رواية الاطلس "دمليج أسود" الفصل الرابع والعشرون 24 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

• ━━━━━━❪♣❫━━━━━━ •

طلعت من غرفة نانا ورجعت لغرفتي غيرت ملابسي سريع ونزلت جوه للمطبخ شفت خالة وام الولد وعمو كاعدين سوه على الميز يسولفون، صبحت عليهم وفوراً سألت..

-عمو الاطلس شعجب سافر؟

-محمد: سفرة عمل ضرورية عدنه

-مريم: البارحة ما اجه للبيت قلقت عليه

-حصة: حبيبتي لا تقلقين محمد رايح وراهم تعالي افطري ويانه

كعدت على الكرسي وعمة زهراء تسولف بولدهه وكل شوية مبسمرة خالة حصة وخالة تضحك مبين بيناتهن ميانة قوية، كملت اكلي ورجعت لغرفتي رتبتهه وعطرتهه وكعدت اتصفن..

اجو امي وخواتي على بالي اتصلت بيهن سولفنه وانوب اتصلت بنوره اختي سديته منهن وكمت افتح الشبابيك اهوي الغرفة باوعت من الشباك وذاكرتي استرجعت يوم عرسي وشصار..

رجف گلبي ولزمني خفقان فوراً سديت الشباك ورحت للحمام اغسل وجهي احاول قدر الامكان ماخلي هالموضوع يسيطر عليه وياخذني الخوف ميصير افكر بشغلات سيئة فال مو حلو..

طلعت من الحمام وابتسمت ابتسامة واسعة من شفت سارونة هستوهه داخلة لغرفتي، سلمت عليهه تباوسنه وتحاضننه وبعدتهه عني..

-مريم: الحمد لله على السلامة سارونة

-سارة: مرايم مشتاقتلج

-هاي وصارلج ثلاث ايام من رحتي بس هاي شنو عينيي صايرة فرنسية

ضحكت من گلبهه وعدلت شعرهه جابته من جهة وحدة وراحت لمراية الميز تعدل حمرتهه..

-سارة: والله تمنيتكم ويانه مريم حرامات ما اجيتو

-تعالي تعالي سولفيلي

ذبت نفس مرتاح وشمرت روحهه على السرير صارت تضحك وحدهه وترافس برجليهه موتتني ضحك، كعدت يم راسهه ولزمت بيدهه..

-ولج يااا هاي شبيچ خرب

-سارة: تونست تونست تونست تونستتتت ونسة بحياااتتي ما متونسة هيج

-الله صدددك

-مريوم لا تكولين هي ثلاث ايام بس والله احلى ايام حياتي عشتهه

-سولفيلي فدوة فدوة

-اي طبعاً اسولفلج

عدلت گعدتهه بسرعة وشالت شعرهه المفتوح، تربعت وهفت على وجهها وبدت تسولفلي..

-سارة: انتِ يمكن متعرفين حمزة شكد يونس فرني الدنيا كلهه وشنو اريد يسوي بدون ميكول لا وكلشي يشوف يشتريلي واني اشتريلج واشتري لخواتي حتى لدعاوي وبسملة اشتريت

-يا گلبي فدوة لعمرج

-ياريت ما رجعنه كلش تونست وفرحت هناك

-اي عيني ويه حمزة بعد منو گدج

ضحكت بخجل ومسحت على وجهها جرت ايدي وقربت روحهه عليه تهمس بيني وبينهه عبالك احد راح يسمعهه..

-لج البارحة اجه يمي يسوي الله اموت على عطرج سارة هايم اني هااايم بي يخبلني، هههههه حتى مجنت راشه عطر

-هههههههههههههههههههه عزه يمة متت ضحك صدك تحجين

-والله العظيم لج شكد يسوي هالسوالف انوب كتله حمسه تره ما حاطه عطر يكول اي كناري هو بجسمج صاير متشبع...

تسولفلي واني خربانة ضحك هالفاهية مدا تستوعب هو يحبهه ويتحجج بعطرهه بس حتى يبينلهه حبه ماحجيت تركتهه هي تكتشف هالشي على برائتهه..

بقينه كاعدات وندگ سوالف للظهر كمت اصلي وهي راحت لغرفتهه شوية واجت المساعدة كالت صار الغده، نزلت جوه شفتهه كاعدة ويه رقية وسارة ميتة من الضحك وجهها وملامحهه كلهه حياة..

تغدينه سوه بس غدير ما اجت كملنه ورجعنه لغرفتي، اني ورقية مكابلات سارة وكاعدات هي تراوينه الصور وتسولف على كل موقف..

-رقية: فديت شكد تونستي المرة الجاية تاخذوني سويرة

-سارة: تدللين ناخذكم كلكم اصلاً حمزاوي ميمانع

-رقية: سارة سارة سولفيلنه رومانسية حبابة

-سارة: انچبي رقية متستحين

-رقية: مرايم سولفيلنه انتِ حبابة بس موقف واحد

-سارة: اذا مريم سولفت اني اسولف

-مريم: بنات ماكو رومانسية بيناتنه

-سارة: أي موقف احجيلنه

سكتت افكر بموقف صار بيناتنه تذكرت الموقف من چنه مسافرين وهو باسني لاول مرة سولفتلهن عنه بدون لا اذكر تقرب مني تخبلنن گامت يگمزن على الفراش ورقية تلطم على وجهها..

-رقية: طلع اخوييية رومانسيييي

-سارة: الله الله الله الله

-مريم: هههه ومن بديت انام بغرفته كل يوم لازم يبوس اذني واني نايمة ويوشوشلي شي مادري ليش هيج يسوي

-سارة: شيكول

-مريم: مادري اكون بين النايمة وبين الكاعدة بس مرة سمعته كال "مريومة السنفورة"

فطسن ضحك واني اتذكر الموقف واضحك وياهن، كملنه مني واندارينه على سارة حصرناهه اله تحجي وهي تحلف ماكو مواقف بيناتهم بس خليناهه امام الامر الواقع واخيراً كالت..

-سارة: من چنه مسافرين رجعنه للفندق تعبانين كلش ورجليه مورمة كمت ابجي من الوجع ما خلاني انام اله يفركلي رجليه شكد استحيت بس ماقبل يعوفني هيج دلكهه وقرالي قصة همينه

-مريم: اووووي شكد حلو بعد موقف بعد

قهقهت بخجل وهزت راسهه لا رقية لزمتهه تخنكهه استسلمت وكالت..

-سارة: مرة واني نايمة حضني من وره وحط وجهه بشعري

رجفت من حچتهه وغطت وجهها بسرعة فكيت عيوني وكمت اعيط بكتمة..

-مريم: كل هذا صار بثلاااث اياااام اويلاااااه

-سارة: ما حاس والله چان غافي يمكن تخيلني غدير

-رقية: لا لا لا ماكو هيج حجي اكيد يعرف هاي انتِ مستحيل

-سارة: صدكوني جان نايم بس شنو غير متت وره هالموقف

-مريم: معقولة تخيلج غدير؟

-سارة: احلف اي لان مستحيل يعني هو يعرف اني شنو وحمزة مو من هالنوع ميتحارش ابد

-رقية: اهووو حتى هناك غدير لاحگتكم....

خنسنه كلنه من دخلت غدير علينه لابسه فستان مفتح ومبين جسمهه منه، ضحكت منتصرة وكعدت ويانه على السرير..

-غدير: سمعت جبتو طاري اسمي

كلت بگلبي لا حبي انتِ سمعتي كل محادثتنه واجيتي، ضحكت بصوت اعلى وتربعت ويانة..

-غدير: تذكرني هناك مووو

-سارة: منو هو

-غدير: حمزة يعني منو

-سارة: لا ماتذكرج

-غدير: لا تجذبين فديته حبيب گلبي راح اموت على شوفته

-سارة: تره عيب!

-رقية: صدك عيب غدير شبيچ

-غدير: دروحن تره رجلي

-سارة: چااان رجلچ

-مريم: بنات شنو رأيكم نسوي كعدة بالحديقة

-غدير: اوكفي اوكفي، انتِ شبيچ ولج شو مصدگة روحج!

-سارة: انتِ شبيچ تسولفين بي عبالك بعدكم متزوجين

-غدير: تره چان رجلي!!

-سارة: وهسة هو رجليي!

خزرتهه غدير شلت حالنه كلنه السالفة حمت يمة يمة دخيلج يا ام البنين..

-غدير: حبييي عود اذا عبالج حمزة ينساني مستحييييل

-سارة: واني شعليه ينساچ لو مينساچ بكيفه بعد

-غدير: هههههه اي ههههههههههه لو تعرفين شيسوي وياي ميخليني انااام من الغزل والحب وبعد فهمج كفاية حبي

-سارة: اي بالعافية عليج الزمن الماضي

-غدير: چلببببة مو زمن ماضي راح يرررجع

-سارة: اوكي حبي هذا هو يرجع ان شاء الله ارتاحي

-غدير: سااااارة راح اموووتچ

هجمت تريد تكفشهه وسارة ابتعدت صرت بيناتهن ورقية ويايه غدير انكلبت فرعون راح تنجلط من برود سارة وسارة ولا يهمهه راحت على المراية تعدل شعرهه..

-غدير: ام كفشة الحمرررة لو تموتيييين ميحبچ لو تموتتتين

-سارة: ما كاتلة روحي عادي

-غدير: هه الخااايسة هو يكرهج تدرين يمووت منج تلعب روحه من لمستج

-مريم: غدددير شبيچ شهالحجي مو عيب علليج

-غدير: انتِ لااا تدخلين

-مريم: شو اتدخل واتدخل جاي تحجين على صديقتي وحمااتي ما اقبل عليهه

-غدير: اويييلي يا لواگتجن بنات الفگرر تتلزگن بينه بنات العزز

-مريم: اييع هو منو متلزگ بيج شو انتِ فد مرة رافعة خشمچ للسما انتبهي غددير لا يجيله يوم وينكسر

-غدير: ما ينكسر واني بنت ابووية وحمزة بظهرري

-مريم: لا انتِ مو طبيعية شنو حبي چنتي غافية بعرس سارة وحمزة ممستوعبة حمزة وسويرة تزوجو وصار رجالهه الهه بعد؟؟ الهه مالتهه مالتتتهه!

-سارة: مريم عوفيهه مالي خلگ اناقشهه

-غدير: مالج خلگ لو تخافييين، ثانياً انتِ هيووو بت الفگر خاف عبالج اخوية يحبج والله يضحك عليج ويلعب عليج البارحة چان ويه نورسييين خاف متدرين

-مريم: اي بالعافية عليهم

-غدير: ههههههههه هههههههههههه نايمة ورجليهه بالشمس اصلاً اطلس مو بحالج ولا يمج ولا يريدج تره نورسين تحبه وراح تتزوجه بأول فرصة

-مريم: فدوة الهه حبيبتي شبيچ شادتهه

امثل البرود وداخلي مفحمة من القهر راح اطگ منهه ومن وجودهه بغرفتي اريد احرگهه..

-غدير: اي اي ظلي هيج عفية لا تصيرين حايط بوجههم خلي العشاق يتزوجون وينجمعون

-مريم: حبي منو لازمه خلي يروح يخطبهه واذا يريد اني اروح اخطبله هاي اذا گدر يفارگني بس احاول بكل جهدي اقنعه بيهه ميخالف

-غدير: لا لا هواي مصدكة نفسج انتِ هههههههههههههههه بابا ميحبج هو وبس يريد يخلص منج

-مريم: حبيبي سودة عليه البارحة ما شفته اشتاقيتله سارونة، رقاوي برأيكم شديسوي هسة

فكن حلگهن عليه بدون لا يعلقن شي وهاي غدير بس تضحك وتفر بيدهه واني لابستهه..

-غدير: تلگي هسة بنادي متونس ويه وحدة وهاي البطرانة مشتاقتله

-رقية: الاطلس مو هيج!!!

-غدير: اي صار هيج وره الزواج عادي

-رقية: مررريم اتصلي بي هسة

-مريم: حبيبتي رقية شبيچ اكيد هسة هو بأجتماع مهم

-غدير: اي اي قنعي روحج الفاهية

-سارة: اتصلييي بي مريم ودكي كامره هم

تأشرلي بعيونهه وتخزرني حتى اتصل ماردت احقق غاية غدير وخفت بنفس الوقت خفت فعلاً يكون بمكان مو خوش ويفشلني بس انحصرت بيناتهن بعد اخذت موبايلي ودكيت عليه..

بقى يدگ وميشيله كررت الاتصال واطرافي ترجف وضحكات غدير المستفزة نخرت گلبي وعقلي، خلصت الدگة الثانية ميجاوب ذبيت الموبايل مستسلمة..

-مريم: كلتلكم بأجتماع

-رقية: اي صح اكيد بأجتماع هو من يكون بأجتماع ميجاوب

-غدير: اي اي قنعن ارواحچن الغشيمات

تضحك متونسة على وضعنه راح اطگ والله فرگع جسمي والدم صعد لوجهي خدودي اشتعلو، سارة فوراً سحبت موبايلهه ودكت على احد كدامنه فتحت مكبرة صوت وصللنه صوت المتكلم..

-الو

-سارة: هلو حمزة شلونك

-حمزة: يا هلا كناري بخير انتِ شلونچ تغديتي؟

ابتسمت وجاوبته دارت بيناتهم محادثة بسيطة وغدير تفرگعت تفرگع تشلع بالفرشة الي على الفراش وتنافخ..

-سارة: حمزاوي اطلس وياك؟

-حمزة: لا هو وعمر طلعو لاجتماع اني هسة لاحگهم

-سارة: يعني بأجتماع همه مو؟ لان مريم تتصل على اطلس ميجاوب

-حمزة: اي بأجتماع ممنوع تدخل الموبايلات هاي وصلت يمهم اني

فوراً حولو على الكام وصورلهه الاجواء خارج غرفة الاجتماع، انفرجت اساريري من شفته كاعد هو وعمر بغرفة زجاجية مبينين منسجمين وديتناقشون وماخذهم الواهس..

-سارة: فدوة حبيبي اخوية اكيد تعبان خطية

-حمزة: اي لا نوم لا راحة هلكنه ادعيلنه كلش مهم هذا الاجتماع

سولفو بعد شوية وسدته ضحكت رقية تصفگ وتگمز على الجرباية..

-رقية: اي اي اي اطلس ويه النسواان موووو غدير ويه النسووان

-غدير: انچبي يله

-مريم: شلون تشككين بأخوج بهالطريقة شلون تنطين بي وتتهمي هيج اتهامات مجاي استوعب تركيبة شخصيتج!

-غدير: اي بالليل راح يروح مو كيفتي

حچتهه وطلعت من الغرفة متنرفزة تابعتهه بنظراتي ممصدگة اكو هيج كائن غريب اطوار ومريض لهدرجة من غيرتهه كامت تذب سمهه على الكل..

طلعن بقية البنات ضايجات من تصرف اختهن واعتذرن نيابة عنهه وعافني وحدي متمددة على السرير وراسي يدور بالافكار..

غفيت بمكاني وحسيت وره المغرب كمت توضيت ووكفت اصلي قريت شوية قران وراه حديث الكساء ونمت على السجادة ملل وتعب نفسي قبل الجسدي شلون راح تفرج ماعرف..

ما كمت الا من دگ موبايلي رحت اجيبه من الميز شفت المتصل "طوطي" جاوبته بدون نفس..

-الو

-الاطلس: شلونچ مرمر وينج مختفية

-مريم: انتَ المختفي اتصل ومتجاوبني

-اي جنت بأجتماع مهم بس وراهه اتصلت عليج سبع مرات ما تجاوبين دكيت على نانا كالت عنچ نايمة

-مريم: هاا اتصلت وراهه مادري ماحسيت نمت

-نوم العافية

-شكراً، احم اطلس انتَ وين هسة؟

-هسة طالعين نتعشى

-وين رايح يعني؟

-مادري والله عازمينه من التعب حتى مانتبهت وين ما وين بس يجوز قريب فندقنه

-اطلس

-هممم

-انتَ وين جنت البارحة؟

-ببيتي

-ليش ما رجعت للبيت؟

-اضطريت اروح هناك عندي اوراق مهمة ضامهن

-وماكدرت تجيبهن وترجع هنا؟!!

-هههه مريم ليش معصبة اسف ادري جان المفروض انطيج خبر بس صار عندي ظرف

-الظرف نورسين

سكت بس اسمع صوت انفاسه بالاتصال، ضحكت بداخلي وافر بيدي جاوبني بسرعة..

-شلون عرفتي؟

-عرفت وبس

-ردت اگلج بس من ارجع ادري راح تفهمين غلط بالاتصال بس..

-ماكو داعي تبرر عيني براحتك شتسوي سوي

-مريم ما سويت شي كل ما بالموضوع نورسين اجت تزورني عبالهه انتِ وياي بالبيت

-اممم صح

-والله العظيم واذا تردين هسة اتصل بيهه وهي تحجيلج

-عادي اطلس تره ممهتمة اني بس ماحبيت اعرف من احد غيرك

-منو كلج؟؟

-غدير

-اخخ من غدير اااخخخ وداعة امي كلت بس ارجع احچيلچ على الموبايل ما راح تفتهمين وتعصبين وتصيرلنه مشكلة

-لا متصير بس لو حاچيهه وره ما راجع جان عصبت وبرد الموضوع ويتألف ويصير غير شكل

-مريم ادري انتِ زعلانة وضايجة وحقج

-لا ما زعلانة ولا ضايجة گتلك براحتك

-لا مو براحتي اوكفي صبري عليه

راح صوته ورجع وره شوية كأن فتح خط ثاني بس مو من نفس جهازه، اجه صوت بنية عرفته نورسين سلم عليهه وهي خبصتنه بيبي وبيبي سألهه على البارحة وكالت هي اجت تزورنه بالبيت وما جانت تعرف بي وحده وحلفت بهذا الشي شوية وسده منهه..

-الاطلس: سمعتي؟؟؟

-اي عادي

-اجت كعدت اقل العشر دقايق وطلعت گلتلهه مريم مو هنا وحستهه طرده صايرة تضوج من برودي تجاهها وتتعصب ما تتحمل وحتى توصل بيهه تتعارك وياي

-وانتَ زعلان لان مضطر تعاملهه ببرود

-ما جاي تفهميني

-لا هذا هو براحتك

-ليش هادئة احجي كولي شي!

-شگول

-كولي أي شي حقچ تضوجين واسمعلچ واني الممنون

-مابيه حيل هي صديقتك وانتو متعودين براحتكم

ذب حسرة عالية وينافخ ضايج ماعرف شبيه احس روحي مطفية وفعلاً ما معصبة ولا ضايجة ما احس بأي شي برود تام احتلني..

-ماريدج تزعلين عليه واني غلطت من ما گتلج بس انخبصت شي صار فوگ شي، ابوي بنفس الوقت اتصل وگال راح تسافرون ودزلي شغل مهم ظليت اشتغل هناك بالبيت وراح عليه الوقت وحقج شنو يجي ببالج هسة حقج هذا اني قصرت ماتصلت بيج وبلغتج

-اي قصرت انتظرتك ترجع هواي واتصلت هواي وما اجيت

عضيت على شفتي مهضومة ماريد تنزل دموعي انقهرت كاعدة انتظره وهو ما كلف على نفسه يتصل حتى لو مشغول اتصال او رسالة ما راح تضره..

-ماردت اكلج اني مسافر خاف توكفين بوجهي

-ليش اوكف بوجهك؟

-اعرفج تحققين وياي وماكدر لازم احجيلج خصوصاً...

هدأ صوته ونفخ بقيت مركزة وياه اردف بهدوء..

-نورسين وابوهه ويانه

-شنو!!

-شركاء احنه بهذا الشغل

-لا لا تشاقة انتَ صح؟؟

-لا ما اتشاقه

-انتَ شنو تضحك عليه لو شنو سالفتك؟؟

-اضحك عليج ليش لو اريد اضحك واللعب ما اكلج نورسين وياي

-وهسة ياله تحجي؟

-لان ما صارلي مجال اني مادري بيهه جاية تفاجأت من شفتهه ويه ابوهه بالمطار

-اوكي اطلس

-مريم سفري لغاية وبعدي عنج غاية ثانية الله يخليج لا تشوشيني اكثر

-شنو سبب سفرك المفاجئ

-صفقة عمل اذا ربحتهه ابوي يتنازل عن شراكة شمسون ويانه، ادري مجازفة جبيرة مني لان العمل ما مدروس بس طلبت من ابو نورسين يكون داعم النه واقتنع بالمشروع وشافه ورقة رابحة الهم

-ونورسين اجت وياه من عرفتك موجود مو

-بيمن احلفلج مادري بيهه جاية

-وهسة ربحت المشروع؟

-بعدنه دنحاول

-اوكي جيد

-مريم

-هاا

-لا ترجعين ويه اهلج

خنست گلبي گام يدگ وبس اسمع لحسراته وتنفسه السريع، اني طرحت على امي فكرة تتصل بي وتقنعه ارجع وياهم ماطوله مسافر، طلب نفتح كامرا فوراً فتحتهه بعدني بچادر الصلاة من شافني ابتسم..

-تضوين

-اطلس اريد اروح وياهم

-مريم لا تسوين هيج بيه لا تطعنيني بظهري

-ما اطعنك والله بس تعبانة اني

-من ارجع وعد اخذج بنفسي ونروح

-اهلي راح يرحون اطلس ما شبعت منهم اريد ارجع وياهم فدوة

-تتعبيني

-شنو

-تتعبيني من ترحين ترضين اتعب مريم

-ليش مكبر الموضوع عادي حالي حال كل البنات اروح لاهلي طبيعي

-مريم لا توجعين گلبي ليش تعوفيني ليييش

-افهمني ماعوفك بس اروح كم يوم وارجع

-امرض على فراگچ

-متمرض متلحگ اصلاً انتَ مسافر

-ما ترجعيلي بعد

-افففف اطلس شبيييك

-اني اعرف شنو غايتج من ترحين هناك حتى تلوين ذراعي وتخليني غصب اطلگج

سكتت وهو ضم الموبايل بصدره واسمع صوت خطواته يمشي دخل لغرفة وطبك الباب ورجع الكامرا على وجهه..

-اذا رحتي مريم اعرفي تاخذين صحتي وعافيتي ما مسويلج شي اني ليش تنتهزين الفرصة وتعوفيني وتاخذين سفري حجة

-افهمني كله كم يوم وارجع ثق والله ماخونك ولا ابقى عند اهلي

-ابوووچ بعد ما يرجعچ الي!!!

-يرجعني لتخاف

-ما ترحين ماكو والله بس ارجع اخذج بنفسي بس لا تكسرين كلمتي وترحين

-خلص ماروح

-احلفي

-ماروح اطلس شبيك

-والله تهدين حيلي لا تكولين بعد سنة نتطلك وراح نبتعد اول وتالي بعد وكت بعد وكت لكل هذا الحجي، خلينه هسة هيج راضي المهم انتِ يمي اعاين عليج وارتاح

شكله تعبان ورغم اناقته ولبسه الكشخة بس وجهه متغير وملامحه مغيمة وتارسهن الهم والغم، ماعرف ليش حسيت اكو شي وميخليني اروح او عنده شك بأبوية ميرجعني اله، انقهرت كلش هزيتله راسي اي وودعته سديت الاتصال..

لميت السجادة ونزلت كاعدين الكل يسولفون عمو محمد سافر وبس علي كاعد هنا يداهر رقية وامه..

-حصة: مرايم عزمت اهلج على العشا

-مريم: صدك؟ شو ما كالت امي

-زهراء: هسة عزمناهم عليوي لح علينه صدك فشلة حصة شجاچ ما توجبين الضيف

-حصة: شدراني ما اجه ببالي وام مريم الله يحفظهه نفسهه عزيزة ما تقبل ابقى اتوسل بيهه خطية

-زهراء: لا واجب هذا شلون

ابتسمت بدون لا اجاوب وجهت نظراتي على علي مكيف فرحان اويلي منك ادري بسوالفك كله حتى يشوف دعيوة.. دا اللاحظ اهتمامه المبالغ بيهه بس كدامهه نادر يحجي يمكن لان هي حياوية يحير شلون يحجي وياهه مادري..

ساعة ووصلو امي والبنات ابوية بس نزلهم وراح استحى يبقى، تعشينه وكملنه وكمنه نشرب چاي..

دعاء وبسملة گامن للحمام ردت اروح وياهن وعمة زهراء ما خلتني لزمتني تسولف ويايه وتسألني على اطلس والولد..

**

"دعاء"
وكفت اغسل وبسملة كاعدة على الدچة تتأفأف نشفت ايدي واللتفتت عليهه..

-شبيچ بسوم

-بسملة: ملل كلش حياتهم كلهه رسميات

-دعاء: مو ذولة هوامير مادري شيسموهم

-بسملة: اي اي ادري بس ماحب هيج حياة الله يساعد مرايم

طلعنه من الحمام نسولف كالت بسملة تريد مي دخلنه للمطبخ واكفة مساعدة دتمسح الكاونتر طلبنه منهه بلطف وجابتلنه كلاص مي..

-دعاء: بسملة يله لا نتأخر عيب

-بسملة: اي هاي شبعت الحمد لله.. شكراً الج حبيبتي تسلمين

ابتسمت المساعدة واحنه عدنه ادراجنه نرجع الصالة ونبض گلبي من شفت علي واكف ديحجي بالموبايل بس شافنه نزله ورجعه بجيبه..

-علي: يا مساء الخير

-دعاء: مساء النور استاذ

-علي: ما نورتينه للشركة آنسة دعاء انتظرناچ

-دعاء: مو اختي مرايم بطلت بعد شنو فائدة وجودي

-علي: ليش احنه ما نعجب

-دعاء: لا العفو استاذ بس.. احم.. هههه مادري والله

-علي: هههههه ننتظرج تجينه شي يوم بس تشوفين الاجواء افرچ قسم المصممين اذا تحبين

-دعاء: كلش حلو تسلم ان شاء الله اشوف مريم اذا تكدر تاخذني

-علي: احم.. اي ان شاء الله تجين.. آنسة دعاء ممكن احجي وياچ على انفراد شوية

چلبت بأيد بسملة وهي تدور عيونهه بيناتنه هزيت راسي لا ما اجي وياك وحدنه افتهم عليه فوراً كال..

-علي: مو مشكلة بسملة انتِ هم مرحب بيج بس ممكن نحجي بالحديقة

باوعت لأختي حركت عيونهه يعني اي روحي، اخذتهه ويايه وتمشينه للحديقة الخلفية وهو ورانه، بسملة همستلي ببسبسة..

-بسملة: لج هذا كلش جنتل زلمة

-دعاء: اششش بسملة راح اموت

-بسملة: خية لا تستعجلين ما يعترفلج انطينه صبر

-دعاء: اخاف اخاف والله اخاف ماعرف اجاوب

-بسملة: عود اني اجاوب بس فكينه وامشي

وصلنه للميز البرة بسملة راحت تكعد واني هم چلبت بيهه اروح وراهه، علي فرك وجهه وكال بقلة صبر..

-دعااء دخيلج لا تصعبين السالفة اكثر تعالي هنا

-دعاء: يمة يا سالفة

-بسملة: صدك يا سالفة؟ استاذ رجاءً عيب احنه ماكو بيناتنه سوالف احترم نفسك

-علي: على كيفج عيني تره ما تجاوزت عليهه

-بسملة: لاااا عيب عيب اخي عيب شنو هالنوايا القذرة

-علي: دخيل علي تعالي دعاء يمي بس اسولفلي سالفتين وروحي

-بسملة: هااا هيج صارت كعدي دعاء ممنوع ترحين

-علي: هييي ابليس كعدي راحة اريد احجي وياهه حجايتين

-بسملة: اي استاذ تفضل احجيهن

كام يلطم ضحكت وكمت وياه رادت تحجي بسملة وخزرتهه تسكت..

-دعاء: تفضل استاذ

-علي: هاي شنو اختج تخوف

-دعاء: اعذرهه بس اسلوبك چان غريب

-علي: ها صدك؟

-اي والله

-اسف حبيبتي

-نعم؟!

-حبيبتي امي احبهه هواي

-شدخل امك؟!

-مادري اجت ببالي المهممم دعاء تعالي على جهة هناك

-ليش ماخذني هناك شكو

-بس احاچيچ اختي في الله احاچيچ مثل الاخوان

-ماشي تفضل

وگفنه قريب قفص الطير وبسملة كاعدة رجل على رجل وتطك بعلچهه كالعادة، اخذ نفس عميق علي وحچى بهدوء..

-دعاء اني ماعرف شلون احجي وياچ كلش جاي احير و...

-ليش بيه خلل يعني؟

-لا لا مابيج كل خلل الخلل بيه اني ماعرف احجي ويه بنية شريفة

-شنو؟؟؟

-اقصد يعني هيج مثلج محترمة وحياوية وخجولة وهيج يعني هيج

يأشر على شكلي وملابسي وايدي متت ضحك بگلبي بس ما بينت، سويت روحي مو فاهمة كلامه نفخ بقوة وكال..

-اخاف احاچيچ لا اچفص واذب ميانة وياچ وتفهميني غلط

-ليش متعود تذب ميانة ويه البنات؟

-اي احجي على لاهيتي والبنات ما يهتمون يضحكون وما عدهم مشاكل ويه اسلوبي بالعكس بس انتِ غير.. انتِ كلش غير

-غير يعني بيه مشكلة لو شنو

-يابة والعباس ابو فاضل مابيج مشكلة بالعكس تخبلين وكلشي بيج يخبل ويجذب

-هاا

-اي، من يوم عبرتج الشارع ماعرف اذا تتذكرين لو لا

-لا ماتذكر

-معقولة؟؟

-شوكت هاي

-من چنه بالسفرة دعاء وكتلج انطيني ايدج وما رضيتي وكمشتي بسترتي

-هاي شوكت صار هيج

-بباب المطعم بالعشا رحنه وگتلج حالات خاصة وكمشيني وگلتيلي منين تجيب هاي الفتاوي

ابتسمت يتذكر الموقف بكل تفاصيله حتى كلامي حافظه لعد كم مرة مكرره بعقله، هزيت راسي اي وسويت روحي هسة ياله تذكرت..

-هاا هذا الموقف اي شبي؟

-اي من هذا الموقف استغربت شخصيتج بالبداية كلت هاي شبيهه بس بعدين تكرر كم موقف كدامي ولاحظتج ما تلمسين رجال ابد

-يا مواقف تكررت كدامك؟

-من اختج مريم تخربطت وسوت عملية طخيت ايدج بالغلط وانتفضتي وظليتي اليوم كله ما تحاچيني رغم ما قصدت شي بهاي الطخة بس حيائچ حلو دعاء حيل حلو

ابتسمت منزلة راسي، حسيت بي يتقرب مني توترت رفعت عيني عليه ماعرف شبيه تخربطت اوضاعي يمكن راح ابچي..

-علي: دعاء اني سرسري

-شنو؟؟

-معجب بيج اني وافكر بيج دوم بس اخاف اتقرب منج اخاف عليج من روحي

-مافهمت استاذ

-دعاء شوفي فتحي عقلج وياي

-ماشي

-اني ادبسز يعني الى درجة ادبسز ورجال زايعته الدنيا شغلي كله ويه عارضات الازياء اصورهن واللمسهن واللعب جولة هنه لبسهن مغري ويشگن شگ وهاي السوالف يعني و...

-يعني نسونچي!!

-لا لا مو نسونچي اني وصدكيني روحي سألي الكل عني عيني صلفة ولساني طايح حظه بس مو نسونچي احب السبايسي ما سبايسي وهالسوالف وانتِ رغم محجبة بس اشوفج سبايسي وفد شي يملخ

-استاذ شنو الموضوع!!

-اسف اسف مو اكلج اني ماستحي بس شسوي هاي شخصيتي من اني وهالگداتني

-واني شدخلني بهذا الشي رجاءً احترم حجابي

-واني محترمه آنستي قسماً بالله ما تشوفيني حاير وجاي اللوص

-هاي حاير وهيج لعد لو متحير شتسوي

صفن بوجهي وعض على شفته وهز راسه لا..

-علي: افضل ماحچيهه

-لا مستحيل

-اختي في الله هسة شسوي

-شتسوي شمدريني علييي

-الله شو عيديهه

ضميت وجهي ميته خجل هذا شبي مستخف وخرت وحدة من ايدي عن وجهي والثانية لسه حاطتهه..

-علي: باعي هذا الجاي اسولف بي هسة شنو اتصرف لا اني الاكدر اللزم ايدج لا ابوس خدج لا اتغزل شني هااي

-استاذ ارجوك اني...

-محجبة اعرف اعرف وروحه لأبوية شبعنه من هالحجاية ويه مريم واحنه محترمين حجابكم وفنه الي يطخچن بسوء

-اي ضروري تحترمو

-على راسي احطه

-تحط الحجاب على راسك؟؟

-تعبير عن الاحترام دعاء هاي العايزة بعد اتحجب لحضرة جنابچ

-استاذ خلينه نتفاهم وندخل بصلب الموضوع المطلوب مني شنو

-احبج

فكيت عيوني وحلگي گمت ازاگط بمكاني من الصدمة والفشلة انداريت على بسملة جمدت والعلچ بحلگهه حتى متعلس بعد..

-علي: مو كتلج صلف

-دعاء: بس انتَ حتى متعرفني

-اعرفج اعرفج

-شلون؟؟

-ظليتي براسي دعاء وموقفنه ما انساه ماحب البنات المحتشمات واتنرفز منهن ما ربيت هيج ولا يعجبني هالشي بس انتِ خليتيني اتغير جاي اشوف الحجاب مو بس قطعة قماش وحاطتهه على راسچ جاي اشوفه بأخلاقج وحشمتچ مشيتچ ورزانتچ

بلعت ريگ استمعله راد يتقرب مني اكثر خفت وابتعدت رجع لمكانه قهقه وكال..

-ما اسوي شي صلف لا تخافين انتِ عفيفة لدرجة استحي اسوي شي واللوثچ

لميت رداناتي وضغطت عليهن انداريت على بسملة حاطة ايدهه على خدهه وتتمعن بينه وتعلج..

-علي: رحت لمدينتكم وسألت عنج

-رحت وين؟؟

-صار عندي شغل هناك واخذت عنوان بيتكم ورحت وكفت ببابكم ردت ازوركم وماكدرت استحيت ورجعت

-استاذ علي...

-بقيت هناك اسبوع وشفتج مرتين وبالمرتين چنتي هادئة ولطيفة وهالشي عجبني اكثر واكثر دعاء فريتيني فر..

سكت يلقط انفاسه واردف..

-يمكن تكولين عني سريع او جذاب بكيفج شتكولين كولي بس هالشي ما راح يغير من مشاعري تجاهچ

-بسملة: الزبدة؟

اندارينه عليهه شفناهه مبتسمة واجت بأتجاهنه كتفت ايدهه ووكفت مقابيل علي..

-بسملة: كول استاذ علي حاچيني شنو الزبدة من كلامك

-علي: الزبدة اني احبهه

ابتسمت وضميت وجهي راح اذوب ماتخيلته يحبني كلت يمكن اعجاب بس ماتوقعت حتى اجه للمدينة مالتنه حتى بس يشوفني..

-بسملة: وبعدين؟

-علي: شنو قصدج

-بسملة: وره الحب شنو يعني الخطوة التالية شنو؟

-علي: ههههههههه بسملة انتِ شنو المحامي مال دعاء حتى اعرف واتخذ اجراء بخصوصج

-بسملة: اجراء شنو يعني

-علي: مادري نشوفلچ رجل نخلص منج

گلبت عيونهه معاجبهه وراحت توكف بعيد مرة ثانية..

-علي: ها دعاء

-دعاء: ها

-علي: شنو تكولين

-دعاء: ماعرف يعني شنو تريد مني

-علي: ندخل علاقة نتعرف على بعض و...

-دعاء: ندخل علاقة!

-علي: كلت شي غلط

-استاذ تره احنه مو هيج ماعدنه هاي السوالف علاقة وماعرف شنو الي يريدنه يندل باب بيت ابونه

-علي: اخطبچ!!!

عكدت حاجبي اباوعله شنو ما سامع بالخطبة هذا ليش هيج متفاجئ..

-علي: دعاء لا تقهميني غلط بس غير نتعرف على بعض اول

-دعاء: لا استاذ اعذرني ماحب هاي السوالف

-علي: ههههههه وين عايشين رأساً نخطب ونتزوج ليش هيج دعاء صدك جذب

-دعاء: ماشوف شي يضحك هاي عقليتنه اتمنى تحترمهه، من رخصتك

اشرت لبسملة حتى نروح واجه يهرول تجاهي جرني من طرف شالي اللتفتت عليه..

-علي: ليش هيج تسوين ما طلبت منج بس نتعرف على بعض

اشرت لبسملة تجاوبه ماعرف شبيه تعبت فجأة ومعدتي گامت تأذيني..

-بسملة: استاذ اكو شي نسمي فترة خطوبة يصير تعارف بيهه وتشوفون اذا تناسبون بعض يتم الزواج واذا ماكو تفاهم خلص كلمن يروح لحال سبيله

-علي: ليش كل هالتعقيد شنو المشكلة بالعلاقة؟؟

رادت تجاوبه واشرتلهه تسكت، انداريت عليه وحجيت بهدوء..

-من رخصتك استاذ لازم نروح امي راح تفگدنه

تركته قبل لا يجاوبني ودخلت جوه كل جسمي يرجف وبسملة ضاغطة على ايدي وتهمسلي السويته صح ولا اتندم عليه..

**

"مريم"
اخذتني السوالف ويه سارة ورقية ونسيت خواتي رفعت راسي اشوفهن وين سألت امي عليهن كالت راحن للحديقة يشوفن الطير سألت عمة زهراء على علي كالت راح لبيته تطمنت ورجعت اسولف..

مرت عشرين دقيقة تقريباً ياله رجعن دعاء لونهه مخطوف وبسملة تهدأ بيهه كمت بسرعة اشوف شبيهن واشرتلي نروح لغرفتي..

سولفتلي كلشي دار بينهه وبين علي تفاجأت ان اعترفلهه بهاي السرعة بس واضح عليه شكد عاجبته من رجعنه من السفرة لليوم كلما يشوفني لازم يسألني عن خواتي ميحدد دعاء حتى ما احس بس اني مو غشيمة..

-مريم: زين سويتي حبيبتي دعاوي لا تخافين اذا هو صدك رايدج ويحبج يجي يتقدملج

-بسملة: حتى اني گلتلهه بس هي متوترة وخايفة

-دعاء: بنات اني ما متوترة لان خاف ما يخطبني حتى لو ميخطب خلص مو قسمتي بس الموقف چان صعب اول مرة رجال يعترفلي ماعرفت شتصرف

-بسملة: ميخالف حبي تنذكر متنعاد ان شاء الله

-مريم: يله تعالن انسن علي هسة راح تباتون يمي اليوم

-دعاء: صددك

-مريم: اييي قنعت امي كلتلهه ماكو زلم بالبيت بس احنه البنات عوفيهن يمي وانتِ رجعي لأبوية سويلكم ليلة رومانسية

ضحكن ونزلنه جوه للـ 11 راحت امي واحنه صعدنه فوك كعدنه على چربايتي نسولف وطلعت حب وحلويات وصحت لسارة ورقية حتى ينضمون ويانة..

كعدنه بالكاع كلنه على شكل دائرة واخذتنه السوالف والاعترافات لعبنه لعبة الاسئلة حرجتنه من رقية كالت بضحكة..

-رقية: منو اول حب بحياتكم

-بسملة: خية اني جفاف واصل للنخاع كلشي ماكو عمت عيني عليه

-سارة: حتى اني گبر طمني

-رقية: اني كلكم تعرفون احب مسلم مو شي جديد

-دعاء: بعدج تحبي رقية؟

-رقية: شلعته من گلبي من خطب اسيله ماحب اكون طرف ثالث ويشفقون عليه

-مريم: كفووووو

-رقية: مريم ودعااء يله دوركم

-دعاء: اني ماعندي

-بسملة: احممممم

-سارة: شو ماشوف هالشي

-دعاء: ماعندي ماعندي انچبن

-رقية: ديلا نعوف دعاء بعدين نرجعلهه مريم انتِ

-مريم: ماعندي

-سارة: مررريم والله منعوفج لازم تكولين منو

-مريم: مااا ماعندي

-رقية: والله العظيم راح تكولين هاج يله حلفت حتى تحجين غصب

-مريم: شكد تلحوون

-سارة: تحجين لو شلوون

-مريم: احم.. استحي

-بسملة: كولي خية كولي سرچ بحضن ام ميساء الحفافة

هستوني دا احجي ودخلت علينه نانا طفرت فرحانة دخلتهه بسرعة للغرفة وجريتهه اكعدهه ويانه ضحكت وسألت شدنسوي وحولن عليهه البنات..

-رقية: نانااا انتِ اول حب بحياتج منو

-نانا: يا ادبسزياات تلعبن لعبة سخيفة

-مريم: دكولي نانات احجي

-نانا: اطلس

-سارة: لااا نانا لا تجذبين علينه

-نانا: اي احب اطلس ليش مو اني ربيته وهو ابني

-مريم: نقصد حب حب رومانسي حوووب

حصرناهه الا تحجي ومتنه ضحك من كالت جانت تحب ابن جيرانهم وجان عمرهه 12 سنة بس هسة هو متزوج وعنده احفاد..

-دعاء: اوووي نانا اكيد احترك گلبج من تزوج

ضحكت بقوة وهزت راسهه لا تحرك بيدهه وتسوي..

-نانا: حب زعاطيط يمعودة

-سارة: مريم ما حجت الوحيدة بيناتنه

-مريم: ماحجي لو تموتون توصلوهه للاطلس وياكل راسي

-رقية: لكم ياااااا الله يعنيييي اطلس اول حب بحياااتچ

-مريم: لج لاا شجاب المحيط الاطلسي هسة

-سارة: لعد منو

-مريم: چان ويانه طالب بالمعهد كلش حباب وفد لطيف ويايه اني من النوع استحي احاچي ولد ومن يجي شخص يضوجني او يحارشني هو يفزعلي ويدافعلي وانعجبت بشخصيته

-سارة: يعني حبيتي؟؟

-مريم: لا لا والله بس اعجاب مو اكثر اصلاً هو مادري وين صفت بي الدنيا

-دعاء: اتذكره صدك جان لطيف كلش

كملنه سوالف ونانا تهددني الا تكول لأطلس وتخلي ينگلب ضدي واني اطفر عليهه اسد بحلگهه، مشت ليلتنه تجنن كلش تونسنه انضمت النه عمة زهراء وبدت بتحشيشاتهه ومداهرهه..

صارت بـ 1 بالليل وگامن البنات تفرقنه رقية چلبت بدعاء وبسملة تريدهن يمهه وهنه ما كالن لا راحن وعافني ويه سارة راح ننام بغرفتي..

حطيت راسي على المخدة وسارة بصفي نمنه وجه بوجه نسولف وسارة حاطه موبايلهه بصف راسهه..

-مريم: شبيچ سريوة

-حمزة چان يتصل عليه اليوم كله واستحي اجاوبه وهسة زعل مني

-حتى اني

-صدك؟ ليش ما تجاوبي؟

-خايف اعوفه واروح ويه اهلي حرگ الموبايل عليه كل شوية يدزلي رسالة

-وانتِ تغلسين

-لان ماعرف شنو اگله استحي افهمه اني ما راح اعوفه واروح اخاف يفهمني غلط

-تخافين عباله انتِ تحبي؟

-اي

-وشلون هسة

-مادري انتو شلون؟ ليش متجاوبين حمزة سولفيلي

-مادري احس بغرابة من احجي وياه گلبي يكوم يدك من لطافته

-انتِ مو تكولين هو صديقج من قبل ليش هسة متوترة من وراه

-مريم اني اشوفه كـ صديق بس اخاف يغير رأيه بيه ويريدنه نصير حالنه حال المتزوجين

-حبي سارونة لا تخوفچ غدير حمزة خوش رجال يستاهل كل خير وانتِ خوش بنية وكلش لايكين لبعض

-اني ماشوفه كـ زوج ما جاي اكدر تعبت

-انتِ كلتي هو متفهم وضعچ ولو مافهمت شنو وضعج وما حابه اللح عليج بس خلص ماطوله متفهم لا تظلين توهوسين وجاوبي

-مو زعل عليه وبعد ماتصل

-انتِ اتصلي

-استحي

-زين دزي رسالة كتبيله مشتاقتلك

-عزززه يمة لا لا استحي ولج شنو مشتاقتلك

-ليش انتِ ما مشتاقتله؟

برطمت شفايفهه ساكته، ابتسمت على حركاتهه وندستهه من كتفهه..

-كتبيله أي شي المهم يعرف انتِ ما زعلانة

-اكتبله مشتاقتلك؟

-بكيفج

-انتِ تكتبين لاطلس؟

-لا اني شعليه

-حبابة وياي على الواهس

-ولج سريوة شنو واهس عوفيني بحالي

-مرايم ملاحظة احنه دنعيش بنفس المشاكل عجيب شنو هالصدفة

-ملاحظة اي بس حلو حابه هالشي احس اكو احد ديشاركني معاناتي

-حتى اني فرحانة

-احنه فرحانات هنا وزلمنه يتلاطمون

ضحكت بصوت وكعدت على حيلهه وخرت شعرهه من عيونهه وكالت بحماس..

-راح ادزله يله انتِ هم دزي لطوطي

-مو استحيييي

-مريم حبابة خلينه نخطي الخطوة الاولى سوه لتعوفيني وحدي فدوة

-ماشي بس ما اكتبله مشتاقتلك ماعندي هاي الجرأة انتِ عادي لان حمزة صديقج من قبل اني راح اكتبله شلونك ماشي؟

-هذا هو اتفقنا

دزينه ثنينه سوه وگعدنه مگابلات موبايلات بعض اتفقنه اذا احد منهم اتصل نفتح مكبرة صوت ونسمع شيكول متت ضحك على خبالنه بس حسيت بالانتماء ويه سارة..

ماطول ثواني وحمزة اتصل عليهه اني اطلس بعده ما شاف الرسالة، بقى يدگ شوية وجاوبته سارة بصوت هادئ خجلان..

-حمزة: هو اليشتاق هيج يعذب

-سارة: شلونك حمزاوي

-مو زين

-ليش شبيك

-ليش اتصل ما تجاوبيني وهسة تدزيلي مشتاقتلك

-اي مو مادري

-واني مشتاقلج كناري

-شنو جاي تسوي؟

-هيج متمدد اريد انام

-هاا منو يمك؟

-الولد ثنينهم

اشرتلهه تسأله على اطلس شاف رسالتي وما جاوبني ماعرف ليش، سألته عنه وكال..

-هذا هنا متمدد

بلعت ريگ ميتة قهر ليش ميجاوبني لعد ليش يغلس عليه، سولفت ويه حمزة شوية وسدت المكبرة اسمع ضحكاتهه ونايمة على بطنهه تسولف وتفر بشعرهه وكل شوية مداهرته بأسمه تصيحله "حمسة" وترگعهه ضحكة شعلاتهه..

سدت الخط وياه وره اكثر من نص ساعة واني كاعدة على اعصابي راح انفجر، اندارت عليه فرحانة رجعت تنام بصفي وحطت راسهه على المخدة..

-سارة: همزين كلتيلي ادزله شكد تونست

-اممم حلو الله يديمهه

-كلش يونسني كلش اموت على حمزة اني مريم الشخص المفضل عندي ما ابدله بالدنيا كلهه

تحجي بحماس وفرح بس واضح الحب الي تحبه مو حب رومانسي حب اخوي او صداقة، ابتسمت على كلامهه وهي لاحظت عبوسي..

-شبيچ مرايم اطلس ما شاف الرسالة؟

-شافهه

-ما جاوب؟؟؟

-لا

-ليش

-مادري يمكن ملتهي

-ملتهي بشنو؟؟

-مادري سارة مادري

-مريم لا تزعلين اكيد عنده سبب صدكيني اطلس يحبج

-بس ما گالهه ولا مرة!!

-شنو ما كال

-ابد ما گلي احبج يغازلني اي يسولف ويايه برومانسية اي بس ولاا مرة گال احبج ولاا مرة

-مو اله يكول بس هو يحبج

-اي ليش ميكول؟؟؟ وليش هسة من ادزله ميجاوبني لعد هيج يعامل اليحبهه يخليهه مقهورة؟ هسة لو ما شايف الرسالة ميخالف مو يشوفهه وميجاوبني

احجي مفرفحة روحي الدموع جمدت بعيوني مستحيل انزلهن، سارة المسكينة حارت ويايه رادت تتصل بي تفتهم شبي وما خليتهه، نمت بمكاني وكلني امل يجاوب او يبرر تصرفه بس ما اتصل ابد ولا حتى جاوب رسالتي..

طفيت الضوه وحطيت راسي على المخدة وبچيت يبست عيوني من كدما بجيت الحسرة كتلتني ليش ازعل عليه اني حتى ماحبه بس هضمني بتصرفه ليش يكابر وليش كل هالغرور..

مسحت عيوني وحسيت على سارة تدغني بظهري همستلي بهدوء..

-سارة: لا تبجين مريومه حبابة

-مابجي حبي

-اني متأكدة عنده تبرير

-اي

-مريوم نكوم ناكل شي ما جايني نوم وجعت شو

-مو فرشنه اسنانه؟

-ميخالف نفرش بعد مرة

هزيت راسي اي موافقتهه وكمنه سوه لبست روب طويل فوك ملابسي وحطيت شال على راسي خاف اكو واحد من المساعدين موجود وكفت انتظر سارة تشيل شعرهه وبلحظة.. برمشة عين.. بجرة نفس وحدة انگلبت الدنيا گلااااب..

انطفت الكهرباء فز گلبي وكلشي بيه قامت القيامة يمكن مادري شصار مادري شديصير وين الضوه وين سارة ما جاي اسمع صوت افكاري من صوت الرصاص الي جاي يجي من بره..

صرخت من عمق روحي من تكسر جام غرفتي وسارة صارت تعيط بهستيريا منشوف شي ظلام دامس والرهبة اخذتنه صرت اعيط بأسمهه وادور على ايدهه لزمتهه حيل وركضت بيهه نطلع بره..

البنات البقية انخبصو وصوت عياطهم جاي من الغرف ماشوف طريقي وما حافظة طرقات البيت ماعرف وين اروح خواتي وييين خواتي..

-دعاااااء بسملللللة وينچنننن نااااناااااا

ادور مثل المخبلة ابجي وافرفح بأسمائهن اخيراً تقرب صوتهن عليه وكدرت اللمسهن صوت الطلق ما وكف انتهيت يبس دمي ورجليه بعد متشيلني هذا شنو دخلت لكابوس؟؟ حلم هذاا شديصيرر..

-حصة: شصااااير بناااات وينكم بنااااااات بلقييييس وينه جمااال بلقيييسس

تصيح على جمال البواب وماله حس صاحت بينه غدير كلنه ننزل جوه وعمة زهراء تركض ركض وتعيط البيت انخل نخل من الطلقات حضنت خواتي لصدري حيييل ميته خوف اجه ببالي موبايلي نسيته فوك بس شلون اصعد مرة ثانية..

-زهراء: منوو عدهه موبااايل خلونه نتصل موبايلاتكممم ويييين

محد اخذت موبايلهه من الرهبة عافتنه غدير ورادت تصعد فوك تجيب موبايل وعمة ما خلتهه جرتهه وجرتني والبنات كلنه تطلعنه بره للحديقة الخلفية عسى ولعل هدوء هناك..

-مريم: الشررررطة ويييين الجيرررران ويننننن

-رقية ببكاء: ماااعدنه جيران ماااعدنه

-سارة: الحررررس ماما الحررررس وينهمممم

خالة متجاوب مذهولة من الموقف ومن الخبصة الدتصير صوت قوي صار بره وصوت الباب الامامية ديردون يفتحوهه جسمي جمد وخالة كامت تصيح بعلو صوتهه..

-منوووو هذذاااا شلوووون تدخلون بيتنااااا

صاحت بينه عمة نطلع هسة راح يدخلون علينه منعرف منو همه منعرف شنو يردون وليش اجونه، المكان ظلام بظلام نتعثر بخطواتنه ودعاء وبسملة ملزمات بيه حيل ويبچن ويصيحن نريد امي..

-حصة: سااارة بنيتي سارررة غدير عينج على سارة

-رقية: ويين عافووونه وين ابوووية اطلللس حمزززة عمر علييي مسلممم وييييين

-سارة: لا تعوفوونييي لا تخليهم يااخذوني يمممةة فدوة

تبجي بجي بصريخ واحس بأصابعهه انحفرت بيدي الكل مخبوص كأن الديصير كله متعلق بسارة ويردون سارة..

اخيراً وصلنه للحديقة الخلفية الي بيهه النسر ضوه الهلال شوية مضويلنه بس منشوف ملامح كلشي مو واضح عيوني تدورهه تدور نانا، نانا اختفت وين نانا؟؟؟

-مريم: نااانا وييين بلقيسسس ويييين

-حصة: يا حسرررتي بلقيسس

-زهراء: بلقييس وينهه احد شافهه؟؟؟.. بلقييسسس

ركضت جوه مثل المجنونة وغدير تجر بيهه وهي متقبل تعيط بعلو صوتهه..

-زهراء: لو صار بيهه شييي محمد يتخخخخبل نددددخل بحررررب

صوت الطلق هدأ واختفى تقريباً من البيت لزمت ايدين غدير ودخلنه وره عمة زهراء نمشي على اطراف اصابعنه لغرفة نانا گلبي وگف من المنظر الشفته.......

يتبع ♠️💸....

• ━━━━━━❪♣❫━━━━━━ •