الأشيب الفصل الثاني عشر 12 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

ما جاوبني بُقى دافن وجهة مستمد
الدفو مِـنْ كف أيدي .!
سحبتها منه بهدوء ونهضت طالعة مِـنْ غُرفتة
كُـل ظني أذا سألتة بعدين راح أعرف منو هذهِ ..
أول ما طلعت صار بوجهي الشخص
اللي غيّر موازين حياتي ..
ما أعرف أذا كانت صدفة أو كان منتظرني.!!
كملت طريقي لـ غُرفتي متجاهلتة
بس إستوقفني بـ سؤاله
عزيز: شكد صارلج يم الأشيب؟
- أنداريت عليه ساكتة ما أريد أجاوب
على أي أستفسار مثل ما وصاني الأشيب
وخفت أحجي شي ويطلع هو حاجي شي ثاني ألهُم؛
رُفع حاجبة مِـنْ طال صمتي
عزيز: شبيج؟
مورفو: اسأل الأشيب هو يكلك شكد.
عزيز: دا اسألج أنـي مابيها شي.
مورفو: هو كال اللي يسألج شي كُليله روح اسأل الأشيب.
- أبتسم وهز راسة بأيجابية
عزيز: تصبحين على خير.

ركضت لـ غُرفتي بدون لا أجاوبة
خفت يسألني شي بعد وأجفص بالجواب؛
سديت الباب وأسمع صوت ضحكتة ..
بُقيت أتفرج يوتيوب لُما غفيت.
ثاني يوم كعدت متأخرة ولا الأشيب ولا غيرة
مكعدني بوقت ، حسيت بفشلة وأستحيت
مِـنْ أهله وبعقلي احجي على نفسي حسبت
راح يكولون هذهِ مدمغة مال نوم .!
طلعت مِـنْ غُرفتي أتسحب مثل الحرامي
البيت هدوء ؛ توجهت لـ غُرفة الأشيب
دكيت الباب بس ما أجاني صوتة ؛
فتحتها ودخلت ما كان موجود..
نزلت جوة كانت نسرين وسُهاد بالصالة
ويمهم مرية وبنية شابة وياها ..
أبتسمت نسرين ابتسامة بشوشة
نسرين: هلا يُمة صباح الخير.
مورفو: صباح النور خالة.
- سألت المرية اللـيّ كانت كاعدة
ماجدة: منيلكم هذهِ البنية؟
نسرين: كرايبنا مِـنْ غير مُحافظة.
- باوعتلي صفح ما عاجبتها
ماجدة: هلا بيج.
مورفو: بيج أكثر خالة.

نهضت رحيق مِـنْ مكانها وطُلبت
مني أدخل وياها المُطبخ ونقذتني مِـنْ موقفي
بس أوزع خالات .!
كانت تبارك كاعدة على طاولة الأكل وعينها
بتلفونها؛ مِـنْ حست بدخولنا رفعت
راسها وصاحت بضحكة
تبارك: كوّد مولنك (good morning).
مورفو: كوّد مورنگات حياتي.

رحيق: أكعدي يمها خلِ أجيبلج ريوك.
مورفو: لا تعبين نفسج.
رحيق: ماكو تعب حبيبتي الغدة يتأخر لما يرجعون الولد.

بدأت تجهز الأكل وأني
كعدت يم تبارك متسائلة
مورفو: لعد وردة ودينا وين؟
تبارك: بالدامعة (الجامعة).
مورفو: زين باعي تبارك الرحمن ..
- نزلت تلفونها مِـنْ أيدها مقاطعتني تتذمر
تبارك: أهـو مولفو شتفگنا؟ (شتفقنا).
مورفو: والله حلو شبيج.!
تبارك: مو حلو ؛ تقبلين أكلج هيج؟
مورفو: أي عادي كُليلي.
تبارك: ما أليد ؛ لا أكلج ولا تكليلي.
مورفو: خوش ما أكلج ؛ بس باعي هذا اللي تباوعين عليه مو حلو.
تبارك: هو مال أطفال ليش تباوعين وياية وأنتِ كبيرة؟
مورفو: اني هو أحبهن ؛ غيري خلينا نشوف شي حلو.
تبارك: شتحبين أنتِ؟

مورفو: نموش

تبارك: يااااا هذا الأصفل (الأصفر)
مورفو: اي
تبارك: اني احبة شوية

غيرت وفتحت نموش ؛ ثبتت التلفون على
الطاولة حتى نشوف اثنينة ؛
مخلين أدينا وحدة فوك الثانية على الطاولة
وساندين روسنا عليهن نباوع
ومندمجين ؛ ضحكت رحيق مِـنْ شافتنا
رحيق: صدك مِـنْ كال الأشيب طفلة.

مورفو: داعيش طفولة متأخره

أبتسمت وأني بُقت حجايتها براسي
شنو مُمكن حاجيلهم عني الأشيب؟
هذا أول شي حاجي أنُ أني طفلة بنظره.!
أبتسمت ورجعت اندمجت ويا نموش ؛ رحيق
خلت الأكل يمنا وطلعت للصالة.
للظُهر وأني باقية بالمُطبخ ؛ دخلو عُمران وعزيز
مع بعض راجعين مِـنْ دوامهم ؛
ركضت تبارك لأبوها فرحانة برجعتة
شالها يشمر بيها بالهوى وصوت ضحكاتهم هرج
البيت تجبرك تبتسم؛ سحبها عزيز مِـنْ أبوها
يضحك لضحكتها اللي ترد الروح
عزيز: البوسات بس لعُمران؛ ماكو لعمو عزيز شوية؟

لزمت وجهة وصارت تبوس بي بقوة؛
عُمران سلم عليه مِـنْ شافني كاعدة وكمل
طريقة ناحية الصالة وعزيز أكتفى يبتسم
ويميل راسة بهدوء كان سلام على الصامت.!
بُقيت وحدي على التلفون ومُضت قريباً
نصف ساعة يلا أجة الأشيب ؛ أبتسم مِـنْ
شافني وشمر الجگارة مِـنْ أيدة بالخارج
الأشيب: شلونك طير الشّوك؟
مورفو: زينة عمو ، أنتَ شلونك؟
- تقرب سند أيدة على الطاولة كدامي وبأيدة الثانية كرص خدي
الأشيب: ليش كاعدة وحدج؟
مورفو: جانت تبارك يمي وراحت ويا أبوها ؛ وأمك يمها خُطار مرية وبنتها.
الأشيب: منو؟
مورفو: ما أعرفهن ؛ المرية الكبيرة تحسها طالعة مِـنْ القبر وعاوجة حلكها ما عاجبها العَجب ؛ البنية حواجبها جسر وعاگدتهن ما أدري شبيها منفسة.

ضحك كافخني على راسي
الأشيب: لا تتنمرين يَول.

مورفو: عمو هذوله اذا اتنمر عليهم تجيني حسنات

الأشيب: وين لكيتيها؟!

مورفو: اذا شفتهن حتى انت راح تتنمر عليهن

الأشيب: وين كاعدات بالصاله

مورفو: اي

الأشيب: مو غريبات لعد

تحرك ناحية الصالة وأني أمشي وراه ؛
مِـنْ سلامة واضح يعرفهن
ماجدة: وين هذهِ الغطة لا تسأل لا تكول عمتي.

الأشيب: حقج عمه بس اني اهلي ما شايفهم ملتهي بالشغل

هزت راسها تتوددله
ماجدة: دامك هنا نحن باقين يمكم كم يوم ونشوفك لعد.
الأشيب: هلا بيكم.

أترخص منهم صاعد لغُرفتة
وأني أتسحبت بهدوء وصعدت وراه ؛
فتحت الباب ودخلت بدون ما أدكها
رجع ضربني مرة ثانية على راسي
الأشيب: دگي الباب بالجايات.
مورفو: هسه دخلت ما لحكت تسوي شي.

هز راسة يستغفر وأني مستمرة بالكلام
مورفو: هذولة منو؟
الأشيب: عمتي أخت أبوية.

مورفو: حبابه لو حيه

الأشيب: أنطيتيها من الأخير.
مورفو: مو سامعة العمات حياية.
الأشيب: هي حية بس مو علينا.

مورفو: يعني ما احبها

الأشيب: حبي الشخص على أساس تصرفاته وياج مو ويا غيرج.

مورفو: انت تحبها لو لا

الأشيب: نص ونص

مورفو: لعد اني هم نص ونص

الأشيب: واذا متحبيها بعد احسن وبنتها هم مالج علاقه بيها

مورفو: ام حواجب الجسر

الأشيب: شلون ويا لسانك طير الشوك

مورفو: هسه عوفنه اريد اسالك شي

الأشيب: اسالي

مورفو: منو عائشة

اختفت ابتسامتة مركز نظراتة بعيوني
الأشيب: وين سمعتي هذا الأسم؟
مورفو: منك.
تقرب مني بلع ريگة بتوتر
الأشيب: شلون سمعتي مني؟

مورفو: البارحه من اجيت احجي وياك انت حضنت ايدي وكلت رجعتيلي عائشة

الأشيب: وبعد شحجيت

مورفو: وكلت أنتِ دفو سنيني.

بُقى يباوعلي بعدها أخذ نفس عميق وجاوبني بهدوء
الأشيب: ما أتذكر شي.

مورفو: هي منو

الأشيب: ماعرف وحده بهيج اسم

مورفو: لعد ليش هيج حجيت

الأشيب: يمكن جنت حلمان

مورفو: نفسها هذهِ اللي تحبها؟

هز راسة نافي تفكيري وغيّر الموضوع
الأشيب: شعندج جاية عليَّ بالليل؟

مورفو: اجيت اكلك انت متستاهل هيج عائلة

الأشيب: ليش شمسوي

مورفو: امك تسكت بيهم وتكللهم لا تعلون صوتكم خلو الأشيب نايم وانت تعبان من الاجرام والقتل

الأشيب: مو كلنا محد يعرف

مورفو: ومن تعرف شراح يصير بيها ما فكرت ترا خطيه والله بعد هاي السنين كلها تعرف ابنها مجرم

الأشيب: لا تفكرين بهذا الموضوع أنسي.

مورفو: انت مو كلت راح اعوف الاجرام

الأشيب: اي وراح اعوفه

مورفو: شوكت

الأشيب: اكو كم شغله اصفيهن واعوفه

مورفو: خاف تموت بيهن وما لحك افرح بيك

الأشيب: باقي على كلبج ما أموت.

مورفو: اي ننتظر ونشوف

الأشيب: اي احجيلي شسويتي اليوم

صرت أشرحله بالتفصيل المُمل شنو
سويت مِـنْ أول ما كعدت لحظة دخولة البيت،
بُقى يسألني ويأكد عليه أذا ضجت او بعدني
مستحية بس أني كنت فرحانة بتواجدي يمهم،
مورفو: وباوع هذا عزيز البارحة سألني
كال شكد صارلج يم الأشيب؟ كُتلة روح اسأله.
- أبتسم على طريقة ردي
الأشيب: زين سويتي عاشت أيدج؛ وأذا سألج
مرة ثانية كُليلة صارلي أسبوع يم سيماف
وصار عدها شُغل وأخذني الأشيب يمة.

مورفو: هو ليش يسأل شيريد مني

الأشيب: يشبع فضوله

مورفو: وهو منين يعرف سيماف

الأشيب: سيماف بنت عم زياف وزياف اقاربي يعني يعرفوها على هذا الأساس.

مورفو: ويعرفون زياف مجرم

الأشيب: اذا اني ابن عمهم ما يعرفوني يعرفون زياف

مورفو: اذا عرفو شيسون

الأشيب: يسجنوني

شهگت مخلبة أيدي على حلگي مصدومة
مورفو: عزة ولد عم زبالة.!!
الأشيب: شيسوي لعد هو ضابط غير ينفذ القانون حتى لو جنت أخوه.

مورفو: على طاري الاخ شو اخوك ماكو؟
الأشيب: المفروض بالدوام.
مورفو: شيداوم؟
الأشيب: محلل هو يدوام بالمستشفى.
مورفو: ورده ودينا شيداومن؟
الأشيب: أثنينهن تحليلات.
مورفو: اني هم اروح مثلهم.

الأشيب: ليش بابا أنتِ معدلج عالي تكدرين تروحين طب عام، طب اسنان ، صيدلة.

مورفو: ماعرف احس ماحب اي شي يخص الطب

الأشيب: لعد شتردين

مورفو: اريد اروح كليه فنون

الأشيب: مابيها مستقبل وأنتِ تعرفين ترسمين ما تحتاجين كُلية.

مورفو: لعد شنو اروح

الأشيب: راح اشرحلج اني كل فتره ع قسم منا لسنه الخ وشوفي ياهو الي يعجبج وتحبي روحيله

مورفو: بس قسم بي راتب حتى نعيش بي اني وياك لان انت راح تبطل من الاجرام

الأشيب: خوش حجي لعد.

أبتسمت على ضحكتة وطلعت مِـنْ يمة
نزلت يم نسرين وعمتهم استلمتنا أسألة
ماجدة: مِـنْ يا گرايب هذهِ؟
نسرين: مو تعرفين زياف؟ هي تقربلة.

أستغربت ليش دا تحجي هيج وتكذب على
عمتهم.! كذبة منها لو كذبة الأشيب عليهم كُلهم.!
وهذهِ عمتهم الثانية خلت راسها براسي
كُـل ما تلمحني تلزمني مِـنْ أيدي تسأل بيه ،
كنت أتهرب ما أصير كدام عينها حتى أتجنب
سؤالها بس أحسها كاعدتلي على الطريق ؛
طلعت مِـنْ الحمام بوقت متأخر مِـنْ الليل
الأغلبية نايمين والبيت هدوء ؛
فزيت مِـنْ أجاني صوتها مِـنْ الخلف تتسأل
ماجدة: شعندج تسبحين بهذا الليل؟
- أنداريت عليها ألطش بيها
مورفو: مو ما كان أكو ماي حار هسه يلا.

تقربت تميل بحلكها يمين يسار بحركة سريعة
ماجدة: وين أهلج؟ وشنو مناسبة جيتج هنا؟
بنية حديثة حمرة صفرة ببيت مليان ولد شنو أهلج
لهذهِ الدرجة راخيلج الحبل؟ تفترين أنتِ وكوشتج
بيناتهم لا شال على راسك لا لبس مال أوادم.!

نزلت راسي أباوع لـ ملابسي
جان جسدي الناعم ضايع بملابسي الواسعة
الفضفاضة ؛ بُقيت ساكتة حايرة شجاوبها
وأدعي يجي أحد ينقذني منها بس محد أجة
ورجعت هي تكرر بالأسئلة ، لزمت بطني وركضت
ناحية الحمام احجي وياها بصوت عالي
ممزوج بألم مُزيف
مورفو: بطني خالة بطني راح أموت يُمـــاا.

دخلت الحمام وقُفلت الباب بسُرعة ،
اسمها تدك عليه وتحجي ويايه
ماجدة: شبيج أنگرصتي؟ اطلعي اشوف شبيها بطنج.

صارت عندي ألم فعلي مِـنْ التوتر وملحتها.!
بُقيت حابسة نفسي متجاهلتها وهي
لحت إلا تريد تعرف أني منو وشسوي جاية هنا
وحدي وشكد راح أبقى ؛ بعدها سمعت صوت
عزيز يحجي وياها وبكل صلافة تسألة عني.!
والصدمة اللي صابتني مِـنْ عزيز كذب عليها
عزيز: أهلها مسافرين عدهم مريض يتعالج بالخارج وهي أنجبرت تجي يمنة ؛ أكو أشكَال؟
ماجدة: وشبيها هي مِـنْ اسألها ما تجاوب؟

حسيت على صوتة يبتعد ونطق بجملة حيرتني
عزيز: لا تخافين ما توكف بطريق مصالحج ، أستمري.

أي مصالح؟ وشدخلني أني؟
وليش أنكتم صوتها بعد كلام عزيز؟
غريبين.! ومع ذلك ما دققت أهم شي أخلص
مِـنْ اسألتها؛ ومن كنت احجي للأشيب عليها
يجاوبني بجواب غير مُقنع مِـنْ كُـل عقلة
الأشيب: ضلي ساكتة لا تجاوبين.
مورفو: خمو دا تحجي ويا الحايط غير وياية؟
الأشيب: أي ضلي ساكتة حتى تعرف ما تردين تجاوبينها او تدخلين نقاش وياها، يعني ألبسيها.
مورفو: لا رجاءً أني مُحترمة.

رُفع راسة يباوعلي بنظرات تشرح اللي
بداخلة ؛ درت وجهي عنه
مورفو: والله مُحترمة بس أنتَ جنت ما مُحترم بالبداية وتعاملت وياك بأخلاقك.
الأشيب: هـــا؟
مورفو: والله لعد شنو؛ بس هسه شحلاتك خلقة وأخلاق وأدب.

ضحك وسحبني مِـنْ شعري ميلني ناحيتة
الأشيب: كومي نامي اللوتية أم لسان.
مورفو: فدعوس هم تحس نفسك لوتي؟
الأشيب: مرات.
مورفو: لوتي عادي لو بُخاري؟

صُفن بوجهي يستوعب بعدها رُفع حواجبة
الأشيب: أبو الوصخ هم جان عنده أوتي بُخاري؟
مورفو: لا تحجي عليه وهو ميت ؛ وأي عندنا ومن الخارج هم لا عبالك مَحلي.

نهضت على حيلي أريد أطلع
ما أعرف ليش مزاجي كُله تغيّر مِـنْ جاب
طاري عُثمان ؛ نهض وراية بسُرعة لزمني مِـنْ ذراعي
الأشيب: شبيك طير الشوك؟ زعلت؟
مورفو: لا، أريد أنام.

بُقى ساكت وأني هم ساكتة ودايرة
وجهي عنه ؛ كسر الصمت دگة الباب
ترك أيدي وصاح بصوت مسموع متسائل
الأشيب: منو؟
- مِـنْ صوتها عرفتها بنت ماجدة
هند: أنــي.

أشرلي أوكف ورة الباب وأصبعة
السبابة على شفايفة بمعنى لا تحجين شي؛
ما فهمت معنى تصرُفه بس سويت مثل ما طُلب؛
وكفت ورة الباب وهو فتحها
الأشيب: كولي هند.!
هند: خالة نسرين كالت أذا ما عندة شي خلي ينزل يمنة بالصالة مسوين أكل والولد هم متجمعين.
الأشيب: عندي شغل أكلو أنتو بالعافية.

كمل كلامة وسد الباب بهدوء حتى
ما أنتظرها تحجي شي ثاني.!
ضل واكف عينه عليه ما أعرف شينتظر حتى
يحجي ولا قبل أني أحجي ألا بعد فترة ثواني
مورفو: لو أني حاجي وياية هيج أرمي عليك يمين الطلاگ.
الأشيب: الحمدلله أني مو رجلج.

رجع كعد على الكرويتة يهز بأيدة،
ثانيتين ونهض مثل اللي متذكر شي
تقدم ناحيتي يتفحصني بنظراتة
مورفو: شبيك احسك دا تسويلي سونار بعيونك.
الأشيب: تضوجين مِـنْ أحجي على عُثمان؟
مورفو: أي لأن ميت عوفة بحالة عاد.

أبتسم ودنك راسة يهمس ويا نفسه
الأشيب: هنيالي والله.
مورفو: على شنو؟

رُفع عيونه يباوعلي وأتوسعت أبتسامتة
الأشيب: مو على شي ؛ تبقين يمي لو تنزلين يمهم؟
مورفو: يمك ويمهم.
الأشيب: هذهِ شلون؟
مورفو: أني وياك ننزل يمهم.
- قبل لا يجاوب عطت بصوت عالي متوسلة بي
مورفو: عليك الله اريد يمهم ويمك حبـاب حبـاب حبـاب لخاطر عشرتنا.

فتح الباب وأشرلي أطلع
غيمت ملامحي توقعت رُفض
مشيت بخطوات بطيئة دا أطلع مِـنْ يمه
الأشيب: أنزلي قبلي شوية وأجي.
- رُفعت راسي عليه بسُرعة أريد أعيط
بس نظراتة كانت كافية تحذرني أفتح حلكي
وأنطق كلمة وحدة.!
كملت طريقي بس ما تحملت ما أحجي
رجعت عليه أهمس بضحكة
مورفو: والله أنتَ خوش زلمة.

ضحك بصوت عالي وأني خزرتة
خزرة مُزيفة لأن صوتة أكيد وصل للكاعدين جوة.!
تركتة يضحك ونزلت ومثل كُـل مرة نسرين
تهلي بيه وتطبطبلي على المكان اللي بجانبها
نسرين: تعالي يُمة تعالي حبيبتي أكعدي يمي.

كلامها البسيط وحنيتها تطيرني لسابع سماء..
الضحكة تنرسم على وجهي مِـنْ الأذن للأذن ؛
كعدت يمها ردت أحجي وياها وقاطعني
سؤال عزيز بطريقة أستفزازية
عزيز: ضحكة الأشيب وياج؟
- هزيت راسي نافية ما أعرف ليش كذبت
مورفو: مو وياية.
عزيز: لعد؟
مورفو: دا يحجي بـ التلفون.
- ضحكت نسرين تحجي ويا عزيز
نسرين: هذهِ الضحكة ما يضحكها غير ويا زياف.

هز راسة مبتسم وسكت ..
بُقى يباوعلي ما نزل عينه لما أني درت
وجهي ؛ دقايق ونزل الأشيب سلم وكعد بجانب
الولد ، وأكيد ماجدة ما تكدر تسكُت
ماجدة: خلصت شُغلك عمة؟
الأشيب: العُمر يخلص والشُغل ما يخلص ، بس لمتكم ما تتعوض.
- توسعت أبتسامتها بفرح
ماجدة: بعد كلبي عرفتك ما تفوت كعدة بيها عمتك.

كنت صافنة عليها وأفكر أفجرها
وأكللها نزل علمودي بس مِـنْ باوعت للأشيب
رُفع حواجبة بتحذير وكأنو فاهم اللي يدور براسي..
طولنا بالكعدة بعدها تطشرنا كلمن لـ مُكانه
وأني والأشيب نفس الطريق مِـنْ وصلت
غُرفتي أريد أدخل رُفعت أصبعي السبابة
كدام وجهي أوضحلة سكوتي
مورفو: لخاطرك سكتت ها.! لخاطرك.
- طبطب على صدرة مبتسم
الأشيب: ممنون ممنون.

شُمرت شعري بالهوى ودخلت لغُرفتي
عبالك مسوية أنجاز عظيم بسكوتي.!
بعدني ما تنفست أنفتحت الباب وكان الأشيب
وبسُرعة أجة على بالي كلامة مِـنْ ادخل عليه هيج
مورفو: بالجايات دُك الباب.
الأشيب: هسه دخلتي ما لحكتي تسوين شي.
- صُفگت كفوف أديه ببعض وضحكت بصوت عالي
مورفو: الله تبوگ حجاياتي.

بُقى مبتسم ويباوعلي لما
كملت ضحك؛ تحمحمت اعدل وكفتي كدامة
مورفو: تفضل؟ أمُر خدمة؟
الأشيب: ما سمعت "تصبح على خير".!
- ميلت راسي عليه أهمس
مورفو: تُصبح على خير فدعوس.
- لأن محذرني أنطق "فدعوس" هنا أنجبرت
أهمس حتى محد يسمع ؛ سوة نفس حركتي
دنگ شوية ناحيتي وهمس مبتسم
الأشيب: وأنتِ بخير فدعوسة.

أبتعد يريد يطلع وصارت عيني على عزيز
واكف بالصالة الفوك اللي مقابيل غُرفنا وعينه
علينا؛ توقعت راح يحجي شي بس الأشيب
ما خلاني أشوف مِـنْ طلع وسد الباب وراه؛
صرت وراها أحاول أسمع شي بس
أصواتهم كانت ما مفهومة .!
ما أنتابني الفضول أتدخل بحديثهم
طفيت الأضوية ودخلت لـ فراشي مستسلمة
للنوم ..
ماجدة بُقت يومين وراحت ؛ وأني خلصت
الأسبوع كُله يمهم ..
وعجزت أوصف فرحتي بيهم
كانو يعاملوني كأنو أني شخص منهم
ويعرفوني مِـنْ سنين مو غريبة..
وأكثر وحدة كدرت أنسجم وياها هي وردة ودنيا..
مورفو: والله طلعتي وردة اسماً على مُسمى.
وردة: ليش شجنتي تشوفيني؟
مورفو: هم وردة بس أصطناعية هسه طلعتي حقيقية أم العطر.

ضحكت وبُقت كاعدة يمي
ومونستني بسوالفها الحلوة ..
بنهاية اليوم دخلت فراشي بس كانت
روحي مقبوضة أحس أريد أبجي وأصرخ
وما أكــــدر.!
صافنة بالسكف اتأمل أنام وأخلص
مِـنْ اللي دا أحس بي ولو لساعات بس ما نمت..
نهضت مِـنْ مكاني أحاول أفرغ طاقتي السلبية
بشي ثاني وما كان كدامي غير الرسم.
أخذت أدواتي وطلعت مِـنْ الغُرفة لـ غُرفة الأشيب
دكيت الباب وبُقيت واكفة لما سمحلي أدخل؛
كان كاعد على سريرة والحاسبة على رجليه ..
خطيت كم خطوة للداخل وأبتسمت
مورفو: عمو اريد أكعد يمك أذا ما نعسان.

الأشيب: تعالي بابا

كعدت على طرف السرير وأحاول
أوضحلة ما راح يحس بوجودي وما أأثر
على تركيزة بشُغلة المشغول بي
مورفو: ما راح أزعجك ، راح أرسم وأنتَ أشتغل.

الأشيب: احجي براحتج الغي للصبح اسمعج

ما أعرف شنو اللي صارلي وكأنو
كنت منتظرتة يسمحلي أحجي حتى أنطلق..
شُمرت الدفتر والأقلام من أيدي وهمست بغصة
مورفو: أحس كلبي يوجعني.
- مِـنْ شافني هيج غلق الحاسبة وباوعلي بأهتمام
الأشيب: ليش مورفو؟ أحد مضوجج أو سمعج حجاية؟
مورفو: لا بس مخووگة ما أعرف شبيه،
أريد أبجي أريد أصرخ أريد أفرغ الطاقة السلبية
اللي بداخلي بس مدا أكدر.!
حتى كلام بداخلي أريد أحجي وهم ما أكدر.

الأشيب: الشي الي متكدرين تحجي ارسمي او اكتبي

مورفو: وين اكتبة

الأشيب: سوي دفتر مذكرات او اذا تردين اكتبي بالايباد

مورفو: ومن يكول راح ارتاح وراها

الأشيب: اني مجربها وهوايه فرقت عندي

بُقيت ساكتة وعيوني مركزة بي
كنت أحس محتاجة حُضن ؛
مِـنْ طال صمتي هز راسة متسائل
الأشيب: شبيج؟

مورفو: عمو اريد احضنك

بلع ريگة مِـنْ سمع مطلبي وما نطق بحرف
كان مستغرب أو يمكن كان رافُض.!
أبتسمت وشلت أدوات رسمي بحُضني ؛
نهضت مِـنْ يمة أريد إطلع
مورفو: راح أنزل أرسم جوة.
- وصلت الباب وأستوقفني مِـنْ ناداني
بأسمي ؛ نهض مِـنْ مكانه متقرب مني طُبع
بوسة عميقة على راسي وحضني،
غمضت عيوني ضامة نفسي بين أديه
مثل طفلة خايفة وحُضن أبوها أحتواها
الأشيب: أفديج بروحي بس لا تضوجين.

بُقيت ساكنة بحُضنه ؛ لميت شفايفي
داخل حلكي أحاول أسيطر على رجفة فگي
أقاوم دموعي تنزل ؛ أستجمعت قواي وكأنو
أستمديت طاقتي منه وأبتعدت
مورفو: عمو خلينا نرجع لذاك البيت.

الأشيب: ضجتي هنا

مورفو: ما ضجت لا ، بس هذه الفترة ما أعرف شبيه وأحس متقيدة حتى ما أكدر أبجي براحتي.
الأشيب: تكدرين تصبرين هذه اليومين وبعدها نروح؟
- هزيت راسي بأيجابية وأبتسمت
مورفو: راح أصبُر.

الأشيب: وين راح تروحين هسه

مورفو: راح انزل للمطبخ اكل شي وارسم شويه واصعد انام

الأشيب: تمام بس لا تتأخرين

مورفو: ماراح اتاخر تصبح على خير فدعوس

الأشيب: وأنتِ بخير فدعوسة

ضحكت كيف تطلع منه حلوة "فدعوسة"
تركتة ونزلت للمُطبخ طلعت أكل وعصير مِـنْ الثلاجة
وكعدت أكل وأرسم، رُفعت راسي على فتح باب
المُطبخ ودخل روار راجع للبيت ؛ أبتسم مِـنْ شافني
روار: شلونج؟

مورفو: الحمدلله وانتَ

روار: الحمدلله، شداتاكلين انطيني وياج

مورفو: وليش انطيك من مالاتي روح اخذ من الثلاجه

روار: بخيلة الملونه

مورفو: عزااا هاي منين سمعتها

روار: من الأشيب

مورفو: كال عليه ملونه

روار: اي وطير الشوك هم

مورفو: بايع اسرارنا.!

روار: لا هو من يسأل عليج مثلا يكول وينها طير الشوك ومن نسأله يضحك ويكول مورفو ومرات يكول صبا مادري شهل اسماء العندج

مورفو: هو شاف نفسه فارغ ماعنده شغله وعمله وكعد يطلعلي اسماء

ضحك وفتح الثلاجة مطلع منها أكل
إله وكعـد كدامي عينه على شعري
روار: شعرج حلو ولونه مُميز.

مورفو: يراد اشتريلك فد كيلو مستحه

ضحك بصوت مسموع
روار: ليش شمسوي؟

مورفو: شسوي بعد كاعد تتغزل بيه اعرفك تعرفني

روار: صارلج اسبوع يمنه غير صرتي من عدنه

مورفو: واذا هو اسبوع تقبل اتغزل بيك

روار: اي والله اقبل تغزلي عادي

مورفو: مشاعرك صايره صحراء

روار: أــخخ اول شخص يفهمني

أبتسمت وسكتت مكملة أكل
هو ياكل وعينه بتلفونه ؛ تنهد بصوت عالي
روار: أي أي ، الشاعر شيكول؟

مورفو: شيكول؟!

روار: المابايل ع روحه ماحاس بطعم الطفولة

مورفو: الله يا روار الفارس وانت حاس بيها؟!

روار: غير عمري 15 سنه وامي تفرش نايلون جواية من انام

ما كدرت أسيطر على نفسي
وضحكت بصوت عالي يمكن كل اللي
موجودين بالبيت سمعوني ؛ ضحك هو هم
روار: شلون تخليني أحجي.
مورفو: أني شعلية أنتَ حجيت مِـنْ ذاتك.
روار: اروح أنام لعد ، تصبحين على خير.

ترك باقي الأكل وطلع مِـنْ المُطبخ ..
كملت أكلي وعزلت المواعين ورجعت كعدت
مكملة رسمي مشغلة أغنية وأدندن وياها.!
تأخر الوقت وأني مندمجة وواهس كبير حتى
أخلص الرسمة بس قاطعني مِـنْ دخل عزيز
بدون لا يسلم أو يحجي شي توجه للثلاجة
ما أعرف شنو طلع منها وبُقى فترة زمنية
يفتر بالمُطبخ يطرگع بهدوء ، تجاهلت وجودة
ورجعت أندمجت ويا رسمتي ؛ ثواني
بعد ما كمل اللي كان يسويه وأجة يباوع بدفتري
عزيز: حلو رسمــج.
- رُفعت راسي عليه مبتسمة بأمتنان
مورفو: شُكراً.

سحب الكُرسي وكعد بجانبي
يباوع وياية ؛ ولأن ما متعودة أحد
يباوعلي أني وأرسم ويركز ويا حركة أيدي
توترت.! ما أحب أكون تحت تركيز أحد وقت الرسم.!
وخصوصاً شخص ما عندي ميانة وياه ..
توقفت عن الرسم وأنداريت عليه
مورفو: ليش كعدت يمي؟

عزيز: ردت اشوف شلون ترسمين

مورفو: اتوتر من احد يباوعلي

رجع نفسة للخلف مبتسم
عزيز: خوش طردة.
مورفو: شوف اني صريحة وما أكذب بشي لو طردة جان كتلك كوم من يمي ما أريدك تكعد تباوعلي.

عزيز: ولا يهمج هم راح اطلع

مورفو: عادي اكعد بس لا تباوعلي

سكت مطول نظراتة، بعدها كتف أديه لصدره
عزيز: لشوكت تبقين هنا؟

مورفو: هو بالعاده يصير تسأل الضيوف شكد تبقون هنا

عزيز: لا ميصير

مورفو: لعد ليش سألتني لو هاي معناها لزكتي امشي من يمنه عاد

عزيز: اني هم صريح وما جان هذا قصدي بس سألت ردت اعرف لشوكت

مورفو: ماعرف يمكن هذهِ اليومين اروح.

الشخص الوحيد اللي ما أندمجت وياه
و كُـل ما يحجي وياية أتوتر بسبب طريقة
كلامة الغريبة ونظراتة الأغرب.!
حاولت أتجاهل وجودة وأكمل رسمتي
وهو بُقى كاعد وأحس عيونه مركزة بيه.!
دخل الأشيب بعد فترة عيونه تتنقل
بيناتنا وأستقرت عليه متسائل
الأشيب: شو بعدج كاعدة؟

مورفو: جنت ارسم ونسيت نفسي

عزيز: واذا بقت كاعده؟!

الأشيب: مو زين عليها السهر

عزيز: انت هم سهران

الأشيب: شتريد عزيز؟!

عزيز: ما رايد شي.

رُفع حاجبة الأشيب وقابلة عزيز بأبتسامة
باردة ونهض طالع مِـنْ المُطبخ ..
أشرلي الأشيب أصعد لـ غُرفتي
الأشيب: يلا بابا للنوم كافي سهر.

مورفو: جان دا يكلي لشوكت تبقين هنا

بُقى ساكت ما عَلق وأني كملت كلامي
مورفو: وراد يباوع وياية بس أني أتوتر وكُتلة ما أحب وهو بُقى كاعد بعيد وساكت.

الأشيب: امشي نصعد يلا

لميت هوستي وصعدنا مع بعض
هو سابقني بكم خطوة وأني وراه ما سكتت
مورفو: أجه روار هم قبل عزيز وكعد شوية بعدها راح.
- كنت أحجيلة كُلشي لأن هو حذرني مِـنْ
الأختلاط بيهم وبنفس الوقت كنت أخاف يوصلولة
كلام عني غير الحقيقة ؛ مِـنْ وصلنا غُرفنا أندار عليه
الأشيب: ما منتظر منج شرح مورفو ، أعرفج
شنو وأعرفهم هُمَ شنو ، ما ضجت لأن حجيتي وياهم
بس لأن تأخر الوقت وأنتِ كاعدة ضجت ، تعرفين مو زين عليج.

مورفو: انت ليش ما نايم لعد

الأشيب: جان عندي شغل هسه خلصت وراح انام

مورفو: اوكي فدعوسي

ضحك بهدوء
الأشيب: روحي نامي فدعوستي

مورفو: اني مورفو معروف اسمي بس انت مجهول

الأشيب: لعد الأشيب شنو مو بعينج

مورفو: بس اسمك الحقيقي مو هذا ويجي يوم واعرفه

الأشيب: اذا اكو راح تعرفينه

مورفو: تمام باي

دخلت الغُرفة شامرة نفسي بفراشي
مستسلمة للنوم ..
ثانـي يوم كعدت نفسيتي متأزمة وروحي بخشمي
الدمعة بطارف عيني بس أريد أبجي؛
خلصت اليوم كُله بالغُرفة ؛ نزلت على كد الأكل
وصعدت ؛ لليل وأني وحدي مرة أبجي مرة
أنام أو أرسم ، ونفسيتي بالنازل.!
مَر يوم ثاني ونفس الحالة ، كرهت نفسي
مدا أفهم شنو أريد وشنو اللي بيه.!
لليل وأني على نفس ضيگة الخُلك وقبضة الروح
كعدت يم السرير حاضنة نفسي وأبجي
ما عندي وسيلة أعبر بيها عن حزني ووجع روحي
غير بالبُكاء.!
شهگت شهگات مُتتالية ورُفعت راسي
على صوت الباب مِـنْ أنفتحت ،
كان الأشيب أنفزع مِـنْ شاف حالتي
تقرب مني بخطوات سريعة كاعد كدامي يسأل بخوف
الأشيب: ليش تبجين مورفو؟ شبيج؟
مورفو: كرهت نفسي ما أعرف شبيه أحس راح أموت.
- رُفع راسي بسرعة مِـنْ دنكت
الأشيب: بروح أبوج أحد ضوجج هنا؟
مورفو: لا والله ، بس نفسيتي متدمرة ، أحس أريد
أنفجر.! حتى كلبي يعصرني حيل وأحس أنفاسي تريد تنگطع.

صار يمسد على راسي ساكت
ما يعرف شلون يتصرف وياية ، أمسح دموعي
بس ما أكدر أكتم شهگاتي لما أنهد حيلي
الأشيب: تهون بابا تهون.

صرت أمسح بدموعي ووجهي مغيم
سحبني مِـنْ شعري بهدوء مخليني اباوعلة وأبتسم
الأشيب: خاف مشتاقتلي لأن ملتهي عنج هذهِ الأيام؟

مورفو: هم مشتاقتلك اني احس ما يفهمون سوالفي بس انت

الأشيب: مو كل يوم بالليل يمج وبالنهار داتصل بيج واحجي وياج

مورفو: وين تحجي ويايه بس تكلي محتاجه شي واكلك لا وتروح

الأشيب: ليش تكولين لا من أنتِ محتاجة تحجين وياية لو تشوفيني؟

مورفو: لان اعرف مشغول لو متفرغ جان اجيت

الأشيب: اتفرغ لـ خاطر عيونج بس آمري

مَد أيدة يمسح بوجهي ونهض مكومني وياه
الأشيب: أمشينا نرجع لذاك البيت.
مورفو: هسه؟!
الأشيب: أي ما عدنا شي
مورفو: ما تودع أهلك؟
الأشيب: لا متعودين اروح وأرجع بدون وداع.

ما ناقشتة ، جمعت أغراضي اللي كنت جايبتهن
وهو أخذهن مني ونزلنا مع بعض ..
عند باب المُطبخ صار بوجهنا روار راجع للبيت
متأخر ، عگد حاجبة مستغرب طلعتنا
روار: وين بهذا الليل؟ مِـنْ مهججكم؟
الأشيب: راح نروح ، أنطي خبر لأمي الصُبح.
روار: على الأقل الصبح روحو شنو السالفة.!
الأشيب: شحجينا روار؟
- رُفع أديه مستسلم ومنسحب مِـنْ النقاش
روار: تمام تمام ، بس أنتبه لنفسك.

تحاضنو حُضن وداع ؛ بعدها أندار عليه
روار: فُرصة سَعيدة الملونة.

مورفو: هسه شنو لازم اجاوبك

روار: كولي اني الاسعد

مورفو: تريد اكذب عليك يعني؟!

ضحكت لضحكتهم على جوابي
روار: صريحة البنية.
مورفو: لا لا صدك اني الاسعد.

روار: ان شاء الله نلتقي مره ثانيه

الأشيب: كمت ادور لقائات

روار: اي شعدنا لعد خلينا نتعرف على كائنات جديدة.

رُفع حاجبة الأشيب ما عاجبة كلام روار وهو ضحك
وسكت ما علق بعد ، طلعنا مِـنْ يمة راجعين للبيت القديم؛
طلب مني أنام لأن مسافة الطريق طويلة
رغُم كنت حابة أبقى كاعدة واحجي وياه حتى ما يمل
مِـنْ الطريق بس وعدني مِـنْ يمل راح يكعدني
وهذا اللي صار فعلاً ؛ بس كنت نعسانة بعدني
مورفو: شتريد فدعوس؟
الأشيب: أكعدي أحجي وياية ضجت.

مورفو: مو متحب اللغوة انت

الأشيب: احب لغوتج اكعدي

مورفو: اكلك فدعوس اذا عفت الاجرام تعوف البيت ونرجع يم امك لو وين

الأشيب: وين تردين تبقين أنتِ؟

مورفو: هنا وهنا بس احس اهلك عدهم هوايه اسئلة.

الأشيب: اختاري المكان اللي يعجبج وما عليج بالباقي.

مورفو: زين خاله نسرين ليش تكول لعمتك اني كرايب زياف

الأشيب: حتى تخلص من لسان عمتي

مورفو: هاااا يعني صدك عمتك حية

الأشيب: شوية

مورفو: فدعوس تعرف بنفسك انت حيل حنين وحباب اول مره اشوف مجرم مثلك

الأشيب: أنتِ هم حنينة وحبابة.

مورفو: قصدك فطيرة

الأشيب: ليش قصدج اني فطير لعد

مورفو: لا انت حنين صدك وبقت بنفسي اعرف ليش صرت مجرم وانت شايل كل هاي الحنيه بكلبك

الأشيب: مو راح اعوف الاجرام شتردين بعد

مورفو: اي والله تصير تخبل بس بطل

الأشيب: هههههه صار ابطل لخاطرج

مورفو: عمو يعني انت تحبني؟!

الأشيب: اي

مورفو: احلف خل اصدكك

الأشيب: والله احبج بنيتي أنتِ

مورفو: اوووووي مو اكلك حنين

ضحك وبقى ماخذني على كد عقلي
منين ما أجيه يجي ويايه ..
كنت فرحانة بي لأن ماخذة مُطلق حريتي وياه
احجي بدون تقيّد وبدون خوف ..
وهو كان مركز ومهتم بكل حرف أنطقة
حتى اللي يعتبر حرف عابر هو يركز بي ويعظمة..
مِـنْ وصلنا للبيت كُـل واحد منا راح لغُرفتة
لأن كان الوقت متأخــر وتعبنا مِـنْ الطريق ..
ثانـي يوم الأشيب ترك شُغلة وكابلني حاير
بسبب نفسيتي الزفت اللي بثانية تتغيّر
وتصبح حالتي تعيسة ومزعجة ..
كان كاعد يحجي كلام لطيف يحاول يهون
عليه حالتي بس فجأة صرت أبجي ،
رُفع راسة يستغفر بـ قلة حيلة وقلق
الأشيب: هسه غير أفتهم شبيج يا عيني.
مورفو: ما أعرف عمو حتى أني ما أعرف.
الأشيب: لچ والله عليتي كلبي.
مورفو: حتى أني كلبي يوجعني ما أحب أضوج بس ما أعرف شبيه.
الأشيب: نطلع تغيرين جو ترتاحين؟

مورفو: ماريد اطلع اريد ابقى بالبيت

الأشيب: راح يصير بيج توحد وين اوديج وكتها

مورفو: اشمرني بشط

ضحك بقهر متنهد
الأشيب: لو كلبي ينطيني جان شمرتج هسه

مورفو: شوف عمو اريد واحد اخلي كدامي واكعدلك دك كتل وتعذيب وغلط وفشار لما ارتاح

الأشيب: اجيبلج كيس ملاكمه واشبعي بي كتل

مورفو: لا لا اريد انسان

الأشيب: اخذيلج كم بوكس بوجهي بلكت ترتاحين

مورفو: مو خطيه انت ماكدر اضربك بقوة

الأشيب: والحل

مورفو: انت مو مجرم وتعرف مجرمين جيبلي واحد منهم ونذبحه

ضحك بصوت عالي وفرك وجهة
الأشيب: شنو هذهِ المصيبة يربي وليش نذبحة اشبعي بي كتل ونرجعة.

مورفو: اهووو عاد نرجعه ويتشافى ويكوم يدور ثارات ويطين عيشتنه نذبحه ونبرد راسنه

الأشيب: ماخذه دور المجرمه من صدك

تأفأفت بملل وعطت
مورفو: فدعـــــــوس.!
الأشيب: لج هــا بابا هــا .

مورفو: كلي اسمك الحقيقي بلكت ارتاح

الأشيب: دروب جديده هاي

ضحكت بصوت عالي أصفگ أيد بأيد
مورفو: أوووي شبيك نفسية هسه هو اسم.

الأشيب: غير كون عندي غير الأشيب واكلج بي

مورفو: هي تبين بعدين

الأشيب: كومي نطلع نفتر بالسياره

مورفو: لا ماريد

الأشيب: اعلمج تسوقين

مورفو: جيبلنه واحد نخلي كدام السيارة ونجعصه

الأشيب: طلعتي أنتِ المجرمة مو اني

مورفو: من عاشر القوم 40 يوماً صار منهم

الأشيب: صرتي اضرب منهم أنتِ.

سكتت وعيني مركزة بعيونه
ما أعرف ليش دائماً تجيني هذهِ الرغبة
أنو أبوسة ؛ كان يباوعلي بحيرة لحد ما نطقت
مورفو: عمو أريد أبوسك.
- بلع ريگة وبُقى صافن بوجهي ما عرف
شيسوي وليش هذا الطلب الغريب.!
ضحك مضيع جدية الموضوع
الأشيب: هذهِ الهوسة كُلها علمود تبوسيني؟ تعالي بوسي.

قربلي خدة وأني هم ما ترددت أو تراجعت
طبعت بوسة على خدة بهدوء وبقيت قريبة
منه وفجأة صار كلبي ينبض بقوة .. أبتعد عني
الأشيب: هـاا وهسه؟
مورفو: خلِ أنام على رجلك سويلي مساج لراسي مثل ما أني اسويلك.

عدل كعدته وأني خليت راسي على رجلة
مغمضة وهو أيدة تمسد على جبيني وراسي
بهدوء لما غُفيت .. ما أعرف شكد مُضى مِـنْ الوقت
وفزيت على نفس نومتي ما متحركة وهو مرجع
راسة ساندة على طرف الكرويتة ونايم ، ندستة مِـنْ كتفة
مورفو: فدعوس ليش نايم؟
- جاوبني بدون ما يفتح عيونة
الأشيب: كاعــد.
مورفو: لعد ليش مبطل تسويلي مساج؟
- فتح عيونة مبتسم
الأشيب: غير أنتِ غُفيتي.
مورفو: وأذا أنتَ أستمر.
الأشيب: تعالي أستمر هسه.
مورفو: لا ما أريد بعد.
الأشيب: كومي كملي نومتج بغُرفتج.

رُفعت نفسي معدلة كعدتي
مورفو: أريد حليب.
الأشيب: جبتلج بالثلاجة.
مورفو: أريد حار.
الأشيب: هو الجو حارّ شتسوين بالحارّ؟

قُفلت إلا حارّ ، نهض مأشرلي أكوم
وياه حتى يحميلي الحليب وأشربة حارّ
بدل البارد ، سوالياه هو وأنطانياه شربت منه
شوية وبطلت
الأشيب: ليش بطلتي؟

مورفو: احس كلبي ماع من الحرورة

الأشيب: اجيبلج بارد

هزيت راسي بأيجابية
بدون كلام جابلي كلاص ثاني بي بارد..
شربتة كُله دُفعة وحدة ونزلت دموعي أحجي بغصة
مورفو: أريد أموت فدعوس.
الأشيب: أوف أوف شبيج ليش البجي هسه.

شهگت وصحت بصوت مبحوح
مورفو: كلبي معصور أريد أموت ما أدري شبيه.!

الأشيب: اسم الله عليج مورفو ليش هيج تسوين بنفسج

مورفو: شسوي وارتاح فهمني

نهض مِـنْ مكانة وكف كدامي ساند ظهره
على الطاولة وأيدة تمسد على شعري
الأشيب: أعرف سبب حالتج كُله بسبب
اللي صار وياج، واللي وصلج هذهِ المرحلة
هو الكتمان.! تضمين بكلبج وتسكتين
ولا مرة طول حزنج يوم كامل.!
حتى مِـنْ أمج ماتت بجيتي وتخربطتي وبعدها
بساعات رجعتي تضحكين وتتشاقين ،
مو لأن ما مقهورة او متأثرة بس لأن فضلتي
تخزنين حزنج بكلبج وتراكمن عليج .!
وبالتالي هذهِ النتيجة شوفي وين وصلتي؟
حتى أنتِ ما فاهمة نفسج شبيج.

مورفو: شسوي عمو اريد ارتاح والله تعبت

الأشيب: كتلج قبل فترة اكتبي كلشي بكلبج حتى ترتاحين واذا تردين اخذج لدكتور نفسي راح يساعدج هوايه وترتاحين

مورفو: ماريد دكتور لا، راح ابلش اكتب

الأشيب: وهو الصح واذا تردين تحجين وتحبين احد يسمعج اني كلني اذن صاغيه الج، واذا غيرتي رأيج وردتي دكتور هم حاضر اني وبالخدمه وشتآمرين اني وياج

مسحت دموعي بكُفى أيدي فگي يرجف
مو بس من حالتي ومن حنيته عليه
أنسان غريب صار أشهر مِـنْ يعرفني وعايش
ضيمي وياية وحاير بية ويحاول يسوي كُلشي لخاطري
مورفو: شُكراً عمو دا أتعبك وياية.

الأشيب: تعبي يروح من تصيرين زينه

وأتبعت نصيحتة وصرت أكتب كُلشي
بداخلي ، كُـل المواقف اللي مترسخة بعقلي
مِـنْ صُغري لحد هذا عُمري كتبتها.!
كُـل شي فرحني و كُـل شي حز بخاطري أنخط
بدفتري ؛ كُـل اللي يضايقني أكتبة ..
وكانت دموعي مصاحبتني بكل حرف أكتبة ..
وتجيني فترات أكعد أحجي للأشيب أشياء
مضوجتني وباقية بكلبي وهو دائماً يسمعني
بأهتمام ويحاول شكد ما يكدر يهون عليه ..
وبعد كُـل نوبة بُكاء وأنهيار يطلعني بالسيارة
يشغلي الأغنية اللي أحبها ويبقى يفتر بالشوارع
لحد ما أرتاح ، وبعدها ياخذني لأقرب
سوبر ماركت ومنطيني مُطلق الحرية بأخذ اي شي ..
كُـل الأشياء اللي كان ممنوع أكلها صرت
اكلها براحتي بدون عقوبة أو توسل ..
صعدنا السيارة راجعين للبيت وأنداريت عليه مبتسمة
مورفو: والله أنتَ خوش زلمة.

يضحك بكل مرة يسمع هذا الكلام مني ..
كان له الفضل بتغيّر حالتي ونفسيتي هذهِ الفترة
أحس صرت فراشة خفيفة وأكدر أطير براحة
بدون لا أحس بثقل الماضي.!
صارت بيه عادة كُـل ما أسمع صوت الباب
تنفتح معناها الأشيب رجع ، أترك كلشي مِـنْ أيدي
وأنزل أركض ، بعدني على الدرج وهو دخل الصالة
وكف بالوسط مخلي أديه بجيب البنطلون مبتسم ..
نزلت أطك أصابيعي كُـل أيد وحد وأميل بكتافي أغنيلة
مورفو: تدري شكد اشتاكيت .. بس تحضني تمنيت
خلصت عمري بياريت .. موتتني اللهفه عليك
محتاجك كلب وروح .. ميخالف صير جروح
لو عني وين تروح .. كلبي بدمة يلاگيك.

بُقيت أتمايل وأفتر حواليه عبالك دا أطرف
وهو يضحك بأنتعاش ، سحبني وكفني كدامة
الأشيب: أحلى مِـنْ يتلگاني بكل حياتي.
مورفو: وين لاكيها يومية اغنيلك.
الأشيب: يابة اروح فدوة للي يغنيلي لج غير واهس البيت أنتِ وعلي.

مورفو: وطبختلك هم

الأشيب: دشوف الدلال.! زين هو كلمن عنده بنية هيج تدللة؟
مورفو: ما أعرف بس اذا تحبة اي.
الأشيب: هنيالي عليج وبيج وبوجودج وبالصدفة العرفتني بيج.

مورفو: يا صدفه عمو غير جبتني يمك سحل

ضحك بصوت عالي
الأشيب: وهذهِ هم صدفة اللي خلتني اصير مجرم حتى تدور الدنيا واجي لبيت عثمان واشوفج.

مورفو: ويمكن رب العالمين دزك الي لان عرف بيك حنين واني شخص طاكه الجفاف وفاقد الحنية من كل الاطراف لا اب ولا ام ولا اخ ولا اخت ولا حتى عثمان، هو صح مردغتني بالبداية بس بعدين ستعدلت كسرت قانون ذاك المثل

صوت ضحكتة رج البيت
الأشيب: أوف مِـنْ لسانج أوف.

مورفو: عرفته المثل مو عمو

الأشيب: اي ذيل الجلب ما ينعدل

مورفو: اي بس انت امانه الله انعدلت وصرت حيل حباب

الأشيب: اذا كدرتي تسامحيني من كل كلبج وتنسين اللي سويتة بيج مو بس راح اكون حباب راح اكون اسعد انسان بهذهِ الدنيا.

مورفو: واني مسامحتك من اعماق كلبي وافعالك ويايه حاليا محتلك كل فعل غلط غلطته بحقي قبل، وصرت صاحب فضل عليه هسه

الأشيب: متوهمة أنتِ صاحبة الفضل عليه اللي غيرتي حياتي وطلعتيني من الاني بي مليتي عليه حياتي قبل البيت.

أحس روحي رفرفت من فرحتي بكلامة
وكيف يحسسني أني مسوية أنجاز كبير بتغيّر
حياتة للأفضل ، أخذت نفس براحة والضحكة ما فاركت
وجهي وهو مستمر يشرحلي أهمية وجودي
الأشيب: جنت أحب الهدوء المُميت هسه أحب لغوتج.

مورفو: جنت عايشة هدوء مميت اني، بس من شفت عندي فرصة احجي والغي براحتي بعد ما سكتت

الأشيب: هههههه اروح فدوة لغوتج

ضحكت وجاوبتة بدلع مُتصنع
مورفو: لا تخجلني فدعوس.
- سحبني مِـنْ ملابسي شامرني كدامة ناحية المُطبخ
الأشيب: أمشي ما تلوگلج.
مورفو: كسرت كلبي فدعـــــــوّس.

الأشيب: يبعد شوارب فدعوس

مورفو: الله حبيتها حلوة.

بُقى يضحك لضحكتي ودخلنا المُطبخ
مع بعض جهزنا الأكل وأندكت الباب ويا كعدتنا..
فتحها الأشيب ودخل علينا زياف عينه على الأكل
زياف: أجيت بوگتي مو؟
مورفو: يمكن أشتميت ريحة اكل واجيت أنتَ.
زياف: على نيتي.

غسل أديه وكعد ويانه باش ياكل قبلنا
عوجت حلكي أحب أستفزة
مورفو: شلون خُطار ملگلگ.

زياف: من اهل البيت اني

مورفو: لعد عليك المواعين اليوم

زياف: خوش تدللين.

مورفو: والله ما سويلك جاي اذا متغسلهن

زياف: خل اتسمم هسه ونحجي عود

الأشيب: تسمم براحتك

رُمق الأشيب بنظرات خيبة أمل مُزيفة
كيف واكف وياية ضدة.!
وكمل أكل بعدها طنش المواعين وراح كعد بالصالة.
عزلتهن وسويتلهم چاي ورحت يمهم
مورفو: المواعين في أنتظارك أبو زلوف.

زياف: خل اشرب جاي وميخالف

مورفو: خوش خل اكوم اقفل الباب وارجع

زياف: أحترمي نفسج الملونة شو صايرة ما تنجرعين؟

مورفو: كيفك لو تكول انت خطار ملكلك لو تكول انت من اهل البيت وتكوم تغسل المواعين

زياف: صدك جذب عمي ستين الف ملكلك مو ملكلك وحده بعد؟!

الأشيب: الحقيقة مُره

مورفو: مُره علينا عمو ومو ع هذا لا احساس ولا ضمير

زياف: رحم الله والديكم وأنتِ الهايشة شكبرج بعد تصيرين ولازكتله عمو وعمو

مورفو: هو ما ضايج انت شكو

زياف: تكبرين بصاحبي ، ما اقبل ترة بعده بعز شبابة.

مورفو: ترة اني رجعتلة شبابة اللي تحجي عنه لأن هو حتى ضحك جان ما يضحك.

زياف: هم صدك

الأشيب: ويامن اضحك وي ابو زلوف

رُفع أديه زياف وعاط بصدمة
زياف: لا هنا راح اكوم ادوس بمصارينك.!

مورفو: باع الصلف كاعد ببيتنا ويهددنا.

زياف: شبيكم وياية چلاب

الأشيب: أنتَ هم چلب لعد مكابلنا وكاعد

زياف: حالي حالك يمعود ، أكوم أولي أحسن مِـنْ الكعدة يمكم.

مورفو: اكلك سيماف شلونها

زياف: زينه

مورفو: شو متجي علينا؟

زياف: ملتهية ويا امها مريضة هذهِ الايام بس هم انطيها خبر.

مورفو: اذا تخاف تجي من وره الأشيب كللها سامحج عادي

الأشيب: شو تحجين بكيفج

مورفو: انت صرت حباب غير تسامح الكل عمو

رفعلي حاجبة ما عجبة الوضع
الأشيب: لا تقررين شي عني بعد

مورفو: بس هذهِ المرة عمو خطية.

الأشيب: الله كريم

زياف: هاي الـ الله كريم معناها أيسي

مورفو: لا يمي معناها هاهي

باوع زياف على الأشيب فاتح عيونه
زياف: بربك كول تتشاقة؟

...ضحك الأشيب وهز راسه بـ لا كام زياف وعاط
:-ولك شكد عااااااار لعد لك اني صاحبك من جنه نلبس حفاظات مايوم سمعت كلامي بشي وهاي الملونه بس تنعوصتلك شوية قبلت

الأشيب: انجب زياف لا تمسلت

زياف: دطيرو خرا بشواربكم

تركنا يريد يطلع صحت وراه
مورفو: اني ماعندي شوارب ترة.

زياف: شواربج برتقالية يالملووووووونة

بُقيت أضحك لما طلع وتقربت مِـنْ
الأشيب بسُرعة متسائلة بفرحة
مورفو: فدعوس عود صدك سامحتها؟

الأشيب: اي لـ خاطرج

مورفو: أوي فدوة شكد أحبك.

الأشيب: تحبيني بس وكت المصلحة

مورفو: خليني محترمتك عمو شنو مصلحتي يمك شهل حجي

الأشيب: طلع لسانها

مورفو: هسه عوفك من لساني، اريد اصبغ شعري اسود

الأشيب: لا
مورفو: عليك الله
الأشيب: لا
مورفو: بداعة نملة سُليمان
الأشيب: لا
مورفو: ما أريد أبقى ملونة.
الأشيب: لا
مورفو: بداعت السيد.
الأشيب: لا

مورفو: واني شكو داخذ رأيك والله اصبغه ونص

الأشيب: متأكده

باوعتلة بتوسل
مورفو: عليك الله بس شويه
الأشيب: لون شعرج حلو ولايگ عليج ليش تردين تخربينه؟

مورفو: اقلل الواني

الأشيب: هو الوانج الي مخليتج مميزة لا تلعبين بروحج شي

مورفو: ما
الأشيب: سوي غير شي
مورفو: ما
الأشيب: مورفو بنياتي لا تعاندين.
مورفو: ليش متحس بيه أريد أصير مثل البنات أتحلس وتملس خمو حرام.!
الأشيب: هذهِ مو معناها تخربين نفسج.

فجأة أجة على بالي غير سؤال وغيرت الموضوع
مورفو: صدك عمو انت هم تكتب سوالفك بدفتر مثل ما علمتني
- ضحك مِـنْ سؤالي وهز راسة بأيجابية
مورفو: انطيني الدفتر خل أقراه.
الأشيب: لا ما يصير.
مورفو: ليش عليك الله ، هيه نمونة هي.

الأشيب: من اموت اخذيهن اقريهن

مورفو: وشلون يعني انتظرك تموت يلا

الأشيب: اي

مورفو: بس ماريدك تموت قبلي عمو راح ارجع اضيع وراك، اني دوم ادعي يومي قبل يومك لان ماريد اعيش شعور الضياع والغربه بعد

الأشيب: ادعي ربي ياخذنا سوة، حتى اني مو كد خسارتج بعد.

مورفو: بالاخرة هم تعال عيش يمنه واعرفك ع بابا واكله شكد صرت حباب ويايه وحنين عليه لان اخر مره كتله الأشيب هم يعذبني ومايحبني

الأشيب: شكو عايش وياكم ابقى عايش يم اهلي

مورفو: لعد شلون اعرفك على بابا؟
الأشيب: عود اجيكم نتعرف ونصير اصدقاء وحبايب وبيناتنا طبات وطلعات شرايج؟!
مورفو: تقشمر عليه فدعوس؟
- ضحك بصوت عالي
الأشيب: اي شبيج هناك هم نصير عوائل.

مورفو: لعد ناخذ قصر بالجنه ونكعد كلنه سوة

الأشيب: مو اني مجرم من يكول ادخل الجنة

مورفو: الله غفور رحيم بس توب وهي تصفى

الأشيب: هيج رأيج؟!

مورفو: اي والله شبيك لا تبقى تستهزأ

الأشيب: مابقى شي الله كريم

دائماً يذكرني "ما بُقى شي"
ما أعرف على شنو بس كنت اتأمل شي زين..
مرت الأيام هدوء والأشيب رجع مثل أول
يطلع لشُغلة ويختفي نهار كامل ومرات
بالليل أنزل ما ألكاه ..
أبقى خايفة مِـنْ شُغلة وكلبي يرجف
كنت أنانية وأفكر بنفسي أذا صارلة شي
أني وين أروح؟ راح أرجع أضيع.!
ومع الوقت تغيّر تفكيري وخوفي ما كان بس على
نفسي .. كنت خايفة عليه مِـنْ الأذية فعلاً.!
ما كان يهدالي بال لحد ما أتطمن هو رجع
للبيت يلا أكدر أنام مرتاحة ..
بس الوضع زاد عن حدة والأيام تمضي ومدا
أشوف أي تغيّر او خطوة تثبتلي هو راح يعرف شُغلة.!
بُقيت كاعدة للصُبح أنتظر رجعتة
وعند الفجر يلا رجـع ، دخل البيت شايل علبة
بيها حية معناها قتل أحـد.!!
أنتقلت عيوني مِـنْ العلبة لعيونة اللي عاگدهن بأستغراب
الأشيب: شمكعدج لـ هسه؟

مورفو: مو كلت راح تبطل

الأشيب: كلت مو هسه

مورفو: شوكت لعد من تموت

الأشيب: مابقى شي مورفو ماكو شي يصير بالهين

نزلن دموعي بقهر مأشرة على الحية اللي بأيدة
مورفو: بس هذهِ تجي بالهيّن مو؟ تطلع تُكتل بدم بارد وترجع وبعدك تتأمل نفسك تبطل؟
الأشيب: كلت قبل كُـل اللي ماتو على أيدي بالحق.

مورفو: وشمدريك بالحق عمووو شمدريك ما واحد منهم مضلوم، زين انت مافكرت كم روح كسرت كم عائلة يتمت كم كلب بنيه كسرت وهي كاعده تنتظر ابوها يرجع ورجعلها جثة

الأشيب: كافي مورفو

زدت بالبكاء وهو عاف البوكس على جهة متقرب مني
الأشيب: ليش البجي هسه ياعيني.

مورفو: انت ليش ما تفهمني عمو والله خايفه عليك، كل ليله انزل والكاك ماكو وابقى انتظرك حتى اسمع صوت الباب واتأكد انت رجعت يلا اكدر انام، اموت الف موته من تتأخر التفكير ياكل كلبي والخوفه تهد حيلي اخاف صايرلك شي، هسه ع الاقل ما تهمك نفسك فكر بيه اني ما تكول اذا صارلك شي وين اروح منو الي بعد لو هم ما اهمك

حضني بقوة يريدني أسكت وهمس بهدوء
الأشيب: اششش كافي وعيونج اعوفها للشغلة بس انطيني صبر ما أكدر اطلع منها بسهولة.

مورفو: كلي شكد اسابيع اشهر سنوات انطيني فترة خلي ابقى احسب حتى اتامل اكو فرج بعدها

الأشيب: حسبه شهرين او 3 وينتهي كلشي

مورفو: اذا ما عفتها بعد هل شهرين راح اعوفك والله وما ابقى يمك بعد

الأشيب: اعوفها وعيونج بس كافي بجي

بُقيت ساكنة بحُضنة وساكتة ، حاول يبتعد
الأشيب: شو خليني أشوفج.
- هزيت راسي رافضة دافنة نفسي بقوة بين
أضلعة خايفة .. مسد على على راسي وهمس
الأشيب: مورفو.
مورفو: أممم.
الأشيب: شبيج بابا؟
مورفو: خليني بحضنك خايفة.

بُقى ساكت لما أبتعدت أني
كنت جاهلة للعيب وللحرام بهذهِ الأمور
كُبرت يم عُثمان على أساس هذا الشي مُباح
وهذا كان تعلومة حتى لا أنفر منه..
بس مِـنْ أجيت يم الأشيب كنت دائماً أشوف
الرفض بعيونة بس يجبر نفسة حتى ما يكسر خاطري ..
بُقيت مدنگة راسي امسح بوجهي
مورفو: راح أرجع أكمــل نومتـي.
- ردت أصعد سحبني مِـنْ أيدي مستغرب
الأشيب: شبيج؟

مورفو: مابيه عوفني

الأشيب: باعيلي احجي وياج

مورفو: ماريد خل اروح

رُفع راسي بأطراف أصابعة متسائل
الأشيب: ليش متباوعيلي ضجتي مني؟

بُقيت ساكتة وعيوني تتأمل ملامحة الحادة
وأجتاحتني نفس الرغبة أريد ابوسة.!
وبكل مرة ما أتردد ورُفعت نفسي محققة رغبتي.!
جمد بمكانة مِـنْ تصرفي ، بلع ريگة وأبتعد
ماخذ صندوق الحية وتوجهه لـ غُرفتة
الأشيب: روحـــي نامــي.

دخل غُرفتة تاركني واكفة بمكاني وكلبي
ينبض بقوة ما أعرف منين هذهِ الجُرئة وليش
دا أتجاوز حدي وياه أصلاً.!
مسدت على كلبي أحاول أهدي ورجعت لغُرفتي
ومن هذهِ اللحظة الأشيب تغيّر نوعاً ما.!
كنت أحسب بسبب تصرفاتي ووعد نفسي
مُستحيل أتقرب منه هذا القُرب بعد
بس ما صارت فُرصة بعد.!
مر نهار وليل وهو ماكو ، لحد ثاني يوم الفجر
سمعت صوت الباب أنفتحت وعرفت هو رجع
ركضت ناحية المُطبخ حتى أتلكاه
بس وكفت بمكاني كلبي يرجف خوف
مِـنْ شكلة كان مو طبيعي ، حالة مبهذل وتعبان.!
تقربت بخطوات بطيئة اسأل بخوف
مورفو: عمو بيك شي؟

كُـل ما أخاف أذا منه وأذا مِـنْ غير شي
ما أكدر أناديه غير "عمو" ..
جاوبني بدون ما يباوعلي
الأشيب: أم سيماف توفت.

تركني بصدمتي أحاول أستوعب كلامة
وفتح ماي المغسلة مخلي راسها جواها ..
ترحمتلها بيني وبين نفسي وجبت منشفة
وكفت يمة أنتظرة بس هو طول مخلي راسة جوة الماي..
بعدها بدقايق نُفضة ورفع راسة ، قدمتله
المنشفة أخذها مِـنْ أيدي ينشف شعره
مورفو: شلونها سيماف؟
الأشيب: ما شفتها ، بس شتتوقعين وهي ما عدها غير أمها.
مورفو: خطية "الله يرحمها" بس أحس أرتاحت لأن جانت مريضة.

هز راسة مترحملها ودخل للصالة
أمشي وراه وكلبي مقبوض خوفاً مِـنْ حالتة
ومنه ، بُقيت اسألة اذا ماكل أو اسويلة أكل
أحاول أفتح موضوع وياه
الأشيب: أريد بس چاي.

ما عرف أذا وضعة بسبب موتت أم سيماف
أو لأن دا يحاول يخلي مسافة بيناتنا هذهِ الفترة.!
رجعت للمُطبخ سويتلة چاي ورجعت خليته كدامة
هو كان صافن بالفراغ مِـنْ حس عليه همس بهدوء
الأشيب: عاشت أيدج.

شُرب الچاي دُفعة وحدة هو وحار ، رجع راسة
على طرف الكروتية وغمض عيونة ..
عصرت أيدي اللي رجفت بحُضني ،
طول يلا فتح عيونة وسأل مستغرب مِـنْ شاف
نظراتي الغريبة أتجاهه
الأشيب: شبيج؟

مورفو: عمو خايفه منك

أشرلي أكعد بجانبة
الأشيب: ليش تخافين مني ؟
مورفو: ما أعرف بس خفت مِـنْ وضعك.
الأشيب: أسف خوفتج بس تعبان شوية مِـنْ الصبح طالع وما نايم ، أنتِ ليش ما نايمة؟

مورفو: ماكدرت انام قبل لا اشوفك

الأشيب: هذا اني رجعت كومي نامي يلا تأخر الوقت
مورفو: عمو هم تاخذني على سيماف؟
الأشيب: راحت لبيت خالتها كم يوم واخذج الها
مورفو: راح تنام أنتَ؟
الأشيب: اسبح وانام.
مورفو: احضرلك ملابس؟
- ابتسم وهز راسة بـ لا
الأشيب: لا بابا روحي نامي لتفكرين بيه

مورفو: اذا احتاجيت شي تعال كعدني واذا جعت هم كعدني اسويلك اكل لتنام جوعان

الأشيب: اكلت وي زياف قبل لا اجي

نهضت مِـنْ مكاني حتى أصعد بعد ما
لحيت بالاسئلة بس ما أعرف كيف أتصرف
بهيج حالة ؛ نطقت بتوتر غير المُعتاد
مورفو: تصبح على خير.
الأشيب: وأنتِ بخير بنياتي.

أبتسمت مِـنْ كلمتة الأخيرة وصعدت لـ غُرفتي
ومرت كم يوم نفس وضعة يطلع مِـنْ الصُبح ويرجع
متأخر وتعبان ، وأني حاولت أبتعد وأعوفة على راحتة.!
بس الأيام كثرت وأحس مشتاقة لهوستي وياه ..
رُفعت عيني على الساعة مِـنْ سمعت صوت الباب
أنفتحت كان راجع مِـنْ وقت ..
ضحكت ونزلت أركض على الدرج صوتي سابقني
مورفو: أشتاقيتلك فدعـــوّس ..

كان قلبي يركض قلبي مِـنْ لهفتي
عليه ، أول ما دخلت الصالة تصرگعت وتجمدت
بمكاني مِـنْ اللي واكف كدامي ما كان الأشيب.!
ضحك بأستحقار متشمت بضُعفي وتقرب خطوات مني
::- ما توقعتي تشوفيني مــــو؟

يتبع......

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105