رواية الكارمــا الفصل السادس والعشرون 26 - بقلم آيــه آلـ صبري

تستاهلني بس بعديش
هسة و من غفت كل وينك بروحي ! 
هسة و من بديت اصحى !
جاي تگلي بس سوالفي تفيدك ..
چا و الفرگة ؟
چا والحلقة اللي بأيدك
♡

...................

_لالي اني معجب بيج
وراح ادز اهلي الكم باجر العصر ...

بقيت صافنه على كلامه حتى ما رمشت ...

لوح ب ايده گدام عيوني ...

_لالي وياي ...

نعم دكتور

_گولي ازاد عوفي الدكتور ...
هسه انت موافقه ادز اهلي باجر ترا حاس بيج اكو تبادل بينا ...

شنو هالثقه هاي ..

صار يضحك بصوت عالي ...

_معجب بثگلج رزانتج هدوئج بعملج وحتى كلامج صار سنتين اعرفج وبكل مره تبهريني بتشددج وحرصج على نفسج ....

باوعت عليه وگتله ..
دكتور بس انطيني مجال استوعب مو هيج فجأة...

بقى يضحك من كُل گلبه ...

_لا مو فجأة انتي من زمان بالي بس جنت منتظر الوقت المناسب ومنتظر تخرجج وحتى اتأكد ماكو احد بحياتج وما اتوقع الگه وحده انقى منج ....

احس وجهي صار احمر من التوتر خليت خصلات شعري ورا اذني اريد اي شي التهي بي ...
فجأة حجه كُلشي مدا استوعب كلامه وياي ...

_لالي ارفعي راسج وباوعي بعيوني اريد اعرف جوابج ...

رفعت رأسي صارت عيني بعينه يباوع عليه بكل تركيز وهدوء ..

ازاد ..

ابتسم من حجيت اسمه ...

شنو عرفت عني حتى تجي تخطبني بهالسرعه ..

_ميحتاج اسأل عنج ولا ادور وراج لان انتي مو غريبه عني صار سنتين وياي الاشوفه بعيني واثق بي ميحتاج اسأل احد ...
والشفته بنيه ثگيله محافظه على نفسها ...

سكتت ما حجيت شي ...

_ انتظر موافقتج بفارغ الصبر ...

انطيني مجال افكر

_كُل الوقت الج بس المهم باجر ادز اهلي ما اريد ادخل علاقه احنا مو صغار لالي ...
اريد مباشره علاقه رسميه وگدام الكل انتي تخصيني ...

مجرد هزيت رأسي اله
اي بنيه بهيج موقف اضيع كُل الكلمات من بالها ويسيطر عليها الخجل ...

خليت ايدي دافتح الباب حتى انزل

دكتور

_هاي صار كم مره اكُلج عوفي الدكتور ...

ماشي
ازاد افتح السياره حتى ارجع للبيت

_اني اوصلج ...

بس ادز رساله لـ امي لعد .....

بلغتها الدكتور راح يوصلني نفسه الوصلني قبل كم يوم ردتلي عادي انتظركم ...

نزلت من السياره واني بعدني مصدومه اسمع امي اسلم عليه ....

دخلت جوا وعقلي مشوش كُلشي صار بسرعه ...

_هذا الدكتور سالفته مو خاليه بس والله خوش رجال عين النبي عليه

ماما باجر اهله يجون يخطبوني

صفنت عليه
_اي مو اگول سالفته مو خاليه شنو بيناتكم علاقه ...

لا ونبي اصلاً تفاجأت

_هاي السوالف ما تمشي عليه بس يلا المهم ثبت نيته فعلاً رجال وراح يجي يخطب بالحلال

افتر وراها بالمطبخ واحجي ..

ياااااا ونبي ما بينا شي ابددد

اندارت عليه

_لالي ترا من وصلج ذيج المره مبين عليه نظراته مفضوحه وعيونه تلاحگج ...

اي ادري بس ماكو علاقه بينا ...

حسيتها ما اقتنعت عافتني ودخلت جوا اصلي ....

دخلت الغرفتي وسديت الباب اتصلت على تاره ...
سولفت الها كُلشي ...

_لعد ليش جنتي ضامه عليه

يااااا هاي شبيج انتي وامي ونبي ماكو شي بينا ...

_اشاقه وياج ادري بيج ماعندج هيج سوالف
المهم دزيلي صورته خل اشوف النسيب ...

جان مخلي صورته على واتس اب اخذت سكرين الها ودزيتها ...

_ماشاء الله عين نبي عليه جنتل مان

انت وامي نفس الحجايه ...

_لا شبهيني بيها الله يبعدني عنها ...

هسه شسوي حايره

_وليش حتى تحيرين اني اشوفه مناسب الج وبعد بكيفج ترا انتي مو صغيره لا تنسين انتي حتى اكبر من دفعتج  ...

احسه متكبر مغرور

_اهووو لا تحسين انتي دكتوره وهو دكتور بعد شنو متكبر روحي صلي استخاره احسن شي ....

ماشي

غلقته منها ودخلت للحمام غيرت ملابسي وتوضيت ...

فرشت السجاده وصليت الاستخاره ...

ثاني يوم لبست فستان بسيط وظفرت شعري ...

للعصر اندك الباب امي استقبلتهم امه واخته الكبيره ...

ما طلعت الهم الا امي نادتني ...

دخلت بـ ايدي صينيه الضيافه قدمته الهم ....

وكعدت مقابيلهن ...

امه مبين جايه مجبوره واخته تحاول بكُل طريقه تغطي عن الموضوع ...

بقن يسألن ويستفسرن وامي اجاوبهن ....

دخلت لغرفتي افتر متوتره ما اريد اي شي غير يعدي موضوع الخطوبه على خير بدون مشاكل ...

انفتح الباب ودخلت امي ..

_راحوا هسه ما عرفت انتي موافقه لو لا ولو مبين اكيد موافقه

اي موافقه

_لعد اخابر عمامج حتى مشيه الزلم اصير يوم الجمعه ...

فزيت بسرعه
ماكووو ما اتخااابريهم

_شنووو ماعندج اهل وراج هيج انطيج شيكولون العالم شكول لعيالج انطيكم فصليه

يممممه لااااا تخااابريهم

_هذا تقدم او غيره لو بعد الف سنه هم لازم عمامج يحضرون ماعندج احد غيرهم  ...

لاااا تخابريهم كدامي ماااا اريد اشوف اي واحد بيهم ...

_يلا عود من اطلعين اخابرهم ...

اعصابي تلفت مجرد ما ذكرت سيرتهم گدامي ..
دزيت فويس لـ تاره ...

ردتلي ...

_وليش خايفه ما اتوقع يگدرون يحجون ويدخلون السالفه صار الها سنوات ....

محد دايحس بخوفي وتوتري ما اريد غير يخلص هالاسبوع على خير ...

داومت بـ الصيدليه عادي مثل كُل يوم ....

دخل ازاد سلم وكف قريب عليه ..

_ الأحد الجاي موعد المؤتمر لا تنسين

ازاد تحضر وياي

_جان بنفسي اشوفج وانتي على المنصه بس ما اگدر  لان يصادف بيومها عندي شغل ضروري بالمركز ...

متوتره اول مره احضر مؤتمر وألقي بحث گدام الكُل ...

_ما ينخاف عليج واثق منج ...

ابتسمت اله ...

علاقتي قوت أكثر واكثر ويه ازاد صار يراسلني ويسأل عني ويسولف الي يومه وكُل شويه يعبر عن مدى اعجابه بيه من سنه او أكثر بس ضام عني ....
بس لحد هسه ماكو كلام حب بينا
لا ارادياً بديت اميل وانجذب اله ...

مشيه الزلم وعقد الشيخ اتأخر بعد اسبوعين بسبب عمي مبلغ امي عنده دوام من ينزل مجاز اصير الخطبه ...

رجعت امي خبر لـ اهل ازاد بالموافقه وموعد المشيه بعد اسبوعين ....

منتظره هالاسبوعين وكُل ما اصفن ايسيطر شعور الخوف عليه خايفه منهم ليش غيروا الموعد ....

بقيت الليل كُله متوتره شنو البس وشنو احضر وكُل شويه اتدرب عود گدامي ناس واني واكفه ...
حتى موضوع الخطوبه نسيته ...

للصبح كعدت متوتره أكثر ....
فتحت الخزانه طلعت منها قاط رسمي اسود ...
وحذاء كعب بيجي مستحيل انسى تفاصيل هاليوم لان جانت تجربه جديده بحياتي ...

شعري سشورته على طوله ...
مكياج هادئ....
بشرتي حنطيه مو كُلش بيضه مثل تاره ...
اعيوني خضر على اهل ابوي ....
كـ شبه اميل لـ اهل ابوي ابد ما اشبه امي ولا اكو ذره شبه ولا كانوا بنتها  ....

داطلع وصلتني رساله ...
فتحتها من تاره ...

_استعجلي انتظرج بالباب ...

بلغت امي ما اطلع لـ اي مكان بدون أذنها تعرف اليوم موعد المؤتمر فـ بس بلغتها بطلعتي ....
وحتى ب اتصال ازاد عدها علم لان كُلشي صار رسمي ومجرد منتظرين يوم المشيه ...

لكيتها كاعده بسيارتها تنتظرني ...

فتحت الباب صعدت بالصدر ...

ليش تعبتي نفسج

_ترا متحمسه اكثر منج
طالعه كُلش حلوه التخرج حلاج  ....

اثناء كلامها اتصل ازاد ..

_ منو النسيب

شمدريج

_ مبين من ابتسامتج

رديت عليه اجاني صوته يسأل بكُل لهفه ...
غلقته منه بعد ما طمنته مسيطره على الوضع وما متوتره ....

وصلتني للمكان بعد ما انطيتها العنوان ...
رفضت تنزل لان علاجها خلصان ولازم تروح للصيدليه هسه ...

اقدم البحث بكل قوه واريحيه بدون توتر
اريد اختم البحث ......
واجت عيني بالشخص الـ ماجنت متوقعه راح اشوفه مره ثانيه بكل حياتي ....

عيني صارت بعينه ابتسم بـ استهزاء ....

كملت البحث واسمع مدح الكل واطرأهم على طريقه تقديمي
نزلت من المنصه اخذت جنطتي وتليفوني حاولت اطلع بدون ما التقي بي كلبي يدك بسرعه...

اشوف خطوات شخص تقدم بـ اتجاهي

_شعندج هنا

رفعت راسي وحجيت بكل هدوء

صيدلانيه مدعوه للمؤتمر........

جان دا يخلي السلاح بحزامه مجرد ما سمع كلمتي رفع حاجبه والابتسامه انرسمت على شفايفه

_حلووو
وين داومين اي جامعه

ميخصك

_ترا بدقيقه وحده اكدر اعرف وين

تصرفاتك هاي والثقه زايده عندك يجوز غيري تعجبهم بس اني لاااا

ضحك ضحكه طويله

_انتي يا نوع منهن يا ام الكعب الصوته رنان

خزرته بنظره حاده مراح تعرف

طلعت بكل سرعتي لدرجه الكعب اذاني وماهتميت الرجفه سرت بكل جسمي معقوله شرجعه ........

لكيت تاره واكفه تنتظرني كعدت وسديت الباب حيل وراي ...

امشي تاااره بسرعه ...

_شكوو شبيج

امشي اطلعي من المكان بسرررعه
ما حجت شي صارت اسوق بكُل سرعتها ...

حطيت ايدي على وجهي اشهك من كُل گلبي ...

وكفت السياره ...

_احجي ترااا وترتيني قبل شويه دخلتي تضحكين ...

شفته تااااره ونبي هووو ونبي .....

______________

تاره ..

لطـالما رأيتني امرأه قويـه ....
ولكـن في العزلـه عندمـا أنظر لنفسي في المرآة ...
تظهر امرأه باهتـه ..
يغـادرها كُل شي جميل ..
في عيني حزن سرمـدي وفي قلبي ظلام أبـدي ..
فـ انـا امرأه قتلت كُل مشاعر الحب في فـؤادي ...

انفتح المصعد صار گدامي المنظر الجنت خايفه اشوفه وخايفه لا احساسي وشكي يكون صح ....

بنات اثنين توأم يطلع اعمارهن 15 او اقل واكفات وياه وراه مراه يشبهنها كُلش
منطيني ظهرهم ما شافوني ....
على الأرض حقائب سفر تعلن دخولهم لـ بيت والدهم ولربما استقرارهم داخله ..

نظري يتجول على المهزله والخداع التعرضت اله ....
يا ترى شكي طول هالفتره صح ..

تقربت ناحيتهم حتى افتح باب شقتي
ناديت بصوت عالي ..

السلام عليكم ..

التفت الي فاتح عيونه متفاجأ وتوتر المراه الوياه جداً واضح ....

فتحت باب الشقه ودخلت بدون ما انتظر اي رد منهم الشافته عيني أكبر دليل ..
الباب صار ينطرق بـ شكل متواصل ....

كعدت ورا الباب ساده أذني ما اريد اسمع اي تبرير منهم كُل الحواليه خداع وكذب ...

هسه راجعه من المقبره وهالمنظر ايصير گدامي ...

طول هالسنوات رافضه فكره الزواج بسبب اغلب اليتقدمون مزوجين وعدهم أسره ...
او يريدون زواج سري بدون ما تدري زوجته مقابل مبالغ وهدايه فخمه وهالشي مستحيل اسوي ....
طول هالسنوات منغلقه عن نفسي ومبتعده عن كُل شي اسمه ارتباط ورجال ...

رافضه فكره اكون زوجه ثانيه واشارك وحده وابقى طول حياتي بقلق وشك وتوتر وغيره علمود رجال
ما الي خلك اتحمل مهزله الضراير ومشاكلهن بس علمود رجال وكانوا هو محور الكون .....

وبالوقت الگدرت اتقبل اكون زوجه لـ رجل
انطعنت بـ الجنت خايفه منه طول حياتي ....

صوت تليفوني يرن غلقته ما اريد اسمع اي مبرر ..
الباب طرقاته مستمره ..

أخذت العلاج ورميت نفسي على السرير مثل كُل مره مهربي الوحيد من الوجع هو النوم .....

كعدت من الصبح غيرت ملابسي فرشت اسناني ..
عطرت روحي ..
رطبت جسمي و وجهي ...
صليت الفجر وقريت كم ورقه من القرآن...
أخذت علاجي الملتزمه بي ..
لبست الباروكه ..
بدأ يطلع الي شعر كُلش خفيف يراد فتره طويله يلا يكون شويه احسن

سويت كُل هالاشياء بكل برود ولا كانوا البارحه قامت القيامه عندي من الأحداث والمشاكل ....

دخلت للبالكونه بـ ايدي فنجان القهوه
انتظر الشمس تطلع بـ فارغ الصبر ...

اتجهت لـ شقتهم بعد ما طلعت الشمس ...
طرقت الباب ..
فتحته الحجيه ..

صارت ترحب بيه ..
دخلت كعدت بـ الصاله البيت هدوء كُلهم نايمين ...

حجيه بيوم التقدمتوا الخطوبتي بلغتوني منفصل من سنوات وعلى هذا الاساس وافقت ..
شنو البارحه المنظر الشفته ...
ولو ما يحتاج اله تفسير ..

_ اي بلغوني البارحه
الشفتي فهمتي خطأ مو مثل ما مفكره ...
بلغناج بنته كُلش مريضه وتحتاج عمليه وعنايه ومصاريف خاصه ...
فـ راح جابهن ولان كُل اقاربها عايشين وياهم بالخارج انجبرت تبقى بيتنا لحد ما تخلص عمليه بنتها وتاخذها وترجع تسافر ...

حجيه شنو الكاعده وياج طفله ترا كلامج مو مقنع وين اكو وحده تبقى بيت طلقيها خاصه انتم من نوع متشددين ....

_هسه هو اخذ بنته وراح للمستشفى حاول يحجي وياج بس انتي ما فتحتي لا الباب ولا الاتصال
انتظري يجي وافتهمي السالفه منه بكل هدوء لا تنهين كُلشي بهالسرعه ...

وينها طليقته اريد احجي وياها وحدنا ...

_ليش شنو ما اصدكين بكلامنا

لا حشاج بس عندي كم كلمه وياها على انفراد ...

شويه ودخلت كعدت مقابيلي بعد ما تركتنا الحجيه وحدنا ....

مرحبا اكيد تعرفيني ..

_ اي والشفتي البارحه سوء فهم ..

شوفي عزيزتي احنا هسه كاعدات وحدنا ماكو احد دا احجي وياج امراه لـ امراه ..
رجاءً اذا اكو بينكم رجعه ولو لمجرد تفكير انطيني خبر هسه ما اريد اتورط اتمنى تكونين صادقه وياي ...
اذا اكو اي محاوله لرجعتكم حتى ابتعد بدون مشاكل وماطول بعدني بدايه الطريق ومجرد خطوبه ....

_لا ابد ماكو هيج شي

بس اني احس اكو حلقه مفقوده ومدا تكونيين صادقه وياي

_لا فعلاً ماكو شي بينا ولا اكو رجعه اجيت بس علمود بناتي ...
وما اريد تخرب خطوبتكم لان هو مبين حابج ومعجب بيج لدرجه كل حديثه انتي ....

زاد الشك عندي حسيتها كذبت لان أساساً حديثي وياه قليل وعلاقتنا بارده شلون يحجي عني طول الوقت ...

طلعت منهم والحيره محاوطه تفكيري المتناقض عقلي يگُلي تأكدي وگلبي يگُلي عوفي كُلشي وانهي الموضوع ....

صار العصر واني بعدني على تفكيري المتشتت ...

صوت الباب ينطرق ..
باوعت بالعين السحريه نفس الشخص الاجه ويه امي قبل وفاتها ...

فتحت الباب ..
بعد ما راودني الفضول لـ سبب جيته ...

نعم تفضل

_تاره ممكن ادخل نحجي موضوع مهم

لا ما ادخل غربه

_بس اني اخوج مو غريب

لا ما عندي أخوان
المهم شنو المطلوب ...

_احجي اني واكف بالباب شلون

مو مشكلتي استعجل

_انتي ليش هيج اسلوبج صح اشبهين امي هواي بالشكل بس تختلفين اهوواي عنها ...

طلعت يمه وسديت باب الشقه ...
مشيت گدامه بدون ما ارد لكلامه
فتحت المصعد ..

_وين

نحجي بالحديقه اريد اشوف شنو هالموضوع المهم ..

نزلت لحديقه المجمع لكيت واحد يشبهه واكف ينتظره ...

_اخونا الجبير

اخوك مو اخوي

وكف مقابيلي احسه متردد يحجي بس الثاني بقى واكف قريب علينا مجتف ايده بدون ما يحجي ....

_امي قبل وفاتها وصتنه شي واحد بس وبقت تترجانه انفذه الها
تاره امي وفاتها كسره وغصه النا أكثر بشر بالدنيا نحبه وقريب علينا امي وفاتها هدمتنا
طلبت مني شي واحد على فراش الموت وصعبه عليه الطلبته ما يتحقق الها ....
انتي بـ ايدج راح تفرحينا وتخلينه شويه ننسى من الحزن ....
ابريها الذمه وسامحيها ماندري شنو سالفتكم الحقيقيه التحجي انتي شكل وامي النعرفها شكل ثاني ماكو مثل حنيتها وگلبها ....

توترت بـ مجرد سيرتها انذكرت ...
وزادت خنكه الضغط عليه ..

لا مستحيل وبعد لا تجي ولا تعب نفسك علمود هالموضوع لان مستحيل اقبل .....

_رجاءً تاره انتي اختنا الكبيره ما نريد شي منج تبريها الذمه هاي وصيتها وشتريدين انطيج ...

خزرته

حدك وياي ممنوع تحجي هيج شنو عايزه عليكم حتى تكُلي شنو تريدين ننطيج

درت ظهري ...

جان الثاني يكُله ..

يمعود دعوفها خبصتوني اختك كبيره واختك طلعت وحده سز بـ امها مامعترفه ....
دشوفها وين كاعده بـ اي مجمع منين عدها كُل هالفلوس .....

كلامه سمعته ترس أذني...

اتجهت للمجمع بدون ما ارد عليه
كُل ظني اخواني جايين يسألون عليه حتى كلمه شلونج ما گالوا ....

دائماً يگولون الدم بعمره ما ايصير مي
بس امبين ذولي دمهم من الاساس مي ....
ما ينشد بيهم الظهر ..

دخلت للشقه ملل ماكو شي اسوي قبل جنت اضيع وقتي بالمركز طول اليوم وارجع للبيت على گد النومه .. 

من المستحيل بعد ارجع افتح مركز لا صحتي تساعدني اتحمل مسؤوليه الموظفين ودوختهم  وهم الفلوس كُلهن راحن للعلاج ....

صار الليل وهو ما اجه حتى ننهي هالموضوع
فتحت التليفون اتصلت عليه گال يبات ويه بنته بالمستشفى ...
شبسرعه سافر ورجع خلال يومين جايبهن وياه...
غريب امره ...
لازم انهي كُلشي قبل لا اتورط ....

الحلقه بـ ايدي افر بيها ..
شنو نهايه موضوعنا ...
المفروض باجر موعد عقد المحكمه والسيد ....

دخلت للمطبخ فارغ صار فتره ما مسوگه.....
غيرت ملابسي لـ بنطلون وقميص مستورات والباروكه وياي وين ما اروح.....

نزلت طلعت السياره من الگراج ....
اتجهت خارج المجمع سوبر ماركت صار سنين اسوگ منهم متعوده عليهم ما احب اشتري من غيرهم ...

دخلت اتسوگ حسيت أحد وراي ...

انداريت بسرعه صار طلحه بوجهي ..

فزيت ..
بسم الله شنو مراقبني ...

ضحك ..

_اي مع الأسف مخلي ناس تراقبج ومنتظرج اطلعين ....

ليش

_تاره امشي وياي اصعدي بـ السياره اكو أمور لازم تنحل قبل لا يصبح الصبح واذا ما صعدتي

اي شنو أسوي اذا ما صعدت

_اشيلج گدام العالم واصعدج بالسياره ..

درت ظهري اكمل مسواگ ..
متجاهله كلامه ...

تقرب وكف بصفي لزمني من زندي
التفتت اله فاتحه عيوني ...

احجي وكازه على أسناني ما أريد احد ينتبه ..
طلحه شكووو

_يگولون باجر عقد المحكمه ...

سحب الأكياس من ايدي راح دفع الحساب ...

طلعت قبله امشي ...

سايق طلحه واكف يريد مني مفاتيح سيارتي حتى يخلي الاغراض انطيتها اله ...

فتحت باب الصدر وصعدت بـ سياره طلحه ....
انتظره يجي ...

عيني على الشارع صافنه
والأفكار مداهمه عقلي شنو نهايتي ..
شوكت تنتهي هالاحداث من حياتي ..
ليش جنت مرتاحه بشخصيه زيتونه وليش بشخصيه تاره عانيت ....

صعد بالسياره ...
حركها ..

طلحه ونبي ما الي خلك گول شعندك اريد انزل ارجع للبيت ورأي علاج موعده ...

قفل السياره من يمه

شنووو هالتصرررف داگولك اريد ارجع للبيت والله تعبتوني يا اخي ما اريد أحد بحياتي من يوم الرجعت اعيش بـ اسم تاره لليوم والمشاكل لاحكتني ...

مركز بالطريق ولا مهتم لـ كلامي ....

طلحه مووو دا احجييي ...

وكف السياره باب بيتا ...
دخلها للحديقه ...

فتح السياره بعد ما أشر للحمايه يغلقون الأبواب الخارجيه ....

نزلت وراه احجي واحجي وهو ما مهتم ...

دخل للصاله نزع سترته خلاها على التخم وكعد يصفح بالتليفون  ..

وكفت فوك رأسه احجي ..

رجعني لبيتي بدون مشاكل انت گلت تحجي وياي مو تجيبني لبيتك احنا مو مراهقين ضالين بس ننجمع نتعارك تراا مليت ...

رفع رأسه

_ماكو رجعه لحد ما تنتهي سالفه الزواج المادري منين طلعتيلي بيها ...

استغفررررر الله
بصفتتتتتك منووو تتحكم بيه
طلحه من اسمع كلامك وامشي وياك من باب الاحترام واثقه منك مستحيل أسوي شي يأذيني ...
بس مو تگوم تتحكم بيه مستحيل اقبل بهالشي ماكو اي رابط بينا يجبرني انفذ طلباتك ....

وكف گدامي حاوط خصري بـ ايده مقربني عليه

_بصفتي منو تاره هالمره انتي مو مريضه حتى تگولين يستعطفني ..
للمره الثانيه اطلبج للزواج كافي انضيع عمرنا بعنادج ...

ضيعنا هواي من عمرنا  سنين طويله يا تاره سنين لا سنه ولا سنتين ....

ما يهمني شنو صار وشنو سويتي اليهمني نلحگ على الباقي من عمرنا ...

دنگ رأسه حتى يگدر يوصل لـ مستواي ...
لحيته المختلطه بـ الابيض والاسود صارت تلامس خدي ...
حراره انفاسـه الغير منتظمه اخترقت عنقيـي ...

رفع رأسه نظراته متسأله ...

ابستمت بـ استهزاء

من يوم المحيته محيتكم وياه من حياتي ...

شدد حضنته ..

_محيتي من جسدج بس محفور بگلبج ...
اعرف بـ تاره ما تهون عليها العشره ..

رفعت حاجبي نظراتي ثابته الـه ..
لا هانـت ..

الابتسامه بدأت تتلاشى من ملامحه تدريجياً الى ان اختفت بشكل نهائي ...

نصى بدون سابق إنذار طبع قبلـه على إثر الوشم ..
_نزوج وننسى منو الجان خطأ ومنو الصح

همست بـ أذنه..
انت أساساً متزوج ...

نظراته المتفاجأة حاوطتني ..
فجأه رخت قبضه ايده منزلها ومبتعد عني داير ظهره .....

ما سمعت غير صوت طگه الجداحه ....
داير ظهره عني يدخن ...

_منو گلج

يعني صح

اتجهت اله صرت مقابيله نظراته مبعدها عني ...

طلحه خلي عينك بعيني وانكر اذا كذب ...
ضربته بصدره حيل ..

لييشش ليشش حتى انت كذبت عليه
طلحه حتى انت ...

لزم معاصم ايدي مثبتني گدامه ...

نظراته حاوطت نظراتي ...
لـ اول مره احس بغرابه نظراته  لـ اول مره اشوفه شخص غريب عني ...

طلعت مني كلمه كلمه بكل ثقه ...

من اليوم احنا انتهينا نهائياً
لا اعرفك ولا تعرفني
من اليوم رجعت غريب يا حضره القاضي  ....

مو تاره التاخذ مزوج ....

سحبت ايدي حيل منه ودرت ظهري طلعت مغادره المكان كُله ..

منعوني الحمايه من الطلعه خارج البيت ...
شويه واجه اتصال للحمايه ابتعد يخابر ..

مثل ما توقعت طلحه أمرهم يوصلوني ..

فتح الي باب السياره صعدت ورا والسايق گدام كاعد ...

نزلت الجامه مانعه دموعي تنزل ...
اليوم نهيت بي كُل علاقاتي ويه الكل ...

صوت القرآن داخل السياره بعد ما السايق شغله خلاني أنهار جنت خايفه لا يطلع كلامهم صح ومع الأسف حتى ما حاول ينكر ....

كُل شويه يجي اتصال للسايق يرد بصوت ناصي ...

نزلت من السياره صارت عيني على جهه الگراج سيارتي موجوده الحمايه مرجعها يمكن من اخذها ...

دخلت للشقه بسرعه أخذت علاجي محد ايفيدني طلعوا كُلهم مخادعين ....
أعصابي ترجف الاحداث الصارت بهاليومين تعبتني وهلكت صحتي ...

شويه وصوت طرقات خفيفه على الباب
المنتظرته وأخيراً شرف .....

فتحت اله الباب ..

_تاره بنتي مريضه وامها كله من ورا امها  ..

بدون ما انتبه عليه مباشره انداريت على التخم حتى اخذ الخاتم نسيته عليه ..

رجعت اله لكيته داخل للشقه انزعجت من تصرفه ..
تقدمت ناحيته بكل سرعه ..

تفضل الخاتم وماكو بعد اي شي بينا ربي يسعدكم
ممكن تتفضل برا مثل ما دخلنا بالمعروف نطلع بالمعروف ...

ما احس الا سد الباب وهجم  من صار قريب عليه بي ريحه كريهه اگدر اميزها بكل سهوله ....

صرت اصرخ حتى أحد يسمعني ...

شمرني على الأرض لدرجه احس رجلي انكسرت من الضربه ...
صار فوكاي يحجي بكلام ما مفهوم كلماته غير متوازنه ...

بـدون تردد سحبت الـ فازه من الطاوله وخليتها برأسـه ......

يتبع ....

______________

اذا تلاحظون بارت 23 و 22 مشت بي أحداث سنه كامله تقريباً يعني سنه مرض تاره بالكانسر ...

مرض تاره ما حبيت كـ كاتبه اتعمق بتفاصيله لان القصه راح تكون اوڤر حزينه ومتعبه للنفس ...

فـ مشيت سنه كامله وذكرت منها بس الاحداث المهمه اللازم تنكتب واكيد شفتوا شلون جان اوڤر مشوق وغير مُمل .....