رواية الخامس من أكتوبر الفصل السابع 7 - بقلم دانيا

رواية الخامس من أكتوبر

الفصل السادس6

بقلم دانيا

طلعت سايق بسرعه عشان احصل سريع قبل الدنيا تعتم لي في الشارع وتحصل لي حاجات انا في غنى عنها ....جيت ماري بالقريه ديك والساعه كانت خمسه ونص عاينت بإتجاهها م شايف لي زول برا كأنو قرروا يدخلوا بيوتهم قبل الظلام قلت في نفسي والله الدنيا دي فيها غرائب وعجائب كيف قريه كامله تعيش بنفس النمط م بزهجو ؟ واثناء ما انا ماشي ومركز مع القريه فجأة سمعت صوت بوري عربيه طويل عاينت قدامي بسرعه شفت بت جات قاطعه الطريق الله ستر بسبب بوري العربيه انا لمن شفتها لمن اتهجمت وسريع لفيت منها نزلت من الظلط ... بتاع العربيه قال لي ركز قدامك ياشاب ومشى م وقف.

انا لسه مخي جايط بحاول استوعب الحاصل شنو ؟ نزلت من الركشه وسبحان الله لمن عاينت للبت لقيتها نهائي م اهتمت للحصل وكملت طريقها عادي ولاا كأنها الكانت قبل شوية ح تعمل حادث وتروح فيها ديك .... قطعت الظلط بإتجاه القريه حتى من دون ما تتلفت وكملت طريقها ،، بقيت واقف مستغرب فيها ومصدوم عديل قلت سبحان الله دي مالها ولا حتى ادتني فرصه اعتذر ليها عن الحصل ،، هي مشت مسافه قربت تصل القريه وانا لسه واقف بعاين فيها لمن قربت تتلاشي بسبب إنو خلاص الشمس غابت .

قلت هوي يا عبدالله امشي اكسب زمنك ركبت في الركشه ودورت وسريع وصلت السوق ... اتصلت لي امي قلت ليها ااي انا وصلت حالياً في السوق عندي بضاعه بشيلها وبجي مشيت لدكان الإجمالي الإتفقت معاهو طلعت البضاعه برا وتاني مشيت لكم دكان في السوق لميت الحاجات وجبت بتاع بوكسي من الظلط رفعت معاهو الحاجات وسقت الركشه قدامو ومشينا ،، بعد وصلت البيت فتحت باب الدكان دخلت الحاجات جوا وبعداك دخلت البيت سلمت على امي وختت لي العشاء اتعشيت وصليت المغرب شوية والعشاء اذن صليتو وطوالي طلعت برا مشيت رتبت البضاعه في الدكان .

مسافة ارتبهم كان في ناس بجو بشتروا كنت متكيف من فكرة الدكان حسيتها ظبطت ... وبعد الساعه جات 11 قفلت الدكان ودخلت البيت عاوز انوم اتزكرت إني نسيت تلفوني جوا الدكان طلعت اجيبو لمحت نفس البت الشفتها امبارح بالليل ماشه ونفس صوت خطوات رجلينها وقفت مستغرب لأنو اتزكرت إنو دي نفس البت الشفتها في طريق القريه برضو ،، وقفت قدام باب الدكان محتار قلت ياربي البت دي م عندها ولي يسأل عنها حايمه بالليل دا كدا ؟ وكمان انا م فهمت من وين هي لأنو مره هنا ومره في القريه ،، بس انا من جيت بنات المنطقه دي بالنهار م قاعد اشوفهم طالعات لمن بالليل م اظن تكون من هنا.

اثناء ما انا بفكر بيني وبين نفسي لقيتها اختفت خلاص من قدامي ... في فضول في راسي قال لي امشي وراها شوف الحاصل شنو وبتمشي وين هي وبتعمل في شنو ؟ وقصتها شنو ؟ بس سمعت صوت امي بتنادي "يا عبدالله" طوالي رجعت خشيت البيت وقفلت الباب لقيت امي في الحوش قالت لي مالك صاحي للزمن دا ياولدي ياداب قفلت؟ قلت ليها لا نسيت تلفوني في الدكان عاوز اجيبو وارجع ،، تاني قبلت على الباب ورجعت برا .. امي قالت الولد دا هي مش كان برا الحاصل عليهو شنو بقى ينسى وطوالي خشت جوا قالت ربنا يحفظك ياولدي .

مشيت فتحت الدكان شلت التلفون وقفلتو وجيت نمت في سرير برا في الحوس قلت عشان احرس الركشه والدكان سوى ... رقدت في السرير وبقيت افكر في موضوع البت دا لمن نمت ،، الصباح بعد شربت الشاي طلعت بالركشه عاوز اودي البنات المدرسه قلت لأمي م مشكله انا بوديهم بالركشه يومي لمن القى لي زول اسلمو الركشه وتاني ح يوديهم ويحيبهم ... قالت لي تمام .

مشيت المدرسه كانت مليانه طلبه ماشاء الله لأنها المدرسه الوحيدة في المنطقه مافي غيرها .... سجلتهم وانتظرتهم لمن دخلو الفصول بعداك طلعت اديت رقمي للمديرة قلت ليها نهاية اليوم اتصلي لي اجي اسوقهم ،، مشيت كنت عاوز ارجع البيت جاني مشوار للسوق اتصلت لي امي قالت لي جوا زبائن عاوزين يشتروا من الدكان وصفت ليها محل المفاتيح والدفتر حق الأسعار قلت ليها انا في السوق يمكن اشتغل للظهر واجيب البنات معاي لمن اجي راجع ،، بقيت شغال في السوق واخدت لي كم مشوار للحله وتاني جيت راجع لمن الظهر اذن قبل المديره تتصل لي مشيت المدرسه لقيتهم طلعوا قالت لي هسي كنت عاوزة اتصل ليك قلت ليها يكتر خيرك .

سقت البنات وطلعت سألتهم قلت ليهم اها يومكم الأول كيف كان؟ دعاء قالت لي حلو شديد اتعرفت على بنات كتار ... ضحكت وقلت ليها كويس والله ماشاء الله عليكي شاطرة بتتأقلمي ،، عاينت ل نداء بالمرايا وقلت ليها اها وانتي ؟ قالت لي يعني حلو شويه اتعرفت على بت حكت لي إنو ساحرة المنطقه بتجي بالليل ولو لقت باب فاتح بتخش بتخطف الشفع عشان كدا هم م قاعدين يطلعوا يلعبوا في الشارع عشان م تشوفهم بالنهار وتجي تخطفهم بالليل ... قالت الكلام دا وكان باين عليها خايفه ومتوترة من الحاجه دي .

انا بقيت مستغرب من كلامها إتزكرت لمن جينا اول يوم ولحد الآن مافي شفع بلعبوا نهائي في الشارع رغم إنو المنطقه مليانه شفع ... تاني اتزكرت البت المن جينا بشوفها بالليل لهسي بشوفها ربطت بين الأحداث وياداب علامات الإستفهام زادت في راسي ... عاينت لنداء وقلت ليها لالا مافي كلام زي دا يمكن البت دي عاوزة تخوفك بس لكن م تشتغلي بكلامها م صاح.

وصلنا البيت دخلت صليت الظهر وخليت الركشه في الحوش وطلعت فتحت الدكان ... بعد شوية جاتني دعاء جابت لي الجبنه ورجعت قلت ليها عندي شيتات في الغرفه جيبيهم لي مشت جابتهم قعدت اقرأ ولو جاني زول بمشيهو "ببيع ليهو" قاعد كدا جاتني امي قالت لي اتصل خالك قال مرتو اتوفت قلت ليها لاحوله ولا قوة إلا باالله اليوم تم ربنا يرحمها .

قفلت الدكان سريع وركبنا في الركشه مشينا المدينه بيت خالي عزبنا خالي وقعدنا هناك تلاته يوم وبعدين رجعنا ... لمن قمنا راجعين خالي قال لينا انا م بقدر اخلي مجتبى ولدي دا هنا براهو يمكن تجيهو نفسيات بسبب موت امو ،، وانا بمشي الشغل وبجي هو بكون قاعد براهو عشان كدا سوقوه معاكم ،، قلت ليهو جداً لمينا ليهو حاجاته وسقناهو معانا ... مجتبى وحيد امو وابو عمرو 12 سنه جبناهو معانا البيت قلت لأمي كويس إنو جبناهو