رواية أخترتك بنفسي الفصل الخامس 5 - بقلم Chra

بنفسي 5

حتى في أصغر أشيائك .. أبقى أتأمل وأراقب

أدهم : كاعد ويا جهالي على البحر ألعب واسبح وياهم أباوع على الناس شلون متونسين لو الازواج واحد بحضن اللاخ واني اتحسر اباوع على نسرين تاخذ صور الها وتخابر جماعتها حتى تتفشخر كدامهم وتستعرض نفسها .أتذكر قبل مانتزوج جانت تجي لبيت أختي جنت اني وام جلال كاعدين بالطابق الارضي ويا بيت ام احمد تجي يم أختي تتلوك وتساعدها لان جانت خياطة واني ويا ابو أحمد نشتغل حالتنا المادية جانت عادية وهي اهلها ماعدهم شي ياخذون مصروف يومي من ابو احمد شوية شوية جانت تتقرب مني هي وامها يوميه ارجع اشوفها يمنه واني بحكم دراستي وشغلي التهيت عن نفسي معرفت شنو علاقات او صداقات ويا بنات خواتي جانو يمدحون بيها يكولون كافي لازم تتزوج كبرت خلي نشوف جهالك كتلهم بكيفكم هو اني راح اتزوج خلي أخذ وحدة اعرفها احسن من
الغريبة مصار3 أشهر على زواجنا طلعت على حقيقتها.

نسرين : اول مرة ارتاح بسفرة الحمدالله خواتك مجايات ولو اعرف بيك جنت تتمنى يجون ويانه يخربون عليه ونستي اكولك صديقاتي مسويات باربكيو انت ابقى ويا الجهال اروح يمهم اني اشوفكم بالليل مو كل دقيقة تخابرني تفشلني يمتى مايخلص اني أخابرك حتى ترجعني.

ادهم: مراح ارد على سوالفج ماكو فايدة بيج اما بخصوص الباربكيو هاي مودة جديدة مطلعيها الشلة التعبانه تروحين بس اياني واياج أذا سمعت الحفلة مختلطة لو بيها شرب ولعب ورق راح أشوفج اللي عمرج مشفتي ولاتخابريني حتى ارجعج خليهم يرجعوج كومو لي لي وحمودي نروح للمطعم. تونست وياالجهال رحنا سينما اسواق العاب اشتريت هداية لخواتي طخم الماس لان اعرف نسرين مراح تشتريلهم شي حسيت براحة من هي مو ويانه حتى جهالي جانو متونسين ولايسألون عليها.

نسرين : اتونست بالحفلة اتحسر على شبابي مضيعتها من ورا أدهم الناس شون عايشة سيارات كل وحدة تستعرض سيارتها وسفرات وحدهم وهذا اللي عقله من زمن جدي ميقبل أسوق بنفسي مخليلنا سايق أتفشلت من سألوني ليش متسوقين أستغرب منهم يشربون جكاير يلعبون ورق مشروبات انواع اشكال جايبين رقاصات مع العلم كلهم نسوان حاولو أشرب وياهم مقبلت خفت أصير مدمنة بأخر الحفلة كل وحدة انطت هدية فلوس مجوهرات تبرعات لجمعية خيرية اني هم اتبرعت بفلوس اهواية اكثر منهم ردت أثبت نفسي أني حالتي المادية أحسن منهم .

أدهم : جنت طالع من الحمام انشف شعري نيمت الجهال ردت أغسل واطلع انام بالهول مالي خلك نسرين حسيت بايدها على كتافي وتبوسني ولابسة ثياب نوم استغربت حاضنتني اخذت مني المنشفة جانت تنشف شعري وتلمس جسمي لو اني اتخيل من ورا الحرمان لو نسرين مبدليها بوحدة ثانية.

نسرين: رجعت طول الطريق افكر شكول لأدهم تبرعت بملايين لجمعية ميصدكني واحتمال مينطيني راح افشل نفسي كدام النسوان وأصير علج بحلكهم بكل المجالس ياربي شسويت بنفسي شلون ورطة فكري نسرين حتى لو تبيعين ذهبج كلها متكدرين تكملين المبلغ ماكو غير شوية أدلل ادهم هالفترة لحد مايرضه دخلت للجناح سمعت صوت المي عرفت بالحمام على السريع بدلت ثيابي دخلت للحمام بقيت ابوسه واحضنه وهو ممصدك كمت ادلع واحجي كلمات طيرت عقله لأول مرة اتغازل بيه واكوله اريدك الليلة😉

أدهم :كعدت الصبح اباوع هي نايمه وحاضنتني شنو سالفتها اللي صار بالليل حقيقة مو حلم الله يستر منج بستها ام حمودي كعدي تأخر الوقت خلي نطلع نتونس باقيلنا يوم ونرجع مقبلت جرتني للفراش😍

داليا: كملت العطلة اول يوم بالدوام جاية نشيطه سلمت عليهم كعدنا اني وميادة عرفت شهد زوجها مبطلها جنا نتناقش اني وياها بموضوع الزواج كتلها لو أموت ماابطل دوام من ورا زوجي تعبي وتعب أهلي تروح على الفاضي زوجي على عيني وراسي راح احاول اوفق بينه وبين شغلي بس ماعوف تعبي يروح بلاش ويضيع مستقبلي أخذ مصروف منه بطلعة الروح.

ميادة : اعصابج عيني صرتي نار والله اكولج بس تتزوجين بكلمة يبطلج بعدج ممجربه حضن الرجال لسانج الطويل راح ينقصر يسكتج بوسة جم كلمة جم حركة ينسيج أسمج تصيرين ثولة .

داليا : هاي ليلى من تشوف رمزي تصير ثولة والله من سوالفج مبينه عليج راح تطلعين أثول منها شوفي ميادة هاي البينة اللي تتقرب من عدنه اللي حجيت عليها تطلع بنت الصاك ميادة صارت😦جتي ليان بدون متسلم كالت ميادة اريد أحجي وياج بموضوع خاص جرتها وراحت أني انصطرت شنو قلة الادب وتكول ميادة عزا لايكون كرايبهم منتظرت ترجع ميادة شلت غراضي أخذت اذن من المديرة أجرت تكسي واني ارجف من الاحراج والعصبية عمري مشايفة هيجي وحدة مثل ليان عديمة تربية وصلت خابرت ليلى أحجي وأبجي من الفشله.

ليلى : خابرتني داليا منهارة تتوسل اسافر اروح يمها كلبي نار عليها ماعرف شلون اقنع رمزي خابرته 7 مرات يالله يجاوب وكلامه قليل بس يريد يخلص مني بحجه مشغول بدون مبرر وافق استغربت شلون قبل بدون تعويضات ومتروحين وحدج ومن هالسوالف اخذت أجازة واتوسلت بأبويه يوديني .

ميادة: كلش انحرجت من الموقف السخيف اللي خلتني بيه ليان لاتحترمني لأن اكبر منها ولا مكانتي بأعتبار مدرستها اول مابتعدنا عن داليا كتلها متستحين جارتني كدام مدرستج وتكولين عليه ميادة حاف يمتى تتعلمين تحترمين الاكبر منج صوج امج مكبره راسج وليش متسلمين شنو شايفه نفسج امشي ولي مرة ثانية اكسر راسج اذا عدتيها أدبسز.رجعت شفت داليا طالعه خابرتها مجاوبتني دزيتلها رساله اعتذار تليفونها مقفول رجعت للبيت نمت كمت على صياح عمتي.

نسرين: تعاي ولج ميادة خاتون شلون تفشلين بنتي كدام صديقاتها متستحين ياعانس انتي بكد أمها مو عيب عليج مخليه راسج براسها ومنو هاي (كح) تحجين على بنتي علمودها تسلم لو لا تحجين عليه تكولين ماعرف اربي تعاي ام احمد لزمي بنتج لا والقرأن اخلي اخويه يطلكج الله ياخذكم مادري يمتى ارتاح منكم شوفي ياعانس تطلعين حركتج على غير واحد مو على جهالي تزوجي وريحي نفسج دواج رجال يلفج ادبسز.

ميادة : من ورا الدموع صوتي ميطلع حسيت نفسي مكطوع كوه اجر كل حجيها عليه بكفه واني ادور رجال بكفه ياريتني ميته ولا اسمع هالحجي اني اللي عمري مرخصت نفسي واسم عائلتي تجي اقرب ناس اليه تتهمني بشرفي وأخلاقي من ورا بنتها المراهقة هاي مو أول مرة بس مراح أسكت دايما امي متقبل احجي او انقل سوالفها وتعاملها لا لأبويه ولا لخالي تكولي لاتسوين مشكلة عقلها صغير.

أدهم: طلعت من الشغل دايخ وجوعان بس اريد أكل وانام اول مافتحت باب الصالة شفت نسرين صايره💪😤سلمت من ورا خشمها ردت عليه بوست حمودي كال بابا ماما اليوم ربت بنت أخوك أنداريت عليها جتي ليان تبجي وتشهك يالله شكو.

نسرين: تعاي ليان سمعي ابوج اشسوت بيج بنت عمتج المصون كدام الغربة شلون فشلتج وخلت صديقاتج يضحكون عليج العانس اليوم لازم توكف بيت اختك وهاي ام الدود عند حدها اني جهالي مجايبتهم من الشارع حتى يقللون من عدهم كدام اللي يسوى واللي مايسوى.

أدهم : بصياح نسرين لزمي حدج عرفي على منو تحجين شنو هالالفاظ كدام الجهال . ابني كلي بابا كله من ورا هاي اللي تكول ماما عليها كح داليا ماعرف اموت نفسي لو اموتها طفل عمره 5 سنوات يحجي ويتعلم هيجي الفاظ ياريت متعلم من الشارع لا من امه رادت تحجي روحي حضري السفرة تعاي ليان ورايه للمكتب دخلت شفت أمها لازمتها ماعرف شنو تحجي بأذنها مو وياج نسرين عوفي البنية سديت الباب أحجيلي بنتي شصاير.

داليا: جتي ليلى بقيت ساعة بحضنها ابجي وهي تسكتني .

ليلى: بس خلي افتهم شصار حتى تنهارين بهالشكل قابل شنو يطلعون معارف عادي أحنا بنات وحجي بيناتنا ليش متصورة هي تاخذ فكرة مو حلوة عليج وبعدين شنو زعطوطة تنقهرين محترمتج مبينه طالعه على ابوها ممتربين كومي غسلي وجهج خلي نطلع نتونس مادام رمزي منطيني الضوء الاخضر 😍

داليا : فرغت فشلتي بالبجي كمت غسلت وبدلت لبسنا اني وليلى خابرت السايق رحنا للمول نتسوق شفت كومة مكالمات ورسائل من ميادة خليت موبايلي على الصامت استحي اجاوبها أفترينا واخذنا غراض كتلها اكو مطعم وكوفي شوب فوك بس اسعارهم نار عازمج عليها بس على حسابج اول ماكعدت صار ابو ليان بوجهي ويا واحد مجان منتبه كرصت ليلى لج باوعي هذا هو .

ليلى: تعبتني من الفراره بالسوك جنت ميته من الجوع بخيله عزمتني على حسابي تكول خطيبج راتبه مال 10 مدرسات دكيت الخشب 😨 حسودة متستحين فوك ماعازمج تحجين على ابو جهالي كرصتني كالت هذا هو باوعت اثنين كاعدين واحد مبين اكبر من اللي بصفه بس الشاب مبين عليه لوتي بس باوعت غمز بعينه اني من الخوف نزلت راسي كتلها ولج هذا دايح كومي نغير مكانه.

أدهم : بعد الهوسة اللي صارت بالبيت طلعت ويا جلال اهواية لح عليه انروح نغير جو واني محبيت أكسر كلمته كعدنا بمطعم كالي خالو أكو بنتين يباوعون عليك مشلت راسي جنت ادخن ضحكت ياروح خالك ديباوعون عليك اني خلص دوري نسرين كرهتني بجنس حوا انت بعدك شاب وحلو اخذ راحتك اني اترخص كام ويايه حسيته راح يمهم عرفت منطيهم رقمه .لحد الان اتذكر حركتها شلون أستغلتني اسبوع حتى انطيها فلوس كرهت نفسي وضعفي ماريد أذيها علمود جهالي كاسرين ظهري أبلع واسكت وأتجاوز اهواية امور أحساسي اني يتيم ماريد جهالي يحسون بيه يعيشون بصراع بيناتنا اضغط على نفسي واتحمل اشوف اخرتها ويا نسرين. حجيها وحجي ليان ميادة بنت اختي مفشلتها كدام صديقاتها وكدام المدرسة مو مقنع مستحيل بس لازم اتأكد.