رواية الكارمــا الفصل السادس عشر 16 - بقلم آيــه آلـ صبري

لا تنتظرني ألتفِت
مو واصل لمَرحلةهَ ،
الگاك جثة بـ درب
ما اوگف ، اتعَدة ..

............................

لالي ...

فزيت من النوم مخروعه وخايفه

اباوع بالغرفه واتلمس جسمي

اردد بسم الله بسم الله...
اعوذ ب الله من الشيطان ...
ياربي رحمتك ...

ادور على التليفون بعيوني
لكيته مشمور بعيد عني

يعني جنت احلم معقوله كل هذا حلم

كمزت من السرير اركض لغرفه امي دخلت ادور على امي وين

لكيتها مشغله التدفئه ونايمه بسابع نومه
وصينيه الغدا مكانها عايفتها

كعدت على الارض ورجفه بعدها بجسمي خوف رهبه الحلم بشع بشع ...

ظليت صافنه من الخوف

اي اي اكيد حلم امي مستحيل تبجي على زيتونه وهذا اكبر دليل يأكد الي اني جنت احلم

اسم الله لو بالواقع ميته زيتونه جان هسه امي تركص بالشارع من الفرحه

وهي اصلاً ناذره بس تسمع بيوم خبر وفاه زيتونه تذبح خروف وتوزعه للعالم ...

اريد الهي نفسي اريد انسى بعدها ايدي ترجف ..

اخذت الصينيه من كدام امي
وغسلت الصحون رتبت المطبخ ..

ظليت احوس ادور اي شي التهي بي راح اموت من الخوف
اخاف بيها شي ...

مابقى شي واخلص المرحله الرابعه وملتهيه ب امتحانات الفاينل ..

بس خلص زيتونه اهم من الامتحانات قررت اليوم اروح الهم اشوفها ...

كعدت على الدرج بعد مابيه اوكف حطيت ايدي على عيوني وابجي من گلبي شافت من حياتها بس ظيم

البعمرها مستقرات بيتهن وداير مدايرهن اطفالهن واهلهن الا هي ظلت العمر كله وحيده .....

كُلشي حلو بحياتها اخذوا منها ...

لحد اليوم اتذكر شلون بيوم تخرجها رافضه تحتفل ويه طلاب ورافضه فكره هي تخرجت من قسم الانكليزي ...

شبسرررعه العمر يركض ركض ...

اخذت تلفوني اتصل على الحجيه وعهد اثنيهن ما يردن عليه .....

فتحت الخزانه لبست اي شي كدامي وشلت شعري
اليوم ناويه اروح الها واشوفها ...

المغرب رن تليفوني طلحه
معقووله طلحه يتصل عليه ..

ردت

_هلا لالي شلونج

زينه

_لالي تكدرين تجين لمستشفى .... اذا ما عندج شي

ليش شكو

_ماكو شي بس شويه تخربطت وماكو بنيه وياها بالمستشفى واني هسه مشغول ...

نبي عليك بيها شي

_لا بس اذا ما عندج شي تعاي لان ما اريد اسويلج زحمه

اي طبعاً طبعاً اجي

_ماشي انتظرج لو ادزلج واحد من الحمايه ..

لا اني اجي ميحتاج ادز احد

غلقت التلفون ...

اليوم حلمت بيها حلم مو زين اخاف صار بيها شي وميحجي الي ..

كلت لامي رايحه للصيدليه وطلعت لان اعرفها مستحيل تخليني اروح لزيتونه ومجبوره اكذب علمود اروح الها ...

شويه واجت سياره انطيته عنوان المستشفى كوه وصلت من الازدحام ...

اتصلت عليه حتى اتأكد ب اي طابق موجودين وبلغني بمكان غرفتها ...

صعدت المصعد واني التوتر عندي مليوون ...

مجرد وصلت الطابق ظليت ادور على غرفتها
شفته من بعيد كاعد ومخلي ايده على راسه ...

تقربت اكثر جان اشوف قميصه بي بقع دم ..
وحتى الكوت الابسه كله دم ..

الف فكره اجت براسي لحد ما صرت يمه ..

عززا شنو هاي طلحه ملابسك وين زيتونه شبيها

من سمع صوتي كام وكف

_مابيها شي لا تقلقين هسه طلعوها من العمليه

عمليه شنو انت كتلي بس متخربطه

_ما ردت اقلقج وطريق كُلشي يصير

زين هسه بس گلي شبيها

_لالي حالي حالج رجعت للبيت لكيتها غركانه بدمها ...
ما اعرف اي شي عن سالفه ولا اعرف شلون هيج صار بيها
من شلتها وجبتها للمستشفى لحد هسه اني هنا على وكفه وحده بس اريدها تطلع سالمه واتأكد مابيها شي حتى اعرف شلون صار بيها هيج ...

ليش هي وين جانت غير بيت امك

_ لا بيتي

شنو بيتك شسوي

_ صار فتره وتبقى بيتي افضل

طلحه كُلشي مامفتهمه شنو بيتك شنو عمليه اني كل ما اخابر امك مترد عليه وكل ظني بعدها يمهم ...

سكت مجاوبني ظلينا فتره طويله ننتظر لحد ما دكتور رجع فحصها مره ثانيه بطلب من طلحه ...

وبلغنا

ضربه السكين صايره بكليتها وكُلش مضرره
وجرح ايدها هواي خياطات على طولها ...

كدر طلحه يسمح النا بدخول نشوفها ..

دخل قبلي واني ورا مجرد شاف ايدها وشلون نايمه وجهه نگلب وطلع بسرعه ...

ظليت واكفه فوك راسها ابجي
ايدها مشوهه تخوف من كثر الخياط
هي اهم شي عدها جمالها شلون اذا تكعد وتشوف ايدها شلون شوهت ....

دكتور ما قبل ابقى اكثر بسرعه طلعت ..

لكيته واكف ويخابر عصبي

شويه واجى واحد من الحمايه وكف بصفه ويحجي بصوت ناصي بعدين تقرب اكثر لدرجه عبالك دايشاوره
طول مدا يسمعه طلحه وجهه نترس غضب
ويقبض على ايده بكل قوه ...

راح الحمايه نص ساعه ورجع مادري شنو حجه ونزل وياه طلحه ...

فوك الساعه واني انتظر طلحه ماكو ما اجى

اتصلت عليه

وين انت طلحه

_انزلي جوا بالحديقه تلكيني

ماشي

نزلت لكيته واكف يدخن واحد من الحمايه لازم الابتوب ...

تقدم خله ب ايدي مشتغل على مقطع وراح بقى بس طلحه يمي

الحديقه بيها قليل ناس واصلاً احنا بجهه شويه بعيده

كعدت على المصطبه وفتحته
طلع الي فيديو تصوير كامره مراقبه
زيتونه جانت مدده على التخم فجاه كامت ودخلت للغرفه

الكامرات تحولن داخل غرفه

وحده سمينه شعرها ولادي واكفه تفتح بالخزانات وطلع فلوس تخليهن بجنطه سوه على السرير
وحتى ساعات وعطور خلتهن ب الجنطه

فجأة دخلت زيتونه شايله سكين ...

العامله بسرعه دفعت زيتونه وكعدت على صدرها لدرجه كُلش واضح بالتصوير زيتونه شلون مختنكه ومتكدر تحجي

احس گلبي فز من العامله طلعت سكين شكلها غريب من جواريبها وصارت تطعن ب صفحه زيتونه اكثر من مره

وكفت المقطع وصرت ابجي ما اكدر اشوفه بعد عيوني غوشن من البجي
المنظر بشع ومقرف شلون بدون رحمه تطعن بيها وهي تريد تقاومها ماتكدر هلكد ما مختنكه ...

ايدي ترجف رجعت فتحته وكملت وين ما وصلت ...

بعدها كامت عنها
من حاولت زيتونه تسند نفسها ب ايدها حتى تكوم شكت ايدها على طولها بحيث بتصوير ومبين شلون دم كام يطافر من قوه الضربه ..

ما كتفت بكل هذا لا قفلت عليها باب الغرفه من برا وطلعت ....

تحولت الكامره ثانيه ب الصاله

العامله رجعت خلت الجنطه بين رجليها وملابسها عريضه وطلعت خارج البيت عود على الاساس تتسوك ...

شلون خلتها بين رجليها هاي معناها خبره بالسرقه شلون ما وكعن ...

رجعت تحولت الكامره الثانيه داخل الغرفه
مكان زيتونه صار عباره عن نزيف
من ساعه 1 لحد ساعه 2 ونص
هي وحده تنزف ماكو احد يمها ولا احد ساعدها ولا احد نقذها

انتهيت من البجي واني اشوفها شلون تحاول تبقى مقاومه ومفتحه عيونها
تخلي ايدها المابيها شي على على عيونها تفتحهن
بعد ما اكدر اتحمل اكمل من البجي ...

نمدت ايد كدامي
مي وكلينكس

_كافي لا نوب انتي هم تتخربطين

اخذت بطل المي شربته ومسحت وجهي بالكلينكس

كعد بصفي ....

طلحه هاي شمسويه بيها

اني من خابرتك وگلت الك بقي زيتونه يمك كم شهور لان امي مدا تتقبلها
وعفت الدنيا كُلها وطلبت منك انت لان اعرفك تخاف الله ومستحيل اسوي شي يأذيها
لهسبب الله خلاك تكون قاضي من بين هاي الناس كُلها
كُل خطوه تخطيها تفكر الف مره واهم شي عندك الحق والعدل ومخافه الله ....

_بس طلع كذب كلامج مو لان امج متريدها كذبتي رغم اني جنت اثق بيج

اي اعترف اني كذبت بسبيل احميها واخلصها
طلحه وهم اعترف زيتونه سوت هواي اخطاء بحياتها التريده تاخذه واسوي غصباً على اكبر واحد ومتخاف من احد ولا تهتم ل اي شخص بهاي الدنيا عدها اهم شي نفسها
بس فعلاً مدا اكذب الصار بدون قصد مستحييييل زيتونه بيوم تفكر مجرد تفكير تأذي احد او تقتل طفله بدم بارد
الصاررر ظلمممم والله ظلمممم

محد نصفها بيكم حتى انت كُلها ضدددها

ولو هي فعلاً مجرمه مجان عافت كُلشي وراها
انت تعررف لو متعرف زيتوونه اهم شي عدها بالدنيا فلوسها مركزها كل فتره تبدل سياره

تخيييل كُل هالاشياااء عافتهن وراها بسبيل ما تبقى تتعامل وياهم

شكد متعرفها قويه بس تخاف من فكره اشوف احد ميت كدامها تخاف احد يموت بسببها ..
شكد ميحجون عنها قويه صلفه مستهتره ما تخاف من احد بس مستحييل تكون سبب تعاسه ولا تقتل نفس

انت ظلمتهااا بحكمك عليهاااا ما نصفتها حتى انت وكفت ضدها ...

_ الله كريم خل تصحى واني اصرف

شسوي

_الله كريم يصير خير

كالها وكام وكف يدخن بعيد عني
حتى بهاي عنده ذوق ....

رجعت فتحت الابتوب وكملت الفيديو

ب 2 ونـص

دخل طلحه للبيت كامره الصاله صوره شلون واكف يدور بعيونه

دخل للمطبخ ورجع طلع اتجهه للحمام يدور

بعدها خله ايده على يده باب غرفته حاول يفتحه ما انفتحت
بقى يحاول متنفتح
شفايفه تتحرك مبين جان دا ينادي احد

اخر شي طلع ودخلوا وياه الحمايه صاروا يدفعون باب الغرفه بكل قوتهم حتى ينفتح
واحد منهم جاب حديد وكسر كيلون الباب وما نفتح
بقى يدفعون بكل قوتهم انكسر الباب و وكع

تحولت الكامره داخل الغرفه ...

دخل طلحه من شاف زيتونه وجانت بس فانيله لابسه شبه المصلخه وبجامه ...

رجع عليهم مادري شنو حجه وياهم بس كُلهم طلعوا ...

فتح خزانته طلع منها كوت طويل

غطاها ب الكوت وشالها ضامها لصدره يبعد شعرها عن وجهه ويرجع يضم راسها لصدره
بسرعه طلع بيها للصاله
وبعدها انقطع التصوير الكامرات توقفن .....

غلقتها وتقدمت اتجاها

تفضل نسيت انطيها الك

اخذها وراح ب اتجاه السياره ...

اني رجعت صعدت فوك يمها انتظرها تكعد
ما حسيت على الوقت
امي متصله عليه هواي
عرفت معناها تأخرت شلون ما انتبهت للوقت ...

دزيت الها رساله اني بالطريق ...

حاجيت الممرضه حتى ادخل كالت بعدها ما كعدت ..

طلعت من المستشفى سياره طلحه بعدها واكفه

تقربت اله جانت الجامه مظلله ف ما عرفت منو بيها

انفتح الباب ونزل منها طلحه

طلحه راح اروح اني مو تعرف امي متخليني ابقى يمها واصلاً ماتدري اجيت على زيتونه
لو تدري تنومني بالشارع ونبي ....

_مو مشكله عاذرج وادري ب امج

لعد شلون منو يبقى يمها

_هسه انطي فلوس الممرضه تهتم بيها وتبقى يمها

اكيد

_طبعاً قابل اعوفها وحدها محد يمها

ماشي كُلش شكراً

_ خل السايق يوصلج

لا

_اصعدي

صعدت ويه السايق وطلحه بقى بالمستشفى

اول مدخلت بسرعه بدلت ملابسي وكعدت اقرأ
باجر عندي امتحان ولحد هسه ما قاريه
ظليت سهرانه مشفت النوم
كل شويه اريد اغفه واكوم اغسل وجهي

لحد ما خلص الوقت وصار لازم اروح للكليه
اخذت من ملابسي بكيس لزيتونه حتى من تطلع من المستشفى تلبسهن ...

ورحت امتحنت اول مخلصت امتحان أجرت سياره واتجهت للمستشفى ...

الممرضه بلغتني كاعده

دخلت لغرفتها لكيتها صافنه

تقربت عليها حضنتها

ما بيج غير العافيه شلون صرتي

باوعت عليه

_الحمد لله

نزلت نظرها على ايدها باوعت عليها بعدم اهتمام
تفأجات توقعت رده فعلها غير شي ...

_لالي اريد ملابس ابدل حتى نطلع اني وياج

وين طلعين وضعج مو شي

_لا كافي صار الي يومين مابيه شي

هاي جبت الج كومي اسندج للحمام تبدلين

_ما اريد انتي

نادت الممرضه يمكن نفسها النطاها طلحه فلوس مقابل تهتم بيها بشكل خاص

اخذت الممرضه الكيس مني وسندت زيتونه مشتها ....

شويه واجت مبدله ...

زيتونه خليها بعدين نطلع والله اخاف كُلشي يصير وجهج اصفر

_لالي لا تلحين نطلع قبل لا يجي طلحه اذا متجين وياي اروح وحدي ...

دخل طلحه سلم وانطه فلوس للممرضه المبلغ جان كبير انطاها ورقتين ماعدا البارحه هم منطيها ....

زيتونه بسرعه نگلب وجهه
كامت وكفت ومبين عليها كوه تضغط على نفسها ...

تقدم طلحه ب اتجاها

_ وين لا تتحركين

اجه اتصال طلع يخابر

اشرت الي اجي يمها

_راح اكول اريد اروح للحمام بس الكاج منتظرتني علمود نطلع بدون ميحس

لا لسوين هيج يصير الوضع ضدنا

_اهووو لالي لا تظلين متخوفه ترا والله مابيه حييل

اجه طلحه سكتنا

_سجلت خروج بالبيت افضل الج

باوعت عليه

_لالي تعاي اسنديني اريد اروح للحمام

طلحه رفع حاجبه وابتسم ....

وكفت بصفها خلت ايدها على كتفي

ما احس الا طلحه بعدني عنها وشالها من الارض
ومشى

_طلحه نزلنيييي

_شنو ما اعرف سوالفج هاي كم مره اگلج اني حافظج

ركضت كدامهم فتحت المصعد لان شايلها ما يكدر
دخلت وياها

هي تريد تنزل وهو ولا مهتم لكلامها ...

طلعنا خارج المستشفى السايق محضر السياره
كعدها ورا بالسياره وقفلها

اندار عليه

_تروحين ويانا على الغدا

ضحكت لا شكراً

_يلا لعد اصعدي بالسياره الثانيه يوصلوج للبيت مشكوره تعبناج ....

.............

زيتونه ...

صعد كعد بصفي والسايق بالصدر

قفل السياره يخاف لا افتح الباب وانزل

باوعت عليه

وين موديني بعد ما ادخل بيتك لو امووووت والله اقتلك بس توديني البيتك

ضحك ضحكه طويله

_ ماشي لبيت امي

درت وجهي عنه

مد ايده بيها بطل مي وحبوب

_علاجج اشربي

ما اريد

_ اشربي حتى تصير عندج قوه وتموتيني مو تريدين تموتيني

جريتهن من ايده شربتهن وشمرتهن عليه ....

من المستشفى لبيت اهله المسافه بعيده وازدحام
فوك الساعه ونص احنا بس بالازدحامات وبعدنا ما واصلين

العلاج احسه من مشى بجسمي كمت اغفي يمكن بي منوم اريد افتح عيوني ما اكدر
وهاي اول مره احس نفسي بردانه

ظليت افتح واغمض بعيوني مقاومه بس علمود ما انام ....

جر راسي خله على كتفه نزع الكوت غطاني بي

احس نفسي شلون السكرانه مابيه افتح عيونه

بعدت راسي عنه واخذت الكوت منه

بس ابتسم
مالي خلك احجي واتعارك

خليت راسي على الجامه وتغطيت بالكوت ونمت ...

ما كعدت الا على صوته ينادينه

واكفين كدام بيت امه

ردت انزل من رفعت رجلي علمود انزل احس كليتي نزرفت ...

لزم زندي راد ينزلني تنررت ايده حيل

عناد بيه جتف ايدي وشالني نزلني

خزرته

اخذ الكوت من جتفي رجع لبسه

امه واكفه من شافتني نزلت بسرعه اجت عليه
رادت تحضني بس من شافت ايدي ابتعدت

_طلحه هاااي شمسووي بالبنيه لو ساجنها ولا هالعذاب ...

وظلت تحجي عليه اخذت ايدي ودخلتني جوا ...

هو دخل لغرفته ينام كال الهم صار يومين ما نايم وبلغوا السايق خل يروح البيته اجازه  ...

مخلين الي سرير بصاله وحدي
اجت عهد سلمت وجايبه شوربه والعلاج

نمت وما كعدت الا من خلص مفعول العلاج

جانت عهد كاعده يمي تنتظرني اكعد حتى تنطيني العلاج طلحه مبلغها الاوقات ....

اخذت العلاج منها

_زيتونه اني لحد هسه متندمه خاصه من تخليتي بموقف محلو كدام اخوي بسببي وبعدها هيج صار بيج احنا كلنا صرنا سبب اذيتج ...

عادي متعوده فتره وتخلص حالها حال المشاكل الصارت بحياتي يجي يوم وينتهي كُلشي

_ يجوز هسه انتي ماخذه نظره محلوه عني
بس والله من اليوم الحجيتي وياي ابتعدت عن هالبنات وصرت ما امشي ويه اي وحده واهتميت بس بدراستي وقبل كم يوم خلصت امتحانات ومتأكد ان شاء الله ناجحه

حتى لعبت نفسي من كل الولد ومستحيل بعد احجي ويه اي ولد ولا ادخل ب اي علاقه

_ العلاقه الدخلتي بيها وفشلت راح تعلمج درس يظل وياج طول العمر درس يخليج تشوفين الدنيا صح
وتفهمين الناس صح......
وما تكونين مثل الطفله الصغيره الي تتعشم ب اي شي حتى تتوقف عن البجي ....

درس يخليج شخص واعي وثگيله بالمشاعر والتصرفات .....

حتى بكلامج راح تعرفين شنو الينگال وشوكت والمن وشنو الازم تگولينه من الاساس ...

كل التجارب الفاشله التمر بحياتج هي مجرد دورات تقوي عقليتج .....

وهسه روحي نامي ولا ظلين تفكرين بالموضوع
الله سترج ولطف بيج لا ظلين تحجين بي نوب تفضحين نفسج بنفسج ....

ابتسمت الي وكامت .....

ظليت مدده بمكاني خليت ايدي على عيوني
تعبت بعد شنو اتحمل كبرت والعمر يركض بيه بعد مابيه حييل ولا طاقه لكل هل الضغط

اباوع على ايدي شوهت بعد متفيد جنت اذا انطخ اموت الا يروح أثرها يلا ارتاح هسه شلون راحت نوب على طولها

احتاجيت اروح للحمام وماكو احد يمي جسمي كله يأذيني ..

كوه عليه كمت وامشي على كيفي

دخلت للحمام وكملت قبل لا اطلع باوعت على وجهي بالمرايه باااهت اصفر وين جنت وين صرت ....

اتجهت للمطبخ اريد اشرب مي

يمكن عشر دقايق يلا وصلت هلكد ما بطيئه بالمشي ...

شربت المي وكعدت على الميز طعام خليت ايد على كليتي تأذيني وايد على عيوني
دموعي تنزل وحدها مدا اكدر اتقبل الوضع تعبت
كل يوميه مشكله كل يوميه واكعه مصيبه
منو الي منو يمي عشت وحيده عمري كُله
بعدني عايشه ومحد يفتقدني لعد اذا اموت
مجرد هالفكره خلتني انهااار ....

دخل طلحه شكله مال واحد مفزوع عباله شردت ...

_هاي انتي هنا بارده مو زين عليج لا تمشين

مسحت دموعي بسرعه وكفت على حيلي مشيت
لان تحركت بسرعه وفجأة
احس بسمار بكليتي
كعدت على ركبي ب الارض
دنكت راسي وصرت ابجي ضعفي وقله حيلتي دمرني ....

نزل لمستواي وكعد كدامي

مااا اريد اشووفك بعد كُل يوم دايزيد كرهي الك

جر راسي ضمه لصدره

صرت ابجي بشهكه من كل گلبي

_اهدي خلص مصار شي

طلحه اسجني وخلصني تعبت بعد ما اتحمل الا اشوفني اموت يلا ترتاح

شدد حضنته الي وضام راسي لصدره

_اشششش لا تحجين هيج

شلون اخلي ام ابني بالسجن .......

يتبع ...

صدمتكم موو كم مره اگول الكم محد يكدر يتوقع الاحداث لا ب آشـور ولا الكارمـا .....