رواية الضابط المستبد والخرساء الفصل الرابع 4 - بقلم tolaalaskari95

مــثل خـيط الـجرح
ملـگاك
تلـچم
بــس تداويـني

افراح : دخلوني بغرفه رفعت وانصدمت بلي شفته
ابويه وجهه مينشاف من الدم ومعلكينه بالبنكه
من رجليه ومخلينه بس بملابسه الداخليه الفالينه ام التعلاكه والشورت
ومليانات دم وجسمه اثر الكيبلات(اسلاك كهربائيه قويه يستخدموها لتعذيب حتى تسوي اثر) طابعه على جسمه

الشرطي :ها يبنيه هذا ابوج عاجبج وضعه
افراح :اني ميته من الخوف وبس ابجي
اتباوع لأبويه وارجف من الخوف
ابو اكرم : بابا فروحه لاتخافين مراح يصيرلي شي لاتخافين هسه ترحين ل امج وترجعن ع البيت بنيتي انه مابيه شي
افراح: اني بس ابجي وبالكوه واكفه على رجليه من حجم الرعب الي عايشته
الشرطي :يله استاذ جاسم كول ابنك وين مهزوم
ابو اكرم :مااعرف طلع ومارجع للبيت
الشرطي :الظاهر انت مامهتم لبنتك
شوف شحلاتها وبعدها بالباكيت
افراح:هذا الشرطي ظل يستفز ابويه بالكلام الوصخ بس ابويه منطاه اي جواب

الشرطي :الظاهر ابوج ممهتملج
افراح :خفت يسوي شي لأبويه
ضل هذا الشرطي يلزم بيه كدام ابويه ويتحرش بجسمي واني. ادفع بي بعدين اجو الشرطه الي وياه وضلو يسحلون ويشككون بملابسي واني ادفع بيهم وهمه اربعه ومااكدرلهم
بهاي اللحظه حسيت شكد الصوت اله فائده
ابو اكرم:عوفوها يا كلاب ياعديمين الشرف عوفوها
افراح ابويه ضل يصيح ويحرك بنفسه يريد يفتح رجليه من الحبل ميكدر
واني متت بلحظتها ملابسي تشككت وطلعت ملابسي الداخليه واني ادفر بيهم واسحل بالعبايه مالتي بس اريد اوصلها اغطي واستر نفسي
وادعي بداخلي ربي دخيلك استرني
يارب سترك
ابويه تخبل من شافهم يردون يعتدون عليه
ضل يصيح بكل قوته رجع السجن رج بالصياح
شويه اجه هذا الشرطي القذر سحلني من رجليه واني دفرته بطنه هو تأذه لو فارت روحه
لزمني من حجابي وضربني على حلكي بحيث حسيت شفايفي نشكن والدم ضل يجري منهن
ضل يشيل راسي ويطكه بالكاع
شويه ونفتح الباب ،،،

نرجع لحمزه
حمزه :بعد ماخلص المغذي مال امي بالمستشفى طلعتها للبيت
دخلناها اني وخالتي لغرفتها لان ضاربيها مهدء ماتكعد وضلت خالتي يمها وصيتها عليها كتلها خاله اني لازم ارجع للمركز طلبت اجازه زمنيه مااكدر اتأخر ديري بالج عليها لمن ارجع الصبح ..
ام علي: شنو السالفه خاله توصيني على بت امي وابوي روح وليدي لشغلك اني هنا لاتخاف
الله كريم مابيها شي ان شاء الله
حمزه:متقصرين خاله يله اودعناكم من تحتاجون شي لو صار شي اتصلي عل المركز
ام علي :ان شاء الله يمه
حمزه :طلعت بالسياره للمركز شويه و دخلت
رحت للمكتب كعدت افكر بأمي
شويه وسمعت صياح قوي
طلعت اركض صحت ياعسكر وينكم
اجه عسكري كتله شنو هذا الصياح
العسكري: سيدي الشرطي سعد
اخذ اربع شرطه وياه
واخذو البنيه اخت المتهم
اكرم جاسم للغرفه الي بيها ابوها وهسه ماسمعنا بس الصياح
حمزه :رحت للغرفه ركض دفرت الباب
افراح :اندفر الباب ودخل هذا الضابط الي اجانه ذاك اليوم
صارت وكعتي يم رجليه اني من خوفي على شرفي ومن الالم الي براسي لزمت رجله
وجلبت بيها مابيه حيل اسوي اي شي حتى وكفه مااكدر اوكف
هو دنك عليه ولزم دشداشتي المشكوكه ورجعها على صدري وغطاني وراح
جاب العبايه ولفاني بيها
راح لهذوله الشرطه استلمهم راشديات
وغلط وفشار ميتغطه عليه غطى
وصاح على الجنود اخذوهم للحجز

اني بعد ماكدرت اسيطر على نفسي
من الالم احس صار انفجار عندي بالدماغ
شويه واغمى عليه بالكاع
ابو اكرم :سيدي دخيلك الله يستر على عرضك طلع بنتي راح تموت داخل على عرضك
حمزه :شلت البنيه واخذت شرطي وياي وطلعت بسيارتي للمستشفى
وصلت للمستشفى اخذوها اجه الدكتور
كتله دكتور متعرضه لضربه براسها
راح الدكتور لغرفة العمليات دخلوها
انتضرت لمن طلعو
الدكتور: وقفنه النزف وخيطنه راسها وراح تبقه تحت المراقبه 48 ساعه
حمزه :تسلم دكتور
الدكتور:تدلل سيادة الرائد
حمزه :كعدت انتضرها لمن تطلع من العمليات
اني مو علمود شي بس ابوها هزني بكلامه من كال طلع بنتي الله يستر على عرضك
كعدت شويه وطلعوها على السديه
لافين راسها وملبسينها ملابس العمليات
وجها كله دم وازرك من الضرب
رحت وراها دخلوها بغرفة العنايه وشكلولها الاجهزه والمغذي والكانوله
كالو يله اطلع ميصير يبقى يمها احد وهي تحت المراقبه
طلعت ،،
صحت العسكري كتله تبقى هنا وشنو يصير تتصل على المركز تخبرني اني بالذات واذا ملكيتني بالمركز تتصل على البيت وانطيته الرقم
العسكري:تأمر سيدي
حمزه طلعت رحت للمركز
رحت لغرفة ابو اكرم لكيتهم معلكينه بالبنكه ومن وكعت افراح نسيته وطلعت بسرعه
دخلت للغرفه صحت العسكر كتلهم نزلو
نزلوه وانطيته مي وكتله اخذيت افراح وسولها عمليه طلع عدها نزف وهسه هي بالعنايه
ان شاء الله يومين او 3 ويطلعوها
ابو اكرم:الله يرضى عليك سيدي ويحمي اهل بيتك مثل ماسترت عرضي وحميت بنتي
حمزه :ولا يهمك بس اكو كلام واسئله لازم افهمها
ابو اكرم :تفضل سيدي
حمزه: منو عندك من اخوانك عمامك حتى ادز عليهم يروحون ل افراح
ابو اكرم :ماعندي احد بس بيت اخوي ابو كمال الي رحتوله ذاك اليوم بالتفتيش
حمزه :ماشي راح ادزلهم عسكري يخبرهم
ابو اكرم :رحم الله والديك سيدي
حمزه :راح تبقى بالحجز انت وراح يطلقون صراح ام اكرم اليوم
ابو اكرم :الحمد الله قابل ابقى طول العمر
بس خل تطلع النسوان زحمه والله وجودهن
هنا
حمزه :يله راح ننتضر التحقيق بالقضيه
ابو اكرم :ان شاء الله خير
حمزه :طلعت رحت للمكتب صحت على العسكري دزيته على بيت عمهم
يخبرهم على وضع افراح ويشوف اكرم عسى يكون جاي ونعتقله
رحت سويت افراج ل ام اكرم
صارت الساعه ب 2 الظهر طلعت من المركز
ردت اروح للبيت
بس اجت على بالي افراح كلت خلي امر اشوف شنو الوضع
رحت للمستشفى لكيت العسكري سألته على الوضع كال ماكو شي جديد نايمه ومكعدت لهسه كتله اتصل على المركز خلي يجي واحد بمكانك وانت روح
العسكري :صار سيدي
حمزه رحت لغرفت افراح لكيتها نايمه وبس الاجهزه عليها

مااعرف ليش من اشوفها احس بالانتقام احس
اريد انتقم منها اريد اخذ ثاري منها
على الرغم هي لاتعرفني ولا اعرفها وبنفس الوقت فاقده لنطق ومتعرضه لضلم وعنف
بس مااعرف ليش احس بالحقد تجاها
اذكر بيها حالة امي
اذكر بيها طفولتي الي نحرمت منها
استغفرت الله وطلعت من الغرفه رحت على البيت
دخلت لغرفة امي لكيتها كاعده وخالتي وجنتها يمها سلمت وبست راس امي وضليت احجي شويه وبعدين صعدت سبحت وبدلت ملابسي
ونزلت خطيه جنة خالتي زوجة علي خلتلي غدى
تسلمين اخيتي
سلوى زوجة علي:تدلل خويه الف عافيه
حمزه :خاله والله تعبناكم ويانه
ام علي :ازعل منك ولك لاتعيدها مره ثانيه انه امك
حمزه: بعد گلبي خاله
تغديت وصبولي جاي
وبعدين اترخصت منهم ورحت نمت

نرجع ل افراح
افراح :بعد يومين كعدت من النوم لكيت نفسي بغرفه كلها اجهزه طبيه وبملابس طبيه
تخبلت انوب الم راسي مو طبيعي وشادينه بشاش ابيض ضليت اصيح من الوجع
شويه ونفتح عليه الباب
الدكتور وياه ممرضات 2
الدكتور :اهدئي بابا
افراح :راح اموت من الالم ومااكدر اكله ضليت املخ بهدومي
الدكتور :بابا انتي شنو اسمج
افراح :......
الدكتور :بس لافقدت الذاكره بس وضعها مستقر هذا الالم طبيعي الم العمليه لان راح المهدئ والبنج
افراح :رجع الدكتور يأشرلي على اصابعه ويكلي هذني شكد
اني اريد اجاوبه اكوله اني طبيعيه مافاقده الذاكره واجاوبه على اسئلته بس خرسه اشون اجاوبه
الدكتور :راح اخبر العسكري يتصل على اهلها
مرحبا يا ابني ممكن تتصل على احد اقربائها
العسكري :دكتور مااعرف اقربائها بس هسه اتصل على الرائد حمزه هو يصرف
الدكتور :تمام انتضره

حمزه :غفيت من التعب شويه واجت خالتي ادك بالباب
ام علي:يمه حمزه هذا عسكري من المستشفى يريدك
حمزه :طفرت كلت اكيد صار عليها شي لو ماتت لو اجو عليها عمامها
كلتلها اي خاله راح ابدل وانزل
بدلت ونزلت رحت للمستشفى لكيت العسكري كتله ها خير شنو صاير
العسكري:سيدي البنيه كعدت وضلت تشكك بهدومها من الالم والدكتور يسئلها
ومجاوب يكول احتمال فقدت الذاكره وهسه الدكتور ينتضرك
حمزه:رحت لدكتور حجالي وضعها وكال متنطق احتمال صار عدها ردة فعل غير مباشره
كتله لا دكتور هي من الصغر فاقده النطق الدكتور :الحمد الله ماكو شي خطر وهذا الالم طبيعي من العمليه
بس اني كشفت على كل حواسها
ولكيت حبالها الصوتيه سليمه
يعني مو عاهه ولاديه
حمزه :يعني شنو دكتور هي بامكانها النطق
الدكتور :لو معالجيها من الصغر جان مضلت خرسه هالشكل
حمزه :الحمد الله على كل حال
طلعت من يم الدكتور رحت لغرفتها لكيتها نايمه حالتها صعبه فاتحيلها شعرها اشقر واكع على المخده كولش حلو
استغفرت الله وطلعت
رحت للمركز اسئل على عمها واطلع امها وارجع
سئلت العسكري كال عمها وعائلته صار يومين شايلين لغير محافظه
واخت البنيه جانت عدهم دازيها لبيت جيرانهم يم خواتها
منو جيرانهم
العسكري :سيدي يصيحولهم بيت ابو محمد مره هي زوجها كبار بالعمر وابنهم شهيد بحرب ايران
حمزه :ماشي راح اطلع امهم حتى تروح لبناتها واجيت اخبرها على وضع بتها
رحت ل ام اكرم خبرتها على البنات وعلى بيت عمهم وعلى حالة افراح
ام اكرم:اصخام وجهي كل هذا صاير بيكم يمه
ياربي دخيلك خلصنه من هاي المصيبه 😭
حمزه :طلعت ام اكرم واني رحت ل ابو اكرم كتله بالوضع
بعدين رجعت للبيت
افراح :ضليت 3 ايام بالمستشفى
يو الثالث اجت امي الي وباتت يمي
وضلت تبجي على حالي
بعدين سوتلي خروج وطلعت من المستشفى
رحت لبيتنه وكعدت
وامي راحت جابت البنات من بيت ام محمد
اجن البنات يبوسن بيه ويتحمدلي بالسلامه واني ارتاحيت شويه
بس اذكرت ابويه وبجيت
ام اكرم :الله كريم يمه ان شاء الله ربي يفك اسره ويخلصنه من هالمصيبه
افراح :طبعا حسنين بس هالشهر ويخلص عسكريه
وحسين نجح مرحله ثالثه
بس بسبب الضروف يبقى هناك مأجرين شقه هو واصدقائه ومايرجع من يخلص الدوام يشتغل
كعدنه سوينه غدى وتغدينه
واكرم مندري بي وين
اكرام :يمه تره بيت عمي مشالو لغير محافظه بيت عمي شردو تهريب ل إيران واكرم وياهم بس مو تكولون
ام اكرم :اسكتي ولج الحياطين الها اذان
اصخام لو تدري الحكومه كلنه يعدمونه
افراح :خفت من كلام اميبس بنفس الوقت فرحت لان اكرم خلص من الاعدام والسجن
بس بقى ابويه اشلون نطلعه
ام اكرام :يله بنات البيت وصخ نظفن البيت
وانه رايحه اسوك
افراح بدينه اني واكرام وزينب انظف البيت ونغسل كملنه
وكعدنه على التلفزيون
واني بالي كله يم ابويه ياترى شصار بي
ندك الباب عبالي امي رحت فتحت الباب طلعو
زلم مسلحين كالو المجرم الي قتل ابنه وينه
احنه متنه من الخوف ضلينه وحده حاضنه الثانيه
شويه واجت امي هي وام محمد وابو محمد يركضون
ام اكرم :خير خاله شتردون تتهجمون على بيوت العالم
ابو محمد :عيب على الزلم تكشف ستر النسوان وانتم تشوفونهن بس بنات وماعدهم زلمه روحو عمي روحو حجيكم يصير وي الزلم مو وي النسوان اذا تعرفون الاصول
افراح :من حجه ابو محمد هالكلام دنكو وراحو وكالو خبرو عمامكم مكاومين انتم وبعد 7 ايام تحضرون عمامكم كعدة عشاير وفصل ابنه الي قتله ابنكم
ابو محمد :ان شاء الله يصير خير
افراح :راحو وامي تشكرت من ابو محمد وعزمتهم على العشا هو وام محمد
ام اكرم :يا ابو محمد مقصرتو انت وام محمد رايتكم بيضه سترتو على بناتي وااحنه بالسجن وهسه فكيتونه من سالفه بس الله يدري بيها
رحم الله والديكم
ابو محمد :شنو السالفه ام اكرم انتي بنيتي وهذني البنيات بمقام حفيداتي وابو اكرم الله يفك اسره مكان مقصر ويانه ونعم الجار
ام اكرم :والنعم منكم
في جانب اخر
حمزه :رجعت للبيت رحت يم امي لان خالتي رايحه ضليت اسولف وياها
وبعدين انطيتها علاجها ونامت
واني رحت بدلت ونمت
كعدت الصبح بدلت ورحت للمركز
العسكري:سيدي اكرم وبيت عمه وصلتنه اخباريه عنهم طالعين تهريب ل ايران
حمزه :شنووو شجاي تحجي
خابرت على القياده وخبرتهم بالوضع
كالو ع اساس راح يحكمون عليهم غيابيا
اكرم ب 3 تهم :وهي القتل وحرق السيطره والانتماء الى زعماء الانتفاضه واللجوء الى بلد عدو وهو ايران
اما عائلة عمهم ينحكم عليهم بتهمة اللجوء الى بلد عدو
لهذا دزينه بلاغ لعائلتهم للحضور امام المحكمه

الكاتبه:تولا العسكري