رواية الكارمــا الفصل السابع 7 - بقلم آيــه آلـ صبري

وَ مَن لُبُّهُ مع غيرهِ كيف حالُـــــهُ؟
‏و مَن سِرُّهُ في جَفنِهِ كيف يكتمُ؟
ـ المتنبي

عيونـه خازرتنـي جر معصم أيدي سحبهن منـي
- چنت شاك بيچ وهسة تأكدت

ترك معصم ايدي وابتعد
- تدخنين ؟!

- ما يخصك

ضرب الميز بـ قوة بـ قبضة أيده فزيت
- شنو ما يخصني سألتج تجاوبين ؟؟؟

دفعني على الحايط بـ قوة قرب رأسه على رقبتي مقيد ايديه بـ قبضة ايده حاولت أبعده ما گدرت !!

صرخت گازة على أسناني
- وخر عنيي دير بالك تتقرب مني .

أبتعد بـ سرعـة ، يحچي بـ استهزاء
- ما ميت عليج حتى اتقرب منج انتِ آخر وحدة افكر بيهـا ، بس ريحة الـ دخان بيچ لا تكذبين !

- منو انتَ حتى أكذب عليك ؟؟

عَلـه صوتـه بـ حدية
- لا تجاوبين سؤالي بـ سؤال

- صوتك لا تصيح ! وما طول عرفت بعد أحسن أي أدخن وما ألك دخل .

مديت ايدي سحبتهن من الميز
- وهسة صارن إلي وبعلمك هم .

درت ظهري بدون ما أنتظر ردة فعله ، شفت المفتاح معلگ بـ الباب فتحته

صرخ بـ هدوء
- لا تدخنين گدام أمي وأختي خط أحمر مفهوم .

ألتفت ورديت مستهزئة
- ماشــي
طلعت بدون ما أهتم اله احچي بيني وبين نفسي ،
همزين عرف حتى هو يجيب الي بعد أحسن ما أبقى انتظر لالي .

وگفت بـ الحديقة دخنت أثنين ورجعت لفيت رأسي ونمت يم عهد لگيتها نايمة ، تنام الصبح وتسهر الليل كله .

گعدت بـ الليل و عرفت من خلال حديث أمه راح ، وهم شوف عود شوكت يرجع يجي ، المهم حصلت باكيتين ما يهمني شوكت يجي  .

رجعت للغرفـة عهد دا تلعب بـ التليفون ولا ينزل من أيدها حتى قراية ما تقرأ !!
فتحت الخزانة رتبت باقي الملابس ، لالي مخليه شكو شي طويل وحتى ملابس طلعه مخليه وين أطلع قابل
بقيت أدور لگيت قميص نص ردن طلعت وياه أي بجامة هسه لو مخليه دشداشه قصير على أقل ،
تخنگني الملابس الـ طويلة .

أخذت من الحجية شامبو ومكيف وحتى غسولات كُلش هواي تجيب العهد دخلت سبحت

وعيونـي على وجهي بـ المرايا صار فوگ الأسبوع هنا ، وجهي راح تدمر بشرتي تدمرت لا عناية لا كريمات من الأعصاب صاير أحمر طول الوقت .

قبل لا أنام نزلت الفيس وفتحت صفحه جديدة على الايميل وخليتها أسم وهمي وصورة وهمية مو مثل صفحتي القديمة بيها صورتي واسمي ، دزيت طلب صداقة لـ لالــي .

دخلت لليوتيوب أتصفح بـ مقاطع الـ شعراوي بـ تصرف لا إرادي  .

الـ محاضرة تقريباً نص ساعة ، وحدي گاعده بـ الـ صالة عهد تخابر اتضايق ما أعرف أنام و وأحد يحچي فوگ رأسي .

مَدده على تخم أسمع اله بـ تركيز
كلامـه خلاني أنهار واتأثر بچيت من كُل گلبي
طفيت التليفون بـ سرعه ما سحـة دموعـي وجابرة نفسي أنام ..

حلمت بـ الـ بنية شفتها بشكل واضح أكو دم بعيونها ودم على گلبها ودم على مكان كِلياتها كانوا واقع مو حلـم ، فزيت مختنگة وعيونـي تتخيلهـا بـ كُل مكان

صرت اشهگ گوه أجر الـ نفس افرگ بـ صدري ماكو هوى ، اتجهت للمطبخ فتحت الباب وطلعت للحديقة
حسيت دا افقد توازني بـ سرعة كعدت على الأرض
أريد اتنفس عيونـي مدمعة ماكو الهوى أختفى
شكل الطفله گدامي دا يصير يخليني أنهار أكثر !!!!!

حسيت خلص هاي نهايتي غمضت عيوني
وخليت رأسي على الكاشي
ماكعدت إلا على صوت الحجية تهز بيه بـ خوف
-  يااا شبيها البنيه ، عهد وينج يمه تعاي وياي زيتونــة نايمة على الـ كاشي الخارجي واگعد بيها ما تگعد !!

اسمعها واحس بيها تحرك بيه  ، أريد اگوم أريد اجاوبها اكللها أني اسمعج !
بس ما اگدر عقلي مشتغل بس جسمي ما اكدر اتحكم بي ، أريد أقاوم جسمي واحرك بـ أيدي وما اگدر !

صارت تصرخ والخوف واضح بـ نبرتهـا
_ يمة عهد تعالي وياي

- شبيج غير نايمة اليوم عندي عطلة إلا تگعديني من الـ صبح شكو .

- شوفيها ما تحرك لا أيد ولا رجل بس لا كرصتها حية

احس بيها تتلمس جسمي وتدور بي
وصوت عهد فوك رأسي تتذمر فجأة صاحت
- ياا يمه هاي صدگ زيتونــة ما تتحرك شبيها

- انشلع گلبي اصيح وما تجين .

گعدن فوك رأسي يحچن متوترات
سحبت الحجيه رأسي خلتـه بـ حضنها وايدها فوگ رأسي تقرأ ايات قرانية وصلت لـ سورة الكرسي قرتها سبع مرات

من وصلت للمره الـ سابعة شَهكت شهگة عبالك روحي طلعت من مكانها ، رفعت رأسي بكل قوتي وحركت أيدي .

اباوع عليهن مصدومة
اتلمس جسمي بـ أيدي اتأكد أني صحيت !!!

- شبيج خوفتيني عليج أكعد بيج وما تكعدين ؟

بس اباوع عليها فاتحـة عيونـي على وسعهم ما بيه أرد عليها واجاوبها ، هزيت رأسي الها بـ معنى مابيه شي .

عفتهن ودخلت بسرعه للغرفه ، ايدي ترجف ما اعرف شنو الصار خليتها على راسي من التوتر
صوت الطفلة وشكلها دا يتهيئ الي بكل مكان
حسيتها كاعده بصفي بسرعه كمزت

ـ شبيج زيتونـــــة وضعج يخوف ؟

عرفت نفسي صرت اهلوس لدرجـة شفتها بـ هيئة عهــد !! سيطرت على ردة فعلي
ـ هاا لا مابيه شي

تركتها و هوى الدنيا كل اختفى گوه اتنفس من الرعب العشته ، شفت الحجيه كاعده أصلي بـ الصالة وتقرا قرأن يوميه الصبح

كعدت كدامها على التخم وبالي مو يمها عقلي مشتت ، صوتها العالـي وهي تقرا القرآن يزعجني بشكل فضيع و يخليني اتضايق واختنگ تعبت من هالشعور ألي ما اگدر اسيطر عليه

عفتها طالعة برا گعدت على الثيل صافنه على السما ما أسوي أي شي عقلي وكف من التفكير تليفوني ما اعرف وين شمرته

اجتي عهد تحچي وتباوع عليه بـ شك 
ـ زيتونـــة أمي تگول لالـي تريد تحچي وياج

ـ بعدين

_مو امي دا تصيح صار ساعة شنو ما تسمعين .

خزرتها
ـ بعدين لا تلحين

عافتني ومشت ، حتى لالي مالي خلك الها وما أريد احجي ويه بشر صوت الطفلة برأسي مدا يطلع اتهسترت تدمرت .

خمس أيام نفس الوضع أكل ما أكل إلا الحجيه تجبرني أشرب كلاص الحليب ..

أسمع صوت لالـي تبچي وتناديني
لأن الحجيه تفتح مايك وتكعد بصفي تسمعني صوتها كل يوميه تتصل و ما أقبل احجي ويه أحد
ولا اكدر احجي لـ اي شخص الي دا اعيشه ودا امر بي

انهلكت من صوت الطفلة الـ برأسي
كل شويه افز اتخيلها كاعده بصفي

دخلت للحمام اباوع على جسمي بـ المرايه بس عظام من الضعف أيام ما ماكله غير الـ انجبر عليه ،
فتحت الدوش خليت أصابعي على أذني أريد صوت يختفي ما أريد أسمعه بعد تعبت بـ الواقع وبـ الحلم تتهيئ ألي .

أكو بانيو گعدت بنصه وخليت رأسي بي اختنكت
طلعته بسرعه ، لـ أي اي مرحله وصلت اخنگ نفسي بـ المي ؟؟

گوه عليه لبست القميص والبجامه بهالبرد ولابسه صيفي وما أحس بـ أي بروده اختفى عندي شي اسمه احساس وشعور ، شعري مبلل تركته مفتوح هو اصلاً سرح مايحتاج امشطه

:: بنيتي باردة عليج اكعدي يم الصوبة .

:: هاج اكلي سويت الج تشريب عظام يسندج راح تموتين من الضعف .

:: اذكري الله يا بنيتي ليش هيج حالج انگلب فجأة .

:: اتعوذي من شيطان وكومي صلي .

:: اتوضي وصلي بلكي تتحسنين .

كل هالكلام اسمعه يوميه وبشكل مستمر بس أسمع لا أرد ولا أنفذ ولا عندي حيل أناقش .

يوم عن يوم اذبل أكثر وما اعرف ليش وشلون وصلت لـ هذهِ المرحله طول الوقت نايمه وإذا ما نايمة بس صافنه ؟

فزيت بـ الليل على صوت عهد تسولف تخيلته صوت الطفلة بسرعه كمزت من السرير اتلفت من مكاني
انتبهت عليها غطت رأسها بـ الغطا من شافتني .

تقربت هزيتها بـ قوة
ـ عهـد عهـد كومي منو چان دا يسولف ؟؟

وخرت البطانيه من وجهة تباوع بخوف
ـ أني زيتونـــــة دا تخوفيني شبيج .

ـ كذابه مو أنتِ .

ـ لا والله إني لعد منو أكو غيرنا بـ الغرفة .

خليت ايدي على شعري المفتوح أهلس بي
ـ الصوت دمرني ليش ليش ؟؟؟؟؟؟

ـ بسم الله يا صوت !!

إتجهت للحديقه كعدت على المرجوحة ابجي بـ إنهيار
صوتها بكل مكان حتى بـ الحلم دا ايطع .

آذان الفجر بـ أعلى الأصوات ، خليت أيدي على أذني سادتهم اريد هدوء تعبت .. غفيت على المرجوحة ما گعدت إلا على ضوة الشمس يضرب بيه .

حتى الجگاير گدام عيني هالفتره مشمور وما أخذه .

من بعيد الحجيه تنظف المطبخ وتحضر غدا
باوعت عليه من الشباك وأشرت أدخل ، خطواتي كُلها تعب رحت وكفت كدامها سندت نفسي على الطباخ

تقربت لزمتني من كتفي وكعدتني على وأحد من كراسي الميز طعام
ـ بنيتي اذا مريضه احجي كولي حتى أخذج للدكتور

انقهرت عليها شلون خايفه
ـ حجيه ما بيه شي

صارت تمسد بـ كف أيدها على شعري بكل حنيه
ـ من سولفت الي لالي كلت الله يهديج ويحاسبج
وبوقتها ما فتحت وياج الموضوع لأن بعد ما يفيد الصار صار وربج غفور رحيم
مو أحنا البشر نحاسب على اخطأ بشر مثلنا ربج موجود ويعرف بـ كُلشي ، هالموضوع متعبج وشاغل بالج ، احجي ألي لا تستحين والله ما سولفت لـ أي شخص وللموت ما احجي لأحد سرج وياي يندفن .

ـ عمرج طويل حجية

ـ لا والله يا خاله انقهر من اشوفج بعز شبابج مدمره حياتج وهسه وكعتي هالوكعه ولا تقبلين تكولين شبيج ولا تقبلين تأكلين انتهيتي من الضعف .

ما عندي أي جواب أني بنفسي ما اعرف شنو بيه شلون تريدني احجي إلها !

صوت تليفونها يتصل راحت أشوفه
ـ هذهِ لالي احجي وياها خطيه صار أسبوع بس تبجي علمودج وما تكدر تجي عندها امتحانات

أبتسمت بوجهة جابرة نفسي
ـ بعدين أني أتصل عليها .

دخلت نمت بصف عهد حياتي انگلبت بس نوم وخنگه ، بعد ما جنت طول وقتي بـ المركز و اكلي مطاعم ما الحگ أرجع للبيت أطبخ
و وقت فراغي افتر بسيارتي لو ادور أثاث جديد لشقتي ألي اشتريتها بدم گلبي .

نفس الحلم رجعت حلمته الطفلة جسمها عبارة عن دم ينزف بـ أماكن مُعينة ونظراتها البريئة قتلتني ورعبتني ولا كانواا تحس بـ ألم !!

فزيت بـ شهگة على أيد تضرب بوجهي
ـ بسم الله أعوذ بـ الله من الشيطان زيتونــــة كومي تسمعيني زيتونـــة .

ثارت ترش مي فوگ رأسي بـ كمية كبيرة دقايق يلل قاومت و بعدتها عني وگلبي يدگ ودگاته من السرعة ما منتظمة ، وگفت اباوع على كُل الغرفـة ما مصدگه نفسي خلصت من هالكابوس !!

ـ اگعد أمي أخوي يأخذوچ للمستشفى وجهج أحمر ؟

ماركزت بـ كلامها طلعت برا للحديقة مثل كل يوم من اختنك أطلع ، أكو مُقابيل المطبخ مُدرجات ينزلن على الثيل گعدت عليهم وسندت ظهري على الحايط

أسمع صوت خشن من بعيد
:: نعم مثل ما بلغتك عقوبته سجن
:: توصل فوگ العشر سنوات
:: لا تعذرني مو بـ بيتي هالأسبوع ، الوالده تعبانة اجيت أشوفها ، ماشي مع السلامـة ..

ما چنت أدري بي هنا رجعت رأسي على الحايط وغمضت مالي خلگهم ، شلون أجيت ألهم شجابني هنا ؟ شلون ساكتة ؟ شلون صابرة ؟ منظرهـا دمرني وشوش تفكيري وخلانـي خاملة مو گادرة حتى أحس بـ الحواليه ولا حتى أفكر بـ نفسي .

فزيت من تفكيري ألي مدا يترتب على صوته عالـي يصيح معصب

:: كم مرة موصي الحماية من أطلع وحدي ما يگولون گدام أحد حتى لو علاقتي قويه بي ؟؟
:: لاااا هسه خابرني وأحد ويعرف أني مو بالبيت !
:: اي شمدري غير الحمايه حچوا .
:: رتبلي وضعهم مو تنسى .

هالكلام فززني ليش هو شنو صار ؟ وليش عنده حمايه منو هو قابل ؟؟؟؟

مديت رأسي اباوع ناحيته
گاعد بعيد بنص الحديقة و قريب على النافورة والمسبح الفارغ ومتروك ، مخلي ارگيله يدخن ويتصفح بالتليفون ، تركته داخله للداخل .

كلشي متغير بي ثگلة رزانته هدوئه
حتى لبسه الرسمي كشخته عطره يملي المكان
شنو واقع لو حلم ؟
شنو هالتغير الصار بـ حياتي وبـ حياته ؟
الدنيا شگد صغيرة مره تصعدك ومره تنزلك !!

قفلت باب الحمام نزعت ملابسي علگتهم
ترست البانيو مي دافي ، دموعي اختطلن ويه المي وصلت لدرجة ابچي بدون سبب بعد ما جانت دمعتي صعب توگع لو أموت وجع

دموعي على عمري وحياتي الضاعت لو على شنو ليش مدا افهم نفسي شنو تريد ؟؟
إحساس الذنب  الملل ومرات أفقد الشعور بـ كُلشي حتى خوف وقلق يختفون ما بقى غير اليأس والعجز  فاقده الإهتمام حتى بنفسي !
الإحباط شكو شي بالماضي دا يمر بعقلي ويزيد انهياري !! تجي ايام عيني ما تغفى صافنه بـ لا شي .

كُل الأشياء ألي حواليه رمادية ، شنو هالاضطراب الداعيشه ، غطست راسي بالمي وغمضت عيوني .

مَرت فتره طويلة يلا طلعت لبست ملابسي شعري مفتوح حتى ما أتذكر شوكت آخر مره مشطت وظفرته ، أتركه بس مفتوح و هو طويل يضايقني وتجيني أفكار من صافنة اگوم اكصه واخلص منه رغُم قبل چنت مهووسه بعنايته .

طلعت من الحمام الصاير بـ الصاله ، البيت تصميمه من القديمات بـ النص صاله كبيره وداير مدايرها غرف ، أكو باب مطبخ وباب للإستقبال
وبـ الجوانب غرف ، غرفه جوا الدرج مال عهد وغرفتين وحده مقابيل الثانية .

الدوخه نرفزتني الساعه بـ 3 الفجر ، الجو من البرد يكص كص وأني ما أحس بي ولا مأثر بيه ، شعري مبلل مفتوح ولابسه نص ردن أكره الملابس الشتويه
دورت على تليفوني ماكو نسيت وين خليته .

كعدت على تخم ورأسي بعده يأذيني خليت ايدي على راسي أضرب بي تعبت تعبت .
اتذكرت فلوسي الجبتهم وياي بقيتهم بـ السياره ونسيت اطلعهم ، أخذت المفتاح من الغرفه وهم لگيت عهد كاعده
طلعت أمشي بـ هدوء و اصلاً خطواتي گوه امشيها
ماكو أحد بالحديقة حتى هو ماكو أستغليت الوضع ،
افتريت ورا البيت وفتحتها أكو ضوه بيها شغلته ادور لكيت هواي شغلات ناسيتهم حتى عصاير أكو
بقيت أدور اتأخرت يلا گدرت أطلعهم ضامتهم بـ مكان ما يبين المبلغ تقريباً  50 مليون ، رجعت ضميتهم بـ مكانهم وقفلت السياره ناويه اخابر لالي باجر تجي تاخذهن يمها ما أمن يبقون هنا .

ما أحس ألا اندفعت على الأرض بـ قوة على ظهري و نحط سلاح على رأسي

يحچي بكُل هدوء حتى يخوف الواحد بنبرته !!
ـ شنو دا تسوين بـ هالليل ؟؟!!!!

خليت شعري ورا أذني وصرخت
ـ وخر شبيك هذهِ أني

أبتعد افتر على سيارتي
ـ هاي سياره منو ؟

جاوبته وجسمي كُله يرجف من الفزة بدون كُلشي صحتي تحت الصفر
ـ سيارتي

انداريت أرجع أدخل ما اسيطر على نفسي بعد .

صار مُقابيلي رغم هالجهة مابيها ضوه وظلمة بس اگدر أشوفه على ضوه القمر ، مادري ليش هالجهه متروكه وحتى مو نظيفه ومابيها اضائه .
ـ عبالي حرامي شبيج أكو أحد يطلع بهالوقت ؟

تلفونه يتصل رد رافع حاجبه عليه
:: شغله نص ساعة وأكون يمك .
:: لا ما اتأخر .

تقدمت على الجهة ألي بيها ضوه تاركته يحچي وحده ، صار مقابيلي بسرعة يحچي بـ حدية
ـ ليش جنتي برا تعرفين هسه الساعة بـ 3 ؟؟؟؟؟
ما فارغ الج هالفترة ديري بالچ تسوين شي .

ـ ترا چنت محتاجه أشياء من سيارتي وفتحتها
شوف السويچ بعده بـ أيدي لا تلح وياي  .

إذا أمشي بعد خطوة وحدة اوگع كعدت على الكاشي المقابيل المطبخ ، خليت أيدي على صدري أتنفس

ـ بعدج على طبعج تلبسين صيفي بعز البرد وما تتمرضين .

رفعت رأسي مستغربة من التغيير !! سترته السوده طوله جسمه المرتب ساعته محابسه هدوئه بـ كلامه المُستفز خله السلاح بـ حزامه وعينه عليه .

حچيت بتعب وابتسامة استهزاء
ـ صاير أحوال

ضحك ضحكه طويلة
ـ محد بقى على حاله كلها تغيرت مثل ما انتِ حتى أسمج غيرتي !!!!!

يتبـــــــــع ..