الأشيب الفصل الحادي والعشرون 21 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

ولأن كان أحساسي بفقدة و كُـل الأمور
راح تتغيّر بعد هذا الحديث ما بقيت كلمة كلبي ..
شكان ينتظر مني وهو مقدملي حُب وأهتمام وأحتواء
محرومة منه 12 سنة؟ كيف مُمكن تخيل كلبي ما راح
ينبض أله ؟ أبتعدت عنه عيوني الغرگانة بدموعي
تركزت بملامحة الباهتة ، مصدوم مِـنْ كلامي ..!
فكي يرجف والكلمات تطلع مُبعثرة مني
مورفو: جنت كُـل يوم أحجي وياك وأكلك
نفس الحجاية "فَـدار أني مورفو" جنت أتمنى ولو
يوم وتحد تغلط بأسمها وتحس اللي بحُضنك مورفو
مو عائشة ، أعرف تحبها ولهسه عايش لذكراها بس مو
ذنبي أذا كلبي غدرني هذه المرة ؛ والله حاولت أمنع
نفسي وكلبي وأقنعة أنتَ ما تكدر تحبني محد راح
ياخذ مُكانها بس عاندني وحَبك غضباً عني ..
وشلون ما تريدني أحبك وأني ما عرفت شنو حُب
وأهتمام وحنية إلا يوم عرفتك؟ مِـنْ صُغري يكلولي أنتِ
فراشة المورفو وما حسيت نفسي فراشة صدك بس يمك؛
أني تنخلقلي أجناحات تطيرني مِـنْ أكون بقُربك
وبحُضنك ، أطير مِـنْ أهتمامك وسوالفك.

حضنت وجهي بين كفوف أديه أبجي وكلبي يوجعني ؛
سحب أديه وصار يمسح بدموعي وهو ساكت ،
أرد أحجي وأغص بالكلمة تعلعلت
مورفو: أني وين أروح هسه؟ لا أكدر أبتعد وروحي صارت بيك ولا أكدر أبقى وأتحمل وأنتظر اليوم الليّ تحبني بي وأعرف ما راح يجي أصلاً ، كُلي وين أروح؟

الأشيب: ماكدر احبج هيج حب مورفو اني احسج بنتي شلون تردين احبج كـ زوجتي فهميني ماكدر اتقبل هل شي

مورفو: اعرف والله اعرف بس شبيدي شسوي فهمني والله داتعذب روحي داتحترك شعور الغيرة دايمرد روحي ومن منو اغار؟! من ميت، اكو شعور اغرب من هيج؟!

...خليت ايدي ع حلكي احاول اكتم شهكاتي بس ماكدرت حجيت واني منهاره بالبكاء
:-مستصعبتها حييييل اكون اني الطرف الثالث

مو وحدي أنهاريت حتى هو أنهار مِـنْ فكرة
حُبي أله ما كان متوقع هذا الشي ، دنكت راسي
مورفو: كُـل ليلة جنت أنام وكلبي يوجعني يمكن يجي يوم وراح يوكف مِـنْ صدك ..
- ما سمحلي أكمل كلامي ؛ سد حلكي بسرعة مفرفح
الأشيب: أشش كافي أسكتي ، دمرتيني أكثر مِـنْ ما دمرتي روحج ، تعرفين بيا نار وكعتي أبو شيبة هسه؟ أـخخ منج والله خليتيني أتمنى ميت ولا راجع وسامع هذا كلامج..! ليش مورفو ليش بنياتي أنتِ ليش هيج؟
شلون أوصفلج وجع كلبي واني عرفت بنتـ ..

بنتي تحبني..! كان يريد يحجيها وهمسها
بغصة عكس باقي الكلام ..
ولا مرة بحياتة حبني بغير نية حُب الأب لبنتة ،
حُبه ، أهتمامة ، خوفه ، غيرته كُلهن بدافع الأبوة ..
حرگت روحي وحرگتة ويايه بس شبيدي على
كلبـــي الليّ ضيعنــي ..!
أنعصرت روحي مو بس كلبي بهذهِ اللحظة
زادت رجفتي مِـنْ شفت أنهيارة ورفضة الواضح
بعيونه ، صارت أصوات كثيرة براسي غمضت عيوني
حتى أتخلص منها بس هيهات..!
فقدت حسي بالمُحيط أستسلمت لعالم ثاني ..

* سيماف ..
عشنه حياة هادئة هذه الفترة خصوصاً بعد
ما أنتهت مُهمة الأشيب و زياف ..
كُلشي كان بخير و الأهم مِـنْ هذا مورفو كانت بخير
وكنت فرحانة لأنها كدرت تتأقلم مع أهل الأشيب
وسعيدة لأن حبوها وأحتوها كأنُ وحدة منهم ..
كنت كاعدة مثل كُـل يوم أنتظر رجعة زياف
بس تأخر هذه المرة ، أتصل عليه بس ما يرد
صحيح متعودة عليه يتأخر ويختفي بس دائماً ينطيني
خبر ، وزاد قلقي لأن ما عرفت شي عنه ..
مرت الساعات مثل النار كنت خايفة لا صاير شي
وركضت ناحية الباب مِـنْ سمعت صوت طبكتها
عرفتة رجع ، كان تعبان بشكل لا يوصف زاد خوف كلبي
سيماف: شبيك زياف شصاير؟
- تقدم شمر نفسة بحُضني وبُقى ساكت
لفترة مو قليلة وأبتعد
زياف: مورفو بالمُستشفى
- شهگت خايفة عليها وأني قبل ساعات كنت
أحمِد ربي لأن أستقرت حياتها
سيماف: ليش شبيها؟

زياف: مـحد يعرف شبيها تخربطت واخذوها للمستشفى

سيماف: وشلونها هسه؟!

زياف: مو زينه لان كالو يمكن تدخل بـغيبوبة

أحس أنضربت على راسي شنو بالمُستشفى شنو غيبوبة.!
شوصلها لهذهِ المرحلة مِـنْ الأساس؟ جَر حسرة وكمل كلامة
زياف: والأشيب أوووف يالأشيب راح يموت ناقص عُمر هذا.
سيماف: شبي ؟
زياف: كولي شنو الليّ مابي؟ مرتين يوكع على وجهة ضغطة مقول ومن يصحى يروح يكابل غُرفتها وعيونه دم ، لا يحجي ولا يقبل يفهمنا شصار ، لا هو المرتاح ولا مريحنا
سيماف: اويلي عليهم ، سودة عليَّ مورفو لا أرتاحت ولا أتهنت

زياف: بيج حيل نروح نبقى يمهم لان خالة نسرين هناك ماتقبل ترجع للبيت وتعوفها

سيماف: اي اروح بس اسويلك شي تاكل قبل لا نروح

زياف: لا ما اشتهي راح اسبح لما تجهزين نفسج واخذي وياج ملابس احتياط خاف نبقى هناك لان ماكدر اعوف الأشيب بعد

بعد ما كملنا أمورنا طلعنا مِـنْ البيت متوجهين
للمُستشفى ، طول الطريق كانت عيوني تصُب دموع
مِـنْ قهري على مورفو ، ومن وصلنا زادت أكثر ..
حال الأشيب صُدك يكسر الخاطر ، كاعد يمها
بالغُرفة لازم أيدها وصافن عليها ..
كعدت بجانب خالة نسرين الليّ ما بطلت ونين ونياح عليها
مسدت على كتفها أحاول أهديها بس كانت مُحاولة فاشلة
مني لأن كانت منهارة على مورفو
سيماف: شصار وياها خالة؟ شوصلها لهذه الحالة؟
نسرين: كالو سُكرها هابط هواية ومأثر عليها مدخلها بغيبوبة ما ندري شوكت تكعد منها
سيماف: وشنو السبب الليّ خله سُكرها يهبط لهل درجة فجأة؟!

زادت دموعها ونزلت راسها رافضة تجاوبني
واضح تعرف السبب بس ما حبت تحجي ..
بقت مَرة تبجي ، مَرة تدعيلها تكوم بالســـلامة ..
عزيز كانت عيونة مفضوحة ، واكف يباوع لمورفو
بخوف مِـنْ بعيد والجگارة ما نزلت مِـنْ بين شفايفة..
تقرب عليه زياف طبطب على كتفة متسائل
زياف: ما كعدت؟
- هز راسة بـ لا
عزيز: على نومتها.
زياف: والأشيب شنو وضعة؟
عزيز: رجع صعد ضغطة وتخربط ، ومن شوية صحى ورجع يمها

زياف: ماعرفت شصاير ليش وصلو لهل حالة

عزيز: محد يعرف ليش بس الأشيب

محد قبل يحجي ويكول شصاير والواضح
كُلهم يعرفون السبب الحقيقي بس ما عرفت سبب
تكتمهم على الموضوع .. مَر الوقت ونحن على حالنا
لا كدرنا نقنع الأشيب يرتاح ولا كدرنا نقنع خالة
نسرين تبطل بجي ، ورُفضت ترجع للبيت وتترك مورفو
وحدها قبل لا تصحى .. خلص الليل ومحد مِـنْ
عندنا غمضتلة عين..! كُـل واحد بجهة عايش حزنه
على حالتها الليّ تبجي الصخر ..
توقعناها ليلة صعبة وراح تمُر وتشرق شمس
نهارنا ويا فتحة عيون مورفو بس ما كعدت ..
مَرت يومين وهي غايبة عن الوعيّ ، تمشيت لغُرفتها
أريد أبقى يمها بس أستوقفني كلام الأشيب وياها
الأشيب: أفتحي عيونج أحجي وياج ما أرتاح هيج مورفو

للحظة السعادة غُمرت كلبي توقعتها كعدت
بس خابت أماليّ مِـنْ أنتظرتها تجاوب وما جاوبت ..
تغيّرت نبرة صوتة وطغى عليها الحزن والأسى
الأشيب: بس أكعدي شتردين اسويلج
- ما كدرت ألزم نفسي وما أتدخل ، فتحت الباب
بهدوء بس حس عليَّ ودار وجهة عني
سيماف: ما سويتلها الليّ تريدة وهي صاحية إلا مِـنْ طاحت يلا تريد تسويلها كلشي؟ شصار وياها؟ شوصلها لهذه المرحلة ها؟ تقنعني سُكرها هُبط مِـنْ موضوع عادي لو عركة بسيطة؟ خاف الله بيها أبو شيبة الليّ بين أديك يتيمة وكُلشي ولا قهرة يتيم

ما كدرت أعذره وأقدر حالته واني ما أعرف السبب
وهو والبقية متكتمين محد يقبل يحجي ويكول ليش وكعت
هذه الوكعة ، بدون لا يجاوبني نهض وطلع مِـنْ الغُرفة ..
بُقيت كاعدة يمها أني بس هو ما تأخر ورجع بأيدة قُرآن
تصرف وكأنُ أني ما موجودة ، كعد بجانبها يمسد
على راسها وبالأيد الثانية لازم القرآن ويقرأ ..
صُعبت حالتة أكثر وأكثر مِـنْ طالت نومتها
مُضت 4 أيام وهي ما كعدت وفوك ضيمة والقهر
كُلها صارت تحجي عليه وتلومة وهو ساكت
حتى خالة نسرين الحنينة الليّ ما تنطي هم صارت تلومة
نسرين: ليل ونهار أوصيك على كليبها ليش هيج يُمة ليش؟

بُقى ساكت ومدنك راسة ، و مِـنْ يبتعد زياف
يزعل ويدردم على البقية ليش يلومونه؟
زياف: شايفين وكت هيج حجي بهذا حالة؟ كلها تلومة بس محد سألة شحال كلبة هو ليش مو بشر؟
نسرين: يُمة طفيلة يتيمة شنو ذنبها تعيش هيج حياة؟ شنو الشي الصعب الليّ رادته؟ شنو الشي الليّ يسوى تنام هاي النومة مِـنْ وراه؟
زياف: وأبو شيبة ما مقصر وياها بشي وأنتِ اكثر بشر تعرفين هذا الشي خالة ، ليش تحرگين روحة وتعذبينة فوك عذابة؟ مو زين واكف على حيلة لو نسيتي طيحاتة أول يومين؟ انتو ما تخافون عليها أكثر منه

تدخل عزيز وزاد النار حطب
عزيز: وشمدريك ما هو سبب نومتها هذه؟
زياف: والله عاد رجال وزوجتة ينيمها بالمُستشفى ينومها بالنجف أنتَ ما يخُصك

أنصدمت مِـنْ رد زياف ونبرتة ويا عزيز..!
شكد تصير مشاكل بين الأشيب وعزيز بس يبقى
زياف يعاملهم بود وطيبة ما يدخل نفسة بس هذه
المرة ما كدر يسكت .. راد يحجي عزيز وتدخل روار
يهدي الأمور حتى لا تصير مُشكلة
روار: كلام زياف صح ، صحيح كُلنا نحبها بس محد راح يخاف عليها بكُثر الأشيب
عزيز: عايش الدور أكثر مِـنْ صاحبة ، اني وأنتَ والعشيرة كلها تعرف سبب هذا الزواج ، وتريد احجيلك سبب نومتها هنا حتى اشوفك الليّ يخاف عليها شنو؟
روار: كافي عزيز

عزيز دفع أيد روار عنه وهو عينه على زياف يباوعلة
بغضب ، تركهم وطلع مِـنْ المُستشفى والأمور صارت
تتعقد أكثر كُـل ما طالت نومتها ..
وطول هذهِ الأيام ورغم كُـل الكلام الليّ سمعة الأشيب
والعتب واللوم ما نطق ولا حرف وكان ملتزم الصمت ..
باليوم الخامس وبين ما نحن ننتظرها تكعد
طلع الأشيب مِـنْ غُرفتها يركض وواضح مِـنْ ملامحة
المنغمسة بفرح الأخبار تبشر بخير ، باوع لزياف بِبهجة
الأشيب: دا تفتح بعيونها صيح للدكتور بسرعة

ركض زياف لغُرفة الدكتور وأحْنا دخلنا عليها
كانت تفتح بعيونها وتغلقهن ما واعية على نفسها ..
مِـنْ دخل الدكتور والممرضين الليّ وياه طلعونا كُلنا ،
مَرت فترة دقايق وطلع بشرنة "مورفو كعدت وصحتها زينة".
تشكرو منه والأشيب أندار علينا بعد ما أبتعد الدكتور
الأشيب: أدخلو شوفوها
زياف: وأنتَ؟
- ما جاوبة وأندار على خالة نسرين
الأشيب: روحي يُمة شوفيها هسه تدور علينا

بدون ما تناقشة خالة نسرين دخلت بسُرعة لأن كانت متلهفة حتى تشوفها صاحية ، كُلنا دخلنا وراها إلا الأشيب بُقى برة وعينة عليها يباوعلها مِـنْ الشُباك ..
كانت مورفو مغمضة عيونها مِـنْ سمعت صوت خالة نسرين فتحتهن بتعب ، أبتسمت وهمست
مورفو: ها عزيزة كلبي
- تحجي وياها بحجايات الأشيب ، بجت خالة نسرين بصوت عالي وتقدمت حضنت راسها
نسرين: أنتِ عزيزة كلبي وروحي ، أنتِ بنيتي الليّ ما شالتها بطني ولج يُمة ليش هيج تخوفيني عليج

مورفو: شوية خالة خنكتيني

ابتعدت خالة نسرين تضحك وتبجي ومورفو رُفعت
أديها مرة ثانية ناحية نسرين مبتسمة
مورفو: اشاقيج احضنيني بعد محتاجتج

* مورفو..
رجعت حُضنتني وأحس ما أريد أبتعد مِـنْ يمها ،
أبتعدت تباوعلي بفرح وتمسد على راسي بحنية
أفترت عيوني بالغُرفة تدور على أشيبي بس ما كان
وياهم ، كان بالخارج خلف الشُباك وعيونه متركزة عليَّ
أبتسمت بس بُقى بدون ردة فعل ، أنداريت على
خالة نسرين طالبة منها تحجي وياه
مورفو: خلي يجيني خالة

هزت راسها بأيجابية ونهضت من جانبي
سيماف تقربت طبعت بوسة على راسي وتحمدتلي
على السلامة و زياف و روار وبُقيت بس أوزع أبتسامات ،
طلعو كُلهم وأني عيني على الأشيب ، بعد ما حجت
وياه خالة نسرين يلا أجاني يشوفني ..
أبتسمت أريد أنسي كُـل الصار ما أريده يتذكر
بس غصتي كانت مفضوحة
مورفو: هــا فدعوس
- تقرب مني طابع بوسة على راسي بقوة
وكعد بجانبي سحب أيدي باس باطنها بس ما
نطق ولا حرف ، ندستة أكثر مِـنْ مرة مِـنْ أيدة
مورفو: هاي منو مطفيك؟ شلون تشتغل؟

رجع يمسد على راسي وملامحة مغيمة
الأشيب: شلونها بنياتي؟
مورفو: زينة بس أحس جوعانة
الأشيب: أدري بيج ووصيتلج على أكل

مورفو: اريد اطلع منا هم

الأشيب: كم ساعه ونطلع تحملي

هزيت راسي بأيجابية ورُغم ما كان عندي شي
أحجي هو هم ما بادر بشي وألتزم الصمت ، وأذا
بُقينا هيج راح تزيد الفجوة بيناتنا
مورفو: شكلك كنافة أم الجبن أنتَ وضايج

...دنك راسه وطول بـ سكوته واردف بصوت مخنوك
:-ميت اني مو ضايج

مورفو: ليش فَداري

الأشيب: شلون ارتاح وأنتِ متأذية بـسببي؟!

...ابتسمت وجاوبته بهدوء
:-راح انتظر ليلة القدر وراح اطلب تتغير اقدارنة ونرتاح اني وياك

الأشيب: واذا ما تغيرت؟!

مورفو: وقتها راح ينبتر جناحي مو بس ينكسر

الأشيب: داتعذبيني بـ كلامج صبا

مورفو: روح صبا انتَ

...عصر ايدي بقوة وعاض ع شفته يحاول يخفي غصته بـ الكلام ابتسمت واردفت
:-لـتضوج فدعوس ارجع مثل قبل والله ماراح احسسك بشي ولا راح اتغير بشي راح ابقى بنياتك الخبلة الي تحب خبالاتها

قطع حديثنا دكة الباب ، كان زياف جايب أكل
أخذه منه الأشيب ورجعلي ، ساعدني أكعد عدل
الأشيب: تاكلين مِـنْ أيدي؟
مورفو: اي

صار يسويليّ لفات صغار ويخلي بحلگي
وبعد كُـل لُگمة يحجي شي "عافيات، صحة، الف عافية"
يجبرني أبتسم على كلامة ، بعد ما كملت هو غسل
أيدة بماي ومسح حلكي .. طلع مِـنْ يمي كمل
أجراءات الخروج وطلعنا للبيت .
أستقبلوني كُـل الليّ موجودين بالبيت أشد أستقبال
فرحانين برجعتي وبصحتي الليّ تحسنت ..
أترخص منهم حتى أصعد أنام بغُرفتي أرتاح ،
وهو كان يمشي بجانبي لازم أيدي ، مِـنْ وصلنا للغُرفة
غيرت أتجاه خطواتي ناحية غُرفتي القديمة
صاح وراية الأشيب متفاجئ
الأشيب: وين مورفو؟
مورفو: خليني بغُرفتي أفضل إلي وألك

بُقى ساكت رُغم الرفض الليّ شفته بعيونه
بس بُقيت مُصرة على قراري..
ومُضت الأيام وأني عايشة بهدوء مُميت ما عندي
قابلية حتى على الكلام وبُقيت بس أبتسم بوجه كُـل
الليّ يحجون وياية ، كعدت يمي وردة حاضنتني مِـنْ أكتافي
وردة: أحسج مو مورفو مِـنْ ساكتة ، هوسي عيطي عاركيني على أمي هم قابلة بس لا تبقين ساكتة.
مورفو: أخذي حذرج مني منا وهيج أحاربج على خالة نسرين
وردة: موافقة وعلـي موافقة بس هزي طولج ولسانج

ضليت أضحك على سوالفها وهي ما تركتني
إلا مِـنْ غيرتلي نفسيتي فعلاً ..
باليـوم الرابع بعد خروجي مِـنْ المُستشفى أترخصت
منهم مِـنْ وقت وصعدت لغُرفتي حتى أنام
أجة وراية عزيز مستوقفني عند نهاية الدرج
عزيز: تريدين تنامين صُدك؟
مورفو: أي
عزيز: تطلعين؟
- أنداريت عليه مستغربة وهو شُبه توتر
عزيز: يعني أفرفرج بالسيارة ، مو تحبين هيج طلعات؟
مورفو: بس تعبانة ونعسانة
- درت وجهي مكملة طريقي ورجع صاح
عزيز: نعسانة لو ما تردين تطلعين وياية؟
- رُمقتة بنظرة أخيرة
مورفو: أثنينهن عزيز

تركتة ودخلت غُرفتي ، شمرت نفسي بفراشي
غركانة بنومة عميقة ..
ما أعرف شكد نمت وحسيت على نفسي أنشاليت
مِـنْ فراشي ، فتحت عيوني بنعاس كان الأشيب
شايلني بين أديه يريد يطلع بيه مِـنْ الغُرفة
مورفو: شبيك؟
الأشيب: مدا أكدر أنام بدونج
مورفو: بس أني ما أريد أنام يمك
الأشيب: تقبليها لعد صار 3 أيام عيوني ما شايفة النوم؟
مورفو: ليش؟

سكت لما دخلنا غُرفتة ، نيمني على السرير ورجع
هو بسُرعة سد الباب وطفى الأضوية وأجة يمي
سحبني لحُضنه مثل قبـــل
الأشيب: ليش؟ لأن ما أكدر بدونج تعودت عليج ، أذا ما ثُكلج يتعب ذراعي وعطر شعرج يملي ريتي ما أرتاح
مورفو: بس أنتَ متعرف اني مورفو من تنام ، خليني أتعود بدونك فدعوس

الأشيب: من يموت فدعوس تعودي عود

مورفو: هيج داتعذبني

الأشيب: متعذب وياج

مورفو: اريد ارتاح

شدني عليه ضامني بعُمق حُضنه وهمس
الأشيب: خليج يمي مورفو

مورفو: لـتجبر نفسك ع شي فَدار

الأشيب: مدا اجبرها ع شي كل الي اريده بنياتي بـحضني، قطعه من روحي صرتي تعودت عليج شلون بيه

مورفو: راح تبقى تعتبرني بـنياتك مو

الأشيب: والله غير هيج ماكدر مورفو

...رفع راسه يباوعلي وكال
:-فهميني شسوي الحيرة اكلت روحي اكل اول مره بـحياتي اصير بهل عجز

مورفو: ما طلبت منك شي اني

الأشيب: اريد اسعدج اريدج تعيشين مرتاحه اريد اشوف ضحكة طير الشوك الترد الروح مثل قبل، ماريد اشوف الضحكه المكسورة ومليانه حزن

مورفو: كتلك خليها مدفونه بـكلبي اذا طلعت تعذبني

الأشيب: اذا بقت بـكلبج هم راح تتعذبين

مورفو: راح اتعذب وحدي مو اني وياك

الأشيب: شسوي بـ الراحه وانتي متعذبة

مورفو: عوفني اروح لعد

الأشيب: ماكدر

مورفو: والـحل

بُقى ساكت لأن ماكو "حَـل"
الحيرة كانت مستوطنة عيونة ؛ حركت نفسي حاشرة
نفسي بحُضنة أكثر وهو شدد قبضتة وضل يلعب بشعري لما غُفيت ، كان المفروض نعيش طبيعي مثل أول بس هو كُـل نظراتة كان ينظرها إلي بحسرة وحزن عكسي أحاول أخفي كلشي بداخلي وأعيش وياه طبيعي ..
أتصلت عليه بيوم مِـنْ تأخر الوقت وهو ما راجع
مورفو: وينك فدعوس؟ مديح بنياتك لحد هسه متكول هذه وين تنام؟
- ضحك وأحسة يمشي بخطوات سريعة
الأشيب: خلِ تنزل بنياتي للمُطبخ تشبع كرشها وأني جايها.

غلقتة منه ونزلت للمُطبخ كانت بحدود الـ3 بالليل ،
طلعت أكل وخليت سُماعات لأذني وكعدت أكل
فاصلة عن العالم ؛ بعد مُدة حسيت السُماعة أنسحبت
مِـنْ أذني ، رُفعت راسي بسُرعة فازة .. كان عزيز مبتسم
عزيز: البيت يحترك وأنتِ ما تدرين
- خليت لگمة بحلكي وجاوبتة بعدم مُبالاة
مورفو: هسه وأذا أحترك شراح أسويلة؟ أحِل أربُط؟
عزيز: تعيطيّن وتفزعين الناس علينا تساعدنا
مورفو: على الجايات لعد

سحب الكُرسي وكعد مُقابيلي
عزيز: شلون صرتي؟

مورفو: عال العال

عزيز: ماتنطيني اكل وياج

مورفو: چؤ تعبت بيهن

ضحك ساند أديه على الطاولة
عزيز: وراح تخلصيهن كُلهن؟

مورفو: اي قابل نمونه هنه صاجيات ثنين ونص كيس فنكر وقوطيتين ببسي وبعد اكو وراهن حلويات

عزيز: الف عافية اذا ما شبعنج اجيبلج بعد

مورفو: أشتهيت حمُص بطحينة تعرف تسويّ؟

عزيز: احد كلج اني منال العالم

مورفو: حرامات اني اعرف بس مابيه حيل

عزيز: باجر اجيبلج

مورفو: چؤ فَدار يجيبلي

ما علق على الموضوع وغيره
عزيز: شو كاعدة لحد هسه؟ تنامين مِـنْ وقت أنتِ

مورفو: انتظر فَدار لسه مارجع

عزيز: شعجب شعندة بهل ليل

مورفو: ماعرف كال اتأخر ولسه ماكو

عزيز: اتصلتي عليه

مورفو: اي كال فد شوية واجي

سكت وبُقى صافن بوجهي لفترة طويلة قلقني
مورفو: شبيك؟

عزيز: احسج مو بخير

مورفو: اي نفس حالتك

عزيز: شلون يعني؟!

مورفو: انت هم مو بخير مو؟!

ولأن فهم قصدي سكت ما جاوبني ، أبتسمت مسترسلة
مورفو: متعذب لأن كلبك يريدني
- قاطعني يحجي بحسرة
عزيز: كُلني أريدج مو بس كلبي

مورفو: ومورفو تريد الأشيب

عزيز: تتعمدين تحركين كلبي؟!

مورفو: چؤ داكلك بس حتى لا تفكر اني مرتاحه

عزيز: تمرضتي بـسببه

مورفو: لا بـسبب كلبي العنودي

عزيز: ماراح يحبج

مورفو: ولا اني راح احبك

..ضحك بقهر وفرك وجهه وكال
:-راح تضيعين الاشيب وتضيعين نفسج وتضيعيني

مورفو: تكدر تنساني؟!

عزيز: استوطنتي بـ عقلي قبل كلبي

مورفو: يعني متكدر مو

عزيز: ومستحيل اكدر بـيوم، يمكن اكدر اتعايش واتقبل بس انسى لا مستحيل

...ميلت راسي واردفت بابتسامه
:-واني هم هيج عزوز مو بيدي

دار وجهة عني كاز على أسنانة بقوة
حاولت أشرحلة مغزى كلامي
مورفو: مدا أحجي هيج حتى أعذبك لو أقهرك والله ،
بس أريدك تفهمني لأن عايشين نفس الشعور أني وياك.
- نهض يريد يطلع بس أتراجع خطوة
تقرب مني مدنك راسة يم أذني وهمس
عزيز: جَعل محد يكلي "عزوز" بعدج يا روح عزوز أنتِ

أبتسمت بقهر على كلامة عصرني كلبي بألم
مِـنْ سمعها .. يحجيها بوجع ملحوظ ،
تركني وطلع وأني رجعت السُماعات لأذني مكملة
أكلي ، أحاول ما أفكر بأي شي يصير وصار ..
مَرت نُص ساعة تقريباً وأنفتحت الباب ، دخل أشيب
روحي مبتسم مِـنْ لمحني كاعدة ، نهضت مِـنْ مكاني
أتمشى ناحيتة وأغني بعد أنقطاع أيام عن هيج أستقبال..
بعد ما خلصت أغنيتي ضحك وسحبني لحُضنة
الأشيب: أروح فدوة وأرجع نذر للبنيات الحلوات الليّ ينتظرني

...ابتعدت عنه واردفت بضحكه واني افتح اديه
:-اشتاقيتلك هالكثر

...فتح اديه مثلي وكال
:-واني اكثر من الـ هالكثر بـ هالكثر

ضحكت بصوت عالي وأني أحلفلة أني أكثر،
تمشينا مع بعض ناحية الدرج قاصدين غُرفتنا
مورفو: جوعان أسويلك أكل؟
الأشيب: لا ما جوعان ، بس أريد أسبح وأنام ميت تعب

...وكفت ع بداية الدرج ورفعت اديه
:-شيلني لعد

...ضيك عيونه عليه وكال
:-هاي لان كتلج تعبان ترديني اشيلج

رفعت اكتافي بعناد
مورفو: ما عليَّ شيلني تعبانة ما أكدر اصعد الدرج

الأشيب: ومن شنو تعبانه

مورفو: من الأكل صار ساعه اكل وتعبت

...ضحك وشالني ع كتفه وصعد يركض الدرج بيه نزلني بباب الغرفه وكال
:-يهون التعب كله لـ خاطر عيونك طير كلبي انت

مورفو: وانت الممنون فدعوسي

الأشيب: اي وعلي

دخلنا الغُرفة هو راح يسبح واني نمت بمكاني
نايمة على بطني أنتظرة يطلع حتى أكلة سويلي مساج
لظهري ، هو ما تأخر وطلع ينشف بشعرة بسرعة
بس يريد يكمل حتى يشمر نفسة لفراشة وينام ..
ندستة بخفة مأشرتلة على ظهري
مورفو: سويلي مساج
الأشيب: مساجيش؟
مورفو: ظهري ظهري يوجعني يريد مساج

مد ايد وحدة يسوي مساج بهدوء
الأشيب: ومن شنو تعبان ظهرج؟

مورفو: من الاكل تعبت واني اكل

الأشيب: منيلج هاي لواته

مورفو: اشوفك ممصدكني شو

الأشيب: ترا جنتي تاكلين مو تحاربين

دفعت أيدة عني وكعدت على حيلي متربعة
كدامة وخازرتة ، هو ضحك
مورفو: كول ما أريد أسويلج مساج
الأشيب: ليش مو دا أسوي؟

مورفو: اي من ورة خشمك بس

الأشيب: لا والله شبيج

مورفو: انت شبيك فَدار

الأشيب: اخاف من تكولين هاي الجملة معناها اكو هجوم وراها

مورفو: شو صاير ما يعجبك شي

الأشيب: والقرآن عاجبني

ابتسمت أباوعلة بطرف عيني وهو سحبني
لحُضنه حتى ننام ..
مورفو: فَـداري أحجيلك لو تريد تنام
الأشيب: أحجيلي
- حجيتلة كُـل الحديث الليّ دار بيني وبين عزيز
الأشيب: ما مجبورة تبررين لعزيز ليش ما تحبينه.
مورفو: لعد أنتَ ليش بررتلي؟
الأشيب: لأن أنتَ عزيزة على كلبي
مورفو: وهو هم يعتبرني عزيزة على كلبة
الأشيب: وأنتِ شتعتبرينة؟

مورفو: مو مهم بس المهم انو حبيت اوضحله هل شي حتى لا يبقى يتأمل شي مني

الأشيب: ماحب تحجين بـهل موضوع وي عزيز

مورفو: اعرف ماتحب واعرف غلط ومايصير واعرف هم انت ساكت ومتحمل لـخاطري بس انقهر من اشوفه هيج متأمل

باس راسي وهمس بهدوء "تهون ان شاء الله"
وهيج مُضت الأيام بهدوء مُميت ، عزيز قَل تواجدة
بالبيت بسبب شُغلة ، والأشيب نفس الحالة
يطلع مِـنْ الصبح ما يرجع للمغرب أو الليل ..
أني رجعت أضيع وقتي بالرسم ومرات نكعد
أني وتبارك نرسم أو أعلمها الأحرف ..
أجت كعدت يمنا خالة نسرين شايلة ماعون فواكة
نسرين: أجيت يم بناتي الحلوات حتى يشاركني بالأكل
تبارك: اني مولفو بناتج؟
نسرين: أي أنتِ ومورفو ووردة هم روحي صيحيلها

ركضت تبارك لغُرفة وردة حتى تصيحلها
وخالة نسرين تقطع فواكهه وتنطيني
نسرين: شلون صرتي؟
مورفو: كُلش زينة أني
نسرين: لا تقهرين روحج مورفو ، ما يصير غير الليّ كاتبة ربج بس الأمور تحتاج صبر
مورفو: والنعم بالله ، ما ردت شي خالة لا قبل ولا هسه ولا بعدين

سكتت مِـنْ أجت وردة وتبارك يتراكضن
وردة: شلونك الأورنج

مورفو: حبيب كلبي الغالي ع راسي

ورده: تاج راسي وراس روار

...عاط روار وهو نازل من الدرج
:-قندره ع راسج

ورده: شبيك يمعووووود

مورفو: شكوووو تصيحين يمعووووده

روار: عبالها أطـــــــرش
مورفو: فريد الأطرش

روار: شكد قديمة وأيع

ورده: ابو القوووووق عزيزي شبيك ويانه اليوم ما عاجبينك

كعد بجانبنة رافع حاجبة فعلاً
روار: رافع حاجبة ومحد عاجبة

مورفو: شكد دسكاستنننننننننك

روار: انجبي لج أنتِ منو وتغلطين عليه

مورفو: وانت شمدريك هاي غلطة

روار: لعد شني؟!

مورفو: غلطه بالانكليزي هههههههههههههههه

روار: غير تستقر الملونة

صاحت بينا تبارك منزعجة
تبارك: أصواتكم لو سمحتو أليد أصول
- توجهت لغُرفتهم وروار هز أيدة
روار: طاح حظج وحظ الملونة وياج

مورفو: شبيك ويايه اليوم

روار: مابيه مشتاق لسوالفج لخايسة صايره عاقلة بروسنه

مورفو: راجعه وبقوة

ورده: ادفري الباب برجلج اليسرة وفوتي

روار: تعالي يمي اشوفج شي

مورفو: تعال انت يمي

روار: اني الليّ اشوفج يول

نهضت مِـنْ مكاني كاعدة بجانبة بعد
ما أترخصت مِـنْ خالة نسرين ..
فتح تلفونة مطلع صورة ولد مكسور فگة ومخلين
أجهزة حديدة مداير راسة ، حواليّن عيونة متصبغ
لون بنفسجي ؛ عگدت حاجبي مستغربة
مورفو: منو هذا؟

روار: بندر كسر فكه الأشيب

شهگت بصدمة ما توقعت فعلاً يأذي
مورفو: شلون كسرة عـــزة..!
روار: شغلتة هذه شعلينا شلون
مورفو: بس ليش أحس لا مو لهل درجة
روار: صح يستاهل أكثر والله لأن خسيس ، شتردين منه يسويلة؟ يصفكلة ويبوس راسة وهو بنص بيتة يتحرش بمرتة؟ ومو أي تحرش مورفو ، ترة الليّ صار ما ينسكت عليه ولأن عمتي أحْنا سكتنا وأكتفى الأشيب بهذا الشي.

بُقيت ساكتة كلامة منطقي
روار: بس دا أشوفج الأشيب شممكن يسوي علمودج
- أبتسمت وهو عدل ياخة التشيرت
روار: والله وكفو مِـنْ أخوية الزود

ورده: استودعكم بـ الله

روار: وين مولية

ورده: مشاغيل عزيزي

ما علقت على الموضوع واضح عدها خبر قبلي وكُلهم يعرفون وما همهم أمره ويحسوه يستاهل ، تركتنا وراحت وروار أندار عليَّ
روار: ليش ذبلان الحلو؟

مورفو: بايع المستحه ومخلص انت

روار: شبيج يمعوده لو مزوج اني جان هسه مزوجج ابني

مورفو: خوش تزوج لعد

روار: شبيها العزوبية تبزز

مورفو: شتكول انت

روار: صدك تبزز

مورفو: صريح
روار: محد يوصل لـ صراحتج ترة

مورفو: احسن ماحب اضم حجاية بـكلبي اتعب

روار: شلون تتعبين

مورفو: اذا اجت حجايه ع بالي وضميتها راح ابقى افكر بيها ومن ابقى افكر اتعب نفسيا فـ احجيها وارتاح

روار: وهو الصح بس داشوفج ممرتاحه هل ايام

مورفو: اي واكعه بـ العشك

روار: ومنو هذا تعيس الحظ

مورفو: شو ادبسزز انت

روار: والعباس ما حجيت شي شبيج

مورفو: ولك غير اني زوجه اخوك شنو منو بعد

روار: ها صدك اي والله نسيت اي كملي وليش ممرتاحه

مورفو: شعليك اوي

روار: دحجي فضفضي ترتاحين

...باوعت عليه وغنيت بابتسامه
:- احبه ومايحس بيه
اكله يكلي شعلية
يكسر كلبي يوميه
شمسويله ما ادري

ضحك بصوت عالي يفزز الميتين بعد ما خلصت
أغنيتي وصاح
روار: حقج ما ألومج لعد

كان الحديث ويا روار كُل غيّر يجبرك ترتاح
وتنطلق وتطلع كُـل الكلام الليّ بداخلك بدون تردد ..
أخذ نفس عميـــق بعد ما هدأ مِـنْ نوبة الضحك
روار: ما أعرف أذا الليّ راح أحجي يفيدج أو لا ؛ بس أحمدي الله وأشكُري هو بخير وكذام عينج ، تكدرين تشوفينه وتحجين وتضحكين وياه ، غيرج محروم مِـنْ كُـل هذا ، غيرج يتحسر على نظرة وضحكة وكلمة حتى لو عادية .

مورفو: صعبة حرت وحتاريت ماعرف شلون اتصرف يوجعني كلبي من قربة ويوجعني اكثر مجرد افكر ابتعد

روار: راح يـجي يوم ويـحبج والله بس اصبري عليه بعده كلبة ينزف ع الراح

مورفو: واني كلبي داينزف عليه هو وموجود

روار: حاولي توقفين نزف كلبه وراح يوكف نزيف كلبج

ابتسمت وهزيت راسي بأيجابية
مورفو: الله كريم

روار: عفية الشطورة

مورفو: وانت؟!

روار: شبية اني

مورفو: ع منو ينزف كلبك

...باوعلي وحجه بغصه
:-اني كلبي دفنته بـ النجف ويه قُدسي

يتبع ..

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105