رواية الكارمــا الفصل الثامن والعشرون 28 - بقلم آيــه آلـ صبري

‏وحدي
‏والدِنيا تعرفني
‏شكثر وحَدي

‏لا طَفيت بليّل
‏وانمدتلي شمعة
‏ولا نَجم منكُم
‏عبر وتعدَّة حدي .

________________________

تـاره ..

لكني احتاج لمن أشكو لـهُ ..

انـا الضياع
انـا الغربه
انـا التناقض
انـا القلق
انـا المغلوب

انـا السماء وانتَ البحـر كلانـا علـى أرض واحده ولا تجمعنا فرصه واحـده ...

طلع وناهي كُلشي بعد ما غلق كُل الابواب ورا ...
متوقعه نهايتنا من البدايه ..
شگد اذيته ونفرته وابتعدت عنه بس بقى متمسك بيه ..

ليش بعد ما غلق الباب ودار ظهره بدون ما يلتفت گلبي آذاني ...
ليش اني الـ نهيت كُلشي وطلبت منه يروح وليش گلبي وجعني ..
خليت ايدي على صدري افرك بي حتى اگدر اتنفس
مانعه دموعي تنزل ..

فتحت باب البلكونه ...
نظراتي تتبعه وهو طالع من المجمع متوجه للكراج ..

اردد بصوت ناصي ...
خلص تاره خلص السويتي صح لا تقبلين بشي أقل من استحقاقج ...
مو تاره التقبل بـ القليل ..

ليش دا انقهر واضوج أساساً تعودت على حياتي التنتهي بخساره كُلشي اتمناه ..

كُل شويه يلزم كتفه معقوله لهدرجه اذيته بضربتي ...
طلع السويج من جيبه دايريد يفتح باب السياره ..

فجأه وكع على الأرض..

فتحت عيوني اركز بـ الداشوفه ...
اريد استوعب الداشوفه بعيني طلعت من البلكونه بكُل سرعتي لدرجه نسيت اقفل باب الشقه
المصعد مداينفتح نزلت على الدرج ركض ..
انكطع نفسي لحد ما وصلت ..

اتجهت اله بعد ما شفته مدد على الارض ..
ما اگدر اشيله ..

كعدت على الأرض مخليه رأسه على رجلي ...
اصرخ بعلو صوتي اريد أحد ماكو حتى الحارس ماكو الـ ساعه فوك الـ 11 المجمع هدوء كُلها نايمه
ما هان عليه اعوف رأسه على الأرض واگوم ...

بقيت كاعده اصرخ لحد ما شباب اثنين جانوا كاعدين دايشربون ارگيله بـ حديقه المجمع ..
اتقدموا الي
انطيتهم مفتاح السياره وطلبت منهم يحملوا داخل السياره ...

كعدت ورا بعد ما دخلوا للسياره
سحبت رأسه لحضني احاول وياه فاقد كُلش ...

واحد منهم كعد بالصدر والثاني يسوق ...

بدون ما يحسون سحبت المسدس من حزامه ولفيته بسترته ضميته جوا المقعد ...

ضميت وجها لصدري تطلع الشهكه من گلبي بسببي كُل مره يتأذه ورغم هالشي باقي وياي وباقي يحاول ...

رفعت رأسي بعد ما حسيت راح أنهار من البجي امسح بدموعي البللت وجها ...
اهمس بـ أذنه ايات وادعي ربي من كُل گلبي ما يصير بي شي ..

نزلوا الشباب فتحوا الباب وحملوا لداخل المستشفى
بقيت برا ..

اخذت تليفونه الثاني الخاص أعرف الرمز مواليد عساف وعهد ...
فتحته أدور بـ الأسماء ...
لحد ما لكيت اسم واحد من الحمايه اعرفهم
أتصلت عليه بسرعه رد ..
طلبت منه بسرعه يجي للمستشفى بدون ما يبلغ أحد ...

راحوا الشباب بعد ما اتشكرت منهم ...

دخلت شفت الدكتور يفحص بي ..
حجيت وياه وضحت اله مسوي عمليه ما صار هواي وتعرض لضربه قويه على مكان العمليه ...
بقى يفحص بي والممرضين وياه طلب مني اطلع برا ..

طلعت افتر بالممر خايفه لا يصير بي شي بسببي وهو قاضي مباشره راح يتهمنوني بـ قتله ...
خاصه عساف بدون كُلشي يكرهني
استوعبت انو عساف بعده بالعراق أكيد الحمايه راح يبلغوا يجي وياهم ...

كعدت على الكرسي اجمع بشعر الباروكه المتناثر واهز برجلي من التوتر ...
وين ورطت نفسي ..
ويه منو ..
شلون راح اگدر أواجه ابني هسه أكيد راح يطلع منه كلام محلو وبنفس الوقت حقه ...

فزيت من صفنتي على صوت الدكتور طلع مستعجل يحجي ويه الممرضين ويوجه بيهم ..
دخلت ورا رغم ما اعرف اذا يقبلون ادخل او لا
شفت ممرضه واكفه ما انتبهت عليها شنو دا اسوي بالي مو يمها ولا اهتميت الها ..

كعدت على السرير بصفه
لزمت كف ايده قربته على شفتي اطبع قبلاتي عليه بكُل خوف وجنون ودموعي تنزل ...
ايدي تتجول على لحيته الغازيها الشيب ...

ليش رجعت بعد كُل هالسنوات ليش دا تعذبني وتعذب نفسك واحنا طريقنا من البدايه منتهي ..

دنگت رأسي لصدره ابجي واهمس بيني وبين نفسي ..
طلحه مو اني التعبتك انت التعبتني
خليتني طول الوقت عايشه بحرب ويه عقلي وگلبي ...

تركت ايده بسرعه فازه من الداسوي ليش دا ابجي
مستحيل اضعف مستحيل أخلي گلبي يتحكم بيه ..

رفعت رأسي على صوت الممرضه تطلب مني أطلع..

ما اگدر اعوفه وارجع بقيت كاعده انتظر الحمايه سويج سيارته عندي خاصه السلاح موجود بيها كُلشي يصير ما أثق انطيهن لـ أحد ...

صار گدامي عساف واحد من حمايه طلحه يمشي وياه ..
اتجه الي يمشي بكل سرعته

_وينه

أشرت اله على الجهه الموجود بيها عافني ودخل بسرعه ..
انطيت السويج للحمايه اخذه مني ..

شويه وطلع عساف يحجي ويه الدكتور بالانكليزي لغتي الانكليزيه قويه وحسب الترجمته اتناقشوا على موعد العمليه وهسه استقر افضل من قبل شويه ...

اطمأنت بعد ما سمعت حديثهم عفتهم وطلعت رغم بعدهم دايحجون ما خلصوا كلامهم ...

وصلت للحديقه وكفت على صوته ..

_ست تاره

التفتت اله مجتفه ايدي

نعم

تقرب ناحيتي ..

_ جان عندج مو

اي

_شنو تفسير رجال نايم بـ بيتج

شنو قصدك

_لا تجاوبين سؤالي بـ سؤال وتتهربين اتصور قصدي واضح
اعرف ابوي مستحيل ينجمع بمكان وحده ويه وحده بالحرام وماكو غير تفسير متزوجين ...

شنو اتهرب انتَ مبين مفسر الموضوع على مزاجك ورايح بعيد كُلش بخيالك ..
ماكو شي بينه نهائياً
وزحمه عليك تتهم امك بهيج كلام ..

_انتي مو أمي وما اتشرف بهيج وحده ..

خزرته
هواي تعديك حدودك بالكلام
خلص لا تعتبرني أمك بس يا حضره الدكتور ما تعرف إحترام المراه اذا تعتبرني غريبه شلون تجاوز عليه ..

_انتي استثناء انتي مو اي مراه ...

ابتسمت بـ استهزاء ودرت ظهري دا امشي ما اريد يسوء الكلام بينا أكثر...

_مثل كُل مره تتهربين من تحسين نفسج بوضوع صعب هذا طبعج ما يتغير ..

رجعت اله
عيني بعينه ما توقع رجوعي ..

عساف حقك شنو تحجي عليه وعاذرتك ..
اني وياك شربنا من نفس الكأس بس الكأس الشربته اني حيل مر لدرجه خله حياتي كُلها مره ..
حاسه بحقدك عليه لان مثلك حاقده على أمي ويجوز أكثر منك حقدي ..
بس فرق كبيررر بين حقدي وحقدك ..
بين أمي وامك ..
امي عافتني رغم جان كُلشي عدها وتگدر اتسوي كِلشي بس هي قررت تعوفني بنص عمام دمروا حياتي برمشه عين ..
امك ما عافتك بـ إرادتها أمك ما انطتك لبيت عم لو خال امك انطتك لـ ابوك ..
انتَ ما انطيتني فرصه احجي وياك ولو لمره وحده ..

سكتت بعد ما حسيت الـ ذكريات داهتنمي خفت لا تنزل دموعي ما اريد يشوفني بالصوره الضعيفه ..
مخلي ايده بجيبه يباوع بدون إهتمام نسخه من طلحه بكلامه أسلوبه حركاته نبره صوته حديته ....

رجعت كملت كلامي بثقه وقوه أكثر من قبل شويه ..
انتَ ابني الوحيد من دمي ما عندي لا ولد ولا بنيه غيرك بهاي الدنيا ..
لو شايفني عندي اولاد غيرك ومددللتهم ومزوجه وعايشه حياتي مثل ما سوت بيه أمي جان گلت حقكك لهدرجه تكرهني ..

دكتور محترم اله مكانته بالمجتمع ما عدا حياه العز و الرفاهيه العايشها كُل هذا بفضل وجودك ويه طلحه لو باقي عندي جان ما حصلت ولا شي ...
و لو يرجع بيه الزمن هم ارجع انطيك لـ أبوك وما متندمه لان انطيتك اله ...

نظراته كُلها قسوه وعدم اقتناعه بكلامي
درت ظهري بعد ما حسيت دا احجي ويه حجر ..

طلعت خارج المستشفى بقيت واكفه بالشارع انتظر سياره كعدت على الرصيف صافنه وعقلي يسترجع لقائنا الحاد ..
فاتت سياره طلحه تمشي بكُل سرعتها الحمايه صاعد بيها ..

مرت فوك النص ساعه ماكو سياره حتى أذان الفجر خلص ..

_تفضلي وياي اوصلج ..

واكف فوك رأسي يحجي بكُل برود ..

شكراً هسه تجي سياره

_ما تخافين على نفسج ترجعين وحدج هيج وقت

لا ترا انتَ مدا تحجي ويه وحده شابه بعدها صغيره

دار وجها يضم ضحكته

_ اليشوفج وياي منو يصدك انتي أمي

فتحت عيوني اول مره تطلع منه هالكلمه ..
مباشره سكت ورجع لملامحه الحاده ..

_ست تاره ممكن تسمحين الي ارجعج البيتج رجولتي ما تسمح الي اعوفج بهالليل تصعدين ويه شخص غريب وهم لو كاعد ابوي ما يسمح بهالشي ..

گتلك شكراً ما يحتاج

_رجاءً مستعجل ما اگدر اعوف والدي وحده ولا اگدر اعوفج بالشارع وحدج لا تعقدين الأمور ...

گمت امشي ورا لسيارته فتحت باب الصدر صعدت
طول الطريق ساكتين محد بينا حجه يمشي بكُل سرعته هلگد ما مستعجل ...

صارت سياره گدامنا وكف بسرعه وفجاه ..
رأسي انضرب بالجامه بقوه
التفت الي سحب رأسي بين ايديه يشوفه مبعد الشعر عن وجهي ..

_بيج شي خوما تأذيتي

رجع لمكانه يباوع بقلق
لا عادي ..

_متأكده

اي

حرك السياره مخفف سرعته ..

_گالوا بيج كانسر

اتشافيت الحمدلله

_دا تاخذين العلاج ملتزمه بي ديري بالج بس تحسين بتعب ارجعي لدكتورج يفحصج لان اكو هواي حالات اتشافوا ورجع الهم المرض مره ثانيه فـ انتي انتبهي ..

ان شاء الله ..
فتحت الجامه الهوا البارد يضرب بوجهي وشعري دا يتطاير بسبب قوه الهوا ..
صابني برود اتجاه كُل تصرف منهم مدا اگدر أتأثر فجاه دا تجي الأحداث وحده ورا الثانيه ...

دخلت الشقتي بعد ما وصلني وغادر المكان راجع للمستشفى...
واكفه گدام المرايه اغسل وجهي بكُل قوتي مانعه دموعي تنزل تعبت من البجي..
فرشت السجاده صليت الفجر
مددت عليها بعد ما كملت صلاتي ..
علاقتي ويه طلحه انتهت ومستحيل نرجع
بس وابني معقوله أموت وهو ما معترف بيه
معقوله أموت وماعندي أحد بهالدنيا من لحمي ودمي يذكرني طول عمري سانده نفسي بنفسي ما محتاجه أحد بس بعد مرضي تعبت وصحتي انتهت ..

مرت يومين بدون ما اگول الأحد عن الصار حتى لالي ما بلغتها ..
الحجيه يوميه تجي الصبح تتريك يمي ما حبيت استغفلها بلغتها اني الطعنت ابنها بـ هذيج الليله وسولفت الها الصار صارت تعتذر مني وتحلف ما يعرفون بي راجع عاقد عليها شيخ ولو يدرون مستحيل يقبلون وطلعوا من زمان مشاكل ويه زوجته تريد تعيش بالخارج عند اهلها وهو مايقبل وهواي مشاكل صايره بينهم ما اهتميت ولا ردت اعرف سبب انفصالهم آخر همي ...

يمكن أسعد يوم بحياتي هو اليوم الـ بلغني بي الدكتور شفائي من الكانسر المفروض افرح وجنت متوقعه راح افرح بس حتى هالخبر بوقتها ما فرحني ليش هيج صابني برود اتجاه حتى نفسي ...
طلع الي شعر اشگر شبه الولادي وهم ما فرحت ...

للعصر اجتي لالي تحاول تعرف شنو بيه ومالي نفس احجي ..
واكفه بالمطبخ تخلط داتحضر كيك
جمعت شعرها وكفت گدامي ..

_باعي تاره گوه قنعت أمي تخليني اجي الج لان هي هم افتقدتج شو صار فتره لا تجين ولا تسألين ولا تتصلين وحتى من أتصل تردين كلمتين وتغلقي ...

حجيت الها كُلشي بالتفصيل ..
فتحت عيونها بـ صدمه ..

_قاضي شكبره شگده اله هيبته واحترامه تجين انتي تضربي عجيب والله عجيب وفوكاها ما حجه ولا سوا الج شي شلون متحمل عصبيتج وكُل هذا وتكولين ما يحبج ...
بس اتوقع فقد وعيه مو من الضربه لان جان عصبي ومنا نزف فـ يمكن ضغطه تخربط لهسبب فقد الوعي ...

ما أدري
بعد ما اريد اي أحد بحياتي
مره طلحه گلي عساف مو الج ولا راح يكون الج بيوم من الأيام وكلامه صح ..
بدأت حياتي وحيده و نهايتي هم وحيده ...

_ جنت متأمله بطلحه يعوضج بس من عرفت بي مزوج تغيرت نظرتي رغم هو منفصل هسه بس احس زواجچ منه شي خطأ اذا صار ...

لا مستحيل أوافق مستحيل أقبل برجال وحده نفسها وعينها مخليته عليه مستحيل أقلل من نفسي وابقى اتعارك ويه مراه مثلي علمود رجال ....

قبل لا تطلع بلغتني بـ اولاد عمي الوحيد بعدهم شباب صغار تقريباً اصغر من عساف جايين عند عمتي البارحه متغدين يمها وسألين عني علاقتي وياهم على گد السلام مالهم علاقه بـ سوالف أبوهم وأمهم
خاصه بعد ما توفى عمي صاروا يسلمون ويسألون عني قبل جانوا يخافون من أبوهم ..
ولو همه حالهم حال الغربه كُل خمس سنين لو اشوفهم مره ومجرد أسلم لو ما اشوفهم ...

مرت الأيام ويوم بعد يوم لحد ما صار شهر كامل ....

شهر كامل ما شايفه طلحه ولا سامعه اخباره
اختفى بشكل نهائي ونفذ طلبي بـ الابتعاد عني ناهي كُلشي ..
انتهت علاقتنا قبل حتى لا تبدي ..
عهد دائماً تتصل بيه وتسأل عن حالي وتبقى أكثر من ساعه تحجي وياي وحتى امها احجي وياها بس ابد ما تجيب طاري طلحه ولا عساف ..

فزيت من نومي على صوت تليفوني وباب بيتي يندگن ..
صارت عيني على الساعـه بـ 3 ونص الفجـر
طفرت من السرير حتى نسيت نفسي لابسه بس فانيله وبجامه ونسيت حتى الباروكه ...

فتحت الباب ..

صار گدامي مو طلحه الاعرفه ضعفان كُلش وعيونه حمر كانوا ما نايم من مده طويله ..

لزمت الباب بـ ايدي مجرد رأسي طالع من الباب واحجي وياه ..
طلحه صاير شي اكو شي وضعك مو طبيعي ..
ما رد عليه ولا حجه حرف نظراته تتجول على تفاصيل وجهي بكُل تعب ..

فتح الباب بـ ايده ودخل
بدون تردد وبدون ما ينطيني مجال انطي رده فعل
دخل لغرفتي ..
امشي ورا واحجي وما يرد عليه خفت لا يكون بي شي ..

طلحه تعرف الوقت هسه شنو راح يصير الفجر اذا ما تدري
احجي فهمني صاير شي عساف امك بيهم شي ..

ولا كانوا موجوده و احجي وياه ...
صار يفتح بـ ازرار القميص نزعه وعلگه على ستاند ملابسي ..
سحب السلاح من حزامه خلاه على الميز تواليت ..

مدد على السرير داير ظهر عني

_اطلعي وسدي وراج الباب

ثواني ترا انت بغرفتي عجيب والله عجيب غير افهم شكو ..

حجه بكُل نرفزه بدون ما يلتفت ..
_تاره اطلعي وسدي وراج الباب بـ الـ 6 ضبط كعديني ...

طريقه كلامه وأسلوبه خلتني بحيره طلعت وسديت الباب ورأي ضليت كاعده بـ الصاله صافنه ..
شنو الـ صاير
ليش طلحه هيج وضعه كُلش تعبان
ليش رجع والاعرفه طلحه من ينهي شي فعلاً ينهي بدون رجعه ..
دخلت توضيت وصليت الفجر
مستحيل يفوت صلاه حتى الفجر يكعد الها شنو الـ بي لدرجه حتى الصلاه نام ونسى يصليها ..

فتحت تليفوني ردت أتصل على عهد حتى أعرف شنو بيهم استحيت شنو اكُللها اخوج نايم عندي راح انفهم بـ غير قصد ..

طلع ضوا الشمس وهو ما كعد
انتظرت الـ 6 عيوني ما اجاها النوم ولا غفيت من القلق ...
مجرد ما صار الوقت ..
اتجهت للغرفه فتحت الباب بكُل هدوء ..
لگيته گاعد يدخن بصفه باكيت الجگاير صافن على السكف بقى هيج بـ الـ عشر دقايق ما أهتم الوجودي ..
كعدت على السرير قريب على رأسه ..
خليت ايدي على كصته مرتفعه حرارته وجها أحمر..

حركت بـ طرف اصبعي كتفه على كيف
طلحه ترا دا تخوفني والله ..

سحب رأسي خلاه على صدره وايده محاوطه كتفي ..

_لا تخافين ما بيه شي
تعبـان وما الگه الراحه غير بشوفتج ...

وخر الغطه عنه رافع نفسه گام اخذ القميص لبسه يدكم الازرار صافن بـ الفراغ رجع گعد على السرير لبس الجواريب والحذاء ...

رفع رأسه يفرك وجها بكُل قوته ..
طلحه بس حاجيني رد عليه لا تخليني هيج قلقانه ...

كعدت من النوم جسمي مي عيوني تفتر على كُل مكان بالغرفه كمزت من السرير من كُل عقلي ادور على طلحه حتى باب الحمام فتحته وماكو ..

كعدت على الأرض ايدي ترجف ليش حلمت بي بعد هاي الفتره كُلها ليش الا اليوم
الأفكار السوده سيطرت على عقلي طلحه او عساف بيهم شي لا سامح الله ..
اريد أتصل اسأل عهد عن حالهم واتردد بقيت يومين كُل ما أنام يجيني نفس الحلم ...

لحد ما أتصلت عليه عهد بعد هالمده ..
جانت تبجي منهاره
حاولت أفهم شنو بيها ما جان عدها غير البجي ..
خليتها على راحتها تبجي لحد ما هدأت وگدرت تتنفس عدل ...

تمام هسه فهميني امج بيها شي ..

_ لا

لعد ليش هالبجي كُله ..

_تاره أريد افصخ الخطوبه وماعندي أحد غيرج يفهمني شلون اتصرف أمي مراه كبيره ومريضه أخاف ابجي گدامها بس اشوفني هيج تتخربط
وطلحه مستحيل احجي وياه استحي
وعساف عصبي بس يشوفني ابجي يسوي مشكله ويأذي الاذوني ...

تمام احجي واسمعج بكُل إذن صاغيه ...

_صار أشهر احاول اتقبل الموضوع بس مدا اگدر امه واخوته كُلهن عدهن اهم شي المظاهر وكُلشي حسب الاتيكيت ونظام وأهم شي بحياتهم التباهي ..
تخيلي جانت عدهم عزيمه ورحت الهم ماكو واحد ما عرف بيه دكتوره وأخوي قاضي وابن أخوي دكتور .. لعبت نفسي من كميه التفاخر كلمه وحده ما حجيت بس ضاله تقدم بيه گدام العالم و تتباها بدون حتى ما تستأذن مني ...
كُل هذا سكتت عنه بس توصل بيها تتدخل وتفرض عليه اشياء اسويها من أكون وياهم مقرفه تحسسني انسانه مشايفه فلوس و تگُلي لا تحجين عربي ويه المعازيم اخلطي ويه الكلام انكليزي ..
وصلت بيهن مرحله يكُللي انتي دكتوره حرامات لابسه حجاب انزعي للحجاب أحلى بعدج صغيره عود من تكبرين البسي ....
من حجن هيج اتهسترت وابد ما قبلت ..

وخطيبج شنو موقفه وتعامله شلونه وياج

_كُلش زين وخلوق وياي علاقتنا أساسها احترام متبادل بس رغم هالشي ضل حاير بيني وبين أهله لا يگدر ينطي بيهم ولا يگدر يسكت ...
يگُلي هو هيج طبعهن مالج علاقه بيهن مجرد نزوج يكون بيتج وحدج وبعيد عنهن أساساً عايش بـ اربيل بيته وحده مو ويه أهله ...

من كُل عقلج تفسخين خطوبتج من ورا امه واخواته ترا الموضوع جداً طبيعي غالباً لازم يكون اكو توتر بين علاقه العمه والجنه ...
تعاملي وياهم بـ برود احضري فقط بالمناسبات العائليه المهمه ومجرد تأديه واجب لا تختلطين بيهم افرضي احترامج وحدودج من بدايه الطريق بكُل هدوء ورقي ..
اهم شي علاقتج ويه زوجچ تكون مستقره مالج علاقه بالباقين ...

_بس مو هذا السبب الرئيسي الحجيته هسه مجرد أسباب..

لعد شنو

_بخطوبتي سويتها عائليه ما عزمت أحد وانتي اجيتي وشفتي بعينج محد جان موجود غيرج وكم وحده من المقربات وهمه هم بوقتها هم اجه غير عائلته لان الحفله صارت بالبيت مو بقاعه فـ ما عزموا أحد..
ورا خطوبتنا بـ أسبوع صار يطلب مني نسوي حفله مهر بالقاعه لان أغلب عمامه وخواله عايشين بالخارج وما اجوي للحفله لان سويناها بسرعه وكُلهم زعلانين ويعتبون عليهم ..
رفضت رفض قاطع وما رضيت ما الحك ولا عندي وقت بسبب ضغط الجامعه عليه ..
وگدرت بـ أسلوبي اقنعه ولغيناها وقررنا بالحنه عود نسويها حفله كبيره ...

لحد هنا الرجال ما مقصر ..

_بس امه وأخواته ما رضن يريدن الا حفله كبيره ورنانه ويحجزون مزرعه ويعزمون الكُل لان حفله البيت البسيطه ماتعجبهم ..
صارن يسمعن كلام مباشره بلغته مستحيل أسوي الحفله بقى يدافع الي ويفهمهن ما اگدر بسبب دوامي ..
من شافني صار أشهر متمسكه بقراري
ما تحملن حجن بوجهي كلام كُلش محلو ويضغطن عليه بطريقه اجباريه حتى اتصير الحفله ...

وانتي اسويتي ..

_احتراماً اله ولان هو زين وياي سكتت وما قللت من إحترام أهله ولا رديت عليهن ..
بس تعبت بعدني بالبدايه وهيج يدخلن بعلاقتنا ويحاولن يخلني أكون مثلهن حياتهم دمار بس مظاهر وتفاخر ....

ليش لهدرجه رافضه من جانب حقهم لان بعد هواي سنوات يلا عود تسوين حفله الحنه مو گلتي الا تتخرجين ومن جانب حقج ترفضين ..

_مدا ارفض من فراغ بس فعلاً ما عندي وقت أقل شي يراد الي أسبوعين اكعد احجز أكثر من فستان لان المعازيم هواي والحفله بمزرعه خاصه الهم واحجز عند المركز للمكياج ما عدا وراها يراد أنام أسبوع حتى ارجع مصحصها للمحاضرات ..
هسه صار أسبوع مثگل عليه وزعلان لان دا ارفض طلبه ...

أهدي واتصرفي برزانه خلي شخصيتج قويه ما طول خطيبج زين وياج ويحبج ويحترمج مالج علاقه بـ احد شنو يحجون سايريهم سوي نفسج مهتمه لـ كلامهم بس انتي بالحقيقه مجاهلتهم وابد لا تصيرين من نوع النقاله حجي شنو يحجن او يسمعنج كلام محلو ورحتي شكيتي اله تعلمي حلي مشاكلج بنفسج بدون ما تدخلين أحد و تنزلين نفسج ...

_يعني شنو أسوي هسه

بـ الليل اتصلي عليه وكُليله لان تعبانه من المحاضرات طلع مني كلام محلو وجنت معصبه خلص نسوي الحفله وحددي الوقت اليناسبج وبالنسبه للـ ميكاب اب لا تشيلين هم تعاليلي بيوم الحفله أسوي الج ..

بعد ما مر أسبوع اجت عهد لـ بيتي واحد من الحمايه نزلها بالمجمع وراح ..

ما باقي لحفلتها الا ساعات قليله ..
كعدتها بغرفتي طلعت كل أغراضي صار فوك السنتين ضامتهن كُلهن ماركه موصيتهن من الخارج من جنت اشتغل التهيت بالمشاكل وبقن ما مستعملتهن ...
دخلتها لغرفه الدريسنك روم والعطور والمجوهرات..
خليتها تختار على ذوقها ...

جانت مشتريه فساتين اثنين
واحد منهن طلحه موصي الها تصميم خاص من تركيا شفت العلامه مختوم عليها السعر بـ 12 ورقه كُلش حلو وفخم مال محجبات لان الحفله مختلطه ومعازيم هواي من الطرفين ...

بعد ما خلصنا كعدت على سريري تصبغ اظافرها
شمرت عليه تليفونها ..

_شوفي المقطع هاي البارحه من رحت اخذت الفستان من بيت طلحه ...

عهد تمشي و شايله التليفون دخلت لغرفه بـ الطابق الثاني
فتحت الباب صار عساف گدام الكامره لابس بس شورت رياضي وشايل اثقال بـ ايده يتمرن داير ظهره ما منتبه ..
دخلت وثبتت الكامره على الميز تواليت ..

كمزت عضته بعضلات ايده حيل ..
التفت الها فاز ..
شالها بـ تك أيد رافعها من الأرض يضحك وياها ..

_دكتوره عهد رغم سمنج شلتج بتك أيد
صارت تضرب بي وزعلت لان يكُللها سمنانه ...

شمر روحه على السرير يباوع عليها
كعدت بصفه خله رأسه على رجليها ..

_عمتي حبيبتي فضفضي منو مضوجچ

گام كعد كدامها يجر بشعرها ويرجع يرضيها بـ بوسه على رأسها..

_احسج بنتي مو عمتي وداعه أبوي مادري شلون انطيناج لهذا رجلچ بعدني اشوفج الصغيره الدلوعه لحد هسه ما مستوعب شبسرعه كبرتي وصرتي جامعه وانخطبتي ...

لو أدري ما صاعده ولا مسلمه عليك هلست شعري تهلس وضوجتني گوه دا اقنع نفسي راح ازوج واعوفكم وانت زودتها ....

_سيندريلا كُلشي ولا تزعلين شيخلصني من اخوج طلحه ..

گام سحب فانيله من الخزانه لبسها وطلع مشط
يمشط بشعرها ويحجي ..

_من تخلص الحفله اخذيلج يومين ارتاحي بعدها جيبي محاضراتج اشرحهن الج حتى ما يتراكمن عليج ماشي حبيبي ...

ماشي

گامت اتجهت دا تأخذ التليفون جان توكع مجموعه العطور على الميز تكسرت ..
بسرعه رفع رأسه ابتسم الها يطمنها..

_عادي حبيبي هسه اناديهم ينظفون المكان ..

سحبت التليفون
شنو العادي عطور كسرتهن ..
تقدم الها صارت عينه على التليفون بسرعه گالت ..
_دا اصور حتى احتفظ بي

خله ايده على كتفها وباسها من عيونها ..
_ بنيتنا اميرتنا الملعونه ...

بقوا التصوير لحد ما نزلوا وطلحه يحجي وياهم بعدها انقطع ..

_هذا الجانب الثاني من ابنج ابو الشخصيه المتعصبه طول الوقت ...

ابتسمت الها
طلع فرفوش

_كُلش خاصه ويه طلحه ولا كانوا ابو اليشوفهم اصدقاء مو اب وابنه وهم لا تنسين فرق العمر بينهم مو هواي طلحه من زوج جان صغير ..

زين علاقتج حلوه ويه عساف

_لان أكبر مني بسنوات هو تخرج واني بعدني جامعه من جنت طفله وعيت عليه عبالي أخوي هو يلعبني هو يهتم بيه هو كُلشي طلحه زرع بـ گلبه المحنه والموده اتجاهنا ..

طلحه دللني وعيشني فعلاً أميره لو أخوي ابن أمي وابوي ما يسوي السوا الي ..

بـ البدايه ما اهتميت لحجايتها بعدين
اجتني لحظه إدراك ...

شلون يعني مو اخوج ..

_لا أخوي بس من أمي
ليش شنو مدا تشوفين عساف أكبر مني

لگيتها فرصه حتى اگدر اعرف تفاصيل هالموضوع بدون ما ابين مهتمه ...

صح أذكر من زوجت طلحه جان عايش ويه عمامه ونسوان عمامه وأولادهم واعرف ابو شهيد ما اذكر بـ اي حرب گالوا ..
بس ابد ما يجيبون سيره امج ولا مره حجوا بيها
وهم جنت صغيره مو كُلش واعيه حتى اسألهم واعرف السبب وبنفس الوقت التهيت بـ مشاكل النسوان وخاصه من شفت عمته شلون تحبه ومتهمه بي توقعت امج ميته ...

_ ورا استشهاد ابو طلحه جانت امي بعدها شابه وما تقبل تزوج ضلت تربي طلحه بس خوالي بقوا يحاولون يقنعوها حتى تزوج آخر شي جبروها تزوج بعدج صغيره وعندج بس طفل واحد لا تضيعين عمرج ....
عمام طلحه ما قبلوا ينطوا واساساً ازوجت لـ ناس بالعرب ما اتوقع يقبلون ياخذون ابن غيرهم
المهم جانت الزوجه الرابعه لـ رجال كُلش كبير بالعمر عمره بـ السبعين يطلع من أهل العرب العدهم حيل ويحبون تعدد الزوجات صار عدها بس اني وگوه صرت وكُلها انصدمت من عرفوا أمي طلعت حامل لان ولده واحفاده كبار وهو هم كبير مو مال يخلف وبعدها تمرض وضل نايم بالفراش سنوات لحد ما توفى ...

عندي من أبوي تقريباً 19 اخ و 15 أخت كُلهم كبار بالعمر اني اصغرهم هلگد ما هواي حتى ناسين عدهم أخت ....

إخواني واخواتي كبار كُلش حتى اكو بيهم أكبر من أمي أولاد اخواني هم كُلهم أكبر مني ..
بعد وفاه ابوي جان عمري سنتين او أقل ما اذكره ولا اعرفه ولا اذكر شكله أمي رجعت لـ خوالي بعد ما اخواني قسموا الورث بينهم وكُل واحد بيهم اخذ عائلته وطلع بـ بستان وحده ...

احنا ما حصلنا ربع منهم من الورث بحجه جنت قاصر عود من تكبر ننطيها ورث وغلسوا عليه ..

صارت مشاكل هواي بين أمي ونسوان اخوتها لدرجه رادوا يرجعون يجبروها تزوج ..
يگومون ويگعدون يعيروها فاكره الزلم اي واحد تزوجه يموت ..
احنا ما تحملنا مسؤوليتج من جان عندج ولد مو نوب هسه رجعتي بـ ايدج بنيه ..

الحمدلله بوقتها طلحه جان كبير ومخلص دراسه اخذنا عنده واشترى بستان كامل بداخله بيت لـ أمي يدري بيها تحب هاي العيشه والزرع ..
بـ هاي الأحداث يمكن جان عمري بوقتها 3 و عساف عمره لو 8 او أقل ما اذكرهن بالضبط ...

من وعيت للدنيا لهذا يومي ما شايفه أحد من إخواني غير طلحه أما الباقين كُل واحد عنده عشيره يحبون الخلفه الـ هواي محد بحال أحد ما صدگوا طلحه أخذني ..

أمي وحتى اني نعرف ام عساف اسمها تاره و شايفين صوره عرسج ويه طلحه لكيناها بغرفته
نهائياً ما تشبهين الـ بصوره
ذيج شعرها اصفر كُلش صغيره ناعمه أي معالم انوثه ماكو بجسمها اليشوفها يكول طفله مو عروس ملبسيها بدله شكلج أكيد مختلف بعد ما كبرتي فـ ما عرفناج ولا اجيتي ابالنا ....

نهينا الحديث بعد ما اجه السايق اخذها وأصرت عليه أحضر الحفله وحتى خطيبها اتصل عزمني
رفضت رفض قاطع بحجه مرضي بس بـ الأصل حتى ما اشوف طلحه ولا ننجمع بمكان بعد ما انتهى كُلشي بينا ...

الحجيه من عرفت رفضت احضر طلبت مني اجي يمها لان راح تبقى وحيدها ما تگدر تطلع بسبب عمليتها ومابيها حيل للحفلات ...

الحمايه وصلوني بطريقهم ..
بقيت بس اني وياها بالبيت محد اكو غيرنا

دخلت لغرفتها نادتني
انطيتها علاجها وسويت الها عشا
بقت تسولف الي شلون ازوجت بعمر صغير واستشهد وبعدين رجعت ازوجت كلامها مطابق لـ كلام عهد ..

حجيه لعد عساف عند منو جان عايش قبل لا تجون

_ عمه طلحه هي ربته

وينها هسه اذكرها هي خطبتني وحتى اذكر كُلش تحب طلحه وهو هم يحبها

_توفت الله يرحمها صار هواي من ماتت ..

الله يرحمها ..

تليفوني يهتز بجيب البنطلون
سحبته عهد متصله أكثر من مره ما انتبهت اله اندمجت بسوالفها ..

رديت عليها اجاني صوتها خايفه وگوه تحجي ..

_تاره طلحه وينه

مادري

_شنو ما وصل الكم

لا

_تاره اول مره بحياتي اشوفه طلحه لهدرجه عصبي
وما متحكم بـ اعصابه محد گدر بيهم يلزمه لا عساف ولا خطيبي أخذ السياره من الحمايه وطلع بكُل سرعته ما قبل أحد يجي وياه
خايفه عليه لا يسوي حادث من ورا اعصابه ..
متأكده الموضوع يخصج سمعت اسمج بـ العركه ...

تاره نبي عليج هدي وتفاهموا بدون مشاكل افتهمي السالفه منه بدون ما تعصبون اثنينكم لا يصير بي شي من العصبيه ..

بعدها دا تحجي ودخل طلحه ..
غلقته هي مجرد ما سمعت صوته ..

وجه نظره اله وبـ اصبعه أشر

_دقيقتين الگاج بـ السياره

ما اجي ماكو شي بينا ولا مسويه شي
دار ظهره وطلع ..

_گومي بنيتي شوفي شبي ماشوفينا صاير نار الا اكو شي كبير ..
ما شاف راحه بحياته ويه النسوان كلنا نعرف البي شنو بنيتي والله انتي غاليه عنده لا تضيعينه من ايدج من ورا عنادج عوفي الراح راح بعد
گومي تفاهموا لا تضلون معاندين ...
لخاطري گومي وياه ..

هزيت رأسي الها ..

كاعد بـ السياره مشغلها ينتظرني ..
فتحت باب الصدر صعدت مجرد ما صعدت داس بكُل سرعته ..

وين مودديني
ترا بزعتني قسماً بـ الله شنو اول وحده آخر وحده تطلك ويضل ولد بيناتهم عوووفني بحالي
يسوق مركز وما يلتفت الي ولا يرد عليه

طلحه داااا احجي وياااك وين ما خذني مو كُلشي انتهى شكوو راجع ..

ضرب الاستيرن حيل بـ ايده
_حرف ما اسمع منج اسكتيييي

اتصيح عليها بـ اي حق

_حرررف ما أسمع

اعصابي تفور لا اگدر احجي دايسوق لا نسوي حادث ولا اگدر اسكت ..

فتحوا الحمايه الباب
مباشره نزل ورگع الباب حيل

_فرغولي البيت محد يبقى بي

_سيدي وين نروح

_ما اريد أحد بالبيت خلال خمس دقايق كُلكم طالعين اليوم اجازه للكل روحوا لـ بيوتكم ..

نزلت بسرعه متجها اله
بعدني اريد احجي
_بدون كلام ادخلي للصاله هسه اجي ..

دخلت للصاله اباوع عليه من الجدران الزجاجيه
انتظرهم يطلعون كُلهم يلا دخل ...

وكفت گدامه اول ما دخل للصاله
شتريددد مني

باوع عليه بكُل برود
طلع تليفونه من جيبه
فتحه وخلاه گدامي ..

_منو هذا
وياريت لو يطلع كذب ما اريد تنزلين من عيني أكثر...

خفيت ارتباكي وصدمتي بصوره الذكرتني بـ حياتي السابقه ..
ما اعرفه

هز رأسه ورفع حاجبه
_اول كذبه

غير الصوره بقيت فاتحه عيوني منين جابها
_ متعرفه وكاعده وياه على نفس الفراش لعد لو تعرفينه شتسوين ..
احجي ليش سكتي يلا مو تگولين كذب اثبتيلي

منو انتَ بالنسبه الي حتى اجي اثبت الك مثل ما انتَ عشت حياتك وزوجت اني هم عشت حياتي على اي أساس اجي اسولف الك ويه منو طلعت ويه منو طبيت ويه منو حجيت ويه منو ضحكت ويه منو سهرت ...

بـ ايده ضرب الباب الزجاجيه فلشها على طولها للأرض..
ايده تنزف دم بشكل فضيع الكزاز مغروس بيها
لزم زندي بكُل قوته ضاغط عليها..

_ ليش تـاره ليش
فشلتيني گبـال روحـي المنتظرتج تـاره

دنگت رأسي مبعده نظري من حجايته همست
طلحه ايدي دا تأذيني

رفع ايده راد يضربني مباشره نزلها ضارب كُل التحفيات القريبه
كعدت على الأرض ساده اذني بـ ايدي ودموعي تنزل ما أسمع غير صوت التكسير ..
دفر الطبله الكبيره برجله فلشها ما خله شي صاحي بـ الصاله ..

كعد على الأرض مقابيلي ساند رأسه على حايط صافن بالسكف
سحب باكيت الجگاير يدخن جگاره ورا جگاره لحد ما خلص باگيت كامل ...

باوع عليه يبتسم بـ استهزاء
گام گعد گدامي
خله اصبعه على فكي رافع وجهي بكُل قسوه
يحجي كلمه كلمه وعينه مثبتها بعيني المجمره من البجي ...

_حرامات انتظاري كُل هالسنين
حرامات البـدايه الـ ردت ابديها ويـاج من جديد
حرامات بـ شـوگي الصرفته عليج

ما توقعت الخيبه تجي منج
خيبتي ظنوني بيج تاره
شنو البدر مني حتى جازيتيني بطعناتج .....

يتبع ....

اليوم انكشف اول سر عهد وامها وماضيهن
والبارتات الجايه بـ كُل بارت راح تعرفون جواب سر جان يدور بالكم طول أحداث القصه ...