الأشيب الفصل الرابع عشر 14 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

كانت صدمة بالنسبة إليّ
كُلشي توقعت بس ما توقعتة
متزوج وعنده طفـــل.!

مورفو: وينهم لعد؟!

أخذ نَفس متنهد تنهيدة واضح الألم
ووجع الكلب بيها ، تقدم بخطوات ثكيلة وكعد
على طرف السرير كأنُ طاري الموضوع خلاه
يفقد حيلة .. فُرك وجهة بـ أثنين كفوف أديه
بقوة يحاول يمحي ملامح الحزن اللي ظهره على وجهه ،
رُفع عينه يباوع للفراغ وجاوبني بنبرة
طاغي عليها الألم والغصة
الأشيب: ماتـــــوّ .

تجمعت الدموع بعيني
مِـنْ صارت عندي لحظة أداك
سبب غضبة على عُثمان.!
تقدمت كاعدة على الأرض قريبة منه
همست متسائلة رغم معرفتي للجواب
مورفو: عُثمان قتلهم؟
- صدمني مِـنْ هَز راسة بـ لا
الأشيب: بالأول جنت عبالي عُثمان بس بعدين
عرفت عابد اللي قتلهم بأمر مِـنْ السيد.

مورفو: ليش شنو ذنبهم

...رفع عينه عليه وكال
:-اني ضابط استخبارات بـ مكافحة المخدرات

توسعت عيوني مصدومة
مورفو: يعني انتَ مو مجرم؟
- هز راسة نافي
الأشيب: أني بمُهمة ومجبور أخلصها.

مورفو: وعائلتك شنو ذنبهم شلون تجيبهم يمهم

الأشيب: ما جبتهم ، جنت هواية متكتم
وباذل كُـل جهدي حتى محد يوصل أهلي بس
ما أعرف شلون عُثمان الكلب عرف بيهم ..
طلب مني نشتغل سوة ضد السيد بس أني رُفضت
لأن عندي خُطة ومُهمة أمشي بيها وأريد إلزم
هواية ناس بظهر السيد ، وأذا أشتغلت ويا عُثمان
وقضينا على السيد ما راح أحصل شي ،
وحتى هسه ما أكدر أقتلة لأن قَربت أوصل للنهاية
وأذا مات يخرب شغل هذهِ الأشهر كُلها ويضيع تعبي وأنتقامي.

مورفو: وعابد شلون عرف

الأشيب: صارت فد حادثة أتهمو عُثمان بيها
فـ هو راد يثبت أخلاصه ووفائة للسيد بهذيج
اللحظة وكاللهم الأشيب متزوج وعنده طفل ..
ما أعرف شنو الربط وشنو دخلني بيناتهم
بس هو راد يخلي بأيدهم ورقة ضدي
هم حتى يخلص نفسه وهم حتى يندمني
لأن رفضت أشتغل وياه..
وصار مثل ما يريد عُثمان لزموني مِـنْ أيدي
التوجعني وعابد صار يساومني بـ عائلتي
وصرت أسوي أشياء مو ضمن المُهمة بسبب عُثمان.

مورفو: ليش ما خليتهم يم امك

دانك راسة متردد يحجي بس
حاول ما يضُم شي عني ويروي فضولي
الأشيب: عائشة جانت رافضة هذا الشي شكد توسلت وشكد حاولت بس ماقبلت وجانت دوم تكول "مُستحيل أعيش بعيدة عنك" حاولت أفهمها بكل الطرق أنُ أنكشفت وصار عدهم خَبر بعائلتي وواكع بين نارين بس بُقت قافلة ومن لحيت هددتني تنتحر وأعرفهت خبلة تسويها.

عصر عيونه بقوة بسبب دموعه اللي
غدرته ونزلت بدون سابق أنذار ..
رُفعت أيدي أمسح دموعه متجاهلة دموعي
اللي غركت وجهي والشهگة ما فاركتني
مورفو: شلون قتلهم عابد؟
- بلع ريگة ويضغط على نفسة حتى يكمل
كلامة بثباتية في سبيل أفهم الصار
الأشيب: جنت طالع بـ شغل بـ الليل ويا السيد
واتصلت بيه اول ما فتحت خط اجاني صوتها تبجي
وتحجي بصوت مخنوك
عائشة: فدوة ألحك علينا راح نموت.

طار عقلي مِـنْ سمعت كلامها
تخبلت وأني اسألها شكو؟ شبيهم؟ شصاير؟
كُـل اللي سمعتة منها "راح نموت"
جانت متأكدة مِـنْ موتتها مِـنْ الرعُب اللي عايشتة ..
بُقيت أتوسل بيها تحجي بس الشهگة ما أنطتها
مجال وأسمع صوت أبني يبجي مفرفح ويصيحني
يمان: بابا .. بابا .. بابا

جانت هذهِ أخير كلمة أسمعها منه
كعدت بالكاع مهدود حيلي وروحي شاغت
عليهم ، صرت أتوسل بيها تحجي لأن ما
أسمع صوت يمها أريد أفتهم شصاير
الأشيب: لچ بوية هديتي حيلي بس فهميني شصاير؟
عائشة: ما أعرف ما أعرف ، واكف رجال فوك راسنا
وكال أتصلي على الأشيب حتى تودعينه وكُليله راح
تموتون نتيجة أفعالة.
الأشيب: منو هذا أنطينياه عائشة.

صرت أصيح محروگ دمي عرفت هذهِ
لحظاتهم الأخيرة دام وصلوهم ما راح يتركوهم
بس جنت أحاول على الأقل أتفاوض وياهم .!
لكن الموازين أنقلبت وصارت تودعني فعلاً
صعدت السيارة أمشي بسُرعة جنونية
أحاول ألهيهم لما أوصل بس كُلشى أنتهى .!
صوتها وكلماتها الأخيرة الممزوجة بصوت بكاء أبني
عائشة: جنت أتمنى أموت قبلك حتى لا
أتعذب بعدك ويمكن راح تتحقق أمنيتي.
- الأحداث بعقلي شُبه حلم واتأمل أفز منها
ردت أحجي ردت أقنعها تصبر وأني جايها بالطريق
بس سبق صوتي صوت الرصاصة اللي أخترقت
أحشاء أبني وكتمت صوت بُكائة .!
سودت الدنيا بعيني وصرخت عائشة بوجع
كلب تأكدلــي موتت يمان
عائشة: لك يمـــان يُمــــــــــــة.!

طغى صُراخها على ضجة روحي
أنهاريت وصوتي راح مِـنْ كثر ما صيحت
وتوسلت أحد يجاوبني ..
رغم روحي اللي أحتركت وصُفت رماد
بس جان هَمي أوصل على الأقل أنقذ عائشة..
أنغلق الخط وأتصلت مرة ومرتين وألف
بس ماكو رد ..
وصلت البيت ونزلت ضايع ومضيع حتى
طريق الباب ما أريد أدخل وأنصدم
وأريد أدخل واتأمل اشوفها عايشة .!
صراع بداخلي تعبني و مِـنْ دخلت أحس
جبل وطاح على ظهري "أنكســـر"
لكيتهم بس شلكيتهم؟ جثة بحُضن جثة.!
حاضنها أبنها بنص الصالة لا نفس ولا روح.!
ركضت عليهم كلبي طايح على الأرض قبل جسدي
رفعتهم بحضني اتحسس مكان النبض
وأدعي عايشين بس أنتهت حياتهم.!
حضنتهم اتوسل بيهم مِـنْ شوغة روحي ما أعرف شسوي
الأشيب: يمان ، عائشة أجيتكم يا نظر عيني أجيتكم ما تتلكوني.؟

بس لا حياة لِمن تُنادي.!
أبوس بيهم اتوسلهم يكعدون ، أقنع بـ يمان
يكعد حتى أخذه لـ زياف مِـنْ كثر ما يحبه
شطلب منه يسوي لخاطر أخذه أله..
صارت ضجة برة ومن فتحت الباب عرفت
هذا زياف دخل مصدوم عينه على جثثهم
اللي بين أديه .!
عطت بي روحي توجعني حتى يطلع
أوهم نفسي هُمَ عايشين وعائشة مُحجبة شلون
يدخل هيج للبيت.! بس هو صدمتة ما جانت
أقل مني بدل لا يطلع كعد بالكاع الدموع متجمعة
بعيونة.! جنت أريده يسندني بس أنهيارة
خلاني أستوعب اللي دا أعيشة حقيقة مو حلم ..
حضنتهم على صدري بقوة أعاتبهم.! أبجي عليهم.!
على منو أبجي؟ كسرتين بنفس الظهر شلون أتحملها.!

غص بالكلام وضم وجهة بين كفوف أديه
يُفرك بوجهه ويعصر عيونه بقوة ..
أخذ نفس عميق يحاول يسيطر على نفسك
وعلى دموعة اللي يقاومها ، أتنهد وكمل كلامة
الأشيب: بُقيت أشهر أني تارك كلشي
أهلي ودوامي ومحد يندل أثري وين بس زياف
اللي بُقى طول هذهِ الأشهر ينبش بسالفة
قتلهم وجانت كُـل الأدلة تثبت "عُثمان اللي قتلهم"
بس وضحت بعدين وطلعت لعبة مِـنْ السيد
حتى يشعل النار بيني وبين عُثمان ..
ورغُم لعبتهم جانت مُخطط الها بأمتياز
لكن عُثمان شيطان أكثر منهم ، أول ما كشفهم
غشم نفسه وخلاهم على مايهم ، ولأن يعرفني
بس أرجع راح أذبحة أستغل غيابي
ووكعهم بسوالف ومصايب دمرتهم ،
مِـنْ غير المليارات اللي سرقها منهم ، كعدت
السيد على الحديدة ومن بعدها شرد ..
وأنتِ جنتِ ضحية لعب عُثمان وشُغلة الوسخ.

مورفو: عثمان السبب الرئيسي بـموتهم لو ما هو جان ماعرفو وماقتلوهم

حقدت عليه كيف كلبة ينطي يكون
سبب بموتت ناس أبرياء لا حول ولا قوة.!
حتى لو كان الأشيب معذبة ومدمر عيشتة
بس ما توصل يأذي أهله بي.!
هز راسة الأشيب بأيجاب ورُفع عينه يباوعلي
الأشيب: وجع كلبي حيل .. تمنيته عايش واوجع كلبه اكثر بس خفت عليج منه دامه عايش ماراح يعوفج بحالج.

زادت دموعي اللي ما وكفت مِـنْ كلامة.!
غريب ما يعرفني ما شاف اللي عايشتة
ما شهد على أنكساري مِـنْ أهلي
وخايف عليه كُـل هذا الخـوّف.! ليش عُثمان
ما خاف عليه؟ ليش ما فكر بيه قبل لا يشتغل هيج
شُغل؟ ليش أستمر وهو يدري هذا مصيري أذا
أنكشف حالي حال عائلة الأشيب تاليتي الموت.!
ورادو يسون الأتعس يوم قررو يعتدون عليه
لو ما الأشيب كان مصيري أتعس مِـنْ كُـل الأطراف..
نهضت على حيلي بدون تردد حضنت راسة
واني كلبي صاير نار عليه وروحي ممرود
مِـنْ العذاب والأختبار اللي مَـر بي ..
رُفع راسة يباوعلي وأني أمسد على وجهه بأيد
وحدة ، أبتسم يخفي حزنه
الأشيب: مِـنْ شفت مصيبتج هانت عليَّ مصيبتي
على الأقل أني رجال وأكدر أتحمل مسؤولية نفسي
وأكدر أدافع عن نفسي لو تعرضت لأذية
وعندي أهل يتفادوني ، بس أنتِ منو ألج؟
شلون تحمين نفسج وأنتِ أرق مخلوق؟

مورفو: بس هسه صار عندي انت راح تحميني ودافع عني وتتحمل مسؤوليتي مو؟!

الأشيب: اضمج بـ عيوني

بجيت من الحنية اللي بصوتة و مِـنْ نار كلبي
عليه ، أختلطت الأمور كُلها ، نهض مِـنْ مكانه كارصني مِـنْ خدي
الأشيب: أني حجيتلج هذا الشي لأن أعرف
أنتِ كد الثقة وما راح يجي يوم وتطلع حجاية منج
وحتى لا تبقين ضايجة ومقهورة لأن تحسبين
عايشة ويا مُجـــرم.
- همست بصوت يرجف
مورفو: والعالم اللي دا تقتلها؟
الأشيب: جنت دائماً أكلج بالحق ، ما قتلت
واحد بريئ.! كلهم مُجرمين ومُغتصبين وتُجار مُخدرات
وكلهم ماتو بأشتباكات ، جنت منهم وبيناتهم بس عليهم.

تفهمت كلامة وهذا شُغلة أكيد لازم يكون هيج ..
ما علقت بُقى عقلي دايخ باللي صاير وياه
الأشيب: وهذا الزواج حتى أعوضج حياتج
اللي فاتت مو لغير شي والله ..
ولا يُمكن يجي يوم وأطلب منج غير شي ،
بنياتي بـ أشهر قليلة مِـنْ عرفتج وصرتي
بمعزة روحي أنتِ ولسانج البيكيسي.

مورفو: ما تستاهل الي صارلك عمو حيل حنين انت

الأشيب: محد بينه يستاهل بس عوض ربج كبير ويجبر ان شاء الله

مورفو: راح ادعيلك ربي يعوضك ويبرد كلبك والله

الأشيب: عوضني بيج ، بنياتي أنتِ عوض أبني الراح.

مورفو: وان شاء الله تجي الي تعوض زوجتك هم

ابتسم وهز راسة رافُض
الأشيب: لا ما أريد عائشة عايشة بروحي عايش لذكراها ما أريد غيرها.
مورفو: مو بكيفك غصباً عليك.

ضحك ماخذني على كد عقلي
الأشيب: وهسه شنو تتزوجيني لو لا؟

مورفو: نعم لقد زوجتك نفسي

الأشيب: لا بطلت اني

مورفو: لا عليك الله تزوجني شبيك

الأشيب: رجاءً لا تجبريني ما أريد.

مورفو: شبيك فدعوس تبيع ثكل عليَّ؟

الأشيب: اي لعد شنو شوية اني

مورفو: لا هكبرك بكد الجاموس

صاح بدون تفكير
الأشيب: طلع لسانها طلع.
مورفو: احترم نفسك ولا تصيح وتعيش دور الرجال المتزوج ويعصب على زوجتة.
الأشيب: انجبي واحترمي نفسج.
مورفو: عــــزة اني ايدي مكسورة وانتَ تغلط عليَّ؟!

الأشيب: قابل لاعبين مصارعة

مورفو: وهسه شنو نتزوج لا

الأشيب: لا بطلت اني

مورفو: هاي فوك ما قابلة بيك الشايب

الأشيب: اني بعز شبابي بس أنتِ زعطوطة.
- غيمت ملامحي بزعل
مورفو: شبيك وياية فدعوسي؟
- ضربني على راسي بخفة
الأشيب: بطلي حركاتج وامشي بدلي يلا راح يجي الشيخ.

مورفو: شلبس

الأشيب: اي شي بابا براحتج

مورفو: خوش صيحلي سيماف لعد

هز راسة وطلع شوية ودخلت سيماف تضحك
سيماف: ها سرحن غزيلاتج؟

مورفو: تعالي ساعديني شلبس

سيماف: البسي واحد من فساتينج الحلوة

مورفو: اذا شافني الشيخ بيهن يصير بي عمى الوان

سيماف: هههههههههههههههه اي والله البسي اسود لعد

مورفو: ترا اريد اتزوج ما اطلك

سيماف: شبيج عيني كلشي ما يعجبج

مورفو: مو اني صحتج حتى تساعديني مو تمسلتين فوك راسي

سيماف: هلاو هلاو صايرة اضرب من عمها تمسلتين وحركات

مورفو: اي شعبالج لعد

ضحكت وطلعتلي فستان طوله 90 ونازك كلش ومشطتلي شعري ابتسمت تباوعلي وأني جامدة
مورفو: شو مدا أحس بـ أي شعور؟

سيماف: شلون يعني

مورفو: اقصد مو اني راح اتزوج اليوم شو مداحس بشعور مثلا يختلف مو المفروض هيج هي

سيماف: بالعاده المفروض تفرحين ترتبكين او تتوترين بس أنتِ زواجج شكلي لهذا السبب ما تحسين بي.

مورفو: اي راح يسكت اهله بي وبس حتى يكدر يبقيني يمهم

سيماف: وهو الصح احسن من ما عايشه وحدج

مورفو: ليش مو الأشيب يمي

سيماف: كاعد لخاطرج لان هو ماعنده مجال يحك راسه من شغله بس من اجيتي انتي صار يشتغل من البيت ويطلع بـ الليل من تنامين هو وزياف لان ميكدر يعوفج وحدج

مورفو: اذا رحت يم اهله راح تجين تشوفيني

سيماف: أكيد أجيج يروحي.

مورفو: بس بعيد

سيماف: دام نفس المحافظة مو بعيد

مورفو: جيبي ابو زلوف وياج هم راح اشتاقله

سيماف: هو من يجيبني غيره

مورفو: اكلج ما تضوجين لان راح اتزوج الاشيب وانتي تحبينه

سيماف: تضربين ع الوتر الحساس

مورفو: دعوفي المشاعر على جهة وجاوبيني.

سيماف: أني متزوجة هسه مورفو ، لا الأشيب ولا غيره بعيني هسه، بس زياف اللي مالي عيني وحياتي.

مورفو: الله يسعدكم

سيماف: بعد عمري ويسعدج ويريح كلبج يارب

مورفو: فدوة لكلبج

سيماف: يلا امشي نطلع

مورفو: خليلي عطر غركيني

غَركتني بالعطر وطلعنا للصالة
كعدت بجانب الأشيب وزياف طالع يجيب الشيخ..
أبتسم الأشيب وهو يباوع لـ فُستاني وشعري المرتب
الأشيب: طلعتي كنافة.
مورفو: ام القشطة مـــو؟
الأشيب: اي والله.

توسعت أبتسامتة وبُقينا نحجي لما وصل زياف
ووياه الشيخ وولد ثاني حتى يكون شاهد وياه..
سيماف دخلت جوة والأشيب أستقبلهم ودخلهم للبيت
كعد الشيخ مقابيلنا ورُفع عينه عليه يسأل بأبتسامة مُريحة
الشيخ: شلونج بنيتي؟
مورفو: زينة عمو.
الشيخ: نبدي على بركة الله.

...بلش الشيخ يحجي وطول وهو يقرة ايات واحاديث بعدها باوعلي وكال
:-صبا بنت رسن هل تقبلين الزواج من فَدار ياس ان قبلتي قولي نعم قبلت

...باوعت ع الأشيب عاكده حاجبي ورجعت باوعت للشيخ واردفت
:-شيخ اني اريد اتزوج الأشيب منو هذا فَدار

...ضرب الأشيب ع وجهه وهمس
:-اني فَدار يغضب الله

...باوعتله واردفت
:-لعد مو تكول ماعندي غير الأشيب

الأشيب: شبيج بابا اسمي بالهوية فَدار

مورفو: لعد والهوية اللي شوفتنياها؟

عصر ايدي كاز على اسنانة
الأشيب: مورفو هي وكتها هسه؟
- ضحك الشيخ يباوعلي
الشيخ: بنيتي لعد انتِ تردين تتزوجين وما تعرفين اسم زوجج؟

مورفو: عمو والله هو كال اسمي الأشيب

الشيخ: ماصار شي بنتي وهسه عرفتي وراح نعيد

باوعت على زياف مخلي أيده على حلكة
وداير وجهة المحتقن في سبيل يكتم ضحكتة ..
عاد كلامه الشيخ ومن وصل لأسم الأشيب
أنفجر زياف مِـنْ الضحك بُقينا كُلنا صافنين عليه ..
أتنرفز الأشيب ونتر بي يريده يسكُت
الأشيب: يعني أسكت هاي ، تطلع أنتَ؟

مورفو: ليش تكول عليه هاي محد كلك كذب عليه بـ اسمك

الأشيب: بعدين افهمج

مورفو: بطلت ماريد اتزوجك واني اسمك ماعرفه

الشيخ: بنيتي أنتِ مغصوبة على هذا الزواج؟

مورفو: لا عمو

الشيخ: زين وين اهلج لعد ليش وحدج

مورفو: كلهم ميتين ماعندي احد

هز راسة بأسف
الشيخ: الله يرحمهم، واذا ماتردين هذا الزواج اني ما اعقدلكم

الأشيب: شيخنه اعذرنه وكمل رحمه لوالديك

الشيخ: اريد اسمع البنيه ابني

مورفو: لا عمو والله ما غاصبيني بس اني اريد اعيش يم اهله ولازم يتزوجني حتى...

سد حلكي بـ أيده مانعني أكمل كلامي
الأشيب: مو وكتها تحجين قُصة حياتج مورفو.

زياف يسكت شوية ويرجع ينفجر من الضحك
مُضت نص ساعة واحنا على هذه الحالة
لـما زهك الشيخ وصار يتذمر
الشيخ: اخرتوني يا ابني هسه تعقدون لو لا؟
- الأشيب خزر زياف مسكتة وجاوبة
الأشيب: أعذرنا شيخ ، تكدر تبدأ.

رجع يعيد نفس الكلام وتم العقد بخير وسلامة ..
باركلنا الشيخ والولد اللي ويا زياف بعدين أخذهم
وطلعو والأشيب طلع وراهم ،
سيماف كانت بالغُرفة وواضح سامعة كُـل الحديث
لأن طلعت منتهية مِـنْ الضحك وتصفُك أيد بأيد
سيماف: ولج يُمة والرب متت ضحك عليكم.

مورفو: انجبي بالله

سيماف: فوكاها تكول أريد اتزوج الأشيب منو فَدار.

مورفو: اي شمدريني هو هم ما كال اني اسمي صخام

سيماف: يعني ماكدرتي تغلسين

مورفو: شغلس يمعوده بالله طلعو دايزوجوني لهذا صاحبهم الي ع اساس شاهد شكول عود

...دخل الأشيب من برا رافع حاجبه ويباوعلي عطت بي
:-لا تذب الصوج بيه

الأشيب: حاجي اني حاااااجي

مورفو: شكووووو تصيييييح

الأشيب: منوووووو مصيييييح موووورفوووو

مورفو: هاي اول ساااعه وهيج باجر عكبه شسوووووي لعد

الأشيب: لج شمسووووي اني بنت الاوااااادم شمسوووي

مورفو: مااااريدك بعد طلكنييييي

الأشيب: اي مو دانلعب بيت بيوت نتزوج ورة ساعه نطلك مووو

مورفو: ااييييي ماريدك من هسه بلشت تعنفني

...تقرب مني حضن وجهي بكفوف اديه وكال
:-واني اكدر ازعلج حتى اعنفج شبيج

مورفو: لعد ليش تصيح

الأشيب: شفتج تصيحين واخذني الواهس وياج

مورفو: ليش ما كلت اسمك فَدار

الأشيب: موتيني لما عرفتي اسمي

مورفو: ماحبيتها منك عمو

الأشيب: شنو هي

مورفو: تخليني اعرف شي عنك من غيرك

الأشيب: ما تنعاد بعد

مورفو: احضني لعد

ضحك وسحبني لحضنه وأول مرة أحسه ما متردد
الأشيب: شلون بنيات ينكرطن.

مورفو: بعد ما اكلك عمو راح اكلك فَدار مو

الأشيب: تكليلي الي يعجبج يروح فَدار

مورفو: أويّ حلوة هاي "يروح فَدار".
- ضحك وبعدني عني يشوف ضحكتي
الأشيب: يروحلج فدوة هم ، بعد؟
مورفو: راح أحبك يول.

الأشيب: انجبي واحترمي نفسج

ضحكت من كُـل كلبي على كلمة "أنجبي"
لأن ما يغلط أحس شي غريب مِـنْ اسمعه يكولها
مورفو: ترة لطيّـــــــــــــف.

قاطع حديثنا الطفولي من ناحيتي صوت
سيماف ، كاعدة بالكاع غاصة من الضحك
أنداريت على الأشيب مستغربة
مورفو: شبيها هاي؟!

الأشيب: طاكات فيوزاتها من تزوجت ذاك العار

من سمعت كلامنا زادت بدل لا تسكُت
وتصيح "راح أموت" الإشيب يدردم عليها
يريدها تسكُت وهي قُفلت ، أتنرفز ما أتحمل ونتر بيها
الأشيب: وسم ، شكو شبيح.!

سيماف: ههههههههههههه تذكروني بماشا والدب نفس شي والله

مورفو: لج سيماف ما اسمحلج تكولين ع زوجي دب

الأشيب: شبيج مورفو شو صرت دب شسالفه

مورفو: غير هي داتكول اني شعليه

الأشيب: هي شبهت ما كالت

مورفو: شبهتك بالدب ترا شنو الفرق مثل مدا تكول انت دب

الأشيب: وهذا الطول والعضلات مو بعينج سويتيني دب

عطت متنرفزة لأن فَر الموضوع عليَّ
مورفو: اني شعليه فَـدار ، غيّــــــــر هـــــــيَّ.

...ضحك وكال
:-حلو بحلكج اسم فَدار

عاطت بينا سيماف بضحكة تريد تسكتنا
سيماف: ولكم كافي راح راح أمــوّت.
مورفو: موتتهم شخبصتينا.!

أستمرت تضحك وكأن تريد سبب حتى
تضحك أكثر ، طنشها الأشيب وسحبني وياه
كاعدين على الكرويتة وهي ضحكت ضحكتها
المصرية الرنانة وصاحت
سيماف: شايفين ماشا شلون تمشي ورة الدُب؟
بالضبط نفس مورفــو ..
مورفو: ترة أيّـــع ما تضحك سيماف لا تصيرين تافهة.
سيماف: ولكم منين اجيبلكم زياف هسه.
الأشيب: هو قصر رجلج العار فضحنا كدام خلق الله صرنا شُبهه للشيخ.
مورفو: اي والله عبالة مغصوبة.
الأشيب: وأنتِ ما كدرتي تلزمين لسانج لما يمشي؟

مورفو: شنو عمو غير عبالي راح تزوجني لهذا صاحبكم

الأشيب: ومخبل اني اسويها

مورفو: هسه ما كلت لعد شو عندك هويتين

الأشيب: مو كلنا اني ضابط أستخبارات

...خليت ايدي ع حلكه بسرعه وهمست
:-شبيك عمو سيماف هنا

سيماف اللي هدأت شوية رجعت نامت
على الكرويتة ورجليها ترفس ميتة من الضحك.!
بُقيت صافنة عليهم والأشيب وخر أيدي مبتسم
الأشيب: تعرف سيماف.
- تشخصت عيوني بصدمة
مورفو: و زياف؟
- ضحك على ردة فعلي وجاوب بهدوء
الأشيب: هم ضابط وياية.

مورفو: انتو تضحكون عليه لو شنو

الأشيب: لا والله شبيج

نهضت من مكاني ضايجة وما مستوعبة
أحس نفسي غشيمة وقشمر بيناتهم ..
نترت بيهم بعصبية أني ومتوجهه لغُرفتي
مورفو: دطيــرو بعد يومين تجوّن تكولون أحنا فضائيّن.

دخل الغُرفة راكعة الباب وراية بقوة
وما أسمع بس صوت سيماف اللي طلعتها
من ماعونها بالضحك ، عطت بيها أني وبالغُرفة
مورفو: وسم بكلب السيد العار الوصخ أبو الدود المكَطن.
- صاح الأشيب بضحكة
الأشيب: تعالي أبوس لسانج على هذا الكلام العسل.

...فتحت الباب ونترت بي
:-لا تستهتر فَداااااار

سيماف: بعد شيخلصك عرفت اسمك.
مورفو: شبيج أنتِ طب بيج جني تهسترتي شكو هو؟
سيماف: لج مورفو بربج كافي راح اموّت.

أنفتحت الباب ودخل زياف
باوعلي ورجع باوع للأشيب وأنفجر مِـنْ الضحك ،
تنرفزت مِـنْ ضحكهم وباوعت للأشيب
مورفو: كول لصاحبة خلِ ياخذ مرتة ويطلعون مِـنْ بيتنا يلا عزلنا.

الأشيب: مو عيب بابا اني هيج علمتج

مورفو: كلشي ممعلمني انت لا طلع حجي من كلبك

ضحك وهز راسة يستغفر ، زياف وسيماف ما سكتو
وزادتها سيماف من كالت لزياف نحن نشبه ماشا والدب.!
باوع زياف للأشيب غاص من الضحك وصاح
زياف: لك هــا الـــدُب .
- هز أيده الأشيب طافرة روحة من ملحتهم
مورفو: تنلام بيكم مورفو من تطردكم ، يلا فاركو.

زياف: افااااا تطرد صويحبك علمود مرتك

مورفو: اي يطردك اني الكل بالكل انت بيش الكيلو بعد

زياف: دافعلي يا عار سكتهاااا

الأشيب: ماكدر اعذرني

زياف: ولك أبو شيبة.!
الأشيب: وجعه بكلب أبو شيبة شكو؟

مورفو: اسم الله ع كلبك عمو خلي الوجعه بكلب السيد

رجع أشتغل زياف يضحك وذيج جنها دجاجة مهلسة هستوهم ذابحيها وترفس، لعبو روحنا بس يضحكون ما سكتو إلا مِـنْ نهض الأشيب وسحب زياف مِـنْ ملابسة طلعة برة البيت
ورجع على سيماف ينتر بيها
الأشيب: كومي أطلعي ورة رجلج لا أطلعج دفرات هسه.
- فززنا زياف مِـنْ رجع دخل وخنك الأشيب مِـنْ ورة
زياف: تريد تطلع مرت دفرات؟ اليوم أدفُر عمرك
وأزوعك العافية عار خايس ، غَيرتك علينا الملونة.
- سحبه الأشيب بحركة سريعة مطيحة على
الأرض بقوة وصار فوكاه مخلي أيده على رقبتة
الأشيب: وسيماف ما غيرتك عليَّ وأنتَ تريد تزوعني العافية لأن طردتها؟

زياف: محد يغيرني عليك حزام ظهري انت

نهض الأشيب ومَد أيده لزياف مكومة وياه
الأشيب: أخوية سندي أنتَ.
مورفو: أيّــــع هاي شبيكم.!

سيماف: دعوفيهم صعدت عدهم المشاعر

مورفو: مشاعركم الجياشة لا طلعوها يمنه حتى ماتلعب نفسنه منكم

زياف: ولج الملونه احترمي نفسج

باوعت للأشيب بزعل
مورفو: دا تشوف شلون يكسرون كلبي كدامك وأنتَ ساكت؟
الأشيب: اكسر ظهر اللي يكسر كلبج.

مورفو: اكسر ظهر زياف لعد

تقدم زياف سحب سيماف من ايدها يباوعلي صَفُح
زياف: أمشي أمشي مو شكول واحد يجيهم هذولة.

اخذها وطلع والأشيب طلع وراهم شوية ورجع يضحك
الأشيب: أرتاحيتي طشرتيهم؟

مورفو: بس يضحكون وهو ماكو شي يضحك

الأشيب: يولون لا تضوجين

مورفو: شوكت نروح لاهلك وشراح تكللهم

الأشيب: شوكت تردين تروحين نروح

مورفو: سألتك سؤالين ليش تجاوب واحد وتغلس ع ثاني

الأشيب: اني مو كايل لا تعبين عقلج بهل سوالف ماعليج اني اعرف شكول

مورفو: مو اتعبه بس فضول اريد اعرف

الأشيب: راح اكول لحقيقه

مورفو: تزوجتني حتى تبقيني يمهم

الأشيب: لا كدامهم أنتِ زوجتي مو اتفاق خوش

مورفو: يا حقيقه لعد

الأشيب: حقيقة أنتِ زوجتي شبيج

مورفو: هااا زين اذا جفصتها شلون

الأشيب: لج أنتِ زوجتي هسه شتجفصين يعني؟

مورفو: يعني اكللهم زواج شكلي وهيج

الأشيب: حتى اموتج غير

مورفو: وهاي راح اعيش بغرفتك

الأشيب: اي

هزيت راسي وسكتت أحس عقلي
متشوش وأفكاري متشتته ..
دخل الغُرفة هو شوية وطلع بأيده تلفون جديد قدملياه
الأشيب: هذا التلفون إلج ، فتحتلج بي واتساب
وموجود رقمي ورقم زياف وسيماف ، ومن نروح لبيتنا تاخذين أرقام البقية.
مورفو: ما أريد مو عندي أيباد.
الأشيب: هذاك باوعي بي يوتيوب وهذا حتى تحجين ويا البقية بي.
مورفو: أخُذ الآيباد لعد ما أريد أثنين.
الأشيب: شهل قناعة اللي عندج.!

مورفو: لعد هي شبع واحد كافي

الأشيب: چؤ بقيهن يمج أثنينهن تحتاجيهن

تقربت طبعت بوسة على خذة بقوة
مورفو: شُكراً كُلش.

الأشيب: تدللين بنياتي

مورفو: نروح باجر لاهلك

الأشيب: صار

مورفو: راح تطلع عيني من الدلال ترا

الأشيب: بيج ومابيج ادللي دام الأشيب عايش

مورفو: أوّي شكد لطيّـــــــــــــف.

ضحك ونزلت عيونه يباوع لأيدي
الأشيب: بعدج ما تحسين بـ ايدج

مورفو: اي واصابعي الـ2 الي مامكسورات ما يتحركن

كان يباوعلهن بتأنيب ضمير
أعرفة يلوم نفسة ، نزل راسة طابع بوسات
بهدوء على أصابعي اللي ما مجبرة الوسط والسبابة
الأشيب: لا تخافين فترة وتطيبين أن شاء الله.

مورفو: كل ليله دادعي ع السيد يطلع حوبتي بي بالدنيا قبل الاخره

الأشيب: ربج عادل ومايضيع حق احد وراح ياخذ حقج

تربعت كدامه بحماس
مورفو: شوف فدعوس اني راح ادعي وأنتَ كول آمين

الأشيب: يلا يا بعد حيلي لا تقصرين بس لا يلوحني طشارج.
مورفو: لا لا بس على السيد الكـ***.
الأشيب: لسانج مورفو ويلا أدعي.

رفعت أيد وحدة بوضعية الدُعاء ورفعت راسي للسماء
مورفو: ربي بجاه أسمك كون تبلي السيد بمرض ما إله لا طب ولا دوه ويتعلعل وينشلع كلبه منا لبعد 60 سنة.

الأشيب: آمين

مورفو: ياااارب توكع طريح الفراش وماتحرك لا ايد ولا رجل والحاجتين جواك ومحد بحالك ولا احد يداريك وتخيس وتموت من ريحه عفونتك ياقذر يا نكس يا معفن

الأشيب: آمين

مورفو: يااااارب كون يصير بي كنكري ويخيس ويطلع منه سلابيح ودود وحيايه وياكلنه شويه شويه ويبقى يتعذب ويتوجع لما يخلص

الأشيب: آميّـــــــــــن

مورفو: روووح ياااا خضييير ان شاء الله توكع بيد مجرم اجرم منك ويغتصبك اغتصاب جماعي 10 مرات ويكطعك ارباً ارباً ويوزعك ثواب ع چلاب المنطقه

ضحك بصوت عالي هرج البيت
الأشيب: ولج ابوس هل للسان على هذه الدعاوي اللي تريح الكلب.

مورفو: عوف البوس هسه وكول امين

الأشيب: آميّـــــــــــن يارب.

مورفو: خلصت الجولة الاولى باجر نكمل الجولة الثانية

الأشيب: خوش لعد كومي نامي تأخر الوقت

مورفو: وانت هم كدامي يلا لـ فراشك

رفع حاجبة مبتسم
الأشيب: لا والله.!
- نهضت مِـنْ مكاني وكرصتة مِـنْ خده
مورفو: أنتِ شنو فَـدار؟ شنو هذهِ اللطافة..
- ضربني على أيدي بخفة
الأشيب: ركض لفراشج بدون لواگة يلا.

مورفو: ما نعسانة

الأشيب: تأخر الوقت.
مورفو: اي شعدنا نبقى نايمين للظهر باجر

الأشيب: مو راح نروح لـ اهلي

مورفو: اي اكمل نومتي بالسيارة

الأشيب: ومنو يحجي ويايه ويونسني بـ الطريق

مورفو: مو اني

الأشيب: هاهي مورفو اعتبرينا متخاربين

مورفو: انت الخسران منو يلغي يمك بعد

الأشيب: اخلص من دوختج عادي

مورفو: يعني اني ادوخ فَدوري

ضحك وهز راسة مستغفر
الأشيب: ماتكدرين اذا ما تجفصين بـ اسمي

مورفو: فوك ما دادلعك وين لاكيها تتبطر

الأشيب: ماريد هل دلع وكومي نامي كافي هيلكة

تأفأفت وتمشيت وكفت بباب غُرفتي وصحت بعصبية
مورفو: ما أنام ما أنام .
- ركعت الباب بقوة وشمرت نفسي على الجُرباية
ثواني وأنفتحت الباب بقوة ، واكف يباوعلي
بملامحة الحادة اللي تخرُط العافية ..
وكفت خايفة منه وهو أشرلي بأصبعة أتقرب منه
الأشيب: تعالـي.
مورفو: ما أريد أجيك أريد أنام.

الأشيب: تعالي اريد ابوسج

مورفو: فَدار سوالف الامهات عوفهن عليك الله تكلي تعالي ابوسج وتعلسني طيح حظي

ابتسم ورجع بسرعة لـ ملامحة الحادة
الأشيب: هو هيج يطبكون الباب مورفو؟

مورفو: مرة الجاية ابوسه واحضنه واطبكه بهدوء

الأشيب: وتصيحين وتعاندين بعد

مورفو: التوّبـــــــــة.

...بقى واكف خازرني خزة مصطنعه برطمت وحجيت
:-عمو هاي اللحظه اصعب من اعرب ما تحتهُ خط

ماكدر يكتم ضحكتة وضحك متسائل
الأشيب: يا لحظة؟

مورفو: هاي مال واكف وخازرني وتهددني واني ماعرف مصيري شنو

الأشيب: لعد صيري حبابه حتى ما تعيشين هاي اللحظه بعد

سويت نفس حركتة أشرتلة على خشمي
مورفو: على هل خشم تآمر.
- توسعت ابتسامتة وأشرلي أروحلة
الأشيب: تعالي لا تخافيّن.
- تقربت امشي بهدوء عليه سحبني لـحُضنه
الأشيب: لا تخافين مني مستحيل أأذيج بيوم بس لا تتصرفين تصرفات تزعلني.
- حُضنته بأيد وحدة بقوة
مورفو: اني أحبك ما أريد أزعلك.
الأشيب: يلا نامي لعد ، حتى الصُبح نروح.
- أبتعدت عنه مبتسمة
مورفو: تصبح على خير فَـدار.

الأشيب: شو احسج ممصدكه عرفتي اسمي

مورفو: حيل حلو حبيتة اكثر من فدعوس

الأشيب: هههههه فدعوس من كلبج مو اسمي

ضحكت ودفعته بخفة
مورفو: يلا للنوم
الأشيب: نوم العوافي فراشتي.

أبتسمت من تسمية "فراشتي"
تركني وراح لـ غُرفتة، وأني كُـل شوية أتذكر
حجايتة وأكزكز فرحانة بيها ..
ثاني يوم الصُبح حسيت على دكة الباب وصوت الأشيب
يصيح عليه حتى أكعُد ..
ما جاوبتة غلست لأن كنت نعسانة ،
ما أعرف شكد مَر مِـنْ الوقت ورجع يدك بالباب
وغلست مرة ثانية ، فزيت مِـنْ حسيت عليه يندس بيه
الأشيب: كافي نوم مورفو شوكت نروح.!
- دفعت أيدة ورُفعت الغُطة على وجهي وهس سحبة
الأشيب: هو هذا اللي يبقى سهران ومن فَـدار
يكول كومي نامي تزعلين وتطلعين لسانج أطول منج.

...فتحت عيوني ضايجة وخازرته ونترت بي
:-شفت نتائج الزواااج مووو شفت شلون تغيرت عليه

ضحك من كل كلبة وحاول يرفعني مِـنْ فراشي
الأشيب: شلون ويا لسانج اني

مورفو: اريد انام عفية

الأشيب: نامي بـ السيارة

مورفو: العصر نروح فدعوس

الأشيب: مو امي تنتظرنا على الغدة خطية

مورفو: خلِ تضم الاكل وتنتظرنا على العشة

رفع ايده يمسد على شعري
الأشيب: مو هي كالت جيب مورفو بسرعة شتاقيتلها

مورفو: ليش تكذب

الأشيب: ممكذب والله وكالت هي تحبج هواية وانو أنتِ دخلتي كلبها وصرتي بـمعزة وردة.
مورفو: أوي فـدوة خالة شكد حنونة.
الأشيب: وهسه تبقين نايمة لو نروح؟
- نهضت مِـنْ مكاني بسرعة
مورفو: لا نروح ، خطية خالة تنتظرنا.

طلعنا مِـنْ الغُرفة أني غسلت وتوجهت للمُطبخ
هو كان يسوي ريوك ، أبتسم مِـنْ دخلت وتقرب مني
الأشيب: شايفة مِـنْ الجوّ ربيع وتكعدين
الصُبح بالحديقة والفراشات طايرة فوك الورد
شكد ترتاح نفسيتج؟ هذا صباحي كُـل يوم بوجودج.

توسعت أبتسامتي طايرة مِـنْ الفرح على الوصف
صرت أحس الفراشات طايرة بكل المكان
مو بس بكلبي ، حضنت أيدي منتعشة
مورفو: عُمري عمو ترة ما أتحمل هيج أني
ما متعودة على الحنيــة .

الأشيب: عوضتي المستحيل يتعوض شلون ما احن عليج

صار أقل موقف يأثر بيه وتنزل دموعي
حتى بالمواقف الحلوة والحنينة ما أكدر أسيطر
عليها ، جاهدت بس ماكدر ونزلت دموعي
حضني يضحك مِـنْ الدراما اللي صارت
الأشيب: دموعج غالية مورفو ما أريدها تنزل.
مورفو: دموع الفرح هذهِ ، فرحانة بيك حيل.

باس عيوني وكعدنا ناكل وبُقيت منطلقة
أحجي وياه وأشرحلة عن أمتناني وكيف أحس
حظي حلو لأن ربي جمعني بي ..
كُـل مشاعري كانت على لساني أشرحها بدون
تردد بدون خجل بدون أي عائق ..
و كُـل أسكت هو يخلق موضوع مِـنْ جوة الكاع
يجبرني أنطلق وياه مرة ثانية ..
بعد ما كملنا دخلت الغُرفة أغير ملابسي
لبست فُستان وردت أرفع السحاب
بس ما كدرت متقيدة بسبب أيدي ..
وكفت الباب مطلعة بس راسي وصحت عليه
أجاني بسُرعة ، كنت مستحية بس ما عندي
غير حل ، أشرت بأيدي على ظهري
مورفو: ساعدني.
- عكد حاجبة ما فاهمني
الأشيب: بشنو؟
- أنداريت منطيتة ظهري
مورفو: ما كدرت أرفع السحاب.
- بدون ما يحجي رُفعها وطُبع بوسة
على كتفي مِـنْ فوك الملابس ، يحجي ويعاملني
بطريقة يحاول بيها يكسر كُـل الحواجز بيناتنا
الأشيب: لا تخجلين مني ؟ شتحتاجين أني موجود.

أنداريت عليه مبتسمة بأمتنان
مورفو: مشطلي شعري لعد.

كرصني مِـنْ خدي ودخل وياية الغُرفة
سحب مُشط وكعد على السرير وأني على الأرض
صايرة بين رجليه ، مشطلي وشدلياه
الأشيب: بعد شتآمرين؟

مورفو: خليلي عطر غركيني هم

أبتسم وسحب العطر مغرگني فعلاً
الأشيب: وهاي غركتج بعد؟
مورفو: خلصنا يلا نطلع.

أخذنا أغراضنا وطلعنا متوجهين لبيتهم
الطريق كُله خلصناه سوالف وأكثر مرة اسألة
أذا أهلة يعرفون أو لا بس ما ينطيني جواب
يروي فضولي .!! لما وصلنا البيت نزلت متكسرة
الأشيب: تعبتي؟

مورفو: تمردغت تمردغ مو بس تعبت

الأشيب: هسه بس تغدي اسبحي ونامي

هزيت راسي بأيجابية وعيني على البيت
تحولت نظراتي عليه من لزم أيدي وباس باطنها
الأشيب: أذا سمعتي حجاية أو شي غثج غلسي لخاطري.
مورفو: عادي ما أهتم أنـي.

بُقى لازم أيدي ودخلنا البيت سوة
الكل جانو كاعدين بالصالة ، أول ما شافتنا
نسرين ابتسمت ونهضت على حيلها تهلي بينا
نسرين: هلا يابعد عيني ونظرها.
- بس بسُرعة أختفت أبتسامتها مِـنْ صارت عينها
على كف الأشيب اللي محتضن كف أيدي ..
شدد قبضتة وهي أبتسمت بتصنع
نسرين: تفضلو يُمة هلا بيكم.

تركني الأشيب وتقدم عليها باس راسها
يحجي وياها بحنية طاغية على نبرتة
الأشيب: شلونج عزيزة كلبي؟
نسرين: بخير دامكُم بخير حبيبي.
- أندار عليه مأشرلي أتقرب منه ، أحتضني
مِـنْ أكتافي شادني عليه ورجع نظراته لأمه
الأشيب: هذهِ المَرة جبتلج مريتي وياية.
نسرين: هلا بيك وبمريتك بوسط عيني أنتَ وياها.

حضنتني تبوس بيه وتباركلي
وأني أحس أنسطرت بُقيت بس ساكتة
حتى ما عرفت شحجي ..
أنداريت على خالتة تحجي وياه بلوم
سهاد: ها يُمة لا كلت لا حجيت ، فجأة تجيبها وتجي حتى ما نعرفها زين.! أصلها فصلها أهلها.!
الأشيب: يكفي أني أعرفها ورايدها ، صارت سكتة لأن ما أريد أحد يعرف الموضوع هذهِ الفترة ، واضح قصدي مو؟

نسرين: لا تضوج يمه خالتك مو قصدها

الأشيب: ماضايج الحنينة بس داوضحلها واوضح للبقية

تقدم على خالتة باس راسها
الأشيب: وهسه ماراح تباركيلي؟
- ابتسمت وضربتة على كتفة
سهاد: والله وعرفت تختار حمره خضرة جبتها
الأشيب: لا خالة ماقبل تحجين على مريتي
سهاد: الف مبروك يُمة تتهنون ان شاء الله.

...باوعتلي وكالت
:-تعالي يالبرتقالية ابوسج

ضحكت على تسميتها وتقدمت بوستها
وباركتلي ، رحيق هم باركتلي وصارت تهلهل
فرحانين لأن الأشيب تزوج مرة ثانية .!
أنجمعنا على الغدة سوة وسهاد باوعت لأيدي مستائلة
سهاد: شبيها أيدج يُمة؟

مورفو: خاله هاي الأشيب كسرها لان ماقبلت اسويله جاي

ضحكت مسرين والبنات وهي عاطت بي
سهاد: ولك مصخم ماخذها فصلية وكاسر ايدها من اول يوم؟
- هو باوعلي رافع حاجبة ويهز براسة يتوعدلي ..
نترت بي خالتة مصدكة كلامـي
سهاد: أحجي لو ما ألك عين تجاوبني؟
الأشيب: شحجي خالة كُـل عقلج؟ هو أني شعراية ما أكدر أكطع مِـنْ شعرها تردين أكسر أيدها؟

نسرين: الأشيب حنين ما تطلع منه هاي السوالف

مورفو: اهووو خاله انتي تدرين شسوة بيه لو لا سحلني ذهاباً و....

ردت أحجيلها شلون كص شعري ناسية
نفسي وكلامة ، سد حلكي بأيدة بسُرعة
الأشيب: كومي نامي نعستي وكمتي تمسلتين.

...كومني من مكاني وهو ساد حلكي كالت رحيق
:-اي بعد اختك تلاحكها قبل لا تفضحك

مشاني ويا حاضني وساد حلكي خاف أحجي شي
لما وصلنا الغُرفة يلا أبتعد عني يباوعلي بحدة
الأشيب: أي مورفو شسويت بيج أحجيلي؟

مورفو: ردت احجيها شسويت بيه من جنت مو حباب

الأشيب: مو اتفقنه ماكو تجفص

مورفو: يعني هاي هم ما احجيها

الأشيب: لا تحجين شي واليسألج هم لا تجاوبين

مورفو: اي بعد احسن

الأشيب: ولا تكولين عمو كدامهم صرتي زوجتي بعد

مورفو: شبيك فَدوري شو عايش الدور

تخصر ووكف يباوعلي بحيرة
الأشيب: وتالـــــــيّ.!

مورفو: اوي شبيك ما تتحمل شقة

الأشيب: مورفو أنتِ داتفهميني شحجي لو لا؟

مورفو: اي بس انسى نفسي وما سيطر ع لساني شسوي

الأشيب: تسبحين لو تنامين

مورفو: شكو تغير الموضوع

الأشيب: شكلج بعد شبيدي عليج اذا لسانج ما تسيطرين عليه تردين اني اسيطر

مورفو: اي شبيك هددني كلي اذا جفصتي بشي اكص لسانج خل اخاف منك

تقرب يمسح على خدي بكُفى أيده
الأشيب: واني ينطيني كلبي.
مورفو: شلون أنطاك تعذبني قبل؟
- أحس نبض كلبي تحول لطبول من كلامة
وحاولت أضيع ارتباكي بس أبتسم وضيعني أكثر
الأشيب: الغضب جان عامي عيني ، مِـنْ وعيت
على نفسي ما صرت أشوفج ألا طفلة صغيرة ما أكدر
أأذيها بشي أو أكسر خاطرها بحجاية.

بُقيت صافنة بعيونه ضاع الكلام مني
لمني بحُضنه يمسد على شعري بحنيه
الأشيب: أصيحلج وحدة مِـنْ البنات تساعدج تسبحين لو أني؟
- هزيت راسي رافضة الأختيارين
مورفو: أريد خالة نسرين.

الأشيب: انزلي يمها لعد متكدر تصعد الدرج

مورفو: تمام

طلعلي برنص مقدملياه
الأشيب: دبري نفسج بهذا لما باجر نشتري.
- جان كبير كلش بقيت صافنة عليه وهو ضحك
الأشيب: اعرف راح تضيعين بي لأن مالتي بس ماعندنا غيره.

مورفو: اي بس انزل ويايه كللها خاف متريد

نزل وياية لغرفتها طلب منها تساعدني
وأحس راحة لامست كلبي مِـنْ كلامها وحنيتها،
طلبت مِـنْ الأشيب يجيب نايلون حتى يغلف
أيدي اللي مجبرتها وما يوصلها ماي ..
طلع الأشيب وأني كعدت يمها خجلانه منها
مورفو: أسفة راح أضوجج بس أستحي مِـنْ البقية.
نسرين: بعد كلبي يُمة شنو هذا الحجي.!
عيوني ألج جنج على سبحة يومية تعالي أسبحج.
مورفو: تسلمين خالة ، والله أنتِ أحن شخص
شفته بحياتي ويجي مِـنْ بعدج الأشيب.

...ضحكت وكالت
:-ديري بالج عليه يمه الأشيب ذهب صافي وحنين حيل داوي جروحه ونسي يستاهل يعيش مرتاح

ما علقت ولا تعمقت وياها بالموضوع
أكتفيت أهز راسي وألتزم الصمت ..
أجة الأشيب جايب نايلون لف أيدي مانع يوصلها
ماي ، بعدها دخلنا الحمام أني وخالة نسرين
كنت غرگانة بخجلي ومستحية حيل بس مجبورة
شعري ثخين وما أكدر أسيطر عليه وأغسلة بأيد
وحدة ، هي كانت حيل حبابة وياية تتشاقة وتفتح
مواضيع تحاول بكل الطُرق تحسب خجلي ..
كملنا وساعدتني ألبس ملابسي
نسرين: أمشطلج يُمة؟

مورفو: لا خاله هاهي تعبتي

نسرين: تدللين بنيتي

تشكرت منها للمرة الألف وصعدت لغُرفتنا
أبتسم الأشيب مِـنْ دخلت
الأشيب: نعيماً ، طلعتي بالباكيت.

مورفو: شكرا فَداري

الأشيب: جيبي مشط وتعالي

أنطيته المُشط وكعدت كدامه يمشطلي
ويتغزل بشعري بطريقة أب يغازل بنتة
ضحكت مِـنْ كلبي كيف محسسني أني طفلة
مِـنْ صدك بين أدية ، كمل وحضني مِـنْ ورة
الأشيب: وهسه منو تنام بحُضني؟
مورفو: ليش تعاملني هيج؟ أني مو صغيرة؟
الأشيب: بس بنظري أنتِ صغيرة شلون أتعامل ويا الصغير؟

أكذب أذا أكول ما فرحانة مِـنْ مُعاملتة
الي بهذهِ الطريقة ، كنت أحس المكان ينملي
فراشات بكل كلمة حلوة منه ..
طفى الأضوية ولمني بحُضنه يلا نام ..
أول مرة أسند راسي على صدر أنسان
وأنام بعُمق مطمئنة ..
ما حسيت غير على صوت تلفوني
سحبتة وجاوبت بدون ما أشوف منو اللي متصل
مورفو: نعم.!
الأشيب: صح النوم.
- نهضت بسرعة أباوع بالغرفة كنت وحدي
مورفو: أنتَ وين؟

الأشيب: طالع بشغله شوية وارجع

مورفو: ليش ما كعدتني

الأشيب: مو هسه كعدتج يلا كافي نوم وانزلي يمهم جوة

مورفو: شو احس استحي

الأشيب: كم يوم وتتعودين، شتردين اجيبلج ويايه

مورفو: طن حبشكلات اريد

الأشيب: صار وبعد؟

مورفو: ماريد شي بعد واذا ردت اتصل بيك

الأشيب: تدللين فدعوستي

مورفو: انت فدعوسي ترااااا

ضحك وطلب مني أنزل ما أبقى
بالغُرفة وبعدها غلقة ، غسلت ونزلت
وردة ودينا كاعدات بالصالة مِـنْ شافني عاطت وردة
وتقدمت حضنتني لأن مِـنْ أجينا ما جانن موجودات
وردة: الف مبـــــروّك حياتـــــيّ.

مورفو: ع شنو؟!

ورده: ع النجاح ع شنو يعني غير متزوجه اخويه

مورفو: هااا اي الله يبارك بيج

عاطت بقوة فززتني
وردة: ولك فـدار هنيالك على هيج مَرة.

مورفو: شبيج تصيحين هسه

تقدمت دينا سحبتها مِـنْ كدامي
دينا: ماعليج منها مخبلة هاي.

هم بوستني وباركتلي وكعدت يمهم طلع عمران وتبارك من غرفتهم ركضت تبارك عليه وعاطت
تبارك: مولفو اللحمن
- ضحكت وحضنتها بقوة
مورفو: عُمري تبارك الرحمن.

تبارك: ليش لحتي من يمنه

مورفو: هاي رجعت بعد ماروح

تبارك: ضجت ولاج كلت لـ بابا ياخدني عليج بس ماكبل

مورفو: لعد خل نزعل من بابا شويه

باوعت على ابوها ومسحت على حلكها بـ اصبعها الخنصر ونفضتة
تبارك: خاصمتك بابا
- ضحك عمران
عمران: شفتحتي عليه باب يا مورفو

مورفو: تستاهل لعد ليش متجيبها عليه

ضحك وباركلي على زواجي ، وبُقت تبارك بحُضني
تشرحلي فرحتها بجيتي ، وعُمران ووردة متناكرين
بسبب صوتها العالي وهرجتها ..
قاطعهم سؤال سهاد لـ عمران
سهاد: لعد أخوك وين؟

عمران: ليش مارجع للبيت

نسرين: لا ماكو اليوم طلع من الصبح ومارجع

عمران: هسه اتصل بي

أتصل عليه ومن كلامة عرفت أنطاه رفض
عمران: يمكن راجع لأن رُفضني.
- وكان فعلاً راجع لأن بعد دقايق دخل البيت
الجگارة بحلكة سلم عليهم بثُكل وكعد مقابيلي مبتسم
عزيز: شلونج مورفو؟
مورفو: الحَمدُ للهِ.
- باركلي على الزواج بس أحس أرتبكت مِـنْ
طريقة كلامة ونظراته .. سحب نفس عميق
مِـنْ الجگارة وزفرة بهدوء متسائل
عزيز: شعجب هيج فجأة تزوجتو؟ لا حجيتو لا سويتو عرس؟

...جاوبته خاله نسرين
:-الأشيب خايف عليها تعرف شصارله قبل

عزيز: اي حقه اذا هيج بس اهلج شلون قبلو بـ الأشيب من اجه خطبج وحده

نسرين: اهلها ميتين يمه ماعدها احد والأشيب كلبه حبها وتزوجها

كنت ساكتة وخالة نسرين تجاوب باللي
تعرفة حتى لا أنحرج أو اضوج من اسألة عزيز
بس هو كانت غايتة يخليني بموقف غبي كدامهم
عزيز: ليش مو عدها عمها عَبد؟

نسرين: لا يمة ماعدها احد

عزيز: اسأليها

باوعت عليه خالة نسرين مستغربة
نسرين: صدك هذا الحجي يُمة؟ عندج عم؟

بُقت عيني على عزيز أحاول أفهم ليش
يسوي هيج؟ أبتسم وإشرلي بعيونه بمعنى أحجي
ردت أنفجر عليه لو ما توصيات الأشيب وجاوبتة بهدوء
مورفو: بشنو يهمك أذا عندي عم أو لا؟
بـ التالي أني زوجة الأشيب مو زوجتك ..

عزيز: ماكلت شي اني بس كلت عندج عم ليش كلتو ماعندج احد

مورفو: وليش تريد تعرف

قوس شفايفة بعدم مُبالاة
عزيز: مجرد فضول

مورفو: اشبع فضولك بعيد عن حياتي لعد، دام الأشيب يعرف كلشي عني محد بيكم اله حق يسال لو يدخل بعد

نسرين: شبيج يمة شكالج هو

عمران: عادي من حقنا احنا كـ عائلة نعرف حياة چنتنة صرتي من عدنا بعد مو غريبة حتى ما نهتم لأمرج.

عزيز: ضاجت لان ما جانت عايشة يم عمها

نسرين: اذا اهلها ميتين وين جانت عايشة لعد

رفع حاجبة مبتسم واضح يُعرف كثير
أشياء عني والأهم يُعرف وين كنت عايشة.!
كان يتحداني بنظراتة حتى أجاوب
على شي صعب أنطقه.!
حصرني بزواية هيجت مواجيع روحي بسؤاله
عزيز: وين جنتي عايشة صبا؟!

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105