رواية الاطلس "دمليج أسود" الفصل السادس 6 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

مو بَس كيدي عَظيِم انِي من ساسي لراسي عظمة 😉.

• ━━━━━━❪♣❫━━━━━━ •

-شكراً الك.. هنا يمك بلا زحمة

انطيت الحساب للتكسي ونزلت بباب الشركة، نصيت اربط حذائي الترانشوز بعد التوبة اللبس كعب على فشلة البارحة لسة ركباتي توجعني..

سلمت على الواكف بالبوابة ودخلت جوه، الموظفين هستوهم ديوصلون شويه شويه بوجهي رحت على المصعد دسته بكل حماس ونويت اروح لطابق 14 اسلم على تينا وضحى واخليهن يدلني وين مكاني..

اول ماوصلت شفتهن واكفات يسولفن ويتمشن، حركت بيدي وهمست بصوت ينسمع للقريب مني..

-هلو بنات تينا.. ضحى

اللتفتو عليه واستقبلوني بحماس ضعف حماسي، حضنتني تينا حيل وكالت..

-مرايم الله طلعتي مو بذاته ونسيتينه

-مريم: ما انساكم شلون انتو صديقاتي صرتو مو؟

-ضحى: طبعاً اكيد صرنه صديقاتج

غطيت فمي وصرت اضحك بحماس واحجي..

-مريم: ههههه هاي اول مرة يصير عندي صديقات متحمسة ههههه

-تينا: اووووي شكد كيوت اكرطج اني

-ضحى: حبيبتي مريم شلون نقاء وبراءة عندج نتشرف بصديقة مثلج

تشكرت منهن وطلبت منهن يدلوني قسم الحسابات، تينا عدلت شعرهه وكالت بغنج..

-اخذج بنفسي مو بس ادليج نبضي

اخذنه المصعد واستلمني سوالف، تينا تعدل روحهه بالمراية وضحى تحجي وياهه وويايه..

-ضحى: شنو هذا الفستان الحلو مريم كلش لطيف

رفعت تينا البدي الداخلي مالتهه تضم جزء من جسمهه وكملت..

-تينا: صح كلش نازك

-مريم: شكراً والله ماعرف شنو لازم اللبس هنا فـ كلت ما اتقيد اللبس الي يعجبني

ابتسمن وهزن راسهن بدون تعليق بس تمنيت لو علموني وگلولي ولا عشت ذاك الموقف...

-تينا: هنا وصلنه قسم الحسابات هو طابق 44 يعني بنص السما

-مريم: شوفي فوك الغيوم صعدنه اخاف اني يمة

-ضحى: تتعودين حبيبتي يله امشو

تمشينه عن المصعد واشرت تينا على باب مسدود وكالت..

-تينا: هنا غرفة مساعد رئيس قسم المصممين مسيو حازم عراقي الجنسية صابئي الديانة ارمل وعنده بنية تشگ شگ

-مريم: ما شاء الله تعرفين سيرته الذاتية

-ضحى: اشري على أي واحد تينا تجيبلج اسم المستشفى الي انولد بيهه

ضحكت وكملنه مشي وكملت تينا تعرفني على اليشتغلون هنا الى ان وصلت لغرفة الاطلس..

-تينا: الاطلس رئيس الشركة والوريث الاول والوحيد لسلسلة شركات "الاطلس" بكل فروعها عدهم فروع بـ فرنسا ووووو...

بدت تعدد افرعهم دخت ما شاء الله شنو هاي الثروة وافتهمت ان الشركة توارثوهه اباً عن جد يعني مو عمو محمد الي صنعهه وصنع الاسم الهه..

-تينا: هنا يصيحوله الاسباني بسبب وسامته وجاذبيته وشكله ينطي للاسبان كلش سبايسي ودمه حار

-ضحى: بس مو تحطين عينج عليه مريم متزوج تره

-تينا: للاسف اي تزوج قبل شهرين هيج شي منعرف هواي عن زوجته واكو يكولون عنهه مو حلوة وهو ميحبهه

-مريم: ليشش ليششش مو حلوة شبيهه يعنييي

-تينا: حب ريلاكس لا تتحمسين مادري مشايفتهه بس هاي اشاعات طلعت واني ماصدكهه صراحة اشك هيج صكوك يتزوج وحدة مو حلوة

-ضحى: حتى اني احسهه تخبل

-‏مريم: حتى اني احسهه تموت هم مو بس تخبل

-تينا: حالياً الكل منتظر الوريث ابن الاطلس

-مريم: شلون ليش عود؟

-ضحى: حتى يضمن اسمه بالشركة ويضمن مكانه

-تينا: بالضبط رغم الكل ديتناقل ان الاطلس ميحب زوجته وما بيناتهم علاقة وباقي وياهه بس علمود ابوه

-مريم: وهمه شمعرفهم بهاي التفاصيل!!

-ضحى: حبي كلشي ما ينضم هنا خصوصاً نوووورسين موجودة

حچتهه وگلبت عيونهه معاجبهه، ضحكت تينا وسوت نفس الحركة تسائلت..

-مريم: منو نورسين؟

تقربت تينا عليه بعدما شافت موظف يتعده من يمنه وهمست بصوت ناصي..

-تينا: الكل يكول نورسين عشيقة الاطلس وبيناتهم علاقة غرامية بس ميحجون

گلبي وگف! انقطع نفسي وبطني خبطت بصعوبة سيطرت على نفسي وما اوكع هنا، مهما كان كرهي اله وحتى لو ميطيقني وماطيقه تبقى الخيانة شي مقزز واهانة چبيرة يعني متزوج بالجديد وعنده عشيقة!!

-مريم: من شوكت علاقتهم؟

-تينا: من زمااان كلش

-ضحى: صراحة اني ماحط بذمتي حرام تعرفون ليش لان مافد يوم احد صادهم بوضع مريب لو دنيء

-تينا: حبي شغلهم كله بالمستخبي همه ذولة رجال الاعمال المعروفين محد يسوي بالعلن

-ضحى: حتى لو بس موسيو اطلس هو من الاساس بارد وماعنده انجذاب لجنس حواء كشكل عام ما ينطي مجال للعلاقات ابد

-تينا: بهاي اتفق البنات هنا داگات رواحهن بالصوندة عليه وهو جبل ميهزك ريح

-مريم: معقولة

-ضحى: يوووه انتِ متعرفي بعدج تعرفي عليه وهم يجيچ الدور وتسرسحين هههه

بلعت ريگ وگوة سألت اطرافي ترعش مجرد ماتخيلت فعلاً عنده علاقة بـ هاي نورسين..

-مريم: وهي شلونهه هاي نورسين؟ حلوة؟

-تينا: من اب روسي وام عراقية وعندج الحساب تممملخ وهي غنوجة ونعووصة ومن ذني المايعات والي لبسهن طافر ومطلعة الحبشكلات

-ضحى: تغري المطي

-تينا: يااا بنات اخذنه الوقت واحنه نسولف راح يبدي الدوام

-مريم: شكراً بنات

-تينا: ادللي نبض قلبي

-ضحى: باي مرايم عود نلتقي بالكافتيريا بوقت الغده اوكي؟؟

-مريم: شنو شوكت يعني

-تينا: الكافتيريا صايرة بطابق السابع وقت الغده بين الوحدة ووحدة ونص

هزيت راسي واتفقت وياهن، استمريت اتمشى بالممرات واتابع المكان بعيوني احفظ الغرف والاسماء واقره اسماء الشعب الموجودة..

-جميلة: هلو صباح الخير شنو داومتي اليوم

-مريم: اي غير

-جميلة: زين اندليتي كلت هسة هاي تتيه اذا كافتيريا متعرف شنو ههههه

-مريم: اعرف شنو كافتيريا حبيبي بس انتِ لفضج الهه چان غلط اكيد ما راح اعرف شنو تقصدين، من رخصتج..

تركتهه صافنة ومشيت جذب لفضتهه البارحة صحيحة بس والله ولا افشل روحي ويه هيج وحدة مستصغرة العالم..

كملت طريقي لمكتب استاذ مسلم اخيراً وصلت للسكرتيره مالته، كلتلهه اجيت اقابله شويه ودخلتني عليه اول ما فتت چانو ثنين زلم واحد واكف ومنطيني ظهره ديقره بملف والثاني كاعد على المكتب..

-صباح الخير

-مسلم: صباح النور، تفضلي مريم

ابتسمت من گال اسمي واضح واصله خبر ودارس ملفي، تقربت عليه واشرلي اكعد رحت استريح وطارت عيني على الواكف ومنطينه گفاه فتحت عيوني عشرة مترات من انتبهت هذا الرجال الي شفته بيوم عرسي كال اسمه عمر!

بلعت ريگ وانتفضت متوترة بمكاني خفت يتذكرني ويسألني عن ذاك اليوم، قاطع نظراتي اله صوت مسلم..

-مريم تعرفين للحاسبة؟

-مريم: لا استاذ بس اتعلم بسرعة شنو تعلموني اعرف

هز راسه ورجع عينه بالملف الكدامه، اخذ قلم وكتب شي واني الوب بمكاني وعيني على عمر، جفلت من دار وجهه يباوعلي صرنه عين بعين وجهي گام ينطي اللوان..

ابتسم من شافني اباوعله عيوني لطشت بي لا اكدر احولهن ولا انزلهن وهو هم اخذله خيرة بوجهي هم يباوعلي..

-مسلم: احم.. كملتو حرب النظرات بيناتكم

كسرت عيني ونزلتهه بسرعة، ضحك عمر وشمر الملف البيده على المكتب وكال..

-جوز من سوالفك بوية جووز

-مسلم: ديلا تفضل بره

-عمر: طالع بس اوكف وين ملفات التصاميم

-مسلم: بمكتب الاطلس البارحة دزوهن يطلع عليهن

-عمر: يعني راح يخيسن هناك

-مسلم: منيمهن ومدفيهن بالقاصة ما يطلعن لو الدنيا تنگلب

-عمر: هو بكيفه اروح ادوس بثربه

ضحك مسلم وعضله شفة بمعنى چفصت اسكت مادري هيج فسرتهه اني، اللتفت عليه وفهمني على كم شغلة وگلي روحي لواحد يسمو "جوزيف"..

-مريم: وين احصله؟

جاوب عمر وهو يطلع جهازه..

-عمر: بنهاية الممر اخذي يمين امشي وبعدهه لوفي يسار اول مكتب جوزيف موجود بي

-مريم: اوكف اسجل

-عمر: شتسجلين؟

-مريم: اسوي خريطة خاف انسى.. اخذ يمين نهاية الممر اخذ يسار واخر مكتب مال جوزيف؟

ضحكو ثنينهم عليه وعدلي عمر..

-اول مكتب جوزيف اذا عندج مشاكل تلگيني عند حازم مكتبه مقابيل..

-مريم: ادري ادري گبال المصعد

ابتسم وهز راسه طلعت افتر بالممر مو ممر تكولون الصفا والمروا شكد ما طويل.. اخيراً وصلت للمكان سألت عليه گالو قبل شويه طلع ميعرفون وين..

-مريم: انتظره يرجع؟

-لا لان طلع هو

-مريم: ماشي شكراً

طلعت حتى اروح لاستاذ حازم اسأل عمر عنه وبين ما اني امشي شفت عمر يتمشى ويدندن اغنية وبنات ثنين يمشون وياه وفاكات حلگهن عليه.. ضحكت عليهن وفريت ايدي..

-استاذ عمر استااذ.. استاااذ

اللتفت عليه وقطع غنائه اللتفتو البنات الوياه من شافني ضحكن وكلمن راحت لمكان عقچت وجهي ليش كل اليباوعلي يضحك ذوله شبيهم؟؟

-مريم: استاذ عمر جوزيف مموجود كالو طلع

-احم.. هاا شلون ليش

-مريم: مادري والله شلون هسة وين اروح

-امممم طيب روحي كملي شغلج

-مريم: استاذ ماعرف وين اروح مو كلت اذا ما لگيتي جوزيف رجعيلي

-اها.. صح صح اي كلت هيج اني صح

بقيت فاكة حلگي هذا شبي شنو صار بي زهايمر، واني اباوعله انتبهت للبسه يختلف عن قبل شويه شبسرعة بدل ملابسه..

-مسيو علي.. مسيوو اخيراً لئيتك

-علي: چؤؤ.. لااا حرامات هههههههه

-شو مسيو؟

ما جاوبهه ورجع عليه كال وهو يضحك ويعفس بخشمه..

-اسف لعبت بأعصابچ اني مو عمر اني علي

-مريم: انتو توأم

-علي: !!identical

رجع سوه الحركة بخشمه وكال بمرح..

-علي: يعني توأم متطابق ما نفرق عن بعض غير بهاي الشامة

رفع كف ايده يراويني الشامة الصغيرة، سبحان الخالق ماكو أي فرق بيناتهم نهااائياً ماكو ولا حتى شخطة استنساخ من بعض..

-مريم: استاذ كلش تتشابهون عيناً

حرك راسه متحمس وعيونه تحجي فرحته، كمل كلامه ويه البنية الصاحتله ورجعلي..

-علي: هسة كولي تردين عمر؟ اكيد تلگي لو عند مسلم لو الاطلس ماعنده غير مكان.. تعالي وراي

مشيت وراه ورجعنه لمكتب مسلم وفعلاً لگيناه على نفس وضعه مجرد شافنه ضحك وكال..

-عمر: هاا بديت بسوالفك عليوي

-علي: چا شلون ضلع ضلعي هاي عادات وتقاليد

-عمر: ديلا هاك استلم

ضحك مسلم وضحكت وياه لاحظت هنا العراقيين كلش مريحين ويه بعض وذابين ميانة كدام الكل وميهتمون لشي..

-مسلم: بدن ريه وسكينة، مريم لگيتي جوزيف؟

-مريم: لا والله

اخذ دور جوزيف وشرحلي وين اروح وشنو لازم اسوي ودلاني مكتبي، الوقت كله هو يحجي وعمر صافن عليه استحيت من نظراته وتوترت ورغم توتري الواضح ما زاح عيونه عني..

-مريم: تمام استاذ اني رايحة هسة لشغلي

-مسلم: good luck

ترخصت منهم وطلعت لحگني علي يمشي وراية ويحجي اتصال راح لغير جهة واني غير جهة بس حسيت لواحد ثاني يمشي ورايه چان التوأم مالته عمر..

-عمر: بالتوفيق آنستي

-تسلم استاذ

-واضح هاي اول مرة تشتغلين بشركة

-مريم: صحيح ما مشتغله من قبل

-عمر: هلا هلا حتى نسوگ عليج

ضحكت وغطيت حلگي نفس عادتي ابتسم على ضحكتي وگال وهو مضيگ عيونه..

-عمر: شايفچ بس مادري وين احنه ملتقين من قبل؟

-مريم: هاا.. لا مادري ماتذكر

-شايفج اتذكر ملامحج واتذكر هاي الضحكة الحلوة

حچاهه بعفوية استحيت وردت بس اتملص منه حس بيه واتوقع وجهي فضحني ولعت، ترخص مني وكمل طريقه گدامي لمكتب الاطلس..

اندليت المكتب الي راح اشتغل بي ميبعد هواي عن مكتب الاطلس ابتسمت منتصرة ودخلت اسلم على الطاقم الي راح اشتغل وياهم كانو متكونين من ثلاث نفرات وكلهن بنات..

تأقلمت ويه ثنين بس الثالثة مبينه نحسة وكلهن عراقيات، قدمولي ضيافة وكالو اليوم ماشتغل بس يعلموني شنو طبيعة العمل وهالسوالف..

-مريم: وجميلة ما اجت؟

جاوبوني وكالو ما عدهم معلومة وحدة اسمهه جميلة راح تشتغل ويانه فرحت همزين ماريد تصير بيناتنه حزازيات..

مر الوقت سريع و "ريتاج" تعلمني على الحاسبة بسرعة كسبت المعلومات واكيد سجلت كلشي بدفتري الصغير حاطته بجنطتي واثناء ما اني مندمجة شتت تركيزي دخول رجال..

-ريتاج: ااه بونجور مسيو اطلس محتاج شي؟

عدلت كعدتي فوراً وياهه حجابي باوعلي وكسر عينه على البنية..

-الاطلس: منار ماكو؟

-ريتاج: صح حتى اني ما شفتهه مسيو يمكن مجازة

-الاطلس: مجازة واني مادري

جاوبته الثانية ان ماعدهم معلومة عنهه حسب ما فهمت منار هي السكرتيرة الخاصة بي، بقى واكف بالباب كأن ديفكر شوية وتشكر من عدنه وطلع..

-مريم: يمة اخترعت من دخل استاذ اطلس

ضحكت خولة المكروهه وفرت بيدهه، جاوبتني ريتاج..

-ريتاج: مسيو اطلس يضيع بدون منار هي ايده اليمين بكلشي

-مريم: ها صدك

-خولة: يلة بنات مو وكت سوالف رجعن للشغل

سوينه مثل مكالت وبقينه نشتغل الى ان كامت خولة وكالت..

-صار وقت الغده شنو مشايفات شغل شبيجن

-ريتاج بهمس: كومي مريم هسة تاكلنه اكل بلسانهه كومي مالج خلگهه

اخذت جنطتي وهزيت راسي كمت وياهن، اخذنه المصعد ورحنه للكافتيريا هناك اللتقيت بـ تينا وضحى كعدت وياهن على الطاولة ونزلن اكل وأصرو يعزموني وياهن..

-تينا: هلا هلا اجو الصكوك

انداريت على وين دتباوع شفت الاطلس ديدخل وجماعته وراه اجو يكعدون على طاولة مو بعيده عنه..

**

-علي: ضلوع شتاكلون

-حمزة: اخذ زلاطة اني

-علي: اووي يالنازك

-حمزة: عندي حرگة وحموضة بمعدتي جلطتني

-مسلم: حموضة علي هاي حب اشرب سفن هسة تصير زين

-حمزة: لو تنكر هم ما ينهضم

-علي: انعل ابيك هيج صارت

-مسلم: اكل خ** لا تلعن ابوي

-الاطلس: وهرش شبيكم تسودنتو اله تفضحونه

-علي: اي وعلي شايفينه العالم بالعين الچبيرة مدراء وشخصيات وقنادر

-حمزة: ما يدرون الواحد بيكم يسويهه بفراشه

-الاطلس: لموله ضحكة شباب

-مسلم: هههههههههههههههههههه

-الاطلس: ليش تبذر وليدي

-علي: خرب بحضك مسلم وعلي فحطت

-مسلم: سنك ما بين وينهه الفحطه؟

-علي: بگلبي ضحكت اهووو شمالك لاطش

-الاطلس: عوفك من الضحك شبي هذا؟

غمز بعيونه واشر على عمر السارح..

-مسلم بضحك: اظن اليوم اللتقى بحب حياته هههههااي

-الاطلس: اكل نعللل

-مسلم: والزهرة ام الحسن شفت عيونه رادت تاكلهه

-علي: بشرررف امككك

-مسلم: اي اي

-حمزة: ماصدك والله

-مسلم: بعيني الي راح تاكلهه الدوود شفته حتى البت صارت حمرة

-الاطلس: دخيلك عليي اخينه وگع والله تستاهل احلى عزيمة على هالخبر

ضرب كتف عمر الصافن وصاح بي..

-الاطلس: هيوو ابن امي ولك صدك عاشگ

-عمر: شنو

صوفر علي بصوت ناصي بيناتهم خله بعض الكاعدين يلتفتون عليهم وكال..

-علي: وداعااً للعزوبيييية

-عمر: شبيكم شنو

-الاطلس بغمزة: ولك صدك عاشگ

-عمر: هذا ياهو

-حمزة: اني چا منو غيرك!

-عمر: نعل مگطعة يا عشگ يا لطام

-علي: اعذرو شباب اجته الحالة

-مسلم: لا تچذب عمر شفتك شلون تعاينلهه

-حمزة: اني اصدك بمسلم

-عمر: شنو وين شكو ولك هذا ياهو تحجون عليه ما عاشگ بوية منيلكم هاي الكلاوات

-الاطلس: شبيك صابك شرجي

-علي: اوكفو شباب اتأكد من صدقه

لزم ايدين عمر وباوع لعيونه فترة هد ايده وكال..

-علي: اي جاي يحجي الحقيقة

-الاطلس: وانتَ شمعرفك ضربته سونار!

-علي: چا غير توأمي

-حمزة: افتهمنه توأم بس مو تقرون افكار بعض

-علي: انتَ ليش تغار هاي لان ماعندك توأم موو مو بله موو

-مسلم: بيك زيج يطيرك لحضن امك

-علي: الله يرحمج يمة

-عمر: وزقنبوووت امنا عايشة!!

-علي: اي مو صار دهر ما شايفهه

-الاطلس: خلو عمتي على صفحة عمر شسالفتك ويه البت

-عمر: ماكو سالفة بس شبهت عليهه

-مسلم: كل هاي النظرات وبس مشبه

-حمزة: اني ويه مسلم

-عمر: وجعع خبصتنه ولكم احس شايفهه بس مادري وين

-مسلم: وين

-عمر: اكله مادري وين يكول وين

-علي: يمكن بعالم الذر چانت زوجتك وهسة اللتقيتو

-الاطلس: حتى اني سامع بهذا الشي

-عمر: احتفظو بمعلوماتكم لنفسكم يابة شايفهه وروح امي

-علي: مو علساس امي عايشة

-عمر: مو صارلنه دهر ما شايفيهه

-حمزة: شافطين والحمزة

-الاطلس: وينهه المشبه عليهه؟

-عمر: راح أشر عليهه بعيوني بداعة امكم لحد يلتفت ويفضحنه

-مسلم: ابشر

-عمر: هاي ام الحجاب

اشر بعيونه وعناد بي كلهم اللتفتو يباوعون عليهه..

-عمر: اششششگكم ششششگ هتلييية

-الاطلس: هاي ام الحجاب؟؟؟

-علي: دخيل علي حتيت

-الاطلس: هه هاي الحتيت شگتني نصين البارحة

-عمر: شلون؟

وبده يسولفلهم......

**

-تينا: عااااا بنات جاي يباوعولنه يمة يمة يمةةة

-مريم: منو؟

-ضحى: الاطلس وجماعته عزه شگالو ليش كلهم اللتفتو سووه

-مريم: صخام الصخمچ مريمم صخااام

-تينا: بنات تخيلو حمزاويتي اعترفلهم بحبي

-ضحى: لا ماتوقع اشرو على مريم

-مريم: عليه اشرو عللللية!؟؟

-ضحى: اي هيج حسيت

-مريم: لا مستحيل لاا شكو اني شعليه اكيد على تينا يحجون هي حلوة ومشلتحه

-تينا: اي يارب عليه يارب

-مريم: يارب يارب

-ضحى: باع ذني عادي بنات يمكن چانو يتناقشون على الشغل خصوصاً مريم جديدة اكيد واحد منهم تسائل عنچ

-مريم: هيج برأيج

-ضحى: اكيد ماكو غير شي

-مريم: ان شاء الله يارب

ماكدرت احط لكمة بحلگي من الخرعة گلبي ينبض بقوة ورقبتي تشنجت ماكدرت اللتفت واباوعلهم، يمكن عمر گال لاطلس عني وحچاله من تعرف عليه واني اطلع من بيته ابجي..

لا لا مستحيل يكدر يميزني چنت ابچي ووجهي مشوه من ضربات الي اعتدو عليه مستحيل راح يعرفني.. لو عرفني؟ لا لا ماتوقع ماتوقع..

-ضحى: شنو ما تتوقعين؟

-مريم: هاا

-تينا: كلتي ماتوقع ماتوقع

-مريم: لا هيج بس جنت افكر بصوت عالي بنات من رخصتكم اني راجعة لشغلي

-ضحى: بس ما اكلتي

-مريم: دايمة النعمة تسلمون على العزيمة حبيباتي

عفتهم وركض رجعت فوك للمكتب وحدي بعدهن الموظفات الوياية مراجعات، بقيت بالغرفة اروح واجي وافكر شنو لازم اسوي وشلون اطبطب على الموضوع وفجأة!...

-مريم: واذا عرفوني؟ وين المشكلة عسى ما يعرفني اني مرته وين المشكلة مريم؟؟ ليش خايفه هيج اني ممسويه شي غلط ولا شي حرام ولا شي ينزل الراس اني اجيت قدمت وظيفة بشركة وانقبلت بعد شكو كل هالخوف؟

نويت نيتي ورجعت تذكرت الخطة ما اتنازل عنهه لو اموت، كمت اروح للحمامات عدلت روحي بالمراية وطلعت اتمشى وراسي عالي ليش ابقى انزله ومستحية وخايفة..

كمل يوم الدوام عادي بدون لا اللتقي بالاطلس وهكذا مشت ثلاث اسابيع واني اروح واجي بهالشركة الشغل صعب مو نفس ماتخيلته ولا نفس الي اشوفه بالمسلسلات كلشي يختلف الهيكل نفسه بس المضمون غير..

كل يوم اللتقي بالاطلس الصبح ويرجع السؤال يتردد بعقلي معقولة ما عرفني؟

اني اتذكر گالو هو شاف صورتي وعجبته معقولة ما شبه او ما ربط؟ هو صح ما اللتقينه ابد ولا فد يوم لمحني او لمحته بالبيت خلال الشهرين الفاتت بس معقولة نسى شكلي من شاف صورتي؟

حاطه راسي على المكتب وعقلي مشتغل وافكر بكلشي بأهلي، شغلي، نانا، الاطلس واهم شي بزواجي..

-ريتاج: مريم.. مريم اجتماع مريمممم

-مريم: هاا اي حبي ماشي جايه

رحت وراهه لغرفة الاجتماع هاي اول مرة ادخللهه سحبت كرسي وكعدت واجت بصفي ريتاج وبقية الجماعة يطلع عددنه ستة، شوية ودخلو مسلم وعمر والاطلس..

بده مسلم بفلسفته عن العمل ويشرح عن الحسابات الجديدة وكلنه منسجمين او نمثل الانسجام لان صراحة كلشي مافهمت..

-مسلم: واضحة الخطة شباب

-ريتاج: نعم مسيو بس الميزانية هالشهر زايدة ضعف عن الشهر الماضي هالشي برأيك ما راح يسببلنه مشاكل؟

-مسلم: عمر؟

-عمر: لا ماكو مشاكل الشهر الجاي نعوض من ننزل اعلان الكولكشن الجديد

-الاطلس: رايد ملفات الحسابات على مكتبي رجاءً..

تشكر من عدنه وطلعو الجماعة كلهم واني هم كمت واستوقفني عمر..

-عمر: كظيتج

-مريم: اسم الله الززهرة

-عمر: مو اكول شايفج صارلج شكد ببالي

-مريم: شنو استاذ

-عمر: احنه اللتقينه بشارع ^^^^^^ صح؟

بلمت ملامحي وانرسم التردد على وجهي، جاوبني بسرعة وهو يضحك..

-والعباس چنت حاس اني ما انسى مستحيل

-مريم: اي صح هسة تذكرتك استاذ ههه اي

-عمر: چنتي مكتولة بوكتهه وتبجين

-مريم: لا ما مكتولة چنت مسويه حادث

-عمر: لا!

-اي

-عمر: سلامات ماجنت ادري بهذا الشي

-عمر؟!

اندارينه على مصدر الصوت واذا نشوف اطلس مكتف ايده وعاكد حاجبه يباوعلنه..

-الاطلس: تشوفون وقتهه هسة واكفين تدگون فچ!!

-عمر: چنه نحجي بالشغل

-الاطلس: والله؟ اي وبشنو چنتو تحجون مدام مريم؟!

-مريم: اني آنسة استاذ

فتح عيونه وحلگه مبهوت يمكن ماتوقعني ارادده..

-مريم: مو انتَ دائماً تصيحلي مدام واني ممتزوجة

-الاطلس: المهم، اي بشنو چنتو تحجون

-عمر: هههه شعليك ياخي سالفة بيني وبين مريم

-الاطلس: عمر چنت احجي ويه مريم!!

-عمر: شسالفة اطلس؟!!!

-مريم: استاذ اطلس چنه نحجي عن التصاميم تسائلت شوكت يصدر اعلان المجموعة الجديدة وشلون ووين يصدر الاعلان وشلون طريقة الترويج واستاذ عمر شرحلي

اخفى عمر ضحكته وانبهاره من چذبتي جوه ملامحه بس واضحة وراح يفضحنه كدام هذا المعقوچ..

-الاطلس: رجعو لشغلكم رجاءً

اندار وراح لطريق مكتبه واني هم فلتت للمكتب وعفت عمر وحده، بعدني دا اكعد على الكرسي ومنار سكرتيرة الاطلس صاحتلي رحت اشوف شبيهه وطلبت مني اساعدهه بكم شغلة لان متلحك وتخاف تترزل منه..

-منار: والله دا اتعبج ويايه مريم

-لا حبي تدللين

كعدت اساعدهه وعيني على الباب اخاف يطلع، هاي على كم مرة صايرة تصيحلي من يتراكم عليهه الشغل تكول الباقيات متعاركة وياهن ومتقبل تطلب منهن يساعدوهه ومن تشوفني ماعندي شغل تصيحلي واستحي اردهه..

طولنه هواي وماحسينه بالوقت باوعت الساعة صارت صلاة المغرب..

-مريم: رايحة اصلي اني منار عود من اكمل ارجعلج

-منار: لا خليني اروح للحمام اول حبابه

-مريم: بس مو تطولين

-منار: لا لا مريم اذا راد شي المسيو انتِ شوفي اوكي

-لا ماتوقع يريد شي

-لا يريد هذا وقته

هزيت راسي وهي كامت للحمام واني كملت الشغل البيدي وفعلاً دقيقتين واتصل تلفون المكتب ترددت اشيله بس سويتهه..

-مريم: احم.. نعم

-الاطلس: منار جيبيلي ماي بلا زحمة

طبكته بوجهه بدون لا اجاوب عشتو يتأمر، كمت اشوف منار وين بعدهه بالحمام كلت انتظر هي تاخذله المي اني ماريد ادخل عليه، مشت عشر دقايق ومنار ماكو رجع اتصل مرة ثانية بس مبين معصب تنازلت وكلت خليني ادخل للمكتب استكشفه واخذله المي..

طرقت الباب سمحلي بالدخول اول ما شافني عكد حاجبه مستغرب بس ما علق..

-هذا المي استاذ

-الاطلس: شكراً..

وجهه اصفر كلش ومبين عليه تعبان منتهي طلع شريط ادوية من جيب سترته وذب حبايتين بأيدين ترجف على الميز صراحة ولاول مرة اقلق عليه وضعه مو تمام..

-مريم: استاذ انتَ زين؟

رفع عيونه وكأن استوعب اني بعدني هنا، هز راسه مرات متتالية وبلع الحبايتين وصك وراهن كلاص المي.. ذب روحه على الكرسي مسترخي ومغمض عيونه..

-استاذ؟

-اني زين

-اسفة على التدخل بس قلقت

ابتسم وهو على وضعه بدون لا يحجي، ترخصت منه وردت اطلع ورجع گال..

-واضح علاقتج بـ عمر قوية

-لا لا مو هيج

-اممم لطيف

-استاذ فعلاً مو هيج بس تسائلت عن الشغل واستاذ عمر كلش حباب وشرحلي

-اممم كلش حباب، لطيف

-يعني شوف شلون اشرحلك هنا شوية نحسين وغثة مادري شبيهم كلما احجي ويه واحد لو يضحك لو يستهزأ ينرفزون كلش

بقى يهز براسه ويستمعلي واني انفتگت كلت هاي خوش فرصة احجي هنا حتى على الاقل هو ينبههم على اخلاقهم شجاهم غير هذا مكان عمل ولازم يكونون لينين وحبابين..

-مريم: استاذ كلش هوايه يعيبون وحتى على كلمة "استاذ" يعيبن يردني اعوج بحلكي مثلهن

-تعوجين بحلكج؟

-مريم: اي اله اكول موووسيوووو

-امممم

-يعني ضروري هيج اكول؟

-براحتج

-اي مو اكول شنو هاي والله هاي جميلة تعيب عليه هم لان ماعرفت شنو كافتيريا تره ميصير هيج اني بس ما سمعتهه عدل مو معناهه اني جاهله

-امممم

-استاذ ادري دوختك اسفة بس گلبي ورم منهم هاي صارلي ثلاث اسابيع شفت الضيم

-لا اخذي راحتج

-ها شكراً، وقبل كم يوم استاذ حازم رزلني اني شعليه اصلاً مو شغلي عند المصممين وظل ينتر بيه والله انهضمت احس گلبي انكسر

-سلامة گلبچ

-تسلم تسلم بس استاذ مو لازم هنا نكون لينين وحنونين شو استاذ مسلم وردة مال الله خو استاذ حمزة بحث اخر واستاذ عمر وعلي تحطهم على الجرح يطيب وهمه رؤوساء اقسام شبيهم الباقين شايلين خشومهم بالعلالي ميصير هيج كلنه من طين محد احسن من احد

احجي ونسيت روحي بس تورم كلبي من صدك وهذا طوطي كدامي ساكت ويسمعلي اي هو مو زوجي غصباً عليه يسمعلي ماعندي احد اشكيله وافضفضله خلي يتحملني شويه..

-مريم: استاذ ماعرف انتو شلون عايشين هنا والله صعبة والله....

انوب صرت احجي بمعاناتي بالمدينة وشلون جبيرة وتتيه اباوعله وجهه متعرق واصفر كركم صار يفتح برباطه ويشرب من كلاص المي مالته..

-استاذ انتَ زين؟

ماكو ذب روحه على الكرسي كلش تعبان متت خوف رحت قريب منه واصيح بي حتى يكعد مادري شسوي اروح اشوف منار وين راحت هاي..

-استاذ اطلس.. ويايه انتَ استاذذ استاااذ عزه صخام الصخمني مات الرجال ولك اطلسس يمة يمةة صخام بوجهج يمريم عزه العزانييي

لزمت وجهه بين ايديه واضرب على خدوده وانفخ بوجهه حتى يكعد يبوو هذا مات يمة مات رجلي يمةةة..

-الله يخليك اكعد وين رايح وين يبوو عليه اكعد اطلس حباب ولك كووم شنو اتصل بالاسعاف عزه اي خليني اتصل لغسل لعقلج مريم لغسسسل

هديت وجهه دا اروح اتصل وحسيت بي يلزم ايديه حيل، نزيت بمكاني وفرحت بنفس الوقت..

-مريم: ما متت استاذ الحمد لله يارب ما متت

-مريم..

-ها هاا كول هااا

-احتاج ارتاح..

يحجي كوة والنفس بصعوبة يطلع منه ماعرفت قصده بقيت مفهيه..

-اتصل بالاسعاف؟ استاذ راح اصيح لاستاذ مسلم هو يجي ماشي؟؟

-لا.. روحي

-وين اروح والله ولا اخليك هيج وحدك

اشرلي بيده روحي بس گلبي ما انطاني حتى لو اكرهه بس انسانيتي متسمح اعوف انسان عبالك ديحتضر وحده..

-راح اصيح لاحد اشش اششش معليك اسكت اسكتتت

ركض طلعت من المكتب ورحت لمكتبنه البنات شفتهن ملتهيات كلت ذني ميفيدن عفتهن ورحت لمكتب استاذ مسلم سولفتله بسرعة بسرعة وكمز من مكانه مستغرب كلش حالة صديقه اخذ الطريق هرولة وبقى يتسائل..

-مسلم: ليش هيج صار شبي؟؟ شنو صار؟؟

-مادري والله استاذ

راح لمكتب الاطلس واني بقيت بره كعدت على كرسي منار كلش متوترة واكل بأظافري مشت اكثر من عشر دقايق وهمه جوه واخيراً شرفت منار الي واكفة تطگ بعلچهه..

-منار: ها حبي

-مناار صارت طركاعه الاستاذ تخربط وانخبصت ماعرفت شسوي

-شنوووو ليش تخربط شصاار؟؟

-بقيت انتظرج هواي وانتِ ماكو وين رحتي ويين

-هاا.. مو نزلت للكافتيريا اكل ما متغدية ميته جوع

-واني وكعت بيهه ليش هيج منار ليشش هاي كل مرة تدكين بيه الناقصة

-منار: بشرفج مريم لا تكولين جنت اكل والله التوبة اسويهه

-اسكتي خليني بضيمي هسة

مشت نص ساعة وصارت بالسبعة بالليل رجليه خيوط متحملني كلش قلقلت كلت لمنار تدخل تشوف شكو خافت بالبداية بس اقتنعت اخيراً ودخلت تشوفهم..

كمت وكفت بباب المكتب مالتهه بره حتى ماترزل من خولة اذا تجي حتى تشوفني عود هستوني جايه لمنار مو كاعده يمهه صارلي فترة، شويه وطلعتلي منار وكفت يمي بره وكالت وضعه طبيعي وكلشي مابي ديسولف ويه مسلم..

-لا مستحييل والله تخربط كدامي راد يموت

منار: اي يجوز ضغطه هبط حبي

-اي يجوز بس والله خفت عليه كلش خرب روحي الغبرة

-منار: هههه عادي حبي يمعودة وجهج اصفر شجاچ

-لان اني غبية ومتت من الخوف عليه عبالي راح يصيرله شيي لغسل اي والله

-مابيه شي

فزينه ثنينه على مصدر الصوت، مسلم والاطلس واكفين وره ظهرنه ديطلعون گلبي ادعبل وصرت امعمع ماعرف شحجي..

-الاطلس: شكراً لاهتمامج بس مابيه شي

-مريم: هاا.. اي زين

-مسلم: على كيفك حب لا تضغط على نفسك صارلك يومين ما نايم

-منار: سلامتك مسيو

-الاطلس: شكراً منار وشكراً لاهتمامج مريم

-مريم: العفو هلو هلو

خفه ابتسامته وتعداني وياه مسلم، خاف سمعني من جنت احجي قبل شويه غميت روحي ورجعت للمكتب فرشت مصلايتي الجايبتهه ويايه ووكفت اصلي وكل شويه اقطع الصلاة اخربط عقلي شخط من وراه واطرافي لسه ترجف...

-ريتاج: يله مرايم ما تطلعين

-بقتلي العشاء اكملهه واللحگكم

-ريتاج: اجاني السايق اني باي حبي

اشرتلهه بيدي وطلعت كملت تسبيح وكمت اكمل صلاتي، لميت المصلاية بعدما انتهيت ورجعتهه بالمجر وطلعت من المكتب بعدما سديت الباب وراية..

وبينما اني امشي على كيفي تعداني الاطلس يمشي سريع يهف باوعتله متفاجأة من حركته، اخذ المصعد ووجهه جلمود ميگصه الطبر عاكد الحاجب وانفه مجنح من العصبية..

خفت اصعد وياه بالمصعد عفته ينزل وحده بعدين اخذته مرة ثانية وحدي ودست زر الطابق الارضي، المصعد ياخذله خيرة ياله ينزل ولو حقه اذا البناية شطولهه أشك احتاجو فضائيين يساعدوهم بالبناء..

اخيراً وصلت، الشركة بدت تطفي اضوائهه الاغلب رجع للبيت بس كم واحد يروش..

-لك عم تسمع!!!

حولت نظراتي على مصدر الصوت چان عالي وصوت صياح واحد ظاهر بوضوح، وكفت بمكاني ماشوف شي..

-تينا: ها حب انتِ هنا

انتبهت لـ تينا وضحى هسة دينزلن من المصعد ووياهن ثنين بنات..

-مريم: ها هلو تينا ضحى دتسمعون الصوت يمكن صايرة عركة؟

-ضحى: عركة؟؟ وين ويامن؟

-تينا: معقولة جايين ضحاوي؟

-ضحى: مادري والله هو مو مسافر؟!

-تينا: امشو نشوف شكو

-مريم: اي شفت الاطلس كلش معصب جان

-تينا: يبووو اي معناهه راجع الطلي

-مريم: منو؟

ثنينهن گالن بنفس الصيغة ونفس الكشه مال الوجه..

-جماعة شركة شمسون!!

-مريم: شبيهم ذولة منو؟

-تينا: ذولة طركاعة تعرفين شنو طركاااعة

-ضحى: مافيات خطف نهب سرقة غسيل اموال كلشي تلگي عدهم

-مريم: يااا شو مبين اسمهم عاوي شمشون

-تينا: مبرگعين نبضي ذولة من فوك الله الله ومن جوه يعلم الله

-مريم: وهسة العركة هاي همه؟

-تينا: مادري نروح نشوف امشن

حچن البنات الثنين الوياهن بخوف وحركن بيدهن بعلامات الرفض..

-احنه معلينه معلينه راجعات للبيت

-تينا: ياا شوف الجبانة

-مو جبانة تينا بس انتِ تعرفين جماعة شمسون شنو!!

ميلت حلگهه بحركة بكيفچن وجروني وياهن حتى نشوف، بعدنه بمقدمة الصالة الثانية للشركة ونشوف الدنيا مگلوبة مسلم ورجال متلازمين من الخوانيگ وديحاولون يفاككوهم..

-اطيييييح حضكككك فاهدددد

هذاك يضحك ممهتم ومسلم صاير ازرك جرهم الاطلس وصار بيناتهم دفع المتسمي فاهد من صدره حيل وكال بصيغة محذرة وصوت قوي بس تعبان..

-المكان يتعذرك فاهد اطلع بره!!

-فاهد: هيج صارت اطلس تطردني من شركتي؟

-علي: حامضض على بوززك شركتكك شنوو ابن القندررة امشي ولي بره لا تكفرررناا بيك

-الاطلس: اطلعععع بره فااااهد كوة كاض روحي اطلعععع

-فاهد: هههه والله تضحكون استقبالكم حار على فكرة تدرون بهذا الشي

نزيت من هجم عليه الاطلس وددددگ على وجهه مطله بالكاع وطيح حظه بوكسيات على دفرات على غلط على فشار والجماعة الباقين قسم منهم يتعاركون وقسم يفاككون..

-مريم: ولجن هاي شنوو

-تينا: ماشفتي شي حبي تصير بالاسلحة بعدين

-مريم: شلون

-ضحى: يساومون ويتربصون وبالحيلة والخدعة يلگفون اليردو ياما وياما صايرة مجازر وممالخ بسببهم ومحد يكدرلهم

جفلت ماعرف شسوي واستغربت من معرفة البنات لهاي التفاصيل، اباوع حواليه المكان شبه فارغ والاضوية مخنفسة ماكو احد غيري وغير تينا وضحى وثلاث بنات واكفات من الجهة الثانيه هم مصدومات..

-مريم: بنات خايفة شوفو شديصير

-ضحى: لازم يجي مسيو محمد هاي ما تفض بهالسهولة

-تينا: اني معليه ما اخبر احد لا توكع براسي

بقيت اباوع واكل بأظافري صارت دماية حرفياً حسيت ايدي مربطة مادري ليش حسيت بالمسؤولية خلال هالثواني..

-فاهد: ههههههههههههههههه روووح بابا روحح لخدامتك رووووح

مدمى ويحجي مأشر عليهم طفر عليه مسلم ورجعو يكتلون بي، سحب الاطلس مسلم عن فاهد اكيد خاف يموت بيدهم ويصيرون بمصيبة جديدة بس مسلم جان فاير اكثر واحد بيهم..

-مسلم: انعععل ابووووك على امكككك ابن ال****** اذا مسيتهه بكلمةةة اشگككك نصيننننن

-الاطلس: مسلم كافي مسلممم

-حمزة: شباب خلص راح يوصل عمي لا تسوولنه سالفة

-فاهد: اويي اوووي خافو الكتاكيت هههههههه

-الاطلس: والعباس كوة كاض روحي ماخرب معاني وجهك الخايس روح فاااهد لا تصير انتَ والكاع سوووه

-فاهد: ليش تعال نشوف عضلاتك حقيقية لو نفخ

هالمرة صارت مو بس عركة صارت حرررب ناس تدك بناس واجو بعد موظفين يشوفون شكو واني ارجف بمكاني وادور بعيوني على عمو محمد لو أي احد من الحماية ليش محد ديجي يشوف شكو الحرس والحماية الواكفين بالباب شنو شغلهم!!

-تينا: يمةةة وكع حمزززة وكككعععع

جرتهه ضحى حيل حتى متروح واني وياهه حضنتهه من ايدهه وهي تغلط وتسب بيهم وكل شويه تريد تروح تطيح حظهم لزمت كعبهه بيدهه وشمرته على واحد صار بظهره زرفة  تزرف صاح بألم وهي صفكت بيدهه مكيفه..

-تينا: ابن النعععال اطيححح حظككك لو رجعععت

خزرهه بقوة ورجعتله الخزرة لزمتهه وجريتهه بره اخاف عليهه ذولة مبينين عصابچيه مو مال واحد يندگ بيهم..

-مريم: تينا حبابه يمعودة انتبهي ليأذيج بعدين

-تينا: دخيووولي ابن الططوة

-ضحى: بناات شبي الاطلس شبيييي

عفت تينا ودرت وجهي اشوف شكو اللتمو عليه جماعته وعمر يصيح بصوت عالي ماشوف شي بس الوجوه مضربه والملابس ممزقة..

-عمر: اسعاااااف خابرووو الاسعاااااااااف

-فاهد: هاي حتى ما تندگون بيننننه جراوووة

-علي: ولككك هددددني مسلمممممممم

-مسلم: عليييييي راح يموت ابن خالكككك عليييييي

-حمزة: ولكم قنددرررررة خابرو الاسعااااااااااف

-ضحى: بنااات شصاير راح اموتتت دخت ماتحمل بعد

اشرت للبنات الواكفات من الجهة الثانية اشرو ان ميعرفون شصاير مدا يشوفون شي مثلنه جماعة الاطلس محاوطي من كل الاتجاهات..

-مريم: گلبي راح يوكف اوف معدتي راح اتقيأ

-تينا: عزه ضحى مريم تخربطتت

-ضحى: مرايم انتِ زينةة مريمم

اشرت براسي اني زينة وكفت بمكاني اوازن نفسي ولازمة ايد تينا حيل، عيوني تدور على عمو محمد وينك عمو وينننك ابنك راح يموت!!

-ضحى: بنات خلونه نبتعد اخاف تجي الشرطة

-تينا: اي امشو امشو

سحبوني وياهن حتى نروح وماسمع غير صوت صرخة هزت جدران الشركة هزز خلتنه نبلع العافية يبس دم جسمي واخذتني الرجفة ثواني وضحى خربت ووكعت علينه.......

يتبع ♠️💸....

• ━━━━━━❪♣❫━━━━━━ •

شلونكم قلبي 😁

كتبولي توقعاتكم نشوفففف 😐🔥
مو تنسون التصويت 💋