رواية الكارمــا الفصل الثاني والعشرون 22 - بقلم آيــه آلـ صبري

يا أيها المُدعي بمحِبتي
ألم يكفيك فعلُ يمناك !؟
لتلك الليالي السِود تِركتني
ولا زِلتُ أغني من بعدِ ذكراكّ
فـ إرأف بحالي يا هاجري
لعل الماضي يحِنُ ويلقاكّ ‏
أنا عاشقك يامن كُنت تدعي
أنا بالفعلِ من كان يهواكّ.
♡

...........

لا احـلل اخـذ الروايـه ونشرها وغير مبري الذمه ...

.................

شأت الاقدار ان نلتقي مره اخرى بعد ما دام الفراق سنين طوال ...
التقينا مره اخرى وكانت المسافه لاتقل بيننا عشره امتار او اقل لكن لفرقاً بسيط ف انت فوق الارض وانا تحتها .....

اريد استوعب كلامه والديحجي شنو سالفه ...

دار ظهره عني وكف يدخن

طلحه

_نعم

انتي واعي للداتحجي شنو قصدك شنو نزوج

حجه وهو داير ظهره عني ومستمر يدخن

_اي اني عرضت عليج الزواج شنو الغريب بالموضوع

لا والله  ماكو شي غريب سيد طلحه  ..

دخلت جوا للصاله وخليت الخاولي على خشمي من حجيت زاد النزف ...

دخل وراي ...

فتحت باب الشقه ولزمته ب ايدي فاتحته..

طلحه انت مو تكول عليه عاهره شلون تزوج وحده عاهره وتسجلها ب اسمك

_مو مهم شنو سويتي ولا مهم السويتي
اني هسه عرضت عليج الزواج ...

فوكاها هيج تحجي وبكل ثقه تررا والله لخاطر الايام البينا والخاطر مساعدتك الي ذيج الايام رغم جانت لخاطر عساف حسب كلامك ....
اني لازمه اعصابي ومحترمه وجودك ...

ليش الا هسه تريد تزوجني شنو السبب والغايه من عرضك عليه للزواج انت مسوي شي اذا مو ورا سبب ...

وهسه تفضل اطلع برا وخلي الاحترام بينا واذا مطلعت اني راح اطلع

قطعت كلامي بعد ما خشمي صار ينزف بشكل مرعب خليت الخاولي عليه ...

تقرب الي بسرعه وكف مقابلي ويباوع بقلق

_ امشي وياي للمستشفى

ما اروح واذا مطلعت هسه اني راح اطلع ..

_شلووون بعناددج انييي مو دمرتي نفسج وخسرتي صحتج البراسج اسوي ....

فتحت الباب داطلع ..

طلع كدامي وفتح تليفونه سجل رقم واتصل
شويه وسمعت صوت تليفوني بصاله ديتصل ...

_ طالع اني وهذا رقم الثاني دائماً مفتوح من تحتاجين شي اتصلي عليه

بعد ما اريد تفتح هالموضوع وياي مره ثانيه خلي البينا احترام و عساف لا اكثر ...

_ماشي انتظر موافقتج على راحتج عود من تخلصين تفكير اتصلي عليه ....

سديت الباب وقفلته ..

دخلت للحمام غيرت ملابسي دمرن بسبب نزيف خشمي ...

بدون تفكير وبدون اهتمام ما اريد افكر ب اي شي بعد رأسي يأذيني..
شمرت نفسي على السرير وجبرت روحي على النوم بسبيل انسى وما افكر بشي اعرفه مستحيل ...

كعدت وما اعرف شنو الوقت او ب الاحرى شكد مرت ساعات ...
المخده عباره عن دم وجهي صاير بي هواي ..

اتجهت للخزانه فتحتها وطلعت ملابس ثخينه احس جسمي قالب ثلج
طلعت امشط بشعري وبالي يم لالي غريب ليش مداترد عليه ابد واصلاً خطها ديطلع مغلق ...

فتحت تليفوني ودزيت رساله لشخص جنت متفقه وياه اشوف مركزه بس لغيت الفكره وبلغته ما راح اجي وما اريد اشتري
لان اريد اروح ل لالي اشوفها ....

الساعه كدامي تفتر ب 3 ونص العصر
الحك اروح لبغداد...

ضميت فلوسي بمكان بعيد وقفلت الشقه ونزلت المفروض بعد يومين ادفع الإيجار الشهري بس مو مشكله عود بس اشوف لالي وارجع ادفع ....

حركت السياره ومشيت مسافه طويله تقريباً داطلع من سليمانيه
فجأة عيوني غوشن وخشمي نزيف فضيع ..
مهتميت حاولت اكمل سياقه ..
عيوني غوشن اكثر وأكثر خفت لا اسوي حادث
وكفت السياره على جانب
خليت راسي على الستيرن غمضت عيوني ...
حسيت نفسي شويه افضل
ربع ساعه ورجع الوضع طبيعي ....

لفيت السياره ورجعت للشقه مستحيل اكدر اسوق بهذا وضعي
شنو البيه ليش هيج وضعي تخربط ....

ضليت ادور على دكتور زين واتصلت بمعارف هنا الي بسليمانيه وانطوني اسم دكتور معروف
اخذت رقمه وحجزت عنده بلغوني لازم باجر من الصبح لان بس الصبح يتواجد ....

توضيت وفرشت السجاده فتحت القرآن وبقيت اقرأ لفتره طويله بدون ما احس على نفسي خلصت نص القرآن أساساً اني جنت قاريه كم جزء ف ما بقى الي شي ب آخر فتره بعد ما سمعت هواي للشعراوي والوائلي التزمت بصلاتي وصرت اصوم اشهر رمضان المجنت اصوم بيهن ...

من الصبح رحت قبل الموعد حتى لا اتأخر ...

دخلت للدكتور وطول بالفحص وطلب مني اسوي هواي فحوصات
بقيت كل شويه رايحه لمكان لحد ما خلصت كل الفحوصات استغربت ليش لهدرجه خضعت لفحوصات ...

ورا ماكملت رجعت دخلت للدكتور شافهن
وصار يشرح الي عن مرضي واكتشافه من وقت ما صار اله فتره طويله ..
يحجي وياي ويفهمني شلون لازم أستمر بالعلاج الموضوع خطر ومايصير اتهاون بي ، عقلي فصل مجرد اول كلمه نطقها من المرض كل حواسي وكفن وهو مستمر يشرح بشكل تفصيلي ويوضحلي !!

كتب الي دكتور بغداد اكمل علاجي عنده لان بلغته ما راح ابقى بسليمانيه ...

طلعت منه واني بعدني بصدمتي وصفتني ما حركت ساكن امشي واتحرك وبالي مو يمي ....

مشيت بالسياره الدنيا صارت غروب الوقت اتأخر ...
وكفتها ونزلت ..
الهوا ضاق بيه نزلت دموعي بعد ما كدرت اتخطى الصدمه ..
نزلت من السياره وكعدت على الرصيف مابيه اوكف مختنكه ...

رفعت رأسي للسما ودموعي تنزل
يااارب اختبارك صعب يوم عن يوم وحدتي تقتلني منو الي بهذا وضعي
ليش هاي السنه تراكمات عليه كُل الاحداث وحده ورا الثانيه ...

خليت ايدي على راسي اضم بيها وجهي وشعري نازل مغطي وجهي ..
المنطقه سكنيه وكُلها بيتها محد طالع ..

من حسيت نفسي ارتاحيت واكدر اتنفس طبيعي
رجعت صعدت بالسياره وتوجهت للشقه ...

نظفتها وطلعت كل ملابسي واغراضي فلوس وغيرهن خليتهن بسيارتي بس الاثاث هو اصلاً مال شقه ف ما الي علاقه بي ..
اتصلت ب المسؤول عنها وبلغته ميحتاج ادفع اجار هالشهر لان راح ارجع لبغداد ...

لهيت نفسي بالتنظيف والشغل بسبيل انسى ...

دخلت للسرير ضمت وجهي بالمخده واشهك من گلبي ..
كُلشي خسرت بديتها من نفوذي والسلطه وابني وهسه اخر شي صحتي وحياتي ...

16 سنه اني عشتهن بس لهوا ولعب كل همي اكون انسانه ناجحه فلوس سفر ب اي وقت اريده ويعجبني اي شي اريده احصله هواي ناس حواليه بس كُلهم على كد المصلحه ..
ليش هاي السنه صارت سنه عجاف عليه كُلشي خسرت بالتدريج ...

بهاي الليله محد بگد گلبي انلچم گلبه .....

ما انسى هاي الليه كضيتها بفراشي مثل الجثه الهامده يمكن انسى كُلشي بس اتذكر بكل وضوح
الشعور النهش جوفي واتذكر مرارته ....

ثاني يوم الصبح طلعت لبغداد طولت يلا وصلت لان كل شويه اخذ فتره استراحه وارجع اكمل الطريق حتى لا اتخربط .....

اول ما دخلت لبغداد رحت للمجمع حتى ادخل لبيتي ..
اني قبل كم شهر بعت المركز والسياره القديمه هم بس البيت ما بعته لان ما لكيت اله شراي جنت مستعجله وهم الحمد لله ما انباع ...

اتصلت بشركه التنظيف عدهم عاملات أجرهن حسب كم وحده اريد او كم يوم ..
بلغتهم يدزون الي عامله تنظف الي البيت بين ما ارجع وتلگه المفاتيح عند الحارس ينطيها وخلال ساعتين تكمل كُلشي ...
وفلوس التنظيف احولهن الهم هيج نظامهم
حتى من ارجع من لالي الگه البيت نظيف على الأقل
جسمي يأذيني مابيه انظف وهو مابي شي بس تراب ...

اتجهت لبيت لالي بقيت ادك ومحد يفتح
ورا وين يلا عمتي فتحت الباب الي ...

كبرانه ومتغير شكلها ..

اول ماشافتني صاحت

_خير شرايده مو سافرتي شو رجعتي

لالي وين

_عوفي بنتي وابتعدي عنها من جانت صغيره لحد ماكبرت وانتي مجلبه بيها

باوعت عليها وتأفافات

سدت الباب حيل بوجهي ...

ماطول مو بالبيت معناها ب الصيدليه اندل المكان الداوم بي ...

المسافه مو بعيده كُلش ف وصلت بسرعه .....

دخلت للصيدليه لكيتها لازمه الايباد والقلم مادري شنو تكتب ..
واكو دكتور هم واكف فوك راسها ويشرح الها عن علاج
وقت غروب وقليل الناس تطلع ...

مرحبا
بلا زحمه اريد دكتوره لالي

رفعت راسها بسرعه على صوتي ...

_عززززززا تااااااره
طلعت الي ركض حضنتني

شلونج

_شلوني وانتي صار كم شهر مختفيه ماكو
وين رحتي المفروض هسه ما احجي وياج بس شنو اسوي مشتاقتلج ..

بقت تحجي وتعبر الي عن شوقها وحزنها بسبب اختفائي ومتكدر تتصل عليه لان تليفونها مديشتغل
نسينا دكتور واكف ..

نطلع نحجي بغير مكان عادي لو ما تكدرين تاخذين اجازه ...

اندارت على الدكتور استأذنت منه بسرعه وافق ...
وهو مبتسم الها ...

_وين نروح

نوكف قريب على نهر دجله

_ماشي

طول الطريق سولف وياي وتحجي واني شايله هم شلون راح ابلغها ادري بيها حساسه ..

بقينا كاعدات ب السياره مقابيل النهر بالليل مستحيل اكدر ادخل هالمنطقه بسبب السكاره ..

بس هسه مغرب ف ماكو احد ...

كعدت بصفي

اباوع على النهر واحجي وياها

لالي

_شكو

بيه كانسر

التفتت الها باوعت عليه وضحكت

_شنو هالشقه الثگيل عود هم تريدين اسافرين بدون علمي ف دكولين هيج حتى تتهربين

لا والله بيه كانسر

ما اسمع الا صوت شهكتها وبجيها ب عياط ....
نزلت من السياره كعدت بالشارع تبجي
بسرعه نزلت وراها ...

العالم كُلها صارت تتلفت على صوت بجيها ...

حضنتها احاول وياها بس علمود تسكت ومايفيد
گوه كدرت اقنعها تصعد ..

من انقهرت خشمي نزف سحبت كلينكس دامسحه من شافتني هيج زادت بالبجي اكثر ....

_ كانسر اي نوع

دم

_ليش هسه يلا گلتي بعد ماتروحين اني اعالجج ابقى وياج

اي هو رجعت بعد ما اروح

نزلت الجامه ودارت وجهه عني تبجي بصوت ناصي ..

احس نفسي دخت وخشمي كل شويه دينزف ..

_انزلي خل اسوق مكانج

لا

فتحت الباب حتى تجبرني اوكف
نزلت كعدت مكانها مدنگه راسي ومخليه كلينكس على خشمي ...

روحي لبيت طلحه تندلينه لو لا

_ليش شنو اسوين هناك ولا ما اندله ...

عندي موضوع وياه
وانطيتها العنوان ...

وكفت السياره مقابيل البيت

لالي ابقي انتظريني دقايق واجي ...

دكيت الباب طلع الي واحد من الحمايه مقبل ادخل ماعرفني ...

فتحت التليفون ادور على رقمه الاتصل بي عليه ..
من اول دگه رد ...

_نعم

اريد ادخل وحمايتك ما يقبلون

_وين

البيتك غير واكفه بالباب اني

_ماشي

سده مني فتحوا الباب الي بسرعه ...

دخلت للبيت لكيت العامله بالحديقه داتنظف ...

تقدمت ب اتجاهي

_مدام السيد طلحه بمكتبه ينتظرج

جانت تحجي انگليزي ...

مشت گدامي دگت الباب صاح

_تفضل

اول مره ادخل المكتبه صاير مقابيل الغرفه مالته بس مشايفته ابدد ...

_بلا امر عليج اثنين گهوه ...

التفتت الها

لا ما اريد ..

اشر الها طلعت وسدت الباب ....

جان كاعده بمكتبه على الكرسي ...

تقدمت وكفت قريب عليه

_شلون صرتي وضعج شلونه

شكد نزلت من عيني ومستحيل اشوف انسان احقر منك

رفع عينه بسرعه عليه ..

عرفت بيه كانسر واجيت تستعطفني ف گلت خطيه ماعدها احد خل اعطف عليها وازوجها مووو
مع الأسف عليك وحرامات والله....
شنو عبالك ما راح اعرف بنفسي مريضه ....
الحالات الانسانيه الداتقدمها للناس حسبتني وحده منهم ومن باب العطف والمساعده تريد تزوجني وفوكاها منتظر مني الموافقه ...

_ صح من باب المساعده بسبب مرضج بس تفكيرج خطأ ليش حتى اعطف عليج ترا انتي تختلفين عندي ...

رفعت اصبعي بوجهه
طلحه من اليوم هذا بعد مالك علاقه بيه مو تاااااره اليتقدم الها واحد من باب العطف والانسانيه ما محتاجتك ولا محتاجه لـ اي رجال بحياتي ....

_تاره نزوج يعني نزوج لا تناقشيني لمصلحتج ....

دخلت العامله خلت الگهوه على الطاوله وطلعت ..

_ تاره وضعج بالايام الجايه راح يسوء اكثر وماعندج احد يكدر يسفرج للخارج حتى تتعالجين
لالي مستحيل بعدها صغيره وامها متقبل تسافر
نزوج واخذج ونسافر اعالجج .....

ايدي رجفت من كلامه احساس الاهانه حاوطني وحاوط كل مشاعري يريد يزوجني بس حتى يساعدني يعرف بضعفي وقله حيلتي ...

فنجان الگهوه كدامي شمرته على الارض وب ايدي كسرت كل التحفيات القريبه على المكتب ...

طلحه لهدررررجه وصلت بيييييك تطلبني للزواج بس علمود عطف ومسااااعده انتتتتت داتكسررر بكبريائي بكلامك دادمر مشاعري كلها
حسستنيييي بالرخص طلحه
هيج اهوووون عليك تحجي هالكلام وبوجهي
وين انوثتي وين كبريائي واني ازوج واحد بس حتى يساعدني ...

خشمي نزف من العصبيه ...

تقرب بسرعه لزمني من ايدي ثبتني كدامه
مطوق ايدي ب ايده ميخليني اتحرك ..

سحب كلينكس مسح خشمي ..

_تااااااااره مررره وحده خليني اصرف
اني اطلبج للزواج للمره الثانيه ...

واني ارفض للمره الثانييييييه مو تاره الينعطف عليها ...

عفته وطلعت بسرعه ..

حسيت اكو احد وراي ما التفتت ...

طلعت برا واشوف ب انعكاس الجام عساف جان بصاله ....

طلعت بسرعه من المكان كُله
لكيت لالي كاعده بسياره تنتظرني ...

امشي بسرعه

_شبيج ليش عصبيه

لالي بعدين نحجي اعصابي تلفانه

_ماشي براحتج

نزلت يم بيتها واني رجعت كعدت بمكانها اسوق لبيتي ...

بهالايام خضعت لهواي فحوصات وبكُلهن جانت لالي وياي ..
بديت اخذ جرع كيمياوي واول جرعه اخذتها جانت لالي هم وياي .....

كل جرعه اخذها جانت تهلكني وتخليني اتعب ومابيه اتحرك خطوتين

تعبت نفسيتي واني اشوف شعري بدا يساقط...

مرت الايام واني ملتزمه ب العلاج ...

ورا احد الجرعات كعدت الصبح لكيت هواي شعر على المخده انهاريت وبجيت دم ...

ماتت روحي وبقيت بلايه روح .....

واني اشوف بعيني شلون داخسر صحتي ....

صوت الباب يندك كمت امشي خطوه خطوه بكل هدوء ...

فتحت الباب
صارت كدامي مراه كبيره لابسه شيله بيضه وملابس رسميه مال كباريه

تباوع عليه وعيونها اذكر شايفتهن
ركزت بيها اكثر
لا مستحيل تطلع هي

_شلونج تاره ما راح تخليني ادخل اجيت اشوفج

طبعاً لا منو حضرتج ما ادخل غرباء لبيتي ..

سديت الباب بوجهه ونزلت على الارض كعدت سانده ظهري على الباب
وين بعد وين تفتر بيه الدنيا

امي من بعد كل هالسنين هسه اذكرتني ...

بقت دك بالباب ما فتحته الها ..

لحد ما راحت

هاي السنتين جانن صعبات عليه طول السنين السابقه مجانت تنزل دموعي ..
بس بهالسنتين هواي بجيت
رده فعلي غلقت الباب بوجها قبل لا تطلع اي كلمه منها ما اريد اسمع اي تبرير منها بعد ما عافتني كل هالسنين شنو من اموت يلا ذكرت عدها ابنيه ..

تليفوني يتصل

طلحه

صار فتره ما شايفته ولا سامعه صوته ...

مرديت

وصلتني رسائل ..

_ليش ما استقبلتيها

قريتها من الاشعارات وغلقت التليفون

طلع هو دازها

هسه صرت عزيزه وكلها تريدني من شافني داموت ...

ورا ايام رجع اتصل طلحه ..

دز رساله

_ما فكرتي بموضوع الزواج ..

انطيته حظر ..

ب جرعه من جرعاتي هم لالي وياي بس مجنت ادري اليوم حفله تخرجها وعلمودي عافت الحفله وبقت وياي لحد ما خلصت الجرعه ...
ب صدفه سمعتها تحجي ويه صديقتها بالكليه وتبلغها ما تكدر تجي

دمعت عيوني من الموقف هاليوم صار خمس سنوات تنتظره وعلمودي تخلت عنه ...

دخلت السياره للكراج واتجهت للبنايه ...

حسيت اكو شخص ديمشي وراي ..
كملت مشي ..

_ست تاره

التفت اله

عساف واكف ..

دمعت عيوني واني اشوفه بهالقرب مني ..

_ رجاءً ابتعدي عن والدي ولا تعكرين حياتنا
ادري بوالدي ديطلب زواج منج علمود يرجع العلاقه ويلم الشمل ...
وادري انتي دتستغلينا اجيتج بنفسي واطلب منج ابتعدي ولا تخربين علاقتي ب والدي لا تكونين انتي السبب ...
وهو اصلاً والدي كمل حياته وعاشها وبنه اسره كامله ....
ومبين انتي راح تهدمين هالشي ...

عساف ابني افهمني اني ما طالبه الزواج ولا راح يصير هيج موضوع الافكار البراسك مو صحيحه ..

_متهميني ولا يهمني امرج المهم والدي ما تدمر حياته بسبب وحده مصلحجيه ....

دار ظهره وصعد سيارته ...

اني هسه جنت طالعه من الجرعه ونفس گوه اجره مابيه وهالكلام اول كلام اسمعه بصوت ابني واول مره اسمع صوته وهيج طريقته بالكلام ..

گوه عليه سندت نفسي وفتحت المصعد دخلت للبيت ...

مددت على التخم جسمي خمول دزيت فويس لالي حجيت الها كلام عساف مردت يمكن نامت   ...

مادري بروحي غفيت ...

فزيت على تليفوني والباب صوتهن سوا بنفس الوقت ..

الساعه كدامي ب 1

باوعت ب العين السحريه طلحه ..

فتحت الباب

شنو تريد

_اريد انام اليوم عندج تقبلين

لا

فتح الباب ب ايده

_تاره تعبان بس اليوم

اول مره اشوف طلحه بهالوضع عيونه حمر وجهه تعبان ..

دخل مدد على التخم من التعب بقى بالكوت والحذاء ..

دخلت لغرفتي وقفلت الباب عليه
ماكدرت انام منا وجع جسمي ورا الجرعه ومنا وضع طلحه ماعجبني ...

فتحت الباب على كيف وطلعت اباوع عليه نايم وجهه كُلش احمر
تقربت خليت ايدي على مصخن ....

اخذت طاسه خليت بيها مي بارد ومنشفه نظيفه ما استعملها ..

سحبت راسه خليته على رجلي وضليت اسوي كمادت اله ...
مجان يردد غير اسم عساف
معقوله متعارك هو وعساف ....

حسيته صار افضل عفته واتجهت لغرفتي طلعت الي ملابس متعوده ورا كل جرعه ادخل اسبح بس اليوم من التعب نمت ...

طلعت وسحبت المشط دامشط بقيت فاتحه عيوني واني اشوف شعري كله ب ايدي ....

بهاي الجرعه وكع تقريباً نص شعري عدل
بالبدايه جانت يوكع خفيف بس هسه نصه عدل ب ايدي ..

احب شعري كُلش احبه
ايدي ترجف واني اجر من راسي واشمره على الارض

فتحت تليفوني وصرت اصور شعري شلون ديوكع كُله ب ايدي

شعري ارموشي حواجي كُلهن راحن ....

طلع الضوا وصبح الصبح واني بس صافنه على شعري الملئ الارض ...

كل شويه ارجع اشوف التصوير يمكن خمسين مره شفته ...

صارت ب 7 الصبح ..

واني باقيه على وضعي

احس ثگل السما كُله صار على متني ....

اسمع صوت طلحه يناديني واني فاصله

انفتح باب الغرفه ودخل طلحه ...

_ تاره وينج
وين رحتي ...

اني كاعده على الارض من جهه الثانيه ورا السرير ف مدايشوفني

خليت الكم شعره الباقيه ورا اذني ..

وصحت

اي هسه راح اجي اطلع واني عود اسد الباب وراك

_بيج شي

لا خلص روح

مجنت رايده يشوفني بهالموضوع

نسد الباب...

عبالي راح

كمت امسح بدموعي وكفت 
صار بوجهي طلحه يباوع عليه بصدمه ...

خليت ايدي على وجهي وصحت

اطلع طلحه مااااريد اشوفك

سحب راسي وضمني لصدره بكل قوته ....

_روحـه لطلحه من عمري على عمرج ان شاء الله ..

صرت اشهك
طلحه دير وجهك واطلع ما اريد اشوفني هيج نبي عليك طلحه دير وجهك روووح مااا اريدد كُلشي خسررت  ...

_اششش لا تحجين كااافي ..

صار يبوس بشعري الباقي ..

_كُله يهون وترجعين احسن من قبل ادري بيج قويه ومتهزج هالكم شعرايه

عوفني وروح ما اريد اشوفك نبييي عليك اذا تريد راحتي دير وجهك واطلع بدون ماتباوع عليه ..

ضمني اكثر لصدره وباسني من راسي ...

عافني ودار ظهره وطلع بدون مايباوع عليه مثل ما ردت ....

تليفوني يتصل لالي ..

رديت عليها ...

_تاره منو يمج

طلحه وهسه راح يمكن

_تاره سمعت الفويس الدزيتي البارحه علمود ابنج

اي

_ انتي قبل فتره گلتي طلحه تقدم الج ورفضتي
مو صح

اي صح

_تاره طلع طلحه اصلاً مزوج وحده محاميه وياه شلون تقدم الج

فلهسبب ابنه هيج حجه وياج ...

يتبع ....

التنزيل كل يوم احـد افضل الي هالفتره ...

اي وحده تنشر القصه على يوتيوب ممنوع لا تخلوني اتصرف تصرف محلو ....