رواية الخامس من أكتوبر الفصل الحادي والعشرون 21 - بقلم دانيا

رواية الخامس من أكتوبر

الفصل العشرون20

بقلم دانيا

لمن المصباح قرب من ابوعبيده بدأ يلاحظ إنو في زول ماشي عليهو بقى واقف في محلو لمن وصل وقف قدامو شاب اكبر منو لكن م كتير واطول منو حبه شايل المصباح في يدو .... قال ليهو السلام عليكم ياشاب ابوعبيده رد عليهو وعليكم السلام ،، وقبل يقول اي كلمه تاني الشاب قاطع كلامو وقال ليهو خير متجول في المنطقه زي الوقت دا ومع الطقس دا .. ابوعبيده دخل تلفونو في جيبو وبقى يعاين ليهو في عيونو وقال ليهو خير ااي بس عندي صاحبي ضايع في المكان دا بفتش فيهو ،، الزول من سمع كلام ابوعبيده ملامح وشو اتغيرت وابتسم إبتسامه خبيثه وشرد في تفكيرو عرف إنو قصدو عبدالله .

قاطع تفكيرو صوت ابوعبيده وهو بسألو انت من هنا؟ عاين لي ابوعبيده وقال ليهو ااي من هنا .... سألو تاني طيب انت دام عايش هنا م شفت ليك شاب اصفر لا طويل ولا قصير في عمر العشرين ونحيل الجسم بس م شديد اخر مره طلع فيها كان لابس فلينه زرقاء وبنطلون اسود م شفتو هنا ؟ عاين للزول لقاهو منطط عيونو سارح بعيد بنظرة جامده بعاين بعيد زي الزول المامركز ،، وفجأة ابتسم وعاين لأبوعبيده وقال "شفته ااي" من قال كلامه دا ابوعبيده حس بإنشراح في صدرو لمن فرح وابتسم .... قال ليهو بلهفه كدا اها شفتو متين ووين وبتعرف حالياً بكون وين ؟ هو من طلع الليله ليهو 15 يوم بنفتش فيهو ، الزول طوالي دار ظهرو وقال بنبره جامده لأبوعبيده " ورح اتبعني " واتحرك على إتجاه البيوت ابوعبيده م صدق طوالي مشى وراهو .

سندس رجعت بيتهم قاعده في غرفتها وسرحانه في التلفون زهجت من المحاولات والخط م قاعد يخش معاها .... براها قالت لنفسها سبحان الله انا مالي شاغله بالي شديد بالناس ديل انا اول مره اعرفهم لكن انا بتمنى يكونو بخير وما يصيبهم اي اذى انا الود دا لو م رجع لأهلو م برتاح خليني ارجع احاول تاني مسكت التلفون واتصلت في الرقم.

امي رجعتني البيت سندتني دخلت الغرفه رقدت في السرير قلت ليها ياامي انا كويس م تخافي الجرح الفي راسي دا جرح بسيط .... قالت لي ياولدي ارتاح انا ح امشي اعمل العشاء وبعمل ليك شوربه هسي نوم وارتاح البنات زاتهن نامن من غير عشاء لكن بعد اجهزو بصحيهن ،، مجتبى جاء داخل شايل صونيه بقينا نعاين ليهو قال لأمي مافي داعي تتعبي نفسك ياعمتي انا جهزت العشاء من بدري والبنات اكلو حتى نامو ... ضحكت وعاينت ليهو بإستغراب قالت ليهو انت بتعرف تطبخ؟ قال ليها يعني م كتير لكن اتعلمت كم حاجه من ابوعبيده ... جاء ختى الصونيه في التربيزه الجنب السرير وقال ح امشي اجيب ليكم مويه .

عاينت لأمي واستغربت شديد من كلامو قلت ليها قال ابوعبيده ؟ هو متين عاش مع ابوعبيده؟ عاينت لي واتوترت وطوالي قبلت غادي شالت الكرسي جابتو ختتو وقالت لي ماابوعبيده كان في غيابك جاء قعد معانا يومين ومشى .

الفصل الحادي والعشرون من هنا