار؟
قمر وهي تجلس ع الارض وتنهدت بحب:ااه قالي احبك فهد قالي احبك ويبي يتزوجني ههههه نور مو مصدقه باب السعاده انفتح لي واخيرا بنبسط نور بنبسط بدون ابوي وعبدالعزيز مو مصدقه احس ودي اطير واقول لكل الناس اني احبه واعشقه
نور وهي تبلع ريقها """مسكينه انتي ياقمر ليش حظك كذا ليش كل مافرحتي لازم تحزنين ""
قمر اللي حست ان نور فيها شي:نور صاير شي؟
نور بسرعه مستحيل تخيلي عبدالعزيز يخرب فرحة قمر:لا لا ههههه بس مصدوومه الف مبروك ياروحي ههه عقبالي
قمر:هههه يارب
نور:انبسطي روحي خلاص يلا انا مضطره اسكر عشان امي تناديني
قمر:طيب سلمي عليها خلاص باي
نور:يوصل باي (سكرت وهي تتنهد ولفت وهي تتدخل غرفتها ونامت جنب منيره ونزلت دموعها ليش يصير لخواتها كذا ليش)

شـــقـــق الــشــمـــس
شـــقــه قــمـــر
دخلوا قمر ووسن رمت نفسها ع الكنب وهي تبتسم: الله وناسه يوه من زمان ماانبسطت كذا احس ودي انام مرا تعبانه
ابتسمت قمر وقعدت جنبها:صادقه
ناظرت وسن قمر وهي لسى مبتسمه وبهدوء:مبسوطه عشانه قالك احبك؟
تنهدت قمر وحطت راسها ع صدر وسن وبنفس الهدوء:ايه احس اني كنت محتاجتها بهذا الوقت تتدري وش نفسي فيه الحين؟
وسن بهمس وهي تلعب بشعر قمر:ايش؟
قمر:اغمض عيوني وماعاد افتحها ابي اخر شي اشوفه واسمعه كلامه ودي حياتي تاقف هنا خلاص ماابيها تكمل
وسن بسرعه:بسم الله عليك لاتقولين كذا فاهمه؟ (وبمزح وهي تتنهد وكانها عااشقه) بعدين تبين تتركين فهد كذا هاه يتعذب من بعدك
ضحكت قمر وهي تغمض عيونها:هههه
دق جوال وسن وبعدت قمر عن صدر وسن وناظرن بعض باستغراب من يدق هذا الوقت (لان السااعه 2 بالليل)
وسن بهمس:تركي
قمر: ردي
هزت راسها وسن:الو (وقفت بسرعه) ايش؟ متى؟ (حطت يدها ع فمها بصدمه) جايه (بصراخ) لا بجي (سكرت السماعه وصارت تلف الطرحه بسرعه)
مسكتها قمر بخوف:وشفيك وش صاير؟
وسن وهي تحاول تضبط نفسها:الجوري
قمر:وش فيها؟
وسن:مدري مدري يقول تركي انهم كلموه وقالوا له انها تعبانه مرا لازم اروح
مسكتها قمر بقوه: وين رايحه صاحيه انتي تروحين لهم برجولك وبعدين من بيوديك باخر الليل؟
وسن اللي بدت تصيح:مدري هذي اختي يا قمر اختي ماراح اسامح نفسي لو صار لها شي
تنهدت قمر وهي تتلفت وتناظر المرايه سحبت مفتاح الشقه وجوالها ودخلتهم بجيبها:امشي
ناظرتها وسن بصدمه:بتروحين معي؟
قمر:اكيد اللي بيشوفنا بيكون ع باله اني ولد والا احد بيقرب لنا يلا بسرعه
هزت راسها وسن ومشوا ووقفوا تاكسي وركبت قمر قدام ووسن وراء واتجهوا لبيت ابووسن!!!

مـســتــشــفــى الانــتــمـاء
كانت اميره جالسه ع كرسي قدام غرفه اصيل وتقلب بالاوراق وبيدها قلم شوي تكتب وشوي ترفع راسها وكانها تفكر بشي
كان مار يبي يطلع من المستشفى للبيت بس انصدم لما شافها موجوده بهذا الوقت قرب لها:اميره؟
رفعت راسها اميره وناظرته:نعم
رامي:وش مقعدك لهذا الوقت المتاخر؟
سكتت اميره ونزلت راسها للاوراق وبهدوء:ولاشي  اقصد عندي شغل
استوعب رامي ان هذي غرفه اصيل لف وصار يناظر الغرفه بعدين رجع يناظر اميره تنهد وجلس جنبها ع الكرسي وهو يحك يدينه ببعض:اميره بقولك شي
سكتت اميره وعيونها ع الاوراق بس قلبها وكل جوارحها معه
سكت رامي شوي بعدين قال وهو يناظر غرفه اصيل:تتدرين ليش اخترتك انتي بالذات لاصيل؟
رفعت راسها وصارت تناظره بصدمه صح توها تستوعب ليش هي بالذات ماسالت نفسها ابدا هذا السوال وبهمس:ليش؟
ناظر عيونها بتعمق:لاني متاكد انك بتساعدينها بترجعينها زي ماكانت (ابتسم ع خفيف)ةانا واثق انك مستحيل تتخلين عنها
ناظرته بتامل بعدين وقفت وفتحت باب غرفه اصيل ودخلت و وقفت عند راس اصيل وهي تتاملها ومعقده حواجبها ""بقدر اساعدك لدرجه هو واثق اني اقدر"" كتفت يدينها وظلت تتاملها والافكار والاسئله تتدور براسها ..

الـــفـــنـــددق
جــنـاح ســلـمــان و حــلا
سلمان وهو جالس ع الكنب ""اف هذي وشفيها طولت كذا ابي اغير ملابسي ااف خليني اقوم اشوفها"" وقف وطق الباب بس ماجاه رد صار يطق اكثر عصب لما ماسمع شي لما جاء يفتحه لقاه مقفل زادت عصبيته وبصوت عالي:حلا حلا ...

كانت حلا قاعده ع السرير بقميص نوم ابيض طويل ..
تنهدت و وقفت وفتحت الباب
سلمان بعصبيه:ليش ماتفتحين؟
حلا وعيونها بالارض وبهدوء:كنت بالحمام
سكت سلمان وهو يناظرها صد وجهه ودخل الغرفه وفتح الدرج واخذ له بجامه ودخل الحمام شوي وطلع ورمى نفسه ع السرير ع بطنه وهو يلم الوساده لصدره:طفي النور
ناظرته حلا بصدمه ابدا ماتوقعت ان هذا اللي بيصير استغربت ليش ماقرب لها ليش ماقال أي شي معقولة هو مغصوب كانت هذي افكار حلا بس صحت ع صوته وهو يناديها باسمها هزت راسها وطفت الانوار ""لحظه انا وين انام سخيف مستحيل انام جنبه اصلا مابي انام"" لفت وجهها وطلعت برا الغرفة ..

بـــيـــت نـــــور
الــمــلــحـــق
كان ماسك بيده كوب ماء بقوة وعيونه بالارَض:يعني ماتعرفون وين مكان قمر؟
تنهد فواز:لا
شد قبضته ع الكوب:ونور ماتدري؟
فواز بنفس النبره:لا
عبدالعزيز بقهر:وين راحت وين؟
ام فواز بحنيه:اهدا ياحبيبي هي تكلمنا من فتره لفتره وتتطمنا عليها وانا واثقه بقمر هذي تربيتي بعد تربيه امك الله يرحمها
بلع ريقه عبدالعزيز وبهمس: الله يرحمها (سكت شوي بعدين قال) عطيني الرقم اللي تكلم منه
ام فواز:حاضر(لفت لماجد) ماجد يمه قوم جب جوالي بالصاله داخل
ماجد وهو مكتف يدينه وقاعد فوق المركى رد بقهر وبعصبيه: وش تبي منها بعد ماشبعت من الفلوس والنعمه جاي تتدورها وينك عنها سنتيين وينك يوم كانت هي تذوق المر وانت تذوق العسل هاه (وقف) خلاص اتركها هي مبسوطه ومرتاحه يكفي حرام عليكم عذبوتها حرام
فواز بعصبيه: ماجد
ماجد وهو يرمي المزهريه اللي جنبه بقهر وكانه بيفرغ عصبيته فيها: لا تسكتني لاتخاف ع مشاعره لانه مايحس هو بدون مشاعر (ابتسم باستهزاء مجروح) هو اصلا لو يحس ماسوا اللي سواه (لف وجه وطلع من البيت بعصبيه وقهر)
فواز بقهر من ماجد بهمس: استغفرالله
سكت عبدالعزيز شوي وهو يفكر بكلام ماجد ""هو صادق بكل كلمه قالها ااه"" بس لحظه تذكر شي:وين عمي (يقصد ابوفواز)
خيمت ملامح الحزن والضيق ع ام فواز ونزلت دمعه شوق
فواز بهمس:عطاك عمره
فتح فمه بصدمه""معقوله كل هذا يصير وانا مو موجود قمر تختفي عمي يموت؟؟"":اييش متى وشلوون؟
سكت فواز وهو يتنهد:يومه الله يرحمه ويغفرله
بلع ريقه وبهمس:الله يرحمه (صار يتذكر كيف كان يعامله صارت ذكريات الطفوله والمراهقه كلها تتدور وتتضارب ببعضها هنا كان يمشيهم بسيارته الجديده وهم يغنون ويضحكون وهنا يعطيه فلوس بمناسبه تخرجه من المتوسط هنا بيوم العيد يصلح له الشماغ ويضبط له العقال ويمسكه جنب فواز وكانه يقول للناس هذا ولدي
نزلت دمعه حرقت خده عرف قد ايش ثمن غلطته كان كبير كان عارف ان فيه ثمن بيدفعه بس ماتوقعه بهذا الحجم ماكان مفروض يكون عقابه كذا صار يشاهق ع الام والاخت والاب اللي ماتخلى عنه بكى ع الصداقه والحاره والشوارع والراحه ايه بكاهم كلهم كلهم لانه بيده تخلى عنهم عشان ثمن بسيط وهو فلوس ؟ ليش الفلوس صارت شي مهم بحياتنا اليوميه تخيلوا لو الدفع كان بالحب مو بالفلوس تتوقعون وشلون بتكون حياتنا افضل والا اسوء؟
ام فواز بهمس وهي تمد يدها:عبدالعزيز
بس يد فواز كانت اسرع ومسك يد امه وهز راسه بعلامه لا وكانه يقولها اتركيه
وقف عبدالعزيز وطلع من البيت بس ماركب سيارته صار يمشي من دون هدف ولا مكان معين صار يمشي بالحاره هنا لعبوا هنا طاح هنا قعد يذاكر وهنا وهنا شهق وطاح ع الارض ع ركبه وهو يغطي وجهه وصار يبكي كانه طفل ضاع عن امه

رجعت فكري تايه شبه مفقود........متخدر قلبي وجسمي وبالي...
ساعة دخلت البيت بالناس محشود....والكل منهم يزعج الصوت عالي...
حتى الصغير اللي من ايام مولود....يبكي ودمعه فوق الاوجان سالي...
من هرجهم حبل الحزن صار معقود...في خافقي والموت وقته طرالي...
حاولت اجامل كل من كان موجود...لا شك حزني ترجم احوال حالي..
ياليتني في قبرهم اليوم ممدود....وهم على الخد الوسيعة بدالي...
لاشك حكم الرب ماعنه مردود..آمنت به ربي...عليه اتكالي....

بــــيـــت ابــوســديــــم
جـــنـــاح ســـديـــم
كانت متربعه ع الارض وحولها اوراق وملفات مبعثره وفوق الطاوله اللي جنبها كوب كافي صرخت بضجر: ياربي (دق جوالها اسحبته وردت) الو
حمد اللي كان منسدح ع سريره بهمس:نايمه؟
بلعت ريقها كان صوت خقه:هاه لا لا قاعده احوس باوراق الصفقه راسي عورني احس فيه شي غلط
حمد وهو يحط يده تحت راسه:ليش؟
سديم وهي تمسك كوب الكافي:مدري احس فيه شي بالمشروع غلط انت ماتشوف انه فيه شي؟
حمد بهدوء:لا بس انا مااثق بثامر
سكتت سديم شوي بعدين قالت:ايه
حمد:ليش ماتنامين بكرا وراءنا شغل
سديم:وانت ليش ماتنام؟
حمد وهو يناظر ولده مهند اللي نايم بحضنه:مهند تعبان وكل شوي يقوم يلا روحي نامي ..

سديم بخوف:وشفيه طيب و ده للمستشفى؟
حمد بهدوء:لا مايستحق الموضوع عطيته خافض حراره
سديم:سلامته ليش ماهو عند امه؟
حمد سكت شوي بعدين قال:رايحه مع زوجها لماليزيا
بلعت ريقها سديم نست انها تزوجت ماتدري ليش حست بشعور غيره:اها
حمد:والله هي قالت باخذه بس انا رفضت يعني صعبه هم بشهر العسل وتاخذ ولدها
عصبت سديم ماتتدري ليش يمكن عشانه مهتم لراحتها: ايه طيب انا بسكر لاني تعبانه وابي انام
ابتسم حمد وبهدوء وصوت يخق:تصبحين ع خير
بلعت ريقها سديم وبقهر:وانت من اهله باي
حمد بابتسامه:باي
سكرت سديم وهي تعض ع شفايفها السفليه بقهر وماسكه الجوال بيدينها الثنتين ""شكله لين الحين يحبها طبعا بيحبها حلوه وجسمها حلو واسلوبها حلو مالت علي مو زي هو اصلا وشلون يحبني وانا 24 بلثمتي حتى وجهي ماعمره شافه وجسمي مو زيها واسلوبي جلف واعصب بسرعة (وقفت بسرعه وصارت تناظر نفسها بالمرايه ببجامتها صح جسمي مو حلو بس بعد مو شين اااف"" مدت بوزها ونزلت جوالها وجمعت اوراقها وحطتها ع الطاوله ورمت نفسها بسريرها بقهر""

الــــفــــنـــدق
جــنـاح ســلمـان و حــلا
حلا وهي قاعده بالصاله ولامه رجولها فوق الكنب  وتناظر التلفزيون بدون صوت بس ماكانت معه اصلا فجأة سمعت صوت وحركه عند الباب لفت بسرعه للباب وشافت المقبض يتحرك شهقت ونقزت من فوق الكنب وركض لغرفه النوم وبدون شعور صارت فوق سلمان وهي تضربه: قوم قوم
سلمان اللي نط من الخوف وهو يدفها عنه وبخوف:وشفيك؟
حلا اللي صارت بحضنه وهي تصارخ:فيه احد برا فيه احد
ناظرها بصدمه:ايش(دفها) بعدي
مسكته حلا بيدينها الثنتين من معصمه: لاتروح وين بتروح وتتركني لحالي فرضا" ذبحوك وش راح يصير لي؟
ناظرها بفهاوه:فاضيه تألفين قصص انتي(دف يدها بقوه) اتركيني (وطلع برا الغرفه)
حلا وهي قاعده ع ركبها فوق السرير ولامه يدينها لبعض ومقربتها لصدرها ووجهها يموت ضحك من علامات الخوف اللي عليه
دقايق ودخل سلمان وهو يحك شعره رفع عيونه بس وقف وهو يناظر لها
نقزت من فوق السرير وركضت له: وشفيه وش صار من؟
نزل عيونه وهو يناظر لوجهها ونزل لجسمها وهي قريبه له:هاه؟
استوعبت حلا لاصقه فيه وتتكلم براحه بس هذا كله من فعايل الخوف لفت وجهها وهي منزله راسها:وشفيه؟
سلمان:هاه ايه ايه لا بس كان ع بالهم الجناح فاضي
ناظرته حلا بس بسرعه لفت وجهها ""والله مملوح حيل""
سلمان ""ناعمه مرا """ بس تذكر حلا عقد حواجبه ورجع لسرير:مره ثانيه قبل ماتخوفيني تاكدي
ناظرته حلا بصدمه توا بغت عيونه تتطلع عليها والحين ينافخ ضمت شفايفها بعصبيه وكتفت يدينها وبنبره حاده:تقدر تقوم من السرير لاني ابي انام
رفع حاجب سلمان وهو منسدح ع بطنه:نعم ياشيخه حلا وش امرتي فيه؟
حلا اللي خافت من نبرته بس ماحبت تبين:اللي سمعته
سلمان:شوفي تبين تنامين تعالي نامي ماتبين انطقي باي مكان
انقهرت منه وقالت بعصبيه:من انت عشان تقولي انطقي؟
شد ع قبضه يده وبقهر:حلا اقصري الشر وروحي عني تراني مو رايق لك
ناظرته باستحقار وتجمعت الدموع بعيونها """لو اني مع سلمان الحين اكيد كان هذي الليله غير"" لفت وجهها ودخلت الحمام وقعدت ع طرف البانيو وهي تبكي

اما عند سلمان تنهد وحط الوساده فوق راسه ""ااه لو انا مع حلا كان كانت ليلتنا غير""

~تٍدًرٍيً وٍشً اٍلًلٍيً يٍكًسٍرً قٍلًوٍبً اٍلًاٍحًبٍاًبٍ

حًكٍمً اٍلًقٍدًرٍ لًاٍقًاٍلً لٍفًرٍاًقٍهًمٍ خًيٍرً ~

**

بــــيـــت ابــووســـن
قمر وهي تمسك يد وسن:انتي متاكده من اللي قاعده تسوينه؟
ناظرت وسن قمر بخوف ولفت تناظر البيت بلعت ريقها ولفت لقمر: ايه
قمر: اه طيب راح انتظرك هنا
وسن بسرعه:لا لاتنتظريني لان اكيد ابوي ماراح يخليني اطلع بس الحين اهم شي اشوف الجوري واكيد بلاقي فرصه اقدر اهرب فيها وبينا اتصال
قمر:بس اخاف يسوون فيك شي؟
وسن:لا ماراح يقدرون
هزت راسها قمر:طيب اكيد بياخذون منك جوالك؟
ابتسمت وسن بهدوء:راح اقدر ادبر نفسي
قمر وهي تضم وسن بقوه:انتبهي لنفسك فاهمه؟
وسن وهي تضم قمر بنفس القوه:وانتي بعد
بعدت قمر عن وسن:طمنيني عنك وعن الجوري حاولي باي طريقه فاهمة ؟
وسن:ان شاء الله
تركت قمر يد وسن وهي تحس بشعور غريب وكانه بيصير شي !
مشت وسن لين وصلت للباب ووقفت عنده وهي تتامل البيت اخذت نفس عميق ودخلت البيت..

بـــيـــت ابــوســـديـــم
جـــنــاح ريـــوف
ريوف وهي متربعه ع السرير:الحين ساره من اللي عازمنا ع هذا الشاليه؟
ساره بحماس وهي تختار الاغراض اللي بتاخذهم:صديق ناصر
ريوف باستغراب:وحنا وش دخلنا بصديق ناصر؟

ساره: اف ياكثر اسئلتك ياريوف مدري بس جهزي اغراضك
ريوف وهي تمد بوزها:لا لازم افهم
ريناد وهي تختار الارواج:ياحبي هذا صديق ناصر عزم ناصر وقال له خل اهلك وعمك واهل يجون بس
ريوف:اها وسدومه بتروح؟
ساره:غصبا عنها
ريناد:بصراحه عطينها وجهه بهذا الشغل
ريوف:هههه صادقه
انطق الباب وقالت ريوف:تفضل
دخل ابوسديم وهو يبتسم:ماشاءالله بناتي سهرانات؟
قاموا يسلمون البنات ع ابوهم
ريناد:يب بابا نجهز اغراضنا عشان الشاليه
ساره:حدنا متحمسين
ابوسديم:هههه الا وين سديم؟
ريوف:بغرفتها بس تقول مو رايحه
ابوسديم:افا ليش؟
ريناد بدلع وهي تمسك ذراع ابوها:تقول عندي شغل
ابوسديم:لالا هذا الكلام مايمشي عندي قولوا لها تروح والشغل مو طاير
ساره:صادق يبه انا قلت لها بس مافيه فايده
ابوسديم:روحي حبيبتي ريناد ناديها
ريناد:تيب (وراحت تركض نادت سديم اللي كانت تبي تنام ودخلن مع بعض )
سديم وهي تبوس راس ابوها:هلا يبه وشلونك؟
ابوسديم:بخير صدق اللي سمعته انك مو برايحه؟
سديم:ههه ايه يبه عندي شغل والمشروع انت عارف كيف صعب
ابوسديم:صح بس الشغل مو طاير وانا ابوك
سديم:عارفه بس ولو
ابوسديم:طيب اسمعي خوذي الشغل معك حنا بنسكن بشاليهنا
ريوف:يبه انت تعرف صديق ناصر هذا؟
ابوسديم:طبعا ابوه صديقي المهم ياسديم بتروحين
سديم: يبه بس تعرف اني مااعرف اشتغل الا حمد يساعدني
ابوسديم:مو مشكله انا اقول لحمد يجي ويجيب بعد ولده منه يتونس ومنه تشتغلون
سكتت سديم لانه بصراحه اعجبتها الفكره ابتسمت:طيب براحتك
ابتسم ابوسديم:اجل بكرا الصبح اذا قمت بكلمه ان شاء الله يلا تصبحون ع خير
البنات:وانت من اهله

بـــيـــت ابـــووســـن
دخلت وسن وهي مسرعه تبي تشوف اختها وبس حمدت ربها ان البيت فاضي دخلت غرفتهم بسرعه:الجوري
فتحت عيونها الجوري باستغراب وهي تفركها وبصوت كله نوم:وسن انتي هنا؟
ناظرتها وسن بصدمه ""لحظه هذي الجوري ومافيها شي"" ركضت لها وضمتها تبي تتاكد ان الجوري بخير:حبيبتي انتي بخير؟
الجوري بصوت يله يطلع:وسن عورتيني
ضحكت وسن بين دموعها وبعدت عنها:انتي بخير مافيك شي؟
الجوري وهي تهز راسها بطفوله:لا
:قلت انك بترجعين
لفت بسرعه وخوف لعمها وبلعت ريقها اما الجوري اللي نطت من السرير ووقفت جنب وسن وهي تلف يدينها الصغيره حول ذراع وسن
وسن وهي ترجع الجوري وراء ظهرها:كل هذا لعبه منك صح؟
دخل ابووسن بعصبيه بس مسكه اخوه:اتركني اتركني ابرد حرتي بالهلكلبه اتركني اذبحها
الجوري وهي تبكي وصارت قدام اختها وهي تمد يدينها:لا بابا اتركها لااتذبح اختي بابا
بكت وسن مو خوف من ابوها ولا عمها لا بكت ع اختها حطت يدينها ع كتوف الجوري: بعدي
الجوري وهي تتمسك بوسن بقوه:لالا ماراح اتركك
ابووسن وهو يسحب وسن من شعرها وصار يضربها بوحشيه
الجوري وهي تحاول تبعد ابوها بس مستحيل تقدر وهي تصيح بصوت عالي:بابا اتركها اتركها
وسن وهي تضم الجوري بقوه عشان تحميها من ضرب ابوها وهي تكتم شهقاتها والالمها طاحوا ع الارض وهي لسى ضامه اختها بكل قوتها
اما الجوري لافه يدينها حول خصر وسن وهي تبكي بقوة

الضيـق وافـي .. والحـزن حيـل وافــر
والجـرح أكثـر شـي .. شفتـه يحبـنـي

عايـش وميِّـت بيـن .. ماضـي وحاضـر
والصبـر [ مفتـاح الفـرج ] ضـاع منِّـي

قل وش تبـي وتتركنـي يـا حزنـي آمـر
مسكيـن فرحـي / تصـدِّق إنَّ وحشنـي !!

دخل البيت وهو يركض ع صوت الصراخ بس لقى جدته وعماته بوجهه بخوف:وشفيه وش صاير؟
ناظرن له بهدوء وسكتن
حس فيه شي قاعد يصير لف وهو يسمع الصوت من جناح وسن والجوري ركض له بس امه وقفت بوجهه
امه:تركي
تركي بقهر وهو يبعد امه: يمه بعدي (دخل الجناح ووقف مصدوم من المنظر لثواني بس ع طول ركض بس يدين ابوه امسكته) يبه اتركني
ابوه وهو يدفه وبحده:مالك دخل وانت لي حساب معك فاهم اجل تساعدها عشان تهرب وتحط روسنا بالارض
تركي وهو يحاول يبعد ابوه بس ابوه ماسكه بقوة: يبه حرام عليكم يبه اتركني يبه
دفه ابوه بقوة وطلعوا برا الجناح وهو يحاول يفك نفسه من يدين ابوه وبنفس الوقت مايقدر يمد يده ع ابوه

ابووسن وهو يسحب الجوري بقوة من معصمها
وبيده الثانيه مسك شنطه وسن
وسن وهي تبكي وشفايفها ينزل منها دم وشعرها مبعثر وبعضه بالارض من قوه شد ابوها صارت تمسك يد الجوري:ااه اااه اتركها
ابووسن وهو يدف وسن بقوة ع الارض ورفع الجوري من بطنها
الجوري وهي تصارخ وتبكي بانفعال وتضرب يدين ابوها:وسن وسن لاتتركيني وسن
وقفت وهي تركض تبي تمسك اختها بس ابوها كان اسرع منها وقفل الباب عليها
صارت تضرب الباب بكل قوتها وهي تبكي ..

صارت تضرب الباب بكل قوتها وهي تبكي وهي تبكي: يبه يبه رجعها لي يبه ااه ااااه (طاحت ع ركبها وهي تضرب الباب ع خفيف وبهمس) يبه ابيها (شقهت بقوه وطاحت ع الارض وعيونها ترمش والدموع تنزل منها كل قطعه بجسمها تالمها بس المها الداخلي كان اقوى واشد

بــــرا الــجــنـــاح
تركي اللي اتركه ابوه ركض لعمه وبعصبيه وهو ياخذ الجوري منه:عطني المفتاح
ابووسن وهو يحاول يسحب الجوري اللي تخبت وراء تركي وتبكي:ماراح اعطيك وانتي امشي
تركي بعصبيه:عمي لا تسوي كذا هذولا بناتك وخلها مارااح تجي معك لااي مكان
ابوتركي بصراخ: بس ولا كلمه مالك دخل اب وياادب بناته
عصب تركي بقوة وهو يسحب المفتاح بس ابوه امسكه بقوة: اتركني يبه
ابوتركي بقوة: تصارخ ع ابوك عشان وحده حثاله زيها؟
بلع ريقه ماقدر يقول شي مو لانه مايقدر لا لانه ابوه والا لو هو واحد غيره كان مسح فيه البلاط
ابووسن وهو يسحب الجوري بس تركي مسكها بقوة قال بقهر وعيونه بالارض:اتركها معي
سكت ابووسن ومشى بعصبيه وقهر
ثواني وفضت كل الصاله مابقى فيها الا تركي والجوري
تنهد تركي بقهر هو السبب باللي صار غبي كيف صدق ابوه وشلون بس دق ع وسن حس بغباء شد ع قبضه يده ونزل عيونه لجوري اللي تبكي تنهد وقعد ع ركبه ومسح دموعها بيدينه وهو يبتسم بالالم:بس حبيبتي بس
شهقت الجوري بقوه وهي ترمي نفسها بحضن تركي:تركي ابي وسن ابي اختي تركي لاتخليهم يذبحونها تركي اذا ذبحوها معناها تموت صح معناها ماعاد اشوفها؟
حس بغصه ايه كان يبكي حط يده وراء راسها وهو يمسح ع شعرها وشالها وهو يمشي فيها لغرفته وبهمس:اوعدك اني ماخليهم يعذبونها ثاني مره لاتخافين برجع لك اختك لاتخافين
لفت يدينها الصغيره حول رقبته وهي تبكي ..

صـــبــاح جـــديـــد

الــشــالــيــهــات
وقفت سياره ابوسديم ونزل السايق وفتح الباب لابوسديم بعدين ام سديم
ووقفت وراءهم سياره ابوناصر ونفس الشي نزل السواق وفتح الباب له ولام ناصر
اما سياره ناصر اللي كانوا كل البنات معه نزلوا بسرعه وهم متحمسين حيل
ابوسديم:ههههه شوي شوي يابنات
ابوناصر:ههههه الله يصلحهم
ابوسديم:امين خلني ادق ع ابومعاذ اقوله اننا وصلنا
ابوناصر:ايه كلمه
كلم ابوسديم ابومعاذ وبلغه واتفقوا يلتقون بشاليه ابومعاذ

شــــقــــق الــشــمـــس
شـــقـــه قـــمـــر
اللي مانامت من امس وتدق ع وسن اللي نفس الشي يعطيها مقفل تنهدت ووقفت تبي تروح للمطبخ دخلت واخذت لها علبه ماء من الثلاجه ودق جوالها ركضت بسرعه وردت دون ماتشوف الاسم: وسن
سكت شوي بعدين قال:قمر وشفيك؟
تنهدت وقعدت ع الطاوله القزاز:هلا فهد
فهد باستغراب من صوتها:وشفيك؟
قمر:لا بس ع بالي انك وسن
فهد:ليش وينها وسن؟
قمر وهي تقوله السالفه:ـ ـ ااف انا خايفه عليها
فهد : لاتخافين ولا شي يمكن لهت مع اختها ونست تشحن جوالها
قمر: اف ياليت
فهد بابتسامه:جوعانه؟
قمر بابتسامه هاديه:لا مو مشتهيه شي
فهد:ليشةماتشوفين نفسك صايره عظم
استحت قمر: فهد
فهد:ههههه صادق بعدين انا مابي زوجتي المستقبليه يكون جسمها كذا لازم تسمنين شوي
قمر:لااا؟
فهد وهو يقلدها:الااااا
قمر:ههههه
فهد:ههه اسمعي انا تحت انزلي بسرعه
قمر: طيب (سكرت وراحت ركض للغرفه وهي تفتح الدرج ""يااربي وش البس ااف"" سحبت برمودا جينز كحلي وبلوزه لونها فسفوري وعليها خطوط بكل الالوان لبستهم وبعثرت شعرها بالجل وبخت عطر ولبست صندل رجالي ابيض وراحت تركض لتحت

الـــفـــنـــدق
جــنـاح ســلــمــان وحــلا

صحى سلمان من النوم ودخل الحمام غسل وجهه ووضى وصلى""صح هذي وينها"" فتح باب الصاله وطلع يدورها انصدم من شكلها كانت نايمه ع الكنب ولامه رجولها لصدرها وشعرها مبعثر ع وجهها بلع ريقه وهو يقرب لها بصراحه رحمها جلس ع الطاوله اللي قدام الكنب:حلا حلا(صار يهزها) حلا
كانت داخله بنوم عميق بس فجأه سمعت صوته ""هذا هو الا هذا صوت حبيبي انا متاكده متاكده"" فتحت عيونها بسرعه بس من شافت سلمان نزت من الخوف وتعدلت بجلستها :وش تبي؟
سلمان بعد ماناظرها بهدوء:قومي نامي داخل
صارت حلا تخزه بقهر وصدت عنه ووقفت ودخلت الحمام توضت وصلت ولبست بنطلون جينز وبلوزه لبست صندل ابيض ومسكت شعرها بطوق وحطت روج رودي خفيف ومسحت الكحل وحطت بس مسكارا
دخل سلمان الغرفه وتراكى ع الباب وهو يناظر لها: بعد اليوم سفرتنا
لفت له حلا:سفرتنا وين؟
سلمان:اندونيسيا
بلعت ريقها وصدت عنه وارجعت بالذاكره قبل شهرين يمكن كانت تكلم سلمان
حلا وهي تضحك:هههه جد سلمان اذا تزوجنا وين بنقضي شهر العسل؟
سلمان:ههه انتي وين تبين؟؟
حلا: مدري اهم شي نكون مع بعض
سلمان: انا اقول اندويسيا يمدحونها ...

رجعت للواقع وهي تتنهد وبصوت قصير:متى؟
سلمان وهو يناظر ساعته:الحين الساعه 9 الطياره تقلع 1 الظهر يعني خلينا نتجهز ونمر نسلم ع اهلنا وبعدين نطلع للمطار
هزت راسها بهدوء ورفعت راسها وهي تناظر نفسها بالمرايه بتامل

ســـيـــارة فــهـــد
قمر: فهد جد عاد وين بنروح؟
فهد وهو يبتسم:الحين تشوفين ليش مستعجله طيب؟
قمر بابتسامه:ابي اعرف
فهد:الحين تشوفين
قمر:طيب (شغلت المسجل وشتغلت اغنيه وائل كفوري قصه عشاق)

بـــيـــت ابــوفــهــد
خوله وهي تنسدح ع الكنب:ياحلو الخميس له طعم ثاني
نواره:ههههه صادقه
خوله: اف مابقى ع الاختبارات الا اسبوع مالي خلق
الجده:شدن حيلكن وجيبن النسب اللي ترفع الراس
نواره: يع الله يعين ع القرف ااف
منى بهمس: مها انتي معنا؟
مها بهدوء:ايه
منى وهي تتنهد:مها حبيبتي خلاص انسيه صدقيني فيه ناس غيره يبونك ويتمنون نظره منك
رفعت عيونها مها لمنى:مشاري؟
سكتت منى شوي بعدين قالت:ايه صدقيني مها هو يحبك تدرين انا بالنسبه لي اتزوج واحد يحبني وانا مااحبه احسن مليون مره اني اتزوج واحد انا احبه وهو مايحبني لانه بحبه بينسيني حبيبي الاول صدقيني عطي مشاري فرصه شوفيه
تنهدت مها وبحيره:مدري مدري
ابتسمت منى وضغطت ع يد مها وسكتت ..

ســـيـــاره فــهـــد
وقفوا ولفت قمر وهي تشوف البحر ابتسمت ونزلوا
فهد وهو يحط يدينه ع عيونها وفمه قريب من اذنها وبهمس:لاتفتح عيونك
بلعت ريقها قمر من قربه منها وبهمس خجول:طيب
ابتسم فهد:بشيل يديني لاتفتحينها؟
قمر بابتسامه خفيفه:لا ماراح افتحها
بعد فهد ومسك يدها وصار يمشي فيها مسافه بسيطه ووقف: فتحي
فتحت عيونها وهي مذهوله كان حاط بساط ع الارض وعليه فطور مرتب بشكل راقي وحلو ومثبت مظله فوق البساط بشكل مايل وفيه طاوله ع الجنب عليها جاك عصيرات وكوبين واستروا(شفاط ـ مزاز) وباقه ورد حست التعبير خانها: فهد
ابتسم وقرب لها ومسك يدها وجلسها:اجلسي خلينا نفطر (جلسوا وصار يحط الاكل بصحنها وهي ماتشيل عيونها عنه)
كانت مذهوله ودها تقوم وتضمه وتقوله احبك احبك مسكت الصحن وهي لسى تناظر له
فهد وعيونه ع الاكل:هههه تراني استحي
استوعبت ابتسمت ونزلت راسها لصحن:مشكور فهد
فهد وهو رافع حاجب: وين اصرفها هذي انا ابي هديه
قمر:هههه هديه ايش؟
فهد وهو يسوي نفسه يفكر:اممم اممم(وبصوت يدوخ وهو رافع حاجب واشر ع خده) بوسه؟
ناظرته قمر بصدمه لثواني بعدين نقزت له وصارت تضربه من كتفه بمزح:سخيف
فهد وهو يمسك يدينها:ههههه هههه طيب طيب خلاص
كان ماسك يدينها:اتركني
فهد:مو تاركك وش بتسوين؟
قمر بدلع: فهد
باسها بسرعه ع خدها وقام يركض اما قمر اول ماستوعبت اللي سواه وهي حاطه يدها ع خدها صرخت وقامت تركض وراءه:فهد والله ماخليك فهد انتظر
فهد وهو يركض لف لها:هههه خلاص خلاص ماعاد اعيدها
قمر:لا بعد ناوي تعيدها وقف وقف
لف فهد وجهه وصار يركض وهو يضحك وقمر تركض وراهءه

إن كـــان تـقدر تـعيشـَ اليوم من ,,

... دونيَ .،

حً‘ـط عينكِ بعينيُ وقولَ ليَ

{ وٍالله } !

الــشــالــيــهــات
دخلوا عيله ابوسديم وعيله ابوناصر طبعا الرجال لجهه الرجال والحريم لجهه الحريم
صاروا الحريم يسلمون ع بعض وتعارفوا وجلسوا

عــيـــلــه مــعــاذ
ابومعاذ:رجل اعمال معروف بمكانه ابوسديم وابوناصر
ام معاذ:بعد تملك الكثير من الشركات والxxxxات
معاذ:سبق التعريف
سما:بنوته عمرها 17 سنه ثاني ثانوي ادبي نعومه حيل وتحب الكشخه والموضه والاغاني الاجنبيه فيها شبه كبير من معاذ
يارا:بنت عم معاذ بس ساكنه عند عمها وهو مربيها من عمرها 5 سنوات لان امها وابوها ماتوا بحادث عمرها 18 هاديه وناعمه تحب تقرا الكتب وبالذات البولوسيه ماتهتم كثير باللبس والكشخه
واخر شي ياسر:عمره 6 سنوات دبدوب يدنن ودك تاكلينه وبس لازق بسما

سما بابتسامه:بنات خلونا نروح للمجلس الثاني
وقفوا البنات وطلعوا للمجلس الثاني وجلسوا يسالفون وبسرعه اخذوا ع بعض ضحك وسوالف وتعليقات وبالذات سما وريناد تتطابقوا واعجبوا ببعض حيل ..
اما ريوف ويارا صاروا يتكلمون عن الكتب بحماس وداخلين جو حيل

اميره:هههه اقول ساره طلعنا منها ريناد قلت احد يسمع لها عن الموضه وريوف لقت احد يسمع لها عن كتبها
ساره:ههههه صادقه
سديم وهي تكلم وقفت:اعذروني عندي شغل باي
الكل:باي

ريوف:ايوه
يارا:صدقيني ماراح تتوقعين النهايه ابدا
ريوف بحماس:جد؟
يارا:يب ا
قاطعتها ريوف: لا لاتقولين لي هههه ابي اقراها بنفسي
يارا:ههههه طيب
سما:يوه يارا ولقت احد يعطيها وجهه بكتبها
ريوف:ههه بالعكس الكتب روعه
سما: تدرين ريوف عندنا مكتبه بالبيت بس خاصه بكتب بيارا
ريوف بحماس: جد يارا ياي انا عندي كتب كثيره بس احطها بغرفتي ماقد فكرت اسوي مكتبه
يارا:ههه ايه بس معاذ الدب دايم يعلق علي
ريوف باستغراب:ليش؟
يارا:مدري عنه مايحب البنات اللي يقرون ههه يعني يحب البنات اللي من نوعيه سما وريناد بس اكبر همها شكلها
استحقرته ريوف بداخلها:بس الشكل والجمال مو كل شي؟
يارا:اكيد انا دايم اقوله

الــــبـــحــــرر
قمر وهي لافه يدينها حول ذراع فهد ويمشون بهدوء ع طرف الشاطي وامواج البحر تصدم رجولهم
فهد:قمر
قمر:همم
فهد:لازم نسوي خطه عشان فارس يختفي ونتزوج
قمر:صح بس وشلون؟
فهد: مدري فكري
قمر بابتسامه:فهد
فهد:هلا
قمر وهي تشد ع ذراعه وبهمس:نقدر نفكر بعدين ونعيش اللحظه؟
ابتسم وشد ع يدها:اكيد

على ضفة بحر ذوقك والجو ساحر
ذبت في همسة شفاهك والسواليف

الـــشــالــيــهــات
كانت سديم قاعده ع الارض وموزعه الاوراق بترتيب معين وهي راميه الطرحه ع كتوفها وتنتظر حمد يجي
دخل مستعجل ووقف وهو يشوفها اول مره يشوفها كذا شعرها ياصل لين تحت صدرها لونه بني فاتح وبياضها جذاب صار يتاملها وهي ترجع خصله وراء اذنها استوعب انه قاعد يشوفها رجع خطوه وهو منزل راسه:احممم
رفعت راسها سديم وبسرعه عدلت طرحتها وزينت لثمتها: ادخل حمد
دخل حمد:السلام عليكم
سديم:وعليكم السلام
ابتسم حمد وجلس وبدوا الشغل بس كل شوي يسهى وهو يتذكر شكلها
سديم: ااف حمد فيه شي صاير؟
حمد باستغراب:لا ليش؟
سديم:لانك مو معي ابدا
حمد ""ماتدرين انك انتي اللي شاغله بالي" : لا لا مافيه شي
سديم:وين مهند ماشفته؟
حمد بابتسامه:قابلتنا رغد عند الباب واخذته
سديم وهي تبتسم:اها(طلعت جوالها) رغوده جيبي مهند بسلم عليه (دقايق وجابته رغد فتحت يدينها سديم) ياقلبي تعال
ضمها مهند:خاله سديم
سديم وهي تضمه بقوه:ههه ياروح خاله سديم
مهند بدلع طفولي:انا تعبان
سديم وهي تجر خدوده:لالا ماقدر ع كذا ههه يالبى التعبانين ياروحي انت (ورجعت ضمته)
حمد وهو يتاملهم""ياحظك يامهند ياليتني مكانك"" ابتسم ع افكاره وسكت

خذني بحضنك قرصة البرد شينه
...................شوف الضلوع شلون ترجف من البرد
شف صاحبك وشلون ترجف يدينه
....................ضمه قبل لايطيح من يده ...... الورد 
 

بــيــت ابــوســن
جـــنــاح تـــركـــي
قام من السرير وهو يغطي الجوري زين مانام طول الليل يفكر بطريقه يطلع وسن وتاكد ان الهروب ماهو الحل تنهد ودخل الحمام توضى وطلع للمسجد لصلاه الفجر صلى ورجع للبيت وقعد بالصاله تحت وهو حاط يده تحت ذقنه يفكر بطريقه قطع افكاره صوت المكنسه الكهربائيه رفع راسه وصار يناظر الخدامه وهي تكنس جاءت بباله فكره وع طول قال: روز انتي معك مفاتيح كل الغرف صح؟
روز:يس
ابتسم تركي:عطيني مفتاح جناح وسن
خافت روز:لا سير انا اسفه مافيه يقدر بعدين سير كبير يضرب انا
سكت تركي وفتح بوكه وعطاها 200:خوذيهم وعطيني المفتاح
ناظرت الخدامه الفلوس ولفت وجهها:لالا بعدين سير يضرب
عصب تركي ورمى 200 زياده:يلا
ابتسمت واخذت الفلوس:طيب شوي جيب مفاتيح
هز راسه تركي:بسرعه
دقايق وجابت المفاتيح وصارت تفكهم ومدت له المفتاح:بس سير بسرعه رجع انا عشان سير كبير مافيه معلوم
هز راسه تركي:طيب (ركب المصعد واول مافتح مشى بخطوات سريعه لجناح وسن وفتحه تعدى الصاله وركض للغرفه وفتح الباب وقف بصدمه وهو يشوفها بالارض ركض لها وهو يمسكها):وسن
فتحت عيونها بتعب بس لما شافته حست بغضب صارت تضربه بقوة ع صدره ووجهه وهي تبكي:انت جبتني لهنا انت السبب
تركي وهو يحاول يمسكها قبل مايسمعها احد حط يده ع فمها وبيده الثانيه مسك يدها بس وسن متواصله تضربه بيدها الثانيه ماعرف وش يسوي لفها خلى ظهرها ع بطنه ولف يده ع كتوفه ويده الثانيه ع فمها: وسن وسن اهدي تكفين اهدي وربي وربي اني ما دريت انهم يكذبون وربي وسن (بس وسن ماهي راضيه تهدى وكان جاها هستريه وهي تحاول تفلت منه وتضربه عضت يده بقوه وتركها بس بسرعه رجع ومسكها ومافكر الا بطريقه وحده يمكن تهدى فيها رماها ع الارض ) وسن وسن
لما صاروا بالارض وهو توسعت عيونها بصدمه وهدت
تنهد وبعد عنها وجلس وهو يمسح وجهه لف وناظرها وهي بالارض:وسن
كانت لسى ع وضعها ماهي مستوعبه اللي صار وفاتحه فمها وعيونها تنزل منها الدموع
مسك كتوفها تركي وعدلها وخلاها جالسه ومسك وجهها بيدينه ومسح دموعها ..

شهقت بقوه لما مسح دموعها ماتتدري ليش يمكن لمسته تبعث شعور غريب لجسمها و الا يمكن انها محتاجه احد يمسح لها دموعها وجروحها ؟
تركي وهو يمشي يده ع وجهها والكدمات اللي صارت عليه وقف عند الجرح اللي عند طرف شفتها غمض عيونه بقهر ورجع فتحها وسحبها لحضنه وضمها بقوه وبهمس:اسف اسف
كانت يدينها ع صدره وكانها طفله بحضنه صارت تشاهق وتبكي بانفعال وقوه: ااه  طلعني مابي اقعد هنا ااه
شدها لصدره اكثر:ماراح اخليك هنا بس حنا ماراح نهرب الهرب مو حل مو حل (صار يمسح ع شعرها) لاتخافين انا معك
وسن بضياع: لاتتركني
ضمها اكثر له ولو بكيفه كان دخلها بصدره وقال :ماراح اتركك

الــشـــالـــيــهـــات
الـــسـ7:00ص ــاعــه
كانوا متجمعين بشاليه ابومعاذ وجالسين يفطرون ماعدا ريوف
يارا:ساره وين ريوف؟
ساره:تتسبح قالت تلحقنا
يارا:اها
صاروا يسالفون ويضحكون ويعلقون
سديم وهو حاطه مهند بحضنها وتوكله وتضحك معه
ام معاذ: ماشاء الله هذا ولدك؟
كلهم رفعوا روسهم واتجهت نظراتهم لسديم
سديم اللي انصدمت بس ع طول قالت بخجل:لالا  مو ولدي
ام سديم:انا بناتي ماهن متزوجات
ام معاذ اللي استحت:سامحيني ياقلبي مادريت بس مدري ليش توقعت انه ولدك
سديم بابتسامه وهي تشرب مهند عصير:ههه لا
ام سديم:هذا ولد مساعد سديم بالشركه هو طالع معنا وجايب ولده
ام معاذ: وين مرته؟
ام سديم وهي تعقد حواجبها:وربي مدري بس اعتقد انهم متطلقين صح سديم؟
سديم:ايه متطلقين
ام معاذ: ياويلي و راميه الولد عنده ليش مايعطيه امه؟
سديم:هو كان عند امه بس امه تزوجت
ام ناصر:ياويلي يالهحريم وشلون تتزوج وترمي عيالها؟
ام معاذ:وين رمته الله يصلحك ياام ناصر الولد عند ابوه وبعدين اذا هي صغيره ليش ماتشوف مستقبلها؟
ام سديم:لاوالله اربي ولدي واقعد وش نبي بالزواج الا الذريه
ـ ـ ـ ويطول الحديث بهذا الموضوع
سما بصوت قصير:اقول بنات خلونا نطلع للبحر امهاتنا بدوا بالعرس ماراح يخلصون
كل البنات:هههههه
وقفوا وطلعوا للبحر يتمشون وطبعا مهند معهم

شـــالـــيه ابــوســديـــم
طلعت ريوف وهي تمشي بين الشاليهات وقفت ""لحظه وينه شاليهم (تقصد شاليه ابومعاذ) ياويلي كم رقمه خلني اكلم سديم""افتحت شنطتها وهي تتدور جوالها""وينه ااف لالا مو وقت اني انساه ااف ياربي حتى مامعي مفتاح شاليهنا ياربي خليني امشي يمكن اعرفهم والا اشوف احد منهم"" صارت تمشي وتمشي بس مالقت شي ""اااف تعبت"" قعدت ع طرف الرصيف وحطت شنطتها بحضنها:ااف هذي حاله باالله كاني شحاذه

كان معاذ يمشي وهو شايل كيس ولابس نظاره شمسيه  ويططق بالايفون

ناظرته ريوف بطرف عينها ""صدق شباب هاليومين صاروا بس اهتمامهم البس (وقفت بسرعه) مو هذا صديق ناصر"" (لاشعوريا صارت تحرك يدها وكانها تقول مع السلامه) هيه انت ..

لف معاذ باستغراب وصار يناظرها فصخ نظاراته ومسكها بيده ورفع حاجبه:نعم؟
وقفت عنده ريوف وهي تلهث من الركض اشرت ع نفسها:اا انا بنت عم ناصر كنت طالعه من شاليهنا ونسيت (بخجل وهي تنزل راسها) نسيت مكان شاليهكم وجوالي ماهو معي
ناظر عيونها معاذ""هذي ريوف الا ريوف هذا صوتها"" ابتسم بفرحه:ماعليك امشي معي اوصلك انا اصلا رايح له
هزت راسها ريوف وصارت تمشي معه بس بينهم مسافه كبيره والصمت هو سيد الموقف..

الـــمـــطــــار
كانت حلا قاعده ع كرسي وحاطه شنطتها بحضنها ومرجعه راسها ع وراء ومغمضه عيونها تنتظر يعلنون عن رحلتهم
وقف فوقها وهو ماسك بيدينه كوبين عصير:حلا
فتحت عيونها وناظرته بدون ماتقول أي شي
مد لها العصير:تفضلي
حلا بهدوء:مو مشتهيه
سلمان بحده:خوذيه انتي ماكلتي شي من امس
حلا بقهر:قلت لك مو مشتهيه ماابي
عصب سلمان وحط العصير ع الطاوله وجلس وصار يشرب عصيره بهدوء ثواني واعلنوا عن رحلتهم وقف:يلا
وقفت وهي تشوفه يسحب شنطه ويمشي صارت تتامله لفت وجهها وصارت تناظر الناس ..
وقف ولف لها وبعصبيه:حلا
لفت وناظرته بخيبه امل""كلهم نفس الاسماء بس الاشخاص يختلفون"" مشت وراءه وكل دقيقه تلتف وراءها لين ركبوا الطياره وجلسوا بامكانهم كانت عند النافذه ركت راسها ع المرتبه وحطت يدها ع النافذه تلامس القزاز غمضت عيونها ..

بـــيـــت ابـــووســــن
جــنــاح وســـن والــجــوري

فتح تركي علبه الاسعافات الصغيره واخذ المسحه الطبيه ومسك ذقن وسن ورفعه وصار يمسح الجرح اللي عند شفايفها
عضت ع شفايفها بالالم لانه احرقها اطلقت اه خفيفه وحطت يدينها ع يده وهي تغمض عيونها:اه يعور
ناظرها تركي بتامل""ليته فيني ولا فيك ااه ماتدري اهاتك وش تسوي فيني"" وبصدق:لاتخافين مابعورك
فتحت عيونها وناظرته لمست الصدق بصوته هزت راسها وبعدت يدينها عن يدينه وهي تحطها بحضنه ونزلت عيونها ...

تركي""لا لاتتركين يدي خلي يدينك عليها"" تنهد وبهمس: بسم الله (وصار يمسحه ع خفيف وتمنى ان فيه مسحه تمسح جروحنا والا تمسح الماضي كان اشتراها لو هي بالملايين)

**بــــيـــت ابــوفــهـــد

كانوا جالسين كلهم بالحوش ويسالفون ويضحكون انطق الجرس وراحت تركض ريماز
ريماز وهي تصرخ:فارس
ضحكت قمر ونزلت وشالتها وهي تسحب خشمها:وشلون الحلوه؟
ريماز:ههه طيبه
ام فهد بصوت عالي:تعال يمه ادخل
نزلت راسها قمر:لا ماله داعي خالتي بس جيت بسلم ع عمي لانه ماجاء اليوم للبقاله
فهد بصوت عالي: فارس تعال البنات متغطيات
رفعت راسها وناظرته وابتسمت ماتقدر ترفض له أي طلب:طيب (مشت لهم ونزلت ريماز وباست راس ابوفهد والجده وام فهد وقعدت صاروا يسالفون ويضحكون تمنت هذي اللحظه تتطول وتبقى تمنت تغمض عيونها وتفتحها وتلاقيهم هم نفسهم مافيه شي خرب بينهم)!

الـــشــالــيــهــات
دق جوال خالد الراسي ناظره وكان رقم غريب رد:الو
....:خالد الراسي؟
خالد باستغراب:ايه من معي؟
ابتسم بخبث:مو مهم تبي تعرف وين بنتك قمر؟
عقد حواجبه و وقف وطلع بسرعه:انت من؟
.....:مو مهم اذا تبي تعرف بنتك وش تسوي ارجع للشركه وبتلقى هناك ظرف افتحه وشوفه (ضحك باستهزاء) ههه شوف بنتك سلام
خالد:الووو (بعد الجوال وصار يناظره ""من هذا اكيد يمزح"" دق بسرعه ع سكرتيره) الو فيه ظرف جاء لي (بلع ريقه) من جابه (تنهد) ماتعرف طيب انا جاي (سكر ومشى بسرعه للسياره اشر للسواق وركب) راح الشركه بسرعة ..

شـــالـــيـــة ابــومــعـــاذ
وقفوا معاذ وريوف عند الباب ولفوا لبعض
ريوف بحياء:مشكور
معاذ وهو يتاملها:ماسويت الا الواجب (فتح الباب بالمفتاح)ةتفضلي
رفعت راسها وناظرته هزت راسها ودخلت ثواني ودخل هو وراءها
سلمت ريوف وبتساءل:وين البنات؟
ام سديم: طلعوا برا الحقيهم
ريوف بابتسامه:طيب عن اذنكم اجل
الكل:اذنك معك
معاذ من وراء الباب: يمه عطيت الكيس اشغاله تامريني بشي؟؟
ام معاذ:سلامتك يمه

الــبـــنـــات
ريوف وهي تشوفهم من بعيد صرخت:بنات
لفوا كلهم لها يارا:هاه هذي ريوف
قربت ريوف وسلمت عليهم:صباح الخير
كلهم:صباح النور..صباح الورد
اما سما قالت:صباحك انا
ضحكوا كلهم:هههههه
ساره:ثقه
سما بغرور مازح: مايحق لي؟
اميره:اوه الا يحق لك ونص بعد
سما:هههههه
سديم:بنات وش رايكم نروح لهذاك الكافي
ناظروا كل البنات الكافي وقالوا بحماس:يلا قدام..تيب>>ريناد هع

شـــركــه خـالــد الــراســي
كان يمشي بسرعه متجاهل كل اللي ياقفون احتراما له دخل مكتبه وقعد ثواني وطق الباب:ادخل
دخل السكرتير:تفضل طال عمرك هذا هو الظرف
اخذه خالد وهو يبلع ريقه:طيب اطلع وسكر الباب ولا احد يدخل فاهم؟
السكرتير:حاضر طال عمرك (وطلع وسكر الباب)
تنهد بخوف مايدري ليش يحس هذا الظرف وراءه مصيبه:بسم الله (فتحه وهو مصدوم من اللي قاعد يشوفه معقوله هذي بنتهةهذي بنت عبير هذي تربيتها هذي تحمل اسمه هذي بنت الراسي وقف بعصبيه ورمى كل الصور بالارض وصدره يرتفع وينزل انتبه لورقه صغيره داخل الظرف سحبها ولقى مكتوب عنوان ومكتوب تحته ""بتلقى بنتك هناك""" جمع الصور ودخلها الظرف واخذه وطلع بسرعه وركب السياره ومد الورقه للسواق:رح لهذا المكان بسرعه
هز راسه السواق ومشى

بـــيـــت ابــوفـــهـــد
وقف مشاري سيارته وهو بيدخل البيت لفت انتباه ظرف عند العتبه سحبه وهو يناظره باستغراب فتح الباب ودخل قرب لهم:السلام عليكم
الكل:وعليكم السلام
ابوفهد باستغراب:وش هذا اللي بيدك؟
مشاري:مدري لقيته عند الباب
ابوفهد وهو يمد يده:هاته
مده له مشاري:تفضل
اخذه ابوفهد وفتحه عقد حواجبه""صور"" سحب اول صوره وكانت لبنت لابسه قميص قصير للحظه رفع راسه بصدمه وهو يناظر فارس او قمر وهي تضحك مع مشاري وفهد نفس العيون نفس الخشم نفس كل شي بس هذا له صدر هذا بنت سحب بسرعه الصوره اللي بعدها كان فارس او قمر ضامه فهد بطريقه كانهم ولد وبنت بلع ريقه كلها صور غريبه غريبه بالنسبه له انتبه لذاكره حقت جوال طلع جواله بسرعه وفتحه ودخل الذاكره وانصدم من المقطع اللي طلع والصوت كان عالي
خلى الكل يتلفت
فهد باستغراب بس تحولت ملامح الاستغراب لصدمه وذهول هذا صوته هذا صوت قمر
اما قمر بالبدايه استغرابت بس بعدين صدمه من وين عمها شاف هذا الموقف وشلون انتبهت للصور اللي بحضنه هذي صورتها لحظه هذي بشقتها وهذي مع فهد لما كانوا بالبحر وهذي وهذي ماقدرت تتكلم او تعبر باي شي
قطع صمت الكل واستغرابهم الجرس اللي صار يدق بشكل غريب ومخيف
ماتدري ليش قمر حست ان هذا الجرس لها ايه لها هي
فتحت ريماز بس رجعت بسرعه بخوف من الرجال اللي دخل
وقفت قمر ولفت وهي تشوف ابوها للحظه ليش هذا يصير كذا هذا حلم اكيد انه حلم ماتستحمل يصير كل هذا بالسرعه هذي
مشاري وهو ياقف: هيه من انت و وين داخل ؟
خالد وهو يمسك ذراع قمر بقوة:هذا انتي؟

فهد اللي عصب ووقف بسرعه ودف خالد بقوه عن قمر: بعد عنها
وقفوا كلهم بصدمه:عنها ليش فهد ياانث فارس ومن هذا الرجال وليش يقول لفارس انتيةوليش ابوفهد كان يسمع مقطع فيه صوت فهد وبنت وش السالفه؟
ابوفهد وهو يقرب:وشفيه فهد فهمني؟
خالد بصراخ: بعد عن بنتي
الكل شهق بصدمه:بنته بنتك وشلون؟
الكل تحولت نظراتهم لقمر اللي تمسكت بثوب فهد من وراء وعيونها بالارض ودموعها تمشي ع خدودها ماكان هامها ايش راح يصير لها اللي كان هامها ان كل شي انتهى فهد والعيله اختفوا؟
مشاري بصدمه:أي بنت انت وش تقول؟
خالد بصراخ: قمر امشي بسرعه انتوا ماتعرفون من انا ماتدرون ايش راح اسوي فيكم وشلون تسوون ببنتي كذا وشلوون؟
فهد بعصبيه: اطلع من هنا مالك بنت عندنا
وقف خالد للحظه وكانه تذكر شي:لحظه انت جيت معها ذيك المره الا مو قلت انك زوجها
الكل لفوا لفهد بصدمه ايش اللي قاعد يصير هذا مقلب ولا حلم ولا ايش الكل يبي يفهم بس اكيد العقل مابيقدر يترجم بهذا الوقت
ابوفهد وهو يقرب لفهد وقمر بصدمه:فهموني  فارس انا اعتبرتك ولدي تكلم قوليلي
شهقت قمر بقوة ماقدرت تستحمل كلمات ابوفهد البسيطه بس كانت قويه بنفسها قويه وصعبه شهقت اكثر رفعت عيونها لابوفهد وهي تشاهق:سامحني
الكل انصدم من الصوت الانثوي اللي طلع من فم فارس
فهد بعصبيه: قلت لك اطلع ما تفهم مالك بنت عندي يلا انقلع توك تتذكر توك يلا
خالد وهو يلف ودخلوا اثنين رجال كبار وضخام:شوف اذا مابعدت وربي اني لاخليهم يكسرون كل ضلع بجسمك وبرفع عليك قضيه بخطف بنتي
قمر بسرعه وهي تصير قدام فهد وتلف يدينها حوله:لالا اتركه خلاص  بروح معك بس لاتسوي له شي
فهد بقهر وهو يحط يدينه ع كتوف قمر:قمر بعدي بعدي
قمر وهي تلف له وتبكي بقوة: لالا مااقدر
فهد اللي عصب دف قمر بقوة: قرب وجرب حظك
لف خالد واشر للرجال اللي هجموا ع فهد بس مشاري وابوفهد صاروا يضربون ..
صرخت قمر وهي بالارض وقفت بسرعه وهي تركض لفهد بس قبل ماتاصل له فيه يد مسكت معصمها بقوه لفت وهي تشوف ابوها:ااه  اتركني اتركني
صار يسحبها بقوة لف يده الثانيه حول بطنها وهو شوي يسحبها وشوي يرفعها عن الارض
كانت تصارخ وهي تحرك يدينها ورجولها وتحاول تفلت منه: فهد ففههد اااه اااه
كان الكل يصارخ والا يشاهق مافيه الا الازعاج الازعاج وبس
وقف فهد وهو يترنح ومافيه أي صوت يسمعه مايشوف الا صورتها البعيده وهي تحرك يدينها وتحرك شفايفها والدموع مغرقه وجهها وما بين ابوها يرفعها ومابين تتطيح بالارض ويرجع يمسكها شهق بقوة وهو يشوفها اختفت لانها صارت برا البيت غمض عيونه وطاح ع الارض
ام فهد بصرخه عاليه وهي بالارض وتشاهق من البكي: فهد

قـويت بلحظة وداعگ أدآري دمعتي لآتطيح |||
لگـن يـوم أنآ آقفيت عجزت وطحت أنآ گـلي !

دفها خالد بقوة داخل السياره وضربها كف قوي:  بسسسس
صارت تبكي بقوه وتصارخ صارت تضربه:اتركني ااااه بس بشوفه (بهمس) اخر مره اخر مره (بس السياره تحركت ومشت وبدت تبعد عن بيت ابوفهد حطت يدينها ع القزاز وهي تضربه وتشاهق هنا عاشت احلى ايام حياتها لفت وهي تشوف بقاله ابوفهد هنا ضحكت هنا بكت بس كلها كانت حلوه شهقت بقوة وهي تشوف بين عيونها وجهه فهد وهو يبتسم شهقت بقوة صارت ترمش حطت يدها ع صدرها تحس ماعاد فيه اوكسجين بالجو ثواني وطاحت
لف لها ابوها بصدمه وصار يطق خدها:قمر قمر ردي علي قمر
صارت ترمش والدموع تنزل من عيونها والدنيا تروح وتجي ماعاد تسمع الا صوته صوت ضحكته صوته لما ينادي اسمها غمضت عيوونها وصارت الدنيا ظلام

الـــمـــســتــشــفـــى
صار يفتح عيونه ويغمضها انوار كثيره بعيونه بس لحظه هذي هي قمر مد يده لفوق وكانه يبي يلمس وجهها اللي يشوفه بس اختفت شهق بقوة والانوار تختفي وترجع رفع عيونه وشاف ابوه ومشاري وامه وممرضات كان حاس انه طاير ياترى هو جد طاير والا هم اللي طايرين فيني؟

دخلوا ولفت لهم الممرضه:ممنوع الدخول
لفوا للنافذه الوسيعه اللي تتطل ع الغرفه وهم يناظرونه
صارت عيون ام فهد تنتقل بين ولدها وبين الجهاز اللي صار يصدر صوت غريب خلا الكل اللي بالغرفه يركضون فجأه صاروا ايش يسوون لحظه ينعشون قلبي ولدي ليش فجأه كل شي صار هادي هادي صرخت ام فهد وهي تتطيح ع ركبها:ففففففففههههههههههههههههدددد

#يـــتـــــبـــع...

🎼

🎻🎻

#خلص_الوقت
.....

خلص الوقت ، ولازم روح
صار لازم روح
امانه عندك بعد الروح
خلي بالك على روحي
داوي ع مهلك بالوفا جروحي
وبكرة برجع بشوفك نصيبي
راح خبي روحي بعيونك
وإنتي غفيها
لو شرقت بكرة من دونك
شو بدي فيها
وإذا بدك ، إبئا حدك ، من خدك
انا باخذ روحي
عشقي
نزل الليل ، وقلبي صار
أنا قلبي صار
مثل اللي محروق بنار
وبدو نار
بعدك ع مهلك
بالهوى صغيره
ويالحب شو بيسوى
بلا غيره
ونصيبك ، غيرتي عليكي
نصيبك ، تعشقي جراح
مجروح
نزل الليل ، وقلبي صار
أنا قلبي صار
مثل اللي محروق بنار
وبدو نار
بعدك ع مهلك
بالهوى صغيره
ويالحب شو بيسوى
بلا غيره
ونصيبك ، غيرتي عليكي
نصيبك ، تعشقي جراح

🎼

🎻🎻
الفيديو يعبر عن الموقف