الغزالة في عرين الاسد الفصل السابع عشر 17 - بقلم فيّد عبدالله

مساااء الورد 🌸🌸🌸 يا ورد اشكركم من القلب على تفاعلكم الجميل وهسة اترككم ببارت حلو مثلكم،،متابعة طيبة

البارت السابع عشر
فيد عبدالله

ريم،،كعدت ابجي بالغرفة خايفة من الجاي كللش، ،شوية وطب حمزة كعد يمي عالجرباية بقة ساكتة واني مدنكة واشهك

حمزة،،ليش تبجين ريمتي

ريم،،سمعت كلشي يردون يزوجوهة الك يذبوهة براسك ورابطين زواجك وية زواج ابراهيم

حمزة،،وعبالج انة انلوي وانكض هيج، ،وسفة ما عرفتي حمزة عدل

ريم،،باوعتلة، ،يعني شنوو شراح تسوي

حمزة،،الج الصافي يا رويحة حمزة

ريم،،متتزوجهة موو

حمزة،،من كل عگلج تحجين زواجيش عگبج تحلالي مرة كومي غسلي وجهج ومعليج بالحجي كلة،، الج الصافي

ريم،، جيتت وحضنتة بفرحة اروحلة فدوة، ،ماطلع بعد من الغرفة سبح ونام بتعب حتى ما تعشى اباوعلة وادعي الله يحفظة الي ،،ثاني يوم طلع للشغل ولا كأنه صاير شي وعمتي تحوس وابراهيم راح ضايج بس رجع جان بااردة اعصابة وما مهتمين ثنينهن يوم يومين الموضوع مسدود ومحد فاتحة وعمتي تلوووب اخر شي اخذتهم لغرفتهة وطبت شوية وطلع حمزة يهز بايدة وفات للغرفة مال جديتي رحت كعدت يمة اني هم احوس

الجدة صالحة،،شعدهة امك صارلهة چم يوم جنهة بزون محترك ذيلة

حمزة،،عوفيهم جدة مو كتلج اسوي الموضوع على نار هااادية

ريم،،اسبوع واجتي ام ثريا وضلت كاعدة تنتظر جية حمزة صدك ما شايفة هيج صلافة لعد اني رجل كرسي كدامج جاية وجايبة لرجلي مرة ناس متستحي، ،رجع حمزة من الشغل سلم عليهة عااادي جانت كاعدة بغرفة جديتي اتوجه حمزة للباب

ام ثريا،،خالة حمزة عندي وياك شغيلة

حمزة،،اذا اكدرلهة مكضية ان شاء الله

ام ثريا،، نروح بغرفة امك

حمزة،،ماكو غريب خالة مرتي وجديتي واختج وهاي سدينة الباب هم حتى ميطلع الصوت اتفضلي

ريم،،اباوعلهة ظلت تبلعم فشلت

حمزة،،احجي خالة اسمعج

ام ثريا،،عالموضوع الصار يمة لمة من يمك وانت العاگل هذا ابوهن اتسودن وسودنهن وشبعهة كتل ارحم بحالهة واخذهة استر عليهة ما تريد كلشي بس عقد وهاي هية بلا هوسة بلا شي لخاطري خالة

ريم،،اباوعلهة بودي اكوم اثرد بدمهة هيج مستحة مشيولة ما شفت

حمزة،،شوفي خالة خاطرج عزيز بس بنتج لو تبقى اخر مرة بالعالم مااخذهة مرة التنزل روحهة وتجي تعرض روحهة على زلمة هاي ما تصلحلي حرمة وغلطهة هي تتحملة عسى ما يموتهة ابوهة،، وهو يتحمل سوء تربيتة الهة

ريم،،يمة مي بارد وصبة على كلبي وروحي وهي كامت تنطي الوان

ام ثريا،،واختهة شذنبهة ينهجم بيتهة

حمزة،لا اختهة هم رعنة مثلهةما عرفت تكللهة غلط، ،لازمتلهة الباب وتطببهة علية جان استحن ماكو ذرة مستحة عند بناتج ولوما اخاف الله حتى ثريا اخليهة عندج

ام ثريا،،اسم الله يمة مو البنية حامل شذنبهة ينخرب بيتهة

ام حمزة،،صدك والله رمزية تحجين ثريا حامل

ام ثريا،،والله ومحمد

حمزة،،اي رجعوهة لبيتهة احد طاردهة رجلج ركب راسة واخذهة لو منة اطم روحي مو اكعد اتشرط

ام ثريا،،على كيفك يمة الحجي اخذ وعطة مو هيج

حمزة،،تعرفيني خالتي السوالف العوج ما اخذ وانطي بيهة من رخصتكم وها صدك وصلي لرجلج حجايتي بنتة خليهة عندة هو حر بيهة اما ابنة لو بتنة بس تولد ناخذة واحنة نربي

ريم،،طلع حمزة واني بداخلي راحة عجيبة حجايتة اجت بالعظم ،هذا حمزة من يومة يخلي الواحد وحدة يتحمل نتيجة اغلاطة ما مستعد يتحمل وياه ذرة، ،باوعت لام ثريا تخوزر بية ابتسمت بوجهة وكمت وهي ما طولت دقايق ولبست عباتهة وطلعت وعمتي تركض وراهة عيب وضلي وكت غدة ماكو المرة ما انشوف الا غبارهة وراهة،،،ابراهيم طار فرح من عرف ثريا حامل بس هم لا نزل روحة ولا راح جابهة السالفة عمتي تعيد وتصقل بيهة كل كعدة يمة ولخاطر اخوك وعايلتة اتزوجهة وما عليك بيهة وحمزة اصلا صار ما يجاوبهة يخلي ويكوم وجديتي اخر شي عاطت بيهة كالتلهة بس تفتحين هالسالفة اكول لحسين واخلي يوديج يم اختج واشبعي بيهة وببنتهة عمي طبعا ميعرف بالصار لان هو هم ما جان راضي على كعدة هدى يمنة وراح اكيد يرد ويلوم عمتي وتفتح عليهة باب انتقام من عمي، ،بس بكل هذا اني الطاح علية انتقام من عمتي عبالك اني الكلت لبنت اختهة تغلط واني الحجيت بمكان حمزة صارت واكفتلي عالزلة وكلة تتحجج باسد هاا متداريه عدل ها ذابتة وخاتلة بغرفتج هاا بردان ها متبلل ها راح تمرضيه ها راح تموتيه متت حتى حمزة من يجي تظل تسولفلة عود اهمالي واخر شي اتعارك وياية لان اجة لكة اسد متبلل واني جنت انضف بالغرفة كلب الدنيا على راسي راح تمرضيه صدك هاملتة طلعتي متت بجي بيومهة اول مرة يعلي صوتة علية كدام احد ضليت يومين حتى ما اكل وزعلت عليه من صدك لان قهرني وصدك اني هاملة ابني هذا ابني يا ناس اكو احد احن مني عليه،، واجة حمزة بيومهة بالليل سويتلة عشة لان اجة متأخر من برة

حمزة،،تعاي اكلي وياي

ريم،،ما اشتهي،،واني جنت الي يومين ماكل لو فاكهة لو ما اشتهي نفسي انسدت هاي بس اضوج تقفل معدتي

حمزة،،تعاي شيليه

ريم،،ولا حجيت كمت شلت الاكل على حطتة ووديتة بالمطبخ رجعتة للثلاجة وغسلت المواعين ورجعت للغرفة لكيتة يلعب وي اسد وهذا اللوتي مكيف ويكمز فوكاه طبيت سبحت ولبست تراك من الجابهن من الاردن لونة بصلي فااتح فتحت شعري مشطتة وعفتة مفتوح على طولة رشيت عطر ورحت تمددت وتغطيت

حمزة،،تعاي انطيني الريمونت

ريم،،كمت انطيتة الة ورجعت للجرباية شوية وصاح

حمزة،،هذا اسد كلب المي تعاي نشفيه

ريم،،كمت بلا كلام نشفتة ورجعت شوية وكام يغفي اسد

حمزة،،هذا نعس

ريم،،اخذتة خليتة بحضني وما نطقت حرف وابوس بي ورجعت بدلتلة وخليتة يرضع على صدري واباوعلة صافن علية بمراية الكنتور درت وجهي ما مهتمة وكوة اتحمل امثل دور اللا مبالاة مو بيدي انقهر كلش من نزعل غفة اسد كمت حطيتة بفراشة ورحت مددت بديت اغفي وهو طفة التلفزيون والضوة واجة نام بصفي ما اتحركت من مكاني بقيت دايرة ظهري واغفي شوية وجان يحضني من ضهري بقيت ساكتة همس باذني

حمزة،،احبچ

ريم،،كلب دك بسرعة رجع عاد الكلمة

حمزة،،احبچ

ريم،،غوركت عيوني التفتت وباوعت عيني بعينة،،ليش تقهرني

حمزة،،اعذريني فرغت عصبيتي بيج

ريم،،والله مداريتة هذا ابني الگوة صار تريد اهملة

حمزة،،ادري مداريتة متشوفيه هالصاير زلمة

ريم،،ابتسمت وعيوني كلهة دموع

حمزة،،اروحن فدوة لهالضحكة ابوي انتي لا تزعلين ومحمد اشب نار من ااذيج

ريم،،من هاي صاررك يومين مزعلني وحتى اكل ما اكل من وراك

حمزة،،يابوية اصيرلج اكل كومي نسوي عشا انة وياج ونتعشى انة هم جعت

ريم،،ههه هسة تالي الليل

حمزة،،اي هسة شو يلا

ريم،،لبست دشداشة طويلة وشال وطلعنة سوينة عشا سوة وكعدنة بالمطبخ عالميز اكلنة ونسولف وهو كل شوية صافن بعيوني طلعت عمتي من غرفتهة للحمام باوعتلنة مستغربة جانت مكيفة بزعلنة يومين واني الثولة هم رأسا ابينهة واتكدر واگطع الاكل فيعرفونة متزاعلين شافتنة هيج وهي انرعصت اجتي تنزل برداناتهة ووكفت بباب المطبخ

ام حمزة،،اي حاط مرتك على گلبك وذاك اخوك من وراك مشلوع گلبة على مريتة وبعيدة عنة وهي حامل وانت مرتاح شعليك

حمزة،،ليش انة الكلت لبنت اختج تجيني للمضيف شو هي الكسرت روحهة وكسرت اختهة،،واخوي كتلة انة ارجعهة الك كال عوفهة تعرف غلطهة وتتأدب هو ما يريد يردهة هسة وهذا عين العگل، ،، يمة قسما بالله اذا انفتح هالموضوع بعد عايفلج البيت وطالع

ام حمزة،،اي يا حمزة جنت كبل من تحجي تكول مااطلع من هالبيت هسة كل حجاية والثانية وعايفلكم البيت وطالع فريتي عگلة يا حية

حمزة،،ششايفتني زعطوط خرگة بيد النسوان وامشي بشوور مرة هاي ثاني مرة تعيديهة يمة وقسما برب السموات والله ومحمد وهو علي انكلب عليكم واحرك البيت حرگ بالبيه كاافي يمة يومية واكف واحاسب بيج والله عيب وزحمة. انة استصعبهة بس غير انتي تكفين

ام حمزة،،اي عفية بعد علي صوتك على امك

ابو حمزة،،خير خير شبيكم صوتكم طالع

حمزة،،ماكو يابة مااكو

ريم،،دخل عمي وصاح عمتي راحت وراه واني لملمت العشا الصار سمم وكمنا لغرفتة خطية حمزة مانام للصبح يتگلب اخر شي اذن الفجر كام صلى وطب سبح وكال حضريلي جنطتي طالع لبغداد وانتي حضري غراضج وروحي لبيت عمي من ارد امرلج كيفت لان مالي خلگ اكابل المغثة راح بس طلع الصبح واني ادعيلة يوصل بسلامة لان طلع ضايج كعدت جديتي وكتلهة راح اروح لاهلي

الجدة صالحة،،روحي اليوم الخلقة مگلوبة روحي يا جدة

ريم،،رحت لاهلي وجانوا مهوسين عمال يبنون بالفوك لان يكبرون بالبيت ويرمموه لعرس كاظم وحسنين الغرف متكفي بس اهون وهم خطية حسناء حامل رحت اعاونهم واخلص من عمتي الله واعلم شيصير يومين ورد حمزة ورجعنة للبيت اهوون الوجوه وسكووت تام للعصر نمت وكعدت عمتي فرحة تفتش بكنتورهة،سالتهة شبيج عمة تتصفنين

فرحة،،الگلبچة مالتي الذهب ماكو بالصندوك بس المحابس الباون موجودات

ريم،،عمة خاف ضامتة بغير مكان مو وي الذهب

فرحة،، لا لا متأكدة هنا كلهن اصلا من عرسكم ما لابستة

ريم،،كعدت ادور وياهة ماكو كلبنة الكنتور وكنتور جديتي وماكو

الجدة صالحة،،صار شكد من فاگدة ذهباتج

فرحة،،صار هواي يمة ما فاگدتهن يمة

الجدة صالحة،،وي ثوول

فرحة،،يمة دعوفيني بحاالي فوكاهة

ريم،،خطية عمتي كعدت تبجي حضنتهة اسكت بيهة وبهالاثناء طبت ثريا للغرفة وابراهيم وياهة جايبهة فرحت والله بجيتهة همزين انحلللت لو ما عيب اهلهل.اجت سلمت عالكل واتعدتني ومشت وما انحس الا صوت ابراهيم

ابراهيم،،ثرياااااا سلمي على ام اسد،،،،يتبع