رواية الخامس من أكتوبر الفصل الثامن عشر 18 - بقلم دانيا

رواية الخامس من أكتوبر

الفصل السابع عشر17

بقلم دانيا

قلت ليهو خدم حقين شنو انا م محتاج لخدم بس عاوز ارجع بيتنا سريع ،، عاين لي وبقى يضحك قال لي مافي زول قال ليك انت محتاج لخدم بس هم المحتاجين ليك .... هيكلك كبني ادم هم محتاجين ليك ،، وعلى فكرة هم ح يغيرو حياتك للأحسن لو انت بقيت مطيع ومرضي زي انا مثلاً قبل مني وبقى ينطق بكلمات غريبه م قدرت افهمها بعد شوية حسيت بطاقه غريبه في المكان حسيت بكتمه قبل عاين لي وقال لي ياهم اسيادي وتاج راسي جو ممكن تطلب اي شيء لو انت م مصدق ،، بقيت اعاين ليهو بإستغراب قلت ليهو لو فعلا كدا عاوز يفكو لي الحبل واول ما قلت ليهو كدا في كسر من الثانيه الحبال اتقطعت بقيت مخلوع بعاين ليديني ورجليني وتاني رفعت راسي عاينت ليهو ... قام غمز لي عينو وقال لي شفت م قلت ليك مفيدين .

قمت سريع من الارض وقفت على حيلي وبقيت بعاين ليهو قلت ليهو بس انا م بهموني مهما كانوا مطيعين اهم شيء اطلع منهم .... دفرتو وقع في الأرض وبقيت بقرأ ومشيت على الباب قبل افتحو حسيت بحاجه تقيله اخترقت جسمي زي كأنو اصطدمت بحيطه وفجأة بقيت بشوف طشاش طشاش اتلفت عليهو آخر شيء شفتو وشو وهو بضحك بأعلى صوت قبل ما اقع في الأرض.

سندس قال ليها اهدئي ياخالتو بقت تعاين ليها وقالت ليها سألتك انتي منو ووين عبدالله ؟ عاينت ليدها لقت مركبه ليها فراشه مدت يدها عاوزة تطلعها سندس مسكتها قالت ليها روقي عبدالله مشى يعمل الغداء للأولاد في البيت وجاي .... عاينت ليها بخلعه قالت البنات ومجتبى قاعدين في البيت وانا هسي ما كويسة ليه خالني هنا انا راجعه البيت اتصلي ل عبدالله قولي ليهو م يجي انا زاتي جايه ،، قالت ليهو تمام بتصل بس انتي روقي انا خليت تلفوني برا في الإستقبال بجيبو وبتصل ل عبدالله بس انتي اهدئي قالت ليها طيب سريع .

المحقق ساق ابوعبيده وساق معاهو اربعه من العناصر وطلعوا بطريق القريه واول ما وصلوا قابلهم شاب كدا .... رفع ليهم يدو نظام اقيفوا واول ما وقفوا العربيه جاء عليهم بعد سلم عليهم قبل ما يسألهم المحقق طلع ليهو الورقه مسكها قراها وعاين للتاريخ ورفع راسو عاين للمحقق قال ليهو من يوم خمسه والليله مضى عليهو عشرة يوم لو عايش زاتو م بتلقوهو لكن اتوكلوا ،، ابوعبيده اتخلع من كلامه وعاين ليهو وقال ليهو قصدك شنو ب لو عايش ؟ عاين ليهو واكتفى بالسكات طوالي المحقق قال للسواق دور ... دور العربيه وفي راس ابو عبيده الف علامة إستفهام دخلو القريه ومشو بيت الناظر على طول سلموهو الورقه قال ليهم زولكم دا م عندنا ونحن م بنسمح للغرباء يدخلو بيوتنا حتى لو كانو شرطه وانا احترمتكم لأنو دي اول مره اشوفكم ولو فعلاً الشاب دا داخل القريه دي كان بلغنا بيهو نحن زاتنا وهسي اتوكلو بسلامتكم .

ابوعبيده عاين ليهو بنظرة حادة وعاين للمحقق كان منتظر منو يقول اي شيء بس لمن لقى إنو م عندو كلام يقولو ابوعبيده طوالي اتكلم معاهو قال ليهو يازعيم كيف يعني نطلع نحن م جينا عشان نطلع .... الزول دا انا متأكد اختفى هنا في قريتكم دي وإذا م عاوزننا نفتش انتوا فتشو لكن م بنرجع فاضيين ،، الراجل عاين لأبوعبيده بغضب وقال ليهو احسن ليكم تطلعوا زي ما جيتو وإلا اتحملو عاقبة افعالكم وانا م عندي غير الكلام القلتو ليكم دا ،، المحقق مسك ابوعبيده من يدو واتبادلو النظرات وقال ليهو اهدأ ياشاب ... طوالي الراجل اتلفت عليهم تاني وقال ليهم إنتوا لو صاح عندكم القوه والشجاعه امشو ابحثوا عنه في " العتبه " في آخر المنطقه دا لو عندكم الجرأة تمشو هناك وقام مشى منهم خشى جوا ،، ابوعبيده عاين للمحقق وقال ليهو وين دي ؟ .

المحقق م رد ليهو وقال ليهم ارح ياشباب اتحركو ح نرجع قامو طلعوا برا من بيت الناظر وابوعبيده واقف محتار .... بعد مسافه طلع وراهم وقال للمحقق كيف يعني نرجع ورح المكان القالوا لينا الزول دا ،، المحقق ركب العربيه وعاين لأبوعبيده وقال ليهو دا مكان م من السهل نقدر نمشيهو ولا بنحاول زاتو لو عاوز ترجع اركب لو م عاوز خلينا نمش لأنو الدنيا قربت تعتم وم من صالحنا تمغرب لينا هنا ،، ولسه ابوعبيده واقف مصدوم من موقف المحقق قال ليهو لو م عاوزين تمشو انا براي بمش انتوا ارجعوا قال كلامو دا بغضب ودار ظهرو منهم ومشى بالإتجاه القالو الناظر .... السواق قال للمحقق الزول دا متهور وم اظنو يجي راجع تاني ،، المحقق بزهج قال للسواق دور عليك الله مالنا ومالو مش نحن كلمناهو تاني م عندنا بيهو شغله .

امي طلعت من المستشفى ومشت ركبت اقرب ركشه ومشت على البيت وسندس م قدرت تمنعها ... اتصلت لأبوعبيده م رد عليها لأنو تلفونو صامت ،، اول ما وصلت البيت دقت الباب جاء مجتبى فتح الباب لمن شافها اتخلع وقف مسافه فاتح خشمو وبعاين ليها جات دعاء قالت ليهو الجاء منو ؟ اول ماشافتها جرت حضنتها وبقت تبكي وبعت شوية التلاته اتلمو فيها حضنوها وبقوا يبكوا قالت ليهو بتبكوا ليه انا كويسه يااولادي ياحليكم معقولة انا غبت منكم للدرجه دي كلها فترة يوم مجتبى عاين ليها وقال ليها ما يوم دا اسبوع كامل ... ما اخدت كلامو على محمل الجد بقت تضحك قالت ليهم عبدالله عمل الغداء ؟ بقوا يعاينو لبغض قالوا ليها غداء ؟

الفصل الثامن عشر من هنا