رواية الكارمــا الفصل الحادي وثلاثون 31 - بقلم آيــه آلـ صبري

كُبرت انهَ وزغر كُلشي
الدرِب والشَوگ
والدنيـَـا
وضَمير الناس .
_____________

تـاره ..

أردت أن أكون أشياء كثيرة ، لا أدري كيفَ انتهى بي الأمر محدقاً بـ نافذة غرفتي وحيداً أفكر بـ هشاشـه حياتي التي فقدتها أمام عيني ..

غلقت التليفون متجاهله كلامها وصفها لـ رفضي بـ الغرور

- لو متفاهمين على الأقل لو حاجيه اله من حقه يعرف كُلشي عنج لا تشغمين روحج كُلنا نعرف طلحه شنو انتِ بـ النسبه الـه ..

_ لو من نصيبي جان صار ألي بس هو وعساف من الأساس مو الي..

- فعلاً كُلشي قسمه ونصيب ، تسرعت بـ رده فعلي ما جان قصدي اوصفج بـ المغروره..

_ عادي

- شگد عساف يشبهج بس من شفته من قريب أنبهرت بـ كميه الشبه سبحان الله اله بيها حكمه..

باوعت عليها
_وين شفتي؟

- من تعينت بـ المستشفى لليوم صار مرتين أشوفه عنده شغل ويه دكتور بـ المستشفى الـ اداوم بيها فـ هو دا يجي وبـ الصدفه شفته تلقائياً عرفته ابنج نسخه منج ..
وسألت عن أسمه طلع هو ..
تاره يعني انتِ معقوله من ولدتي لحد هذا كبره وما شايفته بيوم ولادتج معقوله ما لمحتي

_ لا نهائياً ..
اتركينه منهم دا تتواصلين ويه ازاد؟

- لا مستحيل أسوي هيج أو أتصرف هالتصرف شنو ما تعرفيني

ابتسمت
_والله عرفت جواب قبل حتى لا اسأل لان أعرف كُل خطوه تخطيها تحسبين الها الف حساب..

- مو علمود سنان دا أسوي هيج..
علمود نفسي وكرامتي حتى لو أحبه وغصبوني على تركه من سابع المستحيلات أروح أمارس الخيانه وياه وانسى أني متزوجه وعلى ذمه غير رجال
حبه راح يبقى بـ الحفظ والصون بگلبي..

بقت عندي لحد ما أتصل عليها سنان يريدها تنزل حتى يرجعون للبيت ..
غلقت الباب وراها التفتت لـ ارجاء الشقه الـ مابيها غير الأثاث و أنفاسي وصوتي الـ مايطلع لان ماعندي أحد احجي وياه ، لـ أموت داخل البيت محد يدري بيه ميته ألا ورا أيام..
نظفت المطبخ ، رتبت الصالـه ، دخلت لـ غرفه الملابس رتبتهن ، صليت العشا وكُل هذا وتفكيري مشوش مدا اگدر اسيطر على أفكاري..
فتحت باب البلكونه الزجاجي ، المجمع هوسه الأطفال داتلعب الشباب بيهم الكاعد ويه جماعته وبيهم الدا يدخن ارگيله..
سقيت الزرع الـ مزين البلكونه ومنطيها جمال وروح
وكفت اباوع على الهوسه الجوا حاولت بكُل طريقه دموعي ماتنزل حاولت ما اتذكر الشي القهرني اليوم واتجاهله بس ما گدرت ..
نزلت دموعي حركت گلبي قبل خدي
ليش كُل الناس التدخل حياتي مجرد فتره
ابوي فتره
أمي فتره
طلحه ، أبني فتره
اصدقائي مجرد فتره ومصلحه صار سنين مختفيه محد بيهم سأل عني ولا حاول يدور أخباري شلون الناس تنكر وتنسى بهالسرعه ينسون بيوم من الأيام ضحكنا اكلنا شربنا طلعنا كُله سوا ..
شلون الناس تگدر تبيع بدون أسباب بهالسرعه..

دخلت لـ غرفتي شربت العلاج
بقيت مدده على السرير أحاول النوم ومدا تغفى عيني گمت دورت على المنوم شربته..

گعدت على أحد دايلعب بخصلات شعري القصيره ويهمس بـ أذني حتى اگعد
رفعت رأسي طلحه كاعد بصفي على السرير ..

-والدج ينتظرج مو تريدين تشوفي

_وينه

- ينتظرج بـ الصاله

عافني وگام طلع من الغرفه گمت ورا أمشي
أمي واكفه تبجي وبابا كاعد على التخم مدنگ رأسه ما يحجي ، تقدمت عليه بكُل خوف ولهفه گعدت على الأرض گدامه لزمته ايده بكُل قوتي

- وينك ها وين عفتني صار سنين انتظرك صار سنين اتمنى بس أشوفك تارتك ضاعت وراك أخوك وزوجتك التحبها وفنيت عمرك الها ضيعوني ودمروني ليش ما تسأل عني ليش ما اجيت حتى تشوفني وتشوف شنو سووا بيه ..
هيج أهون عليك تعوفني وما تسأل عني

ما جان يحجي ولا يرد عليه بس مدنگ رأسه وعيونها كُلها دموع ..

_بنتي تاره حالليني واهبيني

خليت رأسي على رجل أبوي ضامه وجهي ابجي بحرگه گلب واعاتبها..

- من وراج ضعت وضاعت سنين عمري لو ما خذتني ما جان عشت كُل هذا العشته شلون گلبج انطاج تشمرين بنتج من دمج ولحمج للعالم شلون انطاج گلبج بنتج الوحيده وأول فرحتج تزوج مرتين وهي بعمر الـ 12 وتدرين بيها وما تسوين شي ولا تحاولين تحميها ليش هيج ليش خليتني احارب وحدي حتى بس أحصل فلوس وأكل بدون ما ابيع شرفي عفتيني بنص ذياب لا عدها أخ لا عدها أخت لا أم لا أب لا خال لا عم ..

ماجان ينطي أي رده فعل ولا حتى حجه
ملامحه التعبانه الدموع متجمعه بـ عينه
حضنت وجها بكفوف أيدي اترجاه

- بابا أخذني وياك عفتني مره لا تعوفني مره ثانيه
ليش مدا تحجي شنو زعلان مني..
قسماً بـ الله لو ما حرام الانتحار جان انتحرت واجيت يمك من زمان ..

شمرت نفسي بحضنه حاضنته بكُل قوتي
-بابا أني مو زينه أبد ، أريد كُلشي يصير زين ويتعدل بس كُلشي دايصير اسوء و اسوء..

فزيت اتنفس بسرعه الهوا مدا يدخل لـ ريتي ..
عيوني تفتر على الغرفه معقوله شفتهم حقيقه لو حلم ، بعدني على نومتي بـ السرير خليت أيدي على رأسي دموعي ماتنزل من الصدمه بس مدا أحسه حلم دا احس فعلاً شفتهم ..
گمت توضيت وصليت الفجر بقيت گاعده على السجاده اقرأ قرآن واسبح بعقل شارد ..
رجعت القرآن لـ مكانه بعد ما أخذت قرار أقدم ماجستير السنه وارجع أخذ شهاده الماجستر بعدها احاول حتى لو انطي فلوس واتعين مستحيل اگدر ارجع افتح مركز أو اي مشروع ثاني بسبب صحتي التعبانه ماعندي قوه قبل ..

للعصر تليفوني يرن بس رقم
رديت

_ مرحبا ست تاره

سكتت واختفى الرد بعد سمعت صوت عساف

_ وياي دا تسمعيني أكو صوت لو لا

- نعم دا اسمعك، أهلاً

_اگدر اجي اخذج هسه ما عندج شي

- شنو

_ اليوم عازمج على العشا بـ بيت أم والدي طلحه تگدرين تجين

- بـ مناسبه شنو

_ بعدين تعرفين بس جد متمني حضورج حتى اجي هسه اخذج ..

- شكراً على العزيمه المجهوله ، واعتذر ما اگدر احضر

حسيته ضحك من نبره صوته
_ لا ترفضينها انتِ تطلبيني اعتذار وأريد اتفاهم وياج بخصوص كم موضوع وماكو أنسب من هالوقت قبل لا أسافر..

- جداً اعتذر ما اگدر اجي بدون ما أعرف السبب الحقيقي ..

_ بعد يومين سفري عندي شويه اجرأت لازم اخلصها واتأخر شهر أو أكثر يلا أرجع ولازم احجي وياج ما اگدر أجل الموضوع لحد ما أرجع..
وبـ المناسبه اليوم عيد ميلاد عهد وهي كُلش تحبج وصار فتره تلح عليه حتى اوصلها الج تجي تشوفج
والـ أريد احجي وجهاً لوجه مو ما مال تليفون ..

- ماشي

_ أي وقت اجي؟

- ما يحتاج عود اجي بسيارتي

_انتظرج

نهيت المكالمه وياه مستغربه تغيره المفاجاه اسلوبه كلامه فرق من السما للأرض معقوله الـ جان يحجي وياي عساف شنو سبب هدوئه وطلبه واصراره أحضر العزيمه لـ أول مره يطلب مني ما گدرت ارده..

فتحت الخزانه طلعت منها بنطلون وقميص بيجي دخلت القميص جوا البنطلون واكفه گدام المرايا دا اسد الحزام ، افتر داير مداير نفسي جسمي مدا يعجبني بسبب الضعف الـ مبالغ بي
بحيث أسد الحزام على آخر شي وبعده عريض ..

حَرت شنو أخذ هديه لـ عهد ، رجعت فتحت الخزانه الخاصه بـ العطور قبل كم شهر وصيت مجموعه عطور من فرنسا ويه وحده اعرفها جنت اتعامل وياها من أيام المركز كُلش ثقه تجيب العطر الأصلي وما تزيد على سعره هواي..
لگيت أثنين بعدهن مغلفات وأحد سعره ورقتين والثاني خمس أوراق أخذت أبو الخمس أوراق غلفته تستاهل عهد ..

نزلت من الشقه طلعت السياره من الگراج ، صار كم سنه گاعده بـ المجمع ولحد هسه ما أعرف أحد ولا ألي علاقه بـ أحد بس الحجيه وهم هالاسبوع سافرت لـ ولدها وما أدري اذا ترجع او لا..
تأخرت بـ الازدحام بيتهم بعيد عني أذا همه كاعدين بـ أطراف بغداد شلون ما يصير بعيد ساعتين يلا گدرت أطلع من الازدحام و أوصل لبيتهم ..

وگفت السياره ، صار گدامي عساف گاعد بـ الحديقه يضحك بصوت عالي ويه خطيب عهد صوتهم وصل لـي عندي ..
من شافني بسرعه گام متجه ناحيتي وگف مقابيلي خله ايده على صدره بـ معنى السلام يرحب بيه بكل حراره

_ أهلاً ست تاره نورتي، تأخرتي ما توقعت تجين

- تأخرت بـ الازدحام

تقدم خطيب عهد سلم رديتله ودخلت جوا لگيتهن بـ المطبخ دا يحضرن العشا فرحن من شافني الحجيه حارت شلون تبوس بيه وترحب بكلامها الحلو وعهد أكثر دخل عساف نقل الـ طاوله الكبيره من المطبخ للحديقه حتى يتعشون برا..
سوا نفسه دايمر مني همس بصوت ناصي
_افتحي تليفونج
حجاها وابتعد ارتاج على الثلاجه

سحبته من جيب البنطلون ، فتحته داز رسالـه
_ بدون أمر عليج أخذي عهد للغرفه اشغليها عنه ربع ساعه أو نص ساعه

رفعت رأسي هزيته وابتسمت
أبتسم تك خد وطلع..

سحبت عهد من أيدها گدام أمها
- عهد من كُل عقبج خطيبج جاي وانتِ طالعه بتراك البيت وشعرج المظفور

_مو صوجي صوجه شكو جاي أني گايله اله بـ أيام الفاينل لا أعرفك ولا تعرفني رأسي ما الحك احكه مو اگعد اتجهز علموده

تحجي متنرفزه
- شو ضايجه

_خلص اليوم وما يعرف يگول كُل عام وانتِ بخير هاي عود مخطوبين وهيج نسى لعد لو نتزوج ..

الحجيه واكفه وراها تأشر بحواجبها اخذيها
سحبتها من أيدها وجريتها غصب عنها لغرفتها دخلتها وسديت الباب..

_ ونبي كُلش ضايجه ومتنرفزه حتى سلام ما أريد أسلم عليه..

فتحت خزانتها اگلب بـ ملابسها طلعت الها فستان جوا الرگبه ردانه طويل مفصل على الجسم..

_ ما ألبس ولا اتحضر اله نهائياً

- ماشي براحتج أبقي بـ التراك ، لا تزوديها يجوز نسى الرجال تعبان من الدوام وضغط الشغل..

انداريت فتحت ضفيرتها ما حجت شي رجعت اخذت مكياجها هي واكفه رسمت عيونها بشي بسيط وتنت وحمره ..

_تاره مره حجيتي وياي كلام عابر ويجوز نسيتي بس متتوقعين شگد فادني واخذت بي ،
گلتي الرجال الحقيقين الله خلق بـ غريزتهم العطاء يحبون يقدمون ، بس محد حاييها بيهم هالفكره ولازم أحنا النساء نسقيها ونحيها ونزرع بي موضوع انو يقدم ..
صرت اسأله بين فتره وفتره عن علاقته بـ أهله ،
تذكرت ميلاد أختك ؟ جبت الها هديه؟ أمك لا تنساها دائماً اهديها ولو شي بسيط لـ تروح وايدك فارغه لـ بيت أبوك ..

-ومن حيتيها راح ترجع الج وراح يتذكرج دائماً ..

_بس هسه هو ما تذكرني

- انتظري لا تحكمين عليه بسرعه، هسه كافي زعل اطلعي سلمي عليه أكو وحده جاي خطيبها وما تطلع لعد هو المن جاي..

طلعنا بـ اتجاها الحديقه بقت واكفه مصدومه
الحديقه الارضيه كُلها نفاخ بـ ألون الأصفر والطاوله صايره بـ الوسط عليها الكيكه ودير مدايرها باقات ورد طبيعي هم بـ ألون الأصفر تقريباً أكثر من 100 ورده ، تقربت تمشي قبلي تضحك متفاجأه ..

صار خطيبها گدامها بكُل خفه رفعه من الأرض بتك أيد حاضنها وهي متمسكه برقبته
مباشره عساف دنگ رأسه سوا نفسه دايعدل بـ أزرار الأكمام ابتسمت على تصرفه ، طلحه فعلاً تعبان بتربيته سوا رجال والنعم منه، لدرجه عنده حياه وغيره عليها ماتسمح يشوف أحد غيرهم يتقرب الها رغم حلالها ..

وكفت بينهم والفرحه ماليه عيونها رحت گعدت بصف الحجيه الفرحانه أكثر منهم ،شويه وراح خطيبها عنده شغل ما يگدر يتأخر أكثر حتى العشا عافه أعتذر منه ..

ورا ما خلصنا العشا عهد گعدت بصف عساف
گعدتي صايره على التخم الـ مقابيلهم

_ اگول ليش اليوم جاي وباقي يوم كامل طلعت وراك سالفه

- هو خابرني وطلب مني أكون موجود حتى يگدر ياخذ راحته لان يدري بيج عندج فاينل وماتقبلين تطلعين برا فـ قرر يسوي حفله بـ البيت

خلت رأسها على صدره حاضنته تبجي
رفع رأسها بـ ايده
_ شكو

- جنت ضايجه منكم كُلكم عبالي نسيتوا

_ حبيبي هو بس انتِ عنونه مالتنا تتوقعين ننسى

رفعت رأسها تباوع عليه وتضحك
_تدري شنو أتمنى
حظي مثل حظك وارث الجمال من أمك والفلوس من أبوك..

أبتسم بثگل صارت نظراته بـ اتجاهي بسرعه اتلاشت ابتسامته ..
الحجيه نادت عهد حتى توصلها لغرفتها تشرب العلاج حسيت متقصدات يتركني وحدي وياه..

جتفت أيدي وخليت رجل على رجل أخذت نفس ..
وجه نظراته ألي
_ شنو اناديج تريديت
ست لو انسة تاره

- بس تاره

_لا مترهم

-مو مُهم براحتك

_ كُل ظني تريدين تأخذين والدي علمود فلوسه حالج حال أي وحده شفتها تستقتل وتتملق حتى تكون ويه والدي بسبب فلوسه وهذا واقع وحال أغلب النساء الرخيصات
حاولت بكُل طريقه ابعدج عنه وابعده عنج ، زعلت ويه والدي أشهر طويله لـ أول مره بحياتي، رافض احجي وياه لان تقدم الج صارت فجوه كبيره بينا مشاكل طول الوقت اتهمتج بطريقه مباشره وجرحتج بكلام واتهام غير لائق..
بيوم الدزيتي الفلوس بيد عهد جانن أكثر من عشرين مليون رجعتيهن كُلهن لـ والدي رافضه مساعدته ورافضه فلوسه ورافضه تقربه، بوقتها ما صدگت عهد من اجت گالت الا شفتهن بعيني وحسبتهن يلا صدگت ، وقبل فتره رجعتي دزيتي فلوس ويه الحمايه وجان رفضج أشد من قبل ومن عدها أدركت تصرفي خطأ وياج وتستحقين اجي اعتذر الج وأني الممنون ..

- عادي مو مشكله حقك تأخذ هيج فكره لان أساساً ماتعرفني ..

_ بعد أكو شي أهم
طلاگ والدي جان بسببي لـ هذا السبب هم بعدتج عنه حتى اگدر ارجعه ويه طليقته بس والدي ما جانت تفيد وياه أي محاولـه رافضها رفض قاطع، من قبل لا تجين واني احاول اخلي يرجعها فوگ السنتين أريد يقتنع وما يقبل .. ومن دخلتي لـ حياتنا صعب الموضوع أكثر عليه ، وخلص أدركت والدي من أول يوم طلاگها نفاها من حياته وما ترجع بعد ، وأدركت انتِ الانسانه اليعشقها والدي ويحبها انتِ الـ جان ينتظرها انتِ الـ يريد يكمل باقي عمره وياها وبرفضج الشديد لـ أي مساعده يقدمها ثبتي حسن نيتج ، جداً اعتذر على قله ذوقي وياج الفتره السابقه ، من اليوم بعد ما أدخل بيكم واتمنى ما أكون اني السبب بـ رفضج والدي يستحق الفرحـه فَنه عمره النا وهسه صار دورنا نعوضه وأقل شي نقدمه ما ندخل بـ قرارته الخاصـه ..

كُل كلمه يحجيها أحسها سجين بگلبي أبني الوحيد يحجي وياي بكُل رسميه حالي حال أي غريبه
كُلشي وكف بعيني وطلبه واعتذاره ما اهتميت الـه
هاي الگعده سلبت جزء من تاره وهدمته
ما أريد ابچي ولا أنزل دمعتي ، ما أريد يشوف امـه وحده ضعيفه كتمتها بداخلي

_ أدري ومتأكد سبب رفضج لـ زواجكم هو أني
وهسه دا اكُلج موافق وهم راح أكون جداً سعيد بزواجكم وأول الحاضرين ..
طبيعه علاقتي بيج شي ، وحياه والدي شي ثاني

حسيتها فرصتي حتى اگدر احجي وياه ، لازم تبدي الـ مبادره مني لان الأم هي الازم تفرض حنيتها على أولادها..
گمت گعدت بصفه بدون مقدمات تفاجأه من تصرفي بس ما انطه أي رده فعل ..

- مو صار لازم نحجي وأوضح الك موقفي
حتى أسمك ما جنت اعرفه ولا شكلك ولا لون عيونك ولدتك و هستوني داخلـه الـ 12 ، أني ما تخليت عنك من فراغ ، انطيني فرصه احجي وياك و افهمك انتِ الوحيد بهالدنيا من دمي ولحمي..

_ مو مُهم عرفت أو لا ، ما راح ترجع السنين الـ راحت ولا راح يتصلح شي من الضاع والـ انكسر..

- انطيني فرصـه وحده

خلـه عينه بـ عيني
_ ما أريد اخليج تتأملين على شي فارغ وما يصير
مستحيل تكون علاقتنا كـ أم وابنها
يجوز اتقبلج بـ حياتي كـ انسانه تخصين والدي وطبعاً الج كُل الاحترام والـ ود ، ما راح أقلل منج أبداً ولا راح يكون عقوق اتجاهج ، لان الدنيا دواره واذا اسأت الج أولادي راح يردولي الاسائه بنفس الطريقه بظروف مختلفه..

- ما راح تغيير الفكره الرسمتها بـ عقلك عني ، أذا حجيت ألك حياتي ما راح تتغير مشاعرك

_ لا الـ راح بعد راح حتى وأن حجيتي راح ترجع السنوات الـ عشت بيهن بدون أم ؟
بس راح أبقى سند الج بـ الوقت الـ تحتاجيني بي ، عون الج بكُل وقت بـ كلمه منج أو طلب يتحقق كُل التريدي
عساف أبن طلحه ما ينكر أصله ولا راح ينكر حقيقه الـ رابط البينه..

فزينا اثنينا على صوت سياره طلحه وگفت گدام البيت نزل من السياره بـ اتجاه الحديقه بعد ما أشر الـه عساف ، من شافني باوع عليه بكُل برود و بدون اهتمام
سلم رديت السلام ..
گعد يحجي بـ مواضيع عامه ويه عساف ويسأل عن سفره وشوكت يرجع وليش يروح ..

_ أم عساف شلونها صحتج علاجچ ملتزمه بي أكو تطورات..

كلمه أم عساف فززت كُل موقف الي وياه وين جنه وين صرنا الـ برود والـ رسميه اليحجي بيها..
- الحمدلله أحسن من قبل

_ اترخص منكم أشوف عهد هسه تزعل التهيت بـ الشغل و نسيت ميلادها..

تركنا ودخل للبيت ، ألتفت عساف
_ أمشي ندخل جوا ، وترا ما تركنج وحدج بس اني بلغتهن ورا العشا عوفنا وحدنا ..

- بس أجيب الهديه نسيتها بـ السياره

أبتسم حتى يخفف من التوتر السيطر على المكان
_ ماشي..

فتحت السياره طلعت منها الهديه
واكف ورأي مخلي ايده بجيوبه ..

_ ذاك اليوم انتبهت عليج تحجين انگليزي بطلاقه شنو انتِ مخلصه دراسه؟

- أي بكلوريوس قسم اللغه اانكليزي وقريباً أن شاء الله أقدم ماجستير ، بس الانكليزي ما تعلمته من دراستي بگد ما أني دربت نفسي من خلال الأفلام الاجنبيه والاغاني ..

_ أي صح الدراسه بـ العراق مو شي يدرسون قواعد أكثر من اللغه ..

دخلت انطيتها الهديه ، ودعتهم وطلعت مستعجله رفضت عرض عساف يوصلني رغم ماقبلوا أرجع وحدي ومن خلال هاليوم عرفت طلحه ما مزوج ..

ورا أسبوع من رجعتي منهم بقيت طريحه السرير من المرض فلاونزه وجع رأس فضيع بس اگوم أصلي وأرجع للسرير لو اگوم أشرب العلاج لو ما اگوم ، لالي تتصل تسأل اجاوبها على گد السؤال واغلقه ما گلت الها على مرضي ما ردتها تخاف ..

أسمع أذان الفجر گمت أجبر نفسي حتى ادخل للحمام طلعت دا ألبس الحجاب عيوني تغوش سجدت السجده الأولى والثانيه ما حسيت بيها على نفسي ، ما أدري شگد بقيت مغمي بيها عليه
رفعت رأسي ثگيل والنفس گوه أجره..
صوت التليفون يرن بشكل مستمر زعجني ، لزمت رأسي بـ أيدي نار وعيوني من الحراره مابيه افتحهن
الـ ساعـه گدامي بـ الـ 2 ونص الفجر من البارحـه الفجر مغمى عليه لليوم شعور الخوف ملئ گلبي لو ميته منو جان عرف بـ موتي ، تتعفن جثتي ومحد يدري بيه ..

گمت أخذت التليفون فتحته لالي متصله كُلش هواي وحتى عمتي ، وعهد دازه رسائل من الصبح ومن شافتني ما فتحتهن راجعه متصله وراها بنفس التوقيت طلحه هم متصل ، رجعت أتصلت على لالي
اجاني صوتها..
_ وين جنتي ليش ما تردين لا اگدر اجي من ورا دوامي بـ المستشفى ، أخاف لا مصابه وانتِ ما عندج مناعه لا أنقلها الج ولا اگدر ابقى گاعده انتظرج تردين من الصبح لحد هسه أتصل وماكو

- معقوله مصابه بكورونا راح أروح أخذ مسحه رأسي راح ينفجر من الألم وگوه اتنفس..

_ ديري بالج تروحين تاره متأكده انتِ مو مصابه لان ما طالعه ولا مختلطه ويه أحد فـ منين تجيج ، بس تروحين تختلطين ويه المصابين وتدخلين للمستشفى بسرعه راح تنصابين مناعتج صفر گوه خلصنا من الكانسر ..

- لعد شلون أبقى هيج ، هسه يلا گعدت ما جنت حاسه على نفسي ..

_ حتى وأن عرفوا مصابه راح يحجروج بـ المستشفى تبقين بيتج أفضل ، تاره لاتخليين بالي يمج هسه أني مربطه خايفه عليج تبقين وحدج ومحد يمج يداريج وخايفه اجيج لا اكون مصابه وانقلها الج ..

- مالي خلك احجي روحي وبعدين أتصل

_ مستحيل اعوفج بـ هذا وضعج أبقي وياي على الخط هو نت قابل رصيد ، وهسه گومي افتحي كامره گدامي اعصري ليمون واشربي واكلي حتى لو بس برتقاله واخذي العلاج ..

- أي ، بس شوفي الوقت روحي نامي انتِ هم تعبانه من الدوام

_تاااره شلوون بـ عنادج

- راح اسويهن كُلهن لا يضل بالج..
غلقته منها أريد افتح رسائل عهد بس ما گدرت عيوني نار ومشتعله من الحراره شمرت التليفون وگمت اتجهت للبالكونه ، گعدت على الكرسي الهزاز المجمع كُله نايم أظلم كُلش وماكو غير صوت الهوا العالي غمضت عيوني أجر النفس گوه صوت يرن بـ أذني ..
أي يا تـاره وين فلوسج الجمعتيهن ، وين المعارف ، وين الاصدقاء الـ جانوا محاوطيج ، وين سلطتج ، شو كُلهن اختفن وبقيتي وحدج ، وحدج بكُل وكعه توكيها محد يمج ولا أحد وياج ..

حياتي كُلها صارت گدامي من يوم دلال أبوي وعيشتي مثل الاميره للـ يوم الوافقت بي على خطف الـ طفله مقابل فلوس ، ياريت لو ما موافقه ياريت لو حاجيه لـ لالي قبل لا اخطي هالخطوه ، جان بعدني ذيج تاره الـ كُل همها شلون تبقى حلوه ومحافظه على جسمها ، شلون تكبر المركز وتغير سيارتها على مزاجها وتشتري شقه بـ أرقى مجمع وكُل فتره تحير شلون تجدد أثاث الشقه والمركز ..

دخلت للمطبخ طلعت ليمون من الثلاجه ، شغلت الدله سخنت بيها مي بعدني دا أعصر بـ اليمون وأحس أيدي ثگلت وعيوني وحدها تدمع من الحراره جسمي نحول فضيع ، سحبت كرسي من الميز طعام گعدت وخليت رأسي على الطاوله ..

أسمع صوت مفاتيح ، باب الشقه أحد دا يحاول يفتحه گمت حتى أشوف منو بس مابيه اتحرك خطوتين لـ بين ما اگوم انفتح الباب اسمع اصوات أشخاص دخلوا..

دا أطلع من الفاصل بين المطبخ والصاله صار گدامي طلحه وعساف بقيت واكفه بـ مكاني مصدومه
تقدم طلحه بكُل سرعه ولهفه وبدون تردد حضني بكُل قوته من الصدمـه ما انطيت أي رده فعل ، ابتعد عني لزم وجهي بـ كفوف ايده عيونه تتجول على معالم وجهي الـ تعبانه صار يبعد الخصلات الشقره القصيره من عيوني ويردد بصوت ناصي الحمدلله..

صارت عيني على عساف جاي بـ الشورت الرياضي والفانيلـه الرياضيه ، النوم بعينه مخلي أيده بجيوبه مدنگ رأسه مايباوع علينا..

طلحه يحجي ونظراته كُلها قلق
_ وجهج صاير جمر من الحراره كم مره گتلج من يصير بيج شي تتصلين عليه أو على عهد ، بس راسج يابس

حرف ما طلع مني معقولـه واقع لو حلم معقولـه دا اهلوس من الحراره أخاف انطي أي رده فعل ..
سحبني من أيدي ساندني گعدني على التخم ، تقدم عساف يفحصني وبينت على وجها الصدمه من خله كفه على جَبيني ولامس الحراره

- أني مدا اهلوس مو صح

صار يضحك بصوت عالي
_ حقج هو أني لحد هسه ما مستوعب شلون وصلت من غرفتي لـ بيتج ، نايم ما أحس الا السيد طلحه الله يسلمه يريدني أمشي وياه بدون ما أعرف وين اگُله بس انطيني مجال اغير ملابسي ماكو خبصني ..

_ لعد المن سويتك دكتور أذا من أريدك تتعاجز تمشي

- افاااا عليك سيادتك طلحه تعيرني
صاروا يضحكون بيهم حتى يلطفون الجو
طلع تليفونه من جيب الشورت يكتب بـ الانكليزي علاج دزه على واتساب لـ طلحه

_ المُهم ما اتوقع هسه أكو صيدله مفتحه دزيتهن ألك عود جيبهن الصبح ضروري تاخذهن لا تتأخر ..
رفع رأسه من التليفون رافع حاجبه مستفهم
انتَ راح تبقى عدها مو ؟

_ أي

باوع عليه
- عيوني ما بيج غير العافيه ، وعلى فكره لو ما صاحيه جان صارت الج جلطه انتِ مناعتج قليله حتى لو اتشافيتي من الكانسر بس تبقى حالتج تنتكس بين فتره وفتره أذا عصبتي بشكل مفرط و أذا ما التزمتي بعلاجچ بس الصاير بيج هسه من العصبيه حاولي تراجعين نفسج تشوفين على شنو عصبتي شنو اليسوا تهلكين صحتج علموده ..

_ ماشي ، شكراً تعبتك

_ ولو ادللي ، هو اگدر أرفض طلب لـ أبو عساف ..
طلحه شمر السويچ بـ اتجاه عساف

_ أخذ سيارتي أرجع بيها وعود الصبح دز واحد من الحمايه يرجعها ودير بالك من تسوق انتبه وبس توصل أتصل عليه

اخذهن ودار ظهره يطلع صاح
- بعد أوامر ثانيـه
گالها وطلع يضحك سد الباب ورا..
علاقته ويه طلحه وتقارب العمر بينهم كانوا أخوان مو أب وابنه..

درت وجهي ناحيتـه واحجي منفعله بكُل عصبيه
- شلون تحضني گدام عساف طلحه كم مره اگُلك أكره أحد يطخني هاي عود انتَ القاضي الـ تعرف الحلال والحرام ، وتگدر تروح ما بيه شي وراك دوام ليش تقلق راحتك وياي ..

أبتسم تك خد بثگل ..
- كُل ما اگول خلص هاي النهايه ما أحس الا أني يمج ومتمسك بيج أكثر وأكثر..

_شكراً على موقفك بس خلص تگدر تروح

فتح أزرار الأكمام يرفعهن ويحجي بدون اهتمام
-اذا بـ مرضج أتخلى عنج لعد شوكت اوكف وياج وأثبت الج أني رايدج بكُل حالاتج

دخل للمطبخ وصاح بصوت عالي حتى أسمع
- وين الحليب والگهوه

_ بـ الكاونتر القريب على جهه الثلاجه

للحظه صفنت على رحمه ربي قبل دقايق جنت منهاره من الوحده العايشتها ، فجاه لگيت أبني و طلحه يمي الشعور الصابني بيومها ما عرفت اوصفه لا هو حزن ولا هو فرح ، ما ردت ابجي ولا تنزل دموعي فتحت باب البلكونه الزجاجي وطلعت الهوا يضرب بوجهي مانعه دموعي تنزل ..

رجعت گعدت على الكرسي الهزاز نفس الگعده بنفس المكان قبل دقايق بس الـ شعور يختلف خلال دقايق كُلشي تغير..

دخل شايل كوب گهوه بـ أيد والايد الثانيه كلاص حليب ، قدم الحليب ألي اخذته من أيده ، سحب وأحد من الكراسي الـ بـ بلكونه صارت گعدته گدامي بـ الضبط ..
درت وجهي عنه أشرب بـ الحليب الحار والعسل ..

_ تاره وداعـه عساف وداعتج الـ ماعندي أغلى منكم ما بيوم لزمتج أو حضنتج بغير دافع الخوف قسماً بـ الله لو جانت نيتي غير شي جان أني انسحبت تلقائياً وادري حرام وأن شاء الله ما يبقى حرام بعد ..

- شنو قصدك

_ بعدين نتفاهم هسه بس اصحي ما أريد غير سلامتج

- بس لالي عدها نسخه مفتاح شقتي شلون أخذتها وشمدريك مريضه ترا لحد هسه ما مستوعبـه الصار قبل شويـه..

_ عهد متصله عليج ومراسلتج وانتِ ما راده هي ضاله تفتر فوگ رأس أمي خايفه وقلقه تگللهم تاره أول ما أتصل ترد ليش هسه يوم ونص ويطلع يرن وماترد عدها رقم لالي مخابره لالي ونفس الشي ما تردين عليها ، أتصلت عليه وهم رجعت أتصلت وما تردين ضال بالي يمج وحدج بالبيت لا سامح الله صاير شي ومحد يمج جنت بـ كركوك معزوم بس خلصت العزيمه اجيت لـ بغداد قبل ساعتين وصلت تقريباً و أول ما وصلت خابرت لالي سألتها عنج حتى أعرف أذا ما راده عليهم اجي لـ بيتج أساساً رجعت لـ بغداد علمودج ..

- يعني لالي انطتك المفتاح ؟

_ لا ما قبلت ، المهم من خابرتها رفضت تحجي وبس كالت زينه ضغطت عليها حجت وضعج وخوفها عليج ما تگدر تجي بسبب دوامها بـ المستشفى واتصالها المباشر ويـه المرضى فـ تخاف لا تنقل الج المرض ، أني من زمان أعرف لالي الوحيدها عدها نسخه مفتاح شقتج طلبت منها ورفضت بشده گوه قنعتها رحت أخذت عساف من البيت وبعدين رحت لـ بيتها اخذت المفتاح ..

باوعت عليه بـ ابتسامه كُلها دموع ..
_ تاره من اليوم بعد شنو تسوين ما أتخلى عنج ولا اعوفج وحدج ما يهمني ماضيج المهم عندي تاره الاعرفها أذا انتِ راسج يابس وعناد أني راح اكون بـ اصرار اقوى من عنادج

- وعساف ترا مبين كُل تصرفاته تمثيل ويحاول يجبر نفسه يتقبلني لخاطرك ، تعرف شنو يعني أموت ألف موته وهو يعاملني حالي حال الغريبه

أخذ نفس بقلـه حيله
_ وعدني راح يتقبل وجودج

- لا ، أني نفرضت عليه فرض وهو من حبه ألك مدا يگدر يرفض طلبك وهم لأن هو سبب بطلاگك من زوجتك السابقه فدا يحس بتأنيب الضمير ..

فتح عيونـه على وسعهن من كلامي ..
- منو گلج ؟

_ عساف ، شنو الـ سبب

گام منزعج كُلش ومتنرفز وكف گدام المحجر يباوع على محيط المجمع مخلي ايده بجيوبه ، طلع جگاره من جيبه ورثها يدخن بعيد عني ..

- بيوم من الأيام جانت تخصني يصعب عليه احجي بـ السوته عساف أبني الوحيد أول فرحـه ألي ردت اخسره للأبد بسببها ..

ألتفت ناحيتي
_ أمشي ندخل جوا نحجي مو زين عليج الهوا قوي ..

- أذا ما تريد تحجي عادي

طفى الجگاره بـ اصابيعـه شمرها وباوع عليه
- لا عادي ، بس تغطي زين بـ الغطا وجهج أحمر لو تدخلين جوا أفضل

سحبت الغطا غطيت بي حتى شعري
- أريد هوا نظيف جسمي تكسر من گعده السرير صار أيام..

رجع گعد بـ مكانه خله عينه بعيني يحجي بكُل هدوء وثقه
- بـ 2013 تزوجتها زواج تقليدي جانت محاميه وياي وأقارب أمي يعني گولي صارت سالفه نسوان الخطبه ، عساف بوقتها جان عمره 18 يدرس للسادس ، بيتي نفسه تزوجنا بي ، الطابق الفوگ لـ عساف كامل غرفه وحمام وصاله خاصه الـه ولحد هسه وهو مو من نوع الينزل حتى الأكل العامله تصعده لـ غرفته ملتهي يقرأ وبوقت فراغه يلعب رياضه عنده اجهزه بغرفته وخاصه من تزوجت عزل روحه أكثر حتى تأخذ راحتها صرت أبني ما اشوفـه ،
ورا شهر من الزواج صارت تشكي وتحاول تلمح بطريقه غير مباشره عساف يتحرش بيها ، جنت أسوي نفسي ما افهم تلميحاتها لان واثق بتربيتي وما أريد اخرب الزواج من ورا حجي نسوان ..

- معقولـه عساف !
ما تطلع منه

- من كلامها المستمر زرعت الشك بگلبي وعقلي ، لحد ما ورا سنه أو أقل تقريباً ما أتذكر المده بـ الضبط جان يوم جمعه الكُل عنده عطله ، وأني طالع ويه جماعـه تأخرت لليل يلا رجعت انصدمت وأني أشوفها تراكها مشگوك وشعرها مهلس ورگبتها مشخوطه ، سألتها صارت تبجي وتحلف عساف محاول يعتدي عليها وتحجي كلام غير لائق لدرجـه توصف الطريقه المعتدي بيها ..

- عساف شنو موقفه

- جانت أيده مشگوكه على طولها وما حجه غير كم كلمه..

- شنو ؟

- أني تربيتك ورجال طالع من ظهر رجال ، وانتَ قاضي وتعرف كُلش زين بين الـ يكذب وبين الـ يحجي الحقيقيه ، وراضي بـ أي قرار تتخذه اتجاهي..
ما حجه غيرهن ولا برر نهائياً ..

- الموقف صعب شلون گدرت بيومها تحكم

- أدري بيها كذابـه وتصرفاتها مدفوعه من أمها واخواتها حتى لا يأخذ الورث عساف ، وحتى اطرده من البيت ويبقى البيت بس الها ، رغم هالشي حاولت انطيها فرصه بـ أنو تنكر وتعتذر حتى يستمر هالزواج ، بس هي راحت خابرت اخوانها وأهلها تتهم عساف گدامي وبكُل عين قحه تمثل مظلومـه ..

- الله يساعدك بيومها شلون گدرت تطلع عساف من هالتهمه ..

- من اليوم الـ بدأت تزرع الشك بعقلي رحت بكُل هدوء وبدون علم أحد حتى الخدامه ما تدري ، انتظرت عساف وهي هم يطلعون للدوام ، واتصلت بواحد يشكل كامرات داخليه وصوتيات بـ داخل البيت حتى الحمايه مايدرون ما أثق بـ أحد ، شكل كامره رتبها بطريقه مخفيه بـ الصالـه وبـ بالمطبخ وبـ الغرفه بس مو من ناحيه السرير وحتى بـ صاله الطابق الثاني هم شكل وربطتهن على الابتوب الخاص وخليت رمز ..

ابتسمت على ذكائه
- وهي ما عرفت

- لا محد عرف ، أساساً محد يخطر على بالـه أسوي هالخطوه فـ لهسبب جانت تتهمه بكُل ثقه ..
تركتها تحجي وتعيط وتلطم وحيدها ودخلت للغرفه قفلت الباب وفتحت التسجيل ، مع الأسف طلعت مدخل حيه لـ بيتي ، بكُل المقاطع هي التحاول تتقرب لـ عساف وهو يصدها بكُل عصبيه ويتركها ويصعد لغرفته يقفل الباب ، آخر مقطع جان قبل لا أدخل هو نزل وهي شگي تراگج كدامه وهلست شعرها وصارت تگله هي وتضحك ألا أخلي أبوك يطردك تحلم تحصل شي من فلوس ابوك مو عود عبالك انتَ الكبير وجهالي ما يحصلون شي ،
وهواي صوتيات وتسجيلات سمعتهن ، طلعت الها حاولت انطيها فرصه وطلبت منها تنكر وتعتذر بس هي أصرت على كذبها اجوي اخوانها وعمامها هالشي أخذته لـ صالحي ..

طلعت الابتسامه من كُل گلبي عيوني دمعت من الفخر أبني عنده أفضل أب..
- ولا يوم ندمت لان نطيته الك ولو يرجع بيه الزمن هم انطي ألك..

هز رأسه يبتسم
- شغلت التسجيل والصوتيات كُلهن كدامهم هي انصدمت لان ما تدري وبقت حايره شلون تسد الموضوع بعد ما جمعت كُل عشيرتها تتهم أبني وتتهمني اتستر الـه ، طلگتها گدامهم وبعدين تحول الموضوع عشائرياً حتى يعتذرون طبعاً لـ صالحنا وهيج يلا نحل الموضوع ..

- لعد ليش عساف دا يحاول يرجعكم

- كُل ظنه جنت سعيد وياها وبسببه طلگتها ، طلب مني أرجعها وهو بعد ما يدخل للبيت بس أهم شي راحتي ، وفعلاً سواها بس طلع معدل سافر كمل طب بـ مصر وسنه كامله ما يقبل يرجع زياره للعراق بقى معتقد أني أحبها وهي هم تحبني وعلاقتنا حلوه وهو جان الطرف السيء ، صارت تحاول تتودد ألي ودز عالم ودز نسوان ومخلت أحد ما دزته حتى تعتذر ونرجع ..وقبل كم يوم سمعت بيها تزوجت بعد ما ملت من المحاوله..

- وما نطيتها فرصـه ثانيه

- لا الـ يَغدر مره يغدر ألف مره ..
عساف خط أحمر بحياتي ألا هو ، وهي أذتني بي هواي بسببها أبني سنوات طويله عايش بالخارج وحده وما يقبل يرجع يحس نفسه سبب بطلاگي وعدم استقراري ويحس نفسه ثگل عليه ..

- شعجب ما صار طفل بهالفتره وهي مبين مستقتله على الفلوس..

- نعمه من الله ، جان هسه متبهذلـه أحوالي
عندي عساف يسوا الدنيا مكتفي بي ما أريد غيره ..

- طلحه كلمه شكراً قليله تعبر عن مدى امتناني لـ تربيتك لـ عساف..

- واجبي
گام وكف أخذ الكلاص من أيدي وكوبه ودخلهن جوا ناداني أدخل ، مجرد ما وكفت وأحس أريد اتقيء ، غصب عني ركضت للحمام اتقيء طلعت روحي گعدت على الأرض منتهيه قبل ثواني ما بيه شي بس وكفت اتخربطت أحوالي ، ما أحس الا رفعني من الأرض دخلني للحمام فتح المغسله غسل وجهي بـ مي بارد ويقرا آيات بصوت ناصي كُل ما يرش مي ..

طلعني ساندني للـ صاله مددت على التخم لازمه رأسي من الألم اليدگ بي شلون المسمار ، مادري وين اختفى شويه واجه جايب تيشيرت نص ردن..

- راح أطلع وغيري ناگع عليج لا تبقين بي

كمت تربعت على التخم حاضنه رأسي من الوجع العذبني ، من شربت الحليب انتهيت ..
- بعدين كُلش تعبت

دخل للمطبخ وطلع بـ ايده طاسه
گعد بصفي على التخم وسحب رأسي خلاه على رجله استسلمت بس أريد أنام وبعد ما اگعد من الألم
يسوي الگمادت والايات القرانيه ما فارگت لسانه

- طلحه

- روحـه

- أذا أموت لا تنساني ما عندي غيرك وغير لالي بهالدنيا يتذكرني ويقرالي الفاتحه

- من عُمري على عمرج ، تاره انتِ وعساف روحـي وبدونكم مالي روح

- أكو شي بگلبي أريد احجي ، ذاك اليوم من تعاركنا ما كذبت وفعلاً محد لازمني بالحرام ولا أحد طاخني برضاتي غيرك ، أذا متت خلي لالي تحجي ألك كُلشي تعرف هي وعمتي ..

- وأني ما أريد أعرف لان واثق منج

- مؤسف ومحزن ما عندي بالدنيا يتذكرني غيرك انتَ ولالي فنيت حياتي بـ الضياع والوحده جنت أتمنى عساف يتقبلني واسمع منه كلمه ماما لـ مره وحده بحياتي بس خلص أمره منتهي وحقه..

ابتعد عني يفرك بوجها متنرفز
- شكو تحجين هيج وقته هالكلام هسه تصيرين زينه وكُلشي ينتهي

- أريد أنام تعبانـه
تقرب لزم وجهي بـ أثنين اديه مثبت نظراته بعيوني

- تاره لا تجيبين سيره الموت على الـسانج

نزلت دموعي بدون كلام
سحب رأسي ضامني لـ صدره بكُل قوتـه يمسد على شعري بكُل هدوء ويردد
- الصبر منك ربي الصبر من عمري لـ عمرهم

- عوفني وحدي أريد أنام
تركني وراح گعد بـ البلكونه وحده ..

گعدت على صوته يخابر وكُلش معصب طلع مستعجل وبلغني ساعه أو أقل ويرجع واذا أتأخر يدز عهد والعلاج جابه موجود على الميز ..
شربت العلاج والعصاير الطبيعيه الجايبهن شربتهن وكُلشي سويت حتى بس أخلص من الوجع دزيتله رساله ما يحتاج يجي أو يدز أحد صرت زينه ..

الثلاجه جانت فارغـه وهواي اشياء محتاجه أكثر من أسبوع هامله البيت وأحس نفسي انغلقت أريد أي حجه حتى أطلع بيها ، نزلت طلعت السياره من الگراج رحت اتسوگت وكملت بطريق الرجعه
فجاه فقدت توازني وعيوني غوشن بنص الشارع العام والسيارات سريعه فلت الـ ستيرن من أيدي آخر شي شفته الكزاز يطافر بكُل مكان ...

يتبع ..

_____________

دخلت مليون وبعدها مستمره 🤍.

البارت هالمره بس لـ تاره حسب طلبكم ..