رواية الخامس من أكتوبر الفصل الخامس 5 - بقلم دانيا

رواية الخامس من أكتوبر

الفصل الخامس5

بقلم دانيا

قال لي طالع طوالي والله عشان احصل اطلع من هنا .. عاينت ليهو بإستغراب حسيتو بعرف حاجه كبيرة عن المنطقه بس ما سألتو حاسبتو على المشوار واتحرك مشى انا دخلت فتحت الباب الجوا عشان انظف قبل ندخل العفش جاء ابوعبيده وقف جنبي قال لي ننظف اول شيء غرفه عشان امي والبنات يرتاحو وبعدين ننظف الباقي ... عاينت ليهو وابتسمت قلت ليهو اوكي ،، فتحت الباب وقفت مزهول بقيت بعاين لأبوعبيده وهو عاين لي .

قلت ليهو بسم الله ماشاء الله البيت دا امبارح لمن جينا كان نظيف كدا؟ طوالي دخل جوا قال لي والله انا زاتي مستغرب ،، تاني قال لي يامان يمكن نحن عشان جينا في وقت متأخر عشان كدا م ركزنا ... قلت ليهو يمكن وانا من جوا لسه م مصدق بس قلت يمكن كلامه صاح .

دخلنا جوا وبدينا نرتب في الحاجات المغرب اذن مشنا الجامع وجينا لقينا امي والبنات بعملوا في الغداء ... طوالي ابوعبيده قال ليها امي انتي ارتاحي شال منها الحاجات وقال ليها خشي ارتاح نحن بنشتغل ،، قالت ليهو مامشكله ياولدي انتوا ارتاحوا انا بعمل الغداء انا خلاص بقيت كويسة انتوا تعبانين شغالين من الصباح تستيف في عفش البيت ... قال ليها لا ياامي ارتاحي م تعبانين ولا شيء اشر للبنات قال ليهم سوقو ماما ودوها الغرفه ترتاح وانتوا زاتكم ارتاحوا لكن م تنومو دقيقتين الغداء بكون جاهز .

هم طلعوا وانا بقيت واقف بعاين لأبوعبيده اتلفت علي قال لي قايلني ح اشتغل براي ولشنو ... يلا ابدأ ياباش ابتسمت وقلت ليهو انت قطع البصل مسافة اركب الغاز ،، في نص ساعه تقريباً جهزنا الغداء وبعد اتغدينا شربنا الشاي وتاني بدينا نرتب في الجاحات للساعه10 م حتى خلصنا وبعدها نمنا طوالي .... بالليل سمعت صوت اقدام ماشه زي كأنو زول لابس كعب عالي قمت مستغرب قلت دا منو البمشي بالطريقه دي وفي الوقت دا ؟ قمت نورت اللمبه لقيت ابوعبيده في سابع نومه .

قمت مشيت شيكت على البيت جوا مافي اي شيء مشيت على ناس امي لقيتهم نايمين ... ولسه كان الصوت ظاهر وقفت مسافه بحاول اركز في مصدر الصوت ،، لاحظت إنو جاي من برا الشارع قمت مشيت على الباب فتحت الباب رغم إنو الجو كان صاني ومافي هواء بس اول ما فتحت باب الشارع جاني هوا بارد حسيت بيهو عاينت يمين شمال م شايف حاجه مشيت طلعت واقف قدام الباب كان على إتجاه البيت من الناحيه الشماليه في شارع مشيت لقدام شويه شفت لي خيال لابس اسود في اسود ماشي قدام ركزت شوية لقيتها دي بت ماشه والشارع كان فاضي عاينت للساعه لقيتها 2 ص بقيت واقف في دهشه قلت معقولة بت في الوقت دا ؟.

اثناء ما انا واقف حسيت بأيد اتخت في كتفي اتلفت بخلعه لقيتو دا ابو عبيده ...قال لي مالك يامان انا قمت مشيت الحمام شايف الباب فاتح ،، قلت ليهو مافي شيء بس سمعت لي حركه وطلعت م لقيت حاجه وطوالي اتحركت دخلت جوا مشيت رقدت في سريري وانا لسه مستغرب وبتزكر في البت ...كيف بت تطلع زي الوقت دا ومعقولة من هدوء المكان لمن ينسمع صوت نعالها؟ بقيت بفكر فيها لمن نمت .

الصباح قلت لأمي نحن طالعين الجامعه ولمن اجي ح اجيب الركشه معاي ... مدرسة البنات دي خليها لبداية الإسبوع الجاي نسجلهم وم تخليهم يطلعوا وانا إن شاء الله بجي بدري من هناك ،، قالت لي ربنا يوفقك ياولدي وانتبه على نفسك قلت ليها آمين يارب ... طلعنا مشينا مع ابوعبيده السوق ومن هناك لقينا عربيه متحركه ركبنا وطوالي طلعت ،، لمن جينا بجنب القريه ديك كان في ناس كتار في الشارع ومن بينهم لمحت لي بت من بعيد ماشه وفجأة اتزكرت البت الأمبارح قلت معقول ؟ لالا مستحيل يا عبد الله كيف من هنا تجي لحد هناك دا شيء مستحيل ،، قاطع تفكيري صوت ابوعبيده وهو بقول لي بتاع الركشه رسل لي رساله قال هو الليله طالع بعيد عشان كدا جاب الركشه ختاها في البيت قلت ليهو تمام بعد المحاضرات نغشى بيتكم نسوقها .

مشينا الجامعه كان عندنا تلاته محاضرات بعد المحاضره التانيه كنا قاعدين في كفتريا الجامعه ،، جات نفس البت الأمس سلمت علينا ابوعبيده قال ليها اتفضلي طوالي قعدت انا بقيت بعاين ليهو ... عمل لي حركه محاجبو نظام مالك دنقرت منو بقيت بطبز في تلفوني ،، حاولت تفتح معاي موضوع عشان اتفاداها عملت لأمي جرس وطلعت من المكالمه امي طوالي رجعت لي قلت الحمد لله ، قلت ليهم عن إذنكم دي امي اشوفها عاوزة شنو ،، قالت لي خد راحتك طوالي قمت منهم .

بعد خلصت قلت لأبوعبيده ورح المحاضرة التالته قربت قال ليها اعذرينا قالت ليهو ولا يهمك وقام طلع ... ماشين على القاعه قال لي انت ياباش مشكلتك شنو مع البت لطيفه هي والله ... عاينت ليهو معاينة حقارة قلت ليهو انا م عندي معاها اي مشكله انا مشكلتي مع كل البنات إني حالياً م عاوز اختهم في تفكيري انت ليه م عاوز تفهم ،، وصلنا القاعه وقفلنا الموضوع على كدا .

بهناك ناس امي اثناء ماهم قاعدين صلوا العصر وقامت بتعمل في الغداء سمعت صوت الباب دق ... قالت ل دعاء امشي شوفي الباب فيهو منو قالت ليها حاضر قامت ماشه على الباب تاني وقفتها قالت ليها سوقي نداء وخشوا احضروا في التلفزيون جوا انا بفتح الباب ،، مشت فتحت لقت تلاته حريم واقفات سلمن عليها وقالت ليهن اتفضلت خشوا جوا قعدوا جابت ليهم المويه وقعدت معاهن حبه ومشت عملت ليهن الجبنه بقوا يتونسوا معاها وورنها كل واحده ساكنه وين واستفسرت منهن عن المدرسه قالن ليها المدرسه واحده وجنب السوق وم عندها ترحيل امي قالت والله دي عوجه ... جنب السوق دي بعيده للبنات خاصة إنو م عندها ترحيل .

بعد المحاضره طلعنا مع ابوعبيده مشينا بيتهم كانت الساعه عامله4:00 م امو حلفت علي ياولدي إلا تقعد الغداء جاهز قلت ليها والله ياامي خليها للمره الجايه لأنو عاوز ارجع بدي عشان المنطقه بعيده وكمان عاوز امشي السوق اشتري بضاعه للدكان ،، قالت لي خلاص بحشي ليك سندوتشات ومشت على المطبخ قلت لأبو عبيده ما تقول حاجه يامان قال لي والله ياباش المسافه بعيده عشان كدا شيلهم معاك يمكن تجوع في الطريق ،، جابتهم لي قلت ليها تسلم ايدك ياامي وطوالي سقت الركشه وطلعت من عندهم الساعه خمسه وبعد