رواية الكارمــا الفصل الثامن عشر 18 - بقلم آيــه آلـ صبري

چنه نحلم،
چنه واحنه إزغار كل عصرية نلتم؛
نلبس جناح الكواغد
نركض اويّ الغيم حافين وعلينة الليل يلتم
چنه شبعانين ماندري الخبز ياهو اليجيبة !
صافي مثل الماي أملنا،
وبطرگ لعب الشوارع؛
لا جگاير ، لا سياسة ، ولا حبيبة، 🌿

.....................

احاول استوعب كلامه ...

فتحت الباب بسرعه وطلعت اله غلق التليفون مجرد ما شافني ...

طلحهه شنو هالكلااااام السمعته
ترررا سمعت ب اذني لا تكولييييي كذب

ما يباوع عليه ولا يرد وما منتبه الي اصلاً ...

طلحه مووو دا احجييي

عافني وراح فتح باب الحمام ودخل عافه مفتوح ..

فتح الدوش وكف جوا لابس بس البنطلون

نظف ظهره وزنده من الدم ....

بدون ما ينكع البنطلون مي

بعده اتجهه للمرايه وكف كدامها واخذ ملقط من السله الشفافه معلكه قريب على البانيو

دار ظهره على المرايه عيونه على المرايه حتى يكدر يشوف كتفه
ب ايده صار يلقط الكزاز

واكفه اني باب الحمام احجي وما معبرني

ضربت الباب حيل ب ايدي

موووو داحجييي ليش تستفززني ....

خزرني وشمر الملقط على الارض وطلع من الحمام

_صوتج نصي

صارت عيني على سلاحه شامره قريب على تليفونه

اخذته بسرعه فتح عيونه

تقربت اله جريت ايده خليت بيها السلاح

رفعتها على كصتي

داير وجهه عني ما يباوع

طلحه افهم اني ما احلف ولا بعمري حالفه بس اليوم احلف الك
قسمااااً ب الله عشت حياتي ونسيت الكل كُلكم نفيتكم من حياتي
صعبه عليه ارجع ابدي من الصفر صعبه عليه اعيش حياه تختلف اني كضيت عمري وحيده وتعلمت على الوحده وحابتها ما اكدر ارجع لحياه هوسه بيها هواي عاالم ...

لا تخليني ارجع للصفر ...

خله عينه بعيني خازرني

_خايفه من المواجهه

اعترررف اني خطااا وكُل حياتي خطأ وكُلشي سويته حررراام وخطأ واستحق الداعيشه

اقتلني هسه واخذ ثارك مني
بس لا تأخذه بالطريقه هاي والله ما اكدررر والله

سحب ايده وضم السلاح ب صفحته

كعدت على الكرسي وايدي على راسي ابجي دمرني ببروده تلف اعصابي ب استفزازه ...

طلحه انت ما عذبتني جسدياً بس دمررتني بكل هدوء وبرود لعبت ب اعصابي لعب ....

حرك شعره الناكع مي ب ايده وظل يفتر بصاله رايح جاي وما يباوع عليه ....

_كومي البسي شي استري نفسج وبعدين نحجي

ياااابرودك اني وييين احجي وهو وين يحجييي

جانت اكو غطوا على الطاوله محظرتها حتى اغطي بيها الطاولات شمرها على كتفي

يلا كعد وباوع عليه

كعد كدامي

_ ما توقعتج تخافين من المواجهه صاار سنين تتهربين بس سبحان الله ربج رجعج الي برجلينج
عفتج 16 سنه
ونفيتج من الوجود انتي رجعتي
محد جان بينا متوقع يرجع يشوف الثاني بس مبين ربج كاتب غير شي ويغير الاقدار بلمح البصر
الصار مو صدفه قدر مكتوب ...

اتهسترت من سمعته يحجي بكل ثقه وهدوء

شمرت الغطوا على الارض وكمت كدامه

يعنيي هسسسه شنووو راح اسووي

صاح

_ استغفر الله

ودار وجهه عني

بنظرك كل السويته بيه قليل وما طفه نار گلبك

_ ما اتحسف ولا اتندم انت خربتي مكانج بنفسج ....

شكد قاومت ما نزلت دمعتي بس بهاي حجايته شهكت ...

دار راسه يباوع عليه
كفوف ايده لزمت وجهي يمسح دموعي

كعدني على التخم

_شفتج نگلبت بيضه مو زين على سكرج لا يتخربط
اهدي اهدي البجي والاعصاب بعد ما تفيد ....

مستمر يحجي بكل برود ويزيد استفزازي شنو اتوقع من قاضي واسلوبه شلون راح يكون مثلاً اكيد ضابط اعصابه ...

سكتت كل الكلام مايفيد وياه ولا راح يغير رائيه ...

غمضت عيوني ودرت وجهي عنه امسح بدموعي ...

فتحت عيوني دا اكوم لكيته صافن عليه وملامحه كلها غضب شكد ما جان بارد قبل شويه هسه وجهه يخوف من العصبيه ...

درت ظهري

سحبني من زدني رجعني عليه

نبت اصابعه بيها

انداريت عليه عيونه خازرتني

دا تأذينيي شكووو ...

اشر الي بعيونه من ناحيه صدري

_ شنو هاي

خليت ايدي اغطي مابيه شي ...

يقصد على الخراميش ب الكزاز مو هواي بس لان باقي دم مبينه هواي

_احجي شنو سوو الج

ماااابيه شي عجيب

منتظر مني الجواب ورافع حاجبه بشك

خدش بسيط من اطشر الكزاز يمكن

دار ظهر ورجع كعد على التخم رفع راسه خله ايده على عيونه ويردد استغفر الله ربي

دخلت للغرفه قفلتها وشمرت روحي على السرير
اكو كلمه غير كلمه تعبانه حتى توصف الداعيشه
وكميه العذاب الدامر بي

ضامه وجهي بالمخده وابجي منو راح يصدك اني عايشه كل هالعذاب النفسي وهمه يشوفوني ب احلى صوره من اطلع وب ارقى لبس وضحكه الكذابيه والمفاخره والكبرياء الشايفني بهاي الصوره شلون راح يصدك اني حياتي سيئه وسوده....

مر الوقت واني مدده على السرير وصافنه شلون القدر رجعني بسبب خطأ واحد ...

فتحت الخزانه طلعت منها اي بجامه وتشيرت كدامي ..

انتبهت على نفسي من ورا العصبيه نسيت شلون جنت طالعه كدامه

مالابسه غير البنطلون والقميص ماكو بس داخليه
واني اكول ليش مايباوع عليه وبس يستغفر
ظل يستفزني ببروده لحد ما خلاني افصل حتى عن نفسي ....

يلا هسه هو قابل منو ادري بي ما يباوع عنده سيطره فضيعه على نفسه ما يتأثر ب اي مراه كدامه ...

دخلت للحمام سبحت ومشطت شعري
الحمام الخاص مالتي داخل الغرفه

اشتاقيت لعنايتي بنفسي قبل
المعالج والعطور كُلهن على الميز تواليت ومالي نفس الهن ....

ولا الي واهس ...

دا ارجع اضم الفلوس وصارت كدامي مخمريه شعري وصيتها من الكويت خصيصاً الي صح غاليه بس تسوه تخلي الشعر اسبوع كامل وحتى لو تغسلينه عطره يبقى بالشعر ...

خليت منها
باوعت على كل الاشياء بغرفتي

وابتسمت بيني وبين نفسي بقهر كُلشي صار ينكال عنه كلمه جنت وقبل ....
شبسررعه الايام تركض ودارت بيه ...

رتبت الغرفه وطلعت منها ...

الشقه مساحتها كبيره بالنسبه لبنيه عايشه بيها وحيدها 200 متر ...

ظلمه ولا ضوا مشتغل مطفيهن كُلهن طلحه
ونايم على التخم بدون غطه ...

مادري وين جان قبل لا يجي الي بس مبين من نومته كُلش تعبان ...

المكان صاير فوضى وهوسه رتبته بكل هدوء وبدون ما اطلع صوت ...

قميصه مشمور على الارض بي دم اخذته ونظفته بالغساله الاوتو وضفت اكثر من ماده غسيل حتى ينظف ..

لان ادري بي راح يطلع شلون قابل يطلع بدون ملابس منا المجمع ...

ورا ما خلصت خليته كدامه على الكرسي من يكعد يلبسه ...

صار هواي ما شاربه اركليله ولا جگاير اشهر طويله مرت واني مبتعده عنهن ...
واحس ما اشتهيهن بعد نفسي نسدت من كُلشي ...
حتى لو اشوفهن كدامي ما اهتم الهن ...

طلعت كهوه من الكاونتر وخليتها ب الجهاز شويه وصارت
كوب كبيره شربته واني واكفه بالمطبخ ورجعت سويت كوب ثاني اخذته وتمشيت على كيف للبلكونه مالتي ...

بعدت البردات الشفافه وفتحتها ..

جنت كُلش احب اكعد بيها كل ما اجي تعبانه احضر اركيله واكعد بيها ديكورها صرفت عليه مبلغ كبير مقارنه بمساحتها ...

بيها كُل الورد الطبيعيه كُلهن ميتات
واثاث خاص الها

سديت الباب وسحبت كرسي كعدت
المجمع هدوء الفجر ساعه 5 الصبح
المجمع جان جديد اول ما نفتح بوقتها اشتريت شقه رغم سعرها غالي لان مكانها راقي ....

السما زركه صافيه
رفعت راسي الها صافنه ...

خلال شغلي بالمركز مره نشرت صوره لنفسي واكفه بصف سيارتي والمركز وراي
بوقتها صارت هواي تعليقات سلبيه
لان جان شي غريب بالنسبه للعراقين بدايه مواقع التواصل كُلشي اليشوفوا يتفاجؤون بي وخاصه البنات ..

كُلهم استسهلوا الطريق الاني بي وانو حصلت فلوس بسهوله حتى وصلت لهل مستوى اشتري مركز ملك وسياره واتهموا لان ابنيه تفكيرهم القذر ...

صورت الهم بس اللحظات الحلوه
مستحيل اصور الهم واني متعاجزه اكوم من السرير لان بعدني نعسانه ومجبوره اكوم لان وراي دوام ..
و لا كميه الضغط الاتعرض اله
من اتحمل الموظفات ومشاكهلن ماعدا سخافات بعض الزبائن الماتنتهي
ما اصور الصداع المزمن العندي لان ابقى على وكفه وحده طول اليوم ....

محد يعرف شكد اجاوزت بحياتي تفاصيل بيوم من الايام دفعتني للانهيار ..
اجاوزت خيبات الاصدقاء طول هاي السنين الوثقت بيهم وخذلوني اشد الخذلان ..
واتعمدوا جرحي بعد ما شافونه صرت انسانه ناجحه وصاحبه نفوذ ...
كم مره اجاوزت القلق حتى ابين كدام المقابل ما متأثره وهادئه ..
اجاوزت شعور الفقد الحنين الاشتياق حتى الحزن والندم ماعدا جلد الذات ...
كل هالمشاعر جنت احتفظ بيها حتى ما ابين كدام احد ضعيفه وهشه ...

محـد يعرف شنـو الدايصيـر ورا الكواليـس ......

جتفت ايدي حسيت برد من يوم سويت العمليه لليوم واني وضعي مو شي قبل مجنت ابرد ولا اتأثر بالبرد هسه العكس ...

اي شخص ينبهر بحياه غيره لاي سبب من الاسباب فهو شخص طفولي ومو ناضج ..

لان الموازين الباطنيه عادله كُلش ومو واجب اي شخص تحجي وياه يجي يحجي الك هو شنو فقد
بحياته مقابل يحصل على شي ثاني ....

شربت القهوه قبل لا تبرد ....

دخلت بكل هدوء كعدت كدام طلحه نايم ومخلي السلاح بين رجليه يخاف لا اخذه ..

ملامحه القاسيه حتى بنومه
شعره الاشيب اليبين الي شكد مرت سنوات ويذكرني شلون العمر يركض بدون ما نحس ...
كتفه العريض وطوله مغطيات التخم ..
هيبته و وقاره ذكائه حكمته بروده استفزازه
كل هالاشياء صارت من صفاته وتوصفه ....

ابتسمت بقهر شلون اقنعك يا طلحه ..
حچيك چان بارد وياي بس حركني حرك ....

سرعان ما بهت وجهي من شفت المحبس الابسه حاولت اتقرب اكثر حتى اركز بي واشوف شنو منقوش بس ابتعدت خفت لا يكعد ويشوفني يفكر غير تفكير ...

رجعت بسرعه للبلكونه ...
اتصلت على لالي بعدين استوعبت انو هسه فجر اكيد نايمه

فصلته بس مطولت ثواني ورجعت اتصلت ..

_صباح الخير شلونج

يعني

_كعدت اصلي وشفتج متصله

اي ارجعي نامي

_بيج شي صوتج متغير

سولفت كُلشي الها بالتفصيل

_وهسه طلحه وين

نايم

_وين نايم

شبيج شنو هالسؤال يعني اكيد بصاله

_ شنو جانت رده فعله خوما عصب عليج

محجه اي شي نهائياً قمه البرود اي رده فعل ماكو هذا الدمرني وتلف اعصابي مدا يحجي وحتى مدا يحاسبني ولا دا يعصب عليه بس ساكت
و من استفزه و اجبره يحجي ما يحجي

_يعني حتى مسائلج منو همه

لا ابدد ولا حجه كلامه ولا حاول يفهم شنو سالفه
تخيلي جاي وحده بدون الحمايه

_زيتونه اني عندي ثقه بطلحه ما يخطي خطوه الا بعد ما يحسب الها الف حساب ويتأكد هالخطوه راح تكون من صالحه ..
ومتأكده منه مستحيل يسوي شي يأذيج
لا يغرج بروده طلحه معروف افعاله التحجي مو هو ...

لالي ليش تنرفزيني صار اشهر يمه اصلاً راح يصير سنه
وما اعرف شنو البراسه وليش مخليني كل هاي المده رغم يكدر كُلشي يسوي ...

_احس خطأت من طلبت المساعده منه خايفه عليج شكد ماهو زين بس مستحيل يخلي اي موضوع يعدي بسهوله ...

شنو يريد يسوي الي خل يسوي ما مهتمه
بس اني دا اكره ...
حجيتها وسكتت

_تكرهين شنو ليش سكتي

دا اكره التقارب الدايصير بينا بكل موقف الموضوع وحده منرفزني و مخليني اكره العيشه هاي ...

ظلت ساكته ما عدها جواب شويه ورجعت حجت ..

_ اني هم حرت شنو براسه ليش دا يصرف هيج وياج ...

نهيت الاتصال وياها واني غضبي نفسه زاد ما قل ...

طلعت الشمس وهو بعده نايم ...

غمضت عيني وكل الصار مدا يطلع من راسي اكره تقربه مني ..

صرت اردد بصوت ناصي ..

فأجبني بربد أنقذني تسمعني و لست تكلمني
يا روحهما ما هكذا كنت تشتاقك أروقة البيت
هل سبق و أن شاق أحدهم لملاك
هل سبق و أن شاق احدهم لملاك غاب و لم يأتِ

اردده بصوت ناصي وكل الصار مدا يطلع من عقلي ..

رفعت رأسي

طلحه واكف يباوع عليه ومكتف ايده

درت وجهي عنه

دخل وكتل

_يلا امشي نروح

كمت قفلت البالكونه وطلعت حذاء لبسته وقفلت كل الغرف حتى الحمام قفلته ..

_ وين القميص

انطيته اله لابسه وظل واكف يعدل بالردن حتى ما يبين مشكوك شكد يهتم ب ادق التفاصيل

اخذ تليفونه وسلاحه وراح طلع
قفلت باب الشقه ..

نفتح باب المصعد ودا نطلع منه
جانت اكو مراه كبيره بالعمر وبنيه ويانه نزلن بالمصعد ف من طلعنه من المصعد

صارت تحجي للبنيه وياها

راح تخرب سمعه المجمع نوب زلم الليل كله طابه طالعه عليها
وبكل عين صلفه تنزل وياه متباهيه
شخرب الزلم غير هاي النسوان
خطافات الزلم هسه تلكينه عايف مرته وظال سهران يم هاي

صوتها عالي سمعته ترس اذني البنيه وياها تكللها اسكتي

طلحه جان يمشي كدامي

ندار عليه رافع حاجبه

رجع للمراه ناداها

_حجيه

بسرعه التفت اله وكالت

_تفضل ابني

_ التحجين عنها زوجتي واليجيب اسمها ب الموزين ينكص السانه
وهالمره عديتها لان مراه كبيره احتراماً لعمرج

بلغي كل المجمع الخايفه عليه لا يخرب

وابتسم الها ب استهزاء

الست زيتونه مزوجه والجان يمها البارحه زوجها.....

اتجه الي خله كف ايدي بكفه ومشاني وياه
ما عافني لحد ما وصلنا للكراج طلع السياره وانطه فلوس ما ادري شكد للحارس
وهو عيونه راح يطلعن من الاعصاب ...

كعدت بالصدر مجرد ما صعد حرك السياره

تليفونه يرن اكثر من مره وما يرد كل شويه ينطي رفض
اخر شي وكف السياره على الجانب ونزل يرد

ابتعد مسافه ومادري شنو يحجي ..

صعد وغير اتجاه الطريق رغم جان لبيته وقربنه نوصل غيره ...

وصلنا لبيت امه

فتحت الباب ونزلت
سلم على امه وراح

احس امه تعودت على مشاكلنا وصارت متحجي ولا تسأل ...

مثل كل مره اختفى طلحه بشكل تاااام بس الحمايه تجي توفر احتياجاتهم وتروح ...

بهاي الايام حسيت امه عدها شك انو اكو شي بيني وبين طلحه بس ما حاولت تسألني ولا فتحت وياي موضوع ...

كاعده اصفح بالفيس بصاله وعهد يمي تقرأ محاضرات للمعهد الخصوصي ...
وجانت تأخر صلاتها بسبب القرايه وامها تتعارك وياها من تشوفها ما تكوم من يأذن اظل مستمره تقرأ....

ورا مخلصت صلاه الحجيه ظلت كاعده على السجاده وتحجي ويه عهد الواكفه تفتر وتقرا ...

_عهد اكو سحاره بيوم من الايام سوت سحر لمجموعه بنات

سويت نفسي العب بالتليفون بس بالحقيقه دا اسمعها اتونس على سوالفها ..

ف قبل وفاتها تابت وصارت سولف للعالم
تكول اكو بيهن بسرعه يأثر عليهن السحر ....
واكو بيهن يجيني الجن ويكول .....
نسمع صوتها بس ما نشوفها ....
واكو نوع ..
يشوفوها من بعيد بس فجاه اضيع منهم ..
وجنت ادز الهم المارد وهو اقوى من الجن ويكول ماكو مالكيناها ...
وادز العفريت يرجع نفس الشي يكول
ضربنا مشارق الارض ومغاربها وماكو ....

الاولى الماتعرف اصلاً الدين شنو
والثانيه اصلي وما ملتزمه يوم اصلي وعشره لا
والثالثه هاي ملتزمه بصلاتها ومتحصنه وما هاجره كتاب الله ...

_يمه هسه فوك ما خايفه من الامتحان نوب خوفتيني اكثر كايمه اصلي

الحجيه خلتها تكوم تتوضى وظلت تضحك وراها
باوعت عليه حسيتها تريد تحجي شي بس سكتت..

مرت الايام متشابها وبديت اتعود على وجود الحجيه وعهد بحياتي
طول اليوم بس تبجي وخايفه لا ما طلع معدل ..
وبعدين من وحده تسكت وترجع تقرأ...

الانكليزي اني درستها من الملل ماكو شي اسوي خلصته الها خلال شهر واحد بس وخليتها ضبطه
بس جنت اضغط هواي عليها لمصلحتها ...

لحد ما بدا دوام و اول امتحان شهري ب الانكليزي اخذت درجه كامله ابتسمت لفرحتها ...

بيوم جنت كاعده بالمطبخ ويه الحجيه هي تطبخ واني اظفر بشعري ...

اتصل عليها طلحه

من بعد الكلام حسيتها فرحت وتغيرت ملامح وجهه

_اي والله مشتاقه اله شوكت يجي
هلا بيكم انتظركم
ليش ما تجي وياه انت هم
هاا يعني هو مو بغداد

غلقت التليفون والفرحه مبينه عليها ...

للعصر اجه طلحه من بعد هالغيبه كُلها

امه جانت دا تسبح وعهد بالمعهد ...

واني مثل كل يوم كاعده اصفح بالتليفون ...

دخل سلم وتقرب عليه

_ امشي وياي البيتي بسرعه

باوعت ب عدم اهتمام

ما اجي اني مو صغيره حتى بكيفك توديني وين ما تريد عندك شي احجي هنا

جان تليفونه يرن اكثر من مره وما يرد

_ ما عندي وقت عوفي عنادج هسه تتندمين بعدين ترا

رفعت راسي اله
جان شكله كُولش اعصاب وعبالك مستعجل ..

شكو ليش شنو راح يصير مثلاً

_وين امي

بالحمام

ما احس الا شالني على جتفه ومشه بكل سرعته

انصدمت اريد اصيح بس امه منا عيب شوفنا هيج...

ايد شايلني بيها على ظهره وايد فتح بيها السياره خلاني بيها وقفلها

من راد يصعد يلا فتحها وبسرعه قفلها
طلع من المنطقه بكل سرعته ...

شنوووو السويته طلحهه شكووو شلوون هيج اشيلنيييي

رد على اتصاله خبلني بس يرن

_اي هسه تكدر تخلي يدخل
اي اي
ماشي
ما اوصيكم بعد

خليت شعري ورا اذني واعصابي تفور

احجيييي راح تخبلني بسكوووتك

مركز بالطريق ولا مهتم

_لمصلحتج

اي مصلحه غيررر افهم شكو

رجع تليفونه يرن

_بابا ليش مستعجل
غير الحمايه جايبهم جديد وميندلون بيتها وين
يلا حبيبي
صار يضحك بصوت

غلقه ورجع وجهه العصبي

شنووووو السمعته طلحه

ضرب ب ايده الستيرن حيل

_عاجبج الوضع الاحنااااا بي هسسسه

اي وضع شكو

ما اريد اصدك ولا اريد استوعب هالمره اني اريده يكُلي كذب ما اريده يجاوبني

حرف ما حجيت اخاف اسمع منه اي كلمه

وصلنا البيته اول منزلت حجه ويه الحمايه

_ممنوع احد يدخل ولا دخلون احد اغلقوا كل الابواب اني داخل انام ما راح اطلع اليوم

_سيدي مو ابنك يجي

_لا ما يجي اليوم نفذوا الحجيته

دخل كدامي فتح الباب راح الغرفته وقفل الباب ورا

كعدت على التخم واحس خلص الصدمات تراكمن عليه وحده ورا الثانيه
حتى حيلي خلص بعد مابيه اسأل والح عليه وما اريد احجي وياه......

ظليت الليل كله واني مكاني صافنه على الساعه دكت 12 ضبط

طلعت برا خليت رجلي بالمسبح من الجهه الثانيه ميشوفوني الحمايه جسمي صار احمر من العصبيه...

فزيت على صوت حجي ويه الحمايه وضحك

رفعت راسي حتى اشوف منو..

شاب يشبه طلحه بطوله ضخامته جسمه المرتب هيبته لبسه الرسمي
ب كُلشي يشبه طلحه الا عيونه الرصاصيه يلمعن من بعيد وشعره ولحيته الاشقر .....

دخل يتمشى ب اتجاه الصاله

احس شفتي يبست ونفسي ضاق من دا اشافه
بعيني .......

يتبع ....