الأشيب الفصل الثالث والعشرون 23 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

ما أبالغ أذا أكول كرهت حياتي بسببة هذه الفترة..!
أنسان متناقض لا مفتهم نفسه شيريد ولا مفتهمني ، شنو كان يتوقع مِـنْ بنت مثل حالتي "وحيدة عايشة حياتها بتعاسة بعيد عن حضن أمها وأبوها فاقدة لشي أسمه حُب وحنية" غير أنُ تحبة؟
ودفنت هذا الحُب بكلبي وسكتت حتى ما أخلي علاقتنا تتأثر وجبرني أحجي وأعترف ومن أعترفت رفضني وحطمني ، ووكفت عند هذهِ النقطة؟ أكيــــد لا ..
أبتعدت مِـنْ شفت الرفض بعيونه وبأيده رجعني لحضنه بحجة أتعود عليَّ وما يكدر بدوني ودست على كلبي وبقيت مثل ما أني أجاهد حتى أكون طبيعية وياه ومن شاف الأمور تمام رجعت مثل قبل صار يبتعد ويحاول يبعدنــــي..!
ومع ذلك أبتعدت بدون أي مشاكل وهوسة وكنت أعاملة بكل أحترام وطيب وودّ لأن مُستحيل أنكر فضلة عليَّ ..
وبعدها شصار؟ مِـنْ أبتعدت مورفو وأستقرت نفسياً متقبلة كُـل الأمور قرر يتزوج.! شنو السبب هل فعلاً يريد يستقر مع أنسانة ناضجة مو طفولية مثلي؟ لو لأن يريد يثير غيرتي؟ لو حتى أطلعة مِـنْ عقلي وكلبي مثل ما يريد؟ لو شنو السبب الحقيقي؟
وصلت حدها فعلاً ، زهگت وطلعت الدنيا مِـنْ عيني بسبب تصرفاتة الليّ بدون مُبرر .. والحل الأفضل كان الطـــــلاق..
مورفو: أني هم بشر فَـدار بدون ما راح أذكرلك أسباب بس أكلك أذا فعلاً تحبني خلص أنهي كلشي وطلگنــي.

بُقى يباوعلي مصدوم مِـنْ كلامي وطلبي الليّ ما توقعة مني ، بلع ريگة حاير وسأل بنبرة طاغي عليها القهر
الأشيب: ليش تسوين هيج مورفو؟
- نهضت مِـنْ مكاني اريد اطلع وجاوبتة
مورفو: هذا الموجود فَـدار ، تريد تتزوج طلگني ما تطلگني ما تتزوج
- نهض بحركة سريعة لازمني مِـنْ أيدي مرجعني عليه
الأشيب: وأذا تزوجت بدون ما أطلك شراح تسوين؟

مورفو: لا هاي ماراح اكلك عليها جرب وشوف شراح اسوي

الأشيب: تهديد هذا لو شنو

مورفو: شتريد تعتبره اعتبره بس وغلاتك بـكلبي راح اخليك تبجي دم عمرك كله راح اخليك تتحسر ع الموت وما تموت

كنت أحجي وياه بهدوء يوضح مدى جدية كلامي وصدق تهديدي ، مِـنْ ملامحة الليّ تغيّرت وضح لأي درجة وصلت عصبيتة ، سحبت أيدي منه وكملت طريقي وهو صاح بقهر
الأشيب: لج ليــــش تكسرين كلبـــي هيـــج؟

مورفو: اكو لزكات بالمجر فَداري

أكسر كلبة لأن طلبت أبتعد عنه وأتطلك بس هو يتزوج عادي مورفو ما راح ينكسر كلبها.! لأن حسب توقعهم كلوب الأناث مِـنْ حجر..
طلعت مِـنْ يمة وركعت الباب بقوة ، دخلت غُرفتي صايرة نار أريد أحترك وحدي بس محد أنطاني مجال ، عزيز كاعد ينتظرني بغرفتي .. ينتظر أخلص عركتي يم الأشيب حتى يستغل فترة كسرتي.! توجهت للكنتور أطلع ملابس وسبقتة بالكلام
مورفو: ما أريد أحجي عزيز عوفني وحدي رجاءً

عزيز: شبيج

مورفو: مابيه بس عوفني

ما كنت أريد شي من الكنتور بس كنت اريد أوضحلة أنشغالي حتى يعوفني بحال سبيلي ، بس ما تركني وحاول يكلمني بعد ما أخذ نفس عميق
عزيز: مورفو
- أنداريت عليه بدون مقدمات ونترت بي
مورفو: عزيز يعني إلا أسمعك حجاية تكسر كلبك يلا ترتاح؟ دا أكلك ما أريد أحجي عوفني بحالي

عزيز: اذا الكلام الي راح يكسر كلبي ترتاحين بي احجي واكسري يفداج

مورفو: اطلع برا لعد

عزيز: كتلج ماراح يحبج لا تضيعين نفسج ورا

مورفو: اني هم كتلك ماراح احبك ليش داتضيع نفسك ورايه؟!

عزيز: تمونين ع كلبي

مورفو: وهو يمون ع كلبي

يمون على كلبي الليّ حطمة؟ أوف منج ومن فطاريتج مورفو.. وهسه حطمت كلب أنسان ثاني بدون ذنب ، أبتسمت بقهر وأحس أريد أشمر نفسي مِـنْ أعلى جبل على وجه الكرة الأرضية
مورفو: أرتاحيت هسه مو؟ جبرتني أحجي شي ما أريد أحجيه وقهرتك وهسه لازم أتحمل ذنب كلبك المكسور بسبب حجايتي أرتاحيـــــــت؟

عزيز: لا تسوين هيج مورفو

مورفو: اطلع برااااااااا هسه صارت حلوة مورفو عمرها كله عاشته من ايد لايد محد بحالها ولا أحد يحبها، ليش من تعودت ع حياتييييي طلعتولي انتوووو لك شوكت ارتاح فهمني شووووكت

عزيز: شمسوووويلج اني مورفو

مورفو: ليش ما يكفي شايلة ذنب كسرة كلبك ماتعرف شكبرهااااا عند رب العالميييييين لو شنووووو

رغم حزن كلبة وكسرتة حاول يبررليّ
عزيز: ما متقصدة أنتِ ومو ذنبج اذا كلبج ما يحبني لا تفكرين هيج

مورفو: وهسه شنو ماراح تطلع

أعتذر وطلع من الغُرفة ، كعدت على الكرويتة مهدود حيلي ما أعرف شسوي وشتصرف.! وأذا تطلگت وين أروح؟ رجعت أحس بشعور الضياع الليّ كنت عايشة بيّ .. غريبة بدون أهل بدون ديرة ووطــــن .. صرت أحس نفسي عبئ وعالة على الكل ، وأتمنيت ميتة ولا عايشة هذا الشعور .
حضنت نفسي وحيدة بين اربع حياطين ما واساني غير دموعي وصوتي الواهن الليّ يتردد صداه بهذهِ الغرفة مُناجين ربنا
مورفو: ربيّ أنتَ أعلم بحالي وضياعي ، أغمرني بعُطفك وحنانك هَـد حيلي التعب والغُربة

شكد بجيت بهذه الليلة وشكد دعيت ربي يعفيني مِـنْ هذا الأبتلاء أحس نفذت طاقتي ومو كد أي أختبار ..
و مِـنْ بين ألف فكرة أجت على بالي رسى عقلي على فكرة وحدة تحرك كلب الأشيب مثل ما حرك كلبي وبهذل حالي بدون سبب..
كعدت ثانـي يوم العصر نزلت جوة كانو الأغلبية موجودين ، سلمت ودخلت للمُطبخ أريد أكل شي .. دخل وراية عزيز أشرلي على الفـــرن
عزيز: جبتلج أكل خليتة هنا حتى لا يبرد

أني هم ما كلت لا ، طلعتة مِـنْ الفرن وكعدت بالمُطبخ أكل بعد ما تشكرت منه ، كان المفروض يرجع لمكانة بس هو بُقى واكف عند الباب وعينه عليَّ مراقب أبسط حركة تصدر مني ..
دخـل روار بدون ما يهتم لعزيز صاح بصوت فوضوي محاول يخلق جَوّ يزيح التوتر الليّ عايشين بي
روار: الملونة ما نزلت على الغدة تريد أدللها بلفة ....

سكت مِـنْ لاحظ الأكل كدامي وسأل مستغرب
روار: عندج مصباح علاء الدين السحري؟
مورفو: أي تريد أطلعلك شي؟
روار: يصير تنطينياه نتفاهم أني وياه بالغرفة وأرجعلجياه
مورفو: لا ما يسمع كلام أحد بس مني

أندار على عزيز ورجع باوعلي وفهم مصدر الأكل منين ، وواضح روار ما أجة مِـنْ ذاتة وأكو مِـنْ دزة حتى يتطمن عني أذا أكلت أو لا عرفتوه مو؟ أي أبو شيبة المتناقض حتى مع نفسه ..
كعد بجانبي روار في سبيل ما نبقى أني وعزيز وحدنا
روار: عندي إلج عرض ما يتفوت ، عازمجن على عشاء شنو رأيج؟
مورفو: موافقة
روار: بهل سرعة؟ كولي يا الله
مورفو: والله موافقة ومابيها تراجع بعد

ضحك وبُقى كاعد يمي ، عزيز أبتسم عينه على روار وطلع مِـنْ المُطبخ ، بعدني أكل وأجت خالة نسرين كعدت يمنة وحاولت شكد ما أكدر أبقى على طبعي المرح وما أبين حزني لأحد ..
وهذا الشي قلقلهم أكثـر وبالأخص الأشيب ، مِـنْ شافني النهار كله متجاهلتة ما أتحمل وتقرب مني أيده تتحس وجهي
الأشيب: وجهج ذبلان مريضة؟ يوجعج شي؟

أبتعدت مِـنْ يمة بدون لا أجاوبة وكنا متحضرين حتى نطلع مثل ما وعدنا روار اني والبنات وياية .. حاولت أنسى شي أسمة "الأشيب" وعشت أجواء الليلة بمرح ..
مِـنْ رجعت كان صدى ضحكتي بكل زوايا البيت متجاهلة كُـل اللي دا يصير بحياتي .. و كُـل ما تجي عيني على الأشيب ابعدها عنه بعدم مُبالاة وما أبالغ لو أكول صار يحترگ ..
مَر أول يوم والثانـي وأني هذا وضعي مطنشة الدنيا والليّ بيها كدامهم وحزني أعيشة بغُرفتي وحدي .
باليوم الثالث كاعدة أرسم وحدي بين أربع حياطين وأندكت الباب بخفة ، نهضت مِـنْ مكاني فتحتها كان الأشيب ، تركت الباب مفتوح ورجعت كعدت بمكاني
مورفو: تفضل فدعوســي
- دخل وسد الباب ، كعد على الكرويتة وبُقى ساكت وأني هم ما رُفعت راسي بقيت مندمجة برسمتي ، أسمعة أتحسر قبل لا ينطق
الأشيب: شنو الليّ تردينه مورفو؟
مورفو: ما أريد شي

الأشيب: ليش داتسوين هيج

مورفو: انت اخر نفر بالدنيا يسأل هذا السؤال

الأشيب: تردين تطلكين ؟!

رُفعت راسي مجاوبة السؤال بسؤال
مورفو: تريد تتزوج؟
ما جاوبني وألتزم الصمت ، هزيت راسي بقبول مجاوبة نفسي
مورفو: أي مورفو أريـد أستقر

الأشيب: ما جاوبتيني

مورفو: انت هم ما جاوبتني

الأشيب: اي

مورفو: شنو اي؟!

دار وجهة عني ما نطقها وهو ينظر لعيوني
الأشيب: أريد أتزوج

مورفو: خوش لعد طلكني وروح اتزوج

الأشيب: وليش إلا أطلكج؟

مورفو: هواي اسباب

الأشيب: احجيهن

طُبگت دفتر رسمي بقوة وتربعت على سريري مقابلتة
مورفو: شوف عزيزي أولاً أني ما أتحمل تجي ضَرة فوك راسي
الأشيب: وثانياً شنو؟
مورفو: أنتَ تريد تتزوج حتى مورفو تنساك ليش؟ لأن ما تكدر تتقبلها كزوجة ومن حقك بس الليّ راح تتزوجها أنتَ ما تحبها لا هي راح ترتاح ولا أنتَ مُجرد راح تضلم بنية وياك .. وأني ما أقبلها فَـ طلگني حتى ما إحس اني سبب زواجك.

الأشيب: اطلكج بس بشرط

مورفو: والي هو؟!

الأشيب: تبقين بهل بيت متطلعين

مورفو: جنت بنتك قبل زوجتك، وهسه انت لا تعتبرني بنتك ولا زوجتك اذا طلكتني المن باقية هنا؟!

الأشيب: هذا شرطي بعد اطلك وتبقين

مورفو: زين اني هم عندي شرط

الأشيب: شنو هو؟!

مورفو: تجيب هاي الي تريد تتزوجها للبيت نشوفها

ضيك عيونة يشك
الأشيب: ليـــــش؟

مورفو: وها اذا ما عجبتني متتزوجها وبكيفك بعد

ضحك مستهزأ
الأشيب: حلوة هاي أذا متعجبج ما تزوجها

مورفو: اي فَداري هاي شروطي وبكيفك

الأشيب: اذا عجبتج او لا اني الليّ راح اتزوجها مو أنتِ

مورفو: الي ميعجبني ما يعجبك

رفع حاجبة بتعجب
الأشيب: شتردين تسوين احجيها من الأخير

مورفو: ولا شي

الأشيب: ماشي موافق ع شروطج

مورفو: احس بلشنا نتفاهم

الأشيب: واذا اكو افكار براسج طلعيها بنياتي

مورفو: ماعدها نعال خطيه تطلع حافية

...بقى صافن عليه حسيتة ما استوعب رجعت اردفت
:-قصدي الأفكار البراسي

هز أيده ونهض
الأشيب: أكص أيدي أذا ما سويتي مصيبة

...ضحكت وغنيت بصوت عالي حتى يسمعني
-مع انك مصيبة ... مجنونه وعنيده ... بس بحبك انااااا.. من قلب قلبي

...طلع وركع الباب حيل صحت ورا
:-الباب اغلى من شوارب الفقمة الي تريد تتزوجهااااا فدعوووووس

ما جاوبني رجعت كملت رسمتي وأستمريت على وضعي كدامهم وتجاهلي للأشيب الليّ سَلة سَل .. كُـل ما يحاول يحجي وياية أو يفتح حديث أدير وجهي عنه .. أخر مرة طلعت للحديقة بعد ما وصلني مسج مِـنْ عزيز جايبلي كنافة ، طلعت عليه كاعد هو وروار ، أخذتها وتشكرت منه ورجعت للبيت .. صار بوجهي أبو شيبة وجهة ما يگصة الطبر
الأشيب: ويـــن جنتي؟
مورفو: يم عـــزوز
- تعديتة أريد أروح للصالة ، سحبني مِـنْ أيدي مرجعني مقابيلة يحاول يبقى هادئ بس عصبيتة مفضوحة
الأشيب: كُـل مرة تستأذنين هذه المرة بدون استأذان.!
مورفو: ليش أنتَ استأذنت مني قبل لا تقرر تتزوج؟

صُفن بوجهي ما توقع رديّ ، توقع راح أبرر ليش طلعت يم عزيز بس ما بررت وبُقيت أنتظر جوابة
الأشيب: أذا تزوجت هذا ما يعني أتخلى عن مسؤوليتج
مورفو: راح تطلگني وأصير بمسؤولية خالة نسرين وأني أنطيتها خبر قبل لا أطلع على عزيز ، روح اسألها

سحبت أيدي منه وتوجهت للصالة تاركتة محترگ بنارة ، وبذيج الليلة هو الليّ ثكل وجهة عليَّ بس ما أهتميت .. ثانــي يوم الظُهر كنت كاعدة اني وتبارك يم رحيق بالمطبخ وهو دخل راجع مِـنْ الدوام ، سلم علينا وركز نظراتة عليَّ
الأشيب: بالليــــل راح تجيّ
- أبتسمت وجاوبتة بهدوء عكس هوسة روحي
مورفو: هـــلا بيها
- تركنة وطلع ورحيق باوعتلي مستغربة
رحيق: منو الليّ راح يجي؟

مورفو: ضرتي المستقبيلة

رحيق: وليش غير احنه نروح نخطبها

مورفو: لا ابنه غالي لازم هي تجي تخطبه

رحيق: هههههه الله ليستر

تبارك: يعني اتو حفلة اليوم

مورفو: اي حبيبتي حفلة حلوه

ضحكت تبارك فرحانة عبالها صدك أكو حفلة .. بالليل أنطاهم خبر راح يجيبها يتعرفون عليها وكُلهم ما كانو راضيّن عن الوضع وما عاجبتهم جيتها بس هو ما يريد يبقيلي حجة .. خالة نسرين كان وجها ثكيل رافضة بشدة فكرة الزواج كلها ونترت بيه
نسرين: ليش قبلتـــي؟

مورفو: الشرع حلل اربعه خالة

نسرين: اول مره اشوف وحده ما تغار ع رجلها

مورفو: هو يكول اني بنته مو زوجته خالة

نسرين: بس أنتِ تحبينه يمه ليش تعذبين روحج هيج

مورفو: هي تصفى عزيزة كلبي لتضوجين

سكتت مقهورة وما عاجبها كلشي وبس تنتر بيهم وتحجي عليهم ماتعرف شلون تفرغ قهرها، لـما اجه الأشيب وست الحسن ..! كانت لابسة فُستان أبيض وشال أسود شامرتة برهاوة على راسها ، تقدمت على خالة نسرين بوستها وتنعوصت
يُسرا: شلونج خالة؟
- جاوبتها خالة مِـنْ ورة خشمها ماكدرت تتقبل الأمر
نسرين: هــــلا بيج
- سلمت على البقية وأخر شي أني تقدمت عليها أضحك أعرفها عن نفسي
مورفو: أني ضرتج أعرف أنتِ بكد البَغل ءءء العفو أقصد أنتِ أكبر مني بس الوكت خلاني أني ضرتج الكبيرة

خالة نسرين أبتسمت بعد ما كانت عاگدة النونة ، وهي باوعت للأشيب الليّ كانت نظراتة عليَّ يريد يفترسني .. مِـنْ شافت الكل ساكت محد علق على الموضوع رجعت ألتفتتلي
يُسرا: أهــلاً وسهلاً أني يُسرا

مورفو: يسرا لو يمنى هههههههههه

بقى وجها ينطي ألوان وأبتسمت مجاملة
يُسرا: لطيفة فدوة

مورفو: شكرا حياتي اني مورفو فراشة فَدار

صُفنت بوجهي حايرة شترد عليَّ ومستغربة هذه شبيها؟ خالة نسرين تداركت الوضع وطلبت منها تكعد .. كعدت مقابيلي ماخذة وضعية رجل على رجل ، محد نطق شي ناس تباوع لناس لما أجت رحيق مِـنْ المُطبخ وسلمت عليها ، بعدها صارت تتلاطف وياها وتجاملها بأعتبار هذهِ ضيفتهم وزوجة أبنهم المُستقبلية
رحيق: كُلش حلــو فُستانج

مورفو: حسيتها ذبانه واكعة باللبن

ما كدرت ألزم لساني وأني لو بيدي هسه أكطعها والعمود المتناقض الليّ واكف ويباوع على المهزلة الليّ داتصير .. ضحكن خالاتــي يلطفن جوّ يضيعن جفصتي وأني عيني صارت على الأشيب كانت عينه مركزة بيه وشُبه أبتسامة على وجهة ، درت وجهي عنه بسؤال رحيق الليّ خلقت حديث يكسر الصمت
رحيق: أي يُسرا أحجيلنا عنج شنو شُغلج؟

يسرا: اني محامية

مورفو: آه اجيتي بـوقتج

يسرا: لـيش شعنـدج

مورفو: شنو عقوبه الي يعنف شخص

يسرا: حسب نوع التعنيف، منو معنفج؟!

مورفو: واحد معنفني نفسيا هم تنحسب

ضحكت وأحسها فاهمة قصدي
يُسرا: لا ما تنحسب

مورفو: واسطه شي ما ترهم

يسرا: قانون هذا مو لعب

صفنت عليها وهي ارتبكت وسألتها بأستغراب شديد
مورفو: شبي خشمج؟
- رفعت ايدها تتحسسة
يُسرا: شبي؟

مورفو: ماعرف حسيته مو عدل مسويتله عملية تجميل

يسرا: لا كونتور هذا

مورفو: كنتور لو جرباية هههههههههه

ضحكت خالة نسرين مداركة الموضوع
نسرين: أعذرينا خالة مورفو دمها خفيف

سهاد: اي يسرا شلون عرفتي الأشيب احجيلنه

يسرا: بـحكم شغلي تعرفت عليه وصرنه أصدقاء

مورفو: أنتِ أثبتي مقولة ماكو صداقة بين الولد والبنية

...ابتسمت وباوعت ع الأشيب وكالت
:-القلب غدار

بعد ما كانت عيونه عليَّ دارها يباوع لـ يُسرا وأبتسملها ، أحس حرگ روحــي وما بأيدي غير أبتسم مِـنْ رجع يباوعلي
مورفو: الوكت هم غَـدار
- باوعتلي يُسرا بأستصغار
يُسرا: وشدخل؟

مورفو: تعرفين بعدين

سكتت عنها وللحظة فكرت أرجع لغُرفتي وأطلع من هذه الهوسة كلها بس شي بداخلي منعني وبُقيت كاعدة أستمع لحديثها هي وخالاتي الليّ ما بقن سؤال بكلبهن ما سألنه وكانت الخاتمة بسؤال خالة سُهاد الليّ حجيها ويانه تشمر كيف ويا شخص ما طايقتة؟
سهاد: زين خالة شلون طالعة بهذا الليل؟ أهلج وين ما كالو وين رايحة؟

يسرا: عادي خالة اهلي يثقون بيه

مورفو: ماصرتي كد هاي الثقه لعد من يثقون بيج

رفعت حاجبها ونترت بيه
يُسرا: كدها اني ما مسوية شي غلط

مورفو: لا ابد بس كاعده ببيت حبيبج حاليا

يسرا: راح يصير زوجي

مورفو: الاقدار تتغير من لحظه لـ لحظه

يسرا: ما يفرقنه قدر

مورفو: اي لان مورفو الراح تفرقكم مو القدر

أحتدت ملامحها وأندارت على الأشيب بعصبية
يُسرا: شدا يصير فَـدار؟
- الأشيب طول هذهِ الفترة هو واكف وعينه علينا ، جاوبها بدون ما يدير عينه عني
الأشيب: تتشاقة وياج ، حجينا مِـنْ البداية وكلنا دمها خفيف مو بنياتي؟

مورفو: اكيد فَداري

بعد ما كان ساند كتفة على الحايط عدل وكفتة وأندار على يُسرا
الأشيب: يلا نروح حتى ما تتأخرين
- نهضت بسرعة كأنُ كانت تنتظر حجاية منه ، ودعت خالاتي وتقربت مني تهمس
يُسرا: هذه يسمونها وقاحة مو خفة دم

مورفو: اهاااا صدك والله لعد مو وقاحه خاطفه زوجي مني

يسرا: راح يطلكج

مورفو: ما راح يتزوجج حياتي

ابتسمت مبتعدة عني وتكلمت بصوت مسموع بنبرة تحدي
يُسرا: اشوفج بـخير مورفو

مورفو: الخير بوجودج حياتي

طلعت هي والأشيب ورحيق ضحكت
رحيق: أكص أيدي أذا ما رُفضت الأشيب بعد هذه الكعدة
نسرين: بردت كلبي بيها

سهاد: اي والله ماحبيتها ام خشم اليابس

مورفو: لا شبيها خطيه اني حبيتها بصراحه

نسرين: اخاف من صراحتج اني يمة

رغم ما يعرفن شي عن البنية بس لمجرد ما فكرت تكون ضرتي ووجودها بحياتنا يضوجني ويقهرني خالاتي كرهنها .. يعني مِـنْ حُبهن لمورفو شكد هنيالي بيهن ..
دخل روار بعد طلعتهم مُباشرة يباوعلنا مضيگ عيونه بأستغراب
روار: منو هذه الليّ جاية مِـنْ الحج؟

مورفو: ضرتي

روار: هههههه ها ع الخير بس شعدها يمنه لو هم تزوجها واجه كال هاي مريتي

مورفو: بسمارك دك بـ العظم

روار: والعباس مو قصدي

مورفو: عادي هي الشغلة نداست

روار: بس شو تبجي شسويتلها

نسرين: ليش تبجي شبيها

روار: شمدريني واكفين برا وعيونها تمطر

مورفو: ما تتحمل شقة طلعت

رحيق: يا شقة مورفو ترا سحلتيها ذهاباً و اياباً

روار: ها يعني من هسه بلشت سوالف الضراير

مورفو: روار راح اكلك وانت احكم اني عايله عليها لو لا

روار: راح احجي بختي والله

مورفو: هي رحيق تقشمر عليها تكللها فستانج حلو اني كتلها حسيتج ذبانه واكعة باللبن وهي زعلت

أنفجر روار مِـنْ الضحك جُوة وأجوائة هذه السوالف
روار: لا لا قوية وعلي بس هي صدك ليش زعلت؟
مورفو: ما أعرف ، مادري شبيها علينا

رحيق: هااا لعد واليمنى واليسرى والكنتور وخشمج الاعوج والبغل هذن ما تحسبيهن

مورفو: مجذبة بشي اني

كعدت رحيق تسولف لـ روار بالتفصيل المُمل وهو منتهي مِـنْ الضحك ؛ أندار عليَّ يتوسل مِـنْ كُـل عقلة
روار: مورفو بربج خلِ يتزوجها حتى تجي يمنا نتونس عليها

نسرين: يمة هاي اذا قبلت تتزوج الأشيب بعد

مورفو: هي الخسرانة خالاتي

بقو يضحكون وأني أترخصت منهم وصعدت لغُرفتي .. كعدت أرسم أضيع وقتي وأشتت تفكيري عن الفكرة الليّ انرسمت بعقلي وجننتني .!! وصلت مرحلة أضرب على راسي وأرزل بنفسي
مورفو: لا تفكرين هيج لا تفكرين ، ليش دا تغارين أصلاً مورفو شبيج.!!

طردت الفكرة من عقلي والمشهد الليّ أنرسم كدام عيني وحاولت ألتهي بالرسم ، مَرت ساعة تقريباً ورُفعت راسي مِـنْ أنفتحت الباب ودخل الأشيب ، سد الباب ورُفع حاجبة
الأشيب: أي مورفو

مورفو: ها فدعوس

الأشيب: ماراح احجي ع الصار واعبرها بس كليلي شنو قررتي

...اخذت نفس عميق وهزيت راسي بـ لا واردفت
:-شبيك فَدار صدك تحجي كل هذا الطول والجسم والعضلات والجمال ونص الاخلاق لان ماعندك اخلاق كاملة

نتر بيه بحدة
الأشيب: لسانك طيـــر الشوك

مورفو: الحقيقة مُره، المهم نكمل فـ شنو حرامات انت تاخذ هاي الفقمة ماحبيتها ما عجبتني

الأشيب: وشبيها ما عجبتج؟

مورفو: شوف اول شي خشمها اعوج باع خشمك انت شلون حلو اذا تزوجتها وطلعو جهالك نفس خشمها راح تهجم النسل

الأشيب: غير الخشم؟!

مورفو: احس شخصيتها ركيكة بـ الرغم هي محامية المفروض تصير شخصيتها قوية بس هي مهزوزة ما تليق بيك

الأشيب: وغير شخصيتها؟!

مورفو: وها نفسية هم هاي لا راح تحجيلك حجاية براسها خير ولا تضحكك ولا تونسك راح تتبقى تتنعوص ع راسك وتتموع فداااار القلب غدااااار

...ضحكت بصوت عالي وكملت
:-حبيتهاااااا فدار القلب غدار والله ارهم شاعرة

هز ايده ما عاجبة كُـل كلامي
الأشيب: أنطيني الزبدة

مورفو: ماحبيتها وقررت اغير الشرط واني اختارلك

الأشيب: شتختارين؟!

مورفو: بطانية ام النمر شختار يعني غير عروس

الأشيب: داتلعبين عليَّ أنتِ لو شنو.!

مورفو: لا والله شبيك واصلا اكو وحده ببالي

الأشيب: منو هاي اصدميني

رُفعتلة حواجبي مركصتهن مبتسمة
مورفو: هنــد بنت عمتك
- صُفن بوجهي يستوعب وبعدها سأل
الأشيب: تردين اتزوج ام عظام؟

مورفو: ههههههه اي عادي تتعدل وتسمن وتصير مصكصكه

الأشيب: شهل مصطلحات مورفو

مورفو: نسيت انت من جيل فريد الأطرش، يعني صاكه يعني حلوة وتجنن هم

...بقى يباوعلي مدري شبي حسيته راح ينفجر حجيت عود اقنعه
:-شبيك ترا هي حلوة بس تسمن شوية وتفصل الجسر لـ بوجها وترتب نفسها شويه تصير توب

الأشيب: بـ احلامج بابا مخبل عاقل

مورفو: عيب عليك شبيها البنية هي صدك مو حلوة بس خلقة الله هاي

ضحك مستهزأ بالفكرة كلها
الأشيب: وتردين ماجدة تصير عمتي

مورفو: هي اصلا عمتك وين الجديد

الأشيب: وتصير بيبية جهالي؟!

مورفو: ليش تريد تخلف منها انت؟!

الأشيب: لا احنطها واباوع ع طولها بس

مورفو: ها عبالي

الأشيب: أنتِ شاربة شي؟

مورفو: اي اخذتلي بطل من عزيز

الأشيب: دانحجي مثل الاوادم مورفو عوفي هل سوالف هسه

مورفو: اي فـ شرطي هسه لو هند آكلت الكبود لو متتزوج

الأشيب: مخبل اتزوج بنت ماجده شبيج

مورفو: عيب فدعوس لو ابوك عايش ويسمعك تحجي هيج ع اخته راح يزعل ترا

الأشيب: لا تخليني اشعل عشيرتها هسه

مورفو: اشعل براحتك الساحه الك

هز راسة متنرفز ودار وجهة يريد يطلع ، صحت عليه بسُرعة مستوقفتة وما كدرت ما اسأل وتأكد مِـنْ المشهد الليّ أنحفر بعقلي بلحظة تخيلتة يمسح دموعها ويقنعها تسكت لأن بجت بسببي ..
عيوني بعيونه ونطقت سؤالي بهدوء ولا كأنُ دا أحترك
مورفو: هم مسحت دموعها مِـنْ بجت؟
- هز راسة بسُرعة نافي ونطق بتبرير
الأشيب: الأيد الليّ ما كدرت تمسح دموعج يوم نزلت تنگص أذا تمسح دموع غيرج بنياتي أنتِ

رغم حقارة الموقف والتناقض الليّ دا نعيشة بس أحس أرتاحيت مِـنْ بررلي ، بس هذا ما يمنع دموعي تفضحني ، تجمعت بعيوني ولأن ما ردت أضعف كدامة قاومت حتى ما تنزل ، أخذت نفس عميق ورجعت فتحت دفتر الرسم
مورفو: خوش سد الباب وراك بدون زحمة
- بس ما طلع وأعرف عيونه تراقبني وأعرفة يريد يقترب ويلمني بحُضنة بس يكابر ؛ جَر حسرة بألم ونطق
الأشيب: تصبحين على خير
- كلبي صابة خفقان أنتظرة يكملها بس ما كمل ، رُفعت راسي عليه مبتسمة
مورفو: كملها.!
- كنت أتوسلة بنظراتي بس كلمة وحدة ينطقها لكن أستكثرها عليَّ ، ضحكت مضيعة حزني
مورفو: صرت أسير يُسرا

رجعت دنكت راسي الليّ صرت أحس بثُكلة ما ينحمل .. عيوني الليّ تشبعت بالخُذلان وهي تتأمل شفايفة تنطق حررت دموعها مُجرد ما طلع مِـنْ الغُرفة ، أحتضنت وجهي بين كفوف أدية منهارة أبجي بقهر شنو الليّ يستوجب يوصلنا لهذه المرحلة؟
حررت كُـل دموعي يلا أرتاحيت ، غسلت وجهي ورجعت أمثل دور الليّ ما مهتمة ونزلت للمُطبخ أدور أكــل ..
حضرت أكل وحلويات وفواكهة وعصاير ما خليت شي بنفسي ، خليت سُماعات بأذني وكعدت أكل ما حسيت غير عزيز فوك راسي ، فزيت مِـنْ شفتة ووخرت السُماعات
مورفو: شبيك مثل الحية ما تطلع صوت مِـنْ تمشي؟
عزيز: أنتِ لابسة سُماعات بأذنج وين تسمعين

مورفو: اي بس من اكو صوت احس

..سحب نفس من الجكارة سحب الكرسي كعد وكال
:-يراد اصير كنغر وانزلج من لغرفه اكمز لما اوصلج حتى تحسين

مورفو: صاير لطيف احس راح نتفاهم

عزيز: بـ شنو نتفاهم

مورفو: تحشش وكذا تعرف جوي هذا

ابتسم وميل راسة
عزيز: نحشش لخاطرج شعدنا

مورفو: سالفتك هاي بداية موضوع احبج وحبيني

عزيز: هههههه لا يابة ما راح احجي شي

مورفو: اي عفية خلينه متفاهمين

صفن بوجهي والأصح مركز بعيوني وكان السؤال واضح قبل لا ينطقة
عزيز: ليش تبجين؟

مورفو: وليش حتى ما ابجي

عزيز: وليش حتى تبجين مورفو؟!

مورفو: شوف الدموع عبارة عن طاقة سلبية لازم تطلع اذا احبسها راح تأذيني فـ ابجيلي دمعتين وارتاح وفضت راحت

عزيز: جوابج بكلشي منطقي مقتنعة بي وتقنعين الطرف المقابل

مورفو: يلا اكدر اعيش هيج

عزيز: حقج

مورفو: باوع اخذت غيبتك قبل شوية ابريني الذمة

عزيز: بـشنو اخذتي غيبتي؟!

مورفو: الأشيب سألني اذا شاربة شي واني كتله اخذت بطل من عزيز

عزيز: لا بطلت اني من زمان

مورفو: اعتبرني ماخذه بطل مي لعد ماعرف بطلت

عزيز: هههه هاهي

مورفو: جان بنفسي اكلك اكل وياي بس تعرف ماحب انطي من اكلي

...ضحك بـصوت عالي وكال
:-الف عافـية

مورفو: اريد ارد ردي القاتل واكلك انت العافية بس راح اجفص بـ ام السالفة وكتها فـ راح اكلك الله يعافيك

عزيز: هههههه مشكلتج صريحة زيادة عن اللازم

مورفو: ابو طبع ما يغير طبعه وهذا طبعي شسوي

عزيز: وحنينه حيل هم

مورفو: خوفك اذا اختفت هاي الحنية وتحولت لـ قسوة

عزيز: معدنج اصيل ماراح تتغيرين

مورفو: الألم يغير كل شي بداخل الانسان وممكن يحوله لـ شخص ثاني هم

...اخذ نفس عميق وكال
:-لشخص انت ماتريده بس مجبور عليه

مورفو: ماكو شي اسمه مجبور عليه، اكو تصرفات غلط مستحيل تنجبر عليها يعني مثلا هسه انت تعذبت ولجأت لطريق خطأ وتحس اذا شربت وسكرت راح تنسى بس ماراح تنسى غير ساعات محدوده وترجع نفس حالتك، بس لو متقرب من رب العالمين جان برحمته طبطب ع كلبك وهون عليك ونساك الي عشتة بس انتَ ايمانك ضعيف

عزيز: بس هسه كلني ثقة بـ رب العالمين وكدرت اقنع عقلي انو هو الوحيد الي يكدر يطلعني من الاني بي كله وبس هو الراح يطبطب ع كلبي مثل ما كلتي

...ابتسمت واردفت بفرحه
:-فرحت لان كدرت تتغير

عزيز: الج الفضل شوية هههه

مورفو: بـشنو

عزيز: بـسبب كلامج من كلتي اذا كل فضل ربك عليك ما هداك وراح تنهدي وتوب بسببي معناها مو محبتاً برب العالمين

مورفو: لعد اني وياك بالنص بـ الحسنات الي تحصلهن

عزيز: هههههه تستاهلين ثلثين منهن والي ثلث

مورفو: خوش لعد متفقين احتاجهن حتى ادخل الجنة

عزيز: شوفي اني سامع سالفة يكولون الشهيد يكدر يشفع لـ40 شخص ويدخله الجنه ويا فـ تعتبرين ضامنه الجنة انتي لان ابوج شهيد

مورفو: وين الله وتطلع سالفتك صدك

عزيز: حتى لو مو صدك هو أنتِ شمسوية وما تدخلين الجنة جبتي عمرج ضيم بضيم

مورفو: مادخل الجنه لان اتنمر ع العالم

عزيز: أنتِ تحجينها بالوجه ما تعتبر تنمر

مورفو: لا لا بيهن ع ناس بعيدين فـما تصير بوجهم هاي راح اتحاسب عليهن

عزيز: مثل منو يعني

مورفو: شوف يعني مثل هند آكلت الكبود بنت عمتك هوايه تنمرت عليها وهي بعيده ماصارن بوجها فـ تخيل باجر عكبه ميتين ودايوزعونه ع الجنه والنار ورب العالمين يكلي ما تدخلين الجنة اذا ما تسامحج آكلت الكبود واروح اعتذر منها واكللها سامحيني لان تنمرت عليج وترفع خشمها عليه وما تسامحني ويدفروني للنار من وراها والله اشبع قهر

عزيز: بهذه حقج

مورفو: اي فـ ماعندي ذنوب غير التنمر وكسرة كلبك

عزيز: رغم كتلج ماعليج ذنب بـ كسرة كلبي بس هسه راح اكلج اني مسامحج عليها حتى ترتاحين

مورفو: بقى ذنب هند آكلت الكبود لازم اشوفلي طريقة تسامحني بس المشكلة اني مدا اتوب كل ما تجي ع بالي اتنمر عليها بس والله هي تجبرني اتنمر شسوي يعني

عزيز: عوفيها لوكتها هي تصفى

مورفو: اللقاء عند رب العزة

عزيز: زين هم تحبين تنتقمين من الشخص الي يأذيج

مورفو: لا متبعه مقولة دع الخلق للخالق، رب العالمين يمهل ولا يهمل وراح ياخذ حقك عاجلاً ام آجلا، وهم اموت مظلومة ولا ظالمه

...ابتسم وكال
:-عقلج اكبر من عمرج بـهوايه

مورفو: تعلوم عثمان الي جان يعلمنيا وما يطبقة

عزيز: الله يرحمه

مورفو: هههههههههه لا صدك متغير قبل كم يوم جان عسا بجهنم الحمره

...ضحك وكال
:-يجي يوم ونموت ونحتاج هاي الكلمة

مورفو: بلشنة نتفاهم عزوز

عزيز: ههههههههه راح اصير شيخ دين من وراج

مورفو: ادعيلنه بصلاة الليل

عزيز: لا بعدني ما وصلت لـ هاي المرحلة

مورفو: وصلاة الصبح واصلها

عزيز: مو كل الايام

مورفو: حتى اني هههههه

...ضحك وكال
:-شوكت تنامين

مورفو: هسه ليش؟!

عزيز: حتى نصعد سوة

مورفو: تكدر تصعد عادي اني بعد وراي اعزل هوستي

نهض من مكانة لأن واضح على شكلة تعبان
عزيز: تصبحين على خير
مورفو: وأنتَ بخير
- ضحك متسائل
عزيز: وأذا تردين بردودج القاتلة شلون؟

مورفو: انت الخير يـ وجه الخير هههههههه

عزيز: كله على الترابي تنزلين

ضحكنا وبعدها هو صعد وأني عزلت هوستي يلا صعدت شمرت نفسي بفراشي مستسلمة للنوم والأصح متهربة مِـنْ واقعي التعيس .. وهيج مُضت الأيام وأني قافلة على قراري يا الأشيب يتزوج هند لو ما يتزوج ولأن أعرف مُستحيل يسويها وياخذ هند قفلت هذه القفلة ، بس هو كان معاند على يُسرا وما يريد يخطي خطوة بدون رضاتي لأن يعرفني خبلة ويمكن يكعد الصُبح ما يلاكيني بالبيت .. كعد كدامي والحيرة واضحة بعيونة
الأشيب: شبيج مورفو ليش هيج تصعبين الأمور؟

مورفو: هذا الموجود عمو

الأشيب: شيفرقلج أنتِ اذا يُسرا واذا هند

مورفو: ماحبيت يسرا مدري يمنى مادخلت كلبي شلون

الأشيب: بس اني....

...سكت ما كملها ضحكت وجاوبته باستهزاء
:-بس انت دخلت كلبك مو

الأشيب: لحد هسه مجاريج ومتحمل مورفو لتخليني اتصرف تصرفات ما تعجبج

بهتت ملامحي مِـنْ نبرة صوتة المحتدة معقولة بسببها وصلنا لهذهِ المرحلة؟ بهذهِ اللحظة بس أدرك كُـل تصرفاتي غلط بغلط ليش أحاول أمنعة؟ لو أعنيلة شي كان أمتنع مِـنْ ذاتة ، ليش أرخص نفسي لشخص ما مشتريني..! كانت نظراتي توضح مدى خُذلاني وأنكساري وخيبتي منه ، نهضت مِـنْ مكاني أريد أطلع مِـنْ المكان الليّ هو موجود بي أحس أختنك والهوى مدا يملي ريتي ، نطقت جُملة عذابي بهدوء
مورفو: هاهــي أتزوج الليّ تعجبك

سحبني مِـنْ أيدي مرجعني خطوات للخلف ومنها مطيحني بحُضنه متشبث بيه بقوة كأنُ رافض فكرة أبتعادي
الأشيب: شبيـــج؟
مورفو: ما بيه شي تريد تتزوج براحتك
الأشيب: وأنتِ؟

مورفو: ماتهمني بعد شتريد تسوي سوي

رُفع راسة يباوعلي وما نزلت عيني طولت بنظراتي ثابتة على كلامي ، باع ريگة متردد بالسؤال
الأشيب: وبعدج تردين تطلگين؟

مورفو: هم ما يهمني تريد تطلك تريد تبقيني ع ذمتك بـكل الحالات اني باقية يمكم لـما الله يفرجها عليه

الأشيب: راح تبقين بنيات الأشيب؟!

مورفو: بس الأشيب تخلى عني لو صدك بعده يعتبرني بنياته ما يسوي كل هاي التصرفات بس حتى يحرك كلبي، جنت تتوقع راح اكرهك بس مو بهل سهولة الشخص يكدر يكره احد وخاصة اذا جان معتبرة كل اهله

الأشيب: والله ما يغيرني عليج شي لج والقرآن افداج بروحي

مورفو: ليش مكدرت تتقبلني مثل قبل لعد

الأشيب: كاره روحي لأن احسج داتتعذبين بسببي

مورفو: ماردت منك شي اني

الأشيب: شايف الكسرة بعيونج بغصه ضحكتج بنضراتج كلشي بيج مكسور

مورفو: بدل ما تجبر كسرتي تريد تكسرتي بزياده لعد

الأشيب: ما استاهلج اني

مورفو: ماردت وطن ردت بس بيت فَدار

كنت أتمنى يبقى محتويني مثل قبل ما ردت شي منه ما ردت يعرف عن مشاعري أتجاهه بس شاءت الأقدار وصار هذا حالنا ، نهضت مِـنْ حُضنه مبتسمة بكسرة
مورفو: بس خسرت حتى بنياتك

شتفيد نظرات الندم ولمعة الدموع الليّ شفتها بعيونة؟ راح تجبر الليّ أنكسر؟ لو ترجع أيامنة الحلوة؟ ما فادت بشي..! طلعت مِـنْ يمة وصرت أبتعد وأبتعد وتمر الأيام وأبتعدت أكثر لدرجة حتى المكان الليّ هو متواجد بي هو اني أغادره.. هم هو وهم عزيز الليّ حاول يقترب بس صديتة أكثر مِـنْ قبل وأبتعدت أكثر .. أنطويت على نفسي بوجودهم ومن هُمَ ماكو أخلص وقتي ويا البنات .. بس شنو كان نهاية الكتمان والمُكابرة؟ المَــــرض..
المَرض الليّ ضل ينهش بروحي مِـنْ الألم على البطيء ..
وكعت طريحة الفُراش وماكو غير أيدها الحنونة تمسد على راسي
نسرين: شلون صرتي يُمة؟

مورفو: جسمي يوجعني

نسرين: غير مشتعله نار يا يمة شلون ما يوجعج

مورفو: راسي مداحس بي من الوجع خالة

نسرين: اسم الله عليج يمه بـعدوينج ان شاء الله

مورفو: عيوني احسها ثكيله ومورمه

نسرين: يا مورمه يمة غير راح ينفجرن

...باوعت عليها واني احجي بوجع
:-خالة ركبتي كلها توجعني من ورة بلاعيمي حتى المي يأذيني

نسرين: سودة عليه يمه شجاج مو نمتي مثل الورد

مورفو: حظي المصخم غير

بعدها ما مجاوبتني وأنفتحت الباب بقوة دخل الأشيب مفزوع وتقرب مني بخطوات سريعة يحجي بخوف
الأشيب: شبيج مورفو شيوجعج بنياتي؟

مورفو: راح اموت عمو

دنك يبوس براسي ويمسد على شعري
الأشيب: يومي قبل يومج يا نظر عيني أنتِ

نسرين: يمة اخذها لدكتور شي راح تموت

هز راسة ونهض بسُرعة ، طلع ملابس إلي من الكنتور وطلبت من خالة نسرين تساعدني بس كانت تعبانة ما تكدر تسندني وأعطتة خبر راح تصيح لوحدة مِـنْ البنات .. بس طلعت هو غلق الباب ورجعلي كان حاير ما يعرف شيسوي
الأشيب: راح أغيـرلج أني
- كانت عيوني بصعوبة أشوف بيها مِـنْ كثر ما مورمة وصوتي رايح أجاهد حتى أنطق الكلمة
مورفو: لا تستهتر فَــدار
الأشيب: ما مستهتر مابيها شي بنياتي أنتِ مو غريبة
- سحبني مكعدني وأني سندت راسي على كتفة
مورفو: ما أريد حباب عوفني
الأشيب: ما راح أباوع مورفو

مورفو: شلون تغيرهن لعد

الأشيب: أنتِ ساعديني يلا بنياتي شوفي نفسي شلون منتهية مِـنْ المرض ، حتى نروح بسرعة للطبيب والله كلبي أشتعل عليج

سكتت مستسلمة بسبب وجع جسمي وحتى حركتي صعبة ، غيرلي وبعدها جاب جواريب وحذاء وكعد يم رجلية لبسنياهن وشالني بحُضنة نازل بيه الدرج يلا أجت رحيق تسأل
رحيق: هـا بدلت؟ أجيت أساعدها

الأشيب: الواحد يموت وانتن مدري وين

تركها ونزل ورغم طلبو منه ينتظرهم حتى وحدة تجي وياية بس هو ما أنتظر ؛ رجع الكُشن بيه حتى أنام وتحرك بأتجاه المُستشفى ، الطريق كُله هو مخبوص بيه مرة يغسل وجهي مرة يمسد على راسي ، لو يغسل أدية ويتحسس جبيني كُـل ثانية .. يحير شيسوي والخوف كان واضح وضوح الشمس بعيونة ، مِـنْ بعد فترة طويلة رجعت حسيت بحنية الأشيب ، أبتسمت عيني عليه
مورفو: ليش حارمنـي حنيتك فدعــوس

الأشيب: الله ياخذ فدعوس اذا تغير عليج بعد

مورفو: متحبني انت

الأشيب: اموت بدونج اني بنياتي والله متعذب

مورفو: ليش رجعت چلب

باوعلي نضرة سريعة ورجع يباوع للطريق وهذه أول مرة ما يعلق على غلطة مني..!
الأشيب: وعيونج وغلاتج عندي مجبور ما أريدج تتعذبين وياية

مورفو: بيك وبلياك متعذبة فَدار

الأشيب: راح تبقين بنيات الأشيب وروحه لابني ماراح اتغير عليج بعد وطز بـ الدنيا وين تريد تصفى خل تصفى

مورفو: ويسرا ام الكنتور

ضحك وأحتضن كف أيدي
الأشيب: هو أنتِ هججتيها

مورفو: شعلية اني هي نفسية

الأشيب: تروحلج فدوة كلشي ولا خسارتج

مورفو: بس انت خسرتني اني ماحبك ولا اريدك بعد

الأشيب: صيري زينه هسه وماريد شي من الدنيا بعد

غمضت عيوني ملتزمة الصمت لحد ما وصلنا المُستشفى ، مِـنْ بعد عِدة فحوصات باوع الدكتور للأشيب متأسف على وضعي
الدكتور: ألتمن عليها ، بلاعيمها كلش متضررة وصاير بيها تقرحات هواية لهذا السبب ماتكدر لا تاكل ولا تشرب شي ، اضافةً للجيوب الأنفية والحساسية ونتيجة الألتهاب القوي صاير عندها ألتهاب الأذن الوسطى ، تحتاج علاج قوي وأبر هواية حتى تتشافى

بأختصار راسي كُله ملتهب .. باوعلي الأشيب بخوف ورجع كمل حديثة ويا الدكتور ويستفسر أكثر عن حالتي .. بعدها سجلي علاج وطلعنا ، كعدت بالغرفة الثانية بيها مُمرضة والأشيب راح يجيب العلاج ومن ضمنه الأبر ، طلب مِـنْ الممرضة تضربني أبرة هسه حسب كلام الدكتور وضربناها بدون أختبار ..
عند هذه اللحظة حسيت هذا يومي ونهايتي .. صار عندي تحسس قوي مِـنْ الأبرة وجسدي صار يملخ بيه ، روحي شاغت بس أبجي وأحگ بجسمي لدرجة تزلغ
مورفو: عمو راح أمــــوت
- حتى هو فرفحت روحة عليَّ وبدون وعي منه صاح بالممرضين
الأشيب: شوفولها شي بسُرعة
- طلع واحد مِـنْ الممرضين يركض بعد ما أنطاه خبر راح يجيب أبرة ثانية للتحسس ، وأني أبجي بهسترية وأريد أحگ جسمي بس الأشيب مقيدني مانعني لأن أذيت نفسي ، صرخت بي مِـنْ وجعي
مورفو: عوفنــــــي راح أمــــــوّت شبيــــــك

بُقى حاير ما يعرف شيسوي ، ضامني بين أديه مقيد حركتي وهو يمسد على أدية وظهري بحركة خفيفة عوض عن حركتي القاسية
الأشيب: أتحملي شوية فدوة أروحلج مو زين عليج هيج
- جاوبتة ببكاء روحي رايحة
مورفو: أحس روحي تريد تطلع عمو
الأشيب: طلعت روحي قبل روحج يا روح عمج

رجع الممرض بأيدة أبرة ثانية ، بس ضربتها ما مُضت إلا دقايق قليلة وهدءت ، ذبيت ثكلي على الأشيب مهدود حيلـي .. صار يمسد على راسي ويسألني أذا أحس بشي بس ما كنت أحس وكأنُ جسدي أنفصل عني .. صار يغسل بوجهي وأدية لما صحيت شوية وطلبت منه نرجع للبيت ، ما كان عندي طاقة أسوي أي شي بس أريد أنام .. نزع حذائي وغطاني زين بسريري وبقى كاعد يمي راسي ، لمُجرد ما غمضت عيوني دخلت بنومة عميقة ..
ما أعرف شكد نمت بس هواية وما كعدت إلا على صوتة
الأشيب: فراشتـــي
- فتحت عيوني بتعب كان وجهة قريب من وجهي وأبتسم
الأشيب: مو كافي نوم فَـدار طك كلبة عليج

مورفو: بس اني ماريدك

الأشيب: من تصيرين زينه لا ترديني بعد

مورفو: ماحبك فدعوس

الأشيب: فدعوس مايكدر بدونج

مورفو: كلاواتك الي جايبها من سوك مريدي لا تحجيها ويايه

ضحك وطُبع بوسة قوية على خدي
الأشيب: لج بابا شعندي غيرج اني احبل اجيب

مورفو: لا تحبل انت

...لحظه استيعاب هو يريد يستوعب شحجيت واني اريد استوعب شجفصت ابتسمت بفشلة واردفت
:-تأثير الصخونه والله

الأشيب: شلون وي لسانك اني طير الشوك

مورفو: بـ الغلط فدعوس

الأشيب: اكعدي يلا ناكل سوة ما هان عليه اكل وأنتِ نايمة جوعانة

مورفو: شلون هان عليك هاي الفترة كلها

الأشيب: وعيونج جنت اتعذب

مورفو: ماراح اسامحك

الأشيب: راح اكفر عن غلطي بس صيري زينه هسه

مورفو: طلكني واسامحك

الأشيب: ماطلك

مورفو: شو لزكت بيه خير

الأشيب: ماطلك وخلص

مورفو: مو بكيفك

الأشيب: ولا بكيفج

كومني وياه سحل ونزلني حتى ناكل سوة ، وبُقيت طول ما أحْنا ناكل أني ساكتة وشكثر حاول يخليني أحجي ما كدر وحاول يستخدم أسلوب ثاني
الأشيب: شكد حلو هدوئج منا وهيج على كُـل وجبة ضلي ساكتة
- ما جاوبتة توقع راح يستفزني حتى أحجي بس ما تجاوبت وياه ، كرصني مِـنْ خدي بقوة خلاني أعيط وضربت أيده
مورفو: شبيك شبيك ما أريد أحجي
الأشيب: أحجي لا تسكتين
مورفو: قبل دقيقة جان شكد حلو هدوئي
الأشيب: بس مو أحلى مِـنْ لغوتج أحجي حتى لو تغلطين ميخالف

دفعت أيدة عني وبُقيت ساكتة ، عجز يخليني أتفاعل وياه ..
الأشيب: شسوي وترضين عني؟
مورفو: تطلكني
الأشيب: ما أطلك مورفو شيليها مِـنْ راسج هذه الحجاية
مورفو: ليش تنقض بالأتفاق؟
الأشيب: وأذا طلكتج شتردين؟ شتسوين وراها؟
مورفو: أتزوج
- أحتدت ملامحة بس حاول يبقى هادئ
الأشيب: وتتزوجين منو؟
مورفو: لوقتها تعرف ما أحب أحجي بشي قبل لا يصير

يتخبل بكل مرة اطلب منه الطلاك وأنطي سبب يجلطة أكثر .. كنت أكابر وهواية لدرجة كلبي يوجعني مِـنْ كثر الكتمان والحجي الليّ ضامتة بكلبي .. ومن بعد 5 أيام حَرب ويا المَرض صرت أتعافى بس أعيش الأتعس .. كوابيـــــس..! كوابيسي القديمة صارت ترجعلي تعيشني ليلة مُرعبـة ، فزيت خايفة وأرجف ونهضت مِـنْ فراشي أتلفت بالغُرفة وأحس حتى الهوى شَح..
فتحت الباب وطلعت وما صار كدامي غير باب غُرفتة
الوحيــد الليّ أكدر ألجئ أله بهذا الوقت..!
تقربت مِـنْ الباب أرجف مترددة أدكها ، حضنت أيدي
على كلبي ونزلت دموعي بضيااع إلمن أروح؟
تجرأت وردت أدك الباب بس تراجعت بسرعة
مِـنْ صوتة الليّ أختــرق مسمعي محذرنـــــــــي
... : مورفــــــو..!

يتبع ..

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105