رواية أخطاء لايُمحيها الزمن الفصل الخامس والعشرون 25 - بقلم أنثى 🪽 ملائكية

انثى 💜 ملائكيه

اخطاء لايُمحيها الزمن

نهى ...البنات ضاجن من تصرف جوري ولان بالغت بعصبيتها كالن راح نسوي ابلاغ عليها....اني رحت ع مسئولتنه وكتلها سالفه ..

المسؤله ... معليج بيهن ولاتخافين ميسون شي دام اني وياكم....

نهى ...فدوه لعينج وجوري تره متعرف خطيه وهي تعبانه نفسيتها تعرفين تريد بس تصير حامل ..

المسؤله ...بتفهم .. اي ادري بيها لبنيه حجتلي وعرفت سالفتها فـ انتي لاتشيلين هم بعد...

نهى ... بأمتنان ...حبيبتي مشكوره...

جوري .. رجعتلي مرت عمي واني كاعده جنت ومخليه راسي بين رجليه وابجي بحركة كلب اعصابي تلفانه حيل..

نهى ... جوري ترى ميصير هيج شوفي شلون ضاجن ورادن يسون ابلاغ شوي تحكمي بعصبيتج والمسؤله خطية تفهمت وضعج ومشت الامور ....

جوري ..واني امسح دموعي تنزل مثل شلال ... عشتو عود يهددن ومنو هاي كالتلج هيج...صكيت سنوني .... هسه كون اروحلها واطلع ضيم قهري بيها ....

نهى ... يمعوده مشيها متسوه تتعاركين وداعتج ..

جوري ... وهسه شلون بيه الابره غاليه 30 خوب اني مذابه نوه...

نهى ..... صبري هسه اشوفلج بلكي وحده منا تعرف تضرب ابر ...

جوري ......كامت مرت عمي وراحت سالت وحده كالتلها اني اعرف اضرب ابر كلت اي وخيرا تنفست واني مرتاحه واخيرا نزاح همي نطيت الها ابره اشو شافتها كاالت..

.. هاي لازم بين جلد ماعرف شلون ...

جوري ...بقلق ...زين خاله متعرفين ...

كالت بحيرة ... مامجربه صراحه ، ط...

جوري .. فريت ايدي ...عادي جربي بيه هيه مليوصه مليوصه ...بعدين اجتي بنيه تطلع  بكدي ..

.. شكو شبيكم ..

المضمدة ...اني مامجربه اضرب من هاي ابر...

... عادي مو اله بلعضله هم ترهم اني ماخذه هيج ابر ..

..عاد والله من كالت لبنيه اطمئنت وخطيه ضربتليها..وفضت سالفه عمتي ندى جانت بلواجب طلعت ويه اول وجبه لان قسمونه وجبات  لمن خلص للواجب مالت عمتي ندى وكعدت مرت عمي تسولفلها ع ابره وع ندى خربت ضحك حته الي خلني اضحك كد ماحششن ..

.. لليل وصار الواجب النه وهنا اتملكني الخوف وارجف اجت المسئوله صاحت ع اسم اسم ومن ضمنهم اسمي ومرت عمي ويه غير وجبه صارت افترقنه...

ظظ..اني ويه وجبتي بس 4 نسوان وياي من محافظتي و4من محافظة الناصريه المهم نطونه وشاح نلبسه ع كتف حته يعرفونه احنه متطوعات....

..وصفولنه المكان الي ننزل بي نفتش ، باب الكرامه مدخل الامام..رحنه هناك سوينه تبديل الي جانو يفتشون قبلنه نسحبو واحنه مكانهم..المسئوله علينه جانت منتسبه يعني مو مثل متطوعه..

المسؤله ... يلا عيني بنات بلاكسل و ع سريع الزمو قواطع صار ازدحام ..

جوري .. اني بعدني واكفه وحده جانت واكفه ع قاطع صاحتني..

.. تعاي حبيبتي اوكفي مكاني ..

جوري ..رحت ليمها واني كوه ميسطره ع نفسي كد ماتملكني الخوف شافتني وشحب لون وجهي وجف ريگي وصرت مو ع بعضي.

...بنتي شبيج ..

جوري ..بلعت ريكي بصعوبة .... هااا يعني هسه اني راح افتش الناس ..

...اي لعد انتي جايه هنا شتسوين تاخذيلهم صور ...

جوري .. عوجت حلگي يعني متضحك وهي هزت ايدها عاد هزيتلها راسي بمعنى اي وهيه راحت باوعت هواي اكو قواطع وكل وحده لزمتلها سره..

....اني واكفه بنص القواطع واحس راح ابدي معركه او مهمه صعبه واني واكفه افرك ايدي بتوتر فتحته القاطع وكامت تجي النسوان عليه افتشهم بلعت ريكي يمه بسم الله وكفت وحده وفتحتلي ايدها
رفعت عيوني نوب هيه طويله ضخمه خرب كوه رفعت نفسي الها فتشتها من راسها ولجوه شفتها محزمه بكلبي كلت عزه خاف هاي مفخخه باوعته الي بصفي جاي تفتش بلجنط همست بخوف ...  اكلج هاي محزمه..

... كالت اي كليلها تفتحا..

جوري ..باوعت واني مرتبكه ومترددة استجمعت قوتي وكلت .. خاله لحزام خطيه هيه هم بسرعه فتحته..

المرة ..بتفهم ...هذا الحزام مال ضهري اسم الله عليج عندي مفاصل ...

جوري ..واني بكلبي ضحكت خرب بعقلج جوري والله اخترع افلام جهنميه مالهليوود واني عبالي حزام ناسف ويطشرنه فريت راسي ورجعت اكمل تفتيش المهم خلصتها وراحت اجت لورها ابنيه ابتسمتلي وكالت..

.. الله يقويج خيه ..

جوري ... تسلمين... فتشتها وراحت ورها ورها استمريت بلربع ساعه واني افتش بلناس  جنت دائما اسمع من المنتسبات او مسئولات يكولن اكو يجون زوار لمن نفتشها تتجاوز عليج او تضربج او او...كل هذا اذا شفتي لازم تسكتين هذا شي من سمعت هيج كلش ضجت كلت اني مو كدها بس بعدين لمن اجيت وخدمت شفت العكس الحمدالله مسمعت غير الكلام الحلو من الناس ودعواتهم الي وحته بكلامهم خلوني اتشجع اكثر وحبيت شغلت التفتيش هواي واني واكفه واخدم الامام ادعي بگلبي يحققلي كل الي اتمنى ...

..صار وقت الاستراحه الي كعدت واجت وحده مكاني وكفت صار يعني تبادل..سالتني المسئوله..

.. ها تعبتي جوري..

جوري ..  لاخاله اصلا ماكو اي تعب بلعكس حلوه الخدمه ..

المسؤله ..ماجوره حبيبتي ينطيج مرادج ..

جوري ..تسلمين امراد الجميع ان شالله..استمرينه ع هذا الحال اربعه ساعات من ساعه 10بليل الى 2..وكل 10دقايق ينطونه استراحه واني كثر مافتشت صارت عندي شغله عاديه وحته الخوف راح مني صرت اكيف لو يجون يكلولي تعاي جوري اوكفي فتشي..

....بلبدايه ماعرف ليش استعصبتها للشغله وخفت منها يمكن لان اول مره ، بس بل استمراريه والتعويد تصير عنده شغله سهله ، وبنفس الوقت خليت الامور ع الله واهل البيت  همه الي وكفو وياي  وساعدوني وقويت نفسي والحمدالله شوي صارت عندي جراءه....

..انتهى الواجب وسحبونه واجو مكانه بديلات واحنه رجعنه لمكانه لكيت عمتي ندى ومرت عمي خطيه نايمات من التعب واني لحد الان منايمه نومه طايره من عيني ماعرف ليش...

...فتحت الجنطه واخذتلي الغسول ماال وجهه وصعدت فوك للحمامات اغسل..رحت للمغساله جلفت وجهي زين اباوع نفسي بلمرايه عيوني جوه سواد لان مدنام اجت وحده وكفت تريد تغسل سوتلها مجال واني جنت مخليه الغسول ماتي ع مغسله جان تكلي

.....هذا الج ....

تأشر ع الغسول كتلها.. اي حبي ...
باوعتلي كالتلي... بس انتي حلوه بشرتج ليش تستعملينه   شوفي اني وجهي بي حبوب وبشرتي حيل تعبانه شسويله يفيدني الغسول اذا اجيب مثله..

..ابتسمت وكلت بداخلي هسه شكالولج عليه خبيرة تجميل مثلا..كتلها حبيبتي ماعرف يفيدج او لا بس كـ نصيحه استعملي اشياء طبيعيه وخليها ع بشرتج يكون احسن وهذا الغسول اني استعمله مكان صابون لان بشرتي تحسس من صابون....

كالت هاها اوك حبيبتي مشكوره

كتلها ادللي وراحت..اني هم خلصت ونزلت
جوه لكيت البنات كاعدات رحت يمهم وجنت داشرب ماي فـ وحده اسمها حنان حجت وياي ...

حنان.... جوري صدوك انتي متزوجه ...

جوري...اي ليش ....

حنان .يا ولج واني عبالي بعدج عزباااء ..

جوري .......اني غصيت بلماي وضحكت من كالت عزباء كتللها ....خرب بيومج حنان عززباء شنو ...بقينه نضحك ونسولف..خاصتن سوالف حنان تخرب ضحك طبعاً هنا مسموح النه وكت الاستراحه عادي نسولف ونضحك بس وقت الخدمه ممنوع سوالف فـ بهذا الوقت ناخذ راحتنه ونبقه كاعدين ناكل ونشرب لحد مصارت ساعه 3 مددنه بلكع نوب اني هم مكدرت انام مو بيدي غمضت عيوني بتعب غفيت شوي بس عبالك جنت بين نايمه والكاعده مامرتاحه بنومتي ساعه وكعدت الفجر شفت الكل كاعد جانو يتهيئون للصلاة...

....هنا كربلاء اني التزمت بصلاتي لان وياهم بوقت بوقتها هاي لو هناك بلبيت اصلا كوه اكوم اصلي..بس هنا الاجواء روحانيه وحلوه وكلنه بلمه وحده نوكف نصلي وبعدها نقره الزياره وبعدها نتريك ونخلص لحد مصار الضهر صار النه واجب بل الامام الحسين  بلضريح الحمدالله طلع اسمي هناك نزلنه بمجرد بس شفت الضىريح كبالي لااردي نزلت دموعي حيل مشتاقه ازوره انطونه تعاليم انو شلون نمشي بلزوار ومنخلي المكان مزدحم نطونه الريش حته يعرفونه احنه متطوعات اني صارت وكفتي يم شباك الامام وامشي بلزوار ....

وكفت وهنا وصار ازدحام ع شباك كمت اكلهن ...يلا عيني زايره اتحركي رحم الله وليدج سوي مجال لغيرج ...ومن هلكلام احجي احس صوتي طبك كثر مااعيد الكلام وياهن ، بقيت واكفه واهنا دموعي ماوكفت جنت ابجي واشكيله للامام بس مابين للناس مشفت اله وحده سحبت مني االريشه كالتلي ..

...فدوه مسحيلي ع بطني مديصير حمل واريدج تندعيلي ....

...بس كلتلي اختنكت وجيت ابجي حسيت بيها خطيه كتلها اخذيها انتي ريشه واطلبي مراد اخذتها مني وضلت تمسح ع بطنها وتبجي وتندعي كبال الامام مسحت دموعها ورجعتليها للريشه كتلها ...حبيبتي مقضيه حاجتج بحق عبدالله الرضيع ..

باوعتلي ونزلت دموعها ودارت وجهه وراحت بداخلي بقيت اندعي لكل محروم يفرح كلبه حته لنفسي ماندعيت كثر ماندعيت للاخرين..صارت الناس بس تشوفني تجي تاخذ مني بركات ويكللي علويه عود لانه واكفه واني خادمت الامام الحسين هاي تمسح بيدي ولخ تمسح ع ضهري واكو البعض يطلبون مني الدعاء اندعيلهم باوعت الناس كلها عندها هموم ومشاكل ماكو

ماكو واحد بينه مرتاح هواي شفت نسوان يبجن حيل ويعيطن ويحجن حجي والله يكزبر الجلد..بعدني امشي بلزوار وجتي وحده تتوسل بيه فدوه اروحلج خيه اخذي ابني زورينه الامام وامسحيله ع وجهه...باوعتها كتلها خاله عذريني ماكدر فوكاي كامرات راح اسويلج مجال وانتي زورينه..وكفت ع طبله نصعد عليها حته اسيطر ع الناس وامشيها بساع..

كتلهن خواتي بس شوي سولي مجال افوت كامن يدافعن هواي صار ازدحام المهم اني كدرت اسويلها مجال واجت زورت ابنها واتشكرت مني وراحت..بقيت فتره طويله واني ع وكفت الوحده حسيت ضهري انكسر وكوه واكفه وصار عندي وجع براسي لان مدنام ،

بعدين اجت المسئوله كالت ....جوري اسفه طولنه عليج بس صارت مشكله ويانه وهسه كدرنه نحل المشكله ورجعو المتطوعات وبعد شوي تجي وحده مكانج وانتي كعدي ارتاحي....

..جوري ....كتلها عادي خاله ...مكتلها شي لانو ماحبيت ادخل وبعدين اذا حجيت وكتلها يوجعني ضهري هسه تكلي احنه مو كلنه لازم نتحمل كلشي فـ لهذا مكتلها شي لحد مااجت وحده مكاني ورحت كعدت ع صفحه كوه كعدت لان ضهري كلش اتشنج بس بلحظتها نسيت الالم والوجع كبالي الامام حطيت راسي ع باب ودموعي تنزل عشره عشره تذكرت كلشي مريت بي بقيت اشكيله حالي تعبت حيل

واني بلنص ساعه كاعده خلص وقت الاستراحه ورجعت وكفت وع هاي حاله مستمرين نمشي بلزاور ويايه اكثر من وحده وهم منلحك ع كثر الازدحام لحد ماخف الازدحام العالم هناك و المنتسبات شغلن المكانيس الكهربائيه وبدو ينضفون الضريح فـ صاحتلي المسئوله

..تعاي جوري ويانه...

اخذت المكنسه ارفع زوالي من جواهن وانضف فـ ناس تجي تركض تلم من الكع اذا جان اكو  تراب رايات اي شي ياخذو للشفاء  بس لو تجون تباوعون عجيب عبالك مو تراب ولااكو شي اسمه وسخ  كله شي ع شي يلمع لمع دخليه لـ اباعبدالله  بقينه بالامام بل 5ساعات لحد ماخلص الواجب رجعنه هلمره صدك تعبت مو مثل تفتيش

..مرت يومين واحنه بكربلاء بيوم الاخير كالو الفجر تكون رجعتنه لبغداد ، فـ بليل اتفقو يسون سفرة ام البنين فـ هنا الكل شارك بلسفره والمتطوعات تبرعن بفلوس ع خمسه الالف او ع الف ع كد الامكانيه الواحد ويرحون يجيبون شغلات مال سفره مثل جكليت او كرزات حلقوم اي شي بعدين عمتي ندى ومرت عمي شاركو وكللي شاركي وطلبي امراد واني هم اتبرعت وره ساعه جابو الغراض وسون سفره كلش طويله ، لان العدد كلش هواي حته

من غير اهل بغداد شاركو ويانه وصارت بركه وخير من للله ...

نهى ...ولج دكومي شاركي وياهم وزعي جكليت ع سفره واندعي ...

جوري ...باوعتها صفح كتلها ..استحي ..

نهى ...كالتلي هو اني اريدج تستحين ، مسامعه انتي ، جانت اكو وحده مثلج كلش تستحي وجان عندهم مجلس بمحرم واجت عمتها تكلها نزلي جولي بنص نسوان حته ينطيها مرادها لبنيه عندت مقبلت تكلها استحي اجت عمتها ودخلتها بنص نسوان تكول هيه حيل ارتكبت ومتعرف حته تلطم مثل نسوان وهنه يضحكن عليها وكامت تبجي من فشله تكول صدكين وره شهر هاي لبنيه نطاها مرادها وتحقق الي تريده فـ عاد هسه انتي حتلو تخجلين ينطيج مرادج .....

جوري .....ع كلام مرت عمي قنعتني وكمت ويه نسوان اخذت علاكه مال كرزات وبديت اخلي بسفره واطلب حاجتي خلصنه وكعدو الكل كامن يقرن حديث الكساء وزيارات وحته قرن ملايه احو احو واني هنا بديت اطوطح من النعس رجعت ليوره وختلت وره عمتي بدون مااحد يحس بيه مددت بلكع وغمضت عيوني ونمت ومادري بروحي نوب صوت ملايه وهيه تنعي انعس بلزايد حسبالك تلوليلي وبعدين وماحسيت غير ع مرت عمي ....

نهى .... ندى ولج هاي جوري نامت ع صوت الملايه واني عبالي الكيها كاعده وتمسح بدموعها ....

ندى.... دعوفيها هسه شرايده منها للبنيه تعبت ونامت ..

جوري....طبعا اني جنت مخليه ايدي ع عيوني بس كاعده اسمعهن وكوه كاتمه ضحكتي..شوي وخرت ايدي شافني اثنينهن ..

كاللي يصباح الخير ..

جوري ..ابتسمت وكتلهن صباحو باوعت ساعه صارت 1بليل رجعت راسي وغمضت باوعتلي ع ندى ...

ندى ....جوري لاتنامين بعد ..

جوري ...ليش بلله ...

ندى ...ولج اكو واجب لخ....

جوري....اي بس اني بعد ماطلع والله تكسرت وحاسه نفسي راح اتمرض ....

ندى ....لعد منو جان يحجي ويكول اريد بعد انزل للواجب...

جوري .... ابتسمت صفح وكتلها... والله عمتو وكت الحاضر جوري خلصت صلاحيتهه غمضت عيوني بحساب نمت..

ندى ...يااا ولج راح ترجعين لـ علاوي خلصان الاكسباير عندج...

جوري ....ضحكت... عمتو  كافي لاتخليني احجي منا عالم تسمعني..

طكتها بضحكه ومرت عمي هم مصدكت كنكت ويه عمتي وبقن يضحكن هنا تذكرت علي بعد ماراسلته او خابرته اخذت موبايلي وخليته ع شحن فتح ولكيت مكالمات منه..دزيتله رساله كاعد حبيبي شفت ماعنده اتصال كلت خاف نايم كتبتله انو اليوم الصبح نرجع لبغداد وعفت موبايل ورحت يمههن الكل نامو نوب اني مكدرت بعد انام بقيت اسولف ويه البنات شفتهن كلهن حبابات ومرحات عبالك مثل لخوات للصبح صارت الصلا توضينه وصلينه بدينه نحضر بغراضنه ونعزل المكان ماعفنه شي هوسه حته فرش رتبناها كلشي رجعنا مثل الاول يلا طلعنه.....

. وره ساعتين علما جهزنه كلنه والمسئوله خابرت ع سايق يجي ياخذنه ، حجت ويانه

المسئوله.. عيني بنات البواشي من تطلعون يلا تنزعوها ميصير منا تنزعوها اله نطلع يلا منريد احد يعرفنه ....

اخذنه الجنط وامشينه مسافه اني كوه صرت امشي حته االبنات كلهم تعبو لحد مااجتنه الكوستر بالف ياعلي لان وكفنه والانتظار يملل..اتجهنه لبغداد تقريب جانت ساعه 6ونص الصبح..صارت 7وعلي اتصل بيه جاوبته الو

علي ... الو شلونج حبي ...

جوري ...حجيت بتعب.. الحمدالله وانته ..

علي ...حبي شبي صوتج ...

جوري ...مابي بس تعبانه واحنه هسه راجعين بلطريق

علي ...شوكت طلعتو ..

جوري ..تقريب قبل نص ساعه..

علي ...  يلا توصلون بسلامه اني رايح للشغل .

جوري ... ماشي حبي...

.........

يتبع

انثى ملائكيه

اخطاء لايُمحيها الزمن

ممكن متابعه للحلوات

faitma-altafili

horaa00