رواية الاطلس "دمليج أسود" الفصل الخامس والعشرون 25 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

ملكي وملاكي ومكملي وكمالي انتِ ♥️..

• ━━━━━━❪♣❫━━━━━━ •

صوت الطلق هدأ واختفى تقريباً من البيت لزمت ايدين غدير ودخلنه وره عمة زهراء نمشي على اطراف اصابعنه لغرفة نانا گلبي وگف من المنظر الشفته..

-ناااناااا

-زهراء: بلقييس بلقيسسس عايني عليه بلققيسس

ضوه موبايلهه مشعول مضويلنه ووجهها متروس دم بين الواعية والغشيانة تگابلنه عليهه اني وعمة زهراء وغدير نريد نطلعهه بصعوبة شلناهه رغم رشاقتهه بس نانا طويلة وعظمهه ثگيل..

-غدير: الدم منيين عمة منين هذا؟؟

-زهراء: مادري طلعنهه يله وياي ياا عليي

شلناهه شيول فحطت تعب صوت خرخشة ديجي من بره متت بدمي وعمة تأشرلنه سكتن وامشن على كيف، فعلاً غدير لزمت موبايل نانا ويانه على الاقل يضويلنه الطريق تمنينه نعرف الرمز ونتصل على احد بس للاسف..

بينما دنطلع واحنه شايليهه دست على شي حاد عطت بكتمة فرفحت روحي بس مانطيته اهمية كملت وكلما ادوس اشوغ وجع بقيت هيج الى ان وصلنه للحديقة الخلفية واستقبلونه البنات..

-حصة: واااي بلقيس شصاير يحسرتيي يحسرتتيي

-زهراء: صوتج حصة لا تحجون بنات دخيلكم حس ما اسمع منكم فهمتن لوو لاا

-رقية: اي اي منحجي منحجي

-مريم: عمة عليج الله شوفي شبيهه نانا

-زهراء: اوكفن ليش ما جاي تصحى..

فتشت كل جسمهه توقعناهه متصاوبة او لايحتهه شضية بس جسمهه مابي شي الدم من وجهها واثناء تفتيشنه غدير همست..

-غدير: من خشمهه الدم طاگ خشمهه دم

-حصة: يمكن ارتفع ضغطهه، بلقيس اصحي بلقييس

نطبطب على وجهها بخفة الى ان بدت تصحصح نوعاً ما بس عبالك بغير عالم حاطه ايدهه على راسهه وتون من الوجع..

-سارة: صوت.. صوت صوت صووت اكو صووت اكو احد ديمشيي جوه راح يجولنه مااماا

-دعاء: راح امووت شنو هاي وين عايشين انتوو

-بسملة: مرايم رجعينه لبيتنه مررريم

-زهراء: اشششش حجاية ما اسمع بنات اهدأو فدوة لا تكشفون مكاننه، بلقيس فتحي موبايلج تسمعينييي

تندس بكتفهه حيل اخيراً نانا استوعبت وفتحت موبايلهه عمة فوراً دكت رقم علي اتصلت بي وبلغته ماطولت وياه عشر ثواني وسدته..

عقلي شخط عيني لزكت على الباب كل خلية بجسمي ترجف خوف ورعب معقولة ما لگونه؟؟ معقولة ما اكتشفو احنه هنا هالشي مستحيل!

-مريم: ليش محد اجه؟؟؟

-زهراء: مادري لازم نطلع منا بسااع بنات

فزينه كلنه من صار صوت طگطگة اقوى كأن احد دخل للمطبخ سارة تخربطت وكعت علينه وغدير لزمتهه وترزل بينه كلنه بالهمسة وخالة راح تنهار وعمة طيحت حظهن بسبب صوتهن العالي..

-سارة: ما يخلونه ما راح يخلونه

تحجي بهذيان ماعرف اشرح الوضع ولا اعرف اشرح الخوف الي جاي نعيشه احسني بحلم مستحيل هاي حقيقة!!

الخوف اكل قلوبنه لميت خواتي وصرت اركض بكل سرعتي بعدما شفنه زلم ثنين ملثمين يطلعون من المطبخ اركض واتعثر بخطواتي تهيت كلشي هنا ماندل مكان ماعرف منين اطلع للباب الدنيا ظلاام كلشيي ماشوف..

وكعت بسملة ونزلت ارفعهه وگمزت على صوت عياط دعاء رفعت راسي اشوف ثلاث زلم محاوطينه جرو مني بسملة جر ويهددونه بسلاحهم تخبلت روحي راحت ماعرفت شسوي اريد املخ روحي راح ياخذون اختي..

صرت اضرب بيهم وواحد منهم رفعني يشيلني تعبت من كدما صرخت احس بأيده تسد حلگي وعيوني على بسملة المحاوطيهه ثنين ودعاء تتعارك وياهم بيدهه، حاولت اللوح اصابعه اعضهن بس ماكدرت الضعف حاوطني من كل جهة وغمضت عيوني مستسلمة..

**

"رقية"
اصنف اليوم لأسوء يوم بحياتي، شكد متابعة افلام ومتابعة مسلسلات بس لا يمكن يشبهن العشناه اليوم، مجموعة رجال مسلحين محاوطينه من جميع الاتجاهات عمة تهمش بيدهه تريد تحميهه بس ماكدرت.. ماكدرت تحميهه..

تقدم رجال مقنع ضخم الجثة على سارة لزمهه من رجليهه وگعهه وصار يسحل بيهه، عطنه خوف ووحشة غربة وهبطة ركضت امي تريد تساعدهه وضربوهه وگعوهه اندارو على غدير من صاحت وعلى نانا..

بقيت ابجي واتوسل بيهم يعوفوهه اركض وراهم مثل المجنونة بس محد طخني منهم يردون سارة ماعرف ليش الا سارة!

دخل بيهه لغرفة وقفلهه عليهم كسرت الباب من الدگ ملخت الزلم الي لزموني ويردوني اهدأ صوتي انبح ورجليه ماتت يأست من المساعدة خلص رحنه بين الرجلين بين ايدين ذولة القذرين وفجأة..

صوت صفارات الشرطة ترس المكان شهكت ادور بعيوني اشوف الزلم كامت تطافر كلهم كامو يطلعون من مكان، ثواني معدودة ودخلت الشرطة توزعت بالبيت صابني ذهول ماعرفت شنو اتصرف شنو لازم اسوي..

لزمني شرطي يحجي ويايه يريدني انطق لساني انبلع بس أشر على باب غرفة سارة أمرو يدخلون ولكوهه مقفولة كسرو الباب ودخلو عليهه ما هدأت الا من شفتهه تركض وتوكع لحدما وصلتني حضنتني حييل ترجف وتبجي تصرخ..

باد حيلي حتى دموع متنزل مني ماكدر احاوط اختي واضم روحي بحضنهه، الاجراءات طولت امي اجتنه تبجي وتدك على وجهها وتصيح بناتي وين بناتي..

-سارة: هناا ماما هناا احنه مابينه شي تعالي

حضنتنه تبجي بجي مهضومة الشهگة شگت صدرهه ولاول مرة من سنين غدير تجينه تحضننه لصدرهه وشدت على سارة بكل قوتهه..

-غدير: رادوووچ رادو ياااخذوووچ من عدننه

عمة اجت بقن نانا والبنات وينهن مريم وخواتهه؟؟ كلت لأمي وكالت الشرطة راحولهن للحديقة ونانا وياهم، غاب عقلي ثواني وما وعيت الا على صوت علي يصيح..

-شكووو شصاااير هنااا يمممةةة وينججج يمممةةة

-زهراء: تعال تعال يا بعد امك سودة بوجهي

اجه ملهوف حتى ممبدل ملابسه بتراك البيت وبيده سلاح سألو الشرطة شلون شايل سلاح وكال هو مرخص بقى يحجي وياهم هواي وعمتي تعيط بيهم وتگلهم مو وكتهه هسة بس لطشو..

مادري شلون عافو وتفرقو بالبيت اجانه علي يلهث وجهه مخطوف ورايحة روحه حضن امه لصدره حيل وباس راسهه واندار على امي وعلينه يكمش بينه ويحجي بصوت يرجف..

-شبيكم.. شصار.. اذوكم؟؟ لمسوكم؟؟ حاچووني رقية سارة غدير بيكم شيي منو ناقص بعد منوو

يضوي بموبايله ويدور بعيونه بيناتنه وعمتي تهدأ بي..

-زهراء: حبيبي اسم الله عليك يمة اهدأ لا يصير بيك شي

-سارة: مريم وخواتهه ماكو منعرف وينهم

فك عيونه على وسعهه وعافنه وراح عمة راحت وراه واحنه بقينه كاعدات لزگ بأمي..

**

"دعاء"
تعبت حيلي راح من شفت خواتي محاوطيهن ولد الحرام وماكو بيدي شي تخيلت راح نموت بأي لحظة راح يخطفونه، يسلبونه، يغتصبونه كل الافكار التعيسة اجت ببالي بهاي الدقايق المعدودة..

لولا سماعهم صوت صفارات الشرطة چان ما تركونه صار الطفار ماله والي ومع ذلك لزموهم الشرطة وجروهم مثل الطليان..

رحت على بسملة اشوفهه تبجي فحطانة وترعش وتوخر بشعرهه عن عيونهه ما طولت وياهه جريتهه ورحنه على مريم الواگعة جثة هامدة بالكاع رحنه نصحيهه وندك وجهها فتحت عيونهه بس خدرانة گوة تحجي ماعرف شسووا بيهه..

كعدناهه على حيلهه ولبدنه بحضنهه نتراجف عيوني كامت تحركني من البحي وصوتي راح من الصياح بقينه على هالوضع والشرطة تحوم حوالينه وكل شوية جاينه ضابط يستفسر بس محد عدهه طاقة تحجي..

فزت بسملة كامت من يمنه باوعت بالاتجاه الراحتله وجان اشوف علي اجه يهرول علينه، اني شفته لو بعد دموعي ماكدرت اسيطر عليهه كأن شفت واحد من اهلي..

-علي: بناات انتو بخيرر.. دعااء احچييي

حطيت ايدي على وجهي ابجي وبسملة وياية تباوعله وتحجي تشكيله حتى الكلام ميطلع من حلگهه عدل كامت تتلعثم بالكلام وهو انخبص وياهه ويكول..

-علي: ميخالف حبيبتي ميخالف عيونيي انتو بخير بأمان اني وياكم ما اعوفكم

-بسملة: رادو ياخذونه.. ياخذوني.. ياخذونه ياخذونه

متكول غير "ياخذونه" وهو يهز براسه ويهدأهه، اندار عليه اطرافه ترجف تقرب مني وحار منين يلزمني بقى على حيرته ويحجي وياية اذني بيهه طنة من صوت الرصاص ما جاي اللقط كلماته بوضوح ماعرف شيكول..

الشي الوحيد الي سمعته كال "حجابچ وين" وفوراً نزع سترة التراك الخفيفة الي لابسهه وغطه بيهه راسي وراس بسملة، ومشى بينه ياخذنه للبقية..

هوسة بهوسة فوضى عارمة بالمكان علي انبح صوته وهو يصيح ويه الشرطة وينبههم محد يتخذ أي خطوة قبل لا يوصل ابو الاطلس..

-علي: يمة كومو وياي بساع

-زهراء: وين يمة وين نروح

-علي: ما تبقون هنا الشرطة تريد تحقق لحد يلمس شي من البيت امشو وياي

-حصة: يحققون ويانه؟؟؟

-علي: لا لا مو وياكم امشو وياي عمة لا نظل نسولف هنا

مشيت مريم وبسملة سودة عليه مريم تعرج ماعرف شبيهه بس ماكو وقت نوكف هسة، ركبنه سيارته مادري شلون كفينه بس اندحسنه دحس كعدت بالكرسي الوره علي بالضبط وهمست بحس خافت ماتوقعته سمعني..

-دعاء: مريم خلينه نتصل بأبوية فدوة

-علي: لا لا دعاء مو هسة

-دعاء: لازم نتصل بي الله يخليكم اهلي راح يوصلهم الخبر ويموتون خوف علينه مو مريم؟؟ كولي شي احجي

-زهراء: محد راح يعرف حبيبتي بس انطينه صبر اذا ابوج افتهم هسة راح يطش الخبر وتصير هوسة اكبر

مافهمت يا هوسة بس ما لحيت خصوصاً خواتي ثنينهن ساكتات، مشى بينه علي ويسولف ويانه يهدأ بينه بس الرجفة الي بصوته تسولف قلقه وتوتره..

مشى بينه بطريق طويل عبرنه المدينة سألته امه وين رايحين عبالهه راح ياخذنه لبيته بس كال رايحين لبيت المزرعة، حسيت بأيد تدغني درت عيني شفتهه مريم مسحت عيونهه وهمستلي بتعب واضح الكلمة تمطهه ياله تحجيهه..

-مريم: هسة لو يقبلون نتصل بأهلي دعاء

-دعاء: حتى اني اشوف لازم نتصل بس استحي احجي

لزمت ايدي بين ايدهه تخفف رجفتهن ونزلت عيونهه عليهن، هزت راسهه بطريقة لا وهمست..

-مريم: الصار حقيقي؟ لو اني نايمة؟

-دعاء: حقيقي والله

-مريم: احسني نايمة عيوني تحرگ

طبطبت على ايدهه وسكتنه ثنينه تأكدنه بسملة بخير وهدأت السيارة من صوتنه بس صوت علي يعتلي وهو من مكالمة لمكالمة ماركزت شيكول ولا يهمني اعرف..

بعد ساعة تقريباً وصلنه لمكان مقطوع مليان زرع بس ظلام غازي المكان وصوت نباح كلب جاي من بعيد..

-علي: لا تخافون هذا كلب حراسة، يله امشو جوه

فتحلنه قفل البيت ودخلنه جوه فتح الاضوية بالمكان واشرلنه نطب للصالة كلمن كعدت على مقعد اباوع للوجوه مبلوعة مصفرة والكل يرجف..

-علي: خالي والولد راجعين باجر ما حصلو حجز اليوم للاسف

-حصة: ما عليه بس خلي يرجعون

-زهراء: بنات تعالو للغرف حبيباتي ارتاحو لا تخافون كلشي تمام علاوي انطه خبر للشرطة احنه هنا وراح يحمونه

-رقية: عمة لو رايحين لبيت الولد

-علي: لا ما اجازف خلونه هنا محد يندل البيت وبلغت الشرطة احتياط

-حصة: بلقيس انتِ بخير، شلون صرتي

-نانا: احسن بس راسي يوجعني احتاج ارتاح

-حصة: كومي حبيبتي انتِ وغدير اخذو البنات خليهم يريحون

كامت نانا وغدير وياهه وانطونه غرف ماقبلنه ردنه كلنه نبقى بغرفة وحدة الخوف تعبنه حتى نانا ما خليناهه تطلع فرشنه بالكاع وكلنه تكومنه بمكان واحد..

-بسملة: اريد امي

-دعاء: باجر نتصل بيهم بسومة نامي

-بسملة: مريم ليش ساكتة؟ مرايم نمتي

-دعاء: عوفيهه تعبانة نامي بسملة

-بسملة: رقية، سارة شنو صار شنو هذا الهجوم الصار على بيتكم؟؟

-رقية: ماعرف حالنه من حالج

-دعاء: متعودين على هيج اجواء انتم؟

-سارة: لا ابد هاي اول مرة يصير هجوم على بيتنه

-غدير: باجر الولد يجون ونفتهم منهم نامو بنات

-رقية: غدير اخاف يجونه

-محد يجي نامي عيني

-بلقيس: هذا شنو الدم منين.. هاي شبيهه رجلين مريم..

كمت اشوف رجليهه واجت بصفي نانا فزت مرايم على لمستنه اوووي سودة بوجهي مشگوگة رجليهه يمكن زجاجة طابة بيهه، انخبصنه بيهه الدماية ترست الفراش وجسم مريم ناار صخنت بسرعة..

اللتهينه بيهه نداوي رجليهه نانا تعرف وكعدت الليل كله تطلع الگزاز واختي تعيط وجع وتبچي بروح رايحة، ارتاحيت من نانا كالت متحتاج خياط بس نلفهه ولا تكوم..

حطيت راسي على المخدة عجزت انام الليل كله افزفز واتخيل الصوت واكوم الوب وحدي البنات نامو بس اني كاعدة واراقب الشباك مال الغرفة حسيت بصوت طگطگة صارت بره بلعت العافية وغطيت راسي وبقيت هيج للصبح..

**

"مريم"
كعدت الصبح على صوت صياح كمت بسرعة اتلفت حوالين نفسي الغرفة فارغة بس اني نايمة باوعت لرجليه ملفوفة وطاسة مي وبيهه وصلة محطوطات يم راسي..

ردت اكوم وماكدرت توجعت دست على وجعي وكمت اذب روحي على الحايط اتچي واضغط على رجل وحدة، خطيت خطوتين ومات گلبي من وانفتحت باب الغرفة على وسعهها، بعدني دا اريد احجي وهتف بأسمي..

-مرررريم

دخل سريع وطبك الباب وچيت عليه حضني لصدره حيييل ويضغط على متوني ويسأل عني وعن حالي ذبيت نفسي على صدره من لا وعي وذبيت كل حملي عليه من الهبطة، وگعنه بالكاع على وضعنه ولسانه ما هدأ من السؤال..

-مرمر عايني عليه مريم انتِ زينة؟؟؟

ما اتجاوب وياه يتلمس وجهي وخدودي وجر الشال من راسي ذبه بجانبي ورجع يحضني ويدخل وجهي بصدره..

رفعت انظاري اله اشوف وجهه اصفر ومتعرق شرايين گصته مطگگة وچف ايده يرجف راح تجيله النوبة او يمكن اجته واكيد بسبب الخرعة، حاولت احجي أي شي بس اطمنه عليه وماطلعت مني غير كلمة..

-مريم: خفت

-اني يمج لا تخافين لا تخافين ما اعوفج

-رادو يخطفوني

-محد يخطفچ محد.. محد ابد مستحيل

جر وجهي عليه يمسح دموعي الجاي تنزل ماعرف خرعة البارحة لسه بيه لو هبطتي هسة من فتح الباب مأثرة عليه..

-اطلس

-عيوني وروحي

-اجيت

-اجي اكيد.. اجي حبيبي

سكتت ما نطقت بعد وهو يتعذر ويبوس بأيدي وراسي ووجهي ويحضني بقوة لدرجة احسني دخلت بنص صدره، يمسح على راسي وظهري ويهمسلي بكلمات مطمأنة، بقينه على هالوضع فترة من الزمن كلما اريد ابتعد يرجع يسحبني عليه..

-الاطلس: هاي شبيهه رجلچ ليش ملفوفة؟؟

اخيراً بعدني عنه شوية وسحب رجلي يشوفهه، جريت كذلتي وره اذني وكحيت بلاعيمي توجعني..

-البارحة دست على شي وجعني

تغيرت ملامحه وعض على شفته السفلية ذب نفس قوي وغمض عيونه، اخذ رجلي بين ايده يمسح عليهه ويهمس..

-توجعچ يروحي

-كلش اي

-ريته بگلبي الوجع

-اسم الله لتكول هيج

-السبب مني الصوچ مني شلون خليت ابوي يسافر شلون جازفت بيكم

-الصار مو ذنب احد كافي حباب بس فهمني شنو صار شلون هيج يدخلون للبيت

-مادري.. عقلي راح يوگف

-ليش سولفلي

تچه ظهره على الحايط وسحبني لصدره حاوطني بثنين ايده وصار يمسح على خدي بهدوء، ذب حسرة عالية وكال..

-هيج جريمة ضخمة تصير لا خافو ولا ارتعبو والحرس ولا واحد موجود بيهم مادري مدفوعين مخطوفين، عدنه اربع حراس يوكفون بالباب ما تغمض عينهم وينهم؟؟ مالهم اثر اختفو، الكامرات متضررة كلهن على طول الطريق كامرات بيتنه والي حواليه

-وكامرات الشارع؟

-كلشي ماكو مطفيات جايبين هكر جبير لاعب بالاعدادات جريمة جريئة حيل ومتقصدين نسوانه يردون يوجعون گلبنه بيهن

-واحد منهم خدرني حسيت خدرت وره ما حط ايده على حلگي وخشمي بس ما غفيت بالكامل ماعرف ليش مادري ما لحگ يسري بيه لان اجو الشرطة

ضمني بقوة وضغط على راسي بحنچه، اسمع دگات گلبه التنبض بهمجية حسيت گلبه راح يشگ صدره ويطلع..

-اطلس البارحة ردت انطي خبر لابوية و..

وخرني عنه بسرعة فاك عيونه نظرتله بأستغراب وكملت كلامي..

-بس علي ماقبل نحجيلهم

ذب نفس مرتاح وحط ايده على صدره هز راسه موافق وكال بعدما مسح وجهه..

-الموضوع تكتمنه عليه محد يدري بالصار لمصلحتنه

-شلون لمصلحتكم؟

-اذا طلع الخبر وطش راح تصيرلنه سالفة اكبر راح نحير ونركز بكلام الجرايد والصحف وننسى الأهم

-يعني محد راح تخلو يفتهم؟

-مستحيل نسمح بهذا الشي حالياً

-اطلس

-ها عيني

-تتذكر الي رادو يعتدون عليه بيوم عرسنه؟

-ما نسيتهم ولا لحظة

-برأيك الهم ايد بالصار البارحة؟

-اي، عندي شك وحدس قوي الهم ايد، صار فترة ابحوش واتابع الكامرات مال يوم العرس بس ما لكفت شي هم معطليهن، وديت الكامرات لهكر وكال لاعبين بالاعدادات مستحيل يرجعن هلكت واني ادور واسأل ما خليت واحد يعتب عليه ما رحتله...

ذب حسرة قوية وحرك راسه نافي، ملامحه تغيرت للحزن وگال بحرگة..

-وحق هو الله ورب السماوات السبعة مريم لا ليلي ليل ولا نهاري نهار من يوم گلتيلي لليوم ما نمت ليلة هنية بالي وياهم كلما اللگه او اشك بأحد يملك نفس المواصفات الگلتيلي عنهم اخلي يحققون وياه، اريد اللگفلي راس خيط بس شغلهم نظيف ودقيق من باب جازفو بجرأة من دخلولج بدون اقنعة ومن باب ثاني مرتبين الموضوع وحاذفين تصوير الكامرات..

-خلص انساهم خيولون

-ما انساهم لو اموت واجيبهم وانعل والديهم بس انطيني صبر

-برأيك ذولة شنو؟ وين يشتغلون والمن؟

-لشمسون

-معقولة؟؟

-معقولة ونص واذا ما تابعين الهم اكيد بيناتهم شغل مشترك

-ماعرف بس ليش هيج يسوون

-شمسون عصابات مافيات شغلهم كله من جوه الجوه كم شركة بشركة بلعوهه واكلوهه بسبب طمعهم واجرامهم معروفين بشغلهم النظيف والرزن لذلك محد عنده شي عليهم حتى الدولة

-وهسة يردون يأذوكم بأي طريقة حتى تنسحبون؟

-ما يردونه ننسحب لان احنه شركة ضخمة مستحيل تروح بين ليلة وضحاها يردونه ننضم الهم ويقوون بينه اكثر

-شكد صعبة اطلس الله يساعدك

-شنو قصدج؟

-يعني احس دتحارب وحدك انتَ الوريث الولد الوحيد لابوك ودا اشوف دمك محترگ وشلون تحاول تبتعد منهم ومتنطيهم مجال هاي شجاعة اطلس وجرأة منك انتَ واحد وهمه اخوان ثنين

-همه ثلاثة

-ثلاث اخوان؟؟؟

-اي

-ماعرفهم شايفة بس مالك وفاهد اني؟

-عدهم بعد واحد ثالث بس مو هنا هذاك ضد اخوته بس مدلل ابوه عايش بالسويد

-من نفس الام لو شنو؟

-لا كل واحد من ام وكتلج ابوهم ما متزوجهن ثلاثتهن

-ليش عبالك هو مفتخر بهالشي ان عنده ولد غير شرعيين؟

-كدام الناس هو متزوجهن علساس بس احنه نعرفهم وحدة من صاحباته خانته ويه ابوي

-شنووو!!!

نزل عيونه عليه ابتسم بتعب وهز راسه اي، عدلت كعدتي وجريت شعري لوره اذاني اريد اركز بكلامه..

-مريم: يعني عمو خان امك؟؟؟

-مو خيانة عاطفية اقصد خيانة بأمور الشغل سربت معلومات منهم لأبوي

-وشلون تنطي معلومات هيج من دون ولشي؟

-شلون يعني

-اقصد المقابل شنو جان؟؟

-فلوس طبعاً

-زين المعلومات شنو چانن؟

-ماعرف ماتدخل بهاي الالعاب مو ثوبي

-معقولة سبب عداوتكم هاي المعلومات اطلس؟؟؟

حرك راسه اي وسكت بقيت صافنة استذكر كلام مالك كال عدهم شريحة وشركة الاطلس سرقوهه منهم معقولة هاي الشريحة حبيبة ابوهم منطيتهه لعمو؟

مريم: اطلس الشريحة اكيد الشريحة هي السرقتهه!!

-اممم

-يعني انتَ هم فكرت بيهه؟؟

-اي طبعاً

-زين كلت لعمو يمكن صدك هالشي؟؟

-چا ليش اني وابوي صارلنه فترة متلاطمين غير بسببهه ما يرضى يشاركني من فاتحته بالموضوع كال ماكو لا شريحة ولا نعل واجهته اكثر من مرة ولفتهه عليه ومُصر ماكو شريحة وشمسون جاي يتبلون علينه

-مريم: حمزة يمكن يكدر يأثر عليه

-مريم الكل تدخل حمزة وابو حمزة الكل وابوي يكول ماكو شريحة وشمسون جذابين وجاي يردون يساومونه بشي ما موجود

-وانتَ تكول عمو يحجي الصدك؟

-لا

-اها!

-اممم

-تتخيل عمو يجذب علمود شريحة اطلس؟

-يجوز مو شريحة يجوز شي ثاني بس ضام عليه شي واكبر دليل تعاونهم ويانه ويريدنه نقبل نشتغل ونحط ايدنه بأياديهم القذرة

-اطلس عليك الله لتوافق حاول تقنعه حرام تره انتَ دتكول شغلهم كله حرام بحرام لتخلي الفلوس تغريكم

-لا تشيلين هم

هزيت راسي ورجعت اكعد بصفه تچه راسه على الحايط وسرح بنظراته بعيد تذكرت من راسلته البارحة وما جاوبني ردت اعاتبه واتعارك وياه بس استحيت الوضع مو مناسب ومبين عليه مريض كلش..

-اطلس انتَ مريض؟

-اممم

-شبيك شنو النوبة؟

-امممم

-تروح طبيب؟ شنو رأيك نروح طبيب حباب لتخوفني عليك

-اممم لطيف تخافين

-عوف اللطافة هسة روح طبيب كلش تعبان انتَ

-مريم

-ها

-احتاج ارتاح

عرفت قصده بهالكلمتين معناهه واصل من التعب لدرجة ميكدر يتحمل شي، لزمته من ايده وجريته انيمه بمكاني وين جنت نايمة وكعدت يم راسه امسح على جبينه المتعرق..

-مريم

-ها كول

-طلعي بره بلا امر عليج

-اطلع؟ ليش

-روحي مريم

-لا ماروح اسكت تتعب

-روحي مريم روووحي

مط الكلمة بتعب روحه جاي تطلع جسمي رجف من تغير لونه كلش، لزم ايدي ضغط عليهه خفيف وقريت همس شفايفه يكول "روحي" ماردت اتعبه اكثر وكمت بصعوبة امشي طلعت من الغرفة بسرعة ورحت للصالة شفت خواتي كاعدات وياهن رقية وعمة زهراء..

-مريم: بنات نانا وين؟

-زهراء: بالمطبخ

رحت للمطبخ فتحت الباب شفت عمو محمد كاعد ياكل على الميز ونانا واكفة تغسل مواعين..

-مريم: الحمد لله على السلامة عمو

-محمد: الله يسلمج بابا حبيبتي، هاي شنو شبيهه رجلج؟

-مريم: البارحة تأذيت

حچيتهه واني امشي متوجهه لـ نانا وكفت بصفهه اخذ الشغل من ايدهه وكلت بصوت ناصي بس اني وياهه وعمو نسمع..

-نانا اطلس راح تجيله النوبة وكلش تعبان

نظرتلي نانا بقلق وغسلت ايدهه بسرعة ونشفتهم اما عمو رجع ياكل اكله وكال..

-محمد: من البارحة وضعه مو تمام خلي تزوره خلي يرتاح

درت وجهي عليه مستغربة كلامه اما نانا عافتنه وراحت للغرفة، شافني صافنة عليه ابتسم وكال..

-تره اطلس ابني مريم هم اخاف عليه

-مريم: اكيد عمو

-محمد: بس متعود على وضعه وليدي مريض صرع من عمره سبع سنوات

-ماله علاج مو؟

-لا ما اله

-مريم: گلبي يوجعني عليه كلش

ابتسم وهز راسه اخذ كوب الچاي بيده رشف منه رشفة خفيفة وحط رجل على رجل..

-محمد: حلو هالشي

-مريم: لا مو حلو عمو يعني شعور تعيس ماكو بيدي شي اساعده بي تعبت على تعبه

كبرت البسمة على وجهه وهز راسه استحيت شبيه ماخذه راحتي ويه الرجال..

-محمد: ليش سكتي؟

-مريم: هههه خلصت كلامي

-كلتيلي تتعبين على تعبه

-اي والله

-هنياله

بلمت ملامحي متوترة من حچايته انداريت اكمل المواعين واسمعله يكمل كلامه..

-تحبي بابا انتِ، حلو هذا الشي ليش خجلانة من احساسچ

-ليش كلت هنياله عمو؟

-لان المرأة الي يحبهه تبادله الشعور

انداريت عليه باقي على ابتسامته ويرتشف من كوب الچاي البيده، رجعت اكمل غسل بلعت ريگي متوترة والصحن كام يرجف بين ايدي شعور غريب حاوطني خصوصاً من كال..

-الحب مو عيب، الي بينج وبين الاطلس عناد تردين تاخذين حقج منه تريد ترجعين كبريائج وتكسرين خشمه العالي واظن سويتيهه وهذا يكفي

-عمو اني طلبت الطلاق منه وانتَ ما رضيت بي هذا الشي الوحيد الي يرجعلي كبريائي

-ولا راح اقبل بي كملي حياتج بابا ويه ابني تره خوش فحل جميل طالع على ابوه...

حجاهه بضحكة وكام طلع من المطبخ تغاضيت عن المحادثة الغريبة الدارت هسة وكملت غسل المواعين نشفت ايدي ونزلت رداناتي وانداريت اطلع وكمزت من شفت عمر بوجهي..

-عمر: بسم الله الرحمن الرحيم

-مريم: اخترعت ياخي هو هييج

-عمر: صح صح جنت اتسحب مادري شحس، المهم شلونچ مرايم

-الحمد لله بخير انتَ شلونك استاذ

-مو زين خرطنه العافية عليكم طمنوني شلونكم احد تأذه؟؟

-لا الحمد لله بس رجلي شوية بس ما لحگو يأذوني لا اني ولا اختي بسملة تخيل رادو يخطفونه والله

-يخطفوچ بيهه مجال بس بسم الله الرحمن الرحيم لا واگفة

-يااا هاي شنو

-وعلي باجر يرجعوهه النه يكولون ما نكدرلهه طيحت حظوظنه

هزيت راسي وكممت حلگي اضحك وهو يفر بيده وراح للثلاجة طلع منهه مي فتح البطل وكال..

-اول ما طبيت البيت تباوعلي وتكول انتَ مو هستوك طلعت شكو رجعت شبسرعة واني صافن عليهه هاي شبيهه بعدين تندار على اختج تگلهه اكلج هذا علي لو هذاك الثاني

-مريم: لسه متفرق بيناتكم خطية

-اي اي وكلما شافتني همست اهووو هم اجه

-انتَ تكول همستهه شنو هيج مركز بيهه

ضحك خجلان وحك مكان خده اندار عليه وكال..

-ما مركز بس نظراتهه الي غريبة چنهه حاقدة لو مزعوجة

-لا تتخيل ماتوقع

-شمدريني شعدهه وياي تكول انقهر من اباع بوجهه عود ليش تنقهر؟

كمت ازلغ بخدودي تعبتني بسملة بلسانهه وتعبت امي ماعدهه ستوب فاضحتنه بين العالم، ما جاوبته بقيت اعدل بالميز الاكل بي عمو وهو يكول..

-والله خوش متسوك عليوي ابو بيت صاير فدوة يروحلي

-شو تارس الثلاجة شنو كم يوم تردون نبقى هنا؟

-لحدما نعفن

-استاااذ

-هههههه شمدريني مريم اني حالي من حالج يله اني افلت محتاجين شي؟

-لا سلامتك

طلع واني شفت زيتون وجوز على الميز اكلت كم وحدة وطلعت للصالة يم خواتي بسملة كاعدة على اعصابهه وكل شوية متعاركات هي ودعاء ورقية تهدي بيهن..

-دعاء: اخيراً اجيتي مريم هاي اكلت راسي تريدنه نرجع

-مريم: اي حبيبتي ميخالف بس خلي اطلس يتحسن هو ياخذنه كلنه

-بسملة: ليش شبي اطلس؟

-مريم: تعبان شوية من السفر

-زهراء: شبي تعبان؟ اني انتبهت عليه وضعه مو تمام شنو اجته النوبة؟

-مريم: لا عمة كلشي مابي

ابتسمت وانداريت بس عليهه عضيتلهه شفه افتهمت عليه وهزت راسهه، كعدت وخواتي بدو يتسائلون شنو نوبة وشبي واني اغلس اعرفه ينحرج بسببهه وميحب احد يعرف هو مريض صرع ولازم احترم هالشي..

واني كاعدة بين البنات نحجي عن الصار البارحة انبلعت حچايتي من شفت نورسين تطل علينه وتجي تكعد ويانه، عكدت حاجبي متسائلة سبب وجودهه بس ما بينت..

-نورسين: شلونچ مريم ان شاء الله بخير؟

-مريم: هلا بيج حبيبتي نورسين، رجعتي وياهم؟

-نورسين: اي كلنه اجينه سوه بس باباتي بقه هناك

-زهراء: نوره وينهه غدورة؟

گولبت عيونهه وكالت بتعب وهي تضحك بخجل وزعل..

-نورسين: بباب غرفة سارة

-مريم: ليش شبيهه؟

رقية لطمت على وجهها وذبت نفس قوي..

-رقية: طبعاً لان حمزاوي يمهه بالغرفة

هزيت راسي وكمت اكعد على جهة من الصالة ماريد تجمعني بنورسين محادثة اتوتر ماعرف شبيه اجو خواتي بصفي ولزمتني بسملة من ايدي وهمستلي بحماس..

-بسملة: حرامات فاتچ لقائهم چان يخببل

-مريم: صدك

-بسملة: ياا غير ركضت بين ايده احضان وبوس وجعص وفعص خزونه خزي بس والله ولا تخزيت بالعكس تمنيت يكملون گدامنه اتعب واني اكول لايكين لبعض

-مريم: هلو هلوو

-دعاء: سارة صارت حمرة والرجال فقد والله فقد عليهه

-مريم: وهاي كدام الكل؟؟؟

-بسملة: كدامنه كلنه وغدير رادت تموت والله كلت راح توكع علينه من الغيرة

-مريم: اتخيل عمو محمد والاطلس يشهدون هالمشهد

-بسملة: لا ثنينهم مو هنا طوطي دخلچ للغرفة والله يعلم شصار من استهتار بيناتكم وحمودات راح لحصحوصة

-مريم: ادبسز بسملة انتِ ادبسزز

-دعاء: عوفي بسملة سولفيلي شصاار بيناتكم

-بسملة: شوكت نصير خالات مرايم شووكت

-مريم: امداج طايحة الحظ اني اعلمج انچبي.. اشش اشش ولا حچاية

-بسملة: والله ولا نسكت نريد نعرف شبيچ عيني شو صرتي حمرة اكيد صارت سوالف فسوقية عميقة جداً

-دعاء: الله صدددك مرايم

-مريم: انتن شبيجن شنو تتخيلون حبي؟ كلشي ما صار ولشي اصلاً اطلس مريض وتعبان

-بسملة: يووه حرامات هسة ما اجه مرضه الا بهيج حدث مهم

-مريم: هييي انتِ شو لسانج بعده شطوله هاي عود البارحة رادو يخطفوهه شو لا احساس ولا ضمير حضرتج

-بسملة: هسة لو خاطفيني والله يومين ميتحملوني انخل روسهم وگلوبهم

-مريم: ههههه نفس حچاية عمر

-بسملة: لا تكولين اسمه مريم ازعل اتذكر قصته ويه اسيل وعيوني تدمع ماتحمل

-دعاء: خلونه نرجع نسولف بالعصافير حمزة وسارة...

**

-والله مابيه شي حمزة اهدأ فدوة

-بله اخذووچ بله اذااچ وين انطي وجهي بعد انييي

-بس ما اذاني كلشي ما صار والله بس جر نفس حباب ليصير بيك شي

لازمة ايده يرجف اعصاب وتوتر عدتله الصار البارحة الف مرة وويه كل مرة يرجع يحضني ويبوس براسي ووجهي..

-سارة: حمزة راح اموت من الخنگ جعصتنيييي

مردني مرد انجعصت جعصة تسوه عمري، يوخر وجهي من صدره يتأمله ويمسح على ملامحي ويرجع يحضني..

-شنو گلج هذا الاخذچ للغرفة؟؟؟

-ما سمعته والله كتلك الف مرة من الخوف انطرشت وثواني ودخلو الشرطة علينه

-راد يعتدي عليج يعني؟؟؟ ليش حبسچ ولجج احجيييي

-لا لا والله ما لمسني بسوء ابد ولا طخني جان اصلاً بعيد عني

-چا لييييش

-مادري مااادري

اتذكر الموقف وابجي وهو يلوم بروحه انوب يسكتني ويهدأني من يشوفني صرت احسن يرجع يسألني وهم ابچي مرعوبة وهيج صارلنه اكثر من نص ساعة..

-لا تبجين انعل ابو الينزل دموعج ولج سارة راح اموت وعلييي

-لتموت وين انطي وجهي بعد اترمل انوب

ضحك وجرني على الفراش نام وخلاني بجانبه توترت من حركته بس ما ابتعدت، مسح على شعري وباس گصتي..

-اريدج تنسين الصار انسي كلشي اني يمج لا تخافين

-اخاف شفت الموت بعيوني، خفت يتكرر الصار وياي قبل

-ما يتكرر مستحيل اسمح بهذا الشي، اني وياچ وفنه الي يطخچ بسوء، الصار البارحة جرت اذن النه كلنه حتى مانعوفكم كلنه ونسافر فد مرة

-هسة لو ابوك هنا چان اجه يساعدنه

-ابوي مسافر هم شغل، خلص انسي سارة اريدج تنسين كلشي

-احاول

-انسي الماضي عيشي حاضرج، ركزي بيه وبس باعي بعيوني.. رفعي عيونج لعيوني لا تستحين

رفعت عيوني صرنه عين بعين معت من الخجل قربنه يوتر ونبضات گلبي صارن ببطني ماكدرت ابقى ابتعدت عنه بسرعة ووخرت شعري عن وجهي..

-اءء.. احم اريد هذا شسمه اريد مرطب الشفة مالتي

-مرطب شفة؟

-اي اي احتاجه اكيد رقية اخذته امداج صرصور بواگة وحرامية

-اها

-اي اخذته هي اخذته دائماً تاخذ اغراضي دائماً هاي

-ميخالف

-لا لا ماقبل اني ابد وهسة شفايفي گسبت احتاج مرطب

-تعالي اني ارطبهن

-شنو شلون؟ تحطلي فازلين؟ لا لا ماحبه كلش انزعج منه

جرني من ايدي عليه ردت اموت بين ايده طفرت اگمز بعيد واصيح..

-مرررطب الايد اخذذذته

-مو چان مرطب شفايف؟

-اءء.. شسمه حتى مال الايد.. حتى هو مو اگلك حرامييية

-تعالي اني ارطب ايدج

-لا لا ميصير اروح اخذه منهه

رحت اهرول على الباب اريد افلت فتحتهه وطلعت مثل المخابيل بره الغرفة اركض للصالة شفت البنات كاعدات وكرصت وياهن دحست روحي بين دعاء ومريم..

-بسملة: اللهم صل على محمد وال محمد وهاي اجت الثانية

-مريم: سارة شبي وجهچ مطرگع احمر؟

-بسملة: هذا تأثير حمسة حوبي

-دعاء: الله سولفيلنه سوولفي

-سارة: وين صرصور اني اعلمج اليوم اشعلچ شعععل

اجت رقية ميته ضحك كعدت ويانه وصارت تصفك بيدهه..

-رقية: هاا شبيه شسويت

-سارة: شكو تصفكين انتِ حقيرة بگتي مرطب الشفة مالتي!!

-رقية: اني؟؟؟ هاي شوكت ولج

-سارة: اي اي انتِ عود تسوي روحهه ناسية

-دعاء: اوكفي حبي سويرة شبيچ شنو باگته تره احنه طلعنه من بيوتنه بطرگ ملابس البيت باعي حتى الربطة لابستهه شرشف

-سارة: اي هي لو ما بايگته چان كدرت اجيبه وياي وما تيبس شفتي!!

-رقية: يمة يالعيارة يمممة

-دعاء: حبي عوفي المرطب سولفيلنه الحصل ما صارت سالفة منا مناك

-سارة: لا لا كلشييي ما صار كلشييي ماكو ابد ولا صار ولا ابد ولا حچينه بس بچيت

-بسملة: امداچن يالفاهيات يالغبرات هاي لو اني عندي رجل الا اكرهه عيشته

-مريم: طبعاً حبيبي انتِ اختصاص بعد

-رقية: سارة شفتي غدير؟ جانت تتجسس عليكم نورسين تكول

-سارة: لا ما شفتهه مادري مانتبهت طلعت من الغرفة اركض

-مريم: ليش شبيچ

صفنت ساكتة صدك اني ليش طلعت اركض؟ هو شنو صار شدعوة كل هالردة الفعل المبالغ بيهه شخطت اني من انخطبت لليوم عقلي مو نفسه..

فركت ايدي بين بعضهه وادردم بيني وبين نفسي ان ماكو شي يستدعي كل هذا التوتر، اندكت باب الصالة وهي مفتوحة وطل علينه علي..

-علي: احم.. سلام

كلنه جاوبناه اشر لأمه تكوم وياه راحتله واحنه رجعنه للسوالف..

**

-يوم تعالي احاچيچ تعالي

دخلتهه الغرفة وقفلت علينه الباب رفعت موبايلي اتصت على عمير وانتظرته يوصل..

-زهراء: ها يمة كول وليدي شبيك متوتر

-علي: عندي موضوع مهم وياچ

-زهراء: يمة عمت عينيي نفس حچاية ابووك

صارت تدك على رجليهه وتبجي ركضت عليهه اكعدهه على كرسي وكعدت يم رجليهه عصرت ايدهه بين ايدي وحجيت متوسل..

-يمة اروحلج فدوة مو وكتهه الله يرحمه ابوي مات راح صار طحين خلص انسي

-انسى روحي وما انساه ولك هذا ابوك

-على راسي ابوي بس هسة خلي يرتاح يومية تبچين عليه شعلتي ابو ابوه بالگبر من وره دموعج

-ولك ليش هيج تحجي اسم الله عليه

-ما تدرين مو زين نبجي على الميت؟ خلص مو زين لا تبجين بعد

صارت تهتز وتبجي اكثر وتصيح ابوك اجاني بالحلم وگلي لا تبجين عليه بعد كمت اللطم من القهر لازم اسكتهه اريدهه تنتبه وياي وتعوف ابوي هسة..

-عمر: هاا خيركم شكو

-علي: ابوس راسك زين اجيت ونقذتني

-عمر: ليش تبجين يوم شلون احنه نظل هيج

-زهراء: لا تحجي انتَ اشش لا تسولف شي والعباس تشبه ابوك بالضبط شبيدي اني ياربي

-علي: يمة تره احنه توم دخيل عينج يعني ماكو فرق بيناتنه

-زهراء: لا لا شمرة عينه نفس ابوه سودة بوجهيي

-عمر: راح اطفيهه وروح ابووي اطفي عيني حتى ترتاحييين

-زهراء: لا يمة لا وليدي اسم الله عليك لا تصير اعور انوب وتبور على گلبي

-علي: يمة اني راح ابور على گلبج دخيلج بالج وياي مسحي دموعج اي ديلا مسحيهن وبعد مخاطينج هم يله فدوة لروحج

-زهراء: يله يله مسحت بس عمر لا تباوعلي انتَ

-عمر: راح اغمض

-زهراء: اي عفية ماما عفية بيك وليدي

-عمر: حاضر، علي سولف شعندك قلقتني

-علي: يمة اني احب

دگت صدرهه وشهگت..

-زهراء: خااالد يَـ زلمتيي تحبببب ولك

-علي: احب احب ما ذبحت ولا كتلت ولا اغتصبت يمة حب هذا

-زهراء: طايح الحظ بعدك صغير على الحب انچب يله

-علي: شو حتى اني احس روحي صغير على هالسوالف مو بله يمة؟

-زهراء: اي بعدك بطول زري انچب لا تحجي بهالسوالف تطلع عينك

-عمر: شسالفة!! عمرنه صار 31 سنة يمة خاف بعدج عبالج احنه 13

-زهراء: اي بعدكم صغار چا شنو

-علي: المهم عوفو العمر مجرد رقم ما يهم، المهم اني احب

-عمر: چنت حاس لا مو حاس متأكد

-علي: اي وحاير كلش

-زهراء: ليش يمة حاير من شنو

-علي: يمة البت مو نفسنه شريفة حيل شريفة محجبة ومحتشمة ومتدينة

-زهراء: چا ما تناسبك هاي يمة

-علي: يوووم شسالفة اشايفتني يهودي

-زهراء: لا خلينه نحجي واقع ماما عليوي انتَ تختلف عنهه وهاي الفوارق بيناتكم راح تسببلكم مشاكل

-عمر: الجاي افهمه تردين تخطبيلنه بنات ليل؟!

-علي: اندري هاي اول مرة اشوف هيج ام مو اگلك حظنه طامس اني وياك

-زهراء: يمة وليداتي مو هيج اقصد بس مد رجليك على گد غطاك يا ماما مو تاخذ وحدة وبعدين تفرض عليهه عيشة تختلف عن عيشتهه ولا هي تاخذك وتريد تغيرك على مزاجهه انتَ جاي تكول هي محتشمة وانتَ مو هيج وليدي

-علي: احبهها يوم اتغير لخاطرهه

-زهراء: خلص ماطول انتَ تريد تقدم هذا التنازل وتتغير لخاطرهه الله يوفقكم

-عمر: يمة هي محتشمة ومتدينة بس مو معقدة البت اني ملتقي بيهه

-زهراء: چا بعد شكو روح والهوا بظهرك يمة فدوة لطولك راح يعرس وليدي

-علي: اي يمة بس عندي مشكلة جبيرة كلش

-زهراء: سترك ربي شنو من مشكلة

-علي: ما ترضى نفوت بعلاقة تريد رأساً خطوبة وزواج

-عمر: اممممم

-زهراء: سألتهه ليش ما تقبل بالعلاقة؟

-علي: اي تكول هاي تربيتي وعقليتي وديني ما اتنازل عنهن علمود حب

-زهراء: حبيبتي فدوة لعينهه اي ولكم ذني البنات المؤدبات طاحظكم تركضولي وره الصايعات الادبسزيات

-عمر: يمة هستوچ گلتي مد رجليك على گد غطاك ثانياً منو راكض وره ذنيچ شو هاي اول مرة عليوي يحب وحبله خوش بت

-علي: ام عمير هسة شلوون باصريني

-زهراء: ترضى بشرطهه وتنچب

-علي: يمااا احنه وين عايشين وين اكو زواج گبل، غير نحب نصخم نعيش تفاصيل سوه مو انتِ وابوي تزوجتو عن حب وهاي قبل 32 سنة

-زهراء: ها علاوي هااا

-علي: ها شنو

-زهراء: مو گتلك مد رجليك على گد غطاك هذا الاقصده ماما انتَ ما يصير تروح على بنية قافلة تدخل علاقة وتقنعهه گوة نصير حبايب تريد من اول روح على بنية من هذا النوع

-علي: هسة شلون شسوي سولفو

-عمر: يا اما تروح تخطبهه يا اما تتنازل عنهه وانتهى

-علي: عمر افهمني ماكدر اخطبهه بهالسرعة افهموني ما مستعد لهيج خطوة

-زهراء: هذا هو چا عوف البت تعيش حياتهه ومن تكون مستعد تعالي گلي واروح اخطبهه الك بعيني

-علي: قابل هي تظل تنتظرني هيج بنات بساع ينلگفن ما يظلن

-عمر: حيرتنه تره

-علي: شوف هسة مو امي وابوي تزوجو عن حب يمة سولفي انتِ كولي

-زهراء: كل وحدة وشخصيتهه ثانياً اني وابوك حبنه طاهر ماما مو نفس تفكيرك هسة تريد بوس ومحاضن ابوك لمسة ما لامس ايدي حبنه كل بالعيون

-علي: واني اظل احب بعيوني وتالي البت تروح وتنخطب لغيري وعلي ابوگهه بيوم عرسهه ماعوفهه

-زهراء: ههههه بوگهه هسة عليوي لا تظل تماطل تره تتندم

-عمر: ملاحظ هنه هم ثگيلات مو خفيفات خصوصاً دعاء كلش تستحي

-زهراء: دعاء اخت مريم؟؟؟

-علي: اي هي شبيچ شو انصدمتي ما عاجبتچ؟

-زهراء: بالعكس خير ما اختاريت وليدي شلون بنية جمال واخلاق وندارة وحياء

-علي: هسة شلوون

-عمر: تظل تحب بالعيون خوية هذا الحل الوحيد

-زهراء: اروح فدوة وليداتي كبرو وراح يعرسون تعالو يمة تعالو يا بعد امكم

حضنتنه وتبجي علينه وكل شوية صالختنه راشدي وتشبهنه بأبونه كرهنه ابونه الله يرحمه وينك بوية تعال شوف ولدك المعنفين..

**

"مريم"
كعدنه حول السفرة نتغده نانا طبختلنه وريحة الاكل تجنن ترست البيت، واحنه ناكل اندكت الباب كام علي يفتح وچان نشوف ابوية وامي جايين يتراجفون..

دارت محادثة طويلة كلش بين ابوية وعمو محمد فهمه على الصار وگله كلشي تحت السيطرة احنه هنا بأمان والحماية محاوطين المكان كله، بابا عصب ولزمنه وحدة وحدة يحضن بينه ويسأل عن احوالنه..

-احمد: امشو بابا يله نروح

-محمد: وين ابو مريم وين ماخذ چنتنه؟

-احمد: ما تظل هنا اخاف عليهه عود من يهدأ الوضع خلي الاطلس ياخذهه

-حصة: هاااو گلنالك امان بو مريم لا تكبر المواضيع

-احمد: واذا صارلهه شي؟؟؟

-محمد: بعيونه مريم لا تخاف عليهه والبنات اذا يحبون يبقون هم ببطن عيننا نحطهم

-احمد: لا لا مريم چنتكم وتبقى بناتي يرجعون وياي يله بابا

ودعوني خواتي وعيوني تعلگت بيهن تمنيت اروح وياهم بس استحيت احجي عمو محمد چان ضايج من اسلوب ابوية وخالة حصة هم قررت ابقى هنا بس كم يوم واكول لأطلس ياخذني الهم من تهدأ الاوضاع..

فرغ البيت من حس خواتي صار هدوء وضوجة المكان مو مكاني والجو مخربط تمنيت نرجع لبيت عيالي او لبيت اطلس على الاقل مكان مريح ومتعودة عليه..

اليوم كله اطلس ما طلع من غرفته كلما اروح اشوفه بالغرفة اللگاه نايم ويرجف، نانا تسويله كمادات وتنطي علاج وتخليني اطلع واعوفه وحده..

لليل كلش الكل راح ينام بس اني كاعدة ونورسين وغدير استغربت غدير ما ذبت سمهه عليه مادري نعسانة مادري تعبانة مادري ضايجة لان حمزة وسارة راحو ودخلو غرفتهم گدام عينهه..

كمت اروح لغرفتي فتت لكيت الاطلس هم نايم نزعت الحجاب والروب الاجيت بي ضوجني بي ياخة تحز برقبتي بقيت بدشداشة النوم أمنت هو غافي وميحس عليه..

كعدت متچية ظهري على الحايط ومغطية جسمي بفرشة وصافنة عليه، دقايق وكمت اقيس حرارته نزلت الحمد لله حتى لون وجهه استعدل، جريت ايدي اوخرهه ونزيت من لزمهه حيل ورجعهه على وجهه..

-كعدت

-امم

-شلون صرت؟ جوعان؟

حرك راسه لا وعدل نومته، فتح عيونه يتأملني غصت بهدومي ملابسي تخزي شجاني نزعت الروب، ابتسم بوجهي وسحبني عليه اكثر وگعني على صدره..

-اطلس رايحة اصبلك عشا

اريد اكوم ولازگني بي حيل گلبي گام يرعد رعيد من گلبني على الفراش بصفه حطيت ايدي حاجز بين صدره وجسمي خفت والافكار السودة ملت راسي..

-اطلس جوعان انتَ اكيد ما اكلت مو ما اكلت

-اكلت

-لا لا وين اكلت رايحة اسويلك اكل

-ماريد اكل

-لا لا تريد

-ماريد شسالفة

-لعد وخر عني كوم مني لتسوي هاي الحركات تره اعيط

ضغط على زندي بين ايده وتجرأ بحركاته لابت روحي شنو ديسوي هذا راح اموت، ضحك من شاف وضعي تخربط وادفع بي گام عني ونام بصفي رجع لمكانه..

-كلشي ما تتحملين شلون بيه

-وخر لتعيد هاي الحركات عيب ميصير

-وين حلقتچ؟

-يا حلقة

-الحلقة مالتج وين

-شنو حلمان اطلس خاف مصخن بعدك تعال اشوف

قست حرارته كلشي مابي مضيگ عيونه ولازم چف ايدي يفر بي، رجع انظاره عليه ونتر..

-حلقتج وين مريم ليش صايرة تنزعيهه؟؟

-ما اللبسهه بس كدام ابوك

-لبسيهه ممنوع تنزع

-ماا

-مررريم

-ماا

-كولي ما بعد مرة وشوفي شيصير

-مـ.... ـا

لزمني فعصني بين ايده وهجم يريد يبوسني كمت اصيح وارافس بين ايده..

-ماماا اقصد مااماا مو ماا والله مو مااا

-اذا عدتي هالكلمة تتعاقبين وبعد انتِ بكيفج

-بله شلون تعاقبني

-اسوي شي مستهتر وياچ ما راح اكلچ شنو منتظرج تكوليهه حتى اراويج صورة وصوت

-عيببب عيب عليك

-كوليهه يله منتظرج

-ماكولهه وخر لو تموت حتى تحقق غايتك الدنيئة

-ماكو دنائة بين المتزوجين عزيزتي

-متزوجين راح يتطلكون بعد سنة!! لا لا لحظة بعد 11 شهر

-كومي كوومي عني لا اطيرچ بدفرة

-وين الكلاس وين الموسيووو وين الرُقي وين السمو

-الاطلس: مايفيد وياچ هالاسلوب

-قصدك اني بيييييئة!!!

-قصدي انتِ لسانج طووووويل وماكدرلج لازم اسولف وياچ بلغتچ

-شقصددددك

-ما اقصددد شييي

-قصدك انييي مو راقييية مووو طلگنيييي يله يله يله هسسسة تطلگ هسسسةةةة شجاريلك باقي ويه وحدة نفسيي يللله

-صوتج ولج منو كال انتِ مو راقية حبيبتي انتِ الرُقي ذاته منين تجيبين هالحجي مرمر اششش ولج لا ترافسين خرب روحج خرررب

-خرب روحييي اطلسسس انتَ تماديييت هسة تطلگ يله يله طلگ هيي كلمة نتفه گولهه وخلصننه

-ماكولهه وعليي

-تكولهه لازم تكولهه يله يله بساع

-ماكولهه لو تنطحين الحايط كدامي هسه

-انطح الحايط!! شنو اني ثوووووور

-ولج لااااا صوتج اشتعلت روحييي

نام عليه يسد بحلگي واني اعضعض بأصابعه وهو يصيح بيه اسكت گلبني على الجهة الثانية وضم حلگي بقوة اكبر وهمس بأذني..

-مريم اروحلج فدوة صوتج لا يجون اهلـ.......

ما لحگ يكمل الجملة وانفتحت علينه الباب واحنه بهذا الوضع اليخزي، خالة حصة ونانا وغدير واكفات فاكات حلوگهن، اطلس طفر مني واني صرت اللم بشعري واضم وجهي بالفراش..

-نانا: شصاير شبيكم

-غدير: هاي شبيكم هو هيج على كيفكم

-حصة: ههههههههههههه يحليلكم على كيفك امي شفيك متشفگ هههههه

-الاطلس: ههه هلا يمة بس لو داكين الباب علينه

-حصة: هههههههههههه المرة الياية تأمرون

طلعت تضحك فرحانة ونانا هم تضحك وياهه تمنيت احفر گبري بصف الفراش واطم روحي بي..

-مريم: كله من وراك سودة بوجهج مريم صخام الصخمج يمصخمة يمريم

-الاطلس: ديلا هسة شصار

-مريم: انتَ انتَ كله بسببك انتَ صحتلهم

-وين صحت اني كاعد وياچ بس كولي صوتج فضحنه وخلاهم يجون

-اصلاً صوتي مو عالي بس انتَ خنگتنيي شكبررك هبدتني هبد

-ديلا يلا كومي سويلي اكل

-عشتووووو

-كومي نسوي صخام سوه

-حرام تكول على نعمة الله صخام اطلس انتبه

-هاا استغفر الله ماقصد بس يله كومي سوه على الواهس

-يله بس روح خليني ابدل

-شتبدلين شفت كلشي

ضحك وكام يطلع باوعت لروحي تمنيتني ميتة الدشداشة صاعدة وكل جسمي مبين شكد غبرة اني شكد ثولة..

لبست الروب والشال وطلعت وراه رحت للمطبخ سد الباب علينه وقفلهه حتى اخذ راحتي وانزع الحجاب، وكفت وياه نفكر شنسويله اكل..

-الاطلس: ما زاد من عشاكم؟

-مريم: ما تعشينه كلمن اكل شي خفيف ونام

-الاطلس: جوعان اني مو مال خفيف، تعالي نسوي بيض وبتيته؟

-الله انتَ تعرف لهذا الاكل؟؟؟

-يا اكل

-بيض وطماطة وبيض وبتيته

-طبعاً يا عراقي ما يعرفلهن

-شمدريني مو انتو حوامير مادري شنو كلت متاكلون مثلنه

-اولاً اسمهه هوامير ثانياً اكره هاي الكلمة مستفزة، ثالثاً احنه حالنه من حالكم هم بشر وناكل نفسكم بالضبط مريم

-مو بقيت ببيتكم كم يوم شو متاكلون هيج كله اتكيت وشوكات وسكاكين وهاي حركة البوز لازم موجودة..

سويت حلگي امثل خالة حصة شلون تاكل ضحك بصوت عالي وراح للثلاجة يطلع بيض..

-الاطلس: حركة البوز على گولتج بس امي تسويهه وهاي حركتهه هي ما متقصده

-اممم خوش والاكل؟

-مريم شعليه اني بيهم اريد بيض وبتيته هسة

-تدري اني اموت على بيض وبتيتة اكلتي المفضلة

ابتسم وهز براسه طگ البيضة بالطاسة وكال..

-ادري نانا گلتلي

-اهاا ماخذ تقرير مفصل عني من نانا بله بعد شنو گلتلك

-كالت لسانج كلش طويل وتفحطين

-هه هه هه هه متضحك

- هه هه هه ما جنت ناوي اضحكج

وكفت اكشر البتيتة وهو يخبط البيض، گصگصتهه وملحتهه وهو وكف يقليهه وكل شوية طاخني لو حاصرني بالكاونتر وميخليني اتحرك واظل اتعارك وياه بالهمسة..

كملنه الاكل وكعد على الكرسي جبتله ليمونة من الثلاجة صفن عليه كصيتهه وعصرتهه فوك جزء صغير من الصحن مالته..

-الاطلس: هاي شنو

-طعمه يصير يخبل ضوگ وانطيني رأيك

اكل شوية منهه وعجبته كلش طلب احطله بعد على كل الماعون سويت مثل ميريد وجرني يكعدني بصفه يوكلني وياه، ماقبلت اكل ماشتهي بس ماقبل..

-الاطلس: شحلاتنه هيج

-مريم: صدك والله شحلاتك وانتَ تسويلي بيض وبتيته

-ابقي يمي ويومية اسويلج

-لا ما احتاج امي تسويلي ببيتنه

-بس منو يوكلج

-دعاء

-ومنو يعصرلج نومي حامض ويسويهه طيبة

-بسملة

حط لگمة بحلگي وشربني مي ضحكت على حركاته هادئة كلش عبالك ديوكل طفل..

-ومنو يشربچ ماي

-ابوية

-مريم انلصمي

-هاي شبيييك

-اسكتي لا تحجين بعد

وجهه انگلب وتعكر مزاجه كمل اكله واني هم كملت وگمنه نغسل، حط قوري الچاي على النار يسوي وما نطق كلمة طول الوقت..

-اطلس

-نعم

-انتَ ليش تزعل من اذكرك بطلاقنه احنه مو متفقين؟

-اي

-ليش تضوج؟

-ماضوج

-بس ملامحك تكول غير هالشي

-تعبان مابيه شي

-ماشي

وكفت اغسل المواعين وهو يراقب قوري الچاي، طخ ببالي شي وانداريت عليه شفته يباوعلي من وره ابتسم من صارت عيني بعينه وكال..

-الاطلس: اليوم شنو

-مريم: شنو؟

-شنو تاريخ اليوم؟

-مريم: 9 بالشهر

همستهه وانطيته ظهري هستوني جنت افكر بهالشي، تقرب مني صار بظهري مباشرة حاوط خصري بأيد وحدة كزبر جسمي من نزل يهمس بأذني..

-اليوم عيد زواجنه

-احم اي، ايدك اطلس

شد اكثر ما ابتعد دارني عليه بلعت ريگ ساكتة عيني بعينه وگلبي يدگ بقوة گرص أنفي بخفة ونزل يطبع قبلة على خدي..

-كل سنة وانتِ وياي

-بدينه

-هههههه اشاقيچ مرمرتي كله كم شهر وتخلصين مني

ما انطيت ردة فعل ابتسم وابتعد مني حاط ايده بجيب بنطرونه وراح يصبلنه چاي بكوبين ولزم ايدي ياخذني للغرفة، فات لغرفتنه وقفل الباب كعد بالكاع وكعدت بصفه..

-الاطلس: احب هذا البيت

-عكسي، اني اكرهه

باوعلي ونزل عينه بسرعة، ذكرى تعيسة عندي بهذا البيت راد يغتصبني، طول اليوم الموقف على بالي ما راح ابد اعصابي تلفت..

-اتمنى اكدر اعدل موقفي بس.. (ذب نفس ومسح على وجهه) بس ماكدر

-اني ما يكتلني غير من تگول ما ردت اغتصبج

-مريم اني فاشل بالتبرير

-ادري بيك طوطي مغتصب الفتيات

-اممم

-الله يعلم كم بنية مغتصبهه

-مرريم!!!

نترهه بعصبية سكتت ودرت وجهي عنه كمت انام على الفراش وانطيته ظهري، غمضت عيوني دقايق واجه يريد يتمدد بصفي ما علقت ماعندي طاقة..

-مريم

-نعم

-يصير تعاينيلي شوي

-ليش

-اريد اصفن بعيونج

-مـ... احم اي اوكي

درت عليه وهو يضحك شكد تنرفزت ردت اكول "ما" وخفت لا يسويلي شي ادبسز..

-مريم: اطلس تره بس اليوم اقبل تنام هنا لان انتَ مريض خطية

-شكراً لحضرتچ مدام

-تدلل استاذنا المزعج

-تحبين اجيبلچ شي؟ مرتاحة بمكانج؟

-اي شكراً لحضرتك

-اهلاً وسهلاً بأي وقت نتمنى تنامين براحة

-انام انام لا تخاف

ابتسم وثنينه اللتزمنه الصمت رفع اصبعه بهدوء وطخ خشمي وهمس..

-تقبلين مني هدية مرمر؟

-هدية؟

-اي اعتبريهه هدية عيد ميلاد زواجنه او اذا الموضوع يزعجچ اعتبريهه هدية عادية للذكرى

-وشنو نوع هاي الهدية؟

كعد على حيله وطلب مني اكعد، مد ايده بجيب البنطرون وطلع علبة مقدفة لونهه اسود، تقرب مني وسحب ايدي برقة قريب وجهه وصار يتأملهه..

-لو ابوي ينتبه لأيدج ينجن

-شافهه وسوه نفس حركتك

-ههههه صدك

-والله من اول ما شافني لزم ايدي هيج وتأملهه وگلي عندج ايدين مثالية

-اي استغربت لحد الان ما انتبه

-شنو قصدكم من هاي الحركة شوية تفاجأت بوكتهه

-ابوي مهووس بالايد وين ما يروح يباوع لأيدين العالم زلم نسوان عنده معايير خاصة بأختيار الايد المثالية

-هَوس غريب صراحة

-ابوي يشتغل بالمجوهرات من عمر وشلون نكول يستنگي العارضين حتى يعرضون مجموعاتنه الجديدة خصوصاً الخواتم والاسوارات

-هاااا هذا السبب يگلي عندج ايد مثالية

-وهذا الصح فعلاً، كف ايد ابيض ناعم، اصابع طويلة ورفيعة شرايين ايدج ما ظاهرة بشكل مزعج حرفياً مثالية

-انتَ هم عندك هذا الهوس اطلس؟

-لا بس انتبهت على ايدج اول ما اللتقيت بيج واجه ببالي ابوي

ضحك خجلان واردف بمشاكسة..

-الاطلس: بعد سوالف تجار المجوهرات

-بس حلو تره عدكم نظرة

-اي بس لا تسمحين لأبوي يقنعچ تعرضين شي بأيدج انتبهي هسة هو ماعنده ميانة وياچ بس باجر عگبة يطلب منج

-لا ماحب هالشي بس خاف يطلب واستحي ارده؟

-كوليله اطلس ما يقبل

-ماشي

فتح العلبة وحطهه كدام عيوني فتحت عيوني مبهورة رغم الاضاءة الخفيفة هنا بس فخامته واضحة، عبارة عن سوار متين اسود بالكامل وحتى الاحجار المرصعه بي هم لونهم اسود بس يلمعون شكله انيق وجميييل بشكل مبهر..

-اني مافتهم بهدايا البنات بس اشوف المجوهرات انسب شي

-يجنن كلش

-هنا يسمو "دمليج اسود" مرصع بحجر العقيق الاسود من اندر انواع الاحجار الكريمة

-دمليج اسود يعني سوار؟

-الدمليج هو السوار والاسود هو الذهب الاسود

-عاش ذوقك

-صراحة حرت ماعرفت شنو اهديج استعانيت بصديق يساعدني

-كلش حلو اطلس شكراً يجنن كلش عجبني

-تسمحيلي؟

هزيت راسي اي وانطيته ايدي لبسني السوار واضح ثكيل وثمين، استحيت من الهدية ظليت اباوعله بيدي وساكتة قرب ايدي من شفايفه طبع قبلة عليهه وهمس بصوت خافت..

-تستاهلي

-تسلم

-لايگ الاسود بيدج يا شيخة

-ههههه شكراً عيني شكراً

-مريم انتِ بهجة للعمر تدرين؟

ما جاوبته ماعرف شحجي بهيج احاديث، قربني عليه اكثر ضربت رجلي برجله، بلع ريگ وغمض عيونه رجع فتحهم وكال وهو يضحك بتعب واضح..

-النظر لك دون تقبيلكِ جهاد

گلبي راح ينفجر كمت منه بسرعة وكفت اللبس شالي اجه عليه بسرعة ودفعني على الحايط ما خلاني انطق فوراً كال..

-صارلي اعرفج عشرة اشهر و 13 يوم واني سعيد بالصدفة الجمعتني بيج، محظوظ بزواجي منج واشوفج من دون أي مبالغة اعظم واثمن ممتلكاتي

دگات قلبنه تحاضنو من القرب ايدي تعلگت على الحايط وايده تضغط عليهه نزل نفسه لمستواية وهمس..

-سواء بقينه سوه لو انفصلنه بالحالتين اريدج تعرفين اني عشت احلى ايام حياتي وياچ اتمنى الوقت ما يخلص من تكونين بين ايديه

-اطلس

-اعرف شلون وشوكت وليش انتِ من دون كل البنات كلهن اعرفهن، صعب مريم.. صعب انظرلچ نظرة عادية واني ميت بيج كل خلية بجسمي تريدج وتتمناچ.. صعب انام بصفج واني غرگان بسواد عيونچ المعذبتني ابقى الليل كله اتخايلاهن واتحلم بيهن...

غمضت عيوني بقوة راح اموت رجليه بعد متحملني گامت ترجف خصوصاً بعدما طوخ بلمساته وهمس..

-احبچ..

فتحت عيوني جاحضتهن اول مرة يكولهه ما سامعتهه منه من قبل، دگات گلبي صارت ببلعومي من كررهه..

-احبچ لدرجة الهلاك

صوته يرجف من يحجي والبحة اعتلت اوتاره الصوتية ابتسمت غصب عني وركزت عيني بعينه..

-انتِ انخلقتي حتى تعبدين الله والاطلس يحبچ

-احم اءء..

-انتِ اجمل لحظة تنعاد ببالي الف مرة

-اطلس شوف

-بس مو عدل احبچ كل هذا الحب وتكرهيني ما استحق هالشي مرمرتي والله ما استحق

-تستاهل

-اخليچ تحبيني بس انطيني مجال اني اعلمج

-ههههههههههههههههه ههههههههههههه

-هههههه ليش تضحكين شبيچ

-مادري شبيه مصدومة ههههههه

-لا تنصدمين ولا تظلين تلحين بسالفة طلاقنه والعباس فهمت

-اي مو اكول خاف تنسى

-ما انسى بس لا تعيديهه وتوجعين گلبي

هزيت راسي وجرني ينيمني لعب بيه لعب خبلني ما خلاني انام ولا ثانية كل شوية يگرصني لو يهددني يبوسني ويقرالي شعر لو غزل لو يكول احبج واني بس اضحك مثل المسودنة..

نمت وكعدت الصبح هو مو بصفي طلعت للصالة افتهم شنو اخر التطورات گالت خالة قسم من الولد راحو للشركة والقسم الثاني لمركز الشرطة والسالفة جرتلنه اسبوع لا اني شايفة اطلس ولا هو شايفني هو وعمر وعلي يباتون ببيته هناك وبس حمزة وعمو يجون يمنه..

طكت روحي من الوضع وكل يوم مأجلين رجعتنه لبيتنه، نورسين رجع ابوهه وراحت وياه اساساً بقت هنا لان ابوهه چان خايف عليهه..

العصر رحت للمطبخ اسوي كيكة ويه نانا وسارة ويانه دنسولف ونضحك على سوالف سارة تحلف الا تكول لحمزة هي سوت الكيكة وحدهه وتريدنه نجذب علمودهه..

-نانا: الباب يندك روحي شوفي منو مرايم هاي وينهن الباقيات

حطيت شال على راسي ورحت افتح الباب انعصر گلبي خوف من شفت ابوية بوجهي عاكد حاجبه وملامحه مغيمة......

يتبع ♠️💸....

• ━━━━━━❪♣❫━━━━━━ •

ابوهه 🤔