الأشيب الفصل الثاني وثلاثون 32 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

تضارب بين الأفكار والمشاعر ، بين العقل والقلب ، بين رغبة البقاء والأبتعاد بنفس الآوان ، هذا الصراع الليّ دا يعيشة عزيز بهذه الفترة ، حاول يبتعد عني وبأيدة قربني مِـنْ الأشيب بس ما كدر يطلعني مِـنْ عقلة ، كلامة جَمدني بمكاني ودموعي نزلت بقهر وخوف بسبب المشهد الليّ كدام عيني ، ضرب على راسة بقبضة أيده ونطق كلماتة بقهر
عزيز: لـــج هنا عايشة أنتِ ، أذا عقلي مدا يكدر ينساج شلون كلبي راح يكدر فهميني؟
- نهض مِـنْ مكانة متقرب مني بس مِـنْ خوفي رجعت خطوة للخلف ، توقف وميل راسة مردد شعر بغصة
عزيز: "يـا صدفة التـلمني وياك وأشـريها بـثمن عمري"
- أنفتحت الباب بهذا الأثناء ودخل الأشيب ، أندارينا أثنينا عليه بس هو عيونة كانت متشخصة على عزيز محتقن ، خُفق كلبي مِـنْ الموقف بس عزيز بدل لا يهدأ الوضع زاد الطين بَلة مِـنْ أبتسم موجه كلامة لفَـدار
عزيز: أخذتها مِـنْ الليّ ماندل دربة إلا بملگاها

كان مقصد كلامة "الأشيب أخذنـي مِـنْ عزيز الليّ ما مشى بالطريق الصح إلا يوم عرفني وحَبني" ، بس هذه أوهام لعقلة وتحدي مع نفسة كيف ما حصل شي هو يريدة.. ما جاوبة الأشيب وكل الليّ سواه تقدم سحبني وياه حتى نطلع مِـنْ المطبخ بكل هدوء ، بس خطينا خطواتنا لخارج المطبخ صاح عزيز بقهر
عزيز: لك شســوي بعد شســوي.! صار شهر شامر نفسي بنص الموت وما متت وخلصت شســـوي؟

دفعني الأشيب بخفة ناحية الدرج ونطق بنفاذ صبر
الأشيب: أصعدي للغرفة
- لزمت أيدة خايفة تصير عركة بيناتهم وخايفة يأذي عزيز وهو بلحظة عصبية
مورفو: عوفة فَـدار أمشي أصعد وياية
- صاح بيه بعصبية غير متوقعة
الأشيب: كلت أصعـــــدي صَـبا

تمشيت بأتجاه الدرج وهو دخل للمطبخ وسد الباب ، بقيت واكفة بمكاني أريد أعرف شراح يحجون وشراح يصير بس كانوا يحجون بهدوء ما سمعت أي كلمة مِـنْ حديثهم لحد ما صاح الأشيب بغضب
الأشيب: ولك شسويلك أنطيـــــك مرتي حتى أريــح كلبك لو شنــو فهمني؟ مو خبلتنـــي..!

بعدها أختفت أصواتهم ، ما أعرف ليش خفت الأشيب سوة شي لعزيز بعد هذا الصياح والعصبية المُفرطة .. أسرعت بخطواتي ناحية المطبخ وفتحت الباب بدون تردد ، جمدت بمكاني مِـنْ شفت الأشيب حاضن عزيز الليّ يرجف بقوة .! صارت عيني بعين الأشيب وخزرني لأن دخلت عليهم وهو طلب مني أصعد ، بدون كلام درت ظهري صاعدة لغُرفتي وتاركتهم ، بُقيت واكفة بنص الغُرفة أبجي والرجفة ما فاركتني شعور غريب وموجع .. أستصعب أنسان يتأذى بسببي وبنفس الوقت ما بأيدي شي. مَرت دقايق وإجة الأشيب كانت نظراتة غريبة بهذهِ اللحظة صَعب عليَّ تفسيرها ، تقدم حضني بهدوء وأني أنهاريت بين أديه ، شدد قبضتة أكثـر وهمس
الأشيب: ليش تبجين؟
- جاوبتة بشهگة
مورفو: شلون راح يبرد كلبة هذا؟ والله روحي تنمرد مِـنْ أشوفة بهذا الحال ، مو كد هَالعذاب أني الليّ بيه كافي والله كافي

الأشيب: لا تبجين حبيبي مو ذنبج هذا

حاولت أبتعدت عنه متوجهة للحمام بس منعني من سحبني مرجعني بين أديه
الأشيب: لا تبتعدين ذبيّ تـعبج بـحضني
مورفو: عوفني فَدار
الأشيب: احجيلي الليّ بكلبج لا تسكتين
مورفو: الليّ بـكلبي أريد اموت وأخلص

*الأشـــيب ..
نطقت جُملتها ببرود فزز الخوف بكلبي ، فكرة وطاري الموت ترجف روحي عليها ، بُقيت صافن مِـنْ صدمتي بكلامها لحد ما سحبت أيدها مِـني ترجف؛ دفعتني مِـنْ صدري بقوة وعاطت مفرفحة تلوم بيه
مورفو: كُله بسببك ليــــش ما عفتني أمــوت ليــــش؟
- تهسترت وصارت تقاوم وتدفع بيه مِـنْ حاولت ألزمها ، وتكرر نفس الحجاية "أني سبب عذابها هسه لأن ما تركتها تموت" ، حاولت أسيطر على حركتها أحتضنتها بقوة وهمست يم أذنها
الأشيب: أشش مورفو ، المفرض توكفين وياية حتى نساعدة ونريح كلبة مو تضعفين وتنهارين مِـنْ حجايتين
- ما جاوبتني أستمرت ترجف مثل السعفة بين أديه وبس صوت أنفاسها مسموع ، ما أبعدتها عني إلا مِـنْ هدأت ، أحتضنت وجهها بين كفوفي مبرر وموضح إلها الليّ صار ودايصير
الأشيب: ما أخذتج مِـنْ أحد أني ، مِـنْ البداية أنتِ بنياتي وهسه زوجتي ، كنتِ وما زلتي شي يخُصني وبس ، عزيز مو أول شخص يحب وما يحصل الليّ يحبة لا تبقين تلومين نفسج

مورفو: شلون تريد ارتاح واني كاسره كلب بس الله يعلم بحالة

الأشيب: ساعديني نداوي لعد

مورفو: وشلون نساعده شنكدر نسوي وهو قافل

الأشيب: خليني افكر واكلج بعدين شلون نكدر نساعده

هزت راسها بقبول وأني روحي أشتعلت بسبب دموعها ، صرت أمسح بيهن بهدوء متوسلها بنبرة صوتي
الأشيب: لا تبجين دموعج نــار على كلبي

ألتزمت الصمت مغيمة ، أخذتها وياية للحمام غسلت وجهها وگرصتها مِـنْ خدها مبتسم على شكلها
الأشيب: شو صاير عندج طنگورة؟

..خزرتني وكالت
:-دم يسرا بيه شتتوقعني اصير

الأشيب: أنتِ كلشي راح تذبي براس يمنى؟
- بلحظة تغيّر مزاجها وضحكت مبتهجة
مورفو:شنــو هاي فدعــوس والله راح احبك

دنكت لمستواها طالع بوسة خلف أذنها بهدوء
الأشيب: ليش هسه ما تحبيني؟
- بُقت ساكتة حتى نفسها گاطعتة ، حاوطت خصرها بأيد والأيد الثانية تخلخلت نهاية شعرها
الأشيب: ما تحبين فَـدارج؟
- كُـل كلمة و كُـل لمسة كان بقصد أفزز كلبها مرة ثانية لـ فَـدار ، كنت أحاول شكد ما أكدر أقربها مني وأكسر كُـل الحواجز الليّ بيناتنا ، حسيت عليها قبضت أيدها على قميصي بقوة وهمست بشهگة رافضة قُربي
مورفو: عوفنــي عمو لا

صعب أوصف الخوف الليّ حسيتة بنبرتها ، عرفتها تذكرت عُثمان الليّ ما فارك أحلامها وما مَر يوم نامت مرتاحة بدون لا تتوسل بي هي ونايمة "يعوفها ويبتعد عنها" ، أنعصر كلبي مثل عصرة القميص الليّ بين أديها ولو كان شي صلب كان تحطم مِـنْ القوة .. ناثرت قُبلات على وجهها
الأشيب: أنـي فَـدار مورفو
- مِـنْ رُفعت راسي رايد أشوف ملامحها كانت مغمضة عيونها بقوة وكأنُ فاقدة تركيزها هـي وين.! مسدت على خدها بقصد أخليها تركز وتعرف أني منو
الأشيب: أفتحـي عيونج حبيبي شوفيني أنـي فَـدارج

فتحت عيونها تباوعلي بخوف ورهبة ، كرصتها مِـنْ خدها مبتسم حتى أسحب خوفها وأطمنها
الأشيب: أنتِ بنياتمن؟

...همست بصوت يرجف
:-بنيات الأشيب

الأشيب: وزوجـتمن

مورفو: زوجة فَدار

الأشيب: ماكو غيري يمج محد يكدر يتقربلج بعد لا تخافين

..نزلت عيونها وكالت
:-ابقى احجي ويايه حتى يبقى صوتك براسي وما انسى أنت فَدار

شلتها بحُضني مطلعها مِـنْ الحمام ، نزلتها بفراشها وبُقيت أمسد على خدها منتعش بنعومتة وملمسة الحريري
الأشيب: أفتحي عيونج باوعيلي
- فتحت عيوني تباوعلي بنظرات نعسانة ، أبتسمت على جمال ملامحها وشكلها بهذه النظرات ، خليت أيدي على كلبها الليّ ينبض بقوة كأنُ يريد يطلع مِـنْ مكانة
الأشيب: شصار بكلبج؟

...توسعت ابتسامتها وضمت راسها بـ صدري وكالت
:-دا يهلهل

الأشيب: يـعني فز لـ فَدارج؟

...هزت راسها بـ ايجابية وضمت نفسها كلها بـ حضني ضحكت وهمست بتلاعب
:-خجلان طير الشوك

...ضربتني بخفه واردفت بدلع تجر الكلمه جر
:-لاااا تخجلنييي فَدااار

الأشيب: أنــي شلون ويا دلعك شلــون؟

رفعتها خليتها معتليتني رفعت راسها تباوعلي بنظرات مليان حُب ، عاضة شفتها السفلية وشعرها متناثر على أكتافها مِـنْ الجهتين أتمنيت الزمان يوكف عند هذهِ اللحظة وأبقى أتأمل باللوحة الفنية الليّ كدام عيوني ، كلها بجهة وعيونها بجهة
الأشيب: أموت على لَمعة عيونج مِـنْ تشوفيني

..ميلت راسها بخفه وكالت
:-عيوني المـيتة بـتفاصيلك

الأشيب: طايـرة بـكلبي أنتِ فـَراشتي

مورفو: فراشتك الي خسرت عمرها وربـحت بيك

ضميتها بقوة لصدري أريد أضمها بين أضلوعي ، مو بس خوف وأنما تصيبني رجفة روح مِـنْ فكرة أبتعادها عني .. مو بس منطي وعد لنفسي وحتى حلف حالف أعوضها عن كُـل عذاب عاشتة ، أخليها تطغى بالدلال دامني عايش .. بقيت ألعب بشعرها بهدوء وهي تغفي وتحجي بصوت نعسان تسلب روحي وتاخذ عقلي بنبرتها
مورفو: لا تنطيني لأحد فَـدار
الأشيب: ضامج بروحة فَـدار ما ينطيج

مِـنْ يوم الليّ طلعتها مِـنْ المُستشفى كانت هذه أول مرة تقبل تنام بقُربي .. شكد غُفينا؟ ما أظن هواية وكعدت على صوتها تكعدني وتحجي بغصة تريد تبجي بس مقاومة ، توقعت شافت كابوس كعدت على حيلي ناطق كُـل الكلمات الليّ مُمكن تخليها تأمن وما تخاف وتحس أني بجانبها ، بس صدمتني مِـنْ مسدت على جهة كلبي ونطقت بشهگة محررة دموعها
مورفو: ليش مروان كلك أنجلطت بسببي؟ تأذيت مو؟
- ما ردتها تعرف لأن راح تبقى تلوم نفسها وتحس هي السبب بس مروان ما سيطر على لسانه وهسه ما أكدر أكذب عليها
الأشيب: خفيفة حبيبي ، هذا أنـي كدامج مابيه شي

ما أقتنعت وجبرتني أحجيلها كُـل الليّ صار بأدق التفاصيل ، عجزت أقنع عيونها تبطل دمع بهذه اللحظة ، صارت تطبع بوساتها على جهة كلبي مثل الطفل الليّ مقتنع الجرح يطيب بالبوسة ، أبتسمت محتضن راسها شادها لكلبي أكثر
الأشيب: هي البوسة تطيبة بس دموعج تأذيّ والله

بُقت ساكتة نظراتها تشرح أحساس بذنب مو هي سببة
الأشيب: تتوقعين معزتج شوية عندي؟ مورفو أني أنتهي مِـنْ بعدج وحق قمر بني هاشم ، أذا لهذه الدرجة خايفة عليَّ أرجعيلي مورفو القديمة بنياتي أم الضحكة الحلوة
مورفو: أرجع مثل ما تريد بس لا تتأذى أني أخاف أعيش بدونك فَـدار

والكُل ملاحظ خوفها بدون فَـدار ، أجتها أيام للحديقة ما تطلع بدوني ودائماً منعزلة وخايفة ، تخاف تعيش ظرف مُشابهه لليّ عاشتة .. وحقها منو يتحمل كُـل هذهِ المُعاناة وبعدها ما داخلة عمر العشرين؟ كُـل ما أقنعها تسكت ترجع تنفجر مِـنْ البجي مرة ثانية ، حرت شلون أتعامل وياها نهضت مِـنْ مكاني شايلها بحُضني متوجه بيها للشُباك فتحته ونطقت بتهديد مُزيف
الأشيب: تسكتين لو أشمرج مِـنْ الشباك؟

صُفنت بوجهي لثواني بعدها ضحك بصوت عالي رغم دموعها الليّ مغرگة خدها
مورفو: شكد حلو مِـنْ تصير عنيف
الأشيب: المفروض تخافين يول
مورفو: تريد أخاف منك وأنتَ أمان روحـي؟

جُبرتني أبتسم وتبخرت كُـل ملامح الغضب والعصبية المزيفة ، شُمرتها بالهوى ورجعتها لحُضني وروحي رفرفت لضحكتها ، طوقت رقبتي بين أديها الناعمات
مورفو: الله شكد حلو حلقت بالهوى ، أشمرني مِـنْ الشُباك خليني أعيش الشعور مرة ثانية
الأشيب: أرخي أيدج لا تلزميني ولا تخافين

رخت أديها منصاعة لكلامي ، وبسبب نعومتها ووزنها الليّ بخفة ريشة كانت شمرتها بالهوى سهلة كأنُ الليّ بين أديك طفل بعُمر أشهر، صرت أشمرها بالهوى وطغت ضحكاتها على هدوء الليل وضافت لِـ ليلي وحياتي نگهة ما إلها مثيـل .. بعد ما تطمنت عنها تغيّر مزاجها وتقبلت الأمر رجعتها لفراشها الليّ بين أديه .. نامت مُطمئنة بالساعات الباقية مِـنْ الليل. كعدت الصبح على صوت تلفوني ومعروف مصدر الأزعاج منو
الأشيب: هــا زياف

زياف: صبااااح العافية حبيب كلبي

الأشيب: خير من الصبح

زياف: لك حزام ظهري يا صبح غير بـ9 صارت وانت متأخر

باوعت لساعة التلفون كان الوقت فعلاً بـ9 وأني ماخذتني النومة
الأشيب: يلا هسه جاي

زياف: محضرلك الريوك حياتي تعال يمي

الأشيب: شبيك اليوم؟

زياف: مشتاقلك حبيبي

قبل لا أجاوبة سحبت التلفون مني مورفو وحجت وياه بنعاس وأنزعاج
مورفو: ممنوع تتصل علينا الصبح بعد أبو زلوف
زياف: لج ماشا الگملة ترة ما ميت عليج ، دزيلي الأشيب وأنجبي
- غلقتة بوجهة ورجعت دفنت راسها بحُضني ، ضحكت على مناكرهم الليّ ما يخلص وطبعت بوساتي على خدها
الأشيب: مو عيب بنياتي تغلقين الخط بوجهة؟

مورفو: مو عيب لعد يزعجنه هو من الصبح

رجع اتصل زياف بس فتحت خط صاح متنرفز
زياف: ولك أبو شيبة أنتَ ليش عـــــــار؟؟
الأشيب: شبيك يمعود تتشاقة وياك

زياف: لو زياف ساده بوجها جان فضحته

الأشيب: لا تمسلت يلا دعبل

...جاوبني بهدوء
:-ادعبل لخاطرك واتمردغ هم

الأشيب: هههههه لاااا صدك مو طبيعي اليوم

زياف: يلا حياتي تعال بسرعه

...غلقتة منه وطبعت بوسه خفيفه ع خد مورفو وهمست
:-فَدارج راح يروح للدوام حبيبي

...رفعت راسها عليه واردفت بابتسامه
:-صباحي صوتك اليرد الروح

الأشيب: صباحي عيونج المضيعتني

مورفو: راح اسويلك ريوك نتريك اني وياك

الأشيب: ماريد اتعبك طير كلبي

مورفو: چؤ اني اريد اتريك وياك

الأشيب: تريدين تتريكين ويايه لو عناد بـ زياف

ضحكت تعرف كاشف سوالفها بس ما تعترف
مورفو: لا اريد وياك

الأشيب: يلا كومي لـعد

...باستني بخدي بقوة وطفرت من مكانها بسرعة تريد تدخل للحمام وكالت
:-راح احبك فدعووسييي

الأشيب: هههههههه واني اموت عليج يروح فدعوس

دخلت هي للحمام بين ما جهزت ملابسي وطلعت واكفة بجانبي ترفع بأديها وتنزلهن بعفوية كأنُ تريد تطير
مورفو: راح أنزل أسوي ريوك لا تتأخر

الأشيب: غيري ملابسج ونزلي

باوعت على ملابسها ورجعت باوعتلي متسائلة
مورفو: ليش شبيهن؟

الأشيب: مابيهن حبيبي بس غيريهن

ما أعترضت ولا ناقشتني وأحترمت كلامي ، تركتها تغيّر ملابسها ودخلت الحمام ، مِـنْ طلعت هي ماكو ، نزلت وراها للمطبخ كانت تتحرك بنشاط مثل فراشات الصباح الطايرة فوق الورود ، تدندن بأغنية بصوتها الموسيقي ، كنت عاجز أوصفلها شعوري وحُبي إلها بهذه اللحظة ، حضنتها مِـنْ الخلف ساند راسي على كتفها
الأشيب: أموت عليج فراشة كلبي
- ميلت راسها مقربة وجها لوجهي مبتسمة
مورفو: عيون فراشتك

الأشيب: اريد اضمج بـ جيبي وين ماروح اخذج ويايه ماريد افاركج

مورفو: راح تمل مني

...دفنت راسي بركبتها استنشقت عطرها بقوة وهمست
:-هو اني داشبع منج حتى امل، صار اكثر من سنه وكل يوم ارجع ملهوف عليج اكثر من اليوم الي قبلة

...اندارت عليه حضنت وجهي بـ ايدها الناعمات واردفت بـ ابتسامه
:-فـراشتك طايرة بيك فَداري

الأشيب: واني ضايع بيج ومتيهه طريقي

مورفو: واذا اجه يوم واندليت طريقك

الأشيب: راح اضيع نفسي من جديد

توسعت أبتسامتها بخجل ، ناثرت قبلات على كُـل تفاصيل وجهها وختمتها بقبلة لزاوية شفايفها ، حسيت على رجفة أيدها الليّ محاوطة رقبتي ، رغُم خجلها بس بُقت تباوعلي تحسها داتحُفظ ملامحي ، مسدت على طرف حاجبي وهمست بصوت هادئ
مورفو: أحب لمعة عيونك
الأشيب: لمعة عيوني أنعكاس لضحتكج

ضحكت ودفنت وجها بحضني ملتزمة الصمت ، أحس كلبها يريد ينفجر مِـنْ قوة النبض مو بس فز .. رُفعت مكعدها على الكاونتر ، ردت أبعدها أتامل تفاصيل وجهها الخجلان بس رُفضت
مورفو: عوفني ضامة وجهي لا تباوعلي هيج

الأشيب: واني عـيوني شتحب غير وجهج حتى اباوعله

مورفو: كافـــي فَـداري أني مو مال هيج أخجل

ما تدري هذا خجلها شيعمل بحالي.! ضحكت وبقيت حاضنها أنتظر الخجل يروح منها ، مِـنْ سمعت صوت باب غرفة أمي رُفعت راسها بسرعة دافعتني عنها وكمزت مِـنْ الكاونتر تعدل بنفسها
مورفو: بــس تشوفنا تسوينا طشــار
الأشيب: شبيــج ماشا الگملة؟

...باوعتلي بصدمه واشرت ع نفسها وكالت
:-انت تكول ماشا الگملة الي؟!

الأشيب: اكو غيرج هنا؟!

...دخلت امي ابتسمت من شافتنه وكالت
:-يمة شهل صباح الحلو

...تقدمت بست راسها وجاوبتها
:-بوجوج عزيزة كلبي

نسرين: شبيج مورفو؟

كانت واكفة عينها عليَّ خازرتني ، ضحكت على شكلها وهي أندارت على أمي تشكيلها مني
مورفو: تقبليها يحجــي عليَّ مِـنْ الصبح؟

نسرين: لا والله ما اقبلها

...ضربتني امي بـخفه ع ايدي ونترت بيه
:-ليش تحجي عليها ولك

الأشيب: هـــــا طبكتن عليَّ

نسرين: مورفو ماتكذب ولا تعيل بـ احد

مورفو: داتشوفين بـ عينج موووو

سحبت أمي لحُضني أضحك مِـنْ صارت تدردم عليَّ مِـنْ كُـل علقها حتى ترضي مورفو ، بس الملونة أم نص عقل أجت فاتت بيناتنا باعدة أمي مِـنْ حُضني
مورفو: نسرينو والله أني أحبج وأموت عليج بس بدون أحضان لو سمحتي يعني
نسرين: أويلي يَالغيرة لعد لو ما دا تشكيلي منه؟
مورفو: أي أشكيلج بس ما أقبل أحضان وما أعرف شنو ، حتى لو زعلانة هم أبقى أغار وأضوج ، عندج وردة وروار أحضنيهم وأذا ما يكفون موجودة رحيق وعمران وعزيز وحتى خالة سهاد أحضنيها ، وأذا كُلش كُلش هم نجيب مروان وأختة وزياف وزوجتة بس فَـداري لا حبابة والله أغار والله ، حسيّ بيه أنتِ مو والدة، غير كلب الوالدة يحس.!
نسرين: يبــــوو ولج أسكتي التوبة بس أسكتي
- أنتهيت مِـنْ الضحك على الطريقة الليّ تحجي بيها خرطتهن كلهن بسرعة بدون حتى ما تاخذ نفس ، أندارت عليَّ أمي ونترت بيه
نسرين: أطيــح حظك أذا تحضني بعد

...توجهت للباب تريد تطلع صاحت عليها مورفو
:-ما زعلتي مووو يمة

...ضحكت امي وجاوبته
:-لا يمة مازعلت

تركتنا وطلعت ، تقربت على فراشة روحي عضيتها مِـنْ خذها ولو بيدي أكلها بمكان الريوك
الأشيب: تغاريــــن مِـنْ أمــي؟

مورفو: ترا حضنك بس الي ليش مشاركيني بي

الأشيب: فَدار كله الج محد مشاركج بـشي يروح فَدار أنتِ

أبتسمت برضى وأبتعدت عني ترتب بالأكل ، بعد ما كملت سحبتها لحضني بس مقبلت ورادت تكوم
مورفو: هسه يجي أحـــد فشلة

الأشيب: محد يجي الولد بالدوام والبقية نايمين

مورفو: هسه ترجع خالة نسرين

الأشيب: چؤ مترجع واكلي من ايدي يلا

الليّ يحلي كعدتي ووجباتي وكل فعل أسوي هو سوالفها وضحكتها وشقاها وأنـــي طاير بيها كأنُ أني الوحيد الليّ عنده شخص يحبه بهذهِ الدنيا .. بعدنا كاعدين وأتصل زياف أخذت التلفون مِـنْ أيدي بسرعة متوسلتني
مورفو: أني أجاوبة حباب

الأشيب: جاوبي

...فتحت خط وفتحت مايك وحجت ويا
:-هاااا زياف ابو زلوف

زياف: هاااا الملونةةة وين الأشيب

مورفو: طلع من زمان بس نسى جهازة بـ البيت

زياف: وين لكيتي هاي الكلاوات الأشيب ينسى روحه وما ينسى اجهزته

مورفو: هاي قبل هسه لا

زياف: هسه الغي وكولي وينه

مورفو: كلنه طلع ونسى جهازة ليش تلح

زياف: شوكت طلع

مورفو: قبل نص ساعه

زياف: خوش دعبلي

...غلقة بدون ما ينتظرها تجاوبة شمرت التلفون وكالت
:-موغفو تغيد شي منك شوبي

...ضحكت ع حجايتها وجاوبتها
:-آمري يـ رغوة گلبي

مورفو: اريد اطلع ضجت من البيت

الأشيب: وين نروح حبيبي مو تعرفين حضر بسبب كورونا

مورفو: ع الاقل نفتر بـ السيارة

الأشيب: اذا ع هاي صار بـ الليل نطلع بعد شتآمرين

مورفو: واريد اشتري ملابس هم خلصت

الأشيب: هههههه ليش بنياتي هنه اكل وخلصتيهن

مورفو: الاكل من يصير قديم شيصير بي؟!

الأشيب: يتلف

مورفو: اي بعد شكو ملابسي هم تلفت لان قديمات

الأشيب: وصي الي يعجبج من النت

مورفو: ما ارتاح اريد اشوف بـ عيني

الأشيب: اخاف عليك وليداتي شلون اطلعك بهل وضع

مورفو: انت مو داتطلع لعد

الأشيب: مجبور اني لان دوام

هزت راسها وسكتت ، نهضت من مكاني شلتها بـأيد وحدة من بطنها وظهرها على صدري باوعت لرجليها مرفوعات وضحكت بـصوت عالي
مورفو: هاي شطولك فـــدعوس
الأشيب: أنتِ قزمة

مورفو: شكد طولك

الأشيب: 192

...اخذتلها صفنة علية وكالت
:-بعد شوي وتصير مترين

الأشيب: أي ، أنتِ شكد؟

مورفو: من زمان كلش جان 158 هسه ماعرف

الأشيب: انطيج من طولي شوية

هزت راسها ما تدري فَـدار ضايع بهذا طولها ، بعدها ودعتها وطلعت للدوام بـعدني بالطريق واتصل زياف
الأشيب: هــــا

زياف: وجعاااا وينك لعد

الأشيب: اي مو نسيت تلفوني ورجعت عليه وتأخرت

زياف: سوالف الگملة بطلهن ما تعبرهن عليه

الأشيب: هههههه كول شتريد

زياف: اتصل بية مروان وكال عزيز مكسر عثمان ممخلي بي شي صاحي ورايد يحركه بـ تيزاب ومروان ممخلي

الأشيب: وعزيز وينه هسه

زياف: ابن عمك لو عمي شمدريني اني بس باوع ترا مالها داعي مبقي يمنه لو تسجنه لو تقتلة

الأشيب: هاي بقت يم مورفو جنت انتضرها تصير زينة حتى احجي وياها بموضوعه

زياف: يلا تعال بسرعة ترا بـعدني ممتريك انتظرك

الأشيب: جايك يلا دعبل

...غلقتة منه وكملت طريقي لـما وصلت مكان شغلي ونزلت دخلت تلكاني زياف يهلي مدري شبي بعدها كعدت تريكت ويا لان اذا اكله اكلت وي مورفو يفضحني

مشت الأمور شُبه طبيعية بالدوام ، بعد ما خلصنا دوامنا طلعنا أني وزياف راح لسيارتة وقبل لا يصعد صاح عليَّ
زياف: نروح نشوف عُثمان؟

الأشيب: لا بس وصي مروان لا يخلي عزيز يروحله بعد

زياف: نطيته خبر

طول هذه الفترة عُثمان ببيت مروان كنت أنتظر مورفو تصير زينة حتى أعرف شتصرف ما أريد أخطي خطوة مُمكن تزعلها أو ما ترضيها .. وراح يبقى هذهِ الفترة كذلك ببيت مروان لحد ما يتشاقى تمامًا في حال سلمناه للعدالة لازم يكون صاغ سليم ..

..

كنت كاعدة أرسم بغُرفتي وفاتحة الشُباك الليّ يطلع على الحديقة حتى أسمع صوت سيارة الأشيب مِـنْ يرجع ، وكالعادة تصير بـ3:30 يلا يرجعت ، أول ما سمعت صوتها ركضت باوعتلة مِـنْ الشباك هو نزل منها ، توسعت أبتسامتي ونزلت ركض بعدني على الدرج وشفت العشيرة كاعدين بالصالة ، نزلت أمشي على كيفي ودخلت المطبخ بدون كلام حتى أنتظر الأشيب ويشوفني أول ما يدخل ، ومثل كُـل مرة يبتسم ببهجة مِـنْ يشوفني ويفتحلي أديه يريد يستقبلني بأحضانة ، تقربت منه أغنيلة بهمس

-يـلوك المحبس بـجفك يـمزيون
حلو بـشعره يتناثر فـوك المتـون
يـحلو الطول يا زيـنة الشبان
من يمشي يتمايل غـصن ريحان
ءهـا ءهـا ءهـا ءهــاااااا

ضحك بصوت عالي وعصرني بحُضنة مكزكز
الأشيب: لك أمــــوت على الليّ يتلگوني أمـــوت
مورفو: العشيرة كلها كاعدة بالصالة أمشي نصعد لغُرفتنا
- غمزلي مبتسم
الأشيب: نصعد شنسوي؟

مورفو: اتلكاك زين

الأشيب: صاير صلف حبيبي

مورفو: غير دم يسرا بيه فَدااااار الغدااااار

مشاني وياه حاضني مِـنْ أكتافي يضحك ، دخل الصالة سلم عليهم وكملنا طريقنا لغُرفتنا ، مِـنْ دخلنا وكف يم الباب عينه عليَّ
الأشيب: يلا شوفيني الملگى الزين
- بُقيت صافنة بوجهة مستحية ، غمزلي يتلاعب بمشاعري
الأشيب: شو خنستي؟

مورفو: يا ملكه حبيبي مو تلكيتك جوة هي كل شويه

طلعت كلمة "حبيبي" مني عفوية ويمكن أول مرة يسمعها مني وغيرت حالة كُلش ، رُفعني بين أديه يعبرلي عن مدى حُبه للكلمة الليّ سمعها
الأشيب: روحة وراحتة لحبيبج
- صار يناثر بوساتة على وجهي بلهفة ، رُفع راسة يباوعلي بعيون ذبلانة
الأشيب: حيــــل راغبــج مورفو
- بُقيت صافنة بوجهة ما فاهمة قصدة وهو صار يوضحلي
الأشيب: ولا مَرة حسيت بهذا الشعور وياج ، صارلج أشهُر نايمة بحُضني بس ولا مَرة حسبتج غير بنتي جنت دائمًا أتخيلج طفلة ، بس هسه كُلشي أختلف ، هواية راغبـج وأريدج تكونين زوجتي فعلاً

بُقيت ساندة كصتي على كصتة وبس صوت أنفاسي مسموع ورجفة بكلبي مِـنْ الخجل الليّ حسيت بي بهذه اللحظة ، صار يتجرأ بلمساتة بس بحذر حتى نظراتة كانت تبين خوفة مِـنْ أي خطوة يخطيها ، وكل دقيقة يهمس كلمة بأذني حتى يخليني مركزة وأعرف أني بين أدين فَـدار وما أخاف .. مو خوف وأنما أول مرة أشوف الأشيب بهذهِ الحالة ، أول مرة يحاول يتجرأ بلمسة ، همست بصوت يرجف منغمس بالخجل
مورفو: نزلني فـــدوة
- بُقى شايلني بين أديه وتمشى بيه كاعد على السرير مخليني بحُضنة ، رُفع أيده يمسد على خدي مبتسم
الأشيب: ما بقى شي وأسويلج أحلى عرس بالدنيا كُلها ، راح أجيبلج فراشات الكون كله حتى يباوعن لجمال عروستي الليّ خُطفت جمالهن

أبتسمت وصرت أمسد على شواربة ، ميل راسة طابع بوسة على باطن أيدي
الأشيب: هسه يلا ردت روحي بالملگى
- ضميت وجهي بين كفوفي خجلانة
مورفو: شبيــك فَــــدار
الأشيب: بيه أنتِ يول

...عضيت شفتي ميته خجل منه رفع ايده يمشيها بـخفه ع جهه كلبي وكال
:-احب رجـفة كلبج يمي

ما كان رجيف عادي أحسة يريد ينفجر وحرارة صارت توهج مني ، عدل ملابسي الليّ خربطهن وأبتسم
الأشيب: دائماً تكليلي فراشتك طايرة بيك فدار ، هذه المرة أني طاير بيج فراشتي

بدون ما أحجي وحتى لو ردت الكلمات ما تطلع مني ، طوقت رقبتة وهو شدد حضنتة وبقينا ساكتين لما هدأ رجيف كلبي شوية وأستقرت حالتي مِـنْ بعد التدهور الليّ صابني بسبب سوالفة .. أبتعد عني يحاول يتكلم طبيعي حتى لا أرجع أخجل
الأشيب: راح أدخل أسبح وأطلع ننام شوية

مورفو: راح احضرلك ملابسك

الأشيب: من اكلج انطينياهن

...هزيت راسي بـ اي وهو كومني من حضنه وكام يريد يروح للحمام رجع باس ركبتي بقوة وصاح
:-اوووويليييييي ولك شلون بيك طير الشوك

...جاوبتة بـ فهاوة
:-شبيك

الأشيب: بيه انت حبيبي شبيه يعني

...حضنت خدودي بـ ادية واردفت بابتسامه
:-شبيك اليوم فَداري

...رجع سحبني لحضنه وعصرني بـقوة حسيت عظامي طكطكت بعدها ابتعد وكال بصوت ذبلان
:-تسكر عـيوني بـشوفتج

مورفو: بـشوفتي لو ماخذلك بطل من عزيز

...ضحك بصوت عالي وكال
:-تكدر تلزم لسانها هي؟! لاااااا والله ماتكدر

مورفو: اووووي شبيك

الأشيب: خليني اروح لا ترجعيني بـ دلعج

مورفو: وانت رجال شكبرك وضابط وهيبه ورتبه هكبرها وتفقد من اووووي

الأشيب: هو اني اكدر اقـاوووومج لج بابا مـيت بيج اني تعرفين شنو يـعني

بُقيت عاضة شفتي بخجل ما أعرف شجاوبة هو صح كُـل يوم يتغزل بيه بس أبد مو مثل اليوم كان جريء بشكل لا يوصف أو يمكن لأن ما متعودة عليه يكون هيج .. دخل الحمام وتركني وأني بُقيت أضم بوجهي مستحية وخجلانة حتى مِـنْ أثاث الغُرفة ، مُضت فترة دقايق وفتح الباب مناديني
الأشيب: فراشتـي

مورفو: روحهااا

الأشيب: انطيني ملابسي يـراحتي

...شلت ملابسه ورحت بـ اتجاهه جان واكف بـ الباب ولاف المنشفة ع خصرة وصدره عليه قطرات مي نزلت عيني خجلانه ومديتله الملابس اخذهن ولزم ايدي سحبني عليه بـخفه وباس اصابعي واحد واحد بهدوء ونزل ايدي ع جهه كلبه مسح بهدوء وهمس
:-داتحسين بي شلون يتخبـل من يشوفج

رغم شايفتة بهذا الوضع سابقاً بس المشاعر الليّ حسيت بيها حالياً مو مثل قبل كنت بدون مشاعر ، ردت اسحب ايدي شدد قبضتة عليها مبقيها على جهة كلبة
الأشيب: باوعيلي مورفو
- رُفعت عيني عليه وهو أبتسم
الأشيب: فَدارج اني لا تخجلين مني

...جاوبتة بصوت يرجف
:-البس راح تتمرض

...شمر ملابسه ع جهه وسحب ايدي الثانية وخلاني احاوط بطنه وبقى حاضن وجهي ويمسد بخفه واني منزله عيوني ما باوعله و ارجف تقرب طبع بوسه ع خدي وهمس
:-لـيش ترجفين يـبعد رجفات گلبي عليج

...حاولت ابتعد عنه وهمست
:-عوفني حباب

الأشيب: باوعيلي ليش منزلة عـيونج

مورفو: عوفني فَدار

الأشيب: لـيش يـعافية فَدار

مورفو: كلبي راح يطلع من مكانه

عصرني بحضنة بقوة يضحك منتعش
الأشيب: لك أموت على كلبك الليّ ينبض بهذه القوة لفَدار

...رفعت راسي عليه وسألته
:-انت ليش كلبك ينبض قوي هم تخجل

الأشيب: كلبي يرجف عليج

...ابتسمت وبقيت اباوعله باس خشمي وكال
:-تجين اسبحج حت تصيرين حلوة

مورفو: چؤچؤچؤ بطل سوالفك السربوتيه

الأشيب: غير بنياتي واريد اسبحها

مورفو: لا ما أريد

الأشيب: صاير وصخ حبيبي

مورفو: تتحملني اني ووصخي وانت الممنون

الأشيب: لا هيج راح اخونج

مورفو: تريد تروح لـيمنى موووووو

الأشيب: دخيلك ياعلي

مورفو: شمسويتلك وتخوني

الأشيب: ذيج تقبل اسبحها أنتِ ما تقبلين

مورفو: لان مسربتة

الأشيب: لا غير زوجتي

مورفو: ماشي روح ختفيدك وخر عني

بُقيت أسحب بنفسي منه وهو مقيدني بقوة ويضحك
الأشيب: لـــج كافي تخبلتي؟

مورفو: طبعاااا اتخبل فوك ما دمها بيه تريد تجيبها ضرة ع راسي

الأشيب: الشرع محلل اربعه شكو بيها

أبتعدت عنه ضايجة وأدردم ، توجهت ناحية الباب أريد أطلع بس أستوقفني مِـنْ صاح عليَّ
الأشيب: ممنوع تطلعين
- وكفت بالباب مغيمة وأنداريت عليه
مورفو: ما عليك بيه أريد أطلــع

الأشيب: جربي

مورفو: اهووو شبيك اريد اطلع

طنشني وراح يلبس بملابسة وأني على وكفتي لما كمل وأجاني سحبني مِـنْ أيدي وياه ناحية السرير
الأشيب: نامي يمي أريد أرتاح بحضنج

مورفو: بس اني زعلانه منك

...نام ع الجرباية وسحبني لحضنه رفع راسي يباوع لـعيوني ويلعب بـشعري بـهدوء وكال
:-روح فَدار زعلانه من فَدار

مورفو: اي لان فَدار غدار

الأشيب: انت مفتاح كلبي طير الشوك محد يجي بعدك

مورفو: ويمنى

الأشيب: لا يمنى ولا عشيرة يمنى تروح فدوة لكل شبر بيج

مورفو: ليش تقهرني هيج لعد تحجي من كل عقلك

الأشيب: اكثر شي احبه بيج هو غيرتج عليه اطير كلبي وطيرني

مورفو: بعد ماغار عليك عوفني

الأشيب: هسه عوفج من فَدار يولي، الأشيب يريدج تعبان خلي بـحضنج انتي مو بنياته

ومثل كُـل مرة يكدر يقشمرني بكلامة الحلو ويراضيني ، أبتسمت وفتحت أديه مستقبلتة بحُضني ، بُقيت ألعب بشعرة لما غُفينا ، ما كعدنا غير بالليل هو بالصالة يم البقية وأني بالمُطبخ يم البنات هُنَ يجهزن العشاء وأني بس واكفة وكل شوية أخمط شي أكلة ، تقربت مني وردة تحجي بهمس
وردة: أكلج شي

مورفو: تفضلي عزيزتي كليلي

ورده: بس بيناتنا هـــا

مورفو: سرج ببير وفَداري ببطن هل بير

ورده: لا انجبي هل مره ضميلج حجاية

مورفو: احجيها واشوف

ورده: تكولين للأشيب يتصل ع مروان حتى يجينه للبيت

مورفو: واني شسوي بـمروان

ورده: شوفي انتي كليله بحجه تردين قَـبس تشوفيها وهو اكيد راح يجيبها مروان واني راح اشوفه

مورفو: المقابل؟!

ورده: شتردين انطيج

مورفو: نفذي وبعدين انفذ

ورده: شتردين احجي ذليتيني

مورفو: تشوفيلي بيج ملابس مرتب واختار منه وانتي توصيهن

ورده: مادفع ربع والله

مورفو: بحال فلوسج الخايسة ترا راح تنطيهم رقم فَدار وهو يدفع

ورده: سهله هاي بعد شويه نوصي

مورفو: خوش اني هم من نصعد لـ غرفتنه اكله وباجر يجون اذا يكدرون

ورده: ااااححح شكد احبج

مورفو: بس تعالي وضحيلي شسالفتج ويا

ورده: مجرد اعجاب يعني من طرفي بس هو ماعرف مرات يباوعلي بس ماحس اكو شي بنضراته لان دوم ملامحه محتده

مورفو: وأنتِ وين شايفته

ورده: شوفي مو يجي ياخذ قـَبس من الدوام واشوفه

مورفو: هي داوم وياكم؟!

ورده: نفس جامعه بس كلية تمريض واحنه تحليلات

مورفو: سنه الخ اصير وياكم

ورده: الله تحمست راح تفجرين الجامعة

مورفو: احد كلج اني نووي

ورده: ههههههههههههه بـقصفج قصدي راح تفجريها

مورفو: لا لا هناك الزم لساني

ضحكنا وبعد ما كملنا العشاء إلتمينا كُلنا على سفرة وحدة وتكلمت خالة سهاد موجهة كلامها للأشيب
سهاد: أبو شيبة يُمة باجر أعزم زياف ومريتة على العشة ، عليَّ نذر وأريد أسوي

الأشيب: تآمرين الحنينة

مورفو: نذر شنو خالة

سهاد: مرة نذرت اسوي عشة لام البنين بس عزيز يرجع سالم جان بمكان خطر وبقى ما وفيت النذر لهسه واريد اسوي باجر

مورفو: اني هم اريد انذر لعد لفد عالم تعقل

...ضحكو وكال روار
:-وعلي بيج دفرة هسه ع هل حجاية

مورفو: مايصير تدفر النعمة روار المغوار

روار: نعمة زربـ....

...بعده ممكملها ضربه الأشيب ع راسه ونتر بي
:-اطيح حظك حيوان

روار: رحم الله والديك هو انت كدرتك عليه

...طنشته وباوعت ع خالة سهاد وحجيت وياها
:-خالة خل نعزم مروان هم حتى يجيب قَـبس

سهاد: هلا بيهم يمه

...باوعت ع الأشيب وسألته
:-عادي نعزمهم مو

...هز راسه وكال
:-من اهل البيت مروان واخته

أنداريت على وردة أريد أشوف ردة فعلها كانت الضحكة شاگة حلكها ما كدرت أسيطر على نفسي وطگيتها بضحكة بقوا صافنين عليَّ متعجبين
الأشيب: هـــا طبكن؟

...هزيت راسي بـ لا وردت اضيع السالفة وجاوبتة
:-تذكرت قَـبس من تكلي موغفو

رجعنا طگيناها بضحكة أني ووردة وهُمَ صافنين عليها ، هز أيدة روار يدردم
روار: عايزنا مخابيــــا أحْنـا

مورفو: لا تخليني ادعي عليك ورور

روار: مو ع اساس دعواتج من حلكج لباب السما هسه واذا دعيتي

...رفعت راسي وادية للسما بوضعية الدعاء واردفت
:-ربي بداعت الأشيب كـو....

...عاط الأشيب مقاطعني
:-هوووووب يمعوده وين رحتي احد كلج الأشيب نبي

...نفجرو البقية من الضحك واني بقيت صافنة عليه واردفت بغباء
:-ليش هو هم يحبك

الأشيب: هو منو بابا

مورفو: رب العالمين غير

الأشيب: انتي مداتطلبين شي من امي وتحلفيها بداعتي مورفو

مورفو: شمدريني عبالي عادي

صرتلهم مضحكة ساعة وهُمَ يضحكون على حجايتي، كملنا أكــل وبُقينا كاعدين بالصالة لما دخـل عزيز واضح شكد تعبان وشكلة حيل ذبلان ، سلم بهدوء وكعد يم سهاد ساند راسة على كتفها ، بُقت تمسد على راسة بحنية وتسأل "أذا بي شي" بس ما نطق ولا حرف أكتفى يهز راسة بمعنى مابي شي .. بُقت عيني عليه أباوعلة بقهر وهو منزل عيونة ما رفعها ولا باوع لأحد بينا ، حسيت أيد الأشيب على كتفي وهمس بأذني
الأشيب: شبيج بنياتي؟

مورفو: مابيه شي

الأشيب: تكومين نطلع

مورفو: اي بس اغير ملابسي

الأشيب: لا ميحتاج ماراح ننزل من السيارة احنه

اترخص منهم وطلعنا، أول ما صعدت السيارة أنداريت عليه متسائلة
مورفو: شراح تسوي لعزيز

الأشيب: ماعرف حاير

مورفو: داتعذب اني والله اكثر منه

...سحبني لحضنه طبع بوسه ع راسي وكال
:-مو ذنبج يروحي وعزيز راح يتخطى وراح اساعده بـ كلشي اكدر عليه لا تبقين تفكرين

مورفو: اريد احجي ويا

الأشيب: لا

مورفو: حباب فَدار

الأشيب: كدامي

مورفو: لا

سكت ما جاوبني أعرفة رافض بس بنفس الوقت ما يريد يمنعني ، بُقينا فترة نفتر بالسيارة بعدها نزلنا يم الجسر الليّ دائماً نروح إله ، ومثل كعدتنا المُعتادة هو على بنيد السيارة وأني كدامة ، أديه على أكتافي ومدنك راسة يم راسي
الأشيب: أريـد أكلج شي بس أبقي هادئة تمام

...هزيت راسي بـ اي وكمل كلامه
:-مصير عثمان بـ ايدج هسه جنت انتظرج تصيرين زينه وتقررين شراح نسوي بي

...بقيت ساكته تناقضات بداخلي كلش جبيرة احس خطية يموت وقتل بـ الرغم الي سوا بيه واعتداءاته وقذارته بس ماكدر انسى هو لمني من الشارع وكبرني وتعب علية، نزلن دموعي واردفت بغصة
:-ماريده يموت بس خايفة يبقى عايش ويرجع ياخذني

الأشيب: محد يكدر ياخذج بعد من الأشيب

مورفو: وينه هسه

الأشيب: موجود عايش

مورفو: خلي بـ السجن لعد لا تقتله رب العالمين هو ياخذ حقي منه

...دارني عليه مسح دموعي وكال
:-تآمرين بـنياتي

...رجع وره وسحبني مكعدني يمة وبقى حاضني من ظهري
:-هسه يشوفونه العالم عيب

الأشيب: المكان ضلمة ما ينشاف شي حبيبي

بقينا كاعدين فترة وأعرف سبب الطلعة كله حتى لا نبقى أني وعزيز بمكان واحد ، بعد مُدة أتصل عليه زياف وطلب منه يروحلة محتاجة بخصوص الشغل ، غلقة منه وباوعلي
الأشيب: أمشينا أرجعج للبيت

مورفو: وين تريد انت

الأشيب: شغلة صغيرة نخلصها ونرجع

رجعني للبيت وهو راح لزياف ، صعدت لغُرفتي وقبل لا أدخلها سمعت صوت أغاني مِـنْ غُرفة عزيز ، ترددت أروح أحجي وياه بالأول بس بعدين فكرت لازم نحجي ونخلي حَـد لليّ دايصير ، دكيت الباب بخفة ثواني وفتحلياه مِـنْ شافني أني أبتسم
عزيز: هــا مورفو

مورفو: عادي نحجي شوية

عزيز: بيج شي؟!

مورفو: اريد احجي وياك بموضوع

عزيز: اي تعالي ننزل بـ المطبخ

...مشيت كدامه وهو يمشي وراية دخلت للمطبخ كعدت وهو كعد كدامي واردف بهدوء
:-اسف ع الصار مو بـقصدي اضوجج

مورفو: ليش داتسوي هيج عزيز

عزيز: مو بيدي مورفو تضيك بيه الدنيا لدرجة افقد السيطرة ع نفسي لهل سبب اني مبتعد عن البيت ماريد اضوجج بس البارحة انتي طلعتي كدامي بوقت غلط وصار الصار

مورفو: داتعذبني وتعذب نفسك وتعذب فَدار كلنه دانتعذب اني متعذبة لان مكسور كلبك بسببي وفَدار متعذب من ناحيتين جهه ابن عمه يحب مرته ونار الغيرة اموته وجهه ابن عمه الي دايتعذب كدام عينه ومايكدر يخفف عنه وانت دا تتعذب لان لحد هسه ممقتنع اني متزوجه ومو اي واحد لا متزوجه ابن عمك الي هو بمقام اخوك

عزيز: محترك بـنار كلبي ومحد مطـفيني

مورفو: ارحم نفسك عزيز اذا داتحسها صعبة روح لـدكتور نفسي راح يساعدك والله راح يعرف يتصرف وي حالتك

...هز راسة وكال
:-الأشيب هم راد اروح بس ماعندي ثقه يكدر يخفف عني

مورفو: راح يكدر والله شوف اني كدامك شكد تعذبت وتكئبت وكرهت حتى نفسي بس كدرت اتخطى صح مارحت لدكتور بس فَدار جان يمشي بنصائحه وتعليماته وكدر يساعدني هوايه، جرب ما خسران شي

عزيز: راح اجرب

مورفو: وراح تكدر اني متأكده انت كلبك طيب وتستاهل كل الخير متستاهل تتعذب هيج

عزيز: زين يصير احجيلج الج هم

مورفو: اكيد اسمعك واني الممنونه واذا اكدر اساعدك ماراح اقصر بشي وعد

عزيز: راح احجيلج سر لعد

مورفو: الله اتحمس للاسرار احجي يلا

...ضحك وكال
:-اكو شخص يحبني بس اني هم كاسر كلبه وهم داتعذب لان كاسر كلبه شلون اكدر اساعده

مورفو: يصير اعرف الشخص منو لو لا

عزيز: عوفج منه منو هسه بس احجيلي شلون

مورفو: زين ليش متنطي فرصه انت مو مره كلت الي انطيني فرصه وانطي لنفسج فرصه اني هم داكلك هسه انطي لنفسك فرصه يمكن تكدر تتخطاني وتحب هل شخص من تشوف حبه الك واهتمامه بيك وحنيته عليك

عزيز: خايف ماكدر واكسر كلبها اكثر من ماهو مكسور

مورفو: بـ الحالتين كلبها مكسور ع الاقل من تحاول وياها هي راح تعذرك وتكول حاول وماكدر ماتبقى تتأمل شي ومتعذبه

عزيز: ماعرف عقلي مشوش

مورفو: شوف احجي وياها بس مو كـحبيب وهل سوالف مجرد اصدقاء يعني وشوف نفسك تكدر تميل الها لو لا

...ضحك وكال
:-داتحجين هيج حتى تخلصين مني

مورفو: لا داحجي هيج لان اريد كلبك يرتاح عزوز، ترا ممرتاحه بحياتي من وراك والله

عزيز: اسف مورفو وعدتج ماراح اضوجج ورجعت ضوجتج

مورفو: شوف اني احبك والله واحب علاقتي هيج وياك واحسك قريب مني وتفهمني واكدر افهمك صح انت ما تحشش بس عادي مو كلشي تحشيش

عزيز: ههههههه راح امشي بـنصيحتج لعد بس راح احتاجج تساعديني لان ماعرف اتصرف

مورفو: راح اكون وياك خطوة بـ خطوة وعد بس الشغله يرادلها صبر مو من البداية تمل وتكول ماكدر

عزيز: راح احاول بـ كل طاقتي وصبري

مورفو: رجعنه نتفاهم عزووووز

عزيز: هههههه اهم شي نتفاهم

مورفو: هسه كلي منو هاي الي تحبها ووعد ما احجي حتى للأشيب

عزيز: لسانج مو امان

مورفو: والله ماحجي شبيييييك حباب يلا كول

عزيز: قَـبس

...صفنت عليه واردفت بملل
:-لاااااا عبالي ازوجها لـ روار هاي

...طكها بضحكه بصوت عالي وكال
:-هم اخذيها مني ما وصيج وضربي كلب عزيز بعرض الحايط

...ضحكت ورفعتله حواجبي واردفت
:-هااا هاااا غرت عليهااااا مووووو

عزيز: انجبي الملونة

مورفو: راح اسكتلك هل مرة

عزيز: رحم الله والديج وهسه كليلي الأشيب وين

مورفو: راح لزياف عنده شغل شوية ويرجع

...ضحك وكال
:-هسه تلكي وره الباب

...طفرت من مكاني بسرعه ع الباب فتحتها مجان اكو احد باوعت لعزيز واردفت
:-ضلمته خطيييييية

عزيز: هههههه مكذب بشي اني مايوم حجيت وياج حرف وطلع ما سامعه

رجعت كعدت بمكاني
مورفو: حتى لو ما سامعنا هو اني احجيلة كلشي ماكدر اضم عليه

عزيز: يحتاج تضمين اشياء مرات

مورفو: چؤ هو ابوية وسندي قبل كلشي ومن احجيلة بـمعنى داذب حملي وتعبي عليه وهو مساندني بـكل قوتة، وهم لان ماريده يجي يوم ويسمع حجاية مو مني

عزيز: وحتى الاشياء الغلط تحجيهن اله

مورفو: كلشي احجي الصح والغلط واليصير والميصير والعيب والحرام والسهل والصعب ماضم بكلبي حجاية وهو يسمعني بطريقة تشجعني احجيله كلشي يخطر ببالي

عزيز: وشلون اخلي شخص هيج يحجيلي كلشي مثلج

مورفو: اني اعلمها لـ قَـبس واكللها احجي كلشي لـ عزيز لا تضمين شي

...ضحك وكال
:-شلووووون طلابة شيخلصني بعد

مورفو: شبيك والله مستانسه الله وتتزوجها وتجيبها يمنه وابقى نهار كله اتنمر عليها وع سوالفها

عزيز: نتخارب اني وياج ماقبل

مورفو: هاااا هاااا شو من هسه صفيت وياها

عزيز: هههههههههه شكد لوتيه لخاطر محمد

...بقينه كاعدين واحشش عليه وهو يضحك اخر شي كتله
:-باوع راح احجيلك سر اقتدي بي

عزيز: الله يستر من اسرارج احجي

مورفو: شوف صير مثل سيماف تعرفها مو

عزيز: اي اعرفها شبيها

مورفو: جانت تحب الأشيب وفجأة طب وتزوجت زياف وصارت تحبه شلون وليش محد يدري

عزيز: ههههههههههههههههه خرابيومج ترا فضحتي البنية يمعودة

مورفو: بس انت كتلك والله حتى تقتدي بيها

عزيز: راح تزعل منج اذا سمعت تحجين وراها هيج

مورفو: لا ما تزعل لان اني راح اكللها شحجيت عليها ماراح تسمعها من غيري انت مو من احجي عليك اجي اكلك وما تزعل

عزيز: هو انتي عندج غير حجاية اخذلك بطل من عزيز

مورفو: البارحة هم حجيتها سامحني

بُقى يضحك بصوت عالي هرج البيت ، نهض مِـنْ مكانة مِـنْ أنفتحت الباب ودخل الأشيب ، اتمشى ناحيتة يريد يطلع وتكلم وياه بضحكة
عزيز: الله يعينك على ما بلاك
- تركنا وطلع ، أبتسم الأشيب متقرب مني
الأشيب: هـا خَبلتي؟

مورفو: لا حجيتله شنو حجيت عليه حتى يبريني الذمة

...ضحك ومشاني ويا صاعدين لـ غرفتنه تمشى يم ميز المرايا خله سلاحه وشغلاته واني واكفه ورا
:-فَداري

الأشيب: يَـواهس فَدار

مورفو: عادي ما احجيلك شنو حجيت وي عزيز هل مره

...اندار عليه مبتسم وكال
:-اثق بيج اني بنياتي واعرفج ما تغلطين بـشي مو اله تحجيلي كلشي

مورفو: ماريدك يوم تسمع حجاية مو مني

...سند نفسه ع المرايا وسحبني موكفني بين رجليه وكال
:-صح احب اسمع كلشي منج ومستانس بهل شي هواية بس حتى اذا سمعت شي عليج ماراح اصدك لان اعرفج شنو

...باس خدودي وكال
:-مو بنيات الأشيب الي تنزل راسه بـ سالفة مو حلوة، صح انتي فراشة بس بـمواقفج انتي ذيبة الأشيب ومو اي ذيبة هم قوية وشرسة وذكية حيل، ليل ونهار اني احمد ربي ع هل نعمة الي نطانياها فـخور بيج هواية

...فراشات طارن بكلبي واني اسمع كلامه توسعت ابتسامتي واردفت
:-لأن أني بـنيات الأشيب والأشيب ما يليق بي اقل من هذا

الأشيب: كلامك صاير قوي طير الشوك

مورفو: اقوى بيك اني أشـيبي

الأشيب: يـبعد شـيباتي

حضنتة بقوة وهو بادلني ، أحب مِـنْ يكول هالحجايتين ، أبتعد عني بعد فترة وأنطاني خبر هو راح يشتغل وطلب مني أنام أذا نعسانة بس اني طاير النوم مِـنْ عيني وفضلت أبقى بجانبة لما يخلص شُغلة ، هو كعد يشتغل بالحاسبة واني أخذت مجموعة حلويات وايبادي ورحت يمة ، مددت مخلية راسي على رجلة ورفعة رجلية على طرف الكرويتة الثاني أباوع يوتيوب .. كُـل شوية أرفع شي مِـنْ حلويات يم شفايفة وهو ياكلها مِـنْ أيدي رغم ما يخبهن بس ما يحب يفشلني بس أني لحيت ، طُبع بوسة على راسي متكلم بهدوء
الأشيب: كافـي بابا راح يصير عندي كرش مِـنْ وراج

مورفو: بس يصير عندك كرش اطلكك

الأشيب: متكولين هاي الحلويات وين تروح لعد

مورفو: اني مو اكل بس ميصير عندي كرش

...يحجي ويايه وعينه بـ الحاسبة
:-تجبريني اكل ومن يصير عندي كرش طلكيني وين صايره هاي ترا ضلم

مورفو: مشكلتك حبيبي بس تروح السكس باك اعوفك

الأشيب: ها طير الشوك حابني ع عضلاتي

مورفو: تريد احبك ع شيباتك لعد

باوعلي رافع حاجبة واني ضحكت ، مَد أيده على بطني
الأشيب: أنـي هم أريد سكس باك لعد

مورفو: واذا ما سويت تعوفني؟!

الأشيب: اسويلج بطريقتي

مورفو: وشلون؟!

نظراتة كانت مو راحة بس ما فهمت شراح يسوي ، نهض مِـنْ مكانه كعد على الأرض بجانبي ورفع ملابسي ، ردت أرجعها بسرعة لزم أيدي
الأشيب: أشش ما أسمع صوتج خلِ أسويلج

مورفو: ماريد حباب عوفني طلكني بس وخر عني

ثبتني بقوة ونزل راسة على بطني عضها حتى يسويلي سكس باك ، صرت اتحرك وأعيط عليه يعوفني لأن توجع بس ما تركني وما أبتعد إلا مِـنْ سواهن 6 بمكان عضلات السكس باك ، رُفع راسة يباوعلهن ويضحك
الأشيب: أحلــى سكس باك شافتها عيني

مورفو: وخر عني وخر شبيييك ترا توجع

صار يمسد عليهن بحنية وأيدة الثانية يمسد على شعري
الأشيب: غير اريد اسويلك مثلي حبيبي

...جاوبته بهدوء
:-أذيتني فَدار

صار يبوس بيه محاول يراضيني وايده مستمرة تمسد على بطني يحاول يخفف ألمهن ..
الأشيب: بعدها تأذيج؟
- هزيت راسي بأيجابية ، رجع نزل راسة يم بطني لزمتة مِـنْ شعرة بسرعة
مورفو: لا حباب بس عوفها

الأشيب: ماسويلها شي حبيبي

سحب أيدي وصار يكسر بعض الحواجز الليّ بيناتنا ، بكل حذر بكل حُب بكل لهفة ، والأهم كان صوته ما يفارك مسمعي يمطرني بالغزل والكلام الحلو بكل خطوة يخطيها ، ورغم أنها كانت لمسات عادية لكن تعنيلنا كثير .. شالني مِـنْ الكرويتة مخليني على السرير مضيعني بدفو حُضنه ، كلمة وحدة ما نطقت وبُقيت دافنة وجهي بصدرة ، حسيت أصابيعة الباردة يمشيها على طول ظهري بهدوء ، ما رُفعت راسي إلا مِـنْ ناداني ، أبتسم مبتهج
الأشيب: كاعدة وهيج خانسة؟

...عضيت شفتي وهزيت راسي بـ اي رفع ايده يلعب بـشعري وكال
:-الي داسوي مو بس لان رايدج، بس اريدج تتعودين عليه وتبقين بوعيج وتعرفيني اني فدار اريدج تتخطين الصار

...نزلت عيوني وسكتت اعرف دايحجي هيج لان هواي مرات من نصير بهل قرب لو اتذكر عثمان لو ابقى جامده بدون ما احس بـ اي شعور وهل شي مو بيدي

الأشيب: لا تنزلين عيونج باوعيلي حبيبي

...رجعت رفعت راسي عليه ابتسم وكال
:-الداسوي علمودج قبل اي شي وعيونج حتى قبل رغبتي القوية بيج بس اذا تضوجين كليلي

...هزيت راسي بـ لا وهمست
:-اني هم اريد اخلص من حالتي ماضوج منك من تسوي هيج بس اضوج من نفسي مرات من ما احس بـ اي شعور وياك لو من اتذكر عثمان واكثر شي اكرهه من ما يفز كلبي الك

الأشيب: بس هسه مو بس دايفز هسه يريد يطلع من مكانه من قرب فَدار

...ابتسمت وهمست
:-كدرت تخلي يفز الك من جديد

عجزت أوصف حُبي لهذا الشخص ، حَبه وحنيتة ما إلها مثيل .. نمت بجانبة مطمئنة متناسية كُـل حزن عشتة .. وأكيد الصُبح أكعد على قبلاتة وكلامة الليّ ما ينشبع منه ، بعدها تريكنا مع بعض وهو راح للدوام وأني رجعت نمت للظهر يلا كعدت لأن ما عندي شي أسوي وخالة نسرين ماقبل أشارك وياهم بشي لا شُغل ولا طبخ ولا أي فعاليات ثانية وكل الليّ تكولة
نسرين: أريدج سالمة يُمة ما أريد منج شُغل
مورفو: يُمة حبيبي وين أكو عمة تعامل جنتها هيج؟ عاركيني صيحي عليَّ ، حتى كتل أكتليتي حسسيني أنتِ عمتي
نسرين: أنتِ تكليلي يُمة وترديني أحسسج اني عمتج شلون؟
مورفو: هم صدك ، بس حبابة أحس نفسي خطار هيج
نسرين: ميخالف يجي يوم وأكومج مِـنْ أذاناتج حالج حالهن

ضحكت وحضنتها أبوس بيها ، بعدها صعدت ويا البنات لأن وردة مخبوصة شتلبس وتشمر بالملابس هيج وهيج
وردة: ولكم شلبس.!

مورفو: ترا جايين يتعشون يمنه مو يخطبونج

ورده: اهووو لج شلون يباوعلي بـ الله غير اتهندم

مورفو: الي يحبج يحبج ع وصخج عزيزتي

ورده: دنجبي أنتِ شمفهمج

مورفو: شبيج والله صدك شوفي اخوج شلون حبني ع وصخي

ورده: يا وصخ حياتي ترا هو ميشوف غير الوان وعميتي وسحلتي من شواربه

مورفو: لا والله جان عنده لحيه بس الوكت اغبر وحلقها من ورة دوامه

ورده: لج باااابااااا صيري ملااااااك

مورفو: الي يريدني اصيرله ملاك يصيرلي جنه

ورده: و ع اساس اخوية ما صايرلج جنه

مورفو: هو لان جنه يحبني ع وصخي

ورده: هسه انجبي وكليلي شلبس

مورفو: انطيج مني عندي فستان جديد حلو

ورده: ملون؟!

مورفو: لا ابيض

ورده: الله حسستيني راح يخطبوني

مورفو: شسوين اذا خطبوج؟!

ورده: العب جوله والبيت اضلم

مورفو: افتحي الاضوية والعبي ليش اضلم

ورده: اوي تحمست اطفري جيبي الفستان وتعالي

...رحت جبته الها ورجعت وهم قاسته عليها وعجبها وقتنعت بي وبقيت كاعده يمها لـما صار وقت رجعه الأشيب من الدوام نزلت وعفتها شوية ودخل الأشيب بطوله اليرد الروح ابتسم وفتحلي اديه مثل كل يوم تقدمت بسرعه حضنته بقوة ابتعد واردف بـحنية
:-شلونها روح الأشيب

مورفو: اصير بـخير يمك

الأشيب: اكو اغراض الج بـ السيارة نجيبهن هسه لو بعدين

مورفو: هسه

...ابتسم وكال
:-يلا تعالي

طلعنا أني وياه للسيارة ، وصار يطلع بيهن كان عددهن كثير بُقيت صافنة ، رُفع كم كيس منهم إلي
الأشيب: إلزمي هذن أنتِ وأني راح أصعد الباقي
- أخذتهن مِـنْ أيده متسائلة
مورفو: هاي شجايب هلكد؟

الأشيب: هسه تشوفيهن

...اخذناهن وصعدنه لـغرفتنه خلاهن ع جهه وكال
:-تعالي انطيني حضن بالاول

...تقدمت حضنته وهو دافن راسه بشعري يشم بي ابتعد وسحب نفس براحه وكال
:-اعرف مقصر وياج بـس والله اخاف عليج ماريد اطلعج لـ مكان والمرض كلش منتشر يخوف

مورفو: حشاك من التقصير فَداري، اني احب المكان الي انت متواجد بي وبس مايهمني بعد اي شي

بُقى محاوطني بين أديه يباوعلي مبتسم
الأشيب: تدرين اليوم كاعد بالدوام ويمي ضباط كبار واني تذكرتج مِـنْ ركصنا هنا وضحكت بقو صافنين عليَّ وزياف نقذ الموقف ذبلة حجاية خلاهم يضحكون
- ضحكت بصوت عالي وأحس شي يدغدغ كلبي مِـنْ الفرح
مورفو: يا فَـــدار حتى بالشُغل أنــي على بالك
الأشيب: أنتِ بوسط روحي مو بس على بالي

مورفو: تعال نركص هسه لعد

...ابتسم واني ابتعدت عنه بسرعه شغلت نفس الأغنية لان احبها كلش وتقدمت عليه اتمايل وهو يضحك حاوط خصري وبقى يتمايل ويايه بهدوء صرت اغني وياها من وصلت لهذا المقطع

-واناااا كـطفلة في يديه
كـ ريشة تحملهااا النسمات
انااا اناا انااا انا بي يديه
كـ ريشة تحملهاااا النسمات
آآه آآه يديه كـ ريشة تحملها النسمات
يـهديني شمساً يهديني صيفاً
وقطيييع السنونواااات
يخبرني اني تـحفتهُ
واسـاوي الالاف الـنجمااات
وبــ أنِ كـنز وبــ أنِ
اجـمل ما شاهد من لوحاات
كلمااات آه كلمااات آه كلمااااااات

أحتضن وجهي بين كفوف أديه مقبلني بلهفة كاتم صوتي الليّ كان منطرب مع الأغنية ، أبتعد متكلم بصوتة الليّ يسلب روحي وكلبي وعقلي مني
الأشيب: مو بس الآف النجمات، أنتِ تسوين كُـل المُجرات

يتبع ..

..

- لا تنسون التصويت
+تعليقاتكم الحلوة حبيبيني 🤎.

- حساب الأنستا itsara.kh
قناة التلي itsara105