رواية الخامس من أكتوبر الفصل الثالث 3 - بقلم دانيا

رواية الخامس من أكتوبر

الفصل الثالث3

بقلم دانيا

اتصلت لأبوعبيده قلت ليهو اطلع انا اتواصل واتفقت معاهو على بيت رسل لي صورو لكن قلت ليهو جاي اشوفو ... ابو عبيده قال لي هسي؟ قلت ليهو هسي مالوا؟ قال لي لا لكن قصدي كان كلامك دا من الصباح وهسي دا العصر ،، قلت ليهو ما الزول دا كان م برد على التلفون إلا هسي رجع لي وقال كان مشغول ،، يلا لازم ننجز عشان سيد البيت حقنا دا جاي بعد بكره .. قال لي تمام اطلع على الظلط .

خلصت المكالمه وقلت لأمي يلا انا مرقت ياامي وم تنسي اتكلمي مع استاذه ساميه عشان ترسل النقليه مع بتاع الترحيل ... طلعت مشينا الموقف ركبنا وشوية كدا العربيه اتحركت ،، المنطقه مننا مسافة نص ساعه م بعيده بقيت بعاين بالشباك وبتكلم مع ابو عبيده قلت ليهو نحن اول مرة نجي بالطريق دا بس لازم نتعود عليهو لأنو شكلنا ح نجي بيهو كتير ... مرينا بقريه صغيرة فاصله بين المدينه الكنا فيها والمنطقه العاوزين ننتقل ليها ،، ابو عبيده عاين برا قال لي سبحان الله شوف ناس القريه ديل حياتهم تحسها حلوة وبسيطه عاين البيوت مبنيه كيف ؟ قلت ليهو ااي والله انا زاتي في بداية الأمر كنت عاوز اشتري بيت هنا لأنو اقرب من المكان داك لكن السمسار قال لي البيوت الفي القريه دي قفلوا .

ابو عبيده عاين لي بإستغراب قال لي والله كان احسن ليكم معقولة بيت ساي فاضي مافي ؟ صاح القريه بتتشاف صغيرة بس م لدرجه تتملي خلاص وم يفضل بيت .... كانت العربيه كلها ساكته إلا انا وابو عبيده كنا بنتونس ،، سمعنا صوت من ورانا "قال لينا القريه دي اهلها م بقبلوا الغرباء" اتلفت ليهو بدهشه مستغرب من كلامو قلت ليهو معقولة ساكننها اهل ياعم؟ ابوعبيده ضحك قال لينا معقولة قريه كامله كلها اهل بس مستحيل ... طوالي الراجل عاين لأبوعبيده نظره حاده ورد ليهو قال ليهو ااي اهل .

بقيت مستغرب بفكر فيها حسيتها م منطقيه واثناء ما ابو عبيده بتكلم مع الزول العربيه وقفت ... عاينت برا السواق نزل قال يلا يا جماعه حمد لله على السلامه ،، نزلنا من العربيه كانت الساعه 4:30 م اتصلت للزول الجاييهو وصف لي وطوالي مشينا .. ابو عبيده قال لي يعني دي منطقتكم الجديدة وبقى يكشف يمين شمال ، قال لي م سيئه حلوه والله بس مسألة التأقلم وبعدها اموركم طيبه .. لمن تتخرج "يا باش مهندس عبد الله" ابني لي جنبكم عشان اجي اسكن ،، عاينت ليهو وضحكت ضحكه عفويه قلت ليهو جداً .

وصلنا طرف السوق الزول اتصل لي قال لي وين انت م شايفك ؟ قلت ليهو انا واقف جنب مكتب زين لابس قميص اسود وجنبي شاب لابس فلينه رماديه ... قال لي خلاص شايفكم شوية كدا وظهر علينا ،، سلم علينا وقال لينا تتفضلوا تشربو حاجه قبل نمش ؟ قلت ليهو تسلم ياابو الشباب الله يكرمك مستعجلين والله المره الجايه .. قال لينا تمام وقف ركشه وطلعنا ماشين في الشارع مسافة ربع ساعه من السوق حتى وصلنا .

وقف الركشه قدام البيت عاينت ليهو قلت لأبو عبيده ياهو نفس البيت الرسل لي صورو ... في الحقيقه شكله احلى من الصور ،، نزلنا مشينا على البيت الزول طلع المفتاح فتح البيت دخلنا كشفنا للبيت من جوا كان بيت سطوح عباره عن " صالون وغرفتين وتلاته حمامات ومطبخ وهول " تاني طلعنا برا مشينا فتح لينا باب الدكان شفناهو قلت ليهو طبعاً اهم حاجه الدكان بس شكله داير صيانه بسيطه .... ابو عبيده قال لي عاوز تفتح دكان هنا؟ قلت ليهو ااي لأنو في الحله مافي دكاكين كتير ومسافاتهم بعيده عشان كدا قلت افتح دكان بباقي قروش الركشه .. قال لي كويس .

مسافة نتفق مع الزول ونكمل الإجراءات العشاء قرب .. بعد خلصنا مشينا السوق عاوزين نرجع بعدا ،، الموقف كان فاضي بقينا واقفين فيهو زي خمسه دقائق مافي عربيه جات والسوق بدأ يقفل ... بقيت بعاين فيهم مستغرب قلت ليه بقفلوا بدري كدا؟ ابو عبيدة قام وقف زول جاء ماري بي جنبو قال ليهو ياابو الشباب المواصلات مالها اتأخرت؟ الزول وقف عاين ليهو بجمود وقال ليهو مافي مواصلات وطوالي قبل مشى ،، خلانا مستغربين من كلامه ومشى والناس بدت تقل .

قلت لأبو عبيدة انت زاتك زي مستغرب ول انا براي؟ قال لي استغراب شديد ...جاء بتاع ركشه ماري قمت وقفتو قلت ليهو لو سمحت طوالي وقف ،، مشينا عليهو قلت ليهو المواصلات قبل اتم كلامي قال لي العربات دي بتقيف من المغيب تاني م بتطلع مشاوير لأنو ناس القريه م بسمحو للعربات بالليل تمر بهناك ... ابو عبيده عاين لي بدهشه قال لي ياها نفس القريه القالوا م برضو بالغرباء الناس ديل متعنصرين في البلد دي كدا مالهم مافي زول بتكلم معاهم؟ بتاع الركشه سكت وتاني قال ليهو بقدر عليهم منو .

قلت ليهو طيب وصلنا انت قال لينا ماشين وين ؟ قلت ليهو المدينه ... عاين لي بخلعه وقال لي لالا م بقدر ، انا زاتي اتهجمت من ردة فعلو بقيت بعاين ليهو قلت ليهو مالك يامان م بتقدر؟ قال لي هسي م قلت ليكم ناس القريه م برضو ، قلت ليهو كيف م برضو عشانهم هم نحن نبيت في الشارع يعني ؟ ورح يا زول خايف من شنو انت؟ عاين لي بتوتر وقال لي مافي طريقه والله م بقدر بخاطر لكن في طريق بجي للقريه بفوق شديد بس لو مشيت إلا كان ابيت في المدينه لأنو بأخد معاي وقت طويل مشيه من غير الرجعه.

عاينت لأبو عبيده الكان مستغرب شديد وم عارف يقول شنو... وبعدها قلت لبتاع الركشه ورح يا زول نتوكل خلاص بالطريق القلتو دا ،، ركبنا وابو عبيدة لسه سارح م من عاداتو يسكت عاينت ليهو وقلت ليهو مالك يا زول نمت ولشنو؟ قال لي ااا م نمت لكن محتار في قوانين ناس القرى ديل م بتشبهنا نحن ناس المدينه ... شيء ناس يقفلوا الشارع الرئيسي وشيء ناس بقفلو السوق من العشاء انا شايل همك كيف تتأقلم مع بيئه زي دي؟ بتاع الركشه قاطع حديثنا وقال ليهو السوق دا م كل الأيام بقفل بدري في تلاته يوم بشتغل للصباح .

انا كلام بتاع الركشه دا فاجأني شديد عاينت لأبوعبيدة بإستغراب وعقدت حاجبي قلنا ليهو بصوت واحد " للصباح؟ قال لينا ااي ابوعبيده طوالي نط ليهو بسؤال قال ليهو لشنو؟ هنا بتاع الركشه سكت من سكاتو حسيت كأنو في بالو بقول دي اسار منطقه لا يسمح بها للغربا