رواية الكارمــا الفصل الخامس والعشرون 25 - بقلم آيــه آلـ صبري

وين أهلي علي ما دكو الباب
تره صحتي عليله وگلبي مو زين
فض الازدحام وقلت الناس
وما گدامنه بس واحد اثنين..
يوصلنه السره ويتأجل الموت
يم رگابنه وتعمى السچاچين

الگاطع

_____________________

لالي ...

تفاجأت من الرساله دكتور ازاد يراسلني شعجب ..

فتحتها

_باجر اداومين

رديت

نعم

رجع دز

_شنو رأيج تگدرين تاخذين مكاني بـ الصيدليه هالفتره

اي عادي

_ماشي
لعد اني بعد ما ادوم بس يوم واحد ب الاسبوع اجي هالفتره راح تبقين وحدج مسؤوله عن الصيدليه وعندي ثقه بيج تكدرين ...

ما رديت

علاقتي وياه جافه صار الي سنتين وياه نفس الوقت انداوم بالليل لان بالدوام الصباحي غيري يكعدون ...

يوم يجي وعشره لا وحتى لو يجي فـ بس يشوفني ويتأكد الوضع مسيطره عليه او لا ..

هو عنده أكثر من صيدليه اله و الوالده أيضاً كالوا صيدلاني ودكتور بـ المستنصريه وهم عدهم مركز ما اعرف مال شنو ب الضبط .....

مرت الأيام وياي متشابهه وملتهيه ويه تاره وعلاجها...

قبل الفاينل ب أسبوع اتصلت عليه رد بسرعه ...

_اهلاً لالي تفضلي

دكتور الفاينل ما بقى اله كم يوم واريد اجازه

_ ماشي من تخلصين داومي واذا احتاجيتي شي فـ اني موجود

اشكرت منه وغلقته .....

خلال ايام العطله قبل الفاينل ...
كُلش تعبت طول الوقت أدرس آخر سنه الي بعد تعب خمس سنوات متواصله ...

شگد ما احب الصيدله شگد ما تعبت بيها دراستها صعبه ومتعبه خاصه جامعه بغداد كُلش مشددين ويانه ....

زميلي العرض عليه موضوع الخطوبه مشفته بعد وحتى لو اشوفه صدفه ف هو يبتعد مباشره ويغير طريقه إنسان جداً محترم احترام قراري وما سوا الي مشكله او حجه عني كلام محلو بسبب رفضي ....

باجر اول امتحان الي او ب الاحرى آخر امتحانات بحياتي الجامعيه .....

بقيت سهرانه للصبح ما شفت النوم بعيوني كُل شويه احس عيوني راح ينسدن بسرعه اكوم اغسل وجهي بـ مي بارد والزم الملزمه وافتر بالغرفه امشي حتى ما انعس
بقيت هيج لحد ما سمعت صوت الأذان توضيت وصليت بسرعه ورجعت اكمل قرايه ....

بس الحمد لله خلص الامتحان على خير ومتأكده من كُل اجوبتي ...

بعد يومين يكون امتحاني الثاني ...
حتى اغير شويه من نفسيتي قررت اروح للصيدليه احس نفسي انغلقت هالفتره أكثر من الازم مشايفه احد ولا حاجيه ويه احد ...

ظفرت شعري وغيرت ملابسي حتى اطلع ....

اول ما دخلت شفت دكتور ازاد بـ الصيدليه ويه دكتور ثاني بعده شاب صغير يمكن جابه بمكاني موقتاً ...

سلمت عليه ودخلت ...

_شلون جاوبتي

الحمد لله مسيطره

_شاطره ما ينخاف عليج

بس ابتسمت اله
شعجب اول مره يمدحني ...

بقيت ملتهيه ويه المرضى اني والدكتور الثاني ودكتور ازاد بس واكف يريد يطلع من شافني اجيت بـ مكانه ...

الصيدليه عليها زخم كُلش قوي لان كبيره و معروفه جداً بالمنصور والها سمعتها ....

دخلت مراه لابسه عبايه بس مو كبيره وصارت تشرح الي عن حالتها النسائيه وتحجي بصوت ناصي وتريد انطيها علاج يخفف من الألم لان ما تكدر تروح لدكتور اختصاص وحتى حاولت اقنعها بس ما قبلت ...

من خلصت كلامها التفتت للدكتور ازاد

جان واكف دايخابر ..

دكتور

_نعم

شرحت اله عن حالتها حتى اتأكد انطيها هذا العلاج لو اخاف يكون غير مناسب ..

ابتسم الي وشجعني على قدرتي للتشخيص بهالسرعه رغم بعدني ما متخرجه ....

التفتت حتى انطيها العلاج ...

المراه غطت وجهه بالعبايه وگالت

_يااااااا خيه انتي ما تستحين انشهرنااا

عافتني وطلعت تركض

صار يضحك بصوت عالي ..

باوعت عليه مستغربه ..

_لالي هاي صار الج كم سنه ولحد هسه ماتعرفين سوالف النسوان ..

مستمر يضحك بصوت عالي ...
واني بس واكفه اباوع ..

_هي ليش حجت الج وما حجت الي او للدكتور الثاني لان شافتج بنيه واكو بيهن عدهن عيب ناس عايشه على الفطره
انتي اشوفين الموضوع عادي
لان هاي مهنتج(ولا حياء فـ العلم ) ...
بس بعض البنات يستحن ويشوفنه شي مخجل اهلهم ربوهم بهيج بيئه محافظه بشكل مبالغ بي ...

مره ثانيه انتبهي ....

حجاها وطلع صعد بسيارته ...

صح كلامه خطيه هسه راحت وما اخذت علاج وما اتوقع بعد تجي تخجل رغم عادي هو دكتور مابيها شي اذا سألته بس يجوز فعلاً عايشين حياتهم بطريقه كُلشي عندهم عيب ...

مرت الايام عندي بين الامتحانات وبين روحاتي لـ تاره ....

آخر امتحانين تعبت لدرجه واكفه كدام المرايا واباوع على نفسي شلون شعري تلف لان مدا اعتني بي بس ارفعه واطلع ...
وجهي مبين عليه السهر والتعب ...
كعدت على الدرج وخليت ايدي على عيوني ابجي نفسيتي تعبت اي كلمه ما تكدر توصف تعب دراسه الصيدله خاصه المرحله الخامسه تعبتني طول الوقت بس ادرس واروح للصيدله ماعندي وقت حتى احجي ويه احد ولا عندي وقت الزم التليفون ....

مسحت دوعي وغسلت وجهي باوعت على امي بعدها نايمه ...
عفتها وقفلت البوب وراي وطلعت أجرت سياره ...
طول الطريق فاتحه الملازم واراجع متوتره ...

على التعب التعبته والسهر وصعوبه المواد قررت ما انصح اي احد يدخل صيدله اذا ما جانت حلمه وطموحه وهو حابها ويگدر يتحمل تعبها خاصه جامعه بغداد .....
رغم انهار خلال فتره الامتحانات بس ابقى احب جامعه بغداد مو بس لان جامعتي لان فعلاً جامعه محترمه وتخرج صيادله يستحقون هالكلمه .....

خلصت الامتحانات واني متأكده من اجوبتهن ...

بعدها بـ فتره استلمت النتيجه وطلعت ناجحه ....

وصرت خريجه جامعه بغداد رسمياً ......

تخرجت سنه (2018_2019)

آخر فتره امي صارت تسمح اروح لـ تاره بدون مشاكل من عرفت بيها مريضه تغيرت ....

بعد ما تخرجت طلبت من الدكتور ازاد يغير اوقات دوامي خليتهن من الصبح للظهر وينتهي ...

احسن ما اضل كاعده بالبيت انتظر التعين
اداوم بالصيدليه لحد ما يجي تعيني ....

الأسبوع هذا آخر اسبوع اداوم بي من العصر لليل وبعدها احول صباحي ...

ساعـه بـ 9 ونص بالليل ...

دخل الدكتور ازاد مجرد سلم واخذ المحاسب مادري شنو يحجي وياه شويه وطلعوا صعدوا بالسياره اثنينهم راحوا صايره مشكله بحسابات صيدليه الفرع الثاني....

المحاسب رجال كبير بالعمر ومن زمان يداوم ب الصيدليه ف ما اخاف ابقى وحدي لان اكو شخص وياي ....

ورا ما طلعوا بعشر دقايق ...

دخل ولد شاب يطلع عمره بنهايه العشرين ملابسه مرتبه بس شكله ابدد مو طبيعي ..

ايده اليسرى ترجف من وحدها ...
والجوا عيونه اسود وعيونه داخلهن حمر وضعه مشكوك بي ...

طلع الي علاج فارغ من جيبه ..

_دكتوره اريد من هذا العلاج

من شوفنياه تأكدت من شكي .....

لـ منو تريده وين الوصفه

_لـ جديتي مضيعه الوصفه

ما ينصرف بدون وصفه ..

ما احس الا رفع سكين بوجهي ابتعدت بسرعه يريد يصعد على الجام حتى يضربني ..

خلص خلص اهدئ راح ادور

_يلاا

انداريت اسوي نفسي ادور وايدي ترجف الموقف مرعب وحدي ماكو احد يمي ...

طلعت علاج عادي مال اطفال حتى لو يستعملها ما راح تأثر عليه ما بيها تأثير ما انطيته اليريده ...

سحبت التليفون من جيب الابكوت اريد اتصل على المحاسب ...

ضرب ايدي حيل بالسكين
انجرحت وصارت تنزف ..

من شاف الدم صار يتمتم بكلمات ما مفهومه وجسمه يرجف

_ما اسويلج شي ما اسويلج بس انطيني واروح لا تخافين لا تخافين

كل كلمه يحجيها يرددها مرتين

مديت ايدي اله انطيته العلاج

_انتي كذذذابه مو هذاااا ما اااريددده انطيني الاااارريده جاي امووت ...

بسرعه فتر ودخل لجهتي رافع السكين ...

صرخت من كُل گلبي ....

الباب زجاجي من يدخل شخص تلقائياً ينغلق ورا فـ الصوت ما ينسمع ...

رجعت ورا مبتعده عنه بخوف وهو بس لازم السكين وايده ترجف بشكل يخوف ...

_شلوون جاااي امووت بس انطيني واروح بعد ما اجي ...

طلع ورق من جيبي شمرهن على الارض واني باقيه واكفه بعيد عنه ...

_هاج هاي الفلوس كُلها وانطيني كل العندج من الاريده اريد كُل الموجود ...

حجايتين مايكدر يحجي گوه يطلع الكلام اريد افهم كلمه منه صوته ما مفهوم ...

اطلع برا وعوف السكين وانطيك ...

_لا لا هسه كدامي

ونبي انطيك بس اطلع ارجع لمكانك ...

اثناء كلامي الاخير دخل ازاد ما انتبه جان يحجي ويه المحاسب مجرد ما شاف الولد داخل جوا عندي ....
بسرعه فتح عيونه يباوع ...

الولد بس شافهم هجم عيه لزمني من ركبتي وعليها السكين ...

صرت اصرخ المحاسب طلع خله العالم كُلها تتجمع ....

تقدم ازاد يحجي وياه بكل هدوء

_عوفها وتعال نحجي اني وياك

_تموتوني ادري بيكم تموتوني تسجنوني ما اريد اروح سجن

اي شخص يگدر يلاحظ ويعرف هو مو بوعيه لان كلامه كُلش ما متزن....

_لا كلمه رجال انطيك هسه اطلع الكل برا ونبقى بس اني وياك بس نزل السكين من رگبتها لاتتهور ترا ب ايدك تروح للسجن وانت تخاف من السجن ...

_ ما اريد شي منها بس اريد من هذا العلاج ..

_وينه تعال يمي شوفني واني انطيك التريده ..

بسرعه عافني وراح لـ ازاد صار يشوفه العلاج
ازاد بـ البدايه انطاه الأمان وخلاه يثق بي ...

فجأة وبدون مقدمات ازاد ضرب الولد بوكس ونومه على بطنه على الارض مجتف ايده حتى ما يفلت ساحب السكين منه وشمرها بعيد ..

دخلوا شباب شالوا الولد ازاد بلغهم يعوفوه يروح محد اله علاقه بي وفعلاً بس كال هيج راح الولد يركض بعد ما اخذ فلوسه المطشره بـ ايده جمعهن....

كعدت على الكرسي والخوفه بعدها بيه رفعت شعري التناثر اجمع بي ...

تقرب ازاد فوك رأسي يباوع بقلق ....

_لالي بيج شي تأذيتي

هزيت رأسي بالنفي ...

صار يفتر وطلع ادويه وكطن ...

سحب ايدي بدون ما يباوع عليه يعقم بالجرح وضمده الي ....

حرف واحد ما حجيت لحد هالحظه من الهبطه الحروف مدا تجمع عندي ...

فتح الثلاجه طلع منها بطل مي فتحه وقدمه الي ..

_اشربي

اخذته منه شربته ورجعته اله ...

فتح تسجيل الكامرات يباوع التفت الي مبتسم ...

_سباعيه عرفتي شلون تتداركين الموقف ...

علقي مشوش بالي مو يمه بس مدنگه رأسي ومخليه ايدي على وجهي من توتر ...

_لالي ركزي وياي كافي تفكرين خلص الصار صار بعد وهاي اول مره ايصير هيج صار كم سنه اداومين بيوم صار هيج موقف وياج او ويه احد غيرج ...

لا

_شاب متهور مدمن مو بوعيه وان شاء الله ما يتكرر الصار وما اتوقع يتكرر ...

رفعت رأسي اباوع عليه عيني صارت بعينه نظراته كُلها قلق ...

بسرعه وكفت ودرت وجهي عنه ...

_باجر لا داومين من تحسين نفسج صرتي احسن داومي

مابيه احجي ولا ارد عليه بس گتله...

ماشي دكتور ..

_امشي اني اوصلج لبيتج ساعه ب 10 مو مال ترجعين وحدج بهذا وضعج...

نزعت الابكوت واخذت تليفوني وتقدمت امشي داطلع ...

طلع گدامي وفتح باب السياره ب الصدر ...

دكتور ما اكدر ارجع وياك شكراً...

_لا ماكو اني اوصلج ...

بقى يحرجني ب اصراره واكف كدامي ومخلي ايده بجيوبه ينتظرني اصعد ...

_ماشي لعد اتصلي ب امج وبلغيها دكتور راح يوصلني لان ادري بيج ما تسوين شي بدون ما تبلغيها ...

فتحت تليفوني اتصلت على امي وهو راح صعد بالسياره ...
انطيتها خبر گالت ماشي انتظركم ...

صعدت وياه مركز بالطريق لا اني حجيت ولا هو ....

انطيته العنوان ..

لگيت امي واكفه بالباب تنتظرني سلم عليها وراح ....

اول ما دخلت استلمتني امي تحقيق شبيها ايدج وشلون هيج صار ...
سولفت الها نوب خافت أكثر وكل شويه توصيني انتبه ....

نايمه بغرفتي فزيت تليفوني صوت رسائل ...

مديت ايده سحبته من الشحن ..

الدكتور ازاد ...

_شلون صرتي وضعج شلونه
بالي يمج

فتحت الرساله بس كتبت

تسلم دكتور صرت افضل ...

شافها وما رد بعد ..

ثاني يوم ما داومت بس بعدها وصلتني رساله من الدكتور لازم باجر اداوم بالفرع الثاني صباحي تحول دوامي ...

مثل كل مره من اطلع البس ملابس مناسبه لوقت الدوام ما اكدر اكشخ لان راح ابقى ساعات طويله ...

طلعت البنطلون الجينز والقميص مكياج ما اخلي غير المسكاره وبلشر .....

ظفرت شعري على طوله مستحيل اعوفه مفتوح اخاف عليه لا يتلف .....

انطيت خبر لـ امي ب تغير الاوقات وطلعت ...

اخذت فورتات وصلتني قريب عليها

جانت كُلش حلوه وديكورها حديث يجنن محد جان موجود بيها غيري اني والمحاسب ..

للظهر تعبت هالفرع هو الاقدم وعليه زخم اكثر من الجنت اداوم بيها بقيت وحدي على وكفه وحده ....

سألت المحاسب معقوله وحدي ماكو احد ثاني بلغني اكو بس ما يعرف ليش ما داوم اليوم ....

مر اسبوع كامل وحدي ماكو دكتور ثاني وياي بهالفتره لاحظت دكتور ازاد هواي دايجي للصيدليه واسلوبه كُلش متغير وياي قبل جان دائماً عصبي واشوفه واحد مغرور ...
اما هسه هدوئه رزانته ثگله اهتمامه ب ادق التفاصيل نظراته التحلاگني بـ كُل رزانه ...

بدأ الموضوع يوترني رغم هو محترم وياي لحد هالحظه بس التوتر يسيطر عليه اول ما يدخل للصيدليه ....

اليوم لاول مره جنت لابسه فستان تسعين وردانه للعكس بڤ والصدر مالته بي ياخه مطرزه ...
شعري فاتحته على طوله ....
من دخلت للصيدليه لبست لابكوت فوك الفستنان صارت البسه كُلش حلوه وملفته ....

دا امشي العالم ب السره وياي دكتور ثاني هم وما نلحك ...
الدكتور ازاد هم جان موجود

اثناء ما دا احجي ويه مريضه اكو شباب وراها يحجون بينهم بس صوتهم كُلش واضح....

يكُله شوفها جنها باربي ..
صدك لو كالوا الصيدلانيات كُلهن صاكات باع رشاقتها خوما مثل نسوانه ...

ما احس الا الدكتور ازاد وكف بصفي وهمس قريب على اذني بصوت ناصي ..

_سدي دگم الابكوت ولمي شعرج ..

سويت نفسي ما سمعته ورجعت انطيهم العلاج ...

فزيت على صوته وكلامه بنبره حاده ..

_دكتوره لالي ممكن تتفضلين وياي برا ...

احتراماً اله طلعت وراه ...

امشي وانزع الابكوت شمرته وجمعت شعري ...

لكيته كاعد بالسياره فاتح الشباك يدخن ...

فتحت الباب وصعدت بالصدر ..

دكتور رجاءً ما مسموح الك تحجي وياي بهالاسلوب احتراماً الك طلعت وراك واتمنى ما يتكرر هالشي احنا فقط زملاء مهنه لا اكثر ولا اقل ...

شمر الجگاره من الشباك والتفت الي عيني صارت بعينه ...

بعدت نظري عنه ومديت ايدي حتى افتح الباب
قفل السياره من يمه ...

التفتت اله ...
باوع عليه وقبل لا احجي حجه كلماته والهدوء ساد المكان ....

_ لالي اني .........

_________________

تاره ...

لـم يشاء قدرنا ان نجتمع كمـا رسمنا في احلامنـا
لـم يكن قدرنا واحد فـ انت لغيري وانـا لنفسي
ولكـن سنبقى كـ القمـر والشمس لا يلتقيان
انـا انير لـك يومك وانت تنير لـي عتمتي
امـا الآن انت في طريق وانـا في طريق آخـر

ربمـا سيكون لنا لقاء آخر ولكن في حياه اخرى ....

صدمه ما تنوصف
كميه الحزن الداعيشه بحياتي
من جهه اني قويه وما يكسرني رجال
من جهه ما اگدر اتحمل كميه الوجع بداخلي ...

اتصفح بالصور انهاريت دموعي صارت تحرك خدي
عيوني غوشن من گد ما بجيت
لا عقلي ولا كبريائي يسمح اسوي شي غير البجي

كُل رسائل التجاوز والطعن
طمعانه بفلوسه
شفتي خوش فريسه حتى تستغلينه بعد ما خلصت فلوسج
هجامه بيوت
تاخذين الرجال من مرته
ما تگدرين تتحملين تبقين بدون رجال

قريتهن كُلهن وما أثرن بيه
اصفح بالصور وحده وحده
أكبر الصوره احاول أكذب نفسي اقنع عقلي الداشوفه مفبرك ....

طلحه ويه عروسته بفستانها الابيض ..
وجود عساف والفرحه غامره وجهه واضحه سعادته بزفاف والداه
ألبوم كامل وصلني لعرسهم ...

بنهايـه الصوره تاريخ الزفاف ..
(2013 )

شويه وصلني مقطع بعده دايحمل ...
طلحه ماسكها من خصرها ويراقصها بـ القاعه تحت انظار الحضور ..
عرس فخم
وجود الكُل واضحه عليهم الفرحه وعساف من ضمنهم ...

كُل الصور وحتى المقطع وجه العروس مغوش خافين شكلها بس فستانها ظاهر ما شفت وجهه نهائياً .....

ما سألت منو ولا اتصلت على هالرقم حتى اعرفهم لان أساساً أنطوني حضر ...

غلقت التليفون وشمرته بعيد عني
خلص تعايشت ويه الوجع لان صار مؤلم أكثر من اللازم ....

دخلت توضيت وصليت شربت علاجي مثل كل مره احاول اتهرب من التفكير بـ النوم ...

همه من البدايه مو الي ولا راح يكونون الي ليش دابجي ....

للعصر مليت من الكعده اجه على بالي اروح ازور الشيخ عبد القادر الكيلاني (رضي الله عنه) ...

دزيت رساله لـ لالي حتى تروح وياي ...
بين ما انتظر ردها ...
دخلت للغرفه ...

فتحت الخزانه حتى اطلع ملابس اغيرهن صار گدامي الخزنه فتحتها وسحبت شدات الفلوس الباقيه ....

كعدت على السرير احسب بيهن فلوس المركز مبلغهن كُلش ضخم ...
باقي بس 150 مليون ومادري اذا راح يكفن علاجي كُلش غالي ما عدا مصرفي و احتياجاتي صار سنه كامله او أكثر اسحب من فلوس المركز ماعندي شغل ولا راتب الوظيفه صار سنين من تركتها بسبب دوامي بالمركز ....

من رحت لسليمانيه طلحه بوقتها ضايف مبلغ زياده فوك المبلغ الأصلي مالتي ....
قررت انطيهن اله شوكت ما اشوفه ما اريد ازوج ويبقى احد يطلبني خاصه اذا جان طلحه لان همه بدون كُلشي دايتهموني بـ الطمع شلون لو عرفوا بالمبلغ الضايفه ....

طلعت 20 مليون غلفتهن بكيس أسود شوكت ما اشوفه انطيهن اله او انطيهن للحمايه ...

تركت التفكير رجعتهن لمكانهن ....
غيرت ملابسي لـ بنطلون وقميص مستورات ..
مجرد رسمت حواجبي ولبست الباروكه مستحيل احد يقتنع هاي باروكه مو شعري الطبيعي...
صح غاليه وسعرها مبالغ بي بس فادتني هواي بـ فتره مرضي .....

فتحت التليفون لكيتها راده ...
تنتظرني وياها امها هم ..

دا اقفل بـ باب الشقه صارت شقتهم گدامي دكيت الباب ....
مجرد سلمت عليه وبلغته راح اطلع ما ايصير اطلع بدون علمه انطاني الموافقه وعرض عليه يوصلنا بسيارته بس رفضت ....

طلعت السياره من الگراج طول مدا اسوق عقلي يم علاقتنا ولا كانوا مخطوبين ....
واضح جداً انزعاجه مني بسبب برودي وقله كلامي وياه ....

مريت بطريقي اخذتهن وياي عمتي گعدت بصفي بالصدر ولـ لالي ورا ....

شويه وعمتي حجت

_تاره امج مو زينه مريضه

مركزه أسوق ولا التفتت الها
شنو أسوي الها

_ما اسألين عنها ترا حالها حال الميته

لا

قبل لا ننزل لالي طلعت كيس اسود بي بشت خليجي وشال واحد الها والي لبسناهن ودخلنا للتفتيش ....
عمتي أساساً من تطلع لبسها كُله بشت خليجي ....

المكان هادئ طلعت امشي گدامهن وحدي ...
صوت آذان المغرب ملئ المكان ...
الناس تمشي حواليه بيهم الـ يزور وبيهم الـ يتوضى حتى يتهيئ للصلاه ....

فصلت عن كُل الحواليه ...
دخلت زرت بكل اريحيه وهدوء
صوت تسبيح واستغفار ودعاء النساء يقشعر البدن ...

ورا ما زرت وصليت عمتي ولالي بقن بمكانهن كاعدات ايصلن ...

كعدت بعيد عن الهوسه وبداخلي مشاعر متناقضه بين الفرحه والخوف والخشوع والحياء من كُل السويته بحياتي ...

فزيت على صوت مراه كبيره لابسه شيله بيضه وجبه رصاصي وجهه بـ الابيض يضوي كاعده بصفي تقرأ قرآن ....

_ انتي مريضه مو صح

ابتسمت الها
أي

_ شنو

جان كانسر بس حالياً بـ مرحله الشفاء الحمد لله ..

_ ابني هم صار بي واتشافى قبل سنوات بشبابه وهسه مزوج وعنده أطفال ...

التفتت الي ..

تدرين كُل ما تحسين بـ وجع الله يغفر الج ذنب من ذنوبج كُل ما اصبرين كُل ما ازيد حسناتج ....
حتى من شخص يسخن ويبقى كم يوم مريض ربج راح يخفف من ذنوبه بسبب صبره ...
فـ شلون لو جان المرض كانسر ...
المرض كفاره للسيئات ....

قال رسول الله( صلى الله عليه وسلم)
((مَا يُصيبُ المُسْلِمَ مِنْ نَصَبٍ، وَلاَ وَصَبٍ، وَلاَ هَمٍّ، وَلاَ حَزَنٍ، وَلاَ أذَىً، وَلاَ غَمٍّ، حَتَّى الشَّوكَةُ يُشَاكُهَا إلاَّ كَفَّرَ اللهُ بِهَا مِنْ خَطَاياهُ )) ....

الـ يبتلي بهالمرض ويصبر ويحمد الله على حاله وبعدها أذا توفى بي فـ اله أجر الشهاده ...

تقربت عمتي ولـ لالي كعدن مقابيلنه ...

ياريت يا خاله ربي يخفف عني خطأت هواي بحياتي ومن أعلنت التوبه ورجوعي لـ الله بعدها بـ فتره قليله انصابيت بالمرض ....
جنت كُلش اتمنى اعرف السبب ..
حايره ضايعه ودائماً سؤال برأسي ليش من رجعت التجأت لـ ربي هيج صار بيه و تمرضت ما عدا المشاكل الاخرى ...
وكانوا كلامج رساله من ربي بالوقت الجنت بي ضايعه جداً اشكرج ....

صارت عيني بعين لالي تمسح بدموعها ..
عمتي تحاول تخفي تأثرها ودموعها عنه ...

عدلت الشال وكمت وكفت غادرت المكان ....
احس الدمعه بعيني ما اگدر ابقى كاعده وياهن أكثر..

نظراتي تجول لـ ارجاء المكان قمه بالجمال و الطمأنينه زوار من كُل مكان خاصه الـ باكستانيين والهنود كُلش هواي ....

كُل سنه بـ مولد النبي محمد (ص)
تكون بداخله احتفاليه تحضرها اعداد ضخمه وحتى من الدول يحضرون .....

_ شبيج شو ضايجه

ما بيه شي

_لا ترا وضعج مو شي من اول ماشفت بس ما ردت احجي گدام أمي .....

فتحت التليفون وطلعت المحادثه
تگلب بالصور فاتحه عيونها ..

_منو هاي شو ما مبين وجهه

مادري

_ أخاف من رحتي لخطوبه عهد احد شافج

ما انتبهت لـ أحد نص الحفله ودخلت لغرفه عهد ما طلعت منها فـ ما ادري اذا اكو وحده بالحفله شافتني

_ هو اني من أمي عرفت بي مزوج بس هم ما تعرف غير مزوج محاميه وياه ..

أي عادي خل يزوج شعليه بي ما يهمني
بس ليش يدزون صوره ليش يراسلوني ....

_ ترا دخت انتي من بقيتي شهر كامل بـ بيته مو گلتي وحدج

اي ماكو غير الخدامه وياي
ما جان يجي للبيت نهائياً وحتى أكل يأكل برا ماطول اني يمهم عود بالليل يدخل لغرفته يقفل بابها ويطلع الصبح قبل لا اكعد ....
حتى حجي ما يحجي وياي كانوا عايشه وحدي بالبيت ....

بس الطابق الثاني بي هواي غرف وكُلهن مقفولات حسب كلام الخدامه لان تگول نظيفات ميحتاج انظفهن
بس ترا اني ما صعدت ابدد من خلال كلامها عرفت ما يصير افتر بالبيت زحمه ....

_ لعد شلون نوب لا يروحون يتهمونج بكلام محلو گدام خطيبج اليكره كُلشي يسوي وخوفج لا ياخذن رقمه ويشوهن سمعتج ....

مستحيل اسأل عهد او طلحه عن زواجه والصور لان هيج راح امبين مهتمه وادور اخباره وبنفس الوقت أخاف اصير الهم مشكله بسببي ....

اجت عمتي سكتنا ونهينه الحديث ....

بعد ما رجعتهن لبيتهن دخلت للسوبر ماركت اخذت الاحتاجهن وطلعت ....

دانظف بـ الصاله صوت التليفون يرن ...

عهد تتصل ..

من بعد السلام والسؤال عن احوالها ..

_هسه حايره شنو اناديج زيتونه لو تاره

ضحكت بكيفج ..

_تاره اطلب منج طلب

ادللي شنو

_ باجر بـ الليل اصدقاء خطيبي مسوين حفله وحاجزين مطعم بمناسبه الخطوبه
انتي مو جنتي ماكيره فـ اريد تجهزيني بالبيت ما اريد اروح للمركز المناسبه بسيطه ....

سكتت وانحرجت لا اگدر ارفض لان همه هواي ساعدوني وهاي اول مره تطلب مني
ولا اگدر اروح ....

_ تاره ادري راح احرجج بس اني كُلش سيئه بالمكياج

ماشي ادللي باجر اجي ساعه وحده بس واروح

غلقته منها والحيره سيطرت عليه ...

ثاني يوم العصر دزيت رساله استأذن منه او بـ الاحرى انطي خبر ...
سمح الي ...
وانطاني خبر بسفره لمده يومين علمود بنته وبس يرجع مباشره يتم عقد المحكمه وأيضاً العرس ....

مشاعري مضاربه بين الخوف والحيره
بعد يومين راح اكون على ذمه رجال رسمياً
حياه ثانيه ما متعوده عليها
لشوكت ابقى بهالبرود والنفور من كُل الرجال
ليش دايسافر بين فتره وفتره وليش مدا اهتم ولا اسأله ليش لهدرجه علاقتنه بارده البرود دايصير من الطرفين .....

اول ما دخلت سلمت على الحجيه وبعدها دخلت لغرفتها حتى تعوفنا نشتغل براحتنا
عهد اخذتني لغرفتها محضره كُلشي مباشره بديت ...

دا اسوي بحواجبها

_ تاره تدرين لو عارفينج بغير ظروف وبغير لقاء جان صارت رده فعلنا مثل عساف وأكثر
من بقيتي يمنه اشهر من خلال كلامج وطريقه تعاملج ويانا ....
عرفنه حقيقتج وكميه اختلافج عن الكلام الـ انزرع بعقلنا من سنين واحنا نسمع مرت طلحه اطلكت وشمرت ابنها لان ما تتحمل عيشه العيال ماعدا اليحاجيها اضربه سكين وووووو كومه كلام ما ينحجي ......

اني وامي ابد ما تخيلنه انتي طليقته لطلحه نهائياً
لان بـ جنسيه عساف مكتوب اسم الام تاره وانتي جنتي گايله النا اسمج زيتونه ...

وهم عساف مواليده نهايـه الـ 1995
وانتي شگلج مبين صغيره مو مال عندج ولد شاب وعلى ابواب تخرج ....

رده فعلنا من بلغنا طلحه بحقيقتج جانت صدمه ...

ما رديت بس استمع الها

_ البارحه جنت دا اريد اشرب مي بالليل وشفت طلحه بالحديقه كاعد وصافن على صورتج

خزرتها
شنو مناسبه هالكلام

_ كلنا نعرف حتى أمي واصلاً امي تتمنى ترجعين توافقين ...
تاره ترا طلحه تعبان كُلش خاصه هالفتره مشاكل طول الوقت ويه عساف راح ايصير اشهر طلحه ما يقبل يحجي ويه عساف
وعساف معاند مايقبل يراضي ابوه
صايرين نار اثنينهم ما ينجمعون بمكان بس ينجمعون يتعاركون ...
وهالمره سفره عساف بدون رجعه .....

بسببي مو

_من ناحيه الدايسوي عساف ورده فعله حقه ومو سهل الموضوع ومن ناحيه ثانيه خطأ تصرفاته ...

كامت وكفت محاوله تغير الموضوع ...

طلعت قاط رسمي كُلش مرتب ..

_شنو رأيج

حلو البسي خل اشوفه عليج ....

فتحت جنطتي
عهد قبل لا تغيرين ملابسج
هاي الفلوس انطيهن الطلحه شوكت ما اشوفينه ....

_ماشي

سلمت عليهم والحجيه جلبت بيه على العشا
ماقبلت طلعت بسرعه اخاف لا اصادف طلحه مالي خلك ....

اكو سياره تكسي من طلعت منهم لحد هسه تمشي وراي كُل ظني صدفه خففت السرعه حتى اشوفهم يتقدمون عليه لو يخففون السرعه حتى يبقون ملاحكيني ....

اباوع عليهم بـ المرايا خففوا السرعه
دست بكل سرعتي اريد بس اوصل للمجمع ....
وبقوا ملاحكيني ....

دخلت السياره بالكراج ...

وكفت التكسي وراي حظرت نفسي خوفاً لا اتعرض لشي ....

نزلت منها مراه لابسه بشت خليجي وذابه الشال على راسها ما لافته ...

ما اذكر شايفته ..

تقدمت بـ اتجاهي

درت ظهري ومشيت بكل سرعتي بـ اتجاه المجمع ..

صارت تناديني بصوت عالي ....

_تاره بس اوكفي احجي وياج واروح

انداريت

نعم منو

_اني زوجه طلحه

فتحت عيوني
ويعني شكو جايتني اصور ما عرفج ولا تعرفيني

_لا انتي ما تعرفيني بس اني اعرفج

المطلوب

_تعوفين طلحه كافي مو خربتي الرجال عليه هدمتي بيتي جان ما ينام الا بحضني هسه من وراج حتى وجهه مدا اشوفه ....

احجي عدل بدون تمسلت شعليه بيكم
او اگلج على شنو داسمعج منو انتي حتى انطيج من وقتي

درت ظهري صاحت بصوت عالي ...

_مبين ما يفيد الحجي بهدوء وياج متستحين على نفسج يوميه مزوجه واحد متعه شفتي ضابط شفتي واحد عنده فلوس رحتي ركضتي الا تحصلين براسه فلوس وتعوفينهم نوب هسه رجعتي على طلحه لان الضباط التعرفيهم خلصوا .....
مراه عدها كل هالاملاك بيت بـ ارقى مجمع سياره آخر موديل غير كُلهن من فلوس المتعه ...

التفتت الها مبتسمه

على الأقل ام المتعه عدها كرامه وعزه نفس مو مثلج جايه تفترين ورايه علمود رجال ما معبرج .....

تقربت عليها اضحك ..

روحي منه يلا قبل لا اخابر طلحه عليج اكيد ما يدري بيج جايه ....

_رايحه اني بس والله ما اسكت الج الا افضحج فضيحه .....

صعدت بالتكسي وطلعت ...

رجعت طلعت السياره من الگراج
اسوق بكُل روح مطفيه ما اريد ارجع للشقه مختنكه ..
نوب صاروا ينادوني ام المتعه هو اني شوكت متقبله وجود رجال بحياتي حتى اصير ام متعه ......

تليفوني يتصل طلحه ...
كُل ظني عرف بزوجته اجتي الي
ما جنت متخيله الراح اسمعه .....

_ تاره وين انتي

ليش

_ بدون ليش

بسيارتي

_وكفي السياره على جهه

وكفتها من فضولي اريد اعرف شكو

وكفت شكو

_ تاره امج توفت وما جان عندي مجال اتصل وابلغج ...

غمضت عيوني من الصدمه مانعه دموعي ينزلن عليها ....

_بيج شي انتي بخير

ماشي

_ شنو ماشي

خلص ماتت بعد اجه يومها

_ تحجين كُل هالكلام بسبيل ما تطلع منج كلمه الله يرحمها ..

خليت رأسي على الستيرن بتعب ...

لان ما تستاهل اترحم الها ...

_ زوجها هو اتصل بيه وبلغني بوفاتها
طلب مني تبريها وتبرينه الذمه لان هو جان مانعها تاخذج او اشوفج او تحجي وياج وهسه متندم يگول أخاف لا اموت ويبقى ذنبها برگبتي ...

طلحه اذا خلصت كلام حتى اسده وراي طريق اريد ارجع للبيت ...

_تاره ليش تتهربين ادري حقج بس خطيه زوجها اتصل بيه يبجي ويتوسل راح ادزلج التسجيل الصوتي للمكالمه اسمعي ما عدا وسط هواي عالم حتى بس يحجي وياي ...

اثناء مدايحجي وصلني التسجيل على الواتس اب مفعله على الرصيد ..

سمعته كُله بكل انصات ....

طلحه

_نعم

تندل وين دفنوها

_ليش

انطيني اسم المقبره والمكان

_ لا تاره ما انطيج
هو زوجها انطاني مكان قبرها حتى تبريها الذمه بس مستحيل انطيج ...

غمضت عيوني بقوه مصبره روحي
بس ما گدرت الشهكه طلعت مني غصب ...

طلحه اريد اروح الها انطيني مكانها

صار يستغفر بصوت ناصي ..

_ بـغداد مقبره ***

ماشي شكراً

_وين ما تروحين وحدج ساعه بـ 10 بـ الليل

مع السلامه طلحه ..

غلقته منه
امسح دموعي بكل قوتي ما اريدهن ينزلن عليها ...

حركت السياره وعيوني غوشن من البجي ...
اول ما وصلت لكيت طلحه عند المقبره واصل قبلي
نزلت واتجهت حتى ادخل للمقبره بدون ما احجي وياه ..

ناداني بعد ما أشر للحمايه يبقى بـ مكانه ...

وكفت انتظره...

_امشي نروح سوا لقبرها

هزيت رأسي..

شغل ضوا تليفونه ويمشي گدامي ..
اتبع خطواته بكُل روح بارده ..

التفت الي ..

_تاره ركزي وياي من احجي

رفعت رأسي اله

_هذا قبرها راح اوكف بعيد عنج حتى تاخذين راحتج بالكلام بس ديري بالج على روحج لا اضغطين على نفسج

هزيت رأسي ما اگدر انطق من الخنكه ..

رفع حواجبه بشك
_اكيد موو

اي

اتجهت لقبرها بعده تراب يعني صح مصار الها ايام ....

تقرب طلحه خله ضوا تليفونه قريب عليه وراح وكف بعيد كُلش مخلي ايده بجيوبه وداير ظهره عني حتى اخذ راحتي ...

كانوا كُل حياتي صارت گدامي
بقيت صافنه واتخيل شكلها وكلامها بذيج الليله وياي من جانت آخر أمل انقاذ الي بس مع الأسف طردتني ورفضتني بكل دم بارد ....

صارت الكلمات تطلع مني همس بگد ما مجروح گلبي ...

ليش هيج سويتي بيه ليش دمرتي حياتي
تمنيت والله تمنيت اعاتبج واحجي وياج واعرف سبب كرهج ورفضج الي ...
تمنيت احضنج واگلج اسوت بيه الدنيا من عفتيني
صار بيه والكل يشوفني ثقل عليهم وبس يريدون يتخلصون منها بقوا يشمرون بيه من كف لـ كف ....

اتمنيت اواجهج وانتي عايشه ليييييش رحتي وعفتي بگلبي حسره حتى بس اعرف ليش هيج سويتي
شمرتيني بهالدنيا لا أم لا أب لا أخ لا أخت ...

تمنيت اگلج شگد گلبي اذاني من شفتج انتي
واولادج ذاك اليوم وشلون يحبونج ويخافون عليج ويدافعلووووولج رغم انتي الخطأ ....

بنيه عفتيها ورحتي شلون انطاج گلبج حتى ما اسألين عليه شلون جنتي تخلين راسج على مخده وتنامين وانتي شامره قطعه منج للوحوش ينهشون بيها ..
من جنتي تهتمين بـ اولادج من لعبتي وياهم من دخلتيهم للمدرسه ومن دخلوا جامعه معقوله ما جانت اصير بين عيونج ولا تذكريني
معقووله ما اجيت على بالج بيوووم
ما گلتي بيوم گلبي اذاني اخاف بنتي تاره بيها شي مثل ما كُل الامهات اسوي .....

بسببج الكل جان يشوفني وحده رخيصه ماكو أهل وراها ماكو الكل جان يشوفني فريسه سهله ما الها قيمه ...

صرت اشهك من گلبي واحجي بصوت عالي بحرگه ...

لا عشت حياتي مثل البنات ولا شفت الراحه
كُل البنات يعيشن مدللات بجال اهلهن الا اني جانت تجي ايام النوم ما اشوفه بعيني حتى اگدر اشتغل واجيب فلوس اصرف على نفسي بيهن ...
حتى حياه زوجيه ما عشت مثل باقي البنات ....

ليشش رحتي وعفتيني محروگه حرك بوجع گلبي
صرت اكره كُل الامهات ..

ما احس الا انشاليت من الأرض

طلحه رفعني من ايدي دايكومني ..

صار يهمس بـ أذني آيات ...

حاوط كتفي بـ ايده عايفني ابجي براحتي ...

همس بـ اذني

_انروح مو احسن

هزيت رأسي اله

يمشيني محاوطني بـ ايده ويردد آيات بصوت ناصي ....

صافنه شارده هواي كلام بگلبي اريد احجي وما حجيته ....

طلعنا من المقبره فتح باب السياره كعدت بالصدر وبقى الباب مفتوح واكف مقابيلي ....

خليت ايدي على وجهي اشهك ..

رفعت رأسي
طلحه راحت وخلت حسره بگلبي لحد ما اموت ..

_اسم الله عليج

ونبي اذا اعوف سيارتي بمكان غير الگراج يضل بالي يمها هي شلون شامره بنيه سنين ولا مهتمه الها ..

من انطيتك عساف انطيته لـ ابوه مو لواحد غريب واعرف ما راح تقصر وياه وشگد تخاف الله ولان جنت أدري حياته راح تكون افضل وياك
أساساً ما جانت عندي حياه فـ شلون انطي لـ ابني حياه....
اني مو مثلها والله مو مثلها هي جان عدها بيت عدها فلوس راتب وكبيره كُلشي تگدر اسوي بس ما سوت ....

عساف حاقد عليه بگد حقدي لـ أمي..

تقرب لزم وجهي بكفوف ايده
عيني صارت بعيني نظراته محاوطتني ..

__كافي يابه كُل شهگه منج گطعت گلبي

درت وجهي عنه ونزلت من السياره

اتجهت لسيارتي الحمايه واكف يمها بعيد عنه ...

سحبني من زندي

_وين

مبعده نظري عنه ما اريد عيوني تلتقي بعيونه
ارجع بسيارتي

_بهاي حالتج
اني اوصلج وعود انطي سيارتج للحمايه يوصلها

لا ما اگدر ارجع وياك

دارني اله
ايده تمسح على ظهري بكل هدوء

_لا تبقين تلومين بروحج عساف عوفي للزمن بلكي يتغير ماكو شي اهم من صحتج

نزلت نظري للأرض ونزلت وياه دموعي

اصابعه لامست خدي يمسح دموعي

_ تاره أهدي لا ايصير بيج شي

مخلي ايده ورا ظهري قربني اله يمشيني

_يلا اصعدي بالسياره خل اوصلج

كلام زوجته صار بين عيوني
ابتعدت عنه بسرعه
تفاجأ من رده فعلي ونفوري

لا مستحيل زواجي بعد يومين بصفتك منو توصلني ..

نظرات الصدمه والخيبه جانت كفيله تخليني اتندم على حجايتي
نزل ايده خلاها بجيوبه ابتسم تك خد بـ استهزاء ..

ما انتظرت لا كلامه ولا رده فعله بسرعه صعدت بسيارتي وحركت ...

امسح دموعي واسوق بكل سرعتي ...

انفتح المصعد اريد ادخل لشقتي صفنت للحظه على المنظر الداشوفه معقوله الداشوفه حقيقه لو حلم
ياريت لو ميته بالطريق ولا شايفه هالكسره ليش مكتوب الي كُل عذاب .......

يتبع ...

____________

اخفتيت لفتره جداً طويله لان جنت مسافره وغالقه كُل البرامج ما عندي وقت الهن ...

وبالنسبه لقصه لالي من هالبارت راح تبدي بتفاصيلها