رواية الكارمــا الفصل الثلاثون 30 - بقلم آيــه آلـ صبري

أنا
التي أنقذُ نملة
و يُبكيني
منظر الفقراء جدًا
كيف أقتلكِ الآن بداخلي ،
و أنت الأعزّ ؟

_________________

لالـي ..

الفـراق فكره ترعبني
فكـره ان اكمـل حياتي بدون الشخـص الـذي أعتدت عليه والـذي رسمت المخيله الورديه معه..
اليوم بكُل خَيبه زارني
زارني وترك تنهيده طويله جرحت أيامـي ..

لاشيء يمكن أن يمـلأ الفراغ الـذي تركته في قلبـي
بعـد مغادرتك من حياتي غـادر الكثير من الفرح والطمأنينة وكأن كُل الأشياء الجميله قررت اللحاق بك ..

طلعت أمي وسدت وراها باب غرفتي كُل ظنها غفيت ..

گمت گعدت سانده ظهري على السرير ..
ظلام دامس هدوء محاوط كُل زوايه الغرفه والبيت ..
الا عقلي مدا يهدأ وهو يذكر تفاصيل هاليوم بحذافيرها من دون نسيان غمضت عيوني بكُل قوتي اضرب على رأسي أريد منظرهم يطلع من رأسي...

من بـعد قرايه الفاتحه وخطوبه لمده سنه كامله وحب بريئ من الطفوله تقرر موعد زواجنا مجرد ما اخلص السادس
خلصنا كُل التجهيزات المطلوبه جهزت بيتنا بعد ما خلص بنائه قريب كُلش على بيت أهلي بالمنصور بيناتهن بس فرع وأحد كُل ركن بالبيت اختاريته على ذوقي وهو وياي بكُل خطوه ..
كُل ما جنت ألتقي بي أو كُل ما نخطي خطوه حتى نخلص التجهيزات أشوف الحقد والكره بعيون أختي الأكبر مني الكل بدأ يلاحظ مشاكلها وياي على اتفه الاسباب غيره فضيعه سيطرت عليها
جنت أكذب نفسي واگول مستحيل أختي هيج تفكر مستحيل أختي تحب خطيبي مستحيل أختي نفسها بـي مستحيل أختي من دمي ولحمي تهدم حياتي ..
فجاه أمي صارت تلح وتضغط أقدم موعد العرس واخلي قبل السادس بالعطله انطت خبر لـ عمي يقدم عرسنا وحتى سنان حجت وياه يكون زواجي بالعطله تفاجأت من تصرفها وإصرارها بدون حتى ما تفهمني السبب..
تقدم موعد عرسي بالعطله قبل السادس بديت أحضر كُل الاحتاجهن وما بقى اله كم أسبوع بهالفتره اختي تمرضت وحتى الجامعه هملتها وصارت ما تقبل تروح طول الوقت بالفراش مريضه..
تسمعني كلام محلو يسم البدن بدون سبب كل ما ننجمع نتعارك وماتسكت الا تشوف أمي تصيح يلا تعوفني..
تغيرها المفاجأ سلوكها الغير متزن كلامها الغير لائق عني تصرفاتها سيئه كُلش ..

كُل هالاشياء تجاهلتها وما بقى لعرسي غير أسبوع ونص بـ هالايام ما يمر يوم اذا ما نطلع علمود حجز المركز وحجز بدله وقاعه وكُل تفاصيل العرس..
بـ هاليوم دز رساله الي ما يگدر يروح وياي حتى احجز البدله اكو عمال بالبيت دايصبغون الغرف
طلب مني أروح ويه أمي واخوه راح يوصلنا ..
داطلع أصعد بالسياره شفت أختي واكفه ويه أخوه سمعت كلامهم صدفه
جانت تستفسر وتسأل وتلح شوكت العمال يطلعون من البيت وشوكت يخلصون صبغ وسنان يبقى لو يرجع لبيتهم وهسه سنان وحده او أكو احد يمه
هو جان يجاوبها عادي
ما اهتميت لكلامها ولا شكيت ..
ورا أذان المغرب يلا رجعنا اول ما دخلنا للبيت فارغ مابي أحد نزعت أمي حجابها تناديها وماكو لا صوت ولا حركه فتحت تليفونها تتصل عليها يطلع مغلق ..

الشك لعب بگلبي بعد ما سمعتها تسأل قبل لا نطلع
خليت أمي ملتهيه تخابر عمي تسأله اذا جايتهم او لا
أخذت مفاتيح بيتي عندي نسخه منطيني واتجهت للفرع اتمشه ..
الاضويه مشتغله الباب الرئيسيه بس مردوده فتحتها على كيف بدون صوت باب الإستقبال دائماً مقفوله ما نستخدمها هواي لان كملت تأثيثها
مديت أيدي الباب المطبخ مقفول خفت افتحه بقيت دقيقتين واكفه خايفه لا يكون البالي صح
خليت المفاتيح بالباب افتحه على كيف حتى ما يطلع صوت ..
دخلت وگلبي يدك بسرعه اتجهت لغرفتنا بابها مسدود ما اسمع غير صوتها تبجي وكلامها مامفهوم بسبب البجي مشيت لـ ناحيه المخزن بصف الغرفه موجود بي مكان سخان المي الحار ومواد التنظيف ..
فتحته ودخلت بـ غرفتنا اكو شباك على طول الحايط اگدر أشوف كُل غرفتي من الداخل ما جنت مخليه بردات بعدني ما مجهزتها بشكل كامل ..
دخلت مدنگه رأسي خفت لا يشوفوني من الشباك ..
گعدت على الأرض حتى ما ابين البيت فارغ الكلام صار بشكل اوضح بعد ما توقفت عن البجي ..
خليت أيدي على رأسي بعد ما سمعت اعترافها اله بحبها من جانوا صغار هي تحبه وتتوسل بي يتركني لو تنتحر تحجي عني كلام محلو ..
جسمي كُله يرجف من كلامها شلون عدها هيج قابليه تعترف لزوج اختها شلون الها قابليه تنزل نفسها وكرامتها علمود مشاعرها
ماجان اكو صوت غير صوتها لحد هسه ما سمعت أي كلمه منه صارت تصرخ وتكُله أحبك حس بيه مااگدر أشوف اختي وياك عوفها..
عاط بعلو صوته يطلب منها تسكت وترجع للبيت وراح يسوي نفسه ما سمع اي شي من كلامها ولا شافها...
بعدني على گعدتي دموعي تنزل شلون هيج گدرت تسوي بيه وتخليني بهالموقف گدام خطيبي شلون تخير خطيبي بيني وبين انتحارها شنو الحقد والغيره الـ بگلبها منو اليصدك أخت تسوي هيج بـ أختها شنو هالتصرف الطفولي ..
ما أدري شنو سوت بس أسمع مدا اشوفهم عاط بيها يكُللها شنو دا تسوين تخبلتي امشي ارجعج قبل لا تجي اختج ..
فجأه اختفى صوتهم مرت دقايق أي صوت ماكو نهائياً خفت اگوم اشوف شي ويكسرني فتحت تليفوني دگيت على أمي وغلقته بسرعه رجعت دزيت رساله تجي بسرعه لـ بيتي وكتبت الها مختصر عن الدايصير گلبي يدگ بسرعه بين الـ اريد اگوم أشوف وبين الخايفه ..
والخايفه منه صار رفعت رأسي شويه فتحت عيوني على وسعهن منظر أختي هي وتتقرب منه لدرجه خلته يتأثر مقرف دنگت رأسي سانده ظهري على الحايط دموعي تنزل جنت متأمله يوكفها عند حدها سكتت حتى أشوف شنو يسوي مع الأسف ما گدر يسيطر على غريزته واستسلم لـ اغرائاتها طلعت بسرعه من المخزن متجها للغرفه قبل لا يكبر الموضوع وايصير شي اسوء ..
فتحت الباب عليهم ما طلعت مني رده فعل غير ابتسامه بـ استهزاء على منظرهم
گام إلي بسرعه يسد بـ ازار قميصه
يحاول يفهمني الصار وانو حتى هو ما مستوعب شلون سوا هيج ابتعدت من گدامه بفزه نافره من مسكه ايده الي ..
دخلت أمي وعمي سمعوا كُل كلامه وتبريراته واگف يترجاني و يحجي بحرگه گلب وعصبيه ما منتبه لـ دخول أهله أمي صارت تعيط على أختي سحلتها من شعرها عمي ضرب سنان بوكس دخلوا إخوانه كُلهم مصدومين..
فصلت عنهم صافنه بالفراغ ما مستوعبه الصار خسرت أغلى اثنين على گلبي أختي وحبيب طفولتي وخطيبي ما باقي لـ عرسي الا أيام قليله..

رغم هذا اتستروا على الموضوع خوفاً من الفضيحه محد عرف بالسالفه غير أهله وأحد من عمامي أما باقي عمامي والاقارب محد يعرف نهائياً ..
اتمسك بيه لدرجه الجنون وصلت مرحله بي يهدنني رافض يطلگني من شفته لهدرجه ما يقبل يطلگ أتصلت بعمي وبلغته افضحهم واخلي سيرتهم على كُل السان اذا ما قبل يطلگ وبسبب تهديدي طلگني بنفس اليوم ..

عمي الثاني اخذ أختي وياه لـ بيته من يوم المشكله
لان أمي طردتها وتبرت منها
الكُل مستغرب انفصخت الخطوبه وما باقي كم يوم للعرس الكُل خلوا الصوج بيه كُل ظنهم لان سادس وما عندي وقت فضلت دراستي عليه و أكو بيهم گالوا هي طفله ماتعرف تتصرف وهو كبير واصل همزين عافها كُل واحد صار يفسر بمزاجه محد بيهم يعرف السبب الحقيقي..

ورا أسبوعين من المشكله بلغنا عمي بخطوبه أختي
عمامي كُلش معروفين واصلين وسمعتهم حلوه
فـ تقدم الها واحد من اصدقاء عمي عايش بـ المانيا وافقوا عمامي خلال شهر واحد بس وقرروا تكمل جامعتها بالخارج ..
اتزوجت أختي لا رحت ولا حضرت ولا شفتها
أمي راحت وياها حتى لا أهل العريس يشكون بشي ..

عشت صدمه نفسيه سيئه
ضعفت أكثر من ما جنت ضعيفه طول الوقت اتظاهر بالنوم بسبيل انسى المنظر الـ شفته بعيني لو الكلام الـ سمعته المفروض اداوم سادس بعد ما خلصت العطله بس ما داومت ولا قبلت اداوم عافتني أمي وما ضغطت عليه مقدره وضعي
مرت سنه ما داومت بيها
مرت سنه ثانيه وهم داومت بيها
خسرت سنتين من عمري انعزلت عن كُل العالم سنتين ما طالعه ولا شايفه أحد غير أمي وتاره الما عافتني لحظه وحده ..
تأذيت وانكسرت أكثر من سمعت أمي تتصل بيها وتحجي وياها ورجعت علاقتهن قويه واتفقت تشوفها لان راح تجي من السفر وصار عدها اثنين ولد تؤم وداتكمل جامعتها ويه زوجها ..
هي عاشت حياتها بعد ما دمرت حياتي

تاره صارت تضغط عليه أرجع للدوام السنه لدرجه زعلت مني شهر كامل ما تقبل تحجي وياي وما اهتميت آخر شي گامت تجي يوميه البيتنا تجبرني اگوم أغير ملابسي غصب عني حتى توصلني للمدرسه لحد ما تعودت وگمت اروح وحدي وأقرأ واختلطت ويه الطالبات وأول ما أرجع افتح الكتب اقرأ...

انقطعنا عن عمامي خاصه أهل سنان لا توصلنا أخبارهم ولا اخبارنا توصلهم الشعب بعد ما دخلناها ..

تخرجت بمعدل 98 المفروض أقدم طب بهاي السنين يعتبر هالمعدل كُلش عالي ويقبلني طب
بس قدمت صيدله بغداد لان احبها وأكثر مهنه تناسبني ..

مـرت الأيـام والسنين لا شايفه سنان ولا شايفه أختي
أدري بـ أمي دا تشوف أختي بدون علمي وحتى مره من جنت بالدوام جايه لبيتنا وطالعه قبل لا اجي ..
بالنسبه إلي متبريه منها وما اعترف بيها وما عندي أخت بهالدنيا غير تاره بس السنتين الضيعتها من حياتي بسببهم كفيله تخليني ابقى حاقده ونافره ما عدا الصدمه والخيانه والغدر ...

فزيت من صفنتي على صوت تليفوني يرن
ازاد يسأل عني مالي خلك ارد بس قريتهن من الاشعارات وما فتحتهن ..

ثاني يوم مثل كُل يوم رحت للدوام ورجعت حسيت أمي ضايجه انتظرتها تحجي بس ما حجت
للمغرب انتظرها وماكو
طلعت من غرفتي متجها للصاله لگيتها دا تنظف بالتخم وترتبه

ارتاجيت على باب مجتفه أيدي
ماما اليوم شكو

تحجي بدون ما تباوع عليه
_ شكو ماكو شي

عادي گولي تعودت

_ازاد هم راجع متقدم اليوم وجايب هالمره كُلش هواي عالم من كُل المحافظات ونفس الشي ما لگوا غير الرفض وسنان من عارف راجعين متقدمين متعارك ويه أهله و گوه لازمي أهله يريد يتعارك ويه ازاد ..

تعبني والله شيريد مني بزعت من تصرفاته شنو يتوقع مثلاً إذا يسوي هيج راح ارجع أحبه لو اوافق عليه ..

كعدت على التخم ابجي نفسيتي هاليومين تعبانه كُلش ابجي على كُلشي..
وكفت أمي فوك رأسي تستغفر وتحجي على سنان وأهله..

_ دعوفي البجي وگومي جيبي علاجي من الصيدليه مابيه أروح نسيت اگلج الصبح من طلعتي
وجيبي وياج عشا مالي خلك أسوي ..

راح أنهي كُلشي على شنو يوميه يجيهم وهمه ما مخلين احترام لـ أحد خلص بعد ما أريد اتزوج خل يشوف حياته هاي صار كم مره يتقدم فوك السبع مرات ..

_لا تتهورين عوفيها للأيام بلگي يقبلون لا تخسرين ازاد لا عندج اب ولا عندج أخ يوكف بوجهم ويوكفهم عند حدهم باقين بس اني وياج بهالبيت منو النا ..

بعدني بملابس الدوام من التعب نمت بيهن وما غيرتهن گمت مسحت دموعي ..
رفعت رأسي الها
كُلش تعبت من هالوضع يوميه حرگان الأعصاب..

باوعت عليه بحيره
_براحتج انتِ مو صغيره حتى اعلمج الصح من الخطأ وهاي حياتج أدري بيج واعيه سوي الـ تشوفي يناسبج..

گمت حتى أطلع أتصلت عليه تاره تريد تجي تشوفني صار فتره ما شايفتها ..
بلغتها انتظرها اول ما دخلت بس سلمت على أمي وگلت الها خل نطلع بالسياره ما حجت شي
نزلت وصيت عشا ورجعت صعدت متجهين للصيدليه اخذت العلاج وطلعت لگيت تاره لازمه تليفوني تخابر ..

سديت الباب وراي اشرت الها بـ عيوني بمعنى منو ..
خلته كتم وحجت ..

_نسيتي تلفونج بالسياره وازاد هواي أتصل رديت عليه گتله وياي داتتسوك للبيت
هاج احجي وياه ..

اخذته منها طلب مني اجي للمركز مالته ماطول قريبه عليه يريد يشوفني ..
رفضت رفض قاطع أخاف لا بلحظه عصبيه انهي كُلشي غلقته منه ..
شويه وتليفون تاره يرن تفاجأت منين ماخذ رقمها ..

_اهلاً دكتور ازاد
أي ادلل من عيوني هسه أوصلها
لا تهتم اني اقنعها الك

فتحت عيوني أشر الها بعصبيه تنهي الحديث وترفض ..
غلقته تباوع عليه وتضحك ..

_شبيج خطيه قالقه الرجال عليج ليش تخلين سنان يحقق الـ يريده ويسوي مشكله بينكم ..

منين أخذ رقمج

_اني مو هو
غير جنت أريد أسوي الج مفاجاه حفله تخرج وحجزت مطعم وجلسه تصوير وأخذت رقمه من تليفونج بدون ما تدرين عزمته وانتِ بكُل دم بارد ما قبلتي وعاندتيني خليتيني ألغي الحجز كُله ..

يااااا ونبي ما جنت أدري حاجزه كُل ظني مجرد اقتراح

_عادي مو مهم أرجع احجز مره ثانيه بس منتظره نفسيتج تتعدل مو شلعتي گلبي منين طلع النا سنان ..

نرجع للبيت

_ طبعاً لا انطيت كلمه للرجال خمس دقايق شوفي ونروح

مالي خلك

_ بس هالمره زحمه اول مره يتصل بيه ..

المسافه بين الصيدليه والمركز خمس دقايق بالسياره..
ما قبلت تنزل وياي بقت گاعده تنتظرني ..
اول ما دخلت صار گدامي واكف ويه مجموعه دكاتره دايحجي وياهم ما انتبه الي ..

وگفت انتظره ورا دقايق يلا انتبه لوجودي
من شافني اختفت ابتسامته تقرب ناحيتي ..
مشاني وياه لحد ما وكفني گدام باب مكتوب عليه الدكتور ازاد فتحه دخلت وسده ورأي..

التفت إلي رافع حاجبه
_ أي دكتوره لالي شكو صار يومين ما تقبلين تحجين وياي وما تردين على رسائلي..

خليت شعري ورا أذني متوتره شلون راح احجي وياه
-خل ننهي كُلشي اعتبر نفسك ما تعرفني بعد لا تتقدم وهاي هيه كل وأحد يروح بطريق

نتر بيه
_مو بكيفج أمشي ديري بالج تحجين بـ هالأسلوب مره ثانيه..

اتنرفزت من صوته العالي
-لعد شنو لشوكت نبقى هيج يوميه حرگان أعصاب
مستحيل عمامي يقبلون ما يفيد لا تحاول ابقى هيج بدون زواج أحسن روح شوف حياتك خوما تظل تنتظرني..

_ هاي بـ بدايه الطريق واستسلمتي بكل سهوله
ما توقعتها منج..

درت وجهي عنه أمسح بدموعي
-تعبانه ازاد ونبي طاقتي خلصت أعصابي تلفت بكُل رفض داتتعرض اله عقلي مشوش من الأيام السوده الدانجبر أتذكرها بسبب تهديدات سنان

تقرب ناحيتي دارني اله
بعد شعري عن عيوني
لـ أول مره يكون بهالقرب مني
بـ اصابعه صار يمسح دموعي

_ممنوع اشوفج بهالضعف متعود عليج قويه
ومو انتِ التحددين احب منو واتمسك بـ منو
اختاريتج من بين الكل وابقى مختارج وابقى متمسك بيج لـ آخر يوم بعمري ما أريد منج اي شي غير تنتظريني عوفي عمامج عليه يجي يوم ويوافقون ..

-وإذا ما وافقوا

ابتعد عني گعد بمكتبه سحب جگاره ورثها ما رد
درت ظهري دا اطلع لازمه يده الباب
التفتت اله

-يجوز قليل تسمع مني كلام حب او أساساً نادراً أعبر الك عن مشاعري بس لو بيوم فرقتنا الطرق ومليت من محاولاتك وعاذرتك وحقك لا تنسى
انتَ أول شخص فتحت اله گلبي من بعد الصار الي وأكثر شخص غالي عندي اعشقك كلمه قليله حتى تعبر عن مدى حبي الك مهما صار او راح ايصير مستحيل أحد يأخذ مكانك بگلبي ..

رفع رأسه خزرني
گام متجه الي بسرعه ..

فتحت الباب وطلعت بسرعه حتى ما أسمع رده
مشي وراي صار بصفي خله ايده على ظهري بدون ما يطخني همس بـ أذني..
_ اهديج سنين عمري مو بس انتظرج ..

رفعت رأسي صارت عينه بعيني المدمعه
ابتسمت
طلعنا سوا من المركز نزلت تاره سلمت عليه ردلها السلام بكُل حراره ..
تركتنا وصعدت شغلت السياره فتحت الباب داصعد انتبهت عليه عينه على شعري حسيته ضاج بس ما حجه..

خليت عيني بعينه وحجيت
-ونبي مو قصدي اعاندك وابقي مفتوح..
سحبت القراصه من أيدي لابستها مثل السوار رفعت بيها شعري گدامه..

أبتسم الي
_عادي حبيبي شويه شويه تتعودين..

صعدت بالسياره مغادرين المكان
اول ما دخلنا حجيت لـ أمي وبقت تاره يمنا جبرتها تبات يمي ما خليتها تطلع بهالليل تأخرت بسببي ..

ورا يومين صادف يوم جمعه ماعندي دوام..
واكفه بالمطبخ احضر الغدا وأمي كاعده على الميز طعام تصفح بتليفونها
شويه و رن ردت تحجي وتسلم على زوجه عمي
أسمعها تگول

_لا اله الا الله
شلون خليتوا هيج يسوي

ما اهتميت كملت شغلي
حسيتها دا تبجي بعد ما غلقته
انداريت باوعت عليه وضربت الطاوله بـ أيدها تبجي..
_ شوكت اشوفج مستقره ومرتاحه مو راح أموت وبعده گلبي مشلوع عليج يوميه گلبي محروك بيج..

-شداتحجين ليش شصاير..

خلت أيدها على وجها تبجي
_البارحه بالليل سنان رايح للمركز مال ازاد ومتعارك كلمه منه وكلمه من ازاد لحد ما صايره مشكله كبيره گوم سنان أسحب اسلاحك وضربه طلقه..

فتحت عيوني على وسعهن مصدومه من كلامها
حجيت بفزه..
-موته مو موووووته

_ما أدري لحد هسه بعده بالمستشفى..

گعدت على الأرض جسمي كُله يرجف حرف ما اگدر احجي وكفت فوك رأسي ترش على وجهي مي بارد..

كُلشي ما أذكر من هاليوم غير گعدت لگيت نفسي بغرفتي وعلى سريري الغرفه ظلمه مسدود الباب
فزيت على صوت عالي كُلش مدا افهم شدايحجون رأسي دايخ نظري مغوش
للحظه اتذكرت سبب هاي حالتي
كمزت من السرير على حيلي
فتحت الباب دخلت للصاله صار بوجهي عمي أبو سنان من شافني تقدم ألي ..

_شويه و يجي الشيخ يعقد ما أسمع منج غير الموافقه..

-لووو اموت على جثتي بس كُلي رجال الشيب تارس رأسك وما تخاف من ربك حرررام الداسوي خااف ربك..

_من ورا حضره جناب الدكتوره أخلي الدم يوصل للركاب بين العشيرتين وحده هالگدوتها تروح زلم من وراها ..

-وتررراب أبوي ساكته وما فاضحه أبنك عديم الغيره لحد هسه حتى ما اتضرر لان الخاني وياها أختي مو غريبه مستحيل أخلي أحد يعيرني ويتشمت بيه من ورا أبنك عديم الشرف..

ما أحس الا حلگي صار ينزف دم بشكل فضيع بعد ما ضربني بـ ايده على شفتي..

_وترراب ابوج الـ تحلفين بي موتج على أيدي بس أسمع حجايه طالعه..

صاروا يتصلون عليه تركنا وطلع
راحت أمي سدت باب الصاله ورا واجتي تحجي فوك رأسي أول مره أشوف أمي تبجي گدام أحد أبد بحياتي ما شايفتها منزله دمعه گدام عمامي رغم صارت النا هواي مشاكل..
_لالي ما عندج حل غير توافقين راح يروح بيها ازاد واذا مو ازاد أهله

-يممه شداتحجين شلوون أوفق

_ لحد هسه ما تعرفين الصاير لان متقدم الج أكثر من مره صاروا يتهموج عندج علاقه بي ومسويه شي خطأ وياه حتى لهدرجه مصره بـ رفضج لـ سنان ..
سمعتج صارت بالنازل على لسان كُل الأقارب وانتِ بعد تعرفين نسوان عمامج يسون من الحبايه كبايه
بعد ما تعارك ازاد وسنان لان سنان رايح مهدد ازاد بعد ما يتقرب الج ولا يتقدم ازاد ما متحمل هالكلام عنج گوم واضرب سنان وهذا سحب سلاحه بكل تهور وهسه ازاد بالمستشفى الضربه بـ صدره ما أعرف غير طلع من العمليه قبل شويه ..

-لا تخبليني شنو أذا ما وافقت شنو يسوون

_ايصير دم بين العشيرتين
المهم هسه أهل ازاد گلبوها للدنيا على رأس عمامج يريدون منهم فصل واستغلوا هالنقطه حتى يجبرون عمامج يوافقون بس عمامج المايخافون من الله
يگولون انتِ أساساً مخطوبه وحقه سنان هيج سوا لان ازاد ابنكم مخلي عينه على مراه متزوجه..
وگلبوا السالفه لصالحهم..
واذا ما تمت الخطبه يجوز تصير اسوء

-سنان بالسجن هسه مو

ابتسمت بـ استهزاء
_سنان ينسجن لا بالعكس كلها واكفه وياه وهو صاحب الحق على الأساس خايفه يا يمه والله خايفه
لا تكبر أكثر..

صارت هوسه بـ باب بيتنا باوعت على أمي
_يجوز اجه الشيخ وعمامج

گمت بسرعه دخلت لغرفتي وقفلت الباب عليه
فتحت تليفوني أتصلت بـ تاره..
تحاول تهديني وتحجي وياي بس عقلي وكف من التفكير كُل همي شلون اخلص منهم..

_لالي فكري بعقلانيه سمعتج راحت وعمامج خلوا على ازاد اكس بعد لو تموتين ما يوافقون عليه
ما عدا المشاكل الصارت بين العشيرتين
وهذا سنان راح يضل وراكم لحد ما يسوي مصيبه..

-مصدومه من موقف عمامي كُلهم ضدي وكُلهم واكفين ويه سنان..

_ من جهه عاذرتهم لان محد بيهم يعرف بـ السالفه الحقيقه لـ سنان لان ابو الله يسلمه تستر على أبنه العار فـ همه حالياً واكفين ضدج لان دايشوفوا مستقتل عليج ويحبج وابن عمج وحالته الماديه جداً ممتازه واصل بـ مكان مرموق فـ شنو سبب رفضج
مع الأسف عمج وسنان استغلوا هالنقطه وزرعوا برأسهم فكره انتِ عندج علاقه خطأ ويه ازاد..

بعدها تحجي صار الباب يندك بقوه وعمي يصيح حتى اطلع فلشوا الباب تفلش كُلها واكفه وياهم على الباطل تاره تصيح حتى ارد عليها
وكع التليفون من أيدي
دموعي تنزل ازاد ما أعرف شنو وضعه ولا أعرف شبي وهسه غصباً عني لازم اعقد..
مسحت دموعي بقوه مو كت بجي لالي مو وكته لازم اشوفلي حل..
ما أحس الا الباب انفتح ودخلوا عمامي كُلهم وسنان رأسه كُله دم لافه بشاش أبيض والشاش تالف من كميه النزيف..

دخل واحد من عمامي الميعرفون حقيقه سنان
_اطلعي بسرعه الشيخ كاعد

ما اطلع وما اعقد

تقدم بسرعه دفعني من أيدي بكُل قوته راد يضربني سنان جرني خلاني ورا ظهره منعهم يتقربولي

_وخرر مني خل اربيها عود هاي الدكتوره وصارت النا من وراها دگه عشائريه وفصول لعد الباقيات شنو يسوووون..

اتدخل عمي الوسطاني طلب منهم يطلعون حتى يحجي وياي الكُل طلع ومحد بقى غير عمي..
گعد على السرير وطلب مني اكعد بصفه

_بنيتي انتِ بنت الغالي والله ما راضي على تصرفهم وما راضي يجبروج بس هو سنان هم ما قاصر ليش ما كُل ما يتقدم ترفضي

-ما اگدر أشوفه مثل أخوي

_لا أعرف البالج شنو بس لا تتأملين ما يصير
وثاني شغله هو مو اخوج الرجال مستقتل عليج
عمامج هسه دمهم حامي ومتعصبين بسبب السالفه الصارت الموضوع كبر وأخذ أكثر من حجمه ما ننكر سنان خطأ من راح ضارب المتقدم الج المهم همه عمامج اليوم ما يطلعون اذا ما يعقد الشيخ حتى ياخذون الورقه لـ أهل ازاد تثبت انتِ مخطوبه وابنهم خطأ لان حاط عينه على مراه متزوجه وهم أدري تصرف عمامج حرام وخطأ
بس هاي هيه شنسوي بعد حتى نخلص من المشاكل
صدگي يابنيتي أذا ما وفقتي هسه
واحد منهم ينقتل لو ازاد لو سنان

- ما أريد اتزوج أي واحد لا سنان ولا ازاد اذا هيج الحجي صار ونبي ازاد ما مسوي الي شي ما أدري منين دايألفون هالكلام

_ مو سهله على عمامج انتِ شرفهم يجي وأحد ما يعرف السالفه شنو يحجي بشرفج لان السالفه طشت عود ازاد صاحبج وسنان خطيبج كاشفج وراح قتل ازاد هسه اني عمج وجاي اگلج هاي السالفه الطشنها النسوان وخلن الزلم كُلها تهيج عليج
لا تخلين أحد يتشمت بيج كومي بكرامتج وافقي أحسن ما يأذونج ..

گام وكف ولزم أيدي
_يلا أمشي سوا نطلع زحمه من الشيخ گاعد صار فوك الساعه ..

طلعت وياه لگيت عمامي كُلهم موجودين وحتى نسوانهم گعدت بصف الشيخ النسوان انطتني وحده من البنات شال ابيض خليته فوگ رأسي
ماطول الشيخ يحجي عمامي كُلهم يخزروني حتى لا احجي غير الموافقه..

_فـ ان قبلتي قولي نعم قبلت وانتَ وكيلي

نعم قبلت وانتَ وكيلي

صوت المباركه والصلوات على النبي ملئ المكان
فاصله عن هوسه المعازيم وكلامهم
تقرب گدام الكل مسك أيدي طبع عليها قبلاته ..
همس بـ أذني
_مو گتلج انتي الي ما تصيرين الغيري

سحبت أيدي متجاهلته

_المهم صرتي زوجتي

هاي اذا گدرت تحصلني يوم زواجي هو يوم وفاتي عندي إستعداد اموت وما ابقى على ذمه واحد مثلك الموت أهون من وأحد قذر ومنحط مثلك يلمسني ..

الكُل طلع بعد ما اخذوا ورقه العقد
انتهت السالفه بگعده عشائريه وسدوا الموضوع
تليفوني بالمشكله عفته بالغرفه وطلعت من رجعت لگيت الجهال حاطينه بالمي من المشاكل العندي حتى ما فكرت اشتري واحد جديد ولا الي خلك ..
القلق على ازاد الما اعرف اخباره والمرض دمرنيي طول هالفتره رأسي ما اگدر اشيله بس نايمه بالفراش لا اگدر اطلع من البيت ما منعوني حتى من الدوام ولا اگدر أتحرك من النحول البجسمي..

آخر حل عندي اخذت تليفون أمي دزيت فويس لـ ازاد حجيت اله السبب الحقيقي وكُلشي صار غصب عني وانو هو حاول هواي وهالمره صار دوري انتظرته يشوفها بس ما شافها ..

من بعد ما مر أسبوع اليوم عرسي
محد موجود بي غير المقربين عمامي ونسوانهم بلغته ما أريد هوسه الحنه لغيتها بس هو سوا حنه اله كُلش كبيره بالقاعه ..
العرس لغيته بحجه راح نسافر محد عارض سنان وأبو سكتوا محجوا يعرفون نفسهم خطأ ..
حتى جهاز ما جهزت ولا أخذت منهم مهر رغم أدري بيهم انطوا المهر لـ أمي مجرد أجرت بدله وعفت شعري مفتوح تاره غصب عني خلتلي مكياج تكُلي ما أريد أحد يتشمت بيج مجرد زفه بيها المقربين بعدها تركونا من وصلنا لـ فرع بيتنا ..

دخلت للبيت وهاي أول مره ادخل اله
صح نفس المنطقه بس بعيد عن بيتي بهواي
المفاتيح بـ أيدي افتح بـ البوب وأدخل مأثثه على آخر حبه اغلب الأثاث بعده مغلف ما فاتحي كُلشي مو بعيني ولا شي بالنسبه ألي..
الدمعه بطرف عيني وروحي محترگه خايفه لا أبقى على ذمته خايفه لا أبقى طول العمر وياه..

فتحت غرفه النوم تصميمها وديكورها كُلش مرتب ونازك وهم مو بعيني..
دخلت وقفلت الباب ورأي فتحت الخزانه أدور على تراك طلعت اي وأحد گدامي وكفت گدام المرايه مديت أيدي على سحاب البدله فتحتها ونزعتها
الحمام داخل الغرفه اتجهت اله مسحت كُل المكياج وسبحت بعدها توضيت لبست حجاب الصلاه صليت المغرب والعشا فاتني..

شويه وصار الباب يندك
غلست عفته وحده يحجي لا رديت ولا فتحته..
انفتح الباب ودخل اخذ ملابس ودخل للحمام
شلون نسيت البيت بيتا أكيد عنده أكثر من نسخه للمفاتيح..

عفت الغرفه كُلها اله
أخذت حجاب الصلاه وطلعت للصاله فتحتها
قفلت الباب عليه من جوا
لبست الحجاب وگعدت أصلي ما اعرف شگد مر وقت
فزيت على صوت الباب يندك
گمت نزعت الحجاب وگعدت على التخم بدون صوت ما رديت
صار الباب يندك اقوى
_لالي ردي ماعندي نسخه للصاله

_اطلعي بس احجي وياج اذا ما تردين اكسره للباب
بقيت من تجاهلته بس من دك الباب بقوه ويفتح باليده استوعبت دا يظن منتحره لو سويت بنفسي شي..

صحت
-شترررريد

_اطلعي و نتفاهم

-تريد حقوق لو تمووت إذا تريد روح اتزوج باجر من الصبح آخر همي..

ضرب الباب بـ ايده حيل
_افتحيييي طالع اني أمشي نامي بالغرفه لا تضلين وحدج بـ الصاله..

ما فتحت الباب ألا من سمعت شخطه السياره طلعه من الكراج طلعت للمطبخ اباوع بالكامره عليه
نزل سد الباب ورا بعدها رجع للسياره حركها طلع من الفرع لحد ما اختفى التصوير..

سحبت كرسي گعدت على الميز طعام رأسي يأذيني بشكل فضيع ما اگدر حتى احركه صافنه على المطبخ مسوي بـ ألالون الاحبها أسود ورصاصي
ليش اني هنا مو المفروض أكون ويه ازاد مدا اتقبل هالبيت ولا داحس بي يخصني كرهته وكارها كُل غرض موجود بداخله..
عايفني وحدي بهالليل بـ بيت و منطقه أول مره ادخلهن ما يگول بنيه وحدها شنو أتوقع منه يخاف على عرضه مثلاً أريد اقفل البوب وحتى المفاتيح ما اندلهن..

بدون ما أحس على نفسي غفيت بالمطبخ رأسي على الطاوله فزيت على صوت حركه رفعت رأسي الشمس طالعه واكف گدام الغلايه دايسوي چاي ومحضر الريوك حجه بحديه..
_ هذا الريوك جهزته أكلي صار أسبوع ما ماكله مو زين عليج ..

عفته يحجي وحده ودخلت للغرفه مددت على السرير مغطيه كُل جسمي باللحاف مكمله نومتي..

3 أيام عايشين بـ نفس البيت و واحد ما يحجي ويه الثاني هو ينام بـ الصاله واني انام بالغرفه يطلع من الصبح ما يرجع الا نص الليل حتى أكل ما ياكل بالبيت..
أكل ما أكل نهائياً من دخلت هالبيت لليوم غير كلاص الحليب ما شاربه جسمي نحول فضيع السخونه مدمرتني وكُل هذا ما أحس بي من ورا وجع گلبي وحياتي الـ تدمرت ..

دا أرش زرع الحديقه الداخليه مقابيل الصاله تجنن كُلها ورد جوري..
وسنان گاعد يتصفح بالتليفون ويدخن ارگيله
شكله كُلش متغير ما باقي ذاك سنان الشاب
شعره لحيته مختلطات بـ الابيض والأسود
وهالشيب زايده هيبه رغم بعده صغير هسه يلا دخل الـ 35 بس هالشي ما يأثر بيه ولا يحرك شعره مني ما بقيت ذيج لالي اليرف گلبها أول ما تشوفه وتحب كُلشي بي حتى عيوبه..
راح تفكيري لـ أول كلمه احبچ من ازاد أول ضحكه ضحكناها سوا لو من يبعد خصلات شعري عن عيوني ويبتسم خليت أيدي على الگلاده الألماس شنو هذا الإحساس العيشتنيا لدرجه محد يگدر ياخذ مكانك..

سديت المي ودخلت جوا الدمعه بطرف عيني مشتاقه كُلش لـ ازاد مشتاقه أشوفه وهو يدخل للصيدليه يبتسم بكُل ثگل ورزانه ولمعه عيونه وحدها تحجي عن حبه من يوم الحبيت ازاد لليوم والزلم كُلهم مو بعيني عيوني ما تشوف غيره..

افتر رايحه جايه بالغرفه أهدي روحي حتى ما ابجي ما گدرت الزم نفسي عيشوني بسجن مدى الحياه من البجي والفلاونزه احس معدتي تگلب
ركضت للحمام اتقي روحي طلعت من الألم..
ما أحس الا أحد جرني من زندي يغسل وجهي بالمي
مابيه احجي حرف واحد معدتي بعدها تگلب دنگت رأسي للمغسله اتقيء خله ايده على ظهري تمسح بهدوء فزيت مبتعده ..

لزم أيدي اثنينهن مقيدهن بقبضه ايده
والايد الثانيه يغسل وجهي بالمي
_اثبتي خل اغسل وجهچ انگلب احمر كم مره اگلج اكلي كم مره انطيج العلاج وما تقبلين تشربين البراسج أسوي اهم شي عندج العناد..

جريت نفسي گوه عنه
-لا تصير ابو گلب الحنين برأسي
حجيتها وطلعت افتح بالخزانه حتى أغير ملابسي تلفت من المي ..

لليل مثل كُل يوم كل واحد ينام بغرفه
مدده على السرير صافنه الافكار تروح وتجي
انفتح الباب دخل شغل الاضويه وراح حضر جنطه ملابسه مبين خلصت اجازته
كمل واجه تمدد على السرير بسرعه كمت عطت بي
-شكوو جاي هنا

خزرني
_صوتج نصي

-ديلا هسه مو شويه شويه گمت تاخذ ميانه

دار ظهره عني
_نومه التخم كسرتني بس اليوم أنام يمج باجر ورأي دوام..

اخذت مخدتي ورحت للصاله نمت بيها
نومي خفيف على أقل شي بسرعه افز
الباب قافلته ما يگدر يفتحه گعدت على دگاته
گمت فتحته صار بوجهي لابس ملابس الدوام

_امشي غيري ملابسج اوديج لـ امج

-ليش ولو تسويلي فضل احسن ما اضل مگابلتك

_ أسبوع يلا اجي ما اگدر ابقيج وحدج بالبيت استعجلي اتأخرت ..

-ماشي

لبست السلبر مال بيت وطلعت ورا بـ التراك
فتحت باب الصدر وصعدت
باوع عليه من فوك ليجوا

_ هيج تروحين

-أي هو من السياره لبيت أمي قابل راح أنزل امشي بيهن..

صار هدوء لا حجه ولا حرك السياره
رفعت رأسي لگيته صافن على شعري المفتوح
درت وجهي متنرفزه صار كلام ازاد بين عيوني وهو يطلب مني ما أفتح شعري نزعت القراصه لابستها بـ أيدي مثل السوار رفعته بيها..

طول الطريق ساكتين محد بينا حجه
اول ما وصلنا أتصل على أمي حتى تفتح الباب
طلع فلوس من محفظته أربع اوراق
_ مصرفج أخاف تحتاجين شي واني ما موجود
وتليفون العصر ادز الج بيد واحد اتصلي عليه أذا رايده شي..

نزلت لازمه باب السياره بـ أيدي
-فلوسك خليهن الك عندي ما أريد وهم لو تنگلب الدنيا ما احتاجك سديت الباب حيل بدون حتى ما اودعه ..

طلعت أمي تفتح بـ الباب نزل سلم عليها عفتهم يحجون ودخلت گبل الغرفتي ..

بهالاسبوع ما طلعت نهائياً ما يقبلون أطلع فتحت تليفون أمي تأكدت ازاد سامع الفويس بس ما راد
ما حاولت اراسله او أتصل بي أو حتى اخطي هالخطوه مهما يكون هسه اني على ذمه غير رجال ومستحيل انزل لـ مستوى الخيانه قبل الحلال والحرام كرامتي وعزه نفسي ما تسمح أتصرف هيج تصرف كُل الـ هامني أهم شي عرف السبب الحقيقي وعرف أني ما متخليه عنه ..

اليوم موعد اجازته أتصل على أمي بلغها راح يجي يأخذني حتى اتحضر راحت أمي بسرعه للمطعم اتجيب عشا لان ما تلحك تسوي..

استغليت طلعه أمي حتى أسوي الـ اريده..

شويه واسمع صوت سياره طبگت والباب اندك ..
طلعت فتحتها مغير ملابسه مو مال دوام معناها هو جاي من الصبح بس المغرب يلا اجه حتى يأخذني ما اهتميت ولا هامني وين جان..

دخل وسد الباب ورا
_ السلام عليكم شلونج

درت ظهري دخلت للصاله
-هلا تفضل أدخل بين ما تجي أمي
اتعمدت اكُله أمي مو هنا..

كعد على التخم يخابر جماعته وياه يمكن بالدوام بقيت واكفه قريب عليه مجتفه أيدي..
خلص مكالمته رفع رأسه خله عينه بعيني هالمره ما بعدتها بالعكس ثبتت نظراتي عليه ...
گام وكف گدامي مخلي ايده بجيوبه..
_ مشاتگلج لالي مشتاگ الـ لمعه عيونج البريئه مو الكُلها حقد وكره مشتاگ لـ حبج النقي ولـ عيونج الـ جانت ما تشوف غيري

ما رديت
_ اعتبريها نزوه ماكو بشر ما يخطأ

- واووو أختي تگول عليها نزوه تررا الـ خنتني وياها مو صديقتي ولو بنت عمي ولا وحده غريبه الـ خنتني وياها أختي بنت أمي وأبوي المهم هالموضوع عندي منتهي..

تقرب أكثر ناحيتي لدرجه صار ظهري على الحايط
بحركه سريعه منه حضني بكُل قوته
يهمس بـ أذني
_بس اختج هي الشمرت روحه عليه قسماً بـ الله ماعندي شي وياها ولا بالي ولا عندي اي مشاعر او نظره اتجاها هي الخلتني اتأثر بيها بلحظه من الشيطان لاتبقين تلومين بس بيه وتحمليني كُل الصار وحدي ..

ما بعدته عني ولا بادلته
مديت أيدي لخصره كُل ظنه راح ابادله كُل ظنه اتأثرت..
سحبت السلاح من حزامه بكُل خفه وسرعه
رجعت ليورا مبتعده عنه موجها السلاح ناحيته ..

- لحظه من الشيطان گلت موو
لو فعلاً تحبني جان خليتني بين عيونك جان گلت شلون اكسرها بـ اختها جان رزلتها جان ضربتها كف ورجعتها للبيت جان طلعتها خارج الغرفه مو بكُل سهوله تتأثر بيها ..
أذا ما طلگتني هسه اقتلك واقتل روحـي ..

ابتسم بـ استهزاء
_انتِ نمله تخافين تأذيها مو تقتلين بشر

-بس انتَ مو نمله

بلحظه تهور سحبت السلاح وضربت طلقه بـ اتجاها بدون تردد و خوف ..

خله أيده على صدره يباوع عليه مصدوم ..
دخلت أمي وكعت الأكياس من أيدها وهي تشوف سنان ساند روحه على التخم متألم
ركضت عليه ادك على رأسها وتجر أيدي تسحب المسدس دفعتها عني وضربت زندي بطلقه وحده..

گوه تطلع الكلمات منه بعده بوعيه بس مو بحيله
_ليششش سويتي هيج

وخرت من أمي التجبي وتعيط منهاره تقربت عليه لازمه ايدي التنزف بشكل فضيع والذبحتني من الوجع..

- حتى من يسألوني اكُللهم السويته دفاع عن النفس
وخل أشوف شنو يبقى عندك لا سمعه ولا حتى وظيفه ..

فجأه اختل توازني واحس روحي تطلع الضربه ألمها يدك بعقلي مو بـ أيدي وكعت وما أسمع غير أمي تنادي أسم تاره ...

_________

تـاره ..

انـتَ ستبقى هناك
وانـا سابقـى هنـا
لـن تسقط كافك ابداً ..
ولـن نلتقي حتى في حافـه العمـر
انـا ضائعه في محاربـه نفسي أحـاول جاهداً قتل شعـور الاشتياق والحنيـن الـيك ..

الحزن خيم علينا بعد زواج لالي الاجباري
انحرمت من شعور الامومه ويه عساف بس لالي هي صارت بنتي وصديقتي وأختي مو بس بنت عمتي..

مشغوله بغرفه الملابس هالفتره دا اصفي بيها واتبرع بكُل ملابسي الـ جانت اوڤر خفيفه ما بقيت غير كم قطعه مستورات أفضل من الـ انطيتهن
تليفوني يرن تركت كُلشي من أيدي واتجهت اله
تفاجأت من شفت رقم عمتي رديت عليها وما أسمع غير صوت صراخها وبجيها تطلب مني اجي لان محد وياها لالي قتلت سنان وهسه همه متجهين لمستشفى ** تترجاني اتلاحك لـ لالي قبل لا يدخلوها بمصيبه ..

غلقته منها أركض بدون وعي لـ خارج الشقه قفلتها ونزلت درج المصعد مدا يشتغل ..
طلعت السياره من الكراج أريد أضغط على رقم طلحه وأيدي ترجف گوه أسوق جنت خايفه من سكوتها خايفه لا تتهور ..
من أول رنه رد

_نعم

-طلحه محتاجتك محتاجه وجودك اليوم
انتَ مو گتلي حتى لو انفصلنا الگاك بالوقت الاحتاجك بي

_شصاير ليش هيج صوتج انتِ وين

- بالسياره متجها لـ مستشفى **

_ تسوقين بـ هاي حالتج

- ما عندي أحد غيرك لالي بلحظه تهور ضاربه زوجها سنان طلقه وراجعه ضاربه روحها..

_ماشي بس أهدي وانتبهي لـ سياقتج دقايق وأكون بالمستشفى..

ما أدري شلون گدرت أوصل بدون ما أسوي حادث طول ما أمشي ادعي ربي سنان ما يصير اله شي ويطلع منها سلامات علقي هلكني من التفكير لا عمام لالي يدخلوها سجن ويشتتوها بالمحاكم ..

دخلت للطوارئ ما أشوف الا عمامها كُلهم موجودين وكُلشي ما افتهمم غير اصياحهم أريد أشوف لالي وين ما اگدر افوت بينهم
تليفوني بجيب البنطلون يرن طلحه
بلغته بمكاني بالضبط ..

ما جنت متوقعه بيوم راح اعيش شعور خساره غالي
طلحه لازمني يحاول يهديني ويسكتني وكفت أصرخ مفجوعه بـ أغلى انسانه على گلبي ..
ما مهتمه لوجود الناس حولي
أدفع طلحه بكُل قوتي حتى يتركني ويخليني أتصرف...

ضغطت على كتفه أصرخ بعلو صوتي نازله على رگبي منهاره واني أشوف منظرها الدامي ...

رفعني من أيدي يحاول يحجي وياي فصلت بعد ما عيوني شافت منظرهم الدامي سنان غركان بدمه لو لالي الفاقده من النزيف..

هوسه فضيعه عمها ابو سنان ما يقبل أحد من الدكاتره يلزمها ما يقبل يعالجوها يريدها تموت معصب ومدا يعرف شنو يسوي..

_تاره اگعدي هنا بس انطيني مجال أحل الموضوع

-لا تعوفها الهم طلحه كُلشي التريده أسوي الك بس طلعها منهم

خزرني وجرني من أيدي بكُل قوته گعدني على الكرسي
_ منهاره مدا تعرفين شنو تحجين ما أخذ بـ كلامج
ولا تتحركين من مكانج خليني أشوف شغلي عدل ..

راح بـ اتجاههم بقه واحد من الحمايه مالته لابس مدني واكف فوگ رأسي طلحه خلاه يمي
منزله رأسي للأرض خسرت هواي دم ومدا يخلوها تدخل للعمليه مرت فوگ النص ساعه يلا اجه..

خله ايده ورا ظهري گومني وياه
رفعت رأسي امسح بدموعي
-وينها ما أطلع بدونها

_حولتها لـ مستشفى اهليه طلعوها حتى ينقلوها قبلنا طلعوا..
مد ايده لجيبي سحب مفتاح السياره شمره على الحمايه وأشر اله بعيونه يطلع ..

يمشي ويمشيني وياه لحد ما وصلنا لـ سيارته فتح الباب صعدت بالصدر حرك السياره متجه للمستشفى..

- شلونها شفتها خوما متأذيه

_هواي نازفه أن شاء الله تعديها سلامات

-وسنان شلونه

_صار فتره طويله من دخل لـ صاله العمليات
لالي واعيه أبد ما توقعتها تتصرف هالتصرف

-حتى اني صدمتني كُلشي تحجي الي بس نهائياً ما جابت سيره راح تسوي هيج

شهكه تطلع من روحي گلبي صار يأذيني من البجي وين ودت روحها بعصبيتها دمروا حياتها عيشوها بسجن مؤبد ..

-اي شي تريده مني اسوي اي طلب تطلبه انفذه بس لا تخليهم يسجنوها او يأذوها بنتييي هاي بنتييي روحي من الدنيا ما عندي غيرها

ضرب الـ ستيرن بـ أيده
_تاااااره اسكتي مدا تعرفين شنو تحجين ولا واعيه لـ كلامج ، أستغفر الله ما أريد منج شي بي تسكتين..

من الـ بجي والعصبيه والخوف عليها دموعي ورجفه أيدي ما يوكفن

دخلنا للمستشفى وهو وياي بكُل خطوه حتى فلوس دافعهن ما عافني ولا لحظه لحد ما طلعت من العمليه وتأكدنا من وضعها منتظرين البنج يفكها..
عمتي وصلت قبلنا ضلت كاعده بعيد عنا تصلي وتدعي..

طلع طلحه يخابر ورا ما طلع بدقايق دخل أبو سنان بـ ملابسه العسكريه وياه ولده يصيح ويحجي يريد لالي ياخذها لدرجه صار يتجاوز على عمتي
من شفته هيج أدخلت وما سكتت كلمه منه كلمه مني صار الصوت أعلى

- هسسسه صرت خااايف عليهم انتَ بسببك صاروا هيج وراك حساب دمرتهم اثنينهم من ورا عقليتك المتخلفه..
بهذا كلامي دخل طلحه فتح عيونه كُلهن من شافني احجي تقدم بسرعه ناحيتي جرني خلاني بظهره احتراماً اله سكتت وما حجيت حرف وأحد رغم ضل يحجي وما سكت لحد ما طلعه طلحه بقوا يحجون برا يتفاهمون..

انداريت على صوت عمتي
_ لو ما طلحه ما تطلع منها لالي

باوعت عليها مستفهمه
-شلون يعني ما فهمت
أدري طلحه ما خله أحد يحقق وياها ولا ينذكر أسمها بس شلون گدر ياخذها من عمامها وهو غريب عنها جنت تعبانه وما سألته..

_ عمامها الباقيين ما راضوا على تصرف أبو سنان يتركها تموت بدون عمليه گدروا يخلوا يبتعد ويلتهي ويه ابنه رادوا بـ أي طريقه يطلعوها خارج المستشفى بعيد عن أبو سنان لان كُلش معصب
من شافوا طلحه وشافوني واكفه وياه وهمه أغلبهم يعرفوا زوجچ ما يعرفون بي منفصل عنج
يعني من طلعها بـ اعتبار أني و انتِ الماخذتها مو هو
ولگوها فرصه حتى يبعدوها عن أبو سنان اخذناها أني وطلحه وطلعت قبلكم وانتم اجيتوا ورأي..

- يعني مو بعدين يحجون وهم يشمرون عليها تهمه

_ لا غير أني طلعت وياها

-عقلي وكفوا من التفكير صرت أخاف عليها لا يتهموها رغم الموضوع ما بي شي وعادي..

ورا ساعه دز رساله طالع مستعجل عود أذا احتاج شي أو صار شي أتصل عليه..

عمتي نامت بقيت الليل كُله كاعده ومكابلتها لحد ما صحت أول شي نطقته..

_عايش لو ميت

گمت الها
-عايش الحمدلله

صارت تبجي بـ هستيريا وتضرب على رأسها أريد الزمها ما اگدر
_ليششش عاااش جانت نيتي امووووته

بدون وعي ضربتها كف بكُل قوتي
-صاااحيه للداتحجي لو ميت جان نوموج بالسجوون شلون هيج تسووين ما تفكرين بـ امج ما تفكرين بيه محترگ گلبي عليج عووفج مني ومن امج ما فكرتي بنفسج وين راح توديها بسبب هالتصررف جان سووا بيج عمامج ..

_ متحسوون بيه محد يحس ما اگدر أعيش وياه أحس نفسي بلا كرامه وحده رخيصه ...

ما تحملت كلامها وانكسارها حضنتها أحاول اهديها ..
طلعت لالي من المستشفى بـ بيت أمها محد اجه ولا أحد حجه ولا أحد شافها محد يعرف ورا هالهدوء شلون راح تكون العاصفه..

دزيت فلوس العمليه وكُل المصاريف الصرفها طلحه بدون نقصان بـ أيد واحد من الحمايه عندي رقمه انطانياه طلحه حتى أخاف أحتاج شي وبلغته يوصلهن اله المبلغ جان مني بدون علم لالي..

مـرت الأيـام ويه اختفاء عهد وأمها الملحوظ ..

ورا كم يوم من دزيت الفلوس اندك الباب واساساً بابي محد يدگه غير طلحه ولالي..
باوعت بالعين السحريه طلحه ..
فتحت الباب دخل بدون حتى ما يسلم..
وكف بنص الصاله طلع من جيب سترته فلوس واندار عليه
_اي ست تاره شوكت تعوفين هاي تصرفاتج

جتفت أيدي وكفت مقابيله

- شنو قصدك

_ مره رجعتي فلوس بيد عهد وعديتها الج لان جنت مشغول هسه على أي أساس ترجعين الفلوس الصرفتهن بيد الحمايه

- وانتَ على أي أساس تجي تصرف عليه وعلى الـ يخصوني

شمرهن على الطاوله..
ودار ظهره گال
_هلكتيني انتِ وعساف بـ تصرفاتكم
ممنوع ترجعيهن ديري بالج تاره تعانديني بهل سالفه
الـ انطي ما يرجع..

مشيت ورا حتى اسد الباب بدون أي كلمه ولا حتى رديت كُلش جان معصب مو مال اجادله بوقت عصبيته..

قبل لا يطلع ألتفت
أول مره يشوفني بعد مرضي بدون باروكه وبلونه الحقيقي صاير شعري ولادي لـ نهايه أذني لونه الطبيعي الأشقر..
هدأت كُل ملامحه وظهرت ابتسامه على شفايفه
تقرب ناحيتي بقيت واكفه بـ مكاني ما تحركت..

خله عينه بعيني لـ أول مره تلتقي نظراتنا بعد كُل هالمشاكل..
مرر طارف اصابعه على أثر الوشم
_ شمعنى 1995

-حتى ما أنسى مواليد عساف

_بس

- أي

هز رأسه مبتسم بـ استهزاء
_ صرتي مجرد ماضي
الرجال الـ جان ينتظر منج نظره ما بقى موجود
استودعتچ الله أم عساف..

غادر المكان ومن يومها بعد ما شفته دخلوا لحياتي فجاه واختفوا فجاه انقطعت كُل أخبارهم هو وأهله..

اجت لالي لـ بيتي صاره فتره طويله ما جايه..
كاعده بصفي على التخم تصفح بالتليفون مخليه رأسها على كتفي..
دا اصفح بـ ستوريات الانستا شفت عهد مخليه ستوري دخلت اله جان مباركه لـ خطوبه صورت العروس ما واضحه بقيت اگلب بالباقيات لگيت تاك دست عليه بدون اهتمام اجيت دا اطلع للحظه استوعبت هاي وين شايفتها ركزت بيها أكثر نفسها..

_ تاره شبيج صافنه
سحبت التليفون من أيدي تشوفهن

_يجوز خطوبه صديقتها خوفتيني اگول هاي البنيه شبيها صفنت

-لا مو صديقه هاي نفسها طليقه طلحه اني شايفتها بس انتِ ما تعرفيها

_يجوز متوهمه

-لا هي نفسها متأكده
رجعت تگلب بيهن بتركيز باوعت عليه بـ أسف

_حرامات بسبب غرورج وكبريائج ضيعتي أكثر شخص يحبچ..

يتبع..

________________

كُلكم توقعتوا لالي انتحرت وطلعت توقعاتكم خطأ ..