رواية الكارمــا الفصل الحادي والعشرون 21 - بقلم آيــه آلـ صبري

ذبلت ايامي وبعـــــد ما بيه ليل
خلك ماكو بجفني يتلكه السهر

مر علي بمرورتك وانكتني حيل
اطيح من راسي محطات وسفر

علي رشم
.............

.............................

من شده صدمه داسمعها عيوني وكفن اخاف ارمش ويطلع حلم
قليل اذا اكول احلى خبر اسمعه بحياتي
كانوا رجع حياني من جديد ...

نزلت اكفوف ايده من وجهي وكعدت على الكرسي بعد ما بيه اوكف واحجي

قشعريره صابت جسمي ...

ضميت وجهي ب ايديه وشعري النازل مغطي وجهي
صرت اشهك ودموعي تجري من الفرحه

اردد الحمد لله ربي الحمد لله

من سمعت كلامه لحد هالحظه واني بمكاني ماكو كلمه على لساني غير الحمد لله
ياربي رحمكتك عجيبه ياارب لك الحمد ....

بعد ما استوعبت الصدمه وكلامه
رفعت راسي ملگيته ماكو ...

المطر كُلش قوي وديدخل للبلكونه من قوته ...
يمكن دخل حتى ميتبلل ...

كمت على حيلي ملابسي كُلها ناكعه
شلت شعري الناكع اعصر بي ..

دخلت وسديت الباب وراي ..

سحبت منشفه جانت على الطاوله لفيت بيها شعري الناكع

اتجه نظري عليه منتجي على الحايط بالصاله يدخن ومخلي ايده على عيونه ..

جتفت ايدي من البرد ملابسي جمدن وتقدمت ناحيته ..

اي كمل شلون عرفت وتأكدت من هالشي

باوع عليه مقلص عيونه
طفه الجگاره ب اصبعه

_غيري ملابس الجو بارد وبعدها احجي الج

اكيد تحجي الي يعني مو ابدل واجي ما الگاك

ابتسم

_ لا بس استعجلي اريد اروح

دخلت بسرعه للغرفه وقفلت الباب لبست اي بجامه وقميص كدامي ورجعت لفيت شعري بالمنشفه وطلعت ...

لگيته بعده كاعد على التخم ب ايده التليفون ..

من الفرحه ما اريد اكعد بس اريد اسمع شنو يحجي ..

ضليت واكفه فوك راسه

رفع نظره ب اتجاهي

_لالي هواي متصله عليه هسه يلا فتحت التليفون اخاف بيها شي جنت غالقه لان مشغول وما فاتح غير خطي الخاص بالشغل ناسي انطيها رقمي الثاني ..

مادري

طلع رقمها واتصل عليها
ما ردت عليه الوقت متأخر واعرفها اني تنام من وقت علمود دوامها ...

قفل التليفون وخلاه على الطاوله

_ عرفت سالفه قتلج للطفله من الحارس الخاص بمركزج ..

بعد ما طلبت لالي تبقين عند امي فتره مؤقته لحد ما تخلص معامله سفرج وعود عندج مشكله ويه زبونه بالمركز ومهددتج وهم بسبب مشاكلج ويه عمتج ومتكدرين تبقين عند لالي
ما صدكتها وجنت متأكد وراجن شي ..
واضح اكو شي خايفات منه ليش بعد كل هالسنوات طلبتن الحمايه والا مني والا ب البيت العايشه بي امي ويعتبر منطقه مقطوعه ....
خليتج تبقين فتره بدون ما احسسج اني كاشفجن....

دورت وراج وعرفت مكان مركزج وشقتج وسيارتج وكُلهن ملكج وب اسمج
هو صح شي غريب منين كدرتي تجيبين كل هالمبلغ بس هذا مو موضوعنا.....

دزيت جماعه للحارس يسألونه عن سبب غلق المركز
وجوابه جان

الست زيتونه قتلت طفله وخوفاً من السجن هربت وسافرت للخارج بليله ويوم بدون محد يعرف ..

ورجعنا سألنه كم واحد من الموظفين العندج
جان جوابهم نفس الشي والبلغهم بهالخبر جماعه مجهوله اجو بلغوا الحارس وانطوا فلوس شوكت ما يشوفج يبلغهم حتى ياخذون حقهم منج على الاساس ...
واي شخص يكدر ينطيهم مكانج اله مكافأه......

بعد ما وصلتني هالمعومات اجيت سألتج وانتي ما نكرتي بالعكس اكدتي الي كلامهم ...

سكوتج وعدم جوابج الي بوقتها خلاني بشك ودوامه شلون اكدر احل الموضوع ...

بقيت ادور عنهم بدون ما احد يعرف حتى انتي ما بلغتج ..
خليتج اشهر باقيه عند امي بسبيل اشتغل بهدوء واخلي كُل الأمور من صالحنه ...

مالكيت الهم أثر ولا اكو اي نقطه اكدر اندلهم بيها ...

العقد الموضوع اكثر هروبج بكل مره وتسرعج ....

بعدها التهيت بقضيه مال واحد سياسي وعفت موضوعج لحد ما كدرت اخلص القضيه ...

ومن خلصتها اتفأجات ب اتصالج بيه بوقت متأخر بالليل وتريدين مساعدتي ...

جنت طالع بموعد جداً خاص بدون حمايه عفت الموعد كُله واتجهت الج لان اعرفج تتصلين عليه بس بوقت المصايب ...

اني اصلاً اندل طابق شقتج ومكانها وين بالضبط لان گتلج دورت وراج هواي ...

هروبج جان بي خير الج اول مره بحياتج عنادج يطلع شي زين ..

واحد منهم اثناء ما صارت بيني وبينه ضرب وكعت منه هويه وبسبب استعجالهم حتى يهربون ما انتبه الها ...

اني ما اتبهت عليها بس بعدين من شمرت القميص على الارض يلا انتبهت عليها
اخذتها ضميتها بجيب البنطلون ولان انتي جنتي بغرفتج ما شفتيني من اخذتها
الشي الوحيد الشفع الج وخلاني اتحمل هروبج للمره الثانيه وما احاجيج هو من اخذت هويته
تخيلي شكد ما جنت معصب منج نسيت كُلشي لان هاي ورقه رابحه ب ايدي ...

فعلاً مرات ورا كل شر خير يصير النا بدون ما نحس ...

المهم سلمت هويته لجماعه اثق بيهم وكدوا يجيبوا الي بقوا يحققون وياه يومين بدون فايده ما حصلنا منه اي كلمه
الا بالتهديد يلا حجه كُلشي واعترف عليهم كُلهم ..

وانسحبوا ورا واحد ورا الثاني ..
بصعوبه كدرنا نلگاهم لان طلعوا عايشين ويمارسون اجرامهم بمنطقه راقيه مو اي واحد يدخلها و مستحيل تتخيلين اكو بيها هيج شي

بعدها صارت عندي قضيه كبيره ما اكدر أجلها ضروري اخلصها لان وراها مشاكل ...

أطريت اعوف سالفتج لفتره مؤقته...

وبعد ما عرفتي ب ابنج تعقد الموضوع اكثر وضليت حاير بينج وبين ابني ...

ومجان عندي حل غير اخليج تروحين ما اكدر اضيع ابني ...

ومجان خليتج تروحين واطلعين وحدج لو ما مأمن وضعج بعد ما كُلهم نحبسوا ف مجان اكو خطر عليج ...

اختفيتي انتي بس رغم هذا اني اندل مكانج ...

مرت الاشهر و انشغلت بالقضيه وتحقيق بسبيل اطلعج برائه
وبعد تحقيق طويل واعترافاتهم اثبتت الطفله عايشه وسووا هيج حتى يخلوج تتوهمين انو انتي مجرمه ويجبروج تشتغلين وياهم
همه صح ياخذون اعضاء بس مو اي واحد بس الماعنده احد بالدوله والفقير ف مأمنين وضعهم ....
بس هاي الطفله مكدورا يأذوها بشي بسبب منصب ابوها وهمه اصلاً جان كل همهم ياخذون منه فلوس لان يعرفون عنده هواي فلوس ويدفع كُلشي حتى بس ترجع بنته ...

وذولي العصابه وراهم واحد جبير بالدوله يتحركون ب امره فلهسبب محد يكدر يلزمهم لو يحاسبهم لان كُلها مستفاده من اجرامهم ..

طلبوا مبلغ من التاجر فوك المليار ...
واستلموا وخلوج تعيشين بوهم الجريمه ...
وكُل هالشي تخطيط منهم حتى توكعين بحفرتهم ..

ميعرفون اني بظهرج ولا يعرفون اني منو
بس بعد أشهر من سجنهم واحد منهم اعترف عليج وراد يقدم ادله التصوير السري بسبب التعذيب صاروا يريدون يذبون حرگه كلبهم ب اي واحد ف اعترفوا عليج ...

صارت هواي مشاكل بس علمود اتخلص من الأدلة عليج حتى ما يمسج ضرر ..
لان انتي ما تستحقين تتعاقبين حالج حالهم تعاقبتي بما فيه الكفايه سنه كامله او اكثر عايشه برعب ماعدا الامراض الصابتج ف متستحقين العقاب ...

فتح تليفونه واشر الي اجه اخذه منه
اخذته من ايده مقطع بي نفس الطفله داتطلع من المدرسه ...

_هاي التصوير البارحه صوروا حتى اشوفه الج ..

رجعت التليفون اله وامسح بدموعي طول ما يحجي دموعي وحدها تنزل وكلمه الحمدلله ما فاركت الساني ...

كام اخذ الكوت لبسه واخذ تليفونه واتجه ناحيه الباب

ناديته

طلحه

اندار عليه وايده على يده الباب

شكراً على كُلشي سويته

هز راسه وابتسم

_ميحتاج واجبي
أساساً سويت كل هالشي لخاطر عساف ما اريد يكون دخولج للسجن وصمه عار بحياته ويتعير بيج امك خريجه سجون..
ميستاهل يتحمل اخطائج رغم هو ما شايفج ولا يعرفج ...

من اليوم انتهى دوري وياج ك ابو ابنج ..

من اليوم انفي شي اسمه طلحه وعساف من حياتج ...

تاره عساف مو الج ولا راح يكون بيوم من الايام الج ...

حجه هالكلام وهو مخلي عينه بعيني مجرد ما حجه كلامه الاخير طلع وسد الباب ورا ...

مجانت عندي غير اي رده فعل كمت بكل برود ورا قفلت الباب
دخلت للمطبخ شغلت الجهاز حضرت گهوه ..

شربت اربع فناجين اني واكفه ...

اتجهت للحمام توضيت
فرشت السجاده وصليت ركعتين شكر لربي ...
مددت على السجاده ودموعي صارن يسابقن منو تنزل اول ...
شكد ما جنت فرحانه ب برائتي
سرعان ما تلاشت هالفرحه من كلامه الاخير

طول حياتي واني ما معبره ل اي شخص عن مشاعري الحقيقيه
مشاعري واني جنت متأمله بيوم من الايام ارجع اشوف ابني واخلي سند اليه للكبر
طول حياتي عايشه على هالامل بدون ما اعبر ل اي احد عن هالشعور ..
جنت متأمله يتحقق هالشعور بس مبين من سابع المستحيلات ابني يعترف بيه.....

الدنيا بيها العجب كل ما تطلع وتختلط بالعالم وتتقدم بالعمر اشوف العجب والميصدكه عقلك ...

منو اليصدك اني عندي ولد عمره 23 سنه ...

23 سنه ما شايفته ولا اعرف حتى اسمه ولا اعرف شكله شنو يدرس شنو يحب وين عايش كُلها ما اعرفها ...

طلع ضوا الشمس واني بعدني كاعده على السجاده

صليت صلاه الفجر وفتحت تليفوني اذكرت كلام طلحه عن لالي ..

اني هم اتصلت عليها قبل يومين وقبل لا يجي طلحه وما ردت عليه وكل ظني ما ترد على الارقام الغريبه

رجعت اتصلت اكثر من مره ...
هم ما ردت ...

بدلت ملابسي وطلعت اخذت السياره من الكراج...

ادور على مركز سليمانيه بيها هواي مراكز حلوه ومرتبه يراد ادور ويجوز اطول يلا اكدر الكه ..

نزلت دا اسد الباب وكفت سياره كدامي نزل منها واحد اباوع عليه شايفته بس ما اذكر وين

جان ديريد يدخل لمكتب عقار بصف المركز من شافني ابتسم وتراجع ...

عميد اعرفه من سنوات طويله مره ساعدني بشغله وجانت رتبته ناصيه ضابط يمكن وطبعاً بوقتها اخذ فلوس محد يسوي بلاش ...

اتقدم ناحيتي اكلني اكل بالسلام رديت عليه بكل احترام ..

جلب الا اعزمج على الغدا رفضت رفض قاطع
طلب رقمي حتى يسلم ويسأل اني بكل حسن نيه انطيته رقمي ....
كل ظني بعده مثل قبل انسان زين...

صعدت السياره ورجعت للبيت صليت ونمت
ما كعدت الا على صوت التليفون يتصل ...

نزلت من السرير وتقدمت اتجاه الصاله لان نسيته هناك وصوته عالي من يتصل ...

رقم غريب ..

_ممكن نحجي اني جوا بحديقه المجمع

فتحت عيوني دا استوعب
بعدين ذكرت يشبه صوت العميد ..

نعم منو وياي تفضل

_ اليوم الصبح شفتج شنو نسيتيني

تفضل اعتذر ما حفظت رقمك

_ اصعد الج شقتج ب اي طابق

عفواً شنو تصعد

سكتت المفروض احجي بنبره اهدء ..

_اريد احجي وياج موضوع مهم

اعتذر ما اكدر ادخل احد لشقتي الكل يعرف اني عزابيه ...
تكدر تحجي هسه على الخط ...

_لعد انزلي الي للحديقه موضوع يفيدج

ماشي

انزعجت من اصراره وما تقبلت طريقته بالكلام ...

غسلت وجهي وشديت شعري ونزلت بالمصعد اتأفاف هسه يطلع موضوع تافه واني عفت نومتي ...

لكيته واكف قريب على سيارته

تفضل

_ زيتونه اريد نتفاهم اني وياج نروح للمطعم

لا اعتذر ما اكدر

_ماشي لعد براحتج نحجي هنا وماكو احد مو مشكله

من قبل كم سنه شفتج وانتي بعقلي بس التهينه ب امور الدنيا وما لكيتج ولا جان عندي رقمج
وهسه التقينه بعد كل هالسنوات ..

رفعت حاجبي اله بدون ما يكمل عرفت قصده متعوده على هاي السوالف مال الزلم متخلص ...

_نزوج وشنو اتطلبين اني حاضر بس بشرط يبقى زواجنا سري مجرد عقد شيخ ولمده كم شهر وكل واحد يروح لطريقه

روح دور غيري هاي السوالف مو عليه

_انطيج شيك وانتي تكبين المبلغ التريدي اعتبريها صفقه رابحه الج ...
وبيت ملك ب اسمج وسياره البالج

انطيهن لمرتك اولى بيهن مني والاعرفه عندك اربع شباب ...

_لهسبب ما اريد اعلن زواجنا سري نمتع نفسنا بيناتنا منو اليدري
وانتي دخلتي عقلي قوتج عنادج تجبرج احب هيج نوع من العناد
احب المراه المتتحصل بسهوله
اول وتالي راح ترضخين الي وتوافقين ...

رفعت اصبعي بوجهه
دير بالك بعد تتقرب مني مو زيتونه الينلعب وياها وينحجي وياها بهالطريقه اني وحده بايعه الدنيا افضحك فضيحه وعود خلي الرتبه تفيدك ...

_احب الوكحات نوعي المفضل يجي يوم وتقنعين

عفته يحجي وحده وصعدت دخلت للشقه
لعبت نفسي يموتون على النسوان اهم شي النسوان عندهم بس شاف صارت عنده فلوس ومنصب عباله يشتري الكل بفلوسه ...

مرت الايام واني مستمره اتصل على لالي وماكو مترد نوب صار يطلع مغلق ...

بعد ما مر اسبوع على الموضوع ونسيته وانطيته حظر ...

باب الشقه يندك ...
باوعت بالعين السحريه خدمه التوصيل ..

فتحته

_تفضلي مدفوع الحساب

خلاها ب ايدي وراح ..

سديت الباب

بوكيه ورد كبير وبنصه علبه سوده ..

خليتها على الطاوله وصرت افتح بيها ..

تليفون جان نازل جديد وسعره يوصل للمليونين بالعراقي لونه ماروني ...

ماكو لا بطاقه لا شي هسه اني منين اعرف من منو ...

طلحه مستحيل يسوي هالسوالف ...

ضليت حايره انتبهت بداخل العلبه كرت ..

_غاليه وتستاهلين الغالي
انتظرج بمطعم .... ساعه 9

اجيت اشمر البوكيه على الارض بس لزمت اعصابي ورجعت غلفتهن ...

غيرت ملابسي ولبست بنطلون اسود وقميص اسود ردانه طويل لاول مره وخليت مكياج قوي
حتى يعرف النسوان شنو اسوي ..
لبست الكعب واتجهت لعنوان المطعم سويت كُل هالشي علمود ارجع الدزهه..

دخلت للمطعم رقم الطاوله سحب الكرسي وكعدت مقابيله خليت رجل على رجل ..

الكرسي البصفي خليت عليه البوكيه

هديتك مرفووضه وممنوع بعد ادز اي شي

خله كدامي ورقه وسويج سياره

_اكتبي المبلغ التريدي وهسه اتصل بالشيخ يعقد النا ..

صحن كدامي دفعته حيل عليه
فز وكام وكف حتى محد ينتبه من الكاعدين ..

مشيت قريب عليه وهمست

تحلم تحصلني لا انت ولا غيرك
سوالف الطايح حظها عوفها لا والله افضحك بمكان عملك للمره الثانيه اگلك اني وحده بايعه الدنيا ...

باوعت عليه ب استهزاء وطلعت من المطعم
برد گلبي خليته يدفع حساب مطعم وتليفون وبعدين رجعتهن اله
المهم خسرته فلوس حتى يبتعد زلم مجر عدل .....

مجرد ما صعدت بالسياره دا احركها وانتبهت بالمرايه خشمي داينزف بشكل فضيع وما حاسه ..

سحبت كلينكس نظفته شويه يلا توقف النزف ما اهتميت ...

دا اصف السياره بكراج المجمع حسيت بدوخه قويه
خليت راسي على الستيرن بتعب ...

ليش دائماً يشوفوني مجرد سلعه وغير صالحه للزواج ويريدوني مجرد متعه الهم
كل اليتقدمون يريدون زواج سري او زوجه ثانيه بحياتي مخليت احد يطخني او يجرأ يلمسني صح جان عندي هواي اصدقاء بس كُلهم علاقتي بحدود وياهم ..
لان عندي فلوس ومستقره لو لان اسافر وادخل واطلع بكيفي ..

ليش محد رادني بالعلن ..

شنو الناقصني والدي دكتور امي استاذه ..
متخرجه وعندي شهاده ومعتمده على نفسي ومستقره مادياً
ليش المراه القويه يشوفوها وحده وكحه وماعدها اخلاق ..

نزلت من السياره والم رأسي موتني صار فتره مدا يهدأ بس هسه اكثر ..

دخلت للشقه ضليت لازمه راسي وافتر تعبت ألم ذبحني ذبح ومابيه اطلع للمستشفى ..
شربت حبوب منوم بس اريد انام ومدايفيد ...

دخلت توضيت وكعدت اصلي
فتحت القرآن داقرا وصارت كدامي حياتي كُلها خلال هالسنه ..

اختصرها بجمله ..

ربّ ضَاره نافعه .......

خطفي للطفله بدون علم احد دخلني بحاله نفسيه شديده وخلاني اخسر صحتي ونفوذي وعالمي البنيته طول هالسنين ..

بس لو ما صار الي هالشر
جان اني لحد هالحظه مطنشه الدنيا وميهمني غير الفلوس وابني حياتي والشهره واطلع وادخل ويه المشاهير ما اصلي ولا اعرف اصول الدين  ..

ولا جان شفت ابني ولا عرفته لو ما هالحادثه جان مستحيل اشوف ابني طول حياتي ...

ياربي الدنيا شكد صغيره تغير حالك ب لحظات ...

مرت الايام ويوم يتبع يوم لحد ما صارت شهر كامل ..

دزيت رساله ل لالي كتبت الها مشتاقتلج وماكو مغلق
ضل بالي عدها وقررت هالفتره اروح الها بس لازم ارتب وضعي لان اتفقت ويه واحد اشتري منه المركز ..

راسي عذبني من الألم تعبت منه
نزلت للصيدليه شوفتهم صوره الوصفه واخذت منهم علاج اكتأب الجنت اشربه واشرب وياهن منوم ..

صرت اخذ العلاج وما يفيد بس يخليني انام فتره طويله لدرجه افقد وما اعرف شوكت اكعد ..

خشمي بس ينزف ومامهتمه الهن ...

بيوم قررت ادخل لصفحه طلحه على الفيس
بلكي الگه عساف ويه الاصدقاء اريد اشوف وجهه عن قرب ..

لكيت صفحته ب اسم عساف طلحه

ناشر صوره ويه طلحه
وناشر صوره واكف كدام جامعه الاسكندريه كليه الطب بمصر ...

ومن خلالها عرفت ابني طالب طب ب مصر ...

نزلت دموعي واني اباوع عليه جنت متأمله تكون سند الي وتتفهمني حتى لو ماكو مشاعر حب اتجاهي بس على الاقل عندي شخص من دمي ولحمي ...

غلقت التليفون واحس الدوخه زادت الألم فضييع ..

نزعت حجاب الصلاه ...

وشربت الحبوب ونمت

ما كعدت الا ثاني يوم المغرب والمخده عباره عن دم ..

قررت اروح للمستشفى
كمت دا ابدل ومابيه خمول والالم وخشمي هالمره مدايوكف نزل كل مره يبقى شويه ويروح ...

صعدت بالمصعد اختنكت كمت كوه اجر النفس
والارضيه صار عليها دم من نزيف خشمي
مجرد ما هبط المصعد
اني دخت وما حسيت بشي بعد ...

كعدت لكيت نفسي بالمستشفى وياي وحده شايفتها بالمجمع ..

_مابيج غير العافيه لو ما زوجي راد يصعد بالمصعد وشافج غركانه بدمج جان هسه انتي صاير بيج شي لا سامح الله ..

شنو بيه

_والله مادري دكتور منتظر واحد من اهلج واحنا اتصلنا عليهم وصار هواي من اتصلنا اكيد على جيه

باوعت عليها ب استفهام
منو اهلي ماعندي احد بسليمانيه ..

_مادري زوجي على منو اتصل سأل الحارس عنج والحارس مال مجمع انطاه رقم ..

راحت المراه
وبقيت وحدي مثل كل مره من اوكع محد وياي ولا احد الي
دخلت الـ 35 من عمري واني بعدني على هالسيناريو ...

صرت اضرب براسي من الألم انادي الممرضه تكُلي هسه يجي الدكتور ..

دنكت راسي ابجي دائماً وحددي دائماً لشووكت ابقى وحيده ..
ياريت لو عندي اهل يخافون ويهتمون لامري ياربت لو عندي احد يهتم الي ...

فزيت على صوت طلحه فوك رأسي واكف ومخلي ايده بجيوبه ...

_تاره بيج شي

لا واتمنى هسه تطلع انت مو متريد اعكر حياتك وحياه ابنك

محجه شي
دخل الدكتور راحوا يحجون على صفحه وطلحه سحب منه اوراق وصار يقرأ بيهن
اندار يباوع عليه وفاتح عيونه بصدمه ...

شلعت الكانوله من ايدي وشمرتها ..
بعد ما طلحه اخذ الدكتور وطلعوا محد اجه بعد كمت وطلعت من الردهه...

واكفه على الشارع انتظر تكسي ماكو الوقت متأخر ومحد دايوكف الي
امسح بخشمي الينقط دم
والخمول دمر جسمي صعبه عليه اضل واكفه هواي ..

شفته من بعيد دايمشي ب اتجاهي

انداريت عليه

طلحه والله مابيه احجي عوفني وروح مالي خلك يوميه مشكله تعبت هسه ملكوا غيرك يتصلون عليه

_امشي ادخلي للمستشفى

استغفر الله ربي
خليت ايدي على خشمي الينزف ودرت وجهي ..

_تاره وضعج مو زين مره وحده لا تعاندين

وكفت تكسي صعدت بسرعه ..

اول ما وصلت رحت جبت فلوس من الشقه  وانطيتهن للسايق ...
دخلت سبحت ملابسي كُلها دم ..

الباب يندك بقوه ..

بدلت واتجهت للباب
باوعت من العين السحريه طلحه
خل يدك ولا افتحه اله

سحبت الخاولي خليته على خشمي المدايوكف نزف ..

بدايه 2019 وبنص الشتاء مستحيل يمر اسبوع بدون مطر بسليمانيه ..

فتحت البلكونه اريد اتنفس المطر بس ما اكدر تليفوني يتصل والباب يندك

فتحته اله

واكف وجهه كُله قلق . ..

_عبالي صار بيج شي ومتفتحينه

شتريد هسه مو داشوف مابيه شي يلا روح هالمره عساف ماله دخل بالسالفه حتى تكول لخاطره ..

اجاهل كلامي ودخل اجيت اسد الباب بوجهه بس بقبضه ايده فتحه ...

بكل برود نزع سترته وسحب كرسي من الطاوله وكعد

تعبت من الكل ومالي نفس اجي احجي واتعارك هو يمل ويروح وحده اعرفه مستحيل يسوي شي الي..

دخلت للبالكونه اكثر مكان اكعد بي من تمطر الا يخلص المطر يلا ادخل تعودت ...

مجتفه ايدي من البرد واكفه والخاولي ب ايدي كل شويه امسح بخشمي الينزف ..

اجه وكف بصفي وصافن على السما اتبللت ملابسه مي وهو بس صافن رغم ادري بي يكره المطر والاجواء الشتويه ...

_تاره

مرديت

حاوط كتفي ب ايده

اجيت انزلها شدد قبضته

_بعد لا تكولين انتي وحيده اني وياج وموجود حولج بكل وقت تحتاجيني بي

سحبني عليه وحضني

احاول ابعده ما يوخر هو اقوى مني

_تاره تقبلين نزوج

ظليت صافنه من حجايته فتحت عيوني كُلهن ورفعت راسي اله
صارت عيني بعيونه   ...

باسني من فروه شعري

همس ب أذني

_اي نزوج ما انتظر موافقتج ...

يتبع ....