رواية الكارمــا الفصل العشرون 20 - بقلم آيــه آلـ صبري

لم دربهم
بعد شمتاني يـگلبي
الليلة وحشة
الليلة شدّينا الرحال
ولا تناطر چف يعتّك
هذا صوت الريح يدوي
شتلتفت مامش تعال.

...............

لالي

كاعده على الاستول ب البدايه ومنتظره دكتور يخلص شرح احس دماغي راح ينفجر من كم المعلومات الجمعتهن من محاضره وحده بس .....
مجرد ما خلص طلعت للنادي اكعد اراجع او اقرأ المحاضره بين ما يخلص الوقت لان بعد وراي محاضره وهسه ريست ....
مثل كل يوم وحدي اكره الاختلاط ونادراً احجي ويه بنيه كُلهم علاقتي بيهم مجرد زماله ...
اصلاً اني اكبر منهم بالعمر كُلهم بهواي سنوات بس لان ناعمه ما مبين عمري الحقيقي اليشوفني عباله بعمرهم او اصغر منهم ...
جريت القراصه من ايدي لابستها مثل السوار ولميت شعري المفتوح ضايقني ...
فتحت الملزمه اريد اراجع عندي كوز وعقلي مشتت بالي عند زيتونه حتى من دكتور يشرح عقلي يروح يمها ....

لان جنت صافنه فزيت على صوت واحد
رفعت راسي اله طالب من دفعتي شايفته ويانه بس ما اعرفه أساساً ما اعرف احد اني

_ممكن كم دقيقه احجي وياج

كمت احتراماً اله الولد كُلش خلوق ومحترم او ب الاحرى طلاب دفعتي كُلهم محترمين ويستحقون كلمه صيادله ملتهين بس بدراستهم وحياتهم ما بيوم سمعوا بنيه كلمه محلوه او اتعرضوا الوحده حتى اعترافات قليل واذا اعترفوا ف شي رسمي وخطوبه مو مثل باقي الاقسام والكليات ماخذين الكليه ونسه واعتراف ولد ماعدهم ذره شخصيه

نعم تفضل

_لا مو بنادي برا افضل على الهدوء

مشيت ورا وكف عند ممر بجهه القاعات فارغ لان اغلب الطلاب هسه بالنادي لو طالعين للمطاعم ...

جتفت ايدي وكفت مقابيله

_ ما اريد علاقه ولا اريد مجرد اقضي وياج وقت
اني سألت هواي عنج وميحتاج اسأل لان انتي وياي صار خمس سنوات ومعروفه اخلاقج
مالج علاقه ب احد ولا تحجين ويه احد وما بيوم شفتج اختلطي او سمحتي ل اي شخص يحجي وياج بشي خارج الدراسه
رايدج بالحلال وانتظر موافقتج حتى ادز اهلي اليوم
من المرحله الثالثه عيني عليج بس جنت رايد اتأكد من مشاعري اتجاهج وبنفس الوقت مجنت رايد اعترف حتى لا تتلهين عن الدراسه ويشتت فكرج وهسه اريد اعلن ارتباطنه رسمي كدام دفعه ماطول مابقى شي ونتخرج الا كم شهر ...

نتظرته يكمل كلامه وسمعت اله بكل انصات واحترام

ما شاء الله انت زينه الشباب ومابيك اي قصور واي وحده تتمناك بس الخلل بيه مو بيك
اي شخص يتقدم اني ارفضه يعني مو بس انت
جداً اعتذر واتمنى الك كُل الخير والتوفيق ويه انسانه افضل مني وجداً اشكرج على كلامك واحترامك وياي ...

_ما اريد جواب هسه انطيج مجال فكري شوكت ما تريدين رجعي الي قرارج اني مو مجرد معجب
متخطي مرحله الاعجاب ومشاعري اتجاههج واضحه ...

مقدره مشاعرك بس الصوج مني اني رافضه فكره الارتباط

_انتظرج اني انتظرت سنتين قابل ما اكدر انتظر اكثر

ونبي كُلش منحرجه منك انت من خيره الشباب وتستاهل كُل الخير بحياتك رجال ونعمه منه
بس سبقاً وگلت الك اني رافضه الكل مو بس انت
كُلش اعتذر منك وربي يكتب الك الخير والتوفيق بحياتك
راح اعتبر نفسي ما سمعت اي شي وتبقى زميلي واخ غالي عندي ......

من شاف شده اصراري على الرفض

_براحتج هنياله التكونين من نصيبه قمه الاخلاق والرقي

ابتسمت اله وشكرته ...

راح رجع للقاعه لان صار وقت المحاضره بس حرفياً توترت واستحيت انسان خلوق صح حسيته شك بيه او ظن اني مرتبطه بسبب شده رفضي بس مو مشكله مجبوره اجنب الكل لحد ما اتخرج واخلص ..

خلصت المحاضره وطلعت صعدت فورتات
كعدت ب الاخير يم الجامه ولبست الهتفون اسمع اغاني فصلت عن الكل

خليت راسي على الجامه ورجعت بذاكرتي لكلام زيتونه عن حياتها وماضيها ....

........

سنـه 1995

بعد ما طعنت زيتونه الچنه

صارت الجنه تصرخ بعلو صوتها
الكُل اتجهه للمطبخ يريدون يعرفون مصدر الصوت والسبب الاطفال النساء المراه الكبيره صارت هوسه ...

ابتعدت زيتونه عنها ورمت السكين على الارض من شده الصدمه
حتى هي مصدومه من نفسها شلون هيج سوت
منو الراح يصدك هي سوت هيج حتى دافع عن نفسها بعد ما حاولت الچنه تحركها بالزيت الحار ومجان عدها غير طريقه حتى تفلت منها الا بعد ما طعنتها .....

بيت كبير عائله كبيره كُلهم عايشين بيت واحد اطفال هواي كُل واحد عنده اقل شي خمس اطفال
البيت صاير اشبه ب المدرسـه التعبير الوحيد اليناسب حالتهم ....

كُل الاخوان ساكنيين ومزوجين بنفس البيت
بحيث النفاق والمشاكل بين نسائهم طول الوقت ...

أساساً كُلهن يكرهن زيتونه لان اصغر وحده بيهن واجملهن ولان دائماً المراه الكبيره تتباهه بيها بكل مكان وتتباهه باهلها والدها دكتور وامها استاذه جامعيه......
وتتفاخر بين الاقارب حصلت هيج جنه اهلها مثقفين لان اغلب نسوان اخوتها مو دارسات واهلهن اقل من مستواهم المادي ف ما جانت تحبهن وبسبب مشاكلهن طول اليوم تضوج منهن ....
بس زيتونه الوحيده بيهم تخلتف ف جانت تحبها وأيضاً تحبها على محبه زوجها ....

الوقت الطعنتها بي الصبح ...
محد اكو بالبيت غير النساء اما الزلم ف اغلبهم ب الشغل او الدوام ...

راح واحد من الاطفال يركض يبلغ ابوه بسالفه لان مكان شغله قريب عليهم ...

كُلهن التمن على زيتونه يريدن يضربنها بدون ما يعرفن السبب بس هيج حتى يفرغن حقدهن وسمهن

العمه الكبيره وكفت بنصهن وصارت دافع عن زيتونه خوفاً لا يموتنها ويبتلون بيها ...

دخل العم يركض شال زوجته السوت روحها مواته ومغمى عليها رغم الطعنه جانت سطحيه وبسيطه ...

دخلوا الجيران وصارت هوسه فضيعه صريخ النسوان الماله داعي وبجيهن ويعيطن ماتت المراه
كتلتها مجرومه متخاف الله خلتنه نلتهي عنهن ودجتها بالسكين ..
وكُل وحده صارت تألف سالفه عليها وتحجي شي شكل بس علمود يشوهن صورتها وياذنها مو بس بالضرب حتى بالكلام واتهمنها بشرفها

كُلها مجرد ساعات قليله طش الخبر بالمنطقه وبين الاقارب وبكل مكان من واحد الواحد رغم قبل مجانت اكو تليفونات بس الفضيحه والكلام السيئ من يوم يومه ينتشر اسرع من الهوا ....

ورا ساعتين من العايط واللطم ...

دخلوا الزلم من الدوام واكو بيهم من الشغل ..

استقبلتهم النسوان ب البجي واللطم يريدون يعرفون شكو
صارن يألفن كلام كذب منهن رغم ما سألن زيتونه ليش هيج سويتي ولا يعرفون السبب كل وحده صارت اطلع حقدها وكرهه ويألفن بمزاجهن حتى يبرد گلبهن
كل واحد صدك كلام مرته وهاجوا منفعلين ومندفعين يريدون يقتلون زيتونه ....

من بعد هالكلام كُله زوجها واكف بس ساكت يستمع لكذبهن ..

من شاف عمه يريد يتقدم يضربها

صار بوجه عمه وخله زيتونه ورا ظهرهه ...

_اليمد ايده عليها تنكسر مرتي اني احاسبها اذا مسويه شي خطأ محددددد يدخل

اندار على النسوان

وانت لمن السانجن ولا ظلن تحجن وتألفن الاسمعها تحجي حجايه عليها لو تطعن بيها الها بس الله ...

الكل صار يحجي عليه ويتهموا يدافع الها وطلي عند مرته بمصطلحهم
تقدم واحد من عمامه وراد يجر زيتونه
تقاوه وياهم وضرب كل عمامه وصارت بينهم مشاكل بسبيل محد يتقرب الها .....

سحبها من بين الكل وطلع بيها برا أجر سياره وصعد وياها
شعرها الاصفر المفتوح عيونها الواكفه من شده الصدمه ايدها كُلها دم ...

انطه العنوان للسايق والتفت الها ...

_سولفي كُلشي الي وراح اصدكج واثق بيج

رفعت عيونها اله من بعد السكوت طول الوقت
همست

طلحه

_احجي اسمعج

ايدها الترجف ودموعها ينزلن وحده ورا الثانيه

سحب راسها ضمها لصدره حتى يهدأ رجفتها

_مصدكج والله مصدكج اعرفهن حيايه وكذابات ..

ما اعرف ونبي ما اعرف شلون طعنتها بس جنت دا اريد ادافع عن نفسي تريد تحركني بالزيت لان ما اشتغلت مكانها وبدون وعي ضربتها
طلحه شلوون هسه يسجنوني

سكت عنها داير وجها يفكر شلون يحل هاي السالفه بدون ما يأذيها ولا يعرضها لتحقيق ..
وكل همه جان يوصلها لبيت عمها الي هو بالحقيقه بيت ابوها كل ظنه راح تكون ب امان ....

مجرد نزلها باب البيت وراح للمستشفى حتى يحل السالفه ويه عمامه بطريقته الخاصه بدون ما يعرضها للقانون وتكبر المشكله ...

من دخلت البيت عمها جان واصلهم الخبر وبي اضافات سمانيه ...
لدرجه جانوا كُلهم منتظريها على نار واول ماشافوها صاروا يصيحون ويحجون وعمها ضربها وعمتها موتها من الضرب ومحد دافع الها ومرت عمها فوك راسهم تدفع بيهم بكلام سماني ....

ما عافوها لحد ما اغمى عليها من الضرب وصارت تنزف عمتها وجهه اصفر من شافت النزف ..

لليل بقت مشموره وحدها بالغرفه بدون ما احد يكعدها ويسألها شبيج ...

كامت وكفت تريد تروح تشرب مي
لكت عمتها كاعده بالمطبخ ..
انتبهت نظرات عمتها صدمه وخوف

راحت دخلت لغرفه عمها ورجعت طلعت تحاجيها شمرت على راسها عبايه
وزيتونه بس صافنه ما تعرف هاي ليش تشمر عليها العبايه ...

اخذتها سحل لوحده ينادوها ب الجده تولد النسوان
وخلتها تفحصها ...
بلغتهم ب حملها ب شهر 3 ومهدد ب الاسقاط خلوها ترتاح وانطتهم علاج

زيتونه مجانت تعرف ولا مستوعبه الدايحجونه شنو حامل صدمه ورا صدمه من يوم وفاه ابوها لليوم فقدت الحياه الجانت عايشتها وتحولت عيشتها من طفله مدلله الى امراه تتحمل كل هالمشاكل ....

صارن يجبرنها تشرب العلاج وخلن الها سرير بصاله ويدارنها ومهتمات بيها بقن على هالوضع شهر كامل ودنها للدكتوره فحصتها وبلغتهم كملت شهرها الرابع وراح تدخل ب 5 وضع الطفل مابي شي ...

فرحوا وراحوا يبغوهم ب ما تأكدوا من ثبات حملها حتى يرجعوها الهم ويخلصون منها ...

بنفس اليوم الانتشر بي الخبر اجه طلحه لبيتهم وطلب يشوفها وحدهم ...

طلعت اله للحديقه ب الطرمه

وكف مقابيلها ويسألها والغضب على وجهه

_شلون حامل واني ما متقرب الج غير بس يوم العرس

ما اعرف اي شي لا تسألني

صار يفرك بوجهه والحيره مبينه عليه

_ماشي لعد ديري بالج على نفسج خل يجي والله كريم

ما طول دقايق وطلع من البيت مستعجل

ب الليل اجت عمته وحده من نسوان عمامه ...

وصارن يعطين ويصيحن ويجاوزن

_انتمممم لكيتوهااا حجه سالفه الحمل حتى ترجعوها براسناااا ما ترجع على موتنا تولد وتطلك ...

عمت زيتونه ما قصرت مخلت تجاوز ما جاوزته وانتهت العركه بطرد اهل طلحه من البيت ....
وانتظارهم تولد حتى يطلكوها ...

مرت الايام وزيتونه شافت انواع العذاب من بيت عمها لدرجه تبقى ايام بدون اكل وتحاول بكل طريقه تتخلص من الطفل بس الله كاتب اله يجي للدنيا ...

عمها جان على اقل شي يأذيها لان بسببها دفع فصل ل اهل المراه الطعنتها زيتونه اخوانها ناس فكر وهمج اخذوها حجه حتى يحصلون فلوس
وحتى يسكتهم
ولان قبل القانون قوي وشحده اليحجي أطر يدفع الهم فلوس خوفاً على نفسه لان هددوا اذا ما يدفع يذبون عليه تهمه ويسجنوه ...

من بعد هالحادثه اختفى طلحه واختفت وياه كل التسأولات شنو سوه وشلون عمامه سكتوا وما خلوها تروح للتحقيق وشلون ما سوو الها شي وبهلسهوله عافوها ومجرد طلاك ....

زيتونه ما اهتمت للموضوع بكد ما بالها شلون تخلص من الطفل اذا هي متعذبه شلون تخلي يتعذب وياها ....

قرب وقت ولدتها وعمتها صارت تحجي وياها

_تولدين وتنطي الهم هو انتي متحملينج گوه نوب يجي طفل وياج
او لا لا تنطي اشلعي گلبهم علمود يرجعوج ونخلص منج لحم البنيه ثگيل مو نوب مطلقه ....

صارت تصرخ عليها
بييييت ابوووي بفلووووس ابوي عاايشين غصباً عنكم كُلهن يرجعن اليييي
وهسه طلحه يرجعني وياخذني وياه ما ابقى يمج ...
طلحه ما يعوفني ...

من خوفها ومن كميه التعذب العيشوها بيت عمها صارت تتمنى ترجع عند طلحه

وايام قليله وتولد اجت وحده من نسوان عمامه ..

_طلحه يگول ما اريد هيج وحده مجرمه بعد تبقى على ذمتي ابني اخذه بس تولد وحتى لو ترجع حالها حال الخدامه

وصار كلام يروح وكلام يجي نفااق كذب فتنه ....

قررت زيتونه تولد وتنطي الهم بدون ما اشوفه حتى لا تتعلق بي وبنفس الوقت اذا هي اكل ما ينطوها تاكل شلون تتحمل مسؤوليه طفل
واصلاً ما متخطيه صدمه انو راحت حياه العز والدلال والرفاهيه كل ظنها بعدها بحلم وتنتظر ابوها يكعد وينقذها ....

بيوم ولادتها ما شافته بسرعه اخذته منها عمتها ..
من صحت اجاها طلحه شايل الطفل ....
وسألها

_يعني هذا قرارج تعوفي وما تريدينا وتتخلين عن ابنج

اي

_متأكده قرار نهائي

اي

اخذ الطفل وطلع وبعدها بفتره اطلكت زيتونه بشكل رسمي
وعمها باع البيت بليله ويوم وانتقل لمحافظه بابل بدون محد يعرف السبب ...

مرت الايام واختفى أثرهم
وبدأت ترجع صحتها وما تعرف اي خبر عن طلحه وابنه ...

راحت ايام واجت ايام وصارت هالايام
سنـه كامله ......

اجاها عمها وگللها باجر عرسج انطيتج لـ خوش ناس احسن من ذولاك ....

فزيت على صوت المراه تكعدني

ياابنيه وصلتي ...

نزلت من السياره واتجهت للبيت
من يوم اختفاء زيتونه لليوم واني اتصل على طلحه ومايرد يطلع مغلق انشلع گلبي
والبارحه رحت لبيت امه كالت ما اخذ اجازه ومسافر عنده شغل مهم ما يگدر يأجله ...
وحاولت اروح لبيته بس ما اندله وين ....

ومرت 5 اشهر على اختفاء زيتونه بشكل تام
وانتظاري الطلحه حتى ابلغه ...

تليفوني يرن صوت اشعارات

تفأجات منو

الدكتور ازاد
داز

_شنو رأيج

فتحتها وظليت مصدومه شعجب يراسلني على رقمي الخاص ....

................

زيتونه ...

شهر الاول من بقائي ب سليمانيه جان كأبه وضيقه مالي نفس لشي بس اجرت الشقه وكعدت بيها لا اشتغل ولا اطلع اشرب منوم وانام حبوب النوم دمرتني ....

صرت ابحث هواي عن الصلاه بسبب الاكتئاب الداعيشه ..

وبعد ما سمعت كوومه محاضرات من الشعراوي التزمت ب الصلاه ونزلت لمول ب سليمانيه اشتريت ازار صلاه وكل صلاه اصليها بوقتها ....

بعدها قررت ارجع اوكف من جديد
رجعت لبغداد بوضع المتخفي بعت السياره وبعت المركز بعد ما صديقي لگه الي شراي يعني رحت بس كملت المعاملات ودفعت طن رشاوي حتى اخلصهن ب اسرع وقت ورجعت ل اربيل اشتريت مناك سياره معرض سياره ب اربيل كُلش معروف

اختاريت جارجر بيضه 2018 ...

وضميت فلوس المركز والعندي فتره من استقر نفسياً ارجع افتح واحد بسليمانيه ....

خمس اشهر عايشه وحيده من دون احد الموضوع وحده متعب بس ك وحده مثلي تعودت على الوحده ف ما اهتميت ...

اقفل بشقتي علمود انزل بحديقه المجمع السكني
دا تمطر حالوب وهاي الاجواء عشقي مستحيل افوتها

خليت تلفوني بجيبي وفتحت شعري وكفيت البنطرون ...

السليمانيه صارت استقراري صح حلوه بس اجوائها كآبه خاصه بالليل تكوم تخنك حتى الهوا يضيك بيها المناطق السكنيه تكون هادئه عكس السياحيه
بعدها هستوها ب 12 والمجمع صار هدوء تكول مجمع اشباح مو بشر ....

صارت عيني على جهه الكراج صار يومين اشوف سياره جي كلاس توكف بصف سيارتي نوب سيارتي ضايعه يمها

زخ مطر قوي كلها تخاف تطلع الا اني استمتع بهيج مطر

وكفت بنص الحديقه وانثر بشعري واتبللت ملابسي مي وجسمي جمد من البرد

فزيت على ضوا فلاش تلفون اشتغل باتجاهي بس جانت ظلمه من ناحيه الشخص مشفته بوضوح بس سمعت صوته يهمس

يـا وردتيَ الما يلوڪلهَـا مطر غيري .........

جمدت بمكاني من صوت .......

تقدمت اطلع من الحديقه دا ارجع ادخل للمجمع

سحبني من ايدي

وخررر شكو جاي

_تاره

التفت اله فازه اول مره يناديني ب اسمي الحقيقي ...

تقرب نزع الكوت مالته وخلاه على كتفي
شمرته دا انزعه رجعه على كتفي

وحجه بصوت ناصي

_ ملابسج لازكه على جسمج

الحارس مال بنايه موجود واكو مجموعه شباب طلعوا ...

صار يمشي وراي واني اعصابي گوه لازمتهن ما اريد احد من المجمع ينتبه

صعدت بالمصعد صعد وياي

باوعت عليه

مخلي ايده بجيوبه

صحت
خييييررررررر شكووو

يباوع عليه وجهه كُله غضب

تقرب وخر شعري الناكع من عيوني ب اصبعه  ...

درت وجهي عنه شمرت الكوت عليه اخذه و ابتسم تك خد ...

انفتح المصعد وكفت كدام شقتي افتحهه دا ادخل

واكف وراي يريد يدخل

عجيييب شكو جايني وفوكاها تريد تدخل

ما اهتم الكلامي سحب المفتاح مني وفتح الباب ودخل قبلي

ركعت الباب حيييل

شكوووو لاحكني ما اريد صووتي يطلع منا المجمع كُلهم يعرفوني وحدي عاااايشه

صار يباوع على شقه ويفتر بيها
طلع جكاره وصار يدخن ...

_حلووو منطقه راقيه شقه فخمه سياره جارجر وبعد اكو شي اني ما اعرفه ..

وهسه شنو تريد بفلوسي محد متفضل عليه

هز راسه ويبتسم بكل استهزاز

طلحه اطلع برا لا انادي الحراس يتصرفووون ويااك

كعد على التخم وخله رجل على رجل

ويباوع عليه من فوك ليجوا اشرلي بحاجبه

_يلا ناديهم اني كاعد

اهووو لا تستفزززني
تعررفني مااااكدر اروح اناديهم ماشي لعد ظل كاعد وحدك ...

_بدلي ملابسج لا تتمرضين تاره

باوعتله ب استفهم
لا والله شنو دا تشاقه انت

صار يضحك بصوت عالي

من يوم يومه يعرف شلون يستفز المقابل ...

عفته كاعد وحده بصاله حتى ما ضيفته شي
شلون اخلي يطلع استحي انادي الحارس واصلاً مستحيل اسويها
الحارس من راح يشوف كشخه طلحه وهيبته لو من يعرف هو منو وشنو منصبه
واكيد راح يقنعه ب اسلوبه واطلع اني الخطأ ...

بنهايه الصاله باب البلكونه
فتحته ودخلت

المطر بسبب الهوا القوي كُله ديتجه للداخل ...

غمضت عيوني وخليت ايدي على المحجر واكفه الهوا البارد يضرب بوجهي ...

نزلت دموعي بكل مره احاول ارجع اقوه ترجع حياتي تبدي من الصفر دموعي والمطر اختلطن ...

نحضنت من ورا وخله ايده على خصري
وحنجه على كتفي وشعري المبلل

همس ب أذني

_تاره انتي بريئه

من شده الصدمه حتى ما حاولت ابعده اريده يكمل كلامه

_تأكدت من موضوعج وطلعت برائتج ب القانون
الطفله عايشه
جنت متأكد تاره نظيفه وبحياتها متأذي احد

جسمي كُله جمد من الداسمعه
انداريت عليه بعدته عني

كذااب

لزم وجهي بين كفوف ايده والابتسامه مرسومه على وجهه بكل رزانه وهدوء تطلع كلماته

_ وداعه عساف .....

يتبع ....

البارت اليوم عباره عن صدمات
هسه عرفتوا جزء من ماضيها وعرفتوا اسمها الحقيقي وعرفتواااااا سالفه الطفله اهم شي واسم ابنها  ....

صار دوركم تربطون الاحداث وتعرفون الباقي ..