الغزالة في عرين الاسد الفصل الثلاثون 30 - بقلم فيّد عبدالله

مسااا الووورد حبايبي شلوونكم اخبااركم مشتاقيلكم،من هنا بلشت احداااث ناررر ،اتمنالكم متابعة طيبة

البارت السادس والعشرون
فيد عبدالله

ريم،لا اراديا باوعتلة من حجة عيوني مغرغرة دموع من الفشلة دنكت بسرعةورديت الحمدلله وطلعت للمطبخ واسد كام يبجي يريد ابوه هالحجي وهو بالصالة يسلم على امي نزلت اسد راح يتدعبل كوة على ابوه اني اباوعلة شون شالة ويبوس بي ويشتم برگبتة مغمض عيونة ويشتمة بعمق بعدت نضري بسرعة وطلعت للطرمة واسمع امي كالتلة خلي اسد يمك مشتاقلك ولو تعبك ردة جانت تحجي ببرود ولحكتني طلعنة من بيت عمي وبس وصلت للبيت طبيت للغرفة وقفلت الباب ودموعي تنزل تحررك مدري شصار بية ما اعرف شنو التحرك داخلي من مشاعر مزيج الم واشتياق وحب من الطفولة وراح وحقد عليه ووجع منة كعدت ابجي ما اعرف عليمن،، تعبت اخر شي وبدلت وغسلت ونمت صايرة اشرد من اي شي يضوجني بنوم المغرب اسمع هوسة اسد وعياطة صاير حرك كلش كمت غسلت واخذتة ابوس بي جان متروس عطر من ابووه ما اعرف ليش كرهت حتى اشم عطرة اخذتة كبل سبحتة وامي تصيح مغرب ميصلح ما اهتميت ما اريد اي شي يذكرني بي سبحتة وبدلتلة وخليتلة من عطري، ،،،بعد هالموقف لملمت كالعادة جروحي وحدي وقويت روحي اكمل بدونة يعني انهياري هذا شيغير مثلا بس جاي اتعب روحي، ،مرت الايام بهدوء وبدينة نحضر لزواج كاظم الي خطب وحدة من بنات عمي اسماعيل جانت بكدي تقريبا جنت فرحانة بخواني وطايرة بالعقد لبست فستان مال محجبات ناازك جابة حسنين الي من بغداد لونة بيجي وشال وحذاء كعب شوية لان طويل الفستان وجنطة مارونيات وخليت مكياج خفيف وحفافة جديدة وذهب ونسقت لاسد قاط القميص بيجي وزين شعرة حبيبي ينكررط، ،،،ما اعرف بهالش السويتة جنت اريد اكسر شنو يمكن نضرة الداير مدايري الي بشفقة اريد اوصللهم ما انكسرت اني ولا اتأثرت ولا لازم ادفن روحي لو اضم روحي لاعيب ولا حرام الصار واريد اقوي ثقتي بنفسي شافتني امي وما رضت بوكتهة

ام ريم،،شني يمة انتي العروس هسة شيكولون تدور رجل

ريم،،شني هالحجي يمة هاي انتي امي هيج تكولين شخليتي للباقين،دمعت عيوني كوة لزمتهن ما ابجي واخرب مكياجي

ام ريم،،اي طالعة تتلامعين بدلي الثوب وذبي الذهب

ريم،،يمة ما ابدلة شبي مستور ويخبل ما ادفن روحي مو شي عيب اني واهفي على وجهي واحس بلعومي بي غصة خانكتني عبرتي ضجت كلش

ام ريم،،ما تطلعين بهذا الثوب اعرف شراح يحجن عماتج ونسوان عمامج

علي،،وطززز باليحجي

ريم،،طب علي على صوت امي

علي،،شمسوية هية مهر اخوهة ومن حگهة تفرح شني يمة حتى انتي تردين تدفنيهة

ام ريم،،هاي ابدال ما تعگلهة تخليهة تتفرعن محد شيشهة غيرك انتة وحسيني

علي،،خليهة تتدلل بجال خوانهة شبيج حجية اليوم مهر ابنج اضحكي وافرحي يلا جاهزين موو

ريم،،اييي مكملة ابتسمت بوجهة

علي،،اروحن فدوات لهالضحكة انة يلا امشي لا تگلب علينة الحجية

ريم،،ضحكت من كل كلبي وركض لبست عباتي والنقاب وشلت اسد

حسنين،،شني هاي حاطة مكياج ومطلعة عيونج

ريم،،مو لابسة نقاب بعد شكووو

حسنين،،اصلا طالعة بعد احلى بالنقاب عيونج يخلسن من الحلاة

ريم،،هههه

حسنين،ايي هههه اخذيني بذني نزلي البوشي يلا بساع

ريم،،ما اشوف والله خاف اوكع اني واسد

حسنين،،جيبي اسد وحيري بروحج بساع

ريم،،اووف من عنادك

كاظم،شسالفة يلا فضوهة اتاخرنة

حسنين،،شوف هذا مستعجل على شلاع الگلب

كاظم،،الك يوم واضحك عليك

ريم،،طلعنة وكوة اميز امشي وصلت بسلام وطبينة جوة سلمت عالكل واني بعباتي وانوب نزعت العباية بغرفة البنات ووكفت عالمراية لان احس معت من الحرر انتبه كل البنات يباوعون مستغربات شكلي واجتي ختام بوستني ووراهة مرت حمزة ما اعرف ليش ضجت من شفتهة وكللش اختنكت

ختام،،وج شطالعة كيكة تجننين

ريم،،شاورتهة شبيهن ذني مثولات ويباوعن

ختام،،مستغربات الجمال وج من جنتي عروس مو هيج تشعيين

ريم،،هممم ليش رسمية خلتني احس بعرس صخام،،حلووة مو عليج الله

ختام،،تخبلين ومحمد البالي لو يشوفج ينجلط

ريم،،اشش ختام لا تضوجيني،

حنان،،شونج ام اسد

ريم،،باوعتلهة تباوعلي بقلق ابتسمت بوجهة عااادي اكاابر كدام الكل،،،كل الهلا حبيبتي شلونج

حنان،،زينة الحمدلله

ريم،،طلعت من الغرفة وعمتي بودهة تاكلني بعيونهة راسا لزمت حنان واخذتهة تسلم على نسوان كبار بنات عم ابوي يصيرن واسمعهة تعرف بيهن بصووت مسموع هاي مرت حمزة الجديدة واسمع وحدة كالت تخبل ماشاء الله وردت الخ هاي الهدية موو اباوع لحنان خطية غاصت بنص هدومهة وتفرك باديهة بتوتر والله ساعتهة انكسر كلبي عليهة شذنبهة هيج يكسرون بيهة اهلهة وتظل طول عمرهة تحس بنقص شوية وشفتهة راحت للمغسلة جوة الدرج تغسل وفاطمة حماتي لحكتهة عفتهم وكعدت يم جديتي بعد ما جنت واكفة اسولف وي حسناء ،،حمواتي عادي سلمن علية طبيعي من بعيد وهن للامانة ماعليهن من قبل ولا يتدخلن ولا يسون مشاكل يجن زوارت كل اسبوع ويرحن اجتي فاطمة وبوستني من دونهن

فلطمة،،اعذريني والله امي ما تقبل اجي واشوفج مشتاقتلج وتضلين بنت عمي وام اسد

ريم،،عادي فاطمة بطلت ازعل من اي احد من زمان احسهة انحرجت ماقصدي افشلهة او احرجهة بس هذا الصدك بطلت اعتب على اي بشر رجعت يم امهة واشوفهة تحجي وياهة ما اهتميت درت وجهي كعدت اسولف وي جديتي وهي يا عيوني طايرة بية وكل شوية وبايستني واني ما اهتميت لاحد اكو نظرات حلوة وتحسهة تتمنالك الخير واكو نظراتهن حقد ونفاق طزز بالكل ادفن روحي قاابل، ،وبلشت الحفلة واغاني ورگص جرتني ختام وحسناء شوية صفكت وياهم،، شوية وكعدت ما احب اركص واصلا ما اعرف استحي اسمع وحدة من خوات العروس الي عشتوا بنت عمي تكول(بس عوزهة تكول مروتكم اريد رجل شوفي شمسوية بروحهة)التفتت عليهة خزرتهة خليتهة تسكت بس ضجت من حجايتهة اهدء بروحي ميخالف ريم انتي ردتي تكسرين عينهم من سويتي هيج اتحملي يحجون وغصبا عنهم يسكتون انتي اختمن اتذكرري ،،،،، عقدلهم السيد وكالوا راح يطبون الولد يلبسوهة الذهب طب كاظم وخواني كلهم وعمي حسين وعمي اسماعيل وولدة ابتعدت ما احب اصير بالوجه وهنا زلم وخاصة ولد عمي اسماعيل ما ماخذة عليهم وبدة كاظم يلبسهة الذهب وكملوا وامي تعاون بيهم وبلشوا ياخذون صور

كاظم،،لعد وين رريمة تجي تكص و ويانة صور ريمة

ريم،،هاا ا اجيت اتقدمت عليهم واحس اكو نظرات تتوجهلي حتى عمي حسين صافن ارتبكت خاف صدك مبالغة بلبسي وترتيبي

ابو حمزة،،هلا بام اسد

ريم،،هلا بيك عمي وبست جتفة وسلمت على عمي اسماعيل ،،وسحبني علي جوة ايدة عبالك يكللهم هاي بنيتي وفنة اليحاجيهة شاورني

علي،،خوما غثج احد

ريم،،شحدة ليغثني واني ربات عليي

علي،،عفية ببنيتي السباعيةوباس راسي رحت اخذت صور وكاظم حاضني بايد ومرتة بايد واخذنة صوور ورجعت وكفت يم خواني وشاورني حسنين

حسنين،،شوفي شون الداير مدايرج راح يطگن هيج اريدج غاثة الكل ومحد يغثج

ريم،،هههه والله عليك سوالف بجالكم منو يغثني ابتسملي ورجع حوول لوجهة الجدي،، طلعوا الولد وشوية شوية بدت تخف الهوسة طبعا اسد الخبيث ما شفتة ابد لازك بابوه ودزيت عليه ناخذ صورة وما قبل يجيني، ،،قريب منريد انروح لملمت الهوسة شوية شكم ماعون كيك على قواطي فارغة وديتهن للمطبخ وطب ابن عمي اسماعيل اسامة ويصير اكبر مني بسنتين تقريب يدرس صيدلة وهو هذا تقريبا اعلى شهادة بالعشيرة هههه

اسامة،،شلونج ريم

ريم،،ارتبكت لسؤالة مو ذيج الميانة وياهم احنة خاصة اني باقي بنات العمام عااادي اني جنت معزولة وخواني محاوطيني فنة ليتقرب،،،جاوبت بارتباك الحمدلله

اسامة،،والله ما عرفتج الا من صاحوج خوانج صار سنين مشايفيج

ريم،،تبتسمت بتكلف، ،شسوي ظروف من رخصتك ردت اطلع من المطبخ اعرف السوالف الراح تنحجي وتنگال لو شافنة احد

اسامة،،سمعت رجعتي تدرسين، ،احسن شي سويتي محد يفيدج غير شهادتج ترة واتوقع جربتي

ريم،،باوعتلة مستغربة جرأتة ليش يحجي وياي بهالموضوع شيخصة فهم استغرابي وكال

اسامة،،اسف اذا اتدخلت بشي خاص بس صدكي افرح من اشوف بالمجتمع مرة قوية وخاصة لو بنت عمي عفية عليج سباعية واي شي تحتاجي انة حاضر اعتبريني مثل حسنين

ريم،،ارتاحيت لكلامة كلش ابتسامة لا ارادية انرسمت على وجهي حلو من تشوف انسان يفهمك ويشجعك ،،مشكوور متقصر ان شاء الله اخوية السادس وابتسمت بوجهة واشوف اسد طب للمطبخ يتدعبل باوعتلة وضحكت والمح حمزة واكف بالحوش ويباوع للمطبخ يباوع بعصبية خازرني بودة يذبحني اخذت اسد واترخصت من اسامة وطبيت للصالة ولاكتني ختام طابة للمطبخ، ،،شوية واجتي ختام بوستني،،ها راح ترحون

ختام،،اي والله هذا حمزة كام يغررد ،بس اعرف ليش موو بااااالله

ريم،،غمزت ختام بمكرر،،شكو

ختام،اامممم خليه ينشوي خية عفية عليج

ريم،،شسويت قابل شاورتني ختام

ختام،،شافج واكفة وي اسامة وتسودن

ريم،،واذا ابن عمي شصار

ختام،،لا خية ما صار يلا نحجي بعدين،،طلعوا ومن مشة الكل طلعت حنان اخر شي التفتلي وابتسمت باوعتلهة مستغربة شبيهة شخصيتهة تحيير، ،رجعنة وعادي تمر الايام بفرح ملتهين بتحضيرات عرس كاظم الي ما طول شهر واتزوج ما حضرت الحنة لان محد بقة بالبيت بقيت اني احضر لحنة الزلم بالليل وهن ما طولن لان اكو ناس باقية عالعشا وورانة هوسة الحنة كملت كلشي وطبيت سبحت اني واسد ولبستة دشداشة تخبل جابهة الة ابووه نيلية ومطرزة بذهبي ماخذة ومفصلهة الة تفصال والحذاء الصيفي برجليه منسق نيلي فدوة يخبل طلع بودي اكرطة بدلت اني هم بكلبية مغربية نازكة لونهة وردي والشغل نيلي ولبست شال نيلي وحطيت مكياج خفيف طبوا وانخبص البيت بهوست الولد وصفگاتهم وهمة يبدلون وعادل يهلهل وطبت امي مكيفة بيهم وتهوس وياهم واني اصور بيهم بموبايل علي انوب طفيتة وجروني بنصهم دك ركص ردت ابجي من فرحتي بيهم وادعي ربي يحفظهم كملوا وطلعوا الحنة بالبستان سووهة ورة البيت والنشرات والكراسي كملنة هوسة العشا وكلهة ركض للسطح بنات عمي جانن جايات كلهن عدا بنات عمي اسماعيل حتى بنات عمي حسين وبنات عماتي كل الشابات صعدن وعافني بهوسة المطبخ ركض ركض كملت واجتي ختام جرتني تعاي راح يركصون چوبي ننزل ونكمل الهوسة صعدت ركض اباوع لخواني شون متسطرين وعلي لازم راس الچوبي يفر بسبحتة فدوة لقلبهم شوية وكاموا ولد عمي كلهم يركصون چوبي شوية واجة حمزة وشايل اسد وانضم وياهم شوية وانطاه لابراهيم ورجع لزم ايد علي وهو لزم راس الچوبي اباوعلهم واحد وكف بصف الخ جررت دموعي على خوتهم الخربت جانوا اكثر من الخوان شسويت ياحمزة لو ادري هيج تخرب من وراي فلا قبلت شحصلت هسة ما كدرت اكمل خاف ينتبهون البنات نزلت وكملت الهوسة وثاني يوم زفيناهم بالزفة زفهم علي بسيارتة وصارت هوسة وكوم نااس حتى من بغداد جايين جماعة حسنين كلشي ما افتهمت حسنين كلما اباوع وكال عيونج تالي نزلت البوشية وباوعت براحتي من وصلنة سيارتنة مسافة طبكت كبال الباب صايرة ازدحام رفعت البوشي وضليت بس بالنقاب لان شايلة اسد وخفت اوكع حسنين طلع كدامنة ولاكاه واحد صاحبة من بغداد سلم عليه واشرلنة نطب طلعنة احنة كبالة عنفص اسد الا ينزل بالهوسة اريد اسيطر عليه شنج روحة ويعيط بنص الشارع ردت انچبح من وراه راسأ اجة حمزة وسحبة مني ونترر

حمزة،،فووتي بساااع

ريم،،باوعتلة ما عاجبني الوضع،،سويت افففف وطبيت للبيت شبيه هذا ناشبلي ،،،دخلت للبيت وبلشنة بهوسة العشا، ،عددت هوسة هاليوم نمت كبل ومن الصبح كعدت خبزت وحضرنة الريوك للعرسان احس اريد اعوضهم كلشي ما صارلي بعرسي، ،،مر اسبوعين على عرسهم خطار رايحة راجعة هلكت بس يهون امي قسمت الشغل بيناتنة بكل عدالة وحالي من حالهن ما كالت بنتي وخطية وهالسوالف ،،فرحتي الصدك من قدمت عالمعهد وانقبلت واخذني حسنين اشترالي ملابس مرتبة تنورات وقمصان وحجابات باعتبار المعهد بنات انزع عباتي بالداخل وبديت اداوم وصدك حسيت دنيا غييررر بديت اتعرف على بنات وجانت الاعمار مختلفة رحت اختصاص اسلامية بلشنة اول اسبوع وخواني يوديني بس همة هم اشغال عندهم واشوفهم خطية يتقيدون بية كتلهم خلولي خط كل البنات خطوط بالبداية ما اقتنعوا تالي علي شاف رجال چبير بالعمر كلش وسيارتة بسيطة كال ياخذج ويردج بلا ما تجيبين العين والرجال جان وردة يصيحلي بوية وقبل لا اداوم وياه صاحني علي للغرفة رحت كعدت يمة طلع علاكة باوعتلة مستغربة

علي،،هذا من انطيه ناطي كل ثقتي وياه دير بالج ترة الثقة شي عزيز

ريم،،فتحت العلاكة موبايل،،ياابة كلبي انقبض هذا جان سبب الخراب هذا بداية الفتنة،،هزيت راسي،،ابد والله اني رباتك

علي،،اعرف اعرف الصار صار بعد كافي دموع يا ريمتي

ريم،،مو بيدي مرات كوة اجرع الغصة البكلبي

علي،،تهون يا بعد اخوج انة يمج ما اعوفج الا انطيج لليصونج من صدك

ريم،،لا لا ابد بعد ابددد

علي،،الله كريم دكومي شحني وخلي يسوي الج حسوون

ريم،،الله لا يحرمني منك كمت بست راسة وطلعت لاكتني حسناء باوعت لايدي

حسناء،،هاي شني

ريم،،ابتسمت موبايل من علاووي شو باوعتلي مدري شلون وكالت مبروك وطبت غرفتهة وسدت الباب،،،هاي شبيهةة،،ما اهتميت سويت الموبايل وخليت بي ارقام الولد خواني بس وبلشت اداوم بالخط ومن اكمل اخابر علي يخابر عمو ابو الخط يجيني، ،،الي لاحظتة حسناء وعلي بيناتهم برود مو طبيعي من ثاني يوم من شافت موبايلي وبدة يطول الزعل مرات اكول اتدخل وارجع اكول شعلية منو شاكيلي اني مو ما جنت احب اتدخل باحد، ،،شوية شوية بدوا يرجعون طبيعي بس حسناء مبتعدة عني وسرور مرت كاظم اسمهة ببيت عمي واذا تواجدت تكمل شغلهة وتطب غرفتهة علاقتي بيهة مو شي واصلا اني ملتهية بدراستي وابني ماخذين وكتي ارجع اغسل مواعين الغدة واتغدة وانام والعصر اكعد اقرة وابلش اسوي بالعشا مرات وحدي مرات توكف وياية وحدة والمواعين هم منو تغسل اني وياهة اعزل انضف الطباخ امسح الكاونترات اكول ميخالف خطية وابني يظل هنا ولو هو على امي بس ميخالف لخاطر خواني كلشي يهوون،،،،،،اتذكر جانت امتحانات نص السنة وجاي اقرة ورة البيت العصرية شمس شوية تضرب بالحديقة الورة البيت والممر واسد يم ابوه اخذة من الظهر شوية واسمع گبت العيطة ببيت عمي والنسوان تعيط الحكوووولنة عزززة غير انخطف گلبي ما خطر ببالي غير اسددد يمةة ابنييي مدري شلون لبست عباة امي القديمة ورة باب المطبخ وامي تصيح يا ستار شكوو ما رديت اتخبلت طلعت اركض جني مخبلة عقلي طاير زلم بالباب ما اهتميت دفعت الباب طبيت اركض ،،،،،،،،،،،يتبع