الغزالة في عرين الاسد الفصل الخامس عشر 15 - بقلم فيّد عبدالله

صباح الورد يا ورد،،واحلى بارت مفاجئ لعيونكم اعذروني جانت عندي ضروف فالبارت عنوني جان حبيت اعوضكم وتتدللون،،متابعة طيبة

البارت الرابع عشر
فيد عبدالله

ريم،،كعدت على وجع ذابحني ذبح اول ما بديت اصحصح باوعت لامي اللازمة ايدي بكل حنان، ،همست وين ابني يمة

ام ريم،،زين يمة بس خلوه بالخدج عبن طلع كبل وكتة

ريم،،يمة اريد اشوفة

ام ريم،انتضري يبعد امج ارتاحي وتشوفيه

ريم،،ما اريد هسة ارووح

الدكتورة،،ها ريمة كعدتي الحمدلله عالسلامة ليش هالبجي وتدمرين تالعيون الحلوات

ريم،،دكتورة اريد اشوف ابني حبابة

الدكتورة،،شوية انتضري ترتاحين وتكومين تشوفيه كافي بجي مينزل الحليب ترة ترضين يبقة جوعان

ريم،،قنعتني الدكتورة وسكتت كلة علمودة لايجوع حبيبي اوووف غير يجيبوه دومهة فرحتي ناقصة تجي،، ساعتين انام واكعد كعدت لكيت عمتي فرحة يمي جاية مكابلتني وفرك برجلي بخفة ايدهة وعيونهة تصب جانت الغرفة عالخاص حاجزيهة فبقت يمي بوستني وتصبر بية وتكلي صيري سباعية اجاوب وارجع اغفي واخر شي البنج من فكني كلش صار وجع العملية يمووووت اتملخت من الوجع صرت اضرب بايدي بالحايط البصفي وحسناء ركضت للدكتورة اجتي الممرضة ضربتني ابر مسكن هدء الوجع شوية كمت مشيت وبدلتلي امي استحي من البقية ورجعت امشي وحسناء لازمة ايدي بس كلبي يركض ردت اروح للخدج اشوف ابني كالت بعيدة لازم تلبسين عباتج يلا همستلهة ميخالف جيبيهة حبابة وصيحي علي ويانة لبستني حجاب وعباية وطلعت اتلكاني علي لزم ايدي بقوة سندهة وباسني من راسي

علي،،الحمدلله عالسلامة ام اسد

ريم،،شفتة زين

علي،،سبع على امة الذيبة

ريم،،لو ذيبة ما هذا حالي

علي،،لا انتي رباتي اعرفج عملتي باصلج ورباتج موكت هالحجي تعاي نشوف الاسد الزغيرون

ريم،،مشاني علي وصلنة للخدج ودخلت شفتة ياعيوني زغيررر كلش ناعم وحاطيلة اجهزة واوكسجين متت شبعت بجي وين وين هالعذاب يا امي يا روحي انت

حسناء،كافي ريم والله ميصلح هالبجي شبي جنة ورد بس اجة كبل وكتة شكم يوم ويطلع

ريم،،راح يطلع موو

حسناء، ،اي بس ادعي واله ميرد دعاج

ريم،،يااارب وانتة اعلم واحكم،طلعت وشمرت روحي بحضن علي ابجي

علي،،كافي يا بعد اخيج والله فترة وتعدي

ريم،،علي عليك الله ادعيلي والة لخاطري

علي،،كافي ولج فطرتي كلبي ومحمد شجاج زين ان شاء الله بس توكلي علي الله

ريم،،اخذني علي وبودي ابقى بعد مااعوفة اصلا صدك يصير قطعة من كلبج رجعنة للغرفة وعلي حاضني من جتفي واني خاتلة بحضنة استمد القوة منة قبل لا نوصل للغرف وسمعت صووتة يسلم على عمي، ،همست لعلي وصلني للغرفة مشينة خطوتين وصار كدامنة وسلم وانفاسة مضطربةبخوفة وقلق

حمزة،،السلام عليكم

علي،،وعليكم السلام،،واشرت لحسناء،تعاي اخذيهة ترتاح

حمزة،،شونج ريم الحمدلله عالسلامة ،

ريم،،باوعتلة بقهرر شطت للسما من شفتة رغم الندم البعيونة بس من اتذكرت ابني وحجمة والاجهزة تارستة حقدت عليه كللش،،،روح شوف ابنك وتعرف شلوني،،عفتة ومشيت وية حسناء

حمزة،،اول مرة ترد علية ريم هيج ،،صح البي هية هواي بس ما متعود على هاي ريم اريد ريمتي اني ،،معقولة ضيعتهة بساعة غضب،،رحت شفت اسد وساعتهة يلا عذرتهة اتملخت عليه حقدت عالعالم كلة كرهت حتى روحي وانانيتي بسببي كلشي صار لو باقي ما رايح خرررب بغيرتك حمززة رجعت للبيت اعصابي تفورر طبيت جديتي تلكتني

الجدة صالحة،،يمعزة وين رايح وعايف النار مشتعلة ماتعرف امك شني هالطاح بيهة وليدك وهالمكرودة ،،اروح ليلتين الكة امك حاركة البيت والله لو صار بالفرخ شي احرك امك هالمرة شلون ما نشوف بزرتك من ورة فعايلهة

حمزة،،جدة برووح جدي عوفيني ما ناقص كليلي وين امي هسة

الجدة صالحة،،ولت لبيت اخوهة ابوك رد وطردهة

حمزة،،استغفرك ربي

الجدة صالحة،،روح تكابل مريتك وتكعد ما اشوفك الا وراد وعايلتك كلهة بيدك ما مرجية منك ابد يا شيخ يا جبير العايلة يا بو عگل الراكز

حمزة،،حجي جديتي حمسني حمس حسسني بغلطتي الجبيرة ما جان لازم اطلع والنار مشتعلة مو انة الاعرف امي بس والله راح من بالي مند بالبيت وكل هاي مو اعذار انة غلطت وهاي غلطة الشاطر البألف،،طلعت للمطبخ ولاكتني ختام مرت صادق

ختام،،ها بشر خوية شلونهم

حمزة،،ان شاء الله بخير

ختام،،والله العظيم كلت لعمتي عوفيهة لخاطر البطنهة ما رضت تسكت

حمزة،،ليش شسوت امي بس لا ضربتهة

ختام،،لالا ظلت قافلة الباب وما كدرت تطبلهة وانة من شفت الوضع يخوف وكلساع عمتي هادة على ريم وتغلط وتدفر بالباب رحت لبيت عمي حسن ركض وصحت امهة و،،،،،،،

حمزة،،صبرك يا ربي ختااام متأكدة من الحجي

ختام،،ومحمد وداعت جهالي

حمزة،،يصير خيرر،،طلعت محترگ اكو ام هيج تسوي بولدهة وشأكدر اسوي امي هااي يا عالم طلعت رديت للمستشفى صورت اسد وهو نايم والاجهزة تارستة ورجعت لبيت خالي طبيت وانتظر امي اي امي وشكد عيب يوكف الابن يحاسب امة اجتي شادة راسهة وتبجي

ام حمزة،،يمة حمزة شفت ابوك شسوة بية تالي العمر

حمزة،،ابوي يمة لو انتي ،،ليش يمة تكتلين فرحتي متعمدة انة ابنج لو لا هاج شوفي ابني شصاير بحالة شوفتهة الصور وكامت تبجي

ام حمزة،،سوودة علية اعذرني يمة اتعصبت منهة ومنك جيف ما رديتهة وانة امك بهذا عمري تهين شيباتي

حمزة،،يمة رحمة لدينج انتي الجبيرة والعاگلة هيج تسوين بينة والقران تطخ براسي اعوفلج البيت واهج

ام حمزة،،لا يمة كل ولا هالسالفة لو اظل طول عمري هنا ولا تعوف البيت انت جبير البيت عگب ابوك وحزام ظهرة هاي هية يمة

حمزة،،باست راسي امي وتتعذرر وحتى الاعتذار صعب جان مو حلوة الام تتعذر من ابنهة ابد،،بست راسهة، ،يمة هالله هالله بالبنات تراهن منة وبينة ومااشوفهن يقصرون ومحمد

ام حمزة،،شعلي بيهن يمة انة هنا كاعدة بعد

حمزة،،لا تردين لبيتج بس يمة بروح موتاج اخر مشكلة هاي ترة انزرف كلبي

ام حمزة،،الله لا يجيب مشاكل،،الله يهنيك بوليدك يمة ويطلعة بسلامة وحك هو علي ما عبالي تجيبة سبيعي من وراي

حمزة،،بعد ما يفيد الحجي صار وما. النة غير ندعي

ريم،،الليل كلة الوب من الوجع والقهررر ما نمت للصبح اجتي الدكتورة شافتني

الدكتورة،،لا عمليتج تمام تكدرين تطلعين

ريم،،وابني دكتورة

الدكتورة،،لاماما يظل هنا علمودة الرئات ما كاملات بعدهن ولازم اوكسجين وابر وعلاج احسنلة هنا

ريم،،لعد مااطلع اظل يمة

الدكتورة،،شلون حجي هذا ما يصير عمليتج بعدهة هستوهة وتحتاجين راحة وتغذية حتى من يطلع يلكةماما تنتظرة بالحليب وصحتهة تمام

ريم،،يعني يطلع موو

الدكتورة،،ان شاء الله ليش هالاستسلام الله جبير وفوكانة وكل ارواحنة بيدة اريدج بطلة ريم انتي مينخاف عليج مووو

ريم،،هزيت راسي، ،ياالله شكد جانت مريحة هاي الدكتورة وعمري ماانساهة وكلما اتذكرهة ادعيلهة لحد هسة،،،طلعت ورجعنة حمزة. طول الطريق عينة علية بس ابد ما جنت صافية ناحيتة نزلنة وركض نزل فتح الباب وسندني نزلني دخلني للغرفة وية امي مددت ونزلت دموعي عالمخدة شلون عفت ابني وطلعت ولو المفروض هو اليطلع وياي ميظل هناك وحدة كعد حمزة كبالي ولزم ايدي بحنية

حمزة،،كافي دموع والله شليتي حالي شبيج يا عيوني انتي والله يطلع وبخير ويكبر كدامنة ويلعب بس ادعي

ريم،،يا رب

حمزة،،انة راجع للمستشفى تردين شي

ريم،،هزيت راسي بنفي وغمضت عيوني بتعب،،باسني من راسي وايدي وطلع ،،،عدت على طلعتي اسبوعين ذبيت الخيوط وعمليتي بدت تطيب واتحسن، واسد ما طالع من المستشفى اروح ارضعة وارجع كم مرة وبايام المااروح اشبع بجي من ينترس صدري حليب وما اكدر ارضعة الة لو اكعد افرغ بي، ،،بس حمزة ما يفاركة على كد يرجع يبدل وياكل ويمر علينة يتطمن علية و يشوفة الي بالصور واشبع بجي من اشتياقي الة ويرجع للمستشفى اتمنى اروح اكابلة واكعد بس حمزة ما يقبل جان يكلي تتعبين بعدج مومال وكفة وتعب وانة هناك،،، نوعا ما بديت ابرد من ناحيتة وغضبي يخف باهتمامة وحنانة الي حتى من يجي يكعد يلفلف بية يكلي مو زين عليج البرد لا تتمرضين،،، وحسيت انتهى هالغضب من اجة وبشرني وكال اسد باجر يطلعوه اتحسن وصدك ثاني يوم من الصبح كعدت اتريكت بشهية واكلت تمر اريد ابني يجي يشبع من حليبي بدلت وحسناء حطتلي مكياج خفيف وكعدت انتظرهم اجتي جديتي وعمتي فرحة وامي وحسناء ركبن غدة كالن على سلامتكم والطلي محضرة حمزة بالباب. اجواء فرحة عدة وكت واندكت الباب ركض عادل فتحهة وجان تطب عمتي ام حمزة شايلة اسد بحضنهة وتهلهل من باب الحوش للمطبخ الصراحة انصدمت بطبتهة وجيتهة كلبي جان شايل ومحمل منهة بس اول ما طبت حطت ابني بحضني وبوستني وطلعت سوارات ثنين ولبستني وردت باوست امي واتعذرتهة وحتى باوست حسناء واني اباوع مستغربة وجديتي تهز براسهة برضى وحمزة عيونة تلمع فرحة معقوولة هاي عمتي بس فرحتي بابني نستني كلشي هذا دنيتي بعد المن اهتم طزز بالكل،،، مااحس الا حمزة بضهري واكف وعطرة ترس ريتي حتى كلبي ركض اثاري حبك يا حمزة ماخذ نص كلبي عبالي كلة صفة لاسد بس لا بدونك امووت اني اباوع واكول شنو هالسعادة ابني بحضني ورجلي بصفي وادعي ربي يديمهة علية، ،،اتقرب علية كلش و همسلي باذني بصوتة اليرجف من يكول هالكلمة(احبچ)،،،،،،،،يتبع