رواية أخترتك بنفسي الفصل السابع 7 - بقلم Chra

#أخترتك_ بنفسي 7

رمزي : سافرت رحت يم ليلى كلت فرصة نتقرب من بعض شوية هي باقية اسبوع يم داليا ضايج من تصرفات لارا حتى كدام الموظفين تتحارش بيا وتغازلني مرات تبوسني متاكد كلهم يعرفون عايشة ويايه بس ميحجون يخافون من ابوها هو هم ابو قرون يعرف يكول تتعرفون على بعض يريدني اتزوجها يحاول يغريني بالمنصب والفلوس واني دايخ امشي ورا قلبي لو عقلي اول ماكامت الصبح طلعت خبالاتها تحجي عليه ليش تعوفني وتروح لأهلك صاير بارد مو مثل قبل اريدك اليه وحدي راح اخليك فوك السحاب بس عوف ليلى واهلك أعيشك ملك بس اريدك ترجع مثل قبل متلهف عليه كتلها كافي كرهتيني بحياتي منين طلعتيلي انتي روحي دوريلج على غير واحد اني ماشبعج عيشي حياتج اني قدراتي هلكد واحب خطيبتي وانتي مجرد جسد لاغير اياني واياج تخابريني لو ترسلين صورج وانتي ملابسه شي اندمج على وجودج بالدنيا عفتها وركبت سيارتي.

ليلى : نزلت شفت رمزي صعدت وياه مثل كل مرة حضن وبوسات ومشتاقلج بس احسه بارد مو مثل قبل سالته حبي بالعافية يمتى اخذتها سيارتك حلوة مستغربة ليش ميفكر يقدم زواجنا ونستقر بدل مصاريفه الزايدة خلال سنة 5 مرات يبدل سيارته واحد احسن من الثاني ملابسه صاير كلها ماركات والساعات والعطور يكول كلها كوبي واني اشوف شكلها اصلي مو شي عادي الله يستر .

داليا : جنت كاعدة منتظرة حصتي الاخيرة بالي يم ميادة وليان هم مجايه خابرت ليلى متجاوب مرة مرتين اوف هسة وكتج طلعت دفتر حظور شفت اسم ليان أدهم 😍 الله اشكد حلو اسمك مثلك شخصية صرت بعالم ثاني أدهم صحيت على صوت المعاون كالي هاي جدول دروس ست ميادة روحي بدالها خلي متبقى شاغرة وهي صديقتج .

ادهم: فتحت عيني اسمع اصوات مركزت منو شوية شوية حسيت اني مو بغرفتي عائلتي وخواتي على راسي يتحمدولي بالسلامة سالتهم شكو .

احمد : خالو انت من البارحة بالمستشفى

ام جلال : ليش سويت هيجي بنفسك عمري الله ياخذني ولا اشوفك متمدد لاحول ولاقوة انشالله عدوينك واباوع على نسرين. بارحة ردت اموتها كوة طلعوها من بين ايدي لو بنت رجال تحجي لأخويا اني ضاربتها.

ادهم : باوعتلهم كل واحد بيهم يطمن وخايف عليه بطريقتهم الا نسرين مشفت بعينها اي شي .عرفت صاير عندي ضيق تنفس وانهيار اعصاب لو ما الخدامه داخلة عليه جنت ميت منطيه خبر لبيت اختي وجايبني للمستشفى .

رمزي: رحنا للسوك اشتريتلها غراض وهدايا لأهلي جنت متونس وياها أحس براحة مو طبيعية اباوع على عيونها اشوف نفسي بيها 💘من الزم ايدها اسمع دكات كلبها رادت نتغدا ويا داليا وعدتها باجر اليوم اريد نكون وحدنا طول ماناكل مشلت عيني من عليها وهي تحجي وتضحك اخاف اخسرها ماتحمل اعيش من دونها ياترى راح تسامحني بيوم اذا عرفت اخونها.

ليلى: حبي خلي نتغدا سويه  ويا داليا ليش باجر مو خطية تبقى وحدها.احس بسعادة رمزي اليه وحدي اول مرة نكون وحدنا دايما لو اخته لو اخويه يطلعون ويانا يشتري غراض وميسمع كلامي واني اكوله ماريد كافي مرينا على محل ذهب عجبتني ميداليه على شكل قلب بيها حرفين طلبت اثنين وحدة اليه وحدة لدالي هو كال لازم تدخليها بكل شي طبعا لان انت وهي كل ماأملك😤هذا حال رمزي اختاريت حرفي وحرف رمزي وهي حرفها وحرف ابوها اسمه أحمد خلي بالمستقبل تغيرها على اسم حبيبها .

رمزي : اخذت ليلى للفندق فكرت اذا صارت مره مراح تكدر تعوفني حتى لو اجبرها لازم اسوي هذا الشي.

داليا : رجعت واني ادندن ويا نفسي وأغني وأطبخ واحجي على رمزي اخذ مني لولي وأخيرا عرفت أسمك ولك كل ليلة أحلم بيك اكيد هسة نايم بالعسل واني حركت الاكلة من وراه اخ ياحلو حظي حلو انا شفت عيونك ردت اخابر ميادة بس أستحي ياربي شسوي خابرت امي حجيت وياها شوية وحجيت ويا نور سألتني ميادة شلونها حسيت تعرف شي ومتكول كتلها زينة وانتي شكو تسالين كالت تليفونها مغلق من البارحة اي وانتي شعليج ولج نور خاف تحجين وياأحمد والله اموتج حيوانه وسديته صدك مراهقة بلوة أوف ملل أطلع أتغدا لو أنتظر ليلى.

ليلى : رجعت بالمغرب كوة امشي بس وصلني محجيت شي وياه راد يلزم ايدي جريته منه وسديت الباب قوي اول مافتحتلي داليا الباب ركضت للحمام استفرغ.

أدهم : سويت فحوصات كالولي لازم ابقى بالمستشفى يومين ضجت كتلهم يرجعوني للبيت مقبلو بالاخير بقت ام جلال ويا ابنها بقينا نحجي بسوالف زمان وحياتنا شلون جانت .انتبهت على جلال ضايج سالت اختي اشبيه.

ام جلال : ماعليك منه سوالف بايخه كلشي ينحل بس انت كوم بالسلامة راح اسويلك عزومة ومولد مصاير الله يحفظك اليه حبيبي ماكو شي بس مثل ماتعرف الافندي كبران يريد يتزوج طلع يحب ميادة وهي مو راضية لان أكبر منه سنتين.

ادهم : يالله هذوله يمتى كبروا صارو يدورون زواج وحب لحد الان اعتبرهم مثل حمودي يمكن اني عجزت ماحس بغيري راحت عليه شتكولين اختي.

ام جلال : بعدك أحلى شاب مشفت شي من الدنيا لو بيدي هسة ازوجك قبل جلال بس شنسوي كلمن وياخذ نصيبه الله يجازيك على ماابتلاك.

ادهم : ههههه متجوزين من سوالفج يازواج لاتخافين كرهتني المحروسة بالنسوان ولك جلال حبيبي وعد مني اخطبلك بيدي ميادة بس اطلع من المستشفى اني اعرف شلون أقنعها ومصاريف زواجك من الالف للياء عليه انت وأحمد .عود اني قريب منكم طلعتو عاشكين ومادري بيكم خونه.

داليا : شفت منظر ليلى تخبلت ركضت شبيها بكلبي اكول لاتكون حامل عزا شنو حامل بيوم واحد استغفرالله تفكيري منحرف اخذتها بدلت ثيابها وسويتلها شراب دافي بقت تحجيلي من غير مااسال.

ليلى : مادري شكول رحنا للفندق جان يبوسني واني بحضنه ويتغزل بيه مثل قبل شوية شوية اتغير يلمس جسمي وينزعني محسيت بنفسي الا واحنا سوية أهواية حاولت وياه يعوفني ميصير قبل الزواج مجان يسمعني ولا كأنه رمزي اللي حبيته تتصورين جان يضربني حتى اقبل وبالاخير مصار شي انحرج كال بسبب ضغوطات هيجي سويت واني اسف مجاوبته بدلت ورجعت واني احس بالاهانة هذا اللي حبيته طول عمري يطلع حيوان ويغتصبني على حظي مكدر يسويها يريد يرضيني بكلمه اسف اخ دالي صديقتج مجروحه الله ياخذني .

رمزي : متحملت ابقى بعد لميت غراضي ورجعت لشغلي كلما اتذكر دموع وتوسلات ليلى وشلون ضربتها ونزعتها ردت أخذها باي طريقة حتى أضمن بعد متكدر تعوفني بس الله جان وياها مكدرت اسوي شي اخ منج ياحقيرة خليتيني مو رجال اني الج لارا ساقطة بنت الجلب اكيد مسويتلي شي.

داليا : جنت كاعده اشرب كهوة كعدت كدامي ميادة اني فزيت لان جنت افكر بالبارحة وشصار بليلى طول الليل بحضني جانت تفز خابرت رمزي 100 مرة ميجاوب مقصرت دزيتله رسايل لعنت جد جده ألادبسز الحقير .جاوبتها صباح نور شكو مجازة خير باوعتلي بمكر ..

ميادة : رحت للدوام خليت غراضي شفت دالي كاعدة رايحه بغير عالم تشرب كهوة متدري بنفسها رحت كدامها صبحت عليها سالتني ليش جنت مجازة جاوبتها بمكر خالي ابو ليان جان بالمستشفى اعرف معجبة بيه ومتعرف يكون خالي خطية وكعت الكهوة عليها عبالي شي عادي بس مبين سالفة أكبر من أعجاب وراج لحد ماتعترفين.

أدهم : رجعت للبيت نسرين جانت تمثل كدام خواتي وتداريني أني ولا يمي ليان جانت واكفة بعيد مني دموعها بعيونها جانت خايفة تقترب مني لان ضربتها اخر مرة اشرتلها جتي ركض تحضني حجيت ويا خواتي على خطوبة احمد كال معجب بأخت صديقة ميادة وطلبت ميادة من ابو احمد اتفقنا بعد اسبوع نروح نخطب لأحمد وميادة بعد 4 ايام لان باجر يسوون عزومة على سلامتي كلش جنت فرحان نسيت همي بهالاخبار الحلوة أحلى شي بالدنيا من تشوف اهلك وياك على الحلوة والمرة.

داليا: يالله ليلى اخرتينا اكلج حلو فستاني لو لا راح البس فوكاها صاية لحد مانوصل اخاف السايق يشوفني ينجلط خطية هو عجوز ميتحمل هالجمال .

ليلى : والله الي يشوفج البارحة حزينه وضايجه يستغرب منج اليوم كل هذا لأن محروس أفندي طلع من المستشفى وتكولين لا مو مهتمه بس انقهرت عليه لان خال ميادة ياجذابه امشي هسة لو يشوفج يخطفج .

ميادة : ماما احمد يكول هالله هالله ويا داليا لاتقصرون بشي عباله منعرف بالاصول يريد يعلمنا ابو المصالح يمتى تنورنا نور خاتون نخلص من طلباته ا.ليوم لازم أتأكد دالي تحب خالي لو مجرد اعجاب متراهنين عليها اني وليلى اني اتصور اعجاب ليلى تكول لا حب.

ادهم : بدلت ونزلت شفت حمودي بسته عرفت كلهم بيت أختي وهذا باقي يم الخدامة لأن وكيح وينقل حجي كتله تعال نروح للنادي اخذك يم جلال واحمد طلعت شفت ميادة وياها وحدة اتقربت سلمت عليهم رحبت بيها

داليا : اهواية تونست بالحفلة ميادة وليلى لازميني كل وحدة تحجي شكل ويضحكون عليه طلبت مني ميادة نروح نشوف الحديقة والنافورات لان ماكو احد ناخذ راحتنا افترينا وحجينا على خطوبتها شفت 💓💓💓💓💓 طالع من بيته وياه ابنه الدبدوب ردت ارجع ورطتني كلما يتقدم اني ادوخ ضاع الكلمات والحجي مني .

ميادة : اتفقت ويا ليلى اخذ دالي يم النافورة قريب من بيت خالي اعرف هو موجود بيته على حظنا جان طالع صحته اتقرب منا جنت اباوع على دالي كلما يقترب لونها يتغير وتباوع عليه .

أدهم : عرفتني ميادة على صديقتها بقينا نسولف شوية مشفت شكلها شنو بس اخر شي أترخصت منهم صافحتها لمسة ايدها كهربتني رفعت راسي اباوع على وجهها هي اندارت وراحت