رواية الخامس من أكتوبر الفصل الرابع 4 - بقلم دانيا

رواية الخامس من أكتوبر

الفصل الرابع4

بقلم دانيا

ابوعبيده سأل بتاع الركشه لشنو السوق بشتغل للصباح؟ هنا بتاع الركشه سكت وم جاوب ... من خلال سكاتو حسيت كأنو من جوه بقول دي اسرار المنطقه لا يُسمح بها للغرباء ،، وقبل يفتح خشمو بالإجابه انا كنت بعاين فيهو مركز معاهو منتظر إجابتو ... طوالي ابوعبيده مسكني من يدي وقال لي شوف يا عبد الله ،، عاينت فيهو لقيتو بعاين قدام بطريقه غريبه قمت اتلفت قدام عشان اشوف الحاصل شنو .. عاينت كان في اتنين واقفين في نص الطريق كانوا لابسين ابيض مع ظلام الليل وضوء الركشه كان الأبيض واضح من بعيد بتشاف .

استغربت شديد من وقفتهم قلت الطريق دا خلا فاضي الناس ديل جابهم هنا شنو ؟ بتاع الركشه كان ساكت بس باين عليهو م كان مرتاح ... لمن قربنا ليهم واحد رفع يدو اشر لينا لمن جينا جنبهم بتاع الركشه زاد السرعه ،، كنت مستغرب شديد في الحركه دي قبل اتكلم معاهو ابوعبيده سبقني قال ليهو ما تقيف لأعمامك ديل بتاع الركشه قال ليهو خليهم هم جايبهم هنا شنو في الوقت دا ،، قلت ليهو يازول قول بسم الله بتحصل حاجات زي دي يمكن جايين من سفر ... سكت مسافه وتاني رد قال لي انا بعرف المناطق دي اكتر منكم عشان كدا اي شيء شفتو م تركزو معاهو.

عاينت لأبوعبيده وهو عاين لي ومافي واحد فينا اتكلم سكتنا وقبلنا قدام ... تاني لمن وصلنا مافي زول اتكلم مع زول ،، بعد وصلنا الساعه كانت 9:00 م ابو عبيده قال واخيراً نزل وقال لي اشوفك بكره على خير يلا تصبحوا على خير قلت ليهو تمام بكرة ح نلم العفش من الصباح وللظهر كدا بنكون خلصنا وح نسلم المفتاح لسيد البيت .

نزلت فتحت الباب لبتاع الركشه دخلها جوا وقلت ليهو اتفضل على الصالون ... بعدها مشيت لأمي في الغرفه لقيتهم نايمين مشيت المطبخ سخنت العشاء وجبتو اتعشينا مع بتاع الركشه وقلت ليهو اها شاي ول جبنه يا ابو الشباب ؟ قال لي جبنه مشيت عملتها وبقينا نشرب ونتونس للساعه عشرة كدا قلت ليهو بعدا نوم اخد راحتك وانا زاتي ماشي انوم لأنو بكره ورانا كتير ،، الصباح قمت ماشي اصلي الصبح في الجامع لقيت بتاع الركشه صحى وكان قاعد يتوضى برا في الحوش ،، قلت ليهو صباح الخير ... صبحت عليهو وطلعنا سوى مشينا الجامع.

في الطريق كنت ساكت م اتكلمت معاهو وقبل افتح خشمي معاهو براهو قال لي تتزكر الناس الأمبارح حاولو يوقفونا في الطريق ؟ عاينت ليهو بنظرة إستغراب وقلت ليهو ااي مالهم ؟ قال لي ديل م ناس .... انا هنا حسيت قشعريرة سرت في جسمي قلت ليهو بدهشه كيف م ناس؟ سكت مسافه وقال لي المناطق البرا دي انت يمكن م بتعرفها ويمكن تكون دي اول مره تزورها صاح؟ عاينت ليهو وحركت راسي بإيجاب ،، قال لي عشان كدا نصيحه ليك ولزمانك يا ولدي م كل من يستقيث بيك تغيثه ... يمكن بعدها انت تطلب الإستقاثه وخاصةً بالليل.

عاينت ليهو وانا منطط عيوني وفي الف علامة استفهام في راسي ... قبل الحق اسألو اي سؤال لقيت نفسنا وصلنا باب الجامع دخلنا صلينا وبعد الصلاة طلعنا من الجامع هو قال لي انا دا بعدا متحرك لازم اصل هناك بدري لأنو اولادي بكونو منتظرني دايرين مصاريف المدرسه ،، قلت ليهو طيب اشرب الشاي وبعدين اطلع رجعنا البيت خلاص الونسه معاهو نستني اسألو هو قصدو شنو من كلامو القبيل ... جينا البيت هو دخل الصالون وانا مشيت المطبخ لقيت امي بتجهز في الشاي صبحت عليها قالت لي امبارح م صحيتك وقت جيت ،، قلت ليها ااي جينا الساعه تسعه كنتوا نايمين قلت ليهو معاي ضيف بتاع الركشه الوصلنا بات معانا بس هسي قال مستعجل طالع عشان يودي مصاريف عيال المدرسه .

جهزت لي الشاي شلتو مشيت وديتو ليهو قعدت معاهو عاوز اسألو اتصل لي ابوعبيدة بقيت بتكلم معاهو .... قال لي شوية وبجي عليك واول ما خلصت المكالمه بتاع الركشه قام قال طالع بعدا ،، حاسبتو وطلع مشى ..مشيت وديت العده المطبخ ومشيت غرفتي بقيت بستف في حاجاتي ... قبل اخلص جاني ابوعبيده قلت ليهو انت شيل الكراتين دي وامشي ستف حاجات الصالون ... بقينا نلم في حاجات البيت للساعه 11 قعدنا للفطور وبعد فطرنا تاني رجعنا نلملم لمن الظهر جاء لقانا خلصنا ،، مشيت مع ابوعبيده الجامع بعدها اتصلت لسيد الدفار جانا بقينا نرفع في العفش .

بعد خلصنا ابوعبيده قال لي اتفقتا مع بتاع الركشه يجيبها بس م بعرف ليه اتأخر كدا ... قلت ليهو م مشكله بكره انا ما جاي الجامعه انت اتصل ليهو قول ليهو خليها معاك لمن بكره نجي ونتفاهم ،، بعد كم دقيقه كدا طلعنا بقيت بعاين في بيتنا لآخر مرة وفي قلبي في حسرة كبيرة عليهو لكن اعمل شنو ماباليد حيله .... بقيت اعاين ليهو لمن مشينا منو وصلنا السوق لاقيت المشتري سلمتو المفاتيح شكله حس بي مقهور على البيت ،، اول ما سلمتو المفاتيح قلت ليهو مبروك عليك يازعيم .. قال لي بإبتسامه ما تشيل هم ياباش مهندس البيت اعتبرو امانه ووقت ما الأمور تتيسر عندك تعال وقول لي ياعمي انا عاوز ارجع الزكرى ح اقول ليك طوالي .

هنا يا داب قلبي حس الإطمئنان عاينت ليهو وابتسمت قلت ليهو تسلم يا راقي ... مشينا منو اتحركنا بطريق المنطقه كنا راكبين فوق انا وابوعبيده وامي والبنات قدام ،، ابو عبيده مسكني من كتفي قال لي شايف يا صاحبي الأمور بتتسهل بإذن الله وترجعوا لينا ،، قلت ليهو إن شاء الله .. طوالي غير الموضوع قال لي اها بتاع الركشه م قال ليك ليه م وقف للناس ديك ؟ عاينت ليهو قلت ليهو والله تصدق هو قال لي كلام م مفهوم وانا نسيت اسألو عن قصدو .

وصلنا سوق المنطقه بتاع الدفار وقف سألني عن شارع البيت وصفت ليهو ... بعد وصلنا نزلت فتحت الباب وبدينا ننزل في العفش من الدفار ،، امي قالت لي ياولدي البيوت الجنبنا دي م فيها ناس ولشنو؟ كنت طالع فوق في الدفار بقيت بعاين في البيوت من فوق قلت ليها لا يا امي فيها ناس ... قالت لي ترا عشان في هدوء غريب في المنطقه عشان كدا حسيتها م فيها ناس ... عندنا هناك العصر دا بكونو شفع الحي منتشرين بلعبو برا في الشارع ،، قلت ليها يمكن م متعوين على اللعب برا هنا.

بعد نزلنا العفش قلت لبتاع الدفار اتفضل جوا قال لي مارق طوالي والله عشان الحق احصل