رواية أخترتك بنفسي الفصل الثالث عشر 13 - بقلم Chra

# أخترتك_ بنفسي 13

حاسة بيك
عارفة انك نفسك ابقى بين ايديك
ليه مخبي؟ وانت بان شوقك عليك

حاسة بيك
حس بيا خلاص هتقتلني الظنون
مش كفاية تقول بحبك بالعيون.

ليلى: دخلنا للفندق وصلنا للجناح ذبيت الشال رمزي جان طول الحفلة يتغزل بيه وبجمالي غيرت الحفلة مقبلت تكون مختلطه بس نسوان مجان موجود غير رمزي اجه قبل مايخلص الحفلة بساعة متت من التعب والركص مبقينا اغنية اني ودالي  منغنيها ونركص نسيت كلشي ركزت هذا اليوم اللي انتظرته من سنين جان يباوع عليه كتله راح ابدل 😕

أدهم : مكدرت احجي ويا داليا هاليومين مشغوله بعرس صاحبتها  محبيت ازعجها رحت للحديقة  شفت خواتي كاعدين يباوعون على ميادة جانت بالحفلة تصور وترسل ألهم الصور والفيديو أقتربت منهم ركزت داليا تخبل طالعه شلون تركص وتغني 👸خواتي على نيتهم يشوفوني الصور واني راكز وياداليا بكلبي اكول شنو هالعذاب كلشي بيها عذاب أخ من الزمن والقدر خلاني انحرم من هالنعمة متحملت عفتهم خابرتها مجاوبتني رجعت كعدت بالي يم داليا جانو يحجون بمواضيع واني يم داليا أخ منج شسويتي بيا يابنت .just me

نسرين : جنت راجعة من عرس بنت صاحبتي اخذت ليان ويايه طلبتها مني وحدة زوجها مسؤول رحبت بالسالفه من الفرحة مجنت اعرف شلون اوصل للبيت اكيد هسة أدهم كاعد بالحديقة ويا الساحرات دخلت مثل ماتوقعت سلمت أدهم رايح بغير عالم كتلهم عندي الكم اخبار حلوة وخصوصا انت أدهم بنتك خطبوها مني اليوم لبيت فلان شفت أدهم اتغير والساحرات كل وحدة بدت تتفلسف وتحجي وأدهم صاير 😤 كتلهم لو جان بيكم خير لو صدك تحبون اخوكم وخصوصا انتي ام احمد جنتي تخطبيها لأبنج مو فضلتي عليها الغريبة .

رمزي : تصرفات ليلى محيرني هادئه بشكل غريب حتى الحفلة اللي خططناها غيرتها بأيام أضطريت أحجز قاعتين بنفس الفندق تريد حفلة خاصة مجادلتها من نطلع تلبس حجاب وهي تعرف اني ماحب هذا الشي بس كلت خلي نتزوج والله كريم اشوف شنو سالفتها تتصرف بكيفها شفتها كاعده ومبدله كعدت يمها اتعشينا جنت اتغزل بيها متتجاوب ويايه ترد عليه بأبتسامه صفرا وين ليلى اللي اول ماتشوفني تبوسني وتحضني تسمعني أحلى كلمات الغزل هاي شبيها ضجت منها ومن برودها كتلها خلي نروح للغرفة نكمل ونام .

داليا : رجعت للبيت تعبانة ميته من الركص والغنا بدلت  فستاني 3 مرات وحدة افضح من الثانية أستغليت العرس خاص مخليت بكلبي شي مسويته حبيبتي ليلو الله يسعدج طول حياتج شفت مكالمات من أدهم أستحيت اخابره لان ميادة رجعت ويانه للبيت راح تبات يمنه ياربي شلون بيه صرت مدمنه أدهم اذا محجيت وياه اليوم يمكن راح أنجلط صوته أدمان دزيت رسالة كتله انتظر اتصالك الصبح .just me

ادهم : راح تموتني هالبلوة من بعد القنبلة اللي ذبتها بوجهنا صارت مشادات بينها وبين ام جلال جريتها ودخلنا لبيتنا مادري كم كف ضربتها من حركتي على بنتي شفتها لابسة لبس مال بنات كبار ومكياج متناسب عمرها لوين تردين توصلين بنتج ولج انتي شلون ام بدل ماتشجعيها على دراستها وتصير براسها خير تاخذيها يم الدايحات تستعرضين بنتج على الناس ليش نسرين ليش ترخصين بنتج اني بشنو مقصر وياكم كافي مليت من تصرفاتج مااسمحلج تدمرين حياة بنتي مثل مادمرتي كلشي حلو بينا.

ليلى : جاوبت رمزي ببرود الافندي يريد مني رومانسيات مصدك نفسه عريس كتله رمزي لهنا وانتهى التمثيل اعترف أثنيناتنا مثلنا براعة انت خنتني بالفراش وتسترت على الموضوع واخذت اللي تحبها كأنما مصاير شي واني الغبية اللي علقت نفسي بيك من سنين وأنطيتك كلما املك من رغبة وحب ومشاعر وبالأخير مثلت السعادة كافي راح اكولك كافي تعبت واني ضامه بصدري بشنو جنت تحس من تخوني وتتصور انت وياها بالفراش شنو احساسك استمتعت بينت رجولتك مفكرت بيه مكلت هاي اللي خانت اهلها ونفسها سنوات علمودي كل اللي سويته مغزر بعينك يا اخي بدون ماتبرر هاك الصور والرسايل والحجي اللي كلما اشوفك اريد استفرغ  جنت اكدر افضحك كدام الناس بس مكدرت أقهر اهلي اشوفهم بنتهم اختارت عار مو رجال واذا تريد تاخذني تعال نزعت ملابسي اغتصبني أني مراح اخليك تلمسني  برضاتي لو تموت .

نسرين : صاير تمد ايدك عليه يا شايب تخرفت منو انت تضربني علمود الساحرات لوبيك ذرة احترام هسة تروح وتعوف البيت يا اخي ماريدك تعبت منك ومن خواتك نفسي تلعب منكم انتو مو بشر صعدت جبت الخدامه شمرت غراضه بالصالة وركضت لغرفتي قفلت الباب خابرت اخويا الحكني أدهم موتني من الكتل من ورا مرتك .

داليا : خابرت ليلى الصبح بدلت على السريع جانت ميته من البجي اخاف هذا الحيوان مأذيها ركبت سيارة اخويه ورحت للفندق خابرني أدهم جان مبين ضايج حجينا شويه مجنت مركزة وياه بالي كله يم ليلى أترخصت منه كالي محتاجج اهواية لاتخلينيjust me

رمزي : متصورت اللي صار ليلى تدري وساكته  منو مرسل صوري الها واني جنت اكول هاي ليش متغيرة حقها غلطت اهوايه ماعندي عين ارد عليها اعرف نفسي غلطان وندمان بس شيفيد الندم.

ادهم : صارت بيتنا هوسة ونسرين مخلت تعدي الليلة على خير.لو لا تدخل ابو احمد وخواتي جنت راح اطلقها ردت اطلقها ليان اتخربطت بقت تتوسل بيه ماعوف امها بقينا طول الليل انداريها جانت تبجي وتكول مليت منكم ومن مشاكلكم اخر شي اتفقت وياها اروح اسافر فترة حتى نفسيتنا ترتاح انتظر بنتي تكوم وأروح .ضجت من داليا اهواية 24 مشغوله بليلى اكوللها اريد احجي وياج لو عدهم خطار لو يم ليلى قررت اسافر اغير جو يمهم .

داليا : طلعنا اني وليلى نتعشى بمطعم صار شهر  متزوجه نفسيتها تحسنت أهوايه بعد مارحتلها للفندق شفتها منهارة وتبجي حجتلي سبب سفرها وهروبها ماعرف شلون تحملت اني أدهم شفته يركص ويا زوجته انهاريت ومجان بينتنا حب او علاقه لو جنت بمكان ليلى يمكن انجلط واموت اني من عرفت ردت أذبح رمزي حجينا اهوايه بقيت يمها لحد الليل كعدنا ويا رمزي .أدهم كثرت أتصالاته بيه كلما يخابرني لو اني يم ليلى لو هي لو ملتمين ويا العائلة حسيته يضوج لو يسال مرات تكعدون ويا كرايبكم من يجون جان يقصد الرياجيل جنت افرح من يخابرني يوم اللي مااسمع صوته احس نفسي ضايعه ولو الحجي بيناتنا بعده رسمي وماكو شي مرات احس يحبني مرات لا مافهم عليه .

رمزي : طلبت مني ليلى ماألمسها في الوقت الحالي علاقتنا تكون عادية مبني على الاحترام وخصوصا كدام الاهل نبين طبيعين مثل قبل .جنت اتمنى اليوم اللي تكون بحضني وصارت بس هي تنام بمكان واني بمكان بنفس الغرفة بس ممنوع عليه اللمس والاقتراب أحسها بدت تتقبل الواقع وتطلع من عزلتها وبجيها بداية زواجنا طول الليل ولو ماحب داليا بس هي اللي خلت ليلى تطلع وتتقبل الصار وتحاول تنسى انتظر هذا اليوم بفارغ الصبر.😘

ليلى : بديت أتعود على التمثيل كدام اهلي واهل رمزي بس نكون سويه ماحجي وياه ولاأقترب منه على كد الحاجه كلما يمر عليه الليل اني اختنك اتذكر احلامي جنت مخططة اذا تزوجت شسوي وياه شلبس اهوايه اشياء من اكون على الفراش اني انام على الارض وهو على السرير وين وصلتنا رمزي بتهورك لا هاي احلامي وياك ولا هاي اني اللي جنت مااتحمل وجودك يمي بدون مااحضنك وابوسك الله يسامحك .طلبت منه يحجزلنا طاولة بمطعم مفتوح جديد رحنا وياه اني وداليا لان باجر راح ترجع لدوامها وتعوفني شفت أدهم كاعد يتعشى وياه جلال باوعت داليا مندمجه تحجي وتضحك ويا رمزي بصوت ردت انبهها بدون مارمزي يحس كتلها كومي مكياجج خربان روحي للحمام رتبيه كوة كامت .
ادهم : طلعت من البيت  بيدي جنطة السفر ردت اركب سيارتي شفت جلال واكف يمي يريد يسافر ويايه جبرني أخذه حلفني براس اختي اعرف هاي من حركات خواتي ميردون ابقى وحدي بعد اللي صار رحنا طول الطريق جان يسالني

جلال :  خالي شعندك بهالمكان قبل مجنت تروح حتى على خطوبة احمد غصب جيت اشوفك كل يومين لازم الخط رايح جاي تخبي على حبيبك ولك خالي اني جلال ستر وغطا عليك احجي وكول فضفض 😎

أدهم : ههههه ماعندي شي بس حبيت المكان والجو تخليك براحة نفسية ماكو غير شي واذا اكو انت اول واحد راح يعرف حبيبي .وصلنا سألنا على مطعم دلونا على مكان رحنا كعدنا شفت داليا ويا ليلى الخاتون ماخذه راحتها تضحك وتحجي صرت نار حسيت ليلى انتبهت غيرت نظراتي بس بالي يم ست داليا شفتها كامت استأذنت من جلال طلعت من الحمام شافتني بوجهها انصدمت مجانت تعرف شتكول باوعت عليها وعبرتها محجيت شي مقهور منها ماعدها مجال تحجي ويايه بس عدها مجال تطلع تتونس .😙