رواية الكارمــا الفصل الثالث والعشرون 23 - بقلم آيــه آلـ صبري

ومثل كل يوم
نبقه ثنينه نتاني ..
منو اليتنازل ويحجي !
وياهو اليحن على ثاني .

..........................

منين عرفتي

_امي سمعتها تحجي وهي اجتي كالت الي ماكو سالفه متعرفها
اصلاً هي هم كالت الي على ام طلحه واخته اني شمدريني عنده ام واخت ....

رفضت اني من البدايه ومستحيل ازوجه

_افضل هسه صحتج اهم مو مال ادخلين بمشاكل خاصه ابنج مبين يدور المشاكل ...
صح نسيت اسألج شعجب طلحه نايم يمج

مادري شو ورا ما شفت عساف هو ب الليل اجه ونام بصاله يمكن متعاركين

_وهسه هو وين

راح لان سمعت الباب انسد مال شقه

_ لو ما مزوج جان اني شجعتج على سالفه الزواج منه بس ما اتوقع اكو أمل
انتبهي لنفسج واي شي ايصير بس اتصلي عليه اني موجوده التليفون طول الوقت ب ايدي علمودج .....

ماشي

غلقته منها وطلعت للصاله
ماكو احد ....

كعدت على التخم ورفعت راسي ..
هالخبر ما أثر بيه لان الصدمه التعرضتها اليوم وخسارتي لشعري نستني كُلشي ...

باب الشقه انفتح بسرعه التفتت
دخل طلحه وب ايده اكياس

خلاهن على الطاوله بدون ما يباوع عليه نهائياً ...

صار يرتب الريوگ ب الصحون

سحبت الكلاو لبسته نسيته على التخم من رجعت من المستشفى اخر فتره صرت من اطلع البسه ..

_تعاي اتريكي

انت مو رحت

_لا نزلت جبت ريوك

تريك وروح لا تنسى ترا كُلها تعرف بيه عزابيه اليشوفك تطلع من بيتي يفكر غير تفكير محد يعرف داخل البيت شكو الهم الظاهر

_محد يكدر يحجي عنج كلمه محلوه واني عايش
مبلغهم كُلهم انتي زوجتي وحتى جيرانج يعرفوني ويسلمون عليه بصفتي زوجج ...

بكيفك تروح تكول مزوجه شلون تحجي هيج
لو صرت زينه وعجبني ازوج شنو اكول للعالم يوميه مزوجه واحد ...

بسرعه رفع عينه خزرني ...

_ اكُلي حتى اشربين العلاج

طلحه اتريك وروح ارجع البيتك ...

تقدم ب اتجاهي وخله صحن كدامي

_ اهتمي بصحتج اكثر هالفتره

ما اريد

_ماشي براحتج

راح يفتح كيس اسود وحتى الاكل عافه ما اكل ..

سحب كرسي من الطاوله خلاه قريب على باب الحمام وجانت اكو مرايا كبيره كدام باب الحمام سحبها بعيد عن الكرسي ودارها من الجهه المابيها انعكاس ...

فتح علبه طلع منها مكينه حلاقه ....

شنو هاي طلحه

تركها على الكرسي...

وتقرب الي كعد كدامي ولزم ايدي اثنينهن ...

_تاره العلاج النفسي وراحتج النفسيه  اهم خطوه بمرضج كُل ما تكون نفسيتج مرتاحه وماكو قلق وتوتر كُل ما زادت نسبه شفائج ...
وانتي اعرفج كُلش زين كل ماتوكع شعره منج كدام عينج تبقين تاكلين بروحج أكل وتكتمين ...
وكتمانج يخلي حالتج اسوء اكثر ...

فهمت قصده شنو
سحبت ايدي و درت وجهي عنه ..

ما اريد لا تضغط عليه

_لخاطر صحتج

ماااا اريددد مستحييل ..

عافني وكام وكف

نزع الستره خلاها على التخم
وصار يفتح ب ازرار القميص
نزعه وبقى بس بالفانيله والبنطلون ...

مثبته عيوني عليه منتظرته شنو يسوي ...

شغل المكينه وخلاها على شعره الاشيب
صار يتساقط كُله على الارض ..

فتحت عيوني
وكمزت بسرعه اله سحبتها من ايده ..

شدااااااسوي من كل عقلك ...

_ب اي طريقه اقنعج لعد
شلون اخليج اسوين بدون ما اجبرج ولا اضغط عليج

ما اكدر والله ما اكدر احبه شلون ب ايدي اخلص منه انت جاي توترني ....

سحب الكلاو من راسي
بسرعه خليت ايدي على راسي

_تستحين بمرضج مني تاره انتي اجمل واقوه مراه اشوفها بحياتي ..

نزلت دموعي وحده ورا الثانيه
والله ما اكدر انتم متحسون بيه احب شعري كُلش احبه صعببببه عليييه والله صعبببه
اني داموت الف موته واشوف شعري رموشي حواجبي كُلهن اختفن بتدريج ...

فتحت ايدي وانطيته المكينه ..
كعدت على الكرسي ..

وكف فوك راسي شغلها ..

_ أبدي

هزيت راسي اله

غمضت عيوني بكل قوتي ما اريد افتحها واشوف شعري شلون ديتساقط مثل اوراق الخريف ..
مفكرت ب اي شي ولا بشكلي شلون راح يكون جنت خايفه افكر ...

توقف صوت المكينه منها عرفته خلص انتهى وراح الشي الاحبه ..

رفعت ايدي اتلمس راسي
نزلها طلحه وما خلاني الزمه لراسي ...

_كُلشي يهون لخاطر سلامتج ..

اريد اشوف شكلي اريد المرايا

_لا هسه ارتاحي عود بعدين

التفتت اله واني ما اعرف شكلي شلونه

باوع عليه وابتسم

_طلعتي ك انو طفله حلوه بكل حالاتج

رجع شغل المكينه وكمل شعره الاشيب ما بقى منه شي ...

ليش سويت هيج بشعرك حرامات ...

_مو مهم كم يوم و يرجع يطلع

خليته ملتهي يكمل شعره

رحت وكفت كدام المرايا
شكلي يخوف بلا شعر بلا حواجب بلا رموش ..

بدون وعي وبدون ما احس اتهسترت ضليت ما اعرف شسوي
صرت اصرخ من كل گلبي واني اشوف منظري البشع ..
جسمي كُله يرجف خشمي صار ينزف ...

صراخي مستمر بدون وعي
ما احس الا انشاليت ونشمرت بغرفتي على السرير ...

خلاني على السرير وسد باب الغرفه

_خلص خلص صوتج هسه يجون الجيران ...

ضميت وجهي بالمخده والشهكه گطعت گلبي ..

كعد بصفي على السرير وسحبني اله
ضميت وجهي عنه وصراخي وشهكتي ميوكفن ..

_اهدي هذا كُله اختبار من ربج وانتي گد هالاختبار

ادررري والله ادررري اختبااار بس صعبه اني داموت وبعدني عايشه حياااتي ادمرت
الاختبااااار صعب صعب محد يحس بنار گلبي ...

محد بگد گلبي منلچم گلبه ...

كُلشي احبه اخسره وبشرررط كدام عيني
شنو سويته بحياتي ..
حبيت ابوي عافني وراح حبيت امي عافتني وعاشت حياتها
حبيت حياتي الورديه العشتها بعدكم تهدمت ب سبب خطأ واحد مني ..
ابني شايفني وحده مصلحجيه وخرابه بيوت ...
وهسه شعري الاحبه وجمالي كدام عيني راحن
احب شعري احب جمالي احبهن كُلش ...
وهم راحن ..

ابتعد عني داير ظهره ومخلي عكس ايده على عيونه ..

حتى انت باقي وياي من باب العطف والمساعده لان تعرف ماعندي احد ولان ابني صار من جانبك ومايريدني ..
عوفنييي وروح ما اريدددك ولا طالبه منك تجيني ولا اريد اشوفك وتعطف عليه ...

غطيت وجهي بالبطانيه واضم شهكاتي بالمخده ...

وخر البطانيه من وجهي وخله راسه برگبتي ..
دموعه بللت رگبتي ..

دارني عليه وضم راسي بصدره حاضني بكل قوته ...

_تاره اي عطف تحجين بي
اني دا الزمج بالحرام ومخلي الذنب عليه وكل هذا تسمينه عطف ...

ما اريد اي شي منكم ولا اريدك
تعبانه عوفني وروح ..

وخرت منه ودرت ظهري تغطيت بالبطانيه ...

كعد على حافه السرير وخله ايده على راسه يستغفر ...

اطلع وبعد لا تجي ..

دنك عليه باسني من راسي ..

_راح ابقى احاول وياج لحد ما توافقين ...

صوت خطواته وهو يطلع ويسد البوب وراه ...

اشعـر ان ذلك الالـم امتد الـى معدتـي ...
هذا الالـم الذي يذكرني طيلـه الوقت بالـكم الهائـل من الكتمـان الـذي ينحبس بداخلـي ...
وب الامـوار التي اخترت السكـوت عنها وابتلاعهـا بدلاً من الافصـاح عنها واخراجها من جسمي المنهـك والمتعب مـن تلك النوبات التي ترافقني كل يـوم ...
صمتـي وبرودي ...
او تعاملـي الحـاد قليلاً ...
لـم يفهـم احد اني متعـب واني لا اقـوى علـى حملي حتـى ......

رفعت راسي من المخده سحبت القرصه من ايدي اريد اجمع شعري متعوده كل ما اكعد اشيله
رفعت ايدي على راسي بشعور لا ارادي ...
فزيت ونزلتها من تلمستها صحراء ...

كُلشي صار كدام عيني غمضتهن واردد

الصبر منك ربي الصبر ....

ما اعرف شكد نمت وشكد مر وقت وشلون بعدني عايشه لحد هالحظه ....

دخلت للحمام توضيت وطلعت بسرعه اخاف اباوع بالمرايا ...

فرشت سجادتي وبجيت لدرجه حسيت الهوا محدود يوصل لرئتي ...
ما اكدر اشيل راسي من الدمار البداخلي بعدني مصدومه ..

من گد الوجع بقيت استفرغ دم وابجي ....

احس بثگل على گلبي وروحي كُلشي بيه تعب ..
ملامحي روحي گلبي نفسي احس الدنيا انسدت بوجهي ....
بعد ماكو شي يكدر يرجع البهجه والفرح والسعاده الروحي ....

شلون كدرت اعدي هالليله بدون ما اموت من وجع گلبي ....

رفعت رأسي للساعه اريد اعرف الوقت ..
طلعت نايمه 25 ساعه بدون ما احس على نفسي ولا احد حس عليه ...

فتحت باب الغرفه وطلعت ماكو احد الشقه فارغه ...

دخلت للمطبخ فتحت الثلاجه اطلع العلاج...

فتحته دا اشربه فزيت وغصيت ...

واني اشوف لالي داتطلع من البلكونه ...

ابتسمت الي ..

_ طالعه اجننين ونبي عبالك وحده روسيا ...

باوعت عليها بنظره معاجبني كلامج ...

شلون اجيتي ..

_طلحه اتصل عليه وبلغني بوضعج راد يجب ممرضه بس مقبلت اخاف عليج كُلشي يصير ادخلين مراه غريبه لبيتج وفوكاها تنام بالبيت هم ..

لعد وامج مو ما متقبل اطلعين وحدج

_عادي اتعاركت اني وياها ورجعت ضليت اتوسل بيها يلا خلتني اجي ابات يمج
ترا اني من البارحه هنا واكثر من مره ادخل للغرفه والكاج بعدج نايمه
وكل شويه ادخل اشوف وضعج ومنتظرتج تكعدين ...
وهسه ساعه بـ 12 الظهر يلا كعدتي اول مره تنامين للظهر

ما حسيت بروحي ...
يعني امج عرفت بـ مرضي ...

دارت وجهه عني ومردت

مو داسألج ...

_اي مو ما قبلت ابات يمج الا سولفت الها وضعج ...

عافتني وراحت لغرفتي تنظفها صارت عيني على المكان الجان بي شعري ملگيته ماكو ....

لكيتها محضره الي هواي وجبات ومغلفتهن بحافظات حتى من اريد بس احمي الأكل ...

ورا ما خلصت تنظيف اجتي تريد تطلع ..

وين رايحه

_ مو امي ما تقبل ابقى بعد اكثر وماطول صرتي زينه حتى ارجع ..

اني ارجعج مليت من كعده البيت ...

_ لا ميحتاج هسه اخذ تكسي

اخذت الكلاو والسويج وطلعت كدامها ...

_يعني ليش هيج تعاندين شلون ترجعين وحدج وهيج وضعج ..

مابيه شي

طلعت السياره من الگراج واشرت الها تصعد ..

_تاره انتي سألتي طلحه عن سالفه زواجه

لا ومستحيل اسأل اني اصلاً رفضته واذا سألته معناها مهتمه اله ف ما افتح هيج موضوع وياه ...

_ طلع يدري ب عساف جاي الج

حجتها وسكتت ..
باوعت عليها

اي كملي

_ لا ماكو شي

ترا والله يبين عليج من تكذبين

_ طلحه سولف الي صاير وياه وما حجه الج حتى لا ضوجين .....
ورا ما حجه عساف وياج الحمايه بلغوا طلحه بس ميعرفون شنو حجه وياج بس كالوا اله راح لهيج مكان ...
من سأله ما نكر وكال لـ شنو حجه وياج بالحرف الواحد ..

المهم طلحه صاير عصبي وعساف اعصاب اكثر منه انتهت عركتهم بطلعه عساف من البيت وراح لبيت جديته ام طلحه وما يقبل يرجع لبيت ابوه وكم يوم وراح يرجع يسافر المصر ...
ومبلغ طلحه اذا فعلاً صار الزواج ف هالمره سفرته بدون رجعه للعراق .....

هذا كارهني لهدرجه

_تاره ترا حقه لو اني امي هيج مسويه بيه بدون ما اعرف الاسباب والحقيقه اكيد راح اصرف مثله ويجوز اسوء ....

وخطيه طلحه ضال بينج وبين عساف ...

ما ادري عساف شنو ما اخذ عني فكره بس طلحه من تقدم الي من باب المساعده والعطف وهو معروف بهاي وكفاته الانسانيه ويه اي شخص
بس مو تاره التزوج واحد يعطف عليها .....

_ما اتوقع كُل هالمواقف عطف

شنو قابل يحبني مستحيل طلحه ما يحب احد غير نفسه ميحب النسوان ...

وكفت السياره كدام بيتها نزلت وهي تبتسم الي ...

انفتح الباب وطلعت عمتي مدت راسها
سلمت عليه ...

بس هزيت راسي الها وفريت السياره ومشيت ...

عجيب من شافوني داموت يلا صاروا زينين ويايه حتى عمتي الصار الها اسنين كارهتني بسبب كرهه لـ امي .....
اليوم اجت تسلم عليه ....

اول ما دخلت لبيتي فتحت التليفون شفت هواي رسائل و مكالمات من طلحه مجرد نزلت القائمه قريتهن وما فتحتهن ولا رديت .....

رقم داز الي رساله على الرصيد ...

فتحتها مكتوب بيها ...

"ابتعدي عن ابوي هذا اخر تحذير الج  "

غلقته وابتسمت ب استهزاء ابني يهددني ....

فتحت الخزنه حتى اتأكد عندي فلوس بعد تكفي للعلاج لو خلصن ...
فلوس المركز نصهن طارن على العلاج وباقي مبلغ يكفيني وزايد هم ....

مرت الايام متشابهه مجرد اخذ علاج وجرعات وطلحه ابتعد عني مثل ما اريد  ...

موعد جرعتي اليوم اروح وحدي بدون لالي بسبب الفاينل امتحانها ويه موعدي ف ما خليتها تجي وياي ...

دا انزل من السياره حتى ادخل للمستشفى
طبگت سياره گدامي ...

نزل منها طلحه ..

مجرد ما شفته عفته ودخلت للمستشفى ...
صار يمشي وراي ..

من دخلت تأخرت اليوم بالجرعه توقعت راح الگه رايح ...

بس من طلعت لگيته بعده موجود من شافني طلع من المستشفى وصعد بسيارته بدون ما يحجي وياي ..

بقت سيارته تمشي وراي لحد ما وصلت للبيت من شافني طبگتها بالگراج يلا راح ....

العصر صوت الباب يندك ...
باوعت بالعين السحريه ولد شاب ...

اول ما فتحته صار الولد بوجهي سبحان الخالقه نسخه مني ومن عساف كأنوا عساف كدامي بس هذا ضعيف ...

واكفه ورا مراه من ركزت بيها طلعت نفسها ..

_ تاره مو ..

نعم شنو المطلوب

_نكدر ندخل نحجي شويه

لا واخذ هاي المراه الوياك وبعد لا تجون ممنوع تجون لبيتي مره ثانيه ...

_ربع ساعه من وقتج

لا وقتي اثمن من اصرفه ويه هيج ناس

سديت الباب بوجهه وما خليته يكمل كلامه ...
بقوا يدگون شويه واختفى الصوت ...

تليفوني يتصل طلحه ما رديت ..

ورا ساعه رجع الباب اندك ...
فتحته صار بوجهي طلحه وراه همه...

فتح الباب وكال الهم ادخلوا ...

احتراماً اله سكتت زحمه اقلل من احترامه گدامهم ...

كعدهم بالصاله دخلت للمطبخ دخل وراي ..

وكفت كدامه ..

طلحه شلووون ادخلهم هيج تعرف بيه ما اكدر اتعارك وياك كدام احد ...

_ هاي المراه اتصلت عليه قبل فتره ورادت عنوانج وكل ما تتصل تبجي وتريد اشوفج من خلال المعلومات الدزتهن الي...
عرفتها امج لان اني ما اعرف امج ف ردت شي يثبت كلامها ودزت جنسيتها  ..
ما ادري منو بلغها بمرضج وتريد اشوفج ..
ولدها وزوجها اتصلوا عليه ويطلبون مني واكثر من شخص توسط عندي حتى اشوفج ....

طلع گدامي كعد على التخم بعيد عنه حتى ياخذون راحتهم بالكلام ...

امي كاعده وكاعد بصفها نفس الولد وبنيه هم تطلع بگد عساف ما انتبهت عليها من دخلت وياهم ...

صارت تحجي واني ما اباوع عليها منزله نظري  للأرض ...

_تاره جايه عليج اليوم واطلب منج تبريني الذمه
صار اشهر ما اكدر انام كل ما انام تجيني بالحلم اشوفج متعذبه وتبجين وتكُليلي ربي ما يغفر الج ...

والمطلوب مني هسه شنو

_خليني اكمل كلامي يا بنتي

خزرتها لا تكولين بنتي

_ماشي براحتج ما اكولها ..
ليش اكذب عليج انتي ما بيوم اجيتي بالي
بس من رحت بي للحج ورا ما حجيت حلمت بيج ومن يومها صرت احلم بيج حلم ابشع من حلم ...

وقبل كم يوم عمتج اتصلت بيه تشمت وفرحانه
تبلغني بمرضج ....

وگوه كدرت اوصل الج واحصل مكانج خليت زوجي يسأل عنج وكالوا انتي زوجه القاضي طلحه من خلال جيرانج ...
وصار اشهر يلا كدرنا نحصل رقمه حتى اخلي يتوسط الي بشوفتج ...

كملتي

من حجيت هيج ابنها حجه من يمه

_امج هاي احترميها ليش اشمرين بكلامج اكو واحد هيج يستقبل امه ..

انت لا تدخل ما موجهه الك هالكلام وهاي التحجي عنها امك مو اميييي ....

_ عود انتي بنتها الكبيره وهيج تحجين ..

احترررام نفسك انت كاااعد بيتييييي ...

_شلوون اسكت الج وانتي تجاوزين على امج

كمت وكفت بوجهه

هاي امك مو اميييي
ما اعتررف ب الام التعوف بنتها وتزوج ورا وفاه زوجهاااا ب اشهررر حتى السنه بعدها ما طاااالعه ...
الام العافت بنتها علمود تعيييش حياتها ..
عافتني واني عمري 11 بيد عمي وعمتي اليريدووون يتخلصون من مساؤوليتي ب اي طريقه ....

لا سألت عني ولا شافت بنتها شبيها اشهررر عايفتني ..
شردت بنص الليل ورحت اتوسل بيها تاخذني يمها
طردتني وما قبلت تاخذني ..
رغم هي عدها راتب واهلها يسمعون كلامها لو كايله الهم اريد بنتي جيبوها اليه ....
اني عندي راتب ما احتاج احد اخذها وابقيها يمي بنتي ما انطيها لـ احد ..

بس امك سوووت عافتني وما سألت بنتي ماتت من الجوع اگلت شربت شلونها ...
زوجني واني عمري 12 وخلوني بنص عائله كبيره ما اعرف اي شي عنهم ولا اعرف شنو زواج
طفله مدلله ابوها كل همها دراسه والالعاب فجأه وبدون مقدمات دخلت الحياه الكبار الحتى الكبار ميكدرون يتحملوها ....

تدررري اني عندي ولد 23 سنه ماشايفته ولا اعرف حتى اسمه ....

بقت تجبي وتحاول تكذبني وبنتها تهدي بيها وابنها بس يباوع عليه ...

ما اريد دموعي تنزل كدامهم ...
كعدت على التخم جسمي كُله يرجف من العصبيه ...

يجوز امك زينه وياك وماقصرت عليكم بس اني ما جانت زينه وياي اني عشت كل هالمصايب بسببها .....
لو قابله تاخذني يمها وحتى لو تزوج عادي المهم ابقى يمها بس ابوك ما خلاها تاخذني ..
جان عشت حالي حال اي بنيه تعيش بوسط اهلها تدخل مدرسه وراها جامعه وتتخرج وتزوج وتبني أسره مثل باقي البنات....

_ ما اريد شي منج بس ابريني الذمه ...

يكولون الجنه تحت اقدام الامهات بس عداج انتي ..
لو دخولج للجنه ابريج واسامحج ف مراح ادخلين للجنه ..
ما اسامحج وامبريج الذمه لآخر نفس بيه ....

بنتها هجمت عليه اصيح وتعيط ...

_شيسوووي بيج الله بعد من حقدج حتى كانسر صار بيج

على صياحها اجه طلحه وكف بصفي ..

_نصي صوتج من تحجين وياها ويلا اطلعوا برا

_انت شلوون مزوج هيج وحده هم حاقده وهم مريضه وبشعه ان شاء الله يصير بيج اكثر واكثر ....

_تاج راسج التحجين عنها ولو ما مراه جان علمتج الأصول ينكص السانج بس تفكين حلگج بكلمه بعد ..

امها تسكت بيها واتجرها حتى تطلع....

طردهم طلحه وسد الباب وراهم ..

بقيت واكفه مكاني من دون اي رده فعل وين تاره الجانت اليعلي صوته عليها تندمه هسه سكتت وما انطيت حتى رده فعل ....

خلصت المسرحيه سيد طلحه تفضل اطلع ....

ما انتظرت جوابه ..

اتجهت للغرفه دخلت وسديت الباب وراي ...
مددت على السرير دفنت وجهي بالمخده اضم شهكاتي ..

بقيت فتره امدده احاول اجبر نفسي على النوم بس وجع گلبي دمرني ...

فتحت الباب وطلعت حتى اقفل باب الشقه قبل لا انام عبالي طلحه طالع ...

انتبهت باب البلكونه مفتوح ...
طلحه داير ظهره يدخن صافن ما انتبه عليه ....

عفته ورجعت للغرفه كعدت على السرير مخليه ايدي على رأسي طاقتي خلصت تعبت واني احاول اعدل الوضع بس كُلشي دايصير عكس ...

مددت على السرير جسمي خاوي من التعب كلمه بشعه مداتروح من رأسي...

اتخلت ايد على خصري ..

حضني من ظهري ودفن رأسه برگبتي ...

صار يهمس ب أذني..

_من گبل ما أعرفك وأنا خاطري فيك يشهد على ما أگول جرحي بضميري
ما شفت حالي قبل أشوفك وألاگيك ....

دارني عليه بخفه سريعه ..

باوع بعيوني بتعب ..

_غارت عيوني من عيوني عليك
اشلون لو شافك من الناس غيري ...
تاره صار اسنين اسمعها ومحد يجي بالي غيرج

ضميت وجهي بصدره اشهك ..
طلحه مدا اكدر اتخطى امي اجت حتى بس ابريها ذمه حتى ما فكرت تسألني شلونج
امي عدها ولد وبنات وعايشه حياتها واني مالي اي وجود ولا قيمه عدها ..
ليش اول لقاء بيني وبين اختي لبعمر ابني يطلع منها هالكلام ...

صار يمسح ب ايده على رأسي

_  انسيهم ما منهم أمل وبراحتج انتي اذا تريدين اسامحيها او لا بس كافي تسلبين بصحتج واطحنين بروحج ...

وخرت منه تربعت وايدي على وجهي امسح دموعي ...

_ تاره اني رايح عساف اليوم طيارته ....
ديري بالج على روحج ...

درت وجهي عنه ..

كام وكف رفع رأسي ب ايده وباسني من عيوني ...

طلع وسد الباب ورا ....

مرت الايام ويوم ورا يوم لحد ما صار شهر كامل ..
وهاي جانت اخر مره اشوف بيها طلحه ...
اختفى بشكل نهائي ..
حتى رسائل ومكالمات منه ماكو ...

وبيوم صدفه لالي ذكرت گدامي طلحه عنده قضيه مال احد الوزراء مُتهم بالفساد بسنه 2019 قبل المظاهرات
ومتعرض لأكثر من تهديد حتى يزور القضيه ...

وحتى ويه اهله منقطع التواصل والحمايه بلغوا امه انو طلحه صار شهر ما جاي للبيت ...

اكذب اذا اگول ما خفت عليه وقلقت ...
حاولت اتصل برقمه الخاص  بوقتها گلي دائماً مفتوح هالرقم ...

بس كُل مره اتصل يطلع مغلق ...

بيوم صافنه ودخلت على اليوتيوب كتبت اسم الاغنيه لـ آخر مره شفته بيها همسها ب أذني...

طلعت المقطع سمعتها أكثر من مره وبكل مره اسمعها ايصير كدامي آخر لقاء بينا ...

كتبت تعليق بهالاغنيه بدون شعور ...

غلقت التليفون وامسح بدموعي ..

مر شهر ونص على اختفائه ومحد يعرف هو وين ..

بيوم فاتحه الفيس اصفح وصار منشور عساف گدامي ...

بقيت فاتحه عيوني من صدمه وخشمي نزف دم واني احاول استوعب الكلام .....

يتبع ....

المفروض باجر ينزل بس نزلته اليوم ....