الأشيب الفصل العشرون 20 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

طلعت للمُطبخ وصرت أرتب الحبشكلات بالصينية متحمسة للفلم وللأجواء الليّ نعيشها .. كنت أدندن مع نفسي فاصلة عن العالم بس أنطفت فرحتي مِـنْ شخص حُضني مِـنْ الخلف ؛ عطت بفزع وما عندي شك صوتي وصل لكل الموجودين بالبيت مِـنْ الخوف ؛ سُرعان ما أتخلت أيد على حلكي كتمت صوتي وأنهمست كلمات بصوت ثقيل وكلمات متقطعة واضح سكران.!
بندر: أشش لا تـ تصيحين ، مـ ما أسويلج شـ شي..

فزن شياطين براسي أنهاريت وصرت أدفع بي بقوة أريد أبعده عني بس يا جيل ما يهزك ريح.! قيدني بقوة عاضني مِـنْ رقبتي بوحشية خلاني أصرخ بصوت مكتوم منقرفة ومتألمة بنفس الوقت.! وكف كلبي عند اللحظة الليّ رخت قبضتة إليّ مع صوت الطلقة الليّ طلعت مِـنْ سلاح.. ما عرفت سلاح منو.!
بس كانت كفيلة حتى تبعده عني ويطيح على الأرض جثة مدماية.! أنسحبت مِـنْ أيدي دافن راسي بصدرة يهدأ رجفتي وهمس بحنية يحاول يسحب الخوف اللي سيطر على جسدي كرعشة
الأشيب: لا تخافيـــن يمج أني.

درت وجهي بخفة حتى أكدر ألمح الليّ طاح على الأرض كان بندر و مِـنْ كُثر ما سكران يلوب بصمت مابي حيل يصرخ مِـنْ الطلقة اللي أخترقت ساقة .! دخلوا الكُل تتراكض مفزوعة على صوت السلاح وأول ما شافتة أمه صارت تلطم على وجها مفرفحة ونزلت يمة حاضنة راسة وما أجة كدام عينها غير الأشيب حتى تدعي عليه
ماجدة: الله لا يوفقك الله لا ينطيك .! تريد تمــــوت أبني.!

تجاهلها وأندار على عُمران
الأشيب: أذا شفتة كدام عيني راح أغسل عاره وحق الخلقة.

تقدمو عُمران و روار على بندر يشوفون شنو وضعة والكل كان مصدوم وما مستوعب ليش فَـدار سوة هيج؟ أنخبص البيت بصوت صراخ ماجدة ودعاويها الليّ يقشعر إلها البدن
ماجدة: الله لا يوفقك يا فَـدار ، الله يوجع كلبك ويحركة مثل ما حركت كلبي على أبني ، ولك بيش طالبة وتضربة بسلاح شمســــــوي.!
- صاح بيها بعصبية مُرعبة
الأشيب: داخل بيتي ويتحرش بعرضي وين صايرة هاي يا أمة الأسلام ويـــــن؟! جايين خُطار تحترمون نفسكم لما تولون مو يرجع بنصاص الليالي سكران.

تقربت خالة نسرين خايفة عليه
نسرين: لا تصيح يُمة على كيفج جرحك بعده أخضر.
- ما أهتمت لليّ مشمور جثة مدماية لأن تعرف أبنها ما يأذي بشر أذا ما غلطان غلط كبير ما ينغفر ؛ شالوه عمران وروار حتى ياخذونه للمُستشفى وبُقت ماجدة كاعدة وتدك وتلطم ؛ ما أتحمل الأشيب وزمخ بيها بنفاذ صبر وعصبية مفرطة
الأشيب: أمشـــي أطلعي برة ؟ أنعلبوكم لبو الخَير مابيكم حيوانات.
- كُـل هذا الوقت وهو حاضني مِـنْ أكتافي ما تركني ، ضامني مِـنْ الكل ؛ سحبني وياه يريد يرجع للأستقبال وصار كدامنا عزيز وكف عند باب الصالة والجگارة بحلكة ماخذ دور المتفرج بصمت
الأشيب: أخذها لبيتها لا أرتكب جريمة بيها

وكف شعر راسي مِـنْ شفتة يبتسم.! شهل برود والأستفزاز الليّ يملكة.! رجعنا للأستقبال تركني عند الباب وكعد على طرف السرير يتنفس بتعب وأيده ضاغطة على جرحة .. بُقيت جامدة بمكاني حاضنة أيدي على كلبي ودموعي تنزل بهدوء ، دخلن خالة نسرين وسهاد يحجن وياه بعتب
نسرين: شلون تطرد عمتك هيج يُمة؟

الأشيب: والله لنعل ابو عمتي لبو الساعه الصارت بيها عمتي

سهاد: ليش هيج ضربت بندر شمسوي

أشرلها عليَّ وصاح بقهر مفرفح
الأشيب: شوفي رگبتها شوفي.! أطلع عــــااار على الزلم لو سكتت لواحد يتحرش بمرتي وفوكــاها ببيتي .!

نسرين: بس لا تصيح يُمة ما تخاف على روحك أنت

دخلت ماجدة منهارة وصارت ترعد
ماجدة: هي مرتك **** ما تكدرلها كدرتك على أبنــــــي
- نهض الأشيب بعصبية يريد يهد عليها ، ركضن خالاتي مانعاتة منها ؛ صاح بيها بصوت زلزل البيت
الأشيب: أسمعـــي لج لا عبالـــج توكف بعيني أنتِ عمتــي لو جبيرة بالعُمـــر ؛ الليّ يندل بـ صبا لو يسمعها حجاية لو يحجي عليها حَرف واحد أفرك حلگة بالقُندرة أفتهمتي لـــــو لا؟؟

دخل عزيز وراها يضحك مستهين بالوضع كُله ، سحبها وياه
عزيز: أمشي عمة أمشي ليش تجيبين الأهانة لنفسج
ماجدة: والله راح أشتكي عليك وأخيسك بالحبوس يا حيوان
الأشيب: أذا ما خيستكم كُلكم بالحبوس وأشوفلجياها شلون تصير ما أطلع أني أبو شيبة بس أصبرولي.

طلعها عزيز وياه ؛ أندار الأشيب على الموجودين وتكلم بهدوء
الأشيب: أطلعو عوفوني

نسرين: لا تسوي بروحك هيج فدوة اروحلك

الأشيب: يمة رحمه للكعبه اطلعو ليش تخليني احجييييي

سحبتها خالة سهاد تعرفة مِـنْ يقفل
سهاد: امشي نسرين لا يتخبل علينا بهذا الليل

حسيت على رحيق لزمتني مِـنْ ذراعي وأشرتلي بعيونها أطلع وياها حتى نترك الأشيب يرتاح بس تكلم بعصبية مانعها
الأشيب: عوفيـــــها

طلعوا كلهم وأني على وكفتي ورجفتي ودموعي الليّ ما هدأن ؛ أشرلي أتقرب منه ، سند ظهرة على الحايط ووجهة يصُعب عرك ؛ عيونة تحول لونها للأحمر مِـنْ العصبية .. أحتضن وجهي بين كفوف أدية يمسح بدموعي يتكلم بهدوء
الأشيب: ليش ترجفين؟
- جاوبتة بشهگة هدت ثلثين حيلي
مورفو: خايفة عمو
- لمني بحُضنه بقوة وهمس
الأشيب: لا تخافين وأنتِ بنيات الأشيب

بُقى محتضني لما هدأت وبعدها طلب مني أقفل الباب واروحلة ، كعد على طرف السرير وأني نفذت الليّ طلبة بدون ما سأل عن السبب ؛ بعدها طلب مني أجيب
علبة الضمادات ؛ جبتها بسُرعة وكعدت بجانبة
متسائلة بخوف ليش طلبها؟
مورفو: جرحك دا ينزف؟
- رفع التشيرت ظاهر الجرح كدام عيني
الأشيب: لا تخافين بس غيري الضماد ما يبقى شي.

بدأت أغير الضماد وأني دمع عيوني ما وكف ، كُـل شوية يرفع أيده يمسحهن ويحجي بحنيه طاغية على صوته
الأشيب: أبوس عيونج كافي بجي.

ياريت لو أكدر أمنع عيوني مِـنْ البجي بس شبيدي.! كملت تعقيم جرحة وسألتة أذا كان الجرح القريب مِـنْ كلبة هم دا ينزحف بس الحمدلله كان مابي شي ؛ نهضت متوجهة ناحية الباب اريد أطلع
مورفو: راح أجيبلك تشيرت غير هذا.
- صعدت لغُرفتنا جبتله جديد ومن رجعت صادفتني خالة نسرين خايفة على وضعة
نسرين: خمو بي شي؟

مورفو: لا خالة مابي شي لتخافين

نسرين: نام لو بعده كاعد

مورفو: بعده

نسرين: ابقي يمه لا تخلي يعصب يمة مو زين عليه

اومأت بأيجاب ؛ ودخلت الأستقبال قافلة الباب وراية ؛ ومن أعطيته خبر يكعد يغيّر تشيرته طلب مني أني أغيرلهيا مِـنْ كثر التعب الليّ جاس جسدة وروحة .. مِـنْ نزعتة التشيرت صُفنت على بطنة وصدرة الليّ مغطيهن ضماد كبير وفوكاه لفاف مغطي جزء جسدة العلوي تمامًا ؛ أنعصر كلبي حاس بأذيتة ، باوعلي بعيون ذبلانة غلبها التعب والنعاس وهمس
الأشيب: يهوّن وجعهن يمج.

بلعت ريگي ووياه غصتي وسكتت ، لبسته التشيرت الجديد ونهضت طفيت الأضوية ؛ طلب مني أنام بحُضنه بس رُفضت
مورفو: راح أنام على الكرويتة أني
الأشيب: متفقين مُكانج بحُضني.!

مورفو: بس انت تعبان

الأشيب: تعبي يزول يمك طير الشوك

أبتسمت لجمال وحنية كلامة الليّ يأسر كلبي ويلعب بحالي لعب ويلوموني بعدين.! يا قلب هذا الليّ يشوف هيج حُب وأهتمام وما يلين؟ يا أنسان ما يوكع على وجهة بحُب هيج شخص؟
طفيت الأضوية ورجعت لحُضنه "لبيتي" طبع بوسات
كثيرة على راسي تحسها أعتذار عن الليّ صار وياية رغم مو ذنبة ولا هو كان السبب ، شدنيّ عليه يناديني بهدوء مُميت
الأشيب: مورفــو
مورفو: أممم

الأشيب: لـيش من تخافين تـكليلي عمو؟!

مورفو: احس بـ الامان اكثر

وصدقاً شعور الأمان يُغمر روحي مِـنْ أناديه "عمو" ، غمضت عيوني مِـنْ حسيت أيدة لامست رقبتي وتحديداً مكان عضة الحيوان القذر بندر
الأشيب: توجعج؟

مورفو: اي شوية

الأشيب: راح اكسر فكة مو بس اسنانه مقابل هاي العضه وعيونج

..رفعت ايده من ركبتي وبست باطنها واردفت
:-اعرف حقي مايضيع واني بـنيات الأشيب

...عصرني بحضنه احس يريد يدخلني بضلوعه وجر حسرة وكال
:-اريد اهج بيج شلون؟!

راقت لي الفكرة "يهج بيه.!" ضحكت ورُفعت راسي أباوعلة
مورفو: وين تهج بيه؟

الأشيب: ماعرف بـ اي مكان مابي ناس وحوش ممكن تأذيج اريد اعيشج بـ عالم بي بس فراشات مثلج

مورفو: اعيش وين ماتعيش أنت حتى لو بنص الوحوش لان انت كدها تحميني وتاخذ حقي من كل الي يأذوني

الأشيب: يـفديج بروحة الأشيب

توسعت أبتسامتي وفراشات تتراكص بكلبي مِـنْ كلامة ، سندت نفسي على عكس أيدي حتى أكدر أشوفة زين
مورفو: راح علينا الفلم
الأشيب: هو أحْنا صرنا فلم بعد

مورفو: بس تخوف من تعصب فدعوس

الأشيب: وهو المطلوب

مورفو: مو اني هم اخاف منك

الأشيب: ما معصب عليج اني ليش تخافين

...رفعت ايدي صرت امسد ع لحيته بـ هدوء واردفت
:-احس تختفي كل الحنية من كلبك وكت العصبية

هز راسة نافي كلامي وهمس
الأشيب: ماكو شي يغيرني عليج

مورفو: ليش سكران بندر شكبره ويشرب هو

الأشيب: ناقص تربية غير

مورفو: يعني عزيز هم ناقص تربية؟!

بهتت ملامحة ما توقع سؤالي ؛ سكت لفترة كأنُ يفكر بجواب مُناسب ما يشوه بيها صورة عزيز كدامي رغم كُـل الليّ صار ؛ أخذ نفس عميق منتقي الجواب ونطقة بهدوء
الأشيب: الدنيا جُبرتة عزيز ، ولأن جان أيمانك بربه ضعيف مشى بهذا الطريق.

مورفو: ليش شصار ويا و نجبر

الأشيب: عزيز مو ابن خالتي سهاد

كانت صدمة بالنسبة الليّ.! كيف مو أبنها وهو عايش وياهم ويصيحلها أمي؟ عگدت حاجبي بأستغراب
مورفو: لعد أبن منو؟

الأشيب: امه متوفية، عمي جان متزوج امه بـ السر 15 سنه ومحد يعرف، من ماتت امه هو جان عمره 14 شمرة ع خواله وما حجه ولا كال جنت مزوج او عندي ابن، وعزيز تعذب يم خواله عاش حياة صعبة وذله واهانات سنتين وهو عايش يمهم بعدها جابة واحد من خواله جان جبير بـ العمر حطه بـ الباب وكال
:-هذا ابنكم راح يموت اذا يبقى تحت رحمه خواله ونسوانهم ارحمو بي وبقو يمكم

..تخيلي جابه ايده مكسورة وهو مو صغير بوكتها عمره 16 سنه بس شيسوي حكم القوي ع الضعيف، نكر عمي بـ البداية بس عزيز جان عنده هوية ومسجل بـ اسم عمي، عاد خالتي سهاد نقهرت عليه وكالت لـ عمي هي تريده لان هي تمرضت بـ اخر ولاده الها ومتكدر تخلف بعد، بقى يمنه من وكتها وخالتي سهاد صارتله ونعم الام ما حسسته هو مو ابنها ابد وشوفت عينج شسوت من طردته من البيت كاعده وتنوح عليه

مورفو: يااااعمريييي خطييييية، زين خالة سهاد ما زعلت من عمك لان متزوج عليها

الأشيب: بـلي زعلت بقت اشهر متحجي ويا بس كاعده بـالبيت لـخاطر اطفالها ولـخاطر عزيز، حيل حبته وتعلقت بي هو جان بـ البداية مايريد احد ولا يحجي وي احد بس بعدين من شاف محبة خالتي سهاد واهتمامها صار يميل الها، وراها راح كلية عسكرية وتخرج وصار ضابط وطغى تحسي يريد يطلع قهر السنين الي فاتت هسه

مورفو: بس هل شي ماراح يريحة بـ العكس راح يزيد حالته سوء

الأشيب: هاي عقليته بعد شكد حجيت ويا اني وعمران وحتى روار الي اصغر منه حجه ويا بس هو عقلة قافل ع فكرة ومقتنع بيها

مورفو: لعد ليش خاله نسرين تكله من صغرك ادور الزلة ع الأشيب شبي وياك

الأشيب: هو اصغر مني بـسنه جنت دوم احاول اتقرب منه هو يكول انت داتعطف عليه ما تحبني وجنه نتعارك من ورة هاي السالفه هواي

مورفو: بس انت حنين عليهم كلهم مو بس هو ليش اخذها بس ع نفسه

الأشيب: الشخص من يعيش بـ مكان ما يشوف الحب والأهتمام ولا الحنية راح يحس هاي الاشياء كذبه وما موجودات اصلا حت لو تقدمتله بعدين راح يحسها كذبة

مورفو: بس اني هم عشت مثله بس ماحس بهيج

الأشيب: أنتِ مو حنينة أنتِ الحنية نفسها

ضميت وجهي عنه خجلانة وهو ضحك
الأشيب: أروح فدوة للخجلان
مورفو: كافـــــي فدعــوس
الأشيب: شنو رأيج تسوين مساج لراسي؟

مورفو: ليش دخت من لغوتي

الأشيب: هذه المرة اني الليّ جنت ألغي مو أنتِ
مورفو: ياريت محد يلغي غيرك
- عضني مِـنْ خدي مكزكز على كلامي
الأشيب: ونسة حياتي أنتِ وعلي

عدلت كعدتي مخلية راسة بحُضني وصرت أسويلة مساج على كيف و كُـل شوية يسحب أديه يبوسهن ويرجعهن على راسة بمعنى كملي ؛ ومن أوكف يهمهم
الأشيب: أمممم
- أضحك وارجع أكمل وسويتها لعبة كُـل شوية واكفة وهو يعيد نفس الحركة حتى أرجع أكمل ، ضحكت بصوت عالي
مورفو: شبيك فدعـــوس؟

الأشيب: ليش توكفين

مورفو: غير اتعب شبيك

الأشيب: لعد مو دابوس بـ اديج حتى تتنشطين

مورفو: هااااا يعني داتقشمرني وتبوسني حتى ابقى افرك مو

ضحك وأبعد راسة مخليه على المخدة ، وسحبني لحُضنه مستسلمين للنوم بعد ليلة مُتعبة نفسياً .. ما حسيت غير الصُبح يكعدني حتى أصعد أكمل نومتي بغرفتنا بس رُفضت
مورفو: خليني يمك

الأشيب: شو باعيلي

..رفعت راسي عليه واني مغمضه عيوني ضحك وكال
:-افتحي عيونج احجي وياج ما ارتاح هيج

مورفو: تستخدم سوالفي وياي فدعوس

الأشيب: هههههه حتى تحسين بشعوري من تجين تكعديني

مورفو: تضوج فدعوسي

الأشيب: ماضوج منك اني طير گلبي انت

توسعت أبتسامتي بسبب حجايتة الليّ خلت فراشات تتراقص بكلبي مِـنْ الصُبح ورجعت مكملة نومتي بحُضنه ، حاول يرجع يكعدني بحجة العالم راح تكوم تجي حتى تشوفة ..
كعدت على حيلي متنرفزة واباوعلة عبالك وحدة متعاركة ..
بُقيت صافنة بوجهة وهو يضحك على شكلي
الأشيب: شبيج؟

مورفو: انت شبيك فَدار

الأشيب: شبية يروح فَدار

مورفو: لا تحاول تخجلني حتى تسكتني ما اسكت

الأشيب: احجي بابا مامسكتج

مورفو: راح اكتب لافته ع الباب البرا (مغلق) حتى محد يزعجنه

الأشيب: روحي اكتبي يلا

مورفو: يعني متذبحني

الأشيب: لا بس اعلكج بـ المروحة

مورفو: الله وتشغلها بيه وابقى اتمرجح

ضحك بصوت عالي وكُفخني على راسي
الأشيب: فرحانة الفطيرة

مورفو: اشكرك عمو ع تمردغ الخواطر من الصبح

الأشيب: راح تطير النعسة وأنتِ بعدج تحجين

...فتحتله اديه وارفت
:-حضن حضن بسررررعةةةة

كعد على حيلة وحضني بقوة والضحكة ما فاركت لا وجهي ولا وجهه ، أحس طايرة بي
الأشيب: لج بويا شلون بنيات حلوات يردن الروح مِـنْ الصبح

مورفو: حتى تحس شكد وجودي مهم بـحياتك

الأشيب: حاس من زمان وعيونج

حاس بنعمتي.! يومة ما يكمل بدوني.!
راسة يصدع أذا ما يسمع لغوتي ..
يهتم بأصغر وأدق تفاصيلي شلون ما حسب حساب
راح أضيع بي وصعب ألاكي طريقي بعيد عنه ..
مسدت على لحيتة بحنية بأثنين كفوفي
مورفو: تعافى بسُرعة فَداري

الأشيب: بس اني ماريد اتعافى هسه

مورفو: ليش

الأشيب: راح ارجع دوام وشغل وانحرم من هاي الكعدة يوميه ومن نهاري المليان بـتفاصيلج وسوالفج

مورفو: راح ترجع تشتغل مجرم يعني؟!

الأشيب: لا خلصت مُهمة المُجرم ، راح أرجع لدوامي اللي ثلثين النهار بي.

مورفو: ابقى مسوي نفسك مريض لـما اداوم اني هم

لمحت نظرات الندم الليّ واضحة وضوح الشمس بعيونة
الأشيب: ضايجة لأن حرمتج مِـنْ الدوام هذه السنة؟

مورفو: حرمتني من شي وعوضتني بشي اعظم

الأشيب: بشنو عوضتج؟!

مورفو: وجودك بـحياتي

الأشيب: كومي من يمي راح احبج

كنت أعنيها للكلمة بكل معانيها ..
كنت أهيم وأضيع مِـنْ أباوع لعيونه وأسمع كلامة ..
ضحكت بصوت عالي مفضوح
مورفو: عـــــزة تخمُـــط سوالفــــي.!

حاول ينهض وطلب مني أساعدة ، وبُقيت ساندة وطلعنا للصالة مع بعض ، مِـنْ شافنة روار أجة ناحيتنا بسرعة
روار: ليش ما صحتني؟

الأشيب: عوفني مرتاح هيج

روار: يمعود دشوفها شلون مجعوصه جواك

مورفو: يجعصني يمردغني يعجني انت شعليك

روار: صوجج لو صوج الخاف عليج

مورفو: انت متخاف عليه اكثر من فَدار

الأشيب: شبيكم من الصبح مناكر

روار: مرتك ما تنجرع
الأشيب: أنتو تتحرشون بيها
- رجع روار كعد بمكانة يدردم
روار: وين يكدر ينطي بيها

مورفو: شو صاير زياف ثاني خيرك

روار: ترفعون الضغط

الأشيب: شبيك اليوم

روار: مادري روحي بـطـ....

سكت وغير كلامة بسُرعة
روار: بـخشمي
- كعد يمة الأشيب واضح فاهمة وطبطب على ظهرة
الأشيب: تريد تروح؟
- هز راسة نافي
روار: ما أعوفك بهذا وضعك

الأشيب: ما علية شي اني روح

...هز راسه رافض وحاول يضيع السالفه ع الأشيب الي اصلا اني ما فهمتها شنو ووين يريد يروح هم ماعرفت، وكال
:-بندر ميكدر يمشي ع رجله بعد

الأشيب: قليلة بـحقة

روار: عزيز جاب عمتي للمستشفى وصارتلك لخه من عياطها

الأشيب: مو كتله اخذها لبيتها

روار: شمدريني جابها وبقى واكف ويضحك عليها تالي رجع للبيت وعافها ع كلبنه، لـما اجه صائب وعمران طيح حظه وهدده يسجن ابنه وكال راح يسويها كعده عشاير هم

الأشيب: ما ينلام بيهم اذا ما خليتهم يبوسون قنادر

روار: كال ع اساس اليوم يريد يجي صائب عليك وبقى يتعذر وكال اني حاضر لـكلشي تردو، بس عمتك العرمة واكفة وتهدد تريد تحبسك بكل صلافة

الأشيب: ما جريتها زيج

روار: ستحيت من صاحب عمران جان ويانه

الأشيب: يلا ع جايات لعد

ضحكو وبقو يحجون عليهم ، خالة نسرين جابت ريوك للأشيب واني صعد لغُرفتي غسلت ورتبت نفسي ونزلت ، الأشيب راجع لمكانه بالأستقبال ويمة خُطار الليّ ما يفاركوه أبد ..
وأني خلصتها ويا تبارك مرة ناكل مرة نلعب ،
أجة روار كعد يمنة بالصالة ، عينه بتلفونه تحسه مهموم ..
تركت تبارك وكعدت بجانبة متسائلة
مورفو: ور ور شبيك اليوم؟

روار: ضايج

مورفو: متلوكلك الضوجة

روار: تدرين شتمنى هسه؟!

مورفو: لا مادري

روار: اتمنى اطلع بـ الشارع وتجي سيارة تجعصني تمردني مرد وعدل وكبل للنجف ومنها للجنه واخلص وارتاح

مورفو: سالفتك صعبة مبينه، بس شو للجنة؟! بـشنو ضامنها؟!

روار: مو متحملكم وساكت هذا يعتبر جهاد والي يجاهد يروح للجنة

مورفو: والمظلوم هم يروح

روار: رب المظلوم اني

مورفو: شكو شبيك منو ضالمك

روار: هسه ماعليج بيه، وكليلي عندج انستكرام

مورفو: ماعندي غير واتساب

روار: ليش شهل اضطهاد

مورفو: مو اضطهاد بس مو ببالي وما مهتمه الهن كلش

روار: افتحي انستكرام حلو

مورفو: نشوف عمنه الأشيب شيكول والله كريم

روار: اذا قبل اول واحد تضيفيني اني

مورفو: ماضيف ولد زوجي ميقبل

روار: اكوم اورج أنتِ وزوجج

مورفو: لا زوجي خطيه مابي حيل

روار: منو الهجم البيت ع راسنه البارحه لعد بـ الصياح

مورفو: اي وتعب وراها وهسه مابي حيل

روار: نزليلج دمعتين بعد ع حالته

مورفو: حقيقة هاي والله تعبان شبيكم ويا

روار: ديلا خوش بس سدي حلكج

مورفو: اوي ما ينحجي وياكم انتو نفسيات

نهضت بزعل راجعة لمكاني وهو رُفع حاجبة
روار: منو الليّ ينحجي وياه لعد؟

مورفو: فَدار، ولا مره كال اسكتي بس انتو كل حجاية وثانيه سدي حلكج

روار: يلا ارجعي احجي ماكلج اسكتي بعد

رجعت كعدت يمة مستفسرة
مورفو: قسمك يعني التحليلات حلو مريح لو لا ؟

روار: اي حلو ومريح

مورفو: شكد يقبلون معدل اريد اروح

روار: شكد معدلج أنتِ

مورفو: 98

روار: يقبلونج وهمه الممنونين، بس ليش تحليلات روحي صيدله حلوه

مورفو: لا ماحبيتها

روار: روحي طب اسنان

مورفو: فَدار كال ماكو اسنان وصيدلة بديالى واني ماريد اروح غير محافظه

روار: نقدملج منحة بجامعة أهلية يقبلونج لان اهلج ميتين ومعدلج عالي

مورفو: لا اريد مثلكم انت والبنات مو هم تحليلات

روار: لج اني لو مطلع 98 حتى ما ابقى بالعراق

مورفو: وين اروح يمعود منو بـحالي

روار: الله كريم منا لـ بعد كم شهر فـكري براحتج وقرري

صاحت رحيق على روار ياخذ الضيافة للموجودين يم الأشيب : صار الظُهر يلا فُرغ الأستقبال ، أخذت تبارك ورحت عليه وهي كُـل ما تشوفة تتحمدله بالسلامة
تبارك: الحمدلله على السلامة خالو
الأشيب: روح خالو أنتِ

...تقربت سحبتها من ملابسها من حضن الأشيب ونترت بيها
:-بدون احضان لو سمحتي

تبارك: ليش؟!

مورفو: روحي احضني ابوج ماعليج بـفدار

تبارك: بس هو خالو

مورفو: تقبلين احضن ابوج اني

تبارك: لا ما أقبل

مورفو: اني هم ماقبل

...ضحك الأشيب وكال
:-صدك جذب تخلين عقلج وي تبارك

مورفو: اي شنو ماقبل كلمن تحضن ابوها ليش التجاوزات

رجعت تبارك للصالة تهدد بيه
تبارك: لاح أكول لبيبي عليج والله

ما أهتميت لكلامها والأشيب سحبني عليه حاضن راسي بقوة ، يضحك وكان واضح ضحكة فرح
الأشيب: عود صدك تغاريّن منها؟

مورفو: اي والله ماقبل

الأشيب: لج بابا طفلة هاي

مورفو: واذا ترا حضنك بس الي وشوية لخالة نسرين وبالمستقبل احتمال تروح هاي الشوية

ضحك بصوت عالي منتعش بغيرتي عليه
الأشيب: أويلي على الغيرة أويلي

مورفو: عمو اريد اكلك شي

الأشيب: كولي

مورفو: اريد افتح انستكرام

الأشيب: منو خلاها ببالج

مورفو: روار

الأشيب: لعد خل هو يفتحلج

مورفو: لا انت

الأشيب: جيبي تلفونج وتعالي

ركضت للمُطبخ جبتة ورجعن يمة ، أخذة مني حتى يسويلي حساب واني مكابلتة أنتظرة يخلص ، أبتسم وهو يباوع لتلفوني ؛ حاول يخفي أبتسامتة ورُفع راسة يباوعلي متسائل
الأشيب: هاي شباحثة أخير شي؟

مورفو: وين

الأشيب: ع اليوتيوب

مورفو: اغنيه حزينه تبجي الصخر

ما كدر يكتم ضحكتة أكثر وضحك
الأشيب: اي وبجيتي؟

مورفو: لا طلعلي هذا يحجي بخشمه وبجيت من الضحك عليه

الأشيب: وليش ردتي تبجين؟

مورفو: هاي من جنت انت ماكو وشتاقيتلك واريد ابجي فـ احتاج معزز حتى ابجي من كل كلبي

الأشيب: حتى بـحزنج تضحكين

مورفو: مو ماعرف يا اغنية تبجي فـ كتبت هيج توقعت راح اكطع نفسي

بُقى كُـل دقيقة يضحك ضحكة بصوت عالي مِـنْ كُـل كلبة ، سحبت تلفوني منه متنرفزة لأن تطفل على خصوصياتي
مورفو: بعدين مِـنْ سمحلك تشوف خصوصياتي؟
الأشيب: جيبي خليني أكمل الحساب

أنطيتهيا ومن كملة طلب مني أكعد بجانبة وبُقى يعلمني شلون أستخدمة وأنطاني خبر ضايف حسابة وحساب العائلة الكريمة كُلها ومن ضمنهم زياف وسيماف ، ألا عزيز ماكو.!
مورفو: لعد وعزيز ليش ما ضايفة؟

الأشيب: شسوين بـعزيز

مورفو: خطيه عمو

الأشيب: چؤ عوفي

مورفو: راح يضوج اذا عرف بهل تفرقة خطية

الأشيب: اني بس اريد أفتهم أنتِ من يا طينة مخلوقة

مورفو: ليش شبية؟!

الأشيب: يعني بشر مأذيج وسوالفه نكسه وياج ليش ملاحكته وتردين تضيفي

بُقيت ساكتة ما عندي جواب بس بعد ما سمعت
قُصة حياتة حيل تعاطفت وياه ..
هو حسبني ضجت وفعلاً ضجت شوية ، شدني عليه
طابع بوساتة على خدي بحنية
الأشيب: هسه هذه الضوجة كلها علمود عزيز؟
-هزيت راسي بأيجابية
الأشيب: وتروح أذا ضفتي؟
- كررت نفس الحركة أشارة لقبولي
الأشيب: ليش هيج مُهم عندج؟
مورفو: أحس خطية خصوصاً مِـنْ حجيتلي ماضيه كسر كلبي ، وأذا تصرفت هيج وما ضفتة راح يضوج ويحس نفسة غريب ومنبوذ

الأشيب: هاهي ضيفي بس لا تضوجين

ضميت وجهي بحُضنة بقصد أبعد ملامحي عن عيونه
مورفو: بس أني ما أريد أضوجك

الأشيب: يرخصلج بنياتي

مورفو: امسحه ماريده بعد

الأشيب: ع شنو بابا ضيفي اليعجبج

بعدني عنه يباوعلي بنظرات تهديد
الأشيب: بس بدون سوالف ومُراسلات وما أعرف شنو.!

مورفو: عمو هو ويايه بالبيت وما حاجيه ويا مو عاد مراسلات

الأشيب: المهم داحذرج

مورفو: ماسوي شي من ورة ظهرك تعرف بهل شي

الأشيب: واثق منج بنياتي

مُضت الأيام طبيعية وأني ألتهيت بالتلفون
هواية ، مرات أكعد لساعات طويلة أكتب بدفتر مُذكراتي
ذكرياتي وياه ، أكتب الصغيرة والكبيرة أحس ما أريد
أنسى لحظة وحدة أعيشها بقُربة ..
كثير مرات يفززني مِـن صفنتي واشوف نفسي
صافنة بي غرگانة بملامح وجهة الليّ يبهج روحي
الأشيب: صفناتك كثرانة طير الشوك

مورفو: أقُر عيني بأبداع الخالق

وكنت أقصد وجهة ، ضحك ماخذ الموضوع يشقة
الأشيب: يا بويا يا بويا شلون كلام هذا

مسدت على لحيتة الطويلة الكثيفة
مورفو: صايرة تنظفر خليني أظفرها
الأشيب: تكومين مِـنْ يمي لو شلون؟
مورفو: حباب بداعة الخوة

سحب أيدي عاضها طارد الفكرة مِـنْ راسي
الأشيب: أكعد راحة يول ، كم يوم وبعد ما تشوفينها
مورفو: وكتها تصير مو خوش زلمة

رفع حواجبة بسرعة متعجب مِـنْ كلمتي
بدون مُقدمات نهض وركضت منهزمة منه بس
ما عافني ولأن صحتة تحسنت كدر يركض وراية
ويلزمني من ملابسي قبل لا أنزل الدرج
الأشيب: دقيقة دقيقة يَـا الخوش مرة ، عليمن هل حجي؟
مورفو: على نفسي أني أبد مو خوش زلمة والله
الأشيب: يحكج أنتِ اعرف بيج
مورفو: نحن عباد الله الصالحين لا تخلينا نصير كافرين

صُفن بوجهي يريد يستوعب كلامي حتى يرتبه
بعقلة ويطلع منه جُملة مُفيدة بس ماكو فايدة
الأشيب: شبيج اليوم ؟
مورفو: ماخذة بُطل مِـنْ عزيز

حجيتها بشقة بس مِـنْ سوء حظي عزيز كان موجود يباوعلنا ؛ بلعت ريگي بتوتر وفشلة بس هو ضحك بدل لا يضوج
عزيز: عزيز وتاب شوفيلج غير عُذر

ما نطقت حرف واحد ، أما الأشيب بُقى يباوعلة بملامح جامدة وعرفت ما يحجي وياه بعد الليّ سواه ويايه بغيابة ..
بعد أيام منجمعين كُلنا على الغدة
وكانت عيني على الأشيب الليّ منطلق ويا الولد
يضحك ويسولف وصوته مخترق كلبي قبل أذني ..
فزيت على وردة ندستني بقوة وهمست
وردة: شبيج؟ كالو أخوية حلو بس مو هيج هو فشل وسكت وأنتِ صافنة عليه.
مورفو: غير دا يسولف ومركزة وياه
وردة: صار دهر مِـنْ خلصو سوالفهم .
- رُفعت عيني على الأشيب مرة ثانية كان يباوعلي
بقلق ما أعرف ليش هز راسة بمعنى شكو بس
ما كدرت أحجي شي وأنداريت على وردة أهمس
مورفو: أحس ما جنت مركزة بي طلع حلو زيادة عن اللزوم أبن الحلو أخ الليّ تموت

ضحكت بصوت عالي فضحتنا كدام العائلة
ولأن متعودين على طباگاتها محد علق ..
لليل كنت أسوي عصير طبيعي لخاطر الأشيب
ودخل عزيز مِـنْ برة شايل بأيدة كيس أكل ، تقدم
خلاه كدامي وكال
عزيز: مِـنْ ستورياتج واضح مشتهية فلافل
- ضربت بخشمي الريحة ، الستوري كان تحشيشة مذكور بيها طاري الفلافل وهو جابلي توقع مشتهيتها ؛ وبعد ما شميت ريحتها فعلاً متت عليها ، أبتسمت بأمتنان
مورفو: شُكراً عزيز ، تشرب عصير؟ تعبتك بالأكل فَـ المُقابل عصير عادي؟
عزيز: ليش لا

كنت أحاول أتعامل وياه بـ ود وننسى التوتر بيناتنا لأن هذا عُمر عايشينه مع بعض بنفس البيت ما ردت نكون مشاحن ..
كملت العصير وأنطيت كلاص لـ عزيز وأخذت الأكل والعصير الباقي لـ فَـدار ، مِـنْ دخلت الغُرفة خليتهن على جهة وفتحت الشباك ؛ ورجعت كعدت بجانب فَـدار
الأشيب: ليش فتحتي الشباك؟
مورفو: مو أريد أكل حتى ما تصير ريحة بالغُرفة
الأشيب: شراح تاكلين؟
مورفو: فلافل ، تريد؟

أخذ مِـنْ أيدي نُص وسأل
الأشيب: منو جابلج؟ روار؟
مورفو: لا عزيز

كان يمضغ اللگمة مِـنْ سمع أسم عزيز توقف
الأشيب: أنتِ طلبتي منه؟
مورفو: لا هو مِـنْ ذاتة كالت شفتج ناشرة ستوري بي طاري الفلافل وكلت يمكن مشتهيتها وجابلي وبالمُقابل أعطيته عصير

بلع اللگمة كوة عليه وسحب الباقي مِـنْ
أيدي مرجعها لمكانها متنرفز
الأشيب: مورفو مِـنْ تردين شي تكليلي إلي
مورفو: شكو بيها؟
الأشيب: ما إقبل ، بنيات أبو شيبة أنتِ مو بنتهم
مورفو: أنتَ كلت هُمَ هَم أهلج
الأشيب: غيرت رأيي اني كُـل أهلج وهاهي
مورفو: فدعوسي تغار؟
- هز راسة بأيجابية بدون تردد
الأشيب: أي أغار ، ما أحب أحد يدللج غيري

كلبي صار ينبض بقوة وحالي تخربط
ما عرفت شحجي وما عرفت شجاوبة بس اللي
أعرفة اني حالياً طايرة بين مجموعة فراشات ..
نهض مِـنْ مكانة ولزم أيدي مكومني وياه
الأشيب: أمشي نطلع أشتريلج أني وناكل سوة

كنت راح أكون خبلة لو كلت لا ..
حتى ما غيرت ملابسي طلعنا بسُرعة ورغم
تعبه وحالتة الصحية الليّ ما كانت تمام التمام
بس غيرتة فعلاً خلته يسوي كُلشي في سبيل ما أحس
بغيره مدللنـي .. أخذلنا لفات ووكف السيارة
بمكان هادئ ، فاتح الجامات والهوى يداعب بشرتنا
برقة ، مشغل أغنية بصوت هادئ ، أندار عليَّ مبتسم
الأشيب: ياهي الأطيب؟
مورفو: هذه لأن منك فدعوســي

ضحك براحة وبُقينا لفترة طويلة كاعدين
وغركانين وصانعين لحظات وذكريات ما تنسي ..
وأول ما رجعت للبيت طمست بين أوراق دفتر مذكراتي
أكتب كُـل الليّ صار بالحرف الواحد ..
وصرت أحب أشوف غيرتة عليَّ خصوصاً مِـنْ عزيز
وأي شي أطلبه منه ويرفض أحجي نفس الحجاية
مورفو: أذا تتعاجز كول حتى أكول لعزيز هو ما يتعاجز مني
الأشيب: مرات سكوتج نعمة
مورفو: أكو مِـنْ يتمنى لغوتي

لزمني مِـنْ أذني ساحبني عليه
الأشيب: منو هذا الليّ يحب لغوتج بكدي ها؟
مورفو: الحياطين والله الحياطين ؛ تعرف بينا شكثر صحبان أني وياها
الأشيب: مورفو لا تخليني أكص لسانج الصاير أطول مِـنْ برج خليفة

هزيت راسي بإيجابية وهو بسبب كلامي صار ما
يرفض أي حجاية او طلب أطلبه ،
كان يحاول يطلعني يجيبلي إشياء
صار هو يخلق ذكريات حلوة وياية
بس بنهاية اليوم أنشغل عنه بالكتابة وهو يبقى
كاعد وصافن عليَّ مِـنْ يسألني شدا أكتب أكتفي
بكلمة وحدة "خصوصيات" وكان محترم هذهِ الخصوصية ..
بس بالفترة الأخيرة زاد أنشغالي عنه
والأصح صرت أتعمد حتى يتلهف عليَّ ، كنت
كاعدة على الكرويتة مُقابيلة عيني بتلفوني
الليّ محتضن صورته ومبتسمة ؛ قطع صفنتي صوته الهادئ
الأشيب: طير الشوك

..رفعت راسي عليه واردفت بـابتسامة
:-عيون طير الشوك

ابتسم وطلب مني أترك التلفون وأروح أكعد بجانبة ،
ضيگ عيونة عليه وواضح بيهن الف سؤال
الأشيب: أي احجيلي

مورفو: شحجيلك

الأشيب: شبيج هل ايام

مورفو: شبيه؟!

الأشيب: كلامج قليل ، تتصفنين هوايه وبس تتبسمين وحدج لو بـ التلفون لو تخلصيها تكتبين، اكو شي واني ماعرف؟!

مورفو: لا ماكو شي بس ملل وين اروح

سحبني عليه أكثر
الأشيب: حتى مداتلغين فوك راسي هواية ليش؟

مورفو: ليش مو 24 ساعة احجي وياك

الأشيب: بس هم اكو شي شضامه عليه

مورفو: لو اكو جان ماكدرت اضمها لـهسه تعرف كلشي احجيلك

حاول يكون متفهم ويعبر الموضوع بس مو قبل لا يهددني بزعله
الأشيب: أذا طلع أكو شي وضامتة عني راح أزعل وقتها.
- طبعت بوسة على خدة بقوة
مورفو: صار فدعــوسي

ضمني بحُضنه ذيج الليلة مانعني أرجع
للتلفون ؛ كارهه فكرة أنشغالي عنه ..
مَرت الأيام هيج وهو كُـل يوم يسألني شبيج وليش
متغيرة وبنفس الوقت خايف صاير وياية
شي وضامة عليه .. بس أني كنت إستغرب مِـنْ يسألني
لأن فعلاً كنت مرتاحة لدرجة لا توصف
وشعور حلو ملامس كلبي روحي بس ما دام هذا الشي..
أنقلبت كُـل موازين حياتي وحياتة
بذيج الليلة الليّ ما أتمنيت يجي يوم وأعيشها ..
صعد للغُرفة محضرة حبشكلاتي وفرحانة راح أسوي
أجواء حلوة حتى نشوف فلم مع بعض
وأعيش أسعد لحظات حياتي بجانبة ..
دخلت وأني أحجي بفرح كبير بس بلعت كُـل الأحرف
الباقية قبل لا تطلع مِـنْ شفتة كاعد على طرف السرير
مورث الجگارة وملامحة محتدة بشكل مُخيف ،
تركت الأشياء الليّ بأيدي على جهة وتقربت منه خايفة
مورفو: فَـدار بيك شي؟
- ما جاوبني وبُقى ساكت لحد ما كمل الجگارة
زاد خوف كلبي مِـنْ هذا الهدوء المميت الليّ يخفي وراه
زلازل وبراكين وعواصف مَرعبة ، طفى گُطف الجگارة
ورفع عينه عليَّ صايب كلبي بذعر مِـنْ نبرة صوتة
الأشيب: أي مورفو أحجي
مورفو: شحجي عمو؟ شمسوية؟

الأشيب: احجي اريد اسمع منج لان اذا اني حجيت راح تصير مو حلوه

تكدرون تتخيلون مدى خوفي من كلمة "عمو"
رجفت أدية وحضنت بسرعة على كلبي
مورفو: عمو والله ما مسوية شي
- سحب دفتر مذكراتي الليّ كان بجانبة وشمره بحُضني بنتر
يحاول يحافظ على هدوئة بس عيونه بُركان
الأشيب: منو هذا الليّ كاتبة عليه دفتر كامل؟
- بحلقت عيوني بصدمة نظراتي متشخصة على
الدفتر بعدها رُفعتها اباوعلة وبلعت ريگي
مورفو: قريت مُذكراتي؟

الأشيب: كم مره سألتج شبيج احجيلي لا تضمين عليه ليش سكتي وتكتمي ع الموضوع هاااا؟!

مورفو: عمو والله مو احد

رُغم صدمتي من تصرفة وكُرهي لتدخلة بخصوصياتي
صرت أبرر حتى ما يعرف حقيقة مشاعري ،
صاح بيه بنفاذ صبر فززنــي
الأشيب: لج هو شنو الليّ مو أحد صبا؟ لعد لو ما قرأت الكلام بنفسي؟
- سحب الدفتر مني بعصبية وفتح أخر ورقة مكتوب بيها
الأشيب: أول فَزة لكلبج مـــــو؟

دنكت راسي ويا ما نزلت دموعي ، رُفعة بأثنين أديه بعصبية
الأشيب: أحجيلي منو خليني أسمع منج
- رجف فكي وأني أجاوبة ببكاء
مورفو: عمو والله مو أحد

...بقى ساكت شويه يباوع لعيوني وكال
:-تحبين عزيز مورفو؟!

بهتت ملامحي معقولة هذا تفكيرة؟ معقولة عيونه معمية عن حقيقة مشاعري؟ لو دا يستغبي ؟ ليش فكر هيج بالأصح شنو الليّ شافة مني أتجاه عزيز حتى يحس أني أحبه.!! أشرلي براسة
الأشيب: أحجي ليش ساكتة
- اومأت بـ لا ونطقت بسرعة وبدون تردد
مورفو: لا ، مو عزيز والله مو هو

الأشيب: جيبي تلفونج

مورفو: ليش ما تثق بيه

الأشيب: جيبي بدون تمسلت

مورفو: ما أنطي

توسعت عيونة بصدمة كأنُ الشك صار يقيّن
الأشيب: يعني صدك؟
مورفو: لا مو صدك ، بس ما أنطي مو لازم تشوف كُلشي وراية ، ما مسوية شي غلط أني

صار يفتر بالغُرفة يتخبط بخطواتك حاير ،
سحبني مِـنْ أيدي بقوة دافعني على الحايط ما مقتنع
بكلامي والفكرة مترسخة بعقلة
الأشيب: شحجيت وياج أني؟ مو كلت عزيز طلعي مِـنْ راسج ، مو كلت لو أخر يوم بعُمري ما أنطيج إله.! وفوك كُـل هذا تضمين وتجذبين عليَّ.! ألف مرة أجيتج بطيب وسألتج وتوسلتج تحجين وتكليلي شصاير وياج بس أنتِ بقيتي متكتمة وبكل مرة تطلعيلي عذر وتتهربين ليش بابا؟

معقولة كُـل هذه العصبية والتوتر والزعل
بس لأن هو رفض عزيز؟ بجيت بقهر لأن أول
مرة يصير وياية شي وما يفهمني
مورفو: مو عزيز والله مو عزيز

الأشيب: لعد منو؟! احجيلي ماراح اسويلج شي

هزيت راسي رافضة والغصة هدت حيلي
مورفو: ما أكدر عمو
الأشيب: ليش مو أحْنا ما بيناتنا أسرار لو غلطان؟

مورفو: لأن هو ما يحبني

...حجيتها وشهكت باوعلي بقهر وكال
:-هاي الدموع كلها علمود شخص ما يحبج مورفو

..بقيت ساكته منزله راسي وابجي حضن وجهي وكال بـحنية
:-بـشنو قصرت وياج حتى تحبين وتبجين ع واحد مايحبج، هيج علمتج اني ترخصين دموعج لشخص ما يسوة

مورفو: مو بيدي گلبي جبرني احبه

أبتعد عني يفرك بوجهة بقوة مزج ملامحة مزج
وأتصبغت بلون أحمر ، حاول يكتم غضبة الليّ ما إله
تفسير ومُبرر منطقي ورجع كدامي محاول بكل الطُرق
يعرف منو بس كان صعب أحجي لأن راح أنرفض
الأشيب: أحجيلي منو هذا؟ وشلون حبيتيه ؟ لا تضمين عليَّ شي

مورفو: ماكدر احجي خليها مدفونه بـكلبي اذا طلعت راح اتعذب اكثر

ضحك بقهر وضرب قبضة أيدة اليمنى بكف أيدة اليسرى
بقوة ، كان مثل أب ويعتبرني بنتة هسه صرت زوجتة
وما يحقلي أعيش حياتي مثل ما وعدني
الأشيب: أــخخ منج أــخخ ، وين صايرة كاعد أتوسل بمرتي تحجيلي على حبيبها الليّ تبجي عليه كدامي.! وين صايــــرة يا أمــة الأســـلام ويـــــــن؟؟

شال التيبلام وضربها بالأرض طشرها ، صدمتني ردة فعلة ، رجـــع عليَّ ضربني بأطراف أصابعة على راسي بخفة
الأشيب: وين عقلج مِـنْ تسوين هيج صبا؟
- وين عقلة هو لعد مِـنْ مدا يستوعبني؟ مدا يلاحظني ؟ مدا يعرف المقصود منو؟ أنهاريت مِـنْ الأستغباء الليّ متقنة دفعتة عني بقوة وعطت بوجهه روحي محتركة
مورفو: وين صايرة لعد كُـل ليلة نايمة بحُضنك وأنتَ تهذي بأسم عائشة؟ ليش ما فكرت أني مرتك مِـنْ تسوي هيج؟ هسه صرت مرتك مو؟؟

ما كانت ولا كلمة ننطقها بهدوء كُـل كلامنا بصياح وعياط وبعيد كُـل البُعد عن التفاهم ، زلزل روحي بكلامة
الأشيب: ليـــــش أنتِ تقارنين نفســـج بعائشة؟
مورفو: بشنو أحسن مني هي بشـــــنو.! مِـنْ ما تريد تنساها وتبقى عايش على ذكراها شعليك بيه بعد؟ اني هم أريد أعيش حياتي لو مو مو حقي؟
الأشيب: مو هيج مورفو مو هيج قصدي بس عائشة جانت زوجتي ، أني ما هذيت بأسم غريبة ، بعدين كتلج أكبري مو هسه مو هسه ليش هيـــــج؟

مورفو: وشنو يفرقلك اذا كبرت لو هسه

الأشيب: أنتِ بـ عقلج هسه من حجاية وحده ينضحك عليج ومن اهتمام بسيط تتعلقين وتحسبينه حب وبالتالي شراح يصير؟ راح ينكسر كلبج مثل ما هسه مكسور ، راح ترخص دموعج مثل ما رخصت هسه..
- تقرب مني حاضن وجهي ويمسح بدموعي
االأشيب: عبالج هينه عندي هسه واني اشوف دموعج على شخص الله يعلم هو شنو، لج مستعد اموت تعرفين شنو اموت ولا اشوف دمعة وحدة من عيونج، جنت مستعد افني عمري لـخاطر تعيشين مرتاحة وسعيدة ، حاير والله حاير شسوي وشتصرف حتى أرضيج.

...سحب وجهي باسني من خدودي بقوة واردف
:-لج مستعد ابيع الدنيا كلها لـ خاطر اشتري ضحكتج

...دفنت راسي بصدره وجاوبته بشهكه
:-كلبي خذلني هل مره مو بيدي

...رفعت راسي اباوعله واردفت بـ بصوت مهضوم
:-كلشي بي جان الي اله كلبه ما حبني

سند راسة على راسي تعبانين ومهدود حيلنا
الأشيب: شكدر اسوي وانسيج فهميني

مورفو: طلكني خل ابتعد وارتاح

عند هذهِ اللحظة بس يلا كدر يستوعب.!
وما كان كدامي غير حَل أذا ما أحجي راح تتأزم
الأمور وما راح يعرفني لما يسمع الحقيقة ..
رُفع راسة مستغرب ، مصدوم ، وسأل بشك
الأشيب: ليش؟ ليش ترتاحين أذا طلكتج؟

كان صعب يفهم مشاعري بدون لا أحجي ..
فكرة أني بنتة مترسخة بعقلة ؛ وحقيقة عائشة عايشة
بروحها لا يُمكن تغيّرها .. خطيت خطوة أعرف وراها
هلاكي وعذابي بس خلص أنتهى كُلشي وصار
لازم يتخلى حَد للموضوع ، خسارتة أهون مِـنْ ما يبقى
يشُك بيه ويفكر أني أحب غيره.!
رفعت أديه محاوطة رقبتة حاضنته حُضن وداع هذه المرة
طبعت بوسة على زواية شفايفة بشوغة وكأنُ
بعد هذه اللحظة لا أشوفة ولا أكدر أحضنه ..
بُقى جامد بمكانه عرف الحقيقة قبل لا أنطقها
بصوت واهن ، ضعيف ، هزيل ممزوج بغصة تعل الروح
مورفو: لأن كلبك الليّ ما كدر يحبني فَـداري ..!

يتبع ..

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105