الأشيب الفصل السابع عشر 17 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

بحلقت عيوني بصدمة؛ والخوف والرجفة
صابن كلبي.. هو ما عرف وين كنت عايشة وبس.!
هو عرف الماضي بأكملة .! وين كنت ومع منو
والأتعس يعرف عُثمان شنو.!
ضلت عيني على عزيز خايفة أديرها لأي
شخص ثاني ، خايفة إشوف ردة فعلهم ..
بس الليّ ما كان متوقع هو ردة فعل خالة نسرين
أندارت على عزيز بدون تفاهم منطيتة راشدي
صوتة رن بأذن الكُل ..
بُقى مصطك بمكانة وملامحة بهتت مِـنْ تصرفها
وردة فعلها الغير متوقعة ، عاطت بي بعصبية
نسرين: مِـنْ صُغرك وأنتَ تدور الزلة على فَـدار
وهو مفضلك على روحة ، ما أكتفيت ورجعت تطعن
بشرف مرتة؟ تنلام بيك مورفو مِـنْ تكلك عار الزلم.

كلامة هيج البُركان اللي كان خامد داخل الأشيب
ونفذ صبرة وهو يحذرة ، هجم على عزيز ضُربة
بنص وجهه بدون رحمة طيحة على الأرض
ركضو عُمران و روار صارو بيناتهم
يحاولون يهدون الوضع بيناتهم بس الأشيب
كان نار مشتعلة وصاح بي بغضب مُخيف
الأشيب: إلا مورفو عزيز؛ حذرتك ألف مرة
تبتعد عنها ليش ما تتوب ليش؟ إلا تخليني
أهدر دمك يلا ترتــــــــــــاااح؟

نهض عزيز لازم خشمة إللي بدأ يزف
بسبب ضربة الأشيب وسألة بهدوء
عزيز: تريد أحجي ليش؟

الأشيب: اقسم بالله العلي العظيم اجيب نهايتك لا تلعب ويايه هاي اللعبات

ما أهتم ولا خاف من تهديدات الأشيب
صارت عينه عليه وأبتسم محاول يزيد نار كلبي
عزيز: تدرين بيّ تزوجج عناد بيه لو لا؟
- صاح بي الأشيب يريدة يسكُت بس ما سكت
عزيز: مجذب بشي؟ كُللها يلا مِـنْ أجيتك وكُتلك
رايد البنية شسويت أنتَ؟ أخذتها وأختفيت
بنفس الليلة ومن رجعتها شرجعتها؟ على ذمتك.!

الأشيب: لو ادمي وتستاهلها جان ماوكفت بطريقك بس انت حيوان

صرخ بوجهه بقهر
عزيز: ليش ما أنطيتني فُرصة؟ شمدريك ما أستعدل وياها؟ فوك كُـل هـــــذا تروح تتزوجــــها وتجيبــــها كــــــدام عينــــي.!

الأشيب: منو كالك هي فأر تجارب، ولك هاي بحسبه بنتي تعرف شنو بنتي اطلع كوااااااد اذا انطيها لواحد مثلك

ضحك مستهزأ
عزيز: حلوة هاي بحسبة بنتة وتزوجها.

بُقيت متصنمة بمكاني
مصدومة مِـنْ كُـل حرف ينطقونه.!
متعاركين وواحدهم يشمر كلام على الثاني
ولا عبالك أني واكفة.! ولا أحد أهتم لمشاعري.!
واحد يحبني ويحاول يشهر بيه ويشوه
سُمعتي يا حُب هذا؟!
والثاني قرر مِـنْ كيفة بخصوص مصيري.!
أندار عليَّ عزيز ناوي يهدم الباقي مِـنْ كلبي
عزيز: هو هذا اللي شادة ظهرج بي يتحكم بحياتج بدون علمج ، قرر مصيرج على مزاجة ، تملكج وما انطاج حق الاختيار وفوك كُـل هذا طرد عمج وهم ما أنطاج حق التفكير والقرار ، الله أعلم شمسوي بعد مِـنْ ورة ظهرج.

صب البانزين على النار
الأشيب فُقد أخر ذرة صبر مصبرتة
دفع روار اللي كان واكف مقابيلة يمنعة عن
عزيز وهجم عليه مثل الأسد اللي يفترس فريستة
نام فوكاه والبوكسات صارت تجيه مِـنْ كُـل مكان ..
عُمران و روار أثنينهم بقوتهم وبالشافعات
يلا كدرو يبعدونه عن عزيز .!
صارت ضجة وصُراخ البنات وخالة نسرين
وسُهاد يتعايطن مفجوعات شلون ولدهن
هيج تكاتلو بيناتهم.!
عاط بيهم عُمران بغضب سكت الكُل ،
أندارت عليَّ سُهاد مفرفحة
سهاد: أرتاحيتي يَـا البُرتقالية خليتيهم يتذابحون؟!

حجايتها أجت مثل سهم بنص كلبي
صار الليّ كنت خايفة منه..
ما كدرت أحجي وما كدرت حتى أدافع عن
نفسي وأكول مو ذنبي.!
بس الأشيب ما سكت أندار عليها بعصبية
يصيح بعالي صوتة الغاضب
الأشيب: لا تخليني أنسى أنتِ خالتي.!
كلت مورفو ممنوع أحد يحاجيها أو يتقربلها..
وأقسم بالله العظيم إللي أسمعة مسمعها حجاية
مو حلوة لـ حتى أندمة على الساعة اللي ولد بيها
والحجــي للكُـــــل مِـنْ أمــي لـ تبارك.

دنكت راسي روحي ممرودة
كان المفروض أفرح لأن دا يدافعلي
بس كانت صعبة عليه يكلم أهله بهذا الأسلوب
ونبرة الغضب والنتر بسببي.!
ما راح يكولون غير غيرتة ولعبت بعقلة..
نهض عزيز مِـنْ مكانة خطواتة ما متوازنة
بسبب الضرُب اللي حصلة مِـنْ الأشيب ..
أيدة تحسس وجهه اللي كُله دم ووجه كلامة لأُمه
عزيز: مو ذنبها يُمة مو ذنبها ، ولا تخافون چنتكم أشرف
مِـنْ الشرف لأن عاشت 12 سنة يم مُغتصب وكدرت تحافُظ على نفسها.

يكسر ويجبُر.!
بعد ما شوه صورتي كدامهم صار يحاول يصلحها.!
تمشى بخطوات بطيئة يريد يطلع مِـنْ البيت
ووكف يباوعلــــــي
عزيز: أعرفج شنو وأعتذر منج ، الصار صار حتى أقهر الأشيب مو أنتِ .

كدرت يوصل مُبتغاه ويقهر الأشيب
بس قهري وكسرة خاطري كان أكبـــــر..
عضيت شفتي بالعة غصتي وكاتمة نار كلبي ،
دفعة الأشيب بقوة وصاح بي
الأشيب: أذا شفتك بهذا البيت بعد رجلك أكسرها أفتهمت؟

ضحك عزيز مستهزأ وطلع مِـنْ البيت وطلع
وراه روار ، كعد الأشيب يغلي مِـنْ العصبية
يفرك براسة ، رحيق جابتلة كلاص ماي
شُربة كُله دفعة وحدة وركعة بالكاع فلشة ..
فزيت مِـنْ الصوت وأنداريت صاعدة الدرج
تاركة الفوضى خلفي ، صاح وراية الأشيب
بس ما جاوبتة وحتى ما أنداريت ، صعدت لِغرفتي
القديمة دخلت وقُفلت الباب ، كعدت على الأرض
ساندة راسي على طرف السرير وبُقيت
صافنة حتى الدموع شحت مِـنْ عيني ..
توقعت راح تستقر حياتي بس فجأة طلعلي
عزيز وعمي عبد بنفس الوقت.!
سمعتة يدك الباب ويحجي وياية بس ما جاوبت
ما كان عندي طاقة لأي شــيء ..
صار الفجر ونحن على نفس الحال لما غُفيت ..
حسيت بعد فترة أنرفعت عن الأرض
عرفتة الأشيب اللي شالني ، فتحت عيوني
بتعب وهمست بروح رايحة
مورفو: عوفني.
- ما جاوبني ، تمشى بيه لغُرفتة
نومني بمكاني وغطاني زين ، بُقى
بجانبي أيدة تمسد على شعري وهمس بشوغة
الأشيب: أسف بنياتي ، كُلشي ولا زعلج
والله ما سويت شي بي مَضرة إلج ، كُـل همي
تعيشين مرتاحة وغلات عيونـــــچ.

غمضت عيوني ودفنت وجهي بالمخدة
بُقى كاعد يمي أيدة تمسد على شعري
طبع بوسات متفرقة على راسي ، بس ما تجاوبت
وياه ، بقى على هذا الحال لما غُفيت ..
كعدت بعد فترة على صوت طگطگة بالغُرفة
فتحت عيوني وأحسهن منتفخات ، كان الأشيب
كاعد على الكرويتة وكدامة الحاسبة
الجگارة بحلكة وأستكان الجاي بأيدة ..
نهضت مِـنْ مكاني وهو أنتبه عليَّ
أجاني بسُرعة ، وأني تراجعت كم خطوة للخلف
رافضة يتقرب مني وتكلمت بهمس وصوت يرجف
مورفو: وخــر عني.

الأشيب: مورفو بابا لا تسوين هيج

مورفو: ماريد احجي وياك عمو

الأشيب: ليش يروح عمج

مورفو: جبتني يم اهلك حتى تحميني كامو همه اذوني شمسويتلهم

اخذ نفس متنهد بأسى
الأشيب: حقج عليَّ وحقج راح أخذلجياه مِـنْ عزيز وأندمة على اللي سواه وياج والخلقج.

مورفو: سمعته شكال مو راد يقهرك، بس ما شاف شي يقهرك بي غير اني، الى متى اتعاقب بسبب افعال غيري هم امي وهم عثمان وهسه انت

تقدم سحبني بحضنة مقيدني وأني عطت بي أبجي
مورفو: وخــر عني وخـــــــــر..
- ما أبتعد وعصرني أقوى
الأشيب: أفديج بروحي مورفو والله أفديج بروحي
وأكسرلج ظهر اللي يقهرج لو يأذيـــج ، لو مو أبن عمي .!
- أنهاريت بالبُكاء أحس روحي توجعني
بُقى حاضني وبعدها أحتضن وجهي بين
كفوف أديه يمسح بدموعي وينظرلي بحزن
الأشيب: لا تبجين دموعج نار تحرك كلبي.

مورفو: وديني للميتم ماريد اعيش يمك بعد

الأشيب: تعيشين بـ ميتم واني موجود وعلي ازين شاربي اذا صارت صدك

بُقت الشهگة ملازمتني تهد ثلثين حيلي
من تطلع ، طُبع بوسة عميق على خدي الأيمن
الأشيب: كافي أروحلج فدوة.
- وطُبع بوسة ثانية بنفس العُمق على خذي الأيسر
الأشيب: كافي يا عيــون فَـدار.

مورفو: ماريدك بعد طلكني

الأشيب: چؤ ماطلك

يحجي هيج وهو يعاملني كـ طفلة
مثل أب دا يراضي طفلتة الزعلانة
مورفو: مو أتفقنا ما تلزك بيه شو لزكت؟

الأشيب: قشمرتج وماطلك بعد

مورفو: مو بكيفك فدعوس

الأشيب: تردين اسربت بنياتي بشوارع

مورفو: لا تروح للميتم

الأشيب: جبيرة ميستقبلونج

مورفو: لعد احجيلي كلشي وممنوع تكذب عليه والله اهج واخلي عينك فارغه ورايه

الأشيب: شحجي شتردين تعرفين؟

مورفو: صدك تزوجتني حتى تقهر عزيز

الأشيب: لا وغــلاتج ، ما أنكر هو طلبج مني
بس شلون تردين أقبل؟ مِـنْ حُبي وخوفي عليج
ولأن صدك معتبرج بنتي رُفضت ، ما تكدرين تعيشين
ويا عزيز لأن طاغي كُلش وأنتِ ما تتحملين شخص
مثلة أعرفج أني ، وهم ما ردت أنطيج خبر يمكن
تفكرين بطيش وتحسبين لو تزوجتي عزيز راح
تتغيّر حياتج ، كُـل اللي أريدة أضمن إلج حياة
مستقرة لما تكبرين وتقررين مصيرج بنفسج مو تحت
ضغط الظروف ومشاعرج اللي ما مستقرة.

مورفو: شلون عرف كلشي عني لعد وليش جاب عمي

الأشيب: معلومات شخص عادي مثلج
تتحصل بسهولة بالأخص هو هم ضابط ..
وجاب عمج حتى ياخذج توقع راح تعوفيني وأنجبر
أطلكج ويصفى إله الجوّ.

هزيت راسي رافضة فكرة رجوعي ويا عمي
مورفو: بس أني ما أريد عمو عبد ما أحبة ،
خالة ريما طردتني وشمرتني بالشارع كدام عينه وهو ساكت.

الأشيب: ومخبل اني انطيج لهذا الخيخه لو يموت لو حياته واكفه عليج هم ما انطيج

مورفو: لعد شوكت رايح عليه وكايلك ماعندي بنت اخ

الأشيب: من توفت امج

مورفو: وليش متريدني يمك

الأشيب: مو ما أريدج بس ما ردت تحسين أنتِ مكطوعة مِـنْ شجرة مثل ما كلتي ، كلت على الأقل يبقى تواصل بيناتكم حتى تحسين عندج أهل بس طلعو چلاب.

مورفو: شلون ماتت خاله ريما

الأشيب: تمرضت بمرض الذئبة الحمراء ماله لاطب ولا دوة بقت تتعذب تنتظر يومها شوكت تموت لـما ماتت

مورفو: ان شاء الله تصير بـ السيد هم كول آمين

ضحك وكرصني مِـنْ خدي
الأشيب: آميـــــــن.
مورفو: امك بعد ما تحبني مو؟

الأشيب: يا ما تحبج غير تخبلت عليج، صارلها سنين هي ما تصعد درج ومن البارحه واليوم الف مره صعدت عليج وعلي

مورفو: وخالتك

الأشيب: هم سألت عليج كالت البرتقالية وين مانزلت علينه اليوم

دنكت راسي وهمست
مورفو: يعني ما عبالهم اني مو زينة لان جنت عايشة يم عثمان؟
الأشيب: وشحده إلليّ يفكر هيج.!
أنتِ ملاك طاهر تشرفين راس عُثمان وعزيز
وكل كـ*** يشكك بيج وبشرفج.

مورفو: ليش هيج قهرني شمسويتله اني

الأشيب: خيولي بنياتي يروحلج فدوة

مورفو: ماراح ادعي عليه لـ خاطر خاله سهاد

الأشيب: راح ياخذ جزاته بدون ما تدعيين

مورفو: جوعانه فدعوس

سحب ايدي مخليها على بطنه
الأشيب: أسمعي بطني لعد تصيح الغوّث مِـنْ الجوع.

مورفو: متاكل منو لازمك

الأشيب: اني اكل وبنياتي جوعانه وما ماكله شي

مورفو: زين شواربك احسن مو

الأشيب: اي وعلي

سحبني من ايدي بـ اتجاه الحمام
الأشيب: تعالي اغسلج وننزل ناكل
مورفو: اني اغسل
الأشيب: لا اني

صار يبلل أيده ويمسح على وجهي
وعند هذهِ اللحظة تذكرت هو كان ما يحجي وياية
مورفو: فَـدار أنتَ مو زعلان مني؟
الأشيب: ما أزعل منج أني ، بس أنغثيت شوية مِـنْ حجايتج.

مورفو: بس اني نقهرت لان بقيت متحجي ويايه

الأشيب: لا تحجين حجي متعرفين معناه بعد حتى ما اضوج وانغث وانجبر اتعامل وياج هيج

مورفو: انت مو تكول اكسر ظهره الي يقهرج

الأشيب: وللموت ع حجايتي

مورفو: انت مو قهرتني منو راح يكسر ظهرك هسه

الأشيب: تردين اكسر ظهري لـ نفسي حاضر اني

كان ماخذني على كد عقلي شحجي يجي وياي
أبتسمت وهزيت راسي بـ لا ، نشف وجهي
وكرصني مِـنْ خدي
الأشيب: أريد أبوس كلبج شلون؟
مورفو: ليش؟
الأشيب: على هذه الحنية الليّ شايلها.

ضحكت فرحانة لأن رجع يحجي وياية
وفرحانة أكثر بمُعاملتة إليّ..
جَعص وجهي بين كفوف أديه وباسني بقوة
الأشيب: فدعوس طك كلبة عليج.

مورفو: وفَدار

الأشيب: فَدار وعيون فَدار وكلب فَدار و روح فَدار وكله طك عليج

كان يضيعني بكلامة بدون ما يحس على نفسة
حضنتة بقوة أريد أدخل نفسي بين ضلوعة
وأختفي عن أنظار هل عالم ..
لا أني أكدر أزعل منه ولا هو يهون على كلبه
زعلي .. حنين لدرجة لا توصف.!
مورفو: بعد ما نتزاعل
الأشيب: ووين يهون على كلبي أزعلج؟

مورفو: عمو يعني هسه عرفو زواجنه كلاوات

ضحك باعدني عنه
الأشيب: اي ارتاحي

مورفو: احس جبل ونزاح عن كلبي

مشاني وياه حتى ننزل ، كانت خالة نسرين وسهاد
كاعدات بالصالة ؟ وهوسة وردة وتبارك مشتعلة
بالمُطبخ ، أبتسمت خالة نسرين تهلي بيه بفرحة
نسرين: يُمة هَــلا بفراشة فَـدار.
الأشيب: يُمة ما باتت بِـ بطنج السالفة؟

نسرين: جذبت بشي اني انت كلت هاي بنتي فراشتي

ضحك وهز راسة يستغفر
وهي أشترلي أكعد بجانبها وحُضنتني
نسرين: لا تزعلين مِـنْ عدنا يُمة ، أحنا والله نحبج شما يكون صاير ما يغيرنا عليج.

مورفو: والله مو ذنبي الصار خالة

نسرين: بعد كلبي يمة الله يريح كلبج ويسعدج بجاه الحسين

شكُثر حنينة وعظيمة هذهِ الأنسانة
اللي فعلاً تستحق كلمة أم وتستاهل الجنة
تكون تحت أقدامها ، رغُم الفوضى إللي صارت
بهذا البيت واللي سببها الرئيسي أني
بس ما لامتني ، وجاية تهون عليه وتدور رضاية ..
أبتسمت مُمتنة وبستها مِـنْ خدها بقوة
مورفو: أخاف أحضنج وتجيني وردة تطين عيشتي.
- ضحكت
نسرين: تتشاقة وياج يُمة لا تزعلين منها.

سهاد: تعالي يالبرتقالية ابوسج لو البوس والمحاضن بس لنسرين

كنت مقهورة منها لأن حجت عليَّ
كدامهم بدون ما تفهم الموضوع وطلعتني
أني السبب بعركتهم بدل لا تعرف أن الصار
حقارة وأستفزاز مِـنْ عزيز ،
شافتني ساكتة وما تحركت ، ضحكت فاهمتني
سهاد: أدري ضايجة مني بس مِـنْ حُركة كلبي يا يُمة ، ما يهون عليَّ أشوف ولدي هيج يتكاتلون.

مورفو: واني شعلية خاله ليش تكليلي من وراج

ما عدها عُذر وسكتت ، ندستني خالة نسرين وهمست
نسرين: كومي بوسيها ميخالف هي هم مثل أمج.
- تقدمت عليها بستها مِـنْ راسها
مورفو: سامحتج لا تضوجين ، بس والله مرة ثانية أزعل منج صدك وأصلاً أني أحبج وحتى ما دعيّت على عزيز لخاطرج وأذا ما تصدكين اسألي فَـدار.

كنت أشرحلها بدون وعي مني حتى أثبتلها
مـدى حُبي إلها ما أعرف ليش ..
ضحكو كُـل الموجودين وهي سحبت وجهي
ودك بوس على خدودي أنهرت ، سحبت روحي منها
مورفو: خالة والعباس أني مورفو ، خاف توهمتي بيه.
-فزينا على ضحكة روار الليّ رجت البيت وصاح
روار: أعذريها خطية محرومـــة.

الأشيب: لسانك روار

روار: لا تصير معقد يمعود صدك جذب

الأشيب: البيت بي اطفال

مورفو: قصدك اني طفلة مو

الأشيب: لا قصدي ع تبارك

مورفو: لا قصدك عليه لان بس اني هنا موجوده

كنت أحجي مِـنْ كُـل عقلي وهو ضحك
الأشيب: مو عليج مورفو.

مورفو: شفت نتيجة الـ...

ما أنطاني فُرصة أكمل جُملتي وصاح مقاطعني
الأشيب: أشش لا تطشرين أسرارنا مورفو.
-غُمزلة روار بتلاعب
روار: نتيجة الـ شنو؟ أحجولنا.

الأشيب: راح اكوم اجفص بمصارينك

مورفو: خل اكله نتيجه شنو حتى ما يشطح باله

الأشيب: واذا كلتيله راح يشطح اكثر ترا

ضحك روار يهز براسة
روار: وصلت وصلت لا توضحون.
مورفو: شنو الليّ وصلا؟ كلي واكلك اي لو لا.
ضحكو بصوت عالي هو والأشيب
روار: لا ماعليج وصلت وهاهي

الأشيب: كافي تمسلت ثنينكم

رحيق: اكللكم اني متت من الجوع ما ناوين تتغدون

روار: تردين اصبلج غدة مثلا غير انتن تصبين

دنيا: شلون يكول انتن عبالك خدامات عنده
روار: تاج الراس انتن وين أكو منجن يلا كومن صبن

بُقى يقشمر وياهن وهُنَ يضحكن ، أنجمعنا
كُلنا على الغدة إلا عمران وعزيز ماكو ،
كعدت بجانبي تبارك فرحانة
تبارك: مس يــــوو (miss you)
مورفو: عُمري مس يو تو.
تبارك: وصينا أشياء حلوة أني وولدة (وردة) وعمة دينا وكُتلهم يوصون الج هم.

مورفو: شنو هذن الأشياء الحلوة

تبارك: سبــــلايــــــز ..

حضنتها مِـنْ أكتافها مكزكزة عليها ؛
وهـي باوعت لوردة تحجي وياها بتفاهم كأنو كبيرة
تبارك: مثل ما علمتج على أداب المائدة ما نسولف بعد.
ورده: صار، ساكتة لعيونج اليوم.
الأشيب: مورفو أندمجت ويا تبارك اكثر من الكل

روار: لان نفس العقل

الأشيب: لا تمسلت لا اورك ور

روار: شدعيلك يابه يوم سميتني روار ساعه الكشرة وعلي

نسرين: شبي اسمك يخبل

روار: والأشيب خبلني من كد ما يور بيه صار تكريتي براسي

ضحك الاشيب مِـنْ كثر ما يتحلطم
الأشيب: ومن كال الحجاية تكريتية شو تمسلت بكيفك.
روار: لعد شني؟

مورفو: مصرية

ورده: ولج تبارك خليني احجي راح انفجر

روار: تريد تكحلها نوبه عمتها

مورفو: لعد شني اني ما سامعه بيها قبل

الأشيب: كملي أكل هو اذا هذا مايعرفها أنتِ تردين تعرفيها

هز ايده روار ما عاجبة وسكت كالت تبارك
تبارك: خالو لوال..
- ما أنطاها مجال تكمل كلامها وصاح
روار: دا تشوفون القهر فوك الوّر صرت لوال.
وردة: لج تبارك خليني أحجي.

سهاد: ولكم يمه شكد تحجون

رُفعت عيني على الأشيب مبتسمة
مورفو: مِـنْ هذا أنتَ متحمل لغوتيّ طلعت متدمغ على لغوتهم.
وردة: لا يا حسرة وين شايفينه احنا ، تصدف بالسنة حسنة.

روار: مثل خفاش الليل يجيله ساعه بالليل ويختفي

نسرين: اي والله زين وكاعد هسه علمود مورفو

روار: طلع بيها فوائد

مورفو: منو الي نقهر عليك البارحة لعد

باوعلي يعض بشفتة يريدني أسكت،
ضحكت وسكتت .. كملنا أكل وتطشرنا كلمن
لغُرفتة لأن هُم متعودين ياخذون قيلولة الظُهر ..
كاعدة على السرير وأجة الأشيب بأيدة
علاجي وكلاص ماي ، أبتسمت متذكرة
مورفو: نسيت عندي علاج.

الأشيب: ميحتاج تتذكرين اني أتذكر عنج بنياتي

مورفو: شكرا عمو داتعبك

الأشيب: كتلج قبل بيج ومابيج ادللي ع الأشيب افرشلج عيوني

...طبعت بوسه قويه ع خده واردفت بابتسامة
:-اروح فدوة لـ حاجبك المكطم

ضحك وهز راسة مستغفر
الأشيب: ماتصيرلج جارة والله

مورفو: اكزكز عليك من لطافتك وحنينك والله

الأشيب: تدرين شنو اتمنى

...هزيت راسي بـ لا لزم ايدي وكال
:-اتمنى تبقين هيج طفلة وماتكبرين ابد ولا يجي يوم وتعقلين

مورفو: اذا على العقل اطمئن ما اعقل

الأشيب: يلا شربي علاجج بسرعة وهاي جكليتة وراهن.

مورفو: كوم من يمي عمو راح احبك ترا

ضحك بصوت عالي وأني اخذت علاجي منه
وهو فتحلي الجُگليتة اكلتها ورة العلاج ..
بعدها أنطاني خبر بجية زياف وسيماف
علينا بالليل ، وهم أنطاني خبر راح نطلع العصر
للسوك.. بعدها نام بجانبي وباوعلي متسائل
الأشيب: تجين بحُضني لو بعدج ما ترديني؟

مورفو: بعدني ماريدك

الأشيب: وماراح تكليلي ليش

مورفو: اي

الأشيب: تشلعين كلبي هيج

مورفو: ماراح يتغير شي اذا كتلك او لا بكل الحالات مانام يمك بعد

الأشيب: اغيرلج اللي ما يتغيّر بس احجي

بُقيت ساكتة وأباوعلة ، أشرلي براسة مشجعني
الأشيب:احجي يلا

مورفو: من انام يمك تحضني وتكلي مشتاقلج عائشة

بهتت ملامحة من اللي سمعة
بُقى ساكت مركز بعيوني بطريقة غريبة..
دنك راسة بعد ثواني متحاشي نظراتي واني أسترسلت
مورفو: وحتى مِـنْ أكُلك فَـدار أني مورفو ما تجاوبني وأني ضجت.
- طال صمته لدقايق بعدها رُفع راسة وسألني بهدوء
الأشيب: أنتِ واعية على نفسج مِـنْ تدفعيني
وتكليلي "عمو عُثمان لا تنام يمي"؟

هزيت راسي نافية كلامة وحتى ما
مستوعبة شدا يحجي ، وكانت ردة فعلي سريعة
مورفو: بس أني ما مسوية هيج.
الأشيب: مسويتها بس أنتِ مو بوعيّج ،
وهذا الشي مو بأيدج ، وأني هم مورفو ما واعيّ
على نفسي ومو بأيدي..
أكو أشياء ما نكدر نتخطاها بيوم ويومين
أو حتى سنة وسنتين ؛ هيج حوادث تترسخ بعقلنا
ما نكدر نتخلص منها بسهولة ، ومثل ما أني
قَدرت حالتج لأن أعرف ومتفهم صعوبة اللي
مريتي بي أنتِ هم أعذريني.

وضحلي بطريقتة أنُ هذهِ أمور
لا بأيدي ولا بأيدة
اللي عشناه أثنينه كان صعب وصعب
نتخطى بين يوم وليلة ..
أبتسمت وأشرتلة على المكان اللي بجانبي
مورفو: تعال يمي لعد.
- ضحك براحة وتقرب مني وأني سندت راسي على صدرة
الأشيب: مرة ثانية لا تطولينها هلكد يلا تحجيلي اللي مضوجج.

هزيت راسي بأيجاب
مورفو: بعدك تحبها مو؟
الأشيب: شلون ما أحبها وهي عايشة بروحي.

مورفو: اتمنى احد يحبني مثل ماتحبها

ضحك وأني تربعت كدامة
الأشيب: أني أحبـج.
مورفو: بس تعرف الحُب الأبوي أحسه أحلى بهواية مِـنْ أي حُب بالدنيا.

بُقى مبتسم مستمعلي لأهتمام
وأني منطلقة أشرحلة ، قاطعني يمسد
على خدي بحنية
الأشيب: مرتاحة يمي مورفو؟

مورفو: وهواي هم الأمان الي احسه يمك اكثر حتى من الامان الي حسيته وي بابا رِسن تعرف ليش؟!

الأشيب: ليش المفروض محد يجي بعد ابوج

مورفو: بابا جان حيل يحب ماما بحيث تأذيني كدامه وميكدر يمنعها كل اللي جان يكدر يسوي ياخذني ويطلع ومن يحجي ويكللها لا تعاملين مورفو هيج تصير مشكلة جبيرة وحتى يضربها علمود تسكت بس ماتسكت هي وبعد كل مشكلة من اسال بابا يكلي خطية امج تتعب ولا مره نطاه كلبة يذب الصوج بيها ..
بس أنتَ حميتني واخذت حقي من كل واحد يأذيني خليتني اتصرف بـشجاعة وقوة اني متأكدة أنتَ بظهري وراح تحميني وتدافعلي بـحيث من اجة السيد وكسر ايدي ابد ما سكتت وحجيت عليه وغلطت وفرغت قهري بي لان جنت اعرف راح تجي أنتَ وتاخذلي حقي منه

كُـل حالة تغيّر تحسه أبتهج
ومن فرحتة بكلامي ما عرف شيسوي
غير يحضني بقوة
الأشيب: كتلج قبل وهسه هم أكولها "أكسرلج ظهر اللي يندك بيج".

مورفو: صدك اثبتتلي انت عوض سنيني

الأشيب: مستعد ادفع عمري لـ خاطر عيونج

ابتعد عني وبقى يمسد على خدي
الأشيب: هنيالي بـ بنياتي الملونات

مورفو: هااااا فدعوس مو جنه حبايب

الأشيب: لونتي حياتي السودة أنتِ

مورفو: صارت برتقالية وزركة وحمره مو

ضحك لأن عرف دا أذكره بكلامة
مِـنْ يكول أنتِ فعلاً ملونة.!
بعد نقاش طويل مليان بالضحك والفرفشة
غيرنا ملابسنا وطلعنا للسوك ..
قبـــل لا ننزل أستقرت عيونه على شعري لثواني
الأشيب: أضوج مِـنْ أطلعج لمُكان ، تجذبين النظر كلش أنتِ وشعرج مشتعل.

...غمزتله واردفت بتلاعب
:-تغار عليه فَداري

الأشيب: ما تنسين شي أنتِ لو شنو؟

مورفو: لا ما انسى منو الجان يغار عليه يردني البس كبوس وحركات

الأشيب: لا ما جنت اغار بس هسه اغار شوية ماريد احد يشوف بنياتي شلون؟!

مورفو: شبيك عمو تكطع رزقنه خل انشوف ننشاف

رفع حاجبة ما عاجبة كلامي
الأشيب: شتشوفين مورفو؟

مورفو: هل عالم المطشرة بالشوارع جوز واحد منهم فارس أحلامي شمدريك

الأشيب: چؤ ماكو

مورفو: هاااااا خيييير

الأشيب: شكووووو

مورفو: بلشنةةةةة نصييييح فَداااااار

الأشيب: لا

مورفو: اي خوش وهسه شنو ننزل لا

الأشيب: لا

مورفو: ليش مو اجينه حتى نتسوك

الأشيب: لا

صرت اندس بي بـ اصبعي وهو ابتعد مستغرب
مورفو: أريد أطفيك وأشغلك شو شكلت على كلمة لا.!

- ضحك وسحب الكبوس مِـنْ الكُشن الخلفي
الأشيب: ألبسي وننزل
مورفو: ما ألبس والله.
الإشيب: هي ساعة أتحملي.
- عطت بنفاذ صبر كارهه الفكرة
مورفو: شبيـــــــــك فدعـــــــّوس؟!
الأشيب: صوتج مورفو.

مورفو: اسفه، ومالبس من كتلك خل اصبغ شعري اسود ما قبلت وهسه تحمل فَدوري

أخذ نفس عميق وطول بنظراتة عليه
يتأملني أقبل ومن أيس شُمره عليه بنرفزة
ودار وجهه عني للجهه الثانية
الأشيب: ما ننزل.
- ضحكت مِـنْ أعماق كلبي على تصرفاتة
وهو أندار بسُرعة خازرني
الأشيب: بعد بعد طلعي راسج مِـنْ الجامة وأضحكي.

مورفو: هسه شنو عمو راح يصير ليل وانت قافل

الأشيب: نرجع لعد

مورفو: خوش ارجع

الأشيب: مو تسويها عرس ع راسي بالبيت

مورفو: جرب وشوف

ضربني على راسي بخفة وطلب مني أنزل
بعد ما يأس ألبسة..
بُقى محتضن كف أيدي ونفر مِـنْ مكان لمكان
ما بُقى شي بنفسي وحتى اللي ما محتاجتة
خلاني أخذه ، وأخير شي دخلنا محل ذهب ..
مورفو: شنسوي هنا؟

الأشيب: ناخذ لـ بنيات الأشيب

مورفو: بس اني ماريد

الأشيب: مدا أخذ رأيج اني

سلم على أبو المحل وطلب منه يشوفنا حلقات
أبتسمت وتقربت منه أحجي بهمس
مورفو: شنو فدعوس شو عايش الدور؟
- أبتسم وباوعلي
الأشيب: باجر يجون كرايبنا حلوة يعني يشوفون زوجة الأشيب بدون حلقة؟

مورفو: والله وطلعت تفكر

الأشيب: لسانك يول

مورفو: زين ناخذ بس حلقة شسوي بالبقية

الأشيب: مو عيب بابا بنيات الأشيب مايلبسن ذهب لعد ياهو اليسوا يلبسة

مورفو: عزاااا عمووو راح احبك

الأشيب: ههههه انجبي بابا

مورفو: احلى نجبي سمعتها

توسعت أبتسامتة وعصر كف أيدي
بقوة بين كف أيدي الضخم ..
شوفنا كثير حلقات وبُقيت محتارة كلهم
حلوين ، وبعد دوخة وحيرة كبيرة صفو أثنين
بأيدي ، قطع صفنتي الأشيب
الأشيب: أثنيهن حلوات مو؟
مورفو: اي برأيك ياهي اخذ؟

أشرلي على وحدة منهن وأني قبلت ..
أخذهن الصايغ مني وطلبنا يصغرلياها على
حجم أصبعي ، الأشيب أختار بقية الذهب
وذوقة كان شگاگي لا يُعلى عليه ..
كملنا ورجعنا للسيارة وفَـدار قدملي علبة
الحلقة طالب مني ألبسها ، أخذتها مِـنْ أيده
مبتسمة وفرحانة بيها ، فتحت العلبة وتفاجئت
الحلقتين اللي عجبني أثنيهن جايبهن
أنداريت على الأشيب مبحلقة عيوني بفرحة
مورفو: شو أثنين؟
- أبتسم بحنية
الأشيب: أنتِ بس كليلي الأشيب كم بنية عنده؟

مورفو: بس مورفو الملونه

الأشيب: مو عيب لعد يخلي بنفسها شي كولي زين شاربك احسن

ضحكت بفرحة لحنيتة أكثر من فرحتي بالحلقات
مورفو: أوّي والله تجبرني احبك
- ضحك لضحكتي ودار وجهه حتى يسوق
الاشيب: انجب طير الشوك

ما سيطرت على نفسي كزكزت عليه
تقربت منه بسرعة طابعة بوسة على خدة بقوة،
دفعني عنه بحركة سريعة
الأشيب: منا العالم بنت الأوادم.
- بدل لا أسمع الكلام وأهتم للعالم
اللي هو مهتملهم عدت نفس الحركة وبستة مره ثانية
مورفو: طُـز بالعالم.

ضحك وسكت ماخذني على كد عقلي ،
رجعنا للبيت بعد مشوار لطيف وينضم
للأيام الحلوة بحياتي ..
مِـنْ دخلنا البيت صار بوجهنا روار عينه
على الأغراض اللي شايلها أشيبي
روار: شجبتولي وياكم؟

الأشيب: ممة رقم 60

روار: مطي كدامك يشرب بـممه هكبر

الأشيب: جان سألت روحك لعد قبل لا تكول شجبتولي

روار: مادري ليش حسيتكم جايبين للعشيرة كلها

مورفو: چؤ هاي كلها الي ويمكن علاكتين لـ فَدار

روار: ها ما جبتيلي لعد

مورفو: عرف ولف اني وياك اجيبلك

الأشيب تركنا وصعد للغُرفة ،
بُقيت واكفة يم روار بالصالة وهو ضيگ عيونه عليَّ
روار: بشكد قطيتي أخوية؟
مورفو: وأنتَ شعليك اني وزوجي نتصافى.

روار: عاد لو محصل شي

مورفو: لا تصير ادبسزز لا اورك ور

روار: غير تستقر الملونه كامت تور

مورفو: هسه اكول لـ فَداري يورك ور

روار: لـ عمج فدار

مورفو: وين سامعها هاي

ضحك يعدل بشعرة
روار: ترة دوم تكولين عمو كدامنا بس أنتِ ما منتبهة.

مورفو: لتكذب ما كايلة

روار: شمدريني اني لعد لو ما اسمعها منج

مورفو: مو اني بالبداية جنت اصيحه عمو وتعلمت مجنت اعرف اسمه فَدار

روار: هو احنا أهله نصيحله أبو شيبة ، حتى ناسين أسمه فَـدار.

مورفو: لا صعب ماكدر

طلعت خالة نسرين من غرفتها وكالت بابتسامة مريحة
نسرين: هلا يمة شوكت رجعتو.
مورفو: هسه أجينا وروار أستلمنا تحقيق مِـنْ الباب.

نسرين: محد يخلص منه هذا

مورفو: زوجي خالة واخلصي منه

روار: ماعندج وحده من كرايبج برتقاليه تزوجيها الي

مورفو: عندي بنت عمي جانت صفرة من هي وصغيره هسه ماعرف

روار: لا احتمال خاست وصارت سودة مو

مورفو: اي يمكن

نسرين: طلعت موزة هذه مو بنية ، شبيكم يُمة.!

روار: يمة جنتج انشتاين ما يلحك بذكائها

نسرين: سد حلكك روار عوف جنتي بحالها

روار: غبية والله مادري شلون توالمت وي الأشيب

مورفو: الوعي چتال صاحبة يول

طكها بضحكة وخالة نسرين هم ضحكت
نسرين: اي والله لا عاب حلكج

روار: لا بعلي قنعتيني

أترخصت منهم وصعدت لغُرفتي
حتى أغير ملابسي وأرتاح ..
الأشيب كان بالحمام ، طلعت ملابس إلي وكعدت
أنتظره ، هو ما طول وطلع بس لاف المنشفة على خصره
مِـنْ شافني بالغُرفة وكف بمكانة فشلان
الأشيب: توقعت راح تبقين جوة.
- نهضت مِـنْ مكاني مدنكة راسي هم خجلت
وهم حتى لا أحرجة
مورفو: أخذ راحتك عمو.

دخلت الحمام غيرت ملابسي وطلعت،
سألت على زياف وسيماف ليش ما أجو؟
الأشيب: يتعشون برة ويجون.

مورفو: ما اجو تعشو يمنه

الأشيب: يردون ياخذون راحتهم وحدهم

مورفو: هاااا يردون يترومسون

الأشيب: شو طالعة عينج.!

مورفو: اني سمعت رحيق تكول لتتزوج تطلع عينها

الأشيب: وين سمعتيها

مورفو: تحجي وي خاله سهاد مدري عليمن وكالت

الأشيب: وأنتِ اي شي تسمعينه لازم تسوين مثله؟

بقيت ساكتة واباوعلة ، رغم اني كبيرة مو صغيرة
بس ما كنت أفهم العيب واللي ما يصير ينحجي
بخصوص هذه المواضيع ..
والسبب عُثمان كان كُلشي مُباح وياه
يعلمني كُلشي أحجي العيب والحرام واللي ما يصير
كُله كان بنظري عادي كُله في سبيل ما ينضم عليه
شي وعلمني تعلوم عانيت منه لحد هذا يومي.!
بس مِـنْ عرفت الأشيب وعائلتة صار ينبهني
على كثير كلام وتصرفات ويمنعني منهم
تقرب مني يحجي وياية بهدوء
الأشيب: أكو أشياء ما يصير تشاركيها ويا الكُل وهم أني ما أقبل تحجين هيج مورفو مو كُـل حجاية تسمعيها مِـنْ النسوان لازم تحجينها أو تطبقينها ، أني أريد مورفو البريئة الحبابة ، ما أريد تطلع عينها بسبب السوالف اللي تسمعها.

مورفو: اسفه

الأشيب: چؤ لا تعتذرين بس اوعديني تبتعدين عن هيج سوالف حتى لو سمعتيهن لا تتأثرين بيهن هنا النسوان اشكال يحجن وبالايام الجاية راح تسمعين هوايه شغلات هم، مو معقولة كل حجاية تسمعيها تحجيها ميصير بابا

مورفو: خلص وعد ماحجي هيج بعد

كرصني من خدي يكلمني كأن طفلة كدامة
بعدها نزلنا جوة مع بعض ، كنت أدور على تبارك
وكالت وردة بغرفة أهلها يم ابوها
أستحيت اروح أصيحلها ووردة هي اخذتني
وياها لغرفتهم حتى نصيحها ؛ مشيت وياها
ومستغربة هدوئها الغير مُعتاد
مورفو: شو صايرة عاقلة هذه الأيام شبيج؟

ورده: تبارك الرحمن داتنطيني دروس عن الهدوء

مورفو: لكل آيه الله يسلطلها آيه
ورده: يوم اللي تتسلط الآيه عليج

ضحكنا وكملنا لطريقنا لغرفة أهل تبارك
صاحت عليها وردة وهي أجت تركض
بوستني وتحجي بحماس
تبارك: بالليل أنطيج السبلايز.

مورفو: ليش مو هسه

تبارك: لا لا بالليل

عافتني وراحت على فَـدار بوستة
وكعدت بحُضنه تحجي وياه بهمس وهو ضحك
الأشيب: تدلليـــن.
تبارك: شُـكلاً خالــو حبيبي.

نسرين: صار بيها همس شكو

مورفو: همس وفوكاها وي الأشيب

روار: السالفه جبيرة يمكن

مورفو: كلبي لعب منهم

تبارك: ميسيل تدخلون بـخسوسيات غيلكم

الأشيب: اسمعو وتعلمو

روار: تبارك خالو نريد ناخذ دروس يمج

تبارك: من اخلس دلوس ولده انتيك

بُقو ناصبين عليها بس هي ما شـاء الله
ذكية حيل وماخذتهم أخذ بلسانها الحلو ،
بعد العشة أجو زياف وسيماف ، طلع الأشيب
يفتحلهم الباب وأني ركضت وراه أحس أهلي اللي
جايين ، أندار عليه وصاح
الأشيب: لا تركضين مورفو.
- ما سمعتلة وسُبقتة بفتح الباب ، صارو بوجهي
أثنيهن وسيماف ضحكت
سيماف: ولكم هاي منو يستقبلنــــا.!
مورفو: عزة والله أحس أهلي جايين.

تقدمت حضنتها بقوة وهي بادلتني الحُضن وتضحك
صرت إشرحلها شكُثر مشتاقتلها وأسمع زياف يحجي
زياف: أشتغلت عيارة النسوان.
- غلسنا عليه وبُقينا متحاضنين ، وهو سلم على
الأشيب؛ أبتعدت عن سيماف وباوعتلة
مورفو: شلونك زياف أبو زلوف؟
زياف: بخيــر ، أنتِ شلونج يالملونة
مورفو: هم بخيـــر.

دخلنا للبيت وأجة روار وخالة نسرين هم
سامو وكعدو يمنا شوية وراحو ؛
بُقينة أني وسيماف على جهة وهُم على جهة
مندمجين بالكلام ، شتت تركيزي موضوعهم
اللي كانو دايخين بي وركزت بحديثهم
زياف: ترة السالفة لو نصفنلها تدوخ.

الأشيب: منو لزم قضيتهم

زياف: العقيد ......

الأشيب: اعتبرها مسدوده لعد

زياف: اي والله أكبر كواد شفته بحياتي

الأشيب: انت ما نبشت وره السالفه شعجب ساكت

زياف: اكلو من نفس الماعون وشربو من نفس الكلاص واحد مات متسمم وثاني عايش شلون ماعرف دخت بيها بس اله اكو لعبة بالموضوع

...باوعت عليه واردفت
:-يمكن ماكل 7 تمرات الصبح

...باوعو عليه مستغربين وكال الأشيب
:-منو

مورفو: هذا الي ما مات وهو اكل من نفس ماعون المات وهو مسمم

زياف: جواب منطقي

مورفو: اي شبيكم عمو عثمان جان يجبرني اكل 7 تمرات كل يوم الصبح يكول حتى يطول عمرج بس اني جنت انطيهن للبزونه مالتي

الأشيب: وين اكو بزونه تاكل تمر

مورفو: خطيه تلعب نفسها احطهن بحلكها وترجعهن عليه وارجع احطهن وابقى لازمه حلكها وتنجبر تاكلهن تالي تعودت كامت تاكلهن وهي ساكته

أنفجرو من الضحك وزياف نُصب على الإشيب
زياف: يجيك يوم وتوكلك الـ7 تمرات الك

الأشيب: لا تمسلت زياف

مورفو: عود يريد يخرب بيناتنا.!
الأشيب: الدنيا كلها ما تخاربني وياج.

سمياف: مو كاعدين يمعودين

مورفو: عادي مو غربه انتو

كانت كعدة تجنن مليانة سوالف حلوة
وضحك ، فعلاً غيّرت نفسيتي 180 درجة ..
بعد فترة فزينا على صوت عزيز هرج البيت
بالصياح وواضح مِـنْ صوتة شكد عصبي.!
تسأل زياف مستغرب وضعة
زياف: هذا مو صوت عزيز؟
- ضحك الأشيب بإستهزاء
الأشيب: أي هـــو.

زياف: سويتها يعني

قبل لا يُنطق الأشيب ونعرف شنو الموضوع
وقبل لا نعرف سبب هدوء وضحكة الأشيب
أندُفرت الباب ودخل عزيز مثل العاصفة ؛
أشبه بالبُركان اللي دا ينفجر وصاح بالأشيب
بصوت غاضب يرعب
عزيز: أتخبلت أنتَ؟ شلــــــــون تسوي بيه هيــــــــــج؟!

...وكف الأشيب وكال بابتسامة
:-كتلك اكسر ظهره الي يندك بـ مورفو

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105