الأشيب الفصل الخامس والعشرون 25 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

تراقصت فراشات بكلبي من كلامة ، يزيد خفقان كلبي حُب بعد كُـل كلمة ينطقها .. كنت أتخيل مُمكن كلشي يصير بحياتي إلا هذه اللحظة حيل مستبعدتها حتى بعد خُطة عزيز ما كنت اتأمل يجيني وما توقعت بهذهِ السُرعة ..
حسيت روحي فردت جناحها تريد تلمة بعد جُملتة الليّ رجفت كلبي "مطشر أني لميني" .. رغُم الأضاءة الخفيفة بس كانت ملامحة واضحة لعيوني ، أبتسمت بدون وعيّ مني أبعدت عيوني عنه متلافية نظراتة الليّ أفترستني .. رجع مرة ثانية طابع بوسة بنفس المكان وتكلم بنفس النبرة
الأشيب: ضحكاتج محفورة بين جفوني
- كيف مُمكن لكلمات تغيّر وتبهذل حالي لهذهِ الدرجة.! والليّ زاد خفقان كلبي مِـنْ تقرب أكثر طخ خشمة بخشمي ويحركة بخفة لحد ما أنمزجت أنفاسنا سوة
الأشيب: أموت وأحيا بأنفاسج

كنت أحتاج أسعاف بهذهِ اللحظة ، كلامة كَـدُفعة وحدة كان هواية على كلبي ، أحتضنت أيده الليّ ضامة خدي وخافيتة بحجمها الكبير وهمست بصوت يرجف أريد يسكت حتى أرجع طبيعية
مورفو: فَـداري

الأشيب: ضـايع بدونج فَدارج، لـف الدنيا يريد ينساج ورجع ميت لـ ملكاج

...ابتعد يباوع لـ عيوني بلهفه وكال
:-جـنت احبج مثل بنـتي ما توقعت يجي يوم واتعلق بيج هيج وحتى جنت مقرر تكبرين يمي وبعدها تكدرين تعيشين حـياتج مثل ما تردين بس من ابـتعدتي عني هاي الـفترة حسيت وعرفت بـنفسي ماراح اكدر ابتـعد عنج ولا راح اكدر اعوفج، يـمكن راح تحسيني اناني بـس جنت اريدج بس الي انتي و سـوالفج و ضـحكاتج و خـبالاتج كلهن ردتهن بـس الي، اشتعـل بـنار من اشوفـج تضحكين لو تحجيـن وي عزيز، بـ البداية كـلت يمكن لان اني اعرف عزيز شنو وماريدها تحجي ويا لان راح يأذيها بس بـعدين اقتنعت اني اريدج بـس الي بـنتي و زوجـتي و حـبيبتي و رويـحتي و دنـيتي و كـل حـياتي

أعتراف واضح وصريح .! كلماتة ما غزت كلبي وبس ، حتى عيوني الليّ ما كدرت أضم دموعها وأخذت مجراها على خدي ، صار يمسح بيهم بحنية
الأشيب: أريدج إلي وبس مورفو
- كُـل الكلام الليّ بكلبة نطقة بدون لا يفكر بحالي شراح يصير بيه بهذهِ اللحظة بس كان خايف يفقدني لهذا السبب ما ترك كلمة ولا شعور ولا وصف ما حجاه ووضحة إلي ، بجيت وضحكت بنفس الوقت مشاعري تعوقت وهمست بنفس نبرتة
مورفو: كلبي راح يوكف فَـدار

بدل لا ينتشلني مِـنْ هوستي ويهدأ خفقان كلبي زادها عليَّ مِـنْ أحتضن وجهي بين كفوف أديه الدافية وقَبل شفايفي بهدوء ، غمضت عيوني بقوة عايشة اللحظة وياه ، طول يدا أبتعد وبنفس القُرب وبصوتة الذبلان نطق
الأشيب: مَيت بيــج أني فَراشتي .. أنتِ فَرحة عُمري ودوة جروحي ، أنتِ عوض كُـل خساراتي
- حضنت راسة وما أعرف كيف طلعت مني هذهِ الجُملة
مورفو: أنتَ عوض عُمري الليّ ضاع فَـداري

الأشيب: نامي بـحضني مورفو ملهوف حتى اضـمج لـصدري

أبتسمت مبتعدة عنه مسويتلة مكان بجانبي ، نام صَفُح مخليني على أيدة وأيده الثانية محتضن بيها وجهي وصافن يتمعن بملامحي ، مِـنْ طال صمتة ما كدرت ما اسألة
مورفو: شبيك فدار؟
الأشيب: طاك كلبي على حضنتج

مورفو: انت هججتني من يمك

الأشيب: الله ياخذني اذا من كل كلبي

مورفو: لا تبقى تدعي ع نفسك دعواتك تضرني اني قبل لا تضرك

حضني بقوة وكأنُ شخص يريد ياخذني منه .. ضاع الكلام عند هذهِ اللحظة ومحد بينا نطق حرف بعد لما غُفينا .. ما حسيت غير الشمس طالعة وكائن يمي يناثر بوساتة على وجهي
الأشيب: طيــر الشوّك
مورفو: أممم

الأشيب: مو كافي نوم اشتاقيتلك

مورفو: نعسانه فدعوس

الأشيب: صباحي ما يـحلى اله بشوفه عيونك شلون بيه

مورفو: لازكات ما يفتحن هسه

ضحك وطبع بوساتة عليهن
الأشيب: افتحهن يَول خليني اضيع بيهن

مورفو: مابينه حيل ندور عليك اذا ضعت

الأشيب: طلع لسانها طلع

...ابتسمت وفتحت عيوني اباوعله توسعت ابتسامته وهمس
:-عـيونج احلى من سـما هـ الكون

مورفو: صباح الخير فَداري

الأشيب: صـباحي عيونج وضـحكاتج

رجعت دفنت وجهي بصدره خجلانة منه ما أعرف منين دا يجني شعور الخجل والأرتباك بين يوم وليلة كُلشي أتغيّر ..
الأشيب: نكوم نتريك لو أتريك بيج؟
- رُفعت راسي مضيگة عيوني ما فاهمة قصدة
مورفو: شلون تتريك بيه؟

الأشيب: كولي اي واشوفج شلون

مورفو: كلي شلون و اكلك اي لو لا

بدون ما يحجي شي تقرب مقبلني بعُمق ، مشدد قبضة حُضنه عليَّ ، أبتعدت عني يحجي بهمس صابني رعشة
الأشيب: هيــج قصدي

بُقيت مغمضة عيوني وساكتة حرف واحد ما كدرت أنطق وجسدي يرجف مثل بزونة صغيرونة خايفة .. بُقى محتويني لما هدأ وعضني مِـنْ خدي بخفة
الأشيب: يلا كومي

مورفو: انت ليش مارايح للدوام

الأشيب: اريد ابقى يم فراشتي اليوم

مورفو: بـس اني بعدني ما سامحتك ترا

الأشيب: شسوي وتسامحيني لعد

مورفو: ماعرف وهسه وخر عني متخاربين احنه

أبتسم وأحس نظراتة شريرة مِـنْ غُمز
الأشيب: وبالليل نرجع حَبايب مو؟

مورفو: لا مانرجع اصلا البارحة ما جنت واعية ع نفسي لان نايمه والنايم مثل الميت كلشي ميدري ولا يعرف شيصير ميصير ويا

الأشيب: كلاواتج الي جايبتها من سوك مريدي بطليها

مورفو: لا تخمط سوالفي فدعوس

الأشيب: ولك غير أموت على سوالفك أني طير كلبي

بُقى فترة طويلة يحاول يقنعني أكوم وأني النعسة ما فاركت عيوني أريد أرجع أنام بس ما سمحلي ، طَفرت روحة يلا كمت وياه ووين ما يروح ياخذني ، لازم أيدي ويفتر بيه بالبيت حسسني راح أنهزم منه ، باوعلــي بطرف عينة
الأشيب: طولها شبر وما أكدرلها

مورفو: شمسوية فدعوسي

الأشيب: صار ساعه اتوسل بيج يلا نزلتي ويايه

مورفو: غير نعسانه يا عيني

دخلنا المُطبخ وحدنا ماكو أحد والبيت هدوء ، جهزنا الريوك مع بعض وبعد ما كملنا رجع لزمني مِـنْ أيدي ووين ما يروح ياخذني .. تذكرت سالفة سيماف مِـنْ تكول ماشا وين ما يروح الدُب تمشي وراه وأنفجرت مِـنْ الضحك بدون مقدمات حتى هو أستغرب
الأشيب: هــا طبگن؟
مورفو: يا دُب أشعر بالملل
- ضحك مِـنْ فهم الموضوع
الأشيب: حتى علينا تنمرتي
مورفو: تخيلها وياية بصوت زياف

...سحبني لـحضنه مكزكز ويجعص براسي وكال
:-لك شلووون بيه اني وي هـ اللسان

مورفو: ياااابة وخر عنييي شبييييك مردتني مرد

الأشيب: يـمج ومـفرفحه روحـي عليج شلون بيه

مورفو: بس ترا بـعدني ما سامحتك اني

الأشيب: يـجي يوم وتسامحيني بس الأهم تـبقين بـحضني

مورفو: بعد ما انام يمك

...تقرب مني كلش وصار يمسد ع خدي بـحنيه واردف بهدوء
:-لـيش يـفرحة گلبي

...توترت من قربة حاولت ارجع خطوة وره بس ما سمحلي وكال
:-شـبيج ترجـفين بـنياتي

...نزلت راسي خجلانه منه واردفت بتوتر
:-ارجع لـتحبني ما عبالي هيج صعبة والله

ضحك متمسك بيه
الأشيب: شنو الصعب؟

مورفو: احس گلبي يريد ينفجر من تتقرب مني هيج مدري شيصير بيه ودا استحي منك حيل هم

سند راسة على راسي متعمد يضيعني أكثر مِـنْ ضياعي ، مستمتع وهو يشوفني خجلانة ومتوترة مِـنْ قُربة
الأشيب: خجلانة مني ياروحي؟
- ياريت لو بس خجلانة أني عند هذه اللحظة أحس أريد أختفي مِـنْ الوجود بدل لا الوقوف بين أديه .. وقبل لا أجاوبة سمعنا صوت خالة نسرين تحمحمت وهو أبتعد عني بسُرعة البرق وباوع الها يضحك
الأشيب: هــا العزيزة

نسرين: ها يمه اليوم هنا

الأشيب: اي مشتاقلكم كلت اقضي نهاري وياكم اليوم

نسرين: بعد كلبي يمه

أندار عليَّ منطيني خَبر راح يطلع وسأل أذا محتاجين شي ، هزيت راسي بمعنى ما أريد شي ، بُقى ساكت وطالت نظراتة الليّ أكلتني ، أبتسم ونزل عيونة يباوع لشفايفي بسُرعة وبدون وعيّ مني لميتهن داخل حلكي ، ضحك بصوت عالي ضحكة مِـنْ كُـل كلبة ، طلع مِـنْ يمنة بدون كلام وخالة نسرين تقربت مني تضحك
نسرين: فدوة لهيج صباح يبلش بضحكاتكم

مورفو: اني ما ضاحكه خالة

سحبتني من أيدي تضحك
نسرين: تعالي غسلي وجهج صاير طماطة
- لزمت خدودي بسُرعة اتحسسهن
مورفو: يُمة أسم الله شبي
- غُمزتلي مبتسمة
نسرين: شبي يعني غير مِـنْ الخَجل
مورفو: عـــــزة خالة شبيج؟ شو هم طلعتي مو قليلة
نسرين: والله فرحانة بيكم أني كُـل يوم بصلاة الليل أطلب مِـنْ رب العالمين يحننّ كلوبكم واحد على الثاني

مورفو: بعد عيوني الزرك والله كثرلي من هل دعاوي الترد الروح

خلصت الصُبحية كُلها هي فرحانة وتضحك وتتغمز .. وأني سايحة مِـنْ الخجل مِـنْ جهة أبنها ومن جهة هي صارت عندي عوق بمشاعري
مورفو: عفية خالة شبيـــــج ترة خَجلتيني والله
نسرين: فدوة للبنات الخَجلانات
- نهضت مِـنْ يمها أحجي بزعل مُزيف
مورفو: والله ما أكعد يمج بعد
نسرين: تعالي تعالي والله ما أحجي بعد
مورفو: هسه أنتِ فرحانة إلي لو لأبنج؟
نسرين: أثنينكم والله

سهاد: شبيجن اليوم بس تتمضحكن وتتغمزن

مورفو: ماكو شي خالة

نسرين: شبيج خل اكللها خل تفرح بيكم يمه

مورفو: خالة هو شكو شفتهمني من السالفة وتردين تفضحينه

نسرين: هو انتو مفضوحين يمه لعد هو بنص الصالة الي يتغزل ويريد يبوس ومدري شيسوي

...باوعتلها مصدومه وهي تضحك كالت خالة سهاد
:-ها يعني اكو فرخ بـ الطريق

مورفو: عزااااااااا شبييييييكم خااااالاتيييي

...ضحكن عليه واني كمت من يمهم واردفت بزعل
:-والحسين ماكعد يمجن بعد شهل فضايح هاي بدل ما تصيرن ستر وغطه

...تمشيت بـ اتجاه الدرج اريد اصعد صاحت وراية خالة نسرين
:-لج يمة غير مستانسين بيكم

...نداريت عليها اني وامشي وجاوبتها
:-مستانسة بينه تفضحينه

...بقن يضحكن واني صعدت لـغرفتي واتصلت ع الأشيب اول ما جاوبني حجيت ويا بـزعل
:-تعال ع امك وخالتك فَدار

الأشيب: شبيهن وياج يـروح فَدار

مورفو: بس يضحكن علينه وفوكاها خالة سهاد ادور فرخ

الأشيب: فرخيش بابا

مورفو: طفل يعني

الأشيب: كليلها اني فرخه الأشيب ميريد بعد

مورفو: ليش متريد؟!

الأشيب: عندي أنتِ

مورفو: لا كول ماريد اطفال منج

الأشيب: تردين تتعاركين يـنظر عيني

مورفو: لا بس هاي حقيقة

الأشيب: انـتي طفلـتي مدللـتي مكـتفي بيج ماريد شي من الدنيا بـعد

مورفو: أقنعتني

ضحك وأترخص لأن واضح كان مشغول ، بُقيت كاعدة بالغُرفة أرسم بشغف وحُب هذهِ المرة عكس الأيام الليّ مُضت .. مَرت ساعة تقريباً ورُفعت راسي على فتحة الباب ، كان الأشيب وكف بالباب ساند كتفة على أطار الباب أيد ورة ظهرة والأيد الثانية أشرلي بيها أتقرب منه ونطق مبتسم
الأشيب: طك كلبي عليج فَراشتي
- بجانبة وبكلامة وكلمة "فراشتي" الليّ أسمعها منه فعلاً أتحول فراشة بهذهِ اللحظة ، ركضت لحُضنة والفرح غامر روحي
مورفو: وأني طك كلبي عليك شوبي
الأشيب: منو هذا شوبج؟
مورفو: أنتَ ، دلع للأشيب
الأشيب: ما أكتفيتي بـ فَـدار وفدعوس؟

مورفو: ضفت هذا للقائمة هم حلو

...طلع باقة ورد من ورة ضهره واردفت بابتسامة
:-من شفت الورد تذكرت فـراشتي

...ضحكت فرحانه واخذتهم من ايده
:-اووويييي فَدااار يخبلن

الأشيب: ردت اجيبلج برتقالي بس كلت راح تضيع فراشتي يمه فـ جـبتلج ابيض حتى هو يضيع بـجمالج

...دمعت عيوني من كلامه ولطافته ابتسم وحضن وجهي بين اديه وكال
:-وعـيونج الضايع بيهن ماراح اخلي دمعة وحده تنزل من عينج غير دموع الفرح

مورفو: هيج هوايه عليه ماتحمل فَداري

الأشيب: تستاهل روحي انت طير كلبي

غُمرني بحُبة وأهتمامة وأحس فراشات متطايرة حوالينا طول الوقت ، خَلص اليوم كُلة هو يتغزل بيه ويسمعني كلام حلو يذوبني أني وكل أعضائي مو بس كلبي .. و كُـل ما يشوفني هيج يزيد بدل لا يقل كان مستمتع ومنتشي بخجلي ..
دفنت راسي بـحضنه واحس فراشات طايرات فوكانه من الفرحة، وخلص اليوم كله هو يتغزل بيه واني ميته من الخجل اول مره اخجل بـحياتي وهو من يشوفني هيج نوبة يزيد..
بعد العشاء كُنا منجمعين بالصالة وهو كعد بجانبي
الأشيب: نروح لبيت زياف؟
- بدون تفكير جاوبتة بلهفة واضحة على صوتي
مورفو: أي حبـــاب
الأشيب: يلا لعد أطفري تجهزي وتعالي

...طفرت من مكاني بسرعه واردفت بصوت عالي
:-هاي هاي كابـتن

صار يصيح وراية بضحكة مانعني من الركض بس غلست وكملت طريقي على نفس الركضة .. رتبت نفسي ونزلت هو كان يحجي بالتلفون لما كمل وطلعنا .. أول ما وكفت السيارة بباب بيت زياف أنفتحت الباب وطلع هو يهلي بينا كأنُ كان ينتظرنا ورة الباب
زياف: ول يــابة هـــــــلااا بيهم
مورفو: شلونك زيــــوف أبو زلوف؟
زياف: ولك هــــــلا بالملونة والله إلج وحشة

مورفو: محد وحش غيرك يا وحش بعدنه ما اجينه كمت تحجي علينه

زياف: شو دنجبي واسكتي

الأشيب: منو الليّ ينجب يول ابو زلوف

زياف: دخلو دخلو جوة وارد عليكم

سبقتهم أني وزياف سحب الأشيب من ملابسة مقربة منه
زياف: شو ما سلمت عليَّ؟

الأشيب: مو البارحه سلمت عليك هي يوميه

زياف: ها هم صدك يلا تفضل تفضل البيت بيتك

مورفو: لعد وين ام السوس ما تلكتنه

...دخلت للصالة وصحت بـصوت عالي
:-سيمااااااف السيفونة

طلعت من وحدة مِـنْ الغُرف تهلي بينا بضحكة
سيماف: يمة يحلي الليّ جاي علينا
- أستقبلتني بالأحضان فرحانة بجيتنة
سيماف: لج عوبة أشتاقيتلج
مورفو: ردنا نجي عليكم بس زوجج طردنا

سيماف: اطرده من البيت ليطردج بعد حيلي

مورفو: كفووووو مسيطرة

ابتعدت عني تضحك ، بعدها سلمت على الأشيب وكعدنا كُلنا بالصالة وزياف يبسمرلي
زياف: أول مرة أشوف خطار ما يستحي

الأشيب: حدد منو قصدك

زياف: عالم دخلت من الباب تصيح

مورفو: ابو زلوف والله اني اريد احترمك ليش تخليني اتجاوز عليك

زياف: شو دتجاوزي واشوفج التجاوز شلون يصير

الأشيب: وشـحدك؟!

ضحكت أرفع بحواجبي مغاورتة وهو هز أيده يباوع صفح للأشيب
زياف: وعلي أني غسلت أيدي منك ومو مِـنْ هسه مِـنْ زمان

مورفو: من شوكت

زياف: من طيح حظي وجبرني اشيل حيواناتج احير بيهن وهو يعرف بيه اتخبل من الحيوانات وابد ما اتقربلهن

مورفو: لعد شلون جنت تتقرب لـ عابد والسيد

تعالت أصوات ضحكاتهم ما متوقعين رديّ
زياف: بالقبر وما خلصو منها

الأشيب: ليش بس همه لك هي مقبرة شكبرها شكدها ما خلصت من لسانها

مورفو: ها شوبي راح اطشر اسرارنه

ضحك زياف بصوت عالي يصنف على الأشيب
زياف: لك هـــــا صرت شوبـــي

الأشيب: شبيج مورفو؟ هسه أنتِ شسويتي لعد ما طشرتيهن

زياف: اخخخخ وعلي كون اخذها فد يوم ويانه للمكتب

الأشيب: حتى أنتَ تطيح صبغك لا تتورط

سيماف: اي والله تخليكم مضحكه

مورفو: هاي شبيكم شحاجية اني

زياف: لا ابد بس شوبي وفدعوسي وفَداري وهذن كلهم بصوب و الـ عمووووو بصوب ثاني

سيماف: نسيت الدب

تحس يدورون سبب حتى يضحكون لأن بس نطقت هل كلمتين أنفجرو من الضحك وهذه حالتهم مرات تضوج ، باوع للأشيب كان بس مبتسم متعود عليهم وأني غيمت ملامحي
مورفو: كوم نرجع أشتغلو هذولة بعد ما يطفون

الأشيب: اطفيهم لـ خاطر عيونج بابا

زياف: احححممممم يمعووووود مو كاعدين

الأشيب: يطبك مرض واذا كاعد

زياف: بايعين ومخلصين

مورفو: هسه عوفك مِـنْ عندنا وكلي وين أخذت حيواناتي؟
زياف: بعتهن بسوك الغزل وفلوسهن صارت نصيبي خاف تكولين وين راحن

ما حجيت شي وما أنقهرت عليهن لأن كنت مجبورة بيهن حتى يسدن وحشة وحدتي بالبيت .. بُقينا فترة طويلة كاعدين وأكيد الكعدة ما تحلى أذا مو بأصوات ضحكاتنا الليّ تهرج البيت .. سحبتني سيماف على جهة
سيماف: ألتهو وحدكم عندنا سوالف خاصة

زياف: نميمه وحش بالعالم وتنمر غير

مورفو: ميخصك ابو زلوف

تركتة متعارك ويا الأشيب كيف زوجتة تحجي ويا صاحب روحة هيج؟ والأشيب يفور دمة أكثر مِـنْ يوكف وياية ويبقى يضحك .. تجاهلنا عركتهم وكعدنا وحدنا أني وسيماف
سيماف: شو أحس أكو شي جديد شصاير؟

مورفو: وشلون حسيتي

سيماف: نضرات الأشيب وضحكته لـسوالفج وكلامه وياج

مورفو: شو متستحين كاعده مراقبه حركات ونضرات زوجي

سيماف: انجبي حبيبتي واحجي شصاير

مورفو: العفو منج ، بس ترا هو زوجي يعني شيصير

سيماف: غبية لو تستغبين

مورفو: استغبي

سيماف: راح تجيج دفره ع عقلج لعد تعدل اسلوبج وتخليج ادمية

مورفو: العفو منج تفضلي شتردين تعرفين

سيماف: اخر التطورات شني

مورفو: زين باعي هاي مو تعتبر خصوصيات مزوجين ولازم ما احجيها

سيماف: لا هاي عادي بعدين اكلج شنو الي ما لازم تحجينه

مورفو: ها حلو لعد راح انطيها من الاخير احبه ويحبني

صفنت بوجهي لثواني وعاطت فززتني
سيماف: عـــــــــزة..!

زياف: وجع شبيج

سيماف: اوي شبييييك

زياف: ترا صار عندي اجهاض من الخرعة

مورفو: هاااا شنو شو نكلبت السالفة هو غير انت الي تـحـ...

...بعدني ممكملتها عاط الأشيب
:-نزلت ع التراااااابيييييي ما تتفاهم بعد

مورفو: ردت اكول تحبها شبيك

زياف: شوفلها حل هاي تفضحك وعلي

سيماف: عوفيهم ماعليج وكملي

مورفو: ها شكمل هو بس هيج احبه ويحبني

سيماف: شلون وشوكت لحكتو تحبون واحنه وين عنكم

مورفو: ترا صارلنه سنه سوة احنه شبيج

سيماف: اي بس كلنه نعرف طبيعه علاقتكم شنو شلون تطورت

مورفو: اي هو تعدى ع خصوصياتي وقرة دفتر مذكراتي واني جنت اخرط احجي وارجع ليورة كله ع الأشيب بس ما ذاكره اسمه وهو تخبل لـ باله عزيز وبعدين من عرف هو كال ماكدر احبج هيج اني ومن ابتعدت كام يحوص ورجع كال احبج ماكدر بدونج ماعيش اذا مو وياج ويمج يبووووو

سيماف: تحمستي شوية

مورفو: والعباس لا

سيماف: يعني من اعترفتيله رفضج ومن ابتعدتي رجع هو اعترفلج

مورفو: اي بس جان المفروض ارفضه حتى تصير وحده بوحده مو

سيماف: شهل خرط هذا شكو ما قبل من البداية

مورفو: ماتحس بـ قيمة الشي اله تفقدة

سيماف: اتفق وياج

مورفو: بس شوفي لـحجي بيناتنه احس اكو سبب وره رفضه الي لان من رجع بعدين كال اريدج وطز بـ الدنيا شيريد يصير خيصير

سيماف: لا تألفين قصص من طيـ....

مورفو: منين أألف لعد

...ضربت ع راسي بخفه وكال
:-هذا الـمن لعد

مورفو: يفكر بـ امور ثانيه

سيماف: وهسه شنو بس يحبج وتحبي لو تطورتو

مورفو: لا ما تطورنه اكثر من البوسه ومرتين بس

سيماف: ها حلوووو

مورفو: اي هسه علميني سوالف مزوجات حبابة

صابني خفقان من ضحكتها المصرية الرنانة وعاط بيها زياف زياف: لج سيماف والحسين گطعتي خلفتي

مورفو: يعني ورة الاجهاض نكطعت خلفتك

زياف: عقلج هم مزيت مو بس لسانج

...ضربه الأشيب بـ الكوشة وكال
:-لسانك هم مزيت ع مرتي ترا ما اقبل

...جر حسرة وكال
:-اويلي ع حظك زيااااف

مورفو: نازوكي ما يتحمل

زياف: منو؟!

مورفو: حظك

زياف: شبي

مورفو: نازوكي

زياف: صدك

مورفو: والله

زياف: ليش

مورفو: لان ما يتحمل

...ضحك الأشيب وكال لـ زياف
:-ماتكدر تستفزها بهذن سوالفك عدها استعداد للصبح تبقى تردلك

زياف: هسه اشوفك اصبر

رجع زياف يحجي بنفس النمط وأني مجاريتة وأجاوبة بكل هدوء ما كدرت يتحمل تنرفز وعاط بيه
زياف: يمعـــودة شبيــــــج؟
الأشيب: مو حجينا..!
زياف: من يا طينة أنتِ

الأشيب: طير الشوك من ذهب مو طين

زياف: اي مو هي اثينا بارثينوس

مورفو: منو هاي

زياف: عمج الشفية يكلج بيها عود مني

مورفو: عمي منو؟!

زياف: هـــا حلو متجاوزين العمو لدرجة ما عرفتة

الأشيب: شكد تمسلت لـخاطر ربك

هجم زياف على الأشيب يمثل العصبية
زياف: ولك شمغيرك عليَّ ****

...وصارو يتباطحون ع الكرويته وبالكاع وواحد يحجي ع ثاني تقربت من سيماف وهمست
:-باعي والله همه جبروني احجي بس ما تحسيهم ثيران هايجة

سيماف: لج عــــــزة مورفو كون يسمعونج
مورفو: أنتِ بس سدي حلكج ومحد راح يسمع

سيماف: لعد لو ما زوجج ع كولتج

مورفو: والعباس احترمه اني بس همه جبروني هسه دباعي شكبرهم ومتعاركين

سيماف: اي زياف يغار ع الأشيب منج يكول من اجت مورفو اخذته مني

مورفو: ترا زياف مو زوجه الأشيب واني اخذته منه بعدين مو دا يداومون سوا من الصبح لليل وين ماخذته منه

سيماف: غيرة الصحبة صعبة اقوة من غيرة النسوان

مورفو: باعي خل احجيلج ع يميييين يساااار

سيماف: شنو هاي

مورفو: هاي رادت تصير ضرتي

بدأت أسردلها كل الأمور الليّ صارت بالحرف الواحد حتى ردات الفعل مني ومنها ومن الليّ كاعدين .. هي طول الوقت كانت تضحك وبنهاية الحديث صارت ترافس مِـنْ الضحك تحسها مُصابة بصرع .. حتى بعد ما كملت السالفة هي ما سكتت
مورفو: شبيج تــرة ما تستوجب هلك.!
سيماف: زين باعي الأشيب شلون بقى ساكت وأنتِ هيج تحجين؟

مورفو: اي اتوقع كال خل اسكت واستر ع نفسي لان يعرف لساني مزيت

رجعت تضحك ضحكتها المفضوحة ، نهضت من مكاني مقررة نروح ونتركها تضحك براحتها .. رجعت على الأشيب
مورفو: شوبي نروح؟

...غمزلي زياف وكال
:-ننطيكم غرفة وابقو يمنه

...دفرة الأشيب ونتر بي
:-ليش تحجونها وبعدين تحجون عليها

زياف: ترا سالفتها هاي

الأشيب: قصدها شريف بس انت قصدك وصخ

زياف: وعلي هي نيتها جانت بـ الخيسه

نهض الأشيب ولزم أيدي حتى نطلع
الأشيب: يلا يابة نشوفكم بخير
- طلعنا وهُمَ ويانة ، أندار عليهم الأشيب طالب منهم يرجعون
الأشيب: أرجعو أرجعو هسه تشتغلون بالباب وتفضحونا شيطفيكم بعد

زياف: ولكم ياااابة هلا بيكم يوميه هيج وقت

مورفو: شكرا الله يهلي بيك

زياف: بعرتها

الأشيب: لا تخاف عار كلشي ماعليك

ودعناهم وصعدنا سيارتنا راجعين للبيت ، وقبلها وكف السيارة قَريب مِـنْ نهر ديالى وسحب أيدي باسها بعُمق
الأشيب: لذة شبابي الليّ أنحرمت منها أنتَ
- نزلت عيوني خجلانة وشعور غريب أجتاح كلبي طير بي فراشات، أحتضن وجهي بين كفوفة الدافية
الأشيب: أحجي شي ضيعيني بسوالفج

مِـنْ لاحظ كمية الخجل الليّ صابني والتوتر الليّ وضح برجفة أيدي أبتسم لام أديه بين كفوفة
الأشيب: ننزل لو نبقى بالسيارة؟

مورفو: ننزل وتحضني مثل اخر مره اجينه

أتوسعت أبتسامتة مِـنْ طلبي ونزلنا ، كعد على بنيد السيارة وسحبني بين رجليه ساند ظهري على صدرة
الأشيب: فراشتي الليّ ترد الروح ، فَـدار يموت عليج
- ميلت راسي مقبلة خدة بخفة
مورفو: روح فراشتك أنتَ فَـداري

الأشيب: بعد شيباتي أنتِ

...ابتسمت ع حجايتة واردفت
:-اروح فدوة لـ شيباتك

الأشيب: طير الشوك

مورفو: عيونه

الأشيب: اريد اشوفج بـ البدلة البيضة

دارني عليه مِـنْ بُقيت ساكتة ما عرفت شجاوبة
الأشيب: أريدج تدخلين بيتي وأنتِ عروسة الأشيب مِـنْ صدك هذه المرة
مورفو: البارحة حَبيتني واليوم تريد تتزوجني؟

الأشيب: يا البارحه حبيتج بابا لج اني ميت بيج من صار راسي يوجعني اذا ما اسمع لغوتج

مورفو: مو ع اساس جنت بنتك

الأشيب: واريدج وحدج تكونين كلشي حلو بـحياتي

ضميت راسي بصدرة سايحة وهو يضحك
الأشيب: اموت على اليخجلون اني

مورفو: شو طلعت رومانسي حيل وتخجلني

الأشيب: شتردين اصيرلج

مورفو: وضعي هسه مثل من جان عندي امتحان صعب حتى روحي ترجف

الأشيب: أنتِ لسانج بس بـالتجفص والعركات شطولة وهسه يم الأشيب حرف حلو ماكو

...رفعت راسي عليه خازرته ونترت بي
:-ليش ناكر الجميل انت ترا قبل ثواني كتلك روح فراشتك انت فَداري لو مو حلوه هاي

الأشيب: كلشي أسمعة منج يخبل

بُقينا على هذا الحال يا يتغزل بيه ويضيعني يا متعاركين يا نضحك .. بعدها رجعنا للبيت طلب مني أسبقة للداخل وهو بقى بالسيارة .. مِـنْ دخلت مِـنْ باب المطبخ كان عزيز كاعد وباوعلي صفح
عزيز: ها ما كدرتي تصبرين؟
مورفو: أشش لا يسمعنا

عزيز: وينه هو

مورفو: هسه يجي ورايه

...ضحك وهمس بهدوء
:-اعترف مو

هزيت راسي بأيجابية والبسمة مرسومة على وجهي
عزيز: بس ما حركناه هواية ترة

مورفو: اي بس البقية عليه راح احركه شويه اني

عزيز: وشلون

مورفو: خصوصيات ميصير تخلي خشمك بحياة مزوجين

ضحك بصوت عالي أتوقع حتى الأشيب سمعة
عزيز: حقج يابة حقج
- تقربت منه عيني على الأكل الليّ كدامة
مورفو: شداتاكل انطيني
- دفع ماعون الكرزات مقربة مني
عزيز: ولو أنتِ ما تنطيني بس ميخالف

مورفو: مو اني ماحب انطي بس انت عادي تنطيني

...رجع سحبه الماعون من كدامي واردفت بضحكه
:-لا مو عادي اني هم ما انطي بعد

مورفو: اووووي عزوز لا تصييير نحييييس

...بقى مبعده عني ورافعلي حواجبه
:-چؤچؤ مانطي بعد توكلي

أنداريت ناحية الباب من أنفتحت ودخل الأشيب
مورفو: فَـدار أحجي وياه
- تقدم الأشيب أحتضني مِـنْ أكتافي وطبع بوسة على راسي حسيتة دا يغث عزيز بهذهِ حركتة
الأشيب: شبي وياج ياروح فَـدار؟

مورفو: ميقبل ينطيني كرزات

الأشيب: ليش عزيز متقبل تنطيها

...رفع عينه عزيز ع الأشيب واردف بـ استفزاز
:-وين اكو حلو ياكل موالح

محد يكدر يوصل عزيز بالأستفزاز ومن كلام الأشيب وياه واضح وصل مرحلة فقدان أعصابة وبأي لحظة يهجم عليه
الأشيب: صار عندك أنذار والليّ وراه راح يكون أنذار نهائي عزيز

عزيز: اليجي من ايدك عسل ع كلبي ابن عمي

حسيت الجوّ تكهرب بيناتهم عصبية الأشيب وأستفزاز عزيز مثل النار والبارود ما يتوالمون أبد ، مِـنْ جهة عزيز دا يحاول يحرك كلبة علمودي أو يمكن علمود نفسة والأشيب دا يستصعبها أبن عمة يتغزل بزوجتة كدامة وما يكدر يأذي بقوة لخاطر خالة نسرين ..
أنداريت على الأشيب حاولت أمتص غضبة وأبتسمت
مورفو: أصلاً أني ما أحبهن بس عناد بي ، أمشي نصعد نعست
- مشى وياية بدون ما يحجي شي ومن صرنا كدام غرفتنا غيرت أتجاه خطواتي ناحية غُرفتي ، صاح وراية الأشيب مستغرب
الأشيب: ويـــن؟
مورفو: لغُرفتي غيـــر
الأشيب: مكانج يمي مورفو

مورفو: هاي من جنت بس بنياتك انام يمك بس هسه من اعتبرتني زوجتك ماكدر انام بغرفه زوجتك السابقة بعد

بهتت ملامحة وما نطق حرف واحد ، أبتسمت ورفعت نفسي طابعة بوسة على خدة
مورفو: تصبح على خير فَـداري
- وهذا الليّ كان لازم يصير مِـنْ البداية ، تركتة ودخلت غرفتي أخذت ملابسي وطلعت للحمام سبحت ورجعت كان هو موجود ، مِـنْ ألتقت نظراتنا باوعلي ببرائة
الأشيب: عرفتي مزعجة عادي أبقى يمج؟
مورفو: وشبيها مزعجة؟
الأشيب: ما أعرف مدا أرتاح بيها أحسها خنكة

مورفو: امممم افتح الشباك يفوتلك هوا لعد

الأشيب: فتحته وما فاد

مورفو: انزل يم خالة نسرين

الأشيب: نزلت ومتريدني

مورفو: نام بـ الصالة

الأشيب: لا ماكدر انام بـهدوء اذا ماكو وحده تحوص بـحضني الليل كله

مورفو: قصدك نومتي مزعجه

الأشيب: الأزعاج الي يرتاحله كلبي

مورفو: اووووي فدعوووس راح احبك

وكف كدامي ونزل راسة لمستواية وهمس
الأشيب: وأني أحبج هواية

بعد ما تصافينا وقبلت ينام يمي طلب مني يمشطلي شعري ، بس ردت ظفيرتين بدل الوحدة
مورفو: أريد أثنين

الأشيب: ماعرف بس وحده اني

مورفو: اي هي نفسها بس اقسم شعري واظفر وحده منا ووحده منا

الأشيب: نظفر يروحي شعندنا

كعد ساعة ما أعرف شيسوي ويقسم بشعري ويظفر ويفتح ولعب براسي طوبة يلا كمل ، لزمهن بأديه اثنيهن منا ومنا يضحك
الأشيب: يمة فدوة للظفاير الحلوة
- نهضت أريد أشوفهن بالمرآيا بس ما سمحلي
الأشيب: الصبح شوفيهن مورفو

مورفو: ليش خليني اشوف هسه

الأشيب: اذا شفتيهن هسه ما راح تخليني انام يمج اليوم

...ضيكت عيوني عليه واردفت
:-يعني مصخمه مووو؟!

الأشيب: هههههه لا شبيج والله حلوات

مورفو: عوفني اريد اشوفهن لعد

...وبعد عركه ساعه يلا عافني وخلاني اشوفهن صفنت ع نفسي بـ المرايا وهو واكف ورايه ويحاول يعدلهن ويحجي
:-شبيج والله حلوات بس هاي الخصله تعاركت وي اختها وطلعت عن الطريق ماكدرت ارجعها لان عرمه

مورفو: تحجي صدك فدعوس نكسر ظهري صار ساعه كاعده تالي وحده نازله وحده صاعده وبيهن انفجار فوكاها

الأشيب: اي حبيبي تغير شويه شبيج والله يخبلن عليج

مورفو: اطلع برا حبيبي ولا تشوفني وجهك بعد

الأشيب: كولي غيرها بنياتي

مورفو: لا بنياتك ولا اعرفك ولا تعرفني بيناتنه المحاكم منا وهيج

الأشيب: شسوين بـ المحاكم واحنه ما عاقدين عقد محكمه

مورفو: طبعا طبعا تريد تضيع حقوقي

الأشيب: هل ايام نعقد بنياتي جنج ع حقوق

مورفو: انطيني رقم يمنى اريدها تصير محاميتي

الأشيب: قصدج يسرا

مورفو: شووو دافعلهاااااا خييييييييرك

الأشيب: دخيلك ياعلي وين مدافعلها

مورفو: لو تحبني صدك جان تنمرت وياااااي عليهاااا مو تصححلي اسمها

الأشيب: تروحلج فدوة

مورفو: كلاواتك هاي

...بعدني ممخلصه حجاهن بصوت عالي
:-كلاواتك هاي الي جايبها من سوك مريدي بطلهن

مورفو: لا ردت اكول ما تمشيهن عليه

الأشيب: شبيك ويايه طير الشوك بس تريد تعاركني

مورفو: لان انت متحبني شفت شلون تغيرت عليه هاي كلها نتيجه الزواج

الأشيب: هـــا رجعنا على طلابة الزواج

مورفو: اي رجعنه لان كله من ورا الزواج دايصير بينه هيج

الأشيب: ليش مو من وره لسانج

...صفنت عليه واشرت ع نفسي واردفت بصدمه
:-لساني؟!

...هز راسه يضحك رجعت سألته
:-قصدك لساني لسان دلاله

الأشيب: لا

مورفو: مشاكلك ذبيتها براس لساني مو

الأشيب: لا

مورفو: تراااا انت كلت فَداااااااار

...جاوبني بصوت ذايب
:-يروحه وراحته لـ فَدار يـنظر عينه لـ فَدار يبعد طـوايفه لـ فَدار

ومطرني بالكلام الحلو والقُبلات الليّ نستني الدنيا ونفسي مو بس كلامي وعركتي وياه .. ضمني بحُضنة محسسني بالأمان الليّ يخليني أنام بعُمق .. الصبح كعدني منطيني خبر راح يروح للدوام وقبل لا يطلع صار يبوس بوجهي بقوة
الأشيب: هذن البوسات تصبيرة لما أرجع
مورفو: لا تعنفني هيج فَداري مدا تبوس بواحد من جنودك
الأشيب: روحي تفرفح عليج ماتحمل

بعدها طلع وتركني ورجعت أني كملت نومتي .. ما حسيت غير الظُهر على صوت تلفوني وجاوبت بدون ما اقرأ الأسم
مورفو: نعم

الأشيب: احلى نعم اسمعها بحياتي

مورفو: ههههه مادري انت

الأشيب: غير تشوفين منو يلا تردين لعد

مورفو: هنه 5 أرقام بجهازي مو غربه كلهم

الأشيب: راجع اني بـ الطريق محتاجه شي يروحي

مورفو: اي

الأشيب: آمريني يبعد طـوايفي

مورفو: من تجي تعرف

الأشيب: يمكن نفس الليّ محتاجة أني

مورفو: ليش شمحتاج انت

الأشيب: من اجي تعرفين

مورفو: هههههههه صاير لوتي فدعوسي

الأشيب: كومي كافي نوم يلا منو يتلكاني اذا انت نايمه

مورفو: يلا باي باي كايمه

نهضت بسرعة فتحت ظفاير الأشيب الليّ صاير بيهن أنفجار وظفرت مِـنْ جديد ، غسلت ورتبت نفسي ونزلت بعدني على الدرج وأسمع صوتة بالمُطبخ ، باقي خطواتي صارت ركض وهو صار بوجهي طالع مِـنْ المطبخ يضحك
الأشيب: لا تركضين
- وكفت كدامة رافعة راسي عليه
مورفو: أشتاقيتلك فَـداري

...طبع بوسه ع راسي وكال
:-اصعدي وياي اشوفج شلون مشتاقلج اني

مورفو: بدون سوالف سربوتيه فدعوس

الأشيب: متسربت وي هند آكلت الكبود غير وي مرتي

مورفو: صرت تتنمر انت هم

...ضحك وحضني من اكتافي مصعدني ويا مادخل لـغرفته اخذني لـغرفتي وحضني بقوة رافعني عن الكاع واردفت
:-لك هو اني شمصبرني ع حياتي غير هل ملكى اليرد الروح

...ضحكت بصوت عالي من صار يفتر بيه بـ الغرفه، نزلني وطبع بوسات متفرقه ع وجهي واردف بابتسامه
:-نعمة ربي الي أنتِ

وعشنا يوم ثاني ونحن واحدنا ضايع بالثاني ، وأكثر أثنين فرحانين ألنا خالة نسرين وسهاد .. كلشي كان حلو والأمور كلها تمام ماكو أي عُقبة بحياتنا لحد ما إجة اليوم المشؤوم ..!
دخل روار وعلامات الأستغراب على وجهة
روار: عَم مورفو بالباب
- كنت أضحك بهذهِ اللحظة أختفت ضحكتي وصابني خفقان مِـنْ طاريّ ، عصر أيدي الأشيب محاول يطمني
الأشيب: أبقي هنا لا تطلعين

نهض مِـنْ مكانة بهمة طالع ويا روار حتى يشوفون عمي ، وأني بقيت كاعدة ملامحي أكتساها الخوف حتى مِـنْ سألتني خالة نسرين أذا أني زينة؟ ووضعي تمام؟ ماكدرت أجاوبها ..
كنت خايفة مِـنْ جيتة رغُم أعرف الأشيب مستحيل ينطيني إله ، مُضت نص ساعة تقريباً ودخل روار عينه عليَّ
روار: تعالي مورفو الأشيب يريدج
- دخلوه للأستقبال وأني رحت يمهم كان بس عمي وحده جاي ،
أشرلي الأشيب أكعد بجانبة
الأشيب: عمج يريد يحجي وياج وأذا ما تردين كولي
- ما رفضت الكلام وياه وصارت عيني على عمي الليّ عيونة مليانة دموع بشكل غَريب يحجي بغصة
عبد: شلونج بابا صبا؟

مورفو: زينه

عبد: ادري غلطان بحقج وحتى مالي عين اجي واحجي وياج بس يابنتي والله متندم واسف ع كل لحظه ضاعت من عمرج متعذبه بيها واني موجود وهسه ماريد شي والله بس اريد ابقى ع تواصل وياج واريد تحسين عندج اهل وعم بظهرج

رفع أيدة عاصر عيونه بسرعة من نزلت دموعة ، بُقيت بحيرة مِـنْ أمره ، أنداريت على الأشيب وهو بسرعة نطق
الأشيب: الليّ تردينه أي وياج بي

...نكسر كلبي ع عمو عبد بـ الرغم اني هم بجيت يمه قبل وتوسلتهم بس ما انكسر كلبهم عليه، رفع راسه عليه وكال بصوت مخنوك
:-والله ضميري يعذبني وامنيه حياتي صارت تسامحيني

...كمت من يم الأشيب كعدت يم عمو عبد واردفت بهدوء
:-لا تبجي عمو اذا رب العالمين بعظمته يسامح اني منو حتى ما اسامح

سحبني لحضنه وبقى يبجي واني هم نزلت دموعي بسببه ،
أبتعد عني بعد فترة يسمح بوجهة
عبد: ما تروحين وياية لعد تشوفين بنات عمج؟

الأشيب: لا متروح

نطقها بسرعة بدون تفكير وبدون حتى ما يسمع رأيي ، مِـنْ صارت أنظاري عليه رُفع حواجبة يحذرني أقبل
عبد: باجر حفلة بنت عمها راح تتزوج خليها تجي يمهن تفرح وياهن وأذا على ماهر ماكو بالبيت لا تخاف
- بُقت عيني على الأشيب وهو سأل
الأشيب: تردين تروحين؟
- مِـنْ بعد صفنة ثواني وتفكير قررت أقبل
مورفو: بس تجي تاخذني باجر
الأشيب: أني أوصلج وأني أرجعج

عبد: لا المن متعب روحك ابني اني اجيت بسيارتي وباجر انت تعال اخذها اذا تريد

نهض الأشيب مترخص منه وأشرلي أطلع وياه ، صعدنا بغُرفتنا وأول ما دخلنا سأل
الأشيب: شلون راح يهون عليَّ أدزج وياه؟

مورفو: بس اليوم فَدار كلش حابه اشوف بناته

الأشيب: والله كوة عليه مورفو

...تقربت حضنته واردفت
:-باجر تعال اخذني فَداري

بادلني الحُضن وهو يوصيني الآف التوصيات ، بعدها طلع جنطة صغيرة وصار هو يخلي ملابس وعطور وأي شي مُمكن أحتاجك
الأشيب: تحتاجيهن هناك
- أبتسمت على حنيتة وبُقيت واكفة بمكاني منتظرتة يكمل
مورفو: شنو تريد تخلص مني دا تلم بجُنطتي.

الأشيب: ماريدج تحتاجين اي شي منهم فـ داخليلج اشيائج الي تحتاجيهم

بعد ما كمل رجع يعيد بالتوصيات وصار يودعني كأنُ رايحة بدون رجعة ، وصلني لسيارة عمي وبُقى واكف لحد ما أختفينا عن أنظارة .. تحركت سيارة عمي متوجهة لبيتهم وأني حاولت أفتح حديث وياه وسألتة منو الليّ راح تتزوج ووين وصلو بالدراسة وهو متجاوب وياية .. شعور حلو لامس قلبي بهذهِ اللحظة وأني أتخيل لقائي بيهم ويحبني بعد ما كانو يكرهوني بالصُغر ..
لفت أنتباهي الطريق غير طريق بيتهم وسألت مستغربة
مورفو: وين رايحين؟
عبد: أتحولنا مِـنْ بيتنا القديم عمو

مورفو: ليش شعجب جان حلو بيتكم

عبد: بعد ما توفت خالتج ريما طلعنا منه

سكتت ما ناقشتة لما وصلنا البيت ومن الخارج كان واضح حديث البناء .. نزل هو وأني أمشي وراه ومن دخلنا البيت كان فارغ مابي أحد .. تمشيت كم خطوة متفحصة المكان وأنداريت عليه متسائلة
مورفو: لعد وين البنات؟

...باوعلي بـ عيون دامعة وكال
:-اسف صبا بس ابني اهم منج

...بقيت صافنه عليه ممفتهمه لما سمعت صوت عثمان ورايه يكول
:-رجعتيلي فـراشتي

يتبع ..

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105