الغزالة في عرين الاسد الفصل الحادي وأربعون 41 - بقلم فيّد عبدالله

صبااح العسل ياحلووين،عطلتكم اعتذر والله جان يمي خطار وعشا وهووسة اعتذر جدا،،متابعة طيبة

البارت السادس والثلاثون
فيد عبدالله

حمزة،،غلطاان واعترف بس بعديش احس گلبي راح يوكف على ساعة ،،الندم اكلني والعناد البراسي رافض يخليني اعترف انة شكد اذيت ريمتي وشكد قهرتهة وشكد تحملت مني وانة ماقدرت جنت ادوس زايد لحدما خليتهة تكرهني وتعوفني وتروح ،،خسرتهة وغصة بكلبي صارت من حسيت هالشي جنت عايش بحبهة ومتأمل نرجع بيوم بس هسة احس تكطعت كل خيوط الوصل بيناتنة وراحت من ايدي للابد اتغير تفكيرهة هواي وكبرت ونضجت و بعدتني عن حياتهة والهة كل الحگ لان ما شافت مني غير اذية وقهر يمكن جنت اتصرف هيج لان ادري تحبني ونرجع بالاخير بس بعد اخر مرة كعدنة وحجينة حسيت طلعتني من گلبهة وهالشي ذبحني وجع احبهة واموت عليهة بس ما اعترفت ولاحسستهة انة متمسك بيهة رغم جنت اريد بكل صورة نرجع سوة بس بنفس الوكت مااريد اغير اي شي اريد بس هية التضحي وبس هية التقتنع بالواقع هذا خلاني اخسر مكاني بكلبهة واتطلعني من حياتهة بقت خط الوصل اسد وبس وجانت محافظة على نفسهة مني تعبت من التفكير شنو الحل لااكدر انفصل من حنان مو حبيتهة لا ابد لان هي هم ضحية عنادي جانت فانطيتهة وعد رجال ما ارجعهة لاهلة وضيمهم لان جانت عايشة بالمر ورغم التسوي امي بيهة جانت راضية وتعتبرة راحة لان حسب كلامهة جانت بوضع اصعب جنت ماانجمع بيهة بغرفة وحدة اني انام بغرفتنة جوة وهي تصعد فوك رغم محاولاتهة تالي الليل تجي يمي او اصعد جانت تلتمس مني حنية وامان وادري مو سوالفهة هاي بس جنت ما مقتنع بهالشي ما ردت اي مشاعر تربطني بيهة كل هذا يمكن لو حاجيه لريم بهدوء جان ما وصلنة هالحال بس هذا انة وهاي اطباعي ما جنت مقتنع اغيرهة ولا كدرت ابدلهة ،،،بس شنو التالي ما اكدر ابتعد اكثر عن ريم الصارت راحتي ببيتهة ويمهة حتى لو انام بالديوانية اهم شي احس بقربهة ولو اختنك الحديقة الرتبتهة بايدهة اتنفس بيهة عالاقل احس الهوة مخلوط بانفاسهة راح تكولون ليش ما رحت وحجيت اذا كل هذا بگلبك اكللكم جنت مقتنع ميفيد الحجي بعد لان تصرفات ريم كلهة تدل انة طلعت من حياتهة وكرهتني فالاعتراف هسة ميفيد بشي بعد،،،احترمت قرار ريم بالبعد لان اقتنعت انة صدك مااستاهلهة بس بقة كلبي مصمم ارجعهة بيوم بقيت قايم بيهة وباسد ومااريد اقصر بشي وياهم هذا اقل شي اقدمة الهة بقيت اتردد للجنة السوتهة بترتيبهة وحنانهة بيتهة بي راحتي الكاهة بكلشي مهتمة تخليك ترتاح من صدك، شكد جنت اكول متعرف تتصرف زغيرة هسة اتغير كلشي بيهة ومن كبرت ووعت من صدك خلتني اندم على كل السويتة وياهة،،،مرت ايامنة ايام من عمرنة ومن سنينة ايام فرح ما عشناهة والحال مثل ماهوة هي مبتعدة عني بكل احترام وحتى اسمي مانطقتة بعد من تكلي ابو اسد اتخلي اشووغ للسما واتأكد انه الباقي بيناتنة وجامعنة سوة صدك اسد وبس، ،،بتفكيرهة هيج انةصابر ومقتنع بس مال اكمل هيج ما اتحمل بعدهة عني انة مو حمزة اذا ما رديتهة اميرتي البنص قلبي ورديت حبهة الي هاي الجملة الترن براسي يومية گبل لااغفة،،،

ريم،،مر على هدوئنة بهالشكل تلث شهور واتأقلمت هاي هية حياتنة هذا شكلهة الراح تستمر بي اسد مرتاح بقرب ابوه كام يجي يتغدة او يتعشى يمنة يلعب اسد ويروح وبالليل لو تجي عمتي لو هو يجي ويطلب افرشلة بالديوانية ما دار بعد بيناتنة اي حديث بس احس الحنية بعيونة ونضراتة احس عيونة التحجي وجع الاايام الجاي يمر بيهة الوجع الحسيت بي من خسرتة امنيتي انام واكعد كل هالوجع منتهي من حياتنة بس خلصت بعد وراحت ميفيد كل الكلام ،،،اتذكر بعقد عادل شون ما قبل اصعد وي اهلي الا وياه وصعدت وياه باوعلي ابتسم براحة ابتسمت و نصيت اصلا كلشي ميبين من النقاب ثواني واجتي عمتي ام حمزة

ام حمزة،،يمة چا وين اصعد انة

حمزة،،ليش يمة مو كال ابراهيم انة اخذ امي وثريا

ام حمزة،،هاا مو صعدت جديتك وعمتك فرحة وياه

حمزة،،اتفضلي يمة

ام حمزة،،ان شاء الله تريدني اصعد ورة ومرتك متشخصة جدام

ريم،،باوعتلة قبض ايدة ونتر

حمزة،،يممممة منا الشارع والزلم مو وكتهةةة

ريم،،على كيفك ،،اتفضلي عمة، ،نزلت صعدت ورة وهي تباوعلي بابتسامة خبث وصعدت والله تغني وحدهة هاي

ام حمزة،،وين حنان شو اتأخرت

ريم،،باوعلهة وعكد حاجبة باستفهام

حمزة،،شتسوي جااية شعندهة، شو هاي بكيفهة استأذنتني قبلت انة شنو من راسهة الحجي مثلا

ام حمزة،،يمة على كيفك وين رايحة البنية هو عقد ابن عم رجلهة

حمزة،، اذا طلعت اكسر رجليهة

ام حمزة،،شجاك يمة

حمزة،،يممممة شحجيت نزلي كليلهة تركد بالبيت لا اطيح حظهة ومحمد وحسابهة من ارجع

ريم،،بقيت اباوعلة يروح ويرجع وعمتي نزلت للبيت ورجعت ما عاجبهة كلامة. صعدت وهو مفوور اعصاب خرربت الجو شون جان هادئ وصلنة وعقدنالهم وهمة جنهم عصافير بالرجعة صعدت ورة كبل

حمزة،،تعاي جدام

ريم،،و عمتي

حمزة،،خليت ابراهيم يرجعهة

ريم،،تنفست براحة وصلنة البيت وهو نزل ويانة ذبيت العباية والنقاب وجنت لابسة فستان نيلي واحمر حزام بي وشال مشجر احمر ونيلي جابة الي حسنين باوعلي عگد حاجبة كعد عالقنفة بالصالة واني رحت للغرفة بدلت ورجعت هو مخلي ايدة جوة خدة وصافن عالباب بس طلعت حجة

حمزة،،شعجب ما لبستي الجبتة الج من الاردن لازم ما عجبج

ريم،،لالا حلوو بس خليتة للحنة ،،اباوعلة ابتسم براحة

ممزة،،اتخيلتة عليج وبس

ريم،،نصيت وطبيت للمطبخ احضر بالعشا وكف بباب المطبخ

حمزة،،لا تسوين رايح اجيب من برة

ريم،،لا عليمن هاي عندي كبة مسوية

حمزة،،عاشت ايدج

ريم،،حضرت العشا وشلتة للصالة هو كاعد يلعب وية اسد ،،كعدنة تعشينة وجنت اتحاشى اباوع لعيونة الاحسهة تراقبني كوة اكلت وكمت للمطبخ اسوي چاي شوية واندكت باب المطبخ فتحتهة حنان وبيدهة صينية صدك اتعجبت جرأتهة ما جانت هيج تتصرف والله ماجنت مبينة هيج هاي كلهة سوالف رسمية

حنان،،هذا عشا لابو اسد عمتي دزتة

ريم،،هستوني احجي واجاني صووت حمزة

حمزة،،انتي شتسوين جاية شحجينة كبل

حنان،،عمتي دزتة والله

ريم،،ليش ماكو عشا هنا هذا بيتة ترة

حمزة،،حنان جدامي للبيت واحسنلج تختفين گبل لاارد للبيت

ريم،،اباوعلهة كامت تنطي الوان

حنان،،والله ......

حمزة،،جداااامي لللبيييت

ريم،،ركضت حنان للبيت هو اني من يمي فزيت بعيطتة،،احسنلهة حتى لاتسمع حجي رسمية وتتوب منهة جاي تخرب متعمر،،شرب الچاي وطلع حمزة سديت الباب لملمت المطبخ وهوسة البيت لكيت اسد غافي من تعبة بدلتلة بملابس نوم وخليتة بفراشة شلت راسي افترت الدنيا بية كعدت عالجرباية احس كلش دخت مددت هاي من تعب هالليوم وركضتة غفيت وفزيت على دكة باب المطبخ كمت احس روحي احسن. فتحت الباب عمتي فرحة مبينة جانت تبجي انخمش كلبي،،ها عمة شكو يا ستارر

فرحة،،هو شكو من ورة رسمية غير البلاوي

ريم،،شكو عمة،،جبتلهة مي وهي شربت وطبت للغرفة كبل وشدت راسهة

فرحة،،راح تخبل الولد ومحمد. اجة يعد ويخرط على حنان جيف صايرة صلفة . ورسمية كل حجاية ونبت وهالثولة خاتلة ورة عمتهة وترادد وهي صايرة تمشي كلة بتعاليم رسمية التسودنت من رديتي وبنولج هالبيت وكامت تقرة براس هالحنان وذيج ثولة تمشي وراهة مغمضة وخلت الولد يجي يتراجف من الاعصاب طك خشمة دم كدما صيح تالي هالعوبة حنان تكلة بس مني ما تتحمل كلشي ومن يم ريم كلشي سماح خلتة يكضهة يطيح حظهة وانصرعت بيدة وركض بيهة للمستشفى، ،راح يموتن الولد ويموتن امي

ريم،،وهسة شونة هوة جديتي شونهة

فرحة،،امي زينة عفتهة كوة ما قبلت اظل يمهة كالت منو يبات يمج

ريم،،لا عمة يظل بالي والله هسة اخابر امي تجي لو واحد من الولد

فرحة،،ها خووش لعد ارد يم امي ظل بالي

ريم،،براحتج عمة،،طلعت عمتي وخابرت حسنين كال راح اجيج ،،صدك شوية واندكت باب المطبخ اجاني حسنين

حسنين،،خير شصاير ببيت عمي شفت حمزة هسة طب ووياه حرمة

ريم،،حنان هاي اتخربطت وماخذهة للمستشفى

حسنين،،هاا الله يشافيهة

ريم،،ان شاء الله،،بهالاثناء دك موبايلي حمزة،كمت رديت

حمزة،،ها ريم شونكم

ريم،،الحمدلله زينين شون صرت كالت عمتي تعبت شوية،،جرر حسرة وحجة

حمزة،،عادي ليش هو انة تعبي يخلص راحتي بس يمج جانت وانة عگبج خسرتهة

ريم،،دمعت عيوني،همست الله يريحك،،سكتنة ثنينة واني حجيت لايظل بالك ترة حسنين بايت يمي

حمزة،،خووش ،،يلا تصبحون على خير

ريم،،وانت من اهل الخير مع السلامة،،سديتة ورجعت لحسنين،،محتاج شي لو اروح انام

حسنين،،تعاي كعدي يمي صار هواي ما مسولفين وحدنة

ريم،،هاي اجيت، ،كعدت كبالة عالجرباية باوعتلة ابتسم

حسنين،،راح ينشگ حلكج شبيج

ريم،،انتظرك تحجي شعندك

حسنين،،انتي التحجين شمسوية لحمزة

ريم،،توسعت عيوني متفاجأة، ،شمسوية والله كلشي ما مسوية اصلا كلش هادئين هالفترة وخلصت كل مشاكلنة اتفقنة نكمل بكل احترام عالمود اسد

حسنين،هممممم،،كتيلة هيج

ريم،،اممم

حسنين،،كتيلة نكمل عالمود اسد وبس

ريم،،اممم

حسنين،، هاااا،،هذا حس خسرج من صدك هسة حس بالنعمة الجانت بين اديه والندم اكلة تدرين ذاك اليوم ببغداد مريت لحسام سلمت عليه

ريم،،خفت عبالي محاجي حسنين عالصار،بلعت ريك اي

حسنين،،لليل خابرني الولد كال حمزة رايح.وياه بكعدة وشارب وراد متعارك وي حسام مااعرف ليش ومدمي وجه الولد وحسام عايفة وطالع وخابرني اروح اخذة

ريم،،بلعت ريك ليش هو كايم يشرب

حسنين،،ما جان يتقربلة حسام يكول ابد بس هالمرة استغربت ورحت رجعتة للشقة بيدي ظل الطريق كلة يدخن بعصبية ومن وصلنة نزل واتعذر مني الصراحة استغربت

حمزة،،اعذرني حسنين على كل الصار ترة انة معزة اختك بكلبي هواي وما ردت اخسرهة

حسنين،،مبين تعزهة هواي من هاي حافظت عليهة

حمزة،،لا خسرتهة ابشررك خسررت كلشي

حسنين،،الله يهديكم،،انت تظل اخووي الجبير الاعزة واحترمة

ريم،،شهكت ابجي

حسنين،،هسة عليمن تبجين ترة هو كالهة هو الخسرر مو انتي بس انة اشوفن حمزة ينطي فرصة ثانية

ريم،،فرصة ثانية انتة جنت متخبل منة شغير حجيك

حسنين،،لان جان يمشي اعوج هسة اشوفنة يحارب علمودج وانة هذا الردتة يحس بقيمتج يلا ترديلة لاعبالج انة اكره حمزة عندي هوة بمعزة علي والله بس من اذاج قهرني منة

ريم،،بس هو مااجة وكال غلطت ولا كال اذيتج لهسة بنضرتة اني الغلطانة واذا لازم يتصلح شي اني الاجي واحاول اصلح الامور

حسنين،،هو خلي الوضع هيج من يحس الوكت يسمح يفتحلج گلبة يجيج واتصالحوا

ريم،،حسنين والله ما كاعد انتظر هالوكت يجي لان احس گلبي برد من ناحيتة صدكني مااريد يفتح مواضيع راحت وانتهت الحجي بيهة لايقدم ولايأخر خلينة بهذا وضعنة كلش مقتنعة وراضية والله اهم شي سالم وطيب لابنة ولاهلة اني مااريد كلشي منة غير سلامتة

حسنين،،الله يهديكم يلا كومي اريد انام دوختونة انتي وحمزة

ريم،،ههههه نوم العوافي، ،رحت مددت افكر بكلام حسنين ياترى لو اجة وكال غلطان ونادم يتغير شي جوابي جاان لاا ميتغير كلشي ريم لا تتأملين وتتألمين نامي واسكتي،،،،

حمزة،،بعد الحجي الگالتة حنان كرهتهة كلش حتى احساس تأنيب الضمير والعطف تجاهة رااح ثاني واجتي تتعذر بالليل طردتهة من الغرفة ما متحمل منهة حجاية،،اذا تردين تسترين على روحج وما تردين لضيم عمج لاتشوفيني وجهج هالايام سمعتيييي

حنان،،اي هاي هية

حمزة،،طلعت واني كااره روحي شكد اذيت ناس انة باعصابي وناري التاكل الاخضر واليابس،،،

ريم،،جنت اروح اشوف جديتي بس عمتي ام حمزة كامت تشوفني وتشوف عزرائيل ما اهتميت جنت اروح شوية لخاطر جديتي وعمي وامي بهالايام تبات يمي لان حمزة ببغداد راح احسنلة خلي يرتاح هناك حنان ما شفتهة ابد هالشكم يوم لحدما خلص اسبوع وجنت طالعة من بيت عمي لكيتهة واكفة يم باب الترك، ،باوعتلهة وكلت السلام عليكم ومشيت

حنان،،انتي شكد خبيثة ما شفت بحقارتج والله

ريم،،التفتت عليهة خزرتهة،،انتي بيج شي الزمي لسانج واحترمي

حنان، مو اجيتج برجلي حتى تردين وكتلج ما علية بيكم ورديلة يحبج عاندتي وركبتي راسج ما فهمت بالبداية ليش تالي من ردج غصبا ماعليج تخبلتي وكمتي بكل صورة تردين تخليه يطلگني هنا فهمت انتي تردينة بس الج وجاي تسعين تخربين بيناتنة حتى يطلكني

ريم،،وانتي منو متدخل بحياتج اني وياه النة حياة خاصة بعيد عنج حياة تربطنة بولد بنصنة شعلية بيج بعد

حنان،،،جذابة جاي تحشين براسة يطلكني ويظل بس الج

ريم،،احترررمي نفسج لا تشوفيني سكتتلج تتجاوزين، ،بعدين شنو احشي براسة جاهل هوة هذا الشيخ حمزة ابو اسد من تحجين عليه احجي بادب واحترام

حنان،،ايي اشوف انتي شون محترمتة شو ساحلتة وراج وكل ريگ حلوو ما منطيتة

ريم،،حنااااان احترررمي نفسج لا اوصل الحجي وهوووة يتصرررف هاااا هوة يتصرف ،،عفتهة وطبيت للبيت اعصابي تفووور هاي متخبلة عالاخير خبلتهة رسمية مدري هية مخبلة ماجانت تبين بس لا لو هي من الاساس هيج مااجتني قبل تريدني ارجع احس كدما انفعلت وضجت راسي افتر مددت تعبانة واسد بحضني غفينة اني وياه فزيت اذان المغرب يأذن اتعوذت الشيطان وكعدت اسد وكعدنة لليل اجني امي والبنات

ام ريم،،شبيج يمة شو وجهج مصوفر

ريم،،مابية يمة ضغطي مضوجني

حسناء،،يبوو يهالهبوط ينرادلج مملحة برگبتج

سرور،،عندي خيوط مال ملهية من مالات حسن ادزلج واحد علگي بي مملحة

ريم،،هههه ووجع،،،كملنة الكعدة واني احس كلمااتذكر حجي حنان انسطر وافووور،،تالي كلت اصلا بعد مالي كل وكفة وياه ولا حتى سلام وصدك ما حجيت وياهة كلمة بعد بس هية كامت متتواجه وياي اصلا الافتهمتة من عمتي فرحة انه حمزة مكاطعهة هية وعمتي ما يحجي وياهن كلمة وحنان ميريد حتى شوفتهة من يجي لذلك هالشهر جان دائما متواجد ببغداد لان حسب حجي حسنين هوة وحسام فاكين الشراكة مالتهم وهوة جاي يسوي بمعرض وحدة. اكيد مااتحمل حمزة الصار وتعارك وية الولد وفضوا هالشراكة

حمزة،،مااتحملت الموقف الصار وي حسام وحاولت اقنع بروحي انه الولد نساهة من عرفهة مرتي بس النذل رجع جاب طاريهة من جنت وياه بكعدة شررب هواي وفقد وكام يخربط،،من اول حجاية نطقهة مااتحملت فكرة هية ببالة لهسة لزمتة شبعتة كتل،،،وفضيت كل شراكة وياه وبلشت بمعرض جديد لوحدي وابراهيم يعاوني بي بشغلة ووكفتة ،،مبتعد عن البيت وهوستة رغم ميت شوگ لشوفة عيونهة بس احسن اريد ارتب حياتي واصفيهة يمكن هالبعد فرصة اعرف لوين وصلنة،،،كاعد اصفي بشغلات تخص المعرض ووصلتني رسائل فتحتهن مكتوب((انتة شيخ ونافخ روحك چا شيخ عالعالم وما تعرف تحافظ على بيتك))،،احس صعدت النار لراسي،،جاوبت انتة ياهو اذا زلمة كول واعرفك شون تجيب طاري بيت الشيخ يا نگس،،وصلتني رسالة ثانية((مو مهم تعرفني انة منو بس المهم تعرف انة رجال اخاف الله واحترم اهلي وناسي يا شيخ روح لم مرتك وكلهة تبعد عن طريقي انة زلمة مااحب ادوس اعراض البيوت خل تكف من طريقي وتبطل تدزلي صورهة))ثواني ووصلت صورة لريم جانت لابسة شال ونفنوف نفسهن مالات عقد عادل احس انسطررت وافترر راسي،،الزمك يا نذل واعرفك منو لو تضم روحك جوة الگاع دزيت الرسالة ورجعت اتصلت دك وميرد وبعدين انغلق احتررگت بناررر،،، ما صاارت براسي لحظة شك برريم لان هاي ربات ايدي وگلبي مستحيل تسوي هيج بس اختنكت من فكرة منو ماخذ صورهة بيدمن واكعة صور مرتي يا نذل وعار والله حفر گبرة بيدة واللللله،،راسا لميت غراضي قفلت ورجعت بوجهي لشركة..انطيتهم الرقم اريد اشوفة باسمن طالع وهمزين لكيت ولد اعرفة ظل وياية خطية كال ما تطلع اليوم بلكت لباجر،واني اخابرك صدك رجعت للشقة واحس محترك فكرة احد يشوفهة تخليني اتخبل ما نمت الليل كلة محترگ،،ثاني يوم الظهر ودك علية الولد،،ها بشر خالد

خالد،،والله يخوي اعذرني ماكدرنة نوصل لصاحب الرقم مشتري بلا مستمسكات الظاهر وومشيهة كلاوات

حمزة،،هاي هية مشكوور، ،سديتة واحس شكي وتفكيري الليل كلة بمكانة طلع بس والله لو صدك،،،،، رجعت للبيت وصلت العصر كلش طبيت موجر نار وبوجهي لغرفتهة جانت كاعدة عالجرباية بيدهة شي بس شافتني ضمتة جوة المخدة وكامت على حيلهة،،،يتبع