رواية الكارمــا الفصل الرابع والعشرون 24 - بقلم آيــه آلـ صبري

محتار بـ أحلامي البقن
شو مارضن يتحققن ؟
مثل اليشوف أبنة البچر
كبران بَس ما يمشي !
ما عندي ڪل شي بي بخت
ويردون آرضى بكلشي ..
♡

....................

اول ما فتحت الفيس صار منشور عساف گدامي ...

"ارجوا من الدوله التدخل بالعثور على والدي القاضي طلحه .... بعد ان تم تهديده لعده مرات من قبل الوزير ..... فُقد لمده شهر وتم تهديدي بعدم الافصاح عن اختفائه وتهديد جميع الجهات التي تدخلت بالبحث عنه ...... "

ماكو خمس دقايق وانحذف المنشور ....

قلقت اكثر الخوف سيطر عليه
وين اختفى ..
وين راح ..
ليش محد يدري بي متعرض لـ أكثر من تهديد ...

ماعندي رقم احد حتى اسأل عنه من بدلت رقمي الاشهر الفاتت راحت من عندي ارقام امه واخته ...

رجعت اتصلت عليه بعده خطه مغلق
كُل ارقامه مغلقه ....

للعصر الباب اندك
فتحته ...

دخلت لالي تسلم عليه وتحجي ...

_تاره لو تدرين عساف من عرف شنو مسوي ...

كعدت على التخم وتحجي منفعله ..

شفت منشوره بس بسرعه حذفه ...

_ يا منشور

حذفه جان دايطالب من الدوله تدخل ..

_ تاره هو اخر مره من جان يمج وحده لو اكو حمايه وياه ...

من اجاني جان كُلش ضايج حتى من يحجي مبين كانوا تعبان وكلامه قليل وكُل شويه صافن ...
قبل لا يطلع بلغني راح يروح للمطار طياره عساف بيومها ....
وهو دائماً من يجي الي يجيني وحده بدون حمايه ولا مره اجت الحمايه وياه ...

_ اول مطلع منج رايح للمطار ومن رجع من المطار لليوم هو مختفي حتى سيارته محد يعرف بيها وين ...

عساف مجان يدري ب ابو مختفي لان متعاركين ف ما يحجي وياه علاقتهم انقطعت آخر فتره ومن سافر
مبلغهم مباشره صاعد بالطياره ما شايف ابوه من اجه للمطار وما يدري بي جاي اصلاً ....

قبل يومين يلا عرف و اول ما اجه مفتش البيت كُله ومخلي كُل الحمايه والخدم تحت التحقيق ...

وباقي بس مكتبه مقفول مكدروا يفتشوا الا كسروا الباب ...
عساف ب ايده مفتش المكتب ما مخلي اي احد يدخل ويلزم اي غرض او يدخل للمكتب وياه ...

نص يوم هو بس يفتش ..
ولاكي ورقه تهديد ويه الملفات قبل خمس اشهر واصلته ورقه تهديد ثانيه قبل اختفائه بيومين ...

وفاتح الحاسبه وتليفون الثاني جان ناسي بالبيت وجايب شخص يگدر يخترقهن لان بيهن اكثر من رمز ومحد يعرفه غيره ...

بعد ما فتحوهن لگوه هواي ارقام مجهوله( وگلك )
دازين تهديد بطريقه مشفره ماتعرفين شنو قصدهم بالكلام ولا تعرفين يقصدون منو ولا تعرفين شنو المطلوب ....

والتهديدات على التليفون صار سنه مستمره بس هو ما راد عليهم ...

انطه أمر بكل الحمايه يدورن عليه ب اكثر الامكان الجان يروح الها ...
ومالگوا اي شي ....
تواصل ويه كُل الجهات السياسيه العلاقتهم قويه ويه طلحه ويه التحقيق المتشدد ...
گدروا يعرفون السواها والخطفه ....

ومن عرفوا هددوهم ف عساف طلب منهم ينسحبون ومحد يدخل بعد حتى لا احد يتضرر ...

وهسه شلون لعد

_ آخر شي عهد كالت عساف ما يدخل للبيت بس طالع ويدور واليوم الصبح من دينزل من السياره
مشت دراجه بسرعه فضيعه صاعدين بيها اثنين واحد يسوق والثاني شايل سلاح ملثمين
رمتهم بس محد اتاذه الحمد لله بس السياره شويه اضررت ....

ومن رجعوا الكامرات طلعت الدراجه بدون رقم ولان ملثمين ما گدروا يعرفونهم لهسبب الكل يخاف من الدرجات لان خطره بهالسوالف ...

راحت دخلت للمطبخ تطبخ وتحجي ..

واني عقلي شوش وبالي مو يمي ...

التفتت الي ..

_شو سكتي

طلحه وعساف اثنيهم خايفه عليهم

_انت لا تخافين على طلحه بگد ما تخافين من عساف لان عساف عصبي ومتهور خوفج لا يسوي شي ....

بس ترا محد يدري هو جان عندج قبل لا يختفي واحمدي الله ما يدرون جان حطوا السالفه براسج خاصه عساف يريد زله ....

مابقت شويه وراحت ....

اول ما راحت توضيت وفرشت السجاده بقيت كاعده اقرأ قرآن ما سديته الا من ختمته اني جنت قاريته وباقي الي شويه وهاي جانت اول ختمه اهديها لـ والدي ...

ونويت خلال هالاسبوع لازم اختمه مره ثانيه ....

ورا ما ختفى طلحه ب ايام نزلوا جيران بالشقه الفارغه مقابيل شقتي ....
مراه كبيره بالعمر وابنها محد ساكن وياهم .....

دائماّ جانت تجي الي وتكعد تسولف ومن تسوي شي دز ....
علاقتها صارت كُلش قويه وياي وحتى مرضي عرفت عنه ...

جانت استاذه جامعيه بجامعه النهرين وحالياً متقاعده ....
دائماً تشكي من أولادها الكبار كُلهم ازوجوا ونسوها وحتى زياره محد يزورها وبناتها تخرجن وزوجن وسافرن ويه ازواجهن ....

ثاني يوم الصبح اجت الي وجايبه وياها ريوكها تضوج تكعد وحدها
لان ابنها هم دكتور بالمستنصريه وطول الوقت خارج البيت ....

_ منو جان عندج البارحه شفت وحده دخلت

حجيه مو سولفت الج عنها بنت عمتي وصديقتي صار سنوات ....

_ شنو تدرس

صيدله

_وين

بجامعه بغداد تخرجت السنه دفعه 2018 ...

_ تاره لعد اهلج وين شو ابد ما اسولفين عنهم

انظف بالصاله واحجي وياها تعودت عليها تجيني هواي ..

والدي متوفي وامي زوجت وعدها عائله بس قاطعه علاقتي بيها لان استحي من زوجها ف علاقتي مو شي وياهم ...

_ لعد وابنج مو گلتي عندج ابن ليش ما اخذتي ليش انطيتي لطليقج ...

لا عادي اشوفه ويشوفني بس هسه هو لا عندي ولا عند طليقي لان مسافر يدرس طب بمصر ...

_ تاره تقبلين اذا انخطبج

ابتسمت الها
حجيه شنو تاخذين معلومات عني حتى ادوريلي خطابه عوفيني هيج مالي خلك للرجال ...
صار اسنين طويله عايشه وحدي وتعلمت على الوحده .....

_ ابني هذا الدكتور العايش مطلك مرته صار سنوات وعنده منها اثنين بنات توم بس هي اخذت الحضانه وهسه عايشات ب المانيا ويه امهن .....

لا خاله خل التهي بمرضي ...

_ انطيني مجال اكمل
ابني شافج اكثر من مره من طلعين بسيارتج وكُلش معجب بيج وحتى يدري بمرضج بس مو مهم اكيد يجي يوم وتتشافين ان شاء الله ....
وما الگه احسن منج اله هم دارسه وهم مثقفه وقمه بالرقي ...

اعتذر واتمنى بعد ما تفتحين الموضوع وياي نبقى مجرد جيران افضل ....

بقت تلح عليه وعافتني وزعلت لان رفضت بشده ....

بعدها التهيت بالجرعه والعلاجات لالي جانت تروح وياي والگاها واصله قبلي ..
تخرجت وبعد ما عدها شي بس كاعده بالبيت واداوم بصيدليه .....

سولفت الها عنهم وهم شجعتني على الرفض ....

كدرت اختم القرآن للمره الثانيه خلال اسبوع ودعيت من ربي يرجع طلحه لـ عساف ....

واليوم راح يصير شهر ونص على اختفاء طلحه ....

فزيت بالليل على اتصال من لالي ....
بسرعه رديت عليها ...

بلغتني برجعه طلحه وهسه هو بالمستشفى لان مصوب ...

غلقته منها لان متعرف غير هالخبر من عهد متصله بيها ....

بقيت على نار لا اكدر اتصل واسأل عنه ولا اكدر اروح اله ومستحيل اروح .....

لحد ثاني يوم اجتي لالي لبيتي ...

من تجي الي ما تقبل اشتغل شي حتى طبخ هي تطبخ الها والي ..
واكفه بصفها قريب على الطباخ وتحجي ...

_ البارحه الصبح راجع الهم
عساف اتفق ويه جهه هم سياسيه قويه ومنطيهم كُل التفاصيل وگلوله خلال يومين يرجع وفعلاً رجعوا خلال يومين بس اي شخص يسأل يكولون جان مسافر ومقبلوا يبلغون احد بسالفه خطفه حتى لا ينتشر الخبر .....

منو گلج ..

_عهد بس هي تتواصل وياي ..

انطيني رقمها

اخذت الرقم منها حفظته عندي ...

_اتصلتي عليه

لا

_زحمه هو بكُلشي واكف وياج من يصير زين اتصلي بس سلمي وسدي لا طولين بالكلام ...
جان اخذتج ورحنه للمستشفى بس عساف واكف وياه ما نريد مشاكل ...

ورا يومين اتصلت عليه مجرد سلمت وتحمدت لسلامته وغلقته ما طولت المكالمه ثواني .....

ب الليل صوت الباب يندك كُلش قوي ..
سحبت الگب لبسته وفتحت الباب بسرعه
صار گدامي عساف ..

اول ما دخل لزمني من رگبتي ودفعني على الحايط يريد يخنكني اريد احجي ما اگدر خانكني ...

_ كل الصار ب ابويه بسببج من رجعتي لحياتنا لليوم والمشاكل وحده ورا الثااانيه عوووفي ابوي بحااااله تريدين فلوووس اني انطيج شگد ما تريدين ...
بعد لا تتصلين ولا سألين ولا تحجيييين وياااه اطلعي ما نريدج ....

ما اتشررررف بهيج ام ....

دفعته حيل عني وطلعته خارج الشقه صحت بوجهه

ولا اني الاريدكم ديرررر بالك بعد توصل لبيتي قسماً ب الله افضحك فضيحه ....

سديت الباب بوجهه جسمي كُله يرجف آذاني كُلش من دفعني احس جتفي انشلع ....

اتهسترت واعصابي تلفت شلون يجاوز عليه بهالطريقه شنو السامعه حتى اجاني منفعل لهدرجه ...

دزيت فويس لـ لالي سولفت الها كُلشي
بهاي الليه ما گدرت انام تهجمه عليه ما اذني جسدياً بگد ما اذاني نفسياً ...

بقيت للصبح سهرانه بالبلگونه حتى للبيت ما دخلت ...

ما طلعت من البلگونه الا بعد ما نفتح باب الشقه عرفتها لالي لان بس هي عدها نسخه من مفاتيحي ..

_بيج شي من سمعت الفويس صوتج تعبان

دخلت وسديت باب البلگونه وراي ...

تصرفاته زادت عن حدها

_اخاف سامع شي مستحيل احد يجي منفعل هيج بدون سبب ...

حتى لو ما يهمني بعد ...

راح اوافق على الخطوبه ...

_ من بعد المشاكل الصارت ومن بعد تصرفات عساف اني هم اشوف موافقتج بهيج وضع افضل حتى تخلصين من هالمشاكل ....
بس فكري أكثر الموضوع مو سهل هذا زواج وخاصه انتي صار سنوات رافضه الكل وما تقبلين بـ احد ....

هو مناسب الي منفصل وما عنده احد ...

_بكيفج بعد بس فكري اكثر يلا تردين جواب

الحجيه هم قبل يومين حاجتني وما قبلت تاخذ مني جواب كالت فكري ف يجوز ارجعها خبر بالموافقه ..

_انتي تريدين توافقين حتى تخلصين من المشاكل لو شنو

طريقي ويه طلحه مسدود مستحيل بيوم نرجع سوا...
هو عاش حياته وحتى ابني كُلهم عاشوا حياتهم ...
ليش اني باقيه على أطلال الماضي ...

يجي بوم وتزوجين وتلتهين بحياتج بعد ما تگدرين تجيني ..
اني اذا اكبر لو اوكع منو الي باقيه وحدي بهالبيت لا اخ لا اخت لا ام لا ابن ...

حتى لو تعودت على الوحده وعدم وجود الرجال بحياتي بس مو مشكله احاول ويه نفسي لحد ما اتقبل وجوده ....

_يعرف بمرضج

اي

_ كلامج صح بس هم فكري اكثر وشوفي شخصيته شلونها وتأكدي من سالفه طلاقه ...

طبعاً لعد الي خلك اخذ واحد مزوج وتالي عمري اصير الثانيه واتعارك ويه الضره علمود رجال ....

_الله كريم
هسه استعجلي حتى نلحك على الدكتور اليوم الموعد يفحصج ويتأكد من وضعج ...

ورا ما دخلنا للدكتور وفحصني وبعد عده فحوصات لاحظ تطور بشفائي لان اصلاً اكتشفنا المرض من وقت ....

واذا ابقى بهذا التطور ف بعد معاناتي طول هالاشهر ويه الجرع ....
ان شاء الله الجرعه الاخذها الشهر الجاي راح تكون اخر جرعه ...
بس لازم ابقى مستمره على العلاج ....

من رجعت التزمت اكثر ب كُلشي حتى اخلص من الجرع ويرتاح جسمي ...
هالاشهر جانت قاسيه عليه كُلش تعبتني ....
راح ايصير الي سنه كامله ويه الجرع .....

بعد تفكير طويل وابتعاده عن الكُل
وأيضاً بسبب آخر موقف بيني وبين عساف ....

قررت اوافق على الخطوبه ......

من اجت الحجيه بلغتها بموافقتي كُلش فرحت ..
وطلبت مني احجي ويه ابنها ...

اجت هي وياه العصر بوجود لالي كعدت حجيت وياه انسان محترم وثگيل وكل هذا ما يهمني اهم شي عندي ما مزوج لان ما اريد ابني سعادتي على سعاده غيري .....

وتحددت الجمعه الجايه موعد المشيه و تلبيس الخواتم گدام اقاربه وعود بعدين نعقد ونسوي حفله عقد ....

بس بلغتهم ما عندي احد ولا زلم حتى اسوي المشيه ف خلوها بس تلبيس خواتم ...

لبست فستان مستور ردن طويله حتى يغطي جسمي هالفتره فجاه دايصير احمر .....
وحواجبي رسمتهن شعره شعره لدرجه ما مبين عليه المرض والمكياج اني رتبته اصلاً هاي لعبتي ....

وقبل فتره وصيت شعري طبيعي باروكه من اشخاص موثوقين جنت اتعامل وياهم قبل لا اغلق المركز ....

صارت حفله عائليه حظروا بيها اخوانه وزوجاتهم وعمتي ولالي جبرت عمتي تجي وياها ....

مجرد حفله عائليه وتعارف بنفس الوقت
محد جان مصدك بيهم عمري 35 كُلهن ما قتنعن عبالهن دا اكبر بروحي حتى لا انحسد وصارن يقيمن عمري 30 او نهايه العشرين ....

لازم يسافر بعد أسبوع عنده شغل ضروري وبنفس الوقت وحده من بناته مريضه يشوفها ...

اخذ رقمي وصار يتصل عليه كُل يوم مجرد يسلم ويسأل وعبر عن اعجابه بيه من خلال كم مره شافني بيها من اكل٥ع بسيارتي
من شاف ردي بارد وياه ما يطول بسرعه يسده ...

حاولت اتعود بس مدا اكدر الموضوع مو سهل فجأه رجال دخل لحياتي ومابقى الا القليل واكون ب اسمه ....

احترام قراري بعدم دخوله لبيتي حتى لو جان ساكن كدامي الا نعقد ......

هالاسبوع كُله هو يتصل يسلم ومرات يدز رسائل ...

وقبل لا يسافر سلم عليه من الباب وراح ...

تعبت واني افكر احس نفسي بدوامه ما اعرف اذا راح اكدر اتعود او لا ...

صليت ودعيت من كُل گلبي ربي يكتب الي الخير بهالخطوه وما يخليني اتندم .....

حتى من سافر بين فتره وفتره يتصل شويه ويسده بسبب ردي الجاف وياه ...

سفره جان شي مفيد بالنسبه الي حتى اگدر اتعود على الوضع بين ما يجي ...

اختفى شي اسمه طلحه وعساف من حياتي رجعت لحياتي القديمه وحدي ...
جنت اعرفهم ما راح يدومون الي .....

ورا اسبوع من سفره باب الشقه يندك ..
باوعت بالعين السحريه طلحه ...

ما فتحت صار هواي مشايفته ولا اعرف اخباره ....

دگه الباب عله صوتها ...
خفت لا الحجيه تسمعها وشوفه زحمه منها ...

فتحته ..

دخل وسد الباب ورا ...

وكف كدامي دايحجي
نزل نظره بسرعه على ايدي ...

رفع حاجبه وابتسم ب استهزاء ....

_يعني صح انخطبتي ...

اي

تقرب عليه خله عينه بعيني خازرني ....

_ اجيت اعاتبج
بس من شفت عيونج تحجي اللامبالاة
شلون اتمسك بشخص يدور حجه حتى بس يبتعد...

بوعي لا ارادي لزمته من زنده ..

طلحه ...

سحبها ومبتعد رافع ايده بوجهي

_ ماطول تريدين اطلعين من حياتي فـ الله وياج ...

دار ظهره فتح الباب وطلع ...

تعبت نفسيتي من كُل المواقف الداصير حولي ...
كلامه الأخير جان قليل بس خلاني هواي افكر
مدافهم طلحه شنو بالنسبه الي وشنو بالنسبه اله ..

تعبت واني عايشه بهالدوامه ...

بس متأكده قراري صح والشجعني اتخذ هالقرار واتمسك بي تهجم عساف عليه واتهمامه المتكرر باقيه وياهم على مصلحه وحتى اخذ فلوس
ولو فعلاً موافقه على زواج طلحه جان تأكد كلامه لـ عساف ....

صارت الحجيه تجيني اكثر من قبل وكعداتها وياي تخليني اطلع شويه من جو القلق والتفكير .....
طلبت مني من اروح اتسوك ابلغها حتى اشتري الها وياي لان ما تكدر تطلع مريضه ....

للمغرب بدلت ومثل كل مره لبست باروكه الشعر الطبيعي مستحيل احد يصدك هذا مو شعري گد ما طبيعه ......
حظرت فلوس حتى اسوك وما قبلت اخذ فلوس منها استحيت لان اول مره توصيني على شي ...

بعدني على سياره جارجر 2018 ما غيرتها اول مره اطول ويه سياره هلگد بدون تغير ....

خلصت مسواك وبطريقي دا ارجع للبيت بدون ما انتبه صارت طفله گدامي تركض ...
حاولت اوكف السياره بسرعه بس مكدرت الطفله انضربت وانشمرت حيل ...

نزلت اركض اريد اشوفها ...

بس تبجي من خوفي شلتها وخليتها بالسياره حتى اسعفها ..

من راحت الخوفه مني يلا وعيت على صوت رجال يغلط ويصيح ...

_اسويتي لبنتيييي

اخي اصعد وياها خل اسعفها بسرعه ...

اسعفها اني افضل لان لو عايفتها على الأرض ورايحها جان كبر الموضوع ....

صعد وهو بس يحجي ويكفر ويصيح خبلني اني منا متوتره وهو بس يحجي ما يسكت ...

_انتي متقصده تموتيها هي جاي تعلب باب البيت ليش عفتي الجهال كُلهم والا هي دعمتيها ...

شنو متقصده اعرفكم تعرفوني هي بنتك ركضت گدام السياره اكو واحد يطلع جهاله على الشارع يلعبون متخافون عليهم ...

_لا انتييييي متقصددده

بزعني گوه ساكته عنه لحد ما وصلت وراح اخذها للطوارئ ....
طلع بس كسر برجليها ومابيها شي ثاني ...
حمدت ربي جان صارت برأسي.....

بقى يجاوز ويصيح يحاولون الممرضين يسكتوا وهو فضحني فضيحه بنص المستشفى يتهمني اني متقصده ...

مبين شراي مشاكل وفصول ...

شنو تريد اني حاضره علاجها كُله عليه اني اتكفلها لحد ما اصير زينه ...

_لا حظري عمامج اني ما احجي ويه نسوان وين عشيرتج ...

ميحتاج تكبرها دا اكولك اني حاضره شنو تطلب ...

_شنووو ماكو زلم وراج حاطين سياره ب ايدج ومفلتينج ...

صار يجاوز وبقى يلح الا عشيره تجي والا فصل وعمامها واقاربها كُلهم اجوي للمستشفى وكل ساعه واحد يشمر اله حجايه ويريدون الا رجال حتى يحجون وياه والشرطه اجوي حتى يحققون وياي ....

الطفله بقت جوا يعالجوها ...

ماعندي رجال حتى يوكف الي بهاي المشكله هسه لو ما مسافر على الاقل اتصل بي ....

اترددت اتصل على طلحه علاقتي انقطعت بي وصارت كُلش سيئه ....

مجان عندي حل ثاني غيره ...
رن مرتين يلا رد عليه ...

_نعم

طلحه محتاجه مساعدتك تگدر تجي للمستشفى بسرعه دعمت طفله واهلها يريدون فصل مني ...

_ شنو اسم المستشفى

**

_ماشي نص ساعه يمج

مرت أكثر من نص ساعه و ماكو تأخر وذولي بس يحجون فوك رأسي ....

دخل طلحه ودخلوا الحمايه ورا يمشون ....

وكفت اله خلاني بظهره حجه ويه الشرطه وانطاهم هويته ف سدوا الموضوع وبقوا اهلها ...

اندار عليه ..

_ابقي يم الحمايه

تقدم الهم ويحجي وياهم بكل هدوء واحترام وهمه يريدون اله فصل حتى عن التحقيق متنازلين بس اهم شي الفصل ايصير ...

طول وياهم خلك وذره احترام ماعدهم ناس ادور فصل وفلوس ...

_انت شنووو تصير منها حتى هيج دافع الها

_ما يخصك

_هو هاي انتم تبوكون بفلوس الدوله وتاخذون الكم عاهرات ساقطات تحطون ب ايدهن سيارات دافعون الهن واحنا الكم الله يالفقرا ...

بعده ما مكمل حجي وطلحه ضربه بوكس فلش وجهه وبقى يضرب بي ركضوا الحمايه يجرون بي والناس ادخلت حتى يوخرون طلحه منه ....

_غصباً عنكم شرررريفه وحجايتك هااااي ما اعديها الك ، هسه التجاوز طلع منكم مو منه يجاااوز على عرضي ...

طلع فلوس من جيبه وشمرهن عليه

_ هالمبلغ علاج الها وزايد يكفيها مصرف سنتين اليگدام ....

من عرفوا قاضي وشافوا الحمايه وشافوا الشرطه شلون كُلها واكفه ويه طلحه وكل كلمه وكالوا سيدي ...

خافوا وبقوا يعتذرون على تجاوزهم واخذوا الفلوس وسكتوا لان همه خسروا حقهم ب ايدهم بسبب تجاوزهم ...

تقرب عليه خله ايده ورا ظهري ويمشي سريع لدرجه احس نفسي راح اوكع ..
ضايقني ب ايده حاولت احرك بظهري حتى يوخر
ما اهتم الي ، لحد ما وصلنا كدام سيارته يلا عافني ...

انطه سويج سيارتي لواحد من الحمايه

_اخذها للتصليح وادفع فلوس تصليحها ويومين وعود اني ادزلك عنوان توديها اله ...

_حاضر سيدي

بقى واحد يسوق كاعد كدام ...
كعدت ورا وهو هم كعد ولا كانوا موجوده ابد ولا باوع عليه ولا سألني شلون صار هيج ....

شگد دفعت فلوس حتى ارجعهن الك ...

_مو مهم وممنوع تحجين وياي هيج مره ثانيه الفلوس الانطيهن ميرجعن الي ...

على اي أساس تدفع عني هالمبلغ الكبير
ما اقبل الا ترجع تاخذهن ...

ما رد عليه ولا اهتم لكلامي ..

وكفت السياره كدام المجمع ...

فتحت الباب دانزل ...

وبقيت واكفه گتله ..

شكراً على وكفتك اليوم وياي ...

بدون ما يندار الي بس هز رأسه واشر للسايق يحرك ...

استفزني بـ بروده وتجاهله الي ..

رجعت صفنت ليش دا افكر بي وضايجه وليش اريده يهتم الي ...

دا افتح ب باب الشقه تليفوني ب ايدي يتصل ...

عهد اني مسجله رقمها فطلع عندي ..

رديت عليها من بعد السلام وعتابها بسبب انقطاعي عنهم ومابلغتهم بمرضي وتعبر عن خوفها واشتياقها الي ...

_ نسيت اكُلج اني انقبلت طب بجامعه بغداد وهسه رحت مرحله ثانيه ...

حبيبي تستاهلين كُل الخير

_ لو ما انتي اجيتي بذيج الفتره جان هسه اني مدمره ...
الحمد لله ربي دزج رحمه الي مستحيل بيوم اكدر انسى فضلج وحتى امي من سولفت الها موقفج وياي لليوم تدعي الج ....

لحگت على نفسي وطلعت من ذيج البيئه الدخلني بيها صديقاتي ....
وهسه صرت ما احجي ويه اي وحده ولا اصادقها الا اتأكد من اخلاقها ..

لان الصاحب ساحب .....

اخاف بعدج ماخذه عليه نظره مو حلوه ترا والله اني تغيرت هووواي ....

لا حبيبتي عهد جنتي طفله مراهقه وتأثرتي بكلام صديقاتج والحمد لله شخصيتج جانت قويه گدرتي تسيطرين على نفسج وتتخلصين منهن .....

_ فرحه طلحه بيوم الانقبلت طب لليوم ما اگدر انساها تخيلي ما فرح ب ابنه بگد ما فرح بيه
احمد ربي بكل لحظه لان وعيت على نفسي من وقت...
طلحه مايستاهل انزل رأسه صار الي اب ب الوقت الماعندي بي اب ....

ربي يحفظه الكم ..

_ معزومه على خطوبتي يوم 15 بالشهر
انتي اول وحده اعزمج واذا ما تجين الغي الحفله كُلها

اشوف اذا اگدر اجي او لا ..

_ زيتونه اني اجي اخذج بنفسي من بيتج بس تعالي تكمل فرحتي بوجود الأشخاص الاحبهم وانتي من ضمنهم ...

ماشي ادللي ...

_ما سألتيني منو الخطبج ...

ابتسمت على كلامها ..
غير دكتور وياج ...

_ لا صديق طلحه سياسي وياهم وصار مرتين يتقدم وارفضه بدون ما حتى اشوفه او اعرف عنه شي لان تعرفين الطب مأخذ كُل وقتي ..
بس بسبب اصراره لان تقدم اكثر من مره
ومدح طلحه اله وكُلش يحبه ويحترمه علاقتهم قويه ..
وطلحه حسب وصفه اله يشوفه اكثر شخص مناسب الي بس ما جبرني انطاني شهر افكر وهو يوكف وياي ب اي قرار ...
بس بعدين اقتنعت من حجيت وياه بوجود طلحه وفعلاً أكثر انسان مناسب الي ..
طلحه نعمه الاخ والاب يفكر بينا اكثر ما يفكر بنفسه
مستحيل يختار الي شخص سيئ ....

غلقته منها بعد ما انتهى الحديث بينا ...

عهد اصغر بهوواي حتى من عساف شلون تكون اخته ما اذكر عنده اخت ...

ولا اذكر عنده ام الموضوع غريب ....

يوم خطوبتها يصادف ويه جيته ثاني يوم من السفر ...

من اجه دز ب ايد امه اشياء جايبهن وياه الي ومجرد سلمت عليه ودخلت جوا البيتي ...

احسه بدأ يمل من أسلوبي البارد وياه ....

ثاني يوم خليت المكياج بالطريقه الاخفي بيها كُل ملامح المرض ...
والباروكه لبستها هم جانت بنيه بلون شعري الحقيقي ...
طلعت فستان تسعين وردانه تول مستور
رغم الكعب كُلش ما احبه بس نسقته وياهن ...

وكفت مقابيل المرايه اباوع على نفسي صار شگد ما مهتمه بنفسي هيج
اليوم بهاي كشختي فعلاً حسيت شخصيه زيتونه المثلتها طول كُل هالسنين رجعت الي ....

فتحت باب الشقه دا اطلع صار بوجهي ...

_ وين تروحين

اقاربي من بعيد علاقتي قويه بيهم حفله خطوبتها اليوم ..

ابتسم الي

_ ما شاء الله سبحان الخالقج طالعه اميره

شكراً

_ اني اوصلج

لا ميحتاج هسه اروح بسيارتي ..

باوع على ايدي

_ليش ما لابسه الخاتم

نسيته هسه ادخل البسه ..

_ انتظرج جوا بالسياره ...

دخلت بسرعه والتوتر زاد أكثر شلون اخلي يروح وياي نوب يتصادف ويه طلحه ...

كعدت على السرير وفتحت التليفون
دزيت رساله لـ عهد
بلغتها ما اكدر اجي ...

بسرعه اتصلت عليه ...

_زيتونه والله ازعل عليج اني ما عندي اخوات انتي اختي الجبيره ...

انحرجت اكثر من بقت تحجي وياي فوك العشر دقايق ...

غلقته منها ...

طلعت الخاتم ولبسته ...

سديت باب الشقه ونزلت لكيته كاعد بسيارته ينتظرني ...

صعدت بالصدر وحرف ما حجيت بس انطيته العنوان ...

_ تاره بعد يومين العقد محكمه وسيد بنفس الوقت وشويه ترتاحين ونسوي عرس بسيط ونسافر كم يوم ...

الموعد كُلش قريب لو نأجله شويه

_المفروض نعقد من البدايه بس محبيت اضغط عليج لان ما قبلتي

ماشي براحتك ...

طول الطريق متوتره هسه لا طلحه يشوفه وعباله اني متقصده اجيب خطيبي كدامهم ....

الدوامه والشعور البشع العشته طول هالفتره ما اتمنى اي شخص يعيشه ...

وصلنا وكفت السياره مقابيل البيت ماكو احد غيرنا لان اجيت من وقت ....

_من تخلصين اتصلي عليه اجي اخذج

ماشي ..

راح واني اردد بگلبي الحمد لله ماكو طلحه ...

فزيت من دا ادخل واشوفه واكف بالحديقه يباوع علينا ...

مخلي ايده ب جيوبه ومبتسم تك خد ب استهزاء.....

درت وجهي عنه ودخلت بسرعه ...

عهد طالعه جنن كُلش حلوه ...

شويه ودخل العريس واهله اني بقيت كاعده بعيد عنهم حتى ما اختلط ب احد وبنفس الوقت بالي مو يمهم الموقف محلو ابددد گدام طلحه ....

جان بالي شارد لدرجه دخل العريس وطلع واني ما انتبهت ولا شفته ...

صارت هوسه أكثر وطلحه يريد يدخل حتى يبارك الها وللعريس ومادري شنو ينطيها هديه ...

اني بسرعه دخلت لغرفه عهد وسديت الباب عليه ...

من جنت كاعده بصف امه كُل شويه واحد يسأل اني منو ...
والحجيه اجاوبهم صديقه عهد ...

اسمع كلام النسوان بيناتهن شلون يوصفني كأنوا ممثله ....
بس كل هالكلام ما همني من ورا التوتر بس اريد الحفله تخلص واطلع ....

للمغرب راح الكُل ما عازمه هواي غير اهل العريس وصديقاتها ....

دخلت عهد وسدت الباب وراها
وكفت كدامي

_افتحيلي سحاب الفستان

فتحته الها اخذت هدومها ودخلت للحمام بدلت وطلعت ...

كعدت كدامي على السرير وبعدها بتسريحتها ومكياجها ..

_ زيتونه شبيج ضايجه اخاف تعبتي من الهوسه مو زين عليج

لا

باوعت على ايدي وفتحت عيونها كُلهن ...

_ مخطوووبه

اي ليش متدرين

_وطلحه لعد

شبي طلحه

انتبهت على نفسها شنو حجت سكتت ...

_ قصدي شو بسرعه

كُلشي بالدنيا قسمه ونصيب

حسيتها ضاجت بس محبت تبين الي
فتحت تليفونها وصارت اشوفني الصور هي وخطيبها يطلع عمره نهايه العشرينات او بدايه الـ 30 شاب مرتب ...

دزيت رساله اله يجيني بسرعه
جاوبني بالطريق اتحضر ...

انطيتها هديتها گلاده ذهب وباقه ورد طبيعي سلمت عليها وباركت الها وللحجيه وطلعت ...

رغم واضح على الحجيه تتهرب مني وتتجنب تحجي وياي خاصه بعد ما عرفت انخطبت ....

طلعت للحديقه ومجتفه ايديه ...

طلحه داير ظهره يدخن

بسبب صوت الكعب العالي ..

التفت الي ..
باوع عليه بـ برود الضوا فوك رأسي صاير ...

داس الجگاره برجله ..
دار ظهر وتقدم للسياره صعد بيها وما سمعت غير صوت شخطتها ....

ورا ما راح مباشره اجت السياره صعدت وياه وكارهه كُلشي حواليه ما اتمنى غير تعدي هالايام على خير ...

يحاول يحجي وياي واني اجاوبه على گد سؤاله ..

صعدت بالمصعد هو راح لشقتهم واني دخلت الشقتي بدون ما نحجي اي كلام مجرد كال تصبحين على خير ودخل ...

نظراته البارده مدا اكدر انساها ....
ما حجه وياي اي كلمه بس نظراته كفيله تفسر كُلشي ....

نزعت الباروكه والمجوهرات ....

طلعت العلاج داشرب قبل لا انام ...

وما اسمع غير صوت تليفوني
يرن رسائل على واتس اب ....
بشكل فضيع حتى ما ينطيني مجال افتحه شكل ...

دخلت على واتس اب
رقم غريب داز فوك +99 رساله ....

بالبدايه بس كلام تجاوز ..
وبنهايه صور انتظرتهن يفتحن ...

صفنت بيهن لدرجه صرت اكبر بالصور حتى اشوفهن حقيقيه لو مفبركه ....

طفيت الشبكه وغلقت التليفون ..

افتر بالغرفه وامسح بدموعي لزمت التليفون اريد اتصل بي
تراجعت خلص خلص كُلشي انتهى بينا ليش دا ابجي من البدايه مو الي ولا راح يكونون الي ...

اتمنيت تطلع مفبركه آخر امل حتى اكذب نفسي.....

مع الأسف كُلشي جان حقيقي وب الأدلة القاطعه .....

يتبع ....