رواية الكارمــا الفصل التاسع والعشرون 29 - بقلم آيــه آلـ صبري

اذا انت غشيم وعرفو يغشوك
شنو ذنبي ثمن لخطائك اني ادفع
ثنة رجلي الحزن والراس طخ الگاع
وركعني وتكلي تهون لا تركع

سمير صبيح

_______________

لالـي ..

ايـها العائد بعد كُل هذا الـ غـدر ..
الـم يصل اليك خبـر ؟
فـ انـا لـم اكُن على ما كُنت عليه سابقـاً ..
ماتت لهفتي
زاد غروري
زاد تكبري
زاد طغياني على الحقراء الذين هم أمثالك ..

فـ انـا لـم اعُد انـا ..

مرت الأيام متشابهه علاقتي ويه ازاد قوة أكثر وأكثر ما يمر يوم اذا ما يحجي وياي حتى لو ماعنده مجال بس يتصل ثواني ويغلقه
حنيته حبه احترامه اهتمامه بـ أدق التفاصيل كُل هالتفاصيل خلتني تلقائياً اتعلق بي..
كلام الغزل والحب كُلهن اسمعهن منه بس لحد هسه ما سمع مني اي كلمه غزل ولا اعتراف بحبي وأبد ماضغط عليه بالعكس يكُلي هالكلمه من تحسيها فعلاً طالعه من گلبج يلا عود كوليها الي ..

أمي قاسيه ويه الكُل حتى ويه طلابها لدرجه من يذكرون الطلاب المعلمات القاسيات جانت أمي من ضمنهن..
شگد ما تحبني شگد ما شديده وقاسيه خاصه بعد استشهاد والدي بـ أنفجار بـ الشعب هو وعمي بس عمي عاش والدي استشهد ..
تعرفت على والدي من خلال الوظيفه هو معلم وهي معلمه وهم جيرانهم جانوا ساكنين بالمنصور
بعد زواجها انتقلوا للشعب وأطرت تروح ويه والدي للشعب تسكن طول الوقت مشاكل وما راضيه على انتقالهم بس من أخوها راح لـ بـابـل وما بقى احد عدها بالمنصور اقتنعت بـ الإنتقال ..
بعد استشهاده باعت بيتنا ورجعت للمنصور اشترت بيت صغير ما حبت تبقى بالشعب ويه عمامي اصلاً كُلش تضوج منهم
بهالاحداث جان عمري 9 سنوات
تحملت مسؤوليتنا ومحد جان يسأل علينا ولا واحد من عمامي محد بحال أحد من ابتعدنا عنهم زاد اهمالهم أكثر خلصوا من مسؤوليتنا ..
بطفولتي جنت إجباري ادرس هواي حتى أطلع الاولى لان ما تريد المعلمات الوياها يشوفن بنتها مستواها ناصي وما تقبل احجي أو العب ويه اي وحده الا هي تعرفهم ..
تغيرت بعد ما تعرضت لـ ابشع خيانه من لحمي ودمي صارت تخاف عليه وتريد بس تشوف ضحكتي ..
ازاد أكثر شخص تشوفه مناسب إلي لدرجه أسمع دعائها بـ الصلاه عمامي يبتعدون عني ويوافقون على ازاد ..

واكفه بـ الصيدليه مثل كُل يوم عليها زخم ما نلحك رغم وياي دكتور ثاني واكو هم طلاب عدهم تدريب
بقت دقايق ويخلص دوامي من البرد بس أريد ارجع للبيت الشتا علاقتي كُلش سيئه وياه طول الوقت منشوله وجهي أحمر مو من نوع التتحمل البرد ..
نزعت الابكوت ولبست الكوت حتى أطلع

دا أمشي صارت سياره ازاد گدامي ..
وكف ونزل منها بـ اتجاهي
خله ايده ورا ظهري بدون ما يطخني ..
حجه بنبره حاده
_ روحـــي بعد لا تفتحين شعرج بـ الدوام

صعد قبلي فتحت الباب وصعدت بالصدر لان أساساً جان دازلي رساله ضروري يشوفني اليوم..
سديت الباب ورأي يمشي بـ الطريق المتجه البيتنا بدون ما يحجي اي كلمه..

ليش هالكلام الحاد بخصوص شعري

_ ما احب أحد غيري يتأمل شعرج وانتِ فاتحته وتمشين

بـ بالي اتحجب قبل حتى لا تحجي بس محتاجه فتره اتأكد من نفسي البسه للأبد ان شاء الله..

_لا ما أريد اجبرج على شي ومن فتره ناوي احاجيچ خوفاً عليج ومن حبي الج تمام حبيبي

ماشي بعد ما افتحه
حسيته ضايج حتى بكلامه حاد..
ازاد بيك شي شو مزاجك سيء مبين

حجه بدون ما يباوع عليه
_لا بس مشتاقلج صار هواي ما شايفج

ترا وضعك مو طبيعي حتى كلامك أحسك گوه دا تحجي ..

_ دائماً اكُلج انتي روحي وراحتي لو بيه شي جان گتلج ..

ـ بداعتي احجي راح أضل قلقانه اذا ما تگول

خفف السرعه وباوع عليه
_ليش حلفتيني هاي آخر مره تحلفيني بداعتج

ملامحي تغيرت خفت لا يكون صاير شي
اي كمل

_ البارحه دزيت مجموعه شيوخ معروفين كُلش بالمحافظات الجنوبيه بعد ما فهمتهم سالفه عمج وابنه حسب الحجيتي الي وهم دزيت مجموعه دكاتره كبار بالعمر أقاربي لبيت عمج الكبير رفضوا بشده بس كُل هذا بكفه وتمسك سنان بيج بكفه ..
لالي مستحيل أحد يتمسك بـ أحد إذا ما متأمل بي وما شايف منه موافقه

شنو قصدك

_ جانت أكو علاقه بينكم

درت وجهي عنه
دا شكك بيه

_طبعاً لا بس أريد أعرف كُلشي عنه حتى أعرف أتصرف..

لا ماكو

_ قبل لا تعرفيني ليش ما وافقتي عليه رغم حسب ما شفت كامل المواصفات منصب عالي من ناحيه الماديه هم متمكن وحالته فوگ الممتازه ورجال متمسك بيج شي غريب مو ..

ازاد شنو دا تقصد بكلامكم
ما احبه واضوج منه فلهسبب رفضته
هز رأسه بدون ما يحجي وكف السياره گدام بيتي
نزلت هالمره بدون حتى ما يودعني ..
توقعت أقاربي حاجين عني كلام محلو وتأكدت من سولفت أمي الصار اليوم بالتفصيل ..

أسبوع كامل ما يتصل عليه ولا حاجي وياي آخر مره شفته من وصلني حتى للصيدليه جان يجي علمودي هسه أبد ولا يجي ..
گلبي نار طول الوقت متضايقه تغيره المفاجاه خلاني أعرف قيمته واعرف هو شنو بالنسبه إلي
اكتشفت نفسي مو بس حابته هايمه بي ..
تندمت على كُل لحظه ضيعتها بدون ما أعبر اله شگد احبه دائماً جان هو اليبادر بدون ما ينتظر مني شي ..

خلص الأسبوع ومرت الأيام ركض لحد ما صار أسبوعين نهائياً ما شايفته ولا حاجيه وياه..

گلبي آذاني أكثر من عرفت من امي ونسوان عمامي..
خلال هالاسبوعين راجع متقدم مرتين وهم رافضين بعده لحد هسه متمسك بيه رغم الكلام المحلو الوصلوه وجان رايد مني تبرير وما بررت ولا فسرت بالعكس ما رديت..

فزيت على صوت اشعارات تليفوني
ماعندي أحد احجي وياه وعلاقتي قويه بي غير ازاد وتاره ..
فتحته ومثل ما توقعت ..

_اطلعي برا واكف انتظرج
رديت بسرعه
ترا الساعه بـ 12

_امج تدري أتصلت بيها قبل لا اراسلج

شنو

_يلا يمعوده جمدت من البرد افتحي الباب

جنت لابسه تراك قديفه وشعري بس رافعته
خليت كبوس التراك على رأسي
اتجهت لغرفه أمي لكيتها كاعده تباوع مسلسلها

ماما ازاد متصل عليج

_اي طلب مني يحجي وياج بالحديقه عشر دقايق ويروح گتله ادخل للاستقبال بارده موجوده اني وياكم بس ما قبل يدخل..

وقبلتي

_اي عادي لان هذا ازاد مو اي وأحد لو غير شخص جان رزلته وطردته..

يعني هسه أطلع افتح الباب

_اي عشر دقايق لا أكثر

طلعت للحديقه متوتره من لقائنا بعد كُل هالمده
فتحت الباب دخل للحديقه
سديت الباب ورا ..

واكف مقابيلي ملامحه كُلها تعب لحيته عاليه ..
حجه بثگل
_يا يابه شگد مشتاگلج
تقربت الـه
حجيت بكُل خوف ولهفه وبدون تردد
_مو بگدي
وينك كُل هالفتره ها وينك متسأل متگول وراك وحده ميته من القلق عليك ..

ابتسم
_ كُل عام وانتِ بخير يا قمر الصيف وشمس الشتاء
احلى من يدخل الـ 26 أميرتي..

وگعت بحبك لدرجه صرت أغلى من روحـي ..

رفع حاجبه فاتح عيونه متفاجأ تقرب عليه يلعب بخصلات شعري عينه بعيوني ..
_هواي عليه هالكلام توقيتج مو مناسب هسه وين تريديني أروح بعد ما فجرتي كُل هالمشاعر
بس وياج حسيت كُلي عشگ لالتي ..
انتِ الوحيد العشت وياها العشگ
وعرفه گلبي لاول مره..
حبچ بگلبي كُل دقيقه يكبر ..

رفع ايده الثانيه لازم كيس أسود ما انتبهت عليه من دخله فتحه وطلع منها علبه بيها سلسله مرصعه بـ الألماس ..

نزعت الكبوس وخرت شعري من رقبتي درت ظهري اله..
ايده حاوطت رقبتي حتى يگدر يسدها ..
اصابعه تمشط بخصلات شعري
همس بـ أذني
_احبچ لالتي
ابتسامه وحده منج تردلي روحـي ..

التفتت مبتسمه عيونه تتأملني بكُل حب ..
مستحيل انزعها الا اذا انتَ طلبت مني انزعها

حتى ابتسامته بيها تعب كانوا دايبتسم حتى بس اكون سعيده ..
تقربت عليه أكثر وجهي صار بوجها ..
خايفـه

_من شنو

دنگت رأسي مبعده دمعتي عنه
خايفه لا ما ننجمع خايفه لا تكون مو من نصيبي

زفر نفسه بقله
_لـ آخر يوم بعمري ابقى أحاول لحد ما تكونين من نصيبي دائماً ابقي اتذكري انتي روحـي وما أتخلى عنج ابداً واي شيء ايصير بلغيني..

ليش جنت مختفي عني وليش ما تكُلي من داتروح لعمامي وتتقدم صار كـم مره تروح واني آخر من يعلم

_ما أريدج تعيشين شعور القلق والخوف والانتظار
ما أريد دموعج تنزل بسببي ولا تتأذين عوفيني ابقى أحاول وحدي ويه عمامج ..

بعد ما انفتح هالحديث دار ظهره فاتح الباب صعد بسيارته مودعني بـ ابتسامه كُلها حيره سديت الباب ورا ..
شگد ما فرحت شگد ما گلبي انعصر واحنا نهايتنا مجهوله بسبب أشخاص ما الهم اي قيمه بحياتنا كُل همهم شلون يخلونه نكون حزينين..
لگيت أمي بعدها كاعده تنتظرني شافت الگلاده برقبتي اكتفت بـ الابتسامه بدون ما تحجي اي كلمه ..

ثاني يوم رجعت من الصيدليه تغديت ودخلت أسبح
طلعت من الحمام انشف بشعري واسمع صوت أمي بـ الصاله تحجي بعصبيه وصوتها كُل شويه يعله لفيت المنشفه على شعري المبلل
اتجهت فتحت الباب الداخلي صار گدامي سنان
باوع عليه بسرعه

_واني اگول ليش ترفضيني وما تقبلين طلعتي عايشه قصه حب ويه الدكتور ازاد الكلب يوميه دازته علينه بـ احلامج تصيرين الغيري لو إلي لو للموت ..

صرخت بوجها
لا تجيب طاري ازاد على لسانك انتَ الكلب والحقير
تقرب بسرعه لزمني من زندي يريد يضربني

وخرررر ايدك ولو واحد مثلك عديم غيره وشرف شنو اتوقع منه يعرف الحلال والحرام ..

نزل أيده خازرني
أمي تحاول تهدي الوضع ..
_ هاي صار كم مره تگوليها واگول عصبيه ما احاچيج
ماكو بشر ما يخطأ وگتلج تندمت وطلبت منج السماح الف مره شلون بس گليلي شلون اخليج تنسين ..

اتهسرت يحجي بكل استفزاز
اطلع ما أريد منك غيرر تعوفني كل الدا اسوي حقاره وخباثه بيه حرررام والله حرررام عليك موكف حياتي صار سنين ...

دار ظهره دايطلع وقبل لا يطلع گال
_هذا ازاد نهايته على أيدي إذا ما يبتعد عنج ..
طلع ورگع الباب ورا ..

انداريت على أمي
ليش خليتي يدخل

_شسوي اله اذا هو غصباً عني دخل ماكو لا إحترام ولا مستحه واذا اطرده عمامج يطلعونا مو زينات ونطردهم ..

دخلت لغرفتي كعدت على السرير امشط بشعري ودموعي تنزل لشوكت تبقى حياتي واكفه على نفس اليوم كُل ما اگول نسيت يطلع شي يذكرني ..

تليفوني يرن ازاد
فتحته بعد ما عدلت نبره صوتي ما أريده يعرف جنت ابجي ..

_لالتي الكلام الدايوصلني عنج محد يتقبله ولا أحد يتحمله كُلي ثقه بيج وما مصدكهم أريد اسمع منج ما اسمع من غيرج..

يعني شنو

_كُلشي احجي إلي بالتفصيل سالفتج الحقيقه ويه سنان شنو جنتوا مخطوبين لو تحبون بعض..

ازاد

_روحــي

ما اگدر احجي والله اموت اذا أرجع اتذكر التفاصيل..

_ماشي هاي هيه براحتج بعد..
غلقه ..
ما تحملت ازعله رجعت أتصلت بسرعه فتح الخط..
حجيت قبل حتى لا يحجي ..
سنان ابن عمي وأكبر مني من الطفوله وعيت على اهتمامه وحبه بس ما جنت أعرف هالشي حب
من الطفوله كُلها تگول لالي لـ سنان وسنان لـ لالي
زرعوا هالفكره براسنا حتى لو جنه ما نفهم بس بسبب كلامهم صار بينا انجذاب..

كبرت واحنا علاقتنا علاقه حب بريئه لا احجي وياه ولا يحجي وياي لان ما أقبل نظراتنا هي جانت تفسر مدى حبه إلي..
بعد ما تخرج وتوظف بـ منصب عالي كبر بالعمر واهله يضغطون عليه يتزوج وظيفه وعنده بيت وعنده بعد ماكو حجه حتى ما يقبل يتزوج ..

بـ الصف الخامس اعدادي تقدم إلي وقروا بس الفاتحه بطلب مني وقررنا عقد الشيخ والمحكمه والعرس بس اتخرج من الساس ..

ما أسمع غير صوت الجداحه ورثها..
همست
مو قصدي احجي هالتفاصيل ادري اي رجال ما يقبل يسمع هيج شي بس اني من حبي الك دا احجي كُلشي وما اضم عنك..

ما رد ..
رجعت كملت ..

بعد كُل هالحب والأوهام العيشها الي
خاني ويه أختي بـ بيتي بنفس البيت الـ بنيت أحلامي وياه ..

شهكت من گلبي بعد ما صار موقفهم بين عيوني
حجه واضح الصدمه من نبره صوته
_شنو معقوله

ازاد شفته على نفس الفراش هو وياها گلي شلون گدرت اعيش واني أشوف اختي هيج طاعنتني ..
بسببه كرهت كُل الزلم بسببه ماعندي ثقه بـ أحد
وفوك كُل هذا محد عرف بـ السالفه غير اهله و واحد من عمامي وسدوا السالفه وما قبلوا حتى احجي بيها وافق يتركني و يفسخ الخطوبه مقابل أسكت وما اشوه سمعتهم ..
طلعوني گدام العالم اني الخطأ واني الفسخت الخطوبه واني السبب مني بحجه دراستي تركته ..
انتَ الوحيد الگدرت اثق بي وافتح اله گلبي من جديد
بدون ما أسمع رده شمرت التليفون دافنه وجهي بالمخده انهاريت الشهگه كطعت گلبي ..
دخلت أمي على صوت شهكاتي كعدت على السرير تحاول تهديني ..
خليت رأسي بحضنها بـ ايدها تمسح على شعري بهدوء ..

_ازاد دايتصل عليه تحجين وياه لو لا

لا هسه تعبانه من اصير زينه عود احجي وياه
ردت عليه و طمأنته عني بالي مو يمهم دموعي وحدها تنزل ..
غلقته منه وصارت تسألني ..

_شنو حجيتي اله الرجال صوته مو طبيعي

كُلشي

_احسن لا تضمين عنه شي ..

بعـد مرور خمسـه أيام ..

_فـ ان قبلتي قولي نعم قبلت وانتَ وكيلي

نعم قبلت وانتَ وكيلي

صوت المباركه والصلوات على النبي ملئ المكان
فاصله عن هوسه المعازيم وكلامهم
تقرب گدام الكل مسك أيدي طبع عليها قبلاته ..
همس بـ أذني
_مو گتلج انتي الي ما تصيرين الغيري

سحبت أيدي متجاهلته

_المهم صرتي زوجتي

هاي اذا گدرت تحصلني يوم زواجي هو يوم وفاتي عندي إستعداد اموت وما ابقى على ذمه واحد مثلك الموت أهون من وأحد قذر ومنحط مثلك يلمسني ..

حاوط كتفي بـ أيده
حركت اكتافي نافره ومتقززه منه ..

____________

تـاره ..

انـا وانـتَ مثل الحـادي والثلاثيـن مـن ديسمبر
والأول مـن ينايـر
قريبون جـداً لكـن بيننا عــام ..

كُلشي بهالدنيا اله نهايه الا علاقتي ويه طلحه محد يعرف شلون راح تنتهي ويه كُل هذا الضياع والحطام ..

عيوني المجمره تتجول بين عيونه الكُلها كره
لازم فكي بكُل قسوه ما جنت احس بـ الألم بگد ما احتركت روحي من كلماته الندمتني على قسوتي وتجاهلي لمشاعره بكُل مره ...

_مـا مريت صدفـه بـ بـالج من سويتي هيج
مـا فكرتي شنو موقفـج اذا عرفـت
معقـوله تطلع منـج ..
احجي ليش ساكته شنو تريدني أسوي واني اشوف صورج ويه رجال بگد ابوج كاعدين على نفس الفراش شنو موقفي من يجون يكولون هي هاي ام ابنك تزوج بالسر شهر شهرين وتعوفهم تعرفين شنو يعني ..

طلعت آخر كلماته بـ قمه الاستهزاء..
رفعت ايدي نزلت ايده عن فكي ..
لا ما احجي ولا اوضح والشفته بـ الصوره زواجي منه بالحلال ما مسويه شي خطأ وحتى وان كان كلامك صح ما الك اي حق حتى تسألني ولا تحاسبني انتَ مجرد طليقي وابو ابني لا أكثر ولا أقل بالنسبه الي ..

نزل ايده خلاها بجيوبه نظراته بين الصدمه والكره مثبتهن بعيوني بكُل برود ..
_ طلع ما الي حق اعاتبج ولا احاسبج
ليش لهدرجه متمسك بيج رغم ما محصل منج غير الرفض والتعب ما بقيت شي ما سويته ما بقيت محاوله ما حاولاتها حتى بس نرجع ..

تقرب عليه وكف گدامي
صفك ايد بـ ايد بكُل قوه
_طلعتي مو بس من عيني حتى من نفسي
مشى بيـه العمـر واني احـن الـج ..
كل ما اشوف مراه تصيرين بين عيوني
وكانوا تغشمين نفسج ما تعرفين شنو انتي بـ بالنسبه الي حتى جايه تمنعيني من محاسبتج
جنت كُل ما نگول انتهينا ارجع اتمسك بيج واحاول بس هالمره بعد لا اريدج ولا اريد أشوف وجهج ...

دگ على يسار صدره بكُل قوته
_حتى هذا راح ادوس عليه واطلعج منه ..

دنگت رأسي ما اريد عيوني تلتقي بعيونه ويه هذا حجيه ..
دار ظهره طلع خارج الصاله نظراتي تتبعه من الجدران الزجاجيه وكف گدام المسبح يخابر ..
عيوني تتجول على الصاله الـ مابقى منها شي صاحي الزجاج متناثر على الارضيه الفوضى محتله المكان ..

تليفوني يرن مالي نفس حتى اطلعه من جيبي واعرف منو ..
هالمره النهايه طلعت من طلحه مو مني وفعلاً راح تكون نهايه بدون رجعه ..

ما أحس الا صار فوك رأسي سحبني من زندي بكُل قوته وكفت أمشي وياه بدون ما اعرف سبب استعجاله
فتح باب غرفته دخلني بيها
حجه بدون ما يباوع عليه ..
_عساف واكف بالباب لا تخلي يشوفج ولا يسمع صوتج بهذا وضعج ..

قفل الباب من برا ..
كعدت على الأرض سانده ظهري على الباب
دموعي تنزل وحده ورا الثانيه
خليت ايدي على حلگي اضم شهكاتي
اذيته هواي بكلامي جرحته قللت من مشاعره واهميته يوم عن يوم علاقتنا تكون نحو الاسوء فرصه رجعوني تقل وتختفي للنهايه ..

أسمع صوت عساف يحجي وطلحه يرد عليه بـ برود قربت أذني على الباب ..
_ هاي شكو شنو الـ صاير شو ماكو أحد بـ البيت لا الحرس لا الخدم ما الها تفسير الا حرامي داخل للبيت مفلشه ..

_ لا أني

_ انتَ زين ليش اول مره بحياتي اشوفك ما مسيطر على أعصابك

طلحه ما رد على كلامه ..

_ توقعت ما تجاوب واضح الموضوع يخصها ماكو غيرها الوحيده الـ تگدر تهديك وتعصبك ..
ليش سياده القاضي الناس تتعلم من هدوئك وسيطرتك على أعصابك مفلش البيت وياريت لو تسوا هسه هي كاعده بـ بيتها مرتاحه وانتَ أعصابك محترگه ..

عله صوت طلحه
_عساااااف سد الموضوع

_لا ما ينسد من يوم الـ دخلت النا لليوم والمشاكل وحده ورا الثانيه حتى ابنك وكفت بوجها وبقيت أشهر ما تحجي وياي علمودها الباعتك مره تبيعك الف مره .. شگد ضحيت علمودها وشگد تنازلت كُلنا نشهد على هالشي وهي بس تبيع بيك

_لا تدخل الموضوع ما يخصك

_يابه والله ادري بيك تحبها بس كافي دائماً انتَ الطرف المضحي علاقتكم سامه صار كـم سنه تنتظرها ..

_عساف اتركني أهدئ بعدين نحجي

_ براحتك طالع أدخن ارگيله بـ الحديقه فـ اذا ناديتني وما سمعتك معناها برا
وراح أتصل بالعامله ترجع باجر من الـ صبح حتى تنظف البيت خوما يبقى هيج الزجاج بكُل مكان ..

_ماشي

_ أوصي عشا الك وضعك ما عاجبني خليني افحصك أشوف ضغطك ..

_ لا مابيه شي من اتعب عود ابلغك ..

_ ماشي

صار المكان هدوء فوك النص ساعه كاعده بـ مكاني ماكو لا صوت ولا حركه بالبيت فجأه ساد الهدوء ..
بقى يتردد بذهني وصف عساف لـ علاقتنا بـ السامه
مسحت دموعي فعلاً حتى الحب مدا ايفيد بترتيب وتصفيه علاقتنا كُل الظروف والأحداث دا تدمر علاقتنا تدريجاً لحد ما وصلنا للنهايه ..

تأخر الوقت وعبرت الـ 1 بـ الليل وطلحه ماكو
لا اگدر اطلع الباب مقفول عنده المفتاح ولا اگدر أنادي اخاف لا عساف يسمعني ..

تليفوني بس يرن طلعته من جيبي
لالي ومكالمات أخرى من عهد ..
رديت عليها مو من طبعها تتصل بـ هيج وقت ..
اجاني صوتها
_تاره قبل لا أسلم انتي وين

بـ بيت طلحه

_عهد خابرتني تسأل عنج وين وخفت عليج صاير شي ليش بـ بيت طلحه شكو

وازيدج معلومه حالياً محبوسه بغرفته..

_غير أعرف ليش فوكاها بغرفه الرجال معقوله عقدتوا من ورأي..

سولفت الها كُلشي بدون نقصان ..
_تاره هذا طلحه مو أي رجال شلون تفرطين بي بهالسهوله شلون تتخلين عنه شلون تسمحين تنتهي علاقتكم للأبد
من بعد كلامج وياه ما اتوقع طلحه يرجع الج ولا يحاول بعد ولا ينتظرج..

أفضل شي صار

_لا والله هيج بكُل برود تحجيها وفوكها ولا مهتمه
تاره بسبب غرورج وكبريائج خسرتي أكثر شخص يحبج ومستعد كُلشي يسوي علمودج
لا تسوين نفسج ما تعرفين بمشاعر طلحه كُل مواقفه وكفاته وياج تدل هو رايدج ومتمسك بيج
مع الأسف غرورج دمرج
صح جنت رافضه فكره زواجكم بعد ما عرفنا بي منفصل بس مو معناها تروحين تنهين علاقتكم للأبد ما خليتي حتى مجال ولا فرصه لرجوعكم ..

لالي مالي خلك احجي بعد انتهينا وخلص

_ لا تخلين النهايه تكون لهدرجه رخيصه..
ليش خليتي يشوفج بهالنظره رغم الحق وياج
نبي عليج عوفي الغرور والكبرياء واحجي اله كُل حياتج جان رحت حجيت اله بس هاي حياتج الخاصه وادري بيج ما تقبلين ومن من حقي اتدخل واحجي بـ مكانج..

ما أريد بس احجي راح يتمسك بيه أكثر ونهائياً ما أريد نرجع عوفي هيج شايفني خطأ حتى يكرهني ويبتعد بعد ما يحاول ..

_ زين تاره شلون ما يعرف معقوله ترا لو نجي للواقع المفروض يعرف من سنوات شلون صدكهم وتفاجاه ..

اني هم استغربت شلون ما يعرف بي
صارت صوت طكطكه نهيت الإتصال وياها بسرعه ..
دخل للغرفه بدون ما يباوع عليه اتجه للحمام شويه وطلع فارش السجاده على الأرض يصلي بعد ما انهى صلاته أخذ القرآن من الميز فتحه يقرأ بدون صوت ..
مجرد ما شفته اتذكرت اليوم ما صليت لا العشا ولا المغرب ولا اگدر اصليهن ماكو حجاب..
كاعده على السرير بس عيوني تتجول على حركاته منتظرته يخلص ..

رفع السجاده من الأرض رجعها لـ مكانها
كعد على الكرسي الهزاز يصفح بالتليفون ..
تقدمت الـه

انطيني المفاتيح أريد اطلع وأريد مفاتيح سيارتك هم حتى ارجع بيها وعود دز أحد من حمايتك ياخذها ما اگدر ابقى وياك بنفس المكان مو نوب نفس الغرفه نفسي ما تتقبل ..

اتجاهل كلامي ساحب المفاتيح من جيبه مخليهن گدامي
اخذتهن وطلعت بدون ما التفت ..

الصاله بعدها على وضعها
دا اطلع تراجعت مباشرهً بعد ما شفت من الجدران الزجاجيه عساف گاعد بالحديقه گدام المسبح يصفح بالتليفون ويدخن ارگيله ..
بقيت جامده بمكاني خفت لا أسوي اي حركه يطلع صوت ويشوفني..
رجعت بكُل سرعتي فاتحه باب الغرفه سادته وراي..
ماكو أحد بالغرفه لعد وين راح طلحه ..
گعدت على السرير مخليه ايدي على رأسي من التوتر گلبي يدك بسرعه لو ابني شايفني جان شنو صار موقفي گدامه بدون كُلشي كارهني ..

فزيت على صوت باب الحمام انفتح رفعت رأسي
طلع من الحمام صدره عاري لابس الروب والمنشفه بـ ايده ينشف شعره المبلل ..

ما أهتم لـ وجودي
درت وجهي عنه بغير إتجاه

حجيت بنرفزه..
ليش ما گلت عساف گاعده برا
ما رد
نرفزني أكثر مددت على السرير وسحبت الغطه غطيت بي حتى وجهي ..

أسمع صوت خطواته بالغرفه وصوت فتح خزانه الملابس..
غطيت رأسي أكثر
للحظه صفنت وسرحت بتفكيري
غرفه مسدوده ما بيها غيري وغيره لو غير شخص جان انجنيت وخفت ليش هو ما أخاف منه ليش هو الوحيد الاثق بي حتى لو جنا وحدنا ما راح يتعرض الي ولا راح يأذيني ولا يسوي شي محلو ليش لهدرجه واثقه منه..
ليش هو الوحيد اسمح اله يلزمني حتى لو جان مجرد حضن او مسكه أيد و واثقه من دافع الخوف مو الغريزه ..
شلون گدر يزرع هالثقه بيه اتجاها ..

وخرت الغطه من وجهي والتفتت الـه
مدد على الجانب الثاني مخلي عكس ايده على عيونه ..
همست طلحه
ما رد

أدري بيك كاعد وتسمعني
طلحه ما أريد نهايتنا تكون بهالسوء
ما أريد اطلع بيها اني الخاينه وإني الغداره وأني البايعه شرفها ...
بـ آخر كلمه مني بعد ايده على عيونه
رفع نفسه سندها على تاج السرير
سحب جگاره والجداحه من الميز
يدخن وعيونه بالفراغ ..

گمت تقربت گعدت بصفه
نفخ الدخان بالجهه الثانيه وعيونه يبعدها عني بكُل طريقه رافض شوفتي ..

بدون تردد سحبت الجگاره من بين شفايفه طفيتها بـ اصابعي ..
كافي هواي دخنت اليوم مو زين عليك..
خزرني وگـال
_حتى اطفى الـنار الشعلتيها

لزمت كف ايده بدون وعي
بس باوع عليه وخلي عينك بعيني وراح تعرف مدا أكذب عليك ..
قسماً بـ الله قسماً بـ الله محد طاخني برضاتي غيرك
قسماً بـ الله محد طاخني بالحرام
نزلت دموعي بعد ما كُل حياتي صارت گدامي..
الصوره قديمه ما اعرف شلون وصلتك بس والله زوجي بالحلال ومو مثل ما مفكر انتَ
ما أريد احجي ألك لان ما اريدك اريد تبتعد عني وبعد ما تحاول نهايتنا معروفه كافي تنتظرني
شلون اكدر انجمع وياك وابني ما راضي..
شلون اكدر انجمع وياك وعلاقتنا من سيء للـ اسوء..
شلون اكدر انجمع وياك وانتَ جنت متزوج وفوكاها نفسها بيك ما اگدر أبني سعادتي على حياه غيري..
الا كـرامتي فوك كُلشي وماطول هالعلاقه تمس كرامتي مـا أريدهـا ...

حجه بدون إهتمام
_ ما راح تحجين ولا تفسرين ولا توضحين لهدرجه متخليه عني..

همست بقهر من بين شهكاتي بعد ما نهيت كلامي
اسـفه والله اسفـه ..

_انتظرتج طول العمر وجانت هاي غلطتي

دموعي تتسابق منو تنزل أول
طلحه لا تكرهني الا الكره لا تنسبه الي ..

_جنتي اقـرب الـي من روحي هسه صرتي ابعد من السمـا ..

أمسح بدموعي الحرگت خدي
ابتعدت بسرعه عنه گمت دخلت للحمام وقفلت الباب وراي..
واكفه كدام المغسله أرش المي البارد على وجهي احسه صار نار من العصبيه
كرهني لدرجه صار ما يخلي عينه بعيني رافض فكره شوفتي ..

فتحت الباب بعده على گعدته
اتجهت لباب الغرفه فتحته بدون صوت بكُل هدوء
وكفت بنص الصاله گدام كاميرات المراقبه
ماكو أحد بالحديقه حتى عساف ماكو ..
رجعت دخلت ..

وكفت قريب عليه
أريد المفاتيح مال البيت وسيارتك

رفع حاجبه
_ليش و وين

لبيتي

_وحدج وبهالليل تريدين تسوقين

ترا صار سنين عايشه وحدي مو شي جديد

_هاي قبل مو هسه
هسه أنتي بـ بيتي وياي ماكو طلعه بهالليل وحدج
گايم اوصلج..

ماشي طالعه قبلك أنتظرك..

دخلت للمطبخ شغلت الاضويه والغلايه علبه الگهوه گدامي حضرت الـ فنجان سحبت كرسي من الطاوله
فتحت التليفون أتصفح بالفيس وبالي مو يمي تفكيري مشتت خلصت الفنجان بدون حتى ما أحس على نفسي ..
دخل مغير ملابسه بعد ما جانن ملابس بيت غيرهن للرسمي كاشخ على آخر حبه
رجع شغل الغلايه حضر اله فنجان
عطره هلگد ما قوي يمشي ورا
گعد مقابيلي بنفس المكان وعلى نفس الطاوله ومحد يحجي ويه الثاني..
ترك الفنجان بعد ما خلص على الطاوله وطلع
اخذتهن غسلتهن ورجعتهن لـ مكانهن لا عساف يكعد ويشوفوهن ..

اتجهت للحديقه لگيته واكف گدام المسبح ايد مخليها بجيبه والايد الثانيه لازم بيها الجگاره
خبلني اليوم كُلش هواي دخن بشكل فضيع ..

الهدوء مسيطر على المكان الهوا البارد يضرب بوجهي شعري يتناثر ويه الهوا القوي ..
امشي بخطوات بطيئه اتجاها
صرت ورا بالضبط حجيت بصوت ناصي
يلا نروح..

_ انتظريني بس أطلع السياره من الگراج وافتح الباب الرئيسيه

ماشي

راح بـ إتجاه الگراج
بيته مساحته كُلش كبيره ورغم هالشي فارغ ما بي أحد غيره هو وعساف تحس البيت مابي روح لا صوت لا ضحكه لا حركه طول الوقت هدوء
الصبح كُلهم بالدوام والعصر يطلعون لـ أي مكان يعجبهم وما يدخلون غير وقت النوم
حتى من بقيت شهر وحدي طلحه ما جان يجي غير وقت النوم يدخل الـ غرفته مباشراً ..

ظليت واكفه بـ مكاني مجتفه ايدي من البرد
رفعت البنطلون وكعدت خليت بس رجلي بالمسبح
شوكت گلبي يبرد مثل هالمي البارد
شوكت حياتي تصفى وتترتب بعد كُل هالفوضى ..

طلعت رجلي من المسبح رجعت نزلت البنطلون ولبست الشوز بعد ما حسيته واكف فوك رأسي يناديني وبسبب صفنتي ما انتبهت عليه ..

درت ظهري دا امشي گدامه
سحبني من أيدي
قربني عليه أيد ماسك بيها خصري مثبتني گدامه والايد الثانيه تبعد بخصلات الباروكه عن عيوني ..
خليت كف أيدي على صدره ادفعه
لزمه قوي عاصره بـ قبضه ايده..
عيونه مثبتهن بعيوني ..

طلحه اتركني عساف موجود لا يكعد ويشوفنا ..

خله رأسه على رأسي
يحجي وايده ماسكه خصري مثبتني حتى ما ابتعد..
_اني مو ذاك طلحه ابن العشرين الـ يتخلى عنج بسهوله ويتركج بس ما بقيتي لا خيط ولا أمل حتى ابقى متمسك بيج ..

نصى لـ مستواي مقرب شفته على أذني
_ ليش لحد هسه احسج تخصيني رغم انفصالنا ورغم السنوات الـ مَرت ورغم نفورج مني..
شدني من خصري اقوى لدرجه أنفاسنا اختلطت
دنگت رأسي دايره وجهي ما أريد اضعف ..
ابتعد عني بسرعه كانوا حس على نفسه دايسوي
نزل ايده مخليها بجيبه دار ظهره بدون كلام مشى گدامي بـ اتجاه السياره ..

صعدت بالمقعد الأمامي حرك السياره وطلع
غادرنا المكان بعد ما صارت علاقتنا نحو الاسوء..
الفجر الشارع فارغ مابي أحد قليل كُلش السيارات الـ تمشي السما زركه الضوا بعده ما طالع ..
خليت رأسي على الجامه صافنه بدون تفكير
فعلاً بعد مشكله اليوم اكتشفت طلحه أكثر شخص بالدنيا متمسك بيه بدون مقابل ما ادري شنو سبب تمسكه او يمكن أدري بس أحاول اتجاهله واكذب نفسي واحساسي ..
نزلت شويه من الجامه الهوا البارد دخل لـ ريتي
يا ترى تصرفي صح بكُل مره اتخله عنه بكل لقاء ابين الـه مدى رفضي ونفوري منه ..

فتحت عيوني على صوت الاغنيه الكـل ما أسمعها تلقائياً اتذكره حتى لو ما جنت رايده اتذكره ..

_غارَت عيونِي من عيونِي علِيك
وشلون لا شافك من الناس غيري

فتحت الجامه أكثر وغمضت عيوني..
من وصل للمقطع صار يردد همس بدون ما يحس
على نفسه..
_من قبل ما أعرفك وأنا خاطري فيك
يشهد على ما أگول جرحي بضميري
ما شفت حالي گبل أشوفك وألاگيك

فجأه انغلقت..

حجه بـ برود
_بعد ما تستاهلين أسمع الج
غـارت عيوني من عيـوني عليـج ..
لان طابت نفسي منج

ما رديت ..
بقى السكوت سيد الموقف طول الطريق لحد ما وصلت گدام المجمع..
نزلت دا اسد الباب
گال بدون ما يباوع عليه..
_اي شي تحتاجينه بعيداً عن مشاكلنا وانفصالنا
اني موجود اتصلي عليه بـ اي وقت تحتاجين واذا اني ما موجود الحمايه بـ مكاني وحتى عهد..

ماشي..

شخط السياره بكُل سرعته طلع من المجمع
رجعت لمكان وحدتي وعزلتي عن العالم رجعت للوحده التعودت عليها وانفرضت عليه من يوم وفاه والدي..
دخلت وقفلت الباب ورأي اتجهت للحمام فتحت ألمي على البانيو مددت بـ داخله غاطسه رأسي بالمي
طول السنوات الفاتت جانت عباره عن لهوا ولعب
كُل همي شلون اجمع فلوس أكثر شلون اكون بمستوى عالي وگدرت احقق هالشي وبعد ما حققته زاد طمعي أكثر يطلع النهار ويجي الليل مشغوله بالمركز وبـ أعمالي ناسيه وحدتي ناسيه فكره من أكبر منو راح يسندني منو راح يكون بجانبي..
مشى بيه العمر بدون ما اكون حياه خاصه مستقره
صرت امراه ناجحه عملياً بس فاشله بحياتها الخاصه...
المراه الناجحه لازم توازن بين حياتها العمليه والخاصه بس مع الأسف ركزت على الجانب العملي وهملت حياتي..

طلعت انشف بشعري غيرت ملابسي لبست ازار الصلاه صليت الفجر حاولت أنام ما گدرت
اخذت الـ قرآن من الميز
اتجهت للـبالكونه فتحتها الشمس بدأت تطلع
أيد لازمه بيها القرآن والايد الثانيه سقيت بيها الزرع
كعدت على الكرسي المجمع هدوء كُلها نايمه
قريت كم ورقه من القرآن..
مرات الإنسان يوگع بخطأ او شده او ينكسر گلبه او عزيز يخذله ويخيب ظنه يحس خلص هاي نهايته وحياته تدمرت بس بالحقيقه هالشر هو سبب رجوعه لـ طريق الله بسببها نرجع نلجأ لـ الله وحده الراح يغنينا عن العالمين..
بالنتيجه عشت هالشي بحذافيره ..
من الملل نظفت الشقه رغم نظيفه فتحت الخزنه طلعت منها الفلوس..
فلوس المركز خلصتها كُلها على علاجي ومصرف الي طول الفتره المرت ما جنت اشتغل ولا عندي مصدر فادني كُلش هواي...
ضليت حايره شنو أسوي بهل كم مليون لازم افتح بيهن حتى لو مشروع بسيط استثمرهن
لو خلصن منين اجيب منو يصرف عليه
لازم ارجع أبدي حياتي العمليه من جديد ..

فتحت تليفوني على مكالمه عهد
تسأل عن سبب المشكله وامها هم جانت كاعده بصفها گلت الهم مجرد سوء فهم بدون ما اوضح شنو النقاش ..

مرت الأيام بين تفكيري بشغله جديده استثمرها او ارجع للوظيفه بـ شهادتي ..
حاولت أسوي جلسه تصوير هديه لـ تخرج لالي بوقتها ما حضرت علمودي بس اجلتها بسبب وضعها وحالتها النفسيه السيئه من ورا تهديدات سنان المستمره ..

ما جنت متوقعه بيوم راح اعيش شعور خساره غالي
طلحه لازمني يحاول يهديني ويسكتني وكفت أصرخ مفجوعه بـ أغلى انسانه على گلبي ..
ما مهتمه لوجود الناس حولي
أدفع طلحه بكُل قوتي حتى يتركني ويخليني أتصرف...

ضغطت على كتفه أصرخ بعلو صوتي نازله على رگبي منهاره واني أشوف منظرها الدامي ...

يتبع ..

_____________